\id PHP
\h Piriputari
\toc1 Piriputari
\mt PIRIPUTARI
\mt2 Que Mütivarunüꞌairi Papuru
\c 1
\s Vaürisica
\p
\v 1 Papuru Timuteumatü tecanixevaüritüaca,
teꞌuximayatamete tehümetütü Cürisitu Quesusisie mieme.
Yunaitü Cacaüyarisie mieme xemupasie Cürisitu Quesusisie
xeteviyatü Piripusie xemütama teꞌüviyamete
teparevivamete, yunaime tecanixevaüritüaca.
\v 2 Cacaüyari mütaꞌuquiyari, Tiꞌaitame Quesusi
Cürisitumatü xüca ꞌaixüa meteꞌuꞌiyarini xehesie mieme,
xüca mexepitüaca yuꞌiyarisie xemücaꞌuximatüariecacü.
\s Papuru que mütiyuneneviecai yuri memüteꞌerie vahesie
mieme
\p
\v 3 Pamüpariyusi necanipitüaca necacaüyari quepaucua
nemüxehaꞌerivani.
\v 4 Quepaucua nemivavirie yunaime xehesie mieme,
nenetemavietü necaninenenevieca neheyemecü.
\v 5 Pamüpariyusi necanipitüaca xeme tame temütaxevicü
hicü tanaitü niuqui ꞌaixüa manuyüne tecuxatatü
yaxeicüa matüaripaü.
\v 6 ꞌIpaü yuri netiniꞌerieca, que müꞌane misutüa
xecuyuitüvatü ꞌaixüa xemüteyuriecacü, mücütütü
catinayeꞌatüamücü tita mütiyuriene tucari ꞌayeꞌayu
quepaucua Cürisitu Quesusi munuani.
\v 7 Caniheiserietüni ꞌipaü nemütinemaicacü yunaime
xehepaüsita, nemüxenaquiꞌeriecü ꞌaixüa ꞌiyaricü. Xeme
neta tanaitü tepütaxevi tetemaitü ꞌaixüa que
mütiucaꞌiyari Cacaüyari, neꞌanutahüiyacacu niuqui ꞌaixüa
manuyünesie mieme neꞌutaniucacacu neꞌihecüatüatü niuqui
que mütiheiserie.
\v 8 Cacaüyari catinihecüatani que nemütixexeiyamücü
yunaime, Cürisitu Quesusipaü netinemaitü.
\v 9 ꞌIpaü necatininenenevieca, xeme masi yemecü
xeteyucanaquiꞌerietü xemacünecü heiseriemecü
xetemaivavetü, nai xetemaitü que müreuyevese
yaxemüteyuriecacü,
\v 10 xemüyüvavenicü xemipatacü tita ꞌaixüa mütiꞌane
tita ꞌaxa mütiꞌane que xemüteꞌimate. Müpaü xeteyurieyu,
tucari ꞌayeꞌayu quepaucua Cürisitu munuani
canimasiücücamücü que xemücateseviximarieca, xehesie
que mücarahüivani.
\v 11 ꞌAna heiserie xecanipitüariecacuni, que
mütiyupitüva Quesusi Cürisitu. ꞌAna mücücü visi
ꞌanetü canayeitüariemücü Cacaüyari, ꞌaixüa
catinicuxaxasivamücü hepaüsitana.
\s Xüca neꞌayeyurini Cürisitu ꞌaixüa
canicuxaxasivamücü, que mutayü
\p
\v 12 Neꞌivama nepütixetaxatüaniqueyu que nemüranayetüa
hepaüsita, müpaü xemütemaicacü, ꞌaixüa puyü masi
vaüca müꞌenierienicü niuqui ꞌaixüa manuyüne.
\v 13 Yunaitü cuviyexunu quita miemete hipatüta yunaitü
müpaü mepütehetima quename Cürisitusüa nemiemetütü
neꞌanutahüiya.
