\id JAS
\h Satiyacu
\toc1 Satiyacu
\mt SATIYACU
\mt2 Meitanüꞌaxüa
\c 1
\s Vaürisica
\p
\v 1 Ne Satiyacu Cacaüyarisie mieme
necatiniꞌuximayatametüni Tiꞌaitame Quesusi Cürisitusie
mieme. Naisarie xemeutayeixüa necanixevaüritüaca yunaime
tamamata heimana yuhutame nuivarite.
\s Cacaüyari que mütatipitüa temütemaivavenicü
\p
\v 2 Neꞌivama naimecü xeyutemamaviecame xequeneyuꞌerieca
quepaucua xemütaꞌinüasieni ꞌinüari yücü müꞌanenecü,
\v 3 müpaü xetemaitü, müpaü xeteꞌinüasieme yuri xüca
xeteꞌerieca yemecü, mücücü xeteꞌucaꞌenivatü xepacüne.
\v 4 Xequenayeꞌaxüa xeteꞌucaꞌenivatü müpaü
xemütemasiücünicü müyuxevicü xeꞌiyari, tixaü
mücareuyevesecü.
\p
\v 5 Me xüca xevitü xeme caꞌayeꞌaveni mütimaivenicü,
müpaü quetitavavirieni Cacaüyari. Müpaü
catinapitüamücü. Cacaüyari ꞌaixüa ꞌiyaricü
catinivamicuani yunaime cavatateꞌatü.
\v 6 Müpaü quetitavavirieni yuri tiꞌerietü xeicüa,
tixaü huta ꞌiyariyari cahexeiyatü. Que müꞌane huta
ꞌiyariyari mexeiya, mücü hamevaripaü caniuyüneni
haramarasie mieme muꞌequepaü muyuanepaü.
\v 7 Mücü müya müꞌane mecuxi pütihayeva müpaü
ticuꞌerivatü quename tipitüarieni. Tiꞌaitame tixaü
pücatipitüani
\v 8 tevi huta ꞌiyariyari mexeiya mühücücü, müyuxamurie
yuyeiyacü naimecü.
\p
\v 9 Taꞌiva tixaü mücatihücü veꞌeme queyuxatani müpaü
raꞌerivatü veꞌeme que mürayeitüarie.
\v 10 Xicutütü meta veꞌeme queyuxatani müpaü raꞌerivatü
tixaü catihücütütü que mürayeitüarieni, müpaü
timaitü, ꞌüxa xuturipaü peuyani.
\v 11 Tau paneica xücatü, ꞌüxa pütivasiüxa. Xuturiyari
pücaxürüve, visi mütiyuxexeiyacai putiyünaxü.
Yaxeicüata tevi müxicu pütavaxime yuyeiyacü sepa que
mütiyuriene.
\s Que mütiucaꞌeniva ꞌinüasietü
\p
\v 12 ꞌAixüa caniꞌitüarieca que müꞌane mütiucaꞌeniva
ꞌinüasietü. Mücü ꞌinüasieme tucari canipitüariemücü
ꞌinüaricü, yaxeicüa muma que müranutimaniyarie que
müꞌane müvaraꞌiva nausaricü, müpaüta
catinitamarivamücü, Cacaüyari que mutayü quename vamini
müme meminaquiꞌerie.
\v 13 Tevi mexi ꞌinüasiexime müpaü pücahaineni,
Cacaüyari püta caniyüaneni nesiꞌinüatatü haitü.
Cacaüyari pücayüve mütaꞌinierienicü para ꞌaxa
mütiyurienenicü. Yaxeicüa mücü pücaꞌitaꞌinieni tevi,
para mücü ꞌaxa mütiyurienenicü.
\v 14 Yuxexuitü masi yücümana mepüꞌinierie ꞌaxa
memüteyurienicü. Meteyucahiveꞌerietü mepüyuviyanüa
mepüyuhapaninüa yücümana.
\v 15 Tiyucahiveꞌerietü cuitü ꞌaxa pütiyurieneni.
