\id TIT
\h Titu
\toc1 Titu
\mt TITU
\mt2 Papuru Que Mütinüꞌairi
\c 1
\s Vaürisica
\p
\v 1 Ne Papuru tiꞌuximayatame necanihücütüni
Cacaüyarisie mieme. Quesusi Cürisitu nüꞌarieya
necanihücütüni, yuri netiꞌerietü yaxeicüa yuri que
memüteꞌerie müme Cacaüyari müvaranayexei, müpaüta
netimaitü tita yuri müraine, que müreuyevese
yamütimaicacü Cacaüyari xüca ꞌayexeiyani.
\v 2 Müpaü netiniyurieneni nemitacueviecü tucari
mücaxüve nemexeiyanicü. Cacaüyari pücatiꞌitava. Meripai
tucari caxuavecacu cuxi müpaü putayü tucari
mütasipitüaniquecaicü.
\v 3 Hicürixüa tucari ꞌaixüa müꞌane ꞌayeꞌacu,
masiücüme canayeitüani yuniuqui, teüteri
yametecuxatacacu. Necaniuhüritüarieni müpaü
nemüticuxatanicü ne, müpaü mütiutaꞌaicü
tativicueisitüvame Cacaüyaritütü.
\v 4 Ne necamanivaüritüaca Titu. Yuricü
pecaninenivetüni, yuri que temüteꞌerie tanaitü.
Cacaüyari mütaꞌuquiyari, Cürisitu Quesusi
mütativicueisitüvame, ꞌaixüa xüca meteꞌuꞌiyarini ꞌahesie
mieme, ꞌaꞌiyarisie xüca memasipitüaca
pemücaꞌuximatüariecacü.
\s ꞌUquiravesixi teꞌüviyamete que müreuyevese müpaü
memüꞌanenenicü
\p
\v 5 Mücücü nemanecuꞌeirieni Cüretasie,
pemeiheiserietüanicü tita müreuyevese,
pemüvacuyasaxüanicü vaꞌuquiyarima xexuime quiecarisie,
yaxeicüa que nemümatiutahüavixü,
\v 6 que müꞌane mücaniuquimarie, que müꞌane xeücüame
müꞌüya, que müꞌane yütüriyama müvarexeiya yuri
meteꞌeriecame vahesie carahüivacacu, quename merucuyatüve
quename mecaꞌiꞌenie müpaü caraniuvacacu.
\v 7 Cacaüyarisie mieme mühüritüariecü, neuyeveca que
müꞌane tiꞌüviyame mühücü mücaniuquimariecacü,
yuxaüta xeicüa mücayüanenicü mayuꞌeriya
mücahücütünicü, tavecame mücahücütünicü,
mücavativayanicü, tumini mücahiveꞌeriecacü
tiyucuamanamütü.
\v 8 Masi peuyevese müvatanaquiꞌerienicü teva quiecatari,
minaquiꞌeriecacü tita ꞌaixüa mütiꞌane, mütimaivenicü,
heiseriemecü yamüticamienicü, Cacaüyari mayexeiyanicü
cuini mieme, müseüyenicü yuꞌiyarisie que mütiyuꞌaitüa.
\v 9 Peuyevese mütiviyanicü niuqui yuri mainesie,
ꞌüquisica manuyünepaü müyüvenicü müvatuicani
tiꞌüquitatü que mütivaiyacü yemecü, müyüvenicü meta
müvahecüatanicü memüniuquixie.
\p
\v 10 Yumüiretü ꞌameniuꞌuvani mecaheuꞌenanatü, yacü
xeicüa metecuxatatü, meteyucuamanatü. Müme xitequiya
ꞌinüariyarisie memüteviya masi yemecü müya mepüꞌanene.
\v 11 Peuyevese memanunatücanicü que memütecuxata. Que
memüꞌanene, mepüvamuina ꞌasita xeime qui quiecatari
ꞌaxeicüa yunaime, mepütetiꞌüquita tita ꞌaixüa
mücatiꞌane, meteꞌivacutü ꞌaxa tiꞌanemecü.
\p
\v 12 Vahesüa mieme tixaxatame xevitü müpaü niutayüni,
Cüretatari yuheyemecü mecateniꞌitavani, yeutari
memayuꞌeririya mecanihümetüni, mecaniyuꞌüraraxieca
yuhuriepa meteviyatü xeicüa.
\v 13 Mücü yemecü yuricü catiniutahecüata. ꞌAyumieme
quenivarutatiꞌa türücaüyemecü, müme memüseseüyenicü,
yuri meteꞌerietü que mütivaiyacü,
\v 14 mecavaꞌenietü Huriyusixi yacü xeicüa que
memüteꞌüxasita, mecaheꞌerivatü tita memüteꞌaita teüteri
memixaniꞌerie tita yuricü müraine.
\p
\v 15 Que memüteꞌixeiya müme memüꞌitiyatüca, naitü
catiniꞌitiyaca. Müme memüseviximarie yuri memücateꞌerie
püta que memüteꞌixeiya, tixaü pücatixuave mütiꞌitiya,
masi mecaniseviximarieca que memüteyumate, yuꞌiyari que
memüteꞌenie vatateꞌacacu.
