\id COL
\h Curusetari
\toc1 Curusetari
\mt CURUSETARI
\mt2 Que Mütivarunüꞌairi Papuru
\c 1
\s Vaürisica
\p
\v 1 Ne Papuru, taꞌiva Timuteumatü, tecanixevaüritüaca.
Nüꞌariecame necanihücütüni Cürisitu Quesusisie mieme,
müpaü mütinaquecü Cacaüyari.
\v 2 Tecanixevaüritüaca taꞌivama yuri xemüteꞌerie
Curusetari, Cacaüyari teüterimama xemühüme Cürisitusie
xeteviyatü. ꞌIpaü teputiyuane, Cacaüyari mütaꞌuquiyari
Tatiꞌaitüvame Quesusi Cürisitumatü xüca ꞌaixüa
meteꞌuꞌiyarini xehesie mieme, xüca mexepitüaca yuꞌiyarisie
xemücaꞌuximatüariecacü.
\s Que mütitavaviri Cacaüyari, müvapitüanicü
memütemaicacü ꞌIyarisie timieme
\p
\v 3 Tetanenevietü, taheyemecü xehepaüsita pamüpariyusi
tecanipitüaca Tatiꞌaitüvame Quesusi Cürisitu
ꞌuquiyarieya, Cacaüyari hücütüme.
\v 4 Teniuꞌena yuri que xemüteꞌerie Cürisitu Quesusisie,
que xemütevanaquiꞌerie Cacaüyari teüterimama yunaime.
\v 5 Müpaü xeteniyurieca ꞌamuvecü tita xehesie mieme
mütiꞌüviyarie taheima, yaxeteꞌicuevietü. Xeme meripai
xeniuꞌenanani que mütiꞌüviyarie, cuxaxasivacacu niuqui
ꞌaixüa manuyüne que mütivaiyacü.
\v 6 Mücü niuqui canixeꞌutaꞌaxiyani. Naisarie cuiepa
catinitixuaverirümeni, canitaverirümeni yaxeicüa que
mütiuyü xehesüa. Niuqui caniusutüarieni ꞌiya tucarisie
quepaucua xemuꞌenana, quepaucua xemütehetima yuricü
ꞌaixüa que mütiucaꞌiyari Cacaüyari,
\v 7 ꞌEpapüraxi que mütixeꞌutaꞌüquitüa. Mücü tahepaü
catiniꞌuximayatametüni, tecaninaquiꞌerieca, yacatinicamieni
Cürisitu parevivameya hücütütü xehesie mieme.
\v 8 ꞌIya cataniutahecüasitüiya que xemüteyucanaquiꞌerie
ꞌIyarisie xeteviyatü.
\p
\v 9 Yatetemaitü ꞌanapai hicüque, tame ꞌayumieme
tepücatehayeva tetanenevietü xehesie mieme, müpaü
teteꞌivavirietü Cacaüyari, xemühüpünenicü yaxetemaitü
tita mütinaque Cacaüyari, naimecü xetemaivavetü,
ꞌIyarisie timieme xetemaitü naimecü,
\v 10 ꞌaxemuꞌuvanicü meta que müreuyevese Tiꞌaitamesüa
miemete memuꞌuvanicü, xeꞌinaquiꞌasitüatü naimecü.
Tepivavirie mütiutixuxuaverenicü ꞌaixüa xeteyuriecacu
naimecü, xemütivaverirümenicü que xemüteꞌimate
Cacaüyari.
\v 11 Tepivavirie xemütürücariyarienicü, naimecü
xetürücavitü, ꞌiya que mütitürücaüye marivetü, para
xemüyüvavenicü xemüteꞌucaꞌenivanicü,
ꞌexemüteheutevinicü xecahaꞌatü,
\v 12 xeyutemamavietü pamüpariyusi xemipitüacacü
taꞌuquiyari. ꞌIya yüvemete catanayeitüani, tahesie
mütinaquenicü tita mütinaqueni Cacaüyari teüterimama
vahesie, hecüaripa meꞌuꞌuvacacu.
