\id 1PE
\h 1 Pecuru
\toc1 1 Pecuru
\mt PECURU
\mt2 Meitanüꞌaxüa Mexüacame Xapayari
\c 1
\s Vaürisica
\p
\v 1 Ne Pecuru necaninüꞌaritüni Quesusi Cürisitusüa
nemiemetütü. Necanixevaüritüaca xeme xemanayexeiyarie
xemeucuyaxixüa teüteri vasata, Punitutari Carasiyatari
Caparusiyatari ꞌAsiyatari Vitiniyatari vasata xemetitei
hicü.
\v 2 Xecananayexeiyarieni Cacaüyari que mütimaicai
meripaitü taꞌuquiyaritütü. ꞌIyarieya xepatacacu
Cacaüyarisie mieme xecaniyüaca. Quesusi Cürisitu
mumieriecü, xemeta xecaniuꞌitiyani xuriyayacü,
xemüyuvaüriyanicü yaxemütecahunicü que maine. Cuini
mieme ꞌaixüa xüca tiucaꞌiyarini xehesie mieme, xüca
xepitüaca yuꞌiyarisie xemücaꞌuximatüariecacü.
\s Tucari que temütepitüarie mexi tetaꞌicueva yuri
teteꞌerietü
\p
\v 3 Que müꞌane Tatiꞌaitüvame Quesusi Cürisitu
mücacaüyarieya müꞌuquiyarieya, mücü hepaüsita ꞌaixüa
queticuxaxasivani. Mücü vaücavamecü tatinenimayatü,
hutarieca cataniutinuivitüani tucari temexeiyanicü mexi
tetaꞌicueva yuri teteꞌerietü. Quesusi Cürisitu müquite
vasata manucuquecü yunivema catanayeitüani.
\v 4 ꞌAyumieme tahesie catininaquimücü tita mücatipünive
mücatiyüvi mücatiyeive, tita muyuavisie müreꞌüviyarie
xehesie mieme.
\v 5 Xemesü yuri xeteꞌerietü xecaniꞌüviyarieca Cacaüyari
türücariyayacü. ꞌAyumieme xecanitavicueisitüariecuni,
Cacaüyari que mütihaꞌarisie hicü, que mütimasiücüni
xevicueisitüatü tucari ꞌayeꞌayu quepaucua mütapare.
\p
\v 6 Müpaü xetemaitü xecaniyutemamavieca, sepanetü
müreuyevese hicü yapaümexa xemüyeheiveriecacü
xetaꞌinüasietüvetü müiremecü.
\v 7 Xüca xemasiücüni yuri yemecü que xemüteꞌerie,
Cacaüyari ꞌaixüa pütayüni xehepaüsita, visi
pütixexeiya, veꞌemecü ꞌaixüa pütixexeiya quepaucua
masiücütü mayani Quesusi Cürisitu. Xüca müpaü
xetemasiücüni xetaꞌinüasietü, cuini mieme ꞌaixüa
püyüni. Ni huru tuminiyari mütipünive mücüpaü ꞌaixüa
pücaꞌane, sepa taipa müꞌinüasieve.
\p
\v 8 Sepa hasuacu xemücaꞌixeiyavave Quesusi Cürisitu,
xepinaquiꞌerie. Xecaꞌixeiyatü cuxi, hesiena yuri
xepüteꞌerie. ꞌAyumieme xepüyutemamavie ꞌanuyuhayevacamecü
visi ꞌaneme que xemütepitüarie.
\v 9 Titayari yuri xeteꞌerie. Xeꞌiyari
mütavicueisitüarienicü, ꞌayumieme yuri xeteniꞌerieca.
Mericüte, müpaü xeꞌitüarietü xenacünirümeni.
\p
\v 10 Mücü vicueisitüarica hepaüsita
mepüyuꞌiyaritüatüvecai mepütevautüvecai Cacaüyari
niucametemama quepaucua memütecuxatacai que
xemütemiquieniquecai hepaüsita.
\v 11 Mepütevautüvecai quepaucua müxatacai, que müꞌane
tucari mühecüatacai Cürisitu ꞌIyarieya vahesie
mütiviyacai. Yacatiyüvecacu cuxi ꞌIyari pütihecüatacai
Cürisitu que müticuinequecai, ꞌarique visi ꞌanetü que
mürayaniquecai.
