\id 2TH
\h 2 Tesarunicatari
\toc1 2 Tesarunicatari
\mt TESARUNICATARI
\mt2 Hutarieca Mieme Xapayari Que
Mütivarunüꞌairi Papuru
\c 1
\s Vaürisica
\p
\v 1 Papuru Sirivanumatü Timuteumatü tecanixevaüritüaca
Tesarunicatari xemüyuyexexeüriva Cacaüyari
mütaꞌuquiyarisie xeteviyatü, Tiꞌaitame Quesusi
Cürisitusie xeteviyatü.
\v 2 Cacaüyari mütaꞌuquiyari, Quesusi Cürisitu
mütiꞌaitame, ꞌaixüa xüca meteꞌuꞌiyarini xehesie mieme,
xüca mexepitüaca yuꞌiyarisie xemücaꞌuximatüariecacü.
\s Cacaüyari que mütivaꞌinüatani müme ꞌaxa memüteyurie
quepaucua Cürisitu munuani
\p
\v 3 Neuxei taꞌivama, neuyeveca tame taheyemecü
pamüpariyusi temipitüacacü Cacaüyari xehepaüsita, que
müreuyevese yatemüteyuriecacü xeme
xemütetaveꞌeriyarümecü yuri xeteꞌerietü, yuxexuitü
yunaitü xemütetamüiriyarümecü xeteyucanaquiꞌerietü.
\v 4 ꞌAyumieme tameri ꞌaixüa teꞌutiyuatü xehepaüsita
yatecatenivacuxaxatüvani müme memüyutixexeüriva
Cacaüyarisie meteviyatü. Müpaü tetenivacühüaveni, que
xemüteꞌucaꞌeniva, yuri que xemüteꞌerie mexi
xetaveveiyarüva, mexi xeꞌuximatüarie, nai que
xemüꞌitüarietüve.
\v 5 Yaxeꞌitüariecacu canimasiücüni Cacaüyari
heiseriemecü que mütiꞌinüata ꞌisücametütü. Müpaü
xetetaꞌinüasieme xemeta xecanimarivacacuni, xehesie que
mütinaqueni ꞌaxemuꞌuvanicü Cacaüyari
tixeꞌaitüvametücacu. Müpaü mütiyünicü xetenicuineni
xemeta.
\p
\v 6 Camüsü, Cacaüyari heiseriemecü catiniyuriemücü
que mütivapinirieni vaꞌuximatüatü müme
memüxeꞌuximatüa,
\v 7 que mütixepinirieni xemeta xeꞌuxipitüatü xeme
xemüꞌuximatüarie, yatatiꞌuxipitüatü tameta, quepaucua
masiücütü mayani Tiꞌaitame Quesusi taheima ꞌacamietü,
yuniuqui tuayamete memütürücavi vahamatü ꞌacamietü,
\v 8 taipaü merücaüyetü. Heiseriemecü
canivaranutaxüriemücü müme memücaꞌimate Cacaüyari,
müme yamemücatecahu Tatiꞌaitüvame Quesusi niuquieya
ꞌaixüa manuyünesie.
\v 9 Müme müpaü memüꞌanene que memüteꞌanutaxüriyani,
vahesie tininaquimücü memücaꞌunarienicü yuheyemecü,
Tiꞌaitame hüxieya mecaxeiyatü, türücaüyetü que
mütimarive mecaꞌixeiyatü
\v 10 quepaucua munuani. Caninuamücüsü visi
mütixeiyarienicü yuteüterima vahesie tiviyatü, yunaitü
yuri memüteꞌutaꞌerie memühüxiyanicü meꞌiꞌixüarietü
ꞌiya tucarisie. Müpaü catiniyümücü yuri
xemüteꞌitaꞌeriricü tita temütehecüatacai xehesüa.
\p
\v 11 Müpaü mütiyünicü, xehesie mieme tenitanenevieca
taheyemecü, tacacaüyari müpaü mütixemaicacü xeme
xeꞌuꞌuvame que müreuyevese ꞌamuyeicanicü Cacaüyari
ꞌitaꞌinieyu. Tepütanenevieta tacacaüyari
yütürücariyacü meyeꞌatüanicü naime que
xemüteyuvaüriya ꞌaixüa xeteyuriecutü, naime que
xemüteyurie yuri xeteꞌerietü.
\v 12 Müpaü tiyüyu, que müꞌane Tatiꞌaitüvame Quesusi
mühücü visi catinixeiyariemücü xehesie tiviyatü.
Xemeta visi xecatenixeiyariecuni hesiena xeteviyatü,
tacacaüyari Tatiꞌaitüvame Quesusi Cürisitu ꞌaixüa
mütiucaꞌiyaricü.
