\id amo
\h Amos
\mt Amos
\mt2 Talk Fo God
\c 1
\s Da Israel Peopo Do Bad Kine Stuff
\s2 Da Guy Dat Talk Fo God
\r (Amos 9:7-15)
\m
\v 1 Dis wat Amos wen tell.
\p Amos, he one a da guys from Tekoa dat know how fo breed da sheeps spesho kine. Dat time, Uzziah was king Judah side. Same time, Joash boy Jeroboam was king Israel side.
\p Dat time, Amos wen see someting jalike one dream, bout wat goin happen to da Israel peopo. Was two year befo da big eartquake, you know.
\s2 God Get Power Fo Punish
\r (Amos 5:8-9; 9:5-6)
\m
\v 2 Dis wat Amos wen tell:
\q “Yahweh Up Dea Inside Da Sky,
\q2 He make big noise from Zion Mountain!
\q2 He talk strong from Jerusalem town, jalike thunda!
\q Wen he do dat, da places wea da sheep farmas go fo find grass,
\q2 No mo grass, notting.
\q2 An da trees on top Mount Carmel all dry up.”
\s2 Da Israel Peopo, Mo Worse Den Da Odda Peopos
\r (Amos 1:3-3:2, 8:4-9:4)
\s3 Da Damascus Peopo
\m
\v 3 You betta lissen! Dis wat Yahweh say:
\q “Too much times awready, da Damascus peopo wen go agains me.
\q2 Az why, no way I goin let um go an no punish dem!
\q Da buggas wen trash da Gilead peopo
\q2 Jalike dey wen go drag one heavy board wit plenny spikes ova dea bodies.
\q
\v 4 Dass why I goin send army guys fo burn da palace
\q2 Dat dea King Haza`el wen build.
\q Dis fire goin eat up eryting dea,
\q2 An da Ben-Hadad Fort wit strong walls too.
\q
\v 5 I goin broke da gate fo Damascus town
\q2 An wipe out da main guy fo `Aven Valley,
\q2 Da guy dat stay in charge Bet-Eden side.
\q Da Aram peopo, I goin catch dem
\q2 An take um all away Kir side.”
\m Dass wat Yahweh say!
\s3 Da Filisha Peopo
\m
\v 6 You betta lissen! Dis wat Yahweh say:
\q “Too much times awready, da Gaza peopo wen go agains me.
\q2 Az why, no way I goin let um go an no punish dem!
\q Dey wen catch one whole peopo
\q2 An sell um to da Edom peopo fo be dea slaves.
\q
\v 7 Dass why I goin send army guys fo burn da Gaza town wall
\q2 An burn up da palaces wit strong walls.
\q
\v 8 I goin wipe out da leada fo Ashdod town
\q2 An da guy in charge Ashkelon town.
\q I goin go agains da peopo dat live Ekron town.
\q2 Da odda Filisha guys, dey goin come poho too.”
\m Dass wat Yahweh say!
\s3 Da Tyre Peopo
\m
\v 9 You betta lissen! Dis wat Yahweh say:
\q “Too much times awready, da Tyre peopo wen go agains me.
\q2 Az why, no way I goin let um go an no punish dem!
\q Dey wen sell one whole peopo to da Edom peopo,
\q2 Cuz dey neva like do da right ting fo dea brudda guys.
\q
\v 10 Dass why I goin send army guys
\q2 Fo burn down da Tyre town wall.
\q2 Da fire goin eat up da palaces wit strong walls.”
\s3 Da Edom Peopo
\m
\v 11 You betta lissen! Dis wat Yahweh say:
\q “Too much times awready, da Edom peopo wen go agains me.
\q2 Az why, no way I goin let um go an no punish dem!
\q Dey wen go hunt dea brudda guys, da Israel peopo,
\q2 Wit sword fo kill.
\q Dey neva like show pity fo da Israel peopo.
\q2 Dey like stay huhu all da time
\q2 An no mo cool head, eva.
\q
\v 12 Dass why I goin send army guys for burn Teman town,
\q2 An da fire goin eat up da palaces wit strong walls, Bozrah town.”
\s3 Da Ammon Peopo
\m
\v 13 You betta lissen! Dis wat Yahweh say:
\q “Too much times awready, da Ammon peopo wen go agains me.
