\id 1ki 
\mt Da King Guys
\mt2 Book Numba One
\h 1 Kings
\c 1
\s David Come Real Ol
\m
\v 1 King David, he come real ol. He stay cold all da time, no can come warm, no matta get plenny blanket on top him.
\v 2 So da palace guys tell um, “Eh King, you oua boss! Us guys tink, if us guys go look fo one young wahine dat neva sleep wit one guy, she can stay wit you an help you. So wen you come cold, she can lay down wit you so you come warm.”
\v 3 Da King tink dass good too. So dey wen go look all ova da Israel land fo one good looking wahine. Dey find Abishag from Shunam, an bring her to da King.
\v 4 Da girl was one real good looking wahine. She stay wit da king an help him. But da king neva have sex wit her.
\s Adonijah Like Make Himself Da King
\m
\v 5 Dat time, King David boy Adonijah (Haggit his mudda) wen go aroun ack big fo come King. He talk: “I goin come King!” So he go get war wagons an army guys dat ride horse. He go get fifty guys fo run in front him wen he come inside da street, so erybody know Adonijah stay coming.
\v 6 From small kid time, weneva Adonijah do bad kine stuff, King David no bodda. King David neva aks “How come you stay do dat?!” cuz David neva like make his boy feel bad. Adonijah one real good looking guy too. He da nex boy dat was born afta Absalom.
\v 7 Adonijah wen go talk wit General Joab (Zeruiah boy) an Abiatar da pries guy, an dey say dey goin help him fo come King.
\v 8 But Zadok da pries guy, an Colonel Benaiah (Jehoiada boy), an Nathan da guy dat stay talk fo God, an Shimei, an Rei, an da military leada guys dat was King David army guys, dey neva help Adonijah.
\p
\v 9 Adonijah go make plenny sacrifice, wit sheeps, an boy kine cows, an da kine cows peopo wen feed plenny fo come fat. He do dat right outside Jerusalem, by da big stone dey call Zohelet nea da En-rogel puka fo watta. He tell all his brudda guys, King David boys, fo come, an all da guys from da Judah ohana dat stay work fo da King.
\v 10 But he neva tell Nathan da talka fo God, o Colonel Benaiah, o da odda army guys, fo come. An he neva tell his brudda Solomon fo come.
\s Da Oddas Aks King David Who Goin Come Da King
\m
\v 11 Den Nathan go tell Bathsheba, Solomon mudda, “You neva hear dis, o wat?! Adonijah, da one dat Haggit wen born fo David, he come King awready. An oua boss David, he donno yet wass happening!
\v 12 So now, lissen! I goin tell you wat you gotta do. Cuz if you no do notting, you an yoa boy Solomon goin mahke.
\v 13 Hurry up an go inside! Talk to King David now! Tell him: ‘You da King, an you da boss fo me, an I jalike yoa slave wahine. But you wen make one strong promise to me befo time, you know. You wen tell me, “Yoa boy Solomon goin come da nex king afta me. He goin sit on top my throne.” Dass wat you wen tell me. So, how come Adonijah stay da king now?!’
\v 14 Befo you pau talk to da King, I goin come inside too, an I goin tell da same ting jalike you.”
\p
\v 15 Bathsheba go by da King, inside da room wea he sleep. Da King, he real ol, an Abishag da Shunam girl stay dea take care him.
\v 16 Bathsheba go down on top da groun fo show respeck fo da King. Da King tell, “Wat you like?”
\p
\v 17 Bathsheba tell da King, “Eh, you da boss fo me! You wen make one strong promise to me, an you wen aks yoa God Yahweh fo make shua you do wat you wen promise. Dis wat you wen tell me dat time: ‘Yoa boy Solomon, he da one dat goin come da King afta I mahke. Goin be him dat stay sit on top my throne.’
\v 18 But you know wat?! I wen jus hear, Adonijah come King awready, an no matta you da real King, you donno dat!
\v 19 He wen kill plenny boy kine cows, an cows peopo wen feed plenny fo come fat, an sheeps, fo make sacrifice. He wen tell all da King's boys, an Abiatar da pries guy, an Joab da general fo da army, fo come by him. Ony yoa boy Solomon, Adonijah neva tell fo come.
\v 20 But you my boss, da King. Az why you da one dat all da Israel peopo stay watch. You gotta tell erybody, who da one goin sit on top yoa throne afta you mahke.
\v 21 If you no tell da peopo notting, den afta you mahke an go by yoa ancesta guys, erybody goin go afta me an my boy Solomon, an make jalike us bad guys.”
\p
\v 22 Right den an dea, wen Batsheba stay talking wit da King, Nathan da guy dat talk fo God come inside dea.
\v 23 Da palace guys tell da King, “Look! Nathan, da guy dat talk fo God, stay hea.” Nathan come in front da King, an go down wit his face on top da groun fo show um respeck.
\v 24 Nathan tell da king, “Eh, my boss da King! Az true, o wat, dat you wen tell, ‘Adonijah goin be da king afta me, an he goin sit on top my throne’?!
\v 25 Cuz today, Adonijah wen make sacrifice wit plenny boy kine cows, an cows dat peopo make um fat, an sheeps too. He wen tell all da King's boys, an General Joab dat stay in charge a da army, an Abiatar da pries guy, fo come by him. An you know wat? Right now, dey stay dea in front him, an dey eating and drinking plenny. Dey tell, ‘We like King Adonijah live long time!’
\v 26 But Adonijah neva tell me fo go by him, cuz I work fo you. He neva tell Zadok da pries guy, an Colonel Benaiah Jehoiadah boy fo come. An he neva tell Solomon, da guy dat work fo you, fo come by him too.
\v 27 You da boss fo me, an you da King. Az true, o wat, dat you wen do all dis? How come you neva let us guys dat stay work fo you know, who goin be da one fo sit on top yoa throne an be da King after you mahke?”
\s David Make Solomon Da King
\p
\v 28 King David tell Nathan, “Tell Bathsheba fo come inside hea.” Den Nathan tell Bathsheba fo come, an she come stand dea in front da King.
\v 29 King David make one strong promise to her. He tell, “Da promise I wen make to you, you can trus fo shua. Jalike fo shua Yahweh stay alive, an erytime I get big trouble, he da one fix up eryting fo me. An jalike I stay shua bout dat,
\v 30 I make dis strong promise fo you one mo time, jalike I wen make um to you befo time in front Yahweh, da God fo da Israel peopo. I wen tell you dat time: ‘Yoa boy Solomon, he goin come da nex King afta me. He goin be da one dat sit on top my throne, an not me.’ Dass da promise I wen make dat time, an now today, I goin do wat I wen promise.”
\p
\v 31 Bathsheba go down wit her face on top da groun fo show respeck fo da King. Den she tell, “King David, you my boss! I like you live foeva!”
\p
\v 32 King David tell his guys, “Go tell Zadok da pries guy, an Nathan da guy dat talk fo God, an Colonel Benaiah Jehoiada boy, fo come hea.” Wen dey come in front da King,
\v 33 da king tell um, “I da boss fo you guys, an I like you guys do dis: Go get all da odda guys dat work fo me. Den put my boy Solomon on top my spesho mule, an make parade fo take him down dea outside Jerusalem, by da Gihon watta place.
\v 34 Wen he come dea, I like fo Zadok da pries guy an Nathan da talka fo God, put olive oil on top his head fo show he goin be da King fo da Israel peopo. Den, tell my guys fo blow da trumpets, an tell erybody fo say dis, ‘We like King Solomon live long time!’
\v 35 Den tell Solomon fo go up to da palace, an all you guys go wit him. Den he goin go inside da palace an sit down on top my throne. He goin come da King afta me, cuz I wen tell erybody, he da one goin stay in charge a da Israel peopo an da Judah ohana!”
\p
\v 36 Benaiah Jehoiada boy tell da King, “Right on! I like fo Yahweh, make all dat happen. He da God dat my boss da King stay pray to!
\v 37 Jalike Yahweh wen stay tight wit you, I like Yahweh stay tight with Solomon, an make dis country even mo awesome den stay now, wen you stay da King.”
\p
\v 38 So Zadok da pries guy, an Nathan da talka fo God, and Colonel Benaiah Jehoiada boy, an da guard guys from da Keret an Pelet peopos, dey all wen go outa da palace. Dey go fo put Solomon on top da mule dat stay spesho fo King David, an dey take Solomon down to da Gihon watta place.
\p
\v 39 Wen dey get dea, Zadok da pries guy take one horn bottle dat get olive oil inside, dat he wen get from da Tent Fo Rememba Da Deal Wit God, an he put da oil on top Solomon head. Den da peopo start fo blow trumpets, an erybody yell, “We like King Solomon live long time!”
\v 40 Den Solomon go up to da palace, an all da peopo go wit him, playing flute an telling erybody dey stay plenny good inside. Dey make big noise, da groun shake!
\s Adonijah Give Up
\m
\v 41 Adonijah an all da peopo dat stay making party wit him, almos pau eat, an dey hea da noise. General Joab, he hear da trumpet noise, an he tell, “Eh! How come erybody inside dis town stay make big noise an yelling?!”
\p
\v 42 Befo Joab pau say dat, Jonathan come dea. (His fadda, Abiatar da pries.) Adonijah tell um, “Come inside! You one importan guy, an fo shua you get good stuff fo tell.”
\p
\v 43 Jonathan tell Adonijah, “No, not good stuff! Oua boss King David wen make Solomon da King, not you.
\v 44 Da King wen send Zadok da pries guy, an Nathan da talka fo God, an Colonel Benaiah Jehoiada boy, an da guard guys from da Keret an Pelet peopos. Dey wen put Solomon on top da mule dat stay spesho fo da King.
\v 45 Zadok da pries guy, an Nathan da talka guy fo God, dey wen go da Gihon watta place. Ova dea dey put da spesho olive oil on top Solomon head fo show he da one dat come King. Den dey wen go from dea up to da palace, an dey all stay good inside. Erybody in dis town stay amping out! Dass da noise you hear.
\v 46 So now, Solomon stay sit on top da throne, an he da King.
\p
\v 47 “An you know wat?! Da guys dat stay work fo oua boss King David, dey all go by King David an tell um, ‘We like fo God make Solomon get even mo big name den you! We like God make dis country even mo awesome den stay now, wen you stay da King!’
\p King David, he stay sitting down on top da bed, an he bend ova fo show God love an respeck.
\v 48 Den he pray to God lidis: ‘I like tell good tings bout you, cuz you Yahweh, da God fo da Israel peopo. Today, you wen let one a my boys take ova da throne from me, an you wen let me see all dat happen!’-”
\p
\v 49 Den, all da peopo dat was making party wit Adonijah stay shaking cuz dey scared. Den dey all stand up an go home.
\v 50 Adonijah, he scared a Solomon too. He go by da big altar an grab da tings jalike horns dat stick out, so nobody can kill him.
\v 51 Somebody tell Solomon, “Adonijah, he scared a you, King Solomon. An you know wat? Adonijah stay put his hands on top da horns dat stay stick outa da big altar, an he tell, ‘I like fo King Solomon make one strong promise to me, dat he no goin tell nobody fo kill me wit one sword. I goin be his worka guy!’-”
\p
\v 52 Solomon tell, “Go tell Adonijah, ‘If you come one guy I can trus, I no goin do notting fo make even one hair from yoa head fall on top da groun cuz a me. But if I hear anyting bad bout you, you goin mahke.’-”
\p
\v 53 Den King Solomon send one guy fo go get Adonijah down from da altar an bring um to da palace. Adonijah come, an he go down in front King Solomon fo show him respeck. Solomon tell um, “Go home.”
\c 2
\s David Tell King Solomon How Fo Make
\r (Jesus Guys 13:36)
\m
\v 1 Wen almos time fo David mahke, he tell his boy Solomon wat fo do. He tell:
\v 2 “You know, erybody inside dis world, gotta mahke. An me, I goin mahke pretty soon. So you gotta be strong an show you no scared notting.
\v 3 Do wateva yoa God Yahweh tell you, you gotta do um. Live da way he tell you. Wateva job God give you, you betta do um. He da Judge, so wen he say someting, do um. Eryting God teach, dat Moses wen write inside da Rules, do um. Den, no matta wat you do, an wea you go, eryting goin come out good fo you.
\v 4 Wen you do all dat, den Yahweh goin make happen, wat he tell bout me befo time, ‘Da king guys dat come born from yoa blood bumbye, dey gotta watch how dey ack. Cuz I goin see how dey live. If dey do eryting wit all dea heart, an wit eryting dey get inside, I know I can trus dem. Den me, Yahweh, I no goin wipe out yoa blood line eva. Erytime goin get one guy dat come from yoa blood line, dat goin be da King fo sit on top da throne fo da Israel peopo.’ Dass wat Yahweh wen tell bout me.
\s2 Joab
\p
\v 5 “One mo ting. You know wat Joab, my sista Zeruiah boy, wen do to me. He wen go kill da two guys dat was da generals fo da Israel army, Abner Ner boy an Amasa Jether boy. Joab do dat afta pau all da fight. An he ack jalike still get war. So now, jalike get blood all ova his army clothes an stuff an all ova his shoes.
\v 6 You know wat fo do erytime, so go do wateva you gotta do. But no matta Joab come ol an get white hair, wen he mahke, no let him mahke an go down to da Mahke Peopo Place easy kine, jalike he neva do notting bad!
\s2 From Absalom Time
\p
\v 7 “Stick wit da Barzillai guys from Gilead side. Make dem some a da guys dat you take care dem, an dey eat wit you at yoa table. Cuz you know, dey da guys dat wen stick wit me an bring me food, da time I wen run away from yoa brudda Absalom.
\p
\v 8 “An no foget, you get wit you dis guy Shimei, Gera boy, from da Benjamin ohana Bahurim side. Da bugga wen put kahuna on top me fo hurt me plenny, da time I go Mahanaim. Layta, Shimei wen come down to da Jordan Riva fo talk to me, an I wen make one strong promise to him. I wen aks Yahweh fo help me. I tell um, ‘I no goin kill you wit my sword.’
\v 9 But now, no need ack like da guy neva do notting bad. You one guy dat know wat fo do erytime, so you know wat fo do bout Shimei. He stay ol an get white hair, but make um bleed befo you send him down to da Mahke Peopo Place!”
\s King David Mahke
\m
\v 10 Den David mahke an go wit his ancesta guys. Da peopo bury him inside Jerusalem, da part dat get da name “David Town.”
\p
\v 11 All da time dat David was da King fo da Israel peopo, was forty year. Firs part, he live Hebron town seven year, an den Jerusalem town, 33 year.
\v 12 Den King Solomon take ova from his fadda David, an sit on top da same throne. An erybody know, dat Solomon da King fo real kine.
\s King Solomon Make Shua He Stay King
\s2 Adonijah
\m
\v 13 Layta, Solomon's half brudda Adonijah go by Solomon mudda Batsheba (Adonijah mudda, Haggit). Batsheba aks Adonijah, “You come hea fo make trouble, o eryting okay?!”
\p Adonijah tell, “Eryting okay.”
\v 14 \p
Den Adonijah tell Batsheba, “I like tell you someting.”
\p She tell, “Kay, you can.”
\v 15 \p
Adonijah tell: “You know, was me suppose to come da King. All da Israel peopo wen tink me da one fo be dea leada. But da whole ting wen turn aroun, an now my brudda come da King, cuz Yahweh wen give him da right, not me.
\v 16 An now, I like aks you fo do one ting for me. No tell me no.”
\p Batsheba tell um, “Tell me.”
\v 17 So Adonijah tell, “Go talk to King Solomon, cuz he no goin tell you no. Aks him fo give me Abishag da Shunam wahine fo come my wife.”
\v 18 \p
Batsheba tell him, “Kay den, I go talk to da King fo you.”
\v 19 \p
So Batsheba go by King Solomon, fo talk to him fo Adonijah. Wen she come inside, da King stand up fo tell her aloha, den he go down in front her. He sit down on top his throne, an he tell his helpa guys fo bring one nodda throne cuz she da King Mudda. She sit down dea, da right side by King Solomon, fo show erybody she importan.
\v 20 She tell, “I get one small ting I like aks you fo do. Can do um fo me, o wat?”
\p Da king tell, “Eh, you my mudda. Aks me, cuz I no goin tell you no.”
\v 21 \p
Batsheba tell, “Go let yoa brudda Adonijah marry Abishag da Shunam wahine.”
\v 22 \p
King Solomon tell his mudda, “Wot! How come you aks me fo let Abishag da Shunam wahine marry Adonijah?! Jalike you stay aks me fo make him da King! Cuz he my older brudda. O same ting jalike you aks me fo make Abiatar da main pries, an Joab Zeruiah boy da main army guy!”
\p
\v 23 Den King Solomon wen make one strong promise to Yahweh. He tell, “If I no go do wat I say now, I like God kill me, o do mo worse tings! Dis Adonijah guy goin mahke, cuz he tell you fo come tell me dat!
\v 24 fo shua Yahweh stay alive, an dat he da one make me strong, an make me sit down on top da same throne jalike my fadda David. An I stay shua dat he wen make me one promise dat da Kings fo da Israel peopo goin come from my blood. An cuz I stay shua bout all dat, I know, Adonijah goin mahke, today!”
\v 25 So King Solomon send Benaiah, Jehoiada boy, fo kill Adonijah, an Adonijah wen mahke.
\s2 Abiatar
\p
\v 26 Da King tell Abiatar da pries guy, “Go back Anatot side, wea you get land. You suppose to mahke. But I no goin kill you today, cuz you wen help carry da Box Fo Rememba Da Deal Wit My Boss Yahweh in front David my fadda, an cuz you wen suffa all da time my fadda wen suffa.”
\v 27 Den Solomon throw out Abiatar, an no let um be one pries fo Yahweh. All dis wen happen jalike wat Yahweh wen tell befo time bout da pries guys from da Eli ohana, Shiloh side.
\s2 Joab
\p
\v 28 Joab wen hear wat wen happen. (Befo time, Joab wen push Adonijah fo come King, but he neva push Absalom.) Joab run to da Tent Fo Rememba Da Deal Wit Yahweh, an he grab da tings jalike horns dat stick out from da four corner a da altar.
\v 29 Somebody tell King Solomon, “Joab wen run to da Tent Fo Rememba Da Deal Wit Yahweh. Now he stay by da altar so nobody can go kill him!”
\p Den Solomon tell Benaiah, Jehoiada boy, fo go ova dea. Solomon tell um, “Go. Wipe out Joab.”
\v 30 \p
So Benaiah go da Tent Fo Yahweh, an he tell Joab, “Da King say, come outside.”
\p But Joab tell, “No. I go mahke right hea.”
\p Benaiah go back by da King an tell um wat Joab wen tell him.
\p
\v 31 Da King tell Benaiah, “Go kill Joab, jalike he tell, an bury him, so dat nobody goin blame me an my fadda peopo. Cuz Joab wen make plenny peopo bleed an mahke, fo no reason.
\v 32 Cuz Joab wen make peopo bleed an mahke, now Yahweh pay back Joab. Joab wen go attack an kill two guys, an my fadda neva know wat Joab do till afta. One guy Abner, Ner boy, da general fo da Israel army, an da odda, Amasa, Jeter boy, da general fo da Judah army. Dey mo betta guys den Joab, an dey stay do da right ting mo den Joab.
\v 33 Dese two guys mahke, an Joab get da blame fo dat, an erybody dat come from him, get da blame too. But fo David an da peopo dat come from him, an his ohana, an fo da kings dat goin come from David, Yahweh goin make eryting come good fo dem, all da time.”
\v 34 \p
So Benaiah, Jehoiada boy, go up dea an attack Joab an kill um. Da peopo bury Joab by his own house, nea da boonies.
\v 35 Den da King wen make Benaiah, Jehoiada boy, da general in charge a da army afta Joab. Da king make Zadok da main pries afta Abiatar too.
\s2 Shimei
\p
\v 36 Den da King send one guy fo tell Shimei fo come by him. Da King tell Shimei, “Go build one house fo yoaself ova hea inside Jerusalem. But you no go outside Jerusalem fo go anodda place.
\v 37 Dis da deal: If you go out, an go cross da Kidron Stream, you know fo shua dat da same day, you goin mahke, an ony you goin get da blame fo dat.”
\p
\v 38 Shimei tell da King, “I goin live jalike how you say. You da King, an you my boss, an I yoa worka guy, an dass wat I goin do.” Shimei wen stay inside Jerusalem town long time.
\p
\v 39 But afta three year, two guys dat was slaves fo Shimei wen run away. Dey go Gat side, by King Akish, Ma`akah boy. Somebody tell Shimei, “Yoa slave guys, dey stay Gat side.”
\v 40 So Shimei put saddle on top his donkey an get ready fo go. He go Gat side by King Akish, fo look fo his slaves. Den he bring um back from Gat.
\p
\v 41 Somebody tell King Solomon dat Shimei wen go outside Jerusalem to Gat, an now he come back.
\v 42 Da King send somebody fo tell Shimei fo come by him. King Solomon tell Shimei, “Wass up?! I wen make you, make one strong promise in front Yahweh, an I wen tell you, ‘Fo shua, I goin do wat I tell you. If you go outside Jerusalem town, no matta wat place you go, da same day, you goin mahke.’
\p “An you wen tell me, ‘I goin live jalike how you say. I do um.’
\v 43 You wen make one strong promise to Yahweh. How come you no do wat you wen promise, aah? I wen tell you wat you gotta do. How come you neva do um, aah?”
\p
\v 44 Da King tell Shimei dis too: “Inside yoa heart, you know all da bad kine stuff you wen do to King David my fadda. Now, Yahweh stay bring all dat bad stuff back to you.
\v 45 But Yahweh goin do good tings fo me, King Solomon. Fo shua, kings from David blood goin sit on top King David throne in front Yahweh, foeva.”
\v 46 \p
Den da King tell Benaiah, Jehoiada boy, go hit Shimei an kill um.
\p Dass how everybody come shua dat Solomon, he stay da King fo real kine.
\c 3
\s Solomon Aks God Fo Help Him Know Erytime Wat Fo Do
\m
\v 1 King Solomon wen let da Pharaoh guy, da King fo Egypt, make one deal wit him. Fo set up da deal, Solomon wen take da Pharaoh guy daughta an marry her. He bring her David Town, az Jerusalem. She stay inside Jerusalem long time, till King Solomon pau build his own palace, an da Temple Fo Yahweh, an da wall aroun da town.
\p
\v 2 Ony one ting -- dat time, all da peopo still stay making sacrifice on top da hills, cuz dey still yet no build one temple fo Yahweh, fo show erybody wat kine god him.
\p
\v 3 King Solomon, he get love an aloha fo Yahweh, an he stay keep all da rules dat his fadda David wen make. Ony one ting not right -- even Solomon stay make sacrifice an burn incense on top da hills.
\v 4 Plenny time, King Solomon wen go Gibeon side fo make sacrifice ova dea, cuz dass da mos important sacrifice place, on top one hill ova dea. King Solomon guys wen kill tousan cows, fo make burn up kine sacrifice on top dat altar.
\v 5 Wen King Solomon stay Gibeon side, Yahweh let Solomon see him inside his dream, one nite wen Solomon stay sleep. God tell um, “Wateva you like me give you, you aks me.”
\p
\v 6 Solomon tell, “You wen do plenny for my fadda King David, dat wen work fo you. You wen stay real tight wit David, cuz you know da way he live, an you know you can trus um, how he stay do da right ting erytime. David get one clean an good heart, jus how you like. An you wen stick wit him, cuz you wen give King David one boy fo sit on top his throne, an dass me.
\v 7 So Yahweh, you da God I pray to, an I work fo you. You wen make me come da King afta my fadda David mahke. But me, I jalike one small boy -- I donno how fo lead da peopo.
\v 8 I yoa worka guy, an I stay hea wit all yoa Israel peopo, da peopo you wen choose. Get choke peopo, so plenny, no can count all dem.
\v 9 You know, I yoa worka guy. So make my heart fo lissen an undastan wass happening, so I can be da right kine judge fo yoa peopo. Help me fo undastan wass good an wass bad. Cuz no mo nobody hea, fo be da judge fo yoa awesome peopo!
\p
\v 10 Da Boss feel good, dat Solomon aks him fo do dat.
\v 11 God tell King Solomon, “You aks me fo help you know wat fo do. You neva aks me fo make you live long time, o fo make you come plenny rich, o fo kill all da peopo dat stay agains you. But you ony aks me fo help you lissen an undastan, so you can know wass right an wass wrong.
\v 12 Cuz you aks me fo do dat, I goin do jalike you say. I goin help you, give you da kine heart, fo know wat fo do erytime, an fo know wass good an wass bad. No mo nobody befo you, dat know wat fo do erytime jalike you, an no goin get nobody afta you too, dat can make jalike you.
\v 13 An one mo ting, I goin give you da tings dat you neva aks me fo give you. I goin make you come rich, an I goin make peopo get respeck fo you. No goin get no odda king guy dat stay jalike you, till you mahke.
\v 14 If you do eryting jalike I tell you fo do, an do how my rules say, an do da tings I tell you dat you gotta do jalike yoa fadda King David wen do, den I goin make you live long time too.”
\p
\v 15 Den King Solomon wake up, an he know God wen talk to him inside da dream. He go back Jerusalem side, an go stand in front da Box Fo Rememba Da Deal Wit Da Boss. He make sacrifice dat you burn up, an da kine sacrifice fo tell God dat eryting stay okay. He make one party fo all da peopo dat work fo him.
\s Solomon Know How Fo Judge Da Right Way
\m
\v 16 One time, get two wahines, da kine dat fool aroun fo get money. Dey come stand in front da King.
\v 17 Da firs wahine tell da King, “Lissen to dis, Boss. Me an dis odda wahine hea, we live inside da same house. I wen born one bebe, an she was dea wit me.
\v 18 Den two days afta, she wen born one bebe too. Us guys stay dea togedda inside da house, nobody else, jus us two an da bebes.
\p
\v 19 “Layta, nite time, dis wahine's bebe wen mahke, cuz she wen sleep on top him.
\v 20 So she get up, middo a da nite wen I stay sleeping. She take away my boy dat stay sleep wit me, an put her mahke boy nex by me. An she start fo breas feed my boy.
\p
\v 21 “Morning time, I get up fo breas feed my boy. I see dat he mahke awready. But den wen I look him good inside da light -- eh, he not da same bebe I wen born!”
\p
\v 22 Da odda wahine tell, “Not! Da bebe dat stay alive, az mines! An da mahke bebe, az yoas.” Dass how dey make argue in front da King.
\p
\v 23 Da King tell dem: “One tell, ‘Dis bebe dass alive, az my boy, an yoa boy, mahke!’ Da odda one tell, ‘Not! Yoa boy, da mahke one, an my boy da one dat stay alive!’-”
\p
\v 24 So da King tell his guys, “Bring me one sword!” An dey bring um.
\v 25 Den da King tell his guys, “Da boy dat stay alive, go cut um half half! Give one piece fo dis wahine, an one piece fo da odda one.”
\p
\v 26 Da wahine dat was da real mudda a da boy dat stay alive, she get plenny pity fo her boy, so she tell da King, “No! Wait, Boss! Give her da boy dat stay alive! No kill um!”
\p But da odda wahine tell, “Mo betta da boy no goin be mines an no goin be yoas. Go head! Cut um half half, da bebe!”
\p
\v 27 Wen King Solomon hear dat, he tell, “Give da boy dat stay alive to da wahine dat say no kill um. No kill da bebe. Her da mudda!”
\p
\v 28 All da Israel peopo, wen dey find out wat King Solomon wen tell cuz he da judge, dey get awesome respeck fo da King, cuz dey see how God help him fo know inside wat fo do, fo make shua da right ting happen.
\c 4
\s Da Govmen Guys Dat Work Fo Solomon
\m
\v 1 Dass how was, wen Solomon was da King fo all da Israel peopo.
\v 2 An now, dis da lis wit his main govmen guys:
\q Azariah Zadok boy was da main pries guy.
\q
\v 3 Eli-Horef, Shisha boy an his brudda Ahijah, dey take care da palace records.
\q Jehoshafat Ahilud boy write da history, eryting dat wen happen.
\q
\v 4 Benaiah Jehoiada boy, da army leada.
\q Zadok an Abiatar, dey da prieses.
\q
\v 5 Azariah Nathan boy, in charge a da districk govna guys.
\q Zabud Nathan boy was one pries, an one good friend dat da King trus.
\q
\v 6 Ahishar stay in charge a da palace.
\q Adoniram Abda boy, in charge a da guys dat no mo pay, dat gotta work fo da King.
\p
\v 7 Solomon get twelve districk govna guys. Dey stay in charge a all da Israel peopo. All dem get da job fo bring from dea districk, all da food da King an his peopo need fo eat. Ery districk take one month from ery year.
\v 8 Dis da names fo da twelve govna guys.
\q Ben-Hur, fo up country Efraim side.
\q
\v 9 Ben-Deker, fo Makaz, Shaalbim, Bet-Shemesh, an Elon-Bet-Hanan side.
\q
\v 10 Ben-Hesed, fo Arubot side, wit Sokoh an all da Hefer land.
\q
\v 11 Ben-Abinadab, fo all da Nafat-Dor land. (He marry Solomon girl Tafat.)
\q
\v 12 Ba`ana Ben-Ahilud, fo Ta`anak, Megiddo, all da Bet-Shean land nex to Zaretan, down side from Jezreel, an from Bet-Shean ova to Abel-Meholah, an from dea across to Jokmeam.
\q
\v 13 Ben-Geber, fo Ramot-Gilead side. He get da small towns dat Jair Ben-Manasseh wen build Gilead side, an da Argob lands Bashan side, sixty big towns wit strong walls aroun dem an bronze bars fo hold da town gates shut.
\q
\v 14 Ahinadab, Iddo boy, fo Mahanaim side.
\q
\v 15 Ahima`az, fo Naftali side. (He wen marry Solomon girl Basemat.)
\q
\v 16 Da odda Ba`ana, Hushai boy, fo Asher an Bealot side.
\q
\v 17 Da odda Jehoshafat, Paruah boy, fo Issakar side.
\q
\v 18 Shimei Ela boy, fo Benjamin side.
\q
\v 19 Geber Uri boy, fo Gilead side, da place wea befo time Sihon was King fo da Amor peopo, an da place wea Og was King, Bashan side.
\p An had one nodda govna guy dat stay in charge a da whole land.
\s Solomon Awesome
\p
\v 20 All ova da Judah an Israel land, get choke plenny peopo, jalike da sand on top da beach. Dey all get plenny fo eat an drink, an dey stay good inside.
\v 21 Solomon was da King in charge a all da local kine kings from da Eufrates Riva to da Filisha land, an all da way to da Egypt border. Da local kine kings bring rich kine gifs fo Solomon an dey work fo him all da time Solomon stay alive.
\p
\v 22 Fo feed all da palace peopo, ery day Solomon get 30 donkey load fancy kine wheat flour, 60 donkey load regula kine wheat flour,
\v 23 ten cows dat dey feed inside da pen, twenny cows dat eat ony grass, hundred sheeps an goats, an three kine deer, an gooses dey feed plenny.
\p
\v 24 Solomon get all dat, cuz he da King ova all da local kine kings dat live da wes side a da Eufrates Riva, all da way from Tifsah to Gaza. Wen Solomon was da King, eryting go good fo him from all da peopo da wes side a da Eufrates, an all aroun him.
\v 25 All da time Solomon stay alive, da Judah an Israel peopo no need worry bout notting, from da Dan land nort side to Beer-Sheba town sout side. Erybody can sit down unda dea own grape vine an fig tree.
\p
\v 26 Solomon get 4,000 place fo keep da horses dat pull his war wagons, an 12,000 horse.
\p
\v 27 Da twelve districk govna guys, take turn ery month. Dey suppose to make shua King Solomon get plenny food fo his own peopo eat, an fo all da odda peopo dat come by King Solomon an eat wit him. An dey erytime bring him wat he need.
\v 28 An dey bring barley, an wheat stalk too, fo da horses dat pull da war wagons, an da odda horses. Ery govna guy bring da food he suppose to bring.
\s Erybody Hear Bout How Solomon Know Wat Fo Do
\p
\v 29 God help King Solomon fo know wat fo do erytime, an fo undastan wass good an wass bad bout all kine stuff, cuz he gotta tink bout plenny stuff, jalike get choke plenny sand on top da beach.
\v 30 Dass how King Solomon know wat fo do, mo betta den all da smart guys dat live da east side, an all da Egypt smart guys.
\v 31 He know wat fo do mo betta den any odda guy, mo den Ethan da Ezrahi guy, an da three Mahol boys Heman, Kalkol, an Darda. Da peopo from all da odda countries aroun dea wen hea bout how awesome King Solomon stay.
\v 32 He wen tell 3,000 smart kine tings peopo tell fo peopo know wat fo do, an he make 1,005 song.
\v 33 He know fo tell bout all da plants, from da big cedar tree dat grow Lebanon side, to da small oregano plant dat grow outa one wall. He know how fo tell bout da animals, da birds, da snakes an lizards, an da fishes.
\v 34 Peopo from all da odda countries wen come fo lissen King Solomon, fo find out how he know wat fo do erytime. All da odda kings dat wen hear how Solomon know wat fo do erytime, wen send dea guys by him.
\c 5
\s King Solomon Make Ready Fo Build Da Temple
\m
\v 1 Hiram was da king dat time Tyre side. Him an King David stay tight from long time. King Hiram wen hear dat da Israel peopo wen put olive oil on top Solomon head fo make him da king, fo take ova from his fadda King David. So Hiram send some a his helpa guys by Solomon.
\p
\v 2 Solomon send back one message to Hiram. Dis wat he tell:
\m
\v 3 “You know awready, dat my fadda David stay pray to da God Yahweh. But get diffren peopos come afta him from all aroun him, fo make war. Az why my fadda no can build one Temple fo his God Yahweh, so erybody goin know wat kine god him. In da end, Yahweh let my fadda win ova dem.
\m
\v 4 “But now, my God Yahweh, da One dat I pray to, he let me res, cuz no need fight wit da peopos all aroun me. No mo nobody stay agains me, no mo nobody do bad kine stuff agains me.
\v 5 So now, I stay tinking lidis: I goin build one Temple so erybody goin know wat kine god, my God Yahweh, da One I stay pray to. Yahweh wen tell my fadda King David, ‘I goin put yoa boy on top yoa throne, afta you pau be da King. Yoa boy, da one goin build da Temple so erybody goin know wat kine god me.’
\m
\v 6 “Az why I like you tell yoa peopo fo cut cedar trees from da Lebanon mountains fo me. Da guys dat work fo me, I like dem work togedda wit da guys dat work fo you. I goin give you silva, so you can pay da guys dat work fo you, wateva you pay dem. Cuz you know dat no mo nobody oua side know how fo cut tree like you Sidon peopo.”
\s King Hiram Write Letta To King Solomon
\p
\v 7 Wen King Hiram hear wat King Solomon tell, make him feel real good inside. He tell, “Today, I like tell good tings bout Yahweh, cuz he wen give King David one boy dat know wat fo do erytime, fo be in charge a da awesome Israel peopo.”
\p
\v 8 Hiram send message to Solomon. He tell um:
\m “I get da message you send me. I goin make shua you get eryting you like, cedar wood an pine wood.
\v 9 My worka guys goin bring da wood downfrom  da Lebanon mountains to da sea. I goin tell um tie um up fo make plenny raft. Den we take um down on top da watta to da place you tell me. I goin tell my worka guys fo hemo da rope dea so, you guys can take da wood away. Den, I like you go send me food fo my palace peopo eat. Dass how you can pay me.”
\p
\v 10 An dass wat wen happen. Hiram wen give Solomon all da cedar wood an pine wood he like.
\v 11 Solomon give Hiram ery year, 3,600 ton wheat fo feed his palace peopo, an 120,000 gallon da bestes kine olive oil.
\v 12 Yahweh help King Solomon know wat fo do erytime, jalike Yahweh wen tell um he goin do, firs time. Hiram an Solomon, dey no fight each odda, an da two kings make one deal fo help each odda.
\s King Solomon Make Ready Fo Build Da Temple
\p
\v 13 King Solomon wen make 30,000 man work fo him an no mo pay. Dey come Jerusalem side, from all ova da Israel land.
\v 14 From dea, Solomon send um out to da Lebanon mountains, 10,000 mens ery month. Dey go Lebanon one month, den go home two month. Adoniram, da guy dat stay in charge a da 30,000 worka guys.
\p
\v 15 Up country Israel side, Solomon get 80,000 worka guys who cut stone, an 70,000 guys fo carry da stone block to Jerusalem.
\v 16 An had 3,300 luna guys in charge a da work an da worka guys.
\v 17 Da king tell dem fo cut real big kine stone blocks outa one mountain ova dea. Da stone cost plenny, cuz dey measure um da right size, an den cut um fo make da foundation fo da Temple.
\p
\v 18 Dass how da builda guys work, da ones work fo King Solomon an King Hiram, an da Gebal peopo. Dey cut da stone da right size an make ready da wood an da stones fo build da Temple.
\c 6
\s King Solomon Build Da Temple
\m
\v 1 Den, 480 year afta da Israel peopo leave da Egypt land, an da year numba 4 dat Solomon stay king fo da Israel peopo, in April, Solomon an his worka guys start fo build da Temple Fo Yahweh.
\v 2 Da Temple dat Solomon guys build fo Yahweh, 90 feet long, 30 feet wide, an 45 feet high.
\v 3 Da hallway to da door wea da pries guys go inside da Temple, go across an cova da front a da building, 30 feet wide, an stick out 15 feet from da building wall.
\v 4 Solomon make small kine square light openings aroun da top a da wall fo da Temple building.
\v 5-6 Outside da Temple wall, da two side an da back, he make storage rooms. But he no like puka da Temple wall fo put inside da beams fo da rooms, so he make one small wall agains da Temple wall an da wall fo da Mos Spesho Place, fo carry da beams. Da wall fo carry da beams, stay mo thick fo da bottom rooms, so da rooms aroun da bottom ony 7 feet 6 inch from da door to da wall. Da secon floor rooms, 9 feet from da lanai to da wall, an da top rooms, 10 feet 6 inch from da lanai to da wall.
\p
\v 7 Fo build da Temple, da workas stack big stone block dat da odda worka guys wen cut awready fo dem, so no mo noise inside da Temple from hammer, axe o any odda kine iron tool wen dey working.
\p
\v 8 Fo go inside da storage rooms, get one door on da sout side a da Temple, den you go up one winding stair dat go aroun to da secon floor, den to da top floor.
\v 9 Dass how da worka guys fo King Solomon wen pau build da Temple. Dey put cedar wood beams an board fo build da roof.
\v 10 Da small wall fo carry da beams fo da storage rooms, dey wen build um agains da Temple wall, wit ery floor 7 feet 6 inch high, an da cedar wood beams fo da rooms go flush to da Temple wall.
\s God Talk To King Solomon
\p
\v 11 Had one time, King Solomon wen get one message from Yahweh. An dis da message:
\v 12 “I like tell you someting bout dis Temple you building: If you stay live da way I tell you fo live, an do eryting da right way, an stay live da way I say you gotta live, den fo you, I goin make happen da ting I wen make promise to yoa fadda David fo do.
\v 13 Dat mean, I goin make house right in da middo a da Israel peopo. Garans I no goin bag from da Israel peopo.”
\s Da Rooms Inside Da Temple
\p
\v 14 Afta Solomon pau build da Temple, he make nice da inside.
\v 15 He cova da inside walls wit cedar wood board, dat go from da floor to da ceiling. Same ting fo da floor, he cova dat wit pine wood board.
\v 16 Da back 30 feet, he make one room fo be da Real, Real Spesho Place Fo God. He cova da inside walls dea too wit cedar wood board, dat go from da floor to da ceiling.
\v 17 Da odda 60 feet, outside da Real, Real Spesho Place Fo God, was da main temple room.
\v 18 Had cedar wood all ova inside da Temple building, wit pichas cut on top da wood, gourds an open up flowas, so no can see da stone wall.
\p
\v 19 Solomon make ready da Real, Real Spesho room inside da Temple, fo put da Box Fo Rememba Da Deal Wit Yahweh dea.
\v 20 Da inside room was 30 feet long, 30 feet wide, an 30 feet high. Solomon put gold all ova da wood inside da room, an same ting fo da altar outside da room made wit cedar wood.
\v 21 Solomon put gold all ova da inside a da Temple, da part in front da Real, Real Spesho inside room. He put gold chains in front a da Real, Real Spesho room, dat get gold all ova da inside.
\v 22 Dass how Solomon wen make eryting perfeck -- he put gold all ova da whole building, even da small altar in front da Real, Real Spesho room.
\s Da Tings Inside Da Temple Rooms
\p
\v 23 Fo da Real, Real Spesho room inside da Temple, Solomon wen make two statues outa olive wood, fo look like da awesome angel watcha guys.
\v 24 Da two statues, 15 feet high. Dea wings was 7 feet 6 inch, both side, an dey stick out strait, so come 15 feet wide wit da wings.
\v 25 Da two statues da same size, an look da same.
\v 26 Da two statues, 15 feet high.
\v 27 Solomon put da awesome angel watcha guy statues nex to each odda, inside da Real, Real Spesho room. Dea wings stick out strait to da side, so dey touch da wall wit one wing, an dey touch each odda wit da odda wing.
\v 28 Solomon put gold all ova da awesome angel watcha guy statues.
\p
\v 29 All da walls inside da Temple, da Real, Real Spesho room an da main room, dey carve da wood fo make pichas -- dey make awesome angel watcha guys, palm trees, an open flowas.
\v 30 Inside da temple, da Real, Real Spesho room an da main room, Solomon tell his guys put gold ova da floor too.
\p
\v 31 Fo go inside da Real, Real Spesho room, Solomon tell his guys put two olive wood doors. Da two side poses, get five sides.
\v 32 All ova da olive wood doors dey carve pichas -- awesome angel watcha guys, palm trees, an open flowas. Den he tell his guys pound gold fo go ova all da pichas, even da angels an da palm trees.
\v 33 An fo da big door fo go inside da Temple, he make olive wood poses wit four sides.
\v 34 Da two double doors, he make dem from pine wood. Da double doors get hinge in da middo so can fold um.
\v 35 His guys carve pichas -- awesome angel watcha guys, palm trees, an open flowas. Dey put gold all ova da doors, even da carve part dey put thin sheet gold too.
\v 36 He make one wall fo make da yard outside da Temple building. His guys make da wall lidis, afta three course cut stone, get one course cedar beam.
\v 37 Da time King Solomon wen start fo put da foundation fo da Temple Fo Yahweh, was April, year numba 4 he was king.
\v 38 Seven year layta, Octoba, year numba 11 he was king, dey pau build da Temple. Eryting stay jalike Solomon wen plan um.
\c 7
\s Solomon Palace An Odda Places
\m
\v 1 Solomon build odda buildings too. Take him 13 year fo finish eryting.
\p
\v 2 Solomon build da house dey call Da Lebanon Fores House too. Was 150 feet long, 75 feet wide, an 45 feet high. Get big poses dey put from cedar kine wood. Dey make four row pos, an put cut cedar beams on top ery pos row fo hold up da raftas.
\v 3 Da roof, cedar wood too. Get 45 raftas fo hold up da roof, an 15 pos in ery row, an da raftas go from da top a one pos to da top a da nex pos dat match in da nex row.
\v 4 Had one side stay open fo put three row window, an da odda side da same ting, an dey stay face each odda.
\v 5 All da door get square frame. Get three row window on one side, an three on da odda side, an dey face each odda.
\p
\v 6 Da Hall Wit Poses, Solomon make dat too, 75 feet long an 45 feet wide. In front da hall, get lanai wit big poses in front. Da roof fo da lanai stick out in front da poses.
\p
\v 7 Den Solomon make da Hall Fo Da Throne. Dis da Hall Fo Judge Da Peopo. From da floor to da roof, eryting stay cova wit cedar wood.
\p
\v 8 Solomon build his own house fo live inside, not da main yard, but litto bit back from da Hall Fo Da Throne. Solomon house, same kine building jalike da Hall Fo Da Throne. He make one nodda house, jalike his own house, fo Pharaoh daughta dat he wen marry.
\p
\v 9 Eryting Solomon build, he make um wit stone block dat cos plenny. Dey measure da block, den cut um wit da saw jus how dey wen measure um, fo da inside an da outside a da house, from da foundation to da top a da wall, an from outside all da way to da big yard inside.
\v 10 Da foundation stone blocks get real big stones, 12 to 15 feet, an cos real plenny.
\v 11 On top da big foundation stone, get stone blocks, da kine dey measure an den saw um fo fit, an beams from cedar wood, dat cos real plenny too.
\v 12 All aroun da main yard, da wall get three course high cut stone block, den one course cedar wood beam, till stay high nuff. Dey make um jalike dey wen make da yard aroun da Temple Fo Yahweh, an da lanai in front da Temple.
\s Huram Da Guy Dat Make Stuff Outa Bronze
\p
\v 13 King Solomon wen call one guy, Huram from Tyre, fo come by him. An da guy come.
\v 14 Huram mudda, one widow from da Naftali ohana. His mahke fadda was one Tyre guy dat know how fo make all kine real good stuff from bronze metal. Huram know eryting how fo do um, an know wat fo make wit metal. He know all da kine work he do wit da bronze metal. So Huram come by King Solomon, an he do all da kine work dat Solomon give um.
\p
\v 15 Huram melt bronze metal fo make two big pos. Dey 27 feet high, an need one 18 feet rope fo go aroun da middo.
\v 16 Den he melt bronze metal fo make two fancy kine piece fo go on top da two pos. Dey 7 feet 6 inch high.
\v 17 He make da top piece fo look like get square net all ova, an chains aroun da net, seven chains fo one top piece, an seven fo da odda.
\v 18 Fo da part dat no mo chains on top, he make two row pomegram dat go aroun da top pieces.
\v 19 Da top six feet a da top pieces a da poses fo da lanai, ova da chains an da pomegram, he make um look like watta lily flowa.
\v 20 Da two top piece unda da lily flowa, stay roun an stick out litto bit wit da nets an chains right dea, den get two row dat look like pomegram fruits wit hundred pomegram ery row all aroun da piece, an da two top piece same same.
\v 21 Huram wen put up da two poses on top da lanai wea da pries guys go inside da Temple. He give da name “He Make You Solid,” az “Yakin” in da Hebrew language, wen he put up da sout side pos. An wen he put up da nort side pos, he give da name “Wit Him, You Strong,” az “Bo`az” in da Hebrew language.
\v 22 Wen dey put da stuff dat look like da lily on da top da poses, da work fo da poses, pau.
\p
\v 23 Den Huram melt da bronze metal fo make da big roun watta tank. Was 15 feet from one side to da odda side, 7 feet 6 inch high, an aroun da outside, if you put one rope, goin be bout 45 feet long.
\v 24 Jus unda da top part, all da way aroun da tank, he make two row picha dat look like roun gourds, an da gourds, ery one a dem bout two inch wide. Dey pour da hot bronze metal fo make da tank, so da tank an da gourds all come out da same piece.
\v 25 Da tank stay on top 12 bronze bull cow statues. Three a dem look nort side, three look wes side, three look sout side, an three look eas side. Da tank stay sit on top dem, an dea okole all stay inside da middo.
\v 26 Da rim, 3 inch thick. Da rim jalike da rim on one cup, an look jalike one lily flowa. Da ting hold 11,500 gallon watta.
\p
\v 27 Huram wen make ten watta cart from bronze metal. Dey 6 feet long an 6 feet wide, an 4 feet 6 inch high.
\v 28 Dey make ery watta cart so get panels aroun da outside so no can look inside. All da panels go from one corna pos to da odda corna pos.
\v 29 Dey cut da panels dat stay in da middo a da poses, fo make picha a lions, an cows, an awesome angel watcha guys, an same ting fo da poses. Dey cut da panels so da top look jalike get one lei aroun um dat stick out litto bit. Da lei stay mo high den da lions an cows, an same ting fo da bottom side, stay unda da lions an cows.
\v 30 All da watta carts get four wheels an axles dey make from bronze metal. On top da four cornas, dey melt bronze metal fo make tings dat stick up from da two sides fo hold one big watta tank. Dey make lei kine picha all ova.
\v 31 Da top side, get one roun hole dat go down 27 inch. Aroun da hole, get one round rim stick up 18 inch ova da top a da cart, jalike one stand fo hold one big watta tank. Get pichas cut all aroun da outside too.
\p Da side panels dat go aroun da cart, dey square, not roun.
\v 32 Da axles fo da four wheels stick out from unda da panels. Dey melt da bronze fo make da cart an da frame an da axles, one piece. Ery wheel 27 inch high.
\v 33 Dey make da wheels jalike da wheel fo one war wagon. Dey melt bronze metal fo make da axle part, an da outside part, an da spokes, an da wheel hub.
\v 34 Same ting wit da four tings dat stick up from da cornas fo hold da watta tank, dey make one piece wit da watta cart frame.
\v 35 All aroun da top a da watta cart, get one roun rim nine inch high. Da poses an da panels, dey make dem one piece wit da frame too.
\v 36 Huram cut pichas all ova da poses an da rims. Da pichas look jalike awesome angel watcha guys, an lions, an palm trees, ery place dat stay big nuff fo put one picha. He cut odda pichas too dat look like get lei all ova.
\v 37 Dass how Huram wen make da ten watta cart. He melt da bronze metal, da same size an da same shape fo make all a dem.
\p
\v 38 Den Huram make ten watta tank from bronze metal fo go on top da ten watta cart. Ery tank 6 feet from one side to da odda side, an hold 230 gallon watta.
\v 39 He put five watta carts on da sout side a da Temple, an five on da nort side. Den he put da big watta tank in front da souteas corna a da temple.
\v 40 He make da small tanks an shovels an bowls too.
\p Dass how Huram finish all da work he do fo King Solomon, fo make da Temple Fo Yahweh. Dis wat he make:
\q
\v 41 Da two big poses,
\q Da two roun tings dat stay sit on top da poses,
\q Da tings dat look like nets dat stay all ova da roun tings,
\q
\v 42 Da 400 tings like pomegram fruits dat go on top da square net on top da roun part, two row pomegram fo da top a one pos an two row fo da top a da odda pos,
\q
\v 43 Da 10 carts fo da watta tanks,
\q Da 10 watta tanks dat go on top da carts,
\q
\v 44 Da one main watta tank,
\q Da twelve bull cows dat hold da watta tank,
\q
\v 45 Da pots an shovels an bowls.
\m Huram wen make all dis tings fo King Solomon, fo da Temple Fo Yahweh. He make um all wit bronze metal dat dey polish plenny.
\p
\v 46 Da king wen tell his guys fo melt da bronze metal an pour um ova dea nea da Jordan Riva, wit Sukkot on one side an Zartan on da odda side, cuz get da spesho kine dirt ova dea dat make good form fo pour metal inside.
\v 47 Get real plenny diffren kine piece. Solomon neva bodda fo weigh da stuff, so dey neva find out how much bronze metal dey use.
\p
\v 48 Solomon tell his guys fo make all da odda tings dat go inside da Temple Fo Yahweh too:
\q Da gold altar,
\q Da gold table fo da bread dey put in front Yahweh,
\q
\v 49 Da pure gold stand fo da lamps, dey put inside da room in front da room wea da Box Fo Rememba Da Deal Wit Yahweh stay, five fo da sout side an five fo da nort side,
\q Da gold flowas, an lamps, an tongs,
\q
\v 50 Da pure gold cups, an knifes fo cut da wicks, an bowls, an dishes fo da incense, an pans fo carry da fire,
\q Da gold plate pivot fo da doors dat go inside da mos inside room, da Place Dat Stay Real, Real Spesho Fo God,
\q Da gold plate pivot fo da big doors fo go inside da main Temple room.
\p
\v 51 An dass how eryting come out good fo da work dat King Solomon wen do fo build da Temple Fo Yahweh. Den Solomon go bring all da stuff dat his fadda King David wen make spesho fo God befo time -- silva, an gold, an tings fo use inside da Temple. An he put um all inside da store rooms inside da Temple Fo Yahweh.
\c 8
\s Da Prieses Bring Da Box Fo Rememba God's Deal Inside Da Temple
\m
\v 1 Den King Solomon tell da older leada guys fo da Israel peopo, an da main guys fo da twelve big ohanas, all da ohana leadas fo da Israel peopo, fo come togedda by him, Jerusalem town. All dese guys come by Solomon fo help bring da Box Fo Rememba Da Deal Wit Yahweh, from da part dey call King David Town, dass Zion, fo put um inside da Temple.
\v 2 Dat time, all da Israel peopo wen stay togedda by King Solomon, cuz dat was da spesho religious time wen erybody live one week inside shacks, da las week in Septemba.
\v 3 Wen all da leada guys fo da Israel peopo wen come David Town, da pries guys go pick up da Box.
\p
\v 4 Den da Levi ohana guys an da prieses bring up da Box Fo Rememba Da Deal Wit Yahweh, an da Tent Fo Come Togedda Wit God, an all da pots an tings spesho fo God fo use inside da Tent.
\v 5 King Solomon an all da odda Israel peopo dat wen come by him, dey all go wit him in front da Box. Da pries guys stay carry da Box, an da peopo make real plenny sacrifice. No even count how plenny sheeps an goats an cows dey wen kill in front da Box!
\p
\v 6 Den da pries guys bring da Box Fo Rememba Da Deal Wit Yahweh inside da place Solomon wen build fo um. Dey put um inside da mos inside room, way inside da Temple. Dey set um up inside da Place Dat Stay Real, Real Spesho Fo God, undaneat da wings a da awesome angel watcha guy statues.
\v 7 Da angel kine statues get wings dat go ova da place fo da Box, so jalike da awesome angel watcha guys make one cova ova da Box an da poles dey use fo carry um.
\v 8 Da pole, real long, an if you stand inside da main room fo da Temple, right in front da Place Dat Stay Spesho Fo God, you can see da ends a da pole from dea. But if you outside da Temple, you no can see da poles. An da poles stay dea still yet today.
\v 9 Inside da box, ony had da two flat stone dat Moses wen put inside dea wen da Israel peopo stay Mount Sinai afta dey come outa da Egypt land, wen Yahweh make da deal wit da Israel peopo.
\p
\v 10 Den, wen da pries guys come outa da Place Dat Stay Spesho Fo God, da cloud from God fill up da whole Temple Fo Yahweh.
\v 11 Da pries guys no can do dea pries kine work notting, cuz dey no can stand in front da cloud dat fill up da Temple Fo Yahweh, dat show how awesome Yahweh stay.
\s Solomon Aks God Fo Do Good Tings Fo Da Peopo
\p
\v 12 Den Solomon tell:
\q “Eh Yahweh! You wen tell us awready,
\q2 Dat you stay live inside real dark place.
\q
\v 13 But now, I wen build
\q2 Dis awesome Temple fo you,
\q2 You can live inside dea, foeva!”
\p
\v 14 Wen all da Israel peopo stay standing dea togedda in front him, King Solomon turn aroun to dem. Den he aks God fo do good kine tings fo all da Israel peopo.
\v 15 He tell da peopo: “You know Yahweh, da God fo us Israel peopo! We like tell, he do good tings fo us! God wen make one promise wit his own mout to my fadda David befo time. An now, God use his powa fo do da ting he wen promise fo do.
\v 16 God wen tell my fadda David dis: ‘From befo time, wen I bring my Israel peopo outa Egypt to dis land, I neva pick one town from da Israel ohana lands fo make my temple. But now, I wen pick dis place fo my temple, so erybody goin know wat kine god me an wea I stay. An I wen pick you, David, fo stay in charge a my peopo, da Israel peopo.’
\p
\v 17 “From befo time, my fadda David wen like build one temple fo Yahweh, so erybody know wat kine god him, da God fo da Israel peopo.
\v 18 Yahweh tell my fadda David, ‘Az real good, wat you wen do, wen you wen tink fo build one temple so erybody know who me!
\v 19 But, you know what? You not da one goin build da Temple. Yoa boy, yoa own blood an bone, goin build da temple fo show how I stay.’
\p
\v 20 “An now, Yahweh do wat he wen make promise fo do. Now az my kuleana fo be da king afta my fadda David. I stay sit on top da throne fo da Israel peopo, jalike Yahweh wen promise. An I wen build dis Temple, so erybody know wat kine god Yahweh, da God fo da Israel peopo.
\v 21 Inside dea, I wen make one spesho place fo put Da Box Fo Rememba Da Deal Wit Yahweh, da same deal Yahweh wen make wit oua ancesta guys, da time he bring um outa da Egypt land.”
\p
\v 22 Den Solomon stand right in front da altar wea dey make sacrifice fo Yahweh. All da Israel peopo dat wen come ova dea stand da odda side. Solomon put up his hands to da sky fo pray.
\v 23 He tell God dis:
\q “Eh Yahweh! You da God fo us Israel peopo!
\q2 No mo odda God dat stay like you.
\q Not inside da sky up dea,
\q2 Not on top da eart down hea.
\q You do jalike you wen make deal wit oua peopo fo do.
\q2 You stay tight wit us guys dat stay work fo you,
\q2 An dat stay live in front you wit good heart.
\q
\v 24 You do jalike you make promise fo do,
\q2 Fo yoa worka guy, my fadda David.
\q You wen tell David dat wit yoa own mout,
\q2 An cuz you strong, you do um all awready.
\q2 Dass how stay today.
\q
\v 25 An cuz you Yahweh, da God fo da Israel peopo,
\q2 An cuz you wen make dat kine promise,
\q I like you fo do bumbye
\q2 Jalike you wen make promise fo do to my fadda David.
\q2 You wen tell David,
\q ‘I like yoa kids take care how dey live in front me
\q2 Da same way you, David, wen live in front me.
\q If dey do all dat, den no goin pau
\q2 Da kings dat going come from yoa blood,
\q Dat goin get da right fo sit in front me
\q2 On top da throne fo da Israel peopo.’
\q
\v 26 So, you da God fo da Israel peopo,
\q2 An I like fo da ting you wen say you goin do
\q2 Come fo real.
\q Dass wat you make promise fo do
\q2 To my fadda David,
\q2 Dat wen work plenny fo you.
\b
\q
\v 27 “But you know wat, God?
\q2 How you goin make house
\q2 Hea on top da eart, aah?! No can!
\q You, mo big den da mos high part a da sky!
\q2 Fo shua, no way you can live down hea
\q2 Inside dis temple dat I wen build!
\q
\v 28 I yoa worka guy.
\q2 Yahweh, lissen to dis prayer I stay make to you.
\q Yahweh, you da God fo me.
\q2 I call to you fo help me.
\q2 Lissen how I stay pray in front you today!
\q
\v 29 I like fo you stay watch dis Temple
\q2 Day time an nite time.
\q Dis da place, you wen tell,
\q2 ‘Dass wea peopo goin know
\q2 Wat kine God me.’
\q So I like fo you hear wen I pray to you,
\q2 Looking at dis Temple.
\q
\v 30 I yoa worka guy,
\q2 An I beg you fo lissen,
\q Me an all yoa Israel peopo stay pray togedda
\q2 An facing dis Temple.
\q From da sky,
\q2 Lissen to us,
\q2 An hemo oua shame fo da bad tings us guys wen do!
\b
\q
\v 31 “Bumbye, jalike wen somebody do
\q2 Someting bad to some odda guy.
\q An da judge goin tell,
\q2 Dat da firs guy gotta come
\q2 In front yoa altar, hea inside dis Temple,
\q An swear to you, God, fo make proof
\q2 Dat he neva do notting wrong.
\q
\v 32 Den I like you lissen from da sky
\q2 An judge wat da guy dat swear to you, God, tell,
\q2 An wat da odda guy tell.
\q Fo da one dat wen do someting bad,
\q2 Make da bad ting he wen do
\q2 Come back an hurt him.
\q An fo da one dat do da right ting,
\q2 Show um dat he get um right wit you,
\q2 Cuz he do wass right.
\b
\q
\v 33 “An bumbye, yoa Israel peopo
\q2 Goin go do bad kine stuff
\q2 An go agains you.
\q Cuz a dat, da peopo dat stay agains dem
\q2 Goin fight um an win.
\q But wen yoa peopo turn aroun
\q2 Come back to you,
\q2 An tell dat dey yoa peopo fo real kine,
\q An dey come dis Temple fo pray to you
\q2 An beg you fo help dem,
\q
\v 34 Den I like you lissen from da sky,
\q2 An let go yoa Israel peopo
\q Fo da bad tings dey wen do,
\q2 An hemo dea shame!
\q Bring um back one mo time
\q2 To da lan you wen give to dea ancesta guys.
\b
\q
\v 35 “Bumbye, wen yoa peopo do bad kine stuff
\q2 An go agains you,
\q You goin shut da sky
\q2 An no let rain come down.
\q But wen dey tink bout dis place
\q2 An look dis way an pray,
\q2 An tell dat dey yoa peopo fo real kine,
\q Den dey goin turn aroun
\q2 An pau do bad kine stuff
\q2 Cuz you punish um awready.
\q
\v 36 Den I like you lissen from da sky,
\q2 An let go yoa Israel peopo
\q Fo da bad tings dey wen do,
\q2 An hemo dea shame!
\q Teach dem da right way fo live,
\q2 An let da rain come down on top da land,
\q2 Dat you wen give yoa peopo fo be dea land.
\b
\q
\v 37 “Bumbye, no goin get food inside da land,
\q2 O get real bad kine sick,
\q O da plants come sick,
\q2 O da mold make da food pilau,
\q O da grasshoppa an da caterpilla
\q2 Eat up all da food
\q2 Befo da peopo can cut um,
\q O da peopo dat stay agains yoa peopo
\q2 Send dea army guys agains yoa towns,
\q2 O get odda kine sick.
\q
\v 38 But anybody dat pray to you,
\q2 O beg you fo help dem
\q2 From all da Israel peopo in da land,
\q An all da ones dat stay pray
\q2 Know dey stay sore inside,
\q An dey put up dea hands
\q2 An look dis way wea dis Temple stay,
\q
\v 39 Den I like you lissen from da sky wea you stay,
\q2 An let um go fo da bad tings dey wen do,
\q An hemo dea shame,
\q2 An help um!
\q Ony you know how ery one a dem stay inside,
\q2 So help ery one a dem, da way dey need help!
\q
\v 40 So do wateva you gotta do,
\q2 Fo make dem feel jalike dey scared
\q2 Weneva dey come in front you.
\q Do dis fo dem,
\q2 An fo all da ones dat goin come from dem.
\q Do um fo all da time dey goin stay inside dis land
\q2 Dat you wen give to oua ancesta guys!
\b
\q
\v 41 “An bumbye, goin get peopo from odda places,
\q2 Dat not Israel kine peopo.
\q Dey goin come from odda lands far from hea,
\q2 Cuz dey like know wat kine god you.
\q
\v 42 Cuz dey goin hear bout da big name you get,
\q2 An how strong you stay,
\q2 An da awesome kine tings you do.
\q So, wen peopo from odda place
\q2 Come fo look dis Temple an pray dea,
\q
\v 43 Den lissen from inside da sky wea you stay,
\q2 An go do someting fo da guys from odda place
\q2 Dat aks you fo help um.
\q Wen you do dat,
\q2 All da diffren peopos all ova da world
\q2 Goin know wat kine god you.
\q Den dey goin feel jalike dey scared
\q2 Wen dey come in front you,
\q2 Same ting jalike yoa own Israel peopo feel.
\q An dey goin know
\q2 Dat dis Temple I wen build,
\q2 Get yoa name.
\b
\q
\v 44 “Bumbye, yoa peopo goin go odda place
\q2 Cuz dey gotta go fight wit da peopo dat stay agains dem.
\q You goin send um wea dey gotta go fo fight,
\q2 An dey goin do um jalike you tell.
\q Den dey goin face dis town Jerusalem you wen pick
\q2 An da Temple I wen build
\q2 Fo show wat kine god you.
\q2 From dea, dey goin pray to you, Yahweh,
\q
\v 45 Den I like you lissen from da sky
\q2 Wen dey pray an beg you fo help dem,
\q An I like you make shua dey doing da right ting,
\q2 An help dem fo do um.
\b
\q
\v 46 “Bumbye, dis peopo
\q2 Goin go do bad kine stuff
\q2 An go agains you.
\q Cuz no mo nobody
\q2 Dat no do bad kine stuff!
\q Den you goin come huhu wit dem,
\q2 An let da peopo dat stay agains dem
\q Take da peopo
\q2 An make dem prisonas
\q An take um away to dea land,
\q2 O maybe nea yoa land, o maybe far way.
\q
\v 47 But den, yoa peopo goin turn aroun
\q2 An start fo tink strait,
\q Ova dea inside da land
\q2 Wea dey stay prisonas.
\q Dey goin change dea mind
\q2 An beg you fo give um chance,
\q Ova dea inside da land
\q2 Fo da peopo dat make um prisonas.
\q2 Dey goin tell you,
\q ‘Us guys wen do bad kine tings
\q2 An do wrong.
\q2 We get da blame fo da bad tings we do!’
\q
\v 48 Ova dea inside dat land
\q2 Wea da peopo dat make dem prisonas
\q2 Stay agains my peopo,
\q If my peopo change how dey tink an how dey feel inside,
\q2 An dey pray to you from ova dea,
\q Facing dis land
\q2 Dat you wen give to dea ancesta guys,
\q An dis big town you wen pick,
\q2 An dis Temple dat I wen build
\q2 Fo show wat kine god you,
\q
\v 49 Den lissen to dem
\q2 From inside da sky, wea you live.
\q Lissen how dey pray to you,
\q2 An da tings dey beg you fo do,
\q2 An do da right ting fo dem.
\q
\v 50 Let go all yoa peopo
\q2 Dat wen do bad kine stuff agains you,
\q2 An dat wen go agains you.
\q Da peopo dat wen make yoa peopo prisonas,
\q2 Make dem show pity,
\q2 An give yoa peopo chance.
\q
\v 51 Cuz dis peopo,
\q2 Dey da ones you wen take
\q2 Fo be yoa own peopo all da time.
\q You wen take um outa Egypt,
\q2 Da time dey feel
\q Jalike dey stay inside one hot place,
\q2 Nuff hot fo melt da iron ova dea.
\b
\v 52 “So den, no foget us guys!
\q2 Me, I jalike yoa slave guy,
\q An dis Israel peopo, dey yoa peopo too,
\q2 An me an all yoa peopo stay beg you
\q Fo lissen,
\q2 Erytime dey call you fo help dem.
\v 53 Cuz you da one wen pick dem
\q2 Fo make um be yoa own peopo,
\q Diffren den all da odda peopos
\q2 All ova da world.
\q Dass wat you wen tell yoa worka guy Moses fo tell dem,
\q2 Da time you wen get oua ancesta guys outa Egypt
\q An bring um ova hea.
\q2 You Yahweh, da Boss!”
\s Solomon Give Da Temple To God
\p
\v 54 Dass how Solomon pray to Yahweh, on his knees, an putting up his hands to da sky an aks um fo help, an looking at da altar fo make sacrifice to Yahweh.
\v 55 Afta he pau pray, he stand up an bless all da Israel peopo dat come togedda dea. He talk real loud, lidis:
\q
\v 56 “Az good us guys tell,
\q2 Yahweh do good tings fo us.
\q All us Israel guys, we his peopo,
\q2 An us can res now,
\q2 Jalike he wen make promise befo time.
\q Yahweh wen make dat good promise
\q2 To his worka guy Moses,
\q2 An Moses wen tell us we can res too.
\q An eryting Yahweh say he goin do,
\q2 He do um.
\q2 Not even one word come poho.
\q
\v 57 We like oua God Yahweh
\q2 Stay wit us guys,
\q Jalike he wen stay befo time
\q2 Wit oua ancesta guys.
\q We no like he no do notting fo us
\q2 O leave us.
\q
\v 58 Mo betta God change how we tink,
\q2 So us can go all out fo do how he like,
\q An live da way he tell us erytime,
\q2 An do da tings he say we gotta do,
\q An keep his rules,
\q2 An do wat he tell cuz he da judge,
\q2 Jalike he wen tell oua ancesta guys fo do.
\q
\v 59 I wen beg Yahweh
\q2 Fo give us guys chance.
\q Now, I like fo oua God Yahweh,
\q2 Rememba da tings I wen pray,
\q2 Day time an nite time.
\q Erytime get problem,
\q2 I like Yahweh do wass right
\q2 Fo me his worka guy,
\q An fo all his peopo, da Israel peopo,
\q2 Wateva dey need, ery day.
\q
\v 60 Cuz a dat, all da diffren peopos all ova da world
\q2 Goin know dat Yahweh, he da God dass fo real,
\q2 An no mo no odda God jalike him.
\q
\v 61 An you guys, I like you go all out
\q2 Fo do eryting fo oua God Yahweh.
\q Live da way he tell you fo live,
\q2 Do eryting he tell you, you gotta do,
\q2 Jalike you stay doing today.”
\s Solomon Make Da Temple Spesho Fo God
\p
\v 62 Den da King an all da Israel peopo togedda, wen make plenny sacrifice in front Yahweh.
\v 63 Fo show dat eryting stay okay wit him an Yahweh, Solomon an da pries guys wen kill 22,000 cows an 120,000 sheeps an goats, fo make da sacrifice.
\p An dass how da King an all da Israel peopo wen start fo use da Temple Fo Yahweh.
\v 64 Dat same day, da King wen make da middo part a da yard in front da Temple Fo Yahweh, spesho fo God. Az wea he make da burn up kine sacrifices, an da wheat flour kine sacrifices, an he burn da fat pieces from da sacrifices fo show dat eryting stay okay wit him an Yahweh. He do all dat outside in da yard, cuz da big bronze metal altar dat sit in front da Temple Fo Yahweh, too small fo do dat. Da altar no can hold all da burn up kine sacrifice, an da wheat flour kine sacrifice, an da fat pieces from da sacrifices dat he make fo show dat eryting stay okay wit him an Yahweh.
\p
\v 65 Dass how, dat time, Solomon wen make da spesho religious time. All da Israel peopo wen come dea togedda fo be wit Solomon, from Lebo-Hamat nort side to da Egypt Border Stream. Dey stay togedda in front oua God Yahweh, seven days, den anodda seven mo days, az fourteen days in all.
\v 66 Da day afta dey pau, Solomon tell da peopo go home. Dey tell da king “We like God do good tings fo you!” Den dey go home dea own place. Dey stay feel real good inside, an dey dance an sing, cuz a all da good tings dat Yahweh wen do fo his worka guy King David, an fo his peopo, da Israel peopo.
\c 9
\s God Let Solomon See Him One Mo Time
\m
\v 1 An dass how was, wen Solomon pau build da Temple Fo Yahweh, an da palace, an wen make happen all da odda stuff he like do.
\p
\v 2 Den Yahweh let Solomon see him one mo time, jalike wen he let Solomon see him da firs time, Gibeon side.
\v 3 Yahweh tell Solomon,
\p “I wen hear wat you pray. I wen lissen wen you come in front me an beg me fo help you. Da Temple you wen build, I make um spesho fo me awready. I give da place my name foeva, cuz az da place wea can find out wat kine god me. An I goin watch dat place real good, an tink plenny bout um, all da time.
\p
\v 4 “Now, you gotta live in front me jalike yoa fadda David wen do, cuz he wen go all out fo me, an he do eryting da right way. Same ting fo you, you gotta do eryting I tell you you gotta do, an take care yoa govmen da way I like.
\v 5 If you do all dat, den I goin make you an da guys dat goin come from you, come da kings fo da Israel peopo foeva. I wen make dis promise to yoa fadda David: ‘You goin be da ancesta fo da kings fo Israel, foeva.’
\p
\v 6 You an da guys dat goin come king afta you, you betta not go da wrong way, an you betta stay tight wit me. An you gotta do eryting jalike I tell you, cuz I get da right fo tell you how you gotta do um. You betta not go let da gods from da odda peopos come yoa bosses, an go down in front dem fo show dem love an respeck.
\v 7 If you guys mess up, den I goin throw out da Israel peopo from da land I wen give um. Dat Temple dat I wen make spesho fo me, da place fo show wat kine god me, I no goin care bout dat place no moa. An wen all da odda peopos tink bout da Israel peopo, dey goin talk stink bout dem, an tell, ‘Watch out! You goin come jalike da Israel peopo!’
\v 8 Dis Temple goin come one big mess jalike one rubbish pile. Erybody dat pass by dea no goin believe wat dey see. Dey goin tell, ‘How come Yahweh wen do dis to da land an da Temple?!’
\v 9 An odda peopo goin tell um, ‘Az cuz da Israel peopo no like lissen to Yahweh, dea God dat wen take dea ancesta guys outa Egypt. Dey wen go wit odda kine gods, go down in front dem and make da odda gods dea bosses. Az why Yahweh wen make all dis bad kine stuff happen to dem.’-”
\p
\v 10 Solomon wen work twenny year fo build da two big house, da Temple Fo Yahweh an da palace.
\v 11 All dat time, King Hiram from Tyre wen get togedda all da cedar an pine wood an gold dat Solomon like. So King Solomon give Hiram twenny towns Galilee side.
\p
\v 12 But wen Hiram come from Tyre fo see da towns Solomon wen give him, Hiram neva like um.
\v 13 Hiram tell, “Eh, brah! Wat kine town you give me?! Dey junk!” He call da towns da Kabul Land, dat mean “Junk Town.” An today, dey still get dat name.
\v 14 Befo dat, Hiram wen send four an a half ton gold to King Solomon too.
\s Da Slave Kine Workas
\p
\v 15 Dis part, tell bout how King Solomon wen use plenny slave kine worka guys fo build da Temple Fo Yahweh an fo build his own palace, an fo fix up da place da army guys need so nobody attack Jerusalem. He build da Jerusalem town wall too, an da towns Hazor, Megiddo, an Gezer.
\v 16 (Befo time, da Pharaoh guy, king fo da Egypt peopo, wen go Gezer and take ova da town. He burn da whole town an kill da Canaan peopo dat live dea. Den he give da town to Solomon fo wedding present wen Solomon marry Pharaoh daughta.
\v 17 Dass why Solomon wen build Gezer one mo time.) An Solomon build Beth-Horon, da makai side one,
\v 18 an Ba`alat an Tadmor inside da boonies inside da Israel land.
\v 19 Solomon build all his storage towns too, an da towns fo da army guys wit war wagons, an da towns fo da army guys dat ride horse. Eryting Solomon like build -- Jerusalem side, Lebanon side, all ova da lands wea he da king, he build um.
\p
\v 20 All da diffren peopos dat not Israel peopo, dat still stay inside da land -- da Amor peopo, an da Het peopo, an da Perez peopo, an da Hiv peopo, an da Jebus peopo,
\v 21 dis all da ones da Israel peopo suppose to wipe out wen da Israel peopo come dat land, but dey neva -- Solomon make all dese peopo go do slave kine work. Dey still stay doing da same ting even now.
\v 22 But Solomon neva make da Israel guys come slaves. Dey was da army guys, an da govmen guys, an da ali`i guys, an da army guys dat help Solomon do his work, an da officer guys fo da war wagons an da horse rida guys.
\v 23 An had 550 Israel luna guys dat Solomon wen put in charge a da worka guys from da odda peopos dat stay do da work.
\p
\v 24 Afta Solomon pau build da house fo Pharaoh daughta, she move ova dea from da part a Jerusalem dat King David wen build befo time. Solomon wait till afta she stay inside da house, den he make his slave guys fix da place da army guys need so nobody can attack Jerusalem.
\p
\v 25 From da time Solomon pau build da Temple, he make sacrifice three times ery year on top da altar dat he wen build fo Yahweh. He make da kine sacrifice you burn da whole animal, an da kine sacrifice dat show eryting stay okay wit you an God, an he burn um up dea in front Yahweh.
\s Solomon Make Business
\p
\v 26 King Solomon guys wen build plenny big kine boat, Ezion-Geber side. Dass nea Elot, nex to da Red Sea, inside da Edom land.
\v 27 King Hiram wen send some a his worka guys fo go wit da guys dat work fo Solomon inside da boats, cuz Hiram guys know da ocean betta.
\v 28 Dey wen sail Ofir side, an from dea dey bring back sixteen ton gold fo King Solomon.
\c 10
\s Da Queen From Sheba
\m
\v 1 Da Queen fo da Sheba peopo wen hear wat peopo tell bout King Solomon an how he tell wat kine god Yahweh. So she come Jerusalem side, fo see Solomon an aks him all kine real hard kine stuff.
\v 2 She come Jerusalem town wit real plenny peopo, an camels fo carry spice an plenny gold, an jewelry stones dat cost plenny. She come by Solomon an talk to him bout all da tings she stay tinking bout.
\v 3 Solomon tell her all da tings she aks him bout. Neva have notting hard fo da king tell her, fo make her undastan.
\v 4 Da Queen fo da Sheba peopo see dat Solomon erytime know wat fo do. She see da palace he wen build,
\v 5 an da kine food on top his table, an da way his govmen guys sit aroun him, an da worka guys dat stand nea him wearing fancy kine robes, an da guys dat bring him wine. She see da burn up kine sacrifice he make inside da Temple Fo Yahweh. Wen blow her mind wen she see all dis.
\p
\v 6 She tell da King, “Wat I wen hear inside my own land bout you an wat you do, fo shua, az fo real! You know wat fo do erytime!
\v 7 But till I come hea an see um wit my own eyes, I neva believe all da tings I wen hear. An I neva hear even half da stuff I see now. Da way you know wat fo do erytime, an all da stuffs you get, mo plenny den I wen hear!
\v 8 Fo shua, yoa guys stay good inside! Yoa helpa guys dat stand in front you all da time an hear wat you know how fo do erytime -- dey all can stay good inside!
\v 9 I like tell yoa God Yahweh, “Mahalo!” cuz he da One stay do good fo you. Fo shua, he feel good inside wen he tink bout you! Az why he wen make you da king fo da Israel peopo. An cuz Yahweh stay get love an aloha fo da Israel peopo all da time, he make you dea king, so you judge dem da right way an do da right tings fo dem.”
\p
\v 10 Da Queen fo da Sheba peopo wen give King Solomon 9,000 pound gold, an plenny spice, an jewelry stones dat cost real plenny. She give King Solomon mo plenny spice den eva come dea befo dat time, an afta dat time.
\p
\v 11 (Solomon get stuffs from odda place too. Da big boats from King Hiram wen bring gold from Ofir, an big stack red sandalwood, an jewelry stones dat cost plenny.
\v 12 King Solomon use da sandalwood fo make railing fo da stairs inside da Temple Fo Yahweh an da palace. He use um fo make small harps an twelve string harps fo da music guys too. Dey neva bring so plenny sandalwood, an nobody see dat plenny befo dat time an afta dat time.)
\p
\v 13 King Solomon give da Queen fo da Sheba peopo eryting she like an eryting she stay aks him fo give her. He give her mo plenny stuffs of his too, jus cuz he like give. Den she go back to her own land. Her helpa guys go back too.
\s King Solomon Get Plenny Stuffs
\p
\v 14 Ery year, Solomon get 25 ton gold from da big boats.
\v 15 He get tax money too, from da guys dat buy stuff an sell um. All da kings from Arabia side, an all da govna guys in charge a Solomon's land, dey pay him too.
\p
\v 16 King Solomon tell his guys fo make 200 big shield from gold you poun wit da hammer. Dey use seven an a half pound gold fo da shield.
\v 17 He tell um fo make 300 small kine shield outa da gold you poun wit da hammer, wit three poun twelve ounce fo ery shield. He put all da gold shields inside Da Lebanon Fores House.
\p
\v 18 Den da King make his guys build one big throne, an put ivory inside da wood fo make picha, an gold all ova da outside.
\v 19 Da throne get six steps. Da top a da head res part, round. Da two sides wea da King sit get arm res, an one lion statue stand one side an anodda one da odda side.
\v 20 On top ery step, get one lion statue standing one side, an anodda lion statue da odda side, total twelve lions on top da six step. Da odda countries neva make notting like dat fo dea king guys.
\v 21 All da tings King Solomon use fo drink, all gold. All da tings dey use fo eat an drink inside da Lebanon Fores House, all pure gold. Dey no use silva, cuz King Solomon time, dey figga da silva kine stuff, not spesho.
\p
\v 22 King Solomon get plenny big boats, da real big kine fo go all da way to Spain. He send um wit da boats from Hiram. Ery three year, da big boats come back, wit gold, silver, an ivory, an all kine monkey.
\p
\v 23 King Solomon was da numba one king in da world. He was rich, an had mo plenny stuffs den all da odda king guys, an he know wat fo do mo betta den all da odda kings.
\v 24 Peopo from all ova da world come aks Solomon if dey can jus come by him an lissen, fo hear wat God tell him cuz he know wat fo do erytime.
\v 25 Ery year fo long time, da peopo dat come by Solomon, all bring present fo him. Dey bring silva an gold kine tings, an robes, an stuff fo da army guys use, an all kine spice, an horses an mules.
\v 26 Solomon wen get mo an mo war wagons an horses. In da end, he get 1,400 war wagon an 12,000 horse. He send some a dem to da towns he wen build fo da army guys dat use da war wagon fo fight, an he keep some a dem by him Jerusalem town.
\v 27 Da King make um so dat da silva come so plenny Jerusalem side, jalike was stone. Had so plenny cedar wood too, jalike was da regula sycamore wood dey get from da makai plain.
\v 28 Solomon wen get his horses from Egypt an from Cilicia. He get govmen guys fo go Cilicia an bring back horses fo da regula price.
\v 29 Fo buy one war wagon from Egypt side, cost like 15 pound silva metal, an 3 pound 12 ounce silva fo one horse. Dass da same price dat all da king guys fo da Het peopo an da Aram king guys pay too.
\c 11
\s King Solomon Wifes
\m
\v 1 But King Solomon wen love plenny wahines from odda places an like marry dem. He love Pharaoh daughta -- an wahines from da Moab peopo, da Ammon peopo, da Edom peopo, da Sidon peopo, an da Het peopo too.
\v 2 Dey come from diffren peopos, da ones Yahweh tell da Israel peopo befo time, “No marry dem. No let dem marry you. Cuz if you do dat, bumbye fo shua, dey goin make you hamajang an you goin start fo follow dea gods, an stop fo follow me, yoa God!” But Solomon, he no can stop love da wahines.
\v 3 He get 700 wifes come from king kine ohanas, an 300 odda kine wifes. An da wifes start fo make Solomon head come hamajang an he wen follow dea gods.
\v 4 Den wen Solomon come ol, his wifes wen make Solomon heart go follow dea odda kine gods. Deep inside his heart, he no stay okay cuz he no stay tight wit Yahweh no moa, da God he pray to. He no stay like his fadda guy David.
\v 5 So Solomon go pray to Ashtoret, da wahine idol kine god dat da Sidon peopo stay pray to. He go pray to Molek too, da pilau kine idol god dat da Ammon peopo stay pray to.
\v 6 So Yahweh see Solomon stay do bad kine stuff. He no stay tight wit Yahweh, da way his fadda David was.
\p
\v 7 He wen build one place on top da Olive Ridge across Jerusalem fo pray to Kemosh da pilau idol kine god dat da Moab peopo stay pray to, an one odda place fo Molek da pilau kine idol god dat da Ammon peopo stay pray to.
\v 8 He wen do da same ting fo all da odda wifes he get from odda places, fo dem burn incense an make sacrifice fo dea own gods.
\p
\v 9 Yahweh come huhu with Solomon, cuz he let his wifes turn him away from Yahweh. He no stay tight wit da God fo da Israel peopo, no matta God wen let Solomon see him two time.
\v 10 No matta Yahweh tell Solomon no pray to odda gods dat not fo him, Solomon neva do wat Yahweh wen tell um fo do.
\p
\v 11 So Yahweh tell Solomon: “Cuz a all dis stuff you stay do, an you no keep yoa side a da deal, an you no do da tings I wen tell you dat you gotta do, dis wat I goin do. Fo shua, I goin take away da right fo you be da king. I goin give one a da guys dat work fo you, da right fo come da king.
\v 12 But cuz a yoa fadda David, I no goin take um away from you da right fo be king, befo you mahke. But fo yoa boy, I goin take away da right fo him be da king.
\v 13 Still yet, I no goin take away all da rights fo yoa boy be king. I goin give him jus yoa ohana an one nodda ohana fo be dea king too, cuz David wen work fo me, an I awready pick Jerusalem town fo be mines.”
\s Da Peopo Dat Stay Agains Solomon
\p
\v 14 Den Yahweh set up one guy fo throw off Solomon. Dis guy was Hadad, from da king ohana Edom side.
\v 15 Now dis da story, how was fo Hadad. Befo time wen David stay fight da Edom peopo, his main army guy Joab wen go Edom side fo bury da Israel army guys dat da Edom guys wen kill. But wen Joab stay dea, he kill ery man dat live Edom side.
\v 16 Joab an all da odda Israel army guys stay inside Edom fo six months, till all da Edom guys wen mahke.
\v 17 Hadad ony was one young guy dat time, but him an some a da Edom guys dat work fo his fadda befo time, dey run away, fo go Egypt side.
\v 18 Dey start from Midian side, den dey go wes Paran side. Dey take some guys wit dem from Paran an go Egypt side by Pharaoh, da king fo da Egypt peopo. Da Pharaoh guy give Hadad one house, an tell his guys fo feed dem, an even give um some land.
\p
\v 19 Da Pharaoh guy wen really like Hadad. He give Hadad his sista in law, Queen Tahpenes sista, fo marry.
\v 20 Tahpenes sista wen born one boy Genubat fo Hadad. His auntie Tahpenes raise him right dea inside Pharaoh palace, wit Pharaoh's own kids.
\p
\v 21 Hadad stay Egypt side long time. Den he hear dat David wen mahke an stay sleep wit his ancesta guys, an he hear dat Joab da main Israel army guy mahke too. Hadad tell da Pharaoh guy, “Let me go, so I can go back my own country.”
\p
\v 22 Da Pharaoh guy aks Hadad, “How come you like go back yoa own country? Wat ova dea get, dat mo betta den get ova hea by me?”
\p Hadad tell um, “Notting. Eryting okay ova hea. But, I like you let me go!” Dass how Hadad wen come back Edom side.
\p
\v 23 An God wen get one nodda guy Rezon, Eliada boy, fo go make pilikia fo Solomon too. Befo time, Rezon work fo Hadadezer, da king fo Zobah, but den he run away from Hadadezer.
\v 24 Wen David wipe out da Zobah army guys, Rezon go get togedda plenny guys fo go by him, an he come da leada man fo one gang dat rip off peopo. Den Rezon an his gang guys go Damascus town an live dea, an take ova Damascus.
\v 25 All da time Solomon stay alive, Rezon make trouble fo Solomon, jalike Hadad. Rezon stay king fo da Aram peopo, but he really hate da Israel peopo.
\s Jeroboam No Stick Wit Solomon
\p
\v 26 Jeroboam, Nebat boy, he make plenny trouble fo King Solomon too. Befo time, Jeroboam work fo Solomon. He from da Efraim ohana an live Zeredah side. His mudda, one widow wahine, Zeruah.
\p
\v 27 Dis, da story how Jereboam wen go agains King Solomon. Solomon wen fix up da place da army guys need so nobody can come attack Jerusalem. He fix one place wea da wall no go across one gulch, inside da big town his fadda David wen build.
\v 28 Jeroboam was one awesome strong young guy. Solomon see how he do real good work. So he make him da head luna fo all da guys from da Efraim an Manasseh ohanas dat gotta come work hard fo Solomon.
\p
\v 29 Dat time, Jeroboam go outside Jerusalem to da country side. Ahijah, da talka from God dat live Shiloh side, meet Jeroboam on top da road, jus dem two guys out da country side. Ahijah stay wear one new robe.
\v 30 Den Ahijah hold da new robe he stay wear, an broke um up fo make twelve piece.
\v 31 Ahijah tell Jeroboam, “Take ten a da pieces fo yoaself. Cuz dis wat Yahweh, da God fo da Israel peopo, tell. He tell, ‘Lissen up! I goin take away da right from Solomon fo be da king! An I goin give you ten a da Israel ohanas.’ Dis why I stay broke dis robe fo make small pieces.
\v 32 ‘Cuz I get respeck fo my worka guy David, an fo Jerusalem town, da place I wen pick from all da Israel ohana land, get one ohana goin stay wit da David ohana.
\v 33 Az cuz da Israel peopo wen go leave me. Dey go pray to Ashtoret da wahine god fo da Sidon peopo, an Kemosh da god fo da Moab peopo, an Molek da god fo da Ammon peopo. Dey no do da way I tell um fo go. Dey no do da tings dat I say stay right. Dey no do wat I tell um dey gotta do. Dey no lissen me, da real Judge. Dey no make like David, Solomon's fadda, cuz David do all dat da right way.
\p
\v 34 ‘But I no goin take away all da right Solomon get fo be king. I wen make him one king awready, fo all da time he stay alive. I let um stay king, cuz a his fadda David. I wen pick David, da guy dat do eryting I tell um he gotta do. An he wen stick wit my rules.
‘
\v 35 But from Solomon's boy, I goin take away da right fo him be king. I going give you da right fo come king fo ten a da ohanas.
\v 36olive 
I jus goin leave da Judah ohana an one nodda ohana fo Solomon's boy. Cuz I like fo my worka guy David erytime get one guy dat come from him, Jerusalem side, fo show my peopo wea fo go, jalike one oil lamp dat goin burn in front me all da time. Az cuz I wen pick Jerusalem town fo be da place wea erybody can find out wat kine god me.
\v 37 An fo you, I goin take you an make you da king fo be in charge eryting you eva like get. You goin be da king ova da Israel peopo.
\v 38 An if you lissen an do eryting I tell you you gotta do, an if you do um my way, an do wat I say stay right, an if you stay do da tings I tell you fo do, an follow my rules, jalike my worka guy David wen do, den I goin stick tight wit you. I goin make da ohana dat goin come from you stay solid, jalike I build one strong house fo you. Goin be solid jalike da David ohana stay solid. An I goin give you da Israel land.
\v 39 I goin make da ohana dat come from David come shame cuz a wat Solomon stay do, but dey no goin stay shame all da time.’-”
\p
\v 40 Solomon wen try fo kill Jeroboam. But Jeroboam go run away Egypt side by Shishak da king fo da Egypt peopo. He live dea till Solomon mahke.
\p
\v 41 Get plenny odda tings Solomon wen do -- da tings he make, da way he show peopo how he know wat fo do erytime. All dat, stay inside da govmen books about Solomon time.
\v 42 Solomon was da king Jerusalem side fo all da Israel peopo, fo 40 year.
\v 43 Den Solomon wen mahke an sleep by his ancesta guys. Dey bury him inside da big town his fadda David wen build. An Rehoboam come da nex king.
\c 12
\s Da Nort Side Ohanas Dump Rehoboam
\m
\v 1 Rehoboam go Shekem town, cuz az da place all da Israel peopo come togedda fo make um come king.
\v 2 Dat same time Jeroboam, Nebat boy, still stay Egypt side. He wen go dea cuz he was scared King Solomon goin kill um. But wen Jeroboam hear dat Rehoboam come king, he leave Egypt fo go home.
\v 3 Da Israel peopo send somebody fo tell Jeroboam fo go Shekem side, so he go ova dea. Den Jeroboam an all da odda Israel peopo dat wen come togedda, dey go talk to Rehoboam. Dey tell um,
\v 4 “Yoa fadda, he wen make us guys jalike cows an he put yoke on top us fo make us work real hard. But now, if you make da work we gotta do fo you mo easy, den we goin work fo you.”
\p
\v 5 Rehoboam tell um, “Give me three days. Den come back by me.” So da peopo go way.
\p
\v 6 Den King Rehoboam go meet wit da older leada guys dat work wit his fadda Solomon befo he mahke. He aks um, “Kay den. Wat you guys tink? Wat I goin tell dis peopo?”
\p
\v 7 Dey tell um, “If you can be one worka guy dat help dis peopo today, an work fo dem, an be up an up wit dem, dey goin stay work fo you all da time.”
\p
\v 8 But Rehoboam no lissen wat da older leada guys tell um fo do. He go talk to da young guys dat grow up wit him an dat stay by him.
\v 9 Rehoboam aks um, “Wat you guys tink I gotta do? How us guys goin answa dis peopo? Cuz dey stay tell me, ‘Try make da work we gotta do fo you mo easy! No give us da same heavy yoke yoa fadda put on us!’-”
\p
\v 10-11 Da young guys dat grow up wit Rehoboam tell um, “Dose peopo dat say to you, ‘Yoa fadda, he wen make us jalike cows an put heavy yoke on top us fo make us work. But we like you fo make da work we gotta do fo you mo easy!’ -- go tell dem, ‘Yeah, my fadda wen make you guys jalike cows an put heavy yoke on top you fo make you work. But you know wat?! I goin make da yoke mo heavy den dat! Jalike you goin tink my small finga, mo big den my fadda's waist! My fadda wen lick you guys wit regula kine whip, but I goin lick you guys wit scorpions!’ Dass wat we gotta tell um.”
\p
\v 12 Day numba three, Jeroboam an all da odda peopo come back by King Rehoboam, jalike he wen tell um fo do.
\v 13 Da king talk real hard to da peopo. He no lissen to wat da older leadas tell um az good fo do.
\v 14 He talk to dem da way da young guys wen tell um fo talk. He tell, “My fadda wen put jalike one heavy yoke, da kine dey use fo da cow, on top you guys fo make you work. Me, I goin make da yoke mo heavy den dat! My fadda wen lick you guys wit regula kine whip, an I goin whip you guys wit scorpions!”
\v 15 An dass how was. Da king guy no lissen to da peopo. But was Yahweh wen make um happen lidat. Cuz az da ting Yahweh wen tell Ahijah da Shiloh guy fo tell Jeroboam, Nebat boy, long time befo.
\p
\v 16 Wen all da Israel peopo see dat King Rehoboam no stay lissen to dem, dey talk back to him. Dey tell um,
\q “Eh! You king guys from da David ohana,
\q2 You good fo notting to us!
\q2 We no get notting from da Jesse ohana!
\q Us Nort Israel guys, we getting outa hea!
\q2 You David ohana guys
\q Take care yoa own peopo,
\q2 No bodda us!”
\p So da Nort Israel guys go home.
\v 17 Cuz a dis, Rehoboam ony stay da king fo da Israel peopo dat live inside da Judah towns.
\p
\v 18 Den King Rehoboam send Adoniram to da country side for talk to da peopo. Adoniram da leada boss fo all da guys dat go work hard fo Rehoboam an no mo pay. But all da Israel peopo throw rock an kill Adoniram. But King Rehoboam, he strong nuff fo jump real quick inside his war wagon an run away from dea to Jerusalem.
\v 19 Az why still yet today, all da Nort Israel peopo stay fight agains da David ohana, an no let um come dea king.
\p
\v 20 Wen all da odda Nort Israel peopo find out dat Jeroboam come back from Egypt, dey send somebody fo tell um, “Come meet wit us!” Dey make him da king fo all da Nort Israel peopo. Da Judah ohana was da ony ones dat stick wit da David kine king guys.
\s Shemaiah Talk Fo God To Rehoboam
\p
\v 21 Wen Rehoboam come back Jerusalem, he tell all da guys from da Judah an Benjamin ohanas fo come by him fo make army. He get 180,000 guys from dem, ready fo make war wit da Israel ohanas, so Rehoboam, Solomon's boy, can come king again fo erybody.
\p
\v 22 But had one message from God fo Shemaiah, one guy dat know God fo real kine, fo say dis:
\v 23 “Talk to Rehoboam, Solomon's boy, da king fo da Judah peopo, an to all da Judah an Benjamin peopo, an all da oddas too.
\v 24 Tell um dis: ‘Dis wat Yahweh tell. No go ova dea fight wit yoa brudda guys da Israel ohana peopo. Go home, all you guys! Cuz I da One dat stay make all dis happen right now!’-” Da peopo lissen to wat Yahweh tell um, an dey go back home, jalike Yahweh tell um fo do.
\s Jeroboam Make Idol Kine Gods Dat Look Like Bebe Cows
\p
\v 25 Den, Jeroboam wen make strong da walls fo Shekem town, up country Efraim side. He go dea fo live. From dea, he go ova Peniel side an make strong da walls fo dat town too.
\v 26 Cuz Jeroboam tink, “If I no do notting, bumbye da David ohana peopo from da Judah ohana, an dea king, goin take ova again.
\v 27 Ery year, dis peopo go Jerusalem town fo make sacrifice inside da Temple Fo Yahweh. Bumbye, dey goin tink fo take da Judah king, Rehoboam, fo be dea boss one mo time. An if dey do dat, dey goin kill me an go back to him!”
\p
\v 28 So King Jeroboam aks his helpa guys wat fo do. Den he tell his worka guys, “Make two idol kine gods outa gold, da kine dat look like bebe cows.”
\p Den he tell da peopo, “Eh, az too hard, fo you guys go all da way Jerusalem side fo make sacrifice! Look now! Right hea, da gods fo you Israel peopo! Dis, da ones wen bring you guys hea from da Egypt land!”
\p
\v 29 Jeroboam put up one a da idol kine gods Bethel side nea da border wit Judah, an da odda one in da nort, Dan ohana side.
\v 30 Cuz Jeroboam wen do dis, make plenny peopo do wat dey not suppose to do. Dey even wen go all da way Dan side fo pray to da idol kine god ova dea.
\p
\v 31 Jeroboam wen build small kine house by da sacrifice places on top da hills fo pray. He take any kine peopo fo come prieses, even if dey not from da Levi ohana.
\v 32 Den Jeroboam tell da peopo dey gotta make one spesho religious time ery year Octoba, same time jalike da spesho time wen da Judah peopo go live inside shack. An Jeroboam make sacrifice on top da altar he wen build. He do dat Bethel side, fo make sacrifice fo da idol kine gods he wen make, dat look jalike bebe cows. He get da peopo fo come prieses fo all da small kine sacrifice house he wen build on top da hills fo pray to da odda gods too.
\v 33 Octoba was da time Jeroboam wen go pick fo be da spesho religious time. He neva get dat time from God. Dat time, Jeroboam go da altar he wen build Bethel side. Dass how he make his own spesho religious time fo da Israel peopo all come togedda, an he da one, not da pries guys, go to da altar an make da sacrifice.
\c 13
\s One Talka Fo God Tell Jeroboam Wat God Goin Do
\m
\v 1 Dat time, Yahweh wen tell one guy dat come from da Judah land an know God, fo go Bethel town. He come right den, wen Jeroboam stay stand by da altar fo burn up da sacrifice.
\v 2 Da guy yell jalike he talking stink to da altar, cuz Yahweh wen tell um wat fo say. He tell, “Eh you! Da altar! Dis wat Yahweh tell: ‘Bumbye one bebe boy goin born from da David ohana. His name goin be Josiah. On top dis altar, Josiah goin make sacrifice. Firs ting, he goin kill da pries guys fo da places on top da hills wea da peopo make sacrifice. He goin kill dose dat burn sacrifice on top dis altar too. Den he goin burn bones from mahke peopo dea, so dis altar no goin be good no moa!”
\p
\v 3 Dat same day, da guy dat know God give da peopo one sign. He tell, “One awesome ting goin happen, one sign from Yahweh. Wen you see dis altar broke in two piece, an da ash from burn fat dat stay on top da altar spill out, you goin know az fo shua wat Yahweh tell.”
\v 4 King Jeroboam hear wat da guy dat know God tell. He hear um yelling bout da Bethel altar. From right dea by da altar Jeroboam put out his hand an point at da guy, an tell, “Grab dat guy!” But da arm he put out fo tell dis, come stiff, so he no can pull um back!
\v 5 Da altar wen broke in two piece an da ash from da sacrifice fat spill out, jalike da sign dat da guy dat know God wen give cuz Yahweh wen tell um.
\p
\v 6 King Jeroboam tell da guy dat know God, “Aks yoa God Yahweh fo make good to me! Pray fo me, so my arm come back okay!” So da guy dat know God aks God fo make good to da king. Da king arm come back okay again, jalike how was befo time.
\p
\v 7 Den King Jeroboam tell da guy dat know God, “Come my house, an go eat. I goin give you one present.”
\p
\v 8 But da guy dat know God tell da king, “No matta you give me half da stuffs you get, I no goin go wit you. No way I goin eat bread o drink watta hea.
\v 9 Cuz dis wat Yahweh wen tell me I gotta do: ‘No eat bread, no drink watta, no go back da same road you wen come.’-”
\v 10 Den da guy go one diffren way den da way he come Bethel side.
\s Da Ol Guy Dat Talk Fo God
\p
\v 11 Had one ol guy dat talk fo God. He live Bethel town. His boys come tell him da whole story. Dey tell dea fadda da tings da guy dat know God wen do dat day, an wat da guy wen tell King Jeroboam too.
\v 12 Da fadda aks his boys, “Wat road he go?” Da boys show da road dat da guy from Judah side dat know God wen go.
\v 13 So he tell his boys, “Put saddle on top da donkey fo me.” Dey do um, an da ol guy go on top da donkey
\v 14 an follow da guy dat know God.
\p Da ol talka fo God find da guy, sitting unda one tree. He aks um, “Eh, you da guy dat know God, da one come from Judah?”
\p Da guy tell, “Az me!”
\p
\v 15 Da ol talka fo God tell um, “Come my house an we go eat.”
\v 16 Da guy dat know God tell, “No, I no can go back dea wit you. I no can eat food o drink watta wit you in dis place.
\v 17 Cuz Yahweh wen tell me. He tell: ‘No eat food o drink watta Bethel side, an no come back da same way.’-”
\p
\v 18 Da ol talka fo God tell um, “I one talka fo God too, jalike you. An one angel messenja guy wen tell me wat Yahweh tell. He tell, ‘Bring da guy back wit you yoa house fo eat and drink.’-” (But da ol talka fo God, he bulai.)
\v 19 So da guy dat know God go back wit da ol talka fo God, an he eat food an drink watta inside da ol guy house.
\p
\v 20 Wen dey stay sit by da table, da ol talka fo God dat make da guy come back, get message from Yahweh right den an dea.
\v 21 He talk real loud to da guy from Judah dat know God, “Dis wat Yahweh tell: ‘You, you wen go agains wat Yahweh tell you! You no do wat yoa God Yahweh tell you fo do!
\v 22 You wen come back, eat and drink, inside da place wea God wen tell you fo no go eat an drink, an no come back hea. So, wen you mahke, yoa body no goin stay inside da place wea yoa ancesta guys stay bury!’-”
\s One Lion Kill Da Judah Guy Dat Know God
\p
\v 23 Afta da guy dat know God pau eat an drink, da ol talka guy fo God dat wen make um come back Bethel side, put saddle on top da Judah guy donkey fo him.
\v 24 Den da guy dat know God stay go. One lion see um on top da road an kill um. Da lion throw down da mahke guy body on top da road. Da donkey an da lion stand dea nea da body.
\p
\v 25 Bumbye, some guys pass by dea. Dey see da body da lion wen throw down on top da road. Dey see da lion stay stand nea da body. Wen dey reach da town wea da ol talka fo God live, dey tell wat wen happen.
\p
\v 26 Da talka fo God dat wen make da guy come back hear all dat. He tell, “Dass da guy dat know God! Da one no lissen wat Yahweh tell um fo do! Yahweh wen turn um ova to da lion, an he bus up da guy an kill um, jalike Yahweh wen tell um goin happen.”
\p
\v 27 Den da talka fo God tell his boys, “Put saddle on top da donkey fo me!” Dey do um.
\v 28 Da talka fo God go out, an he find da guy body on top da road, an da donkey an da lion stay stand nea da body. Da lion neva eat da body, an he neva bus up da donkey.
\v 29 Da ol talka fo God pick up da body a da guy dat know God an lay um on top da donkey. He bring um back Bethel town wea da ol talka fo God live, so he can cry plenny fo him, an bury um dea.
\v 30 Den he put da body inside da tomb he wen make fo himself fo wen he mahke, an he cry real hard fo him, “Auwe, my brudda!”
\p
\v 31 Afta he bury da guy, he tell his boys, “Wen I mahke, you guys bury me inside da same tomb wea da guy dat know God stay bury. Lay my bones nex to his bones.
\v 32 Cuz da ting Yahweh wen tell him fo tell, goin happen fo shua! He tell erybody real loud bout da altar dat stay Bethel town, an bout all da small temples on top da hills wea peopo make sacrifice to odda gods inside da Samaria towns.”
\s Jeroboam Still No Lissen
\p
\v 33 No matta all dis tings happen, Jeroboam still no ack diffren, he still do bad kine stuff. He still go make anybody from any kine place come pries guys fo da sacrifice places on top da hills. Anybody dat like come one pries, Jeroboam make um come pries fo da places on top da hills wea dey make sacrifice to odda gods.
\v 34 Cuz Jeroboam wen make lidis, him an his ohana get blame fo do all kine bad stuff. Az why da Jeroboam ohana king guys wen wipe out, an no mo his ohana inside dis world.
\c 14
\s Ahijah Tell Jeroboam Wat God Say
\p
\v 1 Dat time, King Jeroboam boy Abijah come sick.
\v 2 Jeroboam tell his wife, “Us gotta do someting! Go put on diffren kine clotheses, so nobody know you my wife. Den go Shiloh side. Get one talka fo God ova dea. His name, Ahijah. He da one wen tell me I goin come king fo dis peopo.
\v 3 Take ten roun kine breads, some sweet kine cake, an one small bottle honey. Go by him an give him da present. He goin tell you wat goin happen wit da boy.”
\p
\v 4 So dass wat Jeroboam wife wen do. She start fo go Shiloh side, to Ahijah house. Ahijah, he no can see cuz he real ol.
\v 5 Befo she reach Shiloh, Yahweh tell Ahijah awready, “Jeroboam wife goin come hea fo aks you fo tell her one ting. She goin aks you bout her boy, cuz he stay sick. An you goin tell her some stuff. Wen she come, she goin get diffren kine clotheses on, so nobody know az her.”
\p
\v 6 Ahijah hear her coming by da door. He tell her, “Come inside! You Jeroboam wife, yeah? So, how come you put on diffren kine clotheses so nobody know az you?! God wen tell me awready, fo tell you some stuff dat goin make you bum out.
\v 7 Wen you go home, tell Jeroboam, dis wat Yahweh, da God fo da Israel peopo, tell: ‘Was me wen make you come mo importan den all da peopo aroun you, an I wen make you da leada fo my peopo, da Israel peopo.
\v 8 David was da king, an da odda kings was goin come from his ohana. But I wen take away da right fo da David ohana guys come king, an give you da right fo be king. But you, you no ack like David, cuz he wen work fo me, an you, you no do notting fo me. Wen I tell him he gotta do someting, he do um. He wen stay tight wit me wit one good heart. He ony do da kine stuff dat I see stay right.
\v 9 You wen do mo plenny bad kine stuff den all da peopo dat wen come befo time. You go make idol kine gods dat not fo you, dat you melt metal fo make. You make me come mad and walk away from me.
\p
\v 10 “ ‘Cuz you do all dat, dis wat I goin do. I goin make bad kine stuff happen to all da Jeroboam ohana. I goin wipe out ery man from da Jeroboam ohana inside da Israel land, no matta dey slaves o dey not slaves. I goin burn up all da Jeroboam ohana peopo, jalike peopo burn up all da rubbish, till no mo nobody dea.
\v 11 Anybody from da Jeroboam ohana dat mahke inside da towns, da dogs goin eat um. Any a dem mahke outside da country side, da birds goin eat dem. I, Yahweh, an I telling you dis!’
\p
\v 12 “An fo you, Mrs. Jeroboam, go home now. Wen you go inside yoa town, yoa boy goin mahke.
\v 13 All da Israel peopo going cry plenny fo him an bury him. But him, he da ony one from da Jeroboam ohana dat goin get grave, cuz him da ony one from da Jeroboam ohana dat Yahweh, da God fo da Israel peopo, see dat he one good guy.
\p
\v 14 “Yahweh goin make one nodda guy come king fo da Israel peopo, an do wat Yahweh like. Dat guy goin wipe out all da Jeroboam ohana. An you know wen he goin do dat? Goin be today! An wat Yahweh goin do afta dat?
\v 15 Yahweh goin smash all da Israel peopo so dey no goin stand up strait, jalike wen you smash one plant dat grow inside one riva. He goin pull out da Israel peopo from dis good land he wen give to dea ancesta guys, jalike wen you pull one plant outa da groun wit da roots. He goin throw dem all ova da place, da odda side da Eufrates Riva. Az cuz dey wen put up pos fo pray to da wahine god Asherah, an dat make Yahweh come plenny huhu.
\v 16 Yahweh goin give up on da Israel peopo, cuz a all da bad kine stuff Jeroboam wen do, an cuz Jeroboam wen make da Israel peopo do bad kine stuff too!”
\p
\v 17 So Jeroboam wife get up an go home Tirzah side. Da same time she step inside her door, her boy mahke.
\v 18 Da peopo bury da boy, an all da Israel peopo cry plenny fo him, jalike wat Yahweh wen tell his worka guy Ahijah dat talk fo him, fo tell.
\p
\v 19 All da odda stuff Jeroboam wen do, how he make war an how he lead da peopo, all dat stay write down inside da Record Book Fo Da Kings Fo Israel.
\v 20 Jeroboam was king 22 year. Den he mahke an go sleep wit his ancesta guys. Jeroboam boy Nadab come king afta him.
\s Rehoboam Stay King Judah Side
\p
\v 21 Ova dea Judah side, Solomon boy Rehoboam stay king dat time. Wen he 41 year ol, he come king, an he stay king 17 year Jerusalem side. (Rehoboam mudda name Na`amah, from da Ammon peopo.) Jerusalem, az da big town Yahweh wen pick from all da Israel ohanas, fo build da Temple so da peopo can come fo find out wat kine god him.
\p
\v 22 But da Judah peopo, dey do stuff Yahweh say az bad. Da bad kine stuff dey wen do, was mo bad den da stuff dea ancesta guys wen do. Cuz a dat, dey make Yahweh come real huhu an jealous, cuz dey suppose to live fo him an dey no make lidat.
\v 23 Dem guys make spesho kine place on top da high part a da hills fo make sacrifice, an dey stand up big stone fo make place for pray, an put pos fo pray to da wahine god Asherah, on top da high part a ery hill an unda ery big tree dat get plenny leaf.
\v 24 Dey even get guys inside da land dat stay spesho fo da odda gods. Dey go take da wahines fo do bad kine stuff, an da wahines pay dem, an all da pay dey get, go to da places wea da peopo pray to da odda gods. Da peopo stay do all kine pilau kine stuff jalike how da odda peopos wen do, da same peopos dat Yahweh wen get um outa da land wen da Israel peopo come dea.
\p
\v 25 Afta Rehoboam was king five year, Shishak da king fo da Egypt peopo wen come attack Jerusalem.
\v 26 He take all da stuff from inside da Temple Fo Yahweh an inside King Rehoboam palace. He take eryting, even da gold shields da Solomon guys make.
\v 27 So King Rehoboam tell his guys fo go make shields outa bronze metal, fo put um wea da gold shields stay befo time. He make da officer guys, da ones dat guard da door fo da king's palace, take care da bronze shields.
\v 28 Erytime da king go inside da Temple Fo Yahweh, da guard guys carry da shields. Afta he leave, dey take um back to da room wea dey stay.
\p
\v 29 Odda stuff dat wen happen wen Rehoboam stay king, all da tings he wen do, stay write inside da Record Book Fo Da Kings Fo Judah.
\v 30 An all da time, Rehoboam an Jeroboam make war wit each odda.
\v 31 Den Rehoboam mahke jalike his ancesta guys. Dey bury him wit dem inside David Town, az Jerusalem. (Rehoboam's mudda name was Na`amah, from da Ammon peopo.) Den Rehoboam boy Abijam come da nex king.
\c 15
\s Abijam Come Da King Fo Judah
\m
\v 1 Da numba 18 year dat Jeroboam, Nebat boy, was king Israel side, Abijam wen come da king Judah side.
\v 2 He stay da king inside Jerusalem town three year. His mudda name Ma`acah, Absalom girl.
\v 3 King Abijam do any kine bad kine stuff, jalike his fadda Rehoboam wen do befo time. Az cuz inside his heart, Abijam neva get um right wit his God Yahweh. He no ack like his ancesta guy David, dat wen stay tight wit God.
\v 4 But cuz King Abijam's God Yahweh get plenny respeck fo David, God wen give da David ohana somebody fo lead da Jerusalem peopo, jalike one oil lamp dat stay burn long time. Dat mean, Yahweh give da peopo one guy dat get David fo his ancesta, fo make da Jerusalem govmen stay strong.
\v 5 (David, da way Yahweh see um, he wen do da right kine stuff. David do eryting Yahweh tell um fo do, till he mahke. He ony mess up da time he set up Uriah da Het guy fo mahke.)
\v 6 An all da time Abijam stay live, da Rehoboam an da Jeroboam ohanas still stay make war wit each odda.
\v 7 Odda stuff dat happen wen Abijam stay king, an all da tings he wen do, stay write inside da Record Book Fo Da Kings Fo Judah. An Abijam an Jeroboam stay make war wit each odda too.
\v 8 Den Abijam mahke, an dey bury him by his ancesta guys inside David Town, az Jerusalem. Abijam boy Asa come da nex king.
\s Asa Come Da King Judah Side
\p
\v 9 Da numba 20 year Jeroboam stay king Israel side, Asa come king fo da Judah peopo.
\v 10 He stay da king Jerusalem side 41 year. His granmudda, Ma`acah, her fadda Absalom.
\v 11 Asa wen do all da right kine stuff, da way Yahweh see um, jalike his ancesta guy David.
\p
\v 12 Had guys go take da wahines fo make sex, an da wahines pay dem, an all da pay dey get, go to da places wea da peopo pray to da odda gods. Asa throw all dem guys outa da country. An he throw out all da idol kine gods dat his ancesta guys wen make.
\v 13 He even kick out his granmudda Ma`acah an no give her respeck fo be da ol queen, cuz she wen make one real pilau kine pole fo pray to da wahine god Asherah. Asa cut down da pole an burn um by da Kidron Stream.
\v 14 But da places on top da mos high part a da hills wea da peopo make sacrifice fo da odda gods, dey still stay. Cuz inside, Asa stay tight wit Yahweh all da time he stay alive.
\v 15 Asa put inside da Temple Fo Yahweh, da silva an da gold an tings da pries guys use, dat him an his fadda wen make spesho fo God befo time.
\p
\v 16 All da time dey stay king, King Asa an King Ba`asha from Israel side make war wit each odda.
\v 17 King Ba`asha wen go agains da Judah peopo. He wen build Ramah town real strong, fo make shua nobody from his peopo can go by King Asa, Judah side, an nobody can come from King Asa land.
\p
\v 18 So King Asa take out all da silva an gold dat stay inside da storage rooms fo da Temple Fo Yahweh, an fo da king palace. He give um all to his helpa guys, an tell um fo take um Damascus side, to Ben-Hadad, Tavrimmon boy an Hezion grankid, dat was king fo da Aram peopo, wit dis message fo Ben-Hadad:
\p
\v 19 “Yoa fadda an my fadda wen make one deal fo help each odda. So now, az good me an you make da same kine deal. Look -- I stay send you one present, silva an gold. I like you fo go broke da deal you get wit Ba`asha, da king fo da Israel peopo, so he no fight wit me.”
\p
\v 20 Ben-Hadad, he lissen to King Asa. He send his bestes military guys fo go agains da Israel towns. He take ova Ijon, Dan, Abel Bet Ma`acah, an da land aroun Lake Kinneret all da way to da Naftali land.
\p
\v 21 Wen Ba`asha hear wass happening, he stop building Ramah side, an he go stay inside Tirzah town.
\v 22 Den King Asa tell all da Judah peopo fo come. No mo nobody can stay home. Dey take away from Ramah all da big stones an da wood dat King Ba`asha use fo build ova dea. King Asa use all dat stuff fo build up Geba town mo strong Benjamin side, an Mizpah town too.
\p
\v 23 Odda stuff dat happen wen Asa stay king, an all da tings he wen do, all da powa he get, an all da towns he wen build, stay write inside da Record Book Fo Da Kings Fo Judah. But wen Asa come ol, his feets come real sick.
\v 24 Den Asa mahke. Dey bury him wit his ancesta guys inside David Town, az Jerusalem. An Asa boy Jehoshafat come da nex king.
\p
\v 25 Jeroboam boy Nadab come king fo da Israel peopo, da numba two year dat Asa was king fo Judah. He stay king, two year.
\v 26 Da way Yahweh see um, Nadab do da kine stuff dat Yahweh say az bad. He do da same kine stuff his fadda Jeroboam wen do, an he make da Israel peopo do da same kine bad stuff dat his fadda guy wen make um do.
\v 27 Ba`asha, Ahijah boy from da Issakar ohana, wen make plan wit some odda guys fo kill Nadab. Wen Nadab an all da Israel army guys stay circle aroun Gibbeton town fo take um ova from da Filisha guys, Ba`asha wen kill Nadab.
\v 28 Was da numba three year Asa stay king Judah side, wen Ba`asha kill Nadab fo take ova from Nadab fo come king.
\p
\v 29 Firs ting Ba`asha do wen he come king, he kill erybody from da Jeroboam ohana. He no leave nobody alive. He wipe um all out, jalike Yahweh wen tell befo time to Ahijah, da Shiloh guy dat work fo him.
\v 30 God do dat, cuz a all da bad kine stuff Jeroboam wen do, an all da bad kine stuff he make da Israel peopo do, an cuz Jeroboam make Yahweh, da God fo da Israel peopo, mad.
\v 31 Had odda stuff wen happen wen Nadab stay king. All da tings he wen do, stay inside da Record Book Fo Da Kings Fo Judah.
\v 32 An all da time King Asa an King Ba`asha from Israel stay kings, dey stay make war wit each odda.
\s Ba`asha Come Da King Israel Side
\p
\v 33 Was da numba three year dat Asa stay king Judah side, Ahijah boy Ba`asha come da king fo all da Israel peopo, Tirzah town. He stay king 24 year.
\v 34 Yahweh see Ba`asha do plenny bad kine stuff. He make jalike Jeroboam, an do da same kine bad stuff jalike Jeroboam, an make da Israel peopo do bad kine stuff too.
\c 16
\m
\v 1 One time, Yahweh give Jehu, Hanani boy, dis message fo King Ba`asha:
\p
\v 2 “Befo time, you was notting. I wen pick you up from da dirt. I wen make you leada guy fo my peopo, da Israel peopo. But you wen go make jalike King Jeroboam. You make my Israel peopo go do bad kine stuff. Cuz a you, an da bad tings dey do, dey piss me off!
\v 3 So, I goin wipe out you an all yoa ohana, King Ba`asha. I goin make yoa ohana come jalike da ohana dat come from Jeroboam, Nebat boy, all pau.
\v 4 Anybody from yoa ohana mahke inside one town, da dogs goin eat um. If dey stay mahke inside da country side, da scavenja birds goin eat um.”
\p
\v 5 All da odda stuff dat stay happen wen Ba`asha stay king, an all da tings he wen do, an all da powa he get, stay write inside da Record Book Fo Da Kings Fo Israel.
\v 6 Den Ba`asha mahke. Da peopo bury him wit his ancesta guys inside Tirzah town. An Ba`asha boy Elah come da nex king.
\p
\v 7 All da time Ba`asha was king, he make any kine fo piss off Yahweh. He ack jalike da Jeroboam ohana. Yahweh even give Jehu, Hanani boy, da talka fo God, da message fo King Ba`asha an his ohana. Jehu tell um all da kine stuff Yahweh see Ba`asha stay do, jalike da Jeroboam ohana guys do. An cuz a dat, God go afta Ba`asha too.
\s Elah Come King Israel Side
\p
\v 8 Da numba 26 year dat Asa stay king Judah side, Elah, Ba`asha boy, come king fo da Israel peopo. He stay king Tirzah town, two year.
\v 9 One guy Zimri, one a da palace guys fo Elah dat stay in charge a half da war wagons, make plan fo kill Elah. Dat time, Elah go Tirzah side, Arza house, da guy dat stay in charge a da Tirzah palace, an he stay drink an come drunk ova dea.
\v 10 Zimri go ova dea an hit Elah an kill um. Den Zimri take ova an come king afta Elah. Dat time was numba 27 year dat Asa stay king Judah side.
\p
\v 11 Wen Zimri take ova da throne fo come king, he go kill all da guys from da Ba`asha ohana, an even Ba`asha's odda ohana guys an dea friends.
\v 12 Dass how Zimri wen wipe out all da Ba`asha ohana peopo. Dis happen jalike Yahweh wen tell his talka guy Jehu fo tell Ba`asha.
\v 13 Yahweh make dis happen cuz a all da bad kine stuff Ba`asha an his boy Elah wen do, an all da bad kine tings dey wen make da Israel peopo do, fo make dea God Yahweh come huhu, cuz Ba`asha an Elah wen stick to da idol kine gods dat no can do notting.
\v 14 Da odda stuff dat happen wen Elah stay king, an all da tings he wen do, stay write inside da Record Book Fo Da Kings Fo Israel.
\s Zimri Come King Israel Side
\p
\v 15 Da numba 27 year wen Asa stay king fo da Judah peopo, Zimri wen come king Tirzah town -- but ony seven days. Dat time, da Israel army guys stay camp in tents fo make ready fo fight da Filisha peopo dat live Gibbeton town.
\v 16 Wen da Israel army guys inside da camp find out dat Zimri wen make plan an kill King Ba`asha, dat same day da Israel guys wen make da general fo dea army, Omri, da king fo Israel, right dea inside da camp.
\v 17 Den Omri an all da Israel guys wit him wen go way from Gibbeton town, an go all aroun outside Tirzah town fo attack um.
\v 18 Wen Zimri see da Israel army goin take ova Tirzah town, he go inside da place wit real strong wall inside da palace, an burn down da palace on top him. Dass how he wen mahke,
\v 19 cuz a da kine tings Zimri wen do, dat stay bad da way Yahweh see um. Da way Zimri do bad kine stuff, an da way he make da Israel peopo do bad kine stuff too, he make jalike Jeroboam wen do.
\v 20 Da odda stuff dat happen wen Zimri stay king, an how he make plan fo kill King Elah, all dat stay write inside da Record Book Fo Da Kings Fo Israel.
\s Omri Come King Israel Side
\p
\v 21 Dat time, da Israel peopo wen go take sides. Half a dem like Tibni, Ginat boy, fo come king, an da oddas like Omri stay king.
\v 22 But da peopo dat stick wit Omri mo strong den da peopo wit Tibni, Ginat boy. Az why Tibni mahke, an Omri stay da king.
\p
\v 23 Was da numba 31 year dat Asa stay king Judah side, wen Omri come king fo da Israel peopo. He stay king twelve year. Da firs six year, he stay Tirzah town.
\v 24 Den Omri buy da hill dey call Samaria now. He buy um from Shemer, an he pay Shemer 150 pound silva. On top dat hill, he build one town. He give da town da name Samaria, fo no foget da name Shemer, da guy dat own da hill befo time.
\v 25 But Omri, he do bad kine stuff, da way Yahweh see um. Omri wen do mo plenny bad kine stuff den all da king befo him.
\v 26 Omri wen do all da same kine bad stuff jalike Jeroboam, Nebat boy, wen do. He make da Israel peopo do bad kine stuff too. Az how Omri make Yahweh come huhu, da God Fo Da Israel Peopo, cuz Omri pray to da idol kine gods dat no can do notting.
\v 27 Odda stuff wen happen wen Omri stay king, an all da tings he wen do, an all da powa he get, stay inside da Record Book Fo Da Kings Fo Israel.
\v 28 Den Omri mahke jalike his ancesta guys. Da peopo bury him inside Samaria town. An Omri boy Ahab come da nex king.
\s Ahab Come King Israel Side
\p
\v 29 Ahab, Omri boy, come da nex king fo da Israel peopo, da numba 38 year dat Asa stay king fo da Judah peopo. Ahab stay king fo da Israel peopo inside Samaria town 22 year.
\v 30 Ahab, Omri boy, he do plenny bad kine stuff, da way Yahweh see um, mo bad den all da odda king guys befo him.
\v 31 Fo Ahab, az no big ting fo him do da same kine bad kine stuff jalike Jeroboam, Nebat boy. He wen marry Jezebel, her fadda Etba`al, da king fo da Sidon peopo. He wen start fo make da god Ba`al be his god, an go down an show um respeck.
\v 32 He build one temple fo Ba`al Samaria side, an he put one altar dea fo make sacrifice to Ba`al.
\v 33 An he put up one pos dea fo pray to da wahine god Asherah too. He do plenny fo make Yahweh, da God Fo Da Israel Peopo, come huhu, mo den all da odda kings fo da Israel peopo dat come befo him.
\r (Joshua 6:26)
\p
\v 34 Da time Ahab stay king, one guy Hiel from Bethel town wen go build Jericho town one mo time. Wen he make da foundation, his numba one boy Abiram mahke. Wen he put up da big town gate, his mos young boy Segub mahke. Dass wat Joshua, Nun boy, tell befo time, cuz Yahweh tell um fo say dat.
\c 17
\s Da Scavenja Birds Feed Elijah
\m
\v 1 Get one guy Elijah from Tishbe town, Gilead side. He tell King Ahab, “I stay shua dat Yahweh, da God fo da Israel peopo, stay alive, an he da God I stay work fo. An I shua bout dis: From now, no goin get rain fo long time. No even goin get watta on top da groun morning time. Da ony rain goin come, goin be wen I say come!”
\p
\v 2 Den, Yahweh tell Elijah layta:
\v 3 “No stay hea! Go da east side an go hide up dea inside da Kerit Gulch, mauka da Jordan Riva.
\v 4 Da Kerit Stream goin be wea you get watta fo drink. I wen tell da scavenja birds awready, fo go bring food fo feed you ova dea.”
\p
\v 5 Elijah go an do wat Yahweh wen tell um fo do. He go da Kerit Gulch, mauka da Jordan Riva, an stay dea.
\v 6 Ery day morning time, an ery day befo nite time, da scavenja birds bring him food an meat, an he drink watta outa da Kerit Stream.
\v 7 Den eryting wen change. Da stream all come dry, cuz no mo rain all ova da land.
\s One Widow Feed Elijah Zarefat Side
\p
\v 8 Den Yahweh tell Elijah dis:
\v 9 “Go Zarefat town now, nea Sidon town. Stay dea. I awready wen tell one widow wahine ova dea fo give you food.”
\p
\v 10 So Elijah go Zarefat side. Wen he come by da gate fo da town, one widow wahine ova dea stay pick up sticks fo make fire. He call her, “Hui! Can bring me litto bit watta inside one cup, fo me drink?”
\v 11 Wen she go fo get um, he call her again, an tell, “Can bring litto bit bread too?”
\p
\v 12 She tell, “Jalike you stay shua yoa God Yahweh stay alive, I shua dat I no mo even one pancake. I ony get one handful flour inside one box, an litto bit olive oil inside one jar -- dass it! An me, I ova hea fo pick up two-three stick. Den I go home cook da flour an da oil fo me an my boy. Us goin eat um, den wen us pau, us mahke!”
\p
\v 13 Elijah tell her, “Eh, no scared! Go home. Make da bread jalike you wen tell you goin do. But da firs ting I like you fo do, go make one small roun bread from wat you get fo me. Bring um out hea. Den, make da res fo you an yoa boy.
\v 14 Cuz dis wat Yahweh, da God fo da Israel peopo, tell: Dat box flour no goin come empty, an erytime goin get olive oil inside da jar, till da time wen Yahweh send rain on top da groun.”
\p
\v 15 Da wahine go do jalike Elijah tell. An Elijah, an da wahine, an her boy get food fo ery day fo long time.
\v 16 Da box flour neva come empty, an da jar erytime get olive oil inside. Dis happen jalike wat Yahweh tell Elijah fo tell da wahine.
\p
\v 17 Afta all dat wen happen, da wahine dat own da house, her boy come sick. He come mo an mo sick, till da boy no can breave an stop breaving.
\v 18 She tell Elijah, “You one guy dat know God! How come you go agains me, aah?! Fo shua, you wen come hea fo make me tink bout all da bad kine stuff I wen do, an make my boy mahke!”
\p
\v 19 Elijah tell her, “Give me yoa boy.” He take da boy from her arm an take him upstairs, to da room on top da flat roof wea he stay. He lay da boy on top his pune`e.
\v 20 Den Elijah call to Yahweh fo help him. He tell um, “Yahweh, you da God fo me fo shua! I stay dis widow wahine's house now. How come you wen make dis bad ting happen to her now, making her boy mahke?!”
\p
\v 21 Den three times, Elijah go lay down on top da boy. He call out to Yahweh, “Eh Yahweh! You da God fo me fo shua! Bring back dis boy's life to his body!”
\v 22 Den Yahweh hear Elijah. Da life come back to da boy body, an he come alive.
\p
\v 23 Den Elijah pick up da boy an carry him back down from da room wea he stay an bring him inside da house. He give da boy to his mudda an tell, “Look! Yoa boy, stay alive!”
\p
\v 24 Da wahine tell Elijah, “Now, I know fo shua, dat you one guy dat know God fo real kine! Wen Yahweh tell you fo say someting, az true wat you tell!”
\c 18
\s Elijah An Da Guys Dat Talk Fo Da Ba`al God
\m
\v 1 Long time afta dat, da numba three year dat no mo rain, one message come from Yahweh fo Elijah: “Go talk to King Ahab. Cuz now, I goin make rain come down on top da groun.”
\v 2 So Elijah go back Israel side, so Ahab can see him an know dat he dea awready.
\p Dat time, no mo food Samaria side, an hard fo da peopo dea.
\v 3 Wen Elijah stay on da road fo go Samaria side, King Ahab tell his worka guy Obadiah fo come by him. (Obadiah stay in charge a Ahab palace, an he one guy dat get awesome respeck fo Yahweh.
\v 4 Befo time, wen Jezebel stay kill da guys dat talk fo Yahweh, Obadiah wen take one hundred a dem an hide um, fifty inside one big cave, an fifty mo inside one nodda cave, an he make shua dey get food an watta.)
\v 5 Ahab tell Obadiah, “Go all ova da land. Check out all da pukas get watta come outa da groun, an all da valleys dat get stream wit watta. Maybe can find some grass fo da horse an mule so dey stay alive an we no need kill any a da animals.”
\v 6 Ahab an Obadiah half half da place dey gotta go. Ahab go one side, an Obadiah go da odda side, dey no go togedda.
\p
\v 7 So Obadiah walk down da road. Elijah meet him. Obadiah see Elijah an know dass him. So Obadiah go down on top da groun fo show respeck, an he tell Elijah, “Eh, az you fo real, my boss, Elijah?!”
\p
\v 8 Elijah tell, “Yeah, dis me! Go tell yoa boss, ‘Elijah stay come awready!’-”
\v 9 Obadiah tell, “Wat I wen do wrong, fo me gotta do dis?! Cuz if I do wat you tell me fo do, az jalike you set me up so my boss Ahab goin kill me fo shua!
\v 10 I shua dat yoa God Yahweh stay alive, an I shua bout dis too: my boss Ahab wen send peopo to ery country an ery king fo look fo you! An wen dey tell, ‘Elijah no stay hea,’ den Ahab make da king tell fo real in front God, dat dey no can find you.
\v 11 An now, you tell me go tell my boss, ‘Elijah stay hea awready!’.
\v 12 But me, afta I leave you, I donno wat place God Spirit goin pick you up an take you. If I go tell Ahab dat you stay hea, an he no can find you hea, he goin kill me! No matta I yoa slave guy, an I get awesome respeck fo Yahweh from small kid time.
\v 13 Maybe nobody tell you, boss, wat I wen do befo time, da time Jezebel stay kill da guys dat talk fo Yahweh. I wen take hundred a dem an hide um inside two big cave, an make shua dey get food an watta.
\v 14 But now, you telling me fo go tell my boss, ‘Elijah, he hea awready!’ He goin kill me fo shua!”
\p
\v 15 Elijah tell, “Jalike I shua dat Yahweh, Da God Ova All Da Armies, stay alive, I shua I goin stand in front Ahab today, an I goin let him see me!”
\p
\v 16 Den Obadiah go fo meet Ahab. He tell Ahab wat wen happen. Den Ahab go fo meet Elijah.
\v 17 Wen Ahab see Elijah, he tell um, “So! You, da guy dat stay make trouble fo all da Israel peopo!”
\p
\v 18 Elijah tell, “No ways! I neva make trouble fo da Israel peopo. You an yoa fadda guy ohana wen make trouble, cuz you guys neva do da tings Yahweh tell you fo do, an you pray to da Ba`al kine gods.
\p
\v 19 “So now, go send peopo all ova da Israel land fo bring togedda all da peopo by me on top Mount Carmel. An bring da 450 talkas fo da Ba`al god, an da 400 talkas fo da Asherah god, dat Jezebel stay give food from her palace!”
\v 20 So Ahab send guys fo go by all da Israel peopo, an fo tell da talka guys fo dea gods come togedda Mount Carmel.
\p
\v 21 On top Mount Carmel, Elijah go in front all da peopo. He tell, “You guys gotta make up yoa mind right now, one way o da odda way! If Yahweh stay God fo real kine, go wit him! But if Ba`al stay God fo real kine, go wit him!” Da peopo, dey no say notting.
\p
\v 22 Den Elijah tell da peopo, “Me, I da ony talka fo Yahweh dat neva mahke. But Ba`al, he get 450 guys dat talk fo him.
\v 23 Go get two boy kine cows, one fo me an one fo dem. Dey can pick da one dey like. Den dey goin kill um an cut um up an put da pieces on top da wood, but no put fire. Me, I goin do same ting wit da odda cow, an put da pieces on top da wood, but I no goin put fire, too.
\v 24 Den, you guys call yoa god's name, an I goin use Yahweh name fo call him. Wateva god send da fire fo show dat he stay lissen, dass da God dat stay fo real!”
\p All da peopo tell, “Az good, wat you tell.”
\p
\v 25 Elijah tell da talka guys fo Ba`al, “Get plenny a you guys, so go do um firs. Pick one a da boy kine cows an make um ready. Den call yoa god name, but no light da fire.”
\p
\v 26 Da talka guys fo Ba`al take da cow Elijah wen give um an kill um fo make ready da sacrifice. Den dey go use Ba`al name fo call him. Dey do dat from morning time till noon time. Dey yell, “Eh, Ba`al, lissen to us guys an do someting!” But dey no hear notting from Ba`al. Nobody answer dem. Den dey go dance all ova da altar dey wen build.
\v 27 Wen come noon time, Elijah start fo mout off at dem. He tell, “Yell mo loud! Cuz Ba`al one god. Maybe he stay tink real hard bout someting, o maybe he stay inside da lua, o he go holoholo. Maybe he stay sleep, an gotta wait till he wake up!”
\v 28 So den dey wen yell mo loud, an cut demself wit sword an spear, cuz dass wat dey do, till da blood come out.
\v 29 Aftanoon time, dey do same ting. Dey make like da talkas fo Ba`al suppose to make, spazzing out, till evening time, wen time fo make da regula kine sacrifice. But Ba`al no do notting, nobody answa dem, nobody lissen dem.
\p
\v 30 Den Elijah tell all da peopo, “Come ova hea by me!” Dey all come. He fix da altar fo make sacrifice fo Yahweh, dat stay broke.
\v 31 Elijah go get twelve stone, one stone for ery one a da twelve ohanas dat come from Jacob. (An Jacob, he da guy long time ago get message from God, “From now, yoa name goin be ‘Israel.’-”)
\v 32 Elijah use da stones fo build up da altar one mo time, fo show wat kine god Yahweh. He dig one big ditch aroun da altar, nuff fo plant two box seed.
\v 33 He fix da firewood jus right, an cut up da cow an put da pieces on top da wood.
\v 34 Den Elijah tell da peopo, “Go fill up four big pots wit watta, an pour um on top da sacrifice meat an on top da wood.” Afta dey do dat, he tell um “One mo time, same ting,” an dey go do um again. He tell um, “One mo time,” an dey do um, three time.
\v 35 Da watta go all ova da altar an fill up da ditch too.
\v 36 Wen time fo make da sacrifice, Elijah da talka fo God go by da altar an pray lidis: “Yahweh, you da God fo Abraham an Isaac an Israel. Today, I like erybody know, dat you da God fo da Israel peopo, an you da boss fo me. An all dese tings I do, I do um cuz dass wat you tell me fo do.
\v 37 Yahweh, do someting fo show you lissen to me, so den dis peopo goin know dat you Yahweh, you da God dass fo real, an dat you stay make dea heart come back by you.”
\v 38 Right den an dea, fire from Yahweh wen come down outa da sky. Da fire burn up da sacrifice, an da wood, an da stones an da dirt, an even da watta inside da ditch.
\p
\v 39 Wen all da peopo see dis, dey go down wit dea face on top da groun, an dey yell, “Yahweh, he da God fo real kine! Yahweh, he da God fo real kine!”
\p
\v 40 Den Elijah tell da peopo, “Grab da guys dat talk fo Ba`al! No let even one a dem run away!” Da peopo grab dem. Elijah tell da peopo go take um down by da Kishon Stream, an he kill um all dea.
\s Elijah Pray Fo Da Rain Come
\p
\v 41 Den Elijah tell King Ahab, “You go home now, fo eat an drink. Cuz sound jalike goin get heavy rain!”
\p
\v 42 Ahab go home fo eat an drink. Elijah, he go back up Mount Carmel to da top. He bend down to da groun, an put his face on his knees.
\v 43 Elijah tell da guy dat work fo him, “Go ova dea an look makai side.”
\p Da guy go an look. He tell, “No mo notting ova dea.”
\p Seven time, Elijah tell um, “Go back look!”
\p
\v 44 Da numba seven time, da worka guy tell, “Eh! Get cloud, small kine. Look like one hand. Stay come up outa da ocean.”
\p Elijah tell, “Go by King Ahab. Tell um dis: ‘Tie da horse to yoa war wagon! Go quick down da mountain, befo da rain hold you back!’-”
\v 45 An mo an moa, da sky come dark wit clouds an wind. Den start fo rain hard. Ahab ride his war wagon fo reach Jezreel town.
\v 46 Yahweh make Elijah come strong. So he pull up his robe an tie um wit his belt, den he run in front Ahab all da way to da place peopo go inside Jezreel town.
\c 19
\s Elijah Run Away Mount Sinai Side
\r (Rome 11:3, 4)
\m
\v 1 Ahab tell Jezebel eryting Elijah wen do, an how Elijah wen tell da peopo fo kill all da talka guys fo da Ba`al god wit dea swords.
\v 2 So Jezebel wen send one messenja guy by Elijah fo tell him, “Befo dis time tomorrow, I goin make you jalike you make da guys you wen kill! An if I no do dat, I like my gods do da same kine ting to me, an even mo worsa!”
\p
\v 3 Elijah come scared. He no wase time, an he run away quick from dea, so he no mahke. Wen he reach Beersheba, Judah side, he tell da guy dat work fo him fo stay dea.
\v 4 But Elijah take one mo day fo go mo inside da boonies. He come by one broom tree an sit down undaneat, an he aks God fo let um mahke. He tell Yahweh, “I no can handle no moa! Let me mahke awready! No way I one betta man den my ancesta guys!”
\p
\v 5 Den he lay down unda da tree an go sleep. Den one angel messenja guy come touch him an tell him, “Get up! Eat someting!”
\v 6 Elijah look aroun, an right dea by his head, get one roun flat bread, da kine dey bake on top da hot rocks, an one bottle watta. He eat da bread an drink da watta, den he lay down again.
\p
\v 7 Da messenja guy from Yahweh come back again. He touch Elijah, an tell um, “Get up. Eat some moa. Cuz fo go wea you gotta go, goin be mo den you can handle.”
\p
\v 8 So Elijah get up, eat and drink. Dat food make him strong again, an he go forty day, day time an nite time, till he reach Mount Sinai, da mountain wea God stay.
\p
\v 9 Wen Elijah reach Mount Sinai, he go inside da cave dat get dea, an stay all nite.
\s Yahweh Talk Wit Elijah
\p Den Yahweh give him one spesho message. He tell, “Elijah! How come you stay hea?!”
\p
\v 10 Elijah tell, “I wen go all out fo you, Yahweh, Da God Ova All Da Armies! Cuz da Israel peopo, dey no like da deal you wen make wit dem. Dey wen broke down all da altar places fo make sacrifice fo you. Dey wen kill da guys dat talk fo you wit dea swords. An now, I da ony talka fo you dat still stay, an dey stay look fo me fo kill me too!”
\p
\v 11 Yahweh tell, “Go outside da cave. Stand on top dis mountain, in front me, Yahweh.” Befo Yahweh pass by dea, get one strong wind dat make da stone come down from da mountain an broke da cliffs. But Yahweh, he no come wit da wind. Afta da wind, get eartquake, but Yahweh, he no come wit da eartquake.
\v 12 Afta da eartquake, get fire, but Yahweh, he no come wit da fire. An afta da fire, get one small noise dat almos no can hear, jalike somebody whispa.
\v 13 Wen Elijah hear dat, he pull his blanket ova his face. He go litto bit outside da cave.
\p Den one small voice tell him, “Elijah! How come you stay ova hea?!”
\p
\v 14 Elijah tell, “I wen go all out fo you, Yahweh, Da God Ova All Da Armies! Cuz da Israel peopo, dey no like da deal you wen make wit dem. Dey wen broke down all da altar places fo make sacrifice fo you. Dey wen kill da guys dat talk fo you wit dea swords. An now, I da ony talka fo you dat still stay, an dey stay look fo me fo kill me too!”
\p
\v 15 Yahweh tell Elijah, “Go back, da same way you wen come. From dea, go inside da boonies nea Damascus town. Wen you reach dea, put  olive oil on top Haza`el head, fo show I stay pick him fo come king fo da Aram peopo.
\v 16 An put olive oil on top Jehu, Nimshi boy, fo show I wen pick him fo come king fo da Nort Israel peopo. An same ting fo Elisha, Shafat boy from Abel-Meholah town. Put olive oil on top his head fo show I wen pick him fo come one talka guy fo me, fo take ova yoa work.
\v 17 Haza`el goin kill plenny peopo wit his sword, an da ones he no kill, Jehu goin kill um. An da ones Jehu no kill wit his sword, Elisha goin kill dem.
\v 18 But I still get 7,000 Israel guys dat neva go down on top dea knee in front da Ba`al god an neva kiss da Ba`al statue!”
\s Elijah Tell Elisha Fo Come His Helpa Guy
\p
\v 19 Den Elijah leave Mount Sinai. Firs, he go find Elisha, Shafat boy. Elisha stay inside one big field wit eleven odda guys. Dey all plowing, ery guy wit two cow fo pull da plow. Elisha too stay plow, he da las guy. Elijah go inside da field by Elisha an put his blanket aroun Elisha.
\v 20 Den Elisha leave da cows wit da plow an run fo catch up Elijah. He tell Elijah, “Let me go kiss my fadda an mudda an tell um goodbye. Den I come wit you.”
\p Elijah tell um, “Kay den, go. I no goin give you presha wat you like do.”
\p
\v 21 Den Elisha leave Elijah an go home. He take da two cow an kill um fo make sacrifice. Da wood pieces from da plow, he burn um fo cook da sacrifice meat. He give da meat to da peopo, an dey eat um. Den Elisha leave home for go wit Elijah an be his helpa guy.
\c 20
\s Ben-Hadad Attack Samaria Town
\m
\v 1 Den Ben-Hadad, da king fo da Aram peopo, tell all his army guys fo come togedda. He get 32 odda king guys with dea armies, wit dea horse an war wagon. Dey go Samaria town an put army guys all aroun da town, so nobody can go inside da town o get outa da town. Den dey attack.
\v 2 Ben-Hadad send messenja guys inside da town fo go by King Ahab, da Israel king. Dey tell um, “Lissen up. Dis wat Ben-Hadad tell:
\v 3 ‘Yoa silva an yoa gold, dey mines now. An yoa bestes wifes an kids, dey mines now.’-”
\p
\v 4 Da king fo da Israel peopo answa him, “Jalike you tell, you da king, an you da boss fo me. Dis jalike I yoa slave guy, an eryting I get, yoas.”
\p
\v 5 Da messenja guys come again by Ahab. Dey tell um, “Lissen up. Dis wat Ben-Hadad tell: ‘I wen send my guys awready fo tell you give me all yoa silva an gold, an yoa wifes an yoa kids.
\v 6 Dis da deal. Same time tomorrow, I goin send my palace guys by you. Dey goin check out eryting inside yoa palace, an eryting inside yoa palace guys houses too. Dey goin take eryting dat cost plenny an stay real nice, an take um away.’-”
\p
\v 7 Den da Israel king call all da older leadas from da land an he tell, “You guys, wat you tink bout dis?! Dis guy looking fo make trouble, an how he do bad kine tings to us! Wen he send messenjas fo tell me gotta give him my wifes an kids an silva an gold, I neva tell him no.”
\p
\v 8 Den all da older leadas an all da peopo tell da king, “No lissen him! No tell um you goin make how he like!”
\p
\v 9 King Ahab tell da messenja guys from Ben-Hadad, “Go back, tell my boss King Ben-Hadad, ‘Eryting yoa messenja guys wen tell me da firs time dat I gotta do cuz you da boss, I goin do um. But dis ting you tell me today, I no can do dat!’-” So da messenja guys go back tell Ben-Hadad dis.
\p
\v 10 Den Ben-Hadad send back da messenja guys fo tell Ahab, “I make dis promise: I goin bus up da Samaria town! No goin get nuff dirt ova dea fo all my army guys pick up even one hand full. If I no bus up Samaria town, den I like da gods bus me up even mo den dat!”
\p
\v 11 Den da Israel king tell da messenja guys, “Tell yoa king dis: ‘No talk big now! Wait till afta you pau fight, not befo!’-”
\p
\v 12 Wen Ben-Hadad hear dis, him an da odda king guys stay drinking inside dea tents. Right den an dea he tell his officer guys, “Make ready fo attack!” So dey make ready fo attack Samaria town.
\s Ahab Win Agains Ben-Hadad
\p
\v 13 Dat same time, one talka fo God go by King Ahab an tell um, “Lissen up. Dis wat Yahweh tell: ‘You see all da plenny army guys outside dea? Dis wat I goin do. I goin give you da powa fo win ova dem today. Den you goin know fo shua, dat I Yahweh!’-”
\p
\v 14 Ahab aks um, “Who you goin use fo do dis?”
\p Da talka fo God tell, “Lissen up. Dis wat Yahweh tell: ‘Da young guys dat work unda da officer guys from da odda districks, goin do um.’-”
\p Da king tell, “Who goin tell um wen fo attack?”
\p Da talka fo God tell, “You.”
\p
\v 15 Firs ting, Ahab tell da 232 young guys dat work unda da officer guys from da odda districks fo make ready fo fight. Den he tell da 7,000 odda Israel army guys fo make ready too.
\v 16 Noon time, da Israel army guys go outside da town. Same time, Ben-Hadad stay inside one tent drinking an getting pilute wit da odda 32 king guys dat stay help him.
\v 17 Da young guys dat work unda da officer guys from da districks go out firs. Ben-Hadad get guys he wen send fo watch da town, an dey tell um, “Get guys coming outside from Samaria town!”
\p
\v 18 Ben-Hadad tell, “If dey stay come fo make deal fo no fight, grab um an no kill um. If dey stay come fo make war, grab um an no kill um too.”
\p
\v 19 Da young guys dat work unda da officer guys from da districks stay come outside da town, wit da army behind dem.
\v 20 Ery one a da Israel guys pick one Aram guy in front him an kill him. Den da odda Aram guys run away, an da Israel guys chase um. Da Aram king, Ben-Hadad, he run away on top his horse, an some a da horse rida guys do da same ting.
\v 21 Da Israel king an his army guys keep going an wack up da Aram horses an war wagons, an kill plenny Aram guys.
\p
\v 22 Layta, da guy dat talk fo God go by da Israel king an tell um dis: “You gotta make yoa army strong, an make plan watevas you goin do. Cuz nex year same time, da Aram king goin come back an attack you one mo time!”
\s Ben-Hadad Attack One Mo Time
\p
\v 23 Da govmen guys dat work fo da Aram king tell um, “You know, da gods dat da Israel guys pray to, dey da hill kine gods. Az why dey mo strong den us. But nex time, we goin fight um wea da groun stay flat. Den fo shua we goin be mo strong den dem.
\v 24 Dis wat you gotta do: No let da odda king guys stay in charge a dea own army guys! Mo betta put real kine officers ova dea army guys!
\v 25 Dis yoa job, you gotta put togedda one nodda army jalike da one you wen lose. Go get da same numba horse an da same numba war wagon jalike befo time. Den we goin fight da Israel guys on da flat groun. Den fo shua, we goin be mo strong den dem!” Da king lissen to dem an do how dey tell.
\p
\v 26 So da nex year, same time, Ben-Hadad put togedda da Aram army. Dey go Afek town fo fight da Israel guys.
\v 27 Da Israel guys, dey come togedda too, an get ready nuff food fo da fight. Den dey go Afek side fo fight da Aram army guys. On one side, da Israel guys make camp two place, but dey no mo plenny guys. Dey look jalike two small bunch goats ova dea. Da odda side, da Aram guys make camp all ova da land, an dey get plenny guys.
\p
\v 28 Da guy dat know God fo real kine come by da Israel king again. He tell um, “Lissen up. Dis wat Yahweh tell: ‘Da Aram peopo tink dat me, Yahweh, I ony one hill kine god, an dat I no stay da god fo da valleys too. Cuz dey tink lidat, I goin make you win ova all dat big army ova dea. Den all you guys goin know fo shua, dat I Yahweh!’-”
\p
\v 29 Da two armies stay camp in front each odda, seven days. Den, da numba seven day, dey start fo fight. Da Israel guys wen wipe out hundred tousan a da Aram infantry guys, ony one day.
\v 30 Da guys dat no get wipe out, run away Afek town. But ova dea, da town wall fall down on top 27,000 a dem. An Ben-Hadad, he run away to one place inside da town dat get strong wall, an he hide inside one room inside one house.
\p
\v 31 Da guys dat work fo da king tell um, “You know wat? Us guys hear, can trus da Israel kings fo do good kine stuff fo peopo. So, good us guys put burmbag kine clotheses aroun da waist, an ropes aroun oua head. Den we go da Israel king. Maybe he let you live.”
\p
\v 32 Den Ben-Hadad guys put burmbag kine cloth aroun dea waist an ropes on top dea head. Dey go by da Israel king an tell, “Ben-Hadad tell, now you da boss. He tell, ‘Let me live!’-”
\p Den da Israel king tell, “So! He neva mahke! He my brudda!”
\p
\v 33 Ben-Hadad guys figga, az good how da king talk. So dey make like him, an dey tell, “Fo shua, he yoa brudda, Ben-Hadad!”
\p Da Israel king tell, “Go bring um hea.” Wen Ben-Hadad come outside, Ahab tell Ben-Hadad fo come up inside his war wagon.
\p
\v 34 Ben-Hadad tell Ahab, “Da towns my fadda guy wen take away from yoa fadda, I give um back to you. You can put yoa open market places inside Damascus town, jalike my fadda wen put inside Samaria town.”
\p An Ahab tell, “If you make one deal wit me fo do dat, I let you go.” So Ahab make da deal wit Ben-Hadad, den he let um go.
\s One Talka Fo God Poin Finga Ahab
\p
\v 35 One a da guys dat hang out wit da talkas fo God tell anodda talka, “God wen give me one spesho message fo you. You gotta wack me.”
\p Da odda guy tell um, “No way! I no goin wack you!”
\p
\v 36 Da talka fo God tell, “Cuz you no wack me like how Yahweh tell, wen you go way from hea, one lion goin kill you.” An afta da guy go way litto bit, one lion find da guy an kill um.
\p
\v 37 Den da talka fo God find one nodda guy an tell um, “Wack me.” Da guy wack um an da blood come out.
\p
\v 38 Den da talka fo God go stand by da road wait fo da king. He put bandage ova his eye, so nobody know who him.
\v 39 Wen da king come by dea, da talka fo God yell to him. He tell, “Eh boss! I wen go inside da middo wea dey stay fight. One guy come by me wit one Aram prisona. He tell, ‘Watch dis guy real good! If he run away, you goin pay wit yoa life, o you pay fine 75 pound silva!’
\v 40 But layta, wen I stay doing some odda stuff, da Aram guy wen bag!”
\p Da Israel king tell um, “You, da one dat tell how I gotta punish you!”
\p
\v 41 Right den an dea, da talka fo God hemo da bandage from his eye. Da Israel king know who him den. He one a da talkas for God.
\v 42 He tell King Ahab, “Lissen up. Dis wat Yahweh tell: ‘You let one prisona guy go, no matta I Yahweh say you gotta wipe him out! So den, you goin pay wit yoa life cuz you wen let da Aram king go! An you goin lose yoa own peopo, cuz you let him go back to his peopo!”
\v 43 Den da Israel king come real mad an his face hang. He go home Samaria side.
\c 21
\s Nabot An Da Grape Farm
\m
\v 1 Layta, one mo ting happen wit Ahab, da king fo da Samaria peopo. Had one guy Nabot from Jezreel. He get one grape farm dea. Da grape farm stay nea one palace wea da king get ova dea.
\v 2 One time Ahab tell Nabot, “Eh, give me yoa grape farm so can make one vegetable garden ova dea, cuz stay nea my palace. I can give you one mo betta grape farm. O if you like, I can pay you plenny fo da land.”
\p
\v 3 Nabot tell Ahab, “Yahweh no goin let me sell um to you! Cuz dat land stay wit my ohana from my ancesta time till now!”
\p
\v 4 Den Ahab go home. He look real mad, cuz Nabot da Jezreel guy tell um, “I no goin sell um to you! Dat land, stay wit my ohana from my ancesta time till now.” So Ahab go lay down on top his pune`e. His face look at da wall, an he no eat notting cuz he all piss off.
\p
\v 5 Ahab wife Jezebel come inside by him. She aks, “Wassa matta you, aah?! You get mad face, an you no eat notting!”
\p
\v 6 He tell her wat happen: “I wen tell Nabot da Jezreel guy, ‘Sell me yoa grape farm, o if you like, I give you anodda one.’ But he tell me, ‘No! I no goin sell you my grape farm!’-”
\p
\v 7 Jezebel his wife tell um, “Ho! How come you no ack like da king fo da Israel peopo?! Get up an eat! No worry, brah, I take care dat fo you. I goin get da grape farm from Nabot da Jezreel guy!”
\p
\v 8 So Jezebel write some lettas, an she use Ahab name. Den she use Ahab seal fo ery letta so erybody know dey come from da king. She send um to da older leada guys an da town council guys dat live in Nabot town wit him.
\v 9 Dis wat she write:
\q “Tell yoa peopo, make one day fo no eat so can pray. Den wen da peopo come togedda, give Nabot da bestes place in front all da peopo.
\v 10 Den put two no good guys right in front Nabot. Tell dem fo poin finga at him lidis: ‘Eh! Us guys wen hear you tell, dat you like bad tings happen to God, an to da king!’ Den take Nabot outside, an erybody throw stone fo kill him.”
\p
\v 11 So da older leada guys an da town council guys dat live Nabot town, dey do jalike wat Jezebel tell um fo do inside da lettas she wen write to dem.
\v 12 Dey make one day fo no eat so can pray, an dey give Nabot da bestes place in front all da peopo.
\v 13 Den da two no good guys come dea. Dey sit down right in front Nabot. Dey poin finga at Nabot in front all da peopo. Dey tell, “Dis Nabot, he tell he like bad tings happen to God, an to da king!” Den dey all take Nabot outside da town. Dey all throw stone at him, an he mahke.
\p
\v 14 Den da leada guys send somebody by Jezebel fo tell, “Da peopo throw stone at Nabot, an he mahke awready.”
\p
\v 15 Wen Jezebel hear dat dey wen all throw stone an kill Nabot, she tell Ahab, “Get up. Go take ova da grape farm, da one Nabot da Jezreel guy no like sell um to you. Cuz Nabot, he no stay no moa. He mahke awready.”
\v 16 Wen Ahab find out dat Nabot mahke, he go down take ova Nabot grape farm.
\p
\v 17 Den Yahweh give dis message fo Elijah da Tishbe guy:
\v 18 “Go down fo meet Ahab, da king fo da Israel peopo. He live Samaria side, but right now, he stay inside da grape farm dat Nabot wen own Jezreel side. Ahab wen go down dea fo take ova da grape farm.
\v 19 Tell dis to Ahab: ‘Dis, wat Yahweh tell: Fo shua, you wen kill one guy, an den you take ova his farm!’
\p Den tell um dis too: ‘Dis, wat Yahweh tell: Da same place wea da dogs wen suck up Nabot blood, dey goin suck up yoa blood too!’-”
\p
\v 20 Elijah go dea, an Ahab tell, “You da guy dat stay agains me, an now, you find me!”
\p Elijah tell, “Fo shua I find you, cuz you wen go sell out fo do real bad kine stuff dat Yahweh say, no go do!
\v 21 An now, Yahweh tell, ‘Dis me, da one dat goin make real bad kine stuff happen to you! I goin cut off all da peopo dat goin come from you. I goin wipe out ery guy from da Israel peopo dat get yoa blood, no matta dey slave o dey not slave.
\v 22 I goin make da same ting happen fo yoa ohana, dat I wen make happen fo da ohana dat come from Jeroboam Nebat boy, an same ting I wen make happen fo da ohana dat come from Ba`asha Ahijah boy. Az cuz you wen piss me off, an you wen make da Israel peopo do real bad kine stuff.’
\p
\v 23 “An az fo Jezebel, Yahweh tell dis: ‘Da dogs goin eat up Jezebel by da Jezreel town wall.’
\v 24 Da dogs goin eat da Ahab peopo dat mahke inside da town. Da ones dat mahke da country side, da scavenja birds goin eat um.”
\p
\v 25 (Neva have anodda guy like Ahab. He go sell out fo do real bad kine stuff dat Yahweh say fo no do. His wife Jezebel, she push him fo make lidat.
\v 26 Ahab wen go do real pilau kine stuff, cuz he go all out fo da idol kine gods, jalike da Amor peopo wen do. Az why Yahweh wen throw dem outa da land wen da Israel peopo come dea.)
\p
\v 27 But wen Ahab hear dis message from God, he go broke off his clotheses an put on burm bag cloth nex to his skin fo show erybody he stay feel sore inside, an he no eat so he can pray. He even wear burm bag kine cloth wen he lay down sleep. Den he make real quiet wen he go aroun.
\p
\v 28 Den dis message come from Yahweh fo Elijah da Tishbe guy:
\v 29 “You see how Ahab make himself come notting in front me? Cuz he do dat, I no goin make all da real bad kine stuff happen till afta Ahab mahke. But eryting I tell goin happen to da Ahab ohana afta his boy come da king.”
\c 22
\s Jehoshafat an Ahab
\r (Mark 6:34)
\m
\v 1 Had three year, da Aram peopo an da Israel peopo neva make war.
\v 2 Den, afta three year no mo war, King Jehoshafat from Judah side go fo see King Ahab, Israel side.
\v 3 Wen Jehoshafat stay Israel side, Ahab an his helpa guys talk. He tell, “You guys know, da town Ramot Gilead, dass oua land. But da king fo da Aram peopo, he wen take um away from us befo time. An us guys no do notting fo get um back from him!”
\v 4 Den he aks Jehoshafat, “You go wit me fo make war Ramot Gilead side?”
\p Jehoshafat tell da Israel king, “Shua, I go! Me an you, stay real tight. My peopo an my horses, dey stay yoas.”
\p
\v 5 But Jehoshafat tell Ahab dis: “Firs ting, us guys gotta aks Yahweh if az good fo go make war, o not.”
\v 6 So King Ahab tell all da guys dat talk fo his god Ba`al fo come togedda. Get bout 400 dem. He aks dem, “I can go make war agains Ramot Gilead town, o not?”
\p Dey tell um, “Go make war, King Ahab. Oua main god we pray to, goin give you da town.”
\p
\v 7 But Jehoshafat tell, “Ova hea, no mo one talka fo Yahweh, fo us find out wat Yahweh tink, o wat?”
\p
\v 8 King Ahab tell, “Still get one guy I can aks um wat Yahweh tink. But I hate da bugga! Weneva he talk fo Yahweh, he no tell me notting good! He erytime tell bad tings goin happen to me! His name, Mikaiah, Imlah boy.”
\p King Jehoshafat tell, “Eh, brah, no good you talk lidat!”
\v 9 So da Israel king, Ahab, tell one a his palace guys fo come. Ahab tell um, “Quick! Go tell Mikaiah, Imlah boy, fo come right now.”
\s Mikaiah Tell Dat Ahab Goin Mahke
\p
\v 10 Da two king guys, Ahab da king fo da Israel peopo an Jehoshafat da king fo da Judah peopo, wear dea king kine robes. Dey sit on top two throne, wea you go inside da Samaria town gate. Get one wide open place dea wea da peopo come fo take da junks outa da wheat, afta dey cut da wheat down. Dis time, inside dis wide place, all da guys dat talk for dea gods stay in front da two kings, an tell wat dea gods say.
\p
\v 11 Had one a da talkas fo dea gods name Zedekiah, Kena`anah boy, wen make tings dat look like cow horn outa iron. He tell, “Dis wat Yahweh tell. You use dis horns fo bus up da Aram army guys, till you wipe um out!”
\p
\v 12 All da odda talkas fo dea gods, dey stay tell same ting too. Dey tell, “Go attack Ramot Gilead an win da war! Cuz Yahweh goin give da town to oua king!”
\p
\v 13 Da messenja guy dat go fo tell Mikaiah fo come by da king, he tell Mikaiah, “You see how all da guys dat talk fo da odda gods tell da same ting, dat da king goin win da war?! So, good you tell da same ting jalike dem!”
\p
\v 14 But Mikaiah tell, “Jalike fo shua Yahweh stay alive, I stay shua too bout da only ting I goin tell him, is wat Yahweh tell me!”
\p
\v 15 Den Mikaiah come by King Ahab. Da king aks him, “Mikaiah! We goin go attack Ramot Gilead town? O we no do notting?”
\p Mikaiah tell him, “Go attack um an win da war! Cuz Yahweh goin give da town to oua king!”
\p
\v 16 Da king tell um, “How many times I gotta make you promise fo tell me ony da trut, wen you talk fo Yahweh?!”
\p
\v 17 Den Mikaiah tell,
\q “I see, jalike was one dream,
\q2 All da Israel guys running all ova da hills,
\q2 Jalike sheeps dat no mo sheep farma fo take care dem.
\q Yahweh tell me,
\q2 ‘All dis guys, no mo boss fo dem.
\q Let um all go home,
\q2 An let eryting go good fo dem.’-”
\p
\v 18 Da Israel king tell King Jehoshafat, “Jalike I wen tell you, dis Mikaiah guy, weneva he talk fo Yahweh, he no tell me someting good goin happen to me. Ony bad kine stuff!”
\p
\v 19 Den Mikaiah tell some moa: “Az why you betta lissen dis ting wat Yahweh tell!
\q I wen see Yahweh.
\q2 He stay sit on top his throne.
\q All da armies inside da sky,
\q2 Dey stay stand aroun him, on da right side an on da lef side.
\p
\v 20 “Yahweh aks, ‘Who can go bulai King Ahab, so he go attack Ramot Gilead town, an mahke dea?’ Somebody tell one ting, an oddas tell odda tings.
\p
\v 21 “Den one spirit come an stand in front Yahweh, an tell, ‘Me, I goin bulai him.’
\p Yahweh aks him, ‘How you goin do dat?’
\p
\v 22 “Da spirit tell, ‘I goin go ova dea, be one spirit dat make all da talka guys fo his gods bulai him wen dey talk.’
\p “Yahweh tell, ‘Good idea! You goin bulai all dem! Go, do jalike you tell!’
\p
\v 23 “An dass wat you see stay happen right now. Yahweh wen send one spirit fo make all dese guys dat talk fo yoa gods, bulai wen dey open dea mout. Az cuz Yahweh tell, someting real bad goin happen to you!”
\p
\v 24 Den Zedekiah, Kana`anah's boy, go ova dea an slap Mikaiah's head. He tell, “So! How da spirit from Yahweh can leave me, fo go ova dea talk to you, aah?!”
\p
\v 25 Mikaiah tell Zedekiah, “Fo you, you goin know I tell da trut fo real kine, wen you goin run inside one room inside one house fo hide!”
\p
\v 26 Den da king fo da Israel peopo tell his guys, “Take Mikaiah back by Amon, da Samaria mayor guy, an by my boy Joash.
\v 27 Tell um, ‘Dis wat da king tell: Put dis guy in jail. Give um ony jail kine bread an watta, till I come back da winna.”
\p
\v 28 But Mikaiah tell da king, “Fo shua, if bumbye you come back an you okay, dat mean, Yahweh neva give me notting fo tell!” An Mikaiah tell da peopo, “Eh, all you peopo! No foget wat you wen hear!”
\s King Ahab Mahke
\p
\v 29 So, Ahab da king fo da Israel peopo an Jehoshafat da king fo da Judah peopo go togedda fo attack Ramot Gilead.
\v 30 Ahab tell Jehoshafat, “Befo I go fight, I goin dress so nobody know who me. But you, wear yoa regula kine king robe.” So da Israel king dress so nobody know who him, an go fight.
\p
\v 31 Befo dey start fight, da king fo da Aram peopo tell da 32 officer guys dat in charge a his war wagons, wat dey gotta do. He tell um, “No need fight da regula army guys o da officer guys. Jus make shua you kill da one guy, Ahab da Israel king!”
\p
\v 32 So wen da officer guys in charge a da war wagons see Jehoshafat get da king kine robe, dey tink, “Az him! Da Israel king!” So dey turn da war wagons fo go attack him. But den Jehoshafat yell who him,
\v 33 an da officer guys in charge a da war wagons see he not da Israel king, so dey turn away an stop chasing him.
\v 34 But one a da Aram army guys wen shoot one mo arrow, ony fo shoot. Da arrow wen hit Ahab da Israel king in da puka wea da front part a da body armor come togedda wit da side part. Da king tell da army guy dat drive his war wagon, “Turn aroun quick! Get me away from da fighting! I hit!”
\v 35 All day, da two armies stay fight. Da king helpa guys put King Ahab inside his war wagon so he can sit dea an see da Aram army. But Ahab stay bleed plenny, so get blood all ova da bottom a da war wagon. Late aftanoon, Ahab mahke.
\v 36 Wen da sun almos go down, da Israel army guys all start fo yell, “Erybody go back yoa town! Erybody go back yoa land!”
\p
\v 37 Dass how King Ahab mahke. Da army guys bring his body back Samaria town, an dey bury him dea.
\v 38 Da king's guys take da king's war wagon by one watta place Samaria side, wea da wahines dat fool aroun fo money go fo bafe. Da guys wash down da war wagon dea, an da dogs suck up da king's blood, jalike da message from Yahweh wen tell befo time.
\p
\v 39 Had odda stuff happen wen Ahab stay king. All da tings he wen do -- da palace he wen build wit ivory kine decoration, da towns he wen put strong wall aroun -- all dat stay write inside da Record Book Fo Da Kings Fo Israel.
\v 40 Dey bury Ahab by his ancesta guys. Ahab boy Ahaziah come da nex king.
\s Jehoshafat Stay King Judah Side
\p
\v 41 Now, dis, da story fo Jehoshafat, Asa boy. He come king fo da Judah peopo, da numba four year dat Ahab stay king fo da Israel peopo.
\v 42 Jehoshafat was 35 year ol wen he come king, an he stay king Jerusalem side 25 year. His mudda name Azubah, an her fadda Shilhi.
\v 43 Eryting Jehoshafat do, he do um jalike his fadda Asa. He neva go da wrong way, he ony do da kine stuff Yahweh say stay right. Still yet, all da sacrifice place on da top a da hills still stay dea. Da peopo still stay make sacrifice fo da odda gods an burn incense dea.
\v 44 Jehoshafat an Ahab da Israel king, dey neva fight each odda.
\p
\v 45 Had odda stuff happen wen Jehoshafat stay king too. All da tings he wen do -- how him an his army guys fight da odda kings -- all dat stay write inside da Record Book Fo Da Kings Fo Judah.
\v 46 Had guys dat fool aroun wahines fo get money fo da temples fo da odda gods, an dey still stay do dat even afta Asa was da king. Jehoshafat throw out all dem guys outa his land.
\v 47 Dat time, da Edom peopo no mo king. Ony had one territorial govna from Jehoshafat stay in charge ova dea.
\p
\v 48 Jehoshafat wen do anodda ting, he tell his guys fo build plenny big boat, fo carry plenny stuffs far away. He like dem go Yemen side fo Ofir kine gold dat come from ova dea. But da boats neva go dea, dey all sink Ezion-Geber side.
\v 49 Befo da boats go out, King Ahaziah, Ahab boy, tell Jehoshafat, “Let my saila guys go wit yoa saila guys inside da big boats.” But Jehoshafat neva like, so dey no go.
\v 50 Den Jehoshafat mahke, an dey bury him by his ancesta guys inside David Town, az Jerusalem, cuz he come from King David. Jehoshafat boy Jehoram come da nex king.
\s Ahaziah Stay King Israel Side
\p
\v 51 Da numba 17 year Jehoshafat was king Judah side, Ahaziah, Ahab boy, come da king fo da Israel peopo Samaria side. He da king fo da Israel peopo two year.
\v 52 He do stuff Yahweh say az bad, cuz he do jalike his fadda an his mudda. He ack jalike Jeroboam, Nebat boy, ack befo time, da guy dat wen make da Israel peopo do bad kine stuff.
\v 53 Ahaziah get da Ba`al god fo his boss. He go down in front Ba`al an pray to him. He make Yahweh, da God fo da Israel peopo, real mad, cuz Ahaziah ack jalike his fadda Ahab.