\id REV
\h Masiücütü Que Müratüa
\toc1 Masiücütü Que Müratüa
\mt MASIÜCÜTÜ QUE MÜRATÜA,
\mt2 Vani Que Mütixei
\c 1
\s Tita Quesusi Cürisitu masiücüme mürayeitüa
\p
\v 1 Quesusi Cürisitu ꞌicü masiücüme canayeitüani.
Cacaüyari müpaü catinipitüani müpaü
mütivahecüatüacacü müme hesiena mieme memüteꞌuximaya,
müpaü memütemaicacü yareutevitü que mütiyüni
vaüriyarica. Masiücüme nayeitüani ne Vanitütü müpaü
nemütimaicacü, nehesüa neiyenüꞌani yuniuqui tuayame
hesiena mieme nemütiꞌuximayacü.
\v 2 Cacaüyari niuquieya que maine, müpaü
necatinihecüatani, Quesusi Cürisitu que mütihecüata. Que
nemütixei yanecatinihecüatani.
\p
\v 3 ꞌAixüa caniꞌitüariemücü que müꞌane mititerüva,
mümeta memiꞌenie ꞌicü niuquiyari ꞌaixüa
mecaniꞌitüariecuni xüca yametecahuni que müreꞌuxa
ꞌicüsie. Tucari caneutihuraniri.
\s Que mütivaruvaüritüa memüyutixexeürivacai
ꞌatahutarieca quiecarisie
\p
\v 4 Ne Vani necanixevaüritüaca ꞌatahutarieca quiecarisie
xemüyutixexeüriva ꞌAsiya cuieyarisie. ꞌAixüa xüca
tiucaꞌiyarini xehesie mieme mücü, xüca xepitüaca
yuꞌiyarisie xemücaꞌuximatüariecacü. Müpaü
pütiyurieneni que müꞌane ꞌamuyeicacai ꞌamuyeica ꞌumamie,
mümeta ꞌatahuta ꞌiyari mücü ꞌuvenieya hüxie memütiꞌu,
\v 5 Quesusi Cürisitu meta que müꞌane yaticamietü
müyuhecüatacai, que müꞌane müquite memanucuꞌuni
vamexüacame mühücü, que müꞌane mütivaꞌaitüa cuiepa
teꞌaitamete. Mücü canihücütüni que müꞌane
mütasinaquiꞌerie, que müꞌane yuxuriyacü mütaꞌutixünaxü
tahesie mücarahüivanicü ꞌaxa temüteꞌuyuricü,
\v 6 que müꞌane teüterimama mütaꞌayeitüa
tatiꞌaitüvametütü, maraꞌacate mütaꞌayeitüa
ꞌuquiyarieyasie mieme temüteꞌuximayacacü Cacaüyarisie
mieme. Mücü ꞌaixüa quecuxaxasivani quetürücaüyeni
yuheyemecü. ꞌIcü niuqui caniseꞌini.
\p
\v 7 Camü, haisata pacaneni. Yunaitü yuhüxicü
mecanixeiyacuni, mümeta memeitiseixüa mepixeiya. Yunaitü
nuivarite cuiepa memütama meniyutiheiveriecuni
meꞌixeiyatü. Müpaü caniꞌaneni, niuqui caniseꞌini.
\p
\v 8 Tiꞌaitame mücacaüyari müpaü paine, Ne Mexüacame
ꞌImatüreme netitevatü necanihücütüni que müꞌane
misutüa minüni. Que müꞌane ꞌamuyeicacai ꞌamuyeica
ꞌumamie, que müꞌane nai mütürücaüye, ne
necanihücütüni.
\s Que mütixei Yuri Tevi
\p
\v 9 Neri Vanitütü necanixeꞌivatüni. Xehepaü
nepüꞌitüariene teꞌuximatüariecacu teteꞌaitametetücacu
teteꞌucaꞌenivacacu Quesusisie teteviyatü. Cuie Patümuxi
müracutevasie haramara hixüapa mayemasie neneyeicacaitüni
Cacaüyari niuquieyasie nemütiviyacü Quesusi hepaüsita
nemütihecüatacü.
\v 10 Tiꞌaitame tucarieyasie ꞌIyari nesiꞌuviyacu, nevarita
ꞌuvecacu neniꞌenieni que müꞌane carima mutaniucacai
cuxinetapaü tiꞌeniüriücütü.
\v 11 Müpaü niutayüni, Ne que müꞌane misutüa minüni
necanihücütüni, Mexüacame ꞌImatüreme nepühücü. Tita
pemütixeiya quetinacaꞌutüa xapasie, queneutanüꞌaxüa
memüyutixexeüriva vahesüa ꞌatahutarieca quiecarisie
memetitei, müme ꞌEpesusie ꞌEsimirünasie Perücamusie
Tiyatirasie Sarütixisie Piratepiyasie Rautiseyasie
memetitei.
\p
\v 12 Hicü taꞌaurie nenaveni niucame nexeiyaque, que
müꞌane müneretahüavixü netinecühüavetü. Taꞌaurie
neꞌaveca, cüxeme ꞌutame neniuxeiya ꞌatahutame huru
tepüayaricü muveviya.
\v 13 Tiꞌutame hixüapa ꞌuvecacu nepixei que müꞌane Yuri
Tevipaü mütiyuxexeiyacai. ꞌEtevime panacatücücai,
yutavisie panayücühüacai huru hüiyameyaricü.
\v 14 Muꞌuya cüpaya pütuxacai muxa huxariyaripaü
ꞌüvipaü. Hüxiteya tai mütacapaü caniꞌanenecaitüni.
\v 15 Quetateya tepüa müxavatüpaü pütiyuxexeiyacai
huxunuta hüsieriecamepaü. Niuquieya vaüca hapaü
putatürarücacai.
\v 16 Yuserieta xuravesixi nivaratücücaitüni ꞌatahutame.
Tetana püvayeneicacai cusira naisata heutixicacaunitü. Tau
que mütixavatü türücaüyemecü tatü, müpaü
canayeꞌanecaitüni.
\p
\v 17 Quepaucua nemixei, hetüana neniucaveni müquipaü.
Mücü yuseriecü nehesie caniutimeni müpaü ꞌutaitü,
Pepücamaca. Ne mexüacame ꞌimatüreme necanihücütüni.
\v 18 Que müꞌane mayeniere necanihücütüni sepa
nemümüquicai. Neuxei, nepayeniere hicü neheyemecü.
Neneꞌüca yaviyari heiserie nemexeiyacü müquite
vahepaüsita, nereunarümatü nereuyepivatü haque memeꞌuva.
\v 19 ꞌAyumieme nepaine, quetinacaꞌutüa tita pemütixeiya,
hicüque mütiyüane, ꞌarique que mütiyüni.
\v 20 ꞌIpaü catinimasiücüni niuqui müꞌaviesiecai
ꞌatahutame xuravesixi neserieta nevaratücüme pemüvaruxei
vahepaüsita, ꞌatahutame cüxeme ꞌutame hurucü muveviya
pemüvaruxei vahepaüsita. Mücü xuravesixi ꞌatahutatü,
niuqui tuayamete mecanihümetüni müme ꞌatahutarieca
quiecarisie memüyutixexeüriva vahesüa miemete. Cüxeme
ꞌutamete, müme memüyutixexeüriva ꞌatahutarieca
quiecarisie mecanihümetüni.
\c 2
\s Que mütivarunüꞌairi memüyutixexeürivacai
ꞌatahutarieca quiecarisie ꞌEpesusie memüyutixexeürivacai
que mütivarunüꞌairi
\p
\v 1 Müpaü quetineuꞌutüiri niuqui tuayame ꞌEpesusie
memüyutixexeüriva vahesüa mümieme, Müpaü paine que
müꞌane yuserieta müvaratücü xuravesixi ꞌatahutame, que
müꞌane ꞌatahutame cüxeme ꞌutame hurucü muveviya
vahixüapa muyeica.
\v 2 Neri müpaü nepütimate que pemütiyuriene
petiꞌaꞌuxitüatü petiucaꞌenivatü. Müpaüta nepütimate,
pemücavaneviecü ꞌaxa memüꞌanene. Pepüvarutaꞌinüataxü
müme nüꞌarisixi memüyuxata peru memücahüme,
pepüvaretima memüteꞌitavacü.
\v 3 Pepütiucaꞌeniva, vaüca pepütiucanevie nehesüa
pemümiemecü, pepücaꞌuxive.
\v 4 Peru tixaütü püreuyevese nemasixeiyacacu,
pemütiuhayevaxücü petiꞌacanaquiꞌerietü matüaripai que
pemütiꞌacanaquiꞌeriecai.
\v 5 ꞌAyumieme nepaine, queneꞌaꞌerivani que pemüꞌanecai
haitüari, ꞌarique que pemüracave. Quetineuhayeva que
pemütiyuriene hicü, matüaripaipaü püta
quetineyurieneni. Me xüca pecatiuhayeva, nepunuani
ꞌahesüa, ꞌacüxeme ꞌutame nepüvatixüna huyeritana.
\v 6 Siere tixaütü pepürexeiya ꞌaixüa tiꞌaneme,
pemiꞌuxiveꞌeriecü tita memüteyurie müme Nicuraitasixi
vahesie memüteviya. Neta nepiꞌuxiveꞌerie.
\v 7 Xaütü netü muꞌenaxü, queꞌiꞌenieca tita ꞌIyari
mütivatahüave memüyutixexeüriva. Que müꞌane
mürayuꞌiva, ne nepütimini mürecuanicü mücü cüyesie
mieme cümana mayeyurinicü, Cacaüyari haraveritana meve.
\s ꞌEsimirünasie memüyutixexeürivacai que
mütivarunüꞌairi
\p
\v 8 Hicü müpaü quetineꞌutüiri niuqui tuayame
ꞌEsimirünasie memüyutixexeüriva vahesüa mümieme,
Müpaü canaineni que müꞌane mexüacame ꞌimatüreme
mühücü, que müꞌane müqui matüa manutanierixüta.
\v 9 Neri müpaü nepütimate que pemütiyuriene, que
pemütiꞌuximatüariexime, que pemütimave. Masisüari
pepeucave. Müpaü nepütimate que memütexesevixima hipatü
Huriyusixi teüteriyari memüteꞌuyuterüva ꞌaxa meꞌutiyuatü
xehepaüsita. Huriyusixi masi mepücahüme, Cauyumarie
tuquitana mepümiemetexi püta müme.
\v 10 Pepücamaca sepa pemüticuineni. Camüsü Tücacame
casariyanata püxeꞌanutaxürieni hipame
xemütaꞌisiparienicü. Xepüꞌuximatüarieca tamamata tucari.
Xüca yapeticamieni sepa pemümüni, ne tucari
nemanipitüamücü pemümarivanicü, yaxeicüa muma que
müranutiquesiyarie rayuꞌivaca nausaricü mümarivanicü.
\v 11 Xaütü netü muꞌenaxü, queꞌiꞌenieca tita ꞌIyari
mütivatahüave memüyutixexeüriva. Que müꞌane
mürayuꞌiva, mücü ꞌaxa pücaꞌitüarieni, hutarieca
pücamüni.
\s Perücamusie memüyutixexeürivacai que mütivarunüꞌairi
\p
\v 12 Hicü müpaü quetineuꞌutüiri niuqui tuayame
Perücamusie memüyutixexeüriva vahesüa mümieme, Müpaü
canaineni que müꞌane meixeiya cusira naisata meutixicacauni
cui müreutiquematüca.
\v 13 Neri müpaü nepütimate que pemütiyuriene. Müpaüta
nepütimate, haque pemeca, mana Cauyumarie ꞌuvenieya peve
haque müreꞌaita. Sepa mücü, que müꞌane nemühücüsie
pepütiviya, pepücaꞌacuꞌimava, quename nehesie yuri
pecatiꞌerie peꞌutaitü. Müpaü pepücatiꞌacuꞌimavacai sepa
ꞌiya tucarisie quepaucua xehesüa mumierie ꞌAnütipa. Mücü
nehesüa miemetütü püyuhecüatacai yaticamietü que
nemainecai, pumierie haque Cauyumarie manuca.
\v 14 Perusü ꞌesiva püreuyevese tixaütü nemasixeiyacacu.
Muva pepüvarexeiya müme Varami ꞌüquisicayasie
memüteviya. Mücü müpaü pütitaꞌüquitüa Varaqui
müvacunuitüanicü ꞌIxaheri xiüyarimama, memicuacacü tita
cacaüyarixi memütemaviyarie, memüvacumaüvanicü hipame
memücayüꞌüitamatücai memücayücünamatücai.
\v 15 Yaxeicüa ꞌecü pepüvarexeiya hipame Nicuraitasixi
vaꞌüquisicasie memüteviya, que nemütiꞌuxiveꞌerie.
\v 16 ꞌAyumieme nepaine, quetineuhayeva que pemütiyuriene.
Me xüca pecatiuhayeva, cuitü nepunuani ꞌahesüa, vahamatü
nepütinemieneni necusira nehacuetü neteta mayeneicacü.
\v 17 Xaütü netü muꞌenaxü, queꞌiꞌenieca tita ꞌIyari
mütivatahüave memüyutixexeüriva. Que müꞌane
mürayuꞌiva, ne nepütimini manana payari mutiꞌaviesiecai.
Tete mütuxa nepipitüanita, mücü tetesie püraꞌutüarieni
hecuamecü que mütitevaca. Xevitü müpaü pücatimaica,
que müꞌane mitanaquiꞌerieni, mücü xeicüa müpaü
pütimaica.
\s Tiyatirasie memüyutixexeürivacai que mütivarunüꞌairi
\p
\v 18 Hicü müpaü quetineuꞌutüiri niuqui tuayame
Tiyatirasie memüyutixexeüriva vahesüa mümieme, Müpaü
canaineni Cacaüyari Nuꞌaya, que müꞌane yühüxie tai
mütacapaü mayeꞌane, que müꞌane yüꞌücatesie tepüa
müxavatüpaü müꞌane.
\v 19 Neri müpaü nepütimate que pemütiyuriene, que
pemütiꞌacanaquiꞌerie, que yapemüticamie, que
pemütivaparevie hipame, que pemütiucaꞌeniva. Müpaü
nepütimateta, ꞌimatürieca masi vaüca pepütiyuriene
hicü, matüaripai ꞌesiva xeicüa pepütiyurienecai.
\v 20 Perusü tixaütü püreuyevese nemasixeiyacacu,
pemitauniecü mücü ꞌuca Quesaveri mütiteva
yamütiyurienenicü que mütinaque. Niucame püyuxata
Cacaüyarisüa mieme, peru que mütiꞌüquita,
pütivaꞌirüviya nehesüa miemete teꞌuximayatamete
memüvacumaüvanicü müme memücayüꞌüitama
memücayücünama, memicuacacü tita cacaüyarixi
memütemaviyarie.
\v 21 Ne tucari nepipitüa mütihayevanicü que
mütiyuriene, peru pücayuvaüriya mütihayevanicü
vacumaüvatü müme memücacünamama.
\v 22 Tamüsü nepüticuinitüani, nepeicahüani ꞌutayasie,
müme memicumaüva cavaꞌüyatücacu nepüvareucaxürieni
vaüca memüꞌuximatüariecacü xüca mecatehayevani hepaüna
meteyurietü.
\v 23 Nivemama nepüvacuini. Müpaü netiyurieyu yunaitü
naisarie memüyutixexeüriva müpaü mepütemaica, ne
nemühücücü que müꞌane xeꞌiyari mütaꞌinüata que
xemüteyücühüave. Yuxexuime nepütixeꞌapinirieni que
xemüteꞌuyuri.
\v 24 Peru hipatü xeme Tiyatirasie xemütama,
queyupaümetü ꞌicü ꞌüquisicasie xemücateviya,
queyupaümetü teva xemücaheutahaxüavave
xeteyüꞌüquitüatü Cauyumarie ꞌüquisicayacü que
memüteniniuqui, müpaü nepütixecühüave xeme, tavari
cuanivemecü nepücaxeꞌicatüani.
\v 25 Mücü xeicüa, tita xemütehexeiya, mücü
xequeneuviya nenuayuque.