ꞌAyeꞌame ꞌaxa tiuyurienetü, vaüriyarica pümüni,
yaxeicüa ꞌuca ꞌayehucatü vaüriyarica mütinivenipaü.
\p
\v 16 Xepücateꞌirüviyarieca neꞌivama nenaquiꞌerima.
\v 17 Naitü ꞌimiquieri ꞌaixüa müꞌane, nai temüteꞌumiquie
mürayeꞌaxe, mücü taheima canimiemetüni. Canacaneicani
hecüarivivamete vaꞌuquiyarisüa miemetütü. Mücü
pücayupata, ni ꞌetüriya que mütiyupata tau
ꞌacayunirümecacu, müpaü pücatiyupata.
\v 18 Yücümana müpaü tiuyühüaveca pütaꞌutavevie,
müpaü ꞌutayüca niuquicü yuri mainecü, para tame tita
mütiunetüasie mieme visi temütexeiyariecacü, tame
nivesicapaü temütexeiyariecacü yacütüniquetü.
\s Que müreuyevese yatemüteyuriecacü niuqui que maine
\p
\v 19 ꞌIpaü xequetenemaica neꞌivama nenaquiꞌerima. Peru
yunaitü teüteri mequeyumexüitüaca memüꞌenananicü.
ꞌEmequeteheutevini püta memütiniunicü memüyehaꞌanicü.
\v 20 Tevi haꞌatü yapücaticamieni heiseriemecü,
Cacaüyari que mütixeiya.
\v 21 ꞌAyumieme xequenevivi nai mütiyusevixima, nai ꞌaxa
mütiꞌane naisarie manayuhayeva. Xecaꞌayuꞌeririyatü
xequeneutanaquiꞌeri niuqui xeꞌiyarisie mucaꞌiteüsie. Mücü
caniyüveni xeꞌiyari mütavicueisitüani.
\p
\v 22 Niuqui que maine yaxetecahutü xequenacüni.
Xeꞌiꞌenietü xeicüa xepücayüaca capa xeyucuamananicü
yücümana.
\v 23 Xüca niuqui ꞌenieni xeicüa, xüca yacaticamieni,
tevipaü caniyüaneni xicürisie müyuꞌixüari yühüxie que
mütiyuxexeiya.
\v 24 Yuꞌixüarieme caniyemieni, yapaucua que
mütiyuxexeiyacai püratümaiya.
\v 25 Que müꞌane masi mütaniere mücü ꞌinüarisie
mürayeꞌaxesie mütasixünasie, que müꞌane mücüsie
müꞌayumieme, xüca ꞌuꞌename caratümaiya, masi xüca
yaticamieni müpaü tiyurienetü, mücü ꞌaixüa
caniꞌitüariecamücü yatiyurienetü.
\p
\v 26 Tevi xüca rayexeiyame yuꞌerieca, peru xüca
caꞌipirenutüaca yuneni, mücü masi yücümana
caniyucuamananeni, yacü xeicüa catinayexeiyani.
\v 27 Me xüca rayexeiyani ꞌitiyatü caseviximarietü,
Cacaüyari mütaꞌuquiyari que mütixeiya, müpaü püta
caniyüanemücü. Canivaꞌüviyacamücü memünutuixietüca
viyurasixi meta mexi meꞌuximatüarie. Püyüꞌüviyanita,
tita cuiepa mütimieme caꞌiseviximanicü.
\c 2
\s Que mütivaruꞌimaiyaxü yücü memücatevaxeiyacü
teüteri
\p
\v 1 Neꞌivama, Quesusi Cürisitu Tatiꞌaitüvame visi
müꞌanesie yuri que xemüteꞌerie, xequeteneuhayeva yücü
xetevaxeiyatü teüteri.
\v 2 Mana tevi xüca heutahani xemüyuyexexeürivasie huru
hanirayari vatimanatücaitü visi müꞌane ꞌanacatütü,
xücarita mana heutahani xevitü cui mavetü ꞌanacatünitü,
quesü ꞌuyüni.