\v 14 ꞌIvamarixi ꞌesivatücacu yunaitü menesihaꞌerivatü
que nemüranutahüiya, Tiꞌaitamesie meteviyatü
mecaniyuvaüriyani masi vaüca Cacaüyari niuquieya
memücuxatanicü mecaheumamatü meyutatuatü.
\p
\v 15 Hipatü siepüre ꞌasita meꞌütesatü meyucuicutü
mepütecuxata Cürisitu hepaüsita, hipatü püta ꞌaixüa
meteꞌuꞌiyaritü mepütecuxata.
\v 16 Müme menesinaquiꞌerietü mepütecuxata müpaü
metemaitü, ne niuqui ꞌaixüa manuyünesie mieme
nemutaniucacü, ꞌayumieme nepüyüane.
\v 17 Hipatü püta mepütehecüata Cürisitu hepaüsita
mevaraꞌivacutü hipame, vaꞌiyari cayuxevicacu. Que
memüteyurie, müpaü mepütecuꞌeriva, masi vaüca
nepüꞌuximatüarieca neꞌanutahüiyatü.
\v 18 Sepanetü que memüteyurie, Cürisitu
canicuxaxasivani. Ne ꞌayumieme nepünetemavie, sepa
memütecuxata yacü xeicüa meyüatü, sepa yuricü
meyuvaüriyatü memüyüa.
\p Mücü meta, nepücatihayevani nenetemavietü.
\v 19 Müpaü nepütimate, ꞌicü naitü ꞌaixüa püyüni
nemütavicueisitüarienicü xeyuneneviecacu xeme, Quesusi
Cürisitu ꞌiyarieya nesituicacacu.
\v 20 ꞌIpaü yemecü yuri nepütiꞌerie netaꞌicuevatü,
ꞌuxaꞌatüni varie nepücateviyasitüarieni. Masi Cürisitu
que mütiveꞌeme canimasiücücamücü yaxeicüa meripaipaü.
Menesixeiyatü nevaiyarisie que nemütiuyeica nenetatuatü,
teüteri müpaü mecatenimaicacuni sepa nemayeyurini sepa
nemumü.
\v 21 Sepa nemayeyuri, Cürisitu ꞌaixüa
canicuxaxasivamücü. Sepa nemumü, masi ꞌaixüa
caniyümücü.
\v 22 Nevaiyarisie neꞌuyeicacacu xüca tixaütü
tiutixuavere netiꞌuximayacacu, quesü yüni.
ꞌAsinepücatimate que müꞌane masi ꞌaixüa müyüniqueyu.
\v 23 ꞌEsimacuyeva nepüyüane. Nepünevaüriya
nemüyemiecü Cürisitumatü mana nemeyeicanicü. Müpaü
masi ꞌaixüa püꞌaneniqueyu.
\v 24 Perusü xehesie mieme caneuyeveca masi
nemünehayevacü ꞌena nevaiyarisie netiviyatü.
\v 25 Hicürixüa nepüretima que nemütiyurieni, müpaü
necatinimaica nemünehayevanicü. Yunaime xehesüa
necaninehayevamücü nexeparevietü masi vaüca
xemüyüvavenicü, xemüyutemamaviecacü yuri xeteꞌerietü.
\v 26 Müpaü xüca netiyurieneni, Cürisitu Quesusisie
xeteviyatü yemecü xepüyüvaveni ꞌaixüa ꞌane
xemütemaicacü xenesihaꞌerivatü, quepaucua xehesüa
nemunuani tavari.