\v 13 Cataniutavicueisitüani Cacaüyari, yüriya heiserie
mücahexeiyanicü tahepaüsita. Cataniupata, que müꞌane
münaquiꞌerie tatiꞌaitüvame mayanicü, nuꞌayatütü.
\v 14 Mücüsie teteviyatü tecaniuxünarieni, que
mütareuyehüviri ꞌaxa temüteꞌuyuricü.
\s Cürisitu mumücü, que temüteꞌupitüarie ꞌaixüa
temütexeiyarienicü
\p
\v 15 Tepücayüvave temixeiyacü Cacaüyari, peru ꞌiya
caniꞌüquisicayatüni. Caniveꞌemetüni heiserie hexeiyatü
tita mütiunetüarie hepaüsita.
\v 16 Hesiena tiviyatü, naitü tiniunetüarieni, tita
taheima mütimieme, tita cuiepa mütimieme, tita
temütexeiya, tita temücatexeiya meta, vavemete, müme
memüvaꞌuquiyarima, teꞌaitamete, müme heiserie memexeiya,
naitüri tiniunetüarieni ꞌiya ꞌinetüacu. Hesiena mieme
tiniunetüarienita.
\v 17 ꞌIya ꞌacaniuyeicacaitüni tixaütü
catinetüarievecacu cuxi. Naitü catiniyuxevini ꞌiyasie
tiviyatü.
\v 18 Mücü meta, tame temütatixexeüriva tevi
vaiyarieyapaü teꞌanenecacu, ꞌiya canitamuꞌutüni,
tisutüvame hücütütü. ꞌIya müquite memanucuꞌuni
vamexüacame canihücütüni, naimecü veꞌeme mayanicü.
\v 19 Cacaüyari que mütiyuvaüriya, naitü que ꞌanetü
mühücü Cacaüyari, mücü Cürisitusie ꞌacaniuveni.
\v 20 Müpaüta tiniuyuvaüriya, mipatacü naime Cürisitu
yatiyurienecacu, para naitü ꞌaixüa mütixeiyarienicü ꞌiya
que mütixeiya. Curuxisie yuxuriya que mütiutayeuri,
pipitüa tita cuiepa mütimieme tita taheima mütimieme
hamatüana ꞌaixüa memüteyuxeiyanicü.
\p
\v 21 Xemeta ꞌanapai xepüyupatacai xaüsie miemete
xeꞌayuyeitüatü. Que xemüteyücühüavecai,
xecaniꞌuxiveꞌeriecaitüni mexi ꞌaxa xeteyuriecai.
Hicürixüa ꞌaixüa xetexeiyarietü xecanayeitüarieni,
\v 22 ꞌiya tevitütü yuvaiyarisie mumücü. Müpaü
tiniuyurieni müxeꞌayeꞌatüanicü Cacaüyari hüxie, hesiena
mieme xepasiecacu, xecaseviximariecacu, xehesie
carahüivacacu.
\v 23 Müpaü catiniyümücü xücate xeyuhayeva yuri
xeteꞌerietü, xetesariya türücaüyecacu xehetüa,
xeseiriyarietü xecacuyuaximetü, masi xeꞌicuevietü tita
mütixata niuqui ꞌaixüa manuyüne. Xecaniꞌenieni ꞌiya
niuqui, canihecüasieca naisarie que müranetüarie
muyuavitüa. Ne Papuru neniuhüritüarieni hepaüsitana.
\s Papuru que mütiuhüritüarie nuivarite vahesie mieme
\p
\v 24 Hicüsüari ne necaninetemavieca sepa
nemüꞌuximatüarie xehesie mieme. Necaneyeꞌatüani tita
müreuyevese nemüꞌuximatüariecacü, Cürisitu que
mütiꞌuximatüarie. Nevaiyarisie müpaü netiniyurieneni
ꞌiya vaiyarieyasie mieme, memüyutixexeüriva
mehümetücacu.