\q2 Az why, no way I goin let um go an no punish dem!
\q Gilead side, dey even wen rip open da hapai wahines
\q2 Jus so dey can take ova mo plenny land.
\q
\v 14 Dass why I goin make da Rabbah town wall burn
\q2 An da fire goin eat up all da palaces wit strong walls.
\q Goin get war an yelling
\q2 An fighting jalike one wild wind storm.
\q
\v 15 Da king fo da Ammon peopo, an his officer guys,
\q2 I goin take um all away togedda.”
\m Dass wat Yahweh say!
\c 2
\s3 Da Moab Peopo
\m
\v 1 You betta lissen! Dis wat Yahweh say:
\q “Too much times awready, da Moab peopo wen go agains me.
\q2 Az why, no way I goin let um go an no punish dem!
\q Dey wen make stink to da king fo da Edom peopo,
\q2 Cuz dey wen dig up his body an burn his bones
\q2 Till ony get ashes fo make mortar.
\q
\v 2 Dass why I goin dump fire on top da Moab land
\q2 Fo burn up da palaces wit strong walls, Keriot town.
\q Da Moab peopo goin mahke,
\q2 Goin get war an yelling an trumpet noise.
\q
\v 3 I goin wipe out da guy in charge dea,
\q2 I goin kill all dea leadas, same time.”
\m Dass wat Yahweh say!
\s3 Da Judah Peopo
\m
\v 4 You betta lissen too! Dis wat Yahweh say:
\q “Too much times awready, da Judah peopo wen go agains me.
\q2 Az why, no way I goin let um go an no punish dem!
\q Cuz I Yahweh, I wen give um da Rules,
\q2 But dem, dey ack jalike da Rules no matta!
\q Dey no like do wat I wen tell dem.
\q2 Jalike dea ancesta guys,
\q2 Dey let da fake gods make um go da wrong way.
\q
\v 5 Dass why I goin dump fire on top da Judah peopo
\q2 Fo burn up da palaces wit strong walls, Jerusalem town.”
\s3 Da Israel Peopo
\m
\v 6 You betta lissen! Dis wat Yahweh say:
\q “Too much times awready, you Israel peopo wen go agains me.
\q2 Az why, no way I goin let you guys go an no punish you guys!
\q You Israel peopo tell, ‘Dis guy owe me money.’
\q2 Da judge tell, ‘Nah, he no owe notting.’
\q But no matta wat da judge go tell,
\q2 Still yet, you Israel peopo go sell da guy
\q2 Fo silva money, fo make um one slave.
\q Da guy dat no mo notting,
\q2 You Israel peopo swap um
\q2 Jus cuz da guy owe you fo one pair new slippas.
\q
\v 7 Da guy dat not strong,
\q2 You Israel peopo push his face inside da dirt.
\q Da guys dat get presha,
\q2 You Israel peopo ack jalike dey no mo rights.
\q Da fadda an his boy, dey go sleep wit da same girl.
\b
\q “Cuz a all dat, peopo talk bad bout me,
\q2 An I da One dass good an spesho, you know!
\b
\q
\v 8 “You Israel peopo, you even lay down
\q2 On top da clotheses dat odda peopo wen leave dea
\q Nex to da alta fo sacrifice,
\q2 Till da peopo can pay back wat dey owe.
\q Plus, you Israel peopo,
\q2 You take odda peopo's wine
\q An drink um up yoa own self,
\q2 Right dea inside da temple fo yoa god.
\q
\v 9 “Neva mind was me dat wen wipe out da Amor peopo
\q2 So you Israel peopo can live hea.
\q Da Amor peopo was tall, jalike da cedar tree,
\q2 Strong, jalike da oak tree.
\q But I wen wipe dem out
\q2 Jalike I wipe out all dea fruits from da branches
\q2 An dea roots from undaneat da ground too.
\q
\v 10 But wot! Was me dat wen bring you guys
\q2 Outa da Egypt land to dis side.
\q Forty years, I wen show you guys wea fo go inside da boonies
\q2 So you guys can take ova da land from da Amor peopo.
\q
\v 11 Was me dat wen make yoa boys come talka guys fo me,
\q2 Was me dat wen make yoa young guys make promise
\q2 Fo stick wit da Nazir kine rules.
