\id ezr
\h Ezra
\mt Ezra
\c 1
\s Cyrus Let Da Israel Peopo Go Home
\r (Jeremiah 25:11-12; 29:10-14)
\p
\v 1 Befo time, Yahweh Inside Da Sky wen tell his talka guy Jeremiah fo tell da Israel peopo, “I make dis promise: Bumbye da Babylon peopo goin take you guys away, but I goin bring you back again to yoa land.”
\p Long time afta dat, da firs year dat Cyrus come king fo da Persia peopo, he wen write one letta an send um to all da places wea he da king. Da letta say dis:
\q
\v 2 “Dis King Cyrus, da king fo da Persia land. Yahweh, da God dat live inside da sky, he wen tell me fo take ova all da odda king guys inside da world. He give me da job fo build one temple fo him, inside Jerusalem town, inside da Judah land.
\v 3 All you peopo dat stay pray to da God Yahweh, you can go back now Jerusalem town, inside Judah, fo go build da Temple Fo Yahweh. He da God fo da Israel peopo an he stay live inside Jerusalem. An I like fo yoa God stay wit all you guys!
\p
\v 4 “Da Jewish peopo from any place dat live by you Babylon guys, I like you help dem go home an build dea temple dat stay all bus up now. Give um silva an gold, an animals, an stuff fo eat fo da trip. An give um extra money too, fo God's temple dat dey goin build Jerusalem side.”

\p
\v 5 God make da Israel peopo feel good inside an dey like go back Jerusalem side. He wen even make da pries guys an da helpa guys from da Levi ohana feel good inside an dey like go back, an same ting fo da leada guys fo da Judah an Benjamin ohanas. Dey all like go back Jerusalem side fo build da Temple Fo Yahweh, cuz da Temple stay all bus up.
\v 6 All da peopo dat live aroun dem, help um plenny too. Dey give da Israel peopo plenny bowl an pot, da silva an gold kine, an stuff fo eat fo da trip, an animals. Dey give dem plenny nice gif, an money fo da Temple, cuz dey all like help.

\p
\v 7 Befo time, King Nebukadnezza wen steal all da kine tings dat cost plenny from da Temple Jerusalem side. He wen hide all da stuff inside da temple fo his own gods. Den King Cyrus tell his guys fo go get all dat stuff back.
\v 8 Den King Cyrus tell Mitredat, da guy who take care da money fo da whole Persia govmen, fo go count all da tings from da Jerusalem temple an give um to Sheshbazza (az Zerubbabel), one guy from da Judah king ohana, fo da peopo dat goin go back to da Judah land.
\p
\v 9 Dis was all da tings dat King Cyrus wen give Sheshbazza fo go inside da Temple:
\q2 30 gold tray
\q2 1,000 silva tray
\q2 29 silva pot fo burn incense
\q2
\v 10 30 gold bowl
\q2 410 silva bowl
\q2 1,000 odda tings.
\m
\v 11 Da whole ting, 5,400 silva an gold kine tings. He turn ova all dese tings to Sheshbazza so dat da Israel peopo can take um back Jerusalem side wen dey leave Babylon.
\c 2
\s Da Peopo Dat Go Back Wit Zerubbabel
\p
\v 1 Befo time, King Nebukadnezza army guys wen take da Jewish peopo away fo go live inside aroun Babylon town. Now dey going back Jerusalem town an da odda towns Judah side. Dis da ohana names fo all da peopo going back.
\v 2 Dea leada guys, Zerubbabel, Jeshua, Nehemiah, Seraiah, Re`elaiah, Mordecai, Bilshan, Mispat, Bigvai, Rehum, an Ba`anah.
\p Now, da numbas fo da mens from Israel dat go back:
\q2
\v 3 From da Parosh ohana, 2,172.
\q2
\v 4 From da Shefataiah ohana, 372.
\q2
\v 5 From da Arah ohana, 775.
\q2
\v 6 From da Pahat-moab ohana (da ones dat get Jeshua an Joab fo dea ancestas), 2,812.
\q2
\v 7 From da Elam ohana, 1,254.
\q2
\v 8 From da Zattu ohana, 945.
\q2
\v 9 From da Zaccai ohana, 760.
\q2
\v 10 From da Bani ohana, 642.
\q2
\v 11 From da Bebai ohana, 623
\q2
\v 12 From da Azgad ohana, 1,222.
\q2
\v 13 From da Adonikam ohana, 666.
\q2
\v 14 From da Bigvai ohana, 2,056.
\q2
\v 15 From da Adin ohana, 454.
\q2
\v 16 From da Ater ohana (da ones dat get Hezekiah fo dea ancesta), 98.
\q2
\v 17 From da Bezai ohana, 323.
\q2
\v 18 From da Jorah ohana, 112.
\q2
\v 19 From da Hashum ohana, 223.
\q2
\v 20 From da Gibbar ohana, 95.
\b
\q2
\v 21 Now, da mens from Betlehem town, 123.
\q2
\v 22 From Netofah, 56.
\q2
\v 23 From Anatot, 128.
\q2
\v 24 From Bet-azmavet, 42.
\q2
\v 25 From Kiriath-jearim, Kefirtah, an Be`erot, 743.
\q2
\v 26 From Ramah an Geba, 621.
\q2
\v 27 From Micmash, 122.
\q2
\v 28 From Betel an Ai, 223.
\q2
\v 29 From Nebo, 52.
\q2
\v 30 From Magbish, 156.
\q2
\v 31 From Elam, 1,254.
\q2
\v 32 From Harim, 320.
\q2
\v 33 From Lod, Hadid, an Ono, 725.
\q2
\v 34 From Jericho, 345.
\q2
\v 35 From Sena`ah, 3,630
\p
\v 36 Now, da pries guys dat come back from Babylon:
\q2 From da Jedaiah ohana (da ones dat get Jeshua fo dea ancesta), 973.
\q2
\v 37 From da Immer ohana, 1,052.
\q2
\v 38 From da Pash-hur ohana, 1,247.
\q2
\v 39 From da Harim ohana, 1,017.
\p
\v 40 Now, da helpa guys from da Levi ohana dat come back:
\q2 From da Jeshua an Kadmie`el ohanas (dea ancesta Hodavaiah), 74.
\q2
\v 41 Music guys from da Asaf ohana, 128.
\q2
\v 42 Guys who watch da temple gates from da Shallum, Ater, Talmon, Akkub, Hatita, an Shobai ohanas, 139.
\p
\v 43 Had plenny peopo go back from da odda ohanas dat work inside da temple. Da ancesta guys fo da ones dat go back:
\q2 Ziha, Hasufa, Tabbaot,
\v 44 Keros, Siaha, Padon,
\v 45 Labanah, Hagabah, Akkub,
\v 46 Hagab, Shalmai, Hanan,
\v 47 Giddel, Gahar, Reaiah,
\v 48 Rezin, Nekoda, Gazzam,
\v 49 Uzza, Paseah, Besai,
\v 50 Asnah, Meunim, Nefusim,
\v 51 Bakbuk, Hakufa, Harhur,
\v 52 Bazlut, Mehida, Harsha,
\v 53 Barkos, Sisera, Temah,
\v 54 Nezaiah, an Hatifa.
