\id 1JN
\h 1 Vani
\toc1 1 Vani
\mt VANI
\mt2 Meitanüꞌaxüa Mexüacame Xapayari
\c 1
\s Niuqui tucari tiyupitüvame hepaüsita
\p
\v 1 Tita matüaripai mütimieme, tita temüteꞌuꞌenie, tita
temüteꞌuxei tahüxicü, tita temütexeiyacai, tita
tamamacü temüteꞌumayüa, mücü tecanixecuxaxatüvani
niuqui tucari tiyupitüvame hepaüsita.
\v 2 Tucari masiücütü nayani. Tame tecanixeiya,
tecanihecüatani, tetenixeꞌutaxatüani mücü tucari
mücaxüve hepaüsita. Mücü yuꞌuquiyari
caniteütacaitüni, tepuxeisitüarie tame.
\v 3 Tita temüteꞌuxei, tita temüteꞌuꞌenie, mücü
tecanixecuxaxatüvani xemeta tanaitü temütaxevinicü. Que
temütetaxevi tame, taꞌuquiyarimatü tepütaxevi
nuꞌayamatüta Quesusi Cürisitumatü tepütaxevi.
\v 4 ꞌIpaü tecateniuꞌutüani xemayeꞌaxüanicü
xeyutemamavietü.
\s Cacaüyari hecüariyapaü caniꞌaneni
\p
\v 5 ꞌIpaü panuyüne niuqui hesüana mümieme temiꞌenie
temüxecuxaxatüva. Cacaüyari hecüariyapaü caniꞌaneni,
yüriya pumave hesiena haquevasü.
\v 6 Xüca yateꞌutiyuani quename hamatüana tetaxevi,
yüvipa xüca teꞌuꞌuvani, tepüteꞌitava, yuri
yatepücatecahu.
\v 7 Masisü hecüaripa xüca teꞌuꞌuvani ꞌiya hecüaripa
macavepaü, tanaitü tecanitaxevicacuni. Mücü meta,
Quesusi Cacaüyari münuꞌaya xuriyaya naime ꞌaxa
temüteyurie cataniꞌitirieca.
\p
\v 8 Xüca yateꞌutiyuani quename tita ꞌaxa mütiꞌane
tecatehexeiya, tacümana tepeutayexürüva, tita yuri
müraine tahesie pumave.
\v 9 Me xüca teꞌitahecüata tita ꞌaxa temüteꞌuyuri, ꞌiya
que maine yapüticamie, que mütiheiserie yapütiyuriene,
tita ꞌaxa temüteꞌuyuri pütareuyehüvirieni,
cataniꞌitirieca naime mücatiheiserie.
\v 10 Xüca yateꞌutiyuani quename ꞌaxa tecateyurievave,
mücü tiꞌitavame tenayeitüvani, niuquieya tahesie pumave.
\c 2
\s Cürisitu tahesie mieme pütaniuni
\p
\v 1 Nenivema ꞌicü nepüxeꞌutüirie ꞌaxa
xemücateyuriecacü. Me xüca ꞌaxa tiuyurieni xevitü, tame
tepeixeiya que müꞌane tahesie mieme mütaniuni yuꞌuquiyari
hüxie, Quesusi Cürisitu hücütütü que mütiheiserie
yamütiyuriene.
\v 2 ꞌIya canihücütüni que müꞌane ꞌaixüa mütiuyuri
ꞌaixüa temütexeiyariecacü tame ꞌaxa temüteyurie. Tita
tame temüteyuriecü xeicüa pücaꞌuyü, masi yunaitü
cuiepa memütama vahesie mieme puyü.
\p
\v 3 Xüca yatetecahuni que mütiꞌaita, müpaü
tecatenimaica temeitima.
\v 4 Que müꞌane ne nemeitima maine, yacaticamietü que
mütiꞌaita, mücü tiniꞌitavani, tita yuri müraine hesiena
pumave.
\v 5 Que müꞌane yamüticamie ꞌiya niuquieyasie, yuricü
mücü nayeꞌani tiyucanaquiꞌerietü Cacaüyaripaü. ꞌIpaü
tecatenimaica hesiena temüteviya.