\q Eh, you Israel peopo! Az true, o wat?”
\m Dass wat Yahweh say.
\b
\q
\v 12 “But you guys, you wen make da Nazir guys
\q2 Broke dea rules an drink wine.
\q2 You wen tell my talka guys, ‘No talk no mo fo God!’
\m
\q
\v 13 “Kay den! I goin smash you guys
\q2 Right dea wea you standing,
\q Jalike wen one wagon go huli on top you
\q2 Cuz get too much heavy stuff inside.
\q
\v 14 Da guy dat can run fas, no matta,
\q2 Still yet, dey goin catch um.
\q Da guy dat strong, no matta,
\q2 He no goin do notting.
\q Da army guy no goin stay alive,
\q2 No matta he know how fo fight.
\q
\v 15 Da guy dat shoot arrow,
\q2 He no goin stay standing.
\q Da guy dat run fas,
\q2 He no goin get outa dea.
\q Da guy dat ride horse,
\q2 He no goin stay alive.
\q
\v 16 Even if get da army guy dass da mostes strong inside,
\q2 Dat guy goin throw way da stuff he use fo fight, an run way
\q2 Wen da day come fo all dat fo happen.”
\m Dass wat Yahweh say.
\c 3
\s3 How Come God Say Da Israel Peopo Bad
\m
\v 1 Eh! Lissen up, you Israel peopo! I talking fo God, cuz Yahweh telling dis to you guys, da whole ohana dat he wen bring hea from Egypt side.
\v 2 He say dis:
\q “You guys, you da ony peopo dat I wen pick,
\q2 From all da ohanas dat get all ova da world!
\q Az why, you da peopo dat I goin punish
\q2 Fo all da crooked kine stuff you stay do.
\s2 Da Talka Fo God
\r (Amos 3:3-4:3, 7:1-8:3)
\s3 Da Talka Tell Wat Kine Bad Tings Goin Happen
\q
\v 3 “Tink! Two guys, how dey goin make trip togedda
\q2 If dey no make plan? No can!
\q
\v 4 You tink da lion goin make da big noise inside da trees
\q2 If no mo notting dea dat he can kill? Not even!
\q Da young lion no goin growl inside his house
\q2 If he neva find notting fo catch.
\q
\v 5 If no mo nobody wen put da bait,
\q2 Da bird no goin fall down inside da net!
\q You tink da net goin jump up from da groun
\q2 If no mo notting dea fo catch? Nah!
\q
\v 6 If somebody blow da war bugle inside one town,
\q2 Da peopo dea goin tell, ‘Wass up?! Watch out!’
\q Weneva bad tings happen inside one town,
\q2 Was Yahweh dat wen make um happen lidat!”
\p
\v 7 Cuz you know, my boss Yahweh, he erytime tell his worka guys dat talk fo him da secret plan bout wat he goin do. Layta, he do um.
\q
\v 8 Wen da lion make big noise, you betta be scared!
\q Wen my boss Yahweh tell you someting, you betta talk fo him!
\s3 Da Talka Tell How Da Samaria Peopo Stay Jam Up
\q
\v 9 “Stand up on top da palace roof, Ashdod town,
\q2 An da palace roof, Egypt land,
\q2 An talk strong lidis so dat da peopo inside can hear:
\q ‘Eh! Come togedda on top da hills near aroun Samaria town,
\q2 An check out all da stuff inside dat town dass all jam up,
\q2 Da way dose guys all ack mean to each odda!’-”
\m
\v 10 You betta lissen! Yahweh, he say dis:
\q “Dem guys, dey donno notting how fo do da right ting!
\q2 Dey pile up dea palaces wit stuffs dey get
\q2 From peopo dey wen bus up.”
\m
\v 11 Dass why my boss Yahweh say dis too:
\q “Goin get one army dat go agains you guys.
\q2 Dey goin make circle aroun dis land.
\q2 Dey no goin let you guys go outside.
\q No matta you guys strong, dey going make you guys come notting.
\q2 Dey goin steal eryting you get from inside all yoa palace,
\q2 Dey goin clean you out!”
\m
\v 12 Yahweh say dis:
\q “Wen da lion grab da sheep,
\q2 Da sheep farma guy ony bring back litto bit fo show,
\q2 Maybe two leg bone, o one small piece from da ear.
