\id lev 
\mt Da Prieses
\h Da Prieses
\c 1
\s Da Burn Up Kine Sacrifice
\p
\v 1 Yahweh call Moses fo come by him, an he talk to him from inside da Tent wea da peopo come fo meet God.
\v 2 He tell Moses fo tell da Israel peopo dis: “If any one a you guys make one sacrifice fo me, Yahweh, bring one cow o sheep o goat.
\p
\v 3 “If da guy like bring one cow fo make one burn up kine sacrifice, den he gotta bring one boy kine cow dat no mo notting wrong wit um. He gotta show da cow to da pries guys outside wea you go inside da yard fo da Tent wea da peopo come fo meet me, Yahweh. Az fo make shua da cow stay okay fo me take um.
\v 4 Den da guy goin put his hand on top da head a da cow fo da sacrifice. Dat mean, I goin take da cow fo da guy, so da guy can come da same side wit me, Yahweh.
\v 5 Da guy goin kill da boy kine cow in front me, Yahweh. Den Aaron's boys, da pries guys, goin bring da blood from da boy kine cow, an sprinkle um on top all da sides a da altar, by da place wea you go inside da yard fo da Tent wea da peopo come fo meet me.
\v 6 Den da guy goin take off da skin from da sacrifice, an cut up da sacrifice an make pieces.
\v 7 Same time, Aaron's boys, da pries guys, goin set up da wood on top da altar da right way, an make one wood fire.
\v 8-9 Firs, da inside pieces an da legs, da guy goin wash um wit watta. Den da pries guys put da pieces, da head, an da fat, on top da wood dat stay burning on top da altar.
Wen da pries guys burn up da whole animal on top da altar, az one sacrifice dat dey burn eryting up, so da smoke from da fire go up an make one real nice smell fo me, Yahweh.
\p
\v 10 “If da sacrifice goin be da kine dey burn up one sheep o one goat, da guy gotta bring one boy kine sheep o one boy kine goat dat no mo notting wrong wit um.
\v 11 Da guy goin kill um by da nort side a da altar in front me, Yahweh. An Aaron's boys, da pries guys, goin sprinkle da blood on top all da sides a da altar.
\v 12-13 Da guy goin cut um up an make pieces, an wash da inside pieces an da legs wit watta. Den da pries guy goin put da pieces, an da head, an da fat, on top da wood dat stay burning on top da altar.
Wen da pries guy goin burn up da whole animal on top da altar, az one sacrifice dat dey burn eryting up, so da smoke from da fire go up an make one real nice smell fo me, Yahweh.
\p
\v 14 “If da sacrifice goin be one bird dat dey burn up, den da guy can give one dove o one young pigeon fo be da sacrifice fo him.
\v 15-16 Da pries guy goin bring da bird by da altar, an pull off da head. He goin take out da crop an pull out da feathers on top um, an throw um down by da east side a da altar wea dey put da ashes. He goin pull open by da wings, but not all da way off. Den he goin burn up da bird on top da altar. Da blood goin run off da side a da altar.
\v 17 Wen da pries guy burn up da whole bird on top da altar, az one sacrifice dat dey burn up, so da smoke from da fire go up an make one real nice smell fo me, Yahweh.”
\c 2
\s Da Sacrifice Wit Grain
\p
\v 1 “Wen somebody bring wheat o barley fo make sacrifice fo me, Yahweh, gotta be da bestes kine flour. Da guy dat bring um goin pour olive oil on top da flour, an put incense on top um,
\v 2 an take um by Aaron's boys, da pries guys. Da pries guy goin take some a da bestes kine flour nuff fo fill up his hand, wit da oil, an all da incense, an burn um up on top da altar fo help peopo rememba dat da whole sacrifice stay fo me, Yahweh. An da smoke from da fire goin go up an make one real nice smell fo me.
\v 3 Da odda part from da wheat o barley sacrifice goin be ony fo Aaron an his boys. Az anodda part a da kine sacrifice dey make wit fire, an dat stay real spesho fo me, Yahweh, jalike da part dey burn.
\p
\v 4 “If you bring wheat o barley dat you bake inside one oven fo make sacrifice, gotta be from da bestes kine flour too. You can bake roun breads dat no mo yeast an olive oil mix wit da flour. O you can bake crackas dat no mo yeast, an put olive oil on top um.
\v 5 If you cook da wheat o barley sacrifice on top one pan, gotta make um wit da bestes kine flour, mix wit olive oil, an no mo yeast.
\v 6 Broke um in small piece, an pour olive oil on top um. Az one wheat o barley kine sacrifice too.
\v 7 If you cook da wheat o barley sacrifice inside one pan, da flour gotta be da bestes kine mix wit olive oil.
\v 8 Den bring da wheat o barley sacrifice you make from dese tings fo me, Yahweh. Give um to da pries guy. He goin take um by da altar.
\v 9 Da pries guy goin take out da part from da wheat o barley sacrifice fo help peopo rememba dat da whole ting stay fo me, an burn dat part wit da fire on top da altar. An da smoke from da fire goin go up an make one real nice smell fo me, Yahweh.
\v 10 Da odda part from da wheat o barley sacrifice goin be ony fo Aaron an his boys. Az anodda part a da kine sacrifice dey make wit fire, an dat stay real spesho fo me, Yahweh, jalike da part dey burn.
\p
\v 11 “All da wheat an barley kine sacrifices you guys bring fo me, Yahweh, no make um wit yeast. You guys not suppose to burn honey, o anyting dat make da bread come big, inside one sacrifice you guys make fo me wit da fire.
\v 12 You can bring da yeast o da honey fo me, Yahweh, ony wen you guys bring da firs food you cut fo make sacrifice. But yeast an honey, not suppose to bring um wit da kine sacrifice you burn on top da altar fo make one real nice smell fo me, Yahweh.
\v 13 Put salt wit all yoa wheat o barley sacrifice. Az fo rememba da deal I wen make wit you guys. No make yoa wheat o barley sacrifice dat no mo salt. Put salt wit all yoa sacrifices.
\p
\v 14 “If you bring one wheat o barley sacrifice fo me from da firs wheat o barley you cut, smash da seeds a da new wheat o barley, an roast um on top da fire.
\v 15 Put olive oil an incense on top um. Az anodda kine wheat o barley sacrifice.
\v 16 Da pries guy goin burn one part a da wheat o barley. Az fo help peopo rememba dat da whole sacrifice stay fo me. Az da wheat o barley dey smash, an da oil wit da incense, one sacrifice dey make wit fire fo me, Yahweh.”
\c 3
\s Da Sacrifice Dat Show You An God Stay Tight
\p
\v 1 “If somebody make da kine sacrifice dat show dat him an me, Yahweh, stay tight wit each odda, da guy can give one cow, boy kine o girl kine. He goin bring um in front Yahweh, one animal dat no mo notting wrong wit um.
\v 2 He goin put up his hand on top da head a da sacrifice animal, den kill um outside da place wea you go inside da yard fo da Tent wea da peopo meet me, Yahweh. Den Aaron's boys, da pries guys, goin sprinkle da blood on top all da sides a da altar.
\v 3 Da guy dat bring da sacrifice fo show dat him an me, Yahweh, stay tight wit each odda, goin take one part from da sacrifice fo burn up fo Yahweh. He burn all da fat dat cova da stomach an da guts, an da fat dat stick wit da odda inside parts,
\v 4 an da two kidneys wit da fat on top um in da middo a da rib an da hip bone, an da part a da liver dat stick out. He goin take um out wit da kidneys.
\v 5 Den da pries guys, Aaron's boys, goin burn all dat on top da altar, on top da odda burn up kine sacrifice dey get on top da burning wood. An da smoke from da fire goin go up an make one real nice smell fo me, Yahweh.
\p
\v 6 “If somebody bring one sheep fo da kine sacrifice dat show dat him an me, Yahweh, stay tight wit each odda, he can bring one boy kine sheep, o one girl kine sheep, dat no mo notting wrong wit um.
\v 7 If he bring one bebe sheep fo make sacrifice, he goin bring um in front me, Yahweh.
\v 8 He goin put his hand on top da head a da sacrifice animal, den kill um in front da Tent wea da peopo meet me. Den Aaron's boys goin sprinkle da blood on top all da sides a da altar.
\v 9 From da sacrifice dat show dat him an me, Yahweh, stay tight wit each odda, he goin bring one part fo make sacrifice fo me wit fire: da fat, all da fat tail he cut off nea da bone by da back, all da fat dat cova da stomach an da guts, an da fat dat stick wit da odda inside parts,
\v 10 da two kidneys wit da fat on top um in da middo a da rib an da hip bone, an da part a da liver dat stick out. He goin take um out wit da kidneys.
\v 11 Da pries guy goin burn um up on top da altar fo one food kine sacrifice, dat he make wit fire fo me, Yahweh.
\p
\v 12 “If somebody bring one goat fo sacrifice, he goin bring um in front me, Yahweh.
\v 13 He goin put his hand on top da goat head, den kill um in front da Tent wea da peopo come fo meet me. Den da pries guys, Aaron's boys, goin sprinkle da blood on top all da sides a da altar.
\v 14 One part a da sacrifice animal he bring, he suppose to burn um up fo me, Yahweh, on top da fire: all da fat dat cova da inside parts, o dat stick wit um:
\v 15 both da kidneys wit da fat on top um in da middo a da rib an da hip bone, an da part a da liver dat stick out. He goin take um out wit da kidneys.
\v 16 Da pries guy goin burn um on top da altar fo one food kine sacrifice dat he make wit fire. An da smoke from da fire goin go up an make one real nice smell fo me, Yahweh. All da fat stay fo me.
\p
\v 17 “Dis one ting you guys gotta do all da time, you an all da peopo dat goin come from you guys, no matta wea you guys stay: No eat da fat o da blood.”
\c 4
\s Sacrifices Wen Peopo Do Bad Kine Stuff
\p
\v 1 Yahweh tell Moses
\v 2 fo tell da Israel peopo dis: “Wen somebody do someting bad, but dey do um befo dey tink bout um, wen dey do wat my rules tell dat dey not suppose to do, dey gotta make lidis:
\v 3 “If da guy dat do someting bad stay da main pries guy dat I, Yahweh, wen pick, dat goin make blame fo all da peopo. So da pries guy gotta bring one young boy kine cow fo me, dat no mo notting wrong wit um, an make sacrifice cuz he da one wen do something bad.
\p
\v 4 He goin bring da boy kine cow in front me, Yahweh, by da door fo da Tent wea da peopo come fo meet me. He goin put his hand on top da head a da cow, an kill um in front me.
\v 5 Den da pries guy dat I wen pick goin take some a da boy kine cow's blood inside da Tent wea da peopo come fo meet me, Yahweh.
\v 6 Da pries guy goin put his finga inside da blood, an sprinkle um seven times in front me, Yahweh, in front da thick curtain fo da place dat stay spesho fo me.
\v 7 An da pries guy goin put some blood on top da tings jalike horns dat stick outa da altar. Dass da small altar fo incense dat smell nice dat stay in front me, Yahweh, inside da Tent wea da peopo come fo meet me. All da lefova blood, he goin pour um outside, down by da bottom a da big altar wea dey burn up da sacrifices, by da door fo da Tent wea da peopo come fo meet me.
\v 8 Da pries guy goin take off all da fat from da boy kine cow, da fat dat cova da inside parts, o dat stick wit um. He goin use um fo make sacrifice cuz he da one wen do someting bad.
\v 9 He goin take both kidneys wit da fat on top um in da middo a da rib an da hip bone, da part a da liver dat stick out. He goin take um out wit da kidneys.
\v 10 He take um out jalike he take out da fat from da cow dey kill fo da sacrifice dat show dat him an me stay tight. Den da pries guy goin burn da fat on top da altar fo da kine sacrifice dey burn up.
\v 11 But den, da skin from da cow, an da meat, an head, an legs, da inside parts, an da kukae,
\v 12 all dat, da pries guy goin take um all outside da camp by one place dey make clean fo me, Yahweh, wea dey throw da ashes. He goin make one fire wit wood an burn um ova dea on top da ashes.
\p
\v 13 “If all da Israel peopo, da ones dat mess up togedda befo dey tink bout um, an dey do wat my rules tell dey not suppose to do dat, no matta dey donno dat wat dey do, stay bad, still yet dey get da blame fo do um.
\v 14 Wen dey find out dat dey do wass wrong, dey gotta bring one young boy kine cow fo make sacrifice cuz a da bad ting dey wen do. Dey goin bring um in front da Tent wea da peopo come fo meet me.
\v 15 Da older leaders fo da peopo goin put dea hand on top da head a da sacrifice cow in front me, Yahweh. Den dey goin kill da cow in front me.
\v 16 Den da main pries guy dat I Yahweh wen pick, goin take some a da blood inside da Tent wea da peopo come fo meet me.
\v 17 He goin put his finga inside da blood an sprinkle um seven times in front me, Yahweh, in front da thick curtain inside da tent.
\v 18 He goin put some a da blood on top da tings jalike horns dat stick outa da small altar dat stay in front me, Yahweh, inside da Tent wea da peopo come fo meet me. All da res a da blood, he goin pour um outside down by da big altar fo da burn up kine sacrifice, dat stay outside da door fo da Tent wea da peopo meet wit me, Yahweh.
\v 19 He goin take off all da fat from da cow, an burn um on top da altar fo make smoke.
\v 20 He goin make dis kine sacrifice wit da boy kine cow, jalike he wen do wit da odda boy kine cow fo da sacrifice dey make wen da main pries guy do bad kine ting. Az how da pries guy goin bring da peopo da same side wit God. Den God goin let go da peopo, an hemo dea shame fo da bad kine stuff dey wen do.
\v 21 Den da pries guy goin take da boy kine cow outside da camp, an burn um jalike he burn da odda boy kine cow. Az da kine sacrifice fo make fo all da peopo dat do bad ting.
\p
\v 22 “Wen one leada guy do wat one a Yahweh's rules tell he not suppose to do, but he no tink bout um befo, an he do um, he get da blame fo make lidat.
\v 23 Wen he find out dat wat he wen do, stay wrong, he gotta bring one boy kine goat dat no mo notting wrong wit um.
\v 24 He goin put up his hand on top da goat's head, an kill um da same place wea dey kill da animal fo make burn up kine sacrifice in front Yahweh. Az da kine sacrifice fo wen somebody do something bad.
\v 25 Den da pries guy goin take some a da blood from da sacrifice wit his finga, an put um on top da tings jalike horns dat stick out from da altar fo da burn up kine sacrifice, an pour out da res a da blood aroun da bottom a da altar.
\v 26 He goin burn all da fat on top da altar, jalike he burn up da fat fo da kine sacrifice dat show him an Yahweh stay tight wit each odda. Az how da pries guy goin bring back da leada guy da same side wit Yahweh, an Yahweh goin let da guy go, an hemo his shame from da bad ting he wen do.
\s Da Sacrifice Fo Da Odda Kine Peopo
\p
\v 27 “If one a da odda kine peopo do someting bad, an no tink bout um, an he do wat one a my rules tell dat nobody suppose fo do, he goin get da blame fo dat.
\v 28 Wen somebody tell him dat wat he wen do, stay wrong, den he gotta take one girl kine goat dat no mo notting wrong wit um, fo be da sacrifice fo da bad ting he wen do.
\v 29 He gotta put his hand on top da head a da animal fo da sacrifice cuz he wen do da bad ting, an kill um by da place wea dey make da burn up kine sacrifice.
\v 30 Den da pries guy goin take some a da blood wit his finga, an put um on top da tings jalike horns dat stick out from da altar fo da burn up kine sacrifice, an pour out da res a da blood aroun da bottom a da altar.
\v 31 Da pries guy goin take out all da fat, same ting jalike dey take um out fo da sacrifice dat show dat da guy an Yahweh stay tight wit each odda. Den he goin burn up da fat on top da altar. Da smoke goin be one real nice smell fo me, Yahweh. Az how da pries guy goin bring da guy back da same side wit me. Den I goin let him go, an hemo da shame from da bad ting he wen do.
\p
\v 32 “If da guy bring one bebe sheep fo make da sacrifice cuz he wen do bad ting, he goin bring one girl kine bebe sheep dat no mo notting wrong wit um.
\v 33 He goin put up his hand on top da head a da sacrifice animal, an kill um fo make sacrifice cuz a da bad ting he wen do, by da same place wea dey kill animal fo make da burn up kine sacrifices.
\v 34 Den da pries guy goin take some a da blood wit his finga from da sacrifice fo da bad ting da guy wen do, an put um on top da tings jalike horns dat stick out from da altar fo da burn up kine sacrifice, an pour out da res a da blood aroun da bottom a da altar.
\v 35 He goin take out all da fat, jalike dey take out da fat from da bebe sheep fo da sacrifice dat show dat me an da guy stay tight wit each odda. An da pries guy goin burn da fat on top da altar on top all da kine sacrifices dat dey make wit fire fo me, Yahweh. Az how da pries guy goin bring da guy back da same side wit me. An me, Yahweh, no matta da guy wen do bad kine stuff, I goin let him go an hemo his shame.”
\c 5
\s Sacrifices Wen Peopo No Tell Wat Dey Wen See
\p
\v 1 “If somebody do bad ting cuz he no say notting wen da judge put kahuna on top erybody dat wen see someting happen o know wat wen happen, if dey no say notting. Den da guy get da blame cuz he no talk.
\p
\v 2 “Maybe somebody touch someting dat make dem so dey no can come in front me, Yahweh. Jalike dey touch da mahke wild animals, o mahke animals dat da peopo take care um, o mahke animals dat run aroun on top da groun. Even if da guy donno dat he wen touch um, he still yet get blame an no can come in front me, Yahweh.
\p
\v 3 “O if somebody touch someting dat come outa anodda guy body an make um so he no can come in front me, Yahweh, o any odda kine ting dat make um so he no can come in front me, Yahweh. Den, no matta if da guy donno he wen touch um, wen he find out bout um, he still yet get da blame.
\p
\v 4 “O if somebody make strong promise fo do someting, no matta good o bad, but he no tink bout um befo he make da promise, no matta he no rememba da promise, wateva kine ting he do lidat, wen he find out bout um, he still yet get blame.
\p
\v 5 “Wen somebody get da blame cuz a one a dese tings, he gotta tell wat he wen do wrong fo get da blame.
\v 6 Den, cuz he get blame fo da bad ting he wen do, he gotta bring one girl kine bebe sheep o girl kine goat fo make sacrifice to Yahweh, an den da pries guy goin bring him back da same side wit Yahweh.
\p
\v 7 “If da guy get blame fo do bad ting, but he no mo notting fo buy one bebe sheep, he gotta bring two doves o two young pigeons in front Yahweh, fo make um right, one fo da sacrifice cuz a da blame, an da odda fo da kine sacrifice dey burn up.
\v 8 He goin bring um by da pries guy. He goin give da firs one to da pries guy fo da sacrifice cuz a da bad ting he wen do. Da pries guy goin pull da head from da neck, but no take um off all da way.
\v 9 Den he goin sprinkle some a da blood from da sacrifice on top da sides a da altar, an pour da res a da blood aroun da bottom a da altar. Az da kine sacrifice fo wen somebody do bad ting.
\v 10 Den da pries guy goin make one burn up kine sacrifice from da odda sacrifice bird, da way he suppose to do um. Dass how da pries guy goin bring da guy back da same side wit Yahweh. An Yahweh goin let him go an hemo his shame cuz a da bad ting he wen do.
\p
\v 11 “But if da guy no mo notting fo buy da two doves o two young pigeon, he gotta bring two quart a da bestes kine flour fo make sacrifice cuz a da bad kine ting he wen do. He no can put olive oil o incense on top um, cuz dis fo make sacrifice cuz a da bad ting he wen do.
\v 12 He goin bring da flour by da pries guy. Da pries guy goin take one hand full a da flour an burn um on top da odda sacrifices dey burn. Az da part fo tell da peopo dat da whole sacrifice stay fo Yahweh, one sacrifice wit fire fo Yahweh cuz da guy wen do bad ting.
\v 13 Az how da pries guy bring da guy back da same side wit me, cuz a da bad ting he wen do. An I goin let him go an hemo his shame. Da odda part a da sacrifice goin be fo da pries guy, jalike wit da wheat an barley kine sacrifice.”
\s Da Sacrifice Cuz A Da Blame
\p
\v 14 Yahweh tell Moses:
\v 15 “Maybe somebody show dat I no can trus um, cuz he foget bring da presents dat stay spesho fo me, Yahweh, but da guy neva tink befo he foget um dat he suppose to do um. Cuz he get da blame, he gotta bring one boy kine sheep dat no mo notting wrong wit um, dat cost da right silva weight dey use inside my spesho place. Dis da kine sacrifice fo pay fo da blame fo do someting bad to somebody.
\v 16 He gotta make um right wit wateva he wen mess up bout bring da tings he suppose to bring dat stay spesho fo me, an twenty percent moa. He gotta give um all to da pries guy, an da pries guy goin make sacrifice wit da boy kine sheep fo bring da guy back same side wit me, Yahweh. Den I goin let da guy go, an hemo his shame from da bad ting he wen do.
\p
\v 17 “If somebody do something bad, cuz he do wat my rules say he not suppose to do, no matta da guy donno az wrong, he get da blame fo dat, an he goin get punish.
\v 18 Cuz he get da blame fo dat, he gotta bring one boy kine sheep dat no mo notting wrong wit um, an dat you tell cost da right silva weight, an give um to da pries guy. Da pries guy goin make sacrifice fo him wit da boy kine sheep cuz a wat he wen do, no matta he neva know he wen do da wrong ting wen he wen do um. Az how da pries guy goin bring him back da same side wit me, Yahweh. An I goin let him go, an hemo his shame.
\v 19 Az how fo make sacrifice wen somebody get da blame fo do someting bad agains me, Yahweh.”
\c 6
\p
\v 1 Yahweh tell Moses dis:
\v 2 “If somebody do someting bad an ack da way I, Yahweh, no can trus um -- he bulai some odda guy wen dat guy trus him fo take care someting fo him, o steal from him, o he scam da odda guy,
\v 3 o he find someting da guy wen lose an he bulai bout um, o he make strong promise an bulai, o he do wateva bad kine stuff dat peopo stay do.
\v 4 Afta he do dis kine bad kine stuff, wen peopo find out bout um a he get da blame fo do um, den he gotta give back wateva he wen steal o scam o bulai bout, o da ting da guy lose an he find um,
\v 5 o wateva he wen make promise but he bulai. He gotta give um all back, an twenty percent moa, an give um all back da same day he make da sacrifice cuz a da blame.
\v 6 An cuz he get da blame, he gotta bring by da pries guy  fo me, Yahweh, one boy kine sheep dat no mo notting wrong wit um, an dat cost da right silva weight, fo make sacrifice cuz he get da blame fo do bad ting to somebody.
\v 7 Az how da pries guy goin bring him back da same side wit me, Yahweh. An I goin let him go, an hemo his shame fo da bad kine stuff he wen do dat make him get da blame.”
\s Da Sacrifice Dey Burn Up
\p
\v 8 Yahweh tell Moses
\v 9 fo tell Aaron an his boys fo do dis: “Dis da rule, wat you guys gotta do bout da sacrifice you burn up: da burn up kine sacrifice gotta stay burn on top da place fo da fire in da middo a da altar, all nite till morning time, an you gotta make shua da fire stay burn on top da altar.
\v 10 Den da pries guy goin put on his linen clotheses, wit odda linen shorts undaneat nex to his skin. He goin take out da ash wit fat from da burn up kine sacrifice you wen make wit fire on top da altar, an put da ash one side a da altar.
\v 11 Den he gotta take off dose clotheses, an put on odda kine clotheses, an take da ash wit fat outside da camp, by one place dat stay okay fo put da tings dat stay spesho fo me.
\v 12 Da fire on top da altar gotta stay burn, an no pio. Ery morning da pries guy gotta put mo wood on top da fire, an put da burn up kine sacrifice fo dat day on top da right place. An he goin burn on top da altar, da fat from da sacrifice dat show dat me, Yahweh, an da peopo stay okay wit each odda.
\v 13 Da fire gotta stay burn all da time. Betta not let um pio.”
\s Da Sacrifice Wit Wheat o Barley
\p
\v 14 “Dis wat you gotta do fo make da sacrifice wit wheat o barley: Aaron's boys gotta bring um in front me, Yahweh, in front da altar.
\v 15 Da pries guy goin take one hand full a da fancy kine flour, an da olive oil, an all da incense on top da wheat o barley sacrifice, an burn da part, fo help peopo rememba dat da whole sacrifice stay fo me, Yahweh. Dat goin smell real nice an make me stay good inside.
\v 16 Aaron an his boys goin eat da res, but dey goin eat um wit no mo yeast, inside one spesho place fo me, Yahweh, inside da yard fo da Tent wea da peopo come fo meet me.
\v 17 Dey no can bake um wit da yeast. I give da pries guys dis part from da sacrifices dey make fo me wit fire. Az one a da mos spesho sacrifices fo me, jalike da kine sacrifice fo da bad kine ting somebody do, an da kine sacrifice cuz dey get da blame fo do bad ting to somebody.
\v 18 All da guys from Aaron's ohana can eat um, but not da wahines. Az dea regula share from da sacrifices dey put on top da fire all da time. Wateva touch um goin come spesho fo me, Yahweh.
\p
\v 19 Yahweh tell Moses dis too:
\v 20 “Dis da sacrifice Aaron an his boys goin bring me, Yahweh, da day he get da oil on top his head fo make um one pries guy: two poun da bestes kine flour. Dat goin be da wheat o barley sacrifice dat da pries guys goin make ery day all da time, half in da morning, an half wen da sun go down.
\v 21 Cook um on top one pan wit da flour an olive oil all mix togedda. Den bring um, all broke in small pieces. Da wheat o barley sacrifice goin smell real nice fo me, Yahweh, an make me stay good inside.
\v 22 Dis da rule dat stay all da time: whoeva come da main pries guy afta dis one from Aaron's blood, dey goin make da wheat o barley sacrifice too. Dey goin burn um all up fo make sacrifice fo me, Yahweh.
\v 23 Ery wheat o barley sacrifice dat one pries guy make, gotta burn up da whole ting till no mo notting. No mo nobody goin eat um.”
\s Da Sacrifice Cuz Somebody Do Bad Ting
\p
\v 24 Yahweh tell Moses
\v 25 fo tell Aaron an his boys dis: “Dis da rules fo how fo make sacrifice fo one bad ting somebody do. Dat sacrifice real spesho fo me, Yahweh. Kill da animal in front me, Yahweh, da same place wea dey kill da animal fo da burn up kine sacrifice.
\v 26 Da pries guy dat make da sacrifice, he da one goin eat da meat. He gotta eat um inside da place dat stay spesho fo me, Yahweh, inside da yard wea da Tent stay, wea da peopo come fo meet me.
\v 27 If somebody o someting touch some a da sacrifice meat, dey come spesho fo me too. If some a da blood splash on top yoa clotheses, gotta wash da clotheses inside one place dat stay spesho fo me.
\v 28 Da clay pot fo cook da meat inside, gotta broke um. But if stay cook inside one metal pot, gotta scrape the pot an rinse um wit watta real good.
\v 29 Any guy from da pries guy's ohana can eat um, but not da wahines. Da sacrifice meat stay spesho fo me.
\v 30 But da blood fo da sacrifice you make wen somebody do someting bad, if you bring some a da blood inside da Tent wea da peopo come fo meet me, Yahweh, fo bring back da guy dat do bad ting da same side wit me inside da spesho place, den no can eat da meat. Gotta burn um all up.”
\c 7
\s Da Sacrifice Wen Somebody Get Da Blame
\p
\v 1 “Dis da rules fo make sacrifice fo anybody dat get da blame fo do bad ting to somebody. Az one real spesho sacrifice fo God.
\v 2 Da pries guys gotta kill da animal fo da sacrifice fo whoeva get da blame, da same place dey kill da animals fo da burn up kine sacrifice. Dey gotta sprinkle da blood on top all da sides a da altar.
\v 3 Da pries goin take all da fat to da altar -- da fat tail, an da fat on top da inside parts,
\v 4 both kidneys an da fat on top um in da middo a da rib an da hip bone, an da part a da liver dat stick out, an take out da liver wit da kidneys.
\v 5 Da pries guy goin burn all dat part on top da altar, fo be da kine sacrifice he make fo me, Yahweh, wit fire. Az da kine sacrifice dey make fo wen anybody get blame fo do bad ting to somebody.
\v 6 Inside da pries ohana, any man can eat da meat, but da wahines no can eat um. Da pries guys gotta eat um inside one place dass spesho fo me, Yahweh, cuz az one sacrifice dat stay real spesho fo me.
\p
\v 7 “Da same rule stay good fo both da sacrifice cuz somebody do someting bad an he donno was bad, an da sacrifice cuz somebody know an get da blame fo do bad ting to somebody -- da meat from da sacrifice animal stay fo da pries guy dat bring back da peopo da same side wit me, Yahweh.
\v 8 Da pries guy dat make burn up kine sacrifice fo somebody, can keep da skin from da animal.
\v 9 Ery wheat o barley sacrifice dey bake inside one oven, o dey cook inside one pan o on top one pan, az fo da pries guy dat take da sacrifice in front Yahweh fo anodda guy.
\v 10 Ery wheat o barley sacrifice, no matta dey mix um wit olive oil o not, az fo all Aaron's boys. Ery boy get same same wit his bruddas.”
\s Da Sacrifice Fo Show Dat One Guy Stay Tight Wit Yahweh
\p
\v 11 Dis da rules fo da sacrifice fo show dat one guy an Yahweh stay tight wid each odda.
\p
\v 12 “If da guy give dat kine sacrifice cuz he like tank me, Yahweh, fo someting, den wit da sacrifice he goin give breads dat no mo yeast inside an he mix um wit olive oil, an crackas dat no mo yeast an he spread da olive oil on top, an roun flat breads dat he make wit da bestes kine flour an no mo yeast an he mix um wit oliveoil.
\v 13 Wit da sacrifice fo show dat me, Yahweh, an da guy stay tight wit each odda, fo tank me fo someting, he suppose to give bread dat get yeast too.
\v 14 He goin bring one bread from ery kine fo give me, Yahweh. Az fo da pries guy dat sprinkle blood fo da sacrifice fo show dat me an da guy stay tight wit each odda.
\v 15 Da meat from da sacrifice fo show dat me an da guy stay tight wit each odda, fo tank me, dey gotta eat um da same day dey make da sacrifice. Dey no can leave anyting till da nex morning.
\p
\v 16 “But if da guy make da sacrifice cuz he wen make one strong promise, o cuz he jus like give um, dey can eat da sacrifice da same day, o wateva stay lefova, dey can eat um da nex day.
\v 17 But da meat from da sacrifice dat show dat me an one guy stay tight wit each odda, an stay till day numba three, you gotta burn um up inside da fire.
\v 18 If somebody eat some a da meat from da sacrifice fo show dat me, Yahweh, an da guy stay tight wit each odda on day numba three, I no goin take dat sacrifice. I no goin take um fo da guy dat wen give um, cuz stay rotten an no stay clean. Da guy dat eat um goin get da blame cuz he eat um.
\p
\v 19 “Da meat dat touch someting dass not okay fo put in front Yahweh, no can eat um. You gotta burn um inside da fire. But fo odda meat, whoeva get da right fo come in front me, Yahweh, can eat um.
\v 20 But if somebody dat no can come in front me, eat some meat from da sacrifice dat show dat me, Yahweh, an one guy stay tight wit each odda, you gotta cut off dat guy from his peopo.
\v 21 If somebody touch someting dat make dem so dey no can come in front me -- anyting dat make um so dey no can come in front me, no matta come from peopo o from one animal, o some odda ting dat I hate -- if dat guy eat meat from da sacrifice dat show dat me, Yahweh, an one guy stay tight wit each odda, you gotta cut off da guy dat eat wat he not suppose to, from his peopo. Cuz da sacrifice stay fo me, Yahweh.”
\s No Can Eat Da Blood O Da Fat
\p
\v 22 Yahweh tell Moses,
\v 23 fo tell da Israel peopo dis: “No eat da fat from da cows, da sheeps, o da goats.
\v 24 Da fat from one animal you guys find wen he awready stay mahke, o dat one wild animal wen rip um up, you guys can use um fo odda tings, but you no can eat um.
\v 25 Whoeva eat da fat from one animal dey can use fo make da kine sacrifice dey make wit fire fo me, Yahweh, you gotta cut dem off from dea peopo.
\v 26 Wea eva you guys stay, you no can eat da blood from any kine bird o animal.
\v 27 Anybody eat any kine blood, you gotta cut dem off from dea peopo.”
\s Da Part Fo Da Pries Guy
\p
\v 28 Yahweh tell Moses,
\v 29 fo tell da Israel peopo dis: “Anybody bring one sacrifice fo me, Yahweh, fo show dat me an him stay tight wit each odda, afta he kill da sacrifice animal, he goin make one part a da animal az jalike one present fo me.
\v 30 Wit his own hands he goin bring dat part a da sacrifice fo burn um up wit fire, fo give um to me, Yahweh. He goin bring da fat an da breast part an lif um up in front me, fo show dass da present he goin give me, Yahweh.
\v 31 Den da pries guy goin burn up da fat on top da altar, but da breast meat stay fo Aaron an his boys.
\v 32 You guys goin give da pries guy da right thigh from da sacrifice too, fo show dat me an you guys stay tight wit each odda.
\v 33 Wateva one a Aaron's boys bring me da blood an da fat from da sacrifice fo show dat me an da guy stay tight wit each odda, dass da one goin get da right thigh fo himself.
\v 34 From da sacrifice fo show dat me an one Israel guy stay tight wit each odda, I like da breast part dat da pries guys lif up, an da thigh dat dey bring, an I give um to Aaron da pries guy an his boys. Dey get da right all da time, fo get all dat from da Israel peopo.”
\p
\v 35 Az da part from ery kine sacrifice dey burn wit fire fo me, Yahweh, dat stay fo Aaron an his boys, from da day dey come pries guys fo me.
\v 36 Da day I, Yahweh, wen pick da pries guys, an Moses put oil on top dea heads fo show dat dey stay pries guys, I tell da Israel peopo fo give dem dis kine stuff, az dea part from da sacrifice. Dass da rule fo da peopo dat stay alive now an fo dea kids all da time.”
\p
\v 37 Dis, da rules fo da kine sacrifice dey burn up, da kine sacrifice dey make wit da wheat o barley, da kine sacrifice dey make wen somebody do someting bad, da kine sacrifice dey make wen dey get blame fo do bad ting to somebody. Tell wat dey do fo make guys come pries guys, an da sacrifice fo show dat da peopo an me, Yahweh, stay tight wit each odda.
\v 38 Dass wat Yahweh wen tell Moses he gotta do, on top Mount Sinai, inside da Sinai boonies, da time Yahweh tell da Israel peopo dey gotta bring dea sacrifices fo Yahweh.
\c 8
\s Aaron An His Boys Come Prieses
\r (Outa Egypt 29:1-37)
\p
\v 1 Yahweh tell Moses:
\v 2 “Bring Aaron an his boys, da place wea you go inside da Tent wea da peopo come fo meet me, Yahweh. Tell um fo bring dea pries kine clotheses, da spesho kine olive oil fo put on top dea head, one boy kine cow fo make sacrifice fo da bad tings dey wen do, two boy kine sheeps, an one basket wit bread dat no mo yeast inside.
\v 3 Tell all da peopo fo come togedda too, ova dea by wea you go inside da yard fo da Tent wea da peopo come fo meet me, Yahweh.”
\v 4 Moses do wat Yahweh tell him fo do. All da peopo come togedda, by da place wea dey go inside da yard fo da Tent wea da peopo come fo meet God.
\p
\v 5 Moses tell da peopo: “Dis wat Yahweh tell us we gotta do.”
\v 6 Den Moses bring Aaron an his boys in front da peopo. Den he tell dem fo go wash demself wit watta.
\v 7 Firs he put da shirt on top Aaron, tie da wide cloth belt aroun his waist, put da robe on top him, an da spesho vest. He tie da vest wit da fancy kine band fo da waist dat dey weave.
\v 8 Moses put da chest piece on top Aaron an put da Urim an da Thummim inside da chest piece pocket.
\v 9 Den he put da pries kine hat on top Aaron's head, an put da gold piece dat say Aaron stay spesho fo Yahweh, on top da front, jalike Yahweh wen tell Moses fo do.
\p
\v 10 Den Moses take da spesho kine olive oil an put um on top da Tent an eryting inside um, an all dat, he make spesho fo God.
\v 11 He sprinkle some a da oil on top da altar seven times, an on top all da stuffs dey use fo make sacrifice, da big watta tank, an da lamp stand, fo make um spesho fo God.
\v 12 He pour some a da spesho oil on top Aaron's head too, fo show dat God wen pick him, an fo make him spesho fo God.
\v 13 Den he bring Aaron's boys in front da peopo, put da shirts on top dem, tie da wide cloth belts aroun dem, an put da pries kine hats on top dea head, jalike Yahweh wen tell Moses fo do.
\p
\v 14 Den Moses bring da boy kine cow fo make sacrifice cuz a da bad tings Aaron an his boys wen do befo time. Aaron an da boys put dea hands on top da boy kine cow's head fo show dey know dey wen do bad kine stuff.
\v 15 Moses kill da boy kine cow, an wit his finga he put some a da blood on top da tings jalike horns dat stick out from da altar, fo make da altar clean da way Yahweh see um. He pour out da res a da blood aroun da bottom a da altar. Az how he make da altar spesho fo Yahweh wit da same kine sacrifice he use fo bring somebody da same side wit Yahweh.
\v 16 Moses take out all da fat aroun da inside parts, da part a da liver dat stick out, both da kidneys an dea fat, an burn um on top da altar.
\v 17 But da res a da boy kine cow, da skin, an da meat, an da kukae, Moses burn um all up inside da fire outside da camp, jalike Yahweh tell um fo do.
\p
\v 18 Den Moses bring da boy kine sheep fo da sacrifice dey burn up. Aaron an his boys put dea hands on top da head a da sheep.
\v 19 Den Moses kill da sheep, an sprinkle da blood on all da sides a da altar.
\v 20-21 He cut up da sheep in big pieces. He wash da inside parts an da legs wit watta. Den he burn da head, da piece he cut up, da fat,
an da res a da sheep on top da altar fo make one burn up kine sacrifice. Az one real nice smell fo Yahweh, one sacrifice dey make fo Yahweh wit fire, jalike Yahweh tell Moses fo do.
\p
\v 22 Den Moses bring da odda boy kine sheep, da one fo make Aaron an his boys come pries guys. Aaron an his boys put dea hands on top da head a da sheep.
\v 23 Moses kill da sheep. He take some a da blood an put um on top da bottom part a Aaron's right ear, on top da thumb a his right hand, an on top da big toe a his right feet.
\v 24 Moses bring Aaron's boys in front too, an put some a da blood on top da bottom part a dea right ear, on top da thumb a dea right hand, an on top da big toe a dea right feet. Den he sprinkle blood on all da sides a da altar.
\v 25 He take out da fat: da fat tail, all da fat aroun da inside parts, da part a da liver dat stick out, both kidneys an dea fat, an he cut off da right thigh.
\v 26 Den from da basket a breads dat stay in front Yahweh, dat no mo yeast, he take one flat bread dat no mo oil, one bread dat get oil, an one cracka. He put um on top da fat an on top da right thigh.
\v 27 He put all dat stuff inside Aaron an his boys hands, an dey lif um up in front Yahweh, fo show dass da present dey give Yahweh.
\v 28 Den Moses take dat stuff from dea hands, an burn um on top da altar, on top da burn up kine sacrifice. Az fo make Aaron an his boys come prieses. Az one real nice smell fo Yahweh, da kine sacrifice dey make wit fire.
\v 29 An Moses take da breast part a da meat. Dat stay fo him from da sacrifice fo make Aaron dem come da pries guys. He lif up da meat in front Yahweh, fo show dass da present he give Yahweh, jalike Yahweh tell Moses fo do.
\p
\v 30 Den Moses take some a da spesho kine olive oil an some a da blood from da altar, an sprinkle um on top Aaron an his clotheses, an on top Aaron's boys an dea clotheses. Az how he make Aaron an his clotheses, an his boys an dea clotheses, spesho fo God.
\p
\v 31 Den Moses tell Aaron an his boys: “Cook da res a da meat by da place wea peopo go inside da yard fo da Tent wea da peopo come fo meet God, an eat um dea wit da bread from da basket fo da sacrifice fo make you guys come prieses, jalike I wen tell, ‘Aaron an his boys goin eat dis.’
\v 32 Den burn up all da res a da meat an da bread.
\v 33 No go outside da place wea peopo go inside da yard fo da Tent wea da peopo come fo meet God fo seven days, till all da stuff we do fo you guys come prieses pau, cuz dat stay fo seven days.
\v 34 Da stuff we do today, az wat Yahweh wen tell me fo do, fo bring you guys da same side wit him.
\v 35 You guys gotta stay wea peopo go inside da yard fo da Tent wea da peopo come fo meet God, day time an nite time fo seven days, an do wat Yahweh tell you fo do. If you guys no do dat, you goin mahke, cuz az wat Yahweh tell me.”
\v 36 So Aaron an his boys do eryting Yahweh tell Moses fo tell dem fo do.
\c 9
\s Da Priest Guys Start Dea Work
\p
\v 1 From da time Aaron an his boys come prieses, day numba eight, Moses tell Aaron an his boys come. He tell da older leada guys fo da Israel peopo come too.
\v 2 He tell Aaron: “Take one bebe boy kine cow fo make one sacrifice cuz a da bad tings you wen do befo time. Bring one boy kine sheep too, fo da burn up kine sacrifice. Dese animals gotta be no mo notting wrong wit um. Bring um in front Yahweh.
\v 3 Den tell da Israel peopo go take one boy kine goat fo make one sacrifice cuz a da bad kine stuff dey wen do befo time. Take one bebe cow an one bebe sheep too, da two one year ol an no mo notting wrong wit um, fo make da burn up kine sacrifice.
\v 4 Take one cow an one boy kine sheep fo make one sacrifice fo show dat da peopo an Yahweh stay tight wit each odda. Make da sacrifice in front Yahweh. An make one sacrifice wit wheat o barley, mix um wit oil. Cuz today Yahweh goin let you guys see him.”
\p
\v 5 Dey take da tings Moses tell dem fo take by da front a da Tent, an all da peopo come nea an stand in front Yahweh fo meet him.
\v 6 Den Moses tell dem: “Dis wat Yahweh tell you guys fo do, so dat you guys goin see how awesome he stay.”
\p
\v 7 Moses tell Aaron: “Come by da altar fo make yoa sacrifice cuz a da bad kine stuff you wen do, an make yoa burn up kine sacrifice fo bring yoaself an da peopo da same side wit God. Den make da sacrifice dat stay fo da peopo, fo bring dem da same side wit God, jalike Yahweh wen tell you fo do.”
\p
\v 8 So Aaron go by da altar, kill da bebe cow fo make sacrifice fo da bad tings he wen do.
\v 9 Aaron boys bring da blood by him, an he put his finga inside da blood, an put um on top da tings jalike horns dat stick out from da altar. He pour da res a da blood aroun da bottom a da altar.
\v 10 Aaron burn da fat on top da altar, da kidneys, an da part a da liver dat stick out, from da sacrifice cuz a da bad tings he wen do, jalike Yahweh tell Moses.
\v 11 Da meat an da skin, he burn um wit fire outside da camp.
\p
\v 12 Den Aaron kill da animal fo da burn up kine sacrifice. His boys bring him da blood, an he sprinkle um on top all da sides a da altar.
\v 13 His boys give him da animal fo da burn up kine sacrifice, one piece by one piece, an da head too, an he burn um on top da altar.
\v 14 He wash da inside parts an da legs, an burn um on top da sacrifice dey burn up, dat stay on top da altar.
\p
\v 15 Den Aaron bring da sacrifice dat stay fo da peopo. He take da goat fo da peopo's sacrifice cuz a da bad kine stuff dey wen do. He kill um, an give um fo dea sacrifice jalike he wen make da firs sacrifice fo himself.
\v 16 He bring da animal fo da burn up kine sacrifice, an do eryting da way he suppose to.
\v 17 He bring da sacrifice wit wheat too. He take one hand full a da wheat, an burn um on top da altar, wit da sacrifice dey burn up dat same morning.
\p
\v 18 He kill da cow an da boy kine sheep fo make da sacrifice dat show dat Yahweh an da peopo stay tight wit each odda. His boys give him da blood, an he sprinkle um on top all da sides a da altar.
\v 19 But da fat parts a da cow an da boy kine sheep, da fat sheep tail, da fat dat cova da guts, da kidneys, an da part a da liver dat stick out,
\v 20 dey put all dat stuff on top da breast part a da meat. Den Aaron burn da fat pieces on top da altar.
\v 21 Aaron lif up da breast part an da right thigh in front Yahweh fo make one lif up kine sacrifice, jalike Moses wen tell.
\p
\v 22 Den Aaron put up his hands fo da peopo, an aks God fo do good kine stuff fo dem. Wen he pau make da sacrifice cuz a da bad tings da peopo wen do befo time, da sacrifice dey burn up, an da sacrifice fo show dat da peopo an God stay tight wit each odda, he come down from da altar.
\p
\v 23 Den Moses an Aaron go inside da Tent wea da peopo come meet God. Wen dey come outside, dey aks God fo do good kine stuff fo da peopo, an Yahweh let all da peopo see how awesome he stay.
\v 24 Den fire come out from in front Yahweh, an burn up all da burn up kine sacrifice an da fat parts a da odda sacrifices dat stay on top da altar. Wen da peopo see dat, dey yell cuz dey stay feel good inside. Den dey go down wit dea face on top da groun fo show respeck fo Yahweh.
\c 10
\s Wen Peopo Do Someting Bad, Dey Suffa
\p
\v 1 Layta, two a Aaron's boys, Nadab an Abihu, take tings fo burn incense, put fire inside um, an put incense powda on top da stuff dat stay burn. Dey bring in front Yahweh da wrong kine fire, not da kine from da altar dat he wen tell um fo use.
\v 2 So get fire come out from in front Yahweh, an burn up da boys an dey mahke.
\v 3 Den Moses tell Aaron, “Dis wat Yahweh talking bout wen he tell:
\q
‘Wen pries guys come nea me,
\q2 Dey gotta know I stay spesho.
\q Wen all my peopo stay in front me,
\q2 Dey gotta show plenny respeck fo me.’-”
\p
But Aaron no say notting.
\p
\v 4 Moses tell Mishael an Elzafan, Aaron's uncle Uzziel's boys, fo come. He tell dem, “Come ova hea. Take yoa cousins bodies outside da camp, away from da front a da Place Dat Stay Spesho Fo God.”
\v 5 So dey come carry dem outside da camp by dea spesho shirts, jalike Moses wen tell dem.
\p
\v 6 Den Moses tell Aaron an his odda boys, Eleazar an Itamar, “You pries guys, no do notting fo show dat you guys stay feel sore inside. No mess up yoa hair, an no broke yoa clotheses. Cuz if you make jalike you sore inside, you goin mahke, an Yahweh goin come huhu wit all da peopo. But yoa ohana, all da odda Israel peopo, dey can cry fo da guys dat Yahweh wen wipe out wit da fire.
\v 7 But you guys, no go way from wea peopo go inside da yard fo da Tent wea da peopo come fo meet God, o you goin mahke, cuz you get Yahweh's oil on top you fo come prieses.” So dey make jalike Moses wen tell.
\s Da Rule Fo Da Prieses
\p
\v 8 Den Yahweh tell Aaron,
\v 9 “You an yoa boys no can drink wine o beer kine stuff weneva you guys go inside da Tent wea da peopo come fo meet me, Yahweh, o you goin mahke. Wat I tell you guys now, az how goin be fo da peopo dat stay alive now an dea kids all da time.
\v 10 You guys gotta know dat wat stuff stay spesho fo me, Yahweh, stay real diffren den all da odda stuff. An da stuff dat make you so you can come in front me, an da stuff dat make you so you no can come in front me, dey stay real diffren.
\v 11 An you guys gotta teach da Israel peopo eryting I wen tell Moses fo tell dem fo do.”
\p
\v 12 Moses tell Aaron an his boys dat still stay alive, Eleazar an Itamar, “Take da res a da sacrifice wit da wheat dat still yet stay from da sacrifices da peopo make wit fire fo Yahweh, an eat da bread part dat no mo yeast by da side a da altar, cuz dat bread, real spesho fo me.
\v 13 An you gotta eat um inside one place dat stay spesho fo me, cuz az da share fo you an yoa boys from da sacrifices dey make fo Yahweh wit fire, cuz az wat he wen tell me fo give you.
\v 14 But you an yoa boys an yoa girls can eat da breast part a da meat dat dey lift up an da thigh dat dey put in front Yahweh. Eat um inside any place dat no make you guys so you no can go in front Yahweh. Az da share fo you guys an yoa kids from da sacrifices da Israel peopo make fo show dat dem an Yahweh stay tight wit each odda.
\v 15 Da thigh part dat you pries guys put in front God an da breast meat dat you lif up, you gotta bring wit da fat stuff from da sacrifices you make wit da fire, so you can lif um up in front Yahweh fo make one lif up kine sacrifice. Da meat from dat goin be da regula part fo you an yoa kids all da time, jalike Yahweh wen tell.
\p
\v 16 Wen Moses aks Eleazar an Itamar, Aaron's two boys dat still stay alive, bout da goat fo da sacrifice cuz dey wen do bad kine stuff, he find out dat dey wen burn um up awready. Az why he come huhu wit dem. He tell,
\v 17 “Why you guys neva eat da sacrifice you make wen somebody do someting bad, inside da place nea da altar dat stay spesho fo Yahweh?! Dat meat stay real spesho fo him. He give um to you guys, fo take away da blame from da peopo fo da bad kine stuff dey wen do, an fo bring dem da same side wit Yahweh.
\v 18 Cuz you guys neva take da blood from dat animal inside da Place Dat Stay Spesho Fo Me inside da Tent, you guys suppose to eat da goat meat inside da spesho place outside da Tent, jalike I wen tell you guys fo do.”
\p
\v 19 Aaron tell Moses, “You know wat?! Today my boys wen make da sacrifice cuz a da bad kine stuff dey wen do, an dea sacrifice dey wen burn up in front Yahweh. But wit da stuff wen happen to me today, wen my two odda boys mahke, you tink Yahweh like if I wen eat da sacrifice cuz a da bad kine stuff today, o wat?!”
\v 20 Wen Moses hear dat, he tell, “Az okay.”
\c 11
\s Da Kine Food Dat Make You So You Can Go In Front God, An Da Kine Food Dat Make You So You No Can Go In Front God
\r (Rules 14:3-20; 1 Peter 1:16)
\p
\v 1 Yahweh tell Moses an Aaron
\v 2 fo tell da Israel peopo: “Dese da kine animals you guys can eat, from all da animals dat live on top da land.
\v 3 You guys can eat da kine animals dat get split in da hoof all da way, an dat chew dea food ova an ova.
\p
\v 4 “Get some animals dat ony chew dea food ova an ova, o dat ony get split kine hoof, but you guys no can eat dem. Da camel chew dea food ova an ova, but no mo split kine hoof, so if you guys eat um, you guys no can come in front me.
\v 5 Da rock badger chew dea food ova an ova, but dey no mo split kine hoof, so if you guys eat um, you guys no can come in front me.
\v 6 Da wild rabbit chew da food ova an ova, but dey no mo split kine hoof, so if you guys eat um, you guys no can come in front me.
\v 7 Da pig, he get split kine hoof all da way, but he no chew da food ova an ova. If you guys eat um, you guys no can come in front me.
\v 8 You guys no can eat dea meat o touch dea mahke body, cuz dat goin make you guys no can come in front me.
\p
\v 9 “From all da animals dat live inside da sea an da streams, you guys can eat wateva get fins an scales.
\v 10 But all da animals inside da sea an da streams dat no mo fins o scales, no matta dey all swim togedda, o da odda animals inside da watta, you guys gotta make to dem jalike dey pilau fo you.
\v 11 An cuz dey stay pilau fo you guys, you guys betta not eat dea meat, an you guys betta make dea mahke bodies jalike dey pilau fo you.
\v 12 All dat, anyting dat live inside da watta dat no mo fin o scale, az pilau fo you guys.
\p
\v 13 “Dese da kine birds az pilau fo you guys, an no eat um, cuz dey not fo eat: da eagle, all kine scavenja birds,
\v 14 all kine kite birds,
\v 15 all kine raven birds,
\v 16 all da kine owl dat live inside da boonies, all diffren kine hawk,
\v 17 da small owl, da cormorant, da pueo,
\v 18 da barn owl, da pelican, da fish eagle,
\v 19 da stork, any kine heron, da hoopoe bird, an da bat.
\p
\v 20 “All da kine inseck dat move aroun togedda an crawl, dey all pilau fo you guys.
\v 21 But get some get wings dat move aroun togedda dat you guys can eat: da kine dat get legs wit joint fo hop on top da groun.
\v 22 You guys can eat all kine locust bug, grasshoppa, an cricket.
\v 23 But all da odda tings dat move aroun togedda dat get wings an crawl, you guys gotta ack like dey pilau.
\p
\v 24 “If you guys eat um, you no can come in front me. Anybody touch dea mahke body, no can come in front me till da sun go down.
\v 25 Whoeva pick up one a dea mahke body, dey gotta go wash dea clotheses, an dey no can come in front me till da sun go down.
\p
\v 26 “All da animals dat get da split kine hoof but not all da way, o dat no chew dea food ova an ova, if you guys eat um, dat make you guys so you no can come in front me. An whoeva touch dea mahke body, dey no can come in front me.
\v 27 From all da animals dat walk wit four leg, da kine dat walk on top dea flat paws, if you guys eat um, dat make you guys so you no can come in front me. Whoeva touch dea mahke body no can come in front me till da sun go down.
\v 28 Whoeva pick up one a dea bodies gotta wash dea clotheses, an dey no can come in front me till da sun go down. Dey make you guys so you no can come in front me.
\p
\v 29 “From da small kine animals dat run aroun on top da groun, dese kine animal, if you guys eat um, dey make you guys so you no can come in front me: da weasel, da rat, all kine big lizard,
\v 30 da gecko, da monitor lizard, da shiny kine lizard, da skink kine lizard, an da chameleon.
\v 31 From all da animals dat run aroun on top da groun, dese da ones dat if you eat um, dey make you so you no can come in front me, Yahweh. Whoeva touch um wen dey stay mahke, no can come in front me till da sun go down.
\v 32 Wen one a dem mahke an fall down on top someting, no can use dat ting, no matta az wood, clotheses, leather, o burmbag cloth. Gotta put um inside da watta. No can use um till da sun go down. Afta dat, can use.
\v 33 If one a dem mahke an fall down inside one clay pot, eryting inside da pot no good, no can use, no can eat. You gotta broke da pot.
\v 34 If get food, an da watta from inside da pot splash on top da food, no can eat da food. Anyting you can drink dat get watta from da pot mix wit um, no can drink um.
\v 35 If dea mahke body fall down on top someting, no can use da ting. Gotta broke um, if one clay oven o clay pot.
\v 36 But if da mahke body a dat kine animal fall down inside one puka fo watta o one big hole fo keep watta, still can drink da watta. But anybody touch da animal body, dey no can come in front me.
\v 37 An if one a dea mahke bodies fall down on top some seeds dat somebody goin plant, da seeds still yet stay good an you can use um.
\v 38 But if da seed get watta on top, an da mahke body a one a da small animals fall down on top, da seed no good, so you no can use um.
\p
\v 39 “If one a da animals dat you guys can eat go mahke, anybody touch da mahke body no can come in front me till da sun go down.
\v 40 Anybody go eat some a da meat from da mahke body, dey gotta go wash dea clotheses, an dey no can come in front me till da sun go down. Anybody pick up da mahke body gotta wash dea clotheses too, an dey no can come in front me till da sun go down.
\p
\v 41 “All da small animals dat run aroun togedda on top da groun, az pilau if you guys eat dem.
\v 42 You no can eat da kine dat move aroun on top dea stomach, o walk wit four feet, o walk wit plenny feets -- all dat kine small animal, pilau if you guys eat um.
\v 43 No go make yoaself come pilau from da small kine animals dat run aroun togedda on top da groun. No make yoaself so you no can come in front me, cuz a dem.
\v 44 Cuz me, I yoa God Yahweh. Make yoaself spesho fo me, an stay spesho fo me, cuz I stay spesho. No make so you no can come in front me, from touch any a da small animals dat run aroun togedda on top da groun.
\v 45 I Yahweh, da One wen bring you guys outa Egypt, fo me come yoa God. Az why you guys gotta stay spesho fo me, cuz I spesho.
\p
\v 46 “Dis, da rules bout animals, birds, eryting dat stay alive, dat move aroun inside da watta an on top da groun.
\v 47 Dey diffren den each odda. You guys gotta know wat kine animal you no can eat cuz dey make you so you no can come in front me, an wat kine you can eat cuz dey no make you so you no can come in front me.”
\c 12
\s Afta One Wahine Born One Bebe, How She Can Come In Front Yahweh
\r (Luke 2:24)
\p
\v 1 Yahweh tell Moses
\v 2 fo tell da Israel peopo: “One wahine dat get hapai an born one boy, she no can come in front me fo seven days afta da bebe born. Az jalike she no can come in front me seven days wen her sick time come ery month.
\v 3 Day numba eight, dey goin cut skin da boy.
\v 4 Den da wahine gotta stay home still yet fo thirty-three days, fo make shua all da bleeding pau an den she ready fo come in front me. She no can touch wateva stay spesho fo me, an she no can go da Tent Dat Stay Spesho Fo Me till da time pau, an den she can come in front me.
\v 5 If she born one girl, she no can come in front me fo two weeks, jalike she no can come in front me wen her sick time come ery month. Afta da two weeks, she gotta stay home still yet fo sixty-six days, fo make shua all da bleeding pau, an den she ready fo come in front me.
\p
\v 6 “Afta she born one boy o one girl, an da bleeding pau an she ready fo come in front me, she go by da pries guy wea peopo go inside da yard fo da Tent wea da peopo come fo meet me, Yahweh, an bring one bebe sheep one year ol, fo make one burn up kine sacrifice, an one young pigeon o one dove fo make da kine sacrifice fo any bad kine stuff she wen do.
\v 7 Da pries guy goin bring da two sacrifice in front me, Yahweh, fo bring her da same side wit me. Den she goin be okay fo come in front me, afta she all pau bleed from born da bebe.
\p
“Dis da rules fo da wahine dat born one boy o one girl.
\v 8 If she no mo nuff money fo buy one bebe sheep, she can bring two doves o two young pigeons, one fo da burn up kine sacrifice, an da odda fo da sacrifice fo any bad kine stuff she wen do. Az how da pries guy goin bring her da same side wit me, an den she can come in front me.”
\c 13
\s Da Rules Bout Da Kine Sick On Top Da Skin Dat Odda Peopo Can Catch
\p
\v 1 Yahweh tell Moses an Aaron dis:
\v 2 “Anybody get one place on top dea skin dat stay swell, o one place dat stay itchy, o one place dat shine o stay red, maybe da kine goin come sick an odda guys can catch um. Den da peopo gotta bring dem by Aaron da pries guy, o one a his boys dat stay one pries.
\v 3 Da pries goin check out da sore dat stay on top dea skin. If da hair inside da sore place come white awready, an if da sore look like stay go way down unda da skin, den az one bad kine sick dat odda guys can get um. Afta da pries guy check out da sick guy, da pries guy goin tell erybody dat da guy no can come in front me, Yahweh.
\v 4 If da place on top da skin come white awready, but no look like stay go way down unda da skin, an da hair inside um not white, da pries goin take da guy an put um away by himself fo seven days.
\v 5 Day numba seven, da pries guy goin check um out again. If da pries guy see dat da sore no change, an no come mo big on top da skin, da pries goin make da guy stay by himself seven mo days.
\v 6 Day numba seven, da pries guy goin check out da guy again. If da sore wen fade, an neva come mo big on top da skin, da pries guy goin tell erybody az ony one rash, an da guy stay okay fo come in front me, Yahweh. Da guy gotta wash his clotheses, den he can come in front me.
\v 7 But if da rash come mo big on top da skin afta he show himself to da pries guy fo find out if he okay, den he gotta come back by da pries guy fo check um out one mo time still yet.
\v 8 Da pries guy goin check out da guy again. If da rash stay come mo big on top da skin, da pries guy goin tell erybody dat da guy no can come in front me, Yahweh. Az one sick dat da guy can give to odda guys.
\p
\v 9 “Anybody get one sick on top da skin dat dey can give to anodda guy, da peopo gotta bring dem by da pries guy.
\v 10 Da pries guy goin check um out. If get one white place on top da skin dat stay swell, an if da place dat stay swell get raw skin,
\v 11 az one sick inside da skin dat anybody can catch, an no goin come good bumbye. Da pries guy goin tell erybody dat da guy no can come in front me, Yahweh. Da pries guy no goin make da sick guy stay by himself so he can check um out one mo time, cuz da guy awready no can come in front me.
\p
\v 12 “If da sick come out all ova da guy skin, an da pries see dat dey go cova da skin from da head to da feets,
\v 13 da pries guy goin check um out. If da sick stay all ova his body, da pries guy goin tell erybody dat he can go in front me, Yahweh. Cuz da sick stay all white an dry up, he can go in front me.
\v 14 But if da pries guy see dat da skin still yet stay raw, den da guy no can go in front me, Yahweh.
\v 15 Wen da pries guy see da raw skin, he goin tell erybody dat da guy no can go in front me. Da guy can give da sick to anodda guy.
\v 16 But if da raw skin change an come back white an dry, he gotta go by da pries guy again.
\v 17 Da pries guy goin check out da guy again. If da sores wen come white an dry, da pries guy goin tell erybody dat da guy can come in front me. He stay okay.
\p
\v 18 “Wen somebody get one boil on top dea skin, an da ting come good,
\v 19 an on top da place wea da boil wen stay, get one white place dat stay swell o get one kinda red an white shiny kine place, dey gotta go by da pries guy.
\v 20 Da pries guy goin check um out. If da place look like stay go way down inside da skin, an da hair inside um come white, da pries guy goin tell erybody dat da guy no can come in front me, Yahweh. Az one sick dat odda guys can catch. Dat kine sick wen come from wea da boil wen stay befo.
\v 21 But if da pries guy check um out, an no mo white hair inside um, an no go down inside da skin, an ony can see um litto bit, den da pries guy goin take da guy an put um away by himself fo seven days.
\v 22 But if da kine sick stay come mo plenny on top da skin, da pries guy goin tell erybody dat da guy no can come in front me, Yahweh. Odda guys can catch um.
\v 23 But if da shiny place no stay change, an no come mo big, az ony one scar from da boil, an da pries guy goin tell erybody dat da guy can come in front me.
\p
\v 24 “Wen somebody get one burn on top dea skin, an one kinda red an white shiny kine place o one white shiny kine place come inside da raw skin on top da burn, dey gotta go in front da pries guy.
\v 25 Da pries guy goin check out da burn place. If da hair inside da shiny part wen come white, an da sore look like go way down inside da skin, az da kine sick odda guys can catch, cuz stay come from da place wea da burn wen stay. Da pries guy goin tell erybody dat da guy no can come in front me, cuz dass da kine sick odda guys can catch.
\v 26 But if da pries guy check out da place, an no mo white hair inside da shiny part, an no go down inside da skin, an ony can see um litto bit, den da pries guy goin take da guy an put um away by himself fo seven days.
\v 27 Day numba seven, da pries guy goin look um again. If da sore come mo plenny on top da skin, da pries guy goin tell erybody dat da guy no can come in front me, Yahweh. Az one sick odda guys can catch.
\v 28 But if da sore no change, an no come mo big, an ony can see um litto bit, az one place dat stay swell cuz a da burn. Da pries goin tell erybody dat da guy can come in front me, Yahweh. Az ony one scar from da burn.
\p
\v 29 “If one guy o one wahine get one sore on top da head o on top da chin,
\v 30 da pries guy goin check out da sore. If look like stay go down inside da skin, an da hair inside um stay yellow an skinny kine, da pries goin tell dat dey no can come in front me, Yahweh. Dat kine sore broke da skin on top da head o da chin, an odda guys can catch um.
\v 31 But if da pries see dat da place wea da skin stay broke no look like go way down inside da skin, an no mo black hair inside um, den da pries guy goin take da guy an put um away by himself fo seven days.
\v 32 Day numba seven, da pries guy goin check out da sore one mo time. If da place wea da skin stay broke no come mo plenny, an no mo yellow hair inside um, an no look like stay go down inside da skin,
\v 33 da sick guy gotta shave himself, but no shave da place wea da sore stay, an da pries guy goin make um stay by himself seven mo days.
\v 34 Day numba seven, da pries guy goin check out da place wea da skin stay broke. If no come plenny, an no go down inside da skin, da pries guy goin tell erybody dat da guy can come in front me. Dey gotta wash dea clotheses, an dey goin be okay fo come in front me.
\v 35 But if da place wea da skin stay broke get plenny on top da skin afta da pries guy tell dat dey can come in front me,
\v 36 da pries guy goin look um again. If da place wea da skin stay broke get plenny again, da pries no need look fo one yellow hair, cuz da guy no can come in front me.
\v 37 But if da pries guy tink da place wea da skin stay broke no mo plenny, an get black hair growing inside um, da sore come good awready. Da pries goin tell erybody dat da guy can come in front me, Yahweh.
\p
\v 38 “Wen one guy o one wahine get white shiny kine places on top dea skin,
\v 39 da pries guy goin check um out da guy an da wahine. If da place stay white an shiny an almos no can see um, az ony one rash on top da skin an odda guys no can catch um, an da guy o da wahine can come in front me.
\p
\v 40 “Wen one guy hair fall out from on top his head, he ony bolohead. Az okay fo him come in front me, Yahweh.
\v 41 An if da hair on top da front a his head fall out, dass bolohead too. Da guy can come in front me.
\v 42 But if he get one white sore wit litto bit red inside wea he no mo hair on top o on da front a his head, an da sore come mo big, az one sick dat odda guys can catch.
\v 43 Da pries guy goin check um out. If da sore on top his head o on top da front a da head stay swell, an get white wit litto bit red, jalike one sick odda guys can catch,
\v 44 den fo shua da guy get da kine sick odda guys can catch, an no can come in front me, Yahweh. Da pries guy goin tell erybody dat he no can come in front me, cuz a da sore on top his head.
\p
\v 45 “Anybody get dat kine sick odda guys can catch, dey gotta broke da clotheses dey wear fo show dey stay sore inside, an no comb dea hair. Dey gotta cova up da bottom part a dea face, an yell to erybody, ‘No come nea! I no can go in front Yahweh!’
\v 46 Da whole time dey get dat kine sick, dey no can come in front me, Yahweh. Az why dey gotta live by demself, dey gotta live outside da camp, dey no can live nea odda peopo.”
\s Da Rules Bout Da Mildew
\p
\v 47 “Da clotheses dat get da kine mildew dat stay spread on top um, wool kine o linen kine clotheses,
\v 48 any kine dey weave o knit from linen o wool string, o animal skins, o someting peopo make from leather,
\v 49 an if da mildew on top dese tings look kinda green o kinda red, az da kine mildew dat spread. You gotta show um to da pries guy.
\v 50 Da pries guy goin check out da mildew, an put um away so no can touch odda kine stuffs fo seven days.
\v 51 Day numba seven, he goin check um out again. If da mildew stay go on top da clotheses, o da stuff dey weave o knit, o on top da leddar, no matta wat dey use um fo, az da kine mildew dat goin wipe out all da stuffs. You no can use da ting fo notting.
\v 52 Da pries guy gotta burn all da tings dat get mildew, cuz goin wipe out odda stuff. Gotta burn um up.
\p
\v 53 “But if da pries guy see wen he go check out da stuffs, dat da mildew no spread on top da clotheses o da odda stuff,
\v 54 he goin tell somebody fo wash da tings dat get da mildew. Den he goin put um away from da odda stuff fo seven mo days.
\v 55 Den da pries guy goin check um out one mo time, an if da mildew still look da same, no matta no spread, you no can use um. Burn um up, no matta da mildew stay on da inside o da outside.
\v 56 But if da pries guy see dat da mildew stay fade afta dey wash um, he gotta broke da mildew part off, fo take out da mildew part.
\v 57 But if da mildew stay come again on top da stuff bumbye, gotta burn up da whole ting.
\v 58 Wateva dey wen wash, an no mo mildew, dey gotta wash um again, an den goin be okay fo peopo use um.
\p
\v 59 “Dis, da rules fo wool o linen cloth, an fo stuff peopo make from ledda, dat get mildew on top um, an fo tell erybody if stay okay o if not okay fo peopo use um.”
\c 14
\s How Peopo Can Go In Front God, Afta Dey Get One Sick On Top Da Skin Dat Anodda Guy Can Catch
\p
\v 1 Yahweh tell Moses:
\v 2 “Dis, da rules fo da guys dat get da kine sick on top da skin dat odda guys can catch, fo make dem so dey can come back in front me, Yahweh, wen somebody bring him by da pries.
\v 3 Da pries guy goin go outside da camp, an check out da guy. If he see dat da guy come good awready from da kine sick on top da skin dat anodda guy can catch,
\v 4 da pries guy goin tell somebody fo bring two birds dat stay alive an da right kine fo kill fo make sacrifice, an some cedar wood, red string, an one oregano branch, fo da guy dat like come clean fo come in front me, Yahweh.
\v 5 Den da pries guy goin tell somebody fo kill one bird on top one clay pot wit spring watta inside.
\v 6 Den he goin take da bird dat still alive an dip um inside da blood wit da spring watta from da bird he wen kill. He goin dip da cedar wood, da red string, an da oregano branch, same time.
\v 7 Den da pries goin sprinkle da guy dat like come clean again fo come in front me, Yahweh, seven times. An he goin tell erybody dat now, stay okay fo da guy come in front me again. Den he goin let go da bird dat stay alive, fo fly away inside da fields.
\p
\v 8 “Da guy dat da pries guy wen do all dis fo, da guy gotta wash his clotheses, shave off all his hair, an bafe wit watta. Den he ready fo come in front me. Afta dat he can go inside da camp, but he still gotta stay outside his own tent fo seven days.
\v 9 Day numba seven, he gotta shave off all da hair from his head, his beard, his eyebrow, an his odda hair. He gotta wash his clotheses an bafe wit watta. Den he okay fo come in front me.
\p
\v 10 “Day numba eight he gotta bring two boy kine bebe sheep, an one girl kine bebe sheep, dat ony stay one year ol, an no mo notting wrong wit um. He gotta bring six quart fancy kine wheat flour, mix wit olive oil, fo make one sacrifice wit wheat, an bout one pint olive oil.
\v 11 Da pries guy dat tell dat da guy ready fo come in front me, gotta bring da guy an da sacrifice animals in front me wea peopo go inside da yard fo da Tent wea da peopo come fo meet me.
\p
\v 12 “Den da pries guy goin take one a da boy bebe sheeps fo make one sacrifice fo take away da blame fo da bad tings da guy wen do befo time, an da olive oil. He goin lif up da baby sheep an da oil in front me fo make da kine sacrifice dey lif up.
\v 13 Den da pries guy goin kill da bebe sheep inside da spesho place wea dey make da kine sacrifice cuz a da bad kine stuff da guy wen do, an da kine sacrifice dey burn up. Jalike da sacrifice cuz a da bad kine stuff, da sacrifice cuz a da blame, az ony fo da pries guy eat, cuz stay real spesho fo me.
\v 14 Da pries guy goin take some a da blood from da sacrifice fo take away da blame, an put um on top da bottom a da right ear a da guy he make da sacrifice fo, an on top his right thumb, an da big toe from his right feet.
\v 15 Den da pries guy goin take some a da olive oil, an pour um inside da palm a his own lef hand,
\v 16 dip his right forefinga inside da oil inside his lef palm, an wit his finga, sprinkle some in front me, Yahweh, seven times.
\v 17 Da pries guy goin put some a da oil dat still yet stay inside his palm, on top da bottom a da guy's right ear, on top his right thumb, an his right big toe, on top da blood from da sacrifice fo take away da blame.
\v 18 Da pries guy goin put da res a da olive oil inside his palm, on top da head a da guy. Dass how he goin bring him da same side wit me.
\p
\v 19 “Den da pries guy goin make da sacrifice cuz a da bad tings da guy wen do befo time, an bring him da same side wit me, cuz befo time he no can come in front me. Afta dat da pries guy goin kill da animal fo da burn up kine sacrifice
\v 20 an put um on top da altar, wit da sacrifice wit da wheat too, an bring da guy da same side wit me. Den he can come in front me.
\s Sacrifices Fo Da Guy Dat No Mo Notting
\p
\v 21 “But if da guy no mo notting, an no can buy da animals, he gotta take one boy kine bebe sheep fo make one sacrifice fo take away da blame, an lif um up, fo bring him da same side wit me, Yahweh. An he goin take two quarts fancy kine flour mix wit bout one pint olive oil fo make one sacrifice wit wheat,
\v 22 an two doves o two young pigeons, wateva he can buy, one fo da sacrifice cuz a da bad tings he wen do, an da odda fo da burn up kine sacrifice.
\p
\v 23 “Day numba eight, he gotta bring da animals an da stuff fo da sacrifice by da pries guy wea peopo go inside da yard fo da Tent wea da peopo come fo meet me, fo make da sacrifice so he can come in front me.
\v 24 Da pries guy goin take da bebe sheep an da pint a olive oil fo da sacrifice fo take away da blame, an lif um up in front me, Yahweh, fo da kine sacrifice dey lif up.
\v 25 Da pries guy goin kill da bebe sheep fo da sacrifice fo take away da blame, an take some a da blood, an put um on top da bottom a da right ear a da guy, da right thumb, an da right big toe.
\v 26 Den da pries guy goin pour some a da olive oil inside da palm a his own left hand,
\v 27 an wit his right forefinga, sprinkle some a da oil seven times in front me.
\v 28 Den he goin put some a da oil from his hand on top da same places he put da blood from da sacrifice fo take away da blame: on top da bottom a da guy's right ear, his right thumb, an his right big toe.
\v 29 Da pries guy goin put da res a da oil inside his hand on top da head a da guy, fo bring him da same side wit me.
\v 30 Den da pries guy goin kill da doves o da young pigeons, wateva da guy can buy.
\v 31 He goin kill one fo make da sacrifice cuz a da bad tings da guy wen do, an da odda fo make da burn up kine sacrifice wit da wheat sacrifice. Az how da pries guy goin bring da guy da same side wit me, Yahweh. Den he can come in front me.”
\p
\v 32 Dis, da rules fo whoeva get da kine sick on top da skin dat odda guys can catch, an da guy no mo notting fo buy da regula kine stuff fo make him so he can come in front God.
\s Da Rules Fo Stuff Dat Get Mildew On Top Um
\p
\v 33 Anodda ting Yahweh tell Moses an Aaron:
\v 34 “Wen you guys go inside da Canaan land, dat I stay give you guys fo own um all da time, if I put one mildew inside one house dat goin spread all ova dea,
\v 35 da guy dat own da house gotta go tell da pries guy, ‘I see someting dat look jalike mildew inside my house.’
\v 36 Da pries guy goin tell um fo take eryting outa da house befo da pries guy go inside. If da owna no do dat, den da pries goin tell dat eryting inside da house get da mildew. Den da pries guy go inside fo check out da house.
\v 37 He goin look fo mildew on top da walls. If stay look kinda green o kinda red, an go mo deep den da wall,
\v 38 da pries guy goin go outside da house door, an shut um up fo seven days.
\v 39 Day numba seven, da pries guy goin go back fo check out da house. If da mildew wen spread on top da walls,
\v 40 da pries guy goin tell da peopo dat dey gotta take out da stones dat get da mildew, an throw um outside da town wea peopo put da kine stuff dat make um so dey no can come in front me, Yahweh.
\v 41 Da house, da pries guy goin make um scrape all da walls inside, an dey gotta throw da stuff dey scrape off an throw um da place outside da town dey get fo da kine stuff dat make peopo so dey no can come in front me, Yahweh.
\v 42 Den dey goin take odda new stones fo put wea da ol stones dey wen take out, an dey goin take new clay fo plasta all da walls.
\p
\v 43 “If da mildew come back inside da house afta dey take out da stones wit da mildew, an scrape da house walls, an plasta um,
\v 44 da pries guy goin go check um out again. If da mildew wen spread inside da house again, az da kine mildew dat wipe out stuff. Da house pilau, no can use um.
\v 45 Gotta broke down da house: da stones, da beams, an all da clay, an take um outside da town, da place wea peopo throw stuff dat make um so dey no can come in front me, Yahweh.
\p
\v 46 “Anybody go inside da house all da time da house stay shut up, dey no can go in front me till da sun go down.
\v 47 An anybody sleep o eat inside da house, dey gotta wash dea clotheses.
\p
\v 48 “But if da pries guy come fo check out da house, an da mildew neva spread inside da house afta dey put da new clay, he goin tell erybody dat da house stay okay fo use, cuz no mo mildew awready.
\v 49 Fo da kine sacrifice dat make da house okay da way I see um, he goin take two birds, some cedar wood, red string, an one oregano branch.
\v 50 He goin kill one bird ova one clay pot dat get spring watta inside.
\v 51 Den he goin take da cedar wood, da oregano branch, da red string, an da odda bird dat stay alive, dip um inside da blood mix wit da spring watta from da bird he wen kill, an use um fo sprinkle da house seven times.
\v 52 Afta he make da sacrifice wit da blood from da bird, da spring watta, da bird dat stay alive, da cedar wood, da oregano branch, an da red string, fo make da house okay fo use,
\v 53 den he goin let da alive bird go fly away inside da fields outside da town. Az how he goin make da house okay da way I Yahweh see um.
\p
\v 54 “Dis, da rules fo da kine sick on top da skin dat odda guys can catch, o wea da skin stay broke,
\v 55 o fo mildew inside da clotheses, o inside da house,
\v 56 fo one place dat stay swell on top da skin, one rash, o one shiny spot,
\v 57 so da pries guy can find out wen someting stay okay o not okay, an wen da peopo can come in front God, an wen dey no can.”
\p
Dis da rules bout da kine sick on top da skin dat odda guys can catch, an da mildew.
\c 15
\s Rules Bout Stuff Dat Come Out From Da Body
\p
\v 1 Yahweh tell Moses an Aaron
\v 2 fo tell da Israel peopo dis: “Wen any guy get stuff come out from dea body, dat make dem so dey no can come in front me, Yahweh,
\v 3 no matta stay come out easy o get hard time come out, dey no can come in front me, Yahweh.
\p
\v 4 “Goin make any bed da guy lay down on top um, o anyting da guy sit down on top um, no can use um. So dat whoeva lay down o sit down on top um no can come in front me.
\v 5 Anybody dat touch da guy bed, dey gotta wash dea clotheses, an bafe wit watta, an dey no can come in front me till da sun go down.
\v 6 Anybody dat sit on top da same ting dat guy wit da stuff coming out wen sit on top um, dey gotta wash dea clotheses, an bafe wit watta, an dey no can come in front me till da sun go down.
\p
\v 7 “Anybody touch da guy skin gotta wash dea clotheses, an bafe wit watta, an dey no can come in front me till da sun go down.
\p
\v 8 “If da guy get stuff coming out, an he spit on top somebody dat can come in front me, dat guy gotta wash his clotheses, an bafe wit watta, an he no can come in front me till da sun go down.
\p
\v 9 Wateva da guy sit on top wen he go ride, goin make peopo so dey no can come in front me,
\v 10 an whoeva touch anyting dat was undaneat da guy dat get da stuff coming out, dey no can come in front me till da sun go down. Whoeva pick up da tings dat wen stay unda da guy, dey gotta wash dea clotheses, an bafe wit watta, an dey no can come in front me till da sun go down.
\p
\v 11 “Anybody da guy wit da stuff coming out wen touch befo he wash his hands wit watta, dey gotta wash dea clotheses, an bafe wit watta, an dey no can come in front me till da sun go down.
\p
\v 12 “If da guy wit da stuff coming out touch one clay pot, gotta broke um. If da guy touch one wood ting, gotta rinse um wit watta.
\p
\v 13 “Wen da stuff pau come out from da guy body, he goin wait seven days fo da tings da pries guy goin do so he can come back in front me. He gotta wash his clotheses, an bafe wit spring watta. Den he stay ready fo come in front me, Yahweh.
\v 14 Day numba eight, da guy gotta take two doves o two young pigeon, an come in front me wea peopo go inside da yard fo da Tent wea peopo come fo meet me. He goin give da birds to da pries guy.
\v 15 Da pries guy goin make sacrifice wit da birds, one fo da sacrifice cuz a da bad kine stuff da guy wen do, an da odda fo da burn up kine sacrifice. Az how da pries guy goin bring da guy da same side wit me, cuz a da stuff dat come out from his body.
\p
\v 16 “Wen one guy get one wet dream, he gotta bafe his whole body wit watta, an he no can come in front me till da sun go down.
\v 17 If da clotheses o da leather get semen on top um, gotta wash um wit watta, an no can use um till da sun go down.
\v 18 Wen one guy sleep wit one wahine, an get semen come out from da body, both a dem gotta bafe wit watta, an dey no can come in front me till da sun go down.
\p
\v 19 “Wen one wahine get her sick time ery month, dat goin stay fo seven days. Whoeva touch her no can come in front me till da sun go down.
\p
\v 20 “Wateva she lay down on top wen she stay sick lidat, dat make da peopo so dey no can come in front me if dey touch um. An wateva she sit on top, dat make da peopo so dey no can come in front me if dey touch um.
\v 21 Anybody touch her bed gotta wash dea clotheses, an bafe wit watta, an dey no can come in front me till da sun go down.
\v 22 An anybody touch anyting she sit down on top gotta wash dea clotheses, an bafe wit watta, an dey no can come in front me till da sun go down.
\v 23 No matta if da bed o wat she sit on top, if somebody touch um, dey no can come in front me till da sun go down.
\p
\v 24 “If one guy sleep wit her, an da stuff dat come outa her touch him, he no can come in front me fo seven days, an wateva bed he lay down on top, dat goin make peopo so dey no can come in front me too.
\p
\v 25 “Wen one wahine get blood dat come out fo plenny days, an az not her sick time ery month, o get blood dat still yet stay come out afta her sick time, she no can come in front me till dat pau, jalike wen she get her sick time.
\v 26 Wateva bed she lay down on top wen da blood stay come out, an wateva she sit down on top, goin make peopo so dey no can come in front me if dey touch um, jalike wen she get her sick time ery month.
\v 27 Whoeva touch um no can come in front me. Dey gotta wash dea clotheses, an bafe wit watta, an dey no can come in front me till da sun go down.
\p
\v 28 “Wen da blood pau come out from da wahine body, she gotta wait seven days, an afta dat she can come in front me.
\v 29 Day numba eight, she gotta take two doves o two young pigeons, an bring um by da pries guy wea peopo go inside da yard fo da Tent wea da peopo come fo meet me, Yahweh.
\v 30 Da pries guy goin make da sacrifice, one bird fo da sacrifice cuz a any bad kine stuff she wen do, an da odda bird fo da burn up kine sacrifice. Az how he goin bring her da same side wit me cuz a da blood dat wen stay come outa her.
\p
\v 31 “Az how you guys, Moses an Aaron, gotta make shua da Israel peopo stay away from da Tent fo meet wit me, Yahweh, weneva dey no can come in front me. No good dey mahke wen dey stay lidat, an no good dey make da place wea I stay wit dem come pilau.”
\v 32 Dis, da rules fo any guy dat get da kine sick dat come out from dea body, an fo whoeva get semen come out from dea body, so dey no can come in front me,
\v 33 fo one wahine dat get her sick time ery month, fo one guy o wahine dat get stuff come out from dea body, an fo one guy dat sleep wit one wahine dat get her sick time an no can come in front Yahweh.
\c 16
\s Da Day Fo Bring Back Erybody Da Same Side Wit God
\r (Prieses 23: 26-32; Census 29:7-11; Hebrews 6:19, 13:11)
\p
\v 1 Yahweh talk to Moses afta two a Aaron's boys mahke. Dey wen mahke, cuz dey wen go in front Yahweh wen dey not suppose to.
\v 2 Yahweh tell Moses dis: “Tell yoa brudda Aaron, he no can come weneva he like inside da Real Real Spesho Place behind da thick curtain in front da place on top da Box Fo Rememba Da Deal. Dass wea da pries guy sprinkle da blood from da sacrifice fo bring back da peopo da same side wit me, Yahweh. If he jus come inside cuz he like, he goin mahke. Az cuz I stay inside da cloud dat stay ova da place wea da pries guy sprinkle da blood.
\p
\v 3 “Dis how Aaron can come inside da Spesho Place: Befo he go dea, he gotta bring one boy kine cow fo make sacrifice cuz a da bad kine stuff da peopo wen do, an one boy kine sheep fo da burn up kine sacrifice.
\v 4 An he gotta bafe firs wit watta, cuz he goin put on da pries kine clotheses dat stay spesho fo me. Den he goin put on da spesho long kine linen shirt, wit linen shorts unda um, den tie da linen sash aroun himself, an put on da pries kine hat.
\v 5 Same time, da Israel peopo goin bring two boy kine goats fo da sacrifice cuz a da bad kine stuff dey wen do, an one boy kine sheep fo da burn up kine sacrifice.
\p
\v 6 “Den Aaron goin bring in da boy kine cow dat goin be da sacrifice fo da bad kine stuff he wen do, fo bring back him an his ohana da same side wit me, Yahweh.
\v 7 Den he goin take da two goats an bring dem in front me, Yahweh, by da place wea peopo go inside da yard fo da Tent wea da peopo come fo meet me.
\v 8 He goin pull straw fo da two goats. One goin be fo me, Yahweh. Da odda, layta he goin let um go way inside da boonies wea he no can come back.
\v 9 Aaron goin bring da goat dat goin be fo me, Yahweh, dat goin be da sacrifice fo da bad kine stuff da peopo wen do.
\v 10 But da goat dat he goin let um go way inside da boonies, he goin bring dat one alive in front me, Yahweh. Dat goat, fo bring back da peopo da same side wit me, layta da pries guy goin send um way inside da boonies wea he no can come back.
\s Da Sacrifices Dey Make Fo Bring Erybody Da Same Side Wit God
\p
\v 11 “Den Aaron goin bring da boy kine cow fo make sacrifice fo da bad kine stuff he wen do, an kill um, fo bring him an his ohana da same side wit me.
\v 12 He goin take one bowl full a da burning coals from da altar in front me an two hands full a da incense dat dey grind up small an smell real nice, an take um behind da curtain.
\v 13 Da pries guy goin put da incense on top da burning coals in front me, Yahweh, so da smoke from da incense goin hide da place wea he goin sprinkle da blood ova da cova fo da Box Fo Rememba Da Deal, fo bring da peopo back same side wit me. He make da smoke so he no mahke.
\v 14 Den he goin take some a da boy kine cow's blood wit his finga, an sprinkle um on top da front a da cova fo da Box Fo Rememba Da Deal, fo bring back da peopo da same side wit me, Yahweh, an den he goin sprinkle um seven times in front da cova fo da Box.
\p
\v 15 “Den da pries guy goin kill da goat fo make da sacrifice fo da bad kine stuff da peopo wen do. He goin take da blood behind da curtain, an make da same ting jalike he wen do wit da boy kine cow's blood. He goin sprinkle um on top da front a da cova fo da Box Fo Rememba Da Deal, fo bring back da peopo da same side wit me, Yahweh, an den in front da Box.
\v 16 Az how da pries guy goin make shua da Real Real Spesho Place stay da same side wit me, Yahweh, cuz da Israel ohana peopo do da kine stuff dat make um so dey no can come in front me, an dey go agains me weneva dey do bad kine stuff. Den he do da same ting fo da Tent wea da peopo come fo meet me, Yahweh. Dat Tent stay inside da middo a dea camp, even wen dey do bad kine stuff dat make um so dey no can come in front me.
\v 17 Nobody can go inside da Tent wea da peopo come fo meet me, from da time Aaron go inside da Real Real Spesho Place fo bring da peopo back da same side wit me, till he come outside. Az how he goin bring back himself, his ohana, an all da Israel peopo togedda, da same side wit me.
\p
\v 18 “Den da pries guy goin come outside by da altar dat stay in front me, Yahweh, an make shua da altar stay okay fo make sacrifice on top um, an stay da same side wit me. He goin take some a da blood from da boy kine cow, an some a da blood from da goat, an put um on top all da tings like horns dat stick out from da altar.
\v 19 He goin sprinkle some a da blood on top da altar wit his finga seven times, fo make um come clean fo da sacrifices da way I see um. Dat way, he make um spesho fo me, cuz befo he sprinkle da blood, da Israel peopo no can come in front me.
\p
\v 20 “Wen Aaron pau make shua da Real Real Spesho Place stay okay fo use cuz stay da same side wit me, an same ting fo da Tent an da altar, den he goin bring da odda goat dat still stay alive in front me, Yahweh.
\v 21 Aaron goin put his two hands on top da goat's head, an tell all da bad kine stuff da Israel peopo wen do, an dat dey go agains me, Yahweh, an jalike put da blame fo all dat bad kine stuff on top da goat. Den he goin make da goat go way inside da boonies, wit one guy dat stay ready fo take da goat ova dea.
\v 22 Da goat goin take da blame fo all da bad kine stuff da peopo wen do, an take um one place wea da goat no can come back. Da guy goin let go da goat ova dea inside da boonies.
\p
\v 23 “Afta da goat go way, Aaron goin go inside da Tent wea da peopo come fo meet me, Yahweh, an take off da linen clotheses dat he put on befo he wen go inside da Real Real Spesho Place, an he goin leave um inside dea.
\v 24 He goin bafe wit watta inside da place dat stay spesho fo me, an put on his regula clotheses. Den he goin come out an make da burn up kine sacrifice fo himself, an anodda one fo da peopo, fo bring him an da peopo back da same side wit me, Yahweh.
\v 25 An he goin burn da fat from da sacrifice fo da bad kine stuff da peopo do, on top da altar too.
\p
\v 26 “Da guy dat let da goat go dat wen take da blame, he gotta wash his clotheses, an bafe wit watta. Den he can go back inside da camp.
\v 27 Da boy kine cow an da goat fo da sacrifices fo da bad kine stuff Aaron an da peopo wen do, dat Aaron wen bring dea blood inside da Real Real Spesho Place fo bring um back da same side wit me, Yahweh, dey gotta take um outside da camp fo burn um. Dey gotta burn up da skin, da meat, da kukae, eryting.
\v 28 Da guy dat wen take um fo burn gotta wash his clotheses, an bafe wit watta. Den he can go back inside da camp.
\p
\v 29 “Dis rules you guys goin do all da time. Da month numba seven fo yoa kine year, da day numba ten, all you guys no can eat, so you can pray. An no can work, anybody dat wen born one Jew, o anybody from odda place dat stay with you guys.
\v 30 Az cuz dat day, da pries guy goin do all dis stuff fo bring back you guys da same side wit me, Yahweh, so you guys can come in front me. Den you guys goin stay clean from all da bad kine tings you wen do, da way I Yahweh see you.
\v 31 Az one day fo res, jalike da Res Day, an you guys no can eat, so you can pray. Dis one rule dat goin stay all da time.
\v 32 Da pries guy dat God pick fo be da main pries, an get da right fo do um afta his fadda, he goin bring back da peopo da same side wit me, Yahweh. He goin put on da linen kine clotheses dat stay spesho fo me,
\v 33 an make da sacrifices fo make shua dat da Real Real Spesho Place, da Tent wea da peopo come fo meet me, an da altar, da pries guys, an da peopo all stay da same side wit me.
\p
\v 34 “Dis, da rule fo you guys all da time. One time ery year, da main pries guy goin bring back you Israel guys da same side wit me, cuz a all da bad kine stuff you guys do.”
\p An Aaron wen do um all jalike Yahweh tell Moses fo do um.
\c 17
\s Mo Plenny Rules
\p
\v 1 Yahweh tell Moses
\v 2 tell Aaron an his boys an all da Israel peopo, dis wat Yahweh tell you guys fo do:
\v 3 “Any Israel guy kill one boy kine cow fo make sacrifice, o one bebe sheep, o one goat, inside da camp o outside da camp,
\v 4 dey no can do dat. Dey suppose to bring da sacrifice animal wea you go inside da yard fo da Tent wea da peopo come fo meet me, Yahweh. Dey gotta make da sacrifice fo me, Yahweh, in front da place wea I stay. But if dey make sacrifice some odda place, az jalike dey get da blame fo kill somebody, cuz dey do um da wrong way. Gotta cut dem off so dey not yoa peopo no moa.
\v 5 Az so da Israel peopo make dea sacrifices by me, Yahweh, an no make um inside da open fields. Dey gotta bring um by da pries guy, fo me, Yahweh, wea you go inside da yard fo da Tent wea da peopo come fo meet me. Den dey can make da kine sacrifice fo show dat me, Yahweh, an dem stay tight wit each odda.
\v 6 Den da pries guy goin sprinkle da blood on top da altar fo me, Yahweh, da place wea you go inside da yard fo da Tent wea da peopo come fo meet me, an burn da fat. Az one real nice smell dat make me stay good inside.
\v 7 Dey betta not make sacrifices fo da goat kine idol gods, an fool aroun wit dose gods jalike one guy fool aroun behind his wife's back. Dis da rule dat goin stay fo dem an dea kids from now an all da time.”
\p
\v 8 “Tell dem dis too: All you Israel peopo, an all you peopo from odda place dat stay live wit da Israel guys, lissen up. If you like make one burn up kine sacrifice o odda kine sacrifice,
\v 9 you gotta bring da animal wea you go inside da yard fo da Tent wea da peopo come fo meet me, fo make da sacrifice fo me. If you no do dat, da peopo gotta cut you off so you not dea peopo no moa.
\p
\v 10 “If any Israel guy, o any guy from odda place dat stay live wit you guys, eat meat dat still get blood inside, I goin go agains dat guy dat eat da blood, an I goin cut him off so he not one a my peopo no moa.
\v 11 Az cuz da blood, dass wea da life stay inside one animal o one guy. I wen give you guys da blood so you guys can come back da same side wit me wen you make sacrifice on top da altar. Az da blood dat bring you guys back same side wit me.
\v 12 Az how come I tell you Israel peopo: ‘No mo nobody from you Israel peopo, o from da peopo from odda place dat stay live wit you guys, can eat meat dat still get blood inside.’
\p
\v 13 “If any Israel guy, o any guy from odda place dat stay live wit you guys, go hunt any animal o bird dat you guys can eat, dey gotta let da blood go outa um, an cova up da blood wit dirt on top.
\v 14 Az cuz da blood, dass wea da life stay inside one animal o one guy. Az why I wen tell da Israel peopo no eat da blood from da animals, cuz da blood, dass wea da life stay inside one animal o one guy. Whoeva eat um, gotta cut dem off so dey not one a yoa peopo no moa.
\p
\v 15 “If one Israel guy, o one guy from odda place dat stay live wit you guys, find one animal dat awready mahke o dat da wild animals wen rip um up, an dey eat um, dey gotta wash dea clotheses, bafe wit watta, an dey no can come in front me, Yahweh, till da sun go down. Den dey can come in front me.
\v 16 But if dey no wash dea clotheses, an bafe wit watta, dey goin get da blame fo eat da mahke animal.”
\c 18
\s Peopo Dat Fool Aroun Wit Somebody Dey Not Suppose To
\r (Rome 10:5; Galatia 3:12)
\p
\v 1 Yahweh tell Moses
\v 2 fo talk to da Israel peopo one mo time an tell um: “Me, Yahweh, I yoa God.
\v 3 You guys, no make like da peopo do ova dea Egypt side, da place you guys live befo time. An you guys no make like da peopo do Canaan side, da place I goin bring you guys. No do tings like dem.
\v 4 You guys gotta do wat my rules tell you fo do, an make shua fo live da way I tell you gotta do. Me, Yahweh, I yoa God.
\v 5 Take care fo live da way I tell you gotta do, an do wat my rules tell you fo do. Anybody dat do wat my rules tell, dey goin stay alive an get life cuz dey do um. I Yahweh, da God dass fo real.
\p
\v 6 “Nobody suppose to go nea one close ohana fo make sex wit dem. I Yahweh, da God dass fo real.
\p
\v 7 “You betta not make sex wit yoa mudda. Az yoa mudda. No make shame fo yoa fadda lidat.
\p
\v 8 “You betta not make sex wit yoa fadda's odda wifes, cuz dat make shame fo yoa fadda too.
\p
\v 9 “You betta not make sex wit yoa sista, no matta her yoa fadda's girl o yoa mudda's girl, no matta she grow up da same house wit you, o anodda place.
\p
\v 10 “You betta not make sex wit yoa boy's girl, o yoa girl's girl. Dat goin make shame fo you.
\p
\v 11 “No make sex wit yoa fadda's odda wife's girl, cuz yoa fadda her fadda too. She yoa sista.
\p
\v 12 “No make sex wit yoa fadda's sista. She yoa fadda's close ohana.
\p
\v 13 “No make sex wit yoa mudda's sista. She yoa mudda's close ohana.
\p
\v 14 “No go nea yoa fadda's brudda's wife fo make sex wit her. No make shame fo yoa fadda brudda lidat. She yoa auntie.
\p
\v 15 “No make sex wit yoa daughta in law. She yoa boy's wife. No make sex wit her.
\p
\v 16 “No make sex wit yoa brudda wife. No make shame fo yoa brudda lidat.
\p
\v 17 “If you make sex wit one wahine, no go make sex wit her girl too. An no go make sex wit her boy's girl o her girl's girl. Dey da wahine's close ohana. Az one real bad kine ting you doing.
\p
\v 18 “No take yoa wife sista fo come anodda wife fo you, cuz den dey goin fight. No make sex wit her wen yoa real wife still yet stay alive.
\v 19 “No go nea one wahine fo make sex wit her wen she get her sick time ery month, wen she no can come in front me.
\p
\v 20 “No go make sex wit any odda guy wife, an make yoaself pilau lidat so you no can come in front me.
\p
\v 21 “No give any a yoa own kids fo make um go through da fire fo make sacrifice fo da idol kine god Molek, cuz you guys betta not make my name pilau. I Yahweh.
\p
\v 22 “No make sex wit one guy jalike you make sex wit one wahine. Az pilau lidat.
\p
\v 23 “No make sex wit one animal, an make yoaself come pilau lidat. One wahine betta not give herself to one animal an make sex wit um. Dat mean dey ack jalike peopo an animals not diffren, an az going agains doing da right tings.
\p
\v 24 “No go do dis kine stuff an make yoaself so you no can come in front me, Yahweh. Az how da peopos dat donno me stay make, dat stay live inside da land I goin give you guys, da ones I goin move um outa da land.
\v 25 Dey wen even make da land pilau awready. So I goin punish da land cuz a all da bad kine stuff da peopo ova dea do. Jalike da land goin throw up da peopo dat stay dea now.
\v 26 But you peopo gotta take care fo live da way I wen tell you gotta do, an do wat my rules tell you fo do. An you gotta no do notting dat stay pilau, da kine I wen tell you bout. Da guys dat born hea an da guys from odda place dat live wit you guys, same ting, dey betta not do notting dat stay pilau kine.
\v 27 Da peopo dat wen live inside da land befo you guys, dey wen do all dat pilau kine stuff. Dey make da land pilau too.
\v 28 If you guys make da land pilau, da land goin throw up you guys, jalike it wen throw up da peopo dat stay dea befo you guys.
\p
\v 29 “Anybody do any a dese pilau kine tings, you gotta cut dem off so dey not yoa peopo no moa.
\v 30 You guys gotta make shua fo do da stuff I tell dat you guys gotta do. No follow da pilau kine style da peopo dat wen stay dea befo you guys do. No make yoaself so you no can come in front me lidat. Me, I yoa God Yahweh!”
\c 19
\s Odda Kine Rules
\r (Matthew 5:33, 42, 19:19, 22:39; Mark 12:31-33; Luke 10:27; Rome 13:9; Galatia 5:14; James 2:8; 1 Peter 1:16)
\p
\v 1 Yahweh tell Moses
\v 2 fo tell all da Israel peopo dis: “You guys gotta live spesho an good kine, cuz I yoa God Yahweh, an I stay spesho an good.
\p
\v 3 “Erybody gotta show plenny respeck fo dea mudda an fadda. An ery Res Day, you guys gotta follow my Rules an res. I yoa God Yahweh.
\p
\v 4 “No leave me fo make o follow idol kine gods, cuz dey no can do notting. An no pour hot metal fo make gods fo yoaself. I yoa God Yahweh, az why.
\p
\v 5 “Wen you guys make sacrifice dat show dat you an me, Yahweh, stay tight wit each odda, make um good so I goin like take um from you.
\v 6 Gotta eat um da same day you make da sacrifice, o da nex day. If someting stay lefova till day numba three, you gotta burn um up.
\v 7 If day numba three, anybody eat um, az pilau, an I no goin take da sacrifice.
\v 8 Whoeva eat um goin get da blame fo do um, cuz dey make pilau wat stay spesho fo me, Yahweh. You gotta cut dem off so dey not yoa peopo no moa.
\p
\v 9 “Wen you cut da food from yoa fields inside da land, no cut um all da way to da edge, o pick up da extra food dat da harvesta guys no pick up.
\v 10 No go ova yoa grape field one mo time fo make shua you get eryting, an no pick up da grapes dat wen fall down. Leave um dea fo da peopo dat no mo notting, an da peopo from odda place dat live wit you guys. I yoa God Yahweh.
\p
\v 11 “No go steal notting. No bulai. No go cheat each odda.
\p
\v 12 “No go make strong promise an tell az me, Yahweh, said um. Az how you give me bad name. I yoa God Yahweh.
\p
\v 13 “No give presha on anodda guy o steal from him.
\p
“No hold back da pay fo yoa worka guy till da nex day.
\p
\v 14 “No put kahuna on top one guy dat no can hear, jalike he no matta. No put someting in front one guy dat no can see so he trip an fall down. Stay scared an show respeck fo me, cuz I yoa God Yahweh.
\p
\v 15 “Wen you guys judge peopo, make shua you do um da right way, an make um even. No make diffren to some guys dat stay mo betta den to odda guys, no matta dey no mo notting o dey rich. Judge odda peopo da right an same way.
\p
\v 16 “No go aroun an make bulai story bout anybody wit yoa peopo.
\p
“No jus stan dea, if somebody goin mahke an you do notting fo help. I Yahweh.
\p
\v 17 “No hate yoa brudda inside yoa heart. Wen anodda guy do someting wrong, tell um az wrong strait out, so you no get da blame wit him.
\p
\v 18 “If one a yoa peopo do someting bad to you, no go do someting bad to dem too. No stay nuha wit um, but get love an aloha fo da odda guy, jalike you get love an aloha fo yoaself. I Yahweh, say dis.
\p
\v 19 “Do wat I tell you you gotta do.
\p
“No make diffren kine animals breed wit each odda.
\p
“No plant two diffren kine seeds inside yoa field.
\p
“No wear da kine clotheses dat somebody weave from two diffren kine string, jalike wool an linen.
\p
\v 20 “If one guy make sex wit one slave girl dat goin marry anodda guy, an da guy she goin marry no buy her yet an no pay da owna yet so she not one slave no moa, den da guy dat make sex wit her gotta pay da guy she going marry, cuz he jalike her husban. But you no goin kill da girl o da guy dat make sex wit her, cuz she still one slave girl.
\v 21 But da guy dat make sex wit da slave wahine, gotta bring one boy kine sheep by da place you go inside da yard fo da Tent wea da peopo come fo meet me, Yahweh, fo make da kine sacrifice dat take away da blame fo wat he wen do.
\v 22 Wen da pries guy kill da boy kine sheep fo da sacrifice fo take away da blame, da pries guy goin bring da guy da same side wit me, Yahweh, cuz a da bad kine ting da guy wen do. Den I goin hemo his shame an let him go.
\p
\v 23 “Wen you guys go inside da land an plant any kine fruit trees, tink bout da fruit lidis: no can eat um yet, cuz jalike kapu. Fo three years, you no can eat um.
\v 24 Da year numba four, all da fruit goin be spesho fo me, Yahweh. Goin be jalike one sacrifice fo me fo tell how good I stay.
\v 25 Den, year numba five, you guys can eat da fruit. Az how you guys goin get even mo fruit. I yoa God Yahweh.
\p
\v 26 “No eat no meat dat still yet get blood inside.
\p
“No go find out from da gods wat happening. No go call da spirit from da mahke peopo fo come tell you wat goin happen bumbye.
\p
\v 27 “Wen somebody mahke, no cut da hair on da sides a yoa head like da odda peopo fo show you stay sad. No cut off da edge a yoa beard.
\v 28 “No cut yoa body fo show you stay sore inside cuz a da mahke guys. No make tattoo on top yoa skin. I Yahweh.
\p
\v 29 “No make yoa girl come pilau cuz you make her come one wahine dat fool aroun fo money. If you guys make lidat, erybody inside da land goin make lidat too, an den goin get plenny real bad kine stuff all ova da land.
\p
\v 30 “Make jalike I tell you fo my Res Day. Show respeck fo da place dat stay spesho fo me, Yahweh.
\p
\v 31 “No go look fo da wahines dat talk to da mahke peopo, an no go find da guys dat know how fo find out wat da mahke peopo spirits know. Cuz if you guys do dat, goin make you guys so you no can come in front me. I yoa God Yahweh.
\p
\v 32 “Stand up wen ol peopo come nea you, an show respeck fo dem. Show respeck fo me, yoa God. I Yahweh.
\p
\v 33 “Wen somebody from odda place come live wit you guys inside yoa land, no make any kine to dem.
\v 34 Somebody from odda place dat live wit you guys, you gotta make to dem jalike to one guy dat wen born same place by you guys. Get love an aloha fo da guy, jalike you get love an aloha fo yoaself. Cuz you guys wen stay Egypt side, an you guys not from dea. I yoa God Yahweh.
\p
\v 35 “No use bulai kine measure wen you tell how long someting, o how heavy someting stay, o how much get.
\v 36 Use da kine scale an measure dat stay right an tell da truth. I yoa God Yahweh dat wen bring you guys outa Egypt.
\p
\v 37 “You guys gotta make shua fo do all da tings I tell you guys you gotta do, an all da rules I give you fo do um. Cuz I Yahweh.”
\c 20
\s God Punish Da Peopo Fo No Do How He Tell Um Fo Do
\r (1 Peter 1:16)
\p
\v 1 Yahweh tell Moses
\v 2 fo tell da Israel peopo dis: “Any Israel guy, o any guy from odda place dat stay live wit da Israel guys, if dey give any a dea kids fo make um go inside da fire fo make sacrifice fo da idol kine god Molek, dey gotta mahke. Da Israel peopo gotta throw stones fo kill um.
\v 3 I goin go agains dat guy, an cut him off from his peopo. Wen he give his kid fo make sacrifice fo Molek, he make my spesho place pilau, an he talk bad an make dirty my good an spesho name too.
\v 4 But if da Israel peopo ack jalike notting happen wen dose peopo give one a dea kids fo Molek, an da Israel peopo no kill um,
\v 5 I goin go agains whoeva make da sacrifice fo Molek, an agains dea ohana. I goin cut dem off so dey not my peopo no moa. Same ting fo erybody dat make jalike dem, cuz dey make like one wahine dat fool aroun fo money wen dey go down in front Molek, cuz dey ony suppose to go down in front me.
\p
\v 6 “I goin go agains whoeva go look fo da wahines dat talk to da mahke peopo, an da guys dat know how fo find out wat da mahke peopo spirits know. Dey make like one wahine dat fool aroun fo money wen dey go agains me an follow da odda spirits. I goin cut dem off so dey not dea peopo no moa.
\p
\v 7 “Make yoaself come good an spesho fo me, cuz I yoa God Yahweh.
\v 8 You guys, make shua fo do wat my rules tell. I Yahweh, da One dat make you guys spesho fo me.
\p
\v 9 “If anybody put kahuna on top dea fadda o mudda jalike dey no matta], dey gotta mahke. Cuz dey wen put kahuna on top dea fadda o mudda, dey da ones get da blame, an dey gotta mahke.
\v 10 If somebody fool aroun wit anodda guy's wife, wit any odda guy wife, you guys gotta kill da guy an da wahine dat wen fool aroun.
\p
\v 11 “If somebody make sex wit his fadda's wife, he no mo respeck fo his fadda. Da guy an da wahine, gotta mahke. Da two a dem, get da blame fo wat dey do.
\p
\v 12 “If somebody make sex wit dea daughter in law, da guy an da wahine gotta mahke. Wat dey wen do, az one real pilau kine ting. Da two a dem, get da blame fo wat dey wen do.
\p
\v 13 “If one guy make sex wit anodda guy jalike he make sex wit one wahine, az pilau dat. You guys gotta kill dem. Da two a dem, get da blame fo wat dey do.
\p
\v 14 “If somebody marry one wahine an her mudda too, az one real bad kine ting. You guys gotta burn da guy an da wahines in da fire fo kill um. Dat way, da kine real bad stuff no goin stay wit you guys.
\p
\v 15 “If somebody make sex wit one animal jalike az one wahine, you guys gotta kill da guy an da animal.
\p
\v 16 “If one wahine go by one animal fo make sex wit um, you guys gotta kill da wahine an da animal. Dey gotta mahke cuz dey get da blame fo wat dey wen do.
\p
\v 17 “If somebody marry his sista, no matta his fadda's girl o his mudda's girl, an dey make sex togedda, az shame fo dem. You guys gotta cut dem off in front all da peopo, so dey not dea peopo no moa. Da guy make his sista shame, so he get da blame fo dat.
\p
\v 18 “If somebody make sex wit one wahine wen she get her sick time ery month, he wen show wea da blood stay come from, an she wen show um too. You guys gotta cut dem off so dey not yoa peopo no moa.
\p
\v 19 “No make sex wit yoa mudda's sista o yoa fadda's sista, cuz dat goin show dat you no mo respeck fo one close ohana. You two guys get da blame togedda fo dat.
\p
\v 20 “If somebody sleep wit his auntie, he show dat he no mo respeck fo da uncle. Dey get da blame fo do one bad ting. Wen dey mahke, dey no goin get kids.
\p
\v 21 “If somebody marry an make sex wit his brudda's wife an da brudda still alive, az one pilau ting. He no mo respeck fo his brudda. Dey no goin get kids.
\p
\v 22 “You guys gotta make shua fo do wat all my rules tell, eryting I tell you cuz I da judge. Den no need throw out you guys from da land wea I goin bring you guys fo live.
\v 23 You guys betta not make like da odda peopos ova dea. I goin throw dem outa da land in front you guys. Cuz dey do all dis pilau kine stuff, I hate dem.
\v 24 But I wen tell you guys, ‘You guys goin take ova dea land, an you guys goin own um. Az one land dat get plenny milk an honey.’ I yoa God Yahweh. I wen make you guys diffren den all da odda peopos.
\p
\v 25 “Az why you guys gotta know an make diffren, da kine animals an birds dat you guys can eat, an da kine animals an birds dat you guys no can eat. No make yoaself pilau from eat one animal o bird, o da kine animal dat move aroun on top da groun -- da kine I tell you guys fo no eat, cuz dey make you so you guys no can come in front me.
\v 26 You guys suppose to be spesho fo me, cuz I Yahweh, an I stay good an spesho. I wen make you guys diffren den da odda peopos, fo come mines.
\p
\v 27 “Da guys o da wahines dat talk to da mahke peopo, o dat know how fo find out wat da mahke peopo spirits know, dey gotta mahke. You guys goin throw stones at dem fo kill dem. Dey get da blame fo wat dey wen do.”
\c 21
\s Da Rules Fo Da Pries Guys
\p
\v 1 Yahweh tell Moses fo tell da pries guys, Aaron's boys, dis: “Wen somebody mahke from one pries guy ohana, da pries guy no can make so he no can come in front me.
\v 2 Ony if one close ohana mahke, his mudda o fadda, his boy o his girl, his brudda, den he can make himself so he no can come in front me.
\v 3 An if one sista dat neva marry still yet, an he stay take care her cuz she no mo husban, an she mahke, he can make himself lidat fo her.
\v 4 He no can make himself so he no can come in front me, wen somebody from his wife ohana mahke. Az pilau fo him.
\p
\v 5 “Wen somebody mahke, da pries guys betta not shave part a da hair from dea head, o shave off da edge a dea beard, o cut dea bodies fo show dey stay sore inside.
\v 6 Dey gotta stay spesho ony fo me, dea God. Dey betta not make dirty my good an spesho name lidat. Cuz dey da ones make da sacrifice fo me, Yahweh, wit fire, an az jalike dey give food to me, dea God. Az why dey gotta stay spesho fo me.
\p
\v 7 “Dey no can marry wahine dat make herself pilau cuz she fool aroun fo money, o dat her husban wen throw her out, cuz da prieses stay spesho fo me, dea God.
\v 8 Tink bout da pries guys jalike dey real spesho fo me, cuz dey make sacrifice an give food to me, yoa God. Tink bout dem like spesho guys, cuz I, Yahweh, stay spesho, an I make you guys spesho.
\p
\v 9 “If one pries's girl make herself pilau cuz she fool aroun fo money, she make her fadda shame so he no can make sacrifice. Gotta burn her up fo kill her wit fire.
\p
\v 10 “Da main pries, da one dat goin get da olive oil on top his head fo show dat I wen pick him. He get da right fo wear da pries kine clotheses. He no can let his hair come mess up, o broke his clotheses, wen somebody mahke.
\v 11 Da main pries no can go inside one place wea get one mahke body. He no can let himself come so he no can go in front me, not even fo his fadda o mudda.
\v 12 He no can go way from my spesho place fo go funeral, cuz den he goin make my spesho place come pilau. He get da olive oil on top his head fo show dat I wen pick him. I Yahweh.
\p
\v 13 “Da wahine dat he marry, she gotta be da kine dat neva sleep wit one guy befo.
\v 14 He no can marry one widow, one wahine dat get divorce, o one wahine dat stay pilau cuz she wen fool aroun fo money. He ony can marry one wahine from his own pries kine ohana dat neva sleep wit one man.
\v 15 Dat way, he know his kids not pilau, cuz dey come from his peopo. I Yahweh dat make him spesho fo me.”
\p
\v 16 Yahweh tell Moses fo tell Aaron dis:
\v 17 “Fo yoa kids an dea kids dat come afta dem, no mo nobody dat get someting wrong wit dem can come nea me, dea God, fo make sacrifice fo me wit food.
\v 18 No mo nobody dat get someting wrong wit dem can come nea -- anybody dat no can see, o dat no can walk good, o dat get his face o his body mess up, no can make sacrifice fo me.
\v 19 No mo nobody dat get one feet o hand dat stay all any kine,
\v 20 o get crooked back, o one guy dat no can grow tall, o dat get someting wrong wit dea eye, o dat get da kine sore dat da pus stay run out, o dat get da privates hurt.
\v 21 No mo nobody dat come from Aaron dat get someting wrong wit dem can come nea me fo make da kine sacrifice dey make wit fire. Dey no can come nea fo give food to me, dea God.
\v 22 But any pries guys dat get someting wrong wit dea body, dey can eat da mos spesho food fo me, dea God, an da spesho food dass fo da pries guys.
\v 23 But cuz dey get someting wrong wit dem, dey no can go inside da room wit da thick curtain, an dey no can go by da altar, cuz den dey make my spesho place pilau. I Yahweh, dat make da pries guys come spesho fo me.”
\p
\v 24 So Moses tell dis to Aaron an his boys, an to all da Israel peopo.
\c 22
\s Food Dat Stay Spesho Fo God
\p
\v 1 Yahweh tell Moses fo tell Aaron an his boys
\v 2 “Take care! Goin come some times wen da pries guys no can touch da sacrifices dat da Israel peopo make spesho fo me. Cuz if dey touch um wen dey not suppose to, dey goin make dirty my good an spesho name. I Yahweh.
\p
\v 3 “Tell um dis: Fo da pries guys dat stay alive now an bumbye, if anybody from dea ohana no can come in front me, an yet dey come nea da sacrifices dat da Israel peopo make spesho fo me, Yahweh, you guys gotta cut dem off so dey no can come in front me. I Yahweh.
\p
\v 4 “If any a da pries guys dat come from Aaron get da kine sick on top dea skin dat odda guys can catch, o someting come outa dea body, dey no can eat da kine sacrifice dat stay spesho fo me, till da ting pau an den dey can come in front me. Dey no can come in front me if dey touch someting dat wen touch one mahke body, o if dey get semen come out from dem,
\v 5 o if dey touch anyting dat crawl dat make um so no can come in front me, o if dey touch anybody dat make um so no can come in front me, no matta wat make um lidat.
\v 6 Any pries guy touch dat kine stuff, dey no can come in front me till da sun go down. Dey no can eat da food from one sacrifice dat stay spesho fo me, till dey bafe wit watta.
\v 7 Afta da sun go down, an dey stay clean, den dey can come in front me, an afta dat can eat da sacrifice dat stay spesho fo me, cuz az dea food.
\v 8 Da pries guys no can eat animal dat awready mahke o dat da wild animals wen rip um up, cuz dat goin make um so he no can come in front me. I Yahweh.
\p
\v 9 “Da pries guys gotta do wat I tell um fo do, so dey no get da blame an mahke cuz dey no mo respeck fo wat I tell. I Yahweh, an I make dem spesho fo me.
\p
\v 10 “No mo nobody can eat da sacrifices dat stay spesho fo me, ony da pries guys an dea ohana can eat um. His friend dat come stay wit him his house, an da guy he pay fo work fo him, dey no can eat um.
\v 11 But if one pries guy buy one slave wit silva, o if one slave wen born inside da pries guy house, dat slave can eat his food.
\v 12 If one pries girl marry somebody dat not one pries, she no can eat any food dat stay spesho fo me.
\v 13 But if one pries girl come one widow o get divorce, an no mo kids, an her go back live inside her fadda's house, jalike wen her young, her can eat her fadda's food. But no odda guy can eat um.
\p
\v 14 “If somebody not from da pries ohana eat da food dat stay spesho fo me, an neva know stay spesho befo, dey gotta pay back da pries guy fo da sacrifice, an twenny percent moa.
\v 15 Da pries guys betta not make pilau da spesho sacrifices da Israel peopo give me, Yahweh,
\v 16 cuz dey let da odda peopo eat da food dat stay spesho fo me. Cuz den da pries guys make da odda peopo get da blame fo eat da spesho kine food, so den da odda peopo gotta make da kine sacrifice fo take away da blame. Me, Yahweh, I da one make da pries guys spesho fo me.”
\s Da Kine Sacrifices Yahweh Take An No Take
\p
\v 17 Yahweh tell Moses
\v 18 fo tell Aaron an his boys an all da Israel peopo dis: “Any Israel guy, o any guy from odda place dat live by you guys, if dey like give one animal fo make one burn up kine sacrifice fo me, Yahweh, fo one strong promise dey wen make, o cuz dey like do um,
\v 19 dey gotta give one boy kine cow dat no mo notting wrong wit um, o one boy kine sheep, o one boy kine goat. Den I goin take um an make good fo dem.
\v 20 No bring anyting dat get someting wrong wit um, cuz I no goin take um fo make good fo you guys.
\v 21 Wen anybody bring one a da cows o da sheeps fo make da kine sacrifice dat show dat dem an me, Yahweh, stay tight wit each odda, cuz a one strong promise dey wen make, o cuz dey like do um, gotta be one animal dat no mo notting wrong wit um. Den I goin take um from dem.
\v 22 No bring me one animal dat no can see, o dat get broke bone, o bad cut, o dat get sore dat get pus run out, o get rash o odda sick on top da skin. No put dese kine animals on top da altar fo one sacrifice you make wit fire fo me, Yahweh.
\v 23 Wen you give one sacrifice ony cuz you like give, you can give one boy kine cow o sheep dat no come out good, o small, but I no take dat kine sacrifice if you wen make one strong promise fo make sacrifice fo me.
\v 24 You betta not give me one animal dat get dea privates cut off o mess up. You betta not make lidat wen you reach yoa own land,
\v 25 an you guys betta not take dat kine animals from one guy from odda place, an make sacrifice fo give um to me fo food. I no goin take um fo make good fo you guys, cuz dey get someting wrong wit um.”
\p
\v 26 Yahweh tell Moses:
\v 27 “Wen one bebe cow, bebe sheep, o bebe goat born, dey gotta stay wit dea mudda fo seven days. From da day numba eight, I goin take um fo da kine sacrifice you make wit fire fo me, Yahweh.
\v 28 No kill one mudda cow o one mudda sheep da same day you kill dea bebe.
\p
\v 29 “Wen you make da kine sacrifice fo tank me, Yahweh, make um da right way so I goin take um an make good fo you.
\v 30 You gotta eat um da same day you kill um, an no leave notting till morning. I Yahweh.
\p
\v 31 “Make shua you lissen wat I tell you fo do, an do um. I Yahweh.
\v 32 No talk bad an make dirty my good an spesho name. All da Israel peopo gotta show dat dey know I good an spesho. I Yahweh, da One make you guys spesho fo me.
\v 33 I wen bring you guys outa Egypt, fo me come yoa God. I Yahweh.”
\c 23
\s Da Spesho Religious Times
\p
\v 1 Yahweh tell Moses
\v 2 fo tell da Israel peopo dis: “Dese da spesho times dat I, Yahweh, tell you guys fo make. You guys goin call all da peopo fo come togedda fo dose times dat stay spesho fo me.
\s2 Da Res Day Ery Week
\p
\v 3 “Get six days wen you guys can work. But day numba seven, az da Res Day, fo erybody res. Dass wen you guys goin come togedda fo do stuff dat spesho fo me. No matta wea you guys live, you no can work dat day. Az one Res Day you give fo me, Yahweh.
\s Da Spesho Times Afta Da Cold Time
\s2 Da Passova An Da Bread Dat No Mo Yeast
\r (Outa Egypt 12:14-20, Census 28:16-25, Rules 16:1-8)
\p
\v 4 “Dese, da odda spesho times fo come togedda fo me, Yahweh. You guys goin tell da peopo wen da times goin come dat stay spesho fo me.
\v 5 Da Passova fo Yahweh start wen da sun go down, da month numba one, day numba 14.
\v 6 Da day afta da Passova, anodda spesho time fo Yahweh start, wen erybody eat da Bread Dat No Mo Yeast. Fo seven days, all da bread you guys eat, gotta be da kine dat no mo yeast.
\v 7 Da firs day afta da Passova, tell da peopo fo come togedda fo one time dass spesho fo me, Yahweh, an no do regula kine work.
\v 8 Fo seven days, make da kine sacrifices you make wit fire fo me. Da day numba seven, come togedda fo da time dass spesho fo me, an no do regula kine work.”
\s2 Da Firs Food You Cut Ery Year
\p
\v 9 Yahweh tell Moses
\v 10 fo tell da Israel peopo dis: “Wen you guys go inside da land I goin give you, an you guys cut da food dat you grow, bring da pries guy one bunch wheat you tie up from da firs wheat you cut.
\v 11 Da day afta da Res Day, he goin lif up da wheat in front me, Yahweh, so I goin take um, az one sacrifice from you guys.
\v 12 Da same day you lift up da wheat, you gotta make one burn up kine sacrifice for me, Yahweh, wit one bebe sheep, one year ol, dat no mo notting wrong wit um.
\v 13 An you gotta make sacrifice wit wheat o barley wit four pound flour, mix wit olive oil. Az one sacrifice you make wit fire, one real nice smell dat I like. An you pour out one quart wine by da altar fo make one drink sacrifice.
\v 14 You guys no can make da bread fo eat, o roast da wheat o barley an eat um, o eat da new wheat o barley, till da day you bring da sacrifice dat go wit da wheat in front me, yoa God. You guys an yoa kids goin do how dis rule tell all da time, no matta wea you guys live.”
\s2 Da Harves Pau Time
\r (Census 28:26-31, Rules 16:9-12)
\p
\v 15 “Da day afta da Res Day wen you bring da wheat you cut an tie um up, fo make da sacrifice you lif up, from dat day, count seven weeks.
\v 16 Den count to day numba fifty, up to da day afta da Res Day numba seven. Dat day, make anodda sacrifice fo me, Yahweh. Use da new wheat you jus cut dat week.
\v 17 From wea eva you guys live, ery house an dea ohana gotta bring two breads you make from four pound fancy kine flour from da inside a da wheat. Make um wit yeast. Den give um to da pries guys fo him make da kine sacrifice you lift up fo me, Yahweh.
\v 18 Wit dis bread, you gotta give seven boy kine bebe sheep, one year ol kine, an no mo notting wrong wit um. An give one young boy kine cow, an two boy kine sheeps. Dis goin be one burn up kine sacrifice fo me, Yahweh. Wit da sacrifice from da wheat, an da sacrifice wit da wine, az one sacrifice dey make wit fire, an dey make one real nice smell fo me, Yahweh.
\v 19 Den, make sacrifice wit boy kine goat fo da kine sacrifice cuz a da bad kine stuff da peopo wen do, an two boy kine bebe sheep, da one year ol kine, fo make da kine sacrifice dat show dat you guys an me, Yahweh, stay okay.
\v 20 Da pries guy goin lif up da two boy kine bebe sheep in front me, Yahweh, wit da bread from da wheat you cut dat time. Az one sacrifice dat stay spesho fo me, Yahweh, an da food, az fo da pries guy.
\v 21 Dat same day, you goin tell da peopo fo come togedda fo one spesho religious time, an no do regula kine work. Dis goin be one spesho time you guys an yoa kids goin make from now an all da time, no matta wea you guys live.
\p
\v 22 “Wen you cut da food from yoa field inside yoa land, no cut um all da way by da edge a da land, o pick up da extra food dat da harvesta guys no pick up. Leave um dea fo da peopo dat no mo notting, an da peopo from odda place dat stay live wit you guys. I yoa God Yahweh.”
\s Da Spesho Times Fo Da Hot Time An Afta
\s2 Da Spesho New Year Time Fo Blow Da Horns
\r (Census 29:1-6)
\p
\v 23 Yahweh tell Moses
\v 24 fo tell da Israel peopo dis: “Da month numba seven, da firs day, you guys make one day wen you guys res, an make one spesho time fo come togedda so you guys no foget wat I do. Blow horns real loud fo bring erybody togedda.
\v 25 No do regula kine work, but make sacrifice wit fire fo me, Yahweh.”
\s Da Day Fo Bring Da Peopo Da Same Side Wit Yahweh
\r (Prieses 16:2-34, Census 29:7-11)
\p
\v 26 Yahweh tell Moses:
\v 27 “No foget, da month numba seven, da day numba ten, nine day afta da Blow Da Horn time, az da Day Fo Bring Da Peopo Da Same Side Wit Me, Yahweh. Erybody gotta come togedda fo one religious time dat stay spesho fo me. You guys no can eat food dat day, so you can pray an make sacrifice wit fire fo me, Yahweh.
\v 28 No do work dat day, cuz az da day fo bring da peopo da same side wit me, yoa God Yahweh.
\v 29 Anybody eat food dat day, you gotta cut dem off so dey not yoa peopo no moa.
\v 30 I goin wipe out from dea peopo anybody dat do work dat day.
\v 31 You guys no can do work notting. Dis one ting you guys gotta do now an all da time, wea eva you guys stay live.
\v 32 Az one res day fo you guys, an you guys no can eat food so you can pray. From day numba nine wen da sun go down, till da same time da nex day, az one res day fo you guys.”
\s2 Da Spesho Religious Time Fo Live Inside Shacks
\r (Census 29:12-29, Rules 16:13-17)
\p
\v 33 Yahweh tell Moses
\v 34 fo tell da Israel peopo dis: “‘Da month numba seven, da day numba fifteen, five days afta da Day Fo Bring Da Peopo Da Same Side Wit Me, Yahweh, anodda religious time dass spesho fo me, Yahweh, start, wen all you guys gotta live in shacks. You guys goin make um an live inside fo seven days.
\v 35 Da firs day, az spesho fo me, Yahweh. Da peopo gotta all come togedda an no do regula kine work.
\v 36 Fo seven days you guys gotta make sacrifices wit fire fo me, Yahweh. Day numba eight, az spesho fo me too. Erybody gotta come togedda one mo time, an make sacrifice wit fire fo me, Yahweh. Az da last time fo come togedda an stay spesho fo me, an no do work.
\p
\v 37 (“Dese da spesho religious times I Yahweh tell you guys fo make ery year. You goin tell da peopo fo come togedda fo dese times dat stay spesho fo me, an fo bring da kine sacrifices dey make wit fire. Az da burn up kine sacrifices, da sacrifices wit wheat o barley, an sacrifices wit stuff fo eat an drink, wateva dey suppose to do fo dat day.
\v 38 Dese sacrifices az some mo from da ones fo my Res Days, an mo den da presents, an wateva you make strong promise fo, an fo wateva you give me, Yahweh, jus cuz you like give um.
\p
\v 39 “So, fo da Shacks, you guys start da month numba seven, da day numba fifteen, afta you guys bring togedda da food you cut from da land. Den you guys make dis spesho religious time fo me, Yahweh, fo seven days. Day numba one, az one res day. An day numba eight, az anodda res day.
\v 40 Day numba one, you guys goin take da bestes kine fruit from da trees, an palm branches, an odda branches wit leafs, an branches from da poplar tree. Fo seven days you guys goin show dat you stay good inside in front me, yoa God Yahweh.
\v 41 Ery year, all you guys gotta make dis spesho religious time fo me, Yahweh. You an yoa kids goin make um ery year da month numba seven. Dis, az anodda ting you guys gotta do from now an all da time, wea eva you guys stay live.
\v 42 Make shacks an live inside um fo seven days. Erybody dat born from one Israel ohana, goin make shacks fo dea small ohana an live inside um.
\v 43 Dass so yoa kids an grankids no foget bumbye dat I wen tell da Israel peopo fo live inside shacks, da time I bring dem outa Egypt. I yoa God Yahweh.”
\p
\v 44 So Moses tell da Israel peopo bout da spesho religious times dat Yahweh tell um fo make.
\c 24
\s Da Olive Oil An Da Bread Fo Put In Front Yahweh
\r (Outa Egypt 27:20-21; Matthew 5:38)
\p
\v 1 Yahweh tell Moses
\v 2 fo tell da Israel peopo fo do dis: “Bring me clear kine olive oil you guys smash from da olives, fo make da light inside da Tent, so you guys can make da lights dea stay burn all da time.
\v 3 Outside da curtain dat hide da Box Fo Rememba Da Deal inside da Tent Wea Da Peopo Meet Me, Yahweh, Aaron goin take care da lamps in front me, Yahweh, from wen da sun go down till morning time, all da time, so da light no go out. Az how da pries guys goin make from now till foeva.
\v 4 Da lamps on top da pure gold lamp stand in front me, Yahweh, da pries guys gotta make shua dey stay burn all da time.
\p
\v 5 “Take da bestes kine wheat flour an bake twelve thick roun bread. Use four pound flour fo ery bread.
\v 6 Put dem in two stack, six on ery stack, on top da gold table, in front me, Yahweh.
\v 7 On da side a ery stack put some pure incense powda. Dat way, da pries guys no goin burn up da breads, dey ony goin burn up da incense powda part from da breads fo help dem rememba dat da whole sacrifice wit fire stay fo me, Yahweh.
\v 8 Ery Res Day, now an all da time, Aaron goin put dis kine bread in front me, Yahweh, fo da Israel peopo. Dass one part a da Deal dey get wit me, dat stay all da time.
\v 9 Dis, az fo Aaron an his boys. Dey goin eat um inside one place dat stay spesho fo me, cuz az someting real, real spesho fo me, dat dey get from da sacrifice dey make wit fire fo me, Yahweh.”
\s Da Guy Dat Talk Stink Bout Yahweh
\p
\v 10 Had one guy, da mudda from Israel an da fadda from Egypt. He go wea da Israel peopo stay, an him an one Israel guy start fo fight.
\v 11 Da hapa guy wen use Yahweh's name an tell Yahweh no matta to da guy he beef wit. So da guys bring da hapa guy by Moses. (His mudda's name Shelomit, Dibri's girl from da Dan ohana.)
\v 12 Da peopo wen put him wea guys can watch him, and wait till Yahweh tell dem wat he like um fo do.
\p
\v 13 Den Yahweh tell Moses:
\v 14 “Bring da guy dat wen use my name an talk stink outside da camp. Den let all da peopo dat wen hear him say dat, put dea hands on top his head fo show he da one get da blame. Den all da peopo goin throw stones at him fo kill him.
\v 15 Tell da Israel peopo: If somebody talk stink bout his God, jalike he tink I no matta, den he get da blame fo da bad ting he wen do.
\v 16 Whoeva talk stink bout my name, Yahweh, gotta mahke. All da peopo goin throw stones at dem fo kill dem. No matta dey one guy from odda place dat live wit you guys, o one Israel guy, if dey talk stink my name, you guys gotta kill dem.
\p
\v 17 “If somebody kill one guy o wahine, you guys gotta kill dem.
\v 18 If somebody kill anodda guy's animal, dey gotta pay back da owna. Dey gotta give um one animal fo da mahke animal.
\v 19 If somebody hurt anodda guy, dey gotta hurt him da same way he wen do:
\v 20 one broke bone fo anodda bone, one eye fo anodda eye, one broke teeth fo anodda teeth. Jalike he wen hurt da odda guy, az how he goin get hurt too.
\v 21 Whoeva kill one animal, dey gotta pay back da owna. But whoeva kill one guy o wahine, dey gotta mahke.
\v 22 Az how goin be fo da guys from odda place dat live wit you guys, an fo da Israel guys too. I yoa God Yahweh.”
\p
\v 23 Den Moses talk to da Israel peopo, an dey bring da guy dat wen use Yahweh name an talk stink jalike Yahweh no matta, outside da camp, an dey throw stones at um an kill um. So da Israel peopo wen do wat Yahweh tell Moses.
\c 25
\s Da Year Fo Res
\p
\v 1 Da time Moses stay up on top a Mount Sinai, Yahweh tell Moses
\v 2 fo tell da Israel peopo dis: “Wen you guys go inside da land I goin give you guys, den ery seven year, da land gotta res fo me, Yahweh.
\v 3 Fo six years you guys can plant yoa fields, an fo six years you can trim da grape plants an cut da food.
\v 4 But da year numba seven, az da Res Year, wen da land goin res fo me, Yahweh. All dat year, you no can plant seed inside yoa fields, an no can trim da grape plants.
\v 5 No go fo cut da food dat grow from da seed you wen drop da las time you cut food, o da grapes dat grow wea you no trim. Da land goin get one year fo res.
\v 6 Wateva come up dat year dat you guys no work fo plant, goin be food fo you guys, fo da guys an wahines dat work fo you guys, fo da guys you pay fo work fo you guys, an fo da peopo from odda place dat live wit you guys.
\v 7 Yoa animals, an da wild animals inside yoa land can eat um too. Wateva come up from da land, can eat um.
\s Da Spesho Year Fo Give Back
\p
\v 8 “You guys count seven Res Years--az seven times seven years--so da seven Res Years make forty-nine years.
\v 9 Den, da month numba seven, day numba ten, az da Day Fo Bring Back Da Peopo Da Same Side Wit God, az da year numba fifty. Dat time, peopo goin blow da sheep horn trumpets all ova you guys land.
\v 10 Make da year numba fifty spesho fo me! Tell all ova da land dat erybody gotta give back da land an da peopo dey wen buy to da real ownas. Az goin be da spesho Give Back Year numba fifty wen erybody goin go back fo take ova da property dey wen own befo time, an come one small ohana peopo one mo time.
\v 11 Az goin be da spesho Give Back Year, numba fifty. No go plant seed dat year, an no use da food dat grow from wat wen fall down da las time you cut food, o da grapes dat grow wea you no trim.
\v 12 Az da Give Back Year numba fifty. You guys, you gotta make dat year spesho fo me, Yahweh. You can eat da food you get from da fields.
\p
\v 13 “Da Year Fo Give Back, numba fifty, erybody goin go back dea own property.
\p
\v 14 “If you guys sell land to one Jew, o buy land from dem, no try scam each odda.
\v 15 If you guys goin buy land from one Jew, you gotta figga how much fo pay, from da numba a years dat come afta da spesho Year Fo Give Back. An da one dat sell, gotta sell you da land an figga how many years still get fo you cut food, till da nex Year Fo Give Back.
\v 16 Wen get plenny mo years fo cut food, you gotta pay mo fo um, an wen no mo plenny years, you pay um ony litto bit fo um, cuz da ony ting dey sell you fo real kine, is how plenny years you can cut da food from dat land.
\v 17 No scam each odda, but stay scared an show respeck fo me, Yahweh. I yoa God Yahweh.
\p
\v 18 “Do wat my rules tell, an make shua fo do wat I say. Den you guys goin live inside da land an no need worry.
\v 19 Den da land goin give plenny food, an you guys goin get plenny fo eat, an live good ova dea, an no need worry.
\v 20 You guys goin aks, ‘Wat us guys goin eat da year numba seven, if we no can plant seed o cut food?’
\v 21 I goin make real good fo you guys da year numba six, so da land goin grow plenny nuff food fo three years.
\v 22 Da year numba eight, wen you guys plant, you guys still yet goin eat da food you wen cut befo, an stay eat um till you cut da new food da year numba nine.
\p
\v 23 “You guys no can sell da land to somebody foeva, cuz da land az mines, an you guys stay live on top my land ony short time.
\v 24 All ova da land dat stay yoas, you guys gotta make shua dat whoeva wen sell dea land to you, can buy um back.
\p
\v 25 “If one Jew no mo notting, so he sell some a da ohana land, one guy dass da mos nea ohana to him, suppose to come fo buy back wat da odda guy wen sell, so da land still stay wit da ohana.
\v 26 But if one guy no mo ohana fo buy um back fo him, but den bumbye da guy make good, an can buy um back,
\v 27 firs he gotta figga how much da crops worth from da year wen he sell um till now. Den he goin pay back da guy dat wen buy da land fo wateva he goin grow now till da Give Back Year. So now, he can get his property back again.
\v 28 But if da guy dat own da land befo time no mo nuff fo buy um back, den da guy dat wen buy da land can keep um till da spesho Year Fo Give Back. Dat year, da guy dat wen buy um gotta give um back to da guy dat wen own um befo, so den da firs owna guy can go back to his land.
\p
\v 29 “If one guy sell one house, inside one big town dat get wall aroun um, he get da right fo buy um back one year afta he wen sell um. He can buy um back dat year.
\v 30 If he no buy um back dat same year, da house inside da big town dat get wall goin stay fo da guy dat wen buy um, an stay fo him an his ohana foeva. He no gotta give um back inside da spesho Year Fo Give Back.
\v 31 But da kine house inside one small town dat no mo wall aroun um, dey jalike da land outside da towns. Da guy dat wen sell um, o somebody from da guy ohana, can buy um back. An da guy dat buy um, gotta give um back, da spesho Year Fo Give Back.
\p
\v 32 “But inside da towns dat da Levi ohana get, da guys dat come from dat ohana get da right fo buy back any house dey wen sell.
\v 33 So da Levi ohana property, dey can buy um back. Dey can sell one house inside one a dea towns, but da spesho Year Fo Give Back, da new owna gotta give um back. Az cuz da houses inside da Levi ohana towns, az da ony property dey get inside da Israel land.
\v 34 But da fields dat da Levi ohana peopo own aroun dea towns fo da cows an sheeps eat dea, dey no can sell um. Dat stay fo dem all da time.
\p
\v 35 “If get Jews dat no mo notting, an no can work, help dem jalike you help one guy from odda place o one guy dat live nea you fo short time. Den dey can live wit you guys.
\v 36 No make um pay interes o pay back mo den wat dey wen borrow, but show respeck fo God cuz you stay scared a him. Dass how da Jews dat no mo notting can still stay live wit you guys.
\v 37 You betta not make dem pay interes fo wat dey borrow, o sell dem food fo mo den wat da food cost.
\v 38 I Yahweh, yoa God. Was me wen bring you guys outa Egypt, an give you guys da Canaan land, an fo come yoa God.
\p
\v 39 “If one a yoa peopo owe you plenny an he no mo notting, an he sell himself to you fo pay you off, no make him work jalike one slave.
\v 40 You goin make to him jalike one guy you pay fo work fo you, o jalike one guy dat live nea you fo short time. He goin work fo you, ony till da spesho Year Fo Give Back come.
\v 41 Den you goin let him an his kids go, an dey goin go back by his own ohana an da property dat his ancesta guys own from befo time.
\v 42 Da Israel peopo, dey slaves fo me, Yahweh, cuz I wen bring dem outa Egypt. Az why you guys betta not sell dem fo come slaves fo odda peopo.
\v 43 No give dem hard time, but show respeck fo me, yoa God.
\p
\v 44 “Da guys an wahines dat you guys like come slaves fo real kine, dey goin come from da odda peopos dat stay live aroun you guys. You guys can buy slaves from dem.
\v 45 You guys can buy da peopo dat live nea you fo short time too, an peopo from dea ohanas dat wen born inside yoa land. Dey can come yoa slave.
\v 46 You guys can give da slaves dat not Jews to yoa kids wen you mahke, fo come yoa kids slave. You guys can make dem slaves all da time dey stay alive. But you betta not give hard time to da Jews dat yoa slave, cuz da Israel peopo, dey yoa brudda guys.
\p
\v 47 “If one guy from odda place, o one guy dat live wit you guys fo short time, come rich, an one Jew no mo notting, so da Jew guy sell himself to da guy from odda place dat live nea you, o to da guy's ohana,
\v 48 da Jew still get da right fo somebody buy him back afta he wen sell himself. One a his ohana guys can buy him back.
\v 49 One uncle o one cousin, o odda ohana can buy him back. O if da slave guy come rich, he can buy himself back.
\v 50 Da Jew dat stay slave an da guy dat wen buy him da firs time, dey goin figga da time from da year he wen sell himself till da spesho Year Fo Give Back. Den da price fo buy him back goin be da same jalike dey goin pay one guy dat work fo dem fo da res a dat time.
\v 51 If get plenny mo years still yet till da spesho Year Fo Give Back, he gotta pay mo plenny fo buy himself back, almos da same jalike da guy pay fo buy him.
\v 52 If ony litto bit time stay till da spesho Year Fo Give Back, he goin figga dat an pay ony litto bit fo wat da guy wen pay fo him.
\v 53 Da guy from odda place dat live wit you guys, gotta make to da Jew dass his slave, jalike one guy he pay fo work fo him year afta year. You gotta make shua dat da guy dat own him now, no make mean to him.
\p
\v 54 “Even if da ohana guy o he no can buy him back, da owna gotta let him an his kids go, wen da spesho Year Fo Give Back come.
\v 55 Cuz da Israel peopo, az slaves fo me, Yahweh. Dey work fo me, an I wen bring dem outa Egypt. I Yahweh, an I da God fo you guys!”
\c 26
\s God Do Good Tings Fo Da Peopo Dat Lissen Him
\r (2 Corint 6:16)
\p
\v 1 “No make da kine no good idol kine gods fo yoaself. No put up idol statues o big kine stones dat odda peopos put up fo dem pray in front, an no put up one stone you cut fo make someting inside yoa land, fo you go down in front um. Cuz I yoa God, me, Yahweh.
\v 2 Ery day I make one Res Day, res. Show respeck fo my spesho place. I Yahweh.
\p
\v 3 “If you guys do da way I tell you gotta live, an take care fo lissen wat I tell you fo do,
\v 4 den I goin send rain da right times fo you guys, da groun goin grow food, an da trees inside da field goin give you dea kine fruits.
\v 5 You guys goin stay shake da barley an wheat from da junk kine stuffs, till time fo cut grape. An den da grape plants goin stay give grapes, till time fo plant seed again. You guys goin eat all da food you like, an you goin stay shua you no need worry inside yoa land.
\p
\v 6 “I goin make eryting come good fo you guys inside da land. Wen you guys lay down, you no need stay scared a nobody. I goin take away da wild kine animals from da land, an no mo nobody goin go thru dea making war.
\v 7 You guys goin go afta da guys dat stay agains you, an you goin kill um wit yoa swords.
\v 8 Five a you guys goin chase one hundred a dea guys, an one hundred a you guys goin chase ten tousand a dea guys. Da guys dat stay agains you, you guys goin kill um wit yoa swords.
\p
\v 9 “I goin make good to you guys. I goin give you guys plenny kids so you goin come mo plenny peopo. I goin stick wit da deal I wen make wit you guys.
\v 10 You guys wen grow so plenny food da year befo, dat you still yet eat dat food wen you guys gotta move out dat food fo make room fo da new food you guys cut.
\v 11 I goin make my house by you guys, an I no goin make to you guys jalike you no good.
\v 12 I goin live wit you guys, an come yoa God, an you guys goin come my peopo.
\v 13 I yoa God Yahweh. I wen bring you guys outa Egypt, so you guys no gotta be slaves fo da Egypt peopo no moa. I wen broke da yoke dey wen put on top you guys neck, so dat you guys can walk wit yoa head strait up an no need get shame.
\s God Punish Da Peopo Dat No Lissen Him
\p
\v 14 “But if you guys no lissen to me, an no do all da tings I tell you guys fo do,
\v 15 an if you guys no like da tings I tell you gotta do, an if you guys get mad wen I make diffren to da good peopo an da bad peopo, an so you guys broke da deal I wen make wit you guys --
\v 16 wen you guys make lidat, den fo shua I goin do dis to you guys: Right den an dea I goin make you guys come real scared. I goin give you guys da kine sick dat make you come poho, an wit fever. All dat goin make you guys eyes so you no can see, an make you guys weak, den you mahke. You guys goin plant seed fo notting, cuz da peopo dat stay agains you guys goin eat um.
\v 17 I goin go agains you guys, so dat da guys dat stay agains you guys goin win ova you guys an come yoa boss. You guys goin run away, even wen no mo nobody stay chase you.
\p
\v 18 “Afta I make all dese kine tings to you guys, an you guys still yet no like lissen me, I goin punish you guys seven times mo fo da bad kine stuff you guys still yet do.
\v 19 You guys get big head cuz you strong, but I goin bus up you guys an show dat you not strong. I goin take away da rain from da sky ova you guys jalike dat az iron, an I goin make da groun unda you guys hard jalike az bronze metal.
\v 20 You guys goin work hard fo notting, cuz yoa land no goin grow notting, an da trees on top yoa land no goin give fruits.
\p
\v 21 “If you guys still yet goin stay agains me, an no like lissen me, I goin make mo trouble fo you guys, seven times mo worse, cuz a all da bad kine stuff you guys do.
\v 22 I goin send wild kine animals agains you guys. Dey goin kill yoa kids, an wipe out yoa cows. Dey goin make you guys come ony litto bit peopo, den no mo nobody goin go walk on top da roads inside yoa land.
\p
\v 23 “But if still yet, you guys no lissen wen I punish you, an stay nuha wit me,
\v 24 den fo shua I da one goin stay nuha wit you guys. I goin punish you guys seven times mo cuz a da bad kine stuff you guys do.
\v 25 An I goin bring army guys wit swords agains you guys. Dass how I goin pay back you guys, cuz you guys wen broke da deal I wen make wit you guys. Wen you guys go back inside yoa big towns, I goin send bad kine sick on top you guys. An da guys dat stay agains you guys goin take ova.
\v 26 Wen I take away da food from you guys, ony goin get one oven fo ten wahines bake litto bit bread fo dea ohana. Dey goin bring back da bread fo you guys an weigh um so erybody get same. You guys goin eat, but you no goin get nuff.
\p
\v 27 “An if you guys still yet no lissen me, but stay nuha wit me,
\v 28 den I goin get real mad wit you guys. I goin punish you guys cuz a da bad kine stuff you guys stay do, seven times mo worsa.
\v 29 You guys goin eat yoa own boys an yoa own girls.
\v 30 I goin broke down yoa sacrifice places fo da idol kine gods on top da hills, an cut down da altars you guys make fo burn incense dea. I goin put big stack a yoa mahke bodies on top da wood blocks dat you call yoa idol kine gods, dat no stay alive. An I goin hate you guys.
\v 31 I goin make yoa big towns come all bus up, an wipe out da places you make spesho fo yoa gods. I no goin feel good inside notting from da nice smell you guys make wit yoa sacrifices.
\v 32 I goin bus up yoa land, so dat da guys dat stay agains you guys no goin feel good wen dey go dea fo take ova.
\v 33 I goin make you guys go all ova da place wea all kine peopos stay. I goin take out my sword an go afta you guys. You guys land goin come good fo notting, an yoa big towns, all bus up.
\v 34 Den da land goin stay good, cuz goin res jalike inside da Res Years. Goin res all da time stay good fo notting, all da time you guys stay inside da land a da guys dat stay agains you guys. Dass da time da land goin res, an goin stay good inside cuz now get da Res Years.
\v 35 All da time da land stay good fo notting, da land stay res. Wen you guys wen stay dea, da land neva res.
\p
\v 36 “An fo all you peopo dat still yet stay alive dea, you guys goin stay inside da lands a da peopo dat stay agains you guys, an I goin make you guys stay scared ova dea. Wen da wind blow one leaf, an you guys hear um, goin make you guys so scared, you goin run away. You goin run jalike somebody chasing you wit one sword, an you goin fall down, even nobody stay chase you.
\v 37 You goin fall down on top each odda, jalike you running away from guys wit swords, no matta nobody stay chase afta you. An you guys no get da powa fo even stand up in front da guys dat stay agains you guys.
\v 38 You guys goin mahke inside da lands a da diffren peopos wea you stay. Da peopo dat stay agains you guys, jalike dea land goin eat you guys up.
\v 39 You peopo dat still yet stay alive, I goin punish you an make you come sick an weak inside da lands a da guys dat stay agains you guys. Cuz a da bad kine stuff you guys an yoa ancesta guys wen do, az why you guys goin come lidat!
\p
\v 40 “But if dey tell dat was wrong, all da bad kine stuff dem an dea ancesta guys wen do, an if dey tell az was wrong fo broke my rules an no stay tight wit me, an if dey tell az wrong fo dem stay nuha wit me,
\v 41 an fo me, fo shua all dat wen make me stay nuha wit dem too. Az why I wen send dem inside da land a da peopo dat stay agains dem. Dey neva like lissen me. But wen dey start fo tink dey notting, an dey can tell az okay fo me punish dem cuz a da bad kine stuff dey wen do,
\v 42 den I no goin foget da deal I wen make wit dea ancesta guys Jacob, an Isaac, an Abraham, an I no goin foget da promise I wen make bout da land.
\v 43 No mo nobody goin stay dea on da land, cuz dey all go way from dea. Now, jalike da land goin feel good inside, cuz get da Res Years he suppose to get. Dey goin tell, az okay fo me punish dem cuz a da bad kine stuff dey wen do, cuz dey no like wen I make diffren kine to da good peopo an da bad peopo, an cuz dey no like wen I tell um wat dey suppose to do.
\v 44 But no matta all dat. Wen dey stay inside da land a da peopo dat stay agains dem, I no goin make like dey no good, fo wipe um out all da way. I no goin broke da deal I wen make wit dem. Cuz I Yahweh dea God.
\v 45 Cuz a dem I no goin foget da deal I wen make befo time wit dea ancesta guys. I wen bring dem outa Egypt fo be dea God, in front all da diffren peopos. I Yahweh.”
\p
\v 46 Dis da rules, an how fo make to da good peopo an da bad peopo, an how fo teach, dat Yahweh tell Moses on top Mount Sinai, fo tell da Israel peopo.
\c 27
\s Buying Back Yahweh's Stuff
\p
\v 1 Yahweh tell Moses
\v 2 fo tell da Israel peopo dis: “If somebody make one spesho strong promise to me, Yahweh, fo give somebody to me, den you, Moses, you gotta figga da right pound silva fo dem pay da pries guys so dey no gotta come one slave, cuz ony da Levi ohana guys can work fo me.
\v 3 You figga fifty piece silva, da way da pries guys weigh silva, fo pay fo one guy twenty to sixty years ol.
\v 4 But if az one wahine twenty to sixty years ol, you ony pay thirty piece silva, da way da pries guys weigh silva.
\v 5 If az one guy five to twenty years ol, pay twenty piece silva. If az one girl five to twenty years old, you ony pay ten piece silva.
\v 6 If one bebe boy ony one month to five years ol, you ony pay five piece silva. If one girl ony one month to five years ol, pay three piece silva.
\v 7 If az one guy sixty years ol o moa, pay ony fifteen piece silva. But if one wahine, pay ony ten piece silva.
\v 8 If anybody dat stay make one strong promise, but dey ony get litto bit fo pay, den dey goin bring da one dey wen promise fo give to God in front da pries guy. Da pries guy goin figga how plenny da guy gotta pay, from wat he get fo pay.
\p
\v 9 “If somebody make one strong promise fo give one animal, an az da right kine fo one sacrifice, dat animal come spesho fo me, Yahweh.
\v 10 Da guy no can change um o give one good animal fo one bad animal, o one bad animal fo one good animal. If he make lidat, da animal he say he goin give, an da odda one he give fo um, dey goin come spesho fo me, Yahweh.
\v 11 If somebody make one strong promise fo give one animal, da kine dey no can use fo make sacrifice, cuz me, Yahweh, I no take dat kine animal, dey gotta give da animal to da pries guy.
\v 12 Da pries goin tell if da animal stay good o no good. Wateva da pries guy figga fo um, dass wat da guy gotta pay.
\v 13 If da guy goin like buy back da animal, he gotta pay twenty percent mo fo buy um back.
\p
\v 14 “If somebody make dea house spesho fo me, Yahweh, da pries guy goin tell if da house good o bad. Wateva da pries guys tell da house stay worth, den az how much dat goin be.
\v 15 If somebody make dea house spesho fo me, Yahweh, an den like buy um back, dey gotta pay twenty percent mo. Den da house goin come his again.
\p
\v 16 “If somebody like make some a da ohana land dat he own, spesho fo me, Yahweh, dey gotta figga how much bag seed dey need fo plant dea, fifty silva piece fo one piece land dat need two gunny bag barley seed fo plant.
\v 17 If dey make dea land spesho fo me, Yahweh, inside da spesho Year Fo Give Back numba fifty, dey still gotta pay da fifty piece silva.
\v 18 But if dey make dea land spesho fo me, Yahweh, afta da spesho Year Fo Give Back come, da pries guy goin figga how plenny dey suppose to pay fo buy back da land, from how plenny years still stay till da nex spesho Year Fo Give Back come, so dey no need pay so plenny silva fo get um back.
\v 19 If da guy wen make da land spesho fo me, Yahweh, an like buy um back again, he gotta pay twenty percent moa, an da land come his property again.
\v 20 But if da one dat make his land spesho fo me an no like buy um back, o if he wen sell um to anodda guy, den he no can buy um back eva.
\v 21 An wen time fo da land go back to da owna inside da spesho Year Fo Give Back numba fifty, from dat time, da field goin be fo me, Yahweh. Den no mo nobody can buy um, eva. Da pries guys goin own um.
\p
\v 22 “If somebody make one field he wen buy spesho fo me, Yahweh, an da field az not part a his ohana land,
\v 23 da pries guy goin figga how plenny da owna gotta pay fo buy back da land till da spesho Year Fo Give Back, an da guy gotta pay wateva da land cost dat same day, cuz az spesho fo me, Yahweh.
\v 24 Wen da spesho Year Fo Give Back come, da land no goin go back fo da guy dat wen buy da land and make um spesho fo me. Goin go back fo da guy dat wen own um befo, cuz az his ohana land, but he wen sell um.
\v 25 Dey goin figga how plenny gotta pay fo buy back da land, da way da pries guys weigh da silva. (Twenny gerah, az one piece silva.)
\p
\v 26 “If get one firs animal fo born from da mudda, no mo nobody can make um spesho fo me, Yahweh. Az cuz da firs animal born, awready stay spesho fo me, no matta az one cow o one sheep. Az awready fo me, Yahweh.
\v 27 But if da animal dat born firs, da kine dey no can use fo make sacrifice, da guy can buy um back fo wat da pries guy figga, an pay twenty percent mo fo um. If da guy no like buy um back, da pries guys can sell um fo wat dat kine animal cost.
\p
\v 28 “But wateva somebody own dat stay foeva ony fo me, Yahweh, no matta az one guy, o one animal, o da ohana land, no can sell um o buy um back. Da whole ting stay foeva ony fo me, Yahweh.
\p
\v 29 “No mo nobody can buy back somebody dat stay foeva ony fo me, Yahweh. Gotta kill um.
\p
\v 30 “Ten percent from eryting dat grow up from da land, no matta da wheat o barley from da dirt o da fruits from da trees, az fo me, Yahweh. All dat stay stay spesho fo me.
\v 31 If somebody like buy back some a da ten percent a da wheat o barley o fruits he wen give me, dey gotta pay da pries guys twenty percent mo den wat goin cost him fo um.
\v 32 From ery ten animals from da cows an sheeps an goats, wen da farma guy count um, da numba ten one he count stay spesho fo me, Yahweh.
\v 33 He he no can pick out da good one from da bad one, an no can change one animal fo anodda animal. If he change one fo da odda, den da two animals goin come spesho fo me, Yahweh, an nobody can buy um back.”
\p
\v 34 Dese all da rules Yahweh wen tell Moses on top Mount Sinai, fo him tell da Israel peopo.