\v 3 Xücari cui xeꞌixeiyani que müꞌane visi müꞌane
manacatücü, xüca müpaü xeteꞌicühüaveni, ꞌEcü xüa
ꞌena quenacani ꞌaixüa müꞌanesie, xüca müpaü püta
xeteꞌicühüaveni tevi mümave, ꞌEcüsü ꞌumapaitü
queneuveni, mesü ꞌena nehetüa queneucani,
\v 4 cari huta ꞌiyariyari xepexeiya, cari ꞌisücate
xepayuyeitüa, peru ꞌaxa xeteyücühüavetü.
\p
\v 5 Xequeneneꞌenieca neꞌivama nenaquiꞌerima. Tamüsü
Cacaüyari püvaranuyeteüxixü müme cui memümamave cuiepa
memütama que memütevaxeiya. Müme masi meheucaꞌucame
püvarayeitüa yuri que memüteꞌerie, para vahesie
mütinaquenicü müme memayeꞌaxüanicü tivaꞌaitüvame
mayanicü, que mutayü quename vapitüani müme
meminaquiꞌerie.
\v 6 Xeme püta caꞌayeꞌaveme xepüxata mümave. Tamüsü
xicusixi mecatehüme memütexeꞌuxitüa. Müme mecatehüme
memüxehapa ꞌisücate vahesüa.
\v 7 Tamüsü mümetütü mecatehüme memisevixima que
müꞌanesüa xemümiemete, ꞌaxa meꞌutiyuatü hepaüsitana.
Mücü que müꞌane mühücü, mücü ꞌaixüa püꞌane.
\p
\v 8 Me xüca ꞌacu xeheyeꞌatüani Tiꞌaitame ꞌinüarieya,
ꞌutüarica que maine, Pepinaquiꞌerieca ꞌahepaü tevi
yaxeicüa que pemütiꞌanaquiꞌerie manuyüne, ꞌaixüa
caniꞌaneni.
\v 9 Me xüca yücü petivaxeiyani teüteri, ꞌaxa
xecaniyüaca. ꞌInüari niuquiyari püxehecüata que
xemüteꞌitisana.
\v 10 Que müꞌane naimesie yamüticamie ꞌinüari niuquiyari
que mainesie peru xüca xei niuquiyari hepaüsita
ꞌutiquetamüre, masi hesiena pütiuhüivani miseviximacü
ꞌinüari naime.
\v 11 Que müꞌane müpaü mutayü, Pepücaꞌicumaüvani xeime
ꞌüyaya haitü, mücürita müpaü niutayüni,
Pepücareꞌamemivani. Mericüsü sepa xeime ꞌüyaya
pemücacumaüva, perusü xüca petiꞌamemivani, pepitisanaxü
ꞌinüari niuquiyari.
\v 12 Que xemutiyuane, que xemüteyurie, müpaü
xequetenemaica, ꞌisücame canixetaꞌivaviyamücü ꞌinüari
mütasixüna que maine.
\v 13 Que müꞌane mücatiyucanenimaya, ꞌisücame
caꞌinenimayatü pitahüave. Perusü que müꞌane
mütiyucanenimaya, mücü püraꞌiva sepa ꞌisücame
mitahüave.
\s Xüca yuri tiꞌerieca niu tixaü catiyurienetü, yuri que
mütiꞌerie canimüquini xeicüa
\p
\v 14 Quesü ꞌuyüni neꞌivama, tevi xüca yuri tiꞌeriecame
yuxatani, peru tixaü ꞌasicatiyurienetü. Müpaü niu yuri
que mütiꞌerie, queri tiyüveni para
mütavicueisitüarienicü.
\v 15 Taꞌiva ꞌuquitütü ꞌucatütü xüca ꞌanacavixurieca,
xüca ꞌicuai heuyehüaca tucarisie mieme,
\v 16 xevitü xeme xüca müpaü ticühüaveni, ꞌAixüa
pereuꞌerietü quenemie. ꞌEꞌayesuime quenanacatüqui,
queneutahuxai, ꞌutaitü, peru xüca xecaꞌimini tita
müreuyehüva yuvaiyarisie mieme, quesü ꞌuyünicuta,
ꞌaixüa pücayüni.
