\id deu 
\mt Da Rules Secon Time
\h Rules Secon Time
\c 1
\s God Tell Da Peopo Fo Go Way From Mount Sinai
\r (Jesus Guys 13:18)
\m
\v 1 Dis, wat Moses wen tell da Israel peopo. Dat time, dey all wen stay inside da boonies on da east side da Jordan Riva, inside da Jordan Valley. Dass across Suf, wit Paran on one side an Tofel, Laban, Hazerot, an Dizahab on da odda side.
\v 2 You know, fo go Mount Sinai to Kadesh Barnea, take eleven days, even if you go da long way on da Mount Se`ir road.
\p
\v 3 But dat time, was 40 year afta da Israel peopo come outa Egypt, an was winta time, wen Moses tell da Israel peopo eryting Yahweh tell him he suppose to tell dem.
\v 4 Moses tell um dis afta dey wen win ova Sihon, da king fo da Amor peopo dat stay inside Heshbon, an afta dey win ova Og, da king fo da Bashan peopo dat stay inside Ashtarot an Edrei.
\p
\v 5 From da east side a da Jordan Riva inside Moab, Moses start fo make God's rules mo easy fo da peopo undastand. He tell:
\v 6 “Wen us guys stay Mount Sinai side, oua God Yahweh wen tell us, ‘You guys stay ova hea by dis mountain long time awready.
\v 7 Take all yoa stuffs an go up inside da hills wea da Amor peopo stay. Den go wea da peopo dat live nea dem stay, inside da Jordan Valley, an da small hills on da west side, an da Negev boonies sout side, an da Mediterranean Sea coast. Go wea da Canaan peopo stay, den go nort side to da Lebanon mountains, den go east side all da way to da big Eufrates Riva.
\v 8 Yahweh tell, “Look, I give you guys all dis land awready. Go inside dea an use da land, cuz I wen make one strong promise to yoa ancesta guys Abraham, Isaac, an Jacob, an to dea kids an grankids an you guys.”
\s Dey Pick Leada Guys Fo Da Twelve Ohana
\p
\v 9 “Befo us guys leave Mount Sinai, I Moses wen tell you guys, az too hard fo me stay in charge all you guys by myself.
\v 10 Yoa God Yahweh wen make you guys come plenny peopo awready. Az why today you guys stay plenny jalike da stars inside da sky.
\v 11 I like Yahweh, da God fo yoa ancestas, make you guys come one tousand times mo plenny, an do plenny good kine stuff fo you guys, jalike he wen make promise fo do befo time.
\v 12 But I no can take care all you guys problems all by myself, an wit all da stuff you guys worry bout, an da stuff you guys squawk bout, wit nobody fo help me.
\v 13 So you guys pick some guys dat you know dey know wat fo do erytime, an dat undastan plenny stuff, an peopo get plenny respeck fo dem. Pick some fo ery one a da twelve ohanas. Den I goin make dem yoa leadas.
\p
\v 14 “So you guys tell me, ‘Az good, do wat you tell.’
\v 15 “Den I take da leada guys from yoa ohanas, guys dat know wat fo do erytime an you guys get respeck fo dem. I make dem stay in charge a you guys. Some a dem stay in charge a one tousand peopo, some in charge a one hundred peopo, some in charge a fifty, an some in charge a ten. Dey da main guys fo all da twelve ohanas.
\v 16 Dat time, I wen tell yoa judge guys wat dey gotta do: Dey gotta lissen good wat da peopo say wen dey make argue wit each odda, an do wass right fo dem, no matta dey make argue wit anodda Israel guy, o wit somebody dass not one Israel guy.
\v 17 No make to one guy mo betta den to anodda guy. Lissen, no matta if he one importan guy o one guy dass not importan. No scared dem, cuz God da one goin help you figga wass right, an you stay do um fo him. If you donno wat fo do, den bring dem by me Moses, an I goin lissen.
\v 18 Mount Sinai time, I wen tell you guys eryting you guys gotta do.
\s Dey Send Guys Fo Look Da Land
\p
\v 19 “Den, jalike wat oua God Yahweh wen tell us, we go from Mount Sinai to da hills inside da Amor peopo's land. We go thru da big an scary boonies dat you guys wen see. Den we reach Kadesh Barnea.
\v 20 So I tell you guys, ‘All us guys stay come by da hills inside da Amor peopo's land. Dis, da land oua God Yahweh start fo give us.
\v 21 Look! Right dea, dass da land dat oua God Yahweh stay give you guys awready! Go take um ova, jalike Yahweh, da God oua ancesta guys wen pray to, wen tell you guys. No scared. No lose fight.’
\p
\v 22 Den all you guys come by me an tell, ‘Send some guys dea firs fo look da land, an den come back an tell us da way we goin go up, an da towns we goin go inside.’
\p
\v 23 “Dat wen sound good to me, so I pick twelve guys fo go, one guy from ery big ohana.
\v 24 Da guys wen go up country, all da way to da Eshkol Gulch, an check um out wat stay ova dea.
\v 25 Dey take some a da stuff dat grow ova dea, an bring um back by us. Dey tell us, ‘Az good, da land dat oua God Yahweh start fo give us.’
\s Da Peopo Go Agains Yahweh
\p
\v 26 “But you guys, you neva like go dea. You guys go agains wat yoa God Yahweh tell you guys fo do.
\v 27 You guys sit inside yoa tents an grumble. You guys tell, “Az cuz Yahweh hate us! He wen take us outa Egypt fo turn us ova to da Amor peopo, so dey can wipe us out!
\v 28 Wea we goin go, aah?! Oua bruddas dat wen go look da land make us lose fight. Dey tell, ‘Da peopo mo big an mo tall den us. Dea towns stay big. Dey get big wall dat go up inside da sky. We even see giant guys ova dea -- da ones dat come from Anak!’-”
\p
\v 29 “Den I tell you guys, ‘No need shake and stay scared a dem!
\v 30 Oua God Yahweh, he da One goin go in front you guys. He da One goin fight fo you guys, jalike he wen fight fo you guys inside Egypt. You guys wen see dat awready.
\v 31 An inside da boonies, you guys wen see yoa God Yahweh take care you guys, like one fadda carry his boy inside his arms. He bring you guys all da way to dis place.
\p
\v 32 “No matta oua God Yahweh do all dat, still yet you guys no trus him.
\v 33 Yahweh wen go in front you guys inside one fire nite time, an inside one cloud day time. He even find place wea you guys can make camp nite time! Az how he show you guys wea fo go.
\p
\v 34 “But Yahweh hear wat you guys tell, an he come huhu, an he make one strong promise.
\v 35 He tell, ‘No mo nobody from dis bad peopo dat stay alive now, goin see da good land I wen promise fo give yoa ancestas.
\v 36 Ony Caleb, Jefunneh's boy, he stay tight wit me, Yahweh, all da way. Cuz a dat, he goin go inside dat land. An I goin give him an his kids, da ones dat come from him, da land wea he wen walk on top.’
\p
\v 37 Cuz a you guys, Yahweh come huhu wit me, Moses, too. He tell me, “Not even you goin go inside da land.
\v 38 But yoa helpa guy, Joshua, Nun boy, he goin go inside dea. Talk to him, give him good kine words, cuz he goin lead da Israel peopo fo take ova da land I goin give dem.”
\v 39 An Yahweh tell da peopo, “You guys even tell dat odda guys goin make yoa litto kids prisonas, no matta dose kids still yet donno wass good an wass bad. But dose kids goin go inside da land. I goin give um to dem, an dey goin own um.
\v 40 But you guys, turn aroun an go back inside da boonies on top da road fo go by da Red Sea.’
\p
\v 41 “Den you guys tell me, ‘Fo shua, us guys wen do someting bad agains Yahweh! Now we goin go up fight, jalike oua God Yahweh tell us fo do!’ So all you guys wen take yoa stuffs fo fight, an tink az not hard fo go up dea inside da hills.
\p
\v 42 “But Yahweh tell me, ‘Tell dem, no go up dea fight, cuz I no goin go wit dem. Da guys dat stay agains dem goin win ova dem.’
\p
\v 43 “So I wen tell you guys, but you guys no like lissen. You guys go agains wat Yahweh tell you. You guys get big head an you go up inside da hills.
\v 44 But da Amor peopo dat live inside dose hills wen come out fight you guys, an dey make you guys run away, jalike dey plenny bees. Dey bus up you guys all da way from da Se`ir Range to Hormah town.
\v 45 Den you guys come back cry in front Yahweh. But he no lissen wen you guys cry, he ony make deaf ear to you guys.
\v 46 Az why you guys stay dea Kadesh town long time.
\c 2
\s Da Israel Peopo Go All Ova Inside Da Boonies
\p
\v 1 “Den we turn aroun an go back inside da boonies on top da road fo go by da Red Sea, jalike Yahweh wen tell me. Long time we stay go dis side an dat side aroun da Se`ir Range.
\v 2 Den Yahweh tell me,
\v 3 “You guys stay go aroun dis mountain range long time awready. Now, you go turn aroun an go nort side.
\v 4 Tell da peopo wat dey gotta do: ‘You guys, almos you goin go pass da land wea yoa brudda guys stay, da peopo dat get Esau fo dea ancesta. Dey live inside da Se`ir Range. Dey goin come scared a you guys. So take care plenny so notting happen.
\v 5 No make like you tink you goin make war wit dem. Cuz I no goin give you guys dea land, notting. You guys no goin even get nuff land dea fo put yoa feets on top um. Cuz I awready wen give da Esau ohana da Se`ir Range.
\v 6 Us guys goin buy da food us guys eat and da watta us guys drink, an pay dem wit silva.’-”
\p
\v 7 An Moses tell, “Cuz oua God Yahweh wen do plenny good stuff fo us guys, an make eryting us guys make, come out good. He wen take care us guys inside da big boonies. He wen stay wit us guys fo all dis forty years, an neva need notting eva.”
\p
\v 8 “So us guys go pass our bruddas, da Esau ohana peopo, dat live inside da Se`ir Range. We turn from da Arabah road dat come up da Arabah Valley from Elat an Ezion Geber,
an go by da Moab road inside da boonies.
\p
\v 9 “Den Yahweh tell me, ‘No bodda da Moab peopo an make hard time an make dem like make war wit you guys. Cuz I no goin give you guys notting from dea land. I awready give dea main town Ar to da Moab peopo dat get Lot fo dea ancesta.’
\p
\v 10 “(Da Em peopo live ova dea befo time too. Dey strong an dey plenny peopo, an dey tall jalike da Anak giants.
\v 11 Some peopo call dem da Refa peopo, jalike da Anak peopo, but da Moab peopo call dem da Em peopo.
\v 12 Da Hor peopo live inside da Se`ir Range befo time too, but da Esau ohana peopo get dem outa dea. Dey wipe out da Hor peopo an take ova dea land, jalike us Israel peopo goin make da Canaan peopos get outa inside da land Yahweh give us fo come oua property.)
\p
\v 13 Moses tell da peopo: “Den Yahweh tell me, ‘Now, go da odda side da Zered Stream.’ So we go da odda side, to da Moab land.
\p
\v 14 Az was thirty-eight years afta we go way from Kadesh Barnea da firs time, dat we go da odda side da Zered Stream. Dat time, all da fighta guys dat wen stay alive befo, awready mahke, jalike Yahweh wen make strong promise fo do to dem.
\v 15 Yahweh wen stay agains dose guys, till he wipe dem out from da peopo all da way.
\p
\v 16 “Afta all dose guys dat can fight mahke,
\v 17 Yahweh tell me,
\v 18 ‘Today you guys goin pass Moab, an leave dea land nea Ar town.
\v 19 You guys go pass da land wea da Ammon peopo stay. No bodda dem an no make dem like fight you guys. Cuz I no goin give you guys da Ammon peopo's land, notting. I awready give dat land to dem, cuz dey da Lot ohana peopo.’
\p
\v 20 (Some peopo tink dat land was fo da Refa peopo too, cuz dey wen live dea befo time, but da Ammon peopo call dem da Zamzum peopo.
\v 21 Dey was strong peopo, an get plenny a dem. Dey tall jalike da Anak giants. Yahweh wen let da Ammon peopo wipe out da Refa peopo, an take ova dea land. Den da Ammon peopo live inside dat land, an not da Refa peopo.
\v 22 Yahweh do da same ting fo da Esau ohana peopo, dat stay live inside da Se`ir Range, cuz he wen wipe out da Hor peopo dat stay dea befo da Esau peopo. Da Esau ohana take ova dea land an stay live dea till now.
\v 23 An da Av peopo dat live inside da small towns all da way by Gaza, da Filisha peopo dat come dea from Crete Island wen wipe dem out, an stay live dat land now.)
\s Da Israel Peopo Win Ova Sihon, Da King Fo Heshbon
\p
\v 24 “Yahweh tell, ‘Go da odda side da Arnon Stream now. Look, I give you guys da powa fo fight Sihon awready, da king fo Heshbon town wea da Amor peopo stay, an take ova his land. Start now fo take ova da land an fight King Sihon dem.
\v 25 From today, I goin make all da diffren peopos unda da sky come real scared a you guys. Dey goin hear bout you guys an come scared an shake, an worry plenny cuz a you guys.’
\p
\v 26 Moses tell: “From da boonies Kedemot side, I wen send some messenja guys fo tell dem fo go by Sihon, da king inside Heshbon, dat us guys like make good wit him. I tell,
\v 27 ‘Please, let us guys go pass thru yoa land. We goin stay on top da main road. We no goin go da right side o da left side.
\v 28 Us guys like buy food an watta fo eat an drink, an us guys goin pay wit silva. Ony let us walk thru dea.
\v 29 Da Esau ohana peopo dat live inside da Se`ir Range, an da Moab peopo dat live Ar town, dey wen let us guys pass thru dea land and buy food. So us guys like fo you do dat too, till we go da odda side da Jordan Riva an go inside da land oua God Yahweh start fo give us.’
\v 30 But Sihon, da king fo Heshbon town, no like let us go thru dea. Az cuz oua God Yahweh wen make him hard head, fo give you guys da powa fo take him. An now, God wen let you guys win.
\p
\v 31 “Den Yahweh tell me, ‘Look, I start awready fo give you Sihon an his land. Now you guys can start fo make his land yoa property.’
\p
\v 32 “Den Sihon an all his army guys wen come outside da town fo fight us guys Jahaz side,
\v 33 But oua God Yahweh give him to us an we bus um up, him an his boys, an all his army guys.
\v 34 Dat time, we take ova all his towns an wipe um all out jalike we stay make one big sacrifice fo God: guys, wahines, an kids. We no let nobody stay alive.
\v 35 But all dea stuffs an da animals from da towns, we wen take um away fo ourself.
\v 36 From Aroer town wea can look down inside da Arnon Canyon, an da odda town inside da canyon, all da way nort side to Gilead, no even get one town dat get big wall dat stay too big fo us guys. Oua God Yahweh give us all dem.
\v 37 But jalike oua God Yahweh tell us guys fo do, we neva bodda da Ammon peopo, o da land by da Jabbok Riva, o da towns inside da hills.
\c 3
\s Da Israel Peopo Win Ova Og, Da King Fo Bashan
\p
\v 1 Afta dat we turn go nort side by da road dat go Bashan. Og, da king fo da Bashan peopo an all his army guys come out fo fight us by Edrei.
\v 2 Yahweh tell me, “No come scared King Og, cuz I goin give you guys da powa fo take all his army guys an his land. Make jalike you guys wen make to Sihon, da king fo da Amor peopo, dat was king Heshbon town.”
\p
\v 3 So, oua God Yahweh wen give us powa ova Og, da king fo da Bashan peopo, an all his army guys too. We wipe dem all out. No mo nobody stay alive dea.
\v 4 Dat time, we take ova all his big towns. From da sixty towns Argob side, all ova wea Og stay king inside Bashan, neva have one town dat us guy no take ova.
\v 5 All dose big towns get tall walls dat nobody can broke down, an gates wit bars on top um. An get plenny odda town dat no mo wall too.
\v 6 We wipe um all out, jalike we stay make one big sacrifice fo God. We do same ting fo Sihon, da king inside Heshbon: we wipe out guys, wahines, an kids.
\v 7 But all dea animals an stuffs we take um away fo ourself.
\p
\v 8 Dat time, we take ova da land from da two Amor kings -- da land da east side da Jordan Riva from da Arnon Canyon to Mount Hermon.
\v 9 (Da Sidon peopo call Hermon ‘Sirion’, an da Amor peopo call um ‘Senir’.)
\v 10 We take all da towns up country an all Gilead, an all Bashan to Salekah, an Edrei, da towns wea Og wen stay king inside da Bashan land.
\v 11 (Ony Og, da king fo Bashan, stay dea from da odda Refa peopo, wen he mahke. Og get one iron pune`e thirteen feet long an six feet wide. Dat pune`e still yet stay dea inside Rabbah town wea da Ammon peopo live.)
\s Dey Split Up Da Land
\p
\v 12 From da land we take ova dat time, I give da Reuben an da Gad ohanas da land on da nort side Aroer by da Arnon Canyon, an half da up country an da towns inside Gilead.
\v 13 Da odda land inside Gilead an all da land inside Bashan, wea Og was king befo time, I give um to half da Manasseh ohana. (You know, all da Argob land inside Bashan, befo time da peopo call um da Refa peopo's land.
\v 14 Ja`ir from da Manasseh ohana take da land inside Argob, all da way to wea da Geshur peopo an da Ma`acah peopo stay. Today da peopo still yet call Bashan ‘Ja`ir Towns’.)
\v 15 An I give Gilead to da peopo dat come from Makir, Manasseh boy.
\v 16 But I give da land from Gilead to da Arnon Canyon to da Reuben an Gad ohanas, from da middo a da Arnon Canyon to da Jabbok Riva, wea da Ammon peopo stay.
\v 17 On da west side get da Jordan Riva inside da Arabah Valley, from da Kinneret Lake to da big lake inside da Arabah Valley (az da Big Salt Lake), unda Mount Pisgah, da eas side.
\p
\v 18 Dat time, I wen tell you Reuben, Gad, an Manasseh guys dat goin stay east a da Jordan Riva, wat you gotta do: ‘Yoa God Yahweh wen give you guys da land dis side fo come yoa property. So all yoa guys dat can fight, gotta take dea bows an arrows an swords, an go da odda side da Jordan Riva in front da odda Israel peopo fo help fight dem firs.
\v 19 But yoa wifes, yoa kids, an all da animals you get, can stay inside da towns I wen give you guys ova hea. (I know you guys get plenny animals.)
\v 20 Afta yoa brudda guys pau fight, an dey take ova da land dat yoa God Yahweh stay give dem da odda side da Jordan Riva too, Yahweh goin let dem res. Den all you guys can come back da land I wen awready give you guys ova hea.’
\s Moses No Can Go Da Odda Side Da Jordan Riva
\p
\v 21 “Dat time, I tell Joshua wat he gotta do: ‘You awready wen see wit yoa own eyes wat you guys God Yahweh wen do to dose two kings. Yahweh goin do da same ting to all da places dat get king ova da odda side wea you guys going.
\v 22 You guys no need stay scared a dem. Cuz you guys God Yahweh, he da One goin fight fo you guys.’
\p
\v 23 “Dat time I aks Yahweh plenny times fo please help me. I tell um:
\v 24 ‘Yahweh, you da Boss, an I yoa worka guy. You wen start fo show me how big an how strong you stay. No mo odda god inside da sky o on top da earth dat can do stuff jalike da awesome kine tings you do.
\v 25 Please let me go da odda side da Jordan Riva fo see da good land ova dea, up country an Lebanon side.’
\p
\v 26 “But cuz a you guys, Yahweh come real huhu wit me, an no like lissen me. Yahweh tell, ‘Az nuff awready! No talk to me no mo bout dat!
\v 27 Go up da top Mount Pisgah. Look da land on da wes side, da nort side, da sout side, an da eas side wit yoa own eyes. Cuz you no goin go da odda side da Jordan Riva.
\v 28 But put Joshua in charge. Give him good kine words, an make him mo strong an solid, cuz he da one goin go da odda side da Jordan Riva wit all dese peopo follow him. An he da one goin help dem take ova da land you goin see.’
\v 29 So us guys stay inside da valley nea Bet-Peor.
\c 4
\s Da Israel Peopo Gotta Lissen!
\r (Hebrews 12:29; Mark 12:32-33)
\p
\v 1 Moses tell: “Lissen, you Israel peopo, wat Yahweh tell you guys dat you suppose to do, an da rules he give you. Me, Moses, I goin teach you guys fo do all dat. So lissen, so you guys can stay alive an go inside da land. You guys goin take ova da land dat Yahweh, da God fo oua ancesta guys, stay give you guys.
\v 2 No put notting mo to wat I tell you guys fo do, an no take away notting from um. But jus make shua you do wat oua God Yahweh tell you guys fo do, jalike I stay tell you guys fo do now.
\p
\v 3 “You guys see wit yoa own eyes wat Yahweh wen do, da time us guys stay Ba`al-Peor side. Yoa God Yahweh wen wipe out from you guys all da peopo dat wen stay tight wit da idol kine god Ba`al, ova dea Mount Peor side.
\v 4 But all you guys dat stay tight wit yoa God Yahweh, you still stay alive yet.
\p
\v 5 “Look! I wen teach you guys wat my God Yahweh tell you gotta do, an his rules, jalike he wen tell me fo teach you guys, so you can stay tight wit um inside da land wea you guys going fo take ova.
\v 6 Take care fo do eryting I tell, cuz dat goin show da odda peopos dat you guys know wat fo do erytime, an you undastan plenny stuff. Dey goin hear all dis stuff dat Yahweh tell you guys you gotta do, an dey goin tell, ‘Fo shua dis az one importan peopo -- dey know wat fo do erytime, an dey undastan plenny stuff!’
\p
\v 7 Den Moses tell: “Az right! Cuz no mo odda peopo dat stay mo importan dat get dea gods nea dem, jalike oua God Yahweh stay nea us guys weneva we pray to him.
\v 8 No mo odda peopo stay mo importan, dat wat dea God tell um fo do, stay good an right, jalike dese rules dat I stay teach you guys today!
\p
\v 9 “Ony watch out dat you guys no foget da stuff you guys wen see Yahweh do! No foget bout um all da time you guys stay alive. Teach yoa kids all dis too, dem an dea kids afta dem.
\v 10 Rememba da time you guys wen stand in front oua God Yahweh Mount Sinai side, wen he tell me, ‘Bring hea all da peopo togedda in front me fo me tell um wat I like tell dem. Dat way, dey goin learn fo get awesome respeck fo me, all da time dey stay alive inside da land. An I like dey teach wat I tell dem to da kids too.’
\v 11 You guys wen come nea an stand down side a da mountain, an all dat time da mountain stay burning wit fire an go all da way up to da sky. Get black clouds an stay real dark.
\v 12 Den Yahweh talk to you guys from inside da fire. You guys can hear wat he say, but you guys no see nobody, cuz you guys ony hear one voice.
\v 13 Yahweh tell you guys wat you gotta do cuz a da deal he stay making wit you guys, da Ten Commandments. Den he write um on top two flat stone.
\v 14 Dat time, Yahweh tell me I gotta teach you guys wat you gotta do, an his rules. He like you guys stick wit wat he tell, all da time you guys stay inside da land wea you stay go da odda side da Jordan Riva, so you guys can take ova dat land.
\s No Pray To Da Idol Kine Gods!
\p
\v 15 “You guys neva see wat Yahweh look like, dat time he talk to you guys from inside da fire Mount Sinai side. Az why you guys gotta watch out,
\v 16 dat you no make fo you guys, idol kine god dat look like one guy o one wahine, cuz den you goin mess up an make yoaself come pilau.
\v 17 No make anyting dat look like one animal dat stay on top da earth, o any kine bird dat stay fly inside da sky,
\v 18 o anyting dat move on top da groun, o any kine fish dat stay inside da big watta.
\v 19 An wen you guys look up inside da sky an see da sun, da moon, an da stars -- all da tings dat get inside da sky -- no tink you gotta go down pray to dem an do stuff fo dem, notting. Yoa God Yahweh wen make all dose tings! He give um to all da peopos inside da world.
\v 20 But fo you guys, Yahweh wen take you guys outa Egypt, wea you guys work plenny, jalike you guys stay inside one real hot furnace dat can melt iron. He get you guys outa dea fo come his peopo, his own kids, an az wat you guys stay now.
\p
\v 21 “But Yahweh come huhu wit me cuz a you guys. He make one strong promise dat I not goin go da odda side da Jordan Riva an go inside da good land dat yoa God Yahweh stay give you guys cuz you his kids.
\v 22 Me, I goin mahke inside dis land. I not goin go da odda side da Jordan Riva. But you guys, you almos goin go ova dea, an take ova dat good land fo make um yoa property.
\v 23 Take care dat you guys no foget da deal yoa God Yahweh wen make wit you. No make any idol kine god dat look like anyting yoa God Yahweh wen tell you guys fo no make.
\v 24 Cuz yoa God Yahweh, he stay jalike one fire dat burn up eryting. He no like you guys go down in front da idol kine gods. He one jealous God.
\p
\v 25 Moses tell: “Afta you guys get kids an grankids, an live inside da land long time, if you guys come pilau inside, an make idol kine gods dat look like animals o odda tings, az real bad kine stuff you stay do, da way yoa God Yahweh see um. You guys goin make him come real huhu wit you!
\v 26 Jalike I goin call da sky an da earth fo see wat you guys do today, so dey can talk agains you guys if you no do wat I stay tell you guys. Cuz if you guys no do um, you goin mahke real quick inside da land wea you guys stay cross da Jordan Riva fo take charge. Den you guys no goin live ova dea long time, but you guys goin be wipe out fo shua.
\v 27 Den Yahweh goin make you guys go all ova inside odda peopos land, an ony litto bit a you guys goin stay alive ova dea wit da odda peopos, wea Yahweh goin make you guys go.
\v 28 Ova dea you guys goin come slave fo da kine idol gods dat peopo make from wood an stone. Dose gods, dey no can see o hear o eat o smell notting.
\v 29 But wen you guys stay ova dea, if you really like go all out fo know yoa God Yahweh wit all yoa heart, an wit eryting inside you, you goin find him.
\v 30 Wen all dis kine trouble happen to you guys, an you guys feel bum out, bumbye you guys goin come back by yoa God Yahweh an lissen wat he tell you fo do.
\v 31 Cuz yoa God Yahweh, he give chance. He no goin leave you guys, o wipe you out, o foget da deal he wen make wit yoa ancesta guys, cuz he wen make promise to dem dat fo shua he goin do wat he tell he goin do.
\s Yahweh, He Da Real God
\p
\v 32 “Aks now bout wat wen happen long time ago wen eryting wen start, da time God wen make peopo on top da earth. Aks from one side da sky to da odda side. No mo notting dat awesome eva happen befo! No mo notting dat awesome eva happen dat anybody wen hear bout!
\v 33 No mo anybody eva hear God talking from inside da fire jalike you guys wen hear, an still yet dey stay alive!
\v 34 No mo odda god eva, who wen take his peopo outa da land wea odda peopo stay! God wen make da Egypt peopo suffa fo test um. He show how strong him wen he make dem come sick. He do unreal tings, an make war, an show his powa an do plenny real scary kine stuff. Dass wat yoa God Yahweh wen do fo you guys Egypt side, an you guys see um happen, wit yoa own eyes!
\p
\v 35 “Yahweh wen show you guys all dis tings, so you guys goin know dat Yahweh, he da God fo real kine! No mo any odda God, ony him!
\v 36 He make you guys hear his voice from da sky, fo teach you guys how you gotta do wat he tell. On top da earth he show you guys his awesome fire, an you guys hear him talk from inside da fire.
\v 37 He get plenny love an aloha fo yoa ancesta guys, an he pick da kids afta dem too. Az why he wen stay wit you guys an make strong fo bring you guys outa Egypt.
\v 38 He wen make you guys take ova da land wea odda peopos stay dat mo big an mo strong den you guys. He da One bring you guys inside dea land an give um to you guys, cuz you his kids. An dass how stay today.
\p
\v 39 “Today you gotta know dis, an tink bout um plenny -- dat Yahweh da God inside da sky up dea, an he da God fo da earth down hea too! No mo no odda God!
\v 40 Make shua you guys do wat Yahweh tell you gotta do, an do wat his rules tell dat I stay give you guys today. If you do dat, eryting goin go good fo you guys an yoa kids afta you, an you goin live long time inside da land oua God Yahweh give you guys foeva.
\s Peopo Can Run To Da Big Towns Fo No Mahke
\p
\v 41 Den Moses wen pick three big town on da east side da Jordan Riva
\v 42 wea somebody can run dea an stay, if dey kill somebody, but befo dat happen, dey no hate da guy an neva make plan fo kill um. Dey can run to dose towns an stay alive.
\v 43 Da towns dat side Moses wen choose: Bezer inside da up country boonies fo da Reuben ohana, Ramot inside Gilead fo da Gad ohana, and Golan inside Bashan fo da Manasseh ohana.
\s Moses Make Plain Da Rules
\p
\v 44 Dese da rules dat Moses wen teach da Israel peopo.
\v 45 Dis all da stuff dat God tell, an da tings da peopo gotta do, an da rules dat Moses give da Israel peopo wen dey come outa Egypt.
\v 46 Dat time, dey stay inside da valley nea Bet-Peor on da eas side da Jordan Riva. Az was inside da land wea befo time Sihon wen stay king fo da Amor peopo inside Heshbon. Az was wen Moses an da Israel peopo win ova him, wen dey come outa Egypt.
\v 47 Dey take ova dat land, an da land fo Og, da king fo Bashan. Az was da two Amor kings fo da east side da Jordan Riva.
\v 48 Dat land go from Aroer on da side da Arnon Canyon to Mount Siyon, dat odda peopo call Mount Hermon.
\v 49 Dey take ova all da land inside da Arabah Valley too, on da east side da Jordan Riva, to da Big Salt Lake south side, unda Mount Pisgah.
\c 5
\s Da Ten Commandments
\r (Outa Egypt 20:1-19; Matthew 5:21-22; 27-30; 43 15:4; 19:18-19; Mark 7:10; 10:19; Luke 18:20; Efesus 6:2-3; Rome 7:7-8; 13:9-10; Hebrews 19:18-21; 4:4; James 2:11)
\p
\v 1 “Moses wen tell all da Israel peopo fo come by him. He tell um: “Lissen, you Israel peopo. I goin tell wat God say you guys suppose to do, an his rules fo you guys fo hear today. Learn um, an make shua you guys do um.
\v 2 Oua God Yahweh wen make one deal wit us guys, Mount Sinai side.
\v 3 Yahweh neva make da deal jus wit our mudda an fadda guys, but wit all us, da guys dat stay alive hea today too.
\v 4 Yahweh talk strait wit you guys right dea, from inside da fire on top da mountain.
\v 5 Dat time, I wen stay stand in front Yahweh, an you guys in front me, cuz you guys scared a da fire, an no like go up da mountain. I stay tell you guys wat Yahweh say. He tell:
\p
\v 6 “Me, I yoa God Yahweh. I da One wen get you guys outa da Egypt land, wea you guys was slaves.
\p
\v 7 “You, you no can go pray to odda gods, cuz me, I da ony God fo you.
\p
\v 8 “You no goin make idol kine gods fo yoaself dat look like anyting from up dea inside da sky, o from down hea on top da earth, o from inside da watta dat stay unda da groun.
\v 9 No go bow down in front odda gods fo show dem love an respeck, an no go work fo dem, cuz I yoa God Yahweh. An I one jealous God. An if you go down in front odda gods, I no like dat! Wen peopo do bad tings dat need punish, I go afta dem, an I punish da ones dat hate me. An if dea kids do same ting, I punish dem too, an same ting wit dea grankids, an even da great-grankids.
\v 10 But I stay tight wit all da peopo from long time dat show love an aloha fo me an take care fo do wat I tell um fo do.
\p
\v 11 “No go use my name an ack like dat give you da right fo make any kine stuff. Cuz I yoa God Yahweh, an anybody use my name lidat, fo go do wase time kine stuff, no way I goin let dem go an no punish dem.
\p
\v 12 “Take care fo make shua da Res Day stay spesho fo me, yoa God Yahweh, jalike I wen tell you fo do.
\v 13 You get six days fo do all yoa work an eryting you gotta do.
\v 14 But da numba seven day, az da spesho Res Day fo me, yoa God Yahweh. Dat day you no work notting, not you, yoa boy, yoa girl, yoa worka guy o wahine, yoa cow, yoa donkey, all yoa odda animals, anybody from odda place dat stay by you, so yoa worka guys an wahines can res jalike you.
\v 15 No foget, you guys was slave guys an work real hard inside Egypt, an me, yoa God Yahweh, I wen bring you guys outa dea wit my powa. Az why I, yoa God Yahweh, stay tell you guys fo show respeck fo da Res Day.
\p
\v 16 “Show respeck fo yoa fadda an mudda, jalike I wen tell you guys. Den you guys goin live long time an eryting goin go good fo you guys inside da land I stay goin give you guys.
\p
\v 17 “No go murda nobody jus cuz you like.
\p
\v 18 “No fool aroun wit odda guy o wahine behind yoa wife o husban back.
\p
\v 19 “No go steal notting.
\p
\v 20 “Wen you gotta tell someting in front da judge fo make proof wat one nodda guy wen do, no bulai.
\p
\v 21 “No go tink, ‘I like go take da odda guy's stuffs!’ Dat mean, no go afta his wife,
o his house, o his land, o his worka guy o wahine, his cow, his donkey, o wateva kine ting he get.”
\p
\v 22 Den Moses tell da peopo: “Dis wat Yahweh wen tell all you guys fo do wit one loud voice on top da mountain, from inside da fire an cloud an real dark sky, an he no tell notting moa. Den he write um on top two flat stones, an give um to me.
\s Moses Tell Da Peopo Wat God Tell
\p
\v 23 “Wen you guys wen hear da voice come from da dark sky, an da fire stay burn on top da mountain, all da leada guys from yoa ohanas an yoa older leada guys come by me.
\v 24 You guys tell, ‘You know wat? Oua God Yahweh wen show us how awesome an importan he stay. An we hear his voice come from inside da fire. Today we see dat peopo can stay alive still yet, even if God talk to um.
\v 25 So, how come we gotta mahke?! Cuz dis big fire can wipe us guys out! If us gotta hear oua God Yahweh's voice one mo time still yet, fo shua us goin mahke!
\v 26 Cuz no mo nobody eva hear da God Dat Stay Alive talk to him from inside da fire, jalike us, an still yet stay alive afta.
\v 27 So you Moses, go nea God an lissen all da stuff oua God Yahweh tell you. Den you come back tell us guys wat oua God Yahweh wen tell you, an us goin lissen an do um.’
\p
\v 28 Yahweh hear wat you guys wen tell me, an he tell, ‘I hear wat dis peopo tell you. Az good, eryting dey say.
\v 29 I like dey tink lidat erytime, fo stay scared a me an do eryting I tell um fo do, so den eryting goin go good fo dem an dea kids, all da time!
\p
\v 30 “‘Go, tell um go back by dea tents.
\v 31 But you, stay hea wit me, so I can tell you eryting -- all da stuff dey gotta do, an da rules you goin teach dem, so dey goin do um inside da land I stay goin give dem fo dea property.’-”
\p
\v 32 So Moses tell da peopo: “So now, you guys take care fo do eryting oua God Yahweh wen tell you fo do. No go turn away from um to da right side o da left side.
\v 33 Do eryting da way yoa God Yahweh tell you fo do um, so den you guys goin live long time an eryting goin go good fo you guys inside da land you goin get.
\c 6
\s Main Ting, Get Love an Aloha Fo Yahweh
\r (Matthew 4:7, 10; 22:37; Mark 12:29-30; Luke 4:8, 12; 10:27)
\p
\v 1 Moses tell dis too: “Dis wat oua God Yahweh wen tell me fo teach you guys -- all da stuff you gotta do, an da rules bout wass right an wass wrong. Dass wat you guys gotta do inside da land wea you goin go fo take um ova, da odda side da Jordan Riva.
\v 2 Az cuz oua God Yahweh like fo you, an yoa kids, an dea kids afta dem, stay scared a him an get respeck fo him all da time you guys stay alive. He like you guys do wat he tell you guys you gotta do, an show respeck fo his rules bout wass right an wass wrong, jalike I stay tell you guys. So den, you guys can live long time.
\v 3 Lissen, you Israel peopo, an take care fo do wat Yahweh tell! An az how eryting goin go good fo you guys. You guys goin come plenny peopo inside da land dat ery place get plenny milk an honey, jalike Yahweh, da God fo oua ancesta guys, wen make promise to you guys.
\b
\q
\v 4 “Lissen, you Israel peopo!
\q2
Yahweh, he oua God!
\q2
Ony him, da God fo us!
\v 5 Get love an aloha fo yoa God Yahweh wit eryting how you tink, an wit eryting dat stay inside you, an wit all yoa powa.
\v 6 Dese tings I stay tell you guys fo do today, you gotta tink plenny bout um.
\v 7 Make dese da main ting you teach yoa kids. Talk bout um erytime, wen you guys stay inside yoa house, wen you walk on top da road, wen you lay down, an wen you get up.
\v 8 Write um down an tie um jalike one sign on top yoa hands an on top yoa forehead, so you no foget um.
\v 9 Write um on top yoa door pos an on top da gates fo yoa town.
\p
\v 10 “Oua God Yahweh, he goin take you guys inside da land dat he wen make strong promise fo give yoa ancesta guys, Abraham, Isaac, an Jacob. Az one land dat get big, rich towns dat you guys neva build.
\v 11 Get plenny house dea wit all kine good tings you guys neva put dea, an big holes fo hold watta dat stay dea awready, an grape fields an plenny olive trees you guys neva plant. Wen you guys eat dat, an feel good inside,
\v 12 den take care you guys no foget Yahweh. He da One wen bring you guys outa Egypt, da place wea you guys was slaves.
\p
\v 13 “Stay scared a oua God Yahweh an get respeck fo him. Work ony fo him. Wen you make strong promise fo anybody, tell ony him fo punish you if you no do um.
\v 14 No stay tight wit odda gods, da gods fo da peopos dat live aroun you guys.
\v 15 Cuz oua God Yahweh, he stay right hea wit you guys, an he one jealous God. No good he come real huhu wit you guys, cuz he goin wipe out you guys from da land if you guys pray to da odda gods.
\v 16 No give presha oua God Yahweh fo make him prove dat he God, da way you guys wen make Massah side.
\v 17 Make shua you guys do wateva oua God Yahweh tell you fo do, an stick wit da tings he say you gotta do, an da rules he tell you guys.
\v 18 Do wass right an good, da way Yahweh see um, so dat eryting goin go good fo you guys. Den you guys can go inside da good land dat Yahweh wen make strong promise to oua ancesta guys fo give you, an take ova um.
\v 19 Yahweh wen tell you guys he goin throw out from da land, all da peopos dat stay agains you guys.
\p
\v 20 “Bumbye, wen yoa kids aks you, ‘Wat all dese rules mean dat oua God Yahweh wen tell us we gotta do?’
\v 21 you goin tell dem, ‘Us guys was slaves fo da Pharaoh guy Egypt side, but Yahweh wen bring us outa dea wit his strong powa.
\v 22 We wen see Yahweh do all awesome kine signs, good kine an bad kine, to da Egypt peopo an da Pharaoh guy an his ohana.
\v 23 But he wen bring us guys outa Egypt, an bring us dis place, an give us da land dat he make strong promise to oua ancesta guys dat he goin give.
\v 24 Oua God Yahweh tell us all dis stuff we gotta do, an tell us fo stay scared a him an get respeck fo him, so eryting goin go good fo us, an he make us stay alive, jalike we stay today.
\v 25 If we take care fo lissen an get respeck fo oua God Yahweh, an do all da stuff he tell us fo do in front him, den we goin get um right wit him, jalike he wen tell us guys.’
\c 7
\s Throw Out Da Odda Peopos From Da Land
\r (Jesus Guys 13:19)
\p
\v 1 “Wen yoa God Yahweh take you guys inside da land fo take um ova, he goin throw out plenny peopos from in front you guys -- da Het peopo, da Girgash peopo, da Amor peopo, da Canaan peopo, da Periz peopo, da Hiv peopo, an da Jebus peopo. Dass seven diffren kine peopos dat get mo plenny peopo an stay mo strong den you guys.
\v 2 Wen oua God Yahweh give you guys powa ova dem, an you win ova dem, den you guys gotta wipe um all out, jalike you make one big sacrifice fo Yahweh. No make deal wit dem, an no give dem chance.
\v 3 No go marry dem. No give yoa girls to dea boys fo marry, an no take dea girls fo marry yoa boys.
\v 4 Az cuz if you do dat, bumbye dose peopos goin make yoa kids no stay tight wit me, Yahweh, an yoa kids goin come tight wit odda gods an goin go work for um. An if you do dat, I goin come real huhu wit you guys, an I goin wipe out you guys quick time.
\p
\v 5 “Az why dis wat you guys gotta do to dem: Broke down dea altars, smash da big kapu stones dey put up fo da Ba`al god, cut down da kapu poses dey put up fo da Asherah wahine god, an burn up dea idol kine gods inside da fire.
\v 6 You gotta do all dat cuz you guys da peopo dat stay spesho fo me, yoa God Yahweh. I wen pick you guys from all da odda peopos on top da earth, fo come my own peopo dat worth plenny.”
\p
\v 7 “Yahweh wen like you guys. Az why he pick you guys. But he neva do um cuz you guys get mo plenny peopo den da odda peopos, cuz dat time, you guys ony litto bit peopo.
\v 8 But he pick you guys cuz he get love an aloha fo you guys, an fo make good da strong promise he wen make to yoa ancesta guys, dat he wen take you guys outa Egypt wit his strong powa. Dass how come he wen use his powa fo get you guys outa dea. He wen do wat he gotta do fo get you outa dea, afta you guys was slaves fo da Pharaoh guy, dea king.
\v 9 Az why you guys gotta know dat yoa God Yahweh, he da God dass fo real! He da God you can trus um fo do wat he say he goin do. He make good da deal he wen make, an he stay tight wit da peopo dat get love an aloha fo him an do wat he tell dem fo do, fo one tousand [generation /peopo, fadda afta fadda / peopo's fadda, one afta da odda].
bracket closed, not opened? Typo?
\v 10 But fo da peopo dat hate him, he goin wipe dem out fo pay um back. He no goin be slow fo pay um back.
\v 11 Az why you guys gotta take care fo do wat I wen tell you fo do -- eryting you gotta do, da rules bout wass right an wass wrong, jalike I tell you guys today.”
\p
\v 12 “If you guys lissen to dese rules an take care fo do um, den oua God Yahweh goin take care fo do his part a da deal fo stay tight wit you guys, jalike he wen make strong promise to oua ancesta guys fo do um.
\v 13 He goin get love an aloha fo you guys, an do good tings fo you guys, an make you guys come plenny peopo. He goin do good tings fo yoa kids, same ting fo da food dat grow from yoa land -- yoa wheat an barley, yoa new wine, yoa olive oil -- da bebe cows, an da bebe sheeps an goats. Dass how goin stay inside da land dat he wen make strong promise to yoa ancesta guys fo give you.
\v 14 He goin do good tings fo you guys, mo den wat all da odda peopos goin get. All yoa guys an wahines goin get kids. All yoa animals goin get bebe.
\v 15 Yahweh no goin let you guys come sick. He no goin let you guys get any bad kine sick, da kine you guys know bout wen you live inside Egypt. But he goin give dat kine sick to all da peopo dat hate you guys.
\v 16 You guys gotta wipe out all da peopos dat oua God Yahweh give you guys da powa fo wipe um out. No show pity fo dem, an no do work fo dea gods, cuz all dat az jalike one trap fo catch you guys.
\p
\v 17 “Maybe you guys goin start fo tink lidis, ‘How us can do dis?! Dey get mo plenny peopo den us guys! Us no can take ova dea land!’
\v 18 No scared a dem! You guys gotta rememba, an no foget, wat oua God Yahweh wen do to Pharoah an all da Egypt peopo.
\v 19 You guys wen see wit yoa own eyes, how oua God Yahweh wen make da Egypt peopo suffa. He show how strong him, an he make happen plenny awesome tings. He use his strong powa fo take you guys outa dea. An now, oua God Yahweh goin do da same ting to all da peopos dat stay make you guys come scared now.
\v 20 An anodda ting -- Oua God Yahweh goin make dem come lose fight, till even da peopo dat stay dea still yet and stay hide from you guys, dey goin be wipe out.
\v 21 No come scared and shake cuz a dem! Cuz oua God Yahweh stay right hea wit you guys, an he az one God dat stay big an awesome.
\v 22 Oua God Yahweh goin wipe out dose peopos litto by litto wen you guys go fo attack dem. No good you guys wipe um all out one time, cuz den da wild animals goin come real plenny aroun you guys an take ova da land.
\v 23 But oua God Yahweh goin bring dem to you guys fo take um ova. He goin make um come all mix up dey donno wat dey doing, till dey all wipe out.
\v 24 He goin let you guys take dea kings an wipe um out, so nobody in da world goin even rememba dea name. Nobody goin stand up fo fight you guys, cuz you goin wipe dem all out.
\v 25 You guys goin burn up dea idol kine gods inside da fire. No go make like you like take da silva o gold on top da idols, no take dat fo yoaself. Cuz all dat kine stuff no good, an can catch you guys jalike az one trap. Fo yoa God Yahweh, all dat kine stuff pilau.
\v 26 No take idol kine god inside yoa house, cuz az pilau da way Yahweh see um. If you take um, Yahweh goin wipe you out jalike you az one sacrifice fo him, jalike he goin wipe out da idol. You guys gotta hate dat kine pilau stuff fo real kine, an no take um, cuz Yahweh goin wipe um out jalike az one sacrifice fo him.
\c 8
\s No Foget Yahweh
\r (Matthew 4.4; Luke 4.4)
\p
\v 1 “Make shua fo stick wit eryting I stay tell you guys fo do um today, so dat you guys goin stay alive an come plenny peopo, an go inside da land an take um ova, jalike Yahweh wen make strong promise to our ancesta guys.
\v 2 No foget how oua God Yahweh wen bring you guys all da way inside da boonies fo forty years. He do dat so you guys no mo big head, an fo test you guys fo find out how you guys tink, if you guys goin do wat he tell you guys fo do, o not.
\v 3 He wen make you guys no get big head, an let you guys come hungry, an den he wen feed you guys manna fo eat. You guys an oua ancesta guys neva know wat manna was from befo time. Az how he wen make you guys know dis: dat peopo no can live ony wit food. Gotta lissen to eryting Yahweh tell too!
\v 4 Fo all dose forty years yoa clotheses neva come ol, an yoa feets neva swell up.
\v 5 You guys gotta know inside yoa heart, wen you like tell yoa boy fo no do da tings he wen do wrong, fo teach him, az how oua God Yahweh telling you guys fo teach you.
\p
\v 6 “Take care fo do wat oua God Yahweh's rules tell. Live da way he tell you, an show plenny respeck fo him.
\v 7 Cuz oua God Yahweh stay bring you guys inside one good land, wea get streams an watta place, an watta come from undaneat da valleys an hills.
\v 8 Az one land wit wheat an barley, grape plants, an fig trees, pomegrams, olive oil, an honey.
\v 9 Inside dat land, nobody goin come hungry. You goin get plenny food dea. Da stones dea get iron, an you can dig copper from da hills.
\p
\v 10 “Wen you guys eat all you like an feel good, den talk good bout oua God Yahweh, cuz a da good land he stay give you guys.
\v 11 Take care dat you guys no foget oua God Yahweh. No stop doing wat he tell you guys fo do, an stick wit his rules and all da tings he tell you gotta do, jalike I stay tell you guys today.
\v 12 Cuz if you guys foget, wen you guys eat till you feel good, an build nice houses an stay dea,
\v 13 an you guys get plenny cows, sheeps, an goats, an you stay getting mo and mo silva an gold, an you get mo an mo plenny stuffs,
\v 14 den watch out! Cuz den you guys goin get big head, an den you goin foget dat oua God Yahweh wen get you guys outa Egypt, wea you guys was slaves.
\v 15 He da One wen lead you guys thru da big an scary boonies, wea get poison kine snakes an scorpions, wea, wen you guys was thirsty an no mo watta, he make watta come out from inside one real hard stone fo you guys drink.
\v 16 He da One give you guys manna fo eat inside da boonies. Yoa ancesta guys neva see o know wat was manna befo. He give um to you guys fo make you guys no come big head, an test you guys fo find out how you guys goin ack, so bumbye he can make eryting come good fo you guys.
\v 17 But no go tink lidis: ‘Me, I get all dis rich kine stuff cuz my hand strong an I get powa!’
\v 18 But you guys, no foget dat oua God Yahweh, he da One dat make you strong so you can get rich kine stuffs. Az how he make good da deal he wen make wit yoa ancesta guys, da time he make strong promise fo give da land to dem, jalike he stay do today.
\p
\v 19 “If you guys foget oua God Yahweh, an come tight wit odda gods, do stuff fo dem, an go down in front dem fo show respeck, I tell you guys today fo real kine dat you goin come wipe out.
\v 20 Jalike da odda peopos dat oua God Yahweh stay wipe out wen you guys fight um, az how he goin wipe out you guys if you guys no lissen him.
\c 9
\s Yahweh No Do Dis Cuz Da Israel Peopo Real Good
\r (Rome 10:6-8; Hebrews 12:21)
\p
\v 1 “Lissen, you Israel peopo, you guys almos ready fo go da odda side da Jordan Riva, fo go inside da land an take um ova, no matta da odda peopos dea stay mo big an mo strong den you guys. Dey get big towns an strong walls dat go up inside da sky.
\v 2 Da peopo dea stay strong an tall. Dey come from da Anak peopo. You guys know bout dem. You guys wen hear, ‘No mo nobody can stand up agains da Anak peopo!’
\v 3 But you guys can stay shua dat oua God Yahweh, he da One goin go da odda side da Jordan Riva in front you guys now, jalike one big fire dat burn up eryting! He goin make dem come notting an wipe dem out wen you guys attack dem. An you guys goin take ova dea land an wipe dem out quick time, jalike Yahweh wen make promise to you guys.
\p
\v 4 “But afta oua God Yahweh throw dem out wen you guys attack dem, no go tink lidis: ‘Az cuz I stay do wass right erytime, dat Yahweh bring me ova hea fo take ova dis land!’ Nah! Az not why! Az cuz dese peopos stay do plenny real bad kine stuff. Az why Yahweh goin take ova dea land wen you guys attack.
\v 5 Az not cuz you guys do wass right erytime, o cuz you tink da right way, dat you guys goin take ova dea land, but cuz dese odda peopos stay do real bad kine stuff. Az why oua God Yahweh goin take ova dea land wen you attack, so he can do wat he wen make strong promise to yoa ancesta guys fo do, to Abraham, Isaac, an Jacob.
\v 6 You guys gotta undastan, dat oua God Yahweh stay give you guys dis good land fo come yoa property. But he give um cuz he like, not cuz you guys stay do wass right erytime. Cuz you guys hard head!
\s Da Gold Bebe Cow Idol
\p
\v 7 “Rememba an no foget, how you guys wen make oua God Yahweh come real huhu inside da boonies. From da time you guys come outa Egypt till you guys come ova hea, you guys stay make Yahweh come huhu cuz you no like do wat he tell.
\v 8 Mount Sinai side, you guys wen make him come so plenny huhu dat he stay ready fo wipe out you guys.
\v 9 Da time I go up da mountain fo get da flat stones dat show da deal Yahweh wen make wit you guys, I wen stay on top da mountain forty days an forty nites. I no eat food an no drink watta all dat time.
\v 10 Oua God Yahweh give me two flat stones wea he write wit his own finga. On top dem, get all da stuff he tell you guys fo do, da time he talk wit you guys from inside da fire on top da mountain. Az was da day all you guys come togedda dea.
\p
\v 11 “Afta I pau stay up dea forty days an forty nites, Yahweh give me da two flat stones wea he write da deal he make wit you guys.
\v 12 Den Yahweh tell me, ‘Go down dea quick time, cuz yoa peopo dat you wen bring outa Egypt no wait fo mess up an do pilau kine stuff awready! Dey turn away fas from da way I wen tell um fo live. Dey wen make one idol kine god from metal fo demself!’
\v 13 Yahweh tell me, ‘I see awready, an you know wat?! Dese peopo, hard head fo shua!
\v 14 No try fo stop me! I goin wipe dem out, so den nobody in da world goin rememba who dem. Den I goin make you, Moses, come one peopo mo strong an mo plenny den dem!’
\p
\v 15 “So I turn aroun an go down da mountain wen still yet stay burning. Da two flat stones dat get da deal Yahweh wen write on top um, I get um inside my two hand.
\v 16 Wen I look, I see you guys doing real bad kine stuff agains oua God Yahweh. You guys wen melt metal fo make one idol kine god dat look like one bebe cow. You guys wen turn away quick from da way Yahweh wen tell you guys fo live.
\v 17 So I wen take da two flat stones an throw um down from my hands, an broke um in front you guys.
\p
\v 18 “Den jalike da firs time, I go down in front Yahweh fo forty days an forty nites. I no eat food an no drink watta all dat time, cuz a all da stuff you guys stay do dass real bad kine da way Yahweh see um, an dat make him come real mad wit you guys.
\v 19 I come real scared, cuz Yahweh stay so plenny huhu wit you guys dat he like wipe you out den an dea. But dat time too, I pray an he lissen to me.
\v 20 Same time, Yahweh stay so plenny huhu wit Aaron, dat he like wipe him out. But dat time I pray fo Aaron too.
\v 21 An dat bebe cow, you guys wen do bad ting fo make um. I take um an burn um up inside da fire. I smash um an grind um up an make um come jalike dust. Den I throw um inside da stream dat come down da mountain.
\p
\v 22 “Odda times, you guys wen make Yahweh come huhu too -- Taberah side, Massah side, an Kibrot-Hatta`avah side.
\p
\v 23 “An layta, wen Yahweh wen send you guys fo go out from Kadesh-Barnea, he tell, ‘Go! Take ova da land I wen give you guys awready!’ But you guys, you no like do wat oua God Yahweh wen tell you fo do. You no trus him o lissen wat he tell.
\v 24 You guys no like do wat Yahweh tell you fo do, from da firs time I know you guys.
\p
\v 25 “I wen go down in front Yahweh dat time fo forty days an forty nites, cuz he wen tell me he goin wipe out you guys.
\v 26 But I stay praying to Yahweh, an I say, ‘My Boss Yahweh, you stay in charge a eryting. Please no wipe out yoa peopo! You own dem, an you wen do wat you gotta do fo get dem outa trouble, cuz you big an awesome! You wen use yoa strong power fo bring um outa Egypt.
\v 27 Rememba da guys dat wen work fo you, Abraham, Isaac, an Jacob. No leave us guys, jus cuz dis peopo hard head, an stay do real bad kine stuff.
\v 28 Cuz no good da Egypt peopo inside da country wea you wen bring us guys out from, tell, ‘Yahweh neva can bring dem inside da land he wen promise fo give dem, an he hate dem! Az why he wen bring dem inside da boonies, so he can kill um dea!’
\v 29 But da Israel peopo, dey yoa peopo. You own dem. You wen use yoa awesome powa fo bring dem outa dea, cuz you strong!
\c 10
\s Flat Stones Jalike Da First Ones
\p
\v 1 “Afta da forty days pau, Yahweh tell me, ‘Moses, cut out two mo flat stones jalike da firs ones. Make one spesho wood box too. Den come up hea by me on top da mountain.
\v 2 I goin write on top da flat stones wat I wen write on top da firs ones dat you wen broke. Den you goin put da stones inside da box.’
\p
\v 3 So I wen make da box from koa wood, an cut out da two flat stones jalike da firs ones. Den I go up da mountain an carry da two flat stones in my hands wit me.
\v 4 Yahweh write on top da flat stones da same ting he wen write da firs time, da Ten Commandments dat he wen tell you guys up da mountain, from inside da fire, wen you guys wen come togedda. An he give da stones to me.
\v 5 Den I come back down da mountain, an put da flat stones inside da box I wen make, jalike Yahweh wen tell me fo do. Dey still yet stay dea now, inside da box.”
\p
\v 6 (Afta dat, da Israel peopo go from da Ja`akan ohana's pukas fo watta to Moserah. Aaron wen mahke ova dea dat time, an dey bury him ova dea, an Aaron's boy Eleazar come da main pries.
\v 7 From dea dey go to Gudgodah, an den to Jotbatah, one land dat get plenny stream wit watta.
\v 8 Dat time Yahweh wen make da Levi ohana guys spesho fo him, cuz dey goin carry da Box Fo Rememba Da Deal Wit Yahweh. He tell da Levi ohana guys fo stand in front him an make sacrifice fo him too, an fo pray to God cuz dey his guys, an he do good tings fo dem. An da Levi ohana guys still yet do all dat today.
\v 9 Az why da Levi ohana no mo land o property from Yahweh, jalike dea bruddas from da odda ohanas get. Cuz da Levi ohana get Yahweh, jalike he wen tell dem.)
\p
\v 10 Den Moses tell, “Me, I wen stay on top da mountain dat time, forty days an forty nites, jalike da firs time. An dat time Yahweh lissen to me too, an tell az okay, he no goin wipe out you guys.”
\v 11 Yahweh tell me, ‘Go! Lead da peopo from hea, so dey can go inside da land an take ova, jalike I wen make strong promise to yoa ancesta guys fo give um to dem.’-”
\s Stay Scared A Yahweh
\p
\v 12 Den Moses tell: “So now, you Israel peopo, wat you guys tink yoa God Yahweh like you guys fo do? Ony dis, he like:
\q Fo you guys stay scared a him an show respeck fo him,
\q Fo live da way he tell you guys fo do,
\q Fo get love an aloha fo him,
\q Fo work fo him wit all yoa heart, an wit eryting inside you, an
\q
\v 13 Fo stick wit his rules, an do wat he tell you guys you gotta do.
\m Dass wat I stay tell you guys today fo do, so eryting goin go good fo you guys.
\p
\v 14 “You know, oua God Yahweh own eryting inside da sky, even da mos high place inside da sky! He own da earth an eryting inside um!
\v 15 But still yet, Yahweh wen like yoa ancesta guys, an get love an aloha fo dem. An he pick you guys dat come from dem! He neva pick any odda peopos. An dass how stay today.
\v 16 He tell, ‘So den, make shua erybody know you my peopo, jalike you get mark inside yoa heart fo show you like da deal I wen make fo you. Az jalike wen you cut skin yoa boys fo show dey my peopo. An no come hard head no moa.’
\v 17 Cuz oua God Yahweh, he da real God mo den all da odda gods, an he da real Boss mo big den all da odda bosses. He da big God, strong, an you betta be scared a him. He no make to one guy mo betta den da odda guy, an you no can pay him fo make him do spesho stuff fo peopo.
\v 18 He back up da kids dat no mo fadda o mudda, an da wahines dat no mo husban. He get love an aloha fo peopo from odda place, an give um food an clotheses.
\v 19 An you guys gotta get love an aloha fo da peopo from odda place, cuz you guys wen come from odda place wen you wen stay inside Egypt.
\v 20 Stay scared a oua God Yahweh an work fo him. Stay tight wit him, an wen you make one strong promise, use ony his name fo back you up.
\v 21 He da One you guys talk good bout. He yoa God dat do all dose awesome an scary kine tings dat you guys wen see wit yoa own eyes.
\v 22 Wen all yoa ancesta guys wen go down Egypt side, dey ony was seventy peopo. But now, yoa God Yahweh make you guys real plenny peopo, jalike da stars inside da sky.
\c 11
\s Get Love Fo Yahweh An Lissen Him
\p
\v 1 “Get love an aloha fo yoa God Yahweh, an make shua you do wat he tell you fo do -- eryting he tell you guys gotta do, wat stay right an wat stay wrong, an his rules. Do all dat ery day.
\v 2 Today tink bout dis: No was yoa kids da ones dat yoa God Yahweh wen give presha fo teach dem, was you guys. You guys da ones, not dem, wen see dat he importan, an strong, an can use his powa.
\v 3 You da guys wen see all da tings he wen do fo show who him, an all he do inside Egypt. He do um to da Pharaoh guy, dea king, an to da peopo all ova da Egypt land.
\v 4 He do um to da Egypt army, dea horses, an dea war wagons. Wen da Egypt army guys was chasing you guys, you guys wen see how Yahweh make da Red Sea watta come back ova da Egypt guys an drown um. Dass how he wipe dem out, an dey stay wipe out till today.
\v 5 Was you, not yoa kids, dat wen see wat he do fo you guys inside da boonies, all da way till you guys come ova hea.
\v 6 You guys wen see how Yahweh punish Datan an Abiram, Eliab boys from da Reuben ohana, wen da groun wen open up in da middle a da Israel peopo an da hole swallow dem an all dea ohanas, dea tents, an all dea worka guys an animals an eryting dey own.
\v 7 But you guys da ones wen see wit yoa own eyes, all dat awesome stuff Yahweh do.
\p
\v 8 “Az why you guys gotta make shua you do all da stuff I stay telling you guys fo do today, so dat you guys goin be strong fo go ova da odda side da Jordan Riva an go inside da land an take um ova.
\v 9 If you do dat, you guys goin live long time inside da land dat Yahweh wen make strong promise to yoa ancesta guys, he give um to dem an dea kids. Az one land dat get plenny milk an honey erytime.
\p
\v 10 Da land you stay go inside fo take ova, az not one land jalike Egypt, dat you guys wen come from. Ova dea you guys throw yoa seed, den use da kine pump you step on top fo bring watta from da watta ditch, jalike fo one garden.
\v 11 But da land wea you guys stay goin go da odda side da Jordan Riva, fo go inside an take um ova, dat land get mountains an valleys, an get watta from da rain from da sky.
\v 12 Az one land wea yoa God Yahweh take care um. He watch um erytime, from da start to da end a da year.
\p
\v 13 “So, if you guys really lissen da rules dat I Yahweh stay give you guys today -- fo get love an aloha fo me, yoa God Yahweh, an work fo me wit eryting how you tink, an wit eryting dat stay inside you –-
\v 14 den I goin bring rain on top yoa land da right time, da October rain an da April rain. Den you guys goin cut da wheat an da barley, an get new wine an olive oil.
\v 15 I goin give grass inside da fields fo yoa animals, an you guys goin eat an come full.
\p
\v 16 “Take care an no let notting pull you guys heart away, fo work fo odda gods an go down in front dem an show dem respeck.
\v 17 Cuz if you guys no lissen me, Yahweh, I goin come real huhu agains you guys, an I goin shut da sky fo stop da rain, an da groun no goin grow food. Den you guys goin mahke real quick, no matta you live on top da good land dat I stay give you guys.
\v 18 Rememba dese tings I tell you guys, tink plenny bout um, an feel good bout um. Write um an put um jalike one sign fo tie on top yoa hands, an fo put aroun yoa forehead.
\v 19 Teach um to yoa kids. Talk bout um erytime, wen you guys stay inside yoa house, wen you walk on top da road, wen you lay down, an wen you get up.
\v 20 Write um on top yoa door pos an on top da gates fo yoa town.
\v 21 Den, all da time da sky stay up dea ova da earth, you guys an yoa kids goin live long time inside da land dat I Yahweh wen make strong promise to yoa ancesta guys fo give dem.
\p
\v 22 Moses tell: “If you guys take care an do wat dese rules tell dat Yahweh stay give you guys fo do -- fo get love fo yoa God Yahweh, fo live da way he tell you, an fo stay tight wit him --
\v 23 den Yahweh goin go in front you guys an make dese nations dat stay dea get out so you can take ova dea land, no matta dey mo big an mo strong den you guys.
\v 24 Ery place wea you guys put down yoa feets goin be yoas. Yoa land goin go from da boonies sout side to Lebanon nort side, an from da Eufrates Riva eas side to da Mediterranean Sea on da wes side.
\v 25 Nobody goin stand up agains you guys. Oua God Yahweh goin make da peopo all ova da land come real scared a you guys, wea eva you go, jalike he wen make strong promise to you awready.
\p
\v 26 Moses tell: “Look, I goin let you guys pick today, wat you goin get. You like Yahweh do good kine stuff to you, o bad kine stuff?
\v 27 Oua God Yahweh goin do good kine stuff fo you guys -- if you lissen wat he tell an do um, jalike I stay telling you guys today.
\v 28 Yahweh goin do bad kine stuff fo you guys -- if you guys no lissen wat oua God Yahweh tell an do um, an turn away from wat I stay telling you guys today, an bag from Yahweh fo go wit odda gods dat you guys donno befo.
\v 29 Afta oua God Yahweh bring you guys inside da land wea you going fo take um ova, you guys goin put peopo on top Mount Gerazim fo tell erybody da good kine stuff Yahweh goin do if dey lissen, an peopo on top Mount Ebal fo tell erybody da bad kine stuff Yahweh goin do if dey no lissen.
\v 30 (You guys know dat dose mountains stay da odda side da Jordan Riva, on da wes side a da main road, da side wea da sun go down, nea da big oak trees Moreh side, an inside da land fo da Canaan peopo dat live inside da Jordan Valley nea Gilgal.)
\v 31 Pretty soon you guys goin go da odda side da Jordan Riva fo take ova da land yoa God Yahweh stay give you guys. Afta you guys take um ova an stay live ova dea,
\v 32 make shua you guys do eryting I stay tell you gotta do, an stick wit da rules I stay give you guys today.”
\c 12
\s Da Rules Fo Live Inside Canaan
\r (Rules Secon Time 12:2-26:15)
\p
\v 1 Dis wat yoa God Yahweh tell you guys you gotta do, bout his rules an wass right. All da time you guys stay live inside da land, you guys gotta take care fo do all dat. You guys gotta do um inside da land dat Yahweh give you guys awready, fo you guys make um yoa property. He da same God yoa ancestas stay pray to.
\v 2 Broke down all da sacrifice place on top da high mountains an hills, an unda ery tree dat get plenny green leaf. Dis da kine place wea da peopo dat stay dea, go down in front dea gods. But you guys goin take ova dea land.
\v 3 Broke down dea altars fo dea idol kine gods, smash dea kapu stones, an burn up dea kapu Asherah poses wit fire. Cut down da idols dat look like dea gods. Broke down eryting bout dea gods, so nobody even rememba dea names in da places wea da gods stay befo time.
\p
\v 4 No do da kine stuff fo pray to yoa God Yahweh, da same way dose peopo stay do fo pray to dea gods.
\s Show Love An Respeck Fo God One Place Ony
\p
\v 5 But you guys gotta find da place yoa God Yahweh goin pick from all da places wea yoa ohana peopo goin live. He goin put his name dea an stay dea, an you goin go dea fo show love an respeck fo him.
\v 6 Ova dea, you guys goin bring yoa animal fo make yoa burn up kine sacrifices an odda sacrifices wea you kill animals. You goin bring God's ten percent a eryting you grow an odda spesho presents you like give too. Give wateva you guys wen make promise fo give Yahweh, an da presents you guys give um cuz you like give um, an da firs cow, sheep, o goat dat born -- bring um all da place Yahweh goin pick.
\v 7 Ova dea, da place yoa God Yahweh stay, you guys an yoa ohana peopo goin eat da sacrifice food, an stay good inside cuz a eryting you guys start fo do, cuz yoa God Yahweh stay do good tings fo you guys.
\p
\v 8 “Erybody hea stay doing wateva dey like today, but you guys no goin make lidat bumbye.
\v 9 You make lidat, cuz you guys still yet no stay inside yoa place fo res an da property dat yoa God Yahweh goin give you guys cuz you his kids.
\v 10 But you guys goin go da odda side da Jordan Riva an live inside da land dat yoa God Yahweh stay give you guys cuz you his kids. Ova dea, Yahweh goin let you guys res from fight da peopo all aroun you guys dat stay agains you. You guys goin live ova dea, an no need worry somebody goin hurt you guys.
\v 11 Da place yoa God Yahweh goin pick fo his name stay dea -- dass da place you guys goin bring eryting I tell you, da burn up kine sacrifices an odda animal sacrifices, yoa ten percent presents, an spesho presents, an all da spesho stuff you wen promise fo give me, Yahweh.
\v 12 Ova dea you guys goin stay good inside in front yoa God Yahweh, you, an yoa boys an girls, yoa worka guys an wahines, an da Levi ohana guys from yoa town, cuz dey no mo land fo dea own.
\p
\v 13 Make shua you no make yoa burn up kine sacrifice jus any place you guys like.
\v 14 Make da burn up kine sacrifice ony inside da place Yahweh goin pick inside da land dat one a yoa main ohanas own. An all da odda tings I tell you guys fo do, do um ova dea too.
\p
\v 15 “But fo you guys kill yoa animals jus fo eat an not fo make sacrifice, you can do dat inside wateva town. You can eat all da meat you guys like, jalike was wild meat o deer meat. Dass one a da good kine tings Yahweh stay give you guys. Da peopo dat can come in front me an da peopo dat no can come in front me, dey all can eat um.
\v 16 But you guys no can eat da blood. Pour um out on top da groun jalike watta.
\p
\v 17 Inside yoa own towns, you guys betta not eat God's ten percent a yoa wheat o barley o new wine o olive oil, o kill an eat da firs one fo born from yoa cows o sheeps o goats, o wateva you wen make promise fo give Yahweh, o da stuff you like give him, o da spesho presents.
\v 18 Cuz all dat stuff, you guys gotta eat um in front yoa God Yahweh, inside da place he goin pick fo you, yoa boys an girls, yoa worka guys an wahines, an da Levi ohana guys dat live inside yoa towns. Dass how you goin stay good inside in front yoa God Yahweh, bout eryting you guys start fo do.
\v 19 Make shua you guys no foget fo take care da Levi ohana guys, all da time you guys live on top yoa land.
\p
\v 20 “Yoa God Yahweh wen make promise fo give you guys mo big land bumbye. Wen he do dat, an you say ‘I like eat meat’ cuz dass how you feel, den you can eat how plenny you like.
\v 21 If da place yoa God Yahweh pick fo put his name, stay too far from you, you can kill animals from da cows an sheeps an goats Yahweh stay give you guys, jalike I wen tell you. An you guys can eat plenny how much you like inside yoa own towns.
\v 22 Eat dem jalike you guys eat wild meat o deer meat. Da peopo dat can come in front God an da peopo dat no can come in front God, dey all can eat um.
\v 23 But make shua you no eat da blood, cuz da blood, az wat give da animal life, an you betta not eat da life wit da meat.
\v 24 You betta not eat da blood. You gotta pour um out on top da groun, jalike watta.
\v 25 No eat um, so dat eryting goin go good fo you guys an yoa kids dat goin come from you guys afta. Cuz you guys stay do wat stay right da way Yahweh see um.
\p
\v 26 “But take da stuff you make spesho fo Yahweh, an da stuff you wen make strong promise fo give Yahweh, to da place he goin pick.
\v 27 Make yoa burn up kine sacrifice on top da altar fo yoa God Yahweh, both da meat an da blood. Da blood fo yoa odda kine sacrifices, you gotta pour um on da side a da altar fo yoa God Yahweh, but you can eat da meat.
\v 28 Take care fo lissen an do all da stuff I stay tell you guys fo do, so dat eryting goin go good fo you guys an yoa kids afta you, cuz you guys do wat stay good an right da way yoa God Yahweh see um.
\p
\v 29 Yoa God Yahweh goin cut off da diffren peopos in front you guys, da guys dat you goin go afta fo take ova dea land. But afta you guys throw dem out, an start fo live on top dea land,
\v 30 an afta you guys wipe dem out, make shua you no fall down inside dea trap. No even aks bout dea gods, an say, ‘How dese peopos make wen dey go down in front dea gods? We goin like do da same ting.’
\v 31 You guys make shua you no go down an pray to yoa God Yahweh da same way dey go down an pray to dea gods, cuz dey do all kine pilau kine stuff dat Yahweh hate. Dey even burn up wit fire dea own boys an girls, fo make sacrifice fo dea gods.
\p
\v 32 “Make shua you guys do eryting I stay tell you guys. No add notting to um, an no take notting away.
\c 13
\s Dey Go Down In Front Odda Gods
\p
\v 1 “If get somebody dat tell you guys dey talk fo God, o somebody dat say dey can dream fo tell you wat goin happen bumbye, take care! If one a dem tell dat dey get proof dat one awesome miracle goin happen fo show God's powa,
\v 2 an maybe wat dey wen tell, happen fo real. But den dey tell, ‘Come! Us goin stick wit odda gods, an work fo dem!’ An you guys neva know dose gods befo.
\v 3 If dass how dey talk, den you guys betta not lissen to dat talka guy o da guy dat dream. Cuz yoa God Yahweh, da One stay give you guys one test fo find out if az fo real you get love an aloha fo him wit eryting how you tink, an wit eryting dat stay inside you.
\v 4 Az yoa God Yahweh you guys gotta follow, an stay scared a him an get respeck fo him. Do wat he tell you guys fo do, an lissen to him. Work ony fo him, an stay tight wit him.
\v 5 Gotta kill dat talka guy o dream guy, cuz he teach dat peopo gotta go agains yoa God Yahweh. Yahweh da One wen bring you guys outa Egypt, an wen do wat he gotta do fo get you guys outa dea wen you was slaves ova dea. Cuz dat kine talka guy o dream guy try turn you guys away from da way yoa God Yahweh tell you fo live. You guys gotta clean out all dat kine bad stuff from you guys.
\p
\v 6 “If yoa own brudda, yoa mudda o fadda's boy, o yoa boy o girl, o yoa wife dat you love, o yoa mos good friend talk to you wea nobody can hear an like try make you like do wat you not suppose to do, an tell, ‘Eh! Us go down in front odda gods,’ no lissen dem. You guys an yoa ancestas neva know dose gods befo.
\v 7 Dey some a da gods fo da peopos aroun you guys, no matta dey live nea o far from you guys, from one end a da land to da odda end.
\v 8 No do wat dey tell. No lissen dem. No pity dem. No give dem chance. No try hide dem o wat dey do.
\v 9 You gotta kill dem fo shua. You gotta be da firs one fo kill um, an den all da odda peopo do da same ting.
\v 10 Throw stones at dem fo kill um, cuz dey try turn you guys away from yoa God Yahweh, dat wen bring you guys outa Egypt, wea you guys was slaves.
\v 11 Den all da Israel peopo goin hear bout um an come scared, an nobody from you guys goin do dat kine bad ting again.
\p
\v 12 “Maybe you goin hear, dat inside one a da towns dat yoa God Yahweh goin give you guys fo live dea,
\v 13 get no good guys from yoa peopo, dat stay try turn da peopo from dat town away from Yahweh to odda gods. Dey tell, ‘Us go down in front odda gods an show respeck fo dem.’ But you guys neva know dose gods befo.
\v 14 If you guys hear dat, den you guys gotta aks good, fo find out fo shua if eryting dass happening, az true. If az true an you guys know fo shua dat dey wen do dis pilau kine ting inside yoa land,
\v 15 den you guys gotta kill all da peopo inside dat town wit yoa swords. Wipe dem all out, da peopo an da animals, jalike dey one sacrifice dat stay foeva fo me ony, Yahweh.
\v 16 Take away all dea stuffs an put um all inside da middle a da town. Den burn up da whole town an all da stuffs. Az goin be jalike one sacrifice fo yoa God Yahweh. Da town goin stay one rubbish pile all da time. Nobody goin build dea again.
\v 17 You guys betta not carry away anyting from dat town dat you was suppose to wipe out fo God. So den, yoa God Yahweh no goin stay huhu no moa. He goin show pity fo you guys, an give you chance, an he goin make you guys come mo plenny peopo, jalike he wen make strong promise to yoa ancestas fo do.
\v 18 Yoa God Yahweh goin do all dis wen you guys lissen to him, an do eryting he tell you guys fo do, dat I stay telling you guys today, fo do wass right da way yoa God Yahweh see um.
\c 14
\s No Copy Odda Peopos Funeral
\p
\v 1 “You guys da kids fo yoa God Yahweh. So no go cut yoaself o shave da front a yoa head wen somebody mahke.
\v 2 Cuz you guys, one peopo dat stay spesho fo yoa God Yahweh. He wen pick you guys from all da peopos on top da earth fo come his spesho peopo dat stay ony fo him.
\s Food Dat Make You So You No Can Come In Front God
\p
\v 3 “No eat no pilau kine ting, notting.
\v 4 Dis da kine animals you guys can eat: cows, sheeps, an goats,
\v 5 deers, gazelle kine deers, red deers, wild goats, da ibex kine deer, da antelope kine deer, an da mountain sheep.
\v 6 You guys can eat any kine animal dat get split in da hoof all da way, an dat chew da food ova an ova.
\v 7 But from da animals dat no mo split in da hoof all da way, no matta dey chew da food ova an ova, you guys no can eat da camel, da rabbit, o da rock badger. No matta dey chew da food ova an ova, dey no mo da split in da hoof all da way, so dey can make you guys so you no can come in front God if you eat um.
\v 8 Same ting fo da pig, make you so you no can come in front God too if you eat um, even if get split in da hoof all da way, cuz no chew da food ova an ova. You guys no can eat dea meat o touch dea body wen dey mahke.
\p
\v 9 “From all da animals living inside da watta, you guys can eat wateva animal get fins an scales.
\v 10 But wateva animal dat no mo fins o scales, you guys no can eat um, cuz dey make you guys so you no can come in front God.
\p
\v 11 “You guys can eat any bird dat no make you stay so you no can come in front God.
\v 12 But dis kine bird, you guys no can eat: da eagle, da scavenja bird, da fish eagle,
\v 13 da kite, da hawk, an any kine falcon bird,
\v 14 all kine raven bird,
\v 15 da ostrich, da nite hawk, da seagull,
\v 16 da small owl, da big owl, da white owl,
\v 17 da pelican, da odda kine scavenja bird, da cormorant,
\v 18 da stork, any kine heron, da hoopoe bird, an da bat.
\p
\v 19 “All da bugs dat fly togedda make you guys so you no can come in front God. No eat dem.
\v 20 But odda kine bugs dat get wings you guys can eat, dat no make you so you no can come in front God.
\p
\v 21 “No eat notting dat you guys find dat awready stay mahke. You guys can give um to one guy from odda place dat live inside yoa town, o sell um to one guy from odda place dat go thru yoa town, an dey can eat um. But you guys stay spesho fo yoa God Yahweh, so no eat um.
\p
Wen you guys cook one young goat, no boil um wit da mudda's milk.
\s Da Ten Percent Fo God
\p
\v 22 “You guys gotta put on da side, ten percent a da food you cut from inside yoa field ery year.
\v 23 Take da ten percent a yoa wheat an barley, yoa new wine, yoa olive oil, an da firs one fo born from yoa cows, sheeps, an goats, to da place yoa God Yahweh goin pick so peopo can go dea find out wat kine god him. Eat um dea in front Yahweh. Dass how you guys goin learn fo get respeck fo yoa God Yahweh all da time.
\v 24 But if dat place Yahweh goin pick stay too far, an yoa God Yahweh wen do plenny good kine stuff fo you guys, so if you no can carry all da stuff to da place yoa God Yahweh goin pick, so peopo can go dea find out wat kine god him,
\v 25 den change God's ten percent a yoa stuff fo silva, an take da silva an go da place yoa God Yahweh goin pick.
\v 26 Use da silva fo buy wateva you like: cows, sheeps, wine o beer, o anyting you like. Den you an yoa ohana goin eat um ova dea in front yoa God Yahweh an stay good inside.
\v 27 Make shua you guys no foget da Levi ohana peopo dat stay inside yoa towns, cuz dey no mo land o odda property from Yahweh.
\p
\v 28 Afta ery three years, take all da ten percent from da food you guys grow inside yoa field dat year, an put um inside da store house inside yoa towns.
\v 29 So dat da Levi ohana peopo dat no mo land o odda property from Yahweh, da peopo from odda place, da kids dat no mo fadda o mudda, an da wahines dat no mo husban, dat live inside yoa town, dey can come an get plenny fo eat. Den yoa God Yahweh goin do plenny good stuff fo you guys, wateva you start fo do.
\c 15
\s Da Year Fo Let Um Go An Foget Bout Wat Somebody Owe You
\p
\v 1 Afta ery seven years, wateva peopo owe you, you guys gotta let um go an no make dem pay you back.
\v 2 Dis how you goin do um. Erybody gotta let go an foget bout wat dey wen lend to anodda Israel guy. Dey no goin aks da odda Israel guy fo pay back wat dey owe, cuz az jalike dea brudda, you know, an az da time wen Yahweh tell erybody fo no go afta wat dey owe you.
\v 3 You guys can aks one guy from odda place pay you back, but you gotta let go an foget bout wateva yoa Israel brudda owe you.
\p
\v 4 “No goin get peopo dat no mo notting wit you guys. Cuz inside da land dat yoa God Yahweh stay give you guys cuz you his kids, he goin do plenny good kine stuff fo you guys.
\v 5 But yoa God Yahweh goin do dis, ony if you guys take care plenny fo do all dis stuff he wen tell you guys fo do, an I ta tings stay tell you guys today.
\v 6 Cuz yoa God Yahweh goin do plenny good kine stuff fo you guys, jalike he wen make promise fo do. You guys goin let plenny peopos borrow stuff from you, but you guys no need borrow stuff from nobody. You guys goin stay in charge a plenny peopos, but nobody goin stay in charge a you guys.
\p
\v 7 “If get bruddas o sistas dat no mo notting inside yoa towns, inside da land dat yoa God Yahweh stay give you guys, no come hard head an come stingy bout dem.
\v 8 Mo betta fo open yoa heart an let um borrow wateva dey need.
\v 9 Take care you guys no tink dis kine no good kine ting, ‘Da year numba seven stay come nea, wen we gotta let go an foget bout wateva somebody owe us an let um go!’ No good you tink lidat an come mean an no give yoa brudda guys notting wen dey no mo notting. If you make lidat, dey can aks Yahweh fo help dem agains you, an you goin get da blame fo do wass bad.
\v 10 Make shua you give yoa brudda wat he need, an no tink stingy kine bout wat you give him. Den, cuz you give to him, yoa God Yahweh goin do plenny good kine stuff fo you guys erytime, wateva you guys stay do.
\v 11 Erytime, goin get some peopo dat no mo notting inside da land. Az why I tell you guys fo open yoa heart fo give stuff to yoa brudda guys wen dey no mo powa an dey need plenny inside yoa land.
\s Hemo Yoa Slave Guys
\p
\v 12 “If one Hebrew guy o wahine sell demself to you, an work fo you fo six year, you gotta let um go wen da numba seven year start.
\v 13 An wen you let um go, no send um away wit notting.
\v 14 Give um plenny from yoa animals, yoa wheat an barley, an yoa wine. Give um, jalike yoa God Yahweh wen give plenny to you guys.
\v 15 Rememba, you guys was slaves too, Egypt side, an yoa God Yahweh wen do wat he gotta do fo get you guys outa dea. Az why I tell you guys today, fo make lidat fo da slave guys wen you let um go.
\p
\v 16 “But if yoa slave guy tell you, ‘I no like go way from you! Cuz I get love an aloha fo you an yoa ohana, an eryting stay good fo me hea wit you!’
\v 17 Den take one spike an push um thru da bottom a his ear lobe in one door an take um out. He goin come yoa slave guy all da time he stay alive. An do da same ting fo yoa slave if az one wahine.
\v 18 No tink az too hard fo let yoa slave guy go, cuz wat he do fo you fo six years was two times mo den wat one guy dat you pay do. Den Yahweh goin make wateva you do come good fo you guys.
\s Da Animals Dat Born Firs
\p
\v 19 “Ery year put on da side fo yoa God Yahweh, ery boy kine animal dat born firs from yoa cows an sheeps an goats. No make da firs boy kine cow dat born work fo you, an no cut da wool from da firs boy kine sheep dat wen born too.
\v 20 Ery year you an yoa ohana goin eat um in front yoa God Yahweh by da place he goin pick.
\v 21 If da animal get someting wrong wit um, if no can walk good, o no can see, o some odda bad kine ting, no kill um fo make sacrifice fo yoa God Yahweh.
\v 22 You can eat um inside yoa own towns. Even da peopo dat no can come in front God can eat um, an da peopo dat can come in front God too, jalike dey stay eat one deer.
\v 23 But you guys no can eat da blood. Pour um on top da groun jalike watta.
\c 16
\s Da Passova
\p
\v 1 “Make spesho da Abib month ery year spring time, an make da Passova time fo yoa God Yahweh, cuz az was da month wen he wen bring you guys outa Egypt nite time.
\v 2 Make sacrifice -- one animal from yoa sheeps, goats, o cows fo da Passova fo yoa God Yahweh. Do um by da place yoa God Yahweh goin pick so peopo can go dea find out wat kine god him.
\v 3 No eat sacrifice meat wit da kine bread dat get yeast, but fo seven days eat ony bread dat no mo yeast, da kine bread you guys eat wen you get hard time. Cuz you guys wen go way real fast from Egypt. So dis goin help you guys rememba all da time you guys stay alive, how you guys wen go way from Egypt.
\v 4 Passova time, no mo nobody all ova da land goin get yeast fo seven days. Da first Passova day, no let da meat from da sacrifice you guys make nite time, stay till in da morning.
\p
\v 5 “You no can make da Passova sacrifice inside odda towns yoa God Yahweh give you guys.
\v 6 Ony make um inside da place yoa God Yahweh goin pick so peopo can go dea find out wat kine god him. Ova dea you guys gotta make da sacrifice fo da Passova, evening time wen da sun go down, dat day ery year fo rememba da time you guys wen come outa Egypt.
\v 7 Cook um an eat um by da place yoa God Yahweh goin pick. Den in da morning go back by yoa tent.
\v 8 Fo six days eat da bread dat no mo yeast. Den, day numba seven, come togedda fo yoa God Yahweh an no do no work dat day.
\s Da Spesho Religious Time Fo Cut Da Wheat
\r (Outa Egypt 34:22; Prieses 23:15-21)
\p
\v 9 “Seven week afta you guys start fo cut da barley,
\v 10 dass wen you  make da Spesho Religious Time fo Cut Food fo yoa God Yahweh. Give him one present you like give from all da good an plenny stuff he stay give you. If get plenny, give um plenny, if ony litto bit, give um litto bit.
\v 11 Dance an sing in front yoa God Yahweh at da place he goin pick so peopo can go dea find out wat kine god him. You, yoa boys an girls, yoa worka guys an wahines, da Levi ohana peopo inside yoa towns, an da peopo from odda place, da kids dat no mo fadda o mudda, da wahines dat no mo husban dat live wit you guys, all dose peopo goin do um.
\v 12 No foget, you guys was slaves inside Egypt, so take care fo do all dese tings you guys gotta do.
\s Da Spesho Religious Time Fo Live In Shacks
\r (Prieses 23:33-43; Census 29:12-38)
\p
\v 13 “Make da Spesho Religious Time Fo Live In Shacks seven days afta you guys bring togedda all da wheat from da place wea you split da wheat, an da wine from da place wea you step da grapes fo smash um.
\v 14 Dance an sing fo da spesho religious time -- you, yoa boys an girls, yoa slave guys an wahines, da Levi ohana peopo, da peopo from odda place, da kids dat no mo fadda o mudda, da wahines dat no mo husban, erybody dat stay inside yoa town.
\v 15 Make da spesho religious time fo seven days, by da place yoa God Yahweh goin pick. Cuz he goin do plenny good kine stuff fo you guys, for da stuff you guys grow, an da stuff you make wit yoa hands. Fo shua, you guys goin stay real good inside cuz a dat.
\p
\v 16 Three times ery year, all da guys gotta show up in front yoa God Yahweh by da place he goin pick fo da Spesho Religious Time Fo Da Bread Dat No Mo Yeast, fo da Spesho Religious Time Fo Cut Food, an fo da Spesho Religious Time Fo Live In Shacks. Nobody goin come in front Yahweh wit notting fo give him.
\v 17 Erybody gotta bring one present dat show how plenny yoa God Yahweh wen do good kine stuff fo you guys.
\s Da Judge Guys
\p
\v 18 “Pick judge guys an leada guys fo all da ohanas inside ery town dat yoa God Yahweh stay give you guys. Dey goin judge da peopo, an do um da right way.
\v 19 No judge da wrong way, an no make mo spesho fo some peopo. No take money from peopo so you do tings fo dem. Cuz dat make da peopo dat know wat fo do erytime jalike dey no can see, an make da peopo dat do wass right erytime jalike dey donno notting.
\v 20 Do da right kine stuff, an ony dat! Cuz den you guys goin take ova da land dat yoa God Yahweh stay give you guys, an live dea.
\s No Go Down In Front Odda Gods
\p
\v 21 No put up any kine wood pos fo da wahine kine idol god Asherah, by da side a da altar you guys make fo yoa God Yahweh,
\v 22 an no put up big kine kapu stones fo da odda gods, cuz yoa God Yahweh hate dem.
\c 17
\s Clean Out Da Bad Kine Stuff
\r (Hebrews 10:28; 1 Corint 5:13)
\p
\v 1 Moses tell da Israel peopo: “No make sacrifice fo yoa God Yahweh wit cows o sheeps dat get someting wrong wit um, cuz az pilau dat kine animal, da way Yahweh see um.
\p
\v 2 “Wen you live inside one a da towns dat yoa God Yahweh goin give you guys, maybe goin get one guy o one wahine dat live dea wit you guys, an dey stay do bad kine stuff da way yoa God Yahweh see um, an go way from da deal he wen make wit you guys.
\v 3 An dat mean, dey go broke his rules, cuz dey go bow down in front odda gods an show respeck to dem, o to da sun, da moon, o da stars.
\v 4 An somebody come tell you guys bout um, den you gotta go find out if az true fo real kine. If get proof dat dis pilau kine stuff wen happen wit da Israel peopo, den you know az true fo real kine.
\v 5 Den go take da guy o da wahine dat wen do dis bad kine ting outside da gate fo da town, an erybody throw stones at dem fo kill dem.
\v 6 If get two o three peopo wen see wat happen tell da same ting, den stay true fo real kine, an you guys gotta kill da guy o da wahine. But you no can kill one guy o one wahine if ony one guy tell dat he wen see dem do someting bad.
\v 7 Da ones dat tell wat dey wen see da guy o da wahine do, dey da ones gotta throw da stones firs fo kill um, den da odda peopo can throw afta. Az how you guys gotta clean out da bad kine stuff from yoa towns.
\s In Front Da Judge
\p
\v 8 “If get stuff, da local judge guy donno wat fo do bout um -- wat kine ting wen happen wen somebody go kill anodda guy, o who get wat kine rights, o why somebody bus up anodda guy. Take dat kine question by da place yoa God Yahweh goin pick.
\v 9 Go by da pries guys from da Levi ohana, an by da guy who stay da main judge dat time. Aks dem, an dey goin tell you guys wat you gotta do.
\v 10 Den, da place yoa God Yahweh goin pick, you guys gotta do wat dey wen tell you. Take care dat you guys do eryting dey tell you fo do.
\v 11 Do eryting da rules teach you fo do, an wateva dey tell you guys stay right fo do. No turn away from wat dey tell you, to da right side o da left side.
\v 12 Whoeva ack like dey no care wat da main judge o da pries guy dat work ova dea fo yoa God Yahweh tell, an dey no lissen, gotta kill dem. You guys gotta clean out da bad kine stuff from da Israel land.
\v 13 Den all da peopo goin hear bout dat an come scared, an dey goin make shua fo lissen da judge o da pries nex time.
\s Da King
\p
\v 14 Moses tell: “Wen da time fo you guys go inside da land dat yoa God Yahweh stay give you, fo take ova an live dea, bumbye you guys goin tink, ‘We like get one king fo stay in charge a us, jalike all da odda peopos aroun us get.’
\v 15 If you tink lidat, make shua you guys make king, ony da guy dat yoa God Yahweh pick. He gotta be one a yoa own brudda guys. No go pick one guy from some odda place, dat not one Israel guy.
\v 16 Ony rememba: da king no can get plenny horses fo himself, o make da peopo go back Egypt side fo get mo horses. Cuz Yahweh, he wen tell you guys, ‘No go back Egypt side no moa!’
\v 17 He betta not get plenny wifes, cuz dey goin make him tink diffren bout Yahweh. He betta not pile up plenny silva an gold.
\p
\v 18 “Wen he come king, he gotta write one copy a all dese rules fo himself. He goin copy um on top one roll up kine book, from da copy da pries guys get, from da Levi ohana.
\v 19 Dat book goin stay wit him, an he gotta read da rules ery day he stay alive. Dass how he goin learn fo get awesome respeck fo his God Yahweh, an take care fo do eryting Yahweh tell um he suppose to do.
\v 20 If he stay read um an do wat da rules tell, den he no goin tink he mo betta den da odda Israel guys, an he no goin turn away from wat God tell um fo do even litto bit to da right side o da lef side. Den him an da ones dat come from him goin stay king ova da Israel peopo long time.
\c 18
\s Wat Da Pries Guys An Da Levi Ohana Guys Get
\r (Matthew 17.5; Mark 9.7; Luke 9.35; Jesus Guys 3.22-23; 7.37)
\p
\v 1 “Da pries guys, from da Levi ohana guys, all da Levi ohana peopos, no goin get land an odda property from Yahweh, da way da odda Israel peopo get um. Da Levi ohana peopo goin eat da meat from da sacrifices da Israel peopo make wit fire fo Yahweh. Dass da kine property dey goin get.
\v 2 Cuz dey no goin get land from Yahweh jalike dea brudda guys. Wat dey goin get, is da right fo be da pries guys fo Yahweh, jalike he wen make promise to dem.
\p
\v 3 “Dis wat da pries guys get da right fo get from da peopo: Weneva da peopo make sacrifice wit cows o sheeps o goats, dey give da pries guys da shoulder meat, da jaw meat, an da parts inside da opu.
\v 4 You guys goin give dem da firs wheat an barley dat you cut, da new wine, an da firs olive oil dat you press, an da firs wool from yoa sheeps wen you cut um.
\v 5 Az cuz yoa God Yahweh wen pick da Levi ohana, all da guys dat goin come from Levi, outa all da odda Israel ohanas, fo stand in front Yahweh an do religious kine stuff fo him all da time, cuz he wen pick dem .
\p
\v 6 If one Levi guy from any town inside Israel wea he stay live, an he come da place yoa God Yahweh goin pick cuz he really like work dea fo Yahweh,
\v 7 he can work dea fo his God Yahweh cuz he God's guy, jalike all da odda Levi ohana guys dat work ova dea in front Yahweh erytime.
\v 8 He goin get da same ting wit dem fo eat from wat da peopo bring fo da Levi ohana guys, no matta he awready get someting from wen he sell his ohana stuffs.
\s Pilau Kine Stuff Dat Yahweh Hate
\p
\v 9 “Wen you guys go inside da land dat yoa God Yahweh stay give you guys, no do da kine pilau stuff dat da peopos dat live ova dea do, cuz Yahweh hate dat.
\v 10 No good if even one a you guys throw yoa boy o girl inside da fire fo make sacrifice. No go find out from da spirits wat goin happen. No tell fortune. No tink da tings you see is da kine sign fo you tell peopo wat goin happen. No put kahuna.
\v 11 No use special kine words fo make peopo so dey no can do notting. No try talk to da spirits, da obake, o da mahke guys.
\v 12 Anybody go make lidat, az pilau, da way Yahweh see um. Da odda peopos make lidat, az why yoa God Yahweh goin push dem outa dea land in front you guys.
\v 13 Still yet, you guys gotta be perfeck, no mo blame fo anyting, da way you gotta be wit yoa God Yahweh.
\s Da Guy Dat Goin Talk Fo God
\p
\v 14 “Da peopo you guys goin push out, dey lissen to da peopo dat tell fortune an try find out from da spirits wat goin happen. But yoa God Yahweh neva let you guys make lidat.
\v 15 But yoa God Yahweh goin bring one guy from yoa own peopo, dat talk fo him to you guys, jalike me. Him, da one you guys betta lissen to.
\v 16 Cuz az wat you guys wen aks yoa God Yahweh fo do, dat time Mount Sinai side wen you guys stay all togedda. You guys tell, ‘No let us hear da voice from oua God Yahweh, o see dis big fire no moa! Bumbye we goin mahke!’
\p
\v 17 “Wen dey say dat, Yahweh tell me, ‘Wat dey say stay good.
\v 18 I goin bring one guy from yoa own peopo, dat talk fo me to da Israel peopo, jalike you, Moses. I goin tell dat guy wat fo say, an he goin tell dem eryting I tell him.
\v 19 Anybody no like lissen wat my talka guy tell cuz he my guy, I goin poin finga dat guy.
\v 20 But anybody dat tell he stay talk fo me, but tell dem stuff dat I neva tell him fo say, o any guy dat talk fo odda gods, you guys gotta kill dem.’
\p
\v 21 “ Maybe you guys goin tink, ‘How us guys can know if one guy tell he talk fo Yahweh, but az not was Yahweh tell um fo say dat?’
\v 22 If one talka guy tell dat he talk fo Yahweh, but wat he tell no happen, den az neva come from Yahweh. Dat talka guy ack big head, but he neva take care fo lissen wat Yahweh tell fo real kine. No come scared a him.
\c 19
\s Towns Fo Run Away Dea
\r (Census 35:9-34; Matthew 5:38; 18:16; John 8:17; 1 Corint 5:13; 2 Corint 13:1; 1 Timoty 5:19)
\p
\v 1 “Yoa God Yahweh goin wipe out da peopos dat live inside da land he stay give you guys. Wen you guys go push dem out an live inside dea towns an houses,
\v 2 den you guys go pick three towns in da middle a da land yoa God Yahweh stay give you guys fo take um ova.
\v 3 Build roads fo go dea, an broke da land in three districk, da land yoa God Yahweh stay give you guys fo come yoa property. Make three districk wit one town inside ery one. So dat whoeva kill somebody, dey can run away dea.
\p
\v 4 “Dis da rule fo whoeva kill somebody an run away to one a dose towns fo stay alive. If dey neva make plan befo time fo kill da guy, dey can run away ova dea inside da town, an nobody get da right fo kill dem.
\v 5 Jalike if somebody go inside one place wit his friend fo cut one tree fo wood, an wen he swing da ax fo cut down da tree, da head fly off an kill his friend. Dat kine guy can run to one a dese towns wea somebody can go if dey wen kill somebody, but no make plan fo kill um befo time, an nobody get da right fo go kill um.
\v 6 If not, den one ohana guy dat get da right fo pay um back goin come huhu, go chase um, catch um up if da town stay far, an kill um, no matta da guy dat run away no mo da blame fo kill da odda guy, cuz he neva hate da guy befo time.
\v 7 Az why I stay tell you guys fo pick three towns fo dat.
\p
\v 8 “Bumbye, yoa God Yahweh goin give you guys mo plenny land, jalike he wen make strong promise to yoa ancesta guys, an he goin give you guys da whole land dat he wen promise dem.
\v 9 Den, if you guys make shua you do eryting dat da rules I tell you guys today tell you fo do -- love yoa God Yahweh, an erytime live da way he like -- den you guys gotta pick three odda towns too.
\v 10 Do dat so you guys no go kill somebody dat neva do notting bad inside da land dat yoa God Yahweh stay give you guys fo come yoa property. Cuz if you guys go kill somebody dat neva do notting bad, den da blame fo kill dem come to you guys.
\p
\v 11 “But if somebody hate anodda guy, an wait fo him so he can jump um, bus um up, an kill um, an den da killa guy run to one a dose towns,
\v 12 da older leadas from his own town goin send peopo fo bring da guy back from da safe town, an give him to da guy from da mahke guy ohana dat get da right fo kill him, cuz he gotta mahke.
\v 13 No show him pity notting. You guys gotta clean out from da Israel peopo da blame fo kill somebody dat neva do notting wrong, so dat eryting can go good fo you guys.
\p
\v 14 “Wen you guys go inside da land dat yoa God Yahweh stay give you guys fo take ova fo come yoa property, no go move da stone dat show wea da land stay fo da guy dat live nea you. Da peopo dat wen stay dea befo you guys wen put dat stone dea.”
\s Peopo Dat Tell Wat Dey Wen See
\p
\v 15 Den Moses tell: “If ony get one guy dat see someting happen, dass not nuff fo tell dat somebody wen do someting bad o do someting wrong. Ony can make proof wit two o three peopo dat see um do um.
\p
\v 16 “If one bad guy poin finga anodda guy fo tell dat he wen see um do something wrong, but he bulai,
\v 17 den da two guys dat make argue wit each odda gotta stand in front Yahweh an da prieses an da judge guys dat stay work inside da office dat time.
\v 18 Da judges gotta aks plenny questions an check out eryting real good an find out if da guy stay bulai. If da guy bulai bout his brudda,
\v 19 den you guys gotta make to da bulaia guy jalike how he wen like make to his brudda. You guys gotta clean out da real bad kine stuff from you guys.
\v 20 Den da odda peopo goin hear bout dat, an come scared, an no do dis kine bad kine ting no mo, eva.
\v 21 No show pity fo dat kine guy! One life fo anodda life, one eye fo anodda eye, one tooth fo anodda tooth, one hand fo anodda hand, one foot fo anodda foot.
\c 20
\s Fighting One War
\p
\v 1 “Wen you guys go fight one war wit da peopo dat stay agains you, an you guys see dey get horses an war wagons, an one army wit mo plenny guys den you get, no scared dem. Cuz yoa God Yahweh, he goin stay wit you guys. He da One wen bring you guys hea from Egypt.
\v 2 Wen you guys almos ready fo fight dem, da pries guy goin come in front yoa army guys fo talk.
\v 3 He goin tell, ‘Lissen you Israel guys! Today you guys stay ready fo go fight da peopo dat stay agains you. No lose fight. No scared dem. No come scared an shaking cuz a dem.
\v 4 Cuz yoa God Yahweh, he da One stay go wit you guys an fight fo you guys. He goin fight da peopo dat stay agains you guys. Az how you guys goin win ova dem.’
\p
\v 5 “Den da main army officers goin tell da army guys, ‘Anybody hea jus wen build one house, an no make party fo start live inside still yet? Dey can go home, cuz if dey mahke bumbye wen dey stay fighting, den some odda guy goin start fo live inside dat house.
\v 6 Get anybody hea dat jus wen plant one grape farm, an no cut da grapes yet? Dey can go home, cuz if dey mahke wen dey stay fighting, den some odda guy goin cut da grapes.
\v 7 Get anybody hea dat wen make promise to one wahine dat he goin marry her, but neva marry her still yet? He can go home, cuz if he mahke wen he stay fighting, den some odda guy goin marry her.’
\v 8 Den da army leadas goin tell da army guys dis too, ‘Anybody hea dat stay lose fight an donno how fo make up his mind, he can go home, cuz bumbye his brudda guys goin lose fight jalike him.’
\p
\v 9 Wen da main army officers pau tell da guys all dis, dey goin put main army leadas fo da war in charge a da army guys.
\p
\v 10 “Wen you go up fo go fight in one big town, tell da peopo dea you no like fight, so make one deal wit dem fo no go fight.
\v 11 Den if dey say az good wat you tell, an den open da gates fo da town, den you goin make all da peopo dea work fo you guys.
\v 12 But if dey say dey no like wat you tell dem, an like fight you guys, den put army guys all aroun da town so nobody can go inside o come outside.
\v 13 Wen yoa God Yahweh give dem to you guys, kill all da guys ova dea wit swords.
\v 14 You guys can take da wahines, da kids, da animals, an all da odda stuff inside da town fo yoaself an you can use um. Az how yoa God Yahweh tell you guys fo make to da guys dat stay agains you.
\v 15 Az how you guys can make to all da towns dat stay far from you guys, but not if az towns fo da peopos dat stay live nea you guys.
\p
\v 16 “Inside da towns a da peopos dat stay live nea you guys, dat yoa God Yahweh stay give you guys fo come yoa property, no leave nobody alive, not even da animals.
\v 17 You guys gotta wipe um all out, jalike you make one big sacrifice fo Yahweh -- da Het peopo, da Amor peopo, da Canaan peopo, da Periz peopo, da Hiv peopo, an da Jebus peopo, jalike yoa God Yahweh wen tell you guys fo do.
\v 18 If you no wipe um out lidat, bumbye dey goin teach you guys fo do same kine real pilau kine stuff dey do wen dey go down in front dea gods. You goin do bad kine stuff agains yoa God Yahweh.
\p
\v 19 “Wen you guys put yoa army guys all aroun one town fo long time so you can take um ova, no cut down dea trees wit ax, cuz you guys can eat da fruit from da trees. Eh! Da trees, dey not peopo, you know, dat you guys gotta fight dem.
\v 20 Da ony kine trees you guys can cut down, dey da trees dat you know dey no give fruit. Cuz den you guys can use da wood fo make ladder an tower fo go up ova da top a dea wall, till you make um give up.
\c 21
\s How Fo Make Wen You Donno Who Wen Kill Somebody
\r (Rome 5:11)
\p
\v 1 “If you find somebody dat stay mahke awready dat stay inside one field inside da land dat yoa God Yahweh stay give you guys fo take ova, an nobody know who wen kill um,
\v 2 den yoa older leadas an judges goin go out an measure how far da body stay to da towns dat stay nea.
\v 3 Den da older leadas from da town dat stay mo nea, goin take one young girl cow dat neva work yet, an no wear one yoke yet,
\v 4 an take um inside one valley dat nobody wen plow o plant, an get one stream dat run all da time. Inside da valley dey goin broke da young cow's neck.
\v 5 Den da pries guys from da Levi ohana, goin come in front, cuz yoa God Yahweh wen pick dem fo work fo him, an fo tell Yahweh dey like he do good stuff fo da peopo cuz dey Yahweh guys, an fo figga out wass right an wass wrong wen peopo make argue o bus up each odda.
\v 6 Den all da older leadas from da mos nea town wea da guy wen mahke, goin wash dea hands ova da young cow, da one dat dey broke da neck, inside da valley nea da town,
\v 7 an dey goin talk fo dea peopo, an tell, ‘Us guys neva make dis guy bleed an mahke, an we neva see wat wen happen.
\v 8 Please Yahweh, take wat we do hea fo you let go yoa Israel peopo an let dem stay da same side wit you. You wen pay da price fo hemo da blame from dem. Please no blame dem cuz somebody wen kill dis guy dat neva do notting wrong.’
\v 9 Az how you guys goin make yoaself come clean from da blame fo kill dis guy dat neva do notting wrong, cuz you guys wen do wat stay right da way Yahweh see you guys.
\s Marrying One War Prisna Wahine
\p
\v 10 “Wen you guys go fight one war agains da peopo dat stay agains you guys, an yoa God Yahweh let you guys win ova dem, an you guys make some a dem prisonas,
\v 11 den if you see one a dem dass one good looking wahine, an like her, you can take her fo come yoa wife.
\v 12 Bring her inside yoa house, an tell her fo cut off all her hair fo show eryting goin be diffren now, an cut her finganails,
\v 13 an throw way da clotheses she was wearing wen dey make her prisona. Afta she live inside yoa house, an cry fo one month cuz she no goin see her fadda an mudda again, den you can sleep wit her an come her husban, an she goin come yoa wife.
\v 14 But den, if you no like her, you can let her go. She can go wea eva she like. But you no can sell her o make her jalike she one slave, cuz you wen make her shame awready.
\s Da Numba One Boy Get Rights
\p
\v 15 “If one guy get two wifes, an he get love fo one but not fo da odda, an da two wifes born boys fo him, but da firs boy come from da wife he no love,
\v 16 den wen he make one will fo give his land to his boys, he no can give mo plenny land to da boy from da wife he love, but not to da boy dat born firs dat come from da wife he no love. Cuz da boy dat born firs from da wife he no love get da right fo own mo land den da odda one.
\v 17 He gotta make um clear, dat da boy dat come from da wife he no love, he da one wen born firs, an his fadda gotta give him two times mo stuff den da odda boy. Cuz da firs boy goin show how strong his fadda stay, dass why he get da rights fo da firs one fo born.
\s One Boy Dat Go Agains His Fadda An Mudda
\r (Galatia 3:13)
\p
\v 18 “If one guy get one boy dat stay hard head an no like do wat anybody tell um fo do, an no lissen to his fadda an mudda, an no matta dey punish him he still no goin do wat dey tell,
\v 19 his fadda an mudda gotta take him an bring him in front da older leaders by da gate fo da town.
\v 20 Dey goin tell da older leadas, ‘Dis boy, our boy, he hard head an no like do wat anybody tell um fo do. He no lissen to us guys. He make any kine, an drink plenny.’
\v 21 Den all da guys from wea he come from goin throw stones at him an kill him. You guys gotta clean out all da real bad kine stuff from you guys. Den all da Israel peopo goin hear bout dat an come scared.
\s Odda Rules
\p
\v 22 “If one guy go do someting real bad dat he gotta mahke, an da peopo kill him, an hang his mahke body on top one tree o pos,
\v 23 you guys no can let his body stay hang dea till da nex morning. Make shua you guys bury him dat same day. Cuz if you let his body hang dea, God goin put kahuna on top da land. An you guys betta not make pilau da land yoa God Yahweh stay give you guys fo come yoa property.
\r (Galatia 3:13)
\c 22
\s Odda Rules
\r (1 Corint 5:13)
\p
\v 1 “If you see dat yoa brudda's cow, sheep, o goat come out from da fence, no ack like you no see um. You gotta bring um back by yoa brudda.
\v 2 If da owna no live nea you an you donno who own da animal, take um home wit you an keep um till da owna come fo try find um. Den give um back to da owna.
\v 3 Do da same ting if you find yoa brudda's donkey, o his clotheses, o wateva he lose. No ack like you no see um.
\p
\v 4 “If you find yoa brudda's donkey o cow dat wen fall down on top da road, help yoa brudda make um stan up again. No ack like you no see um.
\p
\v 5 One wahine no can wear one guy kine clotheses, an one guy no can wear one wahine kine clotheses. Fo yoa God Yahweh, all dat kine stuff pilau fo him.
\v 6 “If you find one bird nest by da side a da road, inside one tree o on top da groun, wit bebe birds o eggs inside, an da mudda stay sitting on top da bebes o da eggs, no take da mudda wit da bebes.
\v 7 You gotta let da mudda go, but you can take da bebes. Dass so eryting goin go good fo you, an you goin live long time.
\p
\v 8 “If you build one new house, make one fence aroun da flat roof. No good somebody fall down from on top dea an you get da blame fo kill somebody.
\p
\v 9 “No plant anodda kine seeds inside da rows a yoa grape field. Cuz if you do dat, den da food from da seeds you wen plant an da grapes from da field, all dat goin come spesho fo Yahweh. You no can eat um.
\p
\v 10 “No plow wit one cow an one donkey togedda unda one yoke.
\p
\v 11 “No wear clotheses dat get wool an linen togedda inside da same cloth.
\p
\v 12 “Tie togedda strings fo make four bunch fo make um jalike tassels, an put um on da four corners a da clotheses you wear.
\s Wat You Betta Not Do Wen You Marry
\p
\v 13 “Wen one guy marry one wife, an afta dey sleep togedda, maybe he start fo no like her.
\v 14 So he bulai bout her an give her bad name, an he tell, ‘I wen marry dis wahine, but wen I sleep wit her, I no find proof dat she neva sleep wit one nodda guy befo!’
\v 15 Den her fadda an mudda goin take da sheet wit blood fo show proof to da older leadas by da town gate dat she neva sleep wit one guy befo.
\v 16 Da girl's fadda goin tell da leada guys, ‘I wen give my girl to dis guy fo marry, but he no like her.
\v 17 Now he bulai bout her an tell, “I no find proof dat yoa daughta neva sleep wit one guy befo.” But I get proof dat she neva sleep wit one guy befo.’ Den her fadda an mudda goin show da cloth in front da older leada guys fo da town.
\v 18 Den da older leadas goin take da guy an punish him.
\v 19 Dey goin make him pay two an one half pounds silva to da girl's fadda, cuz dis guy wen give one Israel girl bad name. An she still goin stay his wife. He no can get da right fo leave her all da time she stay alive.
\p
\v 20 “But if wat da guy say, stay true, an dey no can show proof dat she neva sleep wit one guy befo,
\v 21 dey goin take her by da door a her fadda's house, an ova dea da guys from her town goin throw stones at her so she mahke. Az cuz she wen make stink wit da Israel peopo, wen she fool aroun wen she still stay inside her fadda's house. You guys gotta clean out all da bad kine stuff from you.
\p
\v 22 “If peopo find one guy sleeping wit anodda guy's wife, da guy dat sleep wit her an da wahine gotta mahke. You guys gotta clean out da bad kine stuff from da Israel peopo.
\p
\v 23 “If one guy meet one wahine inside one town, an her fadda an mudda wen promise awready fo give her fo marry one nodda guy, an she neva sleep wit no guy befo, but dat guy wen sleep wit her inside da town,
\v 24 you guys gotta take da guy an da wahine by da gate fo da town an throw stones at dem fo kill dem. Da wahine get da blame cuz she stay inside one town, but she no yell fo help. Da guy get da blame too cuz he wen sleep wit one wahine dat her fadda an mudda already wen promise to anodda guy. You guys gotta clean out da bad kine stuff from you guys.
\p
\v 25 “But if one guy meet one wahine outside da town, dat her fadda an mudda wen promise fo her marry anodda guy, but da guy dat see her ova dea rape her, den ony da guy gotta mahke.
\v 26 No do notting to da wahine, cuz she neva do notting wrong an no need kill her. (Dis jalike wen somebody go bus up an kill anodda guy.)
\v 27 Cuz da guy wen find da wahine outside da town, dat her fadda an mudda wen promise fo her marry anodda guy. No matta she yell, no mo nobody dea fo help her.
\p
\v 28 “An if one guy find one wahine dat neva sleep with one guy, an her mudda an fadda neva promise her to anodda guy still yet, an he grab her an rape her, an somebody find dem togedda,
\v 29 da guy dat rape her gotta pay da fadda one an one quarta pound silva. He gotta marry her an she goin stay his wife. Cuz he wen make her shame, he no mo da right fo leave her, all da time he stay alive.
\p
\v 30 “One guy no can marry his fadda's wife, cuz no good he make shame fo his fadda.
\c 23
\s Da Peopo Dat No Can Go Inside Da Tent Yard
\p
\v 1 “Wen da peopo come togedda fo Yahweh, nobody can come wit dem if dea privates stay hurt cuz somebody wen smash o cut um.
\p
\v 2 “An whoeva born wen da fadda an mudda no stay marry, dea kids an grankids no can come one a Yahweh's peopo fo ten generation.
\p
\v 3 “Nobody from Ammon o Moab o dea kids an grankids can come one a Yahweh's peopo, even if dey wait ten generation.
\v 4 Cuz wen you guys was coming outa Egypt, da Ammon peopo neva come out fo meet you guys wit bread an watta. An da Moab guys wen pay Baalam, Beor's boy from Petor inside Aram Naharaim fo put kahuna on top you guys.
\v 5 But yoa God Yahweh get love an aloha fo you guys. Az why he no lissen Balaam. He change da kahuna kine stuff fo come good stuff fo you guys.
\r (Census 22:4-24:25)
\p
\v 6 No make deal fo come friends wit da Ammon o da Moab peopo, fo do good tings fo dem, all da time you guys stay alive.
\p
\v 7 “No ack to da Edom peopo jalike dey pilau, cuz dey da Esau ohana, yoa bruddas.
No ack to da Egypt peopo jalike dey pilau, cuz you guys wen live inside dea land, no matta you guys come from odda place.
\v 8 Da Edom an da Egypt peopo's grankids can come Yahweh's peopo wen you Israel peopo come togedda.
\s Peopo Dat No Can Come In Front Da Boss
\p
\v 9 “Wen you guys make camp fo go fight da peopo dat stay agains you, no go nea notting pilau.
\v 10 If one guy no can go in front Yahweh cuz nite time he get wet dream o make shishi, he gotta go outside da camp an stay dea all day.
\v 11 But wen da sun almos go down, he gotta wash himself wit watta. Den wen da sun go down, he can go back inside da camp.
\p
\v 12 “Make one place outside da camp an put sign fo one place wea you guys can go fo make shishi an kukae.
\v 13 Take someting so you can dig one puka, an wen you pau make kukae inside da puka, cova um up afta wit dirt.
\v 14 Cuz yoa God Yahweh move aroun inside yoa camp fo take care you guys, so you guys can win agains da peopo dat stay agains you. Yoa camp gotta stay spesho fo Yahweh, so he no see notting dat not okay ova dea, an turn away from you guys.
\s Odda Rules
\p
\v 15 “If one slave guy run away from anodda country an come by you, no give him back to his owna.
\v 16 Let him live wit you guys inside wateva place he like inside one a yoa towns he like. No give him hard time.
\p
\v 17 “Da guys an wahines from da Israel peopo no can fool aroun fo pay inside da temple fo one idol kine god, jalike da Canaan peopo do cuz dey tink az goin make da land grow plenny an da animals get plenny bebe.
\v 18 You guys betta not bring da pay dat one guy o wahine get, dat fool aroun fo pay inside one Canaan kine temple, an bring um inside yoa God Yahweh's house, fo pay fo one strong promise you wen make to him, cuz all dat stay pilau, da way yoa God Yahweh see um.
\p
\v 19 “No make yoa brudda pay interes wen you let him borrow silva o food, o wateva odda ting peopo pay interes fo.
\v 20 You can make one guy from odda country pay interes, but not one brudda from Israel. Cuz you like yoa God Yahweh do good stuff fo you guys, wateva you do, inside da land he stay give you guys fo take ova.
\p
\v 21 “If you make one strong promise to yoa God Yahweh, no be slow fo do um, cuz he goin make shua you do um. An if you no do um, you goin get da blame fo do bad ting.
\v 22 But if you neva make promise, you no goin get blame.
\v 23 Wateva you tell, you gotta make shua fo do um, cuz you wen make one strong promise to yoa God Yahweh wit yoa own mout, an nobody wen give you presha fo do dat.
\p
\v 24 “If you go inside da grape farm dat anodda guy own, you can eat all da grapes you like, but you no can put um inside yoa basket.
\v 25 If you go inside da field dat get wheat o barley dat anodda guy own, you can pick litto bit wheat o barley wit yoa hands, but you no can use one sickle fo cut da wheat o barley.
\c 24
\s Odda Rules
\r (Matthew 5:31; 19:7; Mark 10:4; 1 Corint 5:13)
\p
\v 1 “Get some time wen one guy marry one wahine, an den afta dat he no like her, cuz he find out she wen do someting no good. Den he write one divorce paypa an give um to her, den send her away.
\v 2 Den, afta she go away from him an marry one nodda guy,
\v 3 an dat husban no like her too, he write her one divorce paypa, give um to her, an send her away from him. Ony afta dat, da secon husban mahke.
\v 4 Den her firs husban dat wen divorce her no can marry her again afta she already wen come pilau cuz she sleep wit anodda guy. Az why she no can come in front Yahweh. Cuz da way Yahweh see um, she stay pilau. No go bring da blame fo bad kine stuff on top da land yoa God Yahweh stay give you guys fo come yoa property.
\p
\v 5 “If one guy jus wen marry, no can send him fo fight one war, o do govmen kine work. Fo one year he can stay home wit his wife dat he jus wen marry, an make her stay good inside.
\p
\v 6 “No take da two roun stones from one mill fo make flour, o even da top one, from one guy dat own da stones an owe you someting an you no give um back till he pay. Cuz dat take away da ting he need fo make bread fo stay alive.
\p
\v 7 “If you catch one guy dat wen steal anodda Israel guy fo make him one slave, o try sell him, da guy dat steal um, gotta mahke. You guys gotta clean out da real bad kine stuff from you guys.
\r (Prieses 13)
\p
\v 8 “Wen one guy skin get da kine bad sick dat odda guys can get um, take care you do eryting da prieses from da Levi ohana tell you guys fo do. Make shua you guys do eryting I wen tell dem.
\v 9 No foget wat yoa God Yahweh wen do to Miriam afta you guys wen come outa Egypt an you stay going on da road.
\r (Census 12.10-15)
\p
\v 10 “Wen you lend someting to one Israel guy, no go inside his house fo get wat he like give you fo make shua he goin pay you back.
\v 11 Stay outside da house, an wait till da guy bring you someting fo show dat fo shua he goin pay you back, an bring um outside fo you.
\v 12 If da guy no mo notting, an he ony can give you his coat, no go sleep wen you get da coat wit you still yet.
\v 13 Give him back his coat befo da sun go down ery day, so he can sleep inside um. Den he goin tell you ‘God goin do good tings fo you,’ an yoa God Yahweh goin know dat you wen do someting good.
\p
\v 14 “If one guy work fo you an he no mo notting, an need stuff, no make him wait fo you pay him. No matta he one Israel guy, o he not one Israel guy, but he live inside yoa town,
\v 15 pay him wat you owe him fo wat he wen do ery day befo da sun go down, cuz he no mo notting an he need um fo live. If you no pay him, he goin call to Yahweh agains you, an you goin get da blame fo do someting bad.
\p
\v 16 “No kill da faddas fo punish um fo someting dea kids wen do. An no kill da kids fo punish dem fo someting dea faddas wen do. Erybody gotta mahke fo dea own bad kine stuff.
\p
\v 17 “Make shua you guys do da right ting fo da peopo from odda place, an fo da kids dat no mo fadda o mudda. No take away da coat from one wahine dat no mo husban an keep um till she pay you back wat she owe you.
\v 18 No foget dat you guys was slaves Egypt side, an yoa God Yahweh wen pay da price fo bring you guys hea from ova dea. Az why I tell you guys fo do dis kine stuff.
\p
\v 19 “Wen you guys stay cut wheat o barley inside yoa field, an you foget take home one bunch wheat o barley, no go back get um. Leave um dea fo da guys from odda place, da kids dat no mo fadda o mudda, o da wahines dat no mo husban. Den yoa God Yahweh goin do good tings fo you guys in eryting you guys do.
\v 20 Wen you guys shake da olive trees fo make da olives fall down, no go back to um da nex day. Leave da olives dat still stay on top da tree, fo da guys from odda place, da kids dat no mo fadda o mudda, an da wahines dat no mo husban.
\v 21 Wen you cut da grapes from yoa grape plant, no go back cut da ones you wen miss da firs time. Leave da grapes dat stay dea fo da guys from odda place, da kids dat no mo fadda o mudda, an da wahines dat no mo husban.
\v 22 No foget, you guys was slaves Egypt side. Az why I tell you guys fo do dis kine stuff.
\c 25
\s Odda Rules
\r (Matthew 22:24; Mark 12:19; Luke 20:28; 1 Corint 9:9; 1 Timoty 5:18)
\p
\v 1 “Wen Israel peopo make argue wit each odda, dey gotta take um to da judge. Da judge goin tell wat guy do wass right an wat guy get da blame, cuz he wen do wrong.
\v 2 If dey gotta beat da guy dat get da blame, den da judge tell da guy fo lay down. Da judge helpa guys goin beat um wit one whip in front da judge, how many times da judge tell dem, fo show how bad da ting he wen do.
\v 3 But dey no can hit one Israel guy wit da whip mo den forty times. If dey beat him mo den dat, dey goin make him shame in front da peopo.
\p
\v 4 “No go tie up one cow's mout so he no can eat da wheat o barley wen he stay working fo smash da wheat o barley so you can take out da junks.
\p
\v 5 “If get brudda guys dat stay live togedda, an one a dem mahke, but he no mo boy, da widow no can marry some guy from outside da mahke guy ohana. Her brudda in law gotta marry her, fo get one boy, an he gotta do wat he suppose to do cuz he her brudda in law.
\v 6 Da firs boy she born goin carry da mahke brudda's name, so dat da brudda blood line goin still stay okay fo da Israel peopo.
\p
\v 7 “But if da brudda guy no like marry his mahke brudda's wife, she goin go by da older leadas by da town gate an tell dem, ‘My husban's brudda no like marry me jalike he suppose to do, fo give me one boy fo carry his brudda's name inside Israel!’
\v 8 Den da older leaders fo da guy town goin tell um fo come, an dey goin talk wit him. If he still yet tell, ‘I no like marry her,’
\v 9 den da brudda's widow goin go by him in front da older leadas, take off one a his slippas, spit in his face, an tell, ‘Dis wat oua peopo do to one guy dat no do notting fo his brudda guy blood line!’
\v 10 An da Israel peopo goin call da guy an his kids, ‘Da ohana from da guy dat dey wen take away his slippa.’
\p
\v 11 “If two guys stay fighting, an da wife fo one a dem come fo pull her husban outa dea so da odda guy no can hit um, an she grab da odda guy by his privates,
\v 12 you guys gotta cut off her hand. No go pity her.
\p
\v 13 “Wen you sell stuff, no go rip off somebody wit differen kine weight so you can make some stuff look mo heavy an some stuff mo light.
\v 14 An no rip off somebody wit differen kine basket so you can make some stuff look mo big an odda stuff look small.
\v 15 You guys gotta weigh an measure stuff da right way, jalike all da odda peopo. Dat way, you goin live long time inside da land yoa God Yahweh stay give you.
\v 16 Cuz yoa God Yahweh tell, az no good, wen somebody do like dat an no do da right kine ting.
\p
\v 17 “No foget wat da Amalek peopo wen do to you guys wen you stay come outa Egypt.
\v 18 Wen you guys was tired an worn out, da Amalek guys wen attack you guys, an wipe out da peopo dat no can walk good, dat was behind da oddas. Da Amalek peopo, dey not scared a God.
\v 19 Wen yoa God Yahweh let you guys res from all da peopo aroun you guys dat stay agains you guys, inside da land dat he stay give you guys fo come yoa property, you guys goin wipe out da name a da Amalek peopo, so no mo nobody unda da sky goin rememba dem. No foget dat!
\c 26
\s Da Firs Part A Da Harves
\p
\v 1 Moses tell: “Wen you guys goin go inside da land dat yoa God Yahweh stay give you guys fo come yoa property, an you guys goin take um ova an live dea,
\v 2 den wen you start fo bring in food from da land yoa God Yahweh stay give you guys, take some a da firs tings you guys cut from ery kine food, an put um inside one basket. Den go by da place yoa God Yahweh goin pick fo his name stay dea.
\v 3 Tell da guy who stay da pries guy ova dea dat time, ‘Today I goin tell Yahweh, da God you work fo, dat now I come live inside da land he wen make strong promise to our ancesta guys dat he goin give um to us guys.’
\v 4 Da pries guy goin take da basket from yoa hands, an put um down in front da altar fo yoa God Yahweh.
\v 5 Den you goin tell da pries guy in front oua God Yahweh, ‘My ancesta guy wen come from da Aram land an move house all ova da place. He go Egypt side wit ony litto bit peopo, an stay ova dea. Bumbye dey come one importan nation, wit plenny peopo, an dey come strong.
\v 6 But da Egypt peopo wen make any kine to us guys, an make us suffa an work real hard.
\v 7 Den we wen call Yahweh, da God fo our ancesta guys, fo help us. He hear us an see da trouble an hard work an hard time we get.
\v 8 But den, Yahweh wen do real scary kine stuff, an real plenny awesome tings so erybody can see, fo show who him. Az how he get us outa Egypt, cuz he use his strong powa.
\v 9 Yahweh bring us guys to dis place, an give us dis land, dat ery place get plenny milk an honey.
\v 10 Look, Yahweh! Now I bring you da firs stuff dat wen grow on top da land dat you wen give me.’ Den, put da stuff down in front yoa God Yahweh, an go down in front him.
\v 11 Den you, an da Levi ohana guys, an da peopo from odda place dat stay live wit you guys, you all goin stay good inside cuz a all da good kine stuff yoa God Yahweh stay give you guys an yoa ohana.
\p
\v 12 “Da year numba three dat you live inside da land, dat goin be da year fo da ten percent. Dat mean, wen you pau put on da side da ten percent from all da stuff you wen grow, den you goin give da ten percent to da Levi ohana peopo, da peopo from odda place, da kids dat no mo fadda o mudda, an da wahines dat no mo husban. Dass how dey goin get plenny food so dey can eat um ova dea inside yoa towns.
\v 13 Den go in front yoa God Yahweh an tell him, ‘I wen bring outa my house da ten percent a wat I wen grow dat stay spesho fo Yahweh, an give um to da Levi ohana peopo, da peopo from odda place, da kids dat no mo fadda o mudda, an da wahines dat no mo husban, jalike you wen tell me fo do. I neva mess up wat you tell me fo do, an I neva foget notting.
\v 14 I neva eat notting from da ten percent dat stay spesho fo you wen I stay sore inside cuz somebody mahke, an I no take notting from da ten percent outside da house wen I no can go in front you fo pray. I no give notting from dat fo do someting fo one mahke guy. I wen lissen to you, my God Yahweh, an do eryting you wen tell me fo do.
\v 15 Look down from da place dat stay spesho fo you inside da sky, wea you stay, an do good kine stuff fo yoa Israel peopo, an fo da land you wen give us, jalike you wen make strong promise to our ancesta guys you goin do. Dis land, ery place get plenny milk an honey.’
\s Stick Wit Da Ten Commandments
\p
\v 16 Den Moses tell: “Oua God Yahweh tell you guys today fo stick wit wat he tell you fo do, an wit dese rules he give you guys, an fo make diffren kine to da good peopo an da bad peopo. Take care fo do um all wit all yoa heart an eryting inside you guys.
\v 17 You guys tell today in front erybody, dat Yahweh, he da God fo you guys, an you goin live da way he tell, do wat his rules tell, an wat he tell you gotta do, make diffren kine to da good peopo an da bad peopo, an lissen to wat he tell.
\v 18 An Yahweh tell today in front erybody, dat you his spesho peopo jalike he wen promise, an dat you goin do eryting he tell you guys fo do.
\v 19 An he tell dat he goin make you guys come mo importan den all da odda peopos he wen make. He goin tell good tings bout you guys, an show respeck fo you guys, an give you guys good name! Dass how you guys goin come one peopo dat stay spesho fo yoa God Yahweh, jalike he wen promise.”
\c 27
\s Wat Fo Do Inside Da Canaan Land
\r (Galatia 3:10)
\p
\v 1 Moses an da older leadas fo da Israel peopo wen tell da peopo: “Do all da tings we tell you guys today fo do.
\s Write Da Rules On Top Stones
\p
\v 2 Da same day you guys go da odda side da Jordan Riva, an go inside da land dat yoa God Yahweh stay give you guys, put some big stones up, an cover um wit white plasta.
\v 3 Den, ova dea da odda side da riva, inside da land yoa God Yahweh stay give you guys, da land dat ery place get plenny milk an honey, write on top da stones eryting da rules tell. Yoa God Yahweh wen make promise fo give dat land to you guys.
\v 4 Wen you go ova da odda side da Jordan Riva, you goin put up dese stones on top Mount Ebal ova dea. Den cova da stones wit white plaster, jalike I tell you guys today fo do.
\v 5 By da same place ova dea, make one altar wit stones fo yoa God Yahweh. But no use iron tool fo shape da stones.
\v 6 Make da altar fo yoa God Yahweh wit stones jalike dey stay, an make burn up kine sacrifices on top da altar fo yoa God Yahweh.
\v 7 Make da kine sacrifice fo show dat eryting stay good wit you guys an Yahweh, an eat um ova dea, an stay good inside in front yoa God Yahweh.
\v 8 Do good job fo write all dis teaching on top da stones, so da words stay real easy fo read.”
\s On Top Mount Ebal, Dey Goin Tell How God Can Put Kahuna
\p
\v 9 Den Moses an da pries guys from da Levi ohana tell all da Israel peopo dis: “You Israel peopo, no make noise! Lissen! Today, you guys stay come da peopo fo yoa God Yahweh.
\v 10 Do wat yoa God Yahweh tell you guys fo do, an stick wit his rules an da stuff I tell you guys today.”
\p
\v 11 Dat same day Moses tell da peopo:
\p
\v 12 “Afta you guys go da odda side da Jordan Riva, dese ohana peopo goin go stand on top Mount Gerazim fo tell da good kine tings God goin do fo da peopo: da Simeon ohana, Levi ohana, Judah ohana, Issakar ohana, Joseph ohana, an Benjamin ohana.
\v 13 An dese odda ohana peopo goin stand on top Mount Ebal fo tell da bad kine tings dat goin happen wen God put kahuna on top da peopo: da Reuben ohana, Gad ohana, Asher ohana, Zebulun ohana, Dan ohana, an Naftali ohana.
\p
\v 14 Da Levi ohana goin yell to all da Israel peopo in one loud an high voice:
\p
\v 15 ‘God goin punish anybody dat make one idol kine god, no matta he make um wit wood an cut um wit one knife o melt metal fo make um, an den he put up da idol secret kine. Az pilau, da way Yahweh see um, cuz az ony someting one guy wen make!’
\p
Den all da peopo goin tell, ‘Az right!’
\p
\v 16 Den da Levi guys goin tell: ‘God goin punish anybody dat no mo respeck fo dea fadda an mudda!’
\p
An all da peopo goin tell, ‘Az right!’
\p
\v 17 Da Levi guys goin tell: ‘God goin punish anybody dat move one stone dat show wea anodda guy's land stay!’
\p
All da peopo goin tell, ‘Az right!’
\p
\v 18 Da Levi guys goin tell: ‘God goin punish anybody dat make one guy dat no can see, go da wrong way on top da road!’
\p
All da peopo goin tell: ‘Az right!’
\p
\v 19 Da Levi guys goin tell dem: ‘God goin punish whoeva no make right in front da judge to one guy from some odda place, one kid dat no mo fadda o mudda, o one wahine dat no mo husban.’
\p
All da peopo goin tell: ‘Az right!’
\p
\v 20 Da Levi guys goin tell: ‘God goin punish anybody dat sleep wit his fadda's wife, cuz he goin make shame fo his fadda!’
\p
All da peopo goin tell: ‘Az right!’
\p
\v 21 Da Levi guys goin tell: ‘God goin punish anybody dat make sex wit one animal!’
\p
All da peopo goin say: ‘Az right!’
\p
\v 22 Da Levi guys goin tell: ‘God goin punish any guy dat make sex wit his sista, no matta her his fadda's girl o his mudda's girl.
\p
All da peopo say: ‘Az right!’
\p
\v 23 Da Levi guys goin tell: ‘God goin punish da guy dat make sex wit his mudda-in-law!’
\p
All da peopo goin tell: ‘Az right!’
\p
\v 24 Da Levi guys goin tell: ‘God goin punish anybody dat kill one guy an nobody know he kill um!’
\p
All da peopo goin tell: ‘Az right!’
\p
\v 25 Da Levi guys goin tell: ‘God goin punish anybody dat take money unda da table fo kill somebody dat neva do notting bad!’
\p
All da peopo goin tell: ‘Az right!’
\p
\v 26 Da Levi guys goin tell: ‘God goin punish da guy dat no show respeck fo all dese rules cuz he no do eryting wat dese rules tell!’
\p
All da peopo goin tell: ‘Az right!’
\c 28
\s Good Tings Goin Happen To Peopo Dat Lissen To Yahweh
\p
\v 1 Moses tell: “If you guys lissen fo real kine to oua God Yahweh, an take care fo do eryting I stay telling you today fo do, den he goin make you guys come mo importan den all da odda peopos on top da earth.
\v 2 All dis good kine stuff goin come by you guys, an stay wit you guys, if you lissen yoa God Yahweh.
\q
\v 3 “He goin make good kine stuff happen fo you guys inside da towns an all ova outside da country side.
\q
\v 4 “Good kine stuff goin happen to yoa kids, da food you grow, da bebes from yoa animals -- da bebe cows an bebe sheeps.
\q
\v 5 “Good kine stuff goin happen wen you cut yoa food fo make yoa bread.
\p
\v 6 “Good kine stuff goin happen wen you come inside an go outside.
\p
\v 7 “Yahweh goin make you guys win ova da guys dat stay agains you guys, wen dey come fo attack you. Dey goin come fo you guys from one side, but dey goin run away to seven places wen you chase um.
\p
\v 8 “Yoa God Yahweh goin say da ting, fo make good tings happen to yoa storehouse, an fo eryting you guys do. He goin make good tings happen all ova da land he stay give you guys.
\p
\v 9 “Yahweh goin do jalike he wen make strong promise fo do -- he goin make you guys come real good fo come da peopo dat stay spesho fo him, if you guys make shua you stick wit his rules an live da way he tell you fo make.
\v 10 Den all da diffren peopos on top da earth goin see dat Yahweh stay own you guys, an dey goin stay scared a you guys.
\v 11 Yahweh goin make eryting come plenny fo you guys, yoa kids, da bebes from yoa animals, an da food you grow from yoa groun, inside da land he wen make strong promise to yoa ancestas he goin give you guys.
\p
\v 12 Yahweh goin open up da sky wea he keep plenny good stuffs, fo send rain on top yoa land da right time, an make eryting you guys do, come out good. Plenny peopos goin borrow stuff from you, but you guys no goin need borrow from nobody.
\v 13 Yahweh goin make you guys come jalike da head, jalike da mos importan peopo fo eryting, not jalike da tail, da peopo dat not importan. If you guys lissen wat yoa God Yahweh tell you fo do, jalike I stay tell you guys today fo do, so you take care fo do um, den you guys erytime goin come on top, an no stay down da bottom.
\v 14 No turn away from all dis stuff I stay tell you guys today fo do, an no even go litto bit on da right side o da left side, an no follow odda gods an work fo dem.
\s Bad Tings Goin Happen If You Guys No Lissen
\r (Prieses 26:14-46)
\p
\v 15 “But all da kahuna goin go on top you, if you guys no lissen wat yoa God Yahweh tell, if you no take care fo stick wit all da stuff an da rules I tell you guys today fo do. If you no do um, den all dis bad kine stuff goin come on top you guys an make you guys lose fight.
\p
\v 16 “God goin put kahuna on top you guys inside da towns an outside da towns.
\p
\v 17 “God goin put kahuna on top you guys wen you go get food an make yoa bread.
\p
\v 18 “God goin put kahuna on top you guys wen you born kids, wen you cut da food you grow, an wen yoa cows an sheeps born bebes.
\p
\v 19 “God goin put kahuna on top you guys wen you come inside an wen you go outside.
\p
\v 20 “Yahweh goin bring bad kine stuff on top you guys cuz you get kahuna on top you. Az why you goin come all mix up, an peopo goin tell you guys dat you wrong no matta wat you guys do. Az how you guys goin come wipe out quick time, if you guys do bad kine stuff an go way from Yahweh.
\v 21 Yahweh goin make you guys come real sick till he wipe out you guys from da land wea you come an he stay give you da right fo take um ova.
\v 22 He goin give you guys wit real bad kine sick. You guys goin get high fever an swelling. He goin make da land real hot, an no mo rain. He goin make da plants dry up wit da sick an wit mildew. Da sick goin stay till you guys mahke.
\v 23 Da sky ova yoa head goin come dry jalike da bronze metal, da groun unda yoa feets goin come real hard jalike da iron.
\v 24 Yahweh goin make da rain come down jalike dust an jalike powda. Goin come down from da sky till you guys all wipe out.
\p
\v 25 “Yahweh goin make da peopo dat stay agains you guys win ova you. You goin go fo attack dem from one place, but run away from dem to seven places. Peopo in all da diffren countries on top da earth goin bum out wen dey tink bout you guys.
\v 26 Wen you guys mahke, yoa mahke bodies goin come food fo all da birds inside da sky an da animals on top da earth, an no mo nobody goin chase um so dey go way.
\v 27 Yahweh goin give you guys boils jalike he wen do to da Egypt peopo. He goin give you bad kine lumps, bad kine sores, an da itch. An no mo nobody can make um come mo betta.
\v 28 He goin make you guys come pupule. You no goin can see, an you goin come all mix up an no can tink.
\v 29 Even noon time, you guys goin feel aroun fo go some place, jalike one guy dat no can see notting cuz fo him, eryting stay dark. Eryting goin go bad fo you guys. Fo shua, erytime peopo goin give you guys hard time, an steal yoa stuffs. No mo nobody goin help you guys.
\p
\v 30 “If you make promise fo marry one wahine, anodda guy goin take her an rape her. If you go build one house, you no goin live inside um. If you goin plant one grape farm, you no goin start fo eat um an feel good bout um.
\v 31 Da guys dat take ova yoa land goin kill yoa cows in front yoa eyes, but you no goin eat da meat. Dey goin make you give up yoa donkeys, but dey no goin bring um back. Dey goin give yoa sheeps an goats to da peopo dat stay agains you guys, an no mo nobody goin get um back fo you.
\v 32 You goin see da guys dat stay agains you give yoa boys an yoa girls to anodda peopo fo come slaves, an you goin come tired ery day looking fo dem come back, but you no can do notting.
\v 33 One peopo dat you donno, goin eat da food from yoa land dat you wen work hard fo grow. You guys no goin get notting fo keep, you ony goin get hard time erytime.
\v 34 Da sights you guys see goin make you guys come pupule.
\v 35 Yahweh goin make yoa knees an legs get boils dat come real sore, an no mo nobody can make um come good. Dey goin go from unda yoa feets to da top a yoa head.
\p
\v 36 “Yahweh goin make you an da king you wen put ova you, go by anodda nation dat you guys an yoa ancestas neva know befo. Ova dea, you guys goin go down in front odda gods dat peopo make from wood an stone.
\v 37 All da peopos ova dea wea Yahweh make you guys go, no goin believe cuz a wat happen to you. Dey goin talk bout you guys fo make dea own peopo tink plenny, an dey goin make fun a you guys.
\p
\v 38 “You guys goin take plenny seeds fo plant inside yoa field, but you ony goin cut litto bit food, cuz da grasshoppas goin eat um up.
\v 39 You guys goin plant grape farms an take care um, but you no goin bring in da grapes o drink da wine, cuz da worms goin eat um.
\v 40 You guys goin get olive trees all ova yoa land, but you no goin use da olive oil, cuz da olives goin fall down from da trees.
\v 41 You guys goin get boys an girls, but you no goin keep dem fo stay wit you guys, cuz odda peopo goin make dem prisonas an take dem away.
\v 42 Plenny crickets goin take ova all yoa trees an eat da food from yoa land.
\p
\v 43 “Da peopo from odda place dat live wit you guys goin come da bosses ova you guys mo an moa, an you guys no goin come importan mo an moa.
\v 44 Dey goin let you guys borrow stuff from dem, but dey no need borrow stuff from you. Dey goin be jalike da head, an you guys goin be jalike da tail.
\p
\v 45 “All dis bad kine stuff goin come on top you guys cuz you get kahuna. Jalike da bad kine stuff goin chase you guys, an take ova you guys, till you guys wipe out. Az cuz you guys no like lissen yoa God Yahweh, an stick wit da rules an da stuff he tell you guys you gotta do.
\v 46 Da bad kine stuff goin come, jalike az one sign from God dat show you guys an yoa kids wat can happen all da time.
\v 47 All dat goin happen cuz you guys no stay real good inside wen you work fo yoa God Yahweh, an even wen eryting was plenny good fo you guys.
\v 48 So den you guys goin work fo da peopo dat stay agains you guys, not fo Yahweh. He goin send dem agains you guys, an you goin get notting fo eat, an come thirsty, wit no mo clotheses on, an no mo notting. Jalike he goin put one iron yoke on top yoa neck, till he wipe out you guys.
\p
\v 49 “Yahweh goin bring one peopo agains you guys from one far place, from da mos far part a da earth. Dey goin come real quick, jalike one eagle dat fly down real fas fo grab one small animal. You no goin undastan dea language.
\v 50 You guys goin come scared wen you see dem cuz dey look real scary. Dey no mo respeck fo da ol peopo, an dey not nice to da young guys.
\v 51 Dey goin eat all yoa bebe animals an da food dat you guys wen plant, till dey wipe out you guys. Dey no goin leave you guys wheat o barley, new wine, new olive oil, bebe cows, o bebe sheeps. Dey goin wipe you guys out till you no mo notting!
\v 52 Dey goin put army guys all aroun da big towns inside yoa land, so nobody can go inside o come outside, till da tall strong walls aroun da towns fall down, da ones you guys wen trus fo help you. Dey goin put dea army guys aroun all da towns inside da land dat yoa God Yahweh stay give you guys.
\p
\v 53 Cuz a dat, you even goin eat yoa own kids -- da meat from da bodies a yoa boys an girls dat yoa God Yahweh wen give you guys. Cuz da peopo dat stay agains you guys goin put dea army guys all aroun you guys, an you guys goin suffa plenny.
\v 54 Even da mos easy an nice guy wit you guys dat get plenny aloha, he goin come greedy an no share food wit his own brudda o his own wife dat he love, an his kids dat stay still yet.
\v 55 He no goin give even one a dem da meat from his own mahke kids fo eat, da one he stay eating. Goin be az all he get, cuz da peopo dat hate you guys goin make you guys suffa plenny, wen dey put army guys aroun all yoa big towns.
\v 56 Even da mos easy an nice wahine wit you guys dat get plenny aloha, dat she no even let da bottom a her feet touch da groun, she goin be too greedy fo give to her husband dat she love, o her own boy an girl.
\v 57 Even da stuff dat come out wen she born one bebe, an eat her bebe dat she born, an she goin eat um so nobody know, wen da peopo dat stay agains you guys goin make you guys suffa plenny, wen dey put army guys all aroun yoa big towns.
\p
\v 58 “If you guys no take care fo stay do eryting wat inside dese rules stay write inside dis book, an no show respeck fo wat kine god, yoa awesome God Yahweh,
\v 59 he goin send real bad kine sick fo punish you guys an yoa kids, wit real long hard time, an real bad kine sick dat stay long time.
\v 60 He goin bring all da diffren kine sick dat he wen bring to da Egypt peopo on top you guys, da ones dat you guys stay scared um, an dey goin stick wit you guys.
\v 61 Yahweh goin bring all kine sick an hard time too, da kine stuff dat dis book wit da rules no even tell bout, till you guys come wipe out.
\v 62 You guys was real plenny peopo, jalike da stars inside da sky, but you guys goin come ony litto bit peopo, cuz you neva lissen yoa God Yahweh.
\v 63 Jalike Yahweh stay good inside befo time, wen he wen make eryting come good fo you guys, an make you guys come plenny peopo, bumbye he goin come good inside wen he goin wipe you guys out. He goin take you guys outa da land dat you goin go inside now fo take um ova.
\p
\v 64 “Den Yahweh goin make you guys go all ova wea diffren peopos stay, from one side a da earth to da odda side. Wen you go dea, you guys goin go down in front odda gods, da kine gods dey make from wood an stone. You guys an yoa ancestas neva know dat kine gods befo.
\v 65 Ova dea wit dose peopos you guys no can res. You no goin find one place fo rest da bottom a yoa feets. Yahweh goin make you guys stay shaking inside plenny, yoa eyes goin come tired from waiting, an you goin lose fight inside yoa heart.
\v 66 You guys erytime donno wat goin happen. You goin stay scared nite time an day time. You no goin know fo shua if you goin stay alive.
\v 67 Morning time you guys goin say, ‘I like nite time fo come!’ Nite time you guys goin say, ‘I like morning time fo come!’ Cuz you guys stay real scared inside, an you goin see real bad kine stuff happen.
\v 68 Yahweh goin send you guys back Egypt side inside boats wit sail, no matta I wen tell you guys dat you no goin go dat way again, eva. Ova dea you guys an wahines goin try selling yoaself to da peopo dat stay agains you guys, fo come dea slaves. But nobody goin like buy you guys.
\c 29
\p
\v 1 All dis, az wat da deal say, dat Yahweh tell Moses fo make wit da Israel peopo Moab side, an da deal he wen make wit dem befo, Mount Sinai side.
\s Dey Make Da Deal Again
\r (Rome 11:8; Hebrew 10:6-8)
\p
\v 2 Den layta, Moses tell all da Israel peopo fo come, an he tell dem:
\p
“You guys wen see all wat Yahweh do to Pharaoh Egypt side, to all Pharoah's leada guys, an all his peopo an land.
\p
\v 3 “Wit yoa own eyes you guys wen see all da bad kine stuff, an da awesome an all kine stuff he do fo show who him.
\v 4 But still yet today Yahweh no give you da eyes fo see, o da ears fo hear, so you guys no undastan all dat.”
\p
\v 5 Moses tell dat Yahweh say, “All da time fo forty years dat I Yahweh wen lead you guys inside da boonies, yoa clotheses an yoa slippas neva come ol.
\v 6 You guys neva eat bread, but I give you guys da manna fo eat, an you no drink wine o beer. I Yahweh do all dis so you guys goin know inside dat me, Yahweh, I yoa God fo real kine.”
\p
\v 7 “Wen we reach dis place, Sihon da king fo Heshbon, an Og da king fo Bashan an dea peopo come out fo fight wit us, but we fight um an win ova dem.
\v 8 We take dea land an give um to da Reuben ohana, da Gad ohana, an half da Manasseh ohana, fo come dea property.
\p
\v 9 “Take care fo do eryting dis deal say, so den eryting come good fo you guys, wateva you stay doing.
\v 10 All you guys stay standing today in front yoa God Yahweh -- yoa leadas, da head guys, da older leadas, da officers, an all da odda guys hea from da Israel peopo,
\v 11 yoa kids, yoa wifes, da peopo from odda place dat live inside yoa camp dat chop yoa wood an carry yoa watta.
\v 12 You guys stay standing hea fo take dis deal wit yoa God Yahweh today, so dat he goin make um good wit one strong promise.
\v 13 He make solid wit you guys dat you guys his peopo, an dat he yoa God, jalike he wen make promise to you guys an our ancesta guys, Abraham, Isaac, an Jacob.
\v 14 Yahweh stay make dis deal wit one strong promise, not ony wit you guys
\v 15 dat stay standing hea wit us today in front oua God Yahweh, but wit da oddas dat no stay hea today.
\p
\v 16 “You guys know how we wen live inside Egypt, an how we wen pass da odda countries wen we stay coming ova hea.
\v 17 You guys wen see dey had dea pilau kine idol kine gods dat dey make from wood an stone, silva an gold.
\v 18 Make shua no mo any guy o wahine, o ohana wit you guys, who goin turn away from oua God Yahweh, an go down an show respeck to da idol kine gods from dose peopos. Make shua get no mo notting wit you guys, dat make eryting come pilau.
\p
\v 19 “Wen dat kine guy hear wat dis strong promise say, he aks fo good kine stuff fo himself from Yahweh. Cuz a dat he tink, ‘I goin be okay, no matta I still yet do wat I like.’ Cuz he tink lidat, God goin wipe out da land dat get watta, an da dry land too.
\v 20 Yahweh no goin eva let dat kine guy go. Yahweh no take dat kine stuff. All da bad kine stuff dis book tell, goin come to dat kine guy, an Yahweh goin take his name out from unda da sky.
\v 21 Yahweh goin take dat guy from all da ohanas inside da Israel peopo, jalike dis book tell bout all da real bad kine tings dat goin happen to da peopo dat no do all dat da rules tell inside dis deal.
\p
\v 22 “Yoa kids dat goin come layta on, an da peopo from far place, goin see all da bad kine stuff dat stay come on top da land, an da kine sick dat Yahweh give um.
\v 23 Da whole land goin stay jalike was burn up from salt an sulfur. Nobody goin plant notting dea. No can make notting grow dea. No mo notting green come up. Goin be jalike wen Sodom an Gomorrah towns wen come wipe out, an wen Yahweh wen bus up Admah an Zeboiim towns cuz he real mad wit dem.
\v 24 All da odda peopos goin aks, ‘How come Yahweh do dis to dis land? How come he so plenny huhu?’
\p
\v 25 “An some odda peopo goin tell, ‘Az cuz da peopo dea no like take da deal dat Yahweh, da God fo dea ancesta guys, wen make wit dem wen he bring dem outa Egypt.
\v 26 Dey wen go off an work fo odda gods, an show dem respeck, idol kine gods dey donno befo, dat God neva give dem da right fo pray to.
\v 27 Az why Yahweh stay real huhu wit dis land an da peopo inside. So he bring on top dem all da bad kine stuff he wen tell dem he goin bring cuz dey get kahuna, jalike stay write inside dis book.
\v 28 Yahweh stay real huhu, an he no like wat dey stay do. Az why he take dem outa dea land an throw dem inside one nodda land, an dass how dey stay now.’-”
\p
\v 29 Moses tell: “Da tings dat oua God Yahweh no show us, he know um, but he no show us guys. But da tings he stay show, dass da kuleana fo us guys an our kids all da time. So den we gotta follow all da rules he teach us fo do.”
\c 30
\s Afta Da Peopo Turn To Yahweh, Dey Do Good
\r (Rome 10:6-8)
\p
\v 1 “Wen all dis good kine stuff an bad kine stuff dat I put in front you guys, come on top you guys, afta yoa God Yahweh send you guys all ova da earth fo make you live wit diffren peopos, den maybe you guys goin tink real good ova dea bout wat God wen tell you.
\v 2 An wen you an yoa kids come back by yoa God Yahweh, an lissen him wit all yoa heart an wit eryting inside you, jalike I wen tell you guys today fo do,
\v 3 den wen you guys come back, yoa God Yahweh goin make tings come good again fo you guys, an get love an pity fo you guys. He goin bring you guys back togedda from all da diffren countries he wen send you guys go.
\v 4 Even if God make you guys go mo far place unda da sky, from dea yoa God Yahweh goin bring you guys back togedda from ova dea.
\v 5 He goin bring you guys back inside da land dat oua ancesta guys wen own befo time, an you goin take um ova. He goin make good tings happen to you guys, mo den oua ancesta guys, an make you guys come mo plenny peopo den dem.
\v 6 Yoa God Yahweh goin make you and da peopo dat going come from you bumbye, an like come his peopo, jalike he goin put one mark on top yoa hearts an yoa kids hearts fo show dat you his peopo. Den you guys goin get love an aloha fo him wit all yoa hearts, an wit eryting inside you guys, so you guys goin live fo real kine.
\v 7 Yoa God Yahweh goin put all dis bad kahuna kine stuff I wen tell you bout, on top da peopo dat hate you guys an stay give you guys hard time.
\v 8 But you guys, you goin lissen Yahweh again, an do eryting he tell you guys fo do, jalike wat I stay tell you guys today.
\v 9 Den Yahweh goin do mo plenny good kine stuff fo you guys, wateva you guys stay do, an give you guys plenny kids, an plenny bebe animals, an plenny food dat you guys grow from yoa land. He goin stay feel real good inside again wen he tink bout you guys, an make good tings happen to you guys, jalike he wen feel good inside bout yoa ancesta guys.
\v 10 He goin do dat wen you guys lissen him, an stick wit his rules an do da tings he tell you gotta do, dat I wen write inside da book wit da rules, afta you guys come back by yoa God Yahweh wit all yoa heart, an wit eryting inside you.
\s Pick Good Kine Stiuff an Live, O Bad Kine Stuff an Mahke
\r (Rome 10:6-8)
\p
\v 11 “Wat I stay telling you guys fo do now, az not too hard fo you guys, an not too far from you guys.
\v 12 Wat I telling you fo do, no stay up dea inside da sky, so you guys gotta aks, ‘Who goin go up dea fo get um, an tell us guys, so we can do um?’
\v 13 No even stay da odda side da ocean, so you guys gotta aks, ‘Who goin go ova dea fo get um fo us, an tell us, so we can do um?’
\v 14 Nah! All dis stuff stay nea, right hea by you guys awready. Stay inside yoa mout, an inside yoa heart, so you guys can lissen an do um.
\p
\v 15 “Look! Today I put in front you guys two ways you guys can do: you guys can live an good kine stuff happen, o bad kine stuff can happen an you guys mahke.
\v 16 Me, I tell you guys today wat fo do: get love an aloha fo yoa God Yahweh, live da way he tell you guys fo live. Make shua you stay do wat he tell you fo do -- eryting you gotta do, an eryting da rules he give you tell you wat fo do. Den you guys goin live an come mo plenny peopo, an yoa God Yahweh goin do good kine stuff fo you guys inside da land wea you guys going go, fo make um come yoa property.
\p
\v 17 “But if yoa heart turn away from Yahweh, so you guys no lissen, an if odda peopo like you guys go da wrong way so you guys go down in front odda gods an show respeck fo dem,
\v 18 I tell you guys today, dat you goin wipe out fo shua. You guys no goin stay long time inside da land da odda side da Jordan Riva, wea you goin go inside fo take ova an make um yoa property.
\p
\v 19 “Today I call all da powers inside da sky an da earth fo tell me wat dey see you guys doing. Cuz I put in front you guys two ways you guys can do: you guys can live o you guys can mahke. You guys can get good kine stuff, o you guys can get real bad kine stuff. Now take life! So den you an yoa kids goin live.
\v 20 Den you guys goin get love an aloha fo yoa God Yahweh, an lissen to him, an stay tight wit him. Cuz Yahweh, he da One make you live fo real kine, an let you guys stay plenny years on top da land he wen make strong promise fo give to yoa ancesta guys, Abraham, Isaac, an Jacob.’-”
\c 31
\s Joshua Goin Take Charge Afta Moses
\r (Hebrews 13:5)
\p
\v 1 Den Moses go out an tell dis to all da Israel peopo:
\v 2 “Me, I one hundred twenty years ol now, an I no can go hea an dea no moa. Yahweh wen tell me, ‘You no goin go da odda side da Jordan Riva!’
\v 3 Yoa God Yahweh, he da One goin go da odda side in front you guys. He goin wipe out da peopos in front you guys, an you guys goin take ova dea land. Joshua, he goin go ova in front you guys too, jalike Yahweh wen tell.
\v 4 Yahweh goin make to dem guys jalike he wen do to Sihon an Og, da kings fo da Amor peopo. He wen wipe out da peopo an dea land.
\v 5 Yahweh goin give dem to you guys, an you gotta make to dem eryting I wen tell you guys fo do.
\v 6 Make strong an no bum out. No come scared an shaking cuz dey look tough, cuz yoa God Yahweh, he da One go wit you guys. He no goin let you guys go by yoaself, o bag from you!”
\p
\v 7 Den Moses tell Joshua fo come by him. He tell um in front all da Israel peopo, “Make strong an no bum out, cuz you goin go wit dis peopo inside da land dat Yahweh make one spesho promise to our ancesta guys dat he goin give dem da land. You da one goin tell da ohana wat land az deas, fo come dea property.
\v 8 Yahweh, he da One goin go in front you guys, an he goin stay wit you guys. He no goin let you guys go by yoaself, o bag from you guys! No scared! No lose fight!”
\s Dey Read Da Rules
\r (Outa Egypt 23:10-11; Prieses 25:17)
\p
\v 9 So Moses wen write down dese rules an give um to da pries guys from da Levi ohana, dat carry da Box Fo Rememba Da Deal Wit Yahweh, an he give um to all da older leadas fo da Israel peopo.
\v 10 Den Moses tell dem, “Afta ery seven years, wen erybody gotta let go an foget bout wat odda peopo owe dem, den erybody gotta make Da Spesho Religious Time Fo Live Inside Shacks.
\v 11 Dass da time wen all da Israel peopo come fo stand in front oua God Yahweh, by da place he goin pick. Dat time, you goin read dese rules to dem so dey all can hear you.
\v 12 Call all da peopo togedda -- da guys, da wahines, an da kids, an guys from odda place dat live inside yoa towns, so dey can lissen an learn so dey stay scared a oua God Yahweh, an so dey stay do eryting dese rules tell um fo do.
\v 13 Dea kids who donno dese rules, dey gotta hear um an learn so dey stay scared a oua God Yahweh, all da time you guys stay live inside da land dat you guys goin go da odda side da Jordan Riva fo take ova.”
\s Da Israel Peopo Goin Go Agains Yahweh Bumbye
\p
\v 14 Yahweh tell Moses, “Now, da time stay nea wen you goin mahke. Call Joshua, an go stand togedda inside da Tent Fo Come Togedda Wit Me. I goin make him da one in charge a da Israel peopo from now on.” So Moses an Joshua go Da Tent Fo Come Togedda Wit Yahweh.
\p
\v 15 Den Yahweh come inside da tent an dey can see him, inside one cloud dat go from da groun to da sky. Dat cloud stay ova da door fo da tent.
\v 16 Yahweh tell Moses, “Litto bit mo time, an you goin go res wit yoa ancesta guys. But dese peopo, dey goin go down in front da odda gods dat da diffren peopos pray to ova dea inside da land dey goin go inside fo take ova. Dey goin do tings wit dose gods, jalike wen peopo go fool aroun behin dea husban o wife back. Dey goin leave me, an broke da deal I wen make wit dem.
\v 17 Dat time wen dat happen, I goin come huhu wit dem, an leave dem behind. I goin hide my face from dem, an I goin wipe dem out. Plenny trouble an hard time goin happen to dem. Dat time, dey goin tell, ‘Fo shua, us guys get all dis bad kine stuff happen cuz oua God no stay wit us, yeah?’
\v 18 Den I goin hide my face from dem dat time fo shua, cuz a all da bad kine stuff dey do wen dey bag from me an start fo pray to odda gods.
\p
\v 19 “Now you an Joshua, write down dis song fo yoaself. Den you, Moses, you teach um to da Israel peopo, so dey can sing um. Cuz dis song goin tell wat I wen see um do, fo judge dem.
\v 20 Wen I bring dem inside da land wea get plenny milk an honey erytime, da land I wen make spesho promise to dea ancestas fo give dem, dey goin eat all dey like an come full, an eryting goin go good fo dem. Den dey goin turn away an go down in front odda gods, an work fo dem. Dey goin go agains me, an broke da deal I wen make wit dem.
\v 21 Layta, wen plenny bad kine stuff an hard time come on top dem, dis song goin tell wat I wen see um do, fo judge dem, cuz dea kids no goin foget da song, an dey goin sing um. I know wat dey stay tink wat dey like do, even now befo I bring dem inside da land dat I wen make spesho promise fo give to dem.”
\v 22 So Moses wen write dis song dat same day, an teach um to da Israel peopo.
\p
\v 23 Dis, how Yahweh wen tell Joshua, Nun boy, wat he gotta do: “Stay real strong, wit plenny powa! Cuz you goin bring da Israel peopo inside da land I wen make spesho promise fo give dem. An me, I da One goin stay wit you.”
\p
\v 24 Afta Moses pau write inside one book wat dese rules tell, from da start to da end,
\v 25 he tell dis rule to da Levi ohana guys dat carry da Box Fo Rememba Da Deal Wit Yahweh:
\v 26 “Take dis book wit da rules inside, an put um by da side a da Box Fo Rememba Da Deal Wit Yahweh. Da book goin stay dea fo tell wat I wen see da Israel peopo do, fo judge dem.
\v 27 Cuz I know how you guys wen go agains me, an dat you guys hard head. I know you guys wen go agains Yahweh wen I still yet stay hea wit you guys, an I know dat you guys goin go agains him even mo plenny afta I mahke!”
\v 28 Bring togedda by me, all da older leadas from yoa ohanas, an da officer guys, so I can tell dem dis so dey hear. I goin call all da powers inside da sky an on top da earth fo tell wat dey wen see da peopo do, fo judge dem.
\v 29 Cuz I know dat afta I mahke, you guys goin mess up eryting real bad, an make um come pilau. You guys goin turn away from me an no do wat I tell you guys fo do. An layta, plenny bad kine stuff goin come on top you guys, cuz you guys goin do da kine stuff dass bad, da way Yahweh see you guys doing. You guys goin make him come huhu cuz a da tings you guys make wit yoa hands.”
\s Moses Song
\p
\v 30 Den Moses tell wat dis song say from da start to da end so all da Israel peopo dat stay dea togedda can hear um.
\c 32
\s Da Song
\r (Rome 10:19; 12:19; 15:10; 1 Corint 10:20,22; Hebrews 1:6; 10:30)
\q
\v 1 Lissen, peopo on top da earth an in da sky,
\q2 Lissen wat I goin tell.
\q
\v 2 I like wat I teach fall down jalike da rain.
\q2 An wat I tell come jalike wen get plenny dew,
\q Jalike small kine rain on top da new grass,
\q2 Jalike plenny rain on top young plants.
\p
\q
\v 3 I goin tell wat kine god Yahweh.
\q2 I goin tell good stuff bout how big oua God stay!
\b
\q
\v 4 God, he jalike one big stone.
\q2 Wateva he do, erytime stay perfeck.
\q Eryting he do stay right.
\q2 He da God dat do wat he say.
\q He no do notting wrong.
\q2 He ony do tings wat stay good an right.
\q
\v 5 But you Israel peopo,
\q2 You do pilau kine stuff dat he no like.
\q You not his kids no moa
\q2 Cuz you all mess up inside.
\q2 You all crooked an kapakahi kine peopo.
\v 6 You guys tink, az how you goin pay back Yahweh
\q2 Doing pilau kine stuff, o wat?!
\q You guys, stupid!
\q2 You guys donno wat fo do!
\q God, he yoa Fadda,
\q2 He da One dat wen make you guys, so he own you,
\q2 He wen make you guys come one solid nation.
\b
\q
\v 7 Tink bout da time long time ago.
\q2 Tink bout all yoa ancesta guys dat wen stay alive befo.
\q Aks yoa fadda, an he can tell you wat wen happen.
\q2 Aks da older peopo, an dey can tell you too.
\v 8 Da God Dass Mo Importan Den All Da Odda Gods,
\q2 Wen he split up all da diffren peopos
\q2 An give ery one dea own land,
\q He make one place fo ery peopo,
\q2 An fo da Israel peopo, he give nuff land fo how plenny peopo dem.
\q
\v 9 Yahweh wen pick his peopo,
\q2 Fo come dea God.
\q Da peopo dat come from Jacob,
\q2 Dey his property.
\b
\q
\v 10 Yahweh wen find da Israel peopo inside da dry boonies,
\q2 One place wea no mo notting
\q2 Ony get wild animals making big noise.
\q But Yahweh stay all aroun da Israel peopo so notting hurt dem
\q2 An take care dem.
\q He make shua notting hurt dem,
\q2 Jalike one guy make shua nobody hurt his eye.
\q
\v 11 Jalike one eagle dat move stuff inside da nest,
\q2 An move aroun ova dea bebes.
\q Jalike Yahweh wen he wen put out his wings fo catch his peopo,
\q2 An carry dem jalike wit his feathers.
\q
\v 12 Yahweh, he da ony One wen lead his peopo,
\q2 No mo odda god from odda place wen help him.
\p
\q
\v 13 Yahweh, he put da Israel peopo wea dey stay
\q2 In da up country inside da Canaan land.
\q He let um eat stuff dat grow inside da fields,
\q2 An honey from da bees inside da cliffs,
\q2 An oil from da olive trees dat grow wea get hard rocks.
\q
\v 14 He give um soft cheese from dea cows
\q2 An milk from dea sheeps an goats,
\q2 An da bestes kine meats from da bebe sheeps an goats,
\q An meat from da big kine sheeps dat stay Bashan side, an goats,
\q2 An wheat dat get big seed.
\q2 He let um drink da juice from da grapes, da red wine.
\b
\q
\v 15 But Jeshurun, az da Israel peopo dat stay do wass right,
\q2 Dey wen come fat an do dea own ting.
\q Eh, I talking bout you Israel peopo!
\q2 You guys eat too much an come fat.
\q You wen bag from da God dat wen make you.
\q Da One dat stay solid jalike one big stone
\q2 Da One get you guys outa trouble,
\q2 But you guys tink he stupid, an bag from him.
\q
\v 16 You guys make him come jealous
\q2 Cuz you go pray to da gods fo da odda peopos.
\q You guys make him come real mad
\q2 Cuz you like da pilau idol kine gods.
\q
\v 17 You make sacrifice to da aumakua kine spirits.
\q2 But dat kine spirits, dey not real gods!
\q You guys neva know dose spirits befo.
\q2 Dey new kine spirits fo you peopo.
\q Befo time, yoa ancesta guys neva stay scared a dem
\q2 O show respeck fo dem.
\q
\v 18 You guys wen bag, an go way from da real God
\q2 Jalike da Rock fo you guys,
\q2 An da One dat stay jalike yoa Fadda.
\q You guys foget da God dat wen bring you guys inside dis world.
\b
\q
\v 19 Yahweh see wat his peopo stay do,
\q2 So he throw um out
\q An no like dem be his peopo no moa,
\q2 Cuz he no take wat his own boys an girls stay do.
\q
\v 20 Yahweh tell, ‘I goin hide my face from dem,
\q2 An see wat goin happen to dem.
\q Cuz dey one crooked kine peopo.
\q2 Dey kids dat I no can trus.
\q
\v 21 Dey make me come jealous
\q2 Cuz dey pray to da kine gods dat not gods fo real.
\q Dey make me come huhu
\q2 Cuz a dea idol kine gods dat good fo notting.
\q Me, I goin make dem come jealous
\q2 Cuz I goin do good tings fo some no good peopo, not dem.
\q I goin make dem come huhu
\q2 Cuz I goin do good tings fo one nation dat donno notting, not dem.
\q
\v 22 I stay huhu jalike one fire dat stay burn.
\q2 Da fire dat burn all da way
\q2 To da bottom a da Mahke Peopo's Place,
\q Goin burn up da earth an da food dat grow on top um.
\q2 Goin burn up da foundations fo da mountains.
\b
\q
\v 23 I goin pile up plenny bad kine tings
\q2 I goin do to da Israel peopo,
\q2 Jalike I goin shoot all my arrows by dem.
\q
\v 24 I goin make dem come skinny
\q2 Cuz dey no goin get food.
\q Dey goin get real bad kine sick
\q2 Dat make dem feel like da sick stay eat um up.
\q I goin make um feel real bad
\q2 Befo I wipe um out!
\q I goin tell da wild kine animals fo bite dem,
\q2 An send da poison kine snake
\q2 Dat crawl aroun on top da dirt.
\q
\v 25 Outside on da street,
\q2 Goin get war dat goin wipe out dea kids.
\q An even inside dea houses,
\q2 Dey goin come real scared.
\q Same ting fo da young guys an young wahines,
\q2 Da bebes an da ol guys,
\q2 Dey goin mahke too.
\q
\v 26 I wen tell dat I goin put dem all ova da place,
\q2 An all da peopo in da world goin foget who dem.
\q
\v 27 But bodda me plenny, dat maybe
\q2 Da peopo dat stay agains da Israel peopo
\q Goin talk stink
\q2 Cuz dey no undastan,
\q An cuz a dat, dey goin tell,
\q2 ‘Us guys strong!
\q Az why we wen win ova dem!
\q2 Yahweh neva do all dis!’
\b
\q
\v 28 “Da Israel peopo,
\q2 Dey da kine peopo dat no can tink.
\q2 Dey no undastan notting.
\q
\v 29 I like dem know wat fo do erytime,
\q2 An know how come all dis ting happen,
\q An know wat goin come in da end.
\q2 But az not how dey tink!
\q
\v 30 Dey no tink how come one army guy
\q2 Make one tousand Israel army guys run away!
\q2 O how come two a dea army guys
\q2 Make ten tousand Israel army guys run away!
\q Ony one way dat can happen!
\q2 Gotta be, Yahweh wen leave dem!
\q Da One dat befo time stay strong
\q2 Jalike one Rock fo dem,
\q2 But now, he give up on dem!
\q
\v 31 Cuz dea gods dat stay strong jalike one rock
\q2 Fo da guys dat stay agains us guys,
\q Dey not strong like oua Rock!
\q2 Even da guys dat stay agains us know dat!
\q
\v 32 Da guys dat stay agains us,
\q2 Jalike da grape plant dat come from da Sodom peopo,
\q2 An from da fields Gomorrah side.
\q Dea grapes taste sour
\q2 An can kill you!
\q
\v 33 Da wine dey make,
\q2 Jalike az poison from snakes,
\q2 Da kine can kill peopo.
\b
\q
\v 34 Me, eryting I make plan fo do,
\q2 I keep um good place wit me
\q2 An lock um up wea I put all my rich stuffs.
\q
\v 35 Wen dat time come, I da One goin pay back an punish da peopo.
\q2 Wen da right time come, jalike dea feets goin slip.
\q Da time fo wipe dem out, coming pretty soon.
\q2 An dey goin mahke real quick.
\p
\v 36 Yahweh goin be da judge
\q2 Dat goin tell his peopo dey no mo blame.
\q2 He goin show love an pity fo his worka guys
\q Wen he see dat dey no mo powa
\q2 An no mo da Israel guys dea,
\q2 No matta dey slave guys o not slave guys.
\q
\v 37 Yahweh goin tell his peopo,
\q2 ‘Eh, da odda peopo gods, wea dey stay?!
\q Dey suppose to be jalike one rock fo you guys go hide by dem!
\q2 Now, wat happen to dem?!
\q
\v 38 Wea da gods dat wen eat da fat from yoa sacrifice?
\q2 Da ones dat wen drink da wine from yoa drink sacrifice?
\q Let dose gods stand up fo help you guys!
\q2 Let dem give you guys one place fo hide!
\b
\q
\v 39 Now see, dis me, I God fo real kine!
\q2 No mo odda god but me!
\q I can make peopo mahke, an I can give dem life.
\q2 I can hurt dem an I can make dem come good.
\q2 An no mo nobody can get dem outa da kine trouble I give um.
\b
\q
\v 40 I put up my hand to da sky
\q2 Fo make one strong promise.
\q I tell:
\q2 ‘Fo shua I stay foeva!
\q
\v 41 Wen I make my sword sharp an shiny,
\q2 I goin use um cuz I da judge,
\q I goin punish da peopo dat stay agains me
\q2 An pay back da peopo dat hate me.
\q
\v 42 Wen I fight, goin be
\q2 Jalike my arrows stay drunk from da blood,
\q An my sword goin eat da bodies a da ones I goin kill
\q2 A da prisonas bodies too,
\q An da heads a da army guys dat stay agains me,
\q2 An no cut hair, fo show dey serious fo fight.’
\p
\q
\v 43 All you peopos, yell plenny
\q2 Cuz you stay good inside bout Yahweh's peopo!
\q2 Cuz he goin pay back da ones dat wen kill his worka guys.
\q He goin pay back da peopo dat stay agains him.
\q2 He goin bring his peopo an land back da same side wit him.”
\p
\v 44 Moses wen come wit Joshua, Nun boy, an tell eryting dis song say so da peopo can hear um.
\v 45 Wen Moses pau tell da Israel peopo eryting bout dis song,
\v 46 den he tell dem, “Tink plenny bout all dis importan stuff dat I wen tell you guys today, so you guys goin tell yoa kids dey gotta lissen an do eryting dese rules tell.
\v 47 Dis, az not stuff dat no mean notting fo you. Dis, az yoa life! If you lissen dis stuff I tell you, you guys goin live long time inside da land da odda side da Jordan Riva dat you going take ova.”
\s Moses Goin Mahke On Top Mount Nebo
\p
\v 48 Dat same day, Yahweh tell Moses,
\v 49 “Go up inside da Abarim mountains to Mount Nebo inside da Moab land, dat stay across Jericho, an den look all ova Canaan, da land I goin give da Israel peopo fo come dea property.
\v 50 Afta you climb up da top a dat mountain, you goin mahke an go back to yoa peopo, jalike yoa brudda Aaron wen mahke on top Mount Hor.
\v 51 Dis cuz you two guys neva do wat I wen tell you guys fo do, in front da Israel peopo by da Meribah watta place nea Kadesh town, inside da Zin boonies, da time you neva show respeck fo me in front dem. You neva show dat I da God dat stay good an spesho, dat time.
\v 52 Az why you ony goin see da land from dis side da riva. You no goin go inside da land dat I stay give da Israel peopo.”
\c 33
\s Moses Aks God Fo Do Good Tings Fo Da Israel Peopo
\p
\v 1 Dis da good tings dat Moses, da guy dat know God, wen tell wat he like God do fo da Israel peopo, befo Moses mahke.
\v 2 Moses tell,
\q
“Yahweh wen come from Mount Sinai.
\q2 He come fo dem
\q Jalike wen da sun come up from Mount Se`ir.
\q2 He shine from Mount Paran.
\q He come wit plenny angel messenja guys
\q2 Dat stay spesho fo him,
\q2 From da south, from da sides a da mountain.
\q
\v 3 Yahweh, fo shua you get love an aloha fo da Israel peopo.
\q2 All da ones dat stay spesho fo you,
\q2 Jalike dey stay inside yoa hand.
\q Dey go down in front yoa feets,
\q2 An dey learn stuff from you.
\q
\v 4 Us Jacob peopo learn da rules
\q2 Dat me, Moses, wen give all us guys,
\q2 Da spesho ting we get wen we come togedda.
\q
\v 5 God, da king fo da Israel peopo dat stay do wass right,
\q2 Wen da leadas fo da peopo all come togedda
\q2 Wit da ohanas from Israel.
\v 6 \p
Den Moses tell dis bout da Reuben ohana:
\q
“Let Reuben an his ohana peopo stay alive an no mahke,
\q2 But no let dem come plenny peopo.”
\p
\v 7 Dis wat Moses tell bout da Judah ohana:
\q
“Yahweh, lissen da peopo from dat ohana.
\q2 Bring dem togedda wit da odda Israel peopo.
\q Let dem fight fo take care demself
\q2 Wit dea own powa.
\q Be da One dat help dem
\q2 Wen dey fight da peopo dat stay agains dem!”
\p
\v 8 Dis wat Moses tell bout da Levi ohana:
\q
“Yahweh, yoa Tummim an Urim stones,
\q2 Az ony fo da main pries guy you stay tight wit
\q2 Fo find out wat you like.
\q You wen give da Levi peopo one test Massah side,
\q2 An wen judge dem by da Meribah watta.
\q
\v 9 Dat time, da Levi guys neva make diffren kine
\q2 Even to dea own fadda an mudda guys.
\q Dey neva even let go dea own bruddas,
\q2 O even dea own kids.
\q Cuz dey take care fo do wat you tell, Yahweh,
\q2 An dey watch ova da deal you wen make wit da peopo.
\q
\v 10 Da Levi guys teach yoa rules to da odda Jacob peopo,
\q2 (Az da Israel peopo),
\q An dey teach how you make diffren kine
\q2 To da good peopo an da bad peopo.
\q Da Levi guys burn incense in front you,
\q2 An make burn up kine sacrifices on top yoa altar.
\q
\v 11 Yahweh, make eryting da Levi ohana do come out good.
\q2 Stay good inside bout da work dey do wit dea hands.
\q Cut down da peopo dat go agains dem.
\q2 So da ones dat hate dem no can make lidat again.”
\p
\v 12 Dis wat Moses tell bout da Benjamin ohana:
\q
“Da guys Yahweh get love an aloha fo,
\q2 I like dey get res an no mo trouble
\q2 Cuz dey stay tight wit him.
\q Da God Dass Mo Importan Den All Da Odda Gods
\q2 Take care dem all da time,
\q Da ones Yahweh get love an aloha fo,
\q2 Jalike Yahweh stay carry dem on top his back.”
\p
\v 13 Dis wat Moses tell bout da Joseph ohana:
\q
“I like Yahweh do plenny good kine stuff fo dea land,
\q2 An give dem da bestes kine dew
\q2 Dat come from da sky,
\q2 An da watta from deep undaneat da groun.
\q
\v 14 I like da land get da bestes stuff da sun make grow,
\q2 An da bestes stuff dat come up ery month,
\q
\v 15 Da bestes kine stuff from da ol mountains
\q2 An da hills dat stay foeva,
\q
\v 16 Da bestes stuff from da earth
\q2 An eryting inside um,
\q An da tings dat da One inside da bush dat wen burn
\q2 Give cuz he like you guys.
\q I like da Joseph ohana get all dis good kine stuff,
\q2 Cuz Joseph jalike one ali`i an da bestes den his bruddas.
\q
\v 17 Da Joseph ohana dey big an strong,
\q2 Jalike one king,
\q2 Jalike one bull cow dat wen born firs.
\q Da Joseph ohana get plenny powa,
\q2 Jalike one wild cow dat get big horn,
\q An wit da horn dey poke all da differen peopos same time,
\q2 Even da one dat stay mos far place on top da earth.
\q Az how da ten tousand Ephraim ohana peopo dat come from Joseph stay,
\q2 An da tousands inside da Manasseh ohana dat come from Joseph.”
\p
\v 18 Dis wat Moses tell bout da Zebulun an Issakar ohana.
\q
“You Zebulun ohana,
\q2 Stay good inside wen you go out some place.
\q An you Issakar ohana,
\q2 Stay good inside wen you stay home inside yoa tent.
\q
\v 19 Dey goin call peopo from da odda ohanas
\q2 Fo come by dea mountain
\q2 Fo make da good an right kine sacrifices ova dea.
\q Dey goin eat plenny stuff from da sea,
\q2 An da rich kine stuff dat stay hide inside da sand.”
\p
\v 20 Dis wat Moses tell bout da Gad ohana:
\q
“I like peopo tell dat Yahweh do good kine stuff fo dem
\q2 Cuz he make da Gad ohana land mo big.
\q Dey live dea jalike one lion
\q2 Dat can take off yoa arm
\q2 O even da skin from yoa head.
\q
\v 21 Da time da leada guys fo all da peopo come togedda,
\q2 Dey keep da bestes land fo you Gad guys,
\q2 Cuz you da real leadas.
\q You Gad peopo make diffren kine
\q2 To da good peopo an da bad peopo,
\q2 Da way Yahweh like do, da Judge fo da Israel peopo.”
\p
\v 22 Dis wat Moses tell bout da Dan ohana.
\q
“Da Dan peopo jalike one young lion
\q2 Dat live Bashan side.
\q From dea, he attack
\q2 Da peopo dat stay agains him.”
\p
\v 23 Dis wat Moses tell bout da Naftali ohana.
\q
“Yahweh stay real good inside
\q2 Bout how da Naftali peopo ack.
\q He do plenny good kine stuff fo dem.
\q2 He tell um fo take ova da land
\q2 From da wes side Galilee Lake an south from dea.”
\p
\v 24 Dis wat Moses tell bout da Asher ohana.
\q
“I like Yahweh do plenny good kine stuff fo da Asher ohana,
\q2 Mo den fo da odda ohanas.
\q2 I like Yahweh stay mo good inside bout dem
\q2 Den bout da odda ohanas.
\q I like dea olive trees give plenny oil,
\q2 So plenny, dey even can wash dea feets wit olive oil.
\q
\v 25 You Asher guys, I like you get iron an bronze bars fo yoa gates,
\q2 So nobody can hurt you all da time you stay alive.
\b
\q
\v 26 “No mo odda god like da God fo Jeshurun,
\q2 Az da Israel peopo dat stay do wass right,
\q He ride from one side da sky to da odda side
\q2 Fo help you guys.
\q He ride jalike da clouds inside one war wagon fo him,
\q2 Cuz he awesome.
\q
\v 27 Da God dat stay from befo time,
\q2 He take care you guys.
\q2 Undaneat you guys, get his arms dat stay foeva.
\q He goin throw out da peopo dat stay agains you guys.
\q2 He goin tell, ‘Go wipe dem out!’
\q
\v 28 Dass how da Israel peopo goin live,
\q2 An nobody goin hurt dem.
\q Da place wea dey live,
\q2 Nobody goin bodda dem o wipe um out.
\q Da land get plenny wheat an barley an new wine
\q2 An da sky give plenny dew dea.
\q
\v 29 You Israel peopo can stay good inside!
\q2 No mo nobody jalike you guys.
\q2 Yahweh wen get you guys outa trouble.
\q Jalike he yoa shield,
\q2 He help you guys.
\q Jalike he yoa awesome sword,
\q2 He fight fo you guys.
\q Da peopo dat stay agains you guys
\q2 Goin come scared an shaking in front you guys.
\q2 You guys goin walk all ova dea backs.”
\c 34
\s Moses Mahke
\p
\v 1 Den Moses wen climb up from da flat country inside Moab to Mount Nebo, up da top a da Pisgah ridge, across Jericho. Ova dea Yahweh show him da whole land, from Gilead to Dan,
\v 2 all da Naftali land, da land fo Efraim an Manasseh, all da land fo Judah to da Mediterranean Sea west side,
\v 3 da Negev country sout side, an all da land from da Jericho Valley (az Palm Tree Town), all da way to Zoar town.
\v 4 Den Yahweh tell him, “Dis, da land I wen make spesho promise fo give to Abraham, Isaac, an Jacob. I wen tell um. ‘I goin give dis land to da peopo dat come from you guys.’ I stay let you see um wit yoa own eyes, but you no goin go da odda side da Jordan Riva fo go dea inside um.”
\p
\v 5 Den Moses, da guy dat work fo Yahweh, he mahke ova dea Moab side, jalike Yahweh wen tell him.
\v 6 Yahweh wen bury Moses inside Moab, inside da valley in front Beth Peor town. But even today, no mo nobody know wea he stay bury.
\v 7 Moses was one hundred an twenty year ol wen he mahke, but his eyes still see good an he still yet stay strong.
\v 8 Da Israel peopo wen stay inside da flat country place Moab side thirty days, cuz dey stay sore inside an cry plenny afta Moses mahke, till da time fo dat pau.
\p
\v 9 Den God spirit take ova Joshua, Nun boy, an make um know wat fo do erytime. Cuz befo Moses mahke, he wen put his hands on top Joshua fo show he da one goin lead da peopo afta him. So da Israel peopo lissen Joshua, an do wat Yahweh tell Moses dey gotta do.
\s How Da Israel Peopo Tink Bout Moses
\p
\v 10 From dat time no mo nobody talk fo God like Moses talk to da Israel peopo. Yahweh wen know Joshua, jalike wen one guy stay talking wit his friend.
\v 11 Moses wen do all da awesome an unreal tings inside Egypt fo show to Pharaoh, all his leada guys, an all da peopo inside da land.
\v 12 Cuz no mo nobody eva wen show all da strong powa an all da scary kine tings dat Moses wen do in front all da Israel peopo.