\v 12 Mümeri müpaü mepüteꞌuꞌüquitüarie, yuhesie mieme
müpaü mepücayüacai que memütehüritüariecai, tame
püta tahesie mieme mepüyüacai mücü hepaüsita. Xemesü
hicü vicueisitüarica hepaüsita xepüteꞌutahüavarie
vahepaü, texaxatamete yametenixecuxaxatüvacaitüni, ꞌIyari
Mütiyupatasie meteviyatü taheima meyenüꞌariesie.
Cacaüyari niuqui tuayametemama müpaü mepütemaicaqueyu
que xemüteꞌutahüavarie.
\s Que xemüteꞌupasie, müpaü xequeteneuꞌuvani
\p
\v 13 ꞌAyumieme xequeneyuhaꞌaritüaca yuꞌiyarisie ꞌaixüa
ꞌanemecü xetecuꞌerivatü. Xequeneyumateni. Naimesie
xequetenecuevieca tita xemütemiquieni quepaucua
masiücütü mayani Quesusi Cürisitu.
\v 14 Türi yamemütecahu vahepaü xeyüatü, müpaü
xepücayumaica meripaipaü, que xemüteyucahiveꞌeriecai
ꞌasixecatemaitü ꞌana.
\v 15 Que müꞌane müxeꞌutaꞌini canipasieca. ꞌAyumieme
xemeta mücüpaü püta xeꞌanenetü xequenacüni, hesiena
mieme xequenepasieca naimesie que xemüteꞌuꞌuva,
\v 16 müpaü müreꞌuxacü, Xeme xequenepasieca nehesie
mieme, ne nemupasiecü.
\p
\v 17 Mücü yücü cativaxeiyatü nivaꞌinüatani que
memüteyurie yuxexuitü. Müya müꞌane xüca xeꞌutahüave
yuꞌuquiyaritüme, xeteheiyehüvirietü xequeneyüaca mexi
ꞌuva xeꞌutitei
\v 18 müpaü xetemaitü, tita mütipünivecü cumu
püratacü huru tuminiyaricü, mücücü xepücaꞌunanaiya
quepaucua xemuxünarie ꞌuxaꞌatüni varie yacü xeicüa
xemücaꞌuꞌuvanicü, xetevarima que memütexeꞌüquitüacai
yututuyari.
\v 19 Xepuxünarie Cürisitu xuriyayacü püta cuini mieme
masi mürayeꞌaxecü. Mücü mavaripaü muxa nunusipaü
caniumierieni, hesiena carahüivacacu ꞌasicatiyüvitü,
ꞌaixüa ꞌanetü mavari mayanicü.
\v 20 Cuie canetüarievecacu cuxi, Cacaüyari
yacatinimaicaitüni que mütiyurieniquecai ꞌiya. Tucari
ꞌayeꞌaximecacu, xeiyarietü nayani xehesie mieme
\v 21 yuri xemüteꞌerie Cacaüyarisie Cürisitu
yatixepitüacacu, xeme xehesie mieme. Cacaüyari
canenucuquetüani müquite vasata. Visi ꞌaneme nayeitüani
yuri xemütetaꞌerienicü Cacaüyarisie, xemicueviecacü
Cacaüyari.
\p
\v 22 Xecaniyuꞌitirieni yuꞌiyari, tita yuri mürainesie
yaxetecahutü ꞌIyarieya xepareviecacu, ꞌayumieme
xecanivanaquiꞌerieca yuꞌivama yacü xeicüa
xecatevaꞌitaiyatü. Mericüte, ꞌaixüa ꞌiyaricü
xequeneyunaquiꞌerieca müiremecü.
\v 23 Hutarieca xeniutinunuiva. ꞌImüari müpünivesie
xecaputinexüa. Mücapünivesie püta xeputinexüa,
Cacaüyari niuquieya yatixepitüacacu mayeyuri yuheyemecü
ꞌemütiterive.
\v 24 Tamüsü,
\q Yunaitü teüteri
\q ꞌÜxapaü mecaniꞌaneneni.
\q Nai visi que memüꞌanene,
\q ꞌÜxapa mieme tuturipaü
\q Mecaniꞌaneneni.
\q ꞌÜxa pütayüna,
\q Tuturiyari pücaxürieni.
\q
\v 25 Perusü Tiꞌaitame niuquieya püta
\q Yuheyemecü ꞌapütiterive.
