\id 2JN
\h 2 Vani
\toc1 2 Vani
\mt VANI
\mt2 Meitanüꞌaxüa Hutarieca Mieme Xapayari
\c 1
\s Vaürisica
\p
\v 1 Ne nemüxeꞌuquiyari necanixevaüritüaca ꞌuca
pemanayexeiyari ꞌanivemata. Yuricü nenixenaquiꞌerieca. Ne
xeicüa pücatixaü, masi tanaitü temeitima tita yuri
müraine tepüxenaquiꞌeri
\v 2 tita yuri müraine tahesie tiviyatü muyuhayevacü,
mütasiteütacü yuheyemecü.
\v 3 Cacaüyari taꞌuquiyari, Quesusi Cürisitu taꞌuquiyari
münuꞌaya, yuricü meꞌutiyuatü meteyucanaquiꞌerietü, xüca
ꞌaixüa meteꞌuꞌiyarini xehesie mieme, xüca mexenenimayaca,
xüca mexepitüaca yuꞌiyarisie xemücaꞌuximatüariecacü.
\p
\v 4 Vaüca nepünetemaviecai nemütimariecü ꞌanivema
hipatü tita yuri mürainesie meteviyatü memuꞌuvacü,
ꞌaisica taꞌuquiyarisüa mieme que temüteꞌupitüari.
\v 5 Hicüri ꞌuca hecuamecü nematiꞌaitüatü
nepücamatiꞌutüirie, mücü ꞌaisica matüari temeixeiyacai
nepümatiꞌutüirie püta. ꞌIpaü nepümativaviri, tanaitü
temütanaquiꞌeriecacü.
\v 6 ꞌIpaü teteniyurieca xüca tetetacanaquiꞌerieca,
tepuꞌuvani que mütiꞌaita. ꞌIcü caniꞌaisicayatüni,
xeteyucanaquiꞌerietü xemuꞌuvanicü, matüaripai que
xemüteꞌuꞌenana.
\s Memeuyuyexürüva
\p
\v 7 Yumüiretü memeuyuyexürüva mecaneutayeixüani
cuiepa. Müme mepücayuhecüata quename Quesusi Cürisitusie
tevi matüasie meteviya. Müya ꞌanetü canihücütüni
reuyuyehüpame, müya ꞌanetü tihücü ꞌiya Cürisitu
mayeꞌunie.
\v 8 Xequeneyucuerivayurieca capa xeheiyexürienicü
taꞌuximayasica, masi yuꞌivarica naime xemüpitüarienicü.
\p
\v 9 Yunaitü memanuyehaitürüve, tita Cürisitu
mütiꞌüquitasie meteviyatü memücayuhayeva, mücü
Cacaüyari mepücahexeiya. Que müꞌane tita mütiꞌüquitasie
tiviyatü müyuhayeva, mücü yuꞌuquiyari pexeiya nuꞌayata
rexeiya.
\v 10 Xevitü xüca xehesüa nuani ꞌicü ꞌüquisica
cahexeiyatü, xepücaꞌiꞌinieca yuquie,
xepücaꞌivaüritüaca.
\v 11 Que müꞌane mitvaüritüani, mücü ꞌuximayasicaya
ꞌaxa que müꞌanene, müpaü ꞌanetü canayeimücü.
\s Xehesüa nepeuyeimücü
\p
\v 12 Sepanetü müireme nemütixetiꞌutüirieniquecai,
nepücanevaüriya xapacü tauxicü. Masisü xehesüa
nepeuyeimücü püta, tahüxi teꞌutinenieretü
temütetaxatacü xemayeꞌaxüani xeyutemamavietü.
\p
\v 13 ꞌAꞌiva ꞌuca manayexeiyari nivemama
mepümasivaüritüa. Müpaü xeicüa caniꞌaneni.