\c 2
\s Masiücütü que mürayani ꞌiya tevi yamütiyurieneni que
mücatiheiserie
\p
\v 1 Hicü taꞌivamarixi, ꞌipaü tetenixetavavirieniqueyu
yaxemüteyuriecacü xetehaꞌerivatü que mütinuani
Tatiꞌaitüvame Quesusi Cürisitu, xetehaꞌerivatü hesüana
que temütecuxeüriyani. Tepüxetavavirie
\v 2 yapaucua xemücaꞌucuyuitüarienicü que xemüteyumate,
xemücamuinariecacü sepa müxemuina xevitü ꞌiyari ya
niuqui ya xapa tahesüa vaniu mümieme, müpaü ꞌutaitü
quename Tiꞌaitame tucarieya ꞌayeꞌari.
\v 3 Xüca tüma haquevasü xevitü caxeꞌucuamanaque.
ꞌAsipücayüni mexi cuya cayusutüave meri, ꞌarique mexi
masiücütü caꞌayeive mücü tevi yamütiyurieneni que
mücatiheiserie, que müꞌane mücaꞌunarieni.
\v 4 ꞌIya neyeꞌuniecamücü nitaveꞌeriecamücü naime
cacaüyari mütiteva, naitü mürayexeiyari. Yücümana
canayerümücü Cacaüyari tuquieyata, cacaüyari yuxatatü.
\p
\v 5 Müpaü xecatehaꞌeriva müpaü nemütixetaxatüacaicü
quepaucua xehesüa nemeyeicacai cuxi.
\v 6 Hicürita xecatenimaica tita mütinena, masiücütü
mücaꞌayanicü mexi tucariyari caꞌayeꞌave.
\v 7 Tita mücatiheiserie ꞌari ꞌavie caniyüaneni. Masi
hicü xeicüa caniyüaneni mexi que müꞌane hixüatapai
ꞌuvetü minena caꞌanuyevitüquieve cuxi.
\v 8 Yemieyu, masiücütü nayeimücü ꞌiya yamütiyurieneni
que mücatiheiserie. Tiꞌaitame Quesusi canimiemücü ꞌiya
yuꞌiyacü yuteta miemecü, canicaꞌunamücü masiücütü
ꞌayuyeitüame quepaucua munuani.
\v 9 ꞌIya püta caninuamücü Cauyumarie ꞌicuyuitüvacacu.
Nai türücaüyetü punuani ꞌinüarite mütiꞌitava
tiyurienetü mamarivaveme.
\v 10 Yamütiyurienecü que mücatiheiserie, naimecü
nivacuamanamücü müme memücaꞌunariexime,
memücayuvaüriyacaicü meminaquiꞌeriecacü tita yuri
müraine memütavicueisitüarienicü.
\v 11 ꞌAyumieme Cacaüyari püvaranüꞌairiva ꞌirümari
müvacuyuitüva, yuri memütetaꞌerienicü ꞌitaricasie,
\v 12 memanutaxüriyanicü yunaitü yuri memücateꞌitaꞌeriri
tita yuri müraine, masi memünaquiꞌa yameteyurietü que
mücatiheiserie.
\s Que memüteꞌanayexeiyarie memütavicueisitüarienicü
\p
\v 13 Masi neuyeveca tame taheyemecü pamüpariyusi
temipitüacacü Cacaüyari xehepaüsita, taꞌivama Tiꞌaitame
müxenaquiꞌerie. Sutüapai Cacaüyari nixeꞌanuyexeiya
xemütavicueisitüarienicü hesiena mieme xepasietü ꞌIyari
que mütixepata, yuri xeteꞌerietü yuri que maine.
\v 14 ꞌAyumieme canixeꞌutaꞌinieni tame niuqui ꞌaixüa
manuyüne tetexecuxatüvacacu, Tatiꞌaitüvame Quesusi
Cürisitupaü visi xeꞌanenetü xemacünecü.
\p
\v 15 Hicümüsüari taꞌivama, xequeneutiꞌuti ꞌaixüa.
Xequeneuviya tita xemüteyetuiriyari que
xemüteꞌutaꞌüquitüarie ya niuquicü ya taxapacü.
\v 16 Tatiꞌaitüvame Quesusi Cürisitutütüri, Cacaüyari
mütaꞌuquiyari, que müꞌane mütasinaquiꞌerie, mütasituica
yuheyeme, mütasipitüa ꞌaixüa temütaꞌicuevanicü yuri
teteꞌerietü,
\v 17 ꞌiya xüca xetuicani xeꞌiyarisie, xüca xeseiriyani
nai que xemüteyurie que xemaitüca ꞌaixüa tiꞌaneme.