\v 25 Ne vaparevivame necanayani, Cacaüyari que
münetiuhüritüa xehesie mieme, ꞌayeꞌarücamecü
nemüticuxatanicü Cacaüyari niuquieya.
\v 26 ꞌIya niuqui caniꞌaviesiecaitüni. Tucari manucatüasie
pücamasiücücai, teüteri quepaucua memanuticü müpaü
mepücatemaicai. Masi hicü masiücütü canayani,
Cacaüyari teüterimama müpaü memütemaicacü.
\v 27 Cacaüyari niuyuvaüriya müpaü
mütivaꞌüquitüanicü müme, vaücavamecü visi que
mütiꞌane ꞌicü niuqui müꞌaviesiecai, que mütimarive
nuivarite vasata. Cürisitu xehesie catiniviyani, ꞌayumieme
xecanicuevieca visi mütiꞌane. Mücü canihücütüni niuqui
müꞌaviesiecai.
\p
\v 28 Tame tecanihecüatani Cürisitu, que
temütevacuꞌimaiya yunaime teüteri, que temütevaꞌüquitüa
yunaime teüteri tetemaivavetü naimecü,
temüvarayeꞌatüanicü yunaime teüteri meꞌayeꞌarücame
Cürisitusie meteviyame.
\v 29 ꞌAyumieme netinineꞌuxitüaca, yemecü netiꞌuximayatü,
ꞌiya türücaüyemecü que münetiyuitüa.
\c 2
\p
\v 1 Neuyeveca xemütemaicacü vaüca que nemütineꞌuxitüa
xehesie mieme, Rautiseyatari vahesie mieme meta, hipameta
queyupaümetü memücanesixeiyavave vahesie mieme,
\v 2 vaꞌiyari mütuicarienicü, memüyutaxevirecü
meyunaquiꞌerietü, memeucaꞌunicü yemecü yametemaitü que
mütiheiserie, memeitimanicü tita Cacaüyari
mütiꞌavietacai. Mücü Cürisitu canihücütüniri,
\v 3 hesiena müꞌaviesiecü nai que müreucave Cacaüyari,
que mütimate que mütimaive.
\v 4 ꞌIpaü nepaine, xevitü pücatixeꞌirüviyani visi
tiuniutü xeicüa.
\v 5 Sepa nevaiyarisie xehesüa nemücaꞌuyeica, neꞌiyarisie
püta xehesüa neniuyeicani nenetemavietü, nexexeiyatü
ꞌaixüa xeteꞌaitüariecame, xeseseꞌime yuri xeteꞌerietü
Cürisitusie.
\p
\v 6 Quesusi que xemüteyetuiriyarie Tiꞌaitametüme
Cürisitutüme, yaxeicüa hesiena xeteviyatü
ꞌaxequeneuꞌuvani.
\v 7 Hesiena xequeteneviyani cüye que mütiviya
yunanayarisie, qui que mütiviya tesariyasie. Heiseriemecü
xequeneseiriyarieni yuri xeteꞌerietü,
xemüteꞌuꞌüquitüariepaü. Pamüpariyusi xequenepitüaca
Cacaüyari, vaücava yuri xeteꞌerietü.
\s Tucari que mürexeiya yemecü, Cürisitusie tiviyatü
\p
\v 8 Xequeneyucuerivayurieca capa xevitü xenavanicü,
timaivemepaü ticuxatatü, yacü xeicüa tixeꞌirüviyatü
teüteri que memüteyuyetuiri yuyeiyari, hehecuamete cuiepa
memütama que memüteꞌüquitüarie, peru Cürisitu que maine
caticuxatatü.
\p
\v 9 ꞌIya vaiyarieyasie ꞌacaniuveni naitü que ꞌanetü
mühücü Cacaüyari.
\v 10 Xemeta hesiena xeteviyatü xecanayeꞌaxüani. Yunaitü
memüteꞌaita heiserie memexeiya canivamuꞌutüni.