\p
\v 27 ꞌIpaü xeicüa xequeteneyurieca, que müreuyevese
yamütiyurienenicü heixeiyatü niuqui Cürisitu hepaüsita
ꞌaixüa manuyüne, müpaü xequeteneuꞌuvani cuiepa. Xüca
müpaü xeteyurieca, sepa xehesüa nemeyeicani nexexeiyatü,
sepa tevapai nemeyeica xehepaüsita neꞌenatü xeicüa,
müpaü necatinimaicamücü xemüseseüyenicü ꞌiyari
xehexeiyatü müyuxevi, yaxeicüa xetecuꞌerivatü yunaitü
xemüyucuitüvecü capa xeꞌunavaiyarienicü titasie yuri
xemüteꞌerie niuqui ꞌaixüa manuyüne que maine,
\v 28 xepücaꞌutiyüyüacani quepaucua müme
memüxeꞌayeꞌunie memüxemariutani. Müpaü xeteyurietü
ꞌinüari xenacünicuni vahepaüsita, que
memüteheuyexüriyani. Xemeta yuhesie mieme ꞌinüari
xepacüne que xemütetavicueisitüarieni Cacaüyari
xetavicueisitüayu.
\v 29 Cürisitusüa xemümiemetecü xepupitüarie yuri
xemüteꞌeriecacü hesiena, masisü cuxi xepupitüarie
xemütecuinitüarieni hesiena mieme.
\v 30 Yaxeicüa nehepaü xequeteneyucuitüveni hicü, que
xemünetexeiyacai yanetinemieneme, hicüta que xemüteꞌenana
quename yanetinemiene.
\c 2
\s Cürisitu tixaütü catihücütütü que müratüa, ꞌarique veꞌeme que müratüa
\p
\v 1 Caniyuritüni, Cürisitusie teteviyatü tecanituicarieca tecaninütüarieca que temütetacanaquiꞌerie, ꞌIyarimatü tecanitaxevini tanaitü, tetenitacanenimayaca que temüteꞌuꞌiyari.
\v 2 ꞌAyumieme nepaine, xüca müpaü ꞌaneni, xequenenayeꞌatüa xenesitemavieriyatü. Yaxeicüa xequeteneyumaica, yaxeicüa xequeteneyucanaquiꞌerieca, yuhepaü xequetenecuꞌerivani, xequeneyuvaüriyani yuꞌiyarisie xemüyuxevinicü.
\v 3 Hipame xevaraꞌivacutü xepücayüaca, teüteri xehepaüsita ꞌaixüa memutiyuanenicü xeicüa xepücayüaca. Vavemete masi xequenivaꞌerieca hipame, xeme püta tixaütü xecatehümetüme xequeneyuꞌerieca yücümana.
\v 4 Yuxexuitü xeme xepücatecuvautüveni tita xehesie mütimieme xeicüa. Tita hipame vahesie mütimieme püta xequetenecuvautüveni.
\p
\v 5 ꞌIpaü xequeteneyumaica yuꞌivama xevaraꞌerivatü que mütiyumate Cürisitu Quesusisie tiviyatü.
\q
\v 6 Cacaüyari que müꞌane,
\q Mücü yaxeicüa püꞌanecai.
\q Peru müpaü pücaticuꞌerivacai
\q Quename ꞌaixüa yüniqueyu
\q Xüca Cacaüyaripaü veꞌeme
\q ꞌAyuyeitüanique,
\q Sepa müyüvecai.
\q
\v 7 Catiniuhayeva
\q Heiserie hexeiyatü
\q Que müꞌane vaüriyarica
\q Mütiꞌuximayapaü ꞌanetü
\q Nayuyeitüani.
\q Teüteri vahepaü ꞌanetü
\q Nayani.
\q
\v 8 Mericüsü
\q Xeiyarietü
\q Tevipaü ꞌanetü
\q Tixaütü catihücütütü
\q Canayuyeitüani.
\q Yacatinicamiecaitüni
\q Sepa mumü,
\q Curuxisie caniumierieni.
\q
\v 9 ꞌAyumieme Cacaüyari
\q Veꞌeme caneyeitüani.
\q Canipitüani
\q Visi mütimarivanicü
\q Que müꞌane mühücü
\q Hipatü que memücatemarivapaü.
