\id est
\mt Esther
\h Esther
\c 1
\s King Xerxes Make Party
\p
\v 1 Dis wat wen happen wen Xerxes was king fo da 127 districks dat get dea own local govmen, from India to Sudan.
\v 2 Dat time, King Xerxes stay sit on top his throne inside Susa town, wea get strong wall.
\p
\v 3 In da numba three year wen he stay king, he make one big party fo all da ali`i an his govmen guys. Da army leada guys fo Persia an Media, da princes, an da ali`i fo da districks dat get dea own local govmen, dey all stay dea.
\v 4 Fo six month he show um all da big awesome rich stuff he own cuz he da king fo all dat.
\p
\v 5 Afta da six month pau, he make one big party an last fo seven days, inside da yard aroun da garden inside his palace, fo all da peopo dat stay inside Susa town wit da strong walls, from da mos importan peopo to da regula peopo.
\v 6 Da garden dey wen hang blue an white linen cloth, an get white an purple linen rope fo tie um to silva rings on top marble stone poses. Had gold an silva couches on top one floor wit color pichas dey make from dark red stone, white marble, da inside a da pearl oysta shell, an spesho kine brick wit all kine color.
\v 7 Dey give da peopo wine in fancy kine gold cup dat cost plenny, ery one differen. Had plenny wine, cuz da king get plenny fo give dem.
\v 8 Da king tell da guys dat stay in charge da wine, fo give erybody wateva dey like, an no stop um fo drink um dea own way how dey like.
\p
\v 9 Same time Queen Vashti make one big party, fo all da wahines dat stay inside King Xerxes palace too.
\s Da King Throw Out Queen Vashti
\p
\v 10 On da numba seven day, King Xerxes stay tipsy from da wine. He tell da seven palace guys dat work fo him, Mehuman, Bizta, Harbona, Bigta, Abagta, Zetar, an Carcas,
\v 11 fo bring Queen Vashti in front him, wit her queen kine crown on top her head, so Xerxes can show all da peopo an ali`i guys dat stay dea how pretty she stay.
\p
\v 12 But wen da helpa guys go tell her wat da king say, she no like go. Den da king come huhu an real mad agains her.
\p
\v 13 Da king go talk to da guys dat undastan eryting bout wass happening, cuz he do dat erytime he like know bout da rules wat da judge guys gotta do.
\v 14 Had seven ali`i guys from Persia an Media dat stay good friends wit da king: Carshena, Shetar, Admata, Tarshish, Meres, Marsena, an Memucan. Dey da ony ones can go talk to da king weneva dey like, an dey stay da main leadas fo da country.
\p
\v 15 King Xerxes aks dem, “Wat da rules say I gotta do bout Queen Vashti? I da king, an my palace guys wen tell her wat I say awready, but she no like do wat I wen tell her fo do.”
\p
\v 16 Den Memucan stand in front da king an da ali`i. He tell, “No was jus agains you, da king, dat Queen Vashti wen go do dis kine ting. She do um agains da ali`i guys too, an agains da peopo inside all da districks wea you, King Xerxes, stay da king.
\v 17 You know, all da wahines goin hear wat da queen wen do, an dey goin tink dey can make to dea husbans jalike dey no need lissen to dem. Dey goin tell, ‘King Xerxes wen tell his guys fo bring Queen Vashti in front him, but she neva go.’
\v 18 Az why today, da ali`i wahines from Persia an Media who stay hear awready wat da queen wen do, dey goin talk to all da ali`i guys lidat too. Dey no goin show respeck, an dey goin make argue.
\p
\v 19 “So, if you like, you go send out dis rule, an tell yoa peopo fo write um inside da rules fo Persia an Media. Den no mo nobody can change da rule: Vashti no goin eva come again wea King Xerxes stay. Den you goin make anodda wahine da queen, somebody mo betta den Vashti dat goin lissen wat her husban tell.
\v 20 Den, wen erybody all ova dis big wide land hear dis importan rule da king tell, all da wahines goin show respeck fo dea husbands, from da mos important one to da one dat not importan.”
\p
\v 21 Da king an his ali`i guys wen like wat Memucan tell, so da king do wat Memucan say.