\v 11 Hesiena xeteviyatü xecaniuꞌinüaritüarieni
yacütütü, peru ramamacü que mütixitequie pücatixaü.
Cürisitu püta que mütixeꞌuꞌinüaritüa, canixeꞌupitüani
xemütehayevacü yaxeteyurietü teüteri vavaiyari que
mütivacuyuitüva.
\v 12 Quepaucua xemucaꞌüyarie, hamatüana xepucateuqui.
Mücü meta, quepaucua xemucaꞌüyarie,
xecananucuꞌuitüarieni, yuri xeteꞌerietü quename müpaü
tixecuyuitüaniquecai Cacaüyari, yaxeicüa que
mürenucuquetüa Cürisitu müquite vasata.
\v 13 Sepa xemümüquitetücai xeheuyexürüvetü
xecaꞌinüaritüarievavetü que xemüteteüteri, ꞌiya
canixeꞌanutanieritüani Cürisitumame. Catatineuyehüvirieni
naime que temüteheuyexürüvecai.
\v 14 Que temüteꞌatacaꞌutüa yacütütü ꞌaitüaricasie
yatemütecahunicü, mücü ꞌutüarica hixüapa ꞌuvetü que
mütaticaꞌunaquecai, Cürisitu neyeitüani heihurieca
yacütütü, yucuruxisie ꞌicürapuximaca.
\v 15 ꞌIxuriqui müyeꞌipaü nivarevivieni müme memüteꞌaita
heiserie memexeiya, vahecüatüatü yunaime vahüxie.
Curuxisie ꞌuyevietü, nivarehapani yuꞌutüma, varaꞌivaca.
\s Taheima timiemecü xequeneyuvaüriyani
\p
\v 16 Xevitü ꞌayumieme pücaxexanetani que xemütecuaꞌa,
que xemüteꞌuyeꞌe, que xemüteꞌivevie ꞌixüarari ya mesa
ꞌixüarariyari ya ꞌuxipiya tucari, que xemücateꞌivevie
nusu.
\v 17 Mücü tita ꞌumüramie ꞌetüriyaya canihücütüni,
peru que müꞌane ꞌumamie, Cürisitu canihücütüni.
\v 18 Xevitü pücaxetaveꞌerieca, sepa ꞌiya müyuvaüriya
müyuꞌusiviecacü, sepa müyuvaüriya müvarayexeiyanicü
Cacaüyari tupirisiximama, sepa vaüca müyuꞌiyaritüa
yuheinüsi hepaüsita. Que müꞌane müya müꞌane
canihüsierieca, tita vaiyarieyasie mütimieme xeicüa
canaꞌerivani,
\v 19 tamuꞌusie cativiyatü. Peru mücü tamuꞌutütü
canihücütüni que müꞌane mütimicua yuvaiyari.
Turuyaricü tatayaricü canitaxeviriyani yuvaiyari
mütaverecü, Cacaüyari que mütiveriya.
\p
\v 20 Mericüte, Cürisitumatü xüca xeꞌucuini, para tavari
xemücacuyuitüarienicü hehecuamete cuiepa memütama que
memüteꞌüquitüarie, titayari ꞌaumü ꞌaxeteꞌuꞌuva cuiepa
memütama que memütexeꞌaitüa,
\v 21 Tixaü pepücaꞌicumaüvani ꞌicü, pepücaꞌicuaca ꞌiya,
pepücaꞌimayüani ꞌicü, que memutiyuane.
\v 22 Mücü naitü canitixümücü mayüiyatücaitü.
Xepücateyuꞌaitüarinüa teüteri que memüteꞌaita que
memüteꞌüquita.
\v 23 Que memüteyurie, timaiveme niuquieyapaü
catiniꞌeniüriücüni, que memüteyumaiveꞌerie, que
memüteyuꞌusiviva, carima que memiyurie yuvaiyari. Peru que
memüteyurie, ꞌasimepücayüvave para memücatehaꞌerivanicü
tita vavaiyarisie mütimieme xeicüa.