\v 17 Yaxeicüa xüca niu yuri tiꞌerieca, peru xüca tixaü
ꞌasicatiyurieneni, yuri que mütiꞌerie pümüqui xeicüa,
yücümana ꞌasimücayüvecü.
\p
\v 18 Perusü xevitü xüari müpaü pütayüni, Mericüte
ꞌecü xeniu yuri pepütiꞌerie, ne masi tixaütü
nepütiyuriene. Queneꞌahecüata yuri que pemütiꞌerie tixaü
ꞌasipecatiyurienetü, ne masi tixaütü ꞌasinetiyurienetü
nepünehecüatani yuri que nemütiꞌerie.
\v 19 Xüari yuri pepütiꞌerie xeniu quename Cacaüyari
yuxevi. Mericüte ꞌaixüa pepaine, peru ꞌasita cacaüyarixi
ꞌaxa memüꞌanene müpaü yuri mepüteꞌerieta. ꞌAyumieme
mepuyüyüacatüca maricacü.
\v 20 Cari yacü xeicüa pepüticuxata. Tietüsü
peꞌavaüriyani müpaü pemüretimanicü, tevi
ꞌasimücayüvecü xüca yuri niu tiꞌerieca tixaü
ꞌasicatiyurienetü.
\v 21 Mericüsü taꞌuquiyari ꞌApurahami heiserie pupitüarie
tixaütü mütiuyuricü quepaucua yunive ꞌIsahaqui mavari
mayeitüaniquecai müratimavarüvasie.
\v 22 Müpaü xüari pepütimate, yuri tiꞌerietü ꞌiya,
ꞌaxeicüa tixaü ꞌasipütiyurienecai. Yuri que
mütiꞌeriecai, payeꞌatüarie müpaü tiyurienetü.
\v 23 Müpaü tiyurienecacu ꞌutüarica nayeꞌani müpaü
manuyüne, ꞌApurahami yuri tinitaꞌeririeni Cacaüyari,
ꞌayumieme heiserie hexeiyame caniꞌerivacaitüni. Cacaüyari
hamicuya niutaterüvarieni.
\p
\v 24 Müpaü xüari xepütemate, ꞌasitiyurienetü xeicüa
heiserie püpitüarieni tevi, yuri tiꞌerietü xeicüa
pücatixaü.
\v 25 Mücürita yaxeicüa pütiuyuri ꞌasita Xahavi
ꞌucatütü tuminicü muyuvitünüacai. Tamüsü tixaütü
mütiuyuricü heiserie caniupitüarieni, quepaucua cuyaxi
müvarutanaquiꞌeri niuqui tuayamete, quepaucua xaüsie
müvarenüꞌa xeime huyeyari ꞌutüa.
\v 26 Ravaiyari canimüquini carecaꞌiyaritü. Yaxeicüata
yuri tiꞌerietü, peru tixaü ꞌasicatiyurienetü,
canimüquinita yuri que mütiꞌerie.
\c 3
\s Taneni que mütiyuruva
\p
\v 1 Neꞌivama teꞌüquitamete xepücaꞌacüne yunaitü,
hipatü xeicüa, müpaü xetemaitü, tame
temüteꞌüquitamete tahesie masi vaüca pürahüivani.
\v 2 Vaücavamecü tepecaxürüve tanaitü. Xüca tevi
niuquisie cahecavauseni, mücü canayeꞌaveni. Caniyüveni
müyupirenutüanicü yuvaiyarisie naime.
\v 3 Xüca pirenu tevarutaqueisitüani cavayasixi
memütasiꞌanuꞌenienicü, mücücü vavaiyari naime taꞌaurie
tepahüpani.
\v 4 Neuxeita naviyasixi ꞌememünene. Sepa memuꞌequetüca
ꞌeca mütürücaüyecü, taꞌaurie mepaxüriva
titunisitüvame ꞌesimüyevacü, que mütiyuvaüriya taꞌaurie
mehüanicü ꞌinüꞌavame.