\v 22 He send messenja guys all ova da land wit lettas fo da main guys inside ery districk, fo ery peopo in dea own language an alphabets, telling dem dat ery man gotta be da main leada guy inside his own house.
\c 2
\s Dey Make Esther Da Queen
\p
\v 1 Layta, afta King Xerxes no stay huhu no moa, he rememba Vashti an wat she wen do, an wat he tell erybody dey gotta do bout her.
\v 2 Den da guys dat work fo da king fo take care him, dey tell him, “Az good if some guys go look fo some young an good looking wahines fo da king, dat no sleep wit one guy still yet.
\v 3 You can pick guys from ery districk inside da land fo help find all dose good looking young wahines an bring um inside da place wea da king's wifes stay, inside da strong walls Susa side. Hegai, da guy dat no can get kids an da king stay put him fo take care da odda wahines, he can take charge dem too. Den da spesho peopo dat know how fo make dem mo pretty still yet, can do dat.
\v 4 Den da one dat da king like da mostes can come queen, cuz Vashti not da queen no moa.” Da king like wat his guys tell him, so he do dat.
\p
\v 5 Now inside da Susa strong walls, had one Jewish guy from da Benjamin ohana, dat get da name Mordecai. He Jair's boy, Shimei's grankid, an Kish great grankid.
\v 6 Befo time, Nebukadnezzar, da king fo Babylon, wen take Kish prisona from Jerusalem, wit King Coniah da king fo Judah, an odda peopo.
\v 7 Mordecai wen come da hanai fadda fo his uncle girl Hadassah, cuz her no mo fadda an mudda. Her Persia name Esther, dat mean “Star.” She real good looking, wit one awesome figure. From da time her fadda an mudda mahke, Mordecai take her jalike his own girl.
\p
\v 8 Afta erybody hear wat da king tell, an da rule he wen make bout Vashti, plenny young wahines come togedda inside da strong walls Susa town, an dey stay wit Hegai in charge a dem. Da palace peopo take Esther to da King's palace an make Hegai stay in charge a her too.
\v 9 Hegai like Esther plenny, an he do plenny nice tings fo her. He tell da helpa wahines fo make her come mo pretty still yet, an make spesho food dass ony fo her. He pick seven young wahines from King Xerxes palace fo take care her. He move Esther an her wahines to da bestes place inside wea all da wahines stay.
\p
\v 10 Now Esther no tell nobody bout her ohana, o dat she Jewish, cuz Mordecai wen tell her fo no tell dem.
\v 11 Ery day Mordecai walk outside da yard nea wea da wahines stay, fo find out how Esther an wat stay happen to her.
\p
\v 12 Befo one wahine's turn come fo go inside sleep wit King Xerxes, dey gotta pau twelve month wit da palace wahines dat make da young wahines come mo good looking. Dass six month wit myrrh oil, an six month wit odda perfume an fo put make up on dea face.
\v 13 Dis az how dey go inside by da king. Dey can take wateva dey like from da wahine place to da king's palace.
\v 14 Wen dark time almos come, dey go ova dea, an in da morning come back to one diffren place wea da king's odda wifes stay. Shaashagaz, one nodda guy dat take care da wahines fo da king, stay in charge a da ones ova dea. Dey no go back fo sleep wit da king, ony if he like her, an call her back by her name.
\p
\v 15-16 Was January, da numba seven year wen Xerxes stay king. Az wen dey take Esther to King Xerxes palace. (She Mordecai uncle Abihail's girl, dat Mordecai wen hanai.) Wen she go, she neva aks fo notting, ony wat Hegai, da guy dat stay in charge da wahines, tell her. Now, wen erybody see Esther, dey like her plenny.
\p
\v 17 Da king wen like Esther mo den all da odda wahines. He tink her da bestes an he like do nice tings fo her. So he put da queen's crown on top her head an make her da queen, cuz Vashti not da queen no moa.
\p
\v 18 Den da king make one big party fo Esther, an tell all da ali`i an da leadas fo come. He make one spesho day fo all da districks, an give erybody plenny gifs.
\s Mordecai Find Out Two Guys Like Kill Da King
\p
\v 19 Wen dey bring all da young girls again da nex time, Mordecai stay sitting by da king's gate.
