\id PHM
\h Quirimuni
\toc1 Quirimuni
\mt QUIRIMUNI
\mt2 Papuru Que Mütinüꞌairi
\c 1
\s Vaürisica
\p
\v 1 Ne Papuru, neꞌanutahüiyatü Cürisitu Quesusisie
mieme, taꞌiva Timuteumatü, tecanixevaüritüaca, Quirimuni
temümasinaquiꞌerie tahamatü pemütiꞌuximaya,
\v 2 tamita meta ꞌApiya titevacame temünaquiꞌerie,
ꞌAruquipu meta tahepaü cuya, müme meta memüyuyexexeüriva
ꞌaquita.
\v 3 Cacaüyari mütaꞌuquiyari, Tatiꞌaitüvame Quesusi
Cürisitumatü, xüca ꞌaixüa meteꞌuꞌiyarini xehesie mieme,
xüca mexepitüaca yuꞌiyarisie xemücaꞌuximatüariecacü.
\s Quirimuni que mütiyucanaquiꞌeriecai, yuri que
mütiꞌeriecai
\p
\v 4 Pamüpariyusi necanipitüaca necacaüyari neheyemecü,
quepaucua nemümasicuxata nenenenevietü,
\v 5 nemüꞌenacü que pemütivanaquiꞌerie Cacaüyari
teüterimama yunaime, Tiꞌaitame Quesusisie yuri que
pemütiꞌerie.
\v 6 ꞌIpaü netininenenevieca, ꞌaxeicüa temüpitüarienicü
masi yemecü Cürisitusie teteviyatü temacünecü,
ꞌahamatü temütaxevicü yuri teteꞌerietü. Xüca ꞌaixüa
tetemaica tita temütehexeiya ꞌaixüa mütiꞌane naime,
müpaü teniꞌitüariecacuni.
\v 7 Vaücava nepünetemavie nepütuicarie ꞌecü
pemütiꞌacanaquiꞌeriecü. Cacaüyari teüterimama
mecaniꞌuxipitüarieca yuꞌiyarisie, ꞌecü que pemütiyuriene
neꞌiva.
\s Papuru que mütitavavirie ꞌUnesimu hepaüsita
\p
\v 8 ꞌAyumieme, Cürisitusie netiviyatü sepasü heiserie
nemexeiya necamatü nemümatiꞌaitüacacü tita müreuyevese,
\v 9 masi temütetacanaquiꞌeriecü, ꞌayumieme vaüriyarica
nemanipitüacaqueyu püta. Ne Papuru que nemüꞌane,
neꞌuquirasitütü, neꞌanutahüiyacame nehücütütü hicü
Cürisitu Quesusisie mieme,
\v 10 vaüriyarica necamanipitüaca nenive hepaüsita, que
müꞌane neꞌanutahüiyatü nemitinuivitüa. ꞌUnesimu
necanixatani.
\p
\v 11 Mücü ꞌasipücatiyurienecai ꞌaixüa müꞌane ꞌahesie
mieme, perusü hicü ꞌecü ne tecaneiyehüaca tanaitü.
\v 12 ꞌAhesüa nenenunüꞌamücü neꞌiyaritüme.
\v 13 Nehesüa nepicayeniquecai, ꞌahesie mieme
münesiparevienicü neꞌanutahüiyacacu niuqui ꞌaixüa
manuyünesie mieme.
\v 14 Masiri ꞌecü ꞌasipecatimaicacu, nepücanevaüriyacai.
Xüca neꞌicayenique, ꞌaixüa pepütiyurieneniqueyu ꞌecü,
peru vaüriyarica yapepütiyurieneniqueyu. Mecuxi
pemüꞌavaüriyaniqueyu püta.
\v 15 Pepitatümaiya yareutevicacu, peru xüari müpaü
tiniuyüni ꞌaheyemecü peheixeiyatü pemayanicü.
\v 16 Tiꞌuximayatame xeicüa pücahücü, masi vaücava
peuyevese hicü. Taꞌiva canayani münaquiꞌeriva. Ne yemecü
nepinaquiꞌerie, ꞌecüta masi vaüca peninaquiꞌeriecamücü
tevitüme, Tiꞌaitamesie tiviyacameta.
\p
\v 17 ꞌAyumieme xüca tetaxevime peꞌerieca,
queneutanaquiꞌeri que pemüneretanaquiꞌerieniqueyu ne.
\v 18 Xüca ꞌaxa masiꞌuyurieni, xüca tixaütü reuyeveca
mütiyutuanicü, yaquenetineucuetatüa ne.
\v 19 Ne Papuru nemamacü müpaü nepütiuꞌutüa, ne
nepürapica. Siqueresü ꞌasinepücamarahüaveni que
müreuyevese masi pemünerapiniriecacü ꞌecü tucari
pemexeiyacü.
\v 20 ꞌEri neꞌiva, Tiꞌaitamesie temüteviyacü nepaine,
ꞌaixüa nepüꞌitüarieniqueyu ꞌacümana. Queneneuꞌuxipitüa
neꞌiyarisie, Cürisitusie que temüteviya.
\p
\v 21 Nepümatiuꞌutüiri yuri netiꞌerietü quename
yapeticamieni, müpaü netimaitü, que nemutaine ne, ꞌecü
pecananuyehaitürüvemücü.
\v 22 Mücü meta, queneneucuhaꞌaritüiri haque nemayecani.
Nepütaꞌicueva müpaü yuri netiꞌerietü, xeyuneneviecacu
nepüpitüarieni xehesüa nemüyemiecü.
\s Vaürisica que mütivarunüꞌairiexüa
\p
\v 23 Mecamanivaüritüaca, ꞌEpapüraxiri nehepaü muviyarie
Cürisitu Quesusisie mieme,
\v 24 Maricuxiri, ꞌArisitaricuri, Remaxiri, Rucaxiri. Müme
nehamatü meteniꞌuximayaca.
\p
\v 25 Tiꞌaitame Quesusi Cürisitu xüca ꞌaixüa
tiucaꞌiyarini xeꞌiyarisie mieme.