\p
\v 55 Odda peopo dat go back from Babylon, dey come from da guys dat long time ago work fo King Solomon.
\q2 Dea ohanas: Sotai, Soferet, Peruda,
\v 56 Jaalah, Darkon, Giddel,
\v 57 Shefataiah, Hattil, Pokeret-hazzabaim, an Ami.
\p
\v 58 An 392 odda mens come back, dat come from da ohanas dat wen work inside da temple befo time, an from da guys dat wen work fo King Solomon long time ago.
\p
\v 59 Had odda peopo dat go back Jerusalem town same time. Dey from da small towns Tel-melah, Tel-harsha, Kerub, Addan, an Immer. But dey no can show proof dat dey come from Israel, o dat dea ohanas come from Israel.
\v 60 Was 652 mens dat no mo proof, from da Delaiah, Tobaiah, an Nekoda ohanas.
\p
\v 61 Same ting happen wit three a da pries ohanas. Da Hobaiah, Hakkoz, an Barzillai ohanas wen go back Jerusalem. (Barzillai, befo time he marry one wahine dat come from Barzillai da Gilead guy, an he take her ohana name.)
\v 62 Dey wen look inside da genealogy paypas, fo show wea dea ohana come from. But dey no can find dea ohana name, so da leada guys no let um do pries kine work.
\v 63 Da govna guy, he no even let um eat da food from da sacrifices dat suppose to be fo da pries guys eat. He tell um, gotta wait till get one pries dat get da right fo use da Urim an Tumim fo find out from da God Yahweh wat fo do.
\p
\v 64 So all da peopo dat go back Judah side, was 42,360.
\v 65 Had 7,337 worka guys an wahines, an 200 singa guys an wahines too.
\v 66 Dey take wit um 736 horse, 245 mule,
\v 67 435 camel, an 6,720 donkey.
\p
\v 68 Wen all da peopo come to Jerusalem wea da Temple Fo Yahweh stay, some a da ohana leada guys give plenny money. Dey like da leada guys use dat money fo help build one new temple fo God, right dea on top da same place wea da odda temple stay befo time, befo da Babylon army guys bus um up.
\v 69 Ery ohana leada guy give eryting he can give. Da whole ting, was 61,000 gold coin, 6,250 pound silva, an 100 fancy robe fo da pries guys.
\p
\v 70 So den, da pries guys, an da helpa guys from da Levi ohana, da singa peopo, da guys dat watch da Temple gate, da worka guys fo da temple, an some a da regula peopo wen go da small towns nea Jerusalem. Da odda peopo go da towns inside da Judah land wea dey come from.
\c 3
\s Da New Altar Fo Sacrifices
\p
\v 1 Dat year Octoba, afta all da Israel peopo pau make house inside dea towns, dey all come togedda Jerusalem town, jalike dey one.
\v 2 Dat time, Jeshua Jehozadak boy an some a da odda pries guys, an Zerubbabel Shealti`el boy an his ohana, dey start fo build da altar fo God fo da Israel peopo. Befo time da Babylon army guys wen bus up da altar, but now da Israel peopo like make sacrifice fo God on top da altar, jalike Moses, God's guy from long time ago, wen give um da Rules fo do.
\v 3 No matta da peopo scared a da peopo from odda place dat come dea afta da Babylon army guys take away da Israel peopo befo time, dey wen make one new altar, da same place wea was da ol alta dat wen get bus up. Right den an dea dey start fo make sacrifice fo Yahweh on top da new altar, da kine sacrifice you burn up da whole animal. Dey make um ery day, morning time an evening time.
\p
\v 4 Den, jalike da Rules from Moses tell, dey start da religious times too. Firs ting, dey do da spesho religious Time Fo Live Inside Shacks, an make da kine burn up sacrifice fo ery day, fo dat spesho time.
\v 5 Afta dat, ery time get new moon, dey make da burn up kine sacrifices dey suppose to make dat time, too. An same ting fo da odda spesho religious times dat Yahweh befo time tell um dey suppose to make. Jus cuz dey like do someting spesho fo Yahweh, dey bring dea animals fo make odda kine sacrifices.
\v 6 Fo fifteen days befo da Time Fo Live Inside Shacks start, da pries guys make da kine burn up sacrifice ery day fo Yahweh, even befo dey start fo put da foundation fo da new Temple Fo Yahweh.
\s Da New Temple
\p
\v 7 Den da peopo go find stone worka guys an carpinta guys. Dey buy plenny cedar tree from da Tyre an Sidon peopo, an pay um wit food, wine, an olive oil. Da guys dat cut da tree bring um down from da Lebanon mountain an float um nea da shore inside da Mediterranean Sea, all da way to Joppa town, cuz King Cyrus awready tell um dey can do dat.
\p
\v 8 In da numba two year afta dey come back Jerusalem town, aroun March, dey start fo build da Temple Fo God. Da worka guys was erybody dat wen come back from Babylon. Zerubbabel Shealti`el boy, Jeshua Jehozadak boy an all da odda pries guys, an all da pries helpa guys from da Levi ohana, dey all work jalike da odda guys. Dey make da Levi ohana guys dat stay twenny year an older, be da luna guys fo build da Temple Fo Yahweh dat stay all bus up.
\v 9 Da pries guys dat come from Hodavaiah (dass Jeshua an his boys an ohana guys, an Kadmi`el an his boys), dey da ones in charge a da worka guys inside da Temple.
\p
\v 10 Afta da builda guys pau make da foundation fo da Temple Fo Yahweh, da pries guys wen put on dea pries kine robe. Dey stand da place dey suppose to an blow dea trumpets. Da Levi ohana guys dat come from Asaf, dey bang cymbals fo tell good tings bout Yahweh, jalike King David befo time wen say dey suppose to do.
\v 11 Dey tell good tings bout Yahweh, an tell um “Mahalo plenny!” an dey sing fo Yahweh lidis:
\q “Yahweh, he good!
\q2 He stay tight wit us Israel peopo, foeva!”
\m Den all da peopo yell plenny loud an tell good tings bout Yahweh, cuz now da Temple Fo Yahweh get foundation.
\p
\v 12 But plenny pries guys an Levi ohana guys an leada guys dat was older, dey wen rememba how da firs Temple stay befo wen come bus up. Az why dey cry plenny wen dey see da foundation fo da new Temple. But da younga peopo, dey yell plenny cuz dey stay real good inside.
\v 13 Peopo dat stay far from dea can hear da big noise, some a dem yelling cuz dey stay good inside, an some a dem crying plenny!
\c 4
\s Da Odda Peopos No Like Dem Build Da Temple
\p
\v 1 Da odda peopo dat not Jews, dat awready stay dea, dey stay agains da Judah an Benjamin peopo. Dose guys find out, da peopo dat come back from Babylon wen start fo build one new Temple Fo Yahweh, da God fo da Israel peopo.
\v 2 Cuz a dat, da peopo dat not Jews go by Zerubbabel an da odda leada guys. Dey tell, “Let us work wit you guys fo build da Temple. Cuz us guys pray to yoa God, jalike you guys. From da time King Esarhaddon bring us ova hea from Assyria side, us guys stay make sacrifice to yoa God.”
\p
\v 3 But Zerubbabel, Jeshua, an da odda leada guys fo da Israel peopo tell um, “Dis job fo build da temple, az fo us guys, not fo you guys. Ony us guys, da ones dat goin build da Temple Fo Yahweh, da God fo us Israel peopo. Cuz dass how King Cyrus Persia side wen tell us we gotta do.”
\p
\v 4 From dat time, da odda peopos dat not Jews dat live aroun dea make da Judah peopo lose fight, an try fo make um real scared so dey no go work.
\v 5 Da odda peopos pay some guys fo teach dem da bestes way fo mess up da work da Judah peopo get plan fo do, an dey make um stop da work. Fo long time dey do all dis kine stuff, from da time Cyrus was da big king Persia side, till afta Darius Numba Two take ova.
\s Sixty Years Layta, Da Odda Peopos Try Fo Stop Da Building Again
\p
\v 6 (Long time afta dat, same ting wen happen one mo time. Anodda king name Xerxes wen come da big king Persia side. Da peopo dat stay agains da Judah peopo write one nodda letta fo send to King Xerxes, fo poin finga da Judah an Jerusalem peopo.
\p
\v 7 An layta, wen Artaxerxes come da big king fo da Persia land afta King Xerxes, da peopo dat stay agains da Judah peopo do da same ting one mo time. Dea leadas was Bishlam, Mitredat, an Tabe`el. Dey use da Aram language fo write da letta. Wen da letta get to Persia, da peopo dea wen make um in da Persia language so da big king ova dea can read um.
\v 8 Dea main govmen guy fo Judah, Rehum, an da secretary fo da court, Shimshai, wen write one letta fo King Artaxerxes, an tell him bout da tings dat stay happen Jerusalem side.
\v 9 Inside da letta, da peopo dat live aroun Jerusalem send dea aloha to da king an all his friends -- from da main govmen guy Rehum an Shimshai da court secretary, an all da judge guys, da local leada guys, da peopo from Tappel, da Persia peopo, an da peopo from Babylon town, Erech town, an Susa town (dass da main town Elam side).
\v 10 Dey send aloha from all da odda peopo dat da big an importan king Ashurbanipal wen take outa dea land befo time, an make um go live Samaria side, an all ova da Wes Eufrates Side. Dis, da letta dey wen write fo Artaxerxes:
\q
\v 11 “Aloha. Dis letta fo King Artaxerxes, from da peopo dat stay stick wit you, an dat live inside da Wes Eufrates Side.
\b
\q
\v 12 “We like you know dis: Da Jewish peopo dat wen come hea Jerusalem town from Babylon, dey stay building one big town. Dey no like do wat da king tell um, cuz dey real bad peopo. Dey awready put da foundation fo da strong walls aroun da town, an dey almos pau put up da wall.
\m
\q
\v 13 “But we like you know one nodda ting too: If dey build dis town dat was all bus up, an if dey finish da walls, no goin be good fo you. Da Jewish peopo no goin pay you da tax money, no matta you da King.
\p
\q
\v 14 “Us guys like stick wit you, cuz you oua King. We no like see peopo like da Jewish guys, dat no show respeck fo you. Az why we stay send dis letta, so you goin know wat dey doing.
\b
\q
\v 15 “Good if you look inside da court records dat yoa ancesta guys wen write. You goin find out how da peopo from dis big town wen like throw out da govmen from Babylon side befo time. Az why da Babylon kings wen send dea army guys fo wipe out da town. From long time ago, da Jerusalem peopo make trouble agains all da diffren countries dat wen take um ova, an agains dea king guys.
\v 16 We telling you now, dat if dey pau build dis town one mo time an put up strong walls all aroun, you no goin stay in charge da Wes Eufrates Side.”
\p
\v 17 King Artaxerxes wen write dis letta back to dem:
\q “Aloha. Dis letta fo Govna Rehum, Court Secretary Shimshai, an dea peopo dat stay live Samaria town an all ova da Wes Eufrates Side.
\b
\q
\v 18 “Da letta you guys wen send me, peopo hea wen make um so dey can read um to me, my language.
\v 19 I wen tell my peopo fo look inside da court records. Jalike you tell, befo time Jerusalem town was one place dat from long time make war wit plenny kings. Dey go agains da kings an talk stink bout da govmen an dey do dat all da time!
\v 20 Da kings from dat side dat wen live inside Jerusalem an da whole Wes Eufrates Side, dey was strong, and dey get plenny tax money from ova dea dat side.
\b
\q
\v 21 “So, tell da Jerusalem peopo dat me, da Big King, say dat dey gotta stop working. Wen bumbye I tell um fo build, den dey can! But dass da ony way dey goin build up dat town dat stay all bus up.
\v 22 Tell um dey gotta stop. No good us guys let um take ova an jam up eryting fo me, da King!”
\p
\v 23 Wen dat letta from King Artaxerxes come back to Rehum, Shimshai, an da odda guys, dey go right away to Jerusalem town, an dey make da Jewish peopo stop fo build. Dass wat wen happen all ova again, plenny years afta da Zerubbabel guys wen do dea work.
\s Zerubbabel Start Fo Build One Mo Time
\p
\v 24 Da peopo wit Zerubbabel, dey get plenny presha from da odda peopos dat live aroun dea. Az how dey stop working fo build da Temple Fo God Jerusalem side. So notting happen ova dea from King Cyrus time, till da year numba two afta King Darius come da big king Persia side.
\c 5
\p
\v 1 Dat time, had two guys, Haggai an Iddo's boy Zekaraiah, dat stay talk fo da God fo da Israel peopo. Dey talk to da Jewish peopo Judah side an Jerusalem town.
\v 2 Cuz a wat dey tell, Shealtiel's boy Zerubbabel an Jehozadak's boy Jeshua start fo build da Temple Fo God inside Jerusalem again. Da two guys dat stay talk fo God, dey stay by Zerubbabel an Jeshua an help dem. 
\p
\v 3 Az why Tatnai, govna fo da Wes Eufrates Side, an Shetar-boznai, an dea helpa guys wen come Jerusalem. Dey tell Zerubbabel guys, “Eh! Who say you guys can build dis Temple dat was all bus up, an fo finish da place, aah?!”
\v 4 Da govna guys tell Zerubbabel guys dey gotta give um da names fo all da peopo dat stay work fo build da Temple.
\v 5 But God, dis how he take care da Jewish leada guys: Da govna guys like tell da Jews dey no can build, but dey neva tell um yet, cuz firs, dey gotta make report fo King Darius Persia side, den, dey gotta wait fo da King write dem back one letta.
\s Govna Tatnai Write Letta To King Darius
\p
\v 6 Dis, da letta dat Tatnai da govna fo da Wes Eufrates Side wen write, togedda wit Shetar-boznai an da odda govmen guys from da Wes Eufrates Side. Dey send um to King Darius:
\q
\v 7 “Dis letta fo King Darius. We like eryting go good fo you.
\b
\q
\v 8 “Us guys like you know, we wen go da place wea dey stay build da Temple Fo Da Big God, Judah side. Dey using cut stone block an big kine beam fo da walls. Erybody stay work hard, an eryting going good.
\v 9 So we talk to dem, and aks um, ‘Who wen tell you guys can build dis Temple again dat was all bus up, an finish da place?’
\v 10 An we tell da Jewish leadas fo give us guys da names fo all dea leada guys, so we can write down fo you who stay in charge.
\q
\v 11 “Dis wat da Jewish leadas wen tell us: ‘Us, we da worka guys fo da God dat stay in charge a da sky an da world. We stay build dis Temple dat wen get all bus up. Long time ago, one big king fo da Israel peopo wen build um.
\v 12 But our ancesta guys wen do plenny kine stuff dat make da God in da sky come huhu wit us. So God wen let King Nebukadnezza from Babylon take ova dem. Dat king wen tell his guys fo bus up dis Temple an make da peopo move Babylon side.
\b
\q
\v 13 “Da year King Cyrus come King fo Babylon, he make one govmen paypa dat tell, good fo build dis Temple one mo time.
\v 14 Had plenny gold an silva tings dat King Nebukadnezza wen take outa da Temple Jerusalem side. He wen bring um inside da Babylon temple. King Cyrus wen take all dat stuff outa da temple Babylon side, an turn um ova to one guy name Sheshbazza. Den he make dat guy da territorial govna fo da Judah land.
\v 15 King Cyrus wen tell Sheshbazza, “Go take all dis stuffs, an put um inside da Temple Jerusalem side. Den you guys go build da House Fo God one mo time, same place jalike befo time.”
\v 16 So dis guy Sheshbazza, he come ova hea an make da foundation fo da House Fo God inside Jerusalem. From dat time till now, da peopo stay work, but still not pau yet.’
\m
\q
\v 17 “So den, King Darius, if you tink az good, tell yoa peopo fo look inside da records fo da kings ova dea Babylon side. Tell um fo find out if az right, dat King Cyrus wen make one govmen paypa dat say can build da House Fo God Jerusalem side. So wateva good fo you, tell us guys, cuz you da King.” 
\c 6
\s King Darius Numba Two Send Letta
\p
\v 1 So King Darius tell his peopo fo go look inside da Babylon records. (Dis da odda King Darius granson.)
\v 2 But dey neva find notting dea. Dey find um Medea side, inside da town wit da strong walls dat dey call Ekbatana. Dey find one paypa dat stay roll up. An dis wat da paypa say:
\q Govmen Paypa:
\q
\v 3 Da firs year Cyrus was King, he make dis govmen paypa bout da House Fo God Jerusalem side: “Gotta build da Temple one mo time, da same place wea befo time da Jewish peopo make dea sacrifices. Keep da foundation same size jalike befo time. Make um 45 feet wide, 90 feet long, an 30 feet high.
\v 4 Use cut stone blocks, three course high, den one course wood, den stone, den wood, lidat. Use da King's money fo pay fo eryting.
\v 5 Get plenny gold an silva tings from da House Fo God. Befo time, King Nebukadnezza wen take dem outa da Temple dat wen stay Jerusalem side, an bring um Babylon side. So, take all dat stuff back to Jerusalem an put um inside da Temple Jerusalem side, jalike dey wen stay befo time inside da House Fo God.” Dass wat King Cyrus write befo time.
\p
\v 6 King Darius Two send dis message:
\q “Dis letta fo Govna Tatnai, Wes Eufrates Side, an fo Shetar-boznai, an all you odda friends an offisho govmen guys, Wes Eufrates Side:
\q “You betta not go dea Jerusalem side!
\v 7 No bodda da work dey stay doing fo build da House Fo God. Let da Judah territorial govna guy an da Jewish leada guys build dis House Fo God one mo time, da same place jalike befo time.
\q
\v 8 “But dis wat I telling you guys fo do: Go help da Jewish leada guys fo build da Temple Fo God one mo time. Take da tax money dat you guys stay take fo me ova dea Wes Eufrates Side, an pay fo all da work. No wase time, no good dey gotta stop da work.
\v 9 Wateva da pries guys need Jerusalem side, give um -- young boy kine cows, boy an girl kine sheeps fo make sacrifice fo Da God Dat Stay Inside Da Sky. Make shua dey get da wheat, salt, wine, an olive oil dat dey need ery day,
\v 10 so dat dey can make da kine sacrifices dat Da God Dat Stay Inside Da Sky like, an dey goin pray fo me da King fo stay alive, an fo my boys.
\b
\q
\v 11 “Anybody go change dis an no do how I tell um, you guys gotta pull one beam outa dat guy's house, make um sharp one side, den poke um thru da guy's body fo kill um. Bus up da guy house an make um one rubbish pile.
\v 12 God wen pick Jerusalem town fo be da place wea peopo can come cuz dey know wat kine god him. So den, if any king, o any peopo, change dis ting wat I say hea, o if dey bus up dis Temple Jerusalem side, I like da God fo da Jewish peopo, bus up dem. Dis me, King Darius, dat stay tell you all dis. So do um, and no wase time!”
\s Dey Give Da Temple To God
\p
\v 13 Den, cuz a wat King Darius wen tell dem, Govna Tatnai, Shetar-boznai, an dea helpa guys wen go do eryting King Darius tell um fo do, right den an dea.
\v 14 So da Jewish leada guys neva stop working. Da guys Haggai an Zekaraiah Iddo boy, dat talk fo God, dey wen give good words to da leada guys wen dey teach. Afta long time, dey pau build da Temple, jalike da God fo da Israel peopo wen tell um fo do, an jalike da Kings fo da Persia peopo, Cyrus, Darius, an Artaxerxes wen tell um fo do.
\v 15 Dey pau build da Temple March 12, da numba 6 year dat Darius was King.
\p
\v 16 Den dey make one spesho day fo give da Temple to God. Da Israel peopo -- dass da prieses, da Levi ohana guys, an all da odda peopo dat come back from Babylon -- dey feel real good inside.
\v 17 Fo give da Temple to God, dey make plenny sacrifice. Dey kill hundred young boy kine cows, two hundred boy kine sheeps, an four hundred baby sheeps. Dey bring twelve boy kine goats fo make sacrifice fo take away da shame fo all da bad tings dey wen do, one goat fo ery one a da twelve Israel ohanas.
\v 18 Den dey put da mens fo da pries guys work togedda inside da Temple Fo God Jerusalem side, an same ting fo da Levi ohana peopo dat help da prieses. Dey do um jalike da Rules say, eryting dat Moses wen write down fo dem inside his book.
\s Da Spesho Passova Day
\p
\v 19 April 21, da peopo dat come back from Babylon all eat da Passova food.
\v 20 Dey can do dat, cuz all da pries guys an dea helpas from da Levi ohana wen awready make da right sacrifices fo come so dey can go in front God. Az why dey can work inside da Temple. Da pries guys wen kill da bebe sheeps fo da Passova food, fo all da peopo dat come back from Babylon, an fo da odda pries guys, an fo demself.
\v 21 All da Israel peopo dat wen come back from Babylon wen eat da Passova food. Odda peopo from da Judah land, dat wen stop do all da pilau kine stuff dat dea peopos stay do, an dey come jalike da Israel peopo an pray to dea God, Yahweh, dey eat da Passova food too.
\v 22 Fo seven days, dey all wen make da spesho kine time fo Da Bread Dat No Mo Yeast Inside, an dey feel real good inside cuz a dat. Yahweh make um feel good inside, cuz he wen make King Darius come nice an tink diffren bout da Israel peopo den he tink befo time. Az why King Darius help um fo build da House Fo Da God Fo Da Israel Peopo, one mo time.
\c 7
\s Ezra Come Jerusalem Side
\p
\v 1-5 Long time afta da Temple pau build, an Artaxerxes was da King Persia side, had one guy Ezra. He come from da pries ohana. Ezra ancesta guy Aaron was da firs main pries. Den afta him come Aaron's boy Eleazar, den Finehas, den Abishua, den Bukki, den Uzzi, den Zerahiah, den Meraiot, den Azariah, den Amariah, den Ahitub, den Zadok, den Shallum, den Hilkiah, den anodda Azariah, den Seraiah. Ezra, he get Seraiah blood.
\p
\v 6 An Ezra, he know plenny bout da Rules dat Yahweh, da God fo da Israel peopo, wen give to da Israel peopo befo time. An Ezra know how fo teach um. Yahweh, da God dat Ezra pray to, like do good tings fo Ezra, an help um plenny. Az why King Artaxerxes wen give Ezra eryting he aks the king fo give him. So dat time, Ezra wen leave Babylon an go Jerusalem.
\v 7 Da numba seven year dat Artaxerxes stay King, some a da Israel peopo from Babylon wen go wit Ezra, an some a da pries guys an da pries helpa guys from da Levi ohana, an da guys dat play da music, da guys dat get da job fo watch da Temple gates, an da guys dat stay work fo da Temple. An dey all go Jerusalem togedda.
\p
\v 8-9 Ezra an da odda peopo wen leave Babylon April 8, dat year. Dey reach Jerusalem dat same year Augus 4, cuz da God dat Ezra pray to, like do good tings fo Ezra an help um plenny.
\v 10 God like Ezra plenny, cuz Ezra erytime make up his mind fo study da Rules dat Yahweh wen give da peopo, an do eryting God say, an teach da Israel peopo da Rules an all da tings God say cuz he da judge.
\s Da Letta Dat King Artaxerxes Give Ezra
\p
\v 11 Befo Ezra da pries leave Babylon, King Artaxerxes wen give one letta to him, cuz he da one wen study da tings Yahweh say da Israel peopo gotta do an da Rules Yahweh wen give dem. Dis wat da letta say:
\q
\v 12 “Aloha! Dis letta from me, King Artaxerxes, da king ova all da odda king guys. I write um fo Ezra da pries guy, da one dat teach da Rules from da God Inside Da Sky.
\m
\q
\v 13 “Dis wat I tell: Any Israel peopo dat live inside da places wea I stay da King, if any a dem like go back Jerusalem side wit you, no matta dey prieses, o Levi ohana peopo, o regula peopo, az okay fo dem go.
\v 14 Me an my seven guys dat help me know wat fo do, we talk bout wat you goin do. An now, we like you fo go find out how eryting stay Judah side an Jerusalem side. You know da Rules from yoa God plenny. Tell me if da peopo ova dea stay do wat da Rules say.
\v 15 We like you take silva an gold wit you, an we stay give you plenny so you can make sacrifice to da God fo da Israel peopo, da God dat stay Jerusalem side.
\b
\q
\v 16 “Wateva silva an gold da peopo all ova da Babylon side give you, an wateva yoa peopo an dea pries guys give you fo build da Temple fo dea God inside Jerusalem, take dat too.
\v 17 Wit da money dat you get, you gotta buy boy kine cows, boy kine sheeps, bebe sheeps, an wheat an wine, fo make sacrifices on top da altar inside da Temple fo yoa God ova dea inside Jerusalem.
\v 18 If still yet get some mo money afta wat you wen buy fo make da sacrifices, den pray fo find out wat yoa God like fo you an yoa guys do wit da extra money, an go do um.
\v 19 Us guys give you plenny tings fo put inside da Temple fo yoa God, fo use dea. Make shua you put eryting inside da Temple fo da God Dat Stay Live Inside Jerusalem.
\v 20 An if you need odda tings fo da Temple fo yoa God, you can use some a da tax money dat da govmen guys take fo me, da King.
\b
\q
\v 21 “Fo all you govmen guys dat take care da money fo me inside da Wes Eufrates Side, me, King Artaxerxes, tell you guys fo do: Give Ezra wateva he aks you guys fo give him. Cuz he one pries, an he teach da Rules from da God Inside Da Sky.
\v 22 Give him up to 7,500 pound silva, nuff wheat dat need 100 donkeys fo carry, nuff wine dat need 100 donkeys fo carry, same ting fo da olive oil, an all da salt he need.
\v 23 Eryting dat Da God Inside Da Sky say do fo his Temple, make shua you guys do um. Cuz no good, make dat God come huhu wit me o wit my boys!
\v 24 An one mo ting: Fo da pries guys, dea helpa guys from da Levi ohana, da music guys, da security guards, da worka guys inside da Temple, o odda guys dat stay work fo God's Temple, you govmen guys no mo da right fo tell dem dat dey gotta pay da regula tax o da tax you pay fo bring tings from odda places, o land tax.
\m
\q
\v 25 “An you, Ezra, yoa God help you know wat fo do erytime. So, pick guys dat know how fo bring peopo back togedda wen dey huhu, an judge guys too. Dey goin judge all da peopo dat know da Rules from yoa God inside da Wes Eufrates Side. Da peopo ova dea dat donno da Rules, you gotta teach dem da Rules.
\v 26 Anybody dat no like do wat da Rules from yoa God tell, o da rules dat I make cuz I da King, go punish dem right den an dea -- kill um, o throw um outa yoa land, o take da tings dey own, o put um inside jail.”
\s Ezra Tell Good Tings Bout Yahweh
\p
\v 27 Den Ezra tell: “I like tell erybody good tings bout Yahweh, da God fo oua ancesta guys. He da one dat wen make King Artaxerxes help fix da Temple Fo Yahweh, Jerusalem side, an make um real nice!
\v 28 An I like tell erybody mo plenny good tings bout Yahweh still yet, cuz he wen show erybody dat he stay stick wit his peopo. Yahweh wen make me come tight wit da King, an da guys dat help him know wat fo do, an all da odda govmen peopo!
\p
Yahweh, da God I pray to, he like do good tings fo me, an help me plenny. Az why I wen get togedda da leada guys fo da Israel peopo fo come go Jerusalem wit me.
\c 8
\s Da Peopo Dat Come Back From Babylon Wit Ezra
\p
\v 1 Dis da ohana names dey wen write down, fo da ohana leada guys dat come back wit me from Babylon. Dat time, Artaxerxes was da king.
\q
\v 2 From da Finehas ohana: Gershom.
\q From da Itamar ohana: Daniel.
\q
\v 3 From da David ohana: Hattush Shekanaiah boy.
\q From da Parosh ohana: Zekaraiah, an dey write down 150 odda guys too from dat ohana.
\q
\v 4 From da Pahat-Moab ohana: Eliho`enai Zerahaiah boy, wit 200 odda guys.
\q
\v 5 From da Zattu ohana: Shecanaiah Jahazi`el boy, wit 300 odda guys.
\q
\v 6 From da Adin ohana: Eben Jonatan boy, wit 50 odda guys.
\q
\v 7 From da Elam ohana: Isaiah Atalaiah boy, wit 70 odda guys.
\q
\v 8 From da Shefataiah ohana: Zebedaiah Michael boy, wit 80 odda guys.
\q
\v 9 From da Joab ohana: Obadaiah Jehi`el boy, wit 218 odda guys.
\q
\v 10 From da Bani ohana: Shelomit Josifaiah boy, wit 160 odda guys.
\q
\v 11 From da Bebai ohana: Zekaraiah Bebai boy, wit 28 odda guys.
\q
\v 12 From da Azgad ohana: Johanan Hakkatan boy, wit 110 odda guys.
\q
\v 13 From da Adonikam ohana: Elifelet, Jeiel, Shemaiah, wit 60 odda guys. (Dey no come wit da oddas, dey come afta.)
\q
\v 14 From da Bigvai ohana: Utai an Zabbud, wit 70 odda guys. All dese, da guys wen come back wit me.
\s Ezra Guys Make Ready Fo Go
\p
\v 15 Befo we go, I wen tell erybody fo come togedda by da Ahava Watta Ditch. All us guys make camp dea three days. I check da names fo da pries guys an fo da regula peopo. I find out, dat no mo nobody goin go from da pries helpa guys from da Levi ohana!
\v 16 So I send peopo fo tell da leada guys Eliezer, Ariel, Shemaiah, Elnatan, Jarib, da odda Elnatan guy, Nathan, Zekariah, an Meshullam, fo meet wit me. I send odda guys fo tell Joiarib an one nodda Elnatan guy fo come too, cuz dey know wat fo do erytime.
\v 17 Den I tell all dose guys fo go by Iddo, da leada fo da Levi ohana peopo Kasifia side, an talk to Iddo an his ohana peopo an da guys from Kasifia side dat suppose to work inside da Temple. Dey suppose to aks Iddo guys fo send us some Levi guys fo work inside da Temple Fo Oua God, Jerusalem side.
\p
\v 18 Da God us guys pray to, he like do good tings fo us, an help us plenny. Dass why dey send us one guy Sherebaiah, wit his bruddas an dea boys,  all togedda 18 guys. Sherebaiah guys, dey da kine guys dat undastan plenny stuff. Sherebiah come from Mahli, an Mahli come from Levi, Israel boy.
\v 19 Dey send one nodda guy Hashabaiah, an Jeshaiah dat come from Merari, wit his bruddas an dea boys, all a dem 20 guys.
\v 20 Dey send 220 guys fo work inside da Temple too. (Befo time, King David an his govmen guys wen set up da Temple worka guys fo help da Levi guys.) Dey write down all dea names.
\s Dey Pray Befo Dey Go
\p
\v 21 By da Ahava Watta Ditch, I tell erybody fo no eat so dey can pray, an fo come togedda in front God an show dat we need him plenny. We aks God fo take us to Jerusalem, fo watch us an nobody get hurt -- us guys, our kids, an all da stuffs we taking wit us.
\v 22 I shame aks da King fo send army guys an horse rida guys fo go wit us and make shua nobody come agains us guys wen we stay going. Cuz us guys wen tell da King befo time, “Oua God, he stay take care all da peopo dat stay pray to him, but he stay huhu an make strong agains all da peopo dat ack jalike he notting.”
\v 23 Dass why us guys skip food so we can pray. We aks God plenny fo take care us. An he lissen, an he take care us.
\s Ezra Pick Pries Guys Fo Take Care Da Temple Stuffs
\p
\v 24 Den I wen pick twelve a da main pries guys: Sherebaiah, Hashabaiah, an ten odda leada guys from da prieses.
\v 25 I make dem in charge a da Temple kine stuffs, da silva, da gold, da gold bowls. Had plenny odda stuffs dat da king an his leada guys, an da Israel peopo dat was dea, wen give us guys fo put inside da Temple Fo God.
\v 26 Wen I give dem all da stuffs dat cos plenny dat we goin take, I weigh eryting. Dis how much eryting weigh:
\q Silva, 24 ton.
\q Tings made wit silva, 7,500 poun.
\q Gold, 7,500 poun.
\q
\v 27 Gold bowl, 20, dat cost 1,000 piece gold money from Persia.
\q Tings made wit da bestes kine bronze metal, shiny kine jalike one mirra, cos plenny jalike dey was gold.
\p
\v 28 I tell da pries leada guys: “You guys stay real spesho fo Yahweh now. Same ting wit all dese tings fo da Temple, dey spesho fo Yahweh too. All dis silva an gold kine stuff, da peopo wen take um to Yahweh, cuz dey like. He da God dat oua ancesta guys wen pray to.
\v 29 Take good care all dis tings. Wen you come to Jerusalem, go check how much dey weigh fo make shua you neva lose notting. Weigh eryting in front da main pries guys, da Levi ohana guys, an da leadas fo da Israel ohanas, right dea by da storage places fo da Temple Fo Yahweh, ova dea inside Jerusalem.”
\p
\v 30 Afta dey weigh eryting, da pries guys an da Levi ohana guys take all da silva an gold kine stuff inside da Temple Fo God inside Jerusalem.
\s Ezra Guys Go Jerusalem Togedda
\p
\v 31 April 19, we leave our camp nex to da Ahava Watta Ditch, fo go Jerusalem. Da God us guys stay pray to, like do good tings fo us an help us plenny. Az why God wen take care us guys all da way. Da peopo dat like go agains us guys an da guys dat like jump us, he no let dem hurt us.
\v 32 Den we reach Jerusalem an res dea three days.
\s Dey Give Da Stuffs Fo Da Jerusalem Temple To Da Prieses
\p
\v 33 Da numba four day afta we come Jerusalem, we go da Temple Fo Oua God. Ova dea we weigh da silva metal an da gold metal an all da bowls an odda tings. We give eryting to Meremot Uriah's boy, da pries guy, an to Eleazar Finehas boy. Two a da Levi ohana guys, Jozabad Jeshua's boy an Noadaiah Binnui's boy, dey wen check um too.
\v 34 Dey wen count eryting an weigh eryting fo make shua us guys no lose notting. Right den an dea, dey make da Temple record, dat tell how much da whole ting weigh.
\p
\v 35 Den, all da peopo dat wen come back from Babylon bring animals fo make sacrifice. Dey make da kine sacrifice dat you burn up eryting fo da God Fo Da Israel Peopo -- 12 boy kine cows fo all da Israel peopo, 96 boy kine sheeps, 77 bebe sheeps. Dey kill 12 boy kine goats fo hemo da shame fo da bad kine tings dey wen do. Ery one a da sacrifice, dey burn um all up.
\v 36 Den dey take da lettas from da King dat tell da govmen guys wat dey gotta do. Dey give da lettas to da King helpa guys, an da territorial govna guys fo da Wes Eufrates Side. Da govmen peopo wen do plenny kine stuff fo help da peopo, an fo build da Temple Fo God.
\c 9
\s Ezra Hear Bout Guys Dat Marry Wahines Dat Not Jews
\p
\v 1 Wen all dat pau, da leada guys come by me. Dey tell, “Da Israel peopo, prieses and Levi ohana guys an regula kine peopo, dey no ack like dey spesho fo God. Dey stay come jalike da odda peopos dat donno God, dat live inside dis land an odda lands. Oua peopo stay do da same pilau kine stuff jalike da Canaan peopo, da Het peopo, da Periz peopo, da Jebus peopo, da Ammon peopo, da Moab peopo, da Egypt peopo, an da Amor peopo.
\v 2 Our guys take all da peopos daughtas fo come dea wifes, an wifes fo dea boys. So now, da ohana dat stay spesho fo God, come all mix up wit da peopos from da odda places dat donno God. An da leada guys fo da Israel ohanas, dey da main ones dat stay go agains wat God trus um fo do!”
\p
\v 3 Wen I hear dat, I come real sore inside. Den I broke my clotheses an my robe, fo show I feel bad. I pull some hair outa my head and my beard. I jus sit dea an no can tink an no can do notting.
\v 4 Den get odda peopo dat stay scared an shaking too, cuz dey know wat da God Fo Da Israel Peopo tell. Dey all come sit down by me. Cuz dey know dat some a da peopo dat wen come back from Babylon, no stay lissen an do wat God trus um fo do. Me, I stay sit dea, no can tink an no can do notting, till time fo make da late aftanoon sacrifice.
\s Ezra Pray Fo Know Wat Fo Do
\p
\v 5 Wen time fo make da sacrifice, I stand up. All dat day I no eat notting so I can pray. My clotheses an my robe, stay broke, so erybody know I stay sore inside. I go down on my knees on top da groun, an I put up my hands to my God Yahweh.
\v 6 I tell: “You, my God! But I stay get plenny shame! Real plenny shame, so I no can even look up to you, my God. Da bad tings us guys stay do, jalike one big pile a rubbish dat mo high den oua head! Da shame fo do all dat bad kine stuff, jalike go all da way up to da sky!
\v 7 From da time oua ancesta guys wen live to now, us guys get uku paila shame. An cuz a da bad kine stuff us guys stay do, you wen let da kings from odda lands take ova us guys -- oua kings an prieses an erybody. Dey kill us wit swords, an drag us away fo work fo dem. Dey take eryting we get, an dey make us come plenny shame. An dat stay happening again right now!
\p
\v 8 “An jus now, you oua God Yahweh, you wen help us plenny fo short time an do good tings fo us. You wen leave some a us guys fo stay alive, an let us come back to dis place dat stay good an spesho fo you. You even make us happy litto bit. No matta we ony slaves, you help us fo stay alive.
\v 9 Even us guys stay slaves fo shua, you oua God, an you stick wit yoa peopo no matta us slaves. Az why you neva go way from us guys. You even make da kings Persia side do good tings fo us. You make us jalike we come alive again, so we can build yoa Temple one mo time, an fix da tings dat stay all bus up. You let us build one strong wall fo da Judah peopo Jerusalem side.
\p
\v 10 “But now, wit all da bad kine stuff oua peopo stay doing, us no can say notting to you oua God. Cuz one mo time, we awready foget da tings you tell us we gotta do, an we go do wat we not suppose to do!
\v 11 Da guys dat befo time work fo you an talk fo you, dey wen tell us, ‘You guys betta watch out! You going inside one land dat goin come yoa land. Stay plenny pilau! Da diffren peopos dat stay live dea, from one side a da land to da odda side, dey ony do pilau kine stuff!’
\v 12 You wen tell us, ‘No let yoa daughtas marry dea boys! No let yoa boys marry dea daughtas! No do notting fo help dose peopo, an no make eryting come good fo dem!’ You wen make promise to us guys, dat if we no do da kine stuff you tell us fo no do, den we goin come strong, an eat da good stuff dat grow inside dis land, an wen we mahke, we goin leave da whole ting to our kids, all da time.
\p
\v 13 “You wen punish us plenny awready, fo da bad tings we wen do an fo da shame we get cuz a dat. Still yet, you ony punish us litto bit fo da bad tings us wen do. An you let some a oua people come back hea.
\v 14 But now, we stay broke yoa rules one mo time. We stay marry da same peopos dat stay do all da pilau kine stuff. Fo shua, now you goin come real plenny huhu wit us, an go wipe us out, so nobody stay alive fo come back hea fo live!
\v 15 You, Yahweh. You da God fo da Israel peopo. You do wass right erytime. Some a us guys come back hea now, afta we get outa trouble Babylon side. Us guys wen mess up real plenny ova hea. We no can even stand in front you, cuz a da shame we get fo wat we wen do!”
\c 10
\s Da Peopo Tell Dat Dey Wen Do Da Wrong Ting
\p
\v 1 All da time Ezra was praying an telling God dat wat dey wen do was not right, he stay cry an throw himsef down on top da groun in front da Temple Fo God. Uku paila Israel peopo wen come by him, guys an wahines an kids. Dey was crying plenny too.
\p
\v 2 Den Shekanaiah Jehiel boy, dat come from da Elam ohana, tell Ezra: “Us guys like tell erybody, ‘Cuz a wat we wen do, oua God no can trus us.’ We go marry wahines from da peopos dat donno God, dat live inside dis land! But now, no matta us do dis, us Israel peopo can stay shua dat God goin make eryting come okay fo us.
\v 3 Now, dis wat we betta do: we make one strong promise fo make deal wit oua God, fo send back all oua wifes an dea kids, dat come from da odda peopos. Eh Ezra, you da boss ova hea, an dass wat you stay tell us. An all da oddas dat stay scared an shaking wen dey hear wat oua God say fo do, dey telling us same ting. So, we goin do wat you tell. We goin do like how God's Rules tell.
\v 4 Eh Ezra! Go make strong. You da one dat can tell us guys wat we gotta do, fo make eryting come right. We goin stick wit you!”
\p
\v 5 So Ezra stand up. He make da main pries guys, an da Levi ohana guys, an all da Israel peopo make one strong promise to God, dat dey goin do jalike Shekanaiah tell. So dey all make da same strong promise to God.
\s Da Peopo Send Back Dea Wifes An Kids From Da Peopos Dat Donno God
\p
\v 6 Den Ezra go way from da Temple Fo God. He go by Jehohanan, Eliashib boy. He sleep dea, dat nite. He no eat bread o drink watta wen he stay dea cuz he still stay sore inside, cuz he no can trus da peopo dat wen come back from Babylon.
\v 7 Da nex day, da leada guys send one message all ova da Judah land an Jerusalem town. Dey tell all da peopo dat come back from Babylon, fo come togedda Jerusalem town.
\v 8 Dey tell erybody, “Day afta tomorrow, anybody dat no show up hea, da govmen guys an da older leadas goin take away dea land an eryting dey own, an cut um off from da peopo dat come back from Babylon.”
\p
\v 9 Two days afta dat, Decemba 19, all da peopo from da Judah an Benjamin land come togedda. Dey all stay sit down inside da open place in front da Temple Fo God. Dey stay shaking, cuz da ting dey goin talk bout, stay real importan, an cuz stay rain plenny same time.
\v 10 Den Ezra da pries guy stand up an tell dem, “You guys wen do bad ting, so God no can trus you. You guys go marry wahines from da odda peopos dat donno God. So now, God stay ready fo punish us Israel guys again!
\v 11 So now, tell da God fo yoa ancesta guys, dat you know da tings you wen do was bad, cuz he Yahweh. Den do wateva he like you fo do. Make yoasef diffren from da odda peopos dat donno God dat stay live inside dis land, an send yoa wifes dat come from da odda peopos back.”
\s Da Plan Fo Make Eryting Come Right
\p
\v 12 All da peopo dat wen come togedda dea, dey talk strong, an dey tell, “Az right, wat you tell us. Us guys gotta do jalike you tell us!
\v 13 But auwe! Get plenny peopo hea, an stay rain plenny. Us guys no can stay stand outside hea long time. An dis not da kine ting dat need ony one o two days fo do. Cuz get plenny a us guys dat wen go agains God, an az bad.
\v 14 Let oua leada guys take care dis, fo all da peopo. Erybody dat get wife from da peopos dat donno God, dey gotta make time fo come show up in front da older leada guys an da judge guys inside ery town. Dass how we goin do um, till oua God no stay huhu wit all us guys no moa.”
\v 15 Da ony guys dat say dey no like do dat, was Jonatan Asahel boy, an Jahzeiah Tikvah boy. Two guys from da Levi ohana, Meshullam an Shabbetai, dey no like do dat too.
\p
\v 16 So, dass how da peopo dat come back from Babylon side send back dea wifes. Ezra da pries guy, he pick leada guys dat can talk fo ery ohana, an he tell erybody da names a da guys he wen pick. Decemba 29, da leada guys wen sit down fo figga out wat fo do.
\v 17 March 27, dey all pau figga out wat dey gotta do wit da guys dat wen marry wahines from da odda peopos dat donno God.
\s Da Guys Dat Marry Somebody Dey Not Suppose To
\p
\v 18 Dis da names a da pries ohana guys dat wen marry wahines from da peopos dat donno God.
\q From da ohana dat start from Jeshua Jozadak boy an his bruddas: Ma`aseiah, Eliezer, Jarib, an Gedalaiah.
\v 19 Dey make strong promise fo send back dea wifes. Fo show dey like God take away da shame fo da ting dey wen do, dey wen kill one boy kine sheep fo make sacrifice fo God.
\q
\v 20 From da Immer ohana: Hanani an Zebadaiah.
\q
\v 21 From da Harim ohana: Ma`aseiah, Elijah, Shemaiah, Jehiel, an Uzziah.
\v 22 From da Pash-hur ohana: Elioenai, one nodda Ma`aseiah, Ishmael, Nethanel, Jozabad, an Elasah.
\m
\q
\v 23 Had helpa guys from da Levi ohana dat wen do da same ting: Jozabad, Shimei, Kelaiah (dey call um Kelita), Petahaiah, Judah, an Eliezer.
\q
\v 24 From da music guys: Eliashib.
\q From da guys dat watch da Temple gates: Shallum, Telem, an Uri.
\p
\v 25 Had odda Israel guys too dat wen marry wahines from da peopos dat donno God.
\q From da Parosh ohana: Ramaiah, Izzaiah, Malkijah, Mijamin, Eleazar, da odda Malkijah, an Benaiah.
\q
\v 26 From da Elam ohana: Matanaiah, Zekaraiah, Jehiel, Abdi, Jeremot, an Elijah.
\q
\v 27 From da Zattu ohana: Elioenai, Eliashib, Matanaiah, Jeremot, Zabad, an Aziza.
\q
\v 28 From da Bebai ohana: Jehohanan, Hananaiah, Zabbai, an Atlai.
\q
\v 29 From da Bani ohana: Meshullam, Malluk, Adaiah, Jashub, Sheal, an Jeremot.
\q
\v 30 From da Pahat-Moab ohana: Adna, Kelal, Benaiah, Ma`aseiah, Matanaiah, Bezalel, Binnui, an Manasseh.
\q
\v 31 From da odda Harim ohana: Eliezer, Ishijah, Malkijah, Shemaiah, Shimeon,
\v 32 Benjamin, Malluk, an Shemaraiah.
\q
\v 33 From da Hashum ohana: Matenai, Matata, Zabad, Elifelet, Jeremai, Manasseh, an Shimei.
\q
\v 34 From da odda Bani ohana: Ma`adai, Amram, Uel,
\v 35 Benaiah, Bedeiah, Keluhi,
\v 36 Vanaiah, Meremot, Eliashib,
\v 37 Matanaiah, Matenai, an Jaasu.
\q
\v 38 From da Binnui ohana: Shimei,
\v 39 Shelemaiah, Nathan, Adaiah,
\v 40 Maknadebai, Shashai, Sharai,
\v 41 Azarel, Shelemaiah, Shemaraiah,
\v 42 Shallum, Amaraiah, an Joseph.
\q
\v 43 From da Nebo ohana: Jeiel, Matitaiah, Zabad, Zebina, Jadai, Joel, an Benaiah.
\p
\v 44 All dese guys wen go marry wahines from da odda peopos dat donno God. Dey wen send da wahines an dea kids back to dea peopo.