\q
\v 10 ꞌUxaꞌatüni varie
\q Quepaucua Quesusi
\q Mütahüavarieni
\q Que müꞌane mühücü,
\q Müpaü que mütimariva
\q ꞌAna yunaitü
\q Mecanicatunumaꞌuicuni
\q Nenevieri mecanipitüacuni
\q Taheima memütama
\q Cuiepa memütama
\q Cuietüa memütama,
\q
\v 11 Yunaitü
\q Mecaniyutahecüatacuni,
\q Que memüteheitima
\q Quesusi Cürisitu
\q Quename Tiꞌaitame hücü,
\q Meꞌutiyuatü.
\q ꞌAna ꞌaixüa canicuxaxasivamücü
\q Cacaüyari mütaꞌuquiyari.
\s Cuiepa memütama que temütevahecüatüa
\p
\v 12 Xemeta nenaquiꞌerima, müpaü nepütixetahüave, yuheyemecü yaxetenicahucaitüni xehesüa neheyeicacacu. Hicü tevapai neheyeicacacu masi vaüca peuyevese yaxemütecahunicü Cürisitupaü. Yaxequeteneyurieca que müreuyevese yaxemüteyuriecacü mexi xetavicueisitüariexime, peru xeheumamatü xeꞌutiyüyüacatü.
\v 13 Cacaüyari canihücütüni que müꞌane yamütiyuriene xesata, xecuyuitüvatü xemüyuvaüriyanicü, ꞌarique meta yaxemüteyuriecacü. Que mütixecuyuitüva yacatiniyümücü que mütinaque.
\p
\v 14 Müpaü nai yaxequetenecahuni, xecaniuquixietü niuqui xecaxüatüatü.
\v 15 Müpaü xeteyuriecacu, xehesie pücarahüivani, xepücaꞌinüca tita ꞌaxa mütiꞌane. Masi Cacaüyari nivemama xecanacünicuni, xepücaseviximarieca teüteri vasata xeꞌuꞌuvatü vaꞌiyari mütutuni memeuyexüri. Vasata xeꞌuꞌuvatü xecanivahecüariviyani, xuravesixi que memütehecüarivie cuiepa.
\v 16 Niuqui xecanexeiyani varanutanieritüvame. ꞌAyumieme ꞌaixüa ꞌane netinimaicamücü nexehaꞌerivatü quepaucua tucari mayeꞌani, quepaucua Cürisitu munuani. Xehesie catinimasiücücamücü ꞌana, xüanacüa que nemücatiunanausa xüanacüa que nemücatiꞌuximaya.
\v 17 Xeme yuri que xemüteꞌerie, Cacaüyari xecanayexeiya yaxeicüa que müꞌane mavari müvevi meixeiyapaü yucacaüyari. Hesiena mieme xeteniꞌuximayaca. Xüca neꞌumierieni müpaü yuri xemüteꞌeriecacü, nexuriyacü xüca xemavari ꞌuxurimarieni, mücücü necaninaquiꞌacamücü. Xeme yunaitü que xemüteyutemamavie, ne xehepaü necaninetemavieca.
\v 18 Mericüte xemerita yaxeicüa xequeneyutemamavieca, ꞌaxeicüa temütatemamaviecacü.
\s Timuteu ꞌEpapüruritu que memüteyurieniquecai
\p
\v 19 Tiꞌaitame Quesusisie netiviyatü ꞌipaü nepüticuꞌeriva, yareutevitü xehesüa nepenunüꞌani Timuteu, neꞌiyarisie nemütürücariyarienicü neretimaime xehepaüsita.
\v 20 Xeime nepücahexeiya hepaüna tiucaꞌiyarime, mücü xeicüa ꞌaixüa ꞌiyaricü caniyuꞌiyaritüacamücü xehesie mieme.
\v 21 Hipatü yunaitü tita vahesie mütimieme xeicüa metenicuvautüveni, tita Cürisitu Quesusisie mütimieme mepücatecuvautüve.