\q Same ting goin happen wit da Israel ohana!
\q Da ony ting peopo goin bring back from da Samaria guys,
\q2 Goin be one small piece from da fancy bed da Samaria guys wen buy from Damascus.”
\s3 God Goin Bus Up Da Bethel Peopo
\m
\v 13 Da God dass in charge a all da armies, my boss Yahweh, dis wat he say:
\q “Lissen up! Tell da peopo dat come from Jacob
\q2 Dey betta watch out!
\b
\q
\v 14 “Dat time wen I goin punish da Israel peopo
\q2 Fo try fight agains me,
\q2 Same time, I goin bus up all da altars Bethel side!
\q I goin wack da horns dat stick out from da altar,
\q2 Dey goin broke an fall down on top da ground,
\q2 Den you guys no mo notting fo help you.”
\q
\v 15 I goin wack da house wea dey live winta time
\q2 An da house wea dey live summa time.
\q Da houses dey build wit plenny ivory inside, goin come poho.
\q2 All ova da place, no goin get da houses dat get now.”
\m Dass wat Yahweh say.
\c 4
\s3 God Goin Bus Up Da Samaria Peopo
\m
\v 1 Amos wen say dis too:
\q “Eh! You Samaria wahines! Lissen!
\q You guys jalike da fat cows from Bashan
\q2 Dat eat grass on top da hills Samaria side!
\q You wahines give hard time to da peopo dat no mo powa
\q2 An you make any kine to da peopo dat no mo notting.
\q You guys erytime telling yoa husbands,
\q2 ‘Bring us mo booze fo drink!’
\q
\v 2 My boss Yahweh, he good an spesho.
\q2 Cuz a dat, he wen make one strong promise lidis:
\q ‘Goin get one time,
\q2 Jalike peopo goin stick meat hook inside you guys
\q2 An drag you guys one nodda place.
\q Dey goin stick big fish hooks in yoa okole
\q2 An drag you guys outa hea!
\q
\v 3 Dey goin drag ery one a you wahines
\q2 Thru da places wea yoa town wall bus up an fall down
\q2 In front yoa house.
\q Dey goin throw out you guys
\q2 An take you guys away Harmon side.’
\m Dass wat Yahweh say.”
\s2 Da Israel Peopo Still No Learn Notting
\r (Amos 4:4-4:12, 5:18-6:14)
\p
\v 4 Amos tell: “Dis wat da Boss Up Dea say:
\q ‘Eh you Israel peopo! Go Bethel side fo pray!
\q2 But you know wat? Wen you go ova dea,
\q2 You guys ony go agains me!
\q You go Gilgal side fo pray!
\q2 But you know wat? Wen you go ova dea,
\q2 You guys ony go agains me, mo plenny still yet!
\q So den, wen you go ova dea, nex day morning time,
\q2 Take da animal fo da sacrifice to da pries guy.
\q2 Da day afta dat, take da ten percent you suppose to give God.
\q
\v 5 Burn some a da bread you suppose to sacrifice
\q2 Fo tell God “Mahalo plenny!”
\q An brag plenny wen you guys give God someting you no gotta give.
\q2 Cuz dass da way you Israel peopo jus love fo do um, big time.’
\m Dass wat my boss Yahweh say.
\m
\v 6 Dis wat Yahweh say:
\q “Was me dat wen make da peopo inside ery town hungry to da max!
\q So neva have bread, any place.
\q Still yet, you guys no like come back an be my guys.”
\m Dass wat Yahweh say.
\m
\v 7 Yahweh say:
\q “Da time you guys wen need da rain da mostes,
\q2 Fo three month befo you cut da food,
\q2 Was me dat hold back da rain.
\q I wen make da rain go one town an not da odda town.
\q2 Had rain one field, an one nodda field dry up.
\q
\v 8 Had peopo from two three towns,
\q2 So thirsty, yeah? dey gotta stagga to one nodda town
\q2 Fo try get watta fo drink,
\q2 But dey no can find nuff.
\q Still yet, you guys no like come back an be my guys!”
\m Dass wat Yahweh say.