\v 16 Mecaniyuhecüatani yutetacü quename vaniu meꞌimate
Cacaüyari meꞌutiyuatü, peru que memüteyurie,
mepüyuhecüata masi quename mecaꞌimate. Cuini mieme ꞌaxa
mecaniꞌaneneni, yamepücatecahu, mecanixaniꞌerivani sepa que
memüteyurie ꞌaixüa memücateyuriecü.
\c 2
\s ꞌÜquisica müseüye
\p
\v 1 ꞌEcüsü püta müpaü quetinecuxatani que
müreuyevese, seüyemecü pemütiꞌüquitanicü.
\v 2 ꞌUquiravesixi mequeyumateni, ꞌaixüa mequetehecahuni,
mequetehemaivaveni que müreuyevese yamütiyurienenicü,
mequeseseüyeni yuri que memüteꞌerie que
memüteyucanaquiꞌerie, que memüteꞌucaꞌeniva.
\v 3 Yaxeicüa ꞌucaravesixi que memüteꞌuꞌuva, müpaü
mequeteyurieca que müreuyevese yamütiyurienenicü
Cacaüyarisüa miemetütü, niuquiperaixi mepücayüaca,
vinucü mepücaꞌuꞌuvani xeicüa, tita ꞌaixüa mütiꞌanecü
xeicüa mequeteꞌüquitani
\v 4 müpaü metevaꞌüquitüatü ꞌucari, müme
memüvanaquiꞌeriecacü yücünama yütüriyama,
\v 5 memütemaivavenicü que müreuyevese
yamütiyurienenicü, yücünama vahesie memüteviyanicü
meꞌitiyatücaitü, yuquie memüteꞌuximayacacü, ꞌaixüa
memüteꞌuꞌiyarinicü, memüteyuꞌaitüarinüacacü vacünama
que memaitüca. Xüca müpaü meꞌaneneni, Cacaüyari
niuquieya pücaseviximarieca, ꞌaxa pücaticuxaxasivani
hepaüsitana.
\p
\v 6 Müpaü yaxeicüa quetinivatuicani ꞌuquisi
memütemaivavenicü que müreuyevese yamütiyurienenicü.
\v 7 Naime hepaüsita ꞌinüari quenaꞌayeitüvani ꞌaixüa
petiyurienetü. Que pemütiꞌüquita, ꞌaꞌiyarisie ꞌaixüa
petiꞌacühüavetü quetineꞌüquita ꞌaixüa peticamietü.
\v 8 Müpaü quetinecuxatani ꞌaniuqui seüyemecü, xevitü
mücayüvenicü mitaveꞌeriecacü, que müꞌane müxeꞌayeꞌunie
müteviyasitüarienicü masi, cayüvetü mayanicü ꞌaxa
mainenicü xehepaüsita.
\p
\v 9 Müme vaüriyarica memüteꞌuximaya
mequeteyuꞌaitüarinüaca vacusiyarima que memaitüca
naimecü. Mequevanaquiꞌaritüaca masi, mepücaniuquixieca.
\v 10 Mepücavanavatüveni, masi mequevahecüasitüiyani
ꞌaixüa ꞌiyari yamemütecahucü, tativicueisitüvame
Cacaüyari ꞌüquisicaya visi mütixeiyariecacü que
memüteyurie naimecü.
\p
\v 11 ꞌAri masiücütü canayani ꞌaixüa que mütiucaꞌiyari
Cacaüyari. Müpaü müꞌanecü, yunaitü teüteri
mecaniyüvaveni memütavicueisitüarienicü.
\v 12 ꞌAyumieme müpaü teteniꞌüquitüarieni
temütahecüatanicü quename müme Cacaüyari
memücaꞌayexeiya vahesüa tecamiemete, quename tame
tecaꞌihiveꞌeri tita cuiepa memütama memütehiveꞌeri. Masi
yeme ꞌipaü püta tepüteꞌüquitüarie que
temüteꞌuꞌuvanicü, tetemaivavetü que müreuyevese
yatemüteyuriecacü, heiseriemecü yatetecahutü, Cacaüyari
teꞌayexeiyatü hicü temuꞌuvanicü ꞌena cuiepa,
\v 13 meta temicueviecacü que müꞌane yemecü
mütasitemavieritüani. Hicü tepicuevie, masiücütü
mayanicü visi ꞌanetü que müꞌane Cacaüyaritütü
mümarive tativicueisitüvame Cürisitu Quesusi
hücütütü.
\v 14 ꞌIya niyuyetuani tahesie mieme, mütasitaxünacü,
yemecü temücaꞌitisanacü ꞌinüari, mücü
mütasiꞌitienicü masi yuhesie mieme, teüterimama
temacünecü tetavaüriyatü ꞌaixüa temüteyuriecacü.