\v 6 Que müꞌane hesiena tiviyatü ꞌemuyeica maine,
caneuyeveca hepaüna müyüaneni ꞌiya müyüanecaipaü.
\s ꞌAisica hecuame
\p
\v 7 Nenaquiꞌerima, hecuamecü netixeꞌaitüatü
nepücatixeꞌutüiri. ꞌAisica meripai canimiemetüni püta
matüaripai xemeixeiya. ꞌIcü ꞌaisica meripai mümieme,
niuqui canihücütüni matüaripai xemeiꞌenie.
\v 8 Mesüte hecuamecü netixeꞌaitüatü
netinixeꞌutüirieca, tita yuri müraine ꞌiya hepaüsita
xehepaüsitata, yüriya macuyeiximecü, tita yuricü
mütihecüariya mühecüariyacüri.
\p
\v 9 Que müꞌane hecüaripa muyeica maine, yuꞌiva muꞌuxie,
mücü yüvipa cuxi caniuyeicani.
\v 10 Que müꞌane yuꞌiva münaquiꞌerie hecüaripa caniuveni,
pücatiquetamüre yücümana.
\v 11 Que müꞌane yuꞌiva muꞌuxie yüvipa caniuveni, yüvipa
tiuyeica, ꞌasipücatimate que mütimie yüriya
mecüpiriyacü.
\p
\v 12 Nenivema nepütixeꞌutüirie tita ꞌaxa xemüteꞌuyuri
xemüteuyehüviyariecü ꞌiyasüa xemümiemetecü.
\v 13 Xeme xemüvaꞌuquiyarima nepütixeꞌutüirie
xemeitimacü ꞌiya matüaripai ꞌamuyeica. ꞌUquisi
nepütixeꞌutüirie xemeꞌivaxücü ꞌiya ꞌaxa mütiyuriene.
\p Türi nepütixeꞌutaꞌutüiri yuꞌuquiyari xemetimacü.
\v 14 Xeme xemüvaꞌuquiyarima nepütixeꞌutaꞌutüiri
xemeitimacü ꞌiya matüaripai ꞌamuyeica. ꞌUquisi
nepütixeꞌutaꞌutüiri xemütürücavicü, Cacaüyari
niuquieya xehesie mütiviyacü, ꞌiya ꞌaxa mütiyuriene
xemaꞌivaxücü.
\p
\v 15 Tita cuiepa mütimieme xepücatenaquiꞌerieca.
Quepaümetü cuiepa mütixuave xepücatenaquiꞌerieca. Tita
cuiepa mütimieme xüca tinaquiꞌerieca, haquevasü
yuꞌuquiyari pücanaquiꞌerie.
\v 16 Tamüsü naitü cuiepa mütixuave, tevitütü tita
mütihiveꞌerie, tita yühüxicü mütihiveꞌerie, yacü
xeicüa que mütiyucataveꞌerie yupini hepaüsita, mücü
taꞌuquiyarisüa pücatimieme, mücü cuiepa pütimieme
püta.
\v 17 ꞌIcü cuie canacuyeiximeni. Tita cuiepa memütama
memütehiveꞌeri canacuyeiximenita. Masi que müꞌane
yamüticamie que mütinaque Cacaüyari, mücü
caniyuhayevani yuheyemecü.
\s Que müꞌane Cürisitu mayeꞌunie
\p
\v 18 Neuxei türi, hicü tucari canayeꞌaniri quepaucua
mütapare. Que xemüteꞌenanacai quename xevitü ꞌuhamie
Cürisitu ꞌayeꞌunietü, hicütütüri yumüiretü Cürisitu
memayeꞌunie mecanixuaveni. ꞌAyumieme tepütemate tucari
mayeꞌa quepaucua mütapare.
\v 19 Tasata mepayecü, masiri tahesüa
mepücamiemetetücai. Xüca tahesüa
memiemetetücaitünique, tahamatü mepuyuhayevaqueyu.