\v 22 Xeme xepimate ꞌiya, que mütiꞌinüasie que mütimasiücü, xepütemate nehamatü que mütiꞌuximaya niuqui ꞌaixüa manuyüne tetecuxatacacu, ranive yuquemasimatü mütiꞌuximayapaü.
\v 23 ꞌAyumieme ꞌipaü nepüticuꞌeriva, nepenunüꞌani cuitü neretimaime que mütiyüni nehepaüsita.
\v 24 Tiꞌaitamesie netiviyatü yuri nepütiꞌerie cuitüva nemüyemiecü neta.
\p
\v 25 Müpaüta netinicuꞌerivani, peuyevese taꞌiva nemanunüꞌanicü xehesüa ꞌEpapüruritu. Mücü nehamatü catiniꞌuximayaca, tahamatü tecanicuyaxitüni. Xeme xecaneiyenüꞌani nehesüa münesipareviecacü que müreuyevecai.
\v 26 Yunaime nixexeiyamücüni, niyuhiveriecaitüni xemuꞌenanacü que müticuyecai.
\v 27 Tasüari catinicuyecaitüni, ꞌesivatücacu caniumüni. Masi Cacaüyari nitinenimayata, ꞌaxeicüa nesinenimayatü neta, capa nenetihiverieme tavari nenetihiveriecacü.
\v 28 ꞌAyumieme necaninevaüriyani nemenunüꞌanicü xemüyutemamaviecacü xeme tavari xeꞌixeiyatü, neta necanehiverietü nemayanicü.
\v 29 Hicüri xequeneutanaquiꞌerie Tiꞌaitamesie xemüteviyacü, vaüca xequeneyutemamavieca xeheꞌerivatü. Müya memüꞌanene vavemete xequenivaꞌerieca.
\v 30 Cürisitusie mieme tiꞌuximayatü caniumüni tüma. Yücümana caniyucuerivayuriecaitüni meyeꞌatüanicü que müreuyevecai xemünesiparevieniquecaicü.
\c 3
\s Heiserie nepexeiya que mütivaiyacü
\p
\v 1 Mücü meta neꞌivama, xequeneyutemamavieca Tiꞌaitamesie
xeteviyatü. Tavari ꞌipaü netixeꞌutüirietü,
nepünevaüriya, niuquicü nepücaꞌuxive. ꞌAixüa
caniyümücü masi xehesie mieme xecuerivaꞌanenecacu.
\v 2 Xequeneyucuerivayurieca müme nemüvaxatacai ꞌaxa
memüteyurie vahepaüsita, müme süicüri vahepaü
memücaꞌitiyatüca, müme vahepaüsita.
Xequeneyucuerivayurieca que memütexeꞌinüaritüacu
vitequiyacü.
\v 3 Tame püta Cacaüyari ꞌinüarieya tepexeiya, tame püta
tepühüme Cacaüyari temayexeiya ꞌIyari que maine. Tame
taheyemecü tecaninaquiꞌaca Cürisitu Quesusisie
temüteviyacü. Mücü meta, yuri tepücateꞌerie herie
miemesie.
\v 4 Müme que memüꞌanene herie miemesie yuri memüteꞌerie,
neta müpaü necaniꞌaneni. Xüca xevitü müpaü
ticuꞌerivani quename yüve herie miemesie yuri
mütiꞌeriecacü, ne masi necaniyüveniqueyu.
\v 5 Neꞌutinuivaca ꞌatahairieca tucarisie necaniuꞌinüasieni
Huriyusixi vaxitequiyacü. ꞌIxaheri teüteriyari vahesie
Venicamini nuivariyarisie necaniyeyani. Hepürayu teviyari
necanihücütüni Hepürayusixi vahesie nemüyetüa.
ꞌInüari niuquiyarisie que nemütiviyacai, Pareseu
necanihücütücaitüni.
\v 6 Que nemütinevaüriyacai yaneticamietü,
necanivataveveiyacaitüni memüyutixexeürivacai. Heiserie
que nemürexeiyacai ꞌinüari niuquiyarisie yaneticamietü,
nehesie pücarahüivacai yemecü.
\v 7 Perusü Cürisitusie nemütiviyacü müpaü
nepütinemate, mücü nai netiniutatümaiya, naime cümana
ꞌaixüa nemüꞌitüarieniquecai.
\v 8 Mücü meta, sepa que mütitita, naitü
tiniutatümaiyarieni que nemütixeiya, müpaü
nemütinematecü, masi yemecü ꞌaixüa necaniꞌitüariemücü
neꞌimaitü netiꞌaitüvame Cürisitu Quesusi. Mücüsie
nemümiemecü ꞌari naime netiniutatümaiya. Sepanetü,
mücü naitü xasi xeicüa canihücütüni que nemütixeiya.
Necaninevaüriyani masi Cürisitu nehexeiyatü nemayanicü,
\v 9 hesiena netiviyatü yanepütixeiyariecaqueyu xeicüa.
Necümana heiserie nepücahexeiya, ꞌinüari niuquiyarisie
yaneticamietü heiserie nepücanepitüa necümana. Masi
heiserie que nemürexeiya, Cürisitusie yuri nemütiꞌeriecü
püta heiserie necanexeiyani, Cacaüyari heiserie que
münetipitüa yuri nemütiꞌeriecü.
\v 10 ꞌIpaü xeicüa nepütinevaüriya, nemimaicacü
Cürisitu, nehesie nemimaicacü türücariyaya cümana
müranucuquetüarie, ne hamatüana temütaxevinicü que
mütiucuinixü netimaitü, hepaüna neꞌanetü nemayanicü
mücü que ꞌanetü matüa ꞌumierieca.
\v 11 Necanayeꞌaniqueyu xeicüa nemanucuquetüarienicü
müquite vasata.
\s Que mütiunanausacai, heꞌivanique
\p
\v 12 ꞌAcuxi müpaü nepücaꞌane, ꞌacuxi nepücaꞌayeꞌave.
Cürisitu Quesusi pünesiꞌuꞌaxixü, neta nemiꞌaxenicü tita
münetimini. ꞌAyumieme nepünemexüitüa,
yanemürayeꞌanicü.
\v 13 Neꞌivama, neꞌayeꞌame nepücaneꞌerie cuxi. Peru
siqueresü ꞌipaü netiniyurieneni, nenetümaiya nesutüa
mieme, necaninetatuani masi hicü nemiꞌaxenicü neyeta
mieme.
\v 14 Yanetiunanausatü nepünemexüitüa nemeꞌivacü,
Cacaüyari que münetiutaꞌini taheima miemecü
nemüꞌayumiemetünicü Cürisitu Quesusisie netiviyatü.
\p
\v 15 Quetapaümetü temüseseüye ꞌipaü tequetecuꞌerivani.
Xüca yücü xetecuꞌerivani, Cacaüyari
yacatinixehecüatüamücü.
\v 16 Que temüteꞌayeꞌaxüavave, müpaü yatequetecahuni.
\p
\v 17 Neꞌivama ꞌaxeicüa xequeneneꞌüqueni ne que
nemütiyuriene. Tame ꞌinüari tecanihümetüni. Müme
tahepaü memüteꞌuꞌuva, müme xequenivaxeiyani.
\v 18 Yumüiretü que memüteꞌuꞌuva, mecaneyeꞌunieca
Cürisitu que mütiumierie curuxisie. Vahepaüsita müixa
netinixecuxaxatüvacaitüni, hicüta yaxeicüa nepaine
neꞌutasuatü.
\v 19 Müme que memüteꞌayeꞌaxüani, menicaꞌunariecuni
xeicüa. Yuhuca mecanayexeiyani yucacaüyaripaü. Visi
meꞌaneneme mecaniyuxatani quepaucua müpaü memüyüa que
temüteteviyasitüarie. Cuiepa timiemecü xeicüa
mecatenaꞌerivani.
