\id JUD
\h Cura
\toc1 Cura
\mt CURA
\mt2 Meitanüꞌaxüa
\c 1
\s Vaürisica
\p
\v 1 Ne Cura Quesusi Cürisitusie mieme
necatiniꞌuximayatametüni Cacuvu ꞌivaya nehücütütü.
Necanixevaüritüaca xeme xemünaquiꞌeriva Cacaüyari
mütaꞌuquiyarisie xeteviyatü, Quesusi Cürisitu
müxeꞌüviya xemutaꞌinierie.
\v 2 Xüca xenenimayasieca, xüca xepitüarieca yuꞌiyari
xemücamüiriyanicü, xüca xenaquiꞌerivani yemecü.
\s Meteꞌitavatü que memüteꞌüquitani
\r (2 Pecuru 2:1‑17)
\p
\v 3 Nenaquiꞌerima, cuini mieme necaninemexüitüacaitüni
nemütixetiꞌutüirienicü tanaitü ꞌaxeicüa que
temütetavicueisitüariexime hepaüsita, peru neuyeveca
yanemütixetiꞌutüirienicü hicü vaüriyarica nexepitüatü
xemüyucuitüvenicü tita yuri temüteꞌerie hesie mieme,
tita Cacaüyari teüterimama xei mieme temüteyetuiriyarie
hesie mieme.
\v 4 Hipatü teüteri tasata menatahaxüani ꞌavie. Meripai
meniucayasariexüani müpaü memütemariꞌitüarienicü.
Cacaüyari mepücaꞌayexeiya, mecanipata tita Cacaüyari
mütivamicua ꞌaixüa tiucaꞌiyaritü, para memüyutatuanicü
merucuyatüvetü xeicüa. Mecaniyucuꞌimavani müpaü
meꞌutiyuatü quename mecaꞌimate que müꞌane hücüatü
mütacusiyari mütatiꞌaitüvame Quesusi Cürisitu.
\p
\v 5 Sepa xei mieme müpaü xemütehetima naimecü,
necanixeꞌeritüamücüni que mütiuyü hepaüsita quepaucua
Tiꞌaitame müvarutavicueisitüa ꞌIxaherisixi teüteriyari
ꞌEquipitu cuieyarisie vareyevitüca. Varutavicueisitüaca
ꞌarique nivarucaꞌuna müme yuri memücateꞌeriecai.
\v 6 Taheima miemete niuqui tuayamete meta hipatü
mepücayüꞌüviyacai que memütehüritüariecai matüaripai,
mepicuꞌeirie masi yuquie. Mücü Cacaüyari canivaꞌüviyani
memütaxanesienicü tucari mümarive ꞌayeꞌayu,
nivaranutaxürüvani yüriyasie tepüa mücaxüvecü.
\v 7 Vahepaüsü mecaniuyüni Surumatari Cumuxatari vaꞌaurie
miemete quiecaritesie quiecatari. ꞌAmeniuꞌuvacaitüni müme
mevacumaüvatü que müꞌane mücavaꞌüyatücai
mücavacünatücai, meꞌicumaüvatü titacü
memüteyuseviximacai. Mümeta meniucayasariexüani ꞌinüari
memacünecü memariꞌitüarietüvetü taipa yuheyemecü
mütaivesie.
\p
\v 8 Peru hicü miemeteta yaxeicüa mecaniꞌaneneni. Que
memüteheinüsa meniseviximaca yuvaiyari. Menixaniꞌerieca
que müꞌane tiꞌaitame mühücü, mecanivaseviximani
mamarivavemete ꞌaxa meꞌutiyuatü vahepaüsita.
\v 9 Mücü Miyeri niuqui tuayamete tivaꞌaitüvame
mühücü, quepaucua Cauyumariematü mücü niuqui
memüxüatüacai Muisexi caxarieya hepaüsita, mücü
pücayuvaüriyacai miseviximanicü Cauyumarie hesiena
tiuhüpatü, masi müpaü niutayüni, Tiꞌaitame
quematitieni.
\v 10 ꞌIme püta meniseviximaca tita ꞌasimemücatemate
hepaüsita ꞌaxa meꞌutiyuatü. Que memütemate, yücümana
xeicüa mepütemate tatevama memücateꞌuꞌiyari vahepaü.
Müpaü metemaitü ꞌayumieme mecanitümaiyarieca.
\p
\v 11 Xüa ꞌui müme. Caini huyeta meneucayune hepaüna
meteꞌuꞌuvatü. Tuminicü meniyutatuani memeuyexürienicü
Varamipaü mütiꞌivamücücaipaü. Meniutatümaiyarieni
yaxeicüa que mütiuyü quepaucua Cure meyeꞌuniecai Muisexi.