\m Mücü niuqui müxata, niuqui ꞌaixüa manuyüne
canihücütüni xemuxatüarie.
\c 2
\p
\v 1 Xequetenehayeva ꞌaxa xeteyurietü naime,
xepücateꞌirümaca, yacü xeicüa xepücatecuxatani,
xepücaꞌütesaca, xepücavaniuquimaca hipame.
\v 2 Türi xique memutinunuivaxü vahepaü püta
xequenehiveꞌerieca resi ꞌiyarisie mieme mücahatuiyarie.
Mücücü xecanitivericuni, xetavicueisitüarietü
xecanacünicuni.
\v 3 Xüari xecaneꞌinüatavaveni, müpaü xepütehetima
ꞌaixüa que mütiucaꞌiyari Tiꞌaitame.
\s Tetepaü que müꞌane mayeyuri
\p
\v 4 Mücüsie xequeteneviyani. Tetepaü caniꞌaneni
mayeyuri. Teüteri menixaniꞌerieca, Cacaüyari püta
nenayexeiya, veꞌemecü ꞌaixüa tinixeiyani.
\v 5 Xeme meta, tetexi que mütiuꞌuitüariva qui mayanicü,
yaxeicüa xeme xeꞌayeyuyuritü xequenetiꞌuitüarie qui
xemacünecü ꞌiyarisie mieme. Maraꞌacate xequenacüni
Cacaüyarisie mieme xemupasiecü, xemixatüanicü mavari
ꞌiyarisie mieme que mütinaque Cacaüyari, Quesusi Cürisitu
xepareviecacu.
\v 6 Tamüsü ꞌayumieme müpaü püreꞌuxa,
\q Neuxei, Siyunisie nenitaqueni
\q Tete manayexeiyarie
\q Sicurita mieme,
\q Cui veꞌeme.
\q Que müꞌane yuri mütiꞌerie hesiena
\q Tixaü pücayuteviyani.
\m
\v 7 Cuini mieme veꞌemecü ꞌaixüa que mütixeiyarie, xemeta
yuri xemüteꞌerie yaxeicüa xepütexeiyarie hepaüna. Yuri
memücateꞌerie vahepaüsita püta que maine,
\q Mücü tete qui vevivamete memixaniꞌeri,
\q Mücütütü sicurita mieme tutuicame nayani.
\m
\v 8 Mücü metatü,
\q Mücü tetesie mepütiꞌücamüre
\q Tete mürecaxüritüre canihücütüni.
\m Müme meniutiꞌücamüre niuquisie yamemücatecahucü.
Müpaü memüteyurienicü meniucayasarieni.
\s Cacaüyari teüterimama
\p
\v 9 Xeme püta xeime nuivari xecanihümetüni
xemanayexeiyarie. Maraꞌacate xepühüme xemüteꞌaitamete
meta, xeime nuivari Cacaüyarisie mieme mupasie xepühüme,
Cacaüyari yuteüterima püxeꞌayeitüa. Müpaü xepüꞌanene
xemütehecüatanicü marivemecü que mütiyuriene que
müꞌane müxeꞌutaꞌini xemütehayevacü yüvipa xeꞌuꞌuvatü,
mücü hecüariyayasie püta xemuꞌuvanicü mümarivesie.
\v 10 ꞌAnapai nuivari xepücahümetücai, hicüsü
Cacaüyari teüterimama xecanihümetüni.
Xepücanenimayasiecai, hicü xeputinenimayasie.
\s Cacaüyari teꞌuximayatametemama xequeneyüaca
\p
\v 11 Nenaquiꞌerima cücamete xecanihümetüni cuꞌuvamete
xecanihümetüni. ꞌAyumieme müpaü necatinixetuicaniqueyu,
xemütehayevacü yaxeteyurietü que mütiyucahiveꞌerie
vaisie tiviyatü. Mücü hiveꞌerica taꞌiyarimatü
caniyucuitüveni.
\v 12 Hipame nuivarite vasata ꞌaixüa ꞌanemecü
xequeneyüaca. Xüca müpaü xeteyurieca, sepa
memüxeniuquima ꞌaxa xemüteyurie meꞌutiyuatü, ꞌaixüa
ꞌanemecü xemüteyuriecü, mexexeiyatü ꞌaixüa meꞌutiyuatü
mecanacünicuni masi Cacaüyari hepaüsita, mücü tucari
ꞌayeꞌayu quepaucua müvaxeiya.