\v 20 Tame püta muyuavisie tecaniquiecataritüni. ꞌAyumieme
tecanicuevieca tasivicueisitüvame Tiꞌaitame Quesusi
Cürisitu ꞌumamiecü.
\v 21 ꞌIya yücü ꞌaneneme caneyeitüamücü tavaiyari.
Hicü tixaü tecatehümetütü ꞌicü tavaiyarisie
tecaniuꞌuvani. Peru ꞌana yuvaiyaripaü ꞌaneneme
caneyeitüamücü, visi ꞌanetü que mütiuyeica mücü.
Müpaü tiniyuriemücü yütürücariyacü. Müpaü
titürücaüyetü caniyüveni naime yaticamieme
mayeitüanicü, mücü que mütiꞌaita.
\c 4
\s Yuheyemecü xequeneyutemamavieca Tiꞌaitamesie
xeteviyatü, que mutayü
\p
\v 1 ꞌAyumieme nepaine, Tiꞌaitamesie xeteviyatü
xecacuyuitüarivatü xequeneutiꞌuti, nenaquiꞌerima. Müpaü
nepütixecühüave nexexeiyamütü neꞌivama
nemüxenaquiꞌerie. Xeme xecanihümetüni
xemünesitemavieritüa, xehesie catinimasiücüni que
nemüreuyehüviyarie. Yaxeicüa veꞌeme muma que
mütiuhanitüariva, neta necanixehexeiyani xeme
neꞌinüaritüme.
\p
\v 2 Neuxei ꞌEuhuriya, neuxei Sinitique, vaüriyarica
necanixepitüaniqueyu yaxeicüa xemüteyumaicacü
xecaꞌütesatü Tiꞌaitamesie xeteviyatü.
\v 3 ꞌEcü meta nehamatü yuricü pemicuhanane hararu,
nepümasitavavirieniqueyu ꞌecü pemüvapareviecacü mücü
ꞌucari. Nehamatü ꞌaxeicüa tepütacuitüvecai niuqui
ꞌaixüa manuyüne tecuxatatü, Cüremenitimatü hipameta
vahamatü nehepaü teꞌuximayatamete. Müme mepacayasarie
quename tucari mehexeiya.
\p
\v 4 Mericüte, yuheyemecü xequeneyutemamavieca
Tiꞌaitamesie xeteviyatü. Tavari nepaine,
xequeneyutemamavieca.
\v 5 Yunaitü teüteri mequexexeiyani xecaꞌayuꞌeririyacacu.
Tiꞌaitame hura caniuyeicani.
\p
\v 6 Xepücayuꞌiyaritüaca tixaütü hepaüsita. Masi
naimecü xeyunenevietü xeꞌivavirietü pamüpariyusi
xeꞌipitüatü, yaxequeteneutahüavi Cacaüyari tita
xemüteꞌivavirie.
\v 7 ꞌAna Cacaüyaritütü nixepitüacamücü yuꞌiyarisie
xemücaꞌuximatüariecacü. Müpaü tixepitüatü
caniꞌüviyacamücü xeꞌiyari, sepa xeme ꞌasixemücatemate
que mütiyüveni miꞌüviyanicü. Que xemüteyücühüavesie
canixeꞌüviyacamücü Cürisitu Quesusisie xeteviyacacu.
\s ꞌIcü hepaüsita xequeteneyücühüaveni, que mutayü
\p
\v 8 Mücü meta, neꞌivama, naitü yuri müraine, naitü
müreuyehüviyarie, naitü mütiheiserie, naitü
mütiꞌitiya, naitü visi müꞌane, naitü ꞌaixüa maine, sepa
que mütitita xüca ꞌaixüa ꞌaneni xüca ꞌaixüa
ticuxaxasivani, mücü hepaüsita yaxequeteneyücühüaveni
xeme.