Mecanayecünesüari memümasiücünicü tahesüa
memücamiemetecü.
\p
\v 20 Mücü müpasie heiserie canixeꞌupitüani, yunaitü
xepütemate.
\v 21 Nepücatixeꞌutiꞌutüiri tita yuri müraine
xemücamatecü, tita yuri müraine xemümatecü püta
nepütixeꞌutiꞌutüiri, naitü ꞌitarica yurisie
mücaꞌayeneica xemütematecü.
\p
\v 22 Quepai pütiꞌitava. Que müꞌane müyuhecüata müpaü
ꞌutaitü quename Quesusi heiserie cahexeiya Cürisitutütü,
mücüri catiniꞌitavani. Que müꞌane müyuhecüata
ꞌuquiyarieya cahexeiyatü ni nuꞌayata, mücü Cürisitu
mayeꞌunie canihücütüni.
\v 23 Yunaitü nuꞌaya mecahexeiyatü memüyuhecüata,
ꞌuquiyarieyata mepücahexeiya. Que müꞌane ꞌiya nuꞌaya
hexeiyatü muyuhecüata, mücü ꞌuquiyarieyata canexeiyani.
\p
\v 24 Xeme tita xemüteꞌenie matüaripai, xehesie tiviyatü
queyuhayevani. Xüca xehesie tiviyatü yuhayevani tita
matüaripai xemüteꞌenie, xemerita nuꞌayasie
ꞌuquiyarieyasieta xeteviyatü xecaniyuhayevacuni.
\v 25 Tucari mücaxüve canihücütüni tita ꞌiya
mütatiutahüavixü temeixeiyanicü.
\p
\v 26 ꞌIcü ꞌipaü nepütixeꞌuꞌutüiri memüxeheuyexürüva
vahepaüsita.
\v 27 Xemeri heiserie que mütixeꞌupitüa ꞌiya, mücü
heiserie xemexeiya xehesie tiviyatü caniyuhayeva. Tixaü
xeime xepücaheuyehüva mütixetiꞌüquitüanicü. Mücü
heiserie xemupitüarie ꞌiyasüa mieme mütixeꞌüquitüapaü
naime hepaüsita, yuri mainepaü, mücatiꞌitavapaü,
mütixeꞌutiꞌüquitüapaü, müpaü hesiena xeteviyatü
xequeneyuhayeva.
\p
\v 28 Hicüsüari nenivema hesiena xeteviyatü
xequeneyuhayeva. Xüca müpaü xeteyurieca, quepaucua
masiücütü mayani ꞌiya, ꞌaixüa tepütetamaica
tecatateteviyatü hüxiena quepaucua munuani.
\v 29 Xüca xetemaica ꞌiya yamütiyuriene que mütiheiserie,
xequetenemaica yunaitü yamemüteyurie que mütiheiserie
hesiena memüyecü.
\c 3
\s Cacaüyari nivemama
\p
\v 1 Neuxei taꞌuquiyari que tatinaquiꞌerie. Mücücü
Cacaüyari nivemama teputaterüvari, nivemama tepühüme.
ꞌAyumieme cuiepa memütama mepücatasimate
memücaheitimaivavecaicü ꞌiya.
\v 2 Nenaquiꞌerima hicütütüri Cacaüyari
tecaninivemamatüni. Tixaü cuxi pücamasiücü que
temüꞌaneneni. Müpaü tepütemate, quepaucua masiücütü
mayani Cürisitu, mücü que müꞌane, hepaüna
tepüꞌaneneni, teꞌixeiyatü mücü que müꞌane.
\v 3 Yunaitü ꞌipaü memüteꞌicuevi mepuyuꞌitie yücümana
ꞌiya que mütiꞌitiyapaü.
\p
\v 4 Yunaitü ꞌaxa memüteyurie ꞌaisica menitisanani. Tita
ꞌaxa mütiꞌane ꞌaisica saname canihücütüni.
\v 5 Xeme müpaü xepütemate ꞌiya masiücütü matüacü
mütasinavairienicü tita ꞌaxa temüteyurie. Tita ꞌaxa
mütiꞌane pumave hesiena.