\c 3
\p
\v 1 Xüca Cürisitumatü xeꞌanucuꞌuitüarieni, taheima
timiemecü xequeneyuvaüriyani, haque meca Cürisitu,
Cacaüyari serieta ꞌacaitü, mana timiemecü.
\v 2 Taheima timiemecü xequeneyumaica, cuiepa timiemecü
pücatixaü.
\v 3 Xeme xecaniucuiniri. Que xemüteꞌayeyuyuri,
xecaniꞌaviesieca Cürisitumatü, Cacaüyarisie
xemüteviyacü.
\v 4 Cürisitu canitatucaritüni. Quepaucua masiücütü
mayani, ꞌanata xeme hamatüana xemasiücütü
xecanacünicuni visi müracuꞌanesie.
\s Que temüteꞌuꞌuvacai meripai, que temüteꞌuhecuariyarie
\p
\v 5 ꞌAyumieme müquite xequenayuyeitüaca que
xemütecumaüvacai yuvaiyarisie cuiepa timiemecü.
Xepücaꞌicumaüvani que müꞌane mücaxeꞌüya mücaxecüna.
Xepücateyucahiveꞌerieca. Xepücateꞌihiveꞌerieca tita
ꞌaixüa mücatiꞌanene, tita mücatixepini. Que müꞌane
mütihiveꞌerie tita mücatipinieya, tete ꞌayexeiyamepaü
caniyüanemücü.
\v 6 Müpaü memüteyuriecü, ꞌayumieme Cacaüyari haxüa
canivapitüamücü müme yamemücatecahu.
\v 7 Xemeri quepaucua müpaü xeteyurietü ꞌaxemuꞌuvacai
ꞌanapai, yaxeicüa yaxecateniyuriecaitüni que
memüteꞌuꞌuva.
\v 8 Hicü masi xequeteneuhayeva que xemüteyuriecai naime,
que xemüteyucaꞌuxiveꞌeriecai, que xemüteyuhaxüatüacai,
ꞌaxa que xemüteyuriecucai, ꞌaxa que xemutiyuanecai hipame
vahepaüsita, niuqui ꞌaxa manuyüne que xemütexüatüacai
yutetacü.
\v 9 Xepücateyuꞌitaiyani. Xequenehüva mücü tevi müyeꞌi,
xecaheꞌerivatü que xemüteyuriecai meripai.
\v 10 Mühecua püta xequenanacatüqui,
xehecuariyarieximetü yemecü que xemüteyurie hicü,
xemimaicacü Cacaüyari, xeveviecamepaü xeꞌanenetü
xemacünecü.
\v 11 ꞌIyasie tiviyatü sepanetü mücüriyecu mühuriyu,
sepa muꞌinüasie Huriyusixi vaxitequiyacü, sepa
mücaꞌuꞌinüasie, sepa tahepaü mücaniuve, sepa
müsitiyatanaca, sepa vaüriyarica mütiꞌuximaya, sepa
müyunüꞌa, Cürisitu naitü canihücütüni, yunaime
vahesie catiniviyani.
\p
\v 12 ꞌAyumieme nepaine, Cacaüyari müxeꞌanuyexeicü,
teüterimama xemühümecü, xemünaquiꞌerivacü,
xeteyucanenimayatü xequenacüni yuꞌiyarisie, mühecua
xeꞌanacatütü. ꞌAixüa xequeneuyuyurieca, xequenayuyeitüa,
xepücateyucataveꞌerieca, ꞌaxequeteneutevini xecahaꞌatü.
\v 13 Xequeneyunevieca, xequeteneuyuyehüvirieca masi, xüca
xevitü ꞌiniuquimamücüni xeime. Tiꞌaitame que
mütixeheuyehüviri, xemeta hepaüna xequeneyüaca.
\v 14 Xeꞌixeviriyatü naime, xequeteneyucanaquiꞌerieca,
xemayeꞌaxüanicü.