\p
\v 9 Que xemüteꞌuꞌüquitüarie, que xemüteyetuiriyarie,
que xemüneteꞌuꞌeni, que xemüneteꞌuxei yanetiyurienecacu,
müpaü yaxequeteneyurieca. ꞌAna que müꞌane müxepitüa
yuꞌiyarisie xemücaꞌuximatüariecacü, mücü
Cacaüyaritütü xehamatü caniuyeicamücü.
\s Piriputari que memüteꞌimicuacai
\p
\v 10 Tiꞌaitamesie netiviyatü yemecü nepünetemavie tavari
xemisutüacü xenesihaꞌerivatü. Süricü
xepünesihaꞌerivacai, masi pumavecai xevitü xeme
müyüvecai tixaütü mütiyurienicü.
\v 11 Ne nereuyehüatü nepücahaine. Nepüꞌiyamate neꞌiyari
ꞌaixüa müyünicü necümana, sepanetü que nemüranayemie.
\v 12 Nepüꞌiyamate tixaü necatihücütütü, vaüca
nerexeiyatüta nepüꞌiyamate. Naimecü yanepüretima
nemütahuxanicü nemühacamünicü vaüca nemürexeiyanicü
tixaütü nemücarexeiyanicü nepüꞌiyamate.
\v 13 Naime necaniquemaca Cürisitusie netiviyatü, ꞌiya
nesitürücariyacacu.
\v 14 Siepüre ꞌaixüa xepüteꞌuyuri nehamatü
xeyuxeviriyatü que nemütiꞌuximatüariecai.
\p
\v 15 Xeme Piriputari müpaü xepütemate que mütiuyü
quepaucua niuqui ꞌaixüa manuyüne musutüarie
cuxaxasivatü, Maseruniya quepaucua nemeyetüa. ꞌAna
memüyutixexeürivacai mepücanesipareviecai.
Mepücanetemicuacai neheixeiyatü nemayanicü, xeme xeicüa
xepünetemicuacai.
\v 16 Tesarunicapai neheyeicacacu tita nemüreuyehüacai
xepüneteꞌutanüꞌairi heiva hutarieca.
\v 17 Neticuvaunetü tavari yaxemüneteminicü nepücahaine.
Nepüticuvaune tita mütixemaquieri püta mayanicü.
\v 18 Necanitanaquiꞌerieniri xeꞌimiquieri naime,
cananuyuhayevani. Catinayeꞌani tita nemüreuyehüacai,
ꞌEpapüruritu nesiꞌüꞌüitüacu tita xemüteheyenüꞌa. Que
xemüteꞌuyuri, mücü visi muꞌüapaü caninaquiꞌerivani,
mavari münaquiꞌeriva canihücütüni, caninaqueni
Cacaüyari.
\v 19 Mücü meta, necacaüyaritütü catinayeꞌatüamücü
tita xemüteheuyehüaca hepaüsita naime, vaüca
mürexeiyacü visi ꞌaneneme, müpaü que mütimasiücü
Cürisitu Quesusisie.
\v 20 Cacaüyari mütaꞌuquiyari ꞌaixüa queticuxaxasivani
yuheyemecü. Caniseꞌini ꞌicü niuqui.
\s Vaürisica que mütivarunüꞌairiexüa
\p
\v 21 Xequenivavaüritüaca Cacaüyari teüterimama yunaime,
Cürisitu Quesusisie temüteviyacü. Nehamatü memuꞌuva
taꞌivama menixevaüritüaca.
\v 22 ꞌEna yunaitü Cacaüyari teüterimama
mepüxevaüritüa, müme meta Sesaxisüa miemete
cuviyexunusixi.
\p
\v 23 Tiꞌaitame Quesusi Cürisitu xüca ꞌaixüa
tiucaꞌiyarini xeꞌiyarisie mieme. Müpaü xeicüa caniꞌaneni.