\v 6 Yunaitü hesiena memüteviya ꞌaxa mepücateyurie.
Yunaitü ꞌaxa memüteyurie mepücaꞌixeiyavave
mepücaheitimaivave.
\v 7 Nenivema xüca tüma xevitü caxeheuyexürienique. Que
müꞌane yamütiyuriene que mütiheiserie, mücü heiserie
canexeiyani ꞌiya heiserie mexeiyapaü.
\v 8 Que müꞌane ꞌaxa mütiyuriene Cauyumariesüa
canimiemetüni, Cauyumarie ꞌaxa mütiyurienecü matüaripai.
Cacaüyari nuꞌaya ꞌayumieme masiücütü nayani mitaꞌunacü
Cauyumarie tita mütiyuriene.
\p
\v 9 Yunaitü Cacaüyarisie memüyecü ꞌaxa mepücateyurie
ꞌiya ꞌimüarieya vahesie müyuhayevacü. ꞌAxa memüteyurieni
mepücayüvave Cacaüyarisie memüyecücü.
\v 10 ꞌIpaü mepütemasiücü Cacaüyari nivemama Cauyumarie
nivemama. Yunaitü yamemücateyurie que mütiheiserie, que
müꞌane yuꞌiva mücanaquiꞌerieta, mücü Cacaüyarisüa
mepücamiemete.
\s Xequeneyunaquiꞌerieca yunaitü
\p
\v 11 Müpaü canaineni niuqui matüaripai xemiꞌenie.
Tanaitü tepütanaquiꞌerieca paine.
\v 12 Cainipaü tepücayüaca. ꞌIya ꞌaxa mütiyurienesüa
canimiemetücaitüni, yumuta caniumieni. Titayari timi. Tita
mütiyurienecai ꞌaxa mütiꞌanecaicü, mutaya tita
mütiyurienecai müheiseriecaicü.
\p
\v 13 Neꞌivama xepücahüxiyaca xüca cuiepa memütama
mexeꞌuxieca.
\v 14 Tame taꞌivamarixi temüvanaquiꞌeriecü ꞌayumieme
tepütemate temütapataxü tecamüquitetütüri
teꞌayeyuyuritü püta. Que müꞌane mücatiyucanaquiꞌerie
müquitü ꞌapuyeica cuxi.
\v 15 Yunaitü yuꞌivama memüvaꞌuxie teyumemivamete
mecanihümetüni. Xeme xepütemate tiyumemivame yücümana
tucari mücaxüve pücahexeiya.
\v 16 ꞌIcücü tepeitama naquiꞌeriya, ꞌiya tahesie mieme
yutucari müyetuacü. Caneuyeveca tameta taꞌivama vahesie
mieme tatucari temüyetuani.
\v 17 Que müꞌane yupini cuiepa timieme mürexeiya, mixeiya
yuꞌiva reuyehüacame, xüca yuꞌiyari ꞌanunaca hepaüsitana,
queri tinaquiꞌerieca Cacaüyari.
\v 18 Neuxei nenivema tepücatanaquiꞌerieca niuquicü
xeicüa yacü xeicüa. Que temüteyurie püta yuricü püta
tepütanaquiꞌerieca.
\s ꞌAixüa tepütemaica Cacaüyari hüxie
\p
\v 19 Müpaü tetenimaicacuni tita yuri mürainesie
temümiemetecü. Cacaüyari hüxie müpaü taꞌiyari
tepütenütüaca
\v 20 xüca taꞌiyari tasiꞌutatieni. Tita taꞌiyari
mücatimate Cacaüyari püta catinimaica, naime pütimate.
\v 21 Nenaquiꞌerima taꞌiyari xüca catasiꞌutatieni ꞌaixüa
tepütemaica Cacaüyari hüxie,
\v 22 naime temitavaviricü tepütanaquiꞌeri
yatemütecahucü que mütiꞌaita, tita mütinaque
yatemüteyuriecü.
\v 23 ꞌIpaü catiniꞌaitani, yuri temütetaꞌerienicü que
müꞌane Cacaüyari nuꞌaya mühücüsie Quesusi Cürisitusie,
temütanaquiꞌeriecacü tanaitü mücü que mütatiuꞌaitüa.
\v 24 Que müꞌane yamüticamie que mütiꞌaita, Cacaüyarisie
tiviyatü puyuhayeva, Cacaüyarita hesiena tiviyatü
tiyuhayeva. ꞌIpaü tecatenimaica tahesie tiviyatü
muyuhayeva, yuꞌiyari mütasiꞌumicü.
\c 4
\s ꞌIyari yuri maine, ꞌiyari meuyuyehüpa
\p
\v 1 Nenaquiꞌerima yunaime ꞌiyarite yuri
xepücatevaꞌeririeca. Xequeteneutaꞌinüataxüa ꞌiyarite
masi, siparasü xüca Cacaüyarisüa memiemetetüni.
Yumüiretü yacü xeicüa texaxatamete meneutayeixüani
cuiepa.
\v 2 ꞌIpaü xepüteheitimani Cacaüyari ꞌIyarieya. Yunaitü
ꞌiyarite memüyuhecüata Quesusi Cürisitusie tevi matüasie
meteviyatü, müme Cacaüyarisüa mecanimiemetetüni.
\v 3 Yunaitü ꞌiyarite memücayuhecüata Quesusisie
meteviyatü Cacaüyarisüa mepücamiemete. Mücü Cürisitu
muꞌuxiesüa mecanimiemetetüni. Xeme xepuꞌenana quename
ꞌuhamie, hicüri cuiepa caniuyeicani.
\p
\v 4 Nenivema xeme Cacaüyarisüa xecanimiemetetüni,
xepüvaraꞌivaxü. ꞌIya xehesie mütiviya canitürücaüyeni.
Mücü cuiepa memütama vahesie mütiviya masi
pücatürücaüye ꞌiyapaü.
\v 5 Müme cuiepa mecanimiemetetüni. ꞌAyumieme cuiepa mieme
metenicuxatani, ꞌayumieme cuiepa memütama mecanivaꞌenieca.
\v 6 Tamesü Cacaüyarisüa tecanimiemetetüni. Que müꞌane
Cacaüyari mümate cataniꞌenieca. Que müꞌane Cacaüyarisüa
mücamieme pücatasiꞌenie. ꞌIcücü tepüvamate ꞌiyari yuri
maine ꞌiyari meuyuyehüpa.
\s Cacaüyari catiniyucanaquiꞌerieca
\p
\v 7 Camüsü nenaquiꞌerima tepütanaquiꞌerieca tanaitü.
Naquiꞌeriya Cacaüyarisüa canimiemetüni. Yunaitü
memüteyucanaquiꞌeri Cacaüyarisie mecaniyecüne, Cacaüyari
mecanimaica.
\v 8 Que müꞌane mücatiyucanaquiꞌeri Cacaüyari
pücahetimaive Cacaüyari mütiyucanaquiꞌeriecü.
\v 9 ꞌIcücü tahesie masiücütü nayani Cacaüyari que
mütatinaquiꞌeri, Cacaüyari yunive muyuxevi meyenüꞌacü
cuiepa, mücücü temayeyuyurinicü.
\v 10 Müpaü caniꞌaneni naquiꞌeriya. Tameri
tepücaꞌinaquiꞌeriecai Cacaüyari. Mücü püta
pütasinaquiꞌeriecai, yunive reyenüꞌa ꞌaixüa miyurienicü
ꞌaixüa temütexeiyarienicü tame ꞌaxa temüteyurie.
\p
\v 11 Nenaquiꞌerima Cacaüyari xüca müpaü
tatinaquiꞌeriecaitüni, caneuyeveca tameta müpaü
temütetanaquiꞌeriecacü tanaitü.
\v 12 Xevitü pücaꞌixeiyave Cacaüyari hasuacua. Xüca
tetanaquiꞌerieca tanaitü, Cacaüyari tahesie tiviyatü
caniyuhayeva. Mücü que mütiyucanaquiꞌeri, naquiꞌeriya
nayeꞌani tahesie.