\v 26 Que müꞌane mürayuꞌiva, que müꞌane mücatihayevani
nehepaü tiyurienetü tapareyuque, mücü heiserie
necanipitüamücü nuivarite mütivaꞌaitüacacü.
\v 27 Tepüa ꞌisüyari ꞌacuetü pütivaꞌaitüaca, haxu
xariyaripaü püvatitara, neta heiserie que münetiupitüa
neꞌuquiyari.
\v 28 Neta nepimini xurave tuxacüta maneica.
\v 29 Xaütü netü muꞌenaxü, queꞌiꞌenieca tita ꞌIyari
mütivatahüave memüyutixexeüriva.
\c 3
\s Sarütixisie memüyutixexeürivacai que mütivarunüꞌairi
\p
\v 1 Hicü müpaü quetineuꞌutüiri niuqui tuayame
Sarütixisie memüyutixexeüriva vahesüa mümieme, Müpaü
canaineni que müꞌane Cacaüyari ꞌiyariteya ꞌatahutame
müvarexeiya, xuravesixi ꞌatahutame. Neri müpaü
nepütimate que pemütiyuriene. Sepa peꞌayenieretü
pemüxasiva, pepümüqui.
\v 2 Quenanutahütüa, queneutatürücariya tita
mücatimüve mütiuyuhayevaxü mücü mümüximecü.
Necacaüyari que matixeiya, nemasixeiyacacu ne, que
pemütiyuriene peuyevese cuxi pemürayeꞌatüanicü.
\v 3 ꞌAyumieme nepaine, quetinaꞌerivani que
pemütiupitüarie que pemütiuꞌenaxü. Müpaü
yaquetinecamieni, quetineuhayeva que pemütiyuriene hicü.
Me xüca pecaꞌanutahütüani, tinavayamepaü nepunuani.
ꞌAsipepücatimaica quepaucuatücacu ꞌahesüa nemunuani.
\v 4 Siepüre hipame pepüvarexeiya teüteri Sarütixisie
memütama yuꞌixuriqui memücasevixima. Müme nehamatü
meniuꞌuvacuni meꞌanacatuxatü, ꞌaixüa memüteꞌuꞌiyaricü
vahesie müpaü mütinaquenicü.
\v 5 Que müꞌane mürayuꞌiva, mücü vahepaü
pütiquemaritüarieni ꞌixuriqui mütuxacü. Que mütiteva
nepücaheyeitüani haque macayasarie quename tucari hexeiya.
Nepünehecüatani quename neꞌimate, müpaü neꞌutaitü
neꞌuquiyari hüxie hesüana miemete niuqui tuayamete
vahüxie.
\v 6 Xaütü netü muꞌenaxü, queꞌiꞌenieca tita ꞌIyari
mütivatahüave memüyutixexeüriva.
\s Piratepiyasie memüyutixexeürivacai que
mütivarunüꞌairi
\p
\v 7 Hicü müpaü quetineuꞌutüiri niuqui tuayame
Piratepiyasie memüyutixexeüriva vahesüa mümieme, Müpaü
canaineni que müꞌane Cacaüyarisie mieme müpasie, que
müꞌane yuri maine, que müꞌane Raviri yavieya macueꞌe.
Mücü reuyepieyu xevitü pücareunani, reunayu xevitü
pücareuyepieni.
\v 8 Neri müpaü nepütimate que pemütiyuriene. Camüsü,
quitenie müreuyepie nepümasiꞌuxeiyasitüa. Xevitü
pücayüve müreunanicü. ꞌEsiva xeicüa türücariya
pepexeiya peru neniuquisie yapepüticamie, pepücaꞌacuꞌimava
quename pecanesimate peꞌutaitü.
\v 9 Tamüsü müpaü nepütivapitüaca müme Cauyumarie
tuquitana memümiemete, müme Huriyusixi teüteriyari
memüteꞌuyuterüva peru memücahüme, memüteꞌitava xeicüa.
Tamüsü müme nepüvarahapani, meꞌaꞌivarieme
memütihüximaꞌunicü ꞌahetüa. ꞌAna müpaü
mepütehetimani, nemümasinaquiꞌeriecü ꞌecü.
\v 10 Neniuquisie yapemüticatüacü petiucaꞌenivatü
nehepaü, neta nepümasiꞌüviyani quepaucua tucari mayeꞌani
cuiepa naisarie, quepaucua cuiepa memütama
memüꞌinüasieni.
\v 11 Cuitü nepunuani. Queneuviya tita pemürexeiya,
xevitü ꞌamuma camasiꞌunavairienicü ꞌaꞌinüari.
\v 12 Que müꞌane mürayuꞌiva, necacaüyari tuquitana
nepicaqueni ꞌiquisaraütüme. Yuheyemecü pücavayeyani
hasuacu. Hesiena nepüraꞌutüani necacaüyari que mütiteva,
necacaüyari quiecarieya Querusareme mühecua taheima
macaneni necacaüyarisüa miemetütü que mütiteva, neta
hecuamecü que nemütiteva.
\v 13 Xaütü netü muꞌenaxü, queꞌiꞌenieca tita ꞌIyari
mütivatahüave memüyutixexeüriva.
\s Rautiseyasie memüyutixexeürivacai que mütivarunüꞌairi
\p
\v 14 Hicü müpaü quetineuꞌutüiri niuqui tuayame
Rautiseyasie memüyutixexeüriva vahesüa mümieme, ꞌIpaü
canaineni que müꞌane Niuquieya Müseꞌi mütiteva, que
müꞌane yaticamietü yuri haitü müyuhecüata, que müꞌane
misutüa tita Cacaüyari mütiunetüa.
\v 15 Neri müpaü nepütimate que pemütiyuriene. Ni
pepücaseꞌi ha mühaütüpaü, ni pepücacuyuane ha
mücuanapaü. Xüca tüma yemecü pehaütünique, xüca
tüma pecuananique nusu.
\v 16 Hicü masi ꞌesiva xeicüa xücamepaü pepüꞌane
pecacuanatü pecahaütütü. ꞌAyumieme ne
nemananatihayamücü neteta.
\v 17 ꞌEcü müpaü pecanaineni, Cari ne nepeucave,
nepütitaꞌiva, tixaü nepücareuyehüva peꞌutaitü.
ꞌAsipepücatimate que pemüꞌane. ꞌAxa pepüꞌitüarie
pepünenimayasiva, tuminicü pepümave, pepacüpe,
ꞌixuriquicü pepümave.
\v 18 Nepümasitaꞌimaiya, nehesüa queneunanai huru
tuminiyari taipa mütapariyarieve. Mücücü pepeucaveni.
ꞌIxuriqui mütuxa queneunanaita pemenacatünicü. Mücücü
pücamasiücüni que pemütiꞌateviya pemavetü. Hüxi
cuiniya ꞌuhayeyari queneunanaita pemaꞌaviriexüanicü
ꞌahüxita. Mücücü pepeuniereni.
\v 19 Queyupaümeme nemüvanaquiꞌerie, müme nepüvatateꞌa
nepütivaꞌüquitüa nevaꞌuximatüatü. ꞌAyumieme ꞌaixüa
ꞌanemecü queneꞌavaüriyani, quetineuhayeva que
pemütiyuriene hicü.
\v 20 Neuxei ꞌitupari varita neputive neheihusunatü. Tevi
xüca nesiꞌuꞌenieni neꞌutaniucacacu, xüca reuyepieni,
nepeutahani hesüana, hamatüana nepüticuani, ꞌiyata
nehamatü püticuani.
\v 21 Que müꞌane mürayuꞌiva, mücü necanipitüamücü
nehamatü mayerünicü neꞌuvenisie haque nemütiꞌaita, neta
neꞌuquiyarimatü que nemütiuya ꞌuvenieyasie neraneꞌivaca.
\v 22 Xaütü netü muꞌenaxü, queꞌiꞌenieca tita ꞌIyari
mütivatahüave memüyutixexeüriva.
\c 4
\s Muyuavisie nenevieri que memüteꞌipitüa Cacaüyari
\p
\v 1 Mericüsü mücü neꞌuxeiyaca, tavari neneutaniere,
mana nenixeiya quitenie reuyepiyacame muyuavisie. Que
müꞌane nemuꞌeni matüaripaitü cuxinetapaü
tiꞌeniüriücüme nehamatü ticuxatame, mücü müpaü
canetiniutahüave, ꞌUva quenatiyeꞌa. Nepümasixeiyasitüani
que mütiyüni ꞌarique vaüriyarica.
\v 2 Yapaucua ꞌIyari pünesiꞌuvi. Mericüsü tiꞌaitame
ꞌuvenieya mana puvecai muyuavisie. Xevitü ꞌuvenisie
nacateitüni.
\v 3 Que müꞌane mana macatei que mütiyuxexeiyacai, casüpe
teteyaripaü curunarina teteyaripaü tiniyuxexeiyacaitüni.
Cuvivi ꞌuveni ꞌaurie punierecai ꞌesümerarüta teteyaripaü
tiyuxexeiyatü.
\v 4 ꞌUveni ꞌaurie nitiꞌucaitüni ꞌuvenite xei teviyari
heimana naucatü. ꞌUvenitesie ꞌuquiravesixi menatecaitüni
xei teviyari heimana yunaucatü meꞌanacatuxatü, yumuꞌusie
huru mumayari meꞌanamanatü.
\v 5 Mücü ꞌuveni manuvecaisie mana nivayemerücacaitüni
neyeyuanecaitüni neyetürarücacaitüni. Cüxeme mana
canicutatavecaitüni ꞌuveni hüxie ꞌatahutatü. Cüxemete
Cacaüyari ꞌiyariteya canihücütüni ꞌatahutatü.
\v 6 ꞌUveni hüxie haramarapaü tiyuxexeiyatü pucumacai
xicüripaü ꞌanetü tete manuyehecüapaü tiyuxexeiyatü.
\p ꞌUveni ꞌaurie naisarie mana meniuꞌuvacaitüni
memayeneniere yunaucatü, mehahüxitücaitü yuhüxie
yuvarita naisarie.
\v 7 Mexüacame mayepaü pütiyuxexeiyacai, hutarieca
ꞌutüana mieme puixipaü pütiyuxexeiyacai, hairieca mieme
tevipaü payeꞌanecai, naurieca mieme verica mütaviximepaü
pütiyuxexeiyacai.
\v 8 Mücü yunaucatü memayeneniere yuxexuitü ꞌataxeime
ꞌanayari mecanexeiyacaitüni, naisarie yuxetüapaitü
menahüxitücateitüni. Tucaricü tücaricü
mepücaꞌuxipivavecai müpaü meꞌutiyuatü,
\q Canipasieca, canipasieca, canipasieca
\q Tiꞌaitame mücacaüyari nai mütürücaüye,
\q Que müꞌane ꞌamuyeicacai,
\q Que müꞌane ꞌamuyeica,
\q Que müꞌane ꞌumamie.
\p
\v 9 Quepaucua müpaü memutiyuaneni müme memayeneniere,
ꞌAixüa quecuxaxasivani, veꞌemetütü quemarivani,
pamüpariyusi quepitüarieca que müꞌane ꞌuvenisie maca, que
müꞌane mayeniere yuheyemecü, meꞌutiyuatü,
\v 10 ꞌuquiravesixita xei teviyari heimana yunaucatü
mepütihüximaꞌuni que müꞌane ꞌuvenisie maca hüxie.
Nenevieri menipitüaca que müꞌane mayeniere yuheyemecü,
yumumate meneucamanani ꞌuvenieya hüxie müpaü
meꞌutiyuatü,
\q
\v 11 Tatiꞌaitüvame
\q Tacacaüyari ꞌacu,
\q ꞌAixüa pepütiucaꞌiyari
\q ꞌAhesie mütinaquenicü
\q ꞌAixüa pemücuxaxasivanicü
\q Veꞌeme pemümarivanicü
\q Petürücaüyetü pemümarivanicü.
\q ꞌEcü nai pepütiunetüa.
\q Müpaü mümatinaquecü
\q ꞌApütiuve naitü,
\q ꞌAyumieme pütiunetüarie.
\c 5
\s Xapa mutacuicuiya, Muxa Nunusi
\p
\v 1 Mericüsü que müꞌane ꞌuvenisie macatei yuserieta
hehuriecame neniuxeiya xapa mutacuicuiya naisata
müracaꞌutüarie ꞌatahuta seyuyaricü meumanariexüa.
\v 2 Hicü nenixeiya niuqui tuayame mütürücaüyecai
müpaü mutayü carima, Quepaicü ꞌaixüa pütiucaꞌiyari
hesiena mütinaquenicü mitaveracü xapa, hexünaxüame
seyuyari.
\v 3 Muyuavisie cuiepa cuietüa ni xevitü pücayüvecai
mitaveracü xapa, mixeiyacü.
\v 4 Ne vaüca neputasuacacai xevitü
mücataxeiyarievecaicü ꞌaixüa tiucaꞌiyaritü hesiena
mütinaquenicü mitaveracü xapa, mixeiyacü.
\v 5 Müme ꞌuquirasi xevitü müpaü netiniutahüave,
Pepücaꞌutasuacani. Neuxei, mayepaü marivetü Cura
nuivarieyasie miemetütü Raviri quie mutine nana, mücü
pürayuꞌivaxü, püyüve mitaveracü xapa, hexünaxüame
seyuyari ꞌatahutame.
\p
\v 6 Hicü mana neneutaniere. ꞌUveni ꞌaurie yunaucatü
memayeneniere vahixüapa ꞌuquiravesixi vahixüapa nenixeiya
Muxa Nunusi mana ꞌuveme. Mumieriepaü pütiyuxexeiyacai,
ꞌatahuta ꞌavayari ꞌatahuta hüxiyari pexeiyacai. Hüxiteya
Cacaüyari ꞌiyariteya canihücütüni ꞌatahutatü, naisarie
cuiepa meutanüꞌariexüa.
\v 7 ꞌIya ꞌaura nayani, que müꞌane ꞌuvenisie macatei
yuserieta mehuriecai xapa nihuritüani.
\v 8 Quepaucua xapa muhuritüarie, yunaucatü memayeneniere
xei teviyari heimana yunaucatü ꞌuquiravesixi yunaitü
meniutihüximaꞌuni Muxa hüxie. Yuxexuitü harupa
meniuꞌücaitüni huru xacüyari mepuꞌücai ꞌücuacü
hüpüneme. ꞌÜcua Cacaüyari teüterimama vanenevieri
canihücütüni.
\v 9 Hicü cuicari hecuame meniutacuica müpaü
meꞌutiyuatü,
\q ꞌAixüa pepütiucaꞌiyari
\q ꞌAhesie mütinaquenicü
\q Pemenuhurienicü xapa
\q Pemexünaxüanicü seyuyari,
\q ꞌEcü pemumieriecü.
\q ꞌAxuriya mutayeuricü
\q Cacaüyarisie mieme
\q Pepüvarutinanai teüteri
\q Pevaxünaque,
\q Yunaime nuivarite
\q Vahesüa miemete hipatü
\q Naime niuquicü memutiniuca
\q Naisarie cuiepa quiecatari
\q Yunaime teüteriyari vahesüa miemete.
\q
\v 10 Tacacaüyari teüterimama
\q Pepütaꞌayeitüa
\q Tatiꞌaitüvametücacu ꞌiya.
\q Maraꞌacate pepütaꞌayeitüa.
\q Cuiepa tepüteꞌaitani.
\p
\v 11 Hicü neheutaniereca neniꞌenieni tita yumüireme
niuqui tuayamete vaniuquipaü mütiꞌeniüriücücai. ꞌUveni
ꞌaurie memayeneniere vaꞌaurie ꞌuquiravesixi vaꞌaurie
menitiꞌucaitüni müireme miyuniyari meyupaümetü.
\v 12 Müpaü carima meniutiyuanecaitüni,
\q Muxa mumierie
\q ꞌAixüa catiniucaꞌiyarini
\q Hesiena mütinaquenicü
\q Türücaüyetü heucavetü
\q Timaivetü yüvetü
\q Mümarivanicü
\q Veꞌeme mücuxaxasivanicü
\q ꞌAixüa mücuxaxasivanicü
\q Visi müticühüavarüvanicü.
\p
\v 13 Hicü naitü mütiunetüarie muyuavisie cuiepa
cuietüa haramarasie, naitü mana mütitama, nai
neniuꞌenieni müpaü ꞌutaineme,
\q Que müꞌane ꞌuvenisie maca,
\q Muxa meta,
\q Visi mequetecühüavarüvani,
\q Veꞌemete mequecuxaxasivani,
\q Visi mequecuxaxasivani,
\q Mequeteꞌaitani yuheyemecü.
\p
\v 14 Memayeneniere yunaucatü müpaü meniutiyuanecaitüni,
Mücü niuqui caniseꞌini, meꞌutiyuatü, ꞌuquiravesixi
meꞌutihüximaꞌucacu nenevieri meꞌipitüacacu que müꞌane
yuheyemecü mayeniere.
\c 6
\s Xapa seyuyari
\p
\v 1 Mericüsü neneutaniere quepaucua Muxa Nunusi
mixünaxü xeime ꞌatahuta seyuyarisie mieme. Yunaucatü
memayeneniere xeime neniuꞌenieni müpaü haineme
türanaripaü tiꞌeniüriücüme, Quenayeꞌa, queneuxeiya,
ꞌutaineme.
\v 2 Hicü neneutaniere. Camüsü cavaya meutuxa mana
panierecai. Que müꞌane hesiena macatei tupi pacuecai. Muma
cananutimaniyarieni. Rayuꞌivarümetü neyani, rayuꞌivaque
meta.
\p
\v 3 Hicü quepaucua mixünaxü seyu hutarieca mieme,
mayeniere neniuꞌenieni hutarieca mieme müpaü ꞌutaineme,
Quenayeꞌa queneuxeiya.
\v 4 Hicü xevitü cavaya nivayeyani heuxuretü. Que müꞌane
hesiena macatei müpaü catiniupitüarieni müvamuinanicü
cuiepa memütama ꞌaixüa memücateyuxeiyanicü,
memüyucuinicü. ꞌIxipara ꞌamütevi pucueitüarie.
\p
\v 5 Hicü quepaucua mixünaxü seyu hairieca mieme,
mayeniere neniuꞌenieni hairieca mieme müpaü ꞌutaineme,
Quenayeꞌa queneuxeiya. Hicü neneutaniere. Camüsü cavaya
meuyüvi mana panierecai. Que müꞌane hesiena macatei quiru
tiꞌinünüatame nahapacaitüni yumamasie.
\v 6 Hicü xeime neniuꞌenieni yunaucatü memayeneniere
mematiꞌucai hixüapa heyeniucame que mütiꞌeniüriücücai.
Müpaü niutayüni, Türicu merie cacuniyari müpaü
quetinayeꞌatüa xei tucari que mütiꞌiva tevi, sevara meta
xei cacuniyari yaxeicüa rayeꞌarücame. ꞌAsipepücaꞌiyurieni
viya caxie xeicüa.
\p
\v 7 Hicü quepaucua mixünaxü seyu naurieca mieme,
mayeniere neniuꞌenieni naurieca mieme müpaü ꞌutaineme,
Quenayeꞌa queneuxeiya.
\v 8 Hicü neneutaniere. Camüsü cavaya meucutuxie mana
panierecai. Que müꞌane hesiena macatei Tacucuyame
catinitevacaitüni. Müquite vahüveme ꞌutüana
niveiyacaitüni. Heiserie mecaniupitüarieni cuiepa
memütama vahepaüsita, nauca taparisie mieme, xei tapari
vahepaüsita que memüteyupaüme, memüvacuinicü
ꞌixiparacü hacacü cuiniyacü cuiepa miemete yeutari vacü.
\p
\v 9 Hicü quepaucua mixünaxü seyu ꞌauxüvirieca mieme,
mürayutimavatüretüa meꞌateme nenivaruxeiya ꞌiyarite,
müme memucuiꞌivaxü Cacaüyari niuquieyasie
memüteviyacaicü, hesiena memiemetetütü
memüyuhecüatacaicü, müme vaꞌiyarite.
\v 10 Carima meniutihivacaitüni müpaü meꞌutiyuatü,
Cusiyari ꞌacu pemüpasie yuri pemaine, quepaucuaque
petivatahüaveni, quepaucuaque tatacuri petivapitüani
cuiepa memütama taxuriya memutayeuricü.
\v 11 Hicü yuxexuitü mecaniuhuritüarieni ꞌixuriqui
mütuxa memenacatünicü. Müpaü mepüteꞌutahüavarie
memüꞌuxipiecacü yareutevicacu ꞌacuxi, teꞌuximayatamete
memücayunaitütücaicü cuxi vaꞌivama memücuiꞌivaquecai
vahepaü.
\p
\v 12 Hicü neneutaniere quepaucua mixünaxü seyu
ꞌataxevirieca mieme. ꞌAna cuie carima niutayuanecaitüni.
Tau puyürixü ꞌücari müyüvipaü. Meseri naitü
xuriyapaü ꞌanetü nayani.
\v 13 Xuravesixi muyuavisie memeucatecai meniucaxürieni
cuiepa, xapasie que müticaxürüve tacariyari carima
ꞌucuꞌecacacu.
\v 14 Muyuavi hixüapa pusanixü xapa mütacuicuiyanipaü.
Naitü yemurite cuiepa haramara hixüapa mayemata xaüsie
püta pupasi, haque mütinierecai pumavecai.
\v 15 Hicü cuiepa teꞌaitamete vavemete cuyaxi vaꞌuquiyarima
memeucaꞌucai memütürücavicai, yunaitü vaüriyarica
memüteꞌuximayatametetücai memüyünüꞌacaita, yunaitü
meniuyutiꞌavietaxüani terüta ꞌaitüa hürisie.
\v 16 Müpaü metenitahüave hürite ꞌaite, Quetananucanama,
quetaneutiꞌavieta catasixeiyacü que müꞌane ꞌuvenisie maca
Muxa Nunusi catasihecanicü.
\v 17 Tucari mümarive canayeꞌaniri quepaucua memüyehaꞌani.
Quepai püyüve ꞌamuveni, meputiyuanecai.
\c 7
\s Queyupaümetü memuseyumarie
\p
\v 1 Mericüsü ꞌana niuqui tuayamete nenivaruxeiya
yunaucame. Taserieta taꞌutata tahixüapa tasutüa metiꞌutü
meninenacaitüni ꞌeca, naisarie mücaꞌuyeicanicü cuiepa
haramarasie naime cüyesie.
\v 2 Hicü xeime neniuxeiya niuqui tuayame tau manatineica
ꞌutimiecame, Cacaüyari mayeniere seyuya ꞌacuetü. Hicü
carima nivarutahivieni niuqui tuayamete yunaucame, müme
müpaü memütepitüariecai ꞌaxa memiyurienicü cuie
haramara.
\v 3 Müpaü niutayüni, Mexicuxi ꞌaxa xepücaꞌiyurieni cuie
haramara naime cüye, tecavatiꞌinüaritüavavecacu
tacacaüyari teꞌuximayatametemama vacanata.
\v 4 Hicü ꞌinüarite nenetimani, que memüteyupaümecai
memutiꞌinüaritüarie. Xei sienituyari miriyari heimana huta
teviyari miriyari heimana nauca miriyari meyupaümetü
mecaniuꞌinüaritüarieni ꞌIxaheri xiüyarimama. Xexuitü
nuivarite mepuxuavecai.
\v 5 Cura nuivarieyasie miemete tamamata heimana huta
miriyari mecaniuꞌinüaritüarieni, Xuveni nuivarieyasie
miemete tamamata heimana huta miriyari, Cari nuivarieyasie
miemete tamamata heimana huta miriyari,
\v 6 ꞌAseri nuivarieyasie miemete tamamata heimana huta
miriyari, Nepütari nuivarieyasie miemete tamamata heimana
huta miriyari, Manasexi nuivarieyasie miemete tamamata
heimana huta miriyari,
\v 7 Simiyuni nuivarieyasie miemete tamamata heimana huta
miriyari, Revi nuivarieyasie miemete tamamata heimana huta
miriyari, ꞌIsacari nuivarieyasie miemete tamamata heimana
huta miriyari,
\v 8 Savuruni nuivarieyasie miemete tamamata heimana huta
miriyari, Cuse nuivarieyasie miemete tamamata heimana huta
miriyari, Venicamini nuivarieyasie miemete tamamata heimana
huta miriyari mecaniuꞌinüaritüarieni.
\s Meyumüiretü memanacatuxacai
\p
\v 9 Mericüsü ꞌana neneutaniere. Camüsü teüteri
mecaniyumüirecaitüni, tevi pücayüvecai
müvarutiꞌinüatacü. Yunaime teüteriyari vahesüa
mecanimiemetetücaitüni, yunaime nuivarite vahesüa
mepümiemetetücai, naisarie cuiepa mepüquiecataritücai,
naime niuquicü meputiniucacai. Mana menitiꞌucaitüni ꞌuveni
hüxie Muxa hüxie meꞌanacatuxatü, tacü meꞌaꞌütü
yumamasie.
\v 10 Carima müpaü meniutiyuanecaitüni,
Catiniyuvicueisitüvametüni tacacaüyari ꞌuvenisie maca,
Muxa meta.
\v 11 Yunaitü niuqui tuayamete mana menitiꞌucaitüni ꞌuveni
ꞌaurie, ꞌuquiravesixi vaꞌaurie, yunaucatü memayeneniere
vaꞌaurie. Hicü meniutihüximaꞌuni ꞌuveni hüxie. Nenevieri
mecanipitüani Cacaüyari
\v 12 müpaü meꞌutiyuatü, Niuqui caniseꞌini.
\q Visi queticühüavarüvani
\q ꞌAixüa quecuxaxasivani
\q Timaivetü quemarivani
\q Pamüpariyusi quepitüarieca
\q Veꞌeme quexasivani
\q Türücaüyetü yüvetü quexasivani
\q Tacacaüyari yuheyemecü.
\q Müpaü xeicüa caniꞌaneni.
\p
\v 13 Mericüsü xevitü müme ꞌuquirasi müpaü
canetiniutahüave, ꞌIme memanacatuxa quehate. Haque
mepeyecü.
\v 14 Ne müpaü netinicühüaveni, Neuxei, masi ꞌecü
yapepütimate. ꞌIya nerahüave, ꞌIme mecanihümetüni
memuꞌaxüa vaücava meꞌuximatüarieca. Menitiꞌecua
yuꞌixuriqui, menitituriya Muxa Nunusi mumieriecü.
\v 15 ꞌAyumieme Cacaüyari ꞌuvenieya hüxie menitiꞌuni.
\q Tucaricü tücaricü
\q Hesiena mieme meteniꞌuximayaca tuquitana.
\q Que müꞌane ꞌuvenisie maca
\q Püvateütani vaꞌüviyatü.
\q
\v 16 ꞌUxaꞌatüni varie
\q Mepücaheuhacacuicuni,
\q Mepücaheuharicuni.
\q Tau pücavaxürimütüaca,
\q Xüri pücavaꞌuximatüaca.
\q
\v 17 ꞌUveni manuve ꞌaurie
\q Mücü Muxa mana ꞌuvetü
\q Mücü püvaꞌüviyani
\q Muxasi vahüvemepaü yüanetü.
\q Püvacuvitüneni
\q Naisarie haixa mücuneniere
\q Mana meharetü mepayeyuyurini.
\q Cacaüyari naime vaꞌucai
\q Canaꞌitiexüamücü vahüxita.
\c 8
\s Seyu ꞌatahutarieca mieme
\p
\v 1 Mericüsü quepaucua mixünaxü seyu ꞌatahutarieca
mieme, muyuavisie cayuvatü putamarixü merie hurayari
yacütütü.
\v 2 Hicü niuqui tuayamete Cacaüyari hüxie memütiꞌu
necanivaruxeiya ꞌatahutame. Cuxineta meniutaꞌüitüarieni
ꞌatahutame.
\v 3 Hicü xevitü ꞌaura nayani niuqui tuayame.
Mürayutimavatüre niutaqueni huru pusiyari ꞌahanatü.
Vaüca ꞌücua visi muꞌüa caniutuitüarieni, yunaime
Cacaüyari teüterimama vanenevierisie mieme, mimavanicü
mürayutimavatüresie hurucü muveviya ꞌuveni hüxie
maniere.
\v 4 Hicü ꞌücua cuauniyari niutiꞌenirümecaitüni
Cacaüyari teüterimama vanenevierisie mieme, niuqui tuayame
ꞌetucacu Cacaüyari hüxie.
\v 5 Hicü niuqui tuayame ꞌenuhanaca pusi, ꞌitahüniyaca tai
mürayutimavatüre mieme, neihüani cuiepa.
Pecutürarücacai putayuanecai pucumerücacai cuie putayua.
\s Cuxinetate
\p
\v 6 Hicü niuqui tuayamete ꞌatahutatü, ꞌatahuta
cuxinetayari memaꞌücai meniuyucuhaꞌaritüani
memitihüsienicü.
\p
\v 7 Hicü mexüacame nitahüsieni yucuxineta. Te taimatü
xuriya nütü neucaxüriyani cuiepa. Cuie ꞌesivatücacu xei
terisi niutataiyarieni cüyexi ꞌesivatücacu xei terisi
meta, ꞌüxa müsisiüravi naitü niutataiyarieni.
\p
\v 8 Hicü hutarieca mieme niuqui tuayame nitahüsieni
yucuxineta. Yemuripaü tiyuxexeiyatü ꞌenetü tatü
neucahüiyani haramarasie. Haramara ꞌesivatücacu xei terisi
xuriya nayani.
\v 9 Haramarasie memüyeꞌuva ꞌesivatücacu xei terisi
meniucuini. Naviyasixi meniutatümaiyarieni ꞌesivatücacu
xei terisi.
\p
\v 10 Hicü hairieca mieme niuqui tuayame nitahüsieni
yucuxineta. Taheima ꞌacaneca cuiepa niucaveni xurave ꞌenetü
cüxemepaü tatü. Hatuxame haixa mücunenieresie
ꞌesivatücacu xei terisisie niucaveni.
\v 11 Xurave Masivi catinitevacaitüni. Ha ꞌesivatücacu xei
terisi hasivitü nayani. Yumüiretü teüteri meniucuini ha
masiürixücü.
\p
\v 12 Hicü naurieca mieme niuqui tuayame nitahüsieni
yucuxineta. Tau puveiya ꞌesivatücacu xei terisi, meseri
yaxeicüa, xuravesixi yaxeicüa. Niucuyüre, tucari
mücahecüacacü ꞌesivatücacu xei terisi, tücarita
yaxeicüa.
\p
\v 13 Hicü neneutaniere. Niuqui tuayame neniuꞌenieni
muyuavi hixüapa ꞌaviximeme, carima müpaü ꞌutaineme, Xüa
ꞌui, xüa ꞌui, xüa ꞌui que meꞌitüarieni cuiepa memütama
quepaucua hipatü cuxineta mütihüsierieni haicatü,
quepaucua niuqui tuayamete memitihüsieni.
\c 9
\p
\v 1 Hicü ꞌauxüvirieca mieme niuqui tuayame nitahüsieni
yucuxineta. Xurave neniuxeiya taheima mieme cuiepa ꞌucavecu.
Müvatixavasie mieme yaviyari caniucueitüarieni cümana
müreuyepienicü meucatevasie.
\v 2 Hicü tineuyepieni müvatixavasie. Hicü meucatevasie
cuauni nivatineicani teca ꞌamüpa cuauniyaripaü ꞌanetü.
Tau cahecüacacu pucuyürixü, caꞌanuyehecüatü patüa
cuauni müvatineicacaicü müvatixavasie.
\v 3 Hicü cuaunisata mehatinexüaca, cuiepa menivacüne
ꞌusicari. Türücariya mecaniupitüarieni yaxeicüa
terücaxi cuiepa miemete que memütetürücavi.
\v 4 Müpaü meteniutahüavarieni, ꞌasimemücaꞌiyurienicü
cuiepa mieme ꞌüxa, naime müsisiüravi naime cüye, masi
ꞌaxa memüvayurienicü teüteri Cacaüyari seyuya
memücahexeiya yucanata.
\v 5 Müpaü meteniupitüarieni, memücavacuinicü, masi
memüvaꞌuximatüacacü ꞌauxüme meseri. Que
memütevaꞌuximatüacai, yaxeicüa mecaniyüacaitüni cumu
quepaucua tevi terüca miquei.
\v 6 Mücü tucarisie teüteri mepeucuicuni peru
mepüyutatexieni memücuinicü. Mepüyuvautüveni
memücuinicü, peru müiya püyutaꞌuna, vahesie pumaveni.
\p
\v 7 ꞌUsicari que memüteyuxexeiyacai, cavayasixi
memücuhaꞌarisie cuyacü mecaniꞌanenecaitüni. Yumuꞌusie
huru mumayaripaü ꞌaneneme menanutimanacaitüni. Yühüxie
teüteri que memüteꞌayeꞌanene müpaü mepayeꞌanenecai
müme.
\v 8 ꞌUcari vahepaü mepüteꞌucüpacai. Vatame mayesi
vatamepaü püꞌanenecai.
\v 9 Tepüapaü ꞌaneneme mepanacatütücatei yutavisie.
Yuꞌanacü meputixuvarücacai, cuyaxi vacaxetatepaü que
mütiuyuatüca cavayasixi mehehapacacu cuyacü
meheutanausaxüaximetü.
\v 10 Vacuaxi terücaxi vacuaxipaü caniꞌanenecaitüni
ꞌanuyemümüsütü. Yucuaxicü mecanitürücavicaitüni,
ꞌauxüme meseri ꞌaxa memüvayurienicü teüteri.
\v 11 Que müꞌane mütivaꞌaitüvacai niuqui tuayame
canihücütücaitüni mana müreꞌaitacai meucatevasie.
Hepürayusixi vaniuquicü ꞌAvaruni catinitevacaitüni,
Cüriyecusixi vaniuquicü Tiyucaꞌuname titevatü.
\p
\v 12 Nayeꞌaniri, xüa ꞌui matüari que mutayü. ꞌArique
cuxi canayeꞌamücü hutacüa xüa ꞌui que mutayü.
\p
\v 13 Hicü ꞌataxevirieca mieme niuqui tuayame nitahüsieni
yucuxineta. Haqueva meve mürayutimavatüre nauca ꞌavayari
mexeiya hurucü müveviyatüca Cacaüyari hüxie muve, ꞌava
hixüapa ꞌutaniucame xeime neniuꞌenieni.
\v 14 Müpaü tinitahüave ꞌataxevirieca mieme niuqui
tuayame cuxineta macuecai, Niuqui tuayamete quenivarutixüna
yunaucame, müme hatuxame ꞌamüpasie ꞌEupürate mütitevasie
memanutaxüriya.
\v 15 Hicü meniutixünarieni yunaucatü niuqui tuayamete
memücuhaꞌarisiecai mücü hurayari mücü tucari mücü
meseri mücü viyari mecuevietü, memüvacuinicü teüteri
ꞌesivatücacu xei terisi.
\v 16 Vacuyaxima cavayasixi vahesie mematecai huta
sienituyari miriyari miriyari mecaniyupaümecaitüni.
ꞌInüari nenetimani.
\p
\v 17 Hicü heinüsitapaü nepütiunierixü, ꞌipaü
meꞌaneneme nenivaruxeiya cavayasixi, müme vahesie mematecai
meta. Yutavisie menenacatütücateitüni tepüa
mayetaimaüyetücatei mayecuauniyatücatei mayetataxavi
ꞌasupürepaü. Cavayasixi vamuꞌu mayesi vamuꞌupaü
caniꞌanenecaitüni. Vateta nivayeneicacaitüni tai cuauni
ꞌasupüre.
\v 18 Haica cuiniyayaricü meniucuini teüteri ꞌesivatücacu
xei terisi, taicü cuaunicü ꞌasupürecü vateta
müvayeneicacaicü.
\v 19 Cavayasixi yütürücariya mecanexeiyacaitüni yuteta
yucuaxisie. Vacuaxi cuterixi vahepaü caniꞌanenecaitüni
ꞌanutimuꞌutücaitü. Mücücü ꞌaxa mepüvayuriecai.
\p
\v 20 Hipatü teüteri mepücaꞌucuiꞌivaxü mevacuicacu.
Müme mepücatehayevacai meteꞌayexeiyatü tita yumamacü
memütevevie. Mepücatehayevacai nenevieri mevapitüatü
cacaüyarixi ꞌaxa memüꞌanene, huru pürata vürunise tete
cüye cacaüyarixiyari sepa memücaheuneniere
memücaheuꞌenana memücaheucünivave.
\v 21 Mepücatehayevacai que memüteyumemivacai que
memüteyuquevayacai que memütevacumaüvacai müme
memücavaꞌüitamatücai memücavacünamatücai, que
memütenavayacai.
\c 10
\s Niuqui tuayame xapa mahuriecai
\p
\v 1 Hicü xeime niuqui tuayame neniuxeiya türücaüyeme
taheima ꞌacamiecame, haivitüri ꞌanacatücüme, cuvivi
ꞌanamacame yumuꞌusie. Taupaü nayexavatücaitüni yühüxie,
ꞌücateya tai ꞌiquisaraüyaripaü pütiyuxexeiyacai.
\v 2 Yumamasie xapa nahuriecaitüni ꞌesiyeume verime.
Yuserieta niutaqueni haramarasie, yuꞌutata cuiepa.
\v 3 Hicü carima niutaniuni maye que mütiuhiva. ꞌUtaniucu,
ꞌatahuta türanariyari niuyuani.
\v 4 Quepaucua muyua ꞌatahuta türanariyari ne
nepütitiꞌutüaniquecai. Xeime neniuꞌenieni taheima müpaü
haineme, Seyucü queneunama tita pemütiuꞌeni
müretüranaxü ꞌatahuta türanariyari,
yapepücaracaꞌutüani.
\v 5 Hicü mücü niuqui tuayame nemuxei haramarasie cuiepa
ꞌuveme, yuserieta neutimeni muyuavisiepaitü.
\v 6 Niuyuhüritüani ꞌiꞌeniecacu que müꞌane yuheyemecü
mayeniere, que müꞌane mitivevi muyuavi tita muyuavisie
mütixuave cuie tita cuiepa mütixuave haramara tita
haramarasie mütixuave naime mütiutivevi. Müpaü
niutayüni, ꞌAri hicürixüa neutipareri,
\v 7 masi quepaucua ꞌatahutarieca mieme niuqui tuayame
mütaniuni, quepaucua mitahüsieni yucuxineta, ꞌana tita
Cacaüyari mütiutiꞌavietaxü canayeꞌamücü caniunüre, que
mütivacuxaxatüvacai texaxatamete hesiena mieme
memüteꞌuximayacai.
\p
\v 8 Hicü que müꞌane nemuꞌeni taheima ꞌutaniucame, mücü
tavari pünesiꞌutahüavixü müpaü ꞌutaitü, ꞌUma quenemie,
quenahuri ꞌiya xapa ꞌesimüyeva muveri niuqui tuayame
mehurie haramarasie cuiepa ꞌuvetü.
\v 9 Hicü neneyani niuqui tuayamesüa müpaü
neticühüavetü münesihuritüanicü xapa ꞌesimüyeva. ꞌIya
müpaü netinicühüaveni, Quenanuhurisü queneutacuaꞌi.
ꞌAyuriepa pasiüre, peru ꞌateta xietepaü pacacare.
\v 10 Hicü xapa ꞌesimüyeva neꞌanuhurieca niuqui tuayame
mehuriecai, nenitacuani. Neteta xietepaü pacacarixü.
Quepaucua nemitacuai, neyuriepa hasivitü nayani.
\v 11 ꞌIya müpaü pünetiutahüavixü, Neuyeveca ꞌecü
tavari Cacaüyarisie mieme pemüticuxatanicü yumüireme
nuivarite vahepaüsita naisarie cuiepa miemete vahepaüsita
müireme niuquicü memütiniuca vahepaüsita yumüireme
teꞌaitamete vahepaüsita.
\c 11
\s Tehecüatamete yuhutatü
\p
\v 1 Mericüsü haca necaniucueitüarieni
tiꞌinünüatamepaü ꞌaneme. Müpaü netiniutahüavarieni,
Quenanucuquexi, Cacaüyari tuquieya queneutiꞌinüata
mürayutimavatüre meta, mümeta memüyunenevietüve tuquipa
quenivarutiꞌinüata.
\v 2 Tuqui tacua queneuhayeva xeicüa. Pepücaꞌitiꞌinüata,
mana memupitüariecü nuivarite hipatü. Müme meniquesicuni
Cacaüyari quiecariena huta teviyari heimana huta meseri.
\v 3 Neri yuhutame necanivarexeiyani tehecüatamete. Müme
nepüvatiyasani que memüteꞌunenierixü müpaü
memütecuxatanicü xei miriyari heimana huta sienituyari
heimana haica teviyari tucari, maixa meꞌanacatütücaitü
hiverica hepaüsita.
\p
\v 4 Huriva cüyeyari hutatü, cüxeme hutatü cuie cusiyari
hüxie mütiꞌu, ꞌime mecanihümetüni.
\v 5 Xüca xevitü ꞌaxa vayuriemücüni, tai püvayeneica
vateta, püvatixüsitüani müme memüvarayeꞌunie. Müpaü
catinimieriemücü que müꞌane ꞌaxa müvayuriemücü.
\v 6 Müme heiserie mecanexeiyani memeitinanicü muyuavi
mücacaviyecü mexi metecuxata. Heiserie mecanexeiyanita ha
hepaüsita, xuriya memayeitüanicü, memüvativanicü cuiepa
memütama naime cuiniyacü sepa quepaümexa mütivanaque.
\v 7 Quepaucua meminüni müpaü metehecüatatü, yeutanaca
meucatevasie matine varaꞌivamütü püyumieneni. Varaꞌivame
nivacuimücü.
\v 8 Vacaxarite quiecari hixüapa pütiheni quiecari
ꞌamacuyevasie. ꞌIyari que mütimate ꞌinüaricü, Suruma
catinacutevaca, ꞌEquipitu meta racuteva mücü quiecari.
Mana Tatiꞌaitüvame curuxisie caniumierieni.
\v 9 Hipatü naisarie cuiepa miemete, nuivarite vahesüa
miemete müireme niuquitecü memutiniuca vahesüa miemete
yumüireme teüteriyari vahesüa miemete yunaitü
menixeiyacuni vacaxari haica tucari heimana merie tuca.
Mepücavataunieni memücateuquiyanicü vacaxari teuquiyapa.
\v 10 Cuiepa memütama mepüyutemamavieca mevaxeiyatü,
temavierica mecanexeiyacacuni, ꞌimiquieri
mepüyutanüꞌairiexüani, texaxatamete yuhutatü
memüvaꞌuximatüacaicü cuiepa memütama.
\v 11 Hicü haica tucari heimana merie tuca ꞌanucayacu
ꞌiyari nieritüvame nivaruviya Cacaüyari heiyenüꞌacu.
Yüꞌücatecü menanucuꞌuni, müme memüvaruxei cuini mieme
meniutimamani.
\v 12 Hicü xeime meniuꞌenieni taheima ꞌutaniucame müpaü
mütivarutahüavixü, ꞌUva xequenanaticüni. Muyuavisie
menanuticüne haivitürisata, müme memüvarayeꞌuniecai
mevaxeiyacacu.
\v 13 ꞌAnari cuie carima niutayuani. Quiecari tapa xeicüa
nacaxürieni tamamata taparisie mieme xei tapari. ꞌAtahuta
miriyari meyupaümetü teüteri meniucuiꞌiva cuie ꞌutayuacu.
Hipatü meneumamacaitüni, ꞌaixüa metenicuxatacaitüni
Cacaüyari taheima macave hepaüsita.
\p
\v 14 Nayeꞌani xüa ꞌui hutarieca que mutayü. Cuitüva
canayeꞌamücü hairieca xüa ꞌui que mutayü.
\s Cuxineta ꞌatahutarieca mieme
\p
\v 15 Hicü ꞌatahutarieca mieme niuqui tuayame nitahüsieni
yucuxineta. Hicü carima menetiniucacaitüni muyuavisie
müpaü meꞌutiyuatü, Hicüsüari Tatiꞌaitüvamematü
hesüana mieme Cürisitumatü, müme cuiepa meteꞌaitatü
mecanacüne. Catiniꞌaitacamücü yuheyemecü.
\v 16 Hicü ꞌuquiravesixi xei teviyari heimana yunaucatü
Cacaüyari hüxie mematecai ꞌuvenitesie, müme
meniutihüximaꞌuni. Nenevieri mecanipitüani Cacaüyari
\v 17 müpaü meꞌutiyuatü,
\q Pamüpariyusi tepümasipitüa
\q ꞌEcü Tiꞌaitame Cacaüyari
\q Naimecü pemütürücaüye ꞌacu,
\q Que müꞌane ꞌamuyeicacai
\q Que müꞌane ꞌamuyeica,
\q Que müꞌane ꞌumamie
\q ꞌEcü pecanihücütüni,
\q Penisutüani
\q ꞌAcümana peyüanetü
\q Cuini mieme que pemütitürücaüye.
\q Penisutüani
\q Petiꞌaitatü.
\q
\v 18 Nuivarite menihaꞌacaitüni,
\q Peru ꞌahaxüa canayeꞌani,
\q Tucari rayeꞌa
\q Pemüvatahüavecü müquite,
\q Vaꞌivarica pemüvaminicü
\q ꞌAhesüa miemete teꞌuximayatamete,
\q Texaxatamete,
\q Cacaüyari teüterimama,
\q Müme memümateheuyehüviri
\q Que müꞌane pemühücü,
\q Türi ꞌuquiravesixi yunaitü.
\q Nayeꞌani meta
\q ꞌEcü pemüvaseviximanicü
\q Müme cuie memüseviximacai.
\p
\v 19 Mericüsü Cacaüyari tuquieya caneuyepiere
muyuavisie. Cacuni türatuya müꞌinüariyari
canimasiücücaitüni tuquita yecaitü.
Nivayemerücacaitüni neyeyuanecaitüni
neyetürarücacaitüni cuie niutayuani te ꞌenenetü
niucaxürieni.
\c 12
\s ꞌUca cumatü
\p
\v 1 Mericüsü ꞌinüari masiücütü nayani muyuavisie
marivetü. ꞌUca mana nanierecaitüni tau ꞌanacatütü
meserisie ꞌavetü, yumuꞌusie muma ꞌanamatü tamamata heimana
huta xuravesixi mumayari
\v 2 nunusi ꞌayetütü. Niutahivacaitüni ꞌicucuinecacu cui
tinivenique.
\v 3 Xevitüta masiücütü nayani muyuavisie
ꞌinüaritütü, cu ꞌepatü heuxuretü ꞌatahuta muꞌuyari
hexeiyatü, tamamata ꞌavayari hexeiyatü, yumuꞌutesie
ꞌatahuta mumayari ꞌanamanatü.
\v 4 Yucuaxicü nivaranacahapani xuravesixi muyuavisie
ꞌesivatücacu xei teresi, nivareucaxürieni cuiepa. Cu
ꞌamüpa ꞌuca mütiniverümecai hüxie niuhuni ꞌicuaimütü
nuꞌaya quepaucua mütiniveniquecai.
\v 5 Hicü ꞌuquitüme niutiniveni, que müꞌane yunaime
nuivarite tivaꞌaitüvame mayani, que müꞌane tepüa
ꞌisüyari müticueni. Nuꞌaya panutivitüquie Cacaüyarisüa
ꞌuvenieya macavesiepaitü.
\v 6 Hicü ꞌuca niuyutaꞌuna macumavesiepai, haque Cacaüyari
meicuhaꞌaritüiri mana meꞌüviyarienicü xei miriyari
heimana huta sienituyari heimana haica teviyari tucari.
\p
\v 7 ꞌAna cuya niutaveni muyuavisie. Miyeri, niuqui
tuayametemama yunaitü menisutüani cumatü meyucuitüvetü.
Cu niyumienecaitüni, niuqui tuayametemama hepaüna,
\v 8 peru mepüyutatexi, huyeri pumavecai memütenaquenicü
muyuavisie.
\v 9 Hicü mücü cu ꞌamüpa, mücü cu matüaripai mümieme
Cauyumarie mütiteva Satanaxi mütiteva, que müꞌane
mütivaꞌirüviya yunaime cuiepa memütama, mücü
cananuyehüiyani mana. Cuiepapai neucahüiyani, niuqui
tuayametemama ꞌutümana meneucaxüriyani mana.
\p
\v 10 Hicü xeime neniuꞌenieni müpaü mutayü carima,
Hicürixüa canayeꞌani, canimasiücüni tacacaüyari que
mütiyuvicueisitüva que mütitürücaüye que mütiꞌaita.
Canimasiücüni Cürisitu heiserie que mürexeiya hesüana
miemetütü. Que müꞌane müvaxaneta taꞌivamarixi, mücü
cananuyehüiyani, que müꞌane tacacaüyari hüxie
müvaxanetacai tucaricü tücaricü.
\v 11 Mümeri meneꞌiva Muxa xuriyayacü, memütecuxatacaicü
meyuhecüatatü, yutucari memücayucueririecaicü sepa
memucuiꞌivaxü.
\v 12 ꞌAyumieme queneꞌatemavieca muyuavi ꞌacu, xeme
muyuavisie xemetitei xequeneyutemamavieca. Xüa ꞌui cuiepa
xemütama haramarasie xemütama. Cauyumarie neucahüiyani
xehesüa cui haꞌatü müpaü timaitü, yapaümexa xeicüa
püyüveni.
\p
\v 13 Mericüsü quepaucua cu müpaü müretima cuiepapai
macahüiya, niveiyacaitüni mücü ꞌuca ꞌuqui mutinivexü.
\v 14 Hicü ꞌuca caniupitüarieni maꞌanatücanicü verica
ꞌamünenapaü, macumavesiepai manuvienicü yuhuyeripa, haque
mücaꞌixeiyacü cu, haque müremiquieca xei viyari,
ꞌariqueta huta viyari, ꞌariqueta merie viyari.
\v 15 Hicü cu hatuxamepaü pame ha nanatihayani ꞌuca
ꞌutüma ꞌenuhausitüanique.
\v 16 Peru cuie nipareviecaitüni ꞌuca. Nivatixavare, muva
neucayeurieni hatuxame cu menatihayaxü yuteta.
\v 17 Hicü cu niuyehaꞌani ꞌuca hepaüsita. Neyani
müyumienenicü, hipame hesiena memüyenunuiva
varayeꞌunietü, müme yamemütecahu Cacaüyari que
mütiꞌaita, memüyuhecüata Quesusisüa memiemetetütü,
müme varayeꞌunietü.
\c 13
\s Yeutari yuhutatü
\p
\v 1 Mericüsü mana neꞌutaqueca xiücaripa haramara tesita,
yeutanaca neniuxeiya haramarasie ꞌanatiyeiximeme. Tamamata
ꞌavayari nexeiyacaitüni, ꞌatahuta muꞌuyari meta,
ꞌavateyasie tamamata mumayari nanamanacaitüni. Muꞌuteyasie
püraꞌutücatei que mütiyuseviximacai ꞌaxa titevatü.
\v 2 Mücü yeutanaca nemuxei tüvepaü
catiniyuxexeiyacaitüni, husepaü reꞌücatü, mayepaü
retenitü. Hicü cu ꞌamüpa nipitüani yütürücariya,
heiserie nipitüanita mütiꞌaitanicü ꞌuvenisie ꞌacaitü
haque cu müreꞌaitacai, heiserie vaüca nipitüanita.
\v 3 Muꞌuya xevitü mumieriepaü pütiyuxexeiyacai, peru que
mütiucuinixü nanayehüiyani sepa mümüximecai. Yunaitü
cuiepa memütama meniꞌiyarixiecaitüni meꞌixeiyatü
yeutanaca, hesiena mepüteviyacucai.
\v 4 Nenevieri menipitüani cu, mücü heiserie mipitüacü
yeutanaca. Yeutanacata nenevieri menipitüani müpaü
meꞌutiyuatü, Quepaicü mücü yeutanacapaü püꞌane,
quepaicü püyüve hamatüana müyumieneni.
\p
\v 5 Hicü niuqui niupitüarieni vaüca müticuxatanicü,
miseviximanicü Cacaüyari ꞌaxa ꞌutaitü hepaüsitana.
Heiserie caniupitüarienita huta teviyari heimana huta
meseri müpaü mütiyurienenicü.
\v 6 Hicü nisutüani ꞌaxa ꞌutaitü Cacaüyari hepaüsita,
ꞌiseviximatü que müꞌane mühücü, ꞌiseviximatü
tuquieyata, mümeta muyuavisie memütitei vaseviximatü
nisutüani.
\v 7 Hicü müpaü tiniupitüarieni müyumienenicü
Cacaüyari teüterimama müvarayeꞌuniecacü,
müvaraꞌivanicü. Heiserie pupitüarie yunaime nuivarite
vahepaüsita, naime cuiepa quiecatari vahepaüsita, naime
niuquicü memutiniuca vahepaüsita, yunaime teüterixi
vahepaüsita.
\v 8 Yunaitü cuiepa memütama nenevieri menipitüacaitüni,
müme xeicüa cuie munetüariepai memacayasarie Muxa mumierie
xapayasie quename tucari mehexeiya manuyünesie, müme
xeicüa nenevieri mepücaꞌipitüacai.
\p
\v 9 Xaütü netü muꞌenaxü.
\q
\v 10 Que müꞌane teüteri teva müvarahapa
\q Vaviyatü,
\q Mücü nanuhaniemücü tevapai.
\q Que müꞌane ꞌixiparacü mütiyumemiva,
\q Mücüta ꞌixiparacü
\q Canimieriemücü vaüriyarica.
\m Müpaü metemaitü Cacaüyari teüterimama mepüteꞌucaꞌenivani yuri meteꞌerietü.
\p
\v 11 Mericüsü ꞌana xeime necaniuxeiya yeutanaca cuieta
matine. Canaꞌavatücateitüni muxapaü. Cupaü
tiniuxaxatacaitüni.
\v 12 Yeutanaca matüari müyüanecai heiserie que
mürexeiyacai, ꞌicü naimecü yaxeicüa catiniyurieneni
hüxiena ꞌuvetü. Nicuyuitüani cuie, müme cuiepa
memütamata nivarucuyuitüani nenevieri memipitüanicü
mücü yeutanaca matüari müyüanecai, que müꞌane
manayehüiya müximetü quepaucua mütiucuinixü.
\v 13 ꞌInüari püvevie mamarivaveme, tai ꞌaitüatü taheima
macanenicü cuiepa teüteri meꞌixeiyacacu.
\v 14 Cuiepa memütama tinivaꞌirüviyani müireme ꞌinüari
pitüarietü, yamütiyurienenicü yeutanaca hüxie ꞌuvetü.
Müpaü tinivarutaꞌaitüani cuiepa memütama ꞌüquisica
memütavevienicü yeutanacapaü tiyuxexeiyame, que müꞌane
manutanierixü sepa ꞌixiparacü mütiucuinixü, mücüpaü
ꞌaneme.
\v 15 Hicü müpaü catiniupitüarieni ꞌiyari mipitüanicü
yeutanaca ꞌüquisicayari, mücü müticuxatanicü
yeutanacapaü tiyuxexeiyatü, müpaü mütiꞌaitanicü
memücuiꞌivacü queyupaümetü nenevieri memücaꞌipitüa
yeutanaca ꞌüquisicayari.
\v 16 Hicü müpaü tinivarutaꞌaitüani türi ꞌuquiravesixi
yunaime, memeucaꞌu memümamave, müme memüyünüꞌa müme
vaüriyarica memüteꞌuximaya yunaime, yumamasie yuserieta
memüꞌinüaritüarienicü yucanata.
\v 17 Tevi pücayüve tixaütü mütinanenicü mütituanicü
me xüca caꞌinüaritüarieveni, raꞌutü que mütiteva
yeutanaca, que mütiꞌinüasie terüvaricaya ꞌinüariyari
nusu.
\v 18 ꞌIcücü yapüretimani, que müꞌane ꞌaixüa müremuꞌu
queꞌitiꞌinüata yeutanaca ꞌinüasicaya. Tevi müpaü
catiniꞌinüasieca que mütiteva. ꞌInüasicaya ꞌataxeime
sienituyari heimana haica teviyari heimana ꞌataxevi
canipaümeni.
\c 14
\s Mümüiremete vanüavari
\p
\v 1 Mericüsü ꞌana neneutaniere. Camüsü mücü Muxa
Nunusi mana navecaitüni yemurisie Siyuni mütitevasie.
Hamatüana mana menitiꞌucaitüni xei sienituyari miriyari
heimana huta teviyari miriyari heimana nauca miriyari
meyupaümetü, yucanata meteꞌaꞌutücaitü mücü que
mütiteva, ꞌuquiyarieyata que mütiteva.
\v 2 Yuariya neniuꞌenieni muyuavisie haineme, ha ꞌamüpapaü
tiꞌeniüriücüme, türanari mütürücaüyepaü
tiꞌeniüriücüme. Yuariya nemuꞌeni, canarivivamete
vacuicari canihücütücaitüni.
\v 3 Cuicari mühecua menicuicacaitüni mana metiꞌutü
ꞌuveni hüxie, yunaucatü memayeneniere vahüxie,
ꞌuquiravesixi vahüxie. Xevitü pücayüvecai meitimanicü
mücü cuicari, müme xei sienituyari miriyari heimana huta
teviyari miriyari heimana nauca miriyari memüyupaümecai
xeicüa mepimaicai, queyupaümetü memutixünarie
meꞌutinanaiyaca cuiepa memütama vasata.
\v 4 Müme mecanihümetüni memücayusevixima ꞌucaravesixi
mevaveiyatü, mepücaxuriquitüca. Müme mecanihümetüni
memeveiya mücü Muxa que mütimie. Teüteri vasata
meputinanaiya memütixünarienicü, Cacaüyari nivesicaya
Muxa nivesicaya memacünecü.
\v 5 Vateta ꞌitarica pumave, vahesie pücarahüiva.
\s Niuqui tuayamete haica niuquiyari memüꞌatüa
\p
\v 6 Hicü xeime neniuxeiya niuqui tuayame muyuavi hixüapa
haviecame. Niuqui ꞌaixüa manuyüne yuheyemecü
mücuxaxasiva nexeiyacaitüni yamütivataxatüanicü cuiepa
memütama, yunaime teüterixi yunaime nuivarite naime
niuquicü memutiniuca naime cuiepa quiecatari.
\v 7 Müpaü nainecaitüni carima, Xequeteneuyehüvirieca
Cacaüyari, veꞌeme xequeneꞌerieca. Tucari canayeꞌani
müvatahüavecü ꞌisücametütü. Nenevieri xequenepitüaca
que müꞌane mitivevi muyuavi cuie haramara haixate.
\p
\v 8 Hutariecata niuqui tuayame ꞌutümana niumiecaitüni
müpaü ꞌutaitü, Quiecari mümarive niucaꞌunarieniri
Vaviruniya quiecariyari. Yaxeicüa ꞌucapaü yuvinu que
mütivaꞌitüa memüꞌaxenicü memicumaüvanicü, mana
quiecatari menivaꞌitüacaitüni yunaime nuivarite
memühecarienicü. Hicürixüa vaquiecari niucaꞌunarieni.
\p
\v 9 Hairiecata niuqui tuayame vaꞌutüma niumiecaitüni
yaꞌutaitü carima, Que müꞌane nenevieri mipitüa yeutanaca,
que müꞌane nenevieri mipitüa ꞌüquisica hepaüna
mütiyuxexeiya, que müꞌane mitanaquiꞌerie seyuya yucanata
yumamasie,
\v 10 mücü nenuꞌiemücü Cacaüyari vinuya mucatuariva
tecüxitana canüitüarievetü, yapüretimani que mütihaꞌa
Cacaüyari quepaucua mücü mihecani.
Caniꞌuximatüariemücü taicü ꞌasupürecü Cacaüyari
niuqui tuayametemama vahüxie Muxa hüxie.
\v 11 Yameteꞌuximatüariecacu cuauniyari yuheyemecü
petineicani. ꞌUxipiya mepücahexeiyani tucaricü tücaricü
queyupaümetü nenevieri memipitüa yeutanaca, müme
nenevieri memipitüa ꞌüquisica hepaüna mütiyuxexeiya,
memitanaquiꞌerie seyuya que mütiteva raꞌucacu vahesie.
\v 12 Müpaü metemaitü mepüteꞌucaꞌenivani Cacaüyari
teüterimama, müme yamemütecahu Cacaüyari que mütiꞌaita
yuri memüteꞌerie Quesusisie.
\p
\v 13 Hicü xeime neniuꞌenieni müpaü hetaineme taheima,
Müpaü quetineuꞌutüa, ꞌAixüa mecaniꞌitüariecacuni müme
Tiꞌaitamesie meteviyatü memücuini hicü ꞌuxaꞌatüni varie.
Hü, naineni ꞌIyari, meniꞌuxipiecacuni que
memüteꞌuꞌuximayacai. Tita memüteꞌuyuri pümasiücüni sepa
haque memeꞌuva.
\s Cuiepa que mütiucaxirie
\p
\v 14 Hicü neneutaniere. Camüsü haivitüri mütuxa
ꞌacananierecaitüni. Haivitüri heima nacateitüni que
müꞌane Yuri Tevipaü mütiyuxexeiyacai, yumuꞌusie huru
mumayari ꞌanamatü, yumamasie huxa mataxicaunicai ꞌacuetü.
\v 15 Hicü xevitü niuqui tuayame tuquita ꞌayeneca
nitahivieni que müꞌane haivitüri heima macatei, müpaü
ꞌutaitü carima, ꞌAhuxacü queneucaxica. Tucari nayeꞌani
xirica, türicu müseseꞌicü cuiepa.
\v 16 Hicü haivitüri heima ꞌacaitü yuhuxacü cuiepa
necuxini. Cuiepa nacuxirieni naitü.
\p
\v 17 Hicü xevitü niuqui tuayame nivayeneni tuquita
muyuavisie. Mücüta huxa mataxicaunicai nacuecaitüni.
\v 18 Xevitiüxa mürayutimavatüresie neyeyani niuqui
tuayame heiserie mexeiyacai tai hepaüsita. Carima
nitahivieni que müꞌane huxa mataxicaunicai macuecai
yaꞌutaitü, ꞌAhuxa mataxicaunicü queneucuxeüri caxie
tacariyari cuiepa. ꞌAri caxie caniuticuacuaxeniri.
\v 19 Hicü mücü niuqui tuayame yuhuxacü nicuxeürieni
caxie cuiepa. Caxie pünameta ꞌamüyevata neicaxürieni,
ꞌinüari mayanicü Cacaüyari que mütihaꞌa.
\v 20 Hicü caxie pünameta mieme niutiquesinarieni quiecari
tesie. Xuriya nivayeneicacaitüni caxie pünameta,
cavayasixi vapirenupaü suitü, haica sienituyari heimana
xei teviyari quirumetüruyari ꞌacuyeucacu.
\c 15
\s ꞌAtahuta cuiniyayari ꞌatahutatü memiꞌatüa niuqui
tuayamete
\p
\v 1 Mericüsü xeime ꞌinüari neniuxeiya muyuavisie
mariveme tiyühüxiyatüvame. Niuqui tuayamete nenivaruxeiya
ꞌatahutame ꞌatahuta cuiniyayari memexeiyacai ꞌimatürieca
miemete.
\p
\v 2 Hicü haramarapaü ꞌaneme nepuxei xicüripaü
tiyuxexeiyame tai nücame. Mümeta nepüvaruxei memeꞌivaxü
yeutanaca, memeꞌivaxü üquisica hepaüna mütiyuxexeiyacai,
memeꞌivaxü seyuya ꞌinüasicaya cümana müꞌinüasie que
müꞌane mühücü. Xicüri haramarayari tesita
menitiꞌucaitüni harupa meꞌuꞌütü Cacaüyari menüavatü.
\v 3 Muisexi Cacaüyarisie mieme tiꞌuximayatü que
mütinüavacai, Muxa que mütinüava, müpaü
meteniucuicacaitüni müpaü meꞌutiyuatü,
\q Que pemütiyuriene
\q Pepümarive
\q Pepütiꞌahüxisiyatüvame
\q Tiꞌaitame Cacaüyari
\q Nai pemütiꞌaita.
\q Heiseriemecü yapeticamietü
\q Yuri pehaitü ꞌapepuyeica,
\q Nuivarite tivaꞌaitüvame.
\q
\v 4 Yunaitü mepümateheuyehüvirieca Tiꞌaitame,
\q Visi mepümatexatani
\q Que müꞌane pemühücü.
\q ꞌEcü ꞌaxaütame pepüpasie,
\q Yunaitü nuivarite meniꞌaxüacuni,
\q Meniyuneneviecacuni
\q ꞌAhüxie metiꞌutü
\q Mümasiücücü
\q Tita pemütiyuriene
\q Heiseriemecü yapeticamietü.
\p
\v 5 Mericüsü ꞌana neneutaniere. Haque masi yemecü
mepasie tuquita muyuavisie, haque Cacaüyari mehecüasie,
mana tineuyepiyani.
\v 6 Tuquita menayenexüani niuqui tuayamete ꞌatahutatü
memiꞌatüa ꞌatahuta cuiniyayari. Rinu ꞌixuriquiyari
müꞌitiyacai müxavatücai mepanacatütücatei, yutavisie
huru hüiyameyaricü mepühüatücatei.
\v 7 Hicü yunaucatü memayeneniere, xevitü mücü
nivaruhanitüani niuqui tuayamete huru xacüyari ꞌatahutame
haxüa hüpüneme, Cacaüyari yuheyemecü mayeyuri que
mütihaꞌa ꞌinüariyari.
\v 8 Hicü tuquita cüsi niutahüne, Cacaüyari que
mütimarive que mütitürücaüye ꞌinüariyari puyü
cüsiyari. Xevitü pücayüvecai tuquita meutahanicü mexi
catiparivecai ꞌatahuta cuiniyayari, ꞌatahutatü niuqui
tuayamete memiꞌatüa.
\c 16
\s Haxüa que memüteꞌupitüarie xacürüte müpaü
tihüpüneme
\p
\v 1 Mericüsü xeime neniuꞌenieni carima ꞌutaniucame
tuquita müpaü tivacühüaveme niuqui tuayamete ꞌatahutame,
Mana xequenehu, cuiepa xequeneucatuaxüa ꞌatahuta xacüyari
Cacaüyari haxüaya mühüpüne.
\p
\v 2 Hicü mexüacame neyani. Neicatuani yuxacü cuiepa.
Hicü teüteri memüteꞌaꞌutücatei yeutanaca seyuyacü
nenevieri memipitüacai ꞌüquisica yeutanacapaü
mütiyuxexeiyacai, müme cuini mieme ꞌaxa ꞌanemecü
meniutiꞌesata.
\p
\v 3 Hicü ꞌutümana mieme neicatuani yuxacü haramarasie.
Xuriya nayani müqui xuriyayapaü ꞌanetü. Yunaitü
memayenenierecai meniucuini haramarasie memuꞌuvacai.
\p
\v 4 Hicü hairieca mieme neicatuani yuxacü hatuxametesie
haixatesie. Mücüta xuriya nayani.
\v 5 Hicü mücü niuqui tuayame hacü mühüritüariecai
neniuꞌenieni müpaü ꞌutaineme, ꞌEcü ꞌapemuyeicacai
ꞌapemuyeica pemüpasie, heiseriemecü pepütiuyurie müya
pemütivamariꞌitüacü.
\v 6 ꞌAteüterima vaxuriya niucamete vaxuriya
memutiyeurixücü, ꞌecüta xuriya pepüvaruꞌitüa. Müpaü
pütiunaquixü vahesie.
\v 7 Xeimeta neniuꞌenieni mürayutimavatüresie müpaü
ꞌutaineme, Hü, Tiꞌaitame Cacaüyari nai pemütiꞌaita, yuri
pehaitü heiseriemecü yapeticamietü pepütiꞌamariꞌitüva.
\p
\v 8 Hicü naurieca mieme neicatuani yuxacü tausie. Tau
müpaü catiniupitüarieni müvativarücanicü teüteri
taicü.
\v 9 Teüteri menitivariquecaitüni cuini mieme, peru
meniseviximacaitüni que müꞌane Cacaüyari mühücü, ꞌaxa
meꞌutiyuatü hepaüsitana heiserie mexeiyacaicü müpaü
mütivacuiniyatüanicü. Mepücatehayevacai que
memüteyuriecai, mepücayuvaüriyacai veꞌeme
memüꞌeriecacü.
\p
\v 10 Hicü ꞌauxüvirieca mieme neicatuani yuxacü yeutanaca
ꞌuvenieyasie haque müreꞌaita. Naisarie müraꞌaitacai
nacuyüre. Teüterimama yuneni menicuquevecaitüni
müvarucucuinecaicü ꞌana.
\v 11 Cacaüyari muyuavisie macave mecaniseviximacaitüni
ꞌaxa meꞌutiyuatü hepaüsitana, mücü müvarucuitücateicü
memeuꞌesatücateicü. Peru mepücatehayevacai que
memüteyuriecai.
\p
\v 12 Hicü ꞌataxevirieca mieme neicatuani yuxacü hatuxame
ꞌamüpasie ꞌEupürate mütitevasie. Ha mana niucavani
macuhaꞌarisienicü teꞌaitamete vahuye tau manatineicasie
miemete.
\p
\v 13 Hicü necanivaruxeiya cacaüyarixi yuhaicame
memücaꞌitiyatücatei, temusi vahepaü meꞌaneneme, cu teta
yeutanaca teta tixaxatame mütiꞌitavacai teta
meꞌayenexüacu.
\v 14 Müme cacaüyarixi ꞌaxa memüꞌanene vaꞌiyarite
mecanihümetüni. Marivemecü meteniyuriecaitüni,
meneutayeixüani yunaime cuiepa memütama tevaꞌaitüvamete
vahesüa, memüvacuxeürienicü cuyacü, mücü tucari
mümarive ꞌayeꞌayu que maine Cacaüyari nai tiꞌaitame.
\v 15 Mücü müpaü paine, Neuxei, tinavayame müꞌaxepaü
nepunuani. ꞌAixüa püꞌitüarieni que müꞌane müyühütüa,
que müꞌane mühaꞌarisie yuꞌixuriqui mücavaune capa mavetü
ꞌuyeicanicü ꞌuxaꞌa varie meꞌixeiyacacu que mütiyuteviya.
\v 16 Mericüsü teüteri menivarucuxeürieni haque
ꞌArümaquetuni mütiuyeteva Hepürayusixi teüteriyari
vaniuquicü.
\p
\v 17 Hicü ꞌatahutarieca mieme neicatuani yuxacü ꞌecapa.
Hicü muyuavisie niuqui nivayeyani tuquita ꞌuveni manuvesie
carima ꞌutaitü, Canayeꞌaniri.
\v 18 Caniucumerücacaitüni necuyuanecaitüni
necutürarücacaitüni. Cuie carima niutayuani, que
mücatitayuavecai quepaucua tevi cuiepa ꞌucaitü matüa
hicüque, cuini mieme tiutayuatü nayani.
\v 19 Hicü quiecari ꞌamacuyeva haicacüa niutitare. Hipame
nuivarite vaquiecarite caniucaxürieni. ꞌAna Cacaüyari
Vaviruniya quiecari mümarive quiecatari
pücavarutatümaiyaxü, masi yutecüxita mieme yuvinu
nivaruꞌitüani yuhaxüa.
\v 20 Naitü cuie haramara hixüapa mayema niyupata,
yemurite niutimamavere.
\v 21 Teüteri vahesie niucaxürieni te nauca haxuvayari
rahetetücaitü. Teüteri meniseviximacaitüni Cacaüyari
ꞌaxa meꞌutiyuatü hepaüsitana, te ꞌacaxüriecu
memüteꞌucuinixücü cuini mieme.
\c 17
\s ꞌUca mümariꞌitüarieni
\p
\v 1 Mericüsü ꞌatahutatü niuqui tuayamete ꞌatahuta
xacüyari memexeiyacai, xevitü mücü ꞌaura canayani.
Müpaü canetiniutahüave, Quenayeꞌa. Nepümasixeisitüani
que mütimariꞌitüarieni mücü ꞌuca tuminicü
müyuvitünüa marivetü, hatuxame ꞌamüpa tesita ꞌacaitü.
\v 2 Mücü menicumaüvacaitüni cuiepa teꞌaitamete
cavaꞌüyatücacu. Vinuyacü cuiepa memütama
menitarüvecaitüni, mücü yuvitünüacacu.
\p
\v 3 Hicü ꞌIyari nesiꞌuviyacu mücü canenevitüni
macumavesiepai. ꞌUca neniuxeiya yeutanaca meutaüraüyesie
ꞌacaime. Yeutanaca naisarie hesiena püraꞌucai ꞌaxa que
mütitevacai yuseviximatü. ꞌAtahuta muꞌuyari tamamata
ꞌavayari canexeiyacaitüni.
\v 4 ꞌUca taüraüyeme xureme panacatücücai. Hurucü
tetexi visi mürayeꞌarücü perüracü püquemaritüariecai.
Huru tecüxiyari pahanacai yumamasie hüneme.
Püꞌinüarieyatücai que mütiyuseviximacai que
mücatiꞌitiyacai müpaü tiyuvitünüatü.
\v 5 Canatana que mütitevacai naꞌucaitüni ꞌüquisica
müꞌaviecü, Vaviruniya quiecari ꞌamacuyeva, ꞌanuyütü,
Cuiepa miemete tuminicü memüyuvitünüa, yunaitü
memüyusevixima, ꞌicü pühücü vavarusi, ꞌanuyütü.
\v 6 Hicü mücü ꞌuca neniuxeiya tavecame Cacaüyari
teüterimama vaxuriya ꞌanuꞌieca, müme memüyuhecüatacai
Quesusisüa memiemetetütü vaxuriya ꞌanuꞌieca. Hicü
neꞌixeiyatü cuini mieme neniꞌiyarixiecaitüni.
\v 7 Niuqui tuayame müpaü canetiniutahüave, Titayarisü
petiꞌiyarixie. Nepümatihecüatüani ꞌavie niuqui ꞌuca
hepaüsita yeutanaca metücü ꞌatahuta muꞌuyari tamamata
ꞌavayari mexeiya hepaüsita.
\v 8 Mücü yeutanaca pemüxeiya, mücü ꞌaniuyeicacaitüni,
hicü ꞌapücaꞌuyeica. Meucatevasie vatineme, püyemie
mücaꞌunarienicü. Cuiepa memütama queyupaümetü
memücaꞌacayasarie cuie munetüariepai xapasie tucari
memexeiya manuyünesie, müme meniꞌiyarixiecacuni quepaucua
memixeiya mücü yeutanaca ꞌamuyeicacai, hicü
ꞌamücaꞌuyeica, mayeneni.
\p
\v 9 ꞌÜquisica ꞌipaü caniꞌaneni meitimanicü que müꞌane
ꞌaixüa müremuꞌu mütimaive. ꞌAtahuta muꞌuyari, mücü
ꞌatahuta yemuriyari canihücütüni hesiena maca ꞌuca.
\v 10 Teꞌaitamete ꞌatahutatü mecanihümetüni meta.
Yuꞌauxüvitü menacaxürieniri, xevitü ꞌapuyeica, xevitüta
pücueviya pücanuave cuxi. Quepaucua munuani, peuyevese
ꞌesiva yamüreuterecü xeicüa.
\v 11 Mücü yeutanaca ꞌamuyeicacai ꞌamücaꞌuyeica, mücü
ꞌatahairieca mieme canihücütüni müme. ꞌAtahutatü
vahesüa canimiemetüni. Caniyemieni mücaꞌunarienicü.
\p
\v 12 Tamamata ꞌavayari pemuxei, mücü tamamata teꞌaitamete
mecanihümetüni. Meteꞌaitatü mepücaꞌisutüavave cuxi.
Heiserie mecanitanaquiꞌericuni xei hurayari
memüteꞌaitanicü yeutanacamatü.
\v 13 Müme vaꞌiyari caniyuxevini. Yütürücariya
mecaniyetuiriecuni yeutanaca vatürücariya mexeiyanicü,
heiserie mexeiyanicü müme heiserie memexeiyapaü.
\v 14 Cuya meniveviecuni Muxa meꞌayeꞌunietü. Muxa
nivaraꞌivamücü cusiyarite müvacusiyaricü teꞌaitamete
mütivaꞌaitüvamecü. Müme hamatüana memuꞌuva
meputaꞌinierie mepanayexeiyarie yamepütecahu.
\p
\v 15 Hicü müpaü netiutahüavixü, Ha pemuxei haque meca
ꞌuca müyuvitünüa, mücü nuivarite mecanihümetüni
mümüiremete teüterixi niuquitecü memutiniuca mepühüme.
\v 16 Tamamata ꞌavayari pemuxei, yeutanacata, ꞌaxeicüa
mecanitiꞌuxiveꞌeriecuni ꞌuca müyuvitünüa. ꞌUcuꞌeirivame
menayeitüacuni maveme. Menitacuaicuni vaiyarieya,
menitataiyacuni taicü.
\v 17 Cacaüyari müpaü pütivaꞌiyaritüani müpaü
memüteyuriecacü mücü püta que mütiyuriemücü vaꞌiyari
yuxevicacu meꞌipitüacacu yeutanaca mücü püta
mütiꞌaitametünicü vahesie mieme. Müpaü meteyurieyu
catinayeꞌatüariemücü nai Cacaüyari que mutayü.
\v 18 ꞌUca pemuxei, mücü quiecari mümarive
canihücütüni haque cuiepa teꞌaitamete memeꞌaitüarie.
\c 18
\s Vaviruniya que mütiucaꞌunarie
\p
\v 1 Mericüsü ꞌana nenixeiya xeime niuqui tuayame taheima
ꞌacamiecame cuini mieme heiserie mexeiyacai. Cuiepa
canacuhecüare ꞌiya marivecacu.
\v 2 Hicü türücaüyemecü niutahiva müpaü ꞌutaitü,
Quiecari mümarivecai niucaꞌunarieniri Vaviruniya.
Cacaüyarixi ꞌaxa memüꞌanene vaqui nayani, yunaitü
ꞌiyarite memücaꞌitiyatüca, yunaitü viquixi
memücaꞌitiyatüca yunaitü memüꞌuxiveꞌeriva vatesariya
ratüa.
\v 3 Yaxeicüa ꞌucapaü yuvinu que mütivaꞌitüa
memüꞌaxenicü memicumaüvanicü, mana quiecatari yunaime
nuivarite menivaꞌitüacaitüni cümana memühecarienicü.
Cuiepa teꞌaitamete menicumaüvacaitüni cavaꞌüyatücacu.
Tetuayamete cuiepa miemete meheucaꞌutü
menayuyeitüacaitüni visi ꞌane müyupitüacaicü
ꞌanayuhayevamecü.
\p
\v 4 Hicü neniꞌenieni xeime müpaü mainecai taheima,
Quiecarisie xequenevayecüni neteüterima ꞌacu, xehesieta
rahüiyanicü tita ꞌaxa memüteꞌuyuri mana quiecatari,
xemücateꞌucacucuinenicü ꞌiya que müticuine.
\v 5 Tita ꞌaxa mütiuyuri niucuxeüriyani muyuavisiepaitü.
Cacaüyari pücaꞌitatümai que mütiuyuri heiseriemecü
yacaticamietü.
\v 6 ꞌAxequetenapiniri que mürapicai. Hepaüna capaümeme
masi tavari cuxi ꞌaxequetenapiniri müpaü mütiuyuricü.
Tecüxitana haque meinüitüacai yuvinu tavari cuxi
yaxequeteneutanüitüiri.
\v 7 Marivetü que mürayuyeitüacai visi ꞌane que
mütiyupitüacai, yaxeicüa ꞌuximatüarica heiverica
xequenepitüaca. Yuꞌiyarisie müpaü paine, ꞌEna
netiꞌaitametütü ꞌenepuca. Necarecacünatü nepücaꞌayani,
heiverica nepücahexeiyani.
\v 8 ꞌAyumieme cuiniyaya xei tucarisie caninuamücü,
müyacü cuiniyacü hacacü püpitüarieni. Taicü
nitataiyariemücü. Canitürücaüyeni que müꞌane
mitamariꞌitüani tiꞌaitametütü Cacaüyaritütü.
\p
\v 9 Hicü cuiepa teꞌaitamete queyupaümetü memicumaüvacai
cavaꞌüyatücacu hamatüana visi ꞌane memüyupitüacai,
müme meniutisuanacuni meyuheiverietü meheꞌerivatü
quepaucua memixeiya cuauni ꞌatineicame tataiyarieximecacu.
\v 10 Memamatü müpaü mütiꞌuximatüarieximecü, teva
menitiꞌuicuni müpaü meꞌutiyuatü, Xüa ꞌui, xüa ꞌui,
yapaucua quetiumariꞌitüarie Vaviruniya quiecari marivetü
türücaüyetü.
\p
\v 11 Tetuayamete cuiepa miemete mecaniutisuanacuni
meyuheiverietü meheꞌerivatü, müpaü metemaitü, xevitü
tavari pücaꞌinaneni vaꞌicate.
\v 12 Meneiyeꞌicatacaitüni mana huru meꞌatüvatü pürata
tete mürayeꞌarü perüra rinu ꞌixuriquiyari ꞌixuriqui
mütataüravi sera ꞌixuriquiyari ꞌixuriqui müxuxure, naime
cüye visi muꞌüa, naitü mutiveviya herepanite tameyaricü,
naitü mutiveviya cüye mürayeꞌarücü, tepüa müxeta
tepüa mümerücavi marümuri teteyari
\v 13 canera visi muꞌüatüca ꞌücua mixaxi rivanu vinu viya
harina türicu vacaisixi muxasi cavayasixi caxetate
teüteri, teüteri vaꞌiyarite meta.
\v 14 Müpaü meputiyuaneni ꞌana, Tita pemütihiveꞌeriecai
ꞌaꞌiyarisie cuacuaxicacu, ꞌahesüa caniumaveni. Xavatütü
marivetü naitü tiniutatümaiyarieni ꞌahesüa. Yuheyeme
pütiumaveni.
\p
\v 15 Müme memituacai müya ꞌaneneme, müme meheucaꞌutü
memayuyeitüacai cümana, yunaitü tevapai menitiꞌuicuni
memamatü müpaü mütiꞌuximatüarieximecü, meꞌutisuatü
meyuheiverietü
\v 16 müpaü meꞌutiyuatü, Xüa ꞌui, xüa ꞌui, yapaucuaque
pumaveriyari quiecari marivetü. Rinu ꞌixuriquiyari
ꞌixuriqui mütataüravi müxuxure nanacatücücaitüni,
yuquemaritüatü hurucü tetexi visi mürayeꞌarücü
perüracü.
\v 17 Xei hurayarisie niutimavere cui que müreucavecai.
\p Naviya nüꞌavamete, yunaitü naisarie memüꞌaxe naviyasie
meyetetü, naviya vequemete, queyupaümetü haramarasie
memüteꞌivacai, mümeta tevapai menitiꞌucaitüni.
\v 18 Meꞌixeiyatü cuauni ꞌatineicame tataiyarieximecacu
meniutihivacaitüni müpaü meꞌutiyuatü, Haquevasü xevitü
quiecari mücü ꞌamacuyeucaipaü ꞌanetü.
\v 19 Tumuanari meneutivivivacaitüni yumuꞌusie meꞌutisuatü
meyuheiverietü müpaü meꞌutiyuatü, Xüa ꞌui, xüa ꞌui,
yapaucua que tiumaveriyari quiecari marivetü. Mana
meheucaꞌutü menacüne yunaitü naviyasixi memüvarexeiya
haramarasie, mücü vaüca mürexeiyacaicü.
\v 20 Muyuavisie xequeneyutemamavieca xeheꞌerivatü.
Cacaüyari teüterimama, nüꞌarisixi texaxatamete yunaitü
xequeneyutemamavieca. Cacaüyari ꞌimariꞌitüatü
nixehecüatani heiserie xemexeiyacü xeme.
\p
\v 21 Hicü niuqui tuayame mütürücaüye nenutuni tete
matapaü necame. Haramarasie neicahüani müpaü ꞌutaitü,
Yaxeicüa carima tinicaꞌunariemücü Vaviruniya quiecari
mümarive. Tavari ꞌuxaꞌa varie pacumaveni.
\v 22 Canarivivamete xavererusixi cürautavivamete cuxineta
hüsivamete mepücaꞌenierieni ꞌahesie. Naime tevevivamete
mepücaxuaveni ꞌahesie. Tüxüme pücaꞌenierieni ꞌahesie.
\v 23 Cüxeme ꞌahesie pücacüxeniri. Neneüqueme viquivame
vaniuqui pücaꞌenierieni ꞌahesie. ꞌAhesüa quiecatari
memütetuacai cuiepa memütama vaꞌisücate
mecanihümetücaitüni. Petiꞌaquevayacacu
meteniꞌirüviyariecaitüni yunaitü nuivarite.
\v 24 Mana mücü quiecarisie masiücütü nayani
texaxatamete vaxuriya mutayeuricü Cacaüyari teüterimama
vaxuriya mutayeuricü, yunaitü cuiepa memucuiꞌivaxü
vaxuriya mutayeuricü mana.
\c 19
\p
\v 1 Mericüsü ꞌana neniꞌenieni yuariya yumüireme teüteri vaniuquipaü tiꞌeniüriücüme türücaüyeme. Müpaü meniutiyuanecaitüni muyuavisie, ꞌAixüa xequeneutiyuaneni Cacaüyari hepaüsita. Pütiyuvicueisitüvame püveꞌeme pütürücaüye tacacaüyari.
\v 2 Yuri haitü heiseriemecü yaticamietü pütiyumariꞌitüva. Nitamariꞌitüani mücü ꞌuca mümarivecai tuminicü müyuvitünüacai, que müꞌane müvaseviximacai cuiepa memütama yuvitünüatü. Cacaüyari ꞌapürepiniri ꞌuca metayeuricü teüterimama vaxuriya.
\v 3 Hicü hutarieca müpaü meniutiyuani, ꞌAixüa xequeneutiyuaneni Cacaüyari hepaüsita. Camü, cüsi yuheyemecü nivatineicani mana.
\v 4 Hicü ꞌuquiravesixi xei teviyari heimana yunaucame vahamatü yunaucatü memayeneniere meniutihüximaꞌuni yunaitü. Nenevieri mecanipitüani Cacaüyari ꞌuvenisie ꞌacaicu müpaü meꞌutiyuatü, Niuqui caniseꞌini. ꞌAixüa xequeneutiyuaneni Cacaüyari hepaüsita.
\v 5 Hicü niuqui nivayeneni ꞌuveni manuvecaisie müpaü ꞌutaitü,
\q ꞌAixüa xequeneutiyuaneni
\q Tacacaüyari hepaüsita
\q Yunaitü ꞌiparevivametemama
\q Yunaitü xemüteheiyehüviri
\q Türi ꞌuquiravesixi yunaitü.
\s Neüquiya ꞌixüarariyari Muxa mivevie
\p
\v 6 Hicü mümüiremete vaniuqui neniuꞌenieni. Ha ꞌamüpapaü pütiꞌeniüriücücai, türanari mütürücaüyepaü. Müpaü mecaniutiyuanecaitüni,
\q ꞌAixüa xequeneutiyuaneni
\q Cacaüyari hepaüsita,
\q Tiꞌaitatü matüacü
\q Tiꞌaitame mütacacaüyari
\q Nai mütiꞌaita.
\q
\v 7 Tequetatemamavieca
\q Temavierica tequehexeiyani
\q Visi tequeteꞌixatani
\q Mayeꞌacü Muxa mütineüquecü.
\q ꞌÜyaya puyucuhaꞌaritüa.
\q
\v 8 Caniupitüarieni rinu ꞌixuriquiyari
\q Müxavatü müꞌitiya manacatünicü.
\m Rinu ꞌixuriquiyari caniꞌinüaritüni, tita memüteyurie heiseriemecü yametecahutü Cacaüyari teüterimama vaꞌinüariyari.
\p
\v 9 Hicü müpaü pünetiutahüavixü niuqui tuayame, ꞌAixüa mecaniꞌitüarieca müme memutaꞌinierie ꞌixüararipa, Muxa neüquecacu. Müpaüta nerahüave, ꞌIcü Cacaüyari niuquieya müyuri canihücütüni.
\v 10 Hicü hetüana neniutihüximaqueni nenevieri neꞌipitüanique. Müpaü nerahüave, Quetineuhayeva. ꞌAhepaü necatiniꞌuximayatametüni ne, ꞌaꞌivama memüyuhecüata Quesusisüa memiemeteütü vahepaü nepütiꞌuximaya. Nenevieri quenepitüaca Cacaüyari püta. Que müꞌane müyuhecüata Quesusisüa miemetütü, mücü ꞌiyari canipitüarieca Cacaüyari texaxatametemama vahepaü.
\s Que müꞌane cavaya meutuxasie macatei
\p
\v 11 Mericüsü muyuavi neniuxeiya reutenime. Cavaya meutuxa mana niuvecaitüni. Que müꞌane hesiena macatei Yamüticamie catinitevacaitüni, Yuri Maine titevatü. Heiseriemecü yaticamietü catiniyumariꞌitüvametücaitüni caniyumienecaitüni.
\v 12 Hüxiteya tai mütacapaü pütiyuxexeiyacai, yumuꞌusie müireme muma nanamanacaitüni. Que mütiteva nayeꞌucaitüni hesiena, peru xevitü ꞌasipücatimaicai que mütiteva, ꞌiya xeicüa yapütimaicai.
\v 13 ꞌIxuriqui xuriyacü müxure nanacatücücaitüni. Cacaüyari Niuquieya catinitevaca.
\v 14 Cuyaximama muyuavisie miemete meneveiyacaitüni ꞌutümana cavayasixi memeutuxa vahesie meꞌutetü, rinu ꞌixuriquiyari mütuxa müꞌitiya meꞌanacatütücaitü.
\v 15 Tetana niyeneicacaitüni ꞌixipara meutixicacaunicai cümana müvativitenicü nuivarite. Pütivaꞌaitüa tepüa ꞌisüyari ꞌacuetü. Mücü canihücütüni que müꞌane mitiquesina caxie pünameta mieme, ꞌinüari vevienetü Cacaüyari nai mütiꞌaita que mütihaꞌa que mütivaheca.
\v 16 Camixayasie teurieyasie müpaü püreꞌuxacai que mütiteva, Teꞌaitamete Tivaꞌaitüvame titevacacu, Cusiyarima Vacusiyari titevacacu.
\p
\v 17 Mericüsü xeime neniuxeiya niuqui tuayame tausie ꞌuveme. Carima niutahiva müpaü tivacühüavetü yunaime viquixi muyuavi hixüapa meꞌavüximecacu, Xequenacüni, xequeneyucuxeürie, Cacaüyari ꞌicuai püvevieni vaücava.
\v 18 Xequetenecuaca teꞌaitamete vavaiyari, cuyaxi vaꞌuquiyarima vavaiyari, memütürücavi vavaiyari, cavayasixi vavaiyari, müme vahesie memutecai vavaiyari, yunaitü memüyünüꞌa memüteꞌuximayatamete türi ꞌuquiravesixi yunaime vavaiyari.
\v 19 Hicü yeutanaca neniuxeiya, cuiepa teꞌaitamete vacuyaxima meꞌüarime. Yunaitü meniyucuxeürieximecaitüni memüyutacuinicü meꞌeyeꞌunietü que müꞌane cavayasie macatei cuyaximama mevarayeꞌunietü.
\v 20 Hicü yeutanaca niuviyarieni, hamatüanata tixaxatame mütiꞌitavacai niuviyarieni, que müꞌane ꞌinüari mütiveviecai yeutanaca hüxie cümana mütivaꞌirüviyacai müme memitanaquiꞌeri yeutanaca seyuya müme nenevieri memipitüacai ꞌüquisicaya hepaüna mütiyuxexeiyacai. Mücü yuhutatü meꞌayenenieretü meneucaxüriyani haracuna mütaꞌasie ꞌasupürecü mütaꞌasie.
\v 21 Hipatü yunaitü meniucuiꞌiva ꞌixipara vayeneicacacu que müꞌane cavayasie macatei tetana. Yunaitü viquixi meniutihuxani vavaiyaricü.
\c 20
\s Xei miriyari viyari
\p
\v 1 Mericüsü niuqui tuayame neniuxeiya muyuavisie
ꞌacamiecame yavi ꞌacuecame para mürevatiyepienicü
meucatevasie, carena caunariyari ꞌamüpa ꞌahurietü
yumamasie.
\v 2 Hicü mücü cu niuviya meripai mümieme Cauyumarie
mühücü Satanaxi mühücü. Canecuvieni xei miriyari
viyari.
\v 3 Meucatevasie heicahüaca nenunani, quiteniena
niseyumani, mücativaꞌirüviyanicü nuivarite mexi
cataparivecai xei miriyari viyari. ꞌAnaque neuyeveca
müxünarienicü yapaümexa.
\p
\v 4 Hicü teꞌaitamete vaꞌuvenite neniuxeiya mana ꞌaꞌucame.
Hesiena menayaxe müme heiserie memupitüarie.
Mecaniꞌisücatetücaitüni que memüteꞌupitüarie. Hicü
hipameta nenivaruxeiya, müme vamuꞌu manutivitequietüca
memüyuhecüatacaicü Quesusisüa memiemetetütü,
Cacaüyari niuquieya memücuxatacaicü yeutanaca nenevieri
mecapitüatü hepaüna ꞌaneme meta ꞌüquisica, seyuya
mecanaquiꞌerietü yucanata yumamasie, müme vaꞌiyarite
neniuxeiya. Müme meꞌanutaneniereca, Cürisitumatü
teꞌaitamete menacüne xei miriyari viyari.
\v 5 Hipatü müquite mepücaꞌanutanenierixü cuxi ꞌana, xei
miriyari viyari ꞌutaparecuque menanutaneniere ꞌimatüremete.
Que memüteꞌanucuꞌuitüarie haitürüvemete, matüari mieme
catinitevaca.
\v 6 ꞌAixüa caniꞌitüariecamücü, canipasiecamücü que
müꞌanesie mütinaque matüari miemecü manucuquenicü.
Vacucuyame heiserie pücahexeiya vahepaüsita hutarieca
memücuinicü, müme masi maraꞌacate mepühümetüni
Cacaüyarisie miemete Cürisitusie miemete. Hamatüana
teꞌaitamete mehümetütü mepüteꞌaitani xei miriyari
viyari.
\p
\v 7 Mericüsü quepaucua mütapare xei miriyari viyari,
Cauyumarie nixünariemücü manutahüiyasie.
\v 8 Püvatineni mütivaꞌirüviyanicü nuivarite taserieta taꞌutata tahixüata tasutüapai memetitei cuiepa, Cuquitari
Macuquitari yunaime. Nivacuxeüriemücü memüyutacuinicü haramara tesita miemepaü xiücaripaü meyupaümetü.
\v 9 Hicü cuie ꞌamacuyevasie meneutiyunixüani. Quiecari
münaquiꞌeriva ꞌaurie menicutecaitüni Cacaüyari
teüterimama memütihipitecaisie, peru tai nacaneni
muyuavisie nivarutixüsitüani müme.
\v 10 Que müꞌane mütivaꞌirüviyacai Cauyumarietütü mana
neucahüiyani haracuna ꞌasupürecü mütaꞌasie, haque
yeutanaca tixaxatame mütiꞌitavamatü memüyetecai.
Tucaricü tücaricü meniꞌuximatüariecacuni yuheyemecü.
\s ꞌUveni mütuxa hüxie memuhapanie ꞌisücame
müvatahüavecü
\p
\v 11 Hicü tiꞌaitame ꞌuvenieya neniuxeiya ꞌamüpa mütuxa.
Que müꞌane hesiena macatei mexeiyatü cuie muyuavi naitü
niyupataxüani hüxiena memücatitenicü. Vahuyeri pumavecai
muva memücatitenicü.
\v 12 Hicü müquite nenivaruxeiya ꞌuquiravesixi türi
yunaime, ꞌuveni manuvecai hüxie metiꞌucame. Xapate
niutiverarieni. Xevitüta niutaverarieni xapa haque
memacayasarie müme tucari memexeiya. Hicü müquite
meniutaꞌivaviyarieni que memüteꞌuyuri hepaüsita que
müreꞌuxacai xapatesie, müpaü meteniupitüarieni.
\v 13 Mana müquite menivayecüne haramarasie memüyetecai,
Tacucuyamesüa, Müquite Vahüvemesüa menivayecüne
müquite mana memüyetecai. Yuxexuitü meꞌutaꞌivaviyarieca
que memüteꞌuyuri hepaüsita, müpaü meteniupitüarieni.
\v 14 Tacucuyame caneucahüiyani haracuna mütaꞌasie
Müquite Vahüveme ꞌüaritü. Müpaü que
memüteꞌucuiꞌivaxü müme, hutarieca müya catinitevaca.
\v 15 Que müꞌane mücaꞌacayerie xapasie tucari mexeiya
manuyünesie, mücüta haracuna mütaꞌasie caneucahüiyani.
\c 21
\s Muyuavi mühecua cuie mühecua
\p
\v 1 Hicü muyuavi mühecua cuie mühecua neniuxeiya.
Meripai mieme muyuavi meripai mieme cuie neutayeixüani,
haramara pücaꞌanierecai.
\v 2 Cacaüyari quiecarieya Querusareme mühecua neniuxeiya
muyuavisie ꞌacamiecame, Cacaüyari manucasie ꞌacamieme,
haꞌarisiecame viquivame que mürequemarie yücünasie mieme.
Ne Vanitütü necanixeiya.
\v 3 Hicü neniꞌenieni que müꞌane carima müpaü mutayü
muyuavisie, Hicürixüa Cacaüyari teüteri vasata
nitaquimücü, vasata ꞌucaitü nayeimücü. Teüterimama
mecanihümetücacuni, mücütütü nivateütacamücü
vacacaüyaritütü.
\v 4 Naime vaꞌucai canaꞌitiexüamücü vahüxita. Tavari
mepücacuini mepücayuheiverieca mepücaꞌutihivani
mepücateꞌucacucuineni. Tita meripai mütimiemetücai
catinanacayaniri.
\p
\v 5 Hicü que müꞌane ꞌuvenisie macatei müpaü niutayüni,
Camü, naime hecuame nepayeitüaxime. Müpaüta
netiniutahüave, ꞌIpaü quetineuꞌutüa, müyüvecü ꞌicü
niuquisie yuri mütiꞌeriecacü, yuri mainecü.
\v 6 Müpaüta pünetiutahüavixü, ꞌAri tinayeꞌani naitü.
Ne Mexüacame ꞌImatüreme netitevatü, ne necanihücütüni
que müꞌane misutüa minüni. Que müꞌane meuharimücü, ne
necaꞌicuetatüatü neniharitüamücü nehaixacü cümana
tucari mexeiyanicü.
\v 7 Que müꞌane mürayuꞌiva, hesiena catininaquimücü
ꞌicü naitü. Neta Cacaüyarieya necanayeimücü, ꞌiyata
nenive rayani.
\v 8 Peru queyupaümetü memamatü memucunuaxüa,
yamemücatecahu, memüyusevixima, memüteyumemiva,
memüvacumaüva müme memücavaꞌüitama memücavacünama,
memüteyuquevaya, tetexi memüvarayexeiya, yunaitü
memüteꞌitava, yunaime vahesie pütinaqueni haracuna
ꞌasupürecü mütaꞌasie memeucaxüriyanicü haque hutarieca
memecuini.
\s Querusareme quiecariyari mühecua
\p
\v 9 Hicü ꞌatahutatü niuqui tuayamete ꞌatahuta xacüyari
memaꞌücai hüpüneme ꞌatahuta cuiniyayari ꞌimatürieca
mieme, xevitü müme ꞌaura ꞌayaca müpaü
pünetiutahüavixü, Quenayeꞌa. Viquivame
nepümasixeisitüani Muxa ꞌüyaya mayani.
\v 10 Hicü ꞌiyari nesiꞌuviyacu, canenevitüni yemuri
ꞌamünenasie ꞌemutevisie. Cacaüyari quiecarieya
pünesiꞌuxeisitüa Querusareme. Muyuavisie nacaneni
Cacaüyari manucasie ꞌacamietü
\v 11 Cacaüyaripaü visi ꞌanetü. Que mütixavatücai, tete
visi mürayeꞌarüpaü catiniyuxexeiyacaitüni casüpe
teteyaripaü tete manuyehecüapaü.
\v 12 Tesariyari ꞌenetü ꞌeꞌutevitü canitinierecaitüni
tamamata heimana huta quitenieyari hexeiyatü.
Maquitenietücateisie niuqui tuayamete menitiꞌucaitüni
tamamata heimana yuhutatü. Que memüteteteva nuivarite mana
tinaꞌutücateitüni nuivarite ꞌIxaheri nivemama vahesie
memüyecü tamamata heimana yuhutatü que memüteteteva.
\v 13 Tau manatineicasie haicacüa natetenicaitüni, taꞌutata haicacüa, taserieta haicacüa, tasutüapai
haicacüa.
\v 14 Quiecari tesariyayari tamamata heimana hutame
canexeiyacaitüni ꞌitutuicame. Hesiena que memüteteteva
tamamata heimana yuhutatü teyüꞌüquitüvametemama Muxasie
miemete catineꞌucaitüni.
\p
\v 15 Que müꞌane müneticühüavecai tiꞌinüatame
nacuecaitüni huru hacayari ꞌiꞌinüataque quiecari,
quiteniete, tesariyayari naime.
\v 16 Quiecari ꞌutaꞌisiquinatü ꞌepuma yaxeicüa
heutatetevatü yaxeicüa ꞌacuyeutü. Hicü nitiꞌinüata
quiecari mücü hacacü xei meseri yeiyayari heutatevacacu.
Yaxeicüa peutateteva ꞌapacuyeva ꞌapatitütü.
\v 17 Tesariyayarita niutiꞌinüata, xei sienituyari heimana
huta teviyari heimana nauca sicuriyari nayeꞌani tevi que
mütiꞌinüata, niuqui tuayame tevipaü yatiꞌinüatacacu.
\p
\v 18 Tesariyari casüpe teteyaricü püveviya. Quiecari
naitü huru tepüayari müꞌitiyacü caniveviyaca xicüri
mayeꞌitiyapaü tiyuxexeiyatü.
\v 19 Tetexi quiecari tesariyayari mütituica xexuitü
tetexi visi mürayeꞌarücü püquemaritüarie. Mexüacame
tete ꞌituicatü tesariya canicasüpetüni tuxatü, hutarieca
mieme sapiru yuavitü, hairieca mieme ꞌacata teteyari
yuavitü, naurieca mieme ꞌesimerarüta siüraüyetü,
\v 20 ꞌauxüvirieca mieme ꞌunise teteyari tuxatü,
ꞌataxevirieca mieme curunarina xuretü, ꞌatahutarieca mieme
cürisuritu taxaüyetü, ꞌatahairieca mieme veriru
siüraüyetü, ꞌatanaurieca mieme tupasiyu taxaüyetü,
tamamata mieme cürisupürasu siüraüyetü, tamamata
heimana xevirieca mieme casinitu yuavitü, tamamata heimana
hutarieca mieme ꞌamatisüta taüraüyetü.
\v 21 Quiteniete mieme tamamata heimana huta ꞌitupariyari
tamamata heimana huta perürayari canihücütüni. ꞌItupari
xexuitü xei perürayaricü putiveviya. Quiecarisie cayete
huru müꞌitiya canihücütüni xicüri mayehecüapaü
mütiyuxexeiya.
\p
\v 22 Mana tuqui nepücaꞌuxei quiecarisie. Tiꞌaitame
mücacaüyari nai mütiꞌaita yücümana canituquitüni, Muxa
meta.
\v 23 Quiecarisie mepücaheiyehüva tau meseri
mühecüarivienicü mana. Cacaüyari visi ꞌanetü
püvahecüariviya püta. Muxa canihücütüni
vahecüarivivame.
\v 24 Nuivarite metavicueisitüarieme ꞌameniuꞌuvacuni
müpaü metehecüariyarietü. Cuiepa teꞌaitamete tita
memütehexeiya visi tiꞌaneneme meteniꞌatüacuni mana,
veꞌemete que memütemarivani.
\v 25 Quitenie pücareunatücani tucaricü. Tücari
pücaxuaveni muva.
\v 26 Tita nuivarite memütehexeiya visi tiꞌaneneme
rayeꞌarücame mecateniꞌatüiriecuni.
\v 27 Hasuacu hesiena pücaheutahani tita mütiseviximarie,
tita mütiyusevixima meta mütiꞌitava. Müme xeicüa
memacayasarie Muxa xapayasie quename tucari mehexeiya
manuyünesie, müme meneutahaqueni mana.
\c 22
\p
\v 1 Mericüsü ꞌana hatuxame pünesiꞌuxeisitüa cümana
tucari memexeiyanicü. Tete manuyehecüapaü
nixavatücaitüni ha Cacaüyari ꞌuvenieya manucasie Muxa
ꞌuvenieya manucasie ꞌayeneicatü.
\v 2 Caye hixüapa, hatuxame tesita ꞌanataüye ꞌanutaüye
cüye nitiꞌucaitüni cümana tucari mexeiya. Tamamata
heimana hutamexa niutixuxuavereni, xexuime meserisie
niuticuacuaxeni. Cüye xavariyari nuivarite
memanayexürüvenicü caniꞌayumiemetüni.
\v 3 Naitü mütixaniꞌeriva pücaxuaveni hasuacu, muva
catiniumavecamücü. Cacaüyari ꞌuvenieya Muxa ꞌuvenieya
mana puveni, meꞌeyexeiyacacu müme hesiena mieme
memüteꞌuximaya.
\v 4 Yühüxie meniutineniericuni, que mütiteva püreꞌuxani
vacanata.
\v 5 Tücari pücaxuaveni muva, mepücaheiyehüaca cüxeme
müvahecüarivienicü ni tau. Tiꞌaitame Cacaüyari
püvahecüariviyani püta. Yuheyemecü teꞌaitamete
mepüyüaca.
\s Canehuraniri Cürisitu munuani
\p
\v 6 Hicü müpaü netiniutahüave, ꞌIcü niuquisie
caniyüveni yuri mütiꞌeriecacü, yuri paine.
Tiꞌaitametütü, que müꞌane Cacaüyaritütü ꞌiyari
müvatuitüa texaxatamete, mücü neiyenüꞌani yuniuqui
tuayame yamütivaꞌüquitüacacü yuhesüa miemete
teꞌuximayatamete, müme müpaü memütemaicacü que
müreuyevese yamütiyünicü cuitüva.
\v 7 Neuxei, cuitü nepunuani.
\q ꞌAixüa caniꞌitüariecamücü
\q Que müꞌane yamüticamie
\q ꞌIcü xapasie xasica que maine.
\p
\v 8 Nesü Vani necanihücütüni que müꞌane miꞌeni mixei
ꞌicü. Quepaucua nemuꞌenaxü nemunierixü,
neniutihüximaqueni nenevieri neꞌipitüanique niuqui tuayame
müpaü münetiuꞌüquitüa, hetüana neꞌucaveca.
\v 9 Müpaü nerahüave masi, Neuxei, quetineuhayeva.
ꞌAhepaü necatiniꞌuximayatametüni, ꞌaꞌivama Cacaüyarisie
miemecü memütecuxata vahepaü, müme yamemütecahu ꞌicü
xapa que maine vahepaü nepütiꞌuximayatame. Nenevieri
quenepitüaca Cacaüyari püta.
\p
\v 10 Hicü müpaü netiniutahüave, Pepücaꞌinenaca tita
mütixata ꞌicü xapasie, pepücaꞌiseyumaca niuquiyari.
Tucari nehuraniri mayeꞌanicü.
\v 11 Que müꞌane heiseriemecü yamücaticamie, yaxeicüa
püyüaneni heiseriemecü yacaticamietü. Que müꞌane
müyusevixima yaxeicüa quetiyuseviximaca. Que müꞌane
heiseriemecü yamüticamie meta heiseriemecü
yaqueticamieni. Que müꞌane Cacaüyarisie mieme müpasie,
yaxeicüa pasietü queyuhayevani.
\p
\v 12 Camüsü, cuitü nepunuani. Nenuame nepürapica,
yuxexuime netinivarapiniriemücü que memüteꞌuyuri.
\v 13 Neri Mexüacame ꞌImatüreme necatinitevaca, que
müꞌane misutüa minüni nemühücücü.
\p
\v 14 ꞌAixüa mecaniꞌitüariecacuni müme ꞌaixüa ꞌanemecü
memuꞌuvani vaꞌixuriqui ꞌitiyatücaicacu que
memüteheyeꞌecua. Heiserie mecanexeiyacacuni mücü cüyesie
mieme memütecuacacü, cümana tucari memexeiyanicü
heiserie mepexeiyanita quiecarisie memeutahaquenicü
quiteniesie.
\v 15 Quiecari varie meniuꞌuvacuni müme süicüri vahepaü
memüyüa teyuquevayamete müme memüvacumaüva que müꞌane
mücavaꞌüya mücavacüna memüteyumemiva tetexi
memüvarayexeiya, yunaitü ꞌitarica memünaquiꞌerie
memüteꞌitava.
\p
\v 16 Neri Quesusitütü neneinüꞌani neniuqui tuayame
müpaü mütixehecüasitüiyanicü haque xemeyutixexeüriva.
Ne nana necanihücütüni Ravirisie nemüyetüa nemutine.
Xurave müxavatü tuxacüta mieme necanihücütünita.
\p
\v 17 ꞌIyari Quenayeꞌa canaineni, Viquivameta yaxeicüa
paine. Que müꞌane müꞌena Quenayeꞌa queꞌutayüni. Que
müꞌane meuharimücü, mücü queꞌayani. Que müꞌane
müyuvaüriya cacuetatüarietü queꞌanuhareni cümana tucari
mexeiyanicü.
\p
\v 18 Ne ꞌipaü nepütivahecüatüa yunaime memiꞌenie ꞌicü
xapasie xasica que maine. Xüca xevitü ꞌicü niuqui
ꞌutanüitüvani, Cacaüyari mücü pünüitüani cuiniya
ꞌipitüatü ꞌicü xapasie que müreꞌutüca.
\v 19 Xevitü ꞌicü xapasie que maine xasica xüca niuqui
ꞌunavani, Cacaüyari pinavairienita tita hesiena
mütinaquequecai. Müpaü pücatipitüarieni macayerienicü
xapasie tucari memexeiya manuyünesie, ni Cacaüyari
quiecariena mayeꞌanicü que müreꞌuxa ꞌicü xapasie
yapücatipitüarieni.
\p
\v 20 Que müꞌane müpaü mütihecüata müpaü naineni,
Hü, cuitü nepunuani. Mücü niuqui caniseꞌini. Quenayeꞌa
Tiꞌaitame Quesusi.
\p
\v 21 Tiꞌaitame Quesusi ꞌaixüa quetiucaꞌiyarini yunaime
xehesie mieme. Müpaü xeicüa caniꞌaneni.