\v 12 ꞌIme meniseviximaca xeꞌicuai quepaucua
xeyunaquiꞌerietü xemütecuaꞌa, memücateheuyuyehüviriecü
quepaucua xehamatü memütecuaꞌa. Muxasi vahüvemete
meyuterüvatü mepüteyumicua xeicüa. Haivitüri
mayevavaquipaü mecaniꞌaneneni ꞌecacü mecuꞌenetüvetü.
Cüyexipaü mecaniꞌaneneni memücaꞌutixuxuavere tucari
mayeꞌaxesie. Hutacüa mepucui, mepüvatihunarietüca.
\v 13 Memasiücütü mepayuyeitüva que memüteyurie
meyuteviyasitüatü, yaxeicüa hamevari mayuꞌeriya
mücuaimuxa masiücüme que mürayuyeitüva haramarasie.
Xuravesixi memeuyexürüve vahepaü mecaniꞌaneneni. Yüriya
cui müyüvi caniuꞌüviyarieni vahesie mieme yuheyemecü.
\p
\v 14 Müya memüꞌanene meripai catinivacuxaxatüvacaitüni
ꞌEnuqui ꞌArani müxiüyarieyatücai ꞌatahutarieca mieme,
müpaü ꞌutaitü, Nenixeiya Tiꞌaitame nuaximeme yuteüterima
varavitütü müireme miriyari meyupaümeme,
\v 15 yunaime vataxanetaque, yunaitü Cacaüyari
memücaꞌayexeiya vahesie tiuhüanique naime hepaüsita que
memüteꞌuyuri Cacaüyari mecaꞌayexeiyatü vatahüaveque,
naime niuqui müꞌaüxaüna hepaüsita, que memüteꞌiniuquima
Cacaüyari hepaüsita ꞌaxa teyuruvamete Cacaüyari
memücaꞌayexeiya.
\v 16 ꞌIme mecanihümetüni niuqui xüatüacate
niuquixivivamete. Que memüteꞌucahiveꞌerie xeicüa
ꞌameniuꞌuvani. Yutetacü vaüca mepütecuxata
meteyucataveꞌerietü. Niuquicü meꞌutiniutü
menivatemavieritüaca teüteri memüvaraꞌivanicü.
\s Que mütivaꞌimaiyacai que mütivatuicacai
\p
\v 17 Xemesü nenaquiꞌerima, niuqui xequenaꞌerivani meripai
que memutiyua Tatiꞌaitüvame Quesusi Cürisitu nüꞌarimama
yacatiyüvecacu cuxi.
\v 18 Müpaü metenixecühüavecaitüni, Tucari
taparirümecacu ꞌamenitamacacuni teyunanaimavamete.
ꞌAmeniuꞌuvacuni que memüteꞌucahiveꞌerie xeicüa Cacaüyari
mecaꞌayexeiyatü.
\v 19 ꞌIme mecanihümetüni memüvapata teüteri ꞌiyarisie
vaniu memüteviya ꞌiyarisie vaniu memücateviya sepa
yuꞌiyari xeicüa memexeiya müme, yuri ꞌiyari
memücahexeiya.
\p
\v 20 Peru xeme nenaquiꞌerima, xequeneyuseiriyani yunaitü,
yuri que xemüteꞌerie tita mütipasiesie. Xequeneyunenevieca
ꞌIyari Mütiyupatasie xeteviyatü.
\v 21 Xequeneyüꞌüviyani Cacaüyari xenaquiꞌeriecacu.
Xequeneutaꞌicuevani mayeꞌanicü Tatiꞌaitüvame Quesusi
Cürisitu quepaucua müxenenimayacacü xepitüatü
yuheyemecü xemayeyuyurinicü.
\p
\v 22 Xequenivanenimayaca hipame memeuꞌerietüve,
\v 23 xequenivatavicueisitüani müme xevaranayehapanatü
taipa. Hipame meta que xemütevanenimaya xequeneumamaca
masi, xeꞌixeümatü ꞌasita vaꞌixuriqui xüca seviximarieca
que memüteꞌuyuri yuvaiyarisie meteviyatü.
\s ꞌAixüa que mutayü Cacaüyari hepaüsita
\p
\v 24 Que müꞌane müyüve müxeꞌüviyani
xemücaꞌatixürüvenicü, müyüve meta müxeꞌayeꞌatüanicü
que müꞌane visi müꞌane hüxie xehesie catiuhüivacacu
xeyutemamaviecacu,
\v 25 que müꞌane yuxevitü mücacaüyari mütimaive
mütasiꞌutavicueisitüa, mücü visi quetixeiyarieca que
mariveni heiserie quehexeiyani quetürücaüyeni tucari
casutüarievecacu, hicüta, tucari catixüvecacu
yuheyemecü. Müpaü caniꞌaneni.