\v 13 ꞌIpaü tepütemate hesiena temüteviya mücürita
tahesie mütiviya, yuꞌiyari mütasiꞌumicü taxexuime.
\v 14 Tame tepunenierixü tecatenihecüatani taꞌuquiyari
yunive meyenüꞌacü cuiepa memütama vavicueisitüvame.
\v 15 Que müꞌane müyuhecüata müpaü ꞌutaitü quename
Quesusi Cacaüyari nuꞌaya hücü, Cacaüyari hesiena
tiviyatü caniyuhayeva, mücüta Cacaüyarisie tiviyatü
tiyuhayeva.
\p
\v 16 Tame tecatenetimani que mütatinaquiꞌeri Cacaüyari,
yuri teteniutaꞌerieni naquiꞌeriyayasie que
mütatinaquiꞌerie. Cacaüyari catiniyucanaquiꞌerieca. Que
müꞌane tiyucanaquiꞌerietü muyuhayeva, mücü Cacaüyarisie
tiviyatü caniyuhayevamücü, Cacaüyarita hesiena tiviyatü
tiyuhayeva.
\v 17 Naquiꞌeriya müpaü tinayeꞌani tahesie ꞌaixüa
temütetamaicacü mücü tucarisie quepaucua ꞌisücame
mütasitaꞌinüata, hepaüna temüꞌanenecü tame ꞌena cuiepa
ꞌiya müꞌanepaü.
\v 18 Xüca tiyucanaquiꞌerieca marica pücaxüave.
Naquiꞌeriya mayeꞌaxe marica payeveveiya. Que müꞌane müma
caniꞌuximatüarieca. Que müꞌane müma pücaꞌayeꞌave
tiyucanaquiꞌerietü.
\p
\v 19 Tame tepütetacanaquiꞌerie mücü meri
mütasiꞌutanaquiꞌericü.
\v 20 Xüca xevitü yaꞌutayüni, Ne Cacaüyari
nepünaquiꞌerie haitü, xüca yuꞌiva ꞌuxieca, mücü
catiniꞌitavani. Que müꞌane yuꞌiva xeiyatü
mücaꞌinaquiꞌerie, capüyüve minaquiꞌerieca Cacaüyari
caꞌixeiyavetü.
\v 21 ꞌIcü ꞌaisica tecanexeiyani hesüana mümieme. Que
müꞌane Cacaüyari münaquiꞌeri, yuꞌivata quenaquiꞌerieca.
\c 5
\s Yuri tiꞌerietü, tita cuiepa mütimieme püraꞌiva
\p
\v 1 Yunaitü yuri memüteꞌerie quename Quesusi heiserie
ꞌupitüarie Cürisitutütü Cacaüyarisie mecaniyecüne. Que
müꞌane ꞌiya ꞌuquiyarieya münaquiꞌerie, ꞌiya hesiena
müyetüata caninaquiꞌerieca.
\v 2 Tame ꞌipaü tepütemate Cacaüyari nivemama
temüvanaquiꞌerie, quepaucua Cacaüyari temünaquiꞌerie,
quepaucua yatemütecahu que mütiꞌaita.
\v 3 ꞌIpaü teteniyurieca xüca Cacaüyari tenaquiꞌerieca,
yatepütecahuni que mütiꞌaita. ꞌAisicaya pücahahete.
\v 4 Naitü Cacaüyarisie müyetüa cuiepa mieme
canaꞌivarümeni. Tita yuri temüteꞌerie, mücü
canihücütüni tita ꞌari müreꞌiva cuiepa timieme.
\v 5 Quepaicü pühücü cuiepa mieme maꞌivarüme. ꞌIcüri
pühücü, que müꞌane yuri mütiꞌerie quename Quesusi
Cacaüyari nuꞌaya hücü.