\v 5 Yaxeicüa taneni püyuxevi xeicüa ꞌesipetü, peru
marivemecü caniyüveni veꞌeme müyuxatanicü. Camü
macucüyexiyasie xüca ꞌutinaini tai ꞌesipemecü, mücü
caniyüveni ꞌeꞌacuyeume mütaxüsitüani.
\v 6 Taneni meta taipaü caniyüveni. Cuiepa timieme
tixatatü ꞌepüyeca tavaiyarisie, tita mücatiheiserie naime
tixatatü. Tavaiyari püsevixima naime.
Pütasixürimüsitüa tatucari naime. Xasi taiyariyarisie
mieme panunetüarie mütacacü.
\v 7 Yunaitüri que memüꞌanene yeutari, viquixi, cuterixi,
haramarasie quiecatari, yunaitü mecanimaxiusievaveni,
teüteri yücümana menivamaxiutavaveni.
\v 8 Peru tevi pücayüve mimaxiutani yuneni. ꞌAxa
catiniyurieneni, püyuxamuriene xeicüa. ꞌUhaye mümüiyacü
xeicüa pühüne.
\v 9 Tanenicü ꞌaixüa teputiyuane Tiꞌaitame mütaꞌuquiyari
hepaüsita. Tanenicü meta teüteri tepüvaruxaxata ꞌaxa
memüꞌitüarienicü, sepa Cacaüyaripaü meꞌanenetü
memutiveviya.
\v 10 Xei tetayarisie püvayeneica niuqui para ꞌaixüa
müꞌitüarienicü para ꞌaxa müꞌitüarienicüta ꞌaxeicüa.
Mücü ꞌaixüa pücaꞌane neꞌivama.
\v 11 Haixapa que tivatineica heuxeicüa ha hacacatü
hacucutü.
\v 12 Neꞌivama xapasie que tiyüve huriva tacariyari
mütixuxuavere, ꞌicü meta, caxie nanayarisie que tiyüve
mütixuxuavere xapa. Yaxeicüata haixa maꞌusivi müvatineica
ꞌaixüa haꞌaneme mayuyeitüani pücayüve.
\s Que mütimaive müpaü tiupitüarieca taheima miemecü
\p
\v 13 Xevitü xeme xüca timaiveni, xüca vaüca timaica,
ꞌaixüa ꞌanemecü yüanetü queyuhecüatani, quename
caꞌayuꞌeriyatü yatiyuriene, que müreuyevese müpaü
mütiyurienenicü timaivetü.
\v 14 Me xüca hasivimecü xeꞌütesaca xüca yuhesie mieme
xeicüa xeyüaca yuꞌiyarisie, mecuxi
xepücateyucataveꞌerieca, mecuxi xepücateꞌitavani
xeheyeꞌunietü tita yuri müraine.
\v 15 Müpaü que xemütemate xüca müpaü ꞌaneni, taheima
miemecü xepücaꞌupitüarie. Cuiepa püta canimiemetüni,
teüteri vaꞌiyarisie pümieme, cacaüyarixi ꞌaxa memüꞌanene
vahesüa pümieme que xemütemaivave.
\v 16 Haque memüꞌütesa haque yuhesie mieme xeicüa
memüyüa, manarita mecaniyuxamuriecuni, naime ꞌaxa
mütiꞌanecü mepüyüaca.
\v 17 Masi que mütimaive taheima miemecü ꞌupitüarieca,
püꞌitiya meri, meta ꞌaixüa pütivaxeiyasitüa hipame,
pücaꞌayuꞌeriya, pütiyuꞌaitüarinüa, yuheyemecü
pütiyucanenimaya, ꞌaixüa pütiyuriene, ꞌuximayasica que
müreuyevese, huta ꞌiyariyari pücahexeiya, yacü xeicüa
pücatiꞌitava.