\p
\v 13 Tiꞌaitamesüa xemümiemetecü, yaxequetenecahuni que
memutiyuane yunaitü heiserie memexeiya teüteri vasata.
Yaxequetenecahuni cuiepa tiꞌaitame que maine mücü
müveꞌemecü.
\v 14 Yaxequetenecahuni ꞌisücate que memutiyuane, cuiepa
tiꞌaitame müvareyenüꞌaxüacü memüvatamariꞌitüanicü
müme ꞌaxa memüteyurie, ꞌaixüa memütevatahüavecü müme
ꞌaixüa memüteyurie.
\v 15 ꞌIpaü caniꞌaneni tita mütinaque Cacaüyari, xeme
ꞌaixüa xeteyurietü xemenucunacacü tita yacü xeicüa
memüteꞌutiyuane teüteri ꞌasimemücatemate.
\p
\v 16 Xecanixüxünini, peru xexüxünitü, heiserie
xehexeiyame ꞌaxa xemüteyuriecacü xepücayuꞌerieca.
Cacaüyari teꞌuximayatametemama xecanihümetüni püta.
\v 17 Veꞌemecü ꞌaixüa xequetenivaxeiyani yuxexuime.
Xequenivanaquiꞌerieca ꞌivamarixi. Xequeteneuyehüvirieca
Cacaüyari. Cuiepa tiꞌaitame veꞌemecü ꞌaixüa
xequetenexeiyani.
\s Cürisitu taꞌinüari patüa mütiucuinixücü
\p
\v 18 Teꞌuximayatamete yaxequetenecahuni que memutiyuane
xecusiyarima naimecü xetevareuyehüvirietü. ꞌAixüa
memüteꞌuꞌiyari memücaꞌayuꞌeririya nepücavaxata xeicüa,
masi memüseseꞌita que memutiyuane yaxequetenecahuni.
\v 19 ꞌAixüa püticühüavarüvani xüca hiveritüarieca
Cacaüyari haꞌerivatü, xüca tiucacucuineni heiseriemecü
caꞌitüarietü.
\v 20 Titacü ꞌaixüa xetecühüavarüvani xüca
xeteꞌucaꞌenivani ꞌaxa xeteꞌuyurieme xeicüa, xeꞌutiveiyame.
Masi ꞌaixüa püta xeteꞌuyurieme xeꞌutiveiyame xüca
xeteꞌucaꞌenivani, Cacaüyari ꞌaixüa pütixetahüave.
\v 21 Müpaü mütiyünicü xeputaꞌinierie, Cürisituta
mütiucuinixücü xehesie mieme, ꞌinüari xepitüatü,
xemiveiyanicü ꞌiya que mütiyurienecai.
\v 22 Mücü ꞌaxa pücatiuyuri. ꞌIrümari pücaxuavecai
tetana.
\v 23 ꞌAxa ticühüavarüvatü ꞌaxa pücativarutahüavixü.
Ticuinetü ꞌasipücahainecai quename ꞌaxa vayurieniquecai.
Masi caniuyuyetuani, que müꞌane heiseriemecü müvaꞌinüata
ꞌaixüa miyuririenicü.
\v 24 Mücü yuvaiyarisie canititüni tita ꞌaxa
temüteꞌuyuri cüyesie ꞌucavivatü, tame teꞌutixünarieme
ꞌaxa temücateyurienicü ꞌuxaꞌatüni varie,
temayeyuyurinicü püta heiseriemecü yatetecahutü. Mücü
meucuveiyaxüacü, xepanayexüriya xeme.
\v 25 Masi muxasi memeuyexüripaü xepüyüacai. Hicürixüa
taꞌaurie xeꞌaxürieca muxasi vahüvemesie xepüteꞌuvi, que
müꞌane xeꞌiyari müꞌüviyasie.
\c 3
\s Que müreuyevese yamemüteyuriecacü meyuꞌüitatü
\p
\v 1 ꞌUcari yaxeicüa, yaxequetenecahuni que memutiyuane
xecünama. Müpaü xeteyuriecacu, sepa hipatü
yamemücatecahu niuqui que maine, vaꞌüitama ꞌaixüa
ꞌanemecü xeꞌuꞌuvacacu yuri mepütetaꞌeritüarieni
ꞌasixecaꞌutiyuanecacu,
\v 2 mexexeiyatü que xemüteꞌuꞌuva Cacaüyari
xeteheuyehüvirietü xeꞌitiyatücaitü.