\s ꞌIyari catinihecüatani
\p
\v 6 ꞌIcü Quesusi Cürisitutütü canihücütüni que
müꞌane ha xuriya ꞌinüariyaricü munua. Ha ꞌinüariyari
hexeiyatü xeicüa pücanua, masi ha xuriya ꞌinüariyari
hexeiyatü punua. ꞌIyari müpaü tinihecüatanita, ꞌIyari
yuri mainecü.
\v 7 Mepüyuhaica memütehecüata taheima, taꞌuquiyari,
Nuꞌaya, Iyarieya Mütiyupata mepühüme. ꞌIcü yuhaicatü
mecaniyuxevini.
\v 8 Mepüyuhaica memütehecüata cuiepa. Cacaüyari
ꞌIyarieya, ha, xuriya mepühüme. Yuhaicatü ꞌaxeicüa
mepütehecüata.
\v 9 Teüteri que memütehecüata tecanivaꞌenieca.
Mericüte, Cacaüyari que mütihecüata masi
caniheiserietüni. ꞌIpaü catinihecüatani Cacaüyari,
yunive hepaüsita tiniutahecüata.
\v 10 Que müꞌane yuri mütiꞌerie Cacaüyari Nuꞌayasie
mücü hecüasica pexeiya yuhesie. Que müꞌane Cacaüyari
yuri mücatiꞌeriri, mücü Cacaüyari tiꞌitavame
canayeitüvani, yuri mücatiutaꞌericü que
mütiutahecüataxü Cacaüyari yunive hepaüsita.
\v 11 Müpaü paine tita mütihecüata. Cacaüyari
cataniupitüani tucari mücaxüve. Nuꞌayacü canixuaveni
mücü tucari.
\v 12 Que müꞌane ꞌiya nuꞌaya mexeiya, tucari pexeiya. Que
müꞌane Cacaüyari Nuꞌaya mücahexeiya, tucari pücahexeiya.
\s Xepütemate tucari mücaxüve xemexeiyacü
\p
\v 13 ꞌIcü nepütixeꞌutiꞌutüiri xeme yuri xemüteꞌerie que
müꞌane Cacaüyari nuꞌaya mühücüsie xemütemaicacü
tucari xemexeiya mücaxüve.
\p
\v 14 ꞌIpaü ꞌaixüa tepütetamate hüxiena. Xüca tixaütü
teteꞌitavavirieni que mütinaque, pütasiꞌenie.
\v 15 Mücü meta, xüca müpaü tetemaica mütasiꞌenie tita
temüteꞌivaviri, tepütemate temeixeiya tita
temüteꞌivaviri.
\p
\v 16 Xüca xevitü ꞌixeiya yuꞌiva ꞌaxa tiyurieneme que
mücatimüni, canitavaviriemücü yuꞌivasie mieme. Tucari
mecanipitüariecuni müme ꞌaxa memüteyurie que
mücatimüni. Tita ꞌaxa mütiꞌane puxuave ꞌaxa xüca
tiuyurieni mümünicü. Mücüsie mieme xemitavavirieni
ꞌasinepücahaine.
\v 17 Naitü mücatiheiserie ꞌaxa caniꞌaneneni. Tita ꞌaxa
mütiꞌane puxuave ꞌaxa xüca tiuyurieni mücamünicü.
\p
\v 18 Tame tepütemate yunaitü Cacaüyarisie memüyecü
ꞌaxa mepücateyurie. ꞌIya Cacaüyarisie müyetüa
canivaꞌüviyani, ꞌiya ꞌaxa mütiyuriene pücavamayüa.
\p
\v 19 Tepütemate Cacaüyarisüa temümiemete, naitü cuiepa
mütimieme ꞌiya ꞌaxa mütiyurienesie tiviyatü ꞌamuve.
\p
\v 20 Tepütemate Cacaüyari nuꞌaya munua, mütasiꞌenatüa
temimaicacü mücü muyuri. Tame ꞌiya muyurisie tepüteviya
nuꞌayasie Quesusi Cürisitusie. ꞌIcü yuricü
canicacaüyaritüni, tucari mücaxüve canihücütüni.
\v 21 Nenivema xequeneyucuerivayurieca cacaüyarixi
vahepaüsita.