\v 18 Müme ꞌaixüa memütevaxeiyasitüa teüteri,
yuꞌuximayasica que memüteꞌuꞌesa cayuvatü mehexeiyatü
yuꞌiyarisie, que mütitixuavere, mücücü heiserie
mecanipitüariecuni.
\c 4
\s Tepücaꞌinaquiꞌerieca tita cuiepa mütimieme
\p
\v 1 Titayari xeteyucuyatatüve, mücü haque pemieme.
Titayari xeteyucuitüve. Tamüsü xemünaquiꞌacacü xeicüa
xepüyüa, ꞌayumieme müpaü xepüteyurie, mücü
naquiꞌeriya müyumienecü xevaiyarisie.
\v 2 Tixaütü xepütehiveꞌerie, peru xepücaheixeiya,
ꞌayumieme xepüteyumemiva. Mücü meta, xepüyumexüitüa
hipame vahepaüsita xevaraꞌivacutü, peru xepüyutexie
tixaütü xetehexeiyatü xemacünecü, ꞌayumieme
xepüyucuitüve xepüyucuyatatüve. Masi xepücaheixeiya
xemücaꞌivavacü.
\v 3 Sepa xemütevava, tixaü xepücateyetuiriyarüva,
xeꞌiyari ꞌaxa ꞌanecacu xemütevavacü, xemicasitaruvanicü
xenaquiꞌacutü xeicüa.
\v 4 Cari xeme teüteri hipame vaꞌüitama memüvacumaüva
vahepaü xepüyüa. Xüari müpaü xepücatemate, xüca
ꞌinaquiꞌerieca tita cuiepa mütimieme, piꞌuxiveꞌerie
Cacaüyari. ꞌAyumieme que müꞌane müyuvaüriya
minaquiꞌeriecacü tita cuiepa mütimieme, mücü Cacaüyari
ꞌayeꞌunietü payuyeitüva.
\v 5 Mesü müpaü püta xetecuꞌeriva ꞌacu, quename xeniu
ꞌutüarica yacü xeicüa haine, Cacaüyari ꞌütesatü
pihiveꞌerie mücü ꞌiyari mütasiꞌutuitüa tataüta, que
maine.
\v 6 Peru mücü vaücavamecü masi ꞌaixüa tiucaꞌiyaritü
pütasiyurie. ꞌAyumieme müpaü paine, Cacaüyari
nivarayeꞌunieca müme memüteꞌucataveꞌerie, ꞌaixüa
tiucaꞌiyaritü püta püvayurie müme tixaü memücatehüme.
\v 7 ꞌAyumieme xequeneyuvaüriyani Cacaüyari
mütixeꞌaitüacacü. Xequenayeꞌunieca Cauyumarie. Xüca
müpaü xeteyurieca, mücü Cauyumarie püyutaꞌuna xehesüa.
\v 8 ꞌAura xequenacüni Cacaüyarisüa, mücüta ꞌaura
payani xehesüa. Xequeneuyuꞌitiexüa yumamasie xeme ꞌaxa
teyuruvamete. ꞌAixüa ꞌane xequenayeitüa yuꞌiyari xeme huta
ꞌiyariyari xemexeiyacü.
\v 9 Xequeneꞌuximatüarieca yuꞌiyarisie masi,
xequeneyuhiverieca xequeneutisuanani. Xenanai quepasieca
hiverica mayanicü. Xetemavierica quehüiyani xexüxünitü
püta xequenacüne.
\v 10 Tixaü xecatehümetütü xequenayuyeitüani Tiꞌaitame
hüxie. ꞌAna mücü vavemete püxeꞌayeitüani.
\s Taꞌivama vahesie tepücateꞌuhüpani
\p
\v 11 Xepücayuniuquimaca neꞌivama. Que müꞌane miniuquima
yuꞌiva, que müꞌane yuꞌivasie mütiuhüpa, müpaü
tiyurienetü piniuquima ꞌinüari niuquiyari, pütiuhüpa
ꞌinüari niuquiyarisie. Mericüsü xüca ꞌinüari
niuquiyarisie petiuhüpani, que müꞌane ꞌinüari
niuquiyarisie yamüticamiepaü pepücayüane, ꞌisücamepaü
xeicüa pepüyüane.