\v 15 Cürisitu que mütixepitüa yuꞌiyarisie
xemücaꞌuximatüariecacü, quetixeꞌaitüaca xeꞌiyarisie.
Xecaniutaꞌinierieni yuꞌiyarisie xemücaꞌuximatüariecacü,
xei vaiyari xemühümecü. Mücü meta, pamüpariyusi
teyupitüvamete xequenacüni.
\p
\v 16 Cürisitu niuquieya xehesie queheyecani yemecü,
naimecü xetemaivavecacu. Mücücü xequeteneyüꞌüquitüaca
xequeneyutuicani, Cacaüyari cuicarieyacü, nüavari
Cacaüyari hepaüsita manuyünecü, cuicari ꞌIyarisie
timieme hepaüsita manuyünecü xeteyücühüavetü.
Xequeneuticuicani, yuꞌiyarisie xeꞌinüavatü Cacaüyari,
pamüpariyusi xeꞌipitüatü.
\v 17 Naime sepa tita xemüteyurie, sepa xemutiniuca sepa
xemütecumaüva, naime xequeteneyurieca Tiꞌaitame
Quesusisüa xemiemetetütü. ꞌIya xepareviecacu,
pamüpariyusi xequenepitüaca Cacaüyari mütaꞌuquiyari.
\s Que müreuyevese yamüvayurienenicü hipame, xüca
hecuamecü ꞌayeyurini
\p
\v 18 ꞌUcari xequenivaꞌenieca yücünama, que müreuyevese
Tiꞌaitamesie xeteviyacacu.
\v 19 ꞌUquisi meta, xequenivanaquiꞌerieca yüꞌüitama, ꞌaxa
xepücatevacühüaveni.
\v 20 Türi meta, yaxequetenecahuni naime que
memütexecühüave xeꞌuquiyarima. Tiꞌaitamesie xeteviyacacu,
müpaü püreuyevese. Müpaü xeteyuriecacu, caninaquiꞌaca.
\v 21 Xeme meta xemüvaꞌuquiyarima, xepücavahaxüatüaca
yunivema, capa meꞌutivaüripienicü.
\v 22 Xeme vaüriyarica xemüteꞌuximaya, yaxequetenecahuni
naime que memütexeꞌaitüa xecusiyarima cuiepa memütama.
Vahüxie xeicüa xepücateyurieca vanaquiꞌeriyacü,
xevanaquiꞌasitüanique teüteri. ꞌAixüa ꞌiyaricü püta
xequeteneꞌuximayaca Tiꞌaitame xeteheuyehüvirietü.
\v 23 Sepa tita xemüteyurie, yuꞌiyaricü yaxequeteneyurieca
Tiꞌaitamesie mieme, teüteri vahesie mieme pücatixaü,
\v 24 müpaü xetemaitü, ꞌapuve yuri cusiyari. Que
mütiunaquixü xehesie xemayüitaricü, xehesie
catininaquisitüamücü ꞌiya. Yucusiyarisie mieme
xequeteneꞌuximayaca Cürisitusie mieme.
\v 25 Que müꞌane heiseriemecü yamücatiyuriene, mücü
catinapiniyariemücü que mütiuyuri. Cacaüyuri yücü
pücativaxeiya teüteri.
\c 4
\p
\v 1 Xemeta xemüvacusiyarima, que mütiheiserie
xequetenivapitüaca teꞌuximayatamete, yaxeicüa
xevayurietü, müpaü xetemaitü, xemeta taheima
xemeixeiyacü yucusiyari.
\p
\v 2 Xepücatehayevani xeyunenevietü. Neneviericü
xequenayeneniereni, pamüpariyusi xeꞌipitüatü.
\v 3 Quepaucua xemüyunenevie, tahesie miemeta
xequeneyunenevieca, Cacaüyari quitenie müreuyepienicü
tahesie mieme, niuqui temütecuxatanicü, tita
mütiꞌaviesiecai Cürisitu hepaüsita temütecuxatanicü.