\v 20 But Esther still yet neva tell nobody bout her ohana, o dat she Jewish, jalike Mordecai wen tell her. Cuz she still yet do eryting he tell her, jalike he wen teach her fo do, small kid time.
\p
\v 21 Wen Mordecai stay sitting by da king's gate, Bigtana and Teresh, two a da king's palace guys dat stay watch da gate, wen come huhu, an make plan fo kill King Xerxes.
\v 22 But Mordecai find out bout dat, an tell Queen Esther. Den Esther tell da king bout um, an dat Mordecai da guy wen find um out.
\v 23 Wen da police guys check out wat she tell, an find out az wass true, dey hang da two palace guys. An dey write all dat inside da record book fo da king.
\c 3
\s Haman Make Plan Fo Wipe Out Da Jewish Peopo
\p
\v 1 Afta all dese tings wen happen, King Xerxes wen give plenny powa to Haman, Hammedata's boy. He from Agag. King Xerxes make him mo importan den all da odda ali`i.
\v 2 All da king's leadas dat stay by da king's gate go down on dea knees in front Haman, an show him respeck, cuz da king tell dem fo do dat. But Mordecai, he no go down in front Haman, an no show him respeck.
\p
\v 3 Den da king's leadas by da king's gate aks Mordecai, “How come you no do wat da king tell erybody fo do?”
\v 4 Ery day dey aks Mordecai dat, but he still yet no lissen to dem. Az why dey tell Haman bout um, an if he still yet goin let Mordecai make lidat. Cuz Mordecai wen tell dem dat he one Jew.
\p
\v 5 Wen Haman see dat Mordecai no go down in front him o show him respeck, he come real huhu.
\v 6 But wen Haman find out who Mordecai's peopo, Haman tink az no good if he kill ony Mordecai. He tink mo betta if he can find someting so he can wipe out all da Jews, Mordecai's peopo, all ova da land wea Xerxes stay da king.
\p
\v 7 In April, da numba twelve year wen Xerxes stay king, dey pull straw in front Haman fo pick da month an da day wen dey goin kill da Jews. An dey pick March 7, almos one year layta.
\p
\v 8 Den Haman tell King Xerxes, “Get some diffren kine peopo dat live all ova da place inside hea, but dey no make friends wit da odda peopos inside all da districks wea you stay king. Dey get dea own rules differen from all da odda peopos, an dey no do wat yoa rules tell um fo do. Mo betta you no let dem stay alive.
\v 9 If you like do dat, go make one rule fo wipe dem all out. An I goin give 375 ton silva to da guys dat take care da king's money, fo give to da ones dat kill da Jews.
\p
\v 10 So da king take off his ring dat he use fo stamp papers, an give um to Haman, Hammedata's boy, from Agag side, da guy dat hate da Jews.
\v 11 Da king tell Haman, “No worry bout da money, an make how you like to dose peopo.”
\p
\v 12 Den April 17, Haman call da king's secretaries. Da secretaries write da way da peopo inside ery districk stay write, an use dea alphabets. Dey make um fo ery peopo in dea own language. Dey write wat Haman like tell da king's govnas fo da states, da govnas fo all da districks dat get dea own local govmen, an da ali`i fo ery peopo. Den, fo show dat King Xerxes da one wen tell um fo write wat Haman say, den dey stamp ery paypa wit da king's own ring.
\v 13 Da tings dey wen write, dey give um to da messenja guys, an dey run um to all da king's districks. Dey tell da leadas fo kill all da Jews. All da young an da ol guys, da kids an da wahines, dey tell um fo kill um all on March 7. An dey tell da leada guys dey can go take eryting da Jews get.
\v 14 Inside ery districk, an fo ery peopo, dey suppose to make one copy a wat da rule say, an make um da rule fo ery districk. Dey gotta make shua ery peopo hear um, so dey goin be ready fo kill all da Jews dat day.
\p
\v 15 Da king tell da messenja guys fo go real quick, so dey go out right den an dea, an tell wat da king's rule say. Dey put up da rule on top da strong wall inside Susa town too. Den da king an Haman sit down fo drink wine. But da peopo inside Susa town, dey donno wat fo do.