\m
\v 9 Yahweh say:
\q “I wen wack da farms you guys own
\q2 An da fields wea you grow grape
\q So dat da hot wind an da groun worms wen mess up eryting.
\q2 Da grasshoppa wen eat up all da fig tree an olive tree dat you guys own.
\q Still yet, you guys no like come back an be my guys!”
\m Dass wat Yahweh say.
\m
\v 10 Yahweh say:
\q “Was me wen send da sick fo make trouble fo you guys,
\q2 Same ting jalike befo time
\q2 I wen make da Egypt peopo come sick.
\q War time, was me wen kill yoa young guys
\q2 An let da odda peopos catch you guys horses.
\q Auwe! Pilau stink, from da mahke army guys inside yoa camp!
\q Still yet, you guys no like come back an be my guys!”
\m Dass wat Yahweh say.
\m
\v 11 Yahweh say:
\q “I wen wipe out some a da towns wea you guys live,
\q2 Same ting jalike I wen wipe out Sodom town an Gomorrah town befo time.
\q You guys wen get outa yoa towns alive, yeah?
\q2 But jalike sticks dat somebody pull quick outa da fire,
\q2 Stay half burn awready.
\q Still yet, you guys no like come back an be my guys!”
\m Dass wat Yahweh say.
\m
\v 12 Yahweh say dis:
\q “Cuz a dat, I goin make all kine bad kine tings happen to you Israel peopo,
\q2 Jalike I wen tell you guys awready.
\q Eh! You Israel peopo! Get ready fo stand in front me, yoa God!
\q2 Cuz I da Judge, an I goin punish you guys!”
\s2 God Get Da Power Fo Make Eryting
\r (Amos 5:8-9, 9:5-6)
\m
\v 13 Amos tell dis:
\q “You know wat? Yahweh,
\q2 He da one dat shape da mountains.
\q He make da wind an give peopo dea spirit inside.
\q2 He tell peopo eryting he tinking.
\q He take da light wen da sun stay coming up
\q2 An make um come dark one mo time.
\q2 He stay da king fo da mos high places inside da world!
\q Yahweh, Yahweh Fo Da Armies.
\q2 Dass wat kine god him!”
\c 5
\s2 Funeral Song Fo Da Israel Ohana
\r (Amos 5:1-3, 5:16-17)
\m
\v 1 Amos say:
\q “So! You peopo from da Israel ohana!
\q2 Lissen wat I goin tell bout you guys!
\q Dis one funeral song, yeah?
\q2 Me, Amos, I making um fo you guys. Dis da song:
\b
\q
\v 2 ‘Da Israel ohana, jalike one young girl.
\q No matta she young,
\q Her wen fall down cuz dey wen kill her.
\q Her no goin stand up one mo time, eva.
\q Dey wen leave her body dea, inside her own country.
\q Cuz no mo nobody goin come fo her.
\b
\q
\v 3 ‘Cuz dis wat my boss Yahweh say
\q Bout da Israel ohana:
\q2 “Wen tousan army guys go out fo fight from one town,
\q2 Ony hundred goin come back.
\q2 Wen hundred army guys go out fo fight from one nodda town,
\q2 Ony ten goin come back to dea Israel ohana.”
\q Auwe!’
\m Dass my song!”
\s God Can Get Da Israel Ohana Outa Trouble
\r (Amos 5:7-15)
\s2 Betta Look Fo God, Fo Stay Alive
\m
\v 4 Dis wat Yahweh wen tell da Israel ohana:
\q “Eh! Come back by me an be my guys,
\q2 So I can help you, yeah?
\q2 Den you guys goin stay alive an no mahke.
\q
\v 5 No go by da Bethel peopo fo get help,
\q2 No go Gilgal side.
\q2 No go da odda side da country, Beer-Sheba side.
\q You rememba, Gilgal was da first place yoa peopo wen come inside dis land,
\q2 But now, Gilgal garans goin be da place wea dey goin drag you outa dis land.
\q2 Da Bethel peopo goin come notting.”
\m
\v 6 Amos wen tell:
\q “Eh you guys! Go by Yahweh fo get help
\q2 So den you guys goin stay alive an no mahke.
\q But if you no like, God goin wipe out da Joseph ohana quick, jalike da fire,
\q2 An burn up Bethel town so fas, nobody can pio da fire.”
