\id 1sa
\mt2 Book Numba One Bout
\mt Samuel
\h 1 Samuel
\c 1
\s Elkanah An His Ohana
\r (Luke 1:48)
\p
\v 1 Had one man, yeah, his name Elkanah. His house stay Ramah town, dass up country Efraim side, you know. Jeroham his faddah, an Elihu his granfadda, Tohu his great granfadda, an dey get Zuf dat wen live Efraim side fo dea ancesta.
\v 2 Elkanah get two wifes -- Hannah and Peninnah. Peninnah get kids, but Hannah no mo.
\p
\v 3 Ery year, Elkanah take his wifes an kids, an go Shiloh town fo pray God house, an make sacrifice fo Yahweh, Da God Ova All Da Armies. Dat time, da pries guys ova dea was Hofni and Finehas, an Eli da main pries guy, dea fadda.
\v 4 Ery year, afta Elkanah kill da sacrifice animal, he give Peninnah some a da meat fo her an her kids eat um.
\v 5 But Hannah, her da wife Elkanah love da bestes. Dass why Elkanah give her even mo plenny, no matta Yahweh no let her get bebe.
\p
\v 6 But Peninnah, yeah! Eh, she no mo respeck fo Hannah. She humbug Hannah, an make Hannah come plenny sore inside, jus cuz Yahweh no let Hannah get bebe.
\v 7 Plenny years, weneva dey all go Yahweh house, same ting: Peninnah make lotta trouble fo Hannah, so dat Hannah cry plenny, an she no like eat notting.
\p
\v 8 So one time, eh, Elkanah aks Hannah, “Wassa matta?! I see you crying plenny times, an you no eat, an you all da time sad! Az cuz you no mo bebe, o wat? But you get me fo take care you, you know, an dass even betta den get ten boys, aah?
\s Hannah Aks God Fo Give Her One Boy Kine Bebe
\p
\v 9-10 One time, wen dey at da place Yahweh stay, Shiloh town, Eli da pries guy stay sitting on top his pries chair by da door.
\p Elkanah guys pau eat. But den, Hannah feel real junk. So she stan up an go outside fo pray to Yahweh. An she start fo cry an no can stop!
\v 11 Hannah make one strong promise to God. She tell,
\q “Eh, you Yahweh, Da God Ova All Da Armies,
\q2 You awesome!
\q2 An I yoa slave!
\q You know how plenny I stay suffa.
\q2 So I like fo you, no foget me! Take care me!
\q2 You my boss, az why.
\q If you give me one boy bebe,
\q2 I make dis promise:
\q2 I going hanai him ony fo you.
\q An jus fo show dat he going be yoa boy, foeva,
\q2 Nobody goin cut his hair, eva!”
\s Wat Eli Tell Hannah
\p
\v 12 Hannah pray long time in front Yahweh. Eli stay watching her, watching her mout move,
\v 13 cuz Hannah praying one quiet prayer -- her mout stay moving, but she no say notting loud. Eli tinking, “Dis wahine, fo shua she pilute!”
\v 14 He wen yell at her, “Aay! Cut da show awready! No mo shame o wat? Pau drinking already. Go sobah up, yeah?!”
\p
\v 15 Hannah tell um, “Oh, mista, sorry, yeah? I not wat you tink! I not one pilute! I neva drink notting! Me, I jus one wahine dat donno wat fo do! So I stay praying hea in front Yahweh wit my gut. I tell Him all my pilikia.
\v 16 I no like you tink I good fo notting. I praying, cuz fo real, I all hamajang inside, cuz I get plenny stuff dat stay bodda me an bum me out, from long time!
\p
\v 17 Eli tell her, “Den go, an I like eryting stay good fo you. An I pray dat God, da God fo da Israel peopo, goin give you, wat you wen aks him fo.”
\p
\v 18 Hannah say, “Oh, please, you da boss. Try tink good kine stuffs bout me, yeah?!” Den, cause she not feeling sad no mo, she wen go eat someting.
\s Samuel Born
\p
\v 19 Next morning, Elkanah and his family get up early. After dey make prayers, dey go home to Ramah. Elkanah go make sex with Hannah, and Yahweh ansa her prayer.
\v 20 Bumbye, she come hapai, and born one boy. She name da boy, Samuel. She call um dat, cuz she tell, “I wen aks Yahweh fo him!”
\s Dey Give Samuel To Yahweh
\p
\v 21 Nex year, come time again, fo Elkanah and his family fo go Shiloh, and make sacrifice to Yahweh jalike he stay do ery year, an fo do one nodda ting he wen make promise fo do.
\v 22 But Hannah not ready fo go. She tell him, “ Bumbye wen I no need nurse da boy no moa, I go take him to Yahweh house, and leave um, an he going stay dea all da time.”
\p
\v 23 Elkanah ansa her, “OK, watevas you tink best. Stay home, till you no need nurse him. Yahweh going make yoa promise come true.” So, Hannah stay home, an nurse her boy till he no need.
\p
\v 24 Afta da boy no need nurse no moa, Hannah take him to Shiloh. Samuel young yet, but she take him to Yahweh house at Shiloh. She bringing wit her, one three-year-ol bull, one bag flour, one goat skin full a wine, all fo make her sacrifice.
\p
\v 25 Afta dey kill da bull fo make sacrifice fo Yahweh, dey take da boy to Eli.
\v 26 Hannah tell him, “Scuse me, my Boss? Fo shua, you rememba me, yeah?! I da one you saw ova hea befo time, praying to Yahweh.
\v 27 I wen pray to Yahweh fo give me dis boy, and Yahweh give me what I aks fo.
\v 28 So now, I goin hanai him to Yahweh, jalike I wen promise fo do. As long as he live, yeah? he going be fo Yahweh.”
\p Den Hannah an Elkanah, dey show love an respeck fo Yahweh ova dea.
\c 2
\s Wat Hannah Pray
\r (Luke 2:52)
\p
\v 1 Den Hannah, she pray lidis:
\q “Yahweh make me feel real good inside.
\q2 Cuz a all da stuff he wen do, az why I stay feel lidat now!
\q An I now strong so I no need worry.
\q2 An I no shame fo talk in front da peopo dat stay agains me.
\q Cuz you da One dat get me outa trouble,
\q2 I stay good inside!
\b
\q
\v 2 “No mo odda god dat mo awesome an spesho den you, Yahweh!
\q2 You da One, da ony One!
\q You oua God, an you stay solid, jalike da bigges rock!
\q2 No mo any odda god dat stay solid, jalike you!
\b
\q
\v 3 “Eh you guys! Shut yoa mout!
\q2 No talk high makamaka kine awready!
\q2 Cut da pilau attitude, yeah?!
\q Cuz Yahweh, he da God dat know eryting.
\q2 An he da One dat figga out awready
\q2 If da work somebody do, stay good o no good!
\b
\q
\v 4 “Da muscle men army guys get bow an arrow,
\q2 But dey stay broke awready!
\q Oua guys, stay all bum out
\q2 An no can even stand up good,
\q2 But now dey goin come plenny strong!
\q
\v 5 An dose buggas dat befo time get plenny food
\q2 An come real momona,
\q2 Now dey gotta work sweats fo find dea own grinds.
\q But da peopo dat no mo food,
\q2 Now, dey no stay hungry no moa.
\q An da lady dat no can get bebe befo,
\q2 Now goin get seven kids.
\q But da mudda dat get plenny boys befo, poho awready!
\q2 Now she no mo awready.
\b
\q
\v 6 “Yeah, Yahweh da One in charge wen peopo mahke,
\q2 An wen dey come alive too.
\q Yeah, he take peopo down inside da Mahke Peopo Place,
\q2 An he bring um out.
\q
\v 7 Yahweh make some peopo lose dea stuffs.
\q2 An he make some peopo come rich too.
\q He make some peopo come jalike dey notting,
\q2 An he make some peopo come real big time.
\q
\v 8 Yahweh lif up outa da dirt an da ashes
\q2 Dose peopo dat no mo notting,
\q He let um sit wit all da ali`i guys.
\q2 He give dem da right fo sit on top thrones,
\q2 An odda peopo goin show dem respeck.
\b
\q “Dass cuz Yahweh own
\q2 All da deep places undaneat da world,
\q2 An he put da world on top um.
\q
\v 9 He goin take care his spesho peopo, wea eva dey go!
\q2 But da bad kine peopo, dey goin mahke
\q2 An stay one dark place.
\b
\q “An if happen dat one guy come strong,
\q2 Da powa dat he get, you know,
\q Neva come from inside him.
\q2 Come from Yahweh!
\q
\v 10 Dose peopo dat go agains Yahweh, he goin smash um down.
\q2 He even goin make da thunda, dat stay inside da sky, make dem all hamajang.
\q2 Yahweh da One goin judge da peopo all ova da world.
\b
\q “He goin give plenny powa to da guy he wen pick fo be da king.
\q2 He goin make da guy he wen pick, come mo strong erytime.”
\p
\v 11 Den Elkanah-dem go home Ramah side. But da boy Samuel stay back an work fo Yahweh. An Eli da guy dat stay in charge a him.
\s Eli Boys Do Real Bad Kine Stuff
\p
\v 12 Eli boys, cuz dey no mo respeck fo Yahweh, dey pilau kine guys an dey do bad kine stuff.
\v 13 An dey no do, wat da pries guys suppose to do fo da peopo. Dis wat dey do: Weneva somebody make one sacrifice, an stay boil da meat, da guy dat work fo Eli boys come wit one pitchfork.
\v 14 Dat worka guy push da pitchfork real hard inside da pot. An wateva meat da pitchfork bring up, Eli boys take um fo demself. An dass wat dey do to all da Israel peopo dat make sacrifice Shiloh side.
\v 15 Mo den dat, even befo da guy can burn da fat fo da sacrifice, da worka guy come tell um, “Eh! Give da pries guy some a da meat fo roas. Cuz he no goin take da meat dat awready boil. He ony take da raw kine meat.”
\p
\v 16 If da guy tell him, “Suppose to burn up da fat firs, yeah? An den you can take wateva you like fo yoa self,” da worka guy den goin tell him, “Not even! Give um now! Oddawise I jus goin grab um!”
\p
\v 17 Da way Yahweh see um, da ting dose pries helpa guys stay do was real bad, cuz dey make da sacrifice fo Yahweh jalike dey no care.
\s Da Boy Samuel, Shiloh Side
\p
\v 18 Da boy Samuel, he wear da linen kine ves jalike one pries, an he do da pries kine work in front Yahweh.
\v 19 Ery year his mudda make him one small robe, an wen she go wit her husban fo make sacrifice, she take um to Samuel.
\v 20 An ery year, befo dey go home, Eli make blessing fo Elkanah an his wife Hannah. He say, “Hannah wen pray fo one bebe an get um. Den she give da boy Samuel to Yahweh. An dass why Samuel no stay wit you guys now. So! I like Yahweh give you odda kids.”
\p
\v 21 Yahweh no foget Hannah. Afta dat, she born three boys an two girls. An same time, da boy Samuel grow up in front Yahweh.
\s One Talka Fo God Tell, Da Eli Ohana Goin Pau
\p
\v 22 Now Eli stay real ol an makule. But he still hear bout eryting his boys stay doing, how dey make to da Israel peopo, an dat dey sleep wit da wahines dat stay work outside da door fo da Tent Wea Da Peopo Come Togedda Wit God.
\v 23 So he stay telling his boys, “How come you guys make lidat?! I hear from all da peopo bout da real bad kine stuff you guys do!
\v 24 No way, you guys! Not good, wat I hear bout da stuff dat you guys stay doing! All Yahweh peopo dat come by hea, know bout um awready!
\v 25 You know, yeah? one guy do bad kine stuff agains anodda guy, Yahweh can come in da middo an make um right. But, if one guy do bad kine stuff agains Yahweh, pau awready! Nobody goin come in da middo fo make um right!” But his boys no lissen wen dea fadda poin finga an scold um. Az cuz Yahweh awready like dem fo mahke!
\p
\v 26 Same time, da boy Samuel stay grow mo an moa. An Yahweh an da peopo tink good stuff bout Samuel.
\s God Talk Agains Da Eli Ohana
\p
\v 27 Had one guy dat stay tight wit God an talk fo him. He go by Eli an tell um, “Dis one spesho message from Yahweh: ‘I wen show myself awready to yoa ancesta guy Aaron an his ohana, da time dey stay slave inside Egypt unda da Pharaoh guy, yeah?
\v 28 An I wen pick yoa ancesta Aaron from all da ohanas inside Israel fo be my pries guy. He go up by my altar fo burn da incense, an he wear da pries kine spesho ves in front me. An, I give yoa ancesta Aaron ohana all da sacrifice fo you eat, dat da Israel peopo make wit fire.
\v 29 So! How come you guys no mo respeck fo da sacrifice dat I tell da pries guys fo make inside my house?! An you, Eli, how come you show mo respeck fo yoa boys den you show fo me?! How I know all dis?! Cuz all you guys make yoaself fat. You eat ony da bestes part a ery sacrifice dat my Israel peopo make, dis how I know!
\p
\v 30 ‘I Yahweh, da God fo da Israel peopo. Az why I tell you dis: I wen make promise dat yoa ohana, an yoa ancesta Aaron ohana, goin live in front me all da time. But cuz I Yahweh, I tell you dis too: No way goin be lidat! Cuz da peopo dat show respeck fo me, I goin show respeck fo dem. But da peopo dat stay make to me jalike I junk, I goin make to dem jalike dey no matta notting!
\n spelling of mahke in next to last line
\v 31 An now, da time stay come wen I goin make you an all da odda peopo inside yoa ohana mahke wen dey young. No goin even get one ol guy inside yoa ohana.
\v 32 An you goin bum out, cuz you goin see all da good tings I goin do fo da Israel peopo, an you no goin get notting. But from yoa ohana, no goin get nobody dat goin live long time!
\v 33 Anybody inside yoa ohana dat stay alive an work in front my altar, dey ony goin do da kine stuff dat goin make you cry, an make you come sore inside. All yoa kids an grankids goin mahke wen dey young.
\p
\v 34 ‘Wat goin happen to yoa two boys, Hofni an Phinehas, goin show you how goin be. Dey both goin mahke da same day.
\v 35 Den, I goin put one guy fo myself dat I can trus. He goin do da kine stuff dat I like, an he goin do um my way. I goin make his ohana strong, an I goin trus um fo do da pries kine work fo da ones I goin pick fo be da king, all da time.
\v 36 Den, if still yet get anybody inside yoa ohana, dey goin come an go down in front da main pries fo aks fo one piece silva an one small piece bread. Dey goin beg, “Jus let me do one a da kine jobs, so I can get litto bit food fo eat.”-’-”
\c 3
\s Yahweh Call Samuel
\p
\v 1 Da boy Samuel do pries kine work fo Yahweh, an Eli stay in charge a da boy. From long time awready, Yahweh neva say notting to da peopo. An he no let plenny peopo see dream kine tings dat suppose to tell um stuffs.
\p
\v 2 Eli, his eyes not strong like befo, so he no can see. One nite he stay almos ready fo sleep.
\v 3 Samuel, he sleep inside da spesho tent, da Tent Fo Meet Wit Yahweh. (Dass wea Da Box Fo Rememba Da Deal stay.) An da lamp dat burn all nite fo God, still burning.
\v 4 Den, Yahweh call Samuel!
\p Samuel answer, “I stay hea! Dis me!”
\v 5 He run by Eli an tell, “You call me. I stay hea!”
\p But Eli tell, “I neva call you. Go back sleep!” So Samuel go back an lay down.
\p
\v 6 One mo time Yahweh call, “Eh! Samuel!”
\p Samuel get up an go by Eli an tell, “You wen call me. I hea!”
\p Eli tell, “I neva call you. Go back sleep!”
\p
\v 7 Now Samuel neva conneck wit Yahweh yet, an Yahweh neva talk to him befo.
\p
\v 8 Yahweh call Samuel, three time awready. So Samuel get up an go by Eli an tell, “You wen call me. I stay hea!”
\p Den Eli figga out, was Yahweh dat stay calling da boy.
\v 9 So Eli tell Samuel, “Go back yoa bed an lay down. If he call you one mo time, tell him, ‘Talk, Yahweh, cuz you my boss, an I stay lissening.’-” So Samuel go back on top his bed.
\p
\v 10 Yahweh come inside his spesho place, an call jalike befo, “Samuel! Samuel!”
\p Den Samuel tell, “Talk, cuz you my boss, an I stay lissening.”
\p
\v 11 Yahweh tell Samuel: “You know wat?! I litto mo stay ready fo do someting big inside Israel. An goin make erybody dat hear um, come all shook up inside, cuz real bad.
\v 12 Wen dat happen, all da tings I wen tell bout da Eli ohana, eryting from da start to da end, I goin make um happen.
\v 13 I tell Eli awready, dat I da judge, an I goin punish his ohana foeva. He know dat da way his boys ack, dey give God bad name, but Eli neva tell um stop.
\v 14 Az why, I wen make dis strong promise to da Eli ohana: ‘Eli ohana get da blame foeva, fo da bad kine stuff dey wen do, an I no goin let um go. No matta dey make da right kine sacrifice, I no goin let dem be da same side wit me no moa.’-”
\p
\v 15 Samuel lay down till morning time. Den he open da doors fo da Tent Fo Yahweh. He scared fo tell Eli da ting he wen see, was jalike one dream.
\v 16 But Eli call um, “Eh, Samuel boy!”
\p Samuel say, “Yah, wat you like?!”
\p
\v 17 Eli aks, “Wat Yahweh tell you? No hide um from me. If you no start fo tell me, hah? den I like God make real bad fo you -- An even goin be mo worsa den dat, if you no tell me eryting dat he wen tell you!”
\v 18 So Samuel tell him eryting, an no hide notting from him.
\p
Den Eli tell, “Him, Yahweh. So, I like him do wateva stay good, da way he see um.”
\p
\v 19 Yahweh stay wit Samuel all da time he stay grow up. An Yahweh make shua dat eryting Samuel wen tell, happen.
\v 20 All da Israel peopo from da Dan side to Beersheba side know dat dey can trus Samuel wen he talk fo Yahweh.
\v 21 Yahweh stay show up ova an ova Shiloh side, cuz Shiloh da place Yahweh wen show himself to Samuel, an tell Samuel wat he say.
\c 4
\nb
\v 1 An da tings Samuel wen tell, all da Israel peopo lissen.
\s Da Filisha Guys Capcha Da Box Fo Rememba Da Deal Wit Yahweh
\p Dat time, da Israel guys wen go out fo fight agains da Filisha army guys. Da Israel guys make camp by Ebenezer Hill, an da Filisha army make camp by Afek Hill.
\v 2 Da Filisha army make plenny lines fo fight da Israel guys. An wen dey fight, da Filisha army win ova da Israel guys. Inside da fight place, dey kill bout four tousan Israel guys.
\v 3 Wen da Israel guys go back dea camp, da older leadas aks, “How come Yahweh let da Filisha army win ova us today? Eh! We go take Da Box from Shiloh fo help us guys. We bring um wit us, so dat Da Box goin help us win agains da Filisha army, da guys dat hate us!”
\p
\v 4 So da Israel peopo send guys go Shiloh side, an dey bring back Da Box Fo Rememba Da Deal Wit Yahweh, Da God Ova All Da Armies, da one dat get his throne in da middo a da spesho angel watcha guys. An Eli two boys, Hofni an Finehas, wen come wit Da Box.
\p
\v 5 Wen Da Box come inside da camp, all da Israel guys cheer real loud, an dey yell so loud dat dey make da groun shake.
\v 6 Wen da Filisha army guys hear da big noise, dey aks each odda, “How come da Hebrew buggas yell real loud ova dea inside dea camp?”
\p
Wen da Filisha guys find out dat Da Box stay inside da Israel camp,
\v 7 dey come real scared. Dey talking, “Da Israel god wen come inside dea camp. Auwe! Us get trouble big time! Dis neva happen to us befo!
\v 8 Auwe fo us! Who goin help us win da fight agains dea real strong gods? Dass da same gods dat wen hit da Egypt peopo real big time inside da boonies!
\v 9 Filisha guys! Make strong! Ack tough! O bumbye da Hebrew buggas goin make us dea slaves, jalike we wen make dem oua slaves befo time. So, make strong! Ack tough an fight!”
\p
\v 10 So da Filisha army go fight. An you know wat?! Dey win ova da Israel guys! Thirty tousan Israel infantry guys wen mahke dat time, an all da oddas run away, back to dea own tent. Da Filisha army wen beat um good!
\v 11 Den da Filisha guys grab Da Box. An Eli's two boys, Hofni an Finehas, dey mahke too.
\s Eli Mahke
\p
\v 12 Had one guy from da Benjamin ohana dat wen run away from da war too, an he go back Shiloh town dat same day. His clotheses all bus up, an he get dirt on top his head fo show he stay sore inside.
\v 13 He reach Shiloh. He see Eli by da side a da road, sitting on top da pries chair, waiting, cuz Eli, he stay scared wat goin happen to Da Box Fo Rememba Da Deal Wit God. Dis Benjamin guy go inside da town fo tell wat wen happen, an afta dat, all da peopo dea yell fo help.
\p
\v 14 Eli, he hear da yelling, an aks, “How come da peopo stay yelling lidat?”
\p
So da Benjamin guy go quick by Eli an tell um why.
\v 15 (Eli, he ninety eight year ol, an his eyes so bad, he no can see.)
\v 16 Da guy tell Eli, “I da one, jus wen come from da war. I wen run away from dea, today!”
\p
Eli aks, “Brah! Wat happen?”
\p
\v 17 Da guy tell, “Da Israel guys wen run away from da Filisha army guys! Plenny Israel guys mahke! An yoa two boys, Hofni an Finehas, dey mahke too! Den, da Filisha guys take away Da Box Fo Rememba Da Deal Wit God!”
\p
\v 18 Wen da guy tell bout Da Box, Eli fall back from da chair, ova dea by da side a da town gate. An cuz he so ol an real fat, his neck broke, an he mahke.
\p Fo forty year, Eli wen lead da Israel peopo.
\p
\v 19 Eli daughta in law, dass Finehas wife, she stay hapai, an almos ready fo born her bebe. Wen she hear dat da Filisha army guys wen take Da Box, an her fadda in law an her husban mahke, all dat, wen make da bebe start fo come, an she squat down an her bebe wen born. An her get real hard time,
\v 20 an her, litto mo mahke. Da wahines dat stay helping her, tell, “No scared! You wen born one boy kine bebe!” But her, no talk o lissen notting.
\p
\v 21 She name da boy “Ikabod,” cuz her tell, “Da Awesome Ting, bag from Israel.” An Ikabod kinda sound like “No mo notting awesome,” in da Hebrew language. She talk lidat, cuz da Filisha army guys wen take away Da Box, an her fadda in law an her husban mahke same time, az why.
\v 22 Her tell, “Da Awesome Ting bag from Israel, cuz da Filisha guys wen take away Da Box Fo Rememba Da Deal Wit God!”
\c 5
\s Da Box Fo Rememba Da Deal Stay Inside Ashdod An Gat
\p
\v 1 Afta da Filisha army guys take ova God's Box, dey take um from Ebenezer wea dey wen start fo fight, to dea big town Ashdod.
\v 2 Dey take da Box inside da temple fo dea god Dagon, an dey put um nea da Dagon statue.
\v 3 Wen da Ashdod peopo get up early da nex morning, you know wat? Dey find Dagon, wen fall down, wit his face on top da groun, in front da Box Fo Rememba Da Deal Wit Yahweh! So dey take Dagon an put um back on top his place.
\v 4 But den, da nex morning wen dey get up again, dea stay Dagon! He wen fall down on top his face again, on top da groun in front Da Box Fo Rememba Da Deal Wit Yahweh! Dis time, Dagon head an his hands chop off, an all stay laying ova dea on top da board dat stay unda da door. Ony da body stay by da place wea dey put da statue.
\v 5 (Az why even now, da pries guys fo Dagon, an da odda peopo dat go inside Dagon temple, Ashdod side, dey no step on top da board undaneat dat door.)
\p
\v 6 Den Yahweh start fo give da Ashdod peopo an da odda peopo aroun dem plenny trouble. He wack um hard wit da real bad kine sick on top dem -- erybody get someting like lumps unda da skin.
\v 7 Wen da Ashdod guys see wat stay happening, dey tell, “Dat box fo da Israel god, mo betta if no stay wit us. Cuz he give us guys an our god Dagon plenny trouble!”
\v 8 So dey call togedda da leadas fo all da Filisha peopo, an aks dem, “Wat we goin do wit da box fo da Israel god?”
\p
Da leada guys tell, “Pass da box fo da Israel god, Gat side!” So dey move da Box Fo Da Israel God.
\p
\v 9 But afta dey move um Gat side, Yahweh hit da Gat peopo real hard too. He make all da peopo ova dea come plenny scared. All da peopo inside Gat get lumps unda da skin, da ol peopo an da young peopo.
\v 10 So den da Gat peopo send God's Box Ekron side.
\p
But wen da Box stay coming nea Ekron, da peopo ova dea start yelling, “Dey stay bring da box fo da Israel god, aroun by our side, so dey can kill us guys hea, an all our peopo!”
\v 11 So dey call togedda da leada guys fo all da Filisha peopo an tell, “Send da box fo da Israel god back wea it suppose to stay, o da ting goin kill us guys hea, an all our peopo.” Cuz some a da peopo wen mahke awready, all da odda peopo come real scared. God give da Ekron peopo plenny trouble too.
\v 12 An da peopo dat no mahke, dey get lumps unda da skin, an all da peopo stay yelling fo help so loud, jalike da sky can hear um.
\c 6
\s Dey Bring Da Box Back Israel Side
\p
\v 1 Fo seven month, Da Box Fo Rememba Da Deal Wit Yahweh wen stay inside da Filisha land.
\v 2 Den da Filisha leada guys call dea pries guys an da guys dat aks dea gods wat goin happen. Dey tell, “Wat we goin do wit da box fo Yahweh, da Israel god? Tell us guys awready, how we goin send um back da place wea suppose to stay?”
\p
\v 3 Da Filisha pries guys an da guys dat aks dea gods wat goin happen, dey tell, “If you guys da one dat goin send back da box fo da Israel god, den no send um back empty! But fo shua, send one sacrifice wit da box. Dis goin pay fo da blame us Filisha peopo get. If yoa sick guys come good, den you goin know az was dea god dat wen make um come good. Cuz wen you guys send demm back dea box, den maybe he goin stop hitting you wit da real bad kine sick.”
\p
\v 4 Da Filisha guys aks dem, “Wat kine sacrifice we suppose to send back fo show dat us guys sorry?”
\p
Dey tell, “You know how you guys wen swell up wit da lumps? Kay den. Make five lumps outa gold, an make five rats outa gold. Dass cuz us Filisha peopo, we get five main ali`i guys, an da real bad kine sick wen hit both you guys an yoa leada guys.
\v 5 Copy yoa swell up places, an copy da rats dat stay wiping out da peopo inside dis land. Show plenny respeck fo da Israel peopo's god. Den, maybe he goin pau give hard time to you guys, yoa gods, an yoa land.
\v 6 No good, you know, dat you guys ack hard head, jalike da Egypt peopo an da Pharaoh guy wen do, long time ago! Wen da Pharaoh guy give da Israel peopo hard time, ony afta Yahweh wen bus up da Egypt peopo, den Pharaoh an da Egypt peopo let da Israel peopo go outa dea land. An da Israel peopo, dey outa dea!
\p
\v 7 Now, go make one new cart. Go get two cows dat neva get yoke on top um yet, an awready born bebes. Tie da cows an yoke um to da cart. Take away dea bebes, an tie um up by da house, so dey no can go wit da muddas.
\v 8 Take da Box Fo Yahweh, da Israel god, an put um on top da cart. Inside one bag, by da side, put da gold tings dat you guys wen make. Dose tings goin be one sacrifice fo dea god, cuz you guys get da blame fo all da bad kine stuff you wen do. Den, let da cows an da cart go by demself.
\v 9 But, betta watch um good! Cuz maybe da cows goin take da Box, up dea by da land wea da box wen stay befo time, by Bet-Shemesh. Den dat goin mean, dat was da real Israel god, dat give us guys real hard time. But if da cows no go dat way, den us guys goin know dat dea god neva do notting, but eryting dat wen happen, jus happen.
\p
\v 10 So, da Filisha guys make lidat. Dey take two da kine cows, an tie um to da cart, an tie up dea bebes by da house.
\v 11 Dey put da Box Fo Rememba Da Deal Wit Yahweh on top da cart, an by da Box dey put one bag wit da gold rats, an da small gold statues dat look like da lumps.
\v 12 Den da cows go strait up by Bet-Shemesh. Dey stay on top da road, an make noise da whole way. Dey no turn by da right side o da lef side. Da leadas fo da Filisha peopo stay walking in back dem, watching all da way to da Bet-Shemesh land.
\p
\v 13 Dat time, da Bet-Shemesh peopo stay cutting dea wheat inside da valley. Dey look up an wen dey see da Box, dey come real good inside.
\v 14-15 Da cart go inside da field fo Joshua, da one from Bet-Shemesh, an stop right ova dea. Had one big rock ova dea. Da Levi ohana guys take down Da Box, an da bag wit da gold tings inside, an put um on top da big rock. Den da Bet-Shemesh peopo chop up da wood from da cart an dey kill da cows fo make one burn up kine sacrifice fo Yahweh. An dat day, da Bet-Shemesh peopo make dea own regula kine sacrifice an make burn up kine sacrifice fo Yahweh too.
\v 16 Da five leadas fo da Filisha peopo see eryting dat happen. Den dey go back dat same day Ekron side.
\p
\v 17 Da five gold lumps, da Filisha peopo send um to Yahweh, fo make sacrifice fo da blame dey get: one fo Ashdod, one fo Gaza, one fo Ashkelon, one fo Gat, an one fo Ekron.
\v 18 Dey send five gold rats, fo da five leadas who come from da five big towns wit da strong walls, dat get da small towns aroun um in da country side. Da big rock, wea da Levi ohana guys put da Box Fo Rememba Da Deal Wit Yahweh, still stay dea today inside Joshua field Bet-Shemesh side.
\p
\v 19 But seventy guys Bet-Shemesh side wen go look inside da Box. Cuz dey do dat, Yahweh wack um, an dey mahke. Da peopo stay sore inside, cuz Yahweh wen hit dose seventy guys real hard lidat.
\v 20 Da Bet-Shemesh peopo aks each odda, “Wea one pries dat can stand in front Yahweh, dis God dat stay good an spesho? Who we can send da Box to, fo get um away from us guys awready?”
\p
\v 21 Den dey send messenja guys by da peopo Kiriat Jearim side. Dey tell, “Da Filisha peopo wen send back da Box Fo Rememba Da Deal Wit Yahweh. Come down hea, an take um back up dea, yoa place!”
\c 7
\p
\v 1 So, da Kiriat Jearim guys come an take Da Box Fo Rememba Da Deal Wit Yahweh. Dey take um Abinadab place on top da hill, an make his boy Eleazar spesho fo Yahweh, fo watch an take care da Box.
\s Samuel Dem Win Ova Da Filisha Guys Mizpah Side
\p
\v 2 Long time, twenty year awready, Da Box Fo Rememba Da Deal Wit Yahweh stay Kiriat Jearim. An all da Israel peopo make sad kine noise cuz dey stay sore inside, an dey try know Yahweh mo betta.
\v 3 Samuel tell all da Israel ohana peopo, “If dass fo real you guys going back togedda wit Yahweh, den throw out da gods from da odda peopos, an da Ashtoret idols. Den, go fo broke fo Yahweh, an work ony fo him. Cuz den, he goin get you guys outa da Filisha peopo's powa!”
\v 4 So da Israel peopo throw out da Ba`al gods an da Ashtoret idols, an now dey work ony fo Yahweh.
\p
\v 5 Nex ting, Samuel tell, “All you Israel peopo, come togedda Mizpah side, so I can pray to Yahweh fo help you guys.”
\v 6 Wen da peopo come togedda Mizpah side, dey bring watta from one puka, an pour um out in front Yahweh. All day, da peopo no eat so dey can pray, an tell Yahweh, “Us sorry, yeah?! dat we wen go agains you an do bad kine stuff.”
\p An Samuel, he stay da leada guy fo judge da Israel peopo Mizpah side.
\p
\v 7 Wen da Filisha peopo hear dat da Israel peopo wen come togedda Mizpah side, dea leada guys take dea army an go up Mizpah fo go afta da Israel peopo. Wen da Israel peopo hear bout um, dey come scared cuz a da Filisha army guys.
\v 8 Dey tell Samuel, “Yell fo help to oua God Yahweh, an no give up yelling! so dat he goin get us guys outa da Filisha guys powa.”
\v 9 So Samuel take one bebe sheep dat still suck milk, an make one burn up kine sacrifice wit da whole bebe sheep fo Yahweh. Samuel call out to Yahweh, an Yahweh talk to him.
\p
\v 10 Same time Samuel stay making da burn up kine sacrifice, da Filisha guys stay come nea fo fight da Israel guys. But right den, Yahweh make one loud, big, strong kine thunder agains da Filisha guys, an make dem come real mix up, so dat dey run away.
\v 11 Da Israel guys run outa Mizpah, an run afta da Filisha guys, an kill dem wen dey stay running, all da way makai side Bet-Kar.
\p
\v 12 Den Samuel take one mangous rock, an put um up one place wea get Mizpah on one side, an Shen on da odda side. He name um “Ebenezer”, dat mean “Help Monument,” cuz he tell, “Yahweh wen help us all da way to dis place!”
\v 13 So da Israel guys win ova da Filisha guys, an da Filisha guys neva go inside da Israel land again.
\p
All da time Samuel stay alive, Yahweh stay agains da Filisha peopo.
\v 14 Da towns from Ekron to Gat, dat da Filisha peopo wen take away from da Israel peopo befo time, da Israel peopo get um back again. An da Israel guys wen get all da peopo aroun dea outa da Filisha peopo's power. An dat time too, da Israel peopo an da Amor peopo no fight each odda.
\p
\v 15 Samuel stay da local leada fo da Israel peopo all da time he stay alive.
\v 16 Ery year he go aroun from Bethel, to Gilgal, to Mizpah. He stay judge da Israel peopo inside all dose places.
\v 17 But he erytime go back by Ramah, cuz he stay judge da Israel peopo ova dea too, an az wea he stay live. An he build one altar ova dea fo Yahweh.
\c 8
\s Da Israel Peopo Like Get One King
\p
\v 1 Dat time, wen Samuel come ol, he make his boys be da local leada guys fo all da Israel peopo.
\v 2 His numba one boy name Joel. Da numba two boy name Abijah. Dem, da local leada guys Beersheba side.
\v 3 But Samuel boys no do stuff like dea fadda. Dey go da wrong way, fo da money. An dey take unda da table money too! Dey suppose to judge wass right an wass wrong. But erytime, dey make shua dat dey goin judge da wrong way.
\p
\v 4 So, all da older leada guys come togedda, an go by Samuel, Ramah side.
\v 5 Dey tell um, “Eh! We know you ol awready, an we know yoa boys no like do stuff jalike you. So we aksing you, make somebody da king fo lead us guys, jalike all da odda peopos get king.”
\v 6 But wen dey tell, “Give one king fo lead us guys,” Samuel tink, “Eh! Az not good fo do!” An so, he pray to Yahweh.
\v 7 Yahweh answa him, “Lissen to da peopo! Lissen eryting da peopo stay telling you! You not da one dey tink az no good. Az me! I da one dey tink az no good fo be dea king!
\v 8 Dese buggas, erytime, dey ack lidis, from da time I wen get um outa Egypt till now! Dey leave me, an let da odda kine gods be dea boss. Az how dey making to you too.
\v 9 So now, go head! Lissen to dem! But tell um, fo shua, dey betta watch out! Tell um serious kine, dat wen da king make up his mind, dey gotta go wit him, no matta dey no like!”
\p
\v 10 Den Samuel tell eryting Yahweh wen say, to da peopo dat stay aksing him fo one king.
\v 11 Samuel tell, “Dis how da king dat goin lead you guys, goin do. He goin take yoa boys an make some a dem work wit his war wagons an horses, an odda boys goin run in front his war wagons fo fight.
\v 12 He goin pick some a yoa boys an make dem his officer guys in charge a tousand army guys, an some in charge a fifty army guys. He goin tell some a yoa odda boys fo plow his fields fo him an cut his wheat an barley. An, he goin tell yoa odda boys fo make da tings da army guys use fo fight, an make stuff fo his war wagons.
\v 13 He goin tell yoa girls fo make perfume fo him, an fo cook an bake.
\v 14 He goin take ova yoa bestes wheat fields, an grape farms, an olive trees, so he can give um to his own helpa guys.
\v 15 He goin take ten percent a yoa wheat an barley an yoa grapes, an give um to his palace guys an his odda helpa guys.
\v 16 He goin take da guys an wahines dat work fo you guys, an yoa bestes cows an donkeys, an use um fo do his own jobs.
\v 17 He goin take ten percent a yoa sheeps an goats. And he even goin make you guys, come his slave guys.
\v 18 Da time goin come, wen you guys goin yell to Yahweh, fo help you run away from da king dat you guys wen pick, but wen dat time come, Yahweh no goin help you guys!”
\p
\v 19 But da peopo no like lissen Samuel. Dey tell, “Nah! Not! No way! Us guys swea to God, we like one king fo lead us guys!
\v 20 Den we goin come jalike da odda peopos, wit one king fo judge us guys, an go out in front us guys fo fight fo us guys.”
\p
\v 21 Wen Samuel hear all dat da peopo say, he go tell Yahweh.
\v 22 Yahweh tell Samuel, “Lissen to dem an give um one king.”
\p
Den Samuel tell da Israel guys, “Kay den. Now you can go back yoa own town awready.”
\c 9
\s Samuel Pick Saul Fo Come Da King
\p
\v 1 Had one guy, yeah? from da Benjamin ohana, dat erybody know. His name Kish, Abiel boy. Dea ancestas, Zeror, Bekorat, an Afiah.
\v 2 Kish get one boy name Saul. Saul, dass one good looking bugga, even mo good looking den all da odda Israel guys, you know. He young, an eh! he real tall, mo den all da odda guys.
\p
\v 3 Get one time, some a Kish donkeys go wea nobody can find um. So, Kish tell his boy Saul, “Take one a da worka guys wit you, an go look fo da donkeys.”
\v 4 So Saul an da worka guy, dey go up country Efraim from one side to da odda side, an thru da land aroun Shalisha. But dey neva find da donkeys. Den, dey go mo down inside da Sha`alim land, but da donkeys no stay ova dea too! Den dey go thru da Benjamin land, but still yet, dey no find um.
\p
\v 5 Wen Saul, an da worka guy dat stay wit him, come da Zuf land, Saul tell da worka guy, “Eh, we go back awready, o my fadda goin stop tinking bout da donkeys, an he goin worry bout us.”
\p
\v 6 But da worka guy tell, “Eh, you know wat?! Get one guy inside dis town, dat know God. Erybody get respeck fo him, an, eryting da guy say goin happen, happen. So, we go ova dea now. Maybe he tell us wat way fo go.”
\p
\v 7 Saul tell da worka guy, “If we go, wat we can take fo give him? No mo food inside our bag awready! Us no mo present fo give da guy dat know God. Wat we get, hah?”
\p
\v 8 Da worka guy tell Saul, “Look. I get one small piece silva. I goin give um to da guy dat know God, so he can tell us guys wat way fo go.”
\v 9 (Now, befo time, wit da Israel peopo, wen one guy go some place fo find out someting from God, he tell, “Come! We go by da guy dat can see wass goin happen,” cuz az wat dey call da guys dat talk fo God, dat time, ‘guys dat can see.’)
\p
\v 10 Saul tell his worka guy, “Shoots, we go!” So dey go da town wea da guy dat know God stay.
\p
\v 11 Wen dey going up da hill to da town, dey meet some girls dat come out fo get watta from one well. So Saul guys aks dem, “Da guy dat can see wass goin happen, he stay, o wat?”
\p
\v 12 An dey tell, “Yeah, he stay. He jus come our town now. But you betta hurry up, cuz he jus now going ahead a you guys. Az why oua peopo going to da top a da hill, fo make sacrifice dea.
\v 13 Wen you guys go inside da town, you can find him befo he go up da hill to da sacrifice place fo eat. Da peopo no goin start fo eat befo he come, cuz he gotta pray fo bless da sacrifice firs. Den afta dat, da guys dey wen tell fo come, goin eat. So, go up quick, an you goin find him!”
\p
\v 14 Saul an da worka guy go up da hill to da town. Wen dey stay going inside, right dea, get Samuel! He stay coming near dem, fo go up da sacrifice place on da top a da hill.
\p
\v 15 Da day befo Saul come dea, Yahweh wen tell Samuel someting he neva know befo. He tell:
\v 16 “Bout dis time tomorrow, I goin send one guy from da Benjamin ohana land. Pour olive oil on top his head, fo show he goin be da leada guy fo my Israel peopo. He da one dat goin get dem outa da Filisha guys powa. Cuz I wen see how my peopo suffa an cry, an hear dem yell fo me fo help dem.”
\p
\v 17 So wen Samuel spock Saul, Yahweh tell Samuel, “Right dea! Dass da guy I wen tell you bout! He goin lead my peopo!”
\p
\v 18 Saul go nea Samuel right dea inside da town gate. He aks Samuel, “Please, yeah? you can tell me, wea da house wea da guy dat can see wass goin happen stay?”
\p
\v 19 Samuel tell, “I da guy! dat can see wass goin happen. So, you go stay go, an I go stay come, up to da sacrifice place on da top a da hill. Cuz today, you guys goin eat wit me. An morning time, I goin tell you eryting you like know, den I goin let you go home.
\v 20 Da donkeys you neva find fo da last three days, no worry bout dem. Dey no stay lost no moa. Now! All da Israel peopo goin turn to you an yoa fadda ohana, cuz dass wat dey really like see! You, dea leada!”
\p
\v 21 But Saul tell him, “Me?! I ony one guy from da Benjamin ohana, da mos small ohana inside Israel. An my family, da mos small from all da odda families inside da Benjamin ohana. How come you tell me lidis?”
\p
\v 22 Den Samuel bring Saul an his worka guy inside da community centa. He tell dem fo sit down da mos importan place in front all da odda guys Samuel wen tell fo come. Was bout thirty guys.
\p
\v 23 Samuel tell da cook guy, “Bring da piece meat I wen give you, da one I wen tell you awready fo put by da side.”
\p
\v 24 So da cook guy pick up da sacrifice leg bone wit da meat on top um (da one dat was spesho fo da pries guys ony). He put um in front Saul. Samuel tell, “Dis wat we wen keep fo you. So, eat um! I wen put um by da side fo you fo dis meeting, so dat you can tell da peopo, ‘Come hea eat!’-” An Saul eat wit Samuel da same time.
\p
\v 25 Afta erybody come back down from da sacrifice place on da top a da hill to da town, Samuel talk plenny wit Saul on top da flat roof on top his house.
\v 26 Saul an his worka guy wake up jus befo da sun come up. Wen da sun start fo come up, Samuel yell up to Saul on top da flat roof. He tell, “Get yoaself ready. I go wit you litto bit, den I let you go back home!” Wen Saul stay ready, him an Samuel go outside togedda.
\v 27 Wen Samuel an Saul go down by da edge a da town, Samuel tell Saul, “Tell yoa worka guy fo go litto mo down in front us guys.” So da worka guy go dea. Den Samuel tell Saul, “You, stay hea litto while moa. An I goin let you hear wat God tell.”
\c 10
\s Samuel Pour Oil On Top Saul Head
\p
\v 1 Den Samuel take some olive oil dat he get inside one small clay kine picha, an pour um on top Saul's head, an he kiss Saul on top his face. Samuel tell, “Yahweh wen pick you fo come da leada ova his peopo, you know.
\v 2 Wen you go way from me today, you goin meet two guys nea da grave wea Rachel stay bury, by Zelzah, on da borda fo da Benjamin land. Dey goin tell you, ‘Da donkeys you wen go out fo find, somebody find um awready. Now yoa fadda pau tink bout da donkeys, an he worry bout you. He stay aksing, “Wat I goin do bout my boy? Wea he stay?”-’
\p
\v 3 “Den you goin go on from dea, till you go by da big oak tree Tabor side. Three guys dat go up fo make sacrifice fo God Bethel side, dey goin meet you ova dea. One guy get three young goats wit him, anodda guy get three breads, an anodda guy get one sew up goat skin bag wit wine inside.
\v 4 Dey goin tell you howzit, an fo shua goin give you two breads. An you suppose to take um.
\p
\v 5 “Afta dat you goin go by Gibeah, God's place. Get some Filisha army guys stay dea too. Wen you go near da town, you goin meet some guys dat talk fo God dat stay coming down from da sacrifice place on top da hill, wit some odda guys playing small harps, tambourines, flutes, an big harps in front dem. An da talka guys goin stay talking fo God.
\v 6 Da Spirit from Yahweh goin take ova you wit powa, an you goin talk fo God jalike dem, an God goin change you so you come one diffren kine guy.
\v 7 Wen all dese tings happen, dat goin show I tell you da trut. So do wateva you see good fo do! Cuz God goin stay wit you.
\p
\v 8 Go down by Gilgal befo I go dea. I goin come by you fo shua, fo make da burn up kine sacrifices an da sacrifices dat show dat Yahweh an da peopo stay okay wit each odda. But you gotta wait seven days till I come by you, an tell you wat fo do.”
\s Samuel Make Saul Come Da King
\p
\v 9 Wen Samuel turn aroun fo go, God change Saul heart, an eryting Samuel wen tell, come true dat same day.
\v 10 Wen dey come Gibeah side, right dea some guys dat talk fo God meet Saul. Da Spirit from God take ova Saul wit powa, an he start fo talk fo God, jalike dem.
\v 11 Wen all da peopo dat know Saul befo time see dat, dey surprise cuz he now talk fo God, cuz he neva do dat befo. Dey aksing each odda, “Wassup?! Wat wen happen to Kish boy? So now! Saul stay one guy dat talk fo God, o wat?!”
\p
\v 12 One guy dat live ova dea say, “Yeah. No matta wat da ohana, anybody can talk fo God.”
\p So den erybody start telling each odda, “Saul one talka fo God too, o wat?”
\v 13 Afta Saul pau talk fo God, he go up da hill to da place wea peopo make sacrifice.
\p
\v 14 Layta on, Saul uncle aks him an da worka guy, “Wea you guys wen go?”
\p
Saul tell, “We wen go look fo da donkeys. But wen we no can find um, we go by Samuel.”
\p
\v 15 Saul uncle aks, “Tell me, wat Samuel wen say to you guys?”
\p
\v 16 Saul tell, “He tell us fo shua, somebody wen find da donkeys awready.” But Saul neva tell his uncle dat Samuel say dat Saul goin come king.
\p
\v 17 Den Samuel tell da Israel peopo fo come togedda in front Yahweh Mizpah side.
\v 18 He tell um, “Dis wat Yahweh, da God fo da Israel peopo, tell: ‘I wen get you guys outa trouble from da Egypt peopo. Was me! I wen bring you Israel peopo ova hea outa Egypt. An, I wen get you guys outa trouble again from all da odda peopos dat give you guys presha.’
\v 19 But now, you guys say, no way you goin lissen me, yoa God, da One dat wen get you guys outa trouble from all da bad kine stuff dat make you guys bum out. You guys wen tell God, ‘Nah! Mo betta you put one king ova us guys!’ So now, line up in front Yahweh wit yoa families. Put yoa big an small kine ohanas togedda.”
\p
\v 20 Wen Samuel bring all da Israel ohanas nea him, God pick da Benjamin ohana.
\v 21 Den Samuel bring da Benjamin ohana in front, one family an den anodda. An from dem, God pick da Matri ohana. An in da end God pick Saul, Kish boy. But wen dey go look fo Saul, dey no can find him.
\v 22 So dey aks Yahweh one mo time, “Dat guy come hea yet?”
\p
Yahweh tell, “Yeah, he stay. He wen hide himself ova dea wea da peopo put dea stuffs.”
\p
\v 23 Da peopo run an bring Saul from ova dea. An wen he stand wit da peopo aroun him, he even mo tall den all da odda peopo, cuz dea head ony come up his shouldas!
\v 24 Samuel tell all da peopo, “You guys see dat guy dat Yahweh wen pick? From all da peopo, no mo nobody jalike him!”
\p Den da peopo yell, “Yeah! We like da king stay alive long time!”
\p
\v 25 Samuel tell da peopo wat da rules bout da king mean. He write um down on top one roll up paypa, an put dat paypa inside da Tent in front Yahweh. Den Samuel tell da peopo go back home.
\p
\v 26 Saul go home too, Gibeah side, an some strong guys dat know how fo fight go wit him, cuz God wen take ova dea hearts an make dem like fo help Saul.
\p
\v 27 But had some mean buggas wit attitude. Dey tell, “No way dis guy goin get us outa trouble!” An dey ack jalike Saul junk, an dey no bring present fo him notting. But Saul no say notting.
\c 11
\s Saul Get Da Jabesh Peopo Outa Trouble
\p
\v 1 Had one guy Nahash from Ammon, go Israel side an tell his army guys fo make camp all aroun Jabesh Gilead town. All da Jabesh guys tell um, “Make one good deal fo us guys fo no go fight, an fo dat we goin let you be oua boss.”
\p
\v 2 But Nahash from Ammon tell, “I goin make you guys one deal fo no fight wit you guys, but ony if I dig out da right side eyeball from ery one a you guys, so dat all da Israel peopo goin get shame.”
\p
\v 3 Da older leadas from Jabesh tell him, “Give us guys seven days so we can send messenja guys all ova da Israel land. If nobody come fo get us guys outa trouble, we goin give in to you guys.”
\p
\v 4 Wen da messenja guys come by Gibeah wea Saul stay, an tell da peopo wat Nahash wen say, all da Gibeah peopo start fo cry real loud.
\v 5 Right den, Saul stay coming back from his fields, wit da cows he use fo plow da groun, an he aks somebody, “Eh! Wassup?! Wat stay wrong wit da peopo? How come dey stay crying?” So da Gibeah peopo tell him da story, wat da guys from Jabesh wen tell.
\p
\v 6 Wen Saul hear dat, da Spirit from God take ova him wit power, an he come real huhu.
\v 7 He take two a da cows, kill um an cut um up, an send messenja guys fo carry da cow pieces all ova da Israel land. He tell, “Anybody dat no go fight fo Saul an Samuel, dis wat we goin do to dea cows!” Den da peopo come real scared a Yahweh, an dey all come togedda jalike dey ony one guy.
\v 8 Wen Saul bring dem togedda Bezek side fo make ready fo fight, get three hundred tousand Israel guys from da nort side, an thirty tousand Judah guys from da sout side.
\p
\v 9 Dey tell da messenja guys dat wen come by Saul, “Tell dose guys from Jabesh Gilead dis: ‘Befo da sun come hot tomorra, we awready goin get you guys outa trouble.’-” Wen da messenja guys go back an tell dat to da Jabesh peopo, dey stay real good inside.
\p
\v 10 Dey tell da Ammon guys, “Tomorrow we goin give in to you guys, an you guys can do wateva you like wit us.”
\p
\v 11 Da nex day Saul split his guys fo make three armies. Wen still nite time, befo come light even litto bit, dey broke inside da Ammon guys camp, an kill dem till da day come hot. An da Ammon guys dat still stay alive, scatta all ova da place, so dat no even can find two Ammon guys togedda.
\s Samuel Make Saul Come Da King
\p
\v 12 Den da peopo aks Samuel, “Wea da guys dat tell, ‘Saul? No way he goin come our king!’? Bring um ova hea! We goin kill dose buggas!”
\p
\v 13 But Saul tell, “You guys no goin kill nobody today! Cuz today, Yahweh da One dat get us Israel peopo outa trouble!”
\p
\v 14 Den Samuel tell da peopo, “Come. We go Gilgal, an ova dea we goin make um solid, dat Saul goin be da king!”
\v 15 So all da peopo go Gilgal side, an make Saul da king ova dea in front Yahweh. Gilgal was da place wea dey make da kine sacrifice in front Yahweh dat show dat Yahweh an da peopo stay tight wit each odda. An ova dea, Saul an all da Israel peopo make big party, an dey feel plenny good inside.
\c 12
\s Samuel Tell Da Peopo Aloha
\r (Rome 11:2)
\p
\v 1 Samuel tell da Israel peopo, “You know, I wen lissen to you guys, eryting you guys wen tell me, an I put one king ova you guys.
\v 2 So now, da king, he da one dat goin stay in front you guys fo be yoa leada, not me. Me?! Now I stay makule awready wit gray hair. An my boys, dey still stay hea wit you guys. From da time I was young guy till now, I da one wen stay in front you for be yoa leada.
\v 3 I stand hea right now, in front Yahweh an da one Yahweh wen pick fo be da king. If anybody get someting fo tell, dey can poin finga me right now. I wen rip off somebody's cow? I wen rip off somebody's donkey? I wen scam somebody? I wen give somebody presha? I wen take silva from somebody fo shut my eyes? If I wen make lidat to somebody, now, I goin make um come right fo dem!
\p
\v 4 So dey tell um, “You neva scam us o give us presha. You neva take notting from nobody!”
\p
\v 5 Samuel tell um, “An I neva do notting lidat. Today, Yahweh know all dat, an da king he wen pick, he know all dat too. An dey goin talk agains you guys, if bumbye you guys poin finga me.”
\p
Da peopo tell, “Yeah, fo shua! Dey goin talk agains us guys!”
\p
\v 6 Den Samuel tell da peopo, “Az Yahweh, da one dat wen pick Moses an Aaron, an wen bring yoa ancesta guys hea, outa da Egypt land.
\v 7 So, stay right hea, cuz I goin ack jalike one lawya guy in front Yahweh, fo make proof dat Yahweh wen do da right ting fo you guys an yoa ancesta guys.
\p
\v 8 “Afta Jacob go Egypt side, yoa ancesta guys wen call Yahweh fo help dem, an Yahweh send Moses an Aaron, who bring dem outa Egypt, an let dem live inside dis land.
\p
\v 9 “But dey wen foget dea God Yahweh, so jalike he wen sell dem out to Sisera, da main guy in charge a da Hazor army guys. An jalike he wen sell dem out to da Filisha guys, an da Moab king. All dem fight agains da Israel guys.
\v 10 Yoa ancesta guys wen yell to Yahweh, an tell, ‘We wen do bad kine stuff! We wen bag from you, Yahweh, an work fo da Ba`al gods an da Ashtoret gods. But now, Yahweh, get us outa trouble from da guys dat hate us! Den we goin work fo you!’
\v 11 Den Yahweh send Jerub-Ba`al, Barak, Jeftah. He send me too, Samuel. An he get you guys outa trouble from da peopo all aroun you guys dat hate you. Dass why now, you can stay alive an nobody goin touch you.
\p
\v 12 “But wen you guys see dat Nahash, da king fo da Ammon peopo, come agains you guys, you tell me, ‘No way we goin wait fo Yahweh do someting! We like one king fo be our leada,’ no matta you guys get yoa God Yahweh fo yoa king.
\v 13 So, look! Dis da king you guys wen pick, da one you guys aks fo. Look! Yahweh wen awready put one king ova you guys.
\v 14 If you guys stay scared a Yahweh, an work fo him, an lissen wat he tell you, an no go agains wat he tell you guys fo do, den both you guys an da king dat stay ova you guys, goin stay tight wit yoa God Yahweh!
\v 15 But, if you guys no lissen wat Yahweh tell, an go agains wat he tell you guys fo do, he goin go agains you guys, jalike he wen go agains yoa ancesta guys.
\p
\v 16 “Now, stand dea an watch da big ting Yahweh goin do in front you guys!
\v 17 You guys know dat da time fo cut da wheat stay now, an no mo rain dis time. But today, I goin aks Yahweh fo send thunda an rain. I like you guys see dat, an know az real bad wen you guys aks fo one king, cuz az da way Yahweh see um too!”
\p
\v 18 Den Samuel pray to Yahweh, an dat same day Yahweh send thunda an rain. So den, all da peopo come plenny scared a Yahweh an Samuel.
\p
\v 19 All da peopo tell Samuel, “Pray to yoa God Yahweh fo us guys, cuz you da boss fo us guys. Pray so dat us no goin mahke. Cuz now, we wen do even mo bad kine stuff den befo time, cuz we wen aks fo one king.”
\p
\v 20 Samuel tell um, “No scared! Fo shua, you guys wen do all dis bad kine stuff. But no turn aroun an go da odda way from Yahweh cuz a dat. Go all out an work fo him!
\v 21 No turn aroun an go da odda way from Yahweh. An no go wit da idol kine gods, cuz dass ony wase time. Dey no can do notting good fo you guys. Dey no can get you guys outa trouble, cuz dey ony wase time.
\v 22 Yahweh no goin leave you guys! You his peopo, cuz he like erybody know wat kine god him, an cuz he awready make up his mind, fo make you guys come his peopo.
\v 23 An me, if I wen stop praying fo you guys, fo shua az one bad kine ting I wen do agains Yahweh, so no way I goin stop! An I goin teach you guys da way dat stay good an right.
\v 24 But make shua you guys stay scared a Yahweh an show um plenny respeck, an go all out fo work fo him fo real kine. Tink bout all da big kine tings he wen do fo you guys.
\v 25 But if you guys still do bad kine stuff, he goin take away you guys an yoa king.”
\c 13
\s Samuel Poin Finga Saul
\r (Jesus Guys 13:22)
\p
\v 1 Saul stay thirty year ol wen he come king fo da Israel peopo, an he stay king fo forty-two year.
\p
\v 2 Saul pick three tousan guys from Israel fo be army guys. Two tousan guys stay wit him Mikmash side, an up country Bethel side. One tousan guys stay wit Jonathan, Gibeah side, inside da Benjamin land. An Saul send home da odda guys he neva pick.
\p
\v 3 Jonathan dem attack da Filisha army camp Geba side, an da odda Filisha army guys hear bout um. Den Saul tell, ‘Blow da sheep horn trumpet all ova da land, an tell, ‘All you Hebrew peopo, lissen, yeah?!’-”
\v 4 So all da Israel peopo wen hear dis: “Saul wen attack da Filisha army camp, an now da Filisha guys hate us Israel guys even moa!”
\p So Saul call his army guys fo come togedda wit him Gilgal side.
\p
\v 5 Da Filisha guys come togedda too fo fight da Israel guys, wit three tousan war wagon, six tousan guys dat ride horse, an choke plenny infantry guys, jalike da sand on top da beach. Dey go up an make camp Mikmash side, from Bet-Aven on da eas side.
\v 6 Wen da Israel guys see az goin be bad fo dem, an dat da Israel army get plenny presha, dey lose fight an dey go hide inside da caves an bushes, inside da cracks in da cliffs, an inside holes an pukas.
\v 7 Some Israel guys even run away across da Jordan River an go inside da Gad an Gilead land.
\p
Saul stay Gilgal side still yet, an all his army guys dat neva run away, stay shaking cuz dey real scared.
\v 8 He wait seven days, cuz dass da time Samuel tell him he goin come. But Samuel neva show up Gilgal side. So Saul's guys start fo scatta.
\p
\v 9 So Saul tell um, “Bring me da animals fo da burn up kine sacrifice, an fo da kine sacrifice dat show dat da peopo an God stay tight wit each odda.” Den Saul make da burn up kine sacrifice.
\v 10 Same time wen he pau da sacrifice, Samuel show up! Saul go outside fo meet him an tell um aloha.
\p
\v 11 Samuel tell, “Eh! Wat you wen do?!”
\p Saul tell, “Wen I see oua army guys stay scatta all ova da place, an you neva come yet like you wen tell, an da Filisha guys stay come togedda Mikmash side,
\v 12 I stay tinking, ‘Da Filisha guys goin come down agains me Gilgal side, an I neva yet aks Yahweh fo help us.’ So I know I not da pries, but I figga, az gotta be me, dat go an make da burn up kine sacrifice, right now!”
\p
\v 13 Samuel tell, “Bummas! You wen ack stupid! You neva lissen an do wat yoa God Yahweh wen tell you, you gotta do! If you wen do wat Yahweh tell, den he make you come da ancesta awready fo da kings ova da Israel peopo, all da time. But, you neva do um!
\v 14 So dass why you no goin be da ancesta fo da king guys! Yahweh stay look fo one guy dat stay tink an do stuff jalike him, an he pick dat guy awready fo come da leada fo his peopo, cuz you neva do wat Yahweh tell you fo do!”
\p
\v 15 Den Samuel go way from Gilgal, an go Gibeah side, inside da Benjamin land. An Saul count his guys dat still stay wit him. Get bout six hundred guys.
\s Da Israel Guys No Mo Notting Fo Use Fo Fight
\p
\v 16 Saul, his boy Jonathan, an da guys dat still stay wit dem, stay inside Gibeah town inside da Benjamin land, an da Filisha guys stay inside dea camp Mikmash side.
\v 17 Da Filisha guys send out three bunch army guys fo fight. One bunch go nort fo go Ofrah town nea Shual,
\v 18 One nodda bunch guys go west Bet-Horon side, an da odda bunch go up country by da edge a da land wea you can look down an see da Zeboim Valley wit da boonies da odda side.
\p
\v 19 Dat time, all ova da Israel land neva have blacksmith. Cuz da Filisha guys tink, “No good da Hebrew guys go make sword o spear!”
\v 20 So all dat time, all da Israel peopo gotta go down Filisha side fo da Filisha guys make sharp dea hoe, da metal part fo dea plow, dea pick, an dea axe.
\v 21 Dey gotta pay 2/3 ounce silva fo make sharp one hoe o da metal part fo one plow, an 1/3 ounce silva fo make sharp one pitchfork, one pick, o da sharp part a da stick dey use fo poke da cow dat stay pull da plow.
\p
\v 22 An dass how come, wen da day come fo fight, no mo nobody wit Saul an Jonathan get sword o spear. Ony Saul an his boy Jonathan get um.
\s Jonathan Go Afta Da Filisha Guys
\p
\v 23 Had some Filisha army guys wen go make camp by da pass ova da hills Mikmash side.
\c 14
\s Jonathan Make Plan
\v 1 So one day Jonathan, Saul's boy, tell da young guy dat carry his stuff fo fight, “Eh! We go ova dea an attack da Filisha army guys da odda side dis stream.” But Jonathan neva tell his fadda.
\p
\v 2 Dat time, Saul stay Migron town on da edge a Gibeah, an make camp unda one pomgram tree. He get bout six hundred army guys ova dea wit him.
\v 3 Ahijah stay wit dem too. His fadda was Ikabod's brudda Ahitub, an his granfadda was Finehas, Eli's boy (dass da Eli guy dat befo time was Yahweh pries guy Shiloh town). Now, Ahijah, he da pries guy dat wear da spesho kine vest cuz he da main pries.
\p No mo nobody know dat Jonathan wen go way from dea awready.
\p
\v 4 On both sides da pass wea Jonathan gotta go across fo attack da Filisha army guys, get cliff. Da cliff one side da pass get da name Bozez, an da cliff da odda side, Senneh.
\v 5 You look in front you, from da nort side cliff, get Mikmash down dea, an you look in front you, from da sout side cliff, get Geba down dea.
\p
\v 6 Jonathan tell da young guy dat carry his stuff fo fight, “Come, we go ova da pass by wea dose guys stay dat neva cut skin like God's peopo. Maybe Yahweh go do someting fo help me an you. Yahweh goin win, no matta he get plenny guys o litto bit guys.”
\p
\v 7 His helpa guy tell um, “Do eryting you tinking fo do. I stay tight wit you wit all my heart.”
\p
\v 8 Jonathan tell, “Kay den! We go ova dea nea da guys an let dem see us.
\v 9 If dey tell us, ‘Okay, wait dea till we come by you guys,’ we goin stay wea we stay now, an no go up dea by dem.
\v 10 But if dey tell, ‘Okay, come up hea by us guys,’ we goin go up, cuz dat goin be da sign dat show us dat Yahweh stay give dem to us guys.”
\p
\v 11 So da two a dem show demself to da Filisha army guys. Da Filisha guys tell, “Eh! Look! Get Hebrew guys stay coming outa da hole wea dey stay hiding!”
\v 12 Da Filisha army guys yell to Jonathan an his helpa guy, “Come up hea by us guys! We like teach you guys someting!”
\p So Jonathan tell his helpa, “Come up afta me. Yahweh give dem to us Israel guys awready!”
\p
\v 13 Jonathan, use his hands an feets fo climb up, an his helpa guy climb right in back a him. Jonathan wack da Filisha guys an dey fall down in front him. Den his helpa guy come afta an kill um all.
\v 14 Az was da first time da Israel guys attack da Filisha guys. Jonathan an his helpa guy kill bout twenny Filisha guys inside one place bout one half acre big.
\s Da Israel Guys Win Ova Da Filisha Guys
\p
\v 15 Den all da odda Filisha army guys come real scared an shaking -- da guys inside da camp an on top da level groun inside da valley, da small kine camps outside da main camp, an da bunches a army guys dat go out fo fight. Den, da groun shake! God da One dat make um come even mo scared.
\p
\v 16 Da watcha guys fo Saul, Gibeah side inside da Benjamin land, dey look, an wo! uku paila Filisha guys, running aroun dis side an dat side, jalike dey donno wass up!
\p
\v 17 Den Saul tell da guys dat stay wit him, “Line up all oua guys, so I can find out who no stay!” Wen dey make lidat, dey find out was Jonathan an his helpa guy dat no stay.
\p
\v 18 Saul tell Ahijah, “Bring da Box fo Rememba God's Deal ova hea!” Cuz dat time da Box stay wit da Israel peopo.
\v 19 But right den, wen Saul stay talking wit da pries guy, all da big noise inside da Filisha camp come mo an mo loud.
\p So den Saul tell da guy, “Mo betta, no bring da Box now. We go ova dea!”
\p
\v 20 Den Saul an all his army guys come togedda fo fight. Dey find da Filisha guys all pupule -- dey stay fighting each odda wit dea swords!
\v 21 Had Israel guys dat befo time wen go along wit da Filisha guys, an go up wit dem by dea camp. But now, dey turn aroun an go ova by da Israel guys dat stay wit Saul and Jonathan.
\v 22 Wen all da Israel guys dat stay hiding inside da up country Efraim side hear dat da Filisha guys stay running away, dey come to da fight too an chase da Filisha guys fast.
\v 23 Dass how Yahweh get all da Israel guys outa trouble dat time. Dey fight all da way to Bet-Aven.
\s Jonathan Eat Da Honey
\p
\v 24 Dat same day, da Israel army guys get even mo presha, cuz Saul make dem make one strong promise to him. He tell, “I goin put one kahuna on top anybody dat go eat food today! Cuz firs, I gotta pau pay back da buggas dat stay agains me, befo da sun go down! Afta dat, den you can eat.” So nobody eat notting dat day, cuz was kapu.
\p
\v 25 All da army guys go inside da forest, wea had some honey on top da groun.
\v 26 Wen dey go inside da fores, dey spock da honey coming out, but nobody like touch um an eat um, cuz dey scared da kapu.
\v 27 But Jonathan neva hear da kine kahuna dat his fadda wen put on top da army guys. So, he poke his walking stick inside da honey place. He eat some honey, an he smile cuz make him feel real good.
\v 28 One a da army guys tell um, “Yoa fadda wen make us army guys make one strong promise. He tell, ‘I goin put one kahuna on top anybody dat go eat food today! Cuz firs, I gotta pau pay back da buggas dat stay agains me! An I goin pay um back befo da sun go down! Afta dat, den you can eat.’ Az why now all us guys stay wasted!’
\p
\v 29 Jonathan tell, “Wat my fadda wen do, making plenny trouble fo all oua peopo. See! I feel mo betta awready, cuz I wen eat litto bit a dat honey.
\v 30 Fo shua, stay mo betta today, if da guys wen eat some a da stuffs dey rip off from da Filisha army guys! But dey neva! If dey wen eat, den we can kill even mo plenny Filisha guys!”
\p
\v 31 Dat time, afta da Israel guys wen wack da Filisha guys all da way from Mikmas to Aijalon, da Israel guys stay plenny wasted.
\p
\v 32 Dey now jump on top da Filisha guys stuffs, an take da sheeps, da cows, an da bebe cows. Dey kill da animals on top da groun, an eat um, but dey neva get rid a all da blood like dey suppose to.
\v 33 Den somebody tell Saul, “Look! Yoa army guys stay doing bad kine stuff agains Yahweh, cuz dey eat da meat dat get da blood inside um!”
\p Saul tell, “Da way you guys ack, no can trus you guys notting! Roll one big stone ova hea by me, right now!”
\v 34 Den he tell, “Go out ery place da guys stay. Tell dem, ‘Erybody bring yoa cows an sheeps an goats ova hea by me, an kill um on top dis stone. Den you can eat um. No go do bad kine stuff agains Yahweh, an go eat da meat wit da blood still yet, inside um.’-”
\p So dat nite, erybody bring dea cow an kill um on top da big stone ova dea,
\v 35 dat Saul wen use fo one altar fo Yahweh. Az da first time he wen make lidat.
\p
\v 36 Den Saul tell, “Nex ting, nite time, we go down by da Filisha guys, an rip dem off till come light tomorra, an make shua nobody alive!”
\p
Dey tell, “Do wateva you tink good. Les do um!”
\p
But da pries guy tell, “Firs ting, maybe we betta aks God bout um, right hea, befo we go.”
\p
\v 37 So Saul aks God, “You tink dass okay, o wat? if I go down afta da Filisha guys. You goin let us Israel guys win, o wat?” But God no answa him notting, dat time.
\p
\v 38 Az why Saul tell, “All you main leada guys fo da army, come ova hea by me. Go find out wat bad ting we wen do today.
\v 39 Fo shua, Yahweh stay alive, da one stay get us guys outa trouble. An fo shua too, no matta who wen do da bad ting, even if was my boy Jonathan wen do um, dey gotta mahke.” But, no mo nobody from all da army guys tell um notting.
\p
\v 40 Den Saul tell da Israel guys, “You guys stand ova dea. Me an my boy Jonathan goin stand ova hea.”
\p Da guys tell, “Watevas you tink stay good, do um awready.”
\p
\v 41 Den Saul pray to Yahweh, “You, da God fo da Israel peopo! Show who neva do notting bad, an who wen do someting bad!” Den dey pull straw, an Jonathan an Saul get da blame, an da army guys stay okay.
\v 42 Saul tell, “We go pull straw one mo time, fo pick me o my boy Jonathan.” An so, was Jonathan dat get da blame.
\p
\v 43 Den Saul aks Jonathan, “Wat you wen do?!”
\p So Jonathan tell him, “I ony taste litto bit honey dat stay on top my walking stick, on da end. So jus cuz a dat, I gotta mahke, o wat?!”
\p
\v 44 Saul tell, “You gotta mahke, Jonathan, o God goin pay me back plenny moa!”
\p
\v 45 But da army guys tell Saul, “Wat you mean, Jonathan gotta mahke?! No way! He da one wen get us Israel guys outa trouble from da Filisha guys, big time! Jalike fo shua Yahweh stay alive, us guys stay shua too, dat not even one hair from Jonathan head goin fall on top da groun. Cuz God wen help Jonathan get all us guys outa trouble today!” So dass how da army guys get Jonathan outa trouble, an he no gotta mahke.
\p
\v 46 Den Saul pau go afta da Filisha guys, an he go home. An da Filisha guys go back dea own land.
\p
\v 47 Afta Saul take ova an come da king fo da Israel peopo, he fight agains da peopos dat live all aroun dem, an dat stay agains da Israel peopo: da Moab peopo, da Ammon ohana peopo, da Edom peopo, da Zobah kings, an da Filisha peopo. Ery place he go, he punish dose guys.
\v 48 He fight, an he no scared notting. He win ova da Amalek peopo, an get da Israel peopo outa da powa a da guys dat stay rip dem off.
\s Da Saul Ohana
\p
\v 49 Saul boys, dea names Jonathan, Ishvi, an Malki-Shua. His olda girl name Merab, an da younga girl name Michal.
\v 50 Saul's wife name Ahinoam, Ahima girl. Abner, he da guy in charge a Saul army guys. Abner, he Ner boy. Ner, he Saul uncle.
\v 51 Saul's fadda Kish, an Abner fadda Ner, dey Abiel boys.
\p
\v 52 All da time Saul stay king, get real bad war wit da Filisha guys. Weneva Saul spock one strong guy dat know how fo fight real good, o one guy dat no scared notting, Saul take da guy fo his army.
\c 15
\s Saul Make War Wit Da Amalek Peopo
\p
\v 1 Samuel tell Saul, “I da guy dat Yahweh wen send fo put oil on top yoa head fo make you da king fo his peopo, da Israel peopo. So den, you gotta lissen eryting Yahweh tell.
\v 2 Dis, da message from Yahweh, da Boss Fo All Da Armies: ‘I goin go afta da Amalek peopo an punish dem, cuz a wat dey wen do to da Israel peopo, da time da Israel peopo wen come outa Egypt. Da Amalek peopo fight fo da road an make da Israel peopo go aroun dem.
\v 3 Now go! Go afta da Amalek peopo, an wipe um out an eryting dey get, make um all one sacrifice fo me. No let um go! Kill da guys, da wahines, da kids, da bebes, da cows, da sheeps an goats, da camels, an da donkeys!’-”
\p
\v 4 So Saul wen tell all his army guys come, an bring dem togedda Talaim side. Get two hundred tousan infantry guys, an ten tousan guys from Judah.
\v 5 Saul guys go da main town Amalek side, an dey hide inside one gulch.
\v 6 Den he send message to da Ken peopo, “Go way from da Amalek peopo, so dat I no wipe out you guys wit dem. Cuz you guys wen help all da Israel peopo wen dey stay coming outa Egypt.” So da Ken peopo go way from da Amalek peopo.
\p
\v 7 Den Saul guys wack da Amalek peopo all da way from Havilah to Shur, by da east side a Egypt.
\v 8 He catch Agag da Amalek king but he no kill um. He use sword fo wipe out all Agag peopo, jalike dey was one sacrifice fo God.
\v 9 But Saul an his army guys let Agag stay live. An he let his guys keep eryting dat stay good: all da bestes kine sheeps an cows, da cows dey feed spesho kine, an da bebe sheeps. Dey neva like kill all dose animals jalike dey one sacrifice fo Yahweh. Dey kill ony da animals dey no like an tink az wort notting. An dey tell, “We doing dis cuz God tell us fo do um.”
\s Yahweh No Like Saul Be Da King No Moa
\p
\v 10 Den Yahweh give Samuel dis message,
\v 11 “I stay sorry dat I wen make Saul come da king, cuz he make deaf ear so dat he no stay tight wit me no moa, an neva finish wat I wen tell him fo do.” Wat Yahweh tell, bodda Samuel so plenny, dat he pray all nite to Yahweh fo help.
\p
\v 12 Da nex morning, early time, Samuel get up fo go meet Saul. But da peopo tell, “Saul go Carmel town awready. An you know wat? Ova dea Saul awready wen put up one pile rocks fo erybody rememba, dat he da one wen wipe out da Amalek peopo. Den he go da odda way, Gilgal side.”
\p
\v 13 Samuel go from dea, an wen he catch up Saul, Saul tell, “I like Yahweh do good kine stuff fo you! I wen do eryting Yahweh wen tell me fo do, yeah?!”
\p
\v 14 But Samuel tell, “Den how come I hear all dem sheeps an cows making noise?!”
\v 15 Saul tell, “Da army guys wen bring um from da Amalek peopo. Dey let da bestes kine sheeps an cows stay alive, fo make sacrifice fo yoa God Yahweh. But we wipe out all da oddas cuz dass wat we suppose to do fo Yahweh.”
\p
\v 16 So Samuel say, “Stop! Pau talk awready! Cuz I goin tell you wat Yahweh wen tell me las nite.”
\p
Saul tell, “Shoots, brah! Wat he tell?”
\p
\v 17 Samuel tell, “Had one time, you neva tink you was importan, yeah? Den you come da main guy ova all da twelve Israel ohanas, cuz Yahweh wen pick you fo come da King Fo Da Israel Peopo.
\v 18 An he give you one job fo do. He tell, ‘Go wipe out all dose Amalek peopo, fo me. Cuz dey stay do real bad kine stuff, az why. Make war agains dem till you wipe um all out.’
\v 19 How come you no lissen wat Yahweh tell?! How come you jump all ova da Amalek peopo stuffs fo rip um off?! Da way Yahweh see um, az bad, da ting you wen do!”
\p
\v 20 Saul tell, “Not! I wen lissen Yahweh! I do jus how he tell me. I wipe out all da Amalek peopo jalike I suppose to do fo Yahweh. An I cach Agag dea king an make him prisona.
\v 21 Da army guys wen take da sheeps an da cows from all da stuffs. Dey bring da bestes ones. No can use um fo no odda ting, cuz gotta wipe um out total. Dey ony fo make sacrifice fo yoa God Yahweh ova hea, Gilgal side.”
\p
\v 22 But Samuel tell:
\q
“You tink dat Yahweh feel mo good inside
\q2 Wen you make all da diffren kine sacrifice,
\q2 O wen you lissen to him?!
\q Wen you lissen, dass mo betta
\q2 Den wen you make sacrifice!
\q Mo betta wen you find out wat God like,
\q2 Den, kill da sheep!
\q
\v 23 Cuz anybody go agains Yahweh, az bad,
\q2 Jalike if dey aks da fortune tella guys wat goin happen,
\q An anybody dat no do how dea boss tell um fo do, az wrong awready,
\q2 Jalike if dey go down in front da idol kine gods.
\q You! Cuz you no take wat Yahweh tell you fo do,
\q2 Az why he no take you fo stay king no moa!”
\p
\v 24 Den Saul tell Samuel, “I wen do bad ting, yeah?! I go agains wat Yahweh tell me, an wat you tell me. Cuz I scared da army guys, so I do wat dey tell me fo do.
\v 25 Now, please, yeah? let me go I wen do da bad ting, an come back wit me, so dat I can show love an respeck fo Yahweh.”
\p
\v 26 But Samuel tell him, “Eh! I no goin go back wit you. You no take wat Yahweh tell you fo do. Az why Yahweh no take you fo stay da king fo da Israel peopo.”
\p
\v 27 Samuel turn aroun fo go. Saul grab his robe, an one piece a da robe broke off.
\v 28 Samuel tell him, “You see?! Yahweh stay broke off da Israel peopo from you today, so you not dea king no moa, an he give dem to one nodda king dass jalike you, but dis guy mo betta den you.
\v 29 An da God fo da Israel peopo, dat stay awesome foeva, he no bulai nobody, an he no get secon thoughts. He not one guy jalike us dat get secon thoughts.”
\p
\v 30 Saul tell, “I wen do one bad ting. But now, can show respeck fo me an no make me shame in front da older leada guys, an in front da odda Israel peopo? Come back wit me, so I can show love an respeck fo Yahweh, yoa God.”
\v 31 So Samuel go back wit Saul, an Saul show love an respeck fo Yahweh.
\p
\v 32 Den Samuel tell, “Bring me Agag, da king fo da Amalek peopo.”
\p
Da army guys bring Agag in front Samuel. Agag stay good inside, cuz he tink, “Fo shua dey no goin kill me now.”
\p
\v 33 But Samuel tell,
\q
“Jalike you wen use yoa sword so dat da wahines no mo dea kids,
\q2 Now, yoa mudda goin come one a da wahines dat no mo kids.”
\p
An Samuel chop Agag plenny, right dea in front Yahweh, Gilgal side.
\p
\v 34 Den Samuel go his place Ramah side. But Saul go his place inside Gibeah.
\v 35 Till Samuel mahke, he no go fo see Saul again. But Samuel stay sad inside cuz a Saul. An Yahweh stay sorry dat he wen make Saul da king fo da Israel peopo.
\c 16
\s Yahweh Show Dat He Pick David
\p
\v 1 Yahweh tell Samuel, “You goin stay sore inside all da time cuz a Saul, o wat?! I no take him no mo fo be da king fo da Israel peopo. Fill up yoa cow horn bottle wit olive oil, an go; I goin send you by Jesse, da Betlehem guy. I wen awready pick one a his boys fo come da nex king fo me.”
\p
\v 2 But Samuel tell, “How can?! Fo shua Saul goin hear dat I go, an he goin kill me!”
\p
Yahweh tell, “So?! Take one young girl kine cow wit you an tell da peopo, ‘I stay hea fo make sacrifice fo Yahweh.’
\v 3 An make shua Jesse come wen you make da sacrifice. Dass da time I goin tell you wat fo do. I goin tell you pour olive oil on top one guy, fo show he da one I wen pick!”
\p
\v 4 So Samuel do wat Yahweh tell. Wen he come Betlehem, da older leadas fo da town go meet him. But dey stay scared an shaking. Dey aks, “How come you hea? Eryting stay okay, o wat?”
\p
\v 5 Samuel tell, “Yah, eryting okay. I ony come fo make sacrifice fo Yahweh. All you leada guys, make yoaself ready fo come in front Yahweh too. Den come make sacrifice wit me, yeah?” Den Samuel go Jesse place, an he do da religious kine tings fo make Jesse an his boys ready fo come in front Yahweh, an he tell dem fo come wen he make da sacrifice too.
\p
\v 6 Wen dey come, Samuel see Jesse boy Eliab, an tink, “Fo shua! Dis guy, dat stand hea in front Yahweh, he da one Yahweh wen pick fo come da king!”
\p
\v 7 But Yahweh tell Samuel, “Not! No look da outside, how he look. Yah, he look jalike da winna, one big man, but I not taking him. Cuz I no look fo da tings dat peopo like see. Peopo ony look fo wat dey can see wit dea eyes, but me, Yahweh, I look inside da peopo.”
\p
\v 8 Nex, Jesse call Abinadab, an tell him fo walk in front Samuel. But Samuel tell, “Yahweh no pick dis one too.”
\v 9 Den Jesse tell Shammah fo walk in front Samuel. But Samuel tell, “Still yet, Yahweh no pick dis one.”
\v 10 Jesse tell all seven a his boys fo walk in front Samuel. But Samuel tell, “Same ting. Yahweh no pick dem!”
\v 11 So he aks Jesse, “Dese all da boys you get?”
\p
Jesse tell um, “Get one moa, da mos young boy David. But now, he stay taking care da sheeps.”
\p
Samuel tell, “Send somebody fo bring him ova hea. We no goin do notting till he come!”
\p
\v 12 So Jesse send somebody fo bring David dea. David healthy, get good tan an nice kine eyes. He real good looking.
\p Den Yahweh tell Samuel, “Quick! Pour da oil on top him, cuz him da one!”
\p
\v 13 So Samuel take da cow horn bottle wit oil inside, an pour um on top David, wit his brudda guys all aroun. Right den an dea, da Spirit from Yahweh take ova David, so from dat time he stay get da powa from Yahweh. Den Samuel go back home Ramah side.
\s David Start Fo Work Fo Saul
\p
\v 14 Dat same time, da Spirit from Yahweh wen bag from Saul, an Yahweh send one bad kine spirit dat scare Saul an make him suffa.
\p
\v 15 Da guys dat work fo Saul tell um, “Eh, you know wat?! Az one bad kine spirit from God dat stay scare you an make you suffa.
\v 16 You oua boss, but us guys tinking, maybe az good idea dat you send us fo go look fo somebody dat know how fo play da harp real good. Den, weneva da bad kine spirit from Yahweh take ova you, he can play music, an you goin feel mo betta.”
\p
\v 17 So Saul tell his worka guys, “Kay den. Go find somebody dat can play da harp real good, fo me. An bring um hea by me.”
\p
\v 18 One a da worka guys tell, “You know wat?! I wen see one a Jesse boys from Betlehem dat really know how fo play da harp. He one muscle guy, an know how fo fight. He erytime tink befo he talk. An he good looking. Yahweh stay tight wit him.
\p
\v 19 Den Saul send messenja guys by Jesse, fo tell, “Send yoa boy David by me, da one dat stay wit da sheeps.”
\v 20 So Jesse take one young goat. Den he take plenny food an one skin full a wine an put um on top one donkey. He send his boy David fo take all dat fo Saul.
\p
\v 21 Dass how David come by Saul an start fo work fo him, an Saul like David plenny! Laytas, David come one a da guys dat carry Saul stuff fo fight.
\v 22 Den Saul send messenjas by Jesse, an tell, “Try let David stay hea fo work fo me, cuz da way I see um, he one real good guy.”
\v 23 Weneva da bad kine spirit from Yahweh take ova Saul, David take his harp an play music. Den Saul feel mo betta, an da bad kine spirit leave Saul an go way.
\c 17
\s David Kill Goliath
\p
\v 1 Now da Filisha guys tell dea army guys come togedda fo fight. Dey go Socoh inside da Judah land, an make camp Efes Dammim side, wit Socoh dis side an Azekah da odda side.
\v 2 Saul an da Israel guys come togedda an make camp inside da Elah Valley. Dey make ready dea guys inside one line fo fight da Filisha guys.
\v 3 Da Filisha guys stay on top one hill, an da Israel guys on top anodda hill, an get stream in da middo.
\p
\v 4 Had one real strong guy name Goliat from Gat. He stay nine feet eight inch tall. An erytime he fight, he win. He come out from da Filisha camp, an stand wea da two armies can see um.
\v 5 He wear one bronze helmet, an one body armor wit plenny small piece bronze metal, put togedda jalike fish scale, dat weigh one hundred twenty five pound.
\v 6 He get bronze kine leg armor, an one bronze sword hanging from down his back.
\v 7 An he carry one spear too. Da wood part a da spear, big jalike one beam, an da iron point weigh fifteen pound. Had one nodda guy dat carry Goliat big shield an walk in front him.
\p
\v 8 Goliat stand ova dea, an yell to da Israel army guys, “How come all you guys come out hea an stand in line jalike you was goin fight? Me, I da Filisha man! You guys, you no can do notting! You ony can do da work dat Saul give you, yeah?! So den, go pick one a yoa guys an make him come ova hea by me!
\v 9 If yoa guy fight me an kill me, den us guys goin come yoa slave. But if I win an kill yoa guy, den you guys goin come oua slave an work fo us guys.”
\v 10 Den he tell, “Today, I goin make shame fo you Israel guys! Give me one a da guys dat stay all line up ova dea yoa side, so me an him can fight awready!”
\v 11 Saul an all da Israel guys hear eryting da Filisha guy tell, an dey lose fight an stay real scared.
\p
\v 12 David, he Jesse boy. Jesse, from Efrata (dass da ol name fo Betlehem town inside Judah, you know). Jesse get eight boys. He real ol wen Saul stay king.
\v 13 Jesse's three boys dat da mos ol, Eliab, Abinadab, an Shammah, dey wen go wit Saul fo fight da Filisha guys.
\v 14 David, he da mos young. Was ony da three mos olda bruddas dat wen go wit Saul.
\v 15 David work fo Saul liddo bit, den he come back fo take care his fadda's sheeps Betlehem side liddo bit. David, he go an come back plenny fo do all dat!
\p
\v 16 Fo forty days Goliat, da Filisha guy, go out early ery morning, an again wen almos dark, an stand in front da Israel guys.
\p
\v 17 Had one time, Jesse tell his boy David, “Take dis bag a roas kine wheat, an dese ten round breads, an go quick by yoa bruddas inside da army camp.
\v 18 An take dese ten wheel cheese fo dea main leada guy. Check out yoa bruddas fo me an make shua eryting stay good fo dem, an bring back someting fo show me how dey stay.
\v 19 Dey stay wit Saul an all da Israel guys inside da Elah Valley, fo fight agains da Filisha guys.”
\p
\v 20 Early morning time, David wen leave his sheeps wit anodda guy fo take care a dem. He load up his stuffs, an start fo go jalike his fadda Jesse wen tell um fo do. Wen he come jus outside da camp, da army guys stay going out to da place wea dey goin line up fo fight. Dey stay yelling fo fight.
\v 21 Da Israel guys an da Filisha guys stay making dea lines ready fo attack each odda.
\v 22 David leave da stuff he bring wit da guy dat suppose to watch erybody stuffs, an he run by da place wea da army guys line up, fo aks his bruddas if eryting stay okay.
\v 23 Wen he stay talking wit dem, right den an dea, Goliat, da Filisha guy from Gat, come out from da Filisha guys line to da middo. An he yell to da Israel guys wat he erytime say, an dis time David hear um.
\v 24 
Wen da Israel guys see Goliat, dey real scared an bus up inside, an dey all pull back from him.
\p
\v 25 Da Israel guys stay telling, “You see! Erytime dis guy come out to da middo! He come up dis way fo talk big, jus fo make us Israel guys shame! But you know, oua king goin give plenny rich kine stuff to da guy dat kill Goliat. An he goin give da guy his own girl fo marry. He even goin make um so da guy's ohana no gotta pay tax no mo inside Israel.”
\p
\v 26 David aks some odda guys dat stand near him da same ting, “Eh! Wat dey goin do fo da guy dat kill dis Filisha guy an hemo da shame from da Israel peopo? Us guys, da army fo da God dat stay alive fo real kine! So den, who dis Filisha guy tink him?! He no mo God cut skin mark! He ony ack big fo try make us Israel guys shame, aah?!”
\p
\v 27 Da army guys tell David again wat dey tell um da firs time. Wen dey pau, dey tell, “Az how da king goin do fo da guy dat kill Goliat.”
\p
\v 28 Wen Eliab, David's mos older brudda, hear him talking to da guys, he come real piss off wit David. He tell, “What fo you come down hea? Who you wen leave da litto bit sheeps wit, inside da boonies? You get big head an you no do wat you suppose to do! Erytime you tink bad kine stuff inside yoa heart. You come down hea, ony fo see da fight!”
\p
\v 29 David tell, “Now, wat I wen do? I jus aks question, you know!”
\v 30 Den David turn fo talk wit anodda army guy, an aks da same ting, an dat guy tell him da same ting jalike da odda guys.
\p
\v 31 Somebody hear wat David wen say, an go tell Saul. An Saul tell David fo come see him.
\v 32 David tell Saul, “No good erybody lose fight cuz a dis Filisha guy. I work fo you, so I goin fight um.”
\p
\v 33 Saul tell um, “You no can go fight dis Filisha guy! You ony one small kid, an he one real good army fighta, from da time he one boy.”
\p
\v 34 But David tell Saul, “I work fo you, but I take care da sheeps fo my fadda too. Weneva one lion o one bear come out an carry away one sheep from da oddas,
\v 35 I go afta um, an wack um. Den I get da sheep outa dea mout. An wen da lion o bear go afta me, I grab um by da chin hair, wack um one mo time, an kill um.
\v 36 Eh, Boss! I wen kill da lion an da bear too. Dis Filisha guy dat no mo God cut skin mark, he goin be jalike da lion an da bear, cuz he talk big agains oua army dat fight fo da God dat stay alive fo real kine.
\v 37 Yahweh, he da One wen get me outa da lion an da bear powa, an he goin get me outa dis Filisha guy powa too!”
\p
So Saul tell David, “Go awready! Goin be, dat Yahweh stay wit you.”
\p
\v 38 So den, Saul put his own clotheses fo war on top David, an one bronze helmet on top his head. He make um wear da kine body armor dey make wit plenny small piece bronze metal, put togedda jalike fish scale.
\v 39 David put da sword ova da body armor, an try fo walk aroun, cuz he neva wear um befo.
\p
He tell Saul, “I no can wear dese, cuz I neva wear um befo.” So he take um off.
\p
\v 40 Den David pick up his stick, go down to da stream, an he pick up five smood stones from dea, put um inside his bag dat he use wen he take care da sheeps. He get his sling inside his hand fo throw stone. Den he go nea da Filisha guy.
\p
\v 41 Same time, Goliat da Filisha guy an da guy dat carry his shield stay coming mo an mo nea David.
\v 42 Goliat check out David. He see dat he ony one boy, healthy an good looking. Goliat tinking, “Poho! Dis kid, wase my time!”
\v 43 He tell David stink kine, “Wot?! You tink I ony one dog, o wat?! Az why you come afta me wit one stick, yeah?!” Den Goliat tell his Filisha kine gods fo do all kine bad stuff to David.
\v 44 Goliat tell David, “Come mo close ova hea! So I can give yoa mahke body to da birds an da wild animals, fo eat!”
\p
\v 45 David tell Goliat, da Filisha guy, “You! You stay come agains me wit sword an wit one big spear fo poke an one small spear fo throw. But me, I come agains you, cuz I know wat kine god Yahweh stay! He Da God Ova All Da Armies, da God dat da Israel army guys pray to. He, da one you wen talk stink bout!
\v 46 Today, Yahweh goin turn you ova to me. I goin bus you up, an cut off yoa head. I goin give da mahke bodies from all you Filisha army guys to da birds an da wild animals fo eat. Den da peopo all ova da world goin know dat us Israel guys get one God dass fo real kine!
\v 47 All dese guys dat stay hea, goin know dat Yahweh no need sword o spear fo get his peopo outa trouble. Cuz Yahweh da one goin win dis fight. He goin give us guys da powa fo win ova you guys!”
\p
\v 48 Right den an dea da Filisha guy start fo come even mo nea, fo attack David. David move quick. He run fas to da Filisha army side, fo fight Goliat.
\v 49 David put his hand inside his bag an take out one stone. He put um inside da sling, whirl um aroun fas, den let um go. An he hit Goliat in da middo a da forehead! Da stone go inside his head, an Goliat fall down boom lidat, wit his face on top da groun.
\p
\v 50 Az how David wen make mo strong den Goliat da Filisha guy. David use ony one sling an one stone. He no use sword, but still yet he wack da Filisha guy fo kill um.
\p
\v 51 David run ova dea by Goliat body an stand dea. He grab Goliat sword from da sword bag an finish killing him. Den he cut off Goliat head wit da sword.
\p
Wen da Filisha guys see dat dea guy dat erytime win, stay mahke, dey turn aroun an take off fas.
\v 52 Den da Israel an Judah guys yell fo fight an start fo chase afta da Filisha guys all da way to Gat, an to da Ekron gates. Get mahke Filisha guys dat fall down all ova da Sha`arayim road, till you come to Gat an Ekron.
\v 53 Wen da Israel guys come back from chasing afta da Filisha guys, dey rip off all da stuffs from inside da Filisha camp.
\v 54 (Layta, David take Goliat's head an bring um Jerusalem side. He take Goliat stuff dat he use fo fight, an put um inside his own tent.)
\p
\v 55 Befo dat, wen David stay going out fo fight da Filisha guy, Saul watch David, an aks General Abner, “Eh, Abner! Who dat boy fadda?”
\p
Abner tell, “Eh, garans, I donno!”
\p
\v 56 Da king tell, “Go aks somebody. Find out who da fadda fo dis kid!”
\p
\v 57 Wen David come back from kill Goliat, Abner take um an bring um by Saul. An David still stay holding Goliat's head.
\p
\v 58 Saul aks David, “My boy, who yoa fadda?”
\p
David tell, “Jesse from Betlehem, he my fadda, an you da boss fo him.”
\c 18
\s Saul Come Jealous A David
\p
\v 1 Afta David pau talk wit Saul, Jonathan come tight wit David cuz dey get da same kine heart an head. He get love an aloha fo David jalike he get fo himself.
\v 2 From dat time, Saul like David fo stay wit him, an he no let David go back his fadda's place.
\v 3 Jonathan make one deal wit David, cuz he get love an aloha fo David jalike he get fo himself.
\v 4 Jonathan take off da robe he stay wearing, his body armor, an even his sword, his bow an arrows, an his army belt, an give um all to David.
\p
\v 5 Weneva Saul send David fo fight, David win good. So Saul make David come one leada guy fo da army. All da army guys an Saul's officer guys stay good inside bout dat.
\p
\v 6 Afta David come back from kill Goliat, da Filisha guy, wen all da army guys stay coming back, da wahines come out from all da towns all ova Israel fo meet King Saul. An dey stay singing an dancing. Dey stay good inside, an dey play tammorines an da three string harp.
\v 7 Wen dey dance, dey sing one good fun kine song lidis:
\q
“Saul kill tousans an tousans a guys,
\q2 An David kill ten tousans an ten tousans a guys!”
\p
\v 8 Wen Saul hea dis, he come real huhu cuz he tink, “Az not good, wat dey sing!” He tink, “Dey tell dat David wen kill ten tousans an ten tousans a guys, an dey tell dat me, I ony kill tousans an tousans a guys. Nex ting den, da peopo goin like make him come king!”
\v 9 From dat time, yeah, Saul stay jealous a David, an watch um even mo close.
\p
\v 10 Da nex day, had one spirit from God dat was bad fo Saul, dat wen take ova Saul. Saul stay inside his house talking pupule kine. David play his harp, jalike erytime he stay do. Saul get one spear inside his hand.
\v 11 He throw um at David. He stay tinking, “I goin make da spear go through David body an into da wall!” But David, two times he jump outa da way.
\p
\v 12 So now, Saul stay scared fo stay in front David, cuz he know dat Yahweh stay wit David, an wen go way from Saul.
\v 13 Az why he give David one job anodda place. He make David da leada fo one tousan army guys. An David go in front his army guys wen dey stay fighting.
\p
\v 14 An so eryting David stay do, come out good, cuz Yahweh stay wit him.
\v 15 Wen Saul see dat eryting David do, come out real good, he come scared, cuz da guy awesome!
\v 16 But all da Israel an Judah peopo get love an aloha fo David, cuz he lead dea army guys fo fight.
\s David Marry Saul Girl
\p
\v 17 One nodda time, Saul tell David, “Hea, take my olda girl, Merab. I goin give her to you fo marry. Ony work fo me, an fight fo Yahweh, an no come scared.” Saul talk lidat cuz he stay tinking, “I no need go agains dis guy fo kill um, cuz da Filisha army guys goin do dat fo me!”
\p
\v 18 But David tell Saul, “ Eh, I nobody, an my fadda ohana, not importan! No way I can get you, da king, fo my fadda in law!”
\v 19 But, wen da time come fo give Merab to David, Saul wen awready give her to Adriel from Meholah fo marry, an not to David.
\p
\v 20 But Saul's odda girl Michal, she in love wit David. Somebody tell Saul, an he stay tink “Az good!”
\v 21 An he tink, “I goin give her to him. Dass how I goin trap um, so da Filisha guys goin get um!” So Saul tell David, “Now, you get anodda chance fo come my son in law!”
\p
\v 22 Den Saul tell his helpa guys, “Talk to David wen da odda peopo no can hear you, an tell um, ‘Look, da king stay good inside bout you. An us guys dat work fo him, we all get love an aloha fo you too. So den, marry da girl an come his ohana!’-”
\p
\v 23 So da helpa guys go talk to David wen da odda peopo no can hear, an tell um wat da king wen say. But David tell, “You guys tink, az one small kine ting, fo marry one wahine from da king ohana, o wat? Cuz I ony one guy dat no mo notting, you know. An I not even importan!”
\v 24 Den Saul's helpa guys tell Saul wat David wen say.
\p
\v 25 Saul tell, “Tell David, I say dis: ‘Da king no like you pay fo da bride. You, ony gotta cut skin from 100 Filisha guys an bring back all da skins. Dass how da king goin pay back da Filisha guys, cuz dey stay agains him.’-” Saul talk lidat cuz he make plan fo let da Filisha guys kill David.
\p
\v 26 Saul's helpa guys tell David wat Saul wen say. David stay okay bout marry one wahine from da king ohana. So befo da time pau,
\v 27 David an his guys go out, an kill two hundred Filisha guys, an cut skin da bodies. Den David bring da skins back, an count um all in front da king, so dass nuff fo him come da king son in law. So Saul give his girl Michal to David fo marry.
\p
\v 28 Saul see wat happen, an he know fo shua dat Yahweh stay tight wit David, an dat Michal get love fo David.
\v 29 Den, wen David stay nea Saul, Saul come mo plenny scared den befoa. From dat time, Saul stay agains David all da time Saul stay alive.
\p
\v 30 Weneva da main leada guys fo da Filisha army take dea guys out fo make war, da same ting happen -- David an his guys win ova dem, mo plenny den da odda leada guys fo Saul army. Dass how erybody know dat David one awesome kine guy.
\c 19
\s Saul Try Fo Kill David
\p
\v 1 Saul tell his boy Jonathan an all his helpa guys fo kill David. But Jonathan get real plenny aloha fo David.
\v 2 So he tell David, “Betta watch out, cuz my fadda Saul looking fo one chance fo kill you. Take care tomorra morning. Go some place wea he no can find you, an hide ova dea.
\v 3 Me, I goin go out an stand wit my fadda in da country side, nea wea you stay. Den I goin say someting to him bout you, an wateva I find out bout wat he goin do, I goin tell you, okay?”
\p
\v 4 Da nex day, Jonathan talk good bout David to his fadda Saul, an tell him, “You da king, so please, yeah, no go do notting bad to David. Cuz he stay work fo you, an he neva do notting bad to you. An all da tings he do, help you plenny.
\v 5 He almos wen mahke, da time he kill Goliat, da Filisha guy. Dat time, Yahweh get da Israel peopo outa trouble big time. You wen see wat happen, an you wen stay good inside cuz a dat. So, how come you like do dis bad kine ting to one guy like David dat neva do notting wrong?! An den, you like kill him an you no even know why!”
\p
\v 6 Saul lissen to Jonathan, an make dis spesho promise: “Fo shua Yahweh stay alive, an fo shua too I goin do wat I make promise fo do. No mo nobody goin kill David!”
\p
\v 7 So layta, Jonathan wen go yell to David fo come. He tell David wat Saul wen say. Den Jonathan bring David by Saul, an eryting come jalike was befo time, an David stay wit Saul.
\p
\v 8 One mo time get war wit da Filisha guys. David an his army guys go out fo fight dem. David dem hit um real hard, an dey all run away from him.
\p
\v 9 But had one spirit from Yahweh dat bad fo Saul, dat take ova Saul again wen he stay sitting inside his house. He get his spear inside his hand. Wen David stay playing music,
\v 10 Saul try throw his spear fo pin David to da wall jalike da las time. David still move fas an dodge um, an Saul throw da spear inside da wall. Dat same nite, David get outa dea an go way fo good.
\p
\v 11 Saul send watcha guys by David's house fo watch him, so dey can kill him morning time. But Michal, David's wife, tell him, “If you no run away dis nite fo save yoa life, tomorrow you mahke die dead!”
\v 12 So Michal wen help David fo go down outa one window, an he run outa dea.
\v 13 Den Michal take one a da small idol kine gods, an lay um on top da bed. She put one goat hair net wea da head stay, an cover da whole ting wit David clotheses.
\p
\v 14 Den, wen Saul tell his guys fo go bus David, Michal tell, “Sick, yeah? He stay sick.”
\p
\v 15 Den Saul tell da guys fo go back an check out David. He tell um, “Bring da bed by me wit him inside, so I can kill um!”
\v 16 But wen da guys go inside, ony get da idol kine god inside da bed, an da goat hair net wea da head stay.
\p
\v 17 Layta, Saul tell Michal, “How come you bulai me lidis, an let dis guy dat stay agains me run way from me, outa hea?!”
\p
Michal tell um, “He wen tell me, ‘Get me outa hea! You like me fo kill you, o wat?!’-”
\p
\v 18 Wen David get outa dea, he go by Samuel, Ramah side. David tell Samuel eryting dat Saul wen do to him. Den David an Samuel go Naiot side, an stay ova dea.
\v 19 Somebody tell Saul, “You know wat? David stay Naiot side, inside da Ramah land!”
\v 20 So Saul send guys fo try bus David again. Dey see plenny guys talking fo God, an Samuel standing dea by dem cuz he dea leada guy. Right den an dea, God Spirit go take ova Saul guys, an dey make like dey stay talk fo God too.
\v 21 Somebody wen tell Saul bout dem, an Saul send mo odda guys. But dem, dey start fo make like dey talkas fo God too. Three time, same ting happen!
\v 22 In da end, Saul go Ramah side. He go by da big hole wea dey keep watta unda da groun Seku side. An he aks, “Samuel an David, wea dey stay?”
\p
Somebody tell, “Ova dea Naiot side, inside da Ramah land.”
\p
\v 23 So Saul go Naiot. But same ting happen to him -- God's Spirit take ova Saul too wen he stay walking, an he talk fo God till he come Naiot town, Ramah side.
\v 24 Saul, quick take off his clotheses dea jalike da odda guys, an he stay talk fo God in front Samuel. He lay dea widout his clotheses all day an all nite. Az why da peopo tell, “Even Saul ack like one talka guy fo God too, yeah?!”
\c 20
\s David An Jonathan, Good Friends
\p
\v 1 Den David run way from Naiot, inside da Ramah land, an go by Jonathan. He aks, “Wat I wen do? Wat kine crime, Saul like bus me fo? Da way yoa fadda see me, jalike I wen do someting real bad agains him, cuz he stay looking fo me, fo kill me!”
\p
\v 2 Jonathan tell, “Not! No way you goin mahke! Look! Wen my fadda do anyting, big o small, he erytime tell me firs. So! Fo shua, he goin tell me if he like kill you!”
\p
\v 3 But David tell, “Yoa fadda know fo real kine, dat you like me. So, he goin tink, ‘Az not good, wen Jonathan find out wat I goin do, cuz dat goin really bum Jonathan out.’
\p
“But still yet, jalike fo shua Yahweh stay alive, an you stay alive, I stay shua bout dis too: I ony get litto mo time, befo I goin mahke die dead!”
\p
\v 4 Jonathan tell David, “Wateva you tinking inside, I goin do um fo you.”
\p
\v 5 So David tell, “Look, tomorrow goin get da spesho religious time wen da New Moon show up, an I suppose to be dea fo eat wit da king. But you, I like you fo tell me I can go way. Den I goin go hide some place outside da town, till da day afta tomorrow wen litto mo dark time.
\v 6 If yoa fadda look fo me an see dat I no stay, try tell um, ‘David wen aks me fo let him go so he can run quick Betlehem side, da town wea his ohana stay. Cuz dey goin make one sacrifice ova dea dat dey make ery year fo all his ohana.’
\v 7 If he say, ‘Kay den,’ den goin be okay fo me, cuz I all same stay yoa worka guy. But if he come real huhu, den you goin know dat fo shua he goin hurt me.
\v 8 But you da boss, so try make um good fo me. Cuz was you wen set um up so me an you make one spesho deal togedda in front Yahweh. If I get da blame fo do someting wrong, mo betta you be da one dat kill me. But no be da one dat bring me by yoa fadda, fo him kill me.
\p
\v 9 Jonathan tell, “No way! If I wen know fo shua dat my fadda make up his mind fo do someting bad to you, den I goin tell you dat fo shua! But den, I donno, yeah?!”
\p
\v 10 David tell, “Who goin tell me if yoa fadda talk mean kine stuff to you?”
\s Jonathan An David Make Plan
\p
\v 11 Jonathan tell, “Come! Come! Mo betta we get outa hea, an go outside one nodda place fo talk.” So dey go ova dea togedda.
\p
\v 12 Den Jonathan tell David, “Fo shua Yahweh, da God fo da Israel peopo, see me make dis promise. I goin aks my fadda bout dis, by da day afta tomorrow, same time jalike now. If he okay bout you, den fo shua I goin send somebody fo tell you.
\v 13 But if my fadda tink az good fo him fo hurt you, den I like Yahweh punish me, Jonathan, real good, an do even mo plenny to me, if I no let you know, an send you away some place wea you goin stay okay! I like Yahweh stay wit you, jalike he wen stay wit my fadda befo time.
\v 14-15 So, get good heart fo me, jalike Yahweh get, if bumbye, I still stay alive. But, if I mahke, an even afta Yahweh wipe out from da earth, all da peopo dat stay agains you, I like you no change yoa mind bout get good heart fo my family, all da time!”
\p
\v 16 So Jonathan make one spesho deal wit da David ohana foeva. He say, “I like Yahweh make all da peopo dat stay agains David pay fo da bad kine stuff dey do.”
\v 17 An Jonathan tell David one mo time, fo make dea spesho promise good, da one dat David wen make wit Jonathan befo. Dass how Jonathan get love an aloha fo David, jalike he get love fo himself.
\p
\v 18 Den Jonathan tell David, “Tomorrow get da New Moon spesho religious time. Dey goin know dat you no stay, cuz no mo nobody goin sit yoa place by da table.
\v 19 Da day afta tomorra, wen litto mo ready fo da dark time come, go all da way down, by da place wea you wen hide wen dis trouble start, an wait nea da pile up stone dat stay dea.
\v 20 I goin shoot three arrows by da side a da stone, jalike I stay shooting one target.
\v 21 Den I goin send one boy, an tell um, ‘Go, find da arrows.’ If I tell um, ‘Look! Da arrows stay dis side a you. Bring um back hea,’ den you come, cuz dat goin mean dat jalike fo shua Yahweh stay alive, I stay shua az okay fo you. No mo nobody goin hurt you.
\v 22 But if I tell da boy, ‘Eh! da arrows stay mo far, da odda side a you!’ dat mean, you betta get outa hea, cuz Yahweh stay send you away.
\v 23 An bout da promise dat me an you wen talk bout, rememba, Yahweh da One dat know foeva, wat we wen tell.”
\p
\v 24 So David go hide outside da town. Wen da spesho religious time fo da New Moon start, da king sit down fo eat.
\v 25 He sit inside da place wea he erytime sit wit his back by da wall, across Jonathan. An Abner sit nex to Saul. But no mo nobody sit down David's place.
\v 26 Saul, he no say notting dat time, cuz he tinking, “Fo shua, someting happen fo make David so he no can go in front God fo one religious time like today.”
\v 27 But da nex day, da secon day fo da New Moon religious time, David's place again stay empty, an nobody sit dea.
\p Den Saul aks Jonathan, “How come Jesse boy David no come fo eat wit me yesterday an today?!”
\p
\v 28 Jonathan wen answa, “David wen tell me fo let um go Betlehem.
\v 29 He say, ‘Please, let me go home. Cuz oua ohana goin make sacrifice inside oua home town, an my big brudda wen tell me I betta be dea. If you my friend, an tink good kine stuffs bout me, please, yeah? jus let me go way dis short time, fo see my ohana.’ Az why David neva come yoa table.”
\p
\v 30 Saul come real huhu wit Jonathan. Saul tell, “You no ack like my boy fo real kine! You all pupule jalike yoa mudda! Dass gotta be one hamajang wahine dat no lissen nobody! You tink I donno dat you wen pick Jesse's boy fo come yoa bes friend, o wat?! Wen you make um yoa friend, you make shame fo yoaself, an fo yoa mudda dat wen born you!
\v 31 Cuz all da time Jesse's boy stay alive, no way you can stay shua bout notting, an no way you goin be king! So now, tell one a yoa guys fo go grab da bugga and bring um hea by me, cuz he gotta mahke!”
\p
\v 32 Jonathan tell his fadda, “David neva do notting wrong! Why he gotta mahke?! How come you like kill um?!”
\v 33 Den! Saul throw his spear at Jonathan fo try kill him, but Jonatan get outa da way. Dass wen Jonathan know fo shua, dat his fadda make up his mind awready fo kill David.
\p
\v 34 Jonathan jump up from da table, all salty. He now stay real huhu. Dat day, da numba two New Moon day, he no eat notting. He stay sore inside bout David, cuz a da shame kine way his fadda wen ack.
\p
\v 35 Morning time, Jonathan go out outside da town wea he goin meet David. Jonathan get one small boy wit him.
\v 36 He tell da boy, “You go run ova dea, an find da arrows I goin shoot.” So wen da boy running, Jonathan shoot one arrow da far side a da boy.
\v 37 Da boy go by da place wea Jonathan's arrow go down, Jonathan call out to him, “Hui! Da arrow stay mo far away yet!”
\v 38 Den Jonathan yell, “Quick! Hurry up! No stop!” So da boy pick up all da arrows, an come back by his boss.
\v 39 Da boy donno notting bout wat stay happening. Ony Jonathan an David know.
\v 40 Den Jonathan give his bow an arrows to da boy dat help um, an tell um, “Take um, an go back town side.”
\p
\v 41 Afta da boy go, David stand up from da south side a da rock pile. He go down in front Jonathan three times, wit his face on top da groun. Den dey kiss each odda an cry togedda. But David, he cry moa plenny.
\p
\v 42 Jonathan tell David, “Go! I like eryting stay good wit you. Az cuz me an you wen make spesho promise to each odda fo stay friends. An we aks Yahweh fo help us. We tell each odda, ‘Yahweh goin be da One dat know wat me an you stay do, an he know dat yoa ohana an my ohana goin stay friends all da time.’-”
\s Nob Side, Ahimelek Help David
\p
Den David go way, an Jonathan go back inside da town.
\c 21
\p
\v 1 David, he come Nob side, fo talk wit Ahimelek da pries guy. Ahimelek come scared an stay shaking wen he meet David. He aks, “How come you stay by yoaself? How come nobody stay wit you?”
\p
\v 2 David tell Ahimelek, “Da king wen send me ova hea fo do someting. He tell me, ‘Nobody suppose to find out notting bout wat I stay send you fo do. Nobody suppose to find out da stuff I wen tell you.’ My army guys, I tell dem awready fo meet me certain place.
\v 3 Now, wat kine food you get ova hea? You get round breads? Try give me five breads, o wateva you can find.”
\p
\v 4 But da pries guy tell David, “I no mo regular kine breads. But get some bread ova hea dat stay spesho fo God. Can eat um, ony if you stay shua dat yoa guys neva sleep wit da wahines, las nite o today.”
\p
\v 5 David tell, “Fo shua, us neva touch da wahines dis trip. Weneva I go out fo fight, az how we all make. All da guys bodies, stay spesho fo Yahweh. Dass how we do um, even wen we go fo do someting dat not spesho fo Yahweh. An even mo today, we stay spesho fo Yahweh!”
\v 6 So da pries guy give David da breads dat stay spesho fo Yahweh dat he get dea. Cuz da ony bread dey get, stay spesho fo Yahweh. He give David da breads dat da pries guys wen take away awready from in front Yahweh, wen dey put da hot bread dea da same time dey take da ol bread away.
\p
\v 7 Had one guy name Do`eg, from da Edom land. He one a Saul worka guys, da one dat stay in charge a da guys dat take care da sheeps fo Saul. Dat day, he gotta stay Nob side fo go in front Yahweh dea.
\p
\v 8 David aks Ahimelek, “You get one spear o one sword I can use? O no moa? I neva bring my sword o odda stuff fo fight, cuz da ting da king tell me fo do, I need do um quick lidat!”
\p
\v 9 Da pries guy tell, “Still get da sword you wen take away from Goliat da Filisha guy, da guy dat you wen kill inside da Elah Valley. Stay all wrap up inside one cloth, right ova dea in back a da spesho vest. If you like take um, den take um. Az da ony sword dat we get ova hea.”
\p
David tell, “Yeah! No mo odda sword like dat one! You can give um to me.”
\s David Run Away Gat Side
\p
\v 10 Dat same day, David run away from Saul, he go by Akish, da Gat king.
\v 11 But King Akish helpa guys tell da king, “Eh! Dis guy David, he da king fo da Hebrew peopo an dea land, yeah?! Dass da one dey sing bout wen dey dance lidis:
\q
‘Saul wen wack down tousans a guys
\q2 An David wack down ten tousans a guys!’-”
\p
\v 12 David tink plenny bout wat dey tell. Dass why he come plenny scared a Akish, da Gat king.
\v 13 So den he ack jalike he pupule weneva dey can see him. All da time he stay dea, he ack pupule kine. He scratch up da doors fo da town gate, an let spit run down his beard.
\p
\v 14 Akish tell his helpa guys, “Look! Look him! Dass one pupule guy! How come you guys bring um by me, aah?!
\v 15 You guys tink I need mo plenny pupule guys aroun hea, o wat?! Az why you guys wen bring dis bugga hea, o wat?! I no need dis guy fo stay hea in front me an ack lidis! An you betta not let dis guy come inside my house, yeah?!”
\c 22
\s David Stay Adullam An Mizpeh Side
\p
\v 1 So David wen get outa Gat town, an go inside one big cave nea Adullam town. Wen his bruddas an all his fadda's ohana guys find out wat wen happen, dey go down ova dea by him.
\v 2 All da peopo dat stay bum out, o no can pay wat dey owe somebody, o no stay good inside, dey go by David, an he come dea leada. Get bout four hundred guys wit him!
\p
\v 3 From dea, David go Mizpeh town, Moab side. He tell da Moab king, “Can let my fadda an mudda go by you guys, an stay dea wit you, till I find out wat God goin do fo me?” Da king tell, “Shoots, right on!”
\v 4 So David bring dem by da Moab king, an dey stay wit him, all da time David stay hide ova dea, inside da Adullam cave.
\p
\v 5 But one guy dat talk fo God, name Gad, tell David, “Mo betta you no stay ova hea! Go inside da Judah land!” So David go way, an go inside one place Heret side wea get plenny trees.
\s Saul Come Mo Pupule
\p
\v 6 One time, King Saul stay sitting unda da tamarisk tree on top da Gibeah hill. He get his spear wit him an all his officer guys stand roun him. Somebody tell, dat somebody wen find David an his guys.
\v 7 Saul tell da officer guys, “Lissen, aah?! You, Benjamin ohana guys! You guys tink Jesse's boy goin give you fields an grape farms?! You guys tink he goin make you da officer guys fo his army, jalike I wen do?! No way!
\v 8 Az why all you guys gang up agains me, yeah?! No mo nobody tell me wen my boy make one deal wit Jesse boy! No mo nobody from you guys even care bout me, o tell me dat my boy wen make my officer guy David stay wait fo jump me, jalike David do today!”
\s Saul Kill Da Pries Guys Nob Side
\p
\v 9 Get one guy Do`eg from Edom, stay stand wit Saul's officer guys. He tell, “Wen I stay Nob side, I wen see Jesse boy come dea, go by Ahimelek, Ahitub boy.
\v 10 Ahimelek aks Yahweh fo tell him wass goin happen wit David. He give David food, an give um da sword too dat Goliat da Filisha guy use.”
\p
\v 11 Den King Saul send somebody fo tell Ahimelek fo come, an all his fadda's ohana guys too. Dey da pries guys Nob side, an dey all come in front da king.
\p
\v 12 Saul tell, “Now lissen, Ahitub boy.”
\p
Ahimelek tell, “Yeah, az me, boss.”
\p
\v 13 Saul aks him, “How come you pries guys all gang up agains me, you an Jesse boy? You give him food, an one sword, an aks God fo show him wass goin happen. So now he make war wit me, an stay wait fo jump me, jalike he make today.”
\p
\v 14 Ahimelek tell da king, “No mo nobody from all yoa officer guys, mo solid fo you den David, yoa son in law! He da captain fo yoa bodyguard. Erybody inside yoa ohana get plenny respeck fo him.
\v 15 You tink dat day was da first time, o wat?! dat I wen aks God fo tell me wass goin happen fo David?! No way! You da king, but no way can poin finga me o my fadda's ohana guys, cuz I neva know notting bout all dis kine stuff!”
\p
\v 16 But da king tell him, “Fo shua, Ahimelek! You goin mahke! You an all yoa fadda's ohana!”
\p
\v 17 Den Saul tell da guys dat guard him: “Go all aroun da pries guys dat work fo Yahweh, an kill um! Cuz dey, on da same side wit David. Dey know he stay run away from me, but dey neva tell me.”
\p
But da army guys no like do notting fo attack da pries guys dat work fo Yahweh.
\p
\v 18 Den da king tell Do`eg da Edom guy, “You! Go attack da pries guys!” So Do`eg turn an attack dose guys. Dat day, he kill eighty-five guys dat wear da pries kine vest.
\v 19 Do`eg go Nob, da town wea da pries guys live, an wit his sword he kill da peopo dat still stay ova dea too. He kill da wahines, da kids, da bebes, da cows, donkeys, sheeps, an goats.
\p
\v 20 But get one a Ahimelek boys an Ahitub grankids, name Abiatar, dat get outa dea an run, fo be by David.
\v 21 Wen he get dea, he tell David dat Saul wen kill da pries guys dat work fo Yahweh.
\v 22 Den David tell Abiatar: “Dat time, wen Do`eg da Edom guy stay dea, I wen know fo shua he goin tell Saul. Cuz a me, Do`eg wen trap all da peopo from yoa fadda's ohana, an he kill um.
\v 23 You, stay wit me. No need come scared. Cuz da same guy dat like kill you, like kill me too. Stay ova hea wit me. Fo shua I goin proteck you an take care you.”
\c 23
\s David Fight Fo Keilah Town, Den Gotta Run Away
\p
\v 1 One time, some guys tell David, “You know wat?! Da Filisha guys stay fight agains Keilah town, an dey rip off all da good wheat from da places wea da Keilah peopo stay splitting da junk kine stuff from da wheat dey wen cut.”
\v 2 So David aks Yahweh, “You tink goin be okay, o not, if me an my guys go attack dese Filisha guys?”
\p
Yahweh tell um, “Shoots! Go afta da Filisha guys, an get da Keilah peopo outa trouble.”
\p
\v 3 But David's guys tell him, “Eh, us guys ova hea inside Judah, we scared! An we goin come even mo plenny scared if we go ova dea Keilah side, wea da Filisha guys stay ready fo fight!”
\p
\v 4 So David go aks Yahweh bout da plan one mo time.
\p Dis time Yahweh tell um, “Go down Keilah side, cuz I goin give you da powa fo win ova da Filisha guys.”
\v 5 So, David an his guys go Keilah side, fight agains da Filisha guys, an wack um plenny hard an carry off dea cows an sheeps. Dey kill plenny Filisha guys. An dass how David get da Keilah peopo outa trouble.
\p
\v 6 (You know, da time Abiatar, Ahimelek's boy, run away from Saul, he go by David Keilah side. Dat time, Abiatar wen bring wit um, da spesho kine vest dat da main pries wea. An dass how he find out stuff from Yahweh, fo tell David.)
\s Saul Chase David
\p
\v 7 Somebody go tell Saul dat David wen go Keilah side. Saul tell um, “God wen bring David to me awready! Cuz David awready one prisona wen he go inside one town wit strong wall an gates an bars, you know.”
\v 8 So Saul call all his army guys fo go down Keilah side an fight, fo trap David an his guys inside dat town.
\p
\v 9 Wen David find out dat Saul an his guys stay making plan fo hurt him, David tell Abiatar, da pries guy, “Bring da spesho pries kine vest! I gotta find out wat God like me fo do!”
\p
\v 10 Den David pray lidis: “Yahweh, you da God fo da Israel peopo, an me, I yoa worka guy. I hear fo shua dat Saul make plan fo come ova hea Keilah side an wipe out all da peopo inside dis town cuz a me.
\v 11 Az true, o wat? dat Saul goin come down hea, jalike dey tell me? An az true, o wat? dat da leada guys fo da Keilah peopo goin turn me an my guys ova to Saul? Yahweh, you da God fo da Israel peopo, so please, yeah? can tell me!”
\p
An Yahweh tell him, “Yeah! Fo shua, Saul goin come ova hea.”
\p
\v 12 David aks, “Fo real den, da leada guys, goin turn me an my guys ova to Saul, o not?”
\p Yahweh tell um, “Yeah! Dey goin turn you ova to Saul.”
\p
\v 13 So right den an dea, David an his guys, bout six hundred guys, go outa Keilah, an stay go from one place to anodda place, any place dat dey can go. Somebody tell Saul dat David wen get outa Keilah. So dass why Saul neva go ova dea.
\s Saul Try Fo Catch David
\p
\v 14 David stay inside da boonies, wea Saul no can attack um, on top da hills nea Zif town. Ery day, Saul go look fo him, but God neva let Saul grab David.
\p
\v 15 Wen David stay Horesh, still inside da boonies nea Zif town, he find out dat Saul dem wen come out fo find David fo kill um.
\s David Run Away From Saul
\p
\v 16 Saul's boy Jonathan wen go by David Horesh side. He give David good words, fo help David stay tight wit God an come strong.
\v 17 Jonathan tell, “No need be scared! My fadda Saul get plenny powa, but he no goin find you. An you, you goin come da king fo da Israel peopo, an I goin come yoa numba one guy. Even my fadda Saul know az true.”
\v 18 So da two guys make deal in front Yahweh. Afta dat Jonathan go his place, but David stay Horesh side.
\p
\v 19 Get some Zif guys go by Saul, Gibeah side. Dey tell, “You know wat?! David stay hiding nea us guys, inside da boonies, dass da strong kine places dass hard fo attack, Horesh side, on top da Hakilah hill, south from Jeshimon town.
\v 20 So, King Saul, come ova by us guys weneva you like. Cuz we goin capcha da bugga an turn um ova to you.”
\p
\v 21 Saul tell, “I like Yahweh do good fo you guys, cuz you care bout me!
\v 22 Go an make ready some moa. Find out wea David stay go erytime, wea he hang out, an who wen see him ova dea. Peopo tell me, he one sly mongoose.
\v 23 Find out bout all da places wea he go hide, an come back by me wen you know fo shua. Den I goin go wit you. If he stay ova dea, I goin track him down, no matta I gotta check out ery one a da Judah ohanas!”
\p
\v 24 So da Zif guys go, den Saul go stay come. David an his guys, dey stay inside da boonies nea Ma`on town, wea da groun go down to da Arabah Valley, da south side a Jeshimon.
\v 25 Saul an his guys go out fo try find David. Somebody go tell David bout dem, so David go mo down wea get one mangus rock, an he stay inside da boonies nea Ma`on town. Wen Saul hear dat, he go inside da boonies too nea Ma`on, an chase afta David.
\p
\v 26 Get one time, Saul dem go by one side a one mountain, an David an his guys stay on top da odda side. Dey scared, so dey move real fas fo run away from Saul. But Saul an his guys stay come mo an mo nea David an his guys, fo go both side a dem.
\v 27 But right den, one messenja guy come by Saul an tell um, “Come quick! Da Filisha guys stay rip off da peopo inside oua land!”
\v 28 Den Saul stop chasing David, an go back fo fight da Filisha guys. Az why peopo call dat place Da Big Rock Inside Da Middo.
\v 29 Den David go up country from dea, an stay inside da strong kine places dass hard fo attack nea Ein Gedi.
\c 24
\s David Let Saul Stay Alive
\p
\v 1 Wen Saul come back from going afta da Filisha guys, right away somebody tell him, “You know wat?! David stay inside da boonies up country from Ein Gedi town.”
\v 2 So Saul pick da three tousan bestes guys from all da Israel army guys, an dey go look fo David an his guys nea da big high Wild Goat Rocks.
\p
\v 3 He go by da sheep corrals, up from da trail. Get one cave ova dea. Saul go inside fo make kukae. Same time, inside dat same cave, David an his guys stay dea too, way far back!
\v 4 Da guys tell David, “Fo shua, now da time dat Yahweh talk bout wen he wen tell you, ‘I goin give you powa ova da guy dat stay agains you, so you can make to him how you like.’ Den David go real quiet by Saul, an cut off one corner from Saul robe, an Saul neva even know.
\p
\v 5 But laytas, David feel all bum out inside, cuz he wen cut off one piece from Saul's robe.
\v 6 David tell his guys, “Yahweh no like, dat I wen make lidat to my boss, da one Yahweh wen pick fo be da king! Yahweh no like me do notting agains Saul, cuz he da one Yahweh wen pick!
\v 7 Az how David make shua his guys tink diffren den wat dey tell um da firs time, an no let dem attack Saul. Same time, Saul stand up an go outa da cave, an go way.
\p
\v 8 Afta dat, David go outside da cave, an yell to Saul who stay down by da trail, “Hui! My boss, da king!” Saul turn aroun an look behind at David. David go down wit his face on top da groun fo show respeck fo Saul.
\v 9 He yell to Saul, “Eh, King Saul! You wen lissen wen peopo tell you I stay try fo hurt you. How come?! No need!
\v 10 Today you wen see wit yoa own eyes, az not true! Cuz Yahweh wen give me da powa fo hurt you ova dea, inside da cave. Some guys wen tell me fo kill you, but I neva. I wen tell um, ‘No way I goin wack my boss, cuz he da one dat Yahweh wen pick.’
\v 11 You, you jalike my fadda fo me! Look! You see dis piece from yoa robe, hea inside my hand?! I wen cut off da corner from yoa robe, but I no kill you. So, you gotta know fo shua, dat I no mo da blame fo do someting bad. I no go agains you. I no do notting wrong agains you, but you stay hunt me fo kill me.
\v 12 I like Yahweh fo be da judge fo tell if you stay right, o I stay right! I like fo Yahweh pay you back fo da kine wrong stuff you stay doing to me! But me, I no goin even touch you!
\v 13 Jalike da smart peopo wen tell long time ago, ‘From bad kine peopo, come bad kine stuff!’ But no way I goin hurt you.
\p
\v 14 “You da Israel king. Who you stay make war agains?! Who you chasing?! Jalike I one mahke dog! Jalike I one uku! O wat?!
\v 15 I like Yahweh be da judge fo tell if you stay right, o I stay right! He can tell who get da blame. I like him tink bout wat I stay doing. I like him tell erybody dat I not da one fo be da blame, an get me outa yoa power.”
\p
\v 16 Wen David pau talk lidat to Saul, Saul aks, “David, my boy, az yoa voice, o wat?” An Saul, he cry plenny, loud kine.
\v 17 “You stay do da right ting, mo den me. You do good kine stuff fo pay me back, but I do bad kine stuff fo pay you back.
\v 18 Jus now, you tell me bout da good kine ting you wen do fo me. Yahweh wen give me to you, but you no kill me.
\v 19 Wen one guy find da guy dat stay agains him, he no let him get outa dea okay, eva. I like Yahweh do good to you fo wat wen happen today, cuz was good dat you neva kill me.
\v 20 An now I know, dat you goin come king fo shua, an dat you get da powa fo make da Israel peopo come one strong country.
\v 21 Now make me one strong promise in front Yahweh, dat no way you goin cut off my ohana afta I mahke, o wipe out my name from my fadda's family.”
\p
\v 22 So David make da strong promise fo Saul. Den Saul go back his place, but David an his guys go back up inside da strong place fo hide wea nobody can hurt dem.
\c 25
\s Samuel Mahke
\p
\v 1 Wen Samuel mahke, all da Israel peopo come togedda, an stay sore inside cuz he mahke. Dey bury him his place inside Ramah. Den David start fo move house south side, fo go da Paran Boonies.
\s David, Nabal, An Abigail
\v 2-3 Had one guy name Nabal. He from da Caleb ohana. He live Ma`on town, an get business nea dea inside Carmel town. He one importan guy, dat own 3,000 sheep an 1,000 goat.
\p Nabal wife, her name Abigail. She one good looking wahine, dat know how fo tink real good. But her husban, he da kine guy come all huhu if somebody tell him he gotta do someting, and no bodda him do bad kine stuff.
\p Dat time, Nabal an his guys stay cutting da wool from da sheeps Carmel side.
His name Nabal, an his wife Abigail. But her husban come from da Caleb family, an he real mean da way he make to peopo.
\p
\v 4 Dat time, David stay inside da boonies, but he find out dat Nabal stay cutting da wool from his sheeps.
\v 5 So he pick ten young guys, an tell um, “Go up country Carmel side, by Nabal. Wen you get dea, tell um you my guys, an tell um, ‘Howzit’ fo me, an time fo pay up cuz I wen take care him.
\v 6 Tell him dis: ‘David tell, he like you live long time, an he like eryting come out good fo you an yoa ohana, an eryting dat you get stay good.
\p
\v 7 “An David tell dis too, ‘Now, I hear, you get da guys dat cut da wool from da sheeps by you. You know, da time da guys dat stay take care yoa sheeps wen stay by us guys nea Carmel town, we neva do notting fo hurt dem an make dem come shame. All da time dey stay Carmel side, us guys neva rip off even one ting from dem.
\v 8 Aks yoa own worka guys an dey goin tell you how was, dat time. So now, stay pau da cut wool time, an us guys come fo da party. I like you tink good bout my guys. So can kokua my worka guys an me, David, cuz I jalike yoa boy, yeah?!’-”
\p
\v 9 Wen David's guys come by Nabal, dey talk fo David an tell Nabal wat David say. Den dey wait.
\p
\v 10 But Nabal answa dem, “Who dis David guy?! Dis Jesse boy, who he tink him?! Nowdays, get all kine worka guys stay run away from dea boss!
\v 11 You tink I goin take my bread an my watta, an da meat I wen kill fo my worka guys dat stay cutting da wool from my sheeps, an give um to guys dat I donno wea dey come from?! No way, brahs!”
\p
\v 12 So David's guys turn aroun an go back. Wen dey come by him, dey tell him eryting dat Nabal tell um.
\v 13 David tell his army guys, “Eh erybody, Grab yoa swords!” So dey put on dea swords, an David put on his sword too. Bout four hundred guys go nort wit David, an two hundred guys stay back wit dea stuffs.
\s Stupid Da Husban, Akamai Da Wife
\p
\v 14 Same time, yeah? one a Nabal worka guys go tell Nabal wife Abigail, “Eh! David wen send messenja guys from da boonies fo tell our boss ‘Aloha! I like God do good tings fo you!’ But you know wat?! Oua boss talk stink to dem.
\v 15 But befo time, David guys wen make real good to us. Dey neva do notting wrong to us. All da time we stay out, inside da fields nea dem, dey no rip us off notting.
\v 16 Nite time an day time, dey stay guard us guys, jalike dey one wall aroun us, all da time we stay taking care our sheeps nea dem.
\v 17 Now, tink bout all dis, an figga out wat you can do, cuz David guys stay ready fo do someting real bad to our boss an all his ohana peopo, an all us worka guys too. You know Nabal, yeah? He da kine guy dass ony bad, so no mo nobody can talk to him.”
\p
\v 18 Abigail, right away she take two hundred breads, two skins wit wine inside, five sheeps dat stay ready fo barbeque, bout 20 pound wheat dey wen roast, one hundred raisin cake, an two hundred fig cake, an put um on top some donkeys.
\v 19 Den she tell her worka guys, “You go stay go. Me, I go stay come afta.” But, she neva tell her husban, Nabal, notting!
\p
\v 20 Wen she stay riding her donkey an go down one mountain gulch wea nobody can see her, get David an his guys coming down da odda side. Right den an dea, she spock um!
\v 21 David wen jus tell his guys, “Wase time, yeah?! Us wen take care dis Nabal guy stuffs inside da boonies, so dat nobody wen steal even one a his tings. An den! Da bugga go pay me back, bad kine fo good kine!
\v 22 So dis my plan fo kill da buggas! An if I leave even one a all his guys alive morning time, den I like God make real bad to me, David, jalike I aks God fo make to da guys dat stay agains me!”
\p
\v 23 Wen Abigail see David, she quick time get off her donkey, an go down in front him wit her face on top da dirt fo show um respeck.
\v 24 Down by his feets, she tell, “You da boss! Me, let me be da ony one get da blame fo all dis. Please, yeah, let me, yoa worka wahine, say someting to you. Lissen wat I goin tell.
\v 25 No let dat guy Nabal, bodda you! He no good kine! An he ack jalike his name. His name mean, ‘Stupid,’ an he do stupid kine stuff. But I yoa worka wahine, an I neva see da guys dat you, my boss, wen send befo.
\p
\v 26 “Now, jalike fo shua Yahweh stay alive, an you stay alive, same ting, same time, I stay shua bout dis: Yahweh, he da one, dat no let you kill nobody, o pay him back yoaself. An I like da peopo dat stay agains you, an erybody dat like hurt you, come jalike Nabal.
\v 27 So, my boss, I stay bring you dis present! I like you give um to yoa guys dat stick wit you wea eva you go.
\v 28 Scuse, yeah, if I bum you out, can let me go fo dat?! Cuz fo shua, Yahweh goin make da peopo dat goin come from you stay strong an solid, cuz you fight fo him. You do notting wrong, all da time you stay alive.
\v 29 My boss, wen somebody go chase you fo try kill you, fo shua yoa God Yahweh, goin make shua you stay alive! Jalike he take care all da peopo dat suppose to stay alive, jalike he keep um wit all da odda peopo dat get da real kine life, so dey no get hurt. But he goin make shua da guys dat hate you, mahke, jalike he use one sling fo throw um far.
\v 30 Bumbye, Yahweh goin stay do fo you, my boss, eryting good dat he wen promise fo do, an make you da leada fo all da Israel peopo.
\v 31 Den you, boss, you no need feel da heavy blame inside, jus cuz befo time, you wen kill dis guy Nabal dat you neva need kill -- o cuz you wen try pay back Nabal an neva let Yahweh pay um back. An wen Yahweh do all dis good kine stuff fo you, den no foget me, yoa worka wahine.”
\p
\v 32 David tell Abigail, “Awesome! Yahweh, da God fo da Israel peopo, do someting real good fo me right now, cuz he wen send you today fo meet me!
\v 33 An God stay do odda good tings fo me today, cuz you tink strait bout wass right an wass wrong. An, cuz you stop me from go kill somebody today, an from try fo win ova somebody jus cuz I mo strong.
\v 34 I stay shua dat Yahweh, da God fo da Israel peopo, stay alive. An same ting, I stay shua dat he da One wen stop me, so I neva hurt you. But if you neva come quick fo meet me, fo shua no mens from all Nabal guys wen stay alive wen da sun come up again!”
\p
\v 35 Den David take from her, da stuffs she wen bring fo him, an tell, “Go home an no worries! I wen lissen to wat you wen tell, an I goin do wat you say.”
\p
\v 36 Wen Abigail come back by Nabal, she see he stay make big party inside da house, jalike one king. He stay real good inside, cuz he stay plenny pilute. So she no tell him notting bout wat wen happen till light start fo come morning time.
\v 37 Dat morning, Nabal no stay drunk no moa. Wen his wife tell him eryting dat wen happen, Nabal get heart attack an come so he no can move, jalike one rock.
\v 38 Bout ten days afta dat, Yahweh wack Nabal, an he mahke.
\p
\v 39 Wen David hear dat Nabal wen mahke, he tell his guys, “Tank Yahweh! He wen do one good ting fo me, cuz wen Nabal go talk stink bout me, Yahweh take care me! Az cuz Yahweh my boss. He no let me do da wrong kine ting bout Nabal. Da bad kine ting Nabal wen do, Yahweh wen pay him back awready.”
\p
Den David send messenja guys by Abigail, fo tell her he like fo her come his wife.
\v 40 Wen David's messenja guys come by Abigail Carmel side, dey tell her, “David wen send us by you, fo take you by him fo come his wife.”
\p
\v 41 She go down wit her face on top da groun, an tell, “Kay den! I stay ready fo wateva David like, even fo wash his worka guys feets.”
\p
\v 42 Right den an dea, Abigail make ready fo go. She take five helpa girls go wit her. She ride one donkey, an go wit da messenja guys from David. Den she come his wife.
\v 43 David wen marry Ahinoam from Jezreel too. So den, da two wahines come his wifes.
\v 44 But Saul, he wen give his girl Michal, dat was David's wife, to Paltiel, Laish boy, from Gallim.
\c 26
\s One Mo Time David No Kill Saul
\p
\v 1 Da Zif peopo go by Saul Gibeah side, an tell, “David stay hiding on top da Hakilah hill, da side wea can see da boonies Judah side!”
\p
\v 2 So Saul go down quick time by da boonies nea Zif town, wit three tousan Israel army guys dat he wen pick, fo look fo David aroun dea.
\v 3 Saul dem make camp by da road, up dea on top da Hakilah hill wea can see da boonies Judah side. But David dem, dey stay inside da boonies now. He find out dat Saul wen come da boonies fo go afta him.
\v 4 So he send out infantry guys fo go aroun an watch wat Saul do. He find out from dem, az true dat Saul wen come dea.
\v 5 Den David go out by da place wea Saul wen make camp. He see wea Saul an Abner, Ner boy, da main leada guy fo da army guys, lay down an sleep. Saul stay sleeping inside da camp, an da army guys stay sleep aroun him.
\p
\v 6 Den David aks Ahimelek from da Het peopo, an Abishai Zeruiah boy, Joab brudda, “One a you guys like go wit me, down dea by Saul, inside his army camp?”
\p
Abishai tell, “Shoots! Me, I go wit you!”
\p
\v 7 So nite time, David an Abishai go da army camp. Dey spock Saul sleeping inside da camp, wit his spear stuck inside da groun by his head. Abner an da army guys stay sleeping all aroun him.
\p
\v 8 Abishai wispa to David, “Right now, God stay give you da powa ova dis guy dat stay agains you! Now! Lemme poke um wit dat spear one time an pin um to da groun. I no goin even need two times fo poke um.”
\p
\v 9 But David wispa back, “Not! No wipe da guy out! God goin punish anybody try fo hurt da guy God wen pick!
\p
\v 10 “Jalike fo shua Yahweh stay alive, same way I stay shua Saul goin mahke -- maybe Yahweh goin be da One goin take um out. O maybe da time goin come fo him mahke regular kine. O maybe he come wipe out wen he stay fighting one war.
\v 11 No way dat Yahweh goin let me hurt da guy dat he wen pick! Now, go grab da spear an da watta canteen dat stay near his head, an den me an you, we dig outa hea!”
\p
\v 12 So David take da spear an da watta jar dat stay nea Saul head, an dey get outa dea. Nobody wen see um, o know bout um, o wake up. Dey all stay sleeping cuz Yahweh wen make dem pass out sleep.
\p
\v 13 Den David go da odda side long way, an stand on top one hill. Stay plenny far from Saul!
\v 14 He yell to da army guys an to Abner, Ner boy, “Hui! Abner! You no goin talk to me, o wat?!”
\p
Abner yell back, “Eh! Who you tink you? Who stay yelling fo wake up da king?”
\p
\v 15 David tell, “Eh! You one big man, yeah?! From all da Israel peopo, no mo nobody betta fo fight den you! So! How come you neva guard yoa boss da king? Cuz had one army guy come inside yoa camp fo wipe out yoa boss da king, you know?!
\v 16 You no shame, o wat?! No good, how you wen make! Jalike fo shua Yahweh stay alive, az how I stay shua, dat you an yoa guys gotta mahke, cuz you guys neva guard yoa boss, da one Yahweh wen pick! Look aroun you. Wea da king spear an da watta jar dat stay nea his head?!”
\p
\v 17 Saul wake up, an he know from da voice, az David!
He tell, “David my boy, az you yelling?!”
\p
David tell, “Yeah, az me, my boss da king!”
\v 18 Den David tell, “Eh boss! How come you stay chase me, yoa own worka guy?! I neva do notting wrong! Fo wat you like punish me?!
\v 19 Now, you da king, an you my boss. So, I like you try lissen wat I goin tell you. If Yahweh da One stay making you come agains me, den can make sacrifice fo Yahweh, so he smell um an know eryting stay good wit me an him, an den he no stay agains me no moa. But if all dis huhu just come from peopo, I like Yahweh make shua dose buggas get kahuna on top dem! Cuz wat get right now, is dis -- dey wen throw me outa my land, so now, I no mo da right fo own my share dat Yahweh was suppose to give me! Jalike dey stay telling me, ‘Go way! Beat it! Go by da odda peopos an pray to dea gods, not oua God!’
\v 20 Now, my boss da king, no make me bleed an mahke inside one land wea I no can stay nea Yahweh! Wat da king fo da Israel peopo do, he stay come out hea jalike fo hunt ony one flea! Jalike somebody chasing one pheasant bird all ova da mountains.”
\p
\v 21 Den Saul tell, “Yeah, wat I wen do, was bad! Come back, David my boy! I promise, I no goin try hurt you again. Today, you wen let me stay alive, cuz you get respeck fo me. Fo shua, den, I wen ack stupid kine, an mess up big time!”
\p
\v 22 David tell, “Hea, yoa spear! Let one a yoa guys come ova dis side an get um.
\v 23 Yahweh, he pay back erybody good, wen dey do da right kine ting, an wen dey stick wit him. Az why today, no matta dat Yahweh wen give me da powa fo hurt you, I neva like do dat, cuz you da guy Yahweh wen pick.
\v 24 Fo shua I wen make to you like yoa life importan, wen I neva kill you today. So same ting, I like Yahweh show me respeck an no let you kill me, an get me outa all kine trouble too!”
\p
\v 25 Den Saul tell David, “God goin do plenny good kine stuff fo you, my boy David. Fo shua you goin do big kine tings, an be da winna.
\p
So David go way from dea, an Saul go back his place.
\c 27
\s David Stay Wit Da Filisha Guys
\p
\v 1 David now tinking, “Bumbye, yeah? Saul goin wipe me out. So, mo betta I bag outa hea, an go by da Filisha peopo. Ova dea, Saul no goin look fo me inside da Israel land no moa, an I goin get away from his powa.”
\p
\v 2 So David an da six hundred guys wit him go da odda side by Akish, Maok boy. Akish, he da king fo Gat town.
\v 3 David an his guys stay inside Gat wit King Akish. Ery army guy wit David, get his family wit him. David get his two wifes wit him too, Ahinoam from Jezreel, an Abigail from Carmel, Nabal widow.
\v 4 Somebody wen tell Saul dat David wen run away Gat side. Az why he no look fo David dis time.
\p
\v 5 Layta, David tell Akish, “If you feel good bout me, den let da peopo inside one a da country towns give me one place, so I can go live ova dea. You, my boss. But I not one importan guy. So no need fo me live inside yoa big town wea you stay.”
\p
\v 6 Dat same day, Akish give David da right fo be da main man Ziklag town. (Az why dat town, laytas stay unda da Judah kings, an not da Filisha kings.)
\v 7 David live inside da Filisha countryside, was one year an four month.
\p
\v 8 Dat time, David an his guys stay attack an rip off stuff from da Geshur peopo, da Girza peopo, an da Amalek peopo. (From long time dose peopo live inside da small towns, inside da land wea you come nea Shur town, an nea da road dat go Egypt side.)
\v 9 Weneva David dem attack da peopo all aroun one place, he no leave nobody alive, no guy o wahine. But, he take da sheeps an goats, cows, donkeys, camels, an clotheses. Den he go back by Akish.
\p
\v 10 Weneva Akish aks, “Wea you guys wen go dis time fo rip off stuff?”
\p David tell um, “Da south part a da boonies Judah side,” o “Da south part a da boonies wea da Jerahmeel peopo live,” o “Da south part a da boonies wea da Ken peopo live.”
\v 11 David no leave nobody alive, guys o wahines, cuz he figga, “If somebody stay alive, bumbye somebody goin take dem Gat side, an dey goin tell wat us guys wen do fo real kine.” Az how David wen tell his guys fo make, all da time he live inside da Filisha country side.
\v 12 Akish start fo trus David, cuz he tinking, “Da way dis guy ack, he make his peopo, da Israel peopo, tink he one stink kine guy! Az why he goin work fo me all da time.”
\c 28
\s Saul Wit Da Wahine Dat Can Talk To Da Mahke Peopo
\p
\v 1 Dat time da Filisha guys bring all dea army guys togedda fo go fight agains da Israel guys. Akish tell David, “You undastan, you an yoa guys goin go wit me an be part a my army, fo shua, yeah?”
\p
\v 2 David tell um, “Kay den, boss. If dass how, den you goin know fo shua wat I can do.”
\p
Akish tell, “You do dat, den I goin make you come my bodyguard guy all da time.”
\p
\v 3 Befo time, wen Samuel mahke, all da Israel peopo wen cry fo him. Dey bury him inside Ramah, his own town. Dat time, Saul wen throw out from da Israel land, da wahines dat can talk to da mahke peopo, an da fortune tella guys.
\p
\v 4 Da Filisha army guys come togedda an go Shunem town fo make camp. Saul, he bring all da Israel guys togedda, an dey make camp Gilboa side.
\v 5 Wen Saul see da Filisha army, he come all scared an shaking inside.
\v 6 He aks Yahweh fo tell wat goin happen, but Yahweh no answa him notting -- not inside his dreams, o wit da Urim stones da main pries guy use, o from da guys dat talk fo Yahweh. Notting!
\v 7 Den Saul tell his helpa guys, “Go find one wahine dat can make da mahke peopo talk to her, so I can go by her an aks her.”
\p
Dey tell, “You know wat?! Get dat kine, Endor side!”
\p
\v 8 So Saul put on odda kine clotheses so nobody know az him. Nite time, him an two odda guys go ova dea by da wahine. He aks da wahine, “Try talk to da mahke peopo fo me, fo find out wat goin happen. An bring up fo me, from da Mahke Peopo Place, da guy wit da name I goin tell you.”
\p
\v 9 But da wahine tell him, “Eh! Fo shua you know wat Saul already wen do! He throw out da wahines dat talk to da mahke peopo, an da fortune tella guys, all ova da land. So! How come you make one trap fo catch me?! So you make shua I goin mahke, o wat?!”
\p
\v 10 Saul make one strong promise to her in front Yahweh. He tell, “Jalike fo shua Yahweh stay alive, same way I stay shua nobody goin punish you cuz a wat you goin do fo me.”
\p
\v 11 So, da wahine aks, “Who you like me bring up fo you?”
\p
He tell, “Samuel!”
\p
\v 12 Right den an dea, da wahine see Samuel! She yell real loud to Saul, “How come you wen bulai me?! I know you! You Saul!”
\p
\v 13 King Saul tell her, “No need scared! Jus tell me wat you see.”
\p
Da wahine tell, “I see gods coming up outa da groun.”
\p
\v 14 Saul aks, “An Samuel, wat he look like?”
\p
She tell, “He one ol guy, wearing one robe, dat stay coming up too.”
\p
Saul now know fo shua az Samuel. So he go down wit his face on top da groun fo show Samuel respeck.
\p
\v 15 Samuel aks, “How come you stay bodda me an bring me up hea?”
\p
Saul tell, “I get plenny presha! Da Filisha guys stay fighting agains me. Jalike God turn away from me an no lissen! He no talk to me no moa, no matta I aks da guys dat talk fo him, o I dream. Az why I wen call fo you, fo tell me wat fo do.”
\p
\v 16 Samuel tell, “Duh! Fo shua, Yahweh stay turn away from you, an no lissen. He start fo go agains you awready. So! How come you aks me, aah?!
\v 17 Yahweh stay do fo David, wat Yahweh wen tell me fo tell you. Yahweh awready wen rip away from you da right fo be king. An he give um to one guy jalike you -- dass David!
\v 18 Cuz you neva lissen Yahweh, o do wat he tell you agains da Amalek peopo, da time he stay real huhu agains dem. Az why Yahweh stay make lidis fo you today.
\v 19 An one mo ting: Yahweh goin let da Filisha guys take ova both you an da Israel peopo. From tomorrow, you an yoa boys goin stay wit me, inside da Mahke Peopo Place. An same ting fo da Israel army guys -- Yahweh goin let da Filisha guys take ova dem.”
\p
\v 20 Saul come real scared cuz a wat Samuel wen tell. Right den an dea Saul go down wit his whole body stretch out on top da groun. He not strong, cuz he neva eat notting dat day o dat nite.
\p
\v 21 Den da wahine come by Saul, an see dat someting bodda him plenny. She tell, “You know wat?! You da boss, an I wen lissen to you. I tink I was goin mahke, but I wen chance um an do jalike you wen tell me fo do.
\v 22 Now, please lissen to me, yoa worka wahine. I goin fix litto bit food fo you. Eat um. An dat goin make you come strong, so you can go home.”
\p
\v 23 But Saul no like. He tell, “I no goin eat.”
\p
But his helpa guys go wit da wahine, an try fo make him eat too. So he lissen to dem. He get up from da groun, an sit on top one pune`e.
\p
\v 24 Da wahine get one bebe cow her house, dat she feed plenny fo make um fat. Right den an dea, she kill da bebe cow an cook da meat. She take some flour, mix um, an bake da kine bread dat no mo yeast.
\v 25 Den she put da meat an da bread in front Saul an his guys, an dey eat. Dat same nite dey start fo go back.
\c 29
\s Akish Send David Back Ziklag Side
\p
\v 1 So dass how was: da Filisha guys get all dea army guys togedda Afek side, an da Israel army guys get dea camp Jezreel side, by da puka wea da watta come out.
\v 2 Da five Filisha king guys stay march. Some a dem get hundreds a army guys, an some a dem get tousans a army guys. David an his guys stay march in da last part wit Akish.
\v 3 Da army officers fo da Filisha guys aks da king guys, “Wat bout all dese Hebrew guys?”
\p
Akish tell dem, “Dis David. He was one officer fo Saul, da Israel king. He stay wit me mo den one year awready. From da time he wen bag from Saul till now, he neva do notting wrong.”
\p
\v 4 But da Filisha officer guys come huhu wit Akish, an tell him, “Make da bugga go back dea, to da town wea you wen tell him fo stay in charge! No way he going wit us guys fo fight! Bumbye, he goin change his mind an go agains us guys wen we stay fighting! Maybe he figga, if he go cut off oua guys heads, fo shua King Saul goin let him come back!
\v 5 You know, dis David, he da same guy dat da Hebrew peopo wen sing bout wen dey dance:
\q
‘Saul wen kill tousans a guys,
\q2 An David kill ten tousans a guys.’-”
\p
\v 6 So Akish tell David fo come. He tell David, “Fo shua, yoa God Yahweh stay alive, an fo shua you one guy dat stay do wass right. Da way I see um, good, you go wit me an fight inside oua army. From da time you wen come by me till now, I no find notting wrong wit you. But da way da odda king guys see um, az not good you stay wit us guys.
\v 7 So now, go back Ziklag side, an no talk stink. No do notting fo make da odda Filisha king guys come huhu.”
\p
\v 8 David aks Akish, “How come?! Wat I wen do? I stay work fo you, so wat you find agains me, from da time I come by you till now? You my boss, da king! So, why I no can fight agains da guys dat hate you, my boss, da king?”
\p
\v 9 Akish tell, “I know dat I stay good inside bout you, jalike you one angel messenja guy from God. But you know, yeah?! da officer guys fo oua Filisha army wen tell, ‘No way dis guy goin go wit us fo fight.’
\v 10 So, morning time, get up early, you an da odda guys. Befo time dey wen work fo yoa boss Saul too, an now dey come wit you. Go back wen get light, to da town I wen give you guys.”
\p
\v 11 So David an his guys get up early morning time fo go back da Filisha peopo's land, an da Filisha guys go Jezreel fo fight dea.
\c 30
\s David Wipe Out Da Amalek Peopo
\p
\v 1-2 Dis wat happen den. Same time wen David dem stay coming, da Amalek guys stay rip off stuffs inside da Negev Boonies an Ziklag town. Dey attack Ziklag an burn um. Dey grab da wahines an erybody dat stay ova dea, da young ones an da ol ones too. Dey no kill nobody, but make dem go wea da Amalek guys like go.
\p
Three day afta David an his guys go way from Akish, dey come Ziklag.
\v 3 Dey see dat da Amalek guys wen burn down da town awready, an make dea wifes and boys an girls prisonas!
\v 4 David an his guys, cry plenny, till dey not strong nuff fo cry no moa.
\v 5 Da Amalek guys wen take away David's two wifes too, Ahinoam from Jezreel, an Abigail, da widow from Nabal da Carmel guy.
\v 6 David get trouble big time. Ery one a da guys stay nuha an huhu inside, cuz a dea boys an girls. Dey start fo talk bout throw big rocks at David fo kill um. But David stay tight wit Yahweh his God, an he stay strong inside still yet.
\p
\v 7 Den David tell Abiatar da pries guy, Ahimelek boy, “Try bring me da spesho pries kine vest you use fo aks God wat fo do.” An Abiatar go get um.
\v 8 David aks Yahweh, “Az good fo me go chase afta dese guys dat wen rip us off, o wat? Can catch dem up, o no can?”
\p
Yahweh tell, “Go! Chase um! Fo shua you goin catch um, an fo shua you goin get yoa peopo back!”
\p
\v 9 David an da six hundred guys wit him come by da Besor Gulch. Get two hundred guys dat no can move no moa, so dey stay dea,
\v 10 cuz dey so wipe out, dey no can go da odda side da gulch. But David an da odda four hundred guys still yet go chase da Amalek guys.
\p
\v 11 Dey spock one young guy from Egypt inside da country side, an dey bring him by David, an give him watta fo drink, an food fo eat.
\v 12 Dey get plenny fig all mash togedda, so dey cut off one piece an give um, an two bunch dry grape. He eat um an feel mo betta, cuz he neva eat o drink notting fo three days an three nites.
\p
\v 13 David aks him, “Who own you? Wea you come from?”
\p
Da young guy tell, “I from Egypt. I da slave fo one Amalek guy. Day befo yestiday, my boss leave me hea, cuz I stay sick.
\v 14 All us guys wen rip off stuff from da boonies wea da Keret peopo live Negev side, an da part da Judah peopo own, an da boonies wea da Caleb ohana live inside da Negev. Ziklag town, we burn all dat too.”
\p
\v 15 David aks him, “You can show me wea dose rip off guys stay?”
\p
Da Egypt guy tell, “Firs ting, you gotta make one strong promise fo me in front God, dat you no goin kill me, o give me back to my boss! Den I can take you down by dem.”
\p
David tell um, “Shoots! Can.”
\p
\v 16 So da Egypt guy take David dem down. Wen dey get dea, get Amalek guys all ova, eating, drinking, an partying up, cuz get all kine stuff dey wen rip off from da Filisha land an from da Judah land.
\v 17 David an his army guys attack da Amalek guys, wen litto mo ready fo come light da nex morning. Dey stay fight um till afta da sun go down dat day. Ony four hundred young guys get away on top da camels. No odda guys get away, 
\v 18 David dem get back eryting da Amalek guys wen rip off, an David two wifes.
\v 19 Eryting stay dea, young an ol peopo, boys an girls, an all da stuff da Amalek guys wen rip off. David dem take back eryting.
\v 20 He take all da sheeps, goats, an cows. His guys make da animals dat dey take away from da Amalek guys, go in front da odda animals dey had awready. Dey tell erybody, “Dis da stuff dat David bring back from da fight!”
\p
\v 21 Den David dem come back wea da two hundred odda guys stay, da ones dat was real wipe out an no can go all da way wit David, so he wen leave um by Besor Gulch. Dey come out fo meet David an da peopo wit him. Wen David an his guys come nea, David aks da guys dat stay Besor Gulch side if eryting stay okay wit dem.
\p
\v 22 Cuz a dat, some a David guys, da kine bad guys an guys dat like make humbug, dey tell, “Dese guys neva go wit us! So we no goin give dem notting from all da stuffs we bring back from fight! But erybody can take dea wifes an kids an go.”
\p
\v 23 But David tell, “No make lidat, my bruddas! You betta not make lidat wit all da stuff Yahweh wen give us guys. He  take care us guys awready, an he make us win da fight wit da rip off guys dat wen come agains us.
\v 24 If you tink da oddas goin lissen to wat you guys tell bout dis, no way! Da guys dat wen stay hea an take care all our stuffs, dey goin get all da same jalike us guys dat go down fo fight. Erybody goin share, same same.”
\v 25 An from dat day, David make dat rule solid fo all da judge guys fo da Israel peopo. An nowdays, dey still make lidat.
\p
\v 26 Wen David come back by Ziklag, he send some a da stuff da Amalek guys wen rip off to his friends, da older leadas fo da Judah ohana. He tell dem, “Hea! I like give you guys some a da stuffs dat da guys dat stay agains Yahweh wen rip off from you guys.”
\p
\v 27 He send da stuffs by plenny towns: fo da leada guys inside Bethel, Ramot inside da Negev, an Jattir,
\v 28 Aroer, Sifmot, Eshtemoa,
\v 29 an Rakal; an da towns wea da Jerahmeel ohana guys live, an da Ken peopo
\v 30 an by da leada guys inside Hormah town, Bor Ashan, Atak,
\v 31 an Hebron town. David send stuff to da leadas fo all da odda places wea him an his guys wen go hang out befo time.
\c 31
\s Saul An His Boys Mahke
\r (2 Samuel 1.4-12; 1 Records 10.1-12)
\p
\v 1 Da same time David dem leave da Filisha guys fo go Ziklag, da Filisha guys stay fight agains da Israel guys. Da Israel army guys run away from dem, an plenny Israel guys mahke on top Mount Gilboa.
\v 2 Da Filisha guys run fast an chase Saul an his boys Jonathan, Abinadab, an Malkishua. Dey kill his boys.
\v 3 Dey fight hard fo get to Saul. Da bow an arrow guys shoot um, so den he stay twisting cuz he hurt real bad.
\p
\v 4 Saul tell da guy dat carry da tings he use fo fight, “Grab yoa sword an stab me! If dese buggas dat donno God come hea, dey goin make any kine to me wen dey stab me!”
\p
But da guy dat carry his stuff fo fight no like kill him. Da guy real scared, az why. So Saul take his own sword, an throw himself down on top um so da sword go thru his body.
\v 5 Da guy dat carry Saul's stuffs fo fight wit, see dat Saul stay mahke awready, he go throw himself down on top his own sword too, an mahke wit Saul.
\v 6 An az how Saul, an his three boys, an da guy dat carry Saul stuffs fo fight, an all his army guys, dey all mahke togedda dat same day.
\p
\v 7 (Da Israel army guys dat stay da odda side da Jezreel valley, an da ones dat stay da odda side da Jordan River, dey see dat da Israel army guys wen run away, an dat Saul an his boys mahke. So dey bag from dea towns an run away too. An da Filisha guys come an start fo live inside dose towns.)
\p
\v 8 Da day afta da fight, da Filisha guys come back fo rip off stuffs from da mahke guys. Dey find Saul an his boys mahke bodies, dea on top Mount Gilboa.
\v 9 Dey cut off Saul head, an rip off da tings he use fo fight. Den dey send messenja guys all ova da Filisha land fo go da temples fo dea idol kine gods an tell dea peopo da good stuff bout Saul mahke.
\v 10 Dey put da tings Saul use fo fight inside da temple fo da wahine god Astarte. Den dey poke one big stick thru his mahke body fo hang um up on top da wall aroun Bet-Shan town.
\p
\v 11 Da peopo inside Jabesh town Gilead side wen hear wat da Filisha peopo wen do to Saul.
\v 12 So all da Jabesh guys dat know how fo fight good, make ready an go all nite Bet-Shan town. Dey take down da bodies fo Saul an his boys from da wall aroun Bet-Shan town, an go back Jabesh side. Dey burn da bodies ova dea.
\v 13 Den dey take da bones, an bury um unda da tamarisk tree Jabesh side. Dey no eat fo seven days, fo show dey stay sore inside.