\v 3 Que xemüteyuquemaritüa, herie miemecü xeicüa
xepücamarivani, que xemüteyusaꞌa yücüpasie, hurucü que
xemüteꞌaticuca, que xemüteꞌenacatücü ꞌixuriqui.
\v 4 Masi xequenemarivani que xemüꞌanene yutaüta haque
mücahemasiücü herie, yuꞌiyarisie püta. Xüca xeꞌiyari
caꞌayuꞌeriyani xüca cayuvatü ꞌumaca, mücü masi visi
pürequemarie mücapünivecü. Que müꞌane müpaü müꞌane,
Cacaüyari cuini mieme veꞌemecü ꞌaixüa pütixeiya.
\v 5 ꞌUcari meripaitü ꞌamemuꞌuvacai memüpasiecai
Cacaüyarisie miemecü, memütaꞌicuevacai yuri meteꞌerietü
hesiena, müme müpaü mepüteyuquemaritüacai yametecahutü
que memutiyuanecai vacünama.
\v 6 Sara meta yacatinicamiecaitüni ꞌApurahami que
mainecai, tiꞌaitame tinitamare. Xemeta nivemama xecanacüne
hepaüna ꞌaixüa xeteyurietü, xecamamatü xüca
xemariusieca.
\p
\v 7 ꞌUquisita yaxeicüa, xetemaivavetü yuꞌüitama
vahamatü xequeneutiteni, müpaü xetemaitü, xehepaü
memücatürücavicü yuvaiyarisie. Veꞌemecü ꞌaixüa
xequetenivaxeiyani, müpaü xetemaitü, mexeteütacacu
vahesieta pütinaque tucari memümiquienicü xehamatü.
Müpaü xüca xeteyurieca xenenevieri pücaꞌanunamieni.
\s Yaxequeteneyurieca xeꞌiyari caxeꞌutatienicü
\p
\v 8 ꞌImatürieca yunaitü xequeneyuxevini que
xemüteyücühüave, xequeneyuxevini ꞌaxeicüa
xeyutemamavietü xeyuhiverietü nusu, xequenivanaquiꞌerieca
ꞌivamarixi, xequeteneyucanenimayaca, xepücaꞌayuꞌeririyani.
\v 9 ꞌAxa xeteꞌupitüarieme ꞌaxa xepücavayurieni. ꞌAxa
xeteꞌutahüavarieme ꞌaxa xepücatevacühüaveni. Masisü
xequeneutavaviri Cacaüyari ꞌaixüa memüꞌitüarienicü
püta. ꞌAyumieme xeputaꞌinierie, xehesie mütinaquenicü
ꞌaixüa xemüꞌitüarienicü.
\q
\v 10 Que müꞌane minaquiꞌerimücü tucari,
\q Que müꞌane mixeiyamücü tucari ꞌaixüa müꞌane,
\q Quetihayevani ꞌaxa ꞌutaitü yunenicü,
\q Quetihayevani yutetacü cuamanarica ticuxatatü.
\q
\v 11 Queꞌicuꞌeirieni tita ꞌaxa mütiꞌane,
\q ꞌAixüa quetiyurieneni püta.
\q Queticuvauni ꞌaixüa mütivaxeiyanicü teüteri.
\q Queyumexüitüaca mücücü.
\q
\v 12 Tiꞌaitame nivaxeiyani müme heiseriemecü yamemütecahu,
\q Nacaya vaneneviericü püꞌayumieme.
\q ꞌAxa pütivaxeiya müme ꞌaxa memüteyurie.
\p
\v 13 Mücü meta, quepaicüsü ꞌaxa püxeyurieni xüca
xeyuvaüriyani hicü xemüyumexüitüacacü tita ꞌaixüa
mütiꞌane hepaüsita.
\v 14 Mesü xüca xeteꞌucacucuineni heiseriemecü
yaxemütecahucü, xequeneyutemamavieca masi.
Xepücavamacarüca, xepücayuxamurieca.
\v 15 Masi yuꞌiyarisie xequeteneuyehüvirieca Tiꞌaitame
Cürisitu que mütiupasie. Yuheyemecü xequenehaꞌarisieca
xemütiniunicü tita xemütecueviesie mieme,
yaxeteꞌicühüavetü que müꞌane müxetaꞌivaviya. Müpaü
xetecuxatatü xepücaꞌayuꞌeririyani xeicüa,
xequeteneuyehüviri masi que müꞌane müxetaꞌivaviya,
\v 16 xeꞌiyari ꞌaixüa ꞌanecacu caxetateꞌacacu. Müpaü que
memütexeniuquima, mücü hepaüsita mepüyuteteviyani müme
memüxeniuquima que xemüteyurie ꞌaixüa ꞌanemecü,
Cürisitusie xeteviyatü que xemüyüa.
\v 17 ꞌAixüa caniyümücü xüca xeteꞌucacucuineni ꞌaixüa
xemüteyuriecü, xücate müpaü tinaqueni Cacaüyari, peru
ꞌaxa xemüteyuriecü pücatixaü.
\p
\v 18 Cürisitutütü xei mieme xeicüa caniumüni tita
teüteri ꞌaxa memüteyurie hepaüsita. Que müꞌane
heiseriemecü yamüticamiecai, mücü caniumüni tame
heiseriemecü yatemücatecahu tahesie mieme,
mütasiꞌayeꞌatüanicü Cacaüyarisüa. Que mütitevitücai,
caniumierieni. Yuꞌiyari que mürexeiyacai,
panutanieritüarie.
\v 19 Müpaü ꞌanetü ꞌasita caneyani, püvarutaxatüa
ꞌiyarite memanutaxüriyacai.
\v 20 Müme meripai mepücayuvaüriyacai yamemütecahunicü
quepaucua Cacaüyari mütaꞌicuevacai tiucaꞌenivatü ꞌana
Nuhexi ꞌamuyeicacaisie, mexi naviya veviecai. Mücüsie
meyetetü yayupaümetü ꞌatahaicatü meputavicuei
memutihausie.
\v 21 Mücü ꞌinüari canayani, ꞌüyarica caniꞌinüaritüni.
ꞌÜyaricacü xevaiyari xepücahauxina que müticuiema,
mücücü masi xeꞌiyari caxetateꞌacacu xepüyuhüritüa
Cacaüyari xeꞌeniecacu. Müpaü xepüteyuvicueisitüa hicü,
Quesusi Cürisitu manucuquecü.
\v 22 Mücü Cacaüyari serieta ꞌapuve muyuavisiepai heyaca.
Niuqui tuayamete heiserie hexeiyamete türücariya
hexeiyamete yunaitü yamepütecahu que maine.
\c 4
\s ꞌAixüa xequetenayeꞌatüa que xemüteꞌuhüritüarie
Cacaüyari ꞌimiquierieya hepaüsita
\p
\v 1 ꞌAyumieme, Cürisitu yuvaiyarisie que mütiucuinixü
tahesie mieme, xemeta xequeneyuhaꞌaritüaca que
xemüteyucuinicü, hepaüna xeteyumaitü. Tamüsü que
müꞌane yuvaiyarisie mütiucuinixü catiniuhayeva ꞌaxa
tiyurienetü.
\v 2 ꞌAyumieme mexi yuvaiyarisie ꞌuyeica cuxi,
tiucahiveꞌerietü pücayüaneni, teüteri que
memüteꞌucahiveꞌerie, Cacaüyari que mütinaque püta
yatiniyurienemücü.
\v 3 Senecatü tucari manuyetüasie tucari xepühücai
yaxemüteyurienicü que mütivanaque nuivarite.
ꞌAxecaniuꞌuvacaitüni xerucuyatüvetü, xeteꞌucahiveꞌerietü
xetarüvetü xeꞌixüaratüvetü xecuꞌietüvetü tetexi
xevarayexeiyatü que mücatitauniva.
\v 4 Müpaü xemücateyuriecü hicü mecanihüxiyaca, xeme
vahamatü xemücaꞌutananausacü vahepaü xeyutatuatü
xemütümaiyarienicü. ꞌAxa metenicuxatani.
\v 5 Caneuyevecamücü müme niuqui memütaniunicü yuhesie
mieme quepaucua müvataꞌivaviya que müꞌane ꞌamuve
haꞌarisietü müvataꞌivaviyacü memayeyuyuri müquite
yunaitü.
\v 6 ꞌAyumieme teüteri memucui mecaniutaxatüarieni
hepaüsitana niuqui ꞌaixüa manuyünecü,
memütaꞌivaviyarienicü yuvaiyarisie teüteri que
memüꞌitüariva, yuꞌiyarisie püta memayeyuyurinicü
Cacaüyari que mürayeyuri.
\p
\v 7 Mücü meta, canayeꞌaniri naitü mütiparecü.
ꞌAyumieme xetemaivavetü xequeneyüaca. ꞌAixüa
xequeneyumateni xemüyuneneviecacü.
\v 8 Sepa naimecü, xequeneyunaquiꞌerieca yuheyemecü.
Tiyucanaquiꞌeriecacu canayeitüarivani vaüca ꞌaxa
mütiuyuri.
\v 9 Yuquita xequeneyunaquiꞌerieca niuqui xecaxüatüatü.
\v 10 Cacaüyari que mütixepitüa yuxexuime, müpaü
xequeteneyuparevieca. Que xemüteꞌuhüritüarie Cacaüyari
ꞌimiquierieya hepaüsita mümüire hepaüsita, müpaü
ꞌaixüa xequeteneꞌuximayaca.
\v 11 Xüca niucametüni, Cacaüyarisie mieme ꞌutaniutü
queticuxatani. Xüca tiparevivametüni, müpaü
quetivaparevieca Cacaüyari que mütitürücariya. Müpaü
xeteyuriecacu, Quesusi Cürisitu yatixepitüacacu,
Cacaüyari visi catinicuxaxasivamücü naimecü. Mücü visi
queticühüavarüvani, türücariya quepitüarieca
yuheyemecü. ꞌIcü niuqui caniseüyeni.
\s Cürisitusie tiviyatü que mütiyurieni tiucacucuinetü
\p
\v 12 Nenaquiꞌerima, xepücahüxiyaca xetaꞌinüasietüvetü
sepa taicü. Xeꞌiyarixitüariecame xepücayuꞌerieca müpaü
xemüꞌitüarieximecü.
\v 13 Masisü que xemüteyuxevi Cürisitumatü,
xeteꞌucacucuinetü ꞌiya mütiucuinixüpaü, mücücü
xequeneyutemamavieca. Mücü meta, xüca müpaü ꞌaneni, cui
xecaniyutemamaviecacuni quepaucua masiücütü mayani visi
ꞌanetü.
\v 14 Xüca ꞌaxa xeteꞌutahüavarieni Cürisitusüa
xemümiemetecü, xequeneyutemamavieca, müpaü xetemaitü,
ꞌIyari visi müꞌane xehesie pütiviya, Cacaüyari ꞌIyarieya
hücütütü. Vahesüa ꞌaxa püticuxaxasiva, xehesüa
ꞌaixüa püticuxaxasiva püta.
\v 15 ꞌAixüa pücayüni xüca xevitü xeme tiucacucuineni
mütiyumemivacü mütinavayacü ꞌaxa mütiyurienecü
maniuvecü.
\v 16 Masi xüca tiucacucuineni Cürisitusie mütiviyacü,
pücayuteviyani. Cürisitusüa miemetütü müpaü
queꞌitüarieni masi, Cacaüyari ꞌaixüa
müticuxaxasivanicü.
\p
\v 17 Tucari nayeꞌani ꞌivaurica müsutüarienicü,
Cacaüyari quie quiecatari meri temütaꞌinüasienicü. Xüca
tahesie sutüarieni meri ꞌivaurica, quesü meꞌuꞌitüarieni
müme memücayuvaüriya yamemütecahunicü niuqui que maine
Cacaüyari hepaüsita ꞌaixüa manuyüne.
\q
\v 18 Müme heiseriemecü yamemütecahu
\q Xüca haveri mieme xeicüa meꞌutavicueisitüarieni,
\q Haquevari müme Cacaüyari memücaꞌayexeiya,
\q Haquevari müme ꞌaxa memüteyurie.
\m
\v 19 ꞌAyumieme müme memüteꞌucacucuine müpaü
mütinaquecü Cacaüyari, müme caneuyeveca ꞌaixüa
meteyurietü memüyuyetuanicü, que müꞌane müvarunetüa
müvaꞌüviyanicü vaꞌiyari. Mücü yacatinicamieni que
maine.
\c 5
\s Cacaüyari muxasimama xequenivaꞌüviyani
\p
\v 1 ꞌAyumieme ꞌipaü nepütivatuicaniqueyu xeꞌuquiyarima.
Neta xehepaü necaniꞌuquirasitüni, necaniuniere Cürisitu
tiucuinecu, neta neheixeiyatü necanayani tita ꞌumüramie
visi ꞌanetü que temütexeisitüarieni, ꞌayumieme nepaine.
\v 2 Cacaüyari muxasimama xehesie memüteꞌunaquixü
xequenivaꞌüviyani. Vaüriyarica xecayüatü, xeꞌiyari
yaꞌanecacu püta xequenivaꞌüviyani que mütinaque
Cacaüyari. Tumini xehiveꞌerietü xeicüa xepücayüaca
xeteyucuamanatü, yaxequeteneyuvaüriyani püta.
\v 3 Xevamarivecatüatü müme xehesie memütenaque
xepücayüaca, masi ꞌinüari xequenayuyeitüaca muxasi
vahesie mieme.
\v 4 Quepaucua muxasi vahüvemete vaꞌuquiyari xeiyarietü
mayani, muma xecananutimaniyariecuni mücayeive, visi
xeꞌanenetü xepayeitüarieni.
\p
\v 5 Xeme xemühehecua yaxeicüa, que memutiyuane
ꞌuquiravesixi yaxequetenecahuni. Xecaꞌayuꞌeririyatü
xequeneyüaca yunaime vahepaüsita naimecü.
\q Cacaüyari nivarayeꞌunieca
\q Müme memüteꞌucaxaniꞌerie,
\q ꞌAixüa pütiucaꞌiyari püta
\q Tixaütü memücatehüme vahesie mieme.
\m
\v 6 ꞌAyumieme Cacaüyari yütürücariyacü xetuicacacu,
tixaütü xecatehümetütü xequenacüne, mücü yemecü
tixaü xetehümetüme müxeꞌayeitüanicü tucari ꞌayeꞌayu.
\v 7 Que xemüteyuꞌiyaritüa, xequeteneyetuiri naime, mücü
xehepaüsita müyuꞌiyaritüacü.
\p
\v 8 Xequeneyumateni xequenayeneniereni. Xeneüquixivi
pücuyeica maye mahivapaü ꞌicuvaunetü que müꞌane
mütacuani Cauyumarietütü.
\v 9 Xequenayeꞌunieca, xequeneyuseiriyani yuri xeteꞌerietü,
müpaü xetemaitü, caneuyeveca yaxeicüa
memüteꞌucacucuinenicü yunaitü ꞌivamarixi naisarie cuiepa.
\v 10 Mücü meta, Cacaüyari naimecü ꞌaixüa
catiniucaꞌiyarini. Mücü canixeꞌutaꞌinieni hepaüna visi
xeꞌaneneme müxeꞌayeitüanicü yuheyemecü Cürisitusie
xeteviyacacu. Mücüri yapaümexa xetecuineyu
canixemanesiquitüamücü, canixeseiriyamücü,
canixetürücariyamücü, xequitüa mieme tesariya
canitaquemücü.
\v 11 Mücü türücariya quepitüarieca yuheyemecü. ꞌIcü
niuqui caniseüyeni.
\s Teutüarica
\p
\v 12 Sirivanu taꞌiva yamüticamie que nemüticuꞌeriva
nesipareviecacu, yapaümemecü ꞌipaü
netinixeꞌutaꞌutüirieni nexetuicatü netixehecüatüatü
quename yuricü ꞌipaü ꞌaixüa tiucaꞌiyari Cacaüyari.
Mücü ꞌaixüa tiucaꞌiyaricacu xehesie mieme xequenetiꞌuca.
\p
\v 13 Müme Vaviruniyatari memüyutixexeüriva xehepaü
memanayexeiyarie mecanixevaüritüaca. Nenive Maricuxi meta
canixevaüritüaca.
\v 14 Xeteyucanaquiꞌerietü xequeneuyuvaüritüaca
xeyunaquetü.
\p Yunaitü Cürisitusie xemüteviya xüca xepitüarieca
yuꞌiyarisie xemücaꞌuximatüariecacü. Müpaü xeicüa
caniꞌaneni.