\s2 If You Do Bad Kine Stuff, Betta Watch Out!
\r (Amos 5:10-13)
\q
\v 7 “Auwe, fo you guys! You tell peopo
\q2 Dat eryting da judge say, no good,
\q An bulai peopo so dey no mo dea rights!
\q2 Jalike you throw um down on top da dirt!”
\s2 Yahweh Get Da Powa Fo Make Eryting, An Fo Punish Peopo
\r (Amos 1:2, 4:13, 9:5-6)
\q
\v 8 “God, he da one wen make da stars --
\q2 Da Pleiades an Orion stars,
\q He change da real dark time an make um come morning time,
\q2 He change da day time an make um come dark, nite time.
\q He tell da watta fo come up outa da ocean,
\q2 Den he pour um out on top da groun.
\q Yahweh, Yahweh, dass his name, cuz dass who him!
\q2
\v 9 He da one dat bus up da strong guys
\q2 An broke down dea strong walls!”
\s2 No Matta You Bad O You Good, Watch Out!
\q
\v 10 “But you Israel peopo,
\q2 You hate anybody dat tell da judge
\q2 Dat you guys do wass not right.
\q Anybody dat talk strait in front da judge,
\q2 You guys make to dem jalike dey junk.
\q
\v 11 Cuz da peopo dat no mo notting,
\q2 You guys make um pay tax
\q2 An take away some a da food dat dey cut an clean,
\q Cuz a dat, no matta you guys build house
\q2 Wit fancy kine cut stone block --
\q2 You guys no goin live inside.
\q No matta you guys plant good looking kine grape farm --
\q2 You guys no goin drink da wine from dose grapes.
\q
\v 12 Eh! I know how much stuff you guys do agains me.
\q2 I know all da diffren ways you guys do bad kine stuff!
\q You guys, you stay agains da peopo dat do da right ting.
\q2 You guys like get money from bribe,
\q You guys like make presha
\q2 So da peopo dat need help from da judge, no goin get help!
\m
\q
\v 13 “Fo shua, weneva tings stay lidat,
\q Da smart peopo dat you guys hate,
\q Dey goin say notting,
\q Cuz eryting stay bad awready.”
\s2 Do Good Kine Stuff, Fo Stay Alive
\q
\v 14 “Come back an do good kine stuff, not da bad kine,
\q2 Den you guys goin live.
\q Den Yahweh, da God Fo All Da Armies,
\q2 Goin stick wit you guys fo real kine.
\q Right now you guys ony tell dat he stick wit you guys,
\q2 But he not.
\q
\v 15 Go all out fo hate da bad kine stuff
\q2 An get love fo da good kine stuff.
\q2 Make shua you pick judges dat goin tell wass right.
\q Den, maybe Yahweh, da God Fo All Da Armies,
\q2 Bumbye give chance to da litto bit peopo
\q Dat goin stay alive still yet
\q2 From yoa Israel ohana.”
\s God Goin Punish Da Israel Peopo
\r (Amos 5:16-9:15)
\s2 Anodda Funeral Song Fo Da Israel Peopo
\r (Amos 5:1-3)
\p
\v 16 “Cuz a wat you guys wen do, dis wat my God Yahweh say -- he my Boss, da God Fo All Da Armies:
\q ‘Inside ery town, goin hear peopo crying fo you guys.
\q2 Ery open place, ery street, da peopo saying, “Auwe! Auwe!”
\q Dey even goin tell da farm worka guys
\q2 Fo go town, da funeral, an cry fo you guys cuz you mahke.
\q Da peopo dat know how fo sing da funeral songs,
\q2 Dey goin pay um fo yell plenny fo you guys afta you mahke.
\q
\v 17 Cuz wen I go thru da land wea you guys live,
\q2 I goin punish you guys.
\q Peopo goin cry plenny,
\q2 Even inside all da grape farms!’
\m Dass wat Yahweh say.”
\s2 Da Israel Ohana Tink Dey Okay, But Dey Not
\r (Amos 4:4-12, 5:18-6:14)
\m
\v 18 One nodda time, Amos say dis:
\q “Auwe, fo you guys dat talk lidis:
\q2 ‘Time awready fo Yahweh show up!’
\q Wat you guys tink goin happen to you
\q2 Wