\id neh
\h Nehemiah
\mt Nehemiah
\c 1
\s Nehemiah Pray Fo His Peopo
\p
\v 1 Dis da story Nehemiah wen tell bout wat wen happen to him. He Hakaliah boy. He tell dis:
\s2 Nehemiah Tink Plenny Bout Jerusalem
\p Artaxerxes was king inside Persia. Was Novemba, da numba 20 year dat he stay king. Datime, I stay live inside Susa town. One big town wit strong walls wea da king live.
\v 2 One a my bruddas, Hanani, come fo visit me ova dea wit some odda guys dat jus come back from da Judah land. I aks dem bout Jerusalem town, an bout the Jewish peopo dat da Babylon army wen go take Babylon side befo time, an now dey go back Judah side fo live.
\v 3 Den dey tell me, “Da Babylon king wen take away oua peopo from dea land an bring um ova hea, Babylon side. Layta, plenny peopo wen go back Jerusalem side fo live inside Judah. But tings no stay good ova dea too you know. Cuz stay real hard fo dem, an da odda peopos ova dea stay make dem plenny shame. Da Babylon army guys wen broke down da strong walls aroun Jerusalem town, an burn down da gates.
\p
\v 4 Wen I hear dis, I sit down an cry plenny. Fo days I cry, an no eat notting so I can pray. I stay pray in front da God dat live inside da sky.
\v 5 Dis wat I tell: “Yahweh, you da God dat live inside da sky! You da big an awesome God. You wen make one deal fo da peopo dat get love an aloha fo you, da ones dat stay do wat you tell um fo do. An you stay stick wit yoa peopo cuz you wen make dat deal wit dem.
\v 6 Try look down hea. I stay praying day time an nite time, fo you help yoa peopo, da Israel peopo. I stay tell you strait, us Israel peopo wen do plenny bad kine tings agains you. Me an all my ohana peopo, wen do bad kine tings!
\v 7 We stay do real bad kine tings agains you. We no do da tings you stay tell us fo do. You wen give yoa worka guy Moses yoa Rules an all da tings we gotta do, but we no do um.
\p
\v 8 “No foget wat you wen tell yoa worka guy Moses. You tell um: ‘If da way you guys ack, show I no can trus you, den I goin make you guys go all ova da place, fo live unda all da diffren peopos.
\v 9 But if you guys come back an change how you ack, be my guys, an stay do all da tings I say you gotta do, den I goin bring you guys back. I goin bring you guys togedda ova dea, da place I wen pick fo show wat kine god me, so dat you guys can show respeck fo me. No matta you guys stay far place all ova da world, I goin bring you guys back!’
\p
\v 10 “All us guys, we get you fo oua boss. Us da peopo you wen get outa trouble, cuz you strong, an you get plenny powa!
\v 11 Eh! You my boss, so I pray hard to you, an I like you fo lissen good. Get odda peopo, you da boss fo dem too, an dey stay good inside cuz dey know wat kine god you, no matta dey scared wen dey in front you. Dey stay aksing you da same ting. So I like you make eryting come good fo me today. Cuz I goin aks da King fo do someting real good fo me, an I aksing you fo make him lissen to me.”
\p Dat time, I was da king guy, in charge a da wine da king goin drink.
\c 2
\s Da King Send Nehemiah Judah Side
\p
\v 1 April, da numba 20 year dat Artaxerxes stay king, I bring da wine fo da King. Befo dat time, wen I bring da wine, I neva was sad in front da King.
\v 2 So da King tell me, “Eh! How come yoa face stay look sad?! Fo shua, you no goin get sick, yeah? Gotta be, you stay sad inside.”
\p Me, I come real scared.
\v 3 But I tell da King, “You da King, an I like you stay live foeva! But how I can stand hea an no stay sad?! Cuz da big town wea my ancesta guys stay bury, stay all bus up. Da main gates fo da town, all burn down.
\p
\v 4 Da King aks me, “Wat you like me do?”
\p I wen pray to da God Dat Stay Inside Da Sky.
\v 5 Den I tell da King, “You da King, an you my boss. I like you send me ova dea Judah side, da town wea my ancesta guys stay bury, fo build up da town one mo time. But ony if you tink az good, an if you tink I okay fo do um.
\p
\v 6 Da King aks me (wit da Queen sitting nex to him too), “So. How long you goin stay ova dea, an wat time you goin come back hea?”
\p Wen he aks me dat, I know he tink az one good idea fo send me ova dea. I tell um wat time I goin come back.
\v 7 Den I tell da King, “If you tink az good, tell yoa guys fo write lettas fo me to da territorial govna guys fo da districks Wes Eufrates Side. Dis, so dat dey let me go thru dea districk fo go Judah side.
\v 8 An I need one letta fo Asaf, da guy dat take care da park wit plenny trees ova dea fo da King, fo him give me da wood fo make da beams ova da gates fo da towa, an fo da walls aroun da town, an fo da house wea I goin stay.”
\p Da King give me wat I aks him fo, cuz God wen put his good hand on top me an help me.
\p
\v 9 I wen go by da govna guys fo da districks dat stay on da wes side a da Eufrates Riva, an I give um da lettas from da King. Da King wen send officer guys from da army, and army guys wit horses, fo go wit me.
\p
\v 10 But wen Sanballat da Horon guy an his helpa Tobiah da Ammon guy wen find out, dey come real huhu, cuz somebody goin come ova dea fo do someting good fo da Israel peopo.
\s Nehemiah Check Out Da Wall
\p
\v 11 So I wen come to Jerusalem an stay dea three days.
\v 12 Den nite time, I wen get up, me an some odda guys wit me. I neva tell nobody wat God was telling me fo do fo Jerusalem. Da ony animal I wen take was da one I stay ride on.
\v 13 So I go out nite time from da Valley Gate, an ova dea wea can see da Dragon's Puka Fo Watta, den I go to da Rubbish Gate. I wen check out da Jerusalem town walls dat stay all bus up, an da town gates dat stay burn down.
\v 14 From dea, I pass by da Watta Gate to da King's Watta Place. But den, no mo room by da place wea da animal I stay ride can go.
\v 15 So I go up da valley by da stream in da dark an I check out da wall ova dea. Den I turn aroun an go back. I go inside Jerusalem thru da Valley Gate, an go home my place.
\s Da Peopo Say Dey Goin Build Da Wall One Mo Time
\p
\v 16 Da govmen guys, dey donno wea I wen go o wat I stay do. I neva tell nobody yet, not da Jewish peopo, o da prieses, o da ali`i guys, o da govmen guys, o da odda peopo dat goin do da work bumbye.
\v 17 But laytas, I tell all da guys, “You guys, you see da trouble we get. Jerusalem town, stay all bus up. Da town gates, all burn up. Eh you guys! We gotta do someting! We go build da Jerusalem town wall again. Shame, dis! Den wen we pau, no mo shame!”
\v 18 I tell da leada guys da story, how God wen put his good hand on top me an help me. I tell um too, wat da King wen tell me.
\p Dey tell, “We gotta do um, den! We gotta start fo build da wall!” An dey all make ready fo do good job.
\p
\v 19 But wen Sanballat da Horon guy, his helpa Tobiah da Ammon guy, an Geshem da Arab guy wen find out, dey make fun a us guys, an talk stink bout us. Dey tell, “Wass up?! Wat you guys doing?! You guys stay go agains da King, o wat?”
\p
\v 20 Right dea I tell um, “Da God Dat Stay Inside Da Sky, he goin make eryting come okay fo us guys. We work fo him. Az why us guys goin start fo build da wall. You guys no goin do notting, cuz not yoa kuleana. Yoa peopo no mo say wit Jerusalem town from befo time, but dis da town dat oua ancesta guys come from.”
\c 3
\s Da Peopo Build Da Jerusalem Town Wall One Mo Time
\p
\v 1 Da main pries guy Eliashib an da odda prieses wen start da job. Dey build da Gate Fo Da Sheeps an put up da big doors dea. Den dey make sacrifice fo make dat place spesho fo God, from da gate to da Towa Fo Da Hundred Army Guys an da Hananel Towa.
\v 2 Nex to dem, da guys from Jericho town build one part a da wall. Nex to dem, Zakkur Imri boy build anodda part.
\v 3 Hassenaah's boy an his ohana build da Fish Gate. Firs dey put da beams ova da top, den da big doors, da beams fo lock da doors, an da strong bars so nobody can broke da doors.
\v 4 Meremot, dass Uriah boy an Hakkoz grankid, an his ohana fix da nex wall. Meshullam, dass Berekiah boy an Meshezabel grankid, an his ohana fix da nex wall. Zadok, Baana boy, an his ohana fix da nex wall.
\v 5 Nex to dem da guys from Tekoa town fix da nex wall. But dea main ali`i guys, dey no like do dat kine hard work, no matta dey get one boss ova dem.
\p
\v 6 Joiada Paseah's boy an Meshullam Besodeiah's boy, dey fix da Ol Gate. Dey put new beams on da top, den dey put da big doors, da big kine bolt fo lock da door, an da strong bars so nobody can broke down da door.
\v 7 Nex to dem, Melatiah from Gibeon town an Jadon from Meronot town Mizpah side wen fix da wall, no matta dey from da Wes Eufrates Districk an get diffren govna ova dea.
\v 8 Uzziel Harhaiah boy, one a da guys dat make gold kine jewelry, fix da odda side da wall nex to dem. Nex to him Hananiah, one a da guys dat make perfume, fix da wall nex to dem. Dass how dey make da Jerusalem wall come good again all da way to da Wide Wall.
\p
\v 9 Refaiah Hur's boy, dat stay in charge a half da Jerusalem Districk, he fix da nex wall.
\v 10 Nex to dem Jedaiah Harumaf's boy fix part a da wall da odda side from his house, an Hattush Hashabneiah's boy fix da odda part a da wall nex to him.
\v 11 Malkijah Harim's boy an Hasshub Pahat-Moab's boy fix anodda part, an dey fix da Towa Wea Get Ovens too.
\v 12 Shallum Hallohesh boy, dat stay in charge da odda half da Jerusalem Districk, fix da nex wall, an his girls help him.
\p
\v 13 Da Valley Gate, Hanun an da peopo dat live Zanoah, dey fix um. Dey build dat gate one mo time, den dey put up da big doors, da big kine bolt fo lock da door, an da strong bars so nobody can broke down da door. Dey fix da wall 500 yards from da Towa Dat Get Ovens, all da way to da Opala Gate.
\p
\v 14 Da Opala Gate, Rekab's boy Malkijah, da one in charge a da Bet-Hakkerem Districk, dat fix um. Him an his guys fix um one mo time an put up da big doors, da big kine bolt fo lock da doors, an strong bars so nobody can broke down da door.
\p
\v 15 Da Fountain Gate, Shallun Kol-Hozeh's boy, dat stay in charge a da Mizpah Districk, wen fix um. Him an his guys fix um one mo time an put roof on top. Den dey put up da big doors, da big kine bolt fo lock da doors, an da strong bars so nobody can broke down da door. Dey build da part a da wall dat go by da Siloam Watta Place wea da watta tunnel come out, to da King's Park, an from dea to da stone steps dat go down from King David's Town.
\v 16 Afta dem da odda Nehemiah Azbuk's boy, he stay in charge a half da Bet-Zur Districk, fix da wall. He start from across King David's Ohana tombs, an go to da watta place dey wen dig befo time, an to da house fo da army guys.
\v 17 Nex to him, da Levi ohana guys fix da wall, unda Rehum Bani's boy. Nex to dem, Hashabiah, da guy dat stay in charge a half da Keilah Districk, him an his guys do da work fo his districk.
\v 18 Nex to him, some odda guys from da same ohana: Binnui Henada's boy, dat stay in charge a da odda half Keilah Districk,
\v 19 an nex to him Ezer Jeshua's boy, da main guy fo Mizpah, fix anodda part across wea you go up to da place wea dey keep da tings dey use fo da army, ova dea wea da wall stay stick out.
\v 20 Afta him Baruk Zabbai's boy really like help too, so he fix anodda part a da wall, all da way from wea da wall stick out, to da door fo Eliashib's house (Eliashib, he da main pries guy).
\v 21 Nex to him, Meremot Uriah's boy an Hakkoz grankid fix anodda part a da wall, from da front door fo Eliashib house to da odda side a da house.
\v 22 From dea, da pries guys dat live inside da odda small towns near Jerusalem fix da wall.
\v 23 Afta dem, Benjamin an Hashub fix da wall in front dea house. Afta dem, Azariah Maaseiah's boy an Ananiah grankid fix da wall nea his house.
\v 24 Afta him, Binnui Henadad's boy fix anodda part a da wall, from Azariah house to da nex place da wall stick out, an from dea to da corner,
\v 25 an Palal Uzai's boy fix da odda side wea da wall stick out an wea da towa stay on top da house wea da King wen live befo time, da mauka side house nea to da yard dat da prison guard guys use. Nex to him, Pedaiah Parosh's boy
\v 26 an da guys dat live on top Ofel Hill an work inside da Temple wen fix da wall ova on da eas side, across da Watta Gate an da towa dat stick out from da wall.
\v 27 Afta dem, da Tekoa town guys fix anodda part a da wall from across da big towa dat stick outa da wall, to da Ofel Hill wall.
\p
\v 28 From mauka da Horse Gate, some a da pries guys fix da wall. Ery one a dem fix da wall in front dea own house.
\v 29 Nex to dem, Zadok Immer's boy fix da wall da odda side his place. Nex to him, Shemaiah Shekaniah's boy, dat stay in charge a da Eas Gate, fix da wall.
\v 30 Nex to him, Hananiah Shelemiah's boy and Hanun Zalaf's numba six boy fix anodda part. Afta dem, Meshullam Berekiah's boy fix da wall nea da room wea he stay.
\v 31 Nex to him, Malkijah, one a da guys dat make gold jewelry, fix da wall all da way to wea da worka guys fo da Temple an da guys dat own da stores live, across da Gate Wea Da Army Guys Make Ready Fo Fight, an from dea to da place wea get one room on top da wall nea da corner.
\v 32 An from dea to da Sheep Gate, da guys dat make da gold jewelry an da guys dat own da stores fix da wall.
\c 4
\s Da Peopo Dat Stay Agains Da Jews Make Plan Fo Fight
\p
\v 1 Wen Sanballat find out dat us guys stay building da wall one mo time, he get real mad, an he make fun a us Jews.
\v 2 In front his friends an in front da Samaria army guys, Sanballat tell, “Wat dese Jewish guys stay doing?! Dey tink dey can build dat wall one mo time?! Dey tink dey can make sacrifice ova dea?! Dey tink dey can finish da work in one day?! Dey tink dey can find da big stones inside da dirt piles an make um so dey come good again?! cuz dey stay all burn up. No way dey can!”
\p
\v 3 Tobiah, da Ammon guy, he stan dea nex to Sanballat. He tell: “Dass right! Wat dey stay build, if one wild dog climb on top um, da whole stone wall goin fall down!”
\m
\q
\v 4 I pray: “God, you da God fo us guys pray to, so lissen to us!
\q2 Dey no like us guys.
\q Da shame dey like us guys feel,
\q2 Make um so dey da ones dat shame!
\q Make odda peopo take ova dem
\q2 An make um prisonas dat gotta go live anodda land!
\q
\v 5 No hide da bad tings dey do.
\q2
No take away dea shame,
\q2 No foget da bad kine tings dey do.
\q2 Cuz dey make da builda guys come real sore inside dea heart.”
\p
\v 6 Now, us guys wen build da wall till da whole wall stay join togedda awready an no mo puka, an ony half way mo high fo build. Dat happen cuz da peopo work wit all dea heart.
\p
\v 7 But den, Sanballat an Tobiah an da Arab guys an da Ammon guys an da Ashdod guys, dey wen hear dat da work fo fix da Jerusalem town wall going good, an dat da peopo start fo fill up da places wea da wall stay bus up. Sanballat dem come real huhu bout dat.
\v 8 Dey all make plan fo come fight da Jerusalem town an make da peopo dea come all mix up.
\v 9 But us guys pray to oua God, an put security guards day time an nite time all ova da place fo watch out fo dem guys.
\p
\v 10 But da Judah ohana guys tell, “Da guys dat bring da stuff fo fix da wall, dey tired awready. Get so plenny junks from da bus up wall, us guys no can build da new wall.”
\p
\v 11 An da guys dat stay agains us tell, “Wen us guys go afta da Jewish guys, dey no goin know we dea, an dey no goin see us till we stay right dea wit dem. Den we kill um an make da work stop.”
\p
\v 12 Den da Jewish peopo dat live nea da guys dat stay agains us, dey come Jerusalem plenny times an tell us, “From ery place da Sanballat guys live, dey goin come back hea an fight us guys!”
\p
\v 13 Az why I put peopo, one ohana fo ery place, behind da low places wea da wall no stay fix yet, wit swords an spears an bows an arrows.
\v 14 Afta I wen check how dey all stay, den I stand up in front da ali`i guys, da main leada guys, an all da odda guys. I tell um, “No scared dose Sanballat peopo! Tink plenny bout da Boss. He awesome, an good you scared a him. So den, fight fo help yoa brudda guys, an yoa boys an girls, yoa wifes, an yoa houses!”
\p
\v 15 Da guys dat stay agains us find out dat us guys know wat dey was goin do, an dat God jam up dea plan awready. So us guys go back fo work on da wall, an ery guy stay work on da wall jalike befo.
\v 16 From dat time, half my young guys do da construction work, an da odda half make ready da spears, an da shields, da bows an arrows, an da chain kine body armor. Da leada guys wen stay right dea behind da Judah peopo.
\v 17 Da guys building da wall, an da guys bringing dem stuff, dey do dea work so ery guy get one hand fo do da work, an in da odda hand he get someting fo fight wit.
\v 18 Ery builda guy get one sword he tie aroun him. Da guy dat blow da sheep horn trumpet, he stay by me.
\v 19 I tell da ali`i guys, da main leada guys, an all da odda guys, “Get peopo stay working all ova da place, you know. An all us guys stay far from da nex guy on top da wall.
\v 20 Any place you hear da trumpet noise, dass da place you gotta go fo meet us. Oua God, he goin fight fo help us!”
\p
\v 21 Az how us guys do da work. Half da guys stay ready wit da spears, from befo da sun come up till you can see da stars.
\v 22 I tell da peopo dat time too, “Ery guy, him an da ones dat work fo him, dey gotta stay nite time inside Jerusalem, so nite time dey can help guard, an day time dey work.”
\v 23 All dat time, me an my worka guys an da security guard guys dat stay by me, we neva take off oua clotheses. Ery guy get someting fo fight wit, even wen he go fo drink watta.
\c 5
\s Nehemiah Help Da Peopo Dat No Mo Notting
\p
\v 1 Dat time, plenny peopo an dea wifes stay squawk bout how da odda Jewish ohana guys make to dem.
\v 2 Some a dem tell, “Us guys, oua kids, an plenny odda peopo, we all gotta get wheat an stuff fo eat so we no mahke.”
\p
\v 3 Odda peopo tell, “Da plants no stay growing dis year. Az why, fo get wheat an stuff fo eat, us guys sign paypas wit da rich Jewish guys. We give um oua land fo plant, oua grape farm, an oua house, an dey give us money fo buy food. An if we no can pay um back, den we lose eryting.”
\p
\v 4 Odda peopo tell, “Us guys wen sign paypas fo oua land fo plant an fo oua grape farm, fo borrow money from oua own peopo so we can pay da tax fo da Babylon King, an we lose eryting if we no can pay um back.
\v 5 But us get da same blood an bone jalike da peopo from oua own ohana dat we stay borrow da money from. Oua kids an dea kids, same ting. But us guys, we gotta sell oua own boys an girls fo make um come slaves, an some a da girls, dey slaves awready. Us no mo powa fo do notting, an get odda Jewish guys dat take ova oua land fo plant an oua grape farm!”
\p
\v 6 Wen I hear how dey stay yell fo help, an all da stuff dey tell, I come plenny huhu.
\v 7 Afta I tink plenny bout all dat, I take da ali`i guys an da govmen guys in front da judge. I tell all dem guys, “How come you guys taking tings from yoa own peopo?! You charge mo fo loan um money, an den wen dey no can pay, you charge um some moa!”
\p So I tell all da peopo fo come togedda fo do someting bout dem guys.
\p
\v 8 Wen erybody come togedda, I tell um, “Us guys, we stay buy back oua Jewish brudda guys dat befo time peopo wen sell to da odda peopos fo make um slaves. Nuff awready, fo us guys do dat. But now, some a you guys, you stay selling yoa own bruddas! An den, we gotta buy dem back too! Nuff awready!”
\p Da rich guys, dey no say notting, cuz dey no can find notting fo say.
\p
\v 9 Den I tell, “Da tings you guys stay doing, not right! Mo betta you guys live da way dat show you guys scared a God! Dat way, da odda peopos dat stay agains us, no can say notting bad bout us!
\v 10 Me an my bruddas, and da guys dat work fo me, we all stay lend money an wheat to da odda guys too. But we gotta stop charging um plenny too.
\v 11 So. Right now, give um back dea lands fo plant, dea grape farms, dea olive trees, dea houses. Give um back how much mo you wen charge fo lend um money an wheat an wine an olive oil.
\v 12 Dey tell, “We goin give um back eryting. We no goin aks fo anyting no moa. We goin do um how you say.” Den I tell da pries guys fo come, an I make da leada guys make strong promise in front da pries guys, fo do wat I tell.
\v 13 Den I shake out da part a my robe wea I keep stuff, an I tell, “Erybody dat no do how dey wen promise, I like fo God shake dem outa dea house an all da stuffs dey wen work hard fo get, so den dey no mo notting.”
\p All da peopo dat wen come togedda tell, “Az right! We gotta do um!” Dey wen tell good tings bout Yahweh. An dey wen go do jalike dey wen make promise fo do.
\s Nehemiah Help Da Peopo
\p
\v 14 From da time dat King Artaxerxes make me govna fo da Judah land, in da numba 20 year dat he was King, till da numba 32 year, dass 12 year, me an my bruddas had da right fo use da govmen money fo buy food. But we neva do dat. We buy oua food wit oua own money.
\v 15 But da guys dat was govna befo me, dey wen make um hard fo da peopo. Dey wen make um bring food an wine, an ery guy gotta pay 40 silva kine coin. Even da guys dat work fo da odda govnas, dey ack like dey can tell da peopo wat fo do too. But I neva make lidat, cuz I scared wat God goin say if I do dat.
\v 16 I wen hang in dea fo do da work fo fix dis wall. I neva buy land, an all my worka guys wen stay togedda fo do da work.
\v 17 Ery day I feed 150 peopo, da Jews an da govmen guys. Had odda guys dat wen come hea from odda countries aroun us guys dat I wen feed um too.
\v 18 Ery day my peopo cook fo erybody one cow, six sheeps dat dey pick spesho fo us guys, an some chickens, an dey cook um fo me. Ery ten days gotta go get plenny diffren kine wine. Still yet, wit all dat food, I neva aks fo da money I get da right fo use cuz I da govna, cuz dat make da peopo work mo hard fo do all dat.
\p
\v 19 Dis how I stay pray:
\q “My God, no foget do good tings fo me
\q2 Cuz a all da good tings I stay do fo dis peopo!”
\c 6
\s Da Local Peopo Try Fo Make Us Stop
\p
\v 1 Dat time, Sanballat an Tobiah an Geshem da Arab guy an da odda guys dat stay agains us wen hear dat me an my peopo stay build da town wall awready. Dey hear dat da wall no stay bus up no moa. (But dat time, I still neva yet put up da big doors fo da town gates.)
\v 2 Sanballat an Geshem wen send somebody fo tell me, “Go come fo meet us, in one small town Ono Valley side.” But I know dey stay make plan fo do someting bad to me.
\p
\v 3 I wen send some guys by dem fo tell um, “I get big job fo do ova hea. So, I no can go ova dea. No good I leave da job fo go by you guys, an da work stop.”
\v 4 Four times, dey wen send peopo fo tell me come, an I tell um same ting.
\p
\v 5 Da nex time afta dat, Sanballat wen send one a his worka guys by me. He stay carry one letta in his hand fo show um to erybody so dey can see, befo he come by me.
\v 6 Da letta tell:
\q “Da peopo from diffren country telling dis -- an Geshem tell az fo real -- dat you an da Jewish peopo, you stay make plan fo fight da King. Dass how come you stay build da town wall. An from da stuff dey tell, you da guy goin come dea King.
\v 7 An you stay tell da guys dat talk fo God Jerusalem side, fo tell erybody dis bout you: ‘Now, get new king, Judah side!’ An dass wat us guys goin tell King Artaxerxes. So you betta come fo talk to us now.”
\p
\v 8 Den I send somebody fo tell Sanballat, “Dis stuff you stay talk bout, neva wen happen. You ony bulai all dat.”
\p
\v 9 All dem Sanballat guys ony like make us come scared. Dey tink dis bout us, “Da Jewish peopo goin come too weak, an dey goin lose fight an no finish build da wall.”
\p But now I pray to God, fo make my hand strong!
\p
\v 10 One time, I wen go Shemaiah house. Delaiah his fadda, Mehetabel his granfadda. Shemaiah, he no can go outside. Den he tell, “Good fo me an you go inside God's house, inside da Temple. We go shut da doors. Cuz some guys coming fo kill you. Dis nite, dey goin come kill you!”
\p
\v 11 But I tell um, “You tink I dat kine guy, dat goin run away?! No way! You tink I dat kine guy, dat go inside da Temple jus fo stay alive?! Not even! I not going ova dea wit you!”
\v 12 Den I wen figga: no was God dat send dis guy. He make like one talka fo God, cuz Tobiah an Sanballat wen pay him off.
\v 13 Dey wen pay him fo talk lidat, so dey can make me come scared an I do someting bad cuz a dat, an den dey can use dat fo make me lose face an fo make me shame.
\p
\v 14 I stay pray lidis:
\q “My God, no foget pay back Tobiah an Sanballat,
\q Fo da bad tings dey wen do!
\q No foget da wahine Noadiah dat say she talk fo God,
\q An all da odda guys dat say dey talk fo God,
\q Dat stay try make me come scared!”
\s Da Builda Guys Finish Da Town Wall
\p
\v 15 Octoba 2, we wen pau build da town wall, an ony take 52 days!
\v 16 Wen all da guys dat stay agains us find out we pau, all da peopo inside all da countries aroun us guys come scared, an start fo tink maybe us mo strong den dem. Dey figga, us guys wen do all dat work cuz oua God stay help us.
\p
\v 17 Had odda stuff dat happen dat time too. Some a da ali`i guys from the Judah ohana wen send lettas to Tobiah, an Tobiah send lettas back to dem.
\v 18 Cuz had plenny Judah peopo dat wen make strong promise befo time, fo make Tobiah dea boss, cuz he wen marry Shekaniah girl, an Shekaniah fadda was Arah. Tobiah boy Jehohanan wen marry Meshullam girl, an Meshullam faddah was Berekiah.
\v 19 Dey talk to me bout all da good tings Tobiah wen do, an den dey go tell Tobiah eryting I say. An Tobiah stay send plenny letta fo try make me scared.
\c 7
\p
\v 1 Layta, afta da town wall pau an I put up da big doors fo da town gates, an I pick da security guards fo watch da gates, an da music guys, an da Levi ohana guys dat help da prieses,
\v 2 I put my brudda Hanani in charge a Jerusalem town, him an Hananiah dat was da officer ova da army guys inside da strong walls. I know I can trus Hananiah, an he get awesome respeck fo God, mo den plenny odda guys.
\v 3 I tell da peopo, “No open da Jerusalem town gates early. Ony open um wen da sun come hot. Shut da gates evening time, an put bars across da big doors. Make shua dat da guys dat suppose to watch da gates stay standing right dea wen you lock da gates. Pick Jerusalem peopo fo be da security guards fo da town. Put some a dem on top da spesho place fo da security guards, an put some a dem in front dea own houses.”
\v 4 I tell um fo do dat, cuz da town big an get plenny room, but ony get litto bit peopo live inside dea, an dey neva build houses yet.
\s Da Peopo Dat Come Back From Babylon Side
\p
\v 5 Den my God make me tink fo do one nodda ting. I tell all da ali`i guys an da govmen guys an all da odda peopo fo come togedda, so dey can write down all da ohana name. I wen awready find da ohana book wit da name fo da peopo dat wen come wit da firs ones dat come back from Babylon side, an dis wat stay write inside dea:
\p
\v 6 “Dis, da peopo inside dis districk dat come back from Babylon, da ones dat King Nebukadnezzar wen take away Babylon side befo time. Dey come back Jerusalem side, cuz dey all like go live inside da town wea dea ohana come from, Jerusalem town an da odda towns inside da Judah land.
\v 7 “Dis da leadas dat wen come back da firs time: Zerubbabel, Jeshua, da odda Nehemiah, Azariah, Ra`amiah, Nahamani, Mordekai, Bilshan, Mispereth, Bigvai, Nehum, an Ba`anah.
\p “Dis how much Israel peopo wen come back:
\q
\v 8 Da Parosh ohana, 2,172.
\q
\v 9 Da Shefatiah ohana, 372.
\q
\v 10 Da Ara ohana, 652.
\q
\v 11 Da Pahat-Moab ohana, dat wen come from Jeshua an Joab, 2,818.
\q
\v 12 Da Elam ohana, 1,254.
\q
\v 13 Da Zattu ohana, 845.
\q
\v 14 Da Zakkai ohana, 760.
\q
\v 15 Da Binnui ohana, 648.
\q
\v 16 Da Bebai ohana, 628.
\q
\v 17 Da Azgad ohana, 2,322.
\q
\v 18 Da Adonikam ohana, 667.
\q
\v 19 Da Bigvai ohana, 2,067.
\q
\v 20 Da Adin ohana, 655.
\q
\v 21 Da Ater ohana, dass from Hezekiah, 98.
\q
\v 22 Da Hashum ohana, 328.
\q
\v 23 Da Bezai ohana, 324.
\q
\v 24 Da Harif ohana, 112,
\q
\v 25 Da Gibeon ohana, 95.
\b
\q
\v 26 From Betlehem an Netofah, 188.
\q
\v 27 From Anatot town, 128.
\q
\v 28 From Bet-azmavet, 42.
\q
\v 29 From Kiriat-Jearim, Kefirah, an Be`erot, 743.
\q
\v 30 From Ramah an Geba, 621.
\q
\v 31 From Mikmas, 122.
\q
\v 32 From Bethel an Ai, 123.
\q
\v 33 From Nebo town (not Mount Nebo), 52.
\b
\q
\v 34 Da odda Elam ohana, 1,254.
\q
\v 35 Da Harim ohana, 320.
\q
\v 36 Da Jericho ohana, 345.
\q
\v 37 Da Lod, Hadid, an Ono ohanas, 721.
\q
\v 38 Da Senaah ohana, 3,930.
\s Da Pries Guys An Dea Helpas
\q
\v 39 “Da pries guys, get da Jediah ohana dat come from da Jeshua ohana, 973.
\q
\v 40 Da Immer ohana, 1,052.
\q
\v 41 Da Pash-hur ohana, 1,247.
\q
\v 42 Da Harim ohana, 1,017.
\s Da Levi Ohana Guys
\q
\v 43 “Da guys from da Levi ohana dat help da prieses, come from Jeshua, an afta him dey come from Hodevah, an afta him dey come from Kadmiel, 74.
\b
\v 44 “Da music guys dat come from Asaf ohana, 148.
\b
\q
\v 45 “Da guys dat guard da Temple gates, dey come from Shallum, Ater, Talmon, Akkub, Hatita, an Shobai ohana, 138.
\p
\v 46 “Da guys dat work inside da Temple, dea ohanas come from Ziha, Hasufa, Tabbaot,
\v 47 Keros, Sia, Padon,
\v 48 Lebana, Hagaba, Shalmai,
\v 49 Hanan, Giddel, Gahar,
\v 50 Reaiah, Rezin, Nekoda,
\v 51 Gazzan, Uzza, Paseah,
\v 52 Besai, Meunim, Nefushesim,
\v 53 Bakbuk, Hakufa, Harhur,
\v 54 Bazlit, Mehida, Harsha,
\v 55 Barkos, Sisera, Temah,
\v 56 Neziah, an Hatifa.
\p
\v 57 “Da guys dat come from da peopo dat wen work fo King Solomon befo time, dea ohanas come from Sotai, Soferet, Perida,
\v 58 Jaala, Darkon, Giddel,
\v 59 Shefatiah, Hattil, Pokeret-Hazzebain, an Amon.
\v 60 All da guys dat work fo da temple, an da ones dat come from da guys dat wen work fo King Solomon, total 392 guys.”
\s Da Peopo Dat No Can Make Proof Wat Ohana Dey Come From
\p
\v 61 Odda peopo come from Tel-Melah, Tel-Assha, Kerub, Addon, an Immer towns, but dey no can show proof wat ohana dey come from, so dey donno if dey Israel peopo, o not.
\v 62 Da ones dat come from da Delaiah, Tobiah, an Nekoda ohanas, 642 peopo.
\p
\v 63 Da pries guys dat no can show proof too, dey da ones dat come from Hobaiah, Hakkoz, an Barzillai. (Barzillai, he take his ohana name from da Barzillai dat live Gilead side befo time, cuz he wen marry one a da Gilead guy daughtas.)
\v 64 Dose pries guys wen look fo dea name inside da ohana books, but dey no can find um. Az why dey no can be pries guys, cuz dey no can show proof.
\p
\v 65 I was da govna guy, so I tell um dat dey no can eat da food dass spesho fo God yet, dey gotta wait till get one pries dat know how fo use da Urim an da Tumim fo aks God wat fo do.
\p
\v 66 So erybody put togedda, had 42,360 guys total.
\v 67 We neva count dea slave guys an slave wahines wit da Israel peopo. Had 7,337 slaves. Da music guys, had 245 a dem, guys an wahines.
\p
\v 68 Da peopo get 736 horse, 245 mule,
\v 69 435 camel, an 6,720 donkey.
\p
\v 70 Some a da leada guys from da main ohanas wen give gifs fo help do da work. Me, da govna guy, I wen give da govmen guys who take care da money tousand gold coin, 50 gold bowl, 530 robe fo da pries guys.
\v 71 Da odda ohana leada guys wen give da govmen guys who take care da money 20,000 gold coin an 2,750 pound silva fo help do da work.
\v 72 Da odda peopo give 20,000 gold coin, 2,500 pound silva, an 67 robe fo da pries guys.
\p
\v 73 Den all da Israel peopo -- da pries guys, da Levi ohana guys, da guys dat watch da town gates, da music guys, da worka guys fo da Temple, an some a da odda peopo -- dey all wen go home an live inside dea own towns.
\s Ezra Read Da Rules From God Fo Da Peopo
\p
Octoba time, all da Israel peopo stay live inside dea towns now.
\c 8
\nb
\v 1 An all da peopo come togedda inside da open place inside da Watta Gate. Ezra, he da pries guy dat stay teach da Rules From God. Dey tell him fo bring da book dat get da Rules from Moses. Dass da Rules dat Yahweh wen give da Israel peopo long time ago.
\p
\v 2-5 Was Octoba 8. Da peopo wen build one wood stage fo Ezra. All da guys an wahines, an all da kids dat can undastan, dey stay dea fo lissen good. Da pries guy Ezra bring da book wit da Rules in front dem. He stand on top da stage by da open place inside da Watta Gate. On da right side had Mattitiah, Shema, Anaiah, Uriah, Hilkiah, an Maaseiah. Da left side had Pedaiah, Mishael, Malkijah, Hashum, Hash-Baddanah, Zekariah, an Meshullam.
\p Den Ezra open da book. All da peopo can see him, cuz he stay stand up dea on top da stage. So wen he open da book, erybody stand up. Ezra start fo read da Rules to dem early morning time, an he stay read till noon time.
\p
\v 6 Den Ezra talk to Yahweh, da awesome God. Ezra tell God “Mahalo,” cuz he do all kine good tings fo da peopo. All da peopo put up dea hands an tell, “Dass it!” Den dey go down wit dea face on top da groun fo show love an respeck fo God.
\p
\v 7 Had guys from da Levi ohana ova dea. Da peopo stay standing dea, an da Levi guys help um undastan wat da Rules mean. Da Levi teacha guys was Jeshua, Bani, Sherebiah, Jamin, Akkub, Shabbetai, Hodiah, Maaseiah, Kelita, Azariah, Jozabad, Hanan, an Pelaiah.
\v 8 Dey read from da book dat get da Rules from God inside, an dey tell wat eryting mean. Dey make shua dat erybody undastan wat dey stay read to dem.
\p
\v 9 Den Govna Nehemiah, an da pries guy Ezra dat stay teach da Rules, an da Levi ohana guys dat stay help da peopo fo undastan, dey all tell da peopo, “No cry!” Cuz all da peopo, dey stay crying wen dey hear wat da Rules tell. “Dis one day dat stay spesho fo Yahweh, da God you guys pray to!”
\p
\v 10 Nehemiah tell da peopo, “You go now. Go eat fancy kine food an drink sweet kine wine. Send some food to da peopo dat neva get notting ready fo eat. Cuz dis day, you know, real spesho fo oua Boss! No stay sore inside. Cuz Yahweh make you guys feel good inside, an az why you strong.”
\p
\v 11 Jalike Nehemiah, da guys from da Levi ohana stay telling all da peopo, “No need dey make big noise! Cuz today one spesho day! No go stay sore inside!”
\v 12 Den all da peopo go from dea, fo eat an drink an send food to odda peopo, an fo stay feel real good inside. Cuz now dey undastan da tings da leada guys wen teach dem.
\s Da Spesho Religious Time Fo Stay Inside Shacks
\p
\v 13 Octoba 9, da main guys fo all da ohanas, da pries guys, and da Levi ohana guys wen go togedda by Ezra, cuz dey like know wat da Rules tell mo betta.
\v 14 Dey find inside da Rules wea Yahweh tell Moses, dat Octoba da time fo da Israel peopo go make shacks an live inside dem, fo dis spesho religious time.
\v 15 Dey suppose to tell da peopo aroun all da towns an all ova Jerusalem, fo make shua erybody know dey suppose to go up country, an bring back plenny branch from da olive tree, an da wild olive, da myrtle, da date palm trees, an odda trees dat get plenny leaf fo make shacks, jalike stay write down inside da Rules.
\p
\v 16 So da peopo go out an bring back all kine tree branch. Dey make small shacks on top dea flat roof house, o inside dea yard, o inside da yard aroun God's Temple. Odda peopo make dea shacks inside da open places by da Watta Gate an da Efraim Gate.
\v 17 All da peopo dat wen come back from Babylon, dey wen make shack an live inside one week, an erybody stay feel good inside bout dat. Cuz from Joshua time (az Nun's boy), till den, da Israel peopo neva make dat kine spesho religious time.
\v 18 Ery day, from Day Numba One to Day Numba Seven, Ezra read to dem someting from da book dat get da Rules from God. Den, Octoba 15, dey all come togedda an make one mo spesho religious day, jalike God wen tell um.
\c 9
\s Da Peopo Tell Da Bad Tings Dey Wen Do
\p
\v 1 Octoba 31, da peopo go meet one mo time. Dis time, dey no eat cuz dey like pray. Dey wear burmbag kine cloth fo show dey stay sore inside, an dey put dirt on top dea heads.
\v 2 Da peopo from da Israel ohana wen go stand one side, away from all da odda peopo dat not from dea. An da Israel peopo tell erybody da bad kine tings dey wen do, an wat dea ancesta guys wen do too.
\v 3 Dey stand up right wea dey stay, an read da book dat get da rules from Yahweh, dass da God dey pray to, fo three hour. An den, anodda three hour, dey stay tell erybody da bad kine tings dey do. An same time dey go down on top da groun fo show dea God Yahweh plenny love an respeck.
\p
\v 4 Da odda guys from da Levi ohana -- Jeshua, Bani, Kadmiel, Shebaniah, Bunni, Sherebiah, da odda Bani, an Kenani -- stay stand on top da steps dat go up to da stage, an dey talk real loud an strong, aksing Yahweh, da God dey stay pray to, fo help dem.
\s Da Peopo Tink Bout Da Good Tings God Do
\p
\v 5 Den da main guys from da Levi ohana -- dass Jeshua, Kadmi`el, Bani, Hashabneiah, Sherebiah, Hodiah, Shebaniah, an Petahiah -- dey tell da peopo, “Stand up! Tell erybody da good tings dat Yahweh do fo you guys. He stay da God fo you guys, from da time eryting wen start, an foeva an eva!”
\p So den dey talk to God lidis:
\q “We like tell erybody da good tings you do!
\q2 We know you one awesome God!
\q You do plenny good tings dat we donno how fo tell,
\q2 An you mo awesome den awesome!
\s Da World
\q
\v 6 You Yahweh, you da ony one!
\q2
You make da sky, an even da mos high part a da sky.
\q
You make da sun an da moon an all da stars, jalike one army.
\q2
You make da world an eryting dat stay live on top.
\q2
You make da sea an eryting dat stay inside dea.
\q
You da one dat make all da animals an plants an fishes an peopo stay alive,
\q2
An erybody dat stay inside da sky stay show you love an respeck!
\s2 Abraham
\q
\v 7 “You Yahweh,
\q2 Da God dat wen pick Abram
\q An bring um outa Ur town Babylon side.
\q2 Den you give um da name Abraham.
\q
\v 8 You wen look inside Abraham heart an see,
\q2 Dat he da kine guy you can trus.
\q You make one deal wit him.
\q2 You tell him:
\q ‘All da peopo dat goin come from you,
\q2 I goin give to dem, da land wea da Canaan peopo live,
\q2 An da Het peopo, da Amor peopo, da Periz peopo,
\q2 Da Jebus peopo, an da Girgash peopo.’
\q You do eryting jalike you wen promise fo do befo time.
\q2 Cuz you do wass right erytime.
\s2 Outa Egypt
\q
\v 9 “You see how oua ancesta guys suffa plenny Egypt side.
\q2 You hear dem yell fo help by da Red Sea.
\q
\v 10 You wen do awesome kine tings fo show who you,
\q2 Tings dat blow oua mind,
\q Fo hurt Pharaoh an all his helpa guys
\q2 An all da odda peopo inside his land.
\q Cuz you know,
\q2 Dey ack jalike dey betta den anybody
\q2 An make any kine to oua ancesta guys.
\q Da awesome tings you wen do dat time,
\q2 Make you get one awesome name still yet today.
\q
\v 11 You open up da sea in front dem,
\q2 So dey go inside da middo a da Red Sea
\q2 On top dry groun.
\q But da guys dat was chasing dem,
\q2 You throw dem down inside da deep watta,
\q2 Jalike wen you throw one rock inside da rough sea.
\q
\v 12 Day time, had one cloud dat go from da groun to da sky,
\q2 Fo show da peopo wea fo go.
\q Nite time, had fire dat go from da groun to da sky,
\q2 Fo give um light fo see dea way, wea dey stay going.
\s2 Da Rules
\r (John 6:3)
\q
\v 13 “Wen dey stay Mount Sinai,
\q2 You wen come down dea on top da mountain.
\q2 You talk to dem from outa da sky an da air.
\q You tell um da right tings fo do,
\q2 An teach um da Rules dat dey can trus.
\q2 An da good tings you tell um dey gotta do.
\q
\v 14 You let um know dat da Res Day, stay spesho fo you.
\q2 You tell um wat dey gotta do an how dey gotta do um.
\q You wen make Moses teach um yoa Rules,
\q2 Cuz dat time, he da guy dat work fo you.
\q
\v 15 Wen dey hungry, you give um bread outa da sky.
\q2 Wen dey thirsty, you make watta come outa one big rock fo dem.
\q You tell um fo come hea take ova dis land,
\q2 Cuz you wen make one strong promise befo time fo give um da land.
\s2 Da Peopo No Lissen
\q
\v 16 “But dey oua ancesta guys,
\q2 Dey ack jalike dey get da right
\q2 Fo make any kine to God.
\q Dey come hard head, an no lissen
\q2 Wat God tell um fo do.
\p
\q
\v 17 Dey tell, ‘No way us guys goin lissen wat God tell!’
\q2 Dey no even tink bout da awesome kine tings you do
\q2 Right dea in front dem.
\q Dey even come mo hard head fo go agains you,
\q2 An pick one leada guy fo take dem back Egypt side
\q2 Fo come slave again.
\b
\q “But you, you one God dat no mind let peopo go
\q2 Fo da bad kine tings dey do.
\q You big heart fo do good tings fo peopo.
\q2 You get pity fo peopo.
\q You take long time befo you get huhu.
\q2 You erytime stick wit yoa peopo.
\q Dass why you neva leave yoa peopo, dat time,
\q
\v 18 Not even afta dey talk real bad bout you
\q2 An melt gold fo dem make one idol god
\q2 Dat look jalike one bebe cow,
\q An dey tell, ‘Dis idol, yoa God!
\q2 He da one dat wen bring you guys hea from Egypt!’
\b
\q
\v 19 “Cuz you get plenny pity fo dem still yet,
\q2 You neva go way an leave dem
\q2 Ova dea inside da boonies.
\q Da cloud dat go from da groun to da sky fo show um wea fo go
\q2 Neva go way from dem.
\q Nite time, da fire dat go from da groun to da sky
\q2 Give um light fo see da way dey going.
\q
\v 20 You send yoa Good Spirit fo teach dem.
\q2 You neva hold back da manna bread
\q2 Dat come from you so dey can eat.
\q2 You give um watta wen dey thirsty.
\q
\v 21 Forty year, you wen make shua
\q2 Dey get eryting dey need fo live inside da boonies.
\q Az all dey wen need,
\q2 Cuz dea clotheses neva come ol an broke,
\q2 An dea feets neva swell up.
\q
\v 22 “You give um land
\q2 Dat had dea own king an peopo befo time.
\q You divide da land fo dem,
\q2 So dey take ova da land from King Sihon, Heshbon side,
\q2 An from King Og, Bashan side.
\q
\v 23 You give dem plenny kids,
\q2 Jalike da plenny stars inside da sky.
\q You wen take dem inside da land.
\q2 Az da same land
\q2 Dat you wen tell dea ancesta guys fo go take um ova.
\q
\v 24 So da ohanas dat come from yoa ancesta guys
\q2 Wen go ova dea, an take ova da land.
\q All da Canaan peopo dat stay live dea befo time,
\q2 You take away dea powa
\q An give dea king guys an dea peopo to yoa ohana guys,
\q2 Fo make da Israel peopo do how dey like to da Canaan peopo.
\q
\v 25 Dey take ova towns wit strong walls,
\q2 An da bestes kine lands.
\q Dey take ova plenny houses
\q2 Dat stay full wit all kine good stuff.
\q Dey take ova da holes da odda peopos wen dig
\q2 Fo keep watta inside,
\q An grape farms, an olive farms,
\q2 An trees wit fruits fo eat.
\q So oua peopo wen eat plenny an come full,
\q2 An even start fo come fat.
\q Dey party up
\q2 All da real good tings you do fo dem.
\b
\q
\v 26 “But still yet, da peopo no like lissen.
\q2 Dey make war agains you.
\q Dey throw out da Rules you wen teach
\q2 An make like no mean notting.
\q Dey kill da guys dat stay talk fo you,
\q2 Yoa talka guys dat wen talk to dem serious kine
\q Fo help um turn aroun
\q2 An go come tight wit you again.
\q2 Dey talk real bad bout you.
\q
\v 27 Cuz a dat, you wen make shua,
\q2 Da odda peopo dat stay agains oua Israel ohanas
\q2 Bus up oua peopo an make um suffa.
\q But wen oua peopo wen suffa,
\q2 Dey yell to you fo help dem.
\q You hear dem from inside da sky,
\q2 An cuz you get plenny pity fo dem,
\q You wen give some leada guys to oua peopo,
\q2 Fo get um outa da hard times dey stay in
\q2 Cuz a da ones dat stay agains dem.
\b
\q
\v 28 “But wen oua peopo come inside dis land an make house dea,
\q2 One mo time dey go do bad kine stuff in front you.
\q You make shua dat da peopo dat stay agains dem
\q2 Bus dem up an come da boss guys fo oua peopo.
\q Den oua guys turn aroun like how was befo time
\q2 An yell fo help to you again.
\q2 You hear dem from inside da sky,
\q2 An plenny times you get um outa trouble
\q2 Cuz you get plenny pity fo dem.
\b
\q
\v 29 You wen tell da peopo fo wise up,
\q2 Cuz you like make dem come back
\q2 Lissen to yoa Rules.
\q But dey ack like you not fo real kine.
\q2 Dey no like lissen to da tings
\q2 You teach um dey gotta do,
\q An dey no lissen
\q2 Wat you tell cuz you da Judge.
\q Dey go do bad kine stuff,
\q2 Jalike you tell um no do.
\q Cuz wen peopo do wat you tell um,
\q2 Dey goin live fo real kine.
\q But dem, dey no like change.
\q2 Dey hard head an no like lissen.
\q
\v 30 Fo plenny years you hang in dea wit yoa peopo.
\q2 You send yoa Spirit fo tell da talkas fo God
\q2 Fo tell da peopo, ‘Wise up!’ but dey still yet no lissen.
\q So den, you let da peopo from odda lands
\q2 Take ova yoa peopo.
\q
\v 31 But cuz you get plenny pity fo yoa peopo,
\q2 You neva wipe um out,
\q2 An you neva leave dem an go way from dem.
\q Cuz you da God dat like do good tings fo yoa peopo,
\q2 An give peopo one mo chance.
\b
\q
\v 32 “So now, we like say dis to you
\q2 Cuz you da God dat stay big an strong
\q2 An we stay scared a you:
\q You stay do wat you promise fo do,
\q2 An you erytime stay tight wit yoa peopo.
\q An us guys know dat da way you see um,
\q2 All da bad kine stuff we do, not small kine,
\q But real serious fo oua king guys an ali`i guys,
\q2 Oua pries guys an da talkas fo God,
\q2 Oua ancesta guys, an all yoa peopo.
\q We all stay tired cuz we suffa all dis,
\q2 From da time wen da Assyria king guys come agains us till today.
\q
\v 33 You wen do da right ting
\q2 Bout eryting dat happen to us guys.
\q Cuz we can trus you fo do
\q2 Wat you tell dat you goin do.
\q But us guys know fo shua
\q2 Dat we wen do bad kine stuff.
\q
\v 34 But oua king guys, da odda ali`i guys,
\q2 Da pries guys, an all oua ancesta guys,
\q2 Dey neva do wat yoa Rules say fo do.
\q Dey no lissen to da tings you tell um fo do.
\q2 An dey no lissen wen you wen tell um
\q2 Fo watch out, no do um.
\q
\v 35 Dey even get dea own king fo dea land,
\q2 An you do plenny good tings fo dem,
\q2 An you put one big land in front dem, da bestes land.
\q But dey no do notting fo you,
\q2 An dey no stop doing bad kine stuff,
\q2 An dey still make any kine to odda peopo.
\b
\q
\v 36 “An look at us guys!
\q2 Today, we ony slaves.
\q We live on top da land dat you give to oua ancesta guys
\q2 So dey can eat da stuff dat grow dea
\q An da good tings da land get --
\q2 But still yet, we ony slaves!
\q
\v 37 All da rich kine stuff dat come from dis land,
\q2 Go to da king guys dat you put ova us guys,
\q2 Cuz we wen do bad kine stuff.
\q Dey stay in charge a us an oua animals
\q2 Fo do wateva dey like do.
\q2 Us get plenny trouble!
\s Da Guys Dat Sign Da Paypa Fo Do Da Right Tings
\p
\v 38 “Cuz a all dis, us guys like make one deal wit each odda dat we all can trus. We stay write um all down on top one paypa, an da ali`i guys an da Levi ohana guys an da pries guys, dey goin sign um. Den we roll um up an close um wit govmen seal.”
\c 10
\p
\v 1 Dis, da names dey wen write on top da paypa dat get da govmen wax kine seal:
\q Govna Nehemiah, Hakaliah boy, an Zedekiah.
\p
\v 2 Da pries guys Seraiah, Azariah, Jeremiah,
\v 3 Pash-hur, Amariah, Malkijah,
\v 4 Hattush, Shebaniah, Malluk,
\v 5 Harim, Meremot, Obadiah,
\v 6 Daniel, Ginneton, Baruk,
\v 7 Meshullam, Abijah, Mijamin,
\v 8 Ma`aziah, Bilgai, Shemaiah. Dis da pries guys.
\p
\v 9 Da Levi ohana guys: Jeshua Azaniah boy, Binnui from da Henadad ohana, Kadmiel,
\v 10 an da ones dat stay work wit dem Shebaniah, Hodiah, Kelita, Pelaiah, Hanan,
\v 11 Mika, Rehob, Hashabiah,
\v 12 Zakkur, Sherabiah, da odda Shebaniah,
\v 13 anodda Hodiah, Bani, an Beninu.
\q
\v 14 Da leada guys fo da peopo: Parosh, Pahat-Moab, Elam, Zattu, da odda Bani,
\v 15 Bunni, Azgad, Bebai,
\v 16 Adonijah, Bigvai, Adin,
\v 17 Ater, Hezekiah, Azzur,
\v 18 da odda Hodiah, Hashum, Bezai,
\v 19 Harif, Anatot, Nebai,
\v 20 Magpiash, Meshullam, Hezir,
\v 21 Meshezabel, Zadok, Jaddua,
\v 22 Pelatiah, Hanan, Anaiah,
\v 23 Hoshea, Hananiah, Hasshub,
\v 24 Hallohesh, Pilha, Shobek,
\v 25 Rehum, Hashabnah, Maaseiah,
\v 26 Ahiah, Hanan, Anan,
\v 27 Malluk, Harim, an Baanah.
\s Wat Da Paypa Say
\p
\v 28 “All da odda Israel peopo too -- da pries guys, da Levi ohana guys, da security guards fo da Temple, da music guys, da guys dat stay work inside da Temple, an all da odda peopo dat no stay stick wit da diffren peopos inside da odda lands, so we can stay stick wit da Rules From God, us an oua wifes an kids, erybody dat know an undastan wass happening --
\v 29 togedda wit oua bruddas an sistas an dea leada guys, we all stay okay bout living da way da Rules From God tell. We make strong promise an aks God fo do bad tings to us if we no live dat way! Cuz God wen give his worka guy Moses his Rules fo give um to us guys, so we can do eryting dat oua boss Yahweh tell us we gotta do, an all da odda tings he tell cuz he da Judge.
\p
\v 30 “Dat mean, we no goin give oua girls to da guys from dis land fo marry, an we no goin get dea wahines fo oua boys marry.
\p
\v 31 “Da Res Day, if da peopo dat stay dis land bring stuff fo sell, wheat o watevas, us guys no goin buy um from dem, no matta da Res Day o da odda days dat stay spesho fo God. Ery seven year, we no goin use da land an da stuff dat stay grow inside oua fields, an we goin pay off all da money we owe.
\p
\v 32 “We give ouaself da job fo erybody pay part a one piece silva ery year fo da Temple Wea Oua God Stay, fo do da work dea.
\v 33 Da silva, stay fo pay fo da breads dey put in rows on top da table inside da Temple, an da wheat flour dey give fo make sacrifice, an fo buy da animals dey burn up ery day fo make sacrifice, an fo da spesho kine sacrifices fo da Res Day ery week an ery month, an da sacrifices fo da spesho times wen erybody come togedda, an fo pay fo da gifs dat stay spesho fo God, an fo pay fo da sacrifices dey make wen da Israel peopo do someting bad an dey donno dey doing um, but gotta make um right, an fo pay fo all da work us guys gotta do fo da Temple Fo Oua God.
\p
\v 34 “We wen pull name fo pick wen da pries guys goin work, an da Levi ohana guys too, an fo pick wat time ery year da regular ohanas goin go bring wood fo burn on top da altar fo make sacrifice to oua God Yahweh, jalike stay write inside da Rules.
\p
\v 35 “Us guys make promise fo bring da bestes stuff dat grow on top oua land ery year, and da bestes fruits from ery tree, fo da Temple Wea Yahweh Stay.
\v 36 We goin bring oua numba one boy an da firs animal dat born from oua animals, jalike stay write inside da Rules from God. We goin bring da firs animals dat born from ery cow an sheep and goat, to da Temple Wea Oua God Stay, an give um to da pries guys dat stay work dea inside da Temple Fo Oua God.
\v 37 Us guys goin bring da bestes stuff we get -- flour fo make bread, da money we goin give, da fruits from all da trees, da wine an olive oil. We goin bring um by da pries guys, an put um inside da store rooms inside da Temple fo oua God. We goin give ten percen from all da stuff dat grow on top oua land fo da guys from da Levi ohana, cuz az da Levi guys dat get da right fo use all da ten percen from da small towns wea dey work.
\v 38 Wen da guys from da Levi ohana go fo pick up da ten percen from erybody, da main pries guy, dat get Aaron fo ancesta, he goin go wit dem. Den, from all da ten percen dat da Levi guys pick up, dey goin bring ten percen a all dat to da Temple fo oua God, an put um inside da store rooms ova dea.
\v 39 Cuz da Levi ohana peopo an all da odda Israel peopo goin bring da tings dey like give to God: wheat, an wine, an olive oil. Dey goin bring um ova dea an put um inside da store rooms wea dey keep da bowls an tings fo da Place Dat Stay Spesho Fo God. Dass wea da pries guys do dea work, an da security guards fo da Temple stay, an da music guys, same place.
\p “Us guys no goin foget do all dat fo da Temple Fo Oua God.”
\c 11
\s Dey Fill Up Jerusalem Town Wit Peopo
\p
\v 1 Now, da leada guys fo da peopo live inside Jerusalem town. So all da odda peopo wen pull name fo pick one ohana from ery ten ohanas. Da ones dey pick, gotta move house fo live inside Jerusalem, da town dat stay spesho fo God. Da odda nine ohanas stay inside dea own towns.
\v 2 Get odda peopo wen like go live inside Jerusalem town too, an da odda peopo wen tell dem, “Us guys like fo God do good tings fo you guys!”
\p
\v 3 Dis da names a da main leada guys fo da districk, dat wen go live inside Jerusalem town. (Inside da odda Judah towns, all da Israel peopo dat stay dea, live on top dea own land, da peopo an da prieses an da Levi ohana guys, da guys dat stay work inside da Temple, an odda peopo dat come from da guys dat wen work fo King Solomon.)
\v 4 But inside Jerusalem town, get some a da peopo from da Judah an da Benjamin ohanas dat live dea too.
\p From da Judah ohana: Ataiah, his fadda Uzziah an his odda ancesta guys Zekariah, Amariah, Shefatiah, Mahalalel, all da way back to Perez.
\v 5 Ma`aseiah, his fadda Baruk an his odda ancesta guys Col-hozeh, Hazaiah, Adaiah, Joiarib, anodda Zekariah, all da way back to da guy from Shiloh.
\v 6 Get 468 army guys dat good fo fight an get Perez fo dea ancesta guy, dat live inside Jerusalem town.
\p
\v 7 From da Benjamin ohana: Sallu, his fadda Meshullam, his odda ancestas Joed, Pedaiah, Kolaiah, anodda Ma`aseiah, Itiel, all da way back to Jeshaiah.
\v 8 Sallu get two guys dat follow him, Gabbai an Sallai. Dat make 928 guys.
\v 9 Joel, Zikri boy, stay in charge a dem, an Judah, Hassenuah boy, stay da numba two guy in charge a da big town.
\p
\v 10 From da pries guys, get Jedaiah Joiarib boy, Jakin,
\v 11 Seriah Hilkiah boy, his odda ancesta guys Meshullam, Zadok, Meraiot, an Ahitub, dat befo time was da guy in charge a da Temple Fo God.
\v 12 Wit dea helpa guys dat stay do da work fo da Temple, get 822 guys. An get Adaiah, Jeroham boy, dat get ancestas Pelaliah, Amzi, anodda Zekariah, Pash-hur, an Malkijah.
\v 13 Adiah get odda helpa guys dat was da main guys fo da ol ohanas, an togedda dey make 242 guys. Amash-sai, Azarel boy, his ancestas Ahzai, Meshillemot, an Immer.
\v 14 Wit dem an all dea helpa army guys dat stay good fo fight, 128, wit Zabdiel, Haggedolim boy, ova dem.
\p
\v 15 Da Levi ohana guys: Shemaiah Hasshub boy, wit ancestas Azrikam, Hashabiah, an Bunni.
\v 16 Had Shabbetai and Jozabad too, dat was da two leadas fo da Levi ohana peopo an dat stay in charge a da guys dat do da work outside da Temple Fo God.
\v 17 Mattaniah, Mica boy, wit ancestas Zabdi an Asaf, was da leada dat help da peopo start fo tell God “Mahalo plenny!” an pray to God, an His helpa guy was Bakbukiah, an den Abda Shammua wit ancestas Galal an Jedutun.
\v 18 All da Levi ohana guys dat stay live inside Jerusalem, da Town Dass Spesho Fo God, dey 284 guys.
\p
\v 19 Da guys dat watch da gates fo da Temple, Akkub an Talmon an dea helpas, 172 guys dat stay watch da gates.
\p
\v 20 All da odda pries guys an Levi ohana guys an da res a da Israel peopo, dey live inside da small towns Judah side, an erybody dea get dea own ohana land.
\v 21 But da guys dat stay work inside da Temple Fo God, dey live on top Ofel Hill nea da Temple, an Ziha an Gishpa stay in charge a dem.
\p
\v 22 Inside Jerusalem, da guy dat stay in charge a da Levi ohana guys was Uzzi, Bani boy, his odda ancestas Hashabiah, Mattaniah, an Mica. All dese guys come from Asaf. Dey da singa guys, an dey stay in charge a da music fo da Temple Fo God.
\v 23 Befo time, was da King dat tell da singa guys wat dey gotta do, an dass wat dey do ery day.
\v 24 Petahiah Meshezabel boy, wit Zerah an Judah fo his ancestas, he da one dat talk fo da King bout eryting da peopo need.
\s Da Small Towns Nea Jerusalem
\p
\v 25 Had plenny small towns dat no mo strong wall, wit dea fields. Some a da Judah peopo wen live inside Kiriat-Arba an da small towns aroun dea, oddas inside Dibon an da towns ova dea, oddas inside Jekabzeel an da towns ova dea,
\v 26 an inside odda small towns too, Jeshua, Moladah, Bet-Pelet,
\v 27 Hazar-Shual, Beer-Sheba an da small towns aroun dea,
\v 28 Ziklag, Meconah an da towns dea,
\v 29 En-rimmon, Zorah, Jarmut,
\v 30 Zanoah, Adullam, da small towns dea, Lakish an da fields aroun da town, Azekah an da small towns dea. So dey wen make house from Beer-sheba to da Hinnom Valley.
\v 31 Da Benjamin peopo, dey live Geba town an da odda side, Mikmash, Aija, Bethel an da towns aroun dea,
\v 32 Anatot, Nob, Ananiah,
\v 33 Hazor, Ramah, Gittaim,
\v 34 Hadid, Zeboim, Neballat,
\v 35 Lod, an Ono inside da valley wea da guys dat make fancy kine tings live.
\v 36 Some ohanas from da Levi peopo dat stay inside Judah wen go live wit da Benjamin peopo.
\c 12
\s Da Prieses An Da Odda Levi Ohana Guys
\p
\v 1 Dis da names fo da pries guys an da  Levi ohana guys dat wen come back Jerusalem side wit Zerubbabel Sheltiel boy, an wit Jeshua da main pries guy:
\q Seraiah, Jeremiah, Ezra,
\v 2 Amariah, Malluk, Hattush,
\q
\v 3 Shekaniah, Rehum, Meremot,
\q
\v 4 Iddo, Ginnetoi, Abijah,
\q
\v 5 Mijamin, Moadiah, Bilgah,
\q
\v 6 Shemaiah, Joiarib, Jedaiah,
\q
\v 7 Sallu, Amok, Hilkiah, an Jedaiah.
\p
Dey da ones dat wen lead da pries guys an da pries helpa guys, da time Jeshua was da main pries guy.
\p
\v 8 Get odda Levi ohana guys dat wen come back da same time, anodda Jeshua, Binnui, Kadmiel, Sherebiah, anodda Judah, an Mattaniah. Mattaniah an his helpa guys was da one in charge a da songs fo tell God “Mahalo!”
\v 9 Wen dey come togedda fo pray to God, all da Levi guys stand one side, an dea helpa guys Bakbukiah an Unni stand da odda side.
\s2 Da Main Pries Guys
\q
\v 10 Jeshua was da main pries guy wen dey come back.
\q Afta Jeshua, his boy Joiakim come da main pries guy.
\q Afta Joiakim, his boy Eliashib come da main pries guy.
\q
\v 11 Afta Eliashib, his boy Joiada come da main pries guy.
\q Afta Joiada, his boy Johanan come da main pries guy. He get one boy Jaddua.
\p
\v 12 Da time Joiakim was da main pries guy, dis was da leadas fo da pries ohanas:
\q Meraiah was da leada fo da Seraiah ohana.
\q Hananiah was leada fo da Jeremiah ohana.
\q
\v 13 Meshullam was leada fo da Ezra ohana.
\q Jehohanan was leada fo da Amariah ohana.
\q
\v 14 Jonathan was leada fo da Malluk ohana.
\q Joseph was leada fo da Shebaniah ohana.
\q
\v 15 Adna was leada fo da Harim ohana.
\q Helkai was leada fo da Meraiot ohana.
\q
\v 16 Zekariah was leada fo da Iddo ohana.
\q Meshullam was leada fo da Ginneton ohana.
\q
\v 17 Zikri was leada fo da Abijah ohana.
\q Piltai was leada fo da Moadiah ohana.
\q
\v 18 Shammua was leada fo da Bilga ohana.
\q Jehonatan was leada fo da Shemaiah ohana.
\q
\v 19 Mattenai was leada fo da Joiarib ohana.
\q Uzzi was leada fo da Jedaiah ohana.
\q
\v 20 Kallai was leada fo da Sallu ohana.
\q Eber was leada fo da Amok ohana.
\q
\v 21 Hashabiah was leada fo da Hilkiah ohana.
\q Netanel was leada fo da Jedaiah ohana.
\p
\v 22 Da time da Persia guy Darius Numba Two was king, da peopo write down who was da leadas fo all da Levi ohanas, an fo da odda pries ohanas. Da names, dey wen use all da time da main pries guys was Eliashib, Joiada, Johanan, an Jaddua.
\v 23 Da peopo wen write um all inside da main Book Fo Da Name A All Da Peopo, till da time Johanan, Eliashib boy, was da main pries.
\p
\v 24 Da leada guys fo da Levi ohana was Hashabiah, Sherebiah, an Jeshua, Kadmiel boy. Dey stand one side, an da oddas stand da odda side, fo sing fo God and tell him “Mahalo!” jalike David wen tell um fo do, da guy dat stay tight wit God. Da guys one side sing, den da guys da odda side sing.
\p
\v 25 Mattaniah, Bakbukiah, Obadiah, Meshullam, Talmon, an Akkub, dey da guys in charge a da security. Dey stay nea da Temple gates an da storage rooms.
\p
\v 26 Dat time, dis guys work inside da Temple. Joiakim was da main pries guy, he Jeshua boy an Jozadak grankid. Nehemiah was da territorial govna. Da pries guy Ezra was da one stay teach da Rules From God.
\s Dey Give Blessing Fo Da Jerusalem Wall
\p
\v 27 Da time fo give blessing fo da new town wall aroun Jerusalem, dey send peopo all da places da Levi ohana guys live, fo bring all a dem to Jerusalem town so erybody can make one big party fo God cuz dey stay feel real good inside. Dey tell God he awesome, an dey sing, an dey play cymbal an big harp an small harp.
\v 28 All da peopo dat sing wen come togedda from da towns aroun Jerusalem. Dey even come from da small towns wea da Netofat peopo live,
\v 29 an from Bet-Gilgal an nea Geba an Azmavet (cuz da singa guys wen build small towns fo dem live nea Jerusalem).
\v 30 Da pries guys an da Levi ohana guys wen make sacrifice fo make shua dey can go inside da Temple, an dey make sacrifice fo all da peopo, an fo da gates an da wall too.
\p
\v 31 Den I bring da Judah leada guys up on top da wall. I half half da peopo fo make parade an tell God he awesome. Half a dem go da right side on top da wall, all da way to da Rubbish Gate.
\v 32 Hishaiah go wit dem, an half da govmen guys from Judah,
\v 33 an Azariah, Ezra, Meshullam,
\v 34 Judah, Benjamin, Shemaiah, an Jeremiah,
\v 35 an some a da younga pries guys wit trumpets -- Zekariah wit ancesta guys Jonatan, Shemaiah, Mattaniah, Micaiah, Zakkur Asaf boy,
\v 36 an odda guys from da same ohana, Shemaiah, Azarel, Milalai, Gilalai, Ma`ai, Netanel, anodda Judah, an Hanani. Dey use da music instruments dat David wen make, da guy dat stay tight wit God. Ezra, da guy dat stay teach da Rules From God, he go firs, den da oddas.
\v 37 Wen dey come to da Fountain Gate, dey go strait up da steps on top da wall wea da wall go up da hill to David's Town, above David House. Den dey go da eas side to da Watta Gate.
\p
\v 38 All da odda ones dat wen come fo tell God he awesome, dey go da lef side. I go behin dem wit half da peopo, above da Towa Wit Ovens, to da Wide Wall,
\v 39 above da Efraim Gate an da Ol Gate, an da Fish Gate an da Hananel Towa an da Towa Fo Da Hundred, to da Sheep Gate, an den we stop by da Security Gate.
\v 40 Get peopo dat wen go wit me fo tell God he awesome. Me, an half da govmen guys, an da odda half a da peopo dat wen go da lef side, we all stand togedda inside da yard outside da Temple Fo God.
\v 41 Some a da pries guys carry trumpets: Eliakim, Ma`aseiah, Miniamin, Mikaiah, Elioenai, Zekariah, an Hananiah.
\v 42 Odda guys sing: Ma`aseiah, Shemaiah, Eleazar, Uzzi, Jehohanan, Malkijah, Elam, an Ezer. Da singa guys wen do good job fo sing. Jezrahiah was da leada.
\v 43 Dat day, da peopo make choke plenny sacrifice. Dey all stay real good inside, cuz God make dem feel plenny good. Da wahines an da kids, same ting, dey stay real good inside. You can hear how good inside da Jerusalem peopo stay, no matta you stay far from da town.
\s Da Jobs Fo Da Temple Leadas
\p
\v 44 Dat same day, us guys wen give guys dea jobs. Some take care da rooms an da storage places, some take da gifs dat peopo bring, oddas take da bestes stuff dat da peopo cut from da groun an bring to da Temple jalike God's Rules tell so da pries guys can eat. Da peopo bring stuff from da fields aroun da small towns too, fo da Levi ohana peopo. All da Judah peopo stay real good inside, cuz a da pries guys an da Levi ohana guys dat help da prieses.
\v 45 Da pries guys do dea work fo God, an make da sacrifices so dey an da peopo can go inside da Temple fo pray. Da singa guys an da security guard guys, dey all do dea job jalike King David an his boy King Solomon wen tell um fo do befo time.
\v 46 Was jalike da time David was King an Asaf was one a da prieses. Had one leada guy fo da singas, an dey wen make plenny songs fo tell God dat he da greates, an fo tell him “Mahalo!”
\v 47 An da time Zerubbabel stay in charge, an layta wen me, Nehemiah, stay in charge, all da Israel peopo wen give da food ery day fo da singa guys an da security guard guys. Dey wen put inside one storage place, all da stuff dass spesho fo God, fo da Levi ohana guys, an den da Levi ohana guys wen put inside anodda storage place, da part a dat stuff dass fo da pries guys dat get Aaron fo dea ancesta.
\c 13
\s Da Peopo From Ammon An Moab Hemo Demself From God's Peopo
\p
\v 1 Dat same day, da leada guys read from da book Moses wen write, cuz dey like da peopo lissen. Dey find out inside da book, dat nobody from da Ammon peopo o da Moab peopo can get da right fo come one Israel guy, fo come togedda wit da Israel peopo an show God love an respeck.
\v 2 Cuz long time befo, wen da Israel peopo come outa da boonies, da Ammon an Moab peopo neva go out fo meet da Israel peopo an tell um aloha an give um bread an watta. Dey wen pay Balaam fo put bad kine kahuna on top da Israel peopo. But oua God wen take da bad ting Balaam like do an make um come good.
\v 3 Wen da peopo hear wat da Rules from God tell, dey make all da peopo from da odda nations hemo demself from da Israel peopo.
\s Da Tings Nehemiah Change
\p
\v 4 Befo now, had one pries guy Eliashib, dat da main pries guys wen put in charge a da storage rooms inside da Temple Fo Oua God. Eliashib, he Tobiah's relative.
\v 5 Elishiab wen fix up fo Tobiah, one big room inside da Temple. Befo time, inside dat room dey stay stash da wheat dat da peopo bring to da Temple, an da incense, da spesho dishes, an da ten percen a da wheat, wine, an olive oil. Cuz God wen tell da peopo fo give all dat to da Levi ohana peopo, an da singa guys, an da security guard guys. He tell um fo give stuff to da pries guys too. All dat, dey stay stash inside dat room.
\p
\v 6 Da time Eliashib do all dat fo Tobiah, I no stay Jerusalem town. I wen go back Babylon side by King Artaxerxes. Was da year numba 32 dat he stay king. Layta, I wen aks da King fo let me go back Jerusalem town.
\v 7 Da king let me go Jerusalem side. Den I wen find out da bad ting Eliashib wen do fo help Tobiah, fixing up one room fo Tobiah inside da yard, inside da Temple Fo God.
\v 8 I come plenny huhu, an I throw all Tobiah furnitures an stuffs outa dat room.
\v 9 Den I tell da pries guys fo make sacrifice, so can use da storage rooms fo God one mo time. Den I bring back all da bowls an tings fo da Temple Fo God, an da incense an da wheat fo make sacrifice.
\p
\v 10 Den I find out da guys in charge a da stuff peopo bring to da Temple, neva give da Levi ohana guys da tings. Cuz a dat, da Levi ohana guys an da singa guys, dat help da odda peopo show love an respeck fo God, dey neva stick aroun, cuz dey gotta farm dea own fields.
\v 11 So I tell da guys in charge dey not doing da right ting. I tell, “How come nobody do notting fo da Temple Fo God, aah?” An I make dem come togedda and tell erybody wat dea job suppose to be.
\p
\v 12 Afta dat, all da Judah peopo wen bring da ten percen a da wheat, an wine, an olive oil dey wen get. Dey put um all inside da storage places inside da Temple.
\v 13 I wen make guys stay in charge a da money an da storage places. Get da pries guy Shelemiah, da guy Zadok dat stay teach da Rules From God, an Pedaiah from da Levi ohana. Fo dese guys I give um Hanan fo helpa, Zakkur's boy an Mattaniah's grankid. Cuz dese da guys erybody can trus. Dea job was fo make shua da guys dat work wit dem get da stuffs fo give to da Levi ohana guys an da prieses.
\m
\q
\v 14 Eh my God! No foget dis ting I wen do cuz I stay stick wit you!
\q2 No wipe out da good tings I wen do fo da Temple Fo My God an fo take care da place!
\s Dey Make Da Res Day Serious Kine
\p
\v 15 Dat time, I see one nodda ting happen Judah side. On da Res Day, I see da peopo smashing grape wit dea feets fo make wine, an bringing plenny wheat an putting um on top da donkeys. I see um bringing wine, grape, fig, an all kine heavy stuff inside Jerusalem town, on da Res Day. Right den an dea, I tell um “No sell food on da Res Day!”
\v 16 Same time, had peopo from Tyre town dat live inside Jerusalem town. On da Res Day dey wen bring fishes an all kine stuff fo sell to da Judah peopo, inside Jerusalem.
\v 17 Den I tell off da Judah ali`i guys: “Wat you guys doing?! Real pilau, you know! You ack jalike da Res Day da same, jalike da odda days!
\v 18 You guys stay make jalike yoa ancesta guys. Az why God wen wipe out all us guys an bus up oua town! An den, you guys like make God mo plenny huhu wit us Israel guys, cuz you stay ack jalike da Res Day da same, jalike da odda days!”
\p
\v 19 Da day befo da Res Day, da time wen start fo come dark litto bit, I tell um fo shut da Jerusalem town gates. I tell um, “You betta not open da gates till da Res Day pau.” I put some a my own worka guys in charge a da gates, so nobody can bring even one load inside, on da Res Day.
\v 20 One o two times, da guys who get store, an da guys dat like sell all kine stuffs on top da streets, gotta stay all nite outside Jerusalem town.
\p
\v 21 I talk mean to dem: “You guys no can do how you stay doing. How come you guys stay all nite in front da gate?! You do dat one mo time, I put you in jail!” From dat time dey no come inside da town, on da Res Day.
\v 22 I tell da Levi ohana guys fo make da sacrifices so dey can work fo God, den come an be security guards by da gates, fo make shua da Res Day stay spesho fo God.
\q Eh my God, try no foget dis ting I wen do, an tink good bout me!
\q Let me go, an no hurt me,
\q Cuz you stay stick wit yoa peopo all da time!
\s No Can Marry Peopo Dat Not Jewish
\p
\v 23 Dat time too, I wen see Jewish guys dat wen marry wahines from Ashdod, Ammon, an Moab.
\v 24 Half a dea kids talk Ashdod kine. Dey donno how fo talk Judah kine, cuz dey use da odda peopos language.
\v 25 I tell dem strait, “Az wrong!” I tell um off. I bus um up. I even pull out da hair from some a da guys! Den I make dem make one strong promise  an aks God fo wipe dem out if dey no do wat dey say dey goin do. Dis da promise: “You guys, no goin let yoa daughtas marry da guys from da odda peopos. You no goin marry da wahines from da odda peopos, an you no goin let yoa boys marry dem.
\v 26 Even King Solomon wen do bad kine tings, cuz a da wahines from da odda peopos he wen marry! Him, he was mo awesome den all da odda king guys. His God get choke plenny love an aloha fo Solomon, an God make him da king ova all da Israel peopo. But still yet, was da wahines from da odda peopos dat wen make Solomon do bad kine tings.
\v 27 So, wat you tink? You tink az good fo us hear now, dat oua God no can trus you guys, cuz you marry da wahines from da odda peopos?!”
\p
\v 28 Jehoiada da pries guy, his fadda Eliashib da main pries guy, he had one boy dat marry da daughta a Sanballat da Horon guy. I wen throw out da boy an no let um come wea I stay.
\q
\v 29 Eh my God, no foget dat kine bad peopo.
\q Dey make da pries guys come pilau,
\q2 So dey no can work fo you,
\q Cuz dey wen broke da deal you wen make
\q Fo da pries guys an da Levi ohana guys.
\p
\v 30 Dass how I wen get rid a all da stuff dat come from da odda peopos. I set up da jobs fo da pries guys an da Levi ohana guys, so dat ery one a dem know wat dey suppose to do.
\v 31 I make shua dat da peopo bring da pries guys wood, fo burn da sacrifices, wen dey suppose to make sacrifice. I make shua dey get da bestes stuff dat da peopo cut from wat dey wen plant.
\q Eh my God! No foget me!
\q Do good tings fo me.