Müpaü nemütiyurienecü nepanutahüiya hicü.
\v 4 Xequeneyunenevieca nemihecüatanicü tita
mütiꞌaviesiecai, que müreuyevese yanemüticuxatanicü.
\p
\v 5 Xetemaivavetü xequeneyüaca tacua miemete
xevacühüavetü. Quepaucua xemüyüvave ꞌaixüa
xemüteyurienicü, yemecü müpaü xequeteneuyuri.
\v 6 Que xemütecuxata, ꞌaixüa xeteꞌuꞌiyaritü
xequetenecuxatani ꞌunacü yacütütü, xeniuqui
cahamuricacu. Xequeteneyüꞌüquitüaca quepaü ꞌaixüa
müyüni xemüvataꞌeiyacü yuxexuime.
\s Vaürisica que mütivarunüꞌairiexüa
\p
\v 7 Naime que nemütiuyuri catinixetaxatüamücü Tiquicu.
ꞌIya canitaꞌivatüni teminaquiꞌerie, tiparevivame
yamüticamie canihücütüni, tahepaü catiniꞌuximayaca
Tiꞌaitamesie mieme.
\v 8 Xemütemaicacü tahepaüsita, xeꞌiyari
mütuicarienicü, ꞌayumieme necanenunüꞌamücü xehesüa,
\v 9 ꞌUnesimumame. Mücüta canitaꞌivatüni teminaquiꞌerie,
yacatinicamieni, xehesüa miemetütü. ꞌUva que mütiyüane
naime mecatenixetaxatüacuni.
\p
\v 10 Canixevaüritüaca ꞌArisitaricu nehepaü muviyarie.
Maricuxita Verunave masuya püxevaüritüa.
Xepüteꞌaitüarie hepaüsitana. Xüca xehesüa nuani,
xequeneutanaquiꞌeri.
\v 11 Quesusi meta Cusitu mütiteva nixevaüritüaca.
Huriyusixi vasata, ꞌime xeicüa nehamatü meteniꞌuximayaca
Cacaüyari ꞌena tiꞌaitatü mayanicü. Mecanenivaüriyani
müme.
\v 12 ꞌEpapüraxi xehesüa mümieme canixevaüritüaca,
Cürisitu Quesusisie mieme tiꞌuximayatü. Yuheyemecü
xehesie mieme tiniyuꞌuxitüaca yunenevietü, müpaü
ꞌutaitü, xemücacuyuitüarienicü xeꞌayeꞌatü, yemecü
xeyuvaüriyatü naimecü que mütinaque Cacaüyari.
\v 13 Necanihecüataniqueyu, caꞌuxetü que mütiꞌuximaya
xehesie mieme, Rautiseyatari vahesie mieme, Hierapuritari
vahesie mieme.
\v 14 Rucaxi canixevaüritüaca tiyuꞌuhayemavametütü
neminaquiꞌerie, Remaxi meta püxevaüritüa.
\p
\v 15 Xequenivavaüritüaca ꞌivamarixi Rautiseyatari,
Nimüpamame, müme memüyuyexexeüriva quitana vahamame.
\v 16 Quepaucua ꞌicü xapa mütiterüvarieni xehüxie,
xequenivaruhüritüa Rautiseyatari memüyuyexexeüriva
memiterüvanicü mümeta. Rautiseya mieme xapa
xequeneterüvani xemeta.
\v 17 ꞌIpaü xequeteneutahüavi ꞌAruquipu,
Queneꞌacuerivayurieca pemeyeꞌatüanicü ꞌahüritüarica, que
pemütiuhüritüarie Tiꞌaitamesie petiviyatü.
\p
\v 18 Ne Papuru nemamacü netiꞌutüatü
necanixevaüritüaca. Xequenenaꞌerivani neꞌanutahüiyacame.
ꞌAixüa quetiucaꞌiyarini xehesie mieme.