\c 4
\s Mordecai Aks Esther Fo Help Da Jewish Peopo
\p
\v 1 Wen Mordecai wen find out bout eryting Haman guys goin do to da Jewish peopo, he broke his clotheses, an put on burmbag clotheses an throw ashes up in da air an let um come down on top his head fo show he stay sore inside. Den he go outside his house wea he stay fo go inside da big town, an he cry real loud fo get help from somebody.
\v 2 But he ony stay by da king's gate, cuz dey no let nobody wit burmbag clotheses go inside dea.
\v 3 Inside ery districk wea da Jewish peopo hear wat da king tell da odda peopos fo do, da Jews ack jalike somebody wen mahke. Dey no like eat, an dey cry an yell real loud. Plenny Jewish peopo all ova da place wear burmbag clotheses, an throw ashes up inside da air an let um come down on top dea head cuz dey stay plenny sore inside.
\p
\v 4 Wen da wahines dat work fo Queen Esther, an her guys dat stay in charge a da wahines, go tell Esther bout Mordecai, wen bodda her plenny. She send clotheses fo him put on, so he no need wear burmbag clotheses, but he no like use um.
\v 5 Den Esther tell Hatak fo come by her. He one a da guys dat no can get kids an da king stay put fo work fo her. She tell Hatak fo find out wat stay bodda Mordecai, an why he stay ack lidat.
\p
\v 6 So Hatak go out by Mordecai wea he stay in da open place inside da town in front da king's gate, an aks him.
\p
\v 7 Den Mordecai tell Hatak eryting dat wen happen to him, an how plenny money Haman promise fo pay da peopo dat take care da king's money, fo wipe out da Jewish peopo.
\v 8 Mordecai give Hatak one copy wea dey write down wat King Xerxes inside Susa town tell bout da Persia peopo goin wipe out da Jews. Mordecai tell Hatak, “Show dis to Esther. Tell her eryting. Tell her she gotta go by da king fo her peopo, fo beg him fo give um chance!”
\p
\v 9 Hatak go back tell Esther eryting Mordecai wen tell.
\v 10 Den Esther tell Hatak fo tell Mordecai,
\v 11 “All da king's leadas an palace peopo an all da peopo inside his districks know, dat any guy o wahine dat go near da king inside da palace yard, an he neva call dem, da king get ony one rule: dat dey gotta mahke. Da ony time dey no gotta mahke, if he put out his gold rod to dem. Den dey can stay alive. But now get thirty days awready an da king no call me fo go by him yet.”
\v 12 Hatak tell Mordecai wat Esther wen say.
\p
\v 13 Mordecai tell Hatak fo tell her, “No tink dat jus cuz you stay inside da king's palace, you da ony Jew dat no goin mahke.
\v 14 But if you no talk notting dis time, some odda ting goin happen fo get da Jewish peopo outa dis one nodda way. But you an yoa fadda's ohana goin all mahke. Nobody know dis fo shua, but maybe az why you wen come inside da king's ohana, jus fo dis one ting.”
\p
\v 15 Den Esther tell Hatak fo tell Mordecai dis:
\v 16 “Go bring togedda all da Jewish peopo you can find inside Susa town an no eat food so you can pray fo me. No eat an no drink fo three days, day time o nite time. Me an da wahines dat work fo me, we goin do same ting, no eat an no drink notting fo three days too, so us guys can pray. Afta we do dat, I goin go in front da king, no matta I stay broke da rules. An if I mahke, I mahke.”
\v 17 So Mordecai go way an do eryting Esther tell him fo do.
\c 5
\s Esther Aks Da King Fo Do Someting
\p
\v 1 On da numba three day, Esther put on her queen kine clotheses an go stand outside da door, inside da yard in da palace, right in front da place wea da king stay work. Da king stay sitting on top his throne inside da palace, wea he can see outside da door.
\v 2 Wen he see Queen Esther standing inside da yard, he like see her, an he hold his gold rod out to her dat was inside his hand. So Esther go by him an touch da end a da rod.
\p
\v 3 Den da king aks her, “Wat you like, Queen Esther? Wat you aksing fo? Even if you aks fo half a eryting I get, I goin give um to you.”
\p
\v 4 She tell, “If you like, I like you -- an bring Haman too -- fo come today fo one big dinna I wen make fo you.”
