\id 2PE
\h 2 Pecuru
\toc1 2 Pecuru
\mt PECURU
\mt2 Meitanüꞌaxüa Hutarieca Mieme Xapayari
\c 1
\s Vaürisica
\p
\v 1 Ne Simuni Pecuru Quesusi Cürisitusie mieme
necatiniꞌuximayatametüni necaninüꞌaritüni.
Necanixevaüritüaca xeme xemupitüarie yuri
xemüteꞌeriecacü tahepaü, tacacaüyari tasivicueisitüvame
Quesusi Cürisitu que mütixepitüa heiseriemecü
yamüticamiecü.
\v 2 Cuini mieme xüca ꞌaixüa tiucaꞌiyarini xehesie mieme
vaücavamecü, xüca xepitüaca yuꞌiyarisie
xemücaꞌuximatüariecacü, que xemüteꞌimate Cacaüyari,
Quesusi meta Tatiꞌaitüvame.
\s Hamatüana tepütataxevire que mütiꞌane Cacaüyaritütü
\p
\v 3 Mücü Cacaüyaritütü mütürücaüyecü,
pütasiꞌupitüa naime que müreuyevese temayeyuyurinicü
ꞌaixüa ꞌanemecü temüteꞌayexeiyanicü. Müpaü
tecateniupitüarieni temeitimanicü que müꞌane
mütasitaꞌini visi ꞌanetü marivetü.
\v 4 Müpaü müꞌanecü ꞌiya pütasiꞌumi tita
mütatiutahüavixü temeixeiyanicü cuinie rayeꞌarücame
mariveme. Müpaü pütatiumi, mücücü hamatüana
xemüyutaxevirecü que mütiꞌane Cacaüyaritütü, quepaucua
xemütavicueni capa xeseviximariecacü, cuiepa memütama que
memüteyusevixima memüteꞌucahiveꞌeriecü.
\v 5 Mücü ꞌayumiemeyaricü yuri xeteꞌerietü cuini mieme
xequeneyumexüitüaca ꞌaixüa xeꞌanenetü
xemayuyeitüanicü. ꞌAixüa xeꞌanenetü, tita müreuyevese
xetematetü xequenacünita.
\v 6 Yaxetemaitü, xeseseüyetü xequenacünita yuꞌiyarisie
que xemüteyuꞌaitüa. Xeseseüyetü que xemüteyuꞌaitüa
yuꞌiyarisie, yaxeicüa xecayupatatü xequenacünita sepa
ꞌaxa xemüꞌitüarie. Xecayupatatü, xeteꞌayexeiyatü
xequenacünita.
\v 7 Xeteꞌayexeiyatü, yuꞌivama xevanaquiꞌerietü
xequenacünita. Yuꞌivama xevanaquiꞌerietü, yeme
xeteyucanaquiꞌerietü xequenacünita.
\p
\v 8 Müpaü xüca xeteyurieca, cuini mieme xüca
yaxeteyurieca, yacü xeicüa xeteꞌuximayatü
xepücaꞌayeitüarieni, masi pütitixuavere püta que
xemüteꞌimate Tatiꞌaitüvame Quesusi Cürisitu.
\v 9 Que müꞌane müpaü mücaꞌane, mücü ꞌaura xeicüa
caniniereni, masi canacüpeni. Catinatümaiya que
mütiuꞌitiya, tita meripai ꞌaxa mütiuyuri mütiunavaiyari.
\v 10 ꞌAyumieme neꞌivama masi vaüca xequeneyumexüitüaca
xemitürücariyacü mücü ꞌuximayasica para münürecü que
xemüteꞌutaꞌinierie que xemüteꞌanayexeiyarie. Müpaü xüca
xeteyurieca hasuacu xepücaheuyexürieni.
\v 11 Müpaü xeteyurietü, yemecü masi
xecanipitüariecacuni xemayeꞌaxüanicü haque yuheyemecü
müreꞌaita Tatiꞌaitüvame Tasivicueisitüvame Quesusi
Cürisitu.
\p
\v 12 ꞌAyumieme ne sepa müpaü xemütemate, ꞌicü
hepaüsita neheyemecü necanixehaꞌeritüvamücü, sepa
xemutürücariyari tita yuri müraine müxeꞌaꞌaxixücü.