\v 12 Que müꞌane ꞌinüari niuquiyari mucaye, que müꞌane
müꞌisücame, mücü caniyuxevini. Mücü caniyüveni
mütiyutavicueisitüanicü mütiyucaꞌunanicü. Quecuta ꞌecü
peꞌane ꞌahepaü tevisie pemütiuhüpanicü.
\s ꞌAsixepücatemate ꞌuxaꞌatüni que mütiyüni hepaüsita
\p
\v 13 Neuxei xeme müpaü xemutiyuane, Hicüri ꞌuxaꞌa nusu
tepüyehu mücü quiecarisie ya mücüsie, mana xei viyari
tepeyurieni, mana tepetaharerutatüveni tepüteꞌivatüveni
xeniu xemutiyuanepaü.
\v 14 Xeme ꞌasixepücatemate ꞌuxaꞌatüni que mütiyünicü.
Quesü titita xetucari. ꞌAüxi xecanihümetüni xeicüa.
ꞌAüxi ꞌepücareutere xeiyarietü, cuitü caxeiyarietü
payeica.
\v 15 Masi peuyevese müpaü püta xemutiyuanenicü, Xüca
müpaü tinaqueni Tiꞌaitame, tepayeyuyurini, meta ꞌipaü ya
müpaü tepüteyurieca, müpaü xeꞌutiyuatü.
\v 16 Peru hicü masi veꞌemete xepüyuxata xetehaꞌerivatü
que xemüteyucataveꞌerie xeicüa. Naime müpaü que
xemutiyuane yuhepaüsita, ꞌaxa xepüteyurie.
\v 17 Mericüsü que müꞌane müpaü mütimate ꞌaixüa
mütiyurienicü, peru müpaü mücatiyuriene, mücü ꞌaxa
pütiyuriene püta xeicüa.
\c 5
\s Xicusixi memüteyucaꞌuximatüa
\p
\v 1 Hicümüsü xeme xemeucaꞌu. Neuxei, xequeneutisuani
xequeneutihivani müpaü xetehaꞌerivatü ꞌuximatüarica
müxeꞌaxirümecü.
\v 2 Titacü xemüteheucaꞌu, mücü pütitipüque.
Xeꞌixuriqui püticümiva cüpisi mepiyuine.
\v 3 Xehuru tepüayari xepürata tepüayari
püyucuitamatüca. Cuitayari pütihecüata xehepaüsita.
Xepüyuhiveritüa, yaxeicüa tai que mütiyucucuinecü
xevaiyarisie. Sepa tucari mütaparirüme xepeuyucaꞌuitüa
xeicüa.
\v 4 Camü teꞌuximayatamete vaꞌivarica. Mepicuxeüri
xevaxata mieme, peru xepüvacuamana xeme. Vaꞌivarica
pümasiücü meuyevesecü. ꞌIsanamete metihivacacu, que
müꞌane Yumüireme Tivaꞌaitüvame mühücü nivaruꞌenieni.
\v 5 Xemeri hiveꞌericacü xeicüa xeyüatü ꞌaxepuꞌuvacai
cuiepa, xerucuyatüvetü xeicüa xepüꞌayumiemetetücai.
Xepüyuvaiyatüacai vacaisixi vahepaü xemücuiꞌivanicü
xeicüa.
\v 6 Xepixanetacai que müꞌane heiseriemecü
yamüticamiecai. Xepeꞌivaxü, xepimi. Peru mücü
pücaxeꞌayeꞌuniecai.
\s Xepücavaüripieca xeteꞌucaꞌenivatü, xequeneyunenevieca
\p
\v 7 ꞌAyumieme neꞌivama xeteꞌucaꞌenivatü
xepücavaüripietücani, Tiꞌaitame mexi canuave. Camü
cuiepa ꞌesame picuevie ꞌicuaxi cuiepa mieme cui mürayeꞌaxe.
Pücavaüripi sepa ꞌemüreutere ꞌauracacu mieme ꞌicürixa
mieme ha tacuevietü.
\v 8 Xemeta xepücavaüripietücani xeteꞌucaꞌenivatü.
Xequeneyutürücariyani yuꞌiyarisie. Canayeꞌaximeni
Tiꞌaitame munuanicü.
\v 9 Neuxei neꞌivama, xeme niuqui xepücaxüatüaca yuꞌivama
vahepaüsita, capa ꞌisücame xetixaniꞌerienicü. Camü
mücü quitenie pütaꞌaxime.
\v 10 Texaxatamete Tiꞌaitamesüa memiemetetütü
memütecuxatacai, müme xequenivaraꞌerivani neꞌivama
ꞌüquisica memühümetücaicü, ꞌaxa müꞌane menevietü que
memüteꞌucaꞌenivacai temüvaꞌüquenicü.
\v 11 Camü müme memüteꞌucaꞌeniva ꞌaixüa meꞌitüariecame
tepüꞌerie. Xepuꞌenana que mütiucaꞌenivacai Cuvi. Müpaüta
xepütehetima ꞌarique Tiꞌaitame que müreyeꞌatüa, Tiꞌaitame
cuini mieme que mütiyucanenimaya.
\p
\v 12 Sepa naimecü neꞌivama, xepücayühüritüaca. Sepa
taheima mieme xexatatü sepa cuie xexatatü sepa que tita
mütihücü xexatatü, xepücayühüritüaca. Xüca
xeyuvaüriyani, hü xequeneutiyuaneni xeicüa. Me tixaü
xüca xecayuvaüriyani, tixaü xequeneutiyuaneni xeicüa,
capa xehesie tiuhüivatü ꞌayanicü.
\p
\v 13 ꞌAxa müꞌane xüca nevieximeni xevitü xeme,
queyutanenevieni. Me xüca yutemavieca queꞌutacuicani.
\v 14 Xüca ticuyeni xevitü xeme, yuꞌaurie
quevaretacuevieni memüyuyexexeüriva vaꞌuquiyarima. Müme
mequeꞌineneviyani meꞌicavirivatü haseiti, que müꞌane
mütiꞌaitame mücü mehahüavetü.
\v 15 Que memüteyunenevie yuri meteꞌerietü, mücücü
pütavicueisitüarieni ticuicame, Tiꞌaitame penucuquetüani.
Mücü meta, xüca ꞌaxa tiuyurieni, mücücü
püreuyehüviyarieni.
\v 16 ꞌAyumieme hipatü mexeꞌeniecacu xequeneyuhecüatani
xüca ꞌaxa xeteꞌuyurieni, xemüyuneneviecacü yuxexuime
yuhesie mieme yunaitü, müpaü xeteꞌivautü
xemanayexüriyanicü. Que müꞌane heiseriemecü
yamüticamie, mücü nenevierieya vaüca caniyüvemücü
Cacaüyari müpaü xüca ticuyuitüvani.
\v 17 ꞌEriyaxi canitevitücaitüni tahepaü tiucaꞌiyaritü.
Mücü cuini mieme püyuneneviecai mücacaviyecü.
Pücaꞌucaviyexü mana cuiepa haica viyari heimana ꞌataxeime
meseri.
\v 18 Tavari puyutanenevi, ꞌana muyuavisie pucaviyexü, cuie
pitixuavitüa ꞌicuaxi.
\p
\v 19 Neꞌivama xüca xevitü xeme heuyevauseni tita yuri
mürainesie cativiyatü, xüca xevitü taꞌaurie hehüani,
\v 20 müpaü xequetenemaica, que müꞌane taꞌaurie mehüa
ꞌaxa tiyuruvame haque meuyeve mücaꞌuyeicanicü, mücü
pitavicueisitüani tucarieya mücaꞌumünicü. Sepa vaüca
ꞌaxa mütiuyuri, mücü canayeitüariemücü.