\p
\v 15 Müpaü quetinecuxatani, vaüriyarica quenivapitüaca,
quenivahecüatüaca heiserie petivaꞌaitüatü, xevitü
mücamasitaveꞌeriecacü.
\c 3
\s Heiserie tepupitüarie ꞌiya ꞌaixüa mütiucaꞌiyaricü
\p
\v 1 Quenivarataꞌeritüvani yamemütecahunicü teꞌaitamete
heiserie memexeiya que memaitüca,
memüteyuꞌaitüarinüacacü, memüyuvaüriyanicü ꞌaixüa
memüteyuriecacü sepa que mütitita ꞌaixüa mütiꞌane,
\v 2 memücavaseviximacacü hipame ꞌaxa meꞌutiyuatü
vahepaüsita, memücayucuitüvenicü,
memücaꞌayuꞌeririyanicü, mümasiücünicü quename
tixaütü mecatehüme que memütevaxeiya yunaime teüteri.
\v 3 Tameri tanaitü meripai ꞌasitecatemaitü
teniuꞌuvacaitüni, yatepücatecahucai, tepeuyexüriecai,
vaüriyarica tepüteꞌuximayacai tita temütehiveꞌeriecaisie
mieme xeicüa, müiremecü temünaquiꞌacacü xeicüa
tepüyüacai, ꞌatepuꞌuvacai ꞌaxa teteyuriecutü
teꞌütesatü. Tepüꞌuxiveꞌerivacai, tepütaꞌuxiveꞌeriecai
tanaitü.
\v 4 ꞌAnatütüri masiücütü canayani ꞌaixüa que
mütiucaꞌiyari tativicueisitüvame Cacaüyari, que
mütatinaquiꞌerie teüteri.
\v 5 Tame heiseriemecü yatetecahutü temüyüacaicü
ꞌasipücatiuyuri, masi mücü mütasinenimayacaicü püta
pütasiꞌutavicueisitüa. Pütasiꞌuꞌiti hutarieca
tasitinuivitüaca, ꞌIyari Mütiyupata tasihecuariyacacu.
\v 6 Mücü ꞌIyari niutatuani vaücavamecü temeixeiyanicü,
tativicueisitüvame Quesusi Cürisitu yatatiumicu.
\v 7 Heiserie tepupitüarie ꞌiya ꞌaixüa mütiucaꞌiyaricü,
ꞌayumieme tahesie catininaqueni tucari mücaxüve
temexeiyanicü. Müpaü yuri teteꞌerietü tepütaꞌicueva.
\p
\v 8 Mücü niuqui yuricü paine. Müpaü nepüticuꞌeriva,
peuyevese türücaüyemecü müpaü pemütivatahüavecü.
Peuyevese müme yuri memütetaꞌerivave Cacaüyarisie
memüyuꞌiyaritüacacü quepaü ꞌaixüa memüteyurieca.
ꞌAixüa caniꞌanemücü nivapareviecamücü teüteri, müpaü
memüteyuriecacü.
\v 9 Peru niuqui que memütexüatüa ꞌasimecatemaitü, que
memütecuvaütüve xeime ramare hepaüsita, que
memüteyuheca, ꞌinüari niuquiyari hepaüsita que
memüteyucuitüve, mücü hepaüsita queneꞌacuerivayurieca.
ꞌAxa ꞌanetü payeica que memüteyurie, xüanacüa payeica.
\v 10 Que müꞌane yuhesie mütivaviyasitüa ꞌivamarixi,
mücü quenanuyehüva hutacüa peꞌitaꞌimaiyame,
\v 11 müpaü petimaitü, que müꞌane müpaü mütiyuriene
neutunini, ꞌaxa tiniuyurieneni, yücümana yuhesie
tiniuhüpani.
\s Que mütivarutaꞌaitüa
\p
\v 12 ꞌAhesüa quepaucua menuani ꞌArütema nehenunüꞌayu,
Tiquicu nusu, queneꞌamexüitüa nehesüa pemümiecü
Nicupuripai. Müpaü nepüticuꞌeriva, mana nepecani
muhaütüsie.
\v 13 Senaxi ꞌinüaricü mütiꞌüquitame, ꞌApuruxi yunaime
quenivaparevieca vahuyeta, ꞌaixüa ꞌiyaricü peꞌatuatü,
tixaütü memücateheuyehüacacü.
\v 14 Tateüterima müpaü mequeteyüꞌüquitüaca ꞌaixüa
memüteyuriecacü memeixeiyanicü tita müreuyevese, capa
mecaꞌutixuxuaveretü meꞌacünecü.
\s Que mütivaruvaüritüa, ꞌaixüa que mutayü ꞌaixüa
memüꞌitüarienicü
\p
\v 15 Yunaitü nehesüa memuꞌuva mecamanivaüritüaca.
ꞌEcüta quenivavaüritüaca müme memütasinaquiꞌerie yuri
meteꞌerietü. ꞌAixüa quetiucaꞌiyarini yunaime xehesie mieme
tacacaüyari. Müpaü xeicüa.