\v 13 Müpaü nepüticuꞌeriva, mexi ꞌicü vaisie neyeca
püheiserie para nemüxeꞌanutahütüanicü müpaü
xemütehaꞌerivanicü
\v 14 müpaü netimaitü, cuitü nepenutihüna ꞌicü
nevaiyari, que münetiuhecüasitüa Tatiꞌaitüvame Quesusi
Cürisitu.
\v 15 Nepünemexüitüa yuheyemecü xemüyüvavenicü
müpaü xemütehaꞌerivanicü neyemieyu.
\s Tepixei que mütimarive Cürisitu
\p
\v 16 ꞌÜxasi cuamanarica mütaveviyasie, mücüsie
tepücateviyacai tame quepaucua temütexeꞌutaxatüa, müpaü
teꞌutiyuatü que mütitürücaüye Tatiꞌaitüvame Quesusi
Cürisitu, que mütinuani meta. Masi tame temunenierixü
tepühüme, temixeicü que mütimarive ꞌiya.
\v 17 Quepaucua Cacaüyari mütaꞌuquiyari veꞌeme mixatacai,
visi ꞌaneme quepaucua mayeitüa, quepaucua xevitü mutaniu
visi ꞌanemesie marivemesie ꞌayevetü müpaü ꞌutaitü
hesiena mieme, ꞌIcü nenive canihücütüni münaquiꞌeriva,
hepaüsitana nemünaquiꞌa, ꞌutaitü,
\v 18 ꞌana tame teniꞌenieni ꞌutaniucacacu taheima, quepaucua
hamatüana temuꞌuvacai yemurisie Cacaüyarisie mieme
müpasiecaisie.
\p
\v 19 Mücü meta, tita masi vaüca mütiseꞌi
tecanexeiyanita texaxatamete vaniuquitüme. ꞌAixüa
xepüteyurie xüca xeꞌiꞌenieca. Macuyüvisie
mühecüariviepaü caniꞌaneni. Xepiꞌenieca mexi cacatarive,
tuxacüta mieme xurave mexi caꞌatineve xeꞌiyarisie.
\v 20 Yemecü peuyevese müpaü xemütemaicacü,
texaxatamete vaniuqui naitü ꞌutüarica xapayarisie
müreꞌuxa, tevi pücayüve yücümana mihecüatanicü.
\v 21 Mücü niuqui quepaucua munua, tevi müpaü
mütinaquecaicü xeicüa hasuacu pücaꞌatüarie. Masi
püꞌatüarie ꞌIyari Mütiyupata vacuyuitüvacacu teüteri
memüpasiecai. Müme yametenicuxatacaitüni Cacaüyarisüa
miemecü.
\c 2
\s Müme texaxatamete teꞌüquitamete memüyuterüva peru
memücahüme
\r (Cura 4‑13)
\p
\v 1 Hipatü texaxatamete memüyuterüvacai peru
memücahümetücai meripai mepanucuꞌui teüteri vasata.
Yaxeicüata hicü xeme xesata hipatü teꞌüquitamete
mepüyuterüvani, peru mücü mepücahümetünita. Niuqui
mecaniꞌatüacuni ꞌavie cümana teüteri
memütatümaiyarienicü yücü manuyünecü. ꞌAsita
mepüyucuꞌimavani, müpaü meꞌutiyuatü quename mecaꞌimate
yucusiyari que müꞌane müvaruxünaxü müvarunanai.
Yapaucua meyutümaiyatü menayuyeitüacuni.
\v 2 Yumüiretü vahesie mecateniviyacuni vahepaü
memüyutatuanicü merucuyatüvetü xeicüa. Müme vacümana,
tita yuri müraine huyeyari püseviximarieca ꞌaxa
ticuxaxasivacacu hepaüsitana.
\v 3 Pinite metehiveꞌerietü, yacü xeicüa meꞌutiniutü
xecümana mepüteꞌivani. Sepa meripai ꞌamemuꞌuva, xüanacüa
pücayüane ꞌisücame ꞌarique müvatahüave, que müꞌane
müvacaꞌuna pücacusu.
\p
\v 4 Camüsü, Cacaüyari pücavaruhayevaxü ꞌasita niuqui
tuayamete taheima miemete ꞌaxa memüteꞌuyuri. Masi
püvayetua tatacuri müvaxuavesie memütaꞌüviyarienicü
meucatevasie müvatiyüvisie mexi cavatahüavive ꞌisücame.
\v 5 Pücavaruhayevaxüta cuiepa memütama meripai miemete,
masi pitaꞌüviyaxü Nuhexi ꞌatahutame vahamame. Mücü
pütixaxatametücai mütivacuxaxatüvacai heiseriemecü
yamemütecahunicü. Pitaꞌüviyaxü Cacaüyari, peru
püvarutihausitüa cuiepa memütama Cacaüyari
memücaꞌayexeiyacaicü.
\v 6 Mücü meta, tatacuri nivarupitüani
memücaꞌunarienicü Surumasie Cumuxasie quiecatari, naxi
nayeitüani vaquiecarite. ꞌInüari nivarayeitüani, müme
ꞌarique ꞌamemuꞌuvaniquecai Cacaüyari mecaꞌayexeiyatü
memüvaraꞌerivanicü que memüteꞌanayecü.
\v 7 Siepüre tevi heiseriemecü yamüticamiecai
niutavicueisitüani Ruti titevacame. Mücü cuinie
tiniutiꞌuxitüarivacaitüni, ꞌinüari sanamete que
memüteꞌuꞌuvacai merucuyatüvetü.
\v 8 Mücü heiseriemecü yacatinicamiecaitüni, peru que
mütinierecai que mütiꞌenacai mexi vasata ꞌayecatei,
tucaricü yuꞌiyarisie püꞌuximatüariecai vaxeiyatü que
memüteyuriecai ꞌinüari memüsanacaicü.
\v 9 Caniyüveni Tiꞌaitame müvatavicueisitüanicü müme
Cacaüyari memayexeiya quepaucua memütaꞌinüasie.
Püyüveta müme heiseriemecü yamemücatecahu
müvataꞌüviyacü vaꞌuximatüatü, ꞌisücame ꞌarique
müvataꞌivaviyacü.
\p
\v 10 Müme masi püvaquema, müme ꞌamemuꞌuva yuvaiyarisie
meteviyatü, meteꞌucahiveꞌerietü memüseviximarienicü,
meꞌixaniꞌerietü que müꞌane tiꞌaitame mühücü. Mümeri
mepücayucuerivayurie, masi yuhesie mieme xeicüa
mepüyutatua. Mepücamama sepa memüvasevixima
mamarivavemete ꞌaxa meꞌutiyuatü.
\v 11 Taheima miemete niuqui tuayamete sepa masi cuini mieme
memümamarivave meyüvavetü metürücavitü, peru müme
mepücavasevixima quepaucua yamemutiyua, mevaxanetatü müya
memüꞌanene Tiꞌaitame hüxie.
\p
\v 12 Müme tatevama memücateꞌuꞌiyari vahepaü meꞌanenetü,
yücümana xeicüa mepüteꞌuꞌiyari, mepütinunuiva
memütiviyarienicü memücuiꞌivacü xeicüa, müme ꞌaxa
meꞌutiyuatü mepisevixima tita ꞌasimemücatemate hepaüsita.
Mericüte, tatevama vahepaü mepütatümaiyarieni müme.
\v 13 ꞌAxa meꞌitüarietü yamepütepiniyarieni ꞌaxa
memüvaruyuricü hipame. Naquiꞌeriya mepüꞌerie hecüta
merucuyatüvetü müme. Mepüyusevixima mepüyuyüriya sepa
xehamatü memütecuaꞌa xeicüa, memünaquiꞌacü
meteꞌirümatüvetü.
\p
\v 14 Yühüxicü ꞌucaravesixi memüvacuvautüvenicü
püvanaque xeicüa memüvacumaüvanicü sepa hipame
vaꞌüitama. Mepücatehayeva metecuvautüvetü ꞌaxa que
memüteyurienicü. Mepütevaꞌirüviya mepüvaviya müme
vaꞌiyari mücaseseꞌi. Müme masi yuꞌiyarisie mepüꞌiyamate
hipame vapinite memütehiveꞌeriecacü. Vahesie pütinaque
ꞌaxa memütetahüavarienicü para ꞌaxa memüꞌitüarienicü.
\v 15 Huye meꞌucuꞌeirieca müxeuraüye, meneuyexürieni.
Varami Vehuri nuꞌaya huyetana meniuyune masi. Mücü
pihiveꞌeriecai tita mütiꞌivaniquecai sepa mücaheiseriecai,
\v 16 peru niutatierieni ꞌinüari mütisanacaicü. Puxuri
sepa memücaniuvave tevi niuquieyacü tiuniutü puxu
caninena tixaxatame que mütiyurienecai cayumaitü.
\p
\v 17 Mümetütü haixapaü mecaniꞌaneneni peru
memayevavaqui. ꞌAüxipaü mecaniꞌaneneni teücacü
müꞌequetücapaü. Yüriya cui müyüvi vahesie mieme
caniꞌüviyariecamücü.
\v 18 Marivemecü que memütecuxata peru yacü xeicüa
meꞌutiyuatü, mepütevaꞌirüviya mepüvaviya müme haveri
mieme memutavicuei, teüteri memeuyexürie vahepaü
ꞌamemuꞌuvacai. Mepütevaꞌirüviya mevahiveꞌericasitüatü,
teüteri yuvaiyarisie meteviyatü que memüteꞌucahiveꞌerie,
para memürucuyatüvenicü xeicüa.
\v 19 Müpaü mepütevacuxaxatüva quename vaniu meyüvaveni
memüyunüꞌacacü yücümana meꞌutiyuatü, peru mümetütü
müya memutiyua masi yemecü vaüriyarica mepüteꞌuximaya
tita mütipüpünisie miemecü. Tita müreꞌiva tevi,
mücüsie mieme vaüriyarica catiniꞌuximayacamücü.
\v 20 Müme memutavicuei mepüteꞌuhayevaxü que
memüteyusevixima cuiepa memütama, memeitimacü Tiꞌaitame
Tiyuvicueisitüvame Quesusi Cürisitu, peru müme xüca
meꞌaꞌivarieni tavari meꞌuviniyarietü meripaipaü,
ꞌimatürieca masi yemecü ꞌaxa meꞌitüarietüvetü
menacünicuni, memücaꞌitüarietüvecaipaü matüaripai.
\v 21 Masi ꞌaixüa püyüniqueyu xüca mecaheitimanique huye
que müꞌanesie ꞌuyeicatü heiseriemecü yamüticamienicü,
peru ꞌaixüa pücayüniqueyu xüca meꞌucunuaxüanique
meheitimaime, meꞌicuꞌeirieme ꞌaisica memüyetuiriyari
müpasie Cacaüyarisie mieme.
\v 22 Müpaü meniuyüni, mücü xasica que maine, Sücü pucunua yuhayari müticuanicü. Mücü meta, ꞌUcaꞌüyarieca tuixu niucunuani hutarieca müyutahaxumanicü. Yuri paine xasica.
\c 3
\s Tucari payeꞌani quepaucua Tiꞌaitame munuani
\p
\v 1 Hicüri nenaquiꞌerima ꞌicü pühücü hutarieca mieme
xapa nemutavevie nemüxeꞌutaꞌutüirie. ꞌIcüsie mieme
ꞌiyasie mieme yanepütixeꞌutaxatüa tita xemütehaꞌeriva,
nexeꞌanutahütüatü nexeꞌiyaritüatü xeꞌiyari müyuxevicü
\v 2 xemeꞌerivanicü que memutiyuanecai texaxatamete
Cacaüyarisie mieme memüpasiecai, yacatiyüvecacu cuxi,
xemeꞌerivanicüta Tiꞌaitame tiyuvicueisitüvame que
mütiꞌaitacai müme memenüꞌarie xehesüa que
memütexecuxaxatüvacai.
\p
\v 3 Yemecü peuyevese müpaü xemütemaicacü, tucari
taparirümecacu teyunanaimavamete mecanitixuavericuni.
ꞌAmeniuꞌuvacuni que memüteꞌucahiveꞌerie xeicüa
\v 4 müpaü meꞌutiyuatü, Haquevasü pücaꞌayeꞌave cuxi
mücü que mutayü quename nuani. Taꞌuquiyarima
memeucusixüapai hicüque, naitü yaxeicüa ꞌanetü
ꞌacanitamaca que mütiꞌanecai sutüapai quepaucua
munetüarie, meꞌutiyuatü.
\v 5 Müpaü meꞌutiyuatü, mepüyuvaüriya müpaü
memütehatümaiyacü, Cacaüyari yaꞌutayücu muyuavi
matüaripai ꞌapuyemacai, cuie meta hapa pune, putaveviya
hacü.
\v 6 Mücücüta ꞌana miemete cuiepa memütamacai
mecaniutatümaiyarieni ha ꞌutahünecu.
\v 7 Mücü müpaü mutayücüta, hicü mieme muyuavi cuie
niꞌüviyarieca mütataiyarienicü, tucari ꞌayeꞌayu quepaucua
teüteri memücaheyexeiya Cacaüyari memütaꞌivaviyarieni
memütatümaiyarieni.
\p
\v 8 Müpaü xeicüa xepücatehetütümaiyani xeme
nenaquiꞌerima, Tiꞌaitame que mütixeiya, xei tucari xei
miriyari viyaripaü caniꞌaneni, xei miriyari viyari meta xei
tucaripaü püꞌane.
\v 9 Tiꞌaitame ꞌereutevitü pücayüane yuniuqui hepaüsita
que mutayü quename müpaü tiyurieni, sepa hipatü
caheyeꞌatüaveme memüꞌerie. Masi pücavaüripie
ꞌemüreuterecü xecuevietü xeme. Pücayuvaüriya teüteri
memütatümaiyarienicü ni xevitü, masi püyuvaüriya
yunaitü memayeꞌaxüanicü para memütehayevanicü que
memüteyuriecai.
\p
\v 10 Peru tucari canayeꞌamücü quepaucua Tiꞌaitame
munuani, tinavayame müꞌaxepaü yüvicüta. ꞌAna muyuavi
canitayeimücü carima ꞌutayuanecacu, titacü mütiutiveviva
naitü canicumaveriyariemücü taicü. Cuie, tita meta
cuiepa memütama memüteꞌutivevie, naitü masiücütü
catinayeimücü.
\p
\v 11 Mericüte, naitü müpaü xüca tiucumaveriyarieni,
quepaü reuyevese que xemüꞌanenenicü xeme, naimecü
xepasietü Cacaüyarisie mieme que xemüteꞌuꞌuva,
xeheyexeiyatü,
\v 12 xeꞌicuevietü mücü tucari, xeꞌimexüitüatü cuitüva mayeꞌanicü para Cacaüyari munuanicü. ꞌAnasü muyuavi tanaꞌiyarieme pütaxüsitüarieni, titacü mütiutiveviva naitü canitavesitüarimücü taicü.
\v 13 Mücü meta, tame tecanicuevieca muyuavi mühecua cuie
mühecua, mücü que mütatiutahüavixü. Mana quiecatari
heiseriemecü yamecateniyuriecacuni.
\p
\v 14 ꞌAyumieme nenaquiꞌerima, xemicueviecü müya ꞌaneme, xequeneyumexüitüaca mücü xetaꞌivaviyame müxexeiyacü xecaseviximariecame xecayüyüvime ꞌaixüa xeteyuxeiyacame püta.
\v 15 Tatiꞌaitüvame que müreuterive tiucaꞌenivatü, tucari
xehüme xequeneyuꞌerieca para xemütavicueisitüarienicü.
Taꞌiva Papuru teminaquiꞌeri yaxeicüa ꞌutaitü
catinixeꞌutiꞌutüirieni, que mütipitüarie müpaü
mütimaivenicü.
\v 16 Naime xapasie yaxeicüa paine ꞌicü xatatü.
Xapateyasie niuqui canixuaveni mücuanive. Müme
ꞌasimemücateyüꞌüquitüavave memücaseseüye meneitatunani
niuquieya, yaxeicüa que memüteꞌituna ꞌutüarica hipame.
Peru müpaü meteyurietü yücümana mepüyutatümaiya
xeicüa.
\p
\v 17 Mericüsü nenaquiꞌerima, müpaü xepütemate
yacatiyüvecacu cuxi. ꞌAyumieme xequeneyucuerivayurieca capa
xecaseseüyetü xeꞌacünecü, ꞌinüari sanamete
metexeꞌirüviyacacu que memüteheuyexürie müme.
\v 18 Masisü xequenevevereni vaücava masi ꞌaixüa
xeteꞌuꞌiyaritü xemacünirümenicü, xeꞌimatetü
xemacünirümenicü Tatiꞌaitüvame Tasivicueisitüvame
Quesusi Cürisitu. Mücü veꞌemecü quecuxaxasivani hicü,
tucari mücaxüve mexi caꞌayeꞌave. Müpaü xeicüa
caniꞌaneni.