\c 3
\s Cacaüyari niuquieya ꞌaixüa quecuxasivani
\p
\v 1 Mericüsü ꞌivamarixi, xequeneyunenevieca tahesie
mieme, Tiꞌaitame niuquieya cuitüva müꞌenierienicü
naisarie, ꞌaixüa mücuxasivanicü que müyüane xehesüa,
\v 2 tameta temütavicueisitüarienicü müme teüteri
yamemüteyurie que mücareuyevese, ꞌaxa memüteꞌuꞌiyari
ꞌasimemücatasiyurienicü. Yunaitüsietü yuri
mepücateꞌerie.
\v 3 Masi Tiꞌaitame que maine yacatinicamieni. Mücü
canixeseiriyamücü, canixeꞌüviyacamücü que müꞌane ꞌaxa
mütiucaꞌiyari ꞌasimücaxeyurienicü.
\v 4 Tiꞌaitamesie teteviyatü ꞌipaü yuri teteniꞌerieca
xehepaüsita, müpaü xeteniuyurieni que temüteꞌaita,
müpaü xeteniyuriecacunita.
\v 5 Tiꞌaitame xüca ꞌaixüa ꞌiyurieni xeꞌiyari
Cacaüyaripaü xemüteyucanaquiꞌeriecacü, Cürisitupaü
xemüteꞌucaꞌenivanicü.
\s Que müreuyevese mütiꞌuximayacacü
\p
\v 6 Taꞌivama, Tatiꞌaitüvame Quesusi Cürisitusüa
temümiemetecü ꞌipaü tetenixeꞌaitüaca, xemüvahayevacü
yunaime taꞌivama ꞌamemuꞌuva meyüꞌüraxietü yamecatecahutü
que temütexeꞌuyetuiri.
\v 7 Xeme yücümana xecatenimaica que müreuyevese
xemütasiꞌüquenicü tame. Xehesüa teꞌuꞌuvatü
tepücataꞌüraxiecai.
\v 8 Ni xeimesüa pa tepücatecuacai tecatetatuatü. Masi
teteꞌuximayatü tetetaꞌuxitüatü tucaricü tücaricü
tecateniꞌuximayacaitüni xeme temücatexeꞌuxitüanicü ni
xeime.
\v 9 Heiserie tecahexeiyatü tepücayüacai. Heiserie
tecanexeiyanitütü temütexeꞌuxitüanicü, peru müpaü
tecateniꞌuximayacaitüni masi ꞌüquisica tematayeitüanicü,
xemütasiꞌüquenicü.
\v 10 Mücü meta, quepaucua xehesüa temeꞌuvacai müpaü
tetenixeꞌaitüacaitüni, xüca xevitü cayuvaüriyani
mütiꞌuximayacacü, mecuxi mücü tixaü mücaticuani.
\v 11 Tepüꞌenana quename hipatü ꞌameꞌuꞌuva xesata
meyuꞌüraxietü, mecateꞌuximayatü, yacü xeicüa
meniuquixietü püta.
\v 12 Müpaü tepütevaꞌaitüa müme müpaü memüꞌanene,
Tiꞌaitame Quesusi Cürisitusüa temümiemetecü müpaü
tepütevatuica, cayuvatü metitetü meteꞌuximayatü yuꞌicuai
memütecuanicü.
\p
\v 13 Xemeta taꞌivama, xepücaꞌuꞌuxeni ꞌaixüa xeteyurietü.
\v 14 Xevitü xüca caꞌiꞌenieni tita temüteꞌutiyuane ꞌicü
xapasie teteꞌutüatü, xequenetimati ꞌiya, hamatüana
xepücayünüca, ꞌiya müteviyasitüarienicü.
\v 15 Xepücatecuꞌerivani hepaüsitana xemütecuꞌerivapaü
que müꞌane müxeꞌayeꞌunie hepaüsita, masi xequeneꞌimaiyani
xemiꞌimaiyapaü yuꞌiva püta.
\s ꞌImatürieca que mütivaxata ꞌaixüa memüꞌitüarienicü
\p
\v 16 Masi que müꞌane yuꞌiyarisie mücaꞌuximatüarie
Tiꞌaitametütü, yuheyemecü xüca xepitüaca yuꞌiyarisie
xemücaꞌuximatüariecacü sepa naimecü. Tiꞌaitame yunaime
xehamatü xüca ꞌaꞌuyeicani.
\p
\v 17 Ne Papuru nenixevaüritüaca nemamacü netiꞌutüatü.
ꞌIcü canineꞌinüaritüni naime xapasie, ꞌipaü
nepütiuꞌutüa.
\v 18 Tatiꞌaitüvame Quesusi Cürisitu ꞌaixüa xüca
tiucaꞌiyarini yunaime xehesie mieme. Müpaü xeicüa
caniꞌaneni.