\p
\v 5 Da king tell his guys, “Bring Haman now, so we can do wat Esther aks.”
\p
So da king an Haman wen eat da dinna Esther wen make.
\v 6 Wen dey stay drinking da wine, da king aks Esther one mo time, “Now wat you like? I goin give um to you, even half da stuff I get. I goin do um fo you!”
\p
\v 7 Esther tell him, “Dis da ting I aksing you fo do:
\v 8 If da king like me, an he like do wat I aks, den I like you da king -- an Haman too -- come again tomorrow fo anodda dinna I goin make. Den I goin tell you wat I stay aksing fo.”
\s Haman Stay Real Huhu Agains Mordecai
\p
\v 9 Haman go out dat day an he stay feel real good inside. He stay feel real happy. But wen he see Mordecai by da king's gate, an see dat Mordecai neva stand up fo him, an show he no scared a him, Haman come even mo huhu agains Mordecai den befo.
\v 10 But still yet Haman no say notting, an go home.
\p
He call togedda his friends an Zeresh his wife.
\v 11 Haman talk big to dem bout all his rich stuffs, bout all his boys, an how da king show him plenny respeck, an make him mo importan den all da odda ali`i an palace guys dat stay work fo da king.
\v 12 He tell dem, “An az not all! I da ony one Queen Esther wen aks fo come wit da king fo eat one dinna she wen make. An she aks me again fo come eat anodda dinna wit him tomorrow.
\v 13 But dat no mean notting to me! Cuz I see Mordecai da Jew erytime sitting ova dea by da king's gate, an he no stand up wen I come!”
\p
\v 14 Zeresh, Haman's wife, an all his friends tell him, “Go tell somebody put up one big pos 75 feet high, fo hang Mordecai, an in da morning, aks da king fo tell his guys hang Mordecai on um. Den go wit da king to da dinna, an you can feel good inside.” Haman like dat plenny, an tell his guys fo put up da pos fo hang Mordecai.
\c 6
\s Da King Show Respeck Fo Mordecai
\p
\v 1 Dat nite da king no can sleep, so he aks his guys fo bring da record book, da one wea dey write down eryting dat happen from da time he wen come one king. He like fo somebody read um fo him.
\v 2 Inside dea, dey read, dat befo time, Mordecai find out dat two a King Xerxes guys dat guard da doors, Bigtana an Teresh, make plan fo kill da king, an Mordecai tell da king's helpa guys, an dey write um inside da book.
\p
\v 3 Afta da king hear dis, he aks, “How we wen show respeck to Mordecai fo do dis?”
\p
Da king's helpa guys tell him, “We neva do notting fo him.”
\p
\v 4 Da king tell, “Who stay outside, inside da palace yard right now?” Now Haman jus wen come inside da palace yard fo go aks da king fo tell his guys fo hang Mordecai on top da pos Haman wen set up, fo hang um.
\p
\v 5 Da king's helpa guys tell him, “Haman stay standing outside dea.”
\p Da king tell dem, “Bring him inside.”
\p
\v 6 Wen Haman come inside, da king aks him, “Wat I goin do fo one guy, wen I really like show respeck fo him?”
\p Now Haman stay tinking, “Fo shua, az me he talking bout, cuz no mo nobody da king get mo respeck fo den me!”
\v 7 So he tell da king, “Da guy da king really like show respect fo,
\v 8 tell yoa guys fo bring one king kine robe fo him, an one horse da king wen awready ride, dat get one king's mark on top da horse head.
\v 9 Den give da robe an da horse to one a da king's bestes ali`i fo put da robe on top da guy you really like show respect fo, an fo lead da guy on top da horse thru da streets inside da big town, an call out in front him, “Dis da kine ting dat da king like do fo da guy he really like show respeck fo!”
\p
\v 10 Den da king tell Haman, “Go right now. Get da robe an da horse, an do jalike you wen say fo Mordecai da Jew, dat stay sit by da king's gate. Make shua you do eryting jalike you wen tell!”
\p
\v 11 So Haman go get da robe an da horse. He put da robe on top Mordecai, an lead him thru da streets on top da horse, an call out in front him, “Dis da kine ting da king like do fo da guy he really like show respeck fo!”
\v 12 Afta dat Mordecai go back by da king's gate. But Haman run home quick. He put one cloth ova his head fo cover um, cuz he stay sore inside.
\v 13 He tell his wife Zeresh an his friends eryting dat wen happen to him.
\p Da guys dat tell him wat fo do, an his wife Zeresh tell him, “You know, cuz Mordecai one Jew, az why you lose out awready! You no can stand agains him. Fo shua, no way you can win!”
\v 14 An wen dey still yet talk wit him, da guys dat work fo da king, da kine no can make kids, dey come fo take Haman away quick time to da big dinna Esther wen make.
\c 7
\s Dey Hang Haman
\p
\v 1 So da king an Haman wen go eat wit Queen Esther.
\v 2 Wen dey stay drinking da wine on da numba two day, da king aks one mo time, “Queen Esther, wat you like? I goin give um to you. Wat you aksing fo? I give um to you, even half a eryting I get.”
\p
\v 3 Den Queen Esther tell, “O King, if you really like me, an you tink az good, please let me stay alive! Az all I aks you fo do. An I aks you fo let my peopo stay alive too.
\v 4 Cuz somebody wen sell out me an my peopo fo kill us. If dey ony wen sell us fo come slaves, da guys an da wahines, den I no say notting, an I no like bodda you wit dis. Cuz da kine trouble us guys goin get from come one slave, ony litto bit.”
\p
\v 5 King Xerxes aks Queen Esther, “Who da guy wen do dis? Wea da guy dat get big head an like do dis?”
\p
\v 6 Queen Esther tell, “Da guy dat hate us, he dis real bad guy Haman!”
\p
Den Haman come real scared in front da king an queen.
\p
\v 7 Da king stand up. He come real huhu. He leave his wine, an go outside, inside da palace garden. But Haman know awready, da king make up his mind wat he goin do. So Haman stay dea an beg Queen Esther fo let him stay alive.
\v 8 Den da king come back from da palace garden to da place wea Esther make da dinna. But he see Haman go down on top da couch wea Esther stay, begging her fo give him chance.
\p
Da king say, “Dis guy Haman, he even like fool aroun wit da queen wen she stay hea inside da house wit me!”
\p
Wen da king say dat, da king's helpa guys put one cloth on top Haman's face fo show he gotta mahke.
\p
\v 9 Den Harbona, one a da king's guys dat no can make kids, tell, “Eh, you know, get one pos 75 feet high by Haman's house fo hang somebody. He wen make um fo hang Mordecai on top, da guy dat wen tell bout da two guys dat wen like kill da king.”
\p
Da king say, “Hang Haman on top um!”
\v 10 So dey hang Haman on top da pos dat he wen make fo hang Mordecai on top um. Den da king no stay huhu no moa.
\c 8
\s Wat Da King Do Fo Help Da Jews
\p
\v 1 Cuz Haman hate da Jews, dat same day King Xerxes wen give Queen Esther Haman's house an land. Same time, Esther tell da king dat Mordecai her ohana, so Mordecai come in front da king.
\v 2 Da king take off da ring he use fo stamp his papers, dat he wen take back from Haman, an give um to Mordecai. Esther put Mordecai in charge Haman's house an land.
\p
\v 3 One mo time Esther talk to da king. She go down by da king's feet an cry, an beg da king fo stop da real bad plan dat Haman da Agag guy stay make agains da Jews.
\v 4 Den da king put out his hand wit da gold rod to Esther, an den she stand up in front him.
\p
\v 5 She tell, “If da king say az good, an he like me, an tink az right an good fo do um, I like da king write one nodda rule fo wipe out da odda rule dat Haman, Hammedata's boy from Agag, wen write awready. He wen write da rule fo wipe out all da Jews inside all da king's districks.
\v 6 Cuz I no like see dis bad kine stuff come on top my peopo, an see all my own ohana wipe out.”
\p
\v 7 King Xerxes tell Queen Esther an Mordecai da Jew, “Cuz Haman wen go agains da Jews, my guys hang Haman awready, an I give his house an land to you, Esther.
\v 8 Now, I like you guys write anodda rule from me fo da Jews, wateva you tink stay good fo dem, an use my name an stamp um wit my ring, cuz no mo nobody can change wat I da king write an stamp wit my ring.”
\p
\v 9 Right den an dea, June 25, da king call his secretaries fo come. Dey write eryting Mordecai wen tell um fo say to da Jews, an da leadas, govna guys, an ali`i fo all da 127 districks from India to Sudan. Dey write dis wit da alphabets dat all da diffren peopos use, an in dea languages. Fo da Jews dey use dea alphabets an dea language too.
\v 10 Mordecai wen write um jus like King Xerxes wen write um himself, an stamp um wit da king's ring, an send da tings dey write by messenja guys on top horses dat go fas (cuz dey wen raise da horses spesho kine jus fo da king's work).
\p
\v 11 Da king's new rule now tell, dat da Jews inside ery big town get da right fo come togedda, fo fight fo take care demself, an can wipe out an kill any army from any peopo o districk dat go agains dem an dea wahines an kids, an dey can take da stuffs from da guys dey wen kill.
\v 12 Da day wen da Jews can do dis inside all da districks wea Xerxes stay king, was goin be March 7, da nex year.
\v 13 Dey send one copy a dis rule to ery districk, an tell um to ery peopo, so da Jews can stay get ready dat day, fo fight agains da guys dat hate dem.
\p
\v 14 Da messenja guys on top da king's horses go real fas, cuz da king tell um fo go fas. Dey tell dis rule too inside da strong walls inside Susa town.
\p
\v 15 Mordecai wen go out from wea da king stay. He wear king kine blue an white clotheses, one big gold crown, an one purple kine robe wit da bestes kine linen from Egypt. Inside da Susa big town erybody make one big party an stay feel real good inside.
\v 16 Fo da Jews, now dey stay feel real good inside, cuz erybody get respeck fo dem.
\v 17 Inside ery districk an big town, wea eva da rule dat da king tell wen come, all da Jews stay real good inside. Dey make big party an holiday. An plenny odda peopo wen come Jews, cuz now dey real scared a da Jews.
\c 9
\s Da Jews Win
\p
\v 1 On March 7, da day da guys dat hate da Jews wen do wat da king's firs rule say. An dey tink dey goin win ova dem. But now eryting change, an da Jews get da power ova da guys dat hate dem.
\v 2 Da Jews come togedda inside dea big towns inside all da districks wea Xerxes stay king, fo go agains da guys dat like do bad tings to dem. No mo nobody can stand agains da Jews, cuz all da odda peopos scared a dem.
\v 3 All da ali`i inside all da districks, da leadas, da governas, an da guys dat take care da work fo da king, dey wen help da Jews, cuz dey scared a Mordecai.
\v 4 Mordecai wen come one importan guy inside da palace now. Erybody inside all da districks hear bout him. So he get mo an mo power.
\p
\v 5 Da Jews wen use swords fo kill all da guys dat hate dem, an dey do wat dey like to dose guys.
\v 6 Inside da strong walls Susa side, da Jews wen kill 500 guys.
\v 7 Dey kill Parshandata, Dalfon, Aspata,
\v 8 Porata, Adala, Aridata,
\v 9 Parmashta, Arisai, Aridai, an Vaizata.
\v 10 Dey wen kill da ten boys dat time, dat get Haman fo dea fadda (da same Haman, Hammadata boy, dat hate da Jews). But dey neva take dea stuffs.
\p
\v 11 Dey tell da king da same day, how plenny guys da Jews wen kill inside da strong walls Susa town.
\p
\v 12 Da king tell Queen Esther, “Da Jews wen kill 500 guys awready inside da strong walls Susa town. Dey wen kill Haman ten boys too. Wat dey do inside my odda districks? Now, wat odda ting you like? Wateva you aks, I give um to you!”
\p
\v 13 Esther tell, “If you tink az good, let da Jews inside Susa do da same ting tomorrow too, an let dem hang Haman's ten boys mahke bodies on top poses.”
\p
\v 14 So da king make one mo rule fo inside Susa town, fo hang Haman's ten boys mahke bodies.
\v 15 Da Jews inside Susa wen come togedda one mo time on March 8, an dey kill 300 mo guys inside Susa town, but dey no take dea stuffs.
\p
\v 16 Da same time, da odda Jews inside da king's districks wen come togedda fo take care demself, fo no let da guys dat hate dem bodda dem no moa. Dey kill 75,000 guys, but dey no take dea stuffs.
\v 17 Dey do dis on March 7. Den March 8, dey res, an make big party an stay feel real good inside.
\s Dey Make Da Purim Ho`olaule`a
\p
\v 18 But da Jews inside Susa town still stay fight da peopo dat stay agains dem on March 7 and 8. Az why March 9 da day wen da Susa peopo res an come togedda an make party, an stay feel real good inside.
\p
\v 19 An az why da Jews dat live da country side stay make March 8 da spesho day fo feel good inside, wen dey make party an give food to each odda fo gifs.
\p
\v 20 Mordecai write down all dis stuff. He send lettas to da Jews inside all da districks wea Xerxes stay king, near an far,
\v 21 fo make shua erybody know az good fo dem make party March 8 an 9 ery year,
\v 22 cuz az was wen da Jews wen res, cuz dey no gotta suffa no mo from da guys dat hate dem. From dat time, eryting change fo dem. Dey no feel sore inside no moa, dey stay feel good inside. Dey no ack like somebody wen mahke, dey make holiday an make big party. Mordecai write dem fo rememba dose days an fo give food gifs to each odda an to da peopo dat no mo notting.
\p
\v 23 So da Jews wen make plan togedda fo stay make holiday ery year afta dat, jalike Mordecai wen write to dem.
\v 24 Cuz Haman, Hammedata's boy from Agag dat wen hate all da Jews, wen make plan agains da Jews fo wipe dem out dat day March 7. He throw wat dey call da “Pur,” dat mean he pull straw fo pick da day fo kill um an wipe um all out.
\v 25 But wen da king find out wat Haman was goin do to da Jews, da king write down fo his guys dat wat Haman wen plan, goin come back to him, an fo da king's guys hang Haman an his boys.
\v 26 Az why da Jews call dis days “Purim,” cuz Pur mean kinda like “pull straw.” An cuz a da letta Mordecai wen write, an cuz a eryting da Jews wen see, dat wen happen to dem,
\v 27 da Jews start da custom fo dem an dea kids an da ones dat come from dem, an all da odda peopos dat come Jews bumbye. From dat time, ery year dey goin make shua dey make big party dose two days, jalike Mordecai wen write to dem.
\v 28 Az importan fo ery ohana, fo rememba an do all dis ery year on da right days. Dass fo ery ohana, an dea kids an grankids all da time, an fo ery districk an ery town. Good da Jews no let da Purim holiday pau. Dey gotta rememba fo no pau do um eva, dem an dea kids an grankids.
\p
\v 29 So Queen Esther, Abihail's girl, hanai girl to Mordecai da Jew, write anodda letta, dat show dat cuz she da queen, she get da powa fo okay da letta numba two from Mordecai bout setting up da Purim holiday.
\v 30 An had odda lettas dat peopo send to all da Jews inside da 127 districks wea Xerxes stay king, giving dem aloha an telling dem dey can trus wat da queen wen tell.
\v 31 Dat way, da Jews can set up da Purim holiday da same time ery year, jalike Mordecai da Jew an Queen Esther tell dem an dea kids dey gotta do, jalike dey wen set up odda times fo demself, wen dey an dea kids gotta no eat so dey can pray, an aks fo help.
\v 32 Wat Esther tell, make solid eryting bout Purim. An wat she tell, stay write inside da govmen record book.
\c 10
\s Mordecai One Importan Guy
\p
\v 1 King Xerxes stay make all da peopos all ova da land work fo him an no mo pay, even da far islands.
\v 2 All da stuff da king do dat show his power, an erything bout da stuff dat Mordecai do, an how King Xerxes wen make Mordecai come real importan, da palace guys write all dat inside da Record Book Fo Da Kings Fo Media An Persia.
\v 3 Mordecai da Jew stay da numba two guy to King Xerxes. Mordecai one big man wit da Jews. All da Jews get plenny respeck fo him, cuz he work plenny so his peopo can stay okay. He talk to da govmen fo make eryting come good fo all da odda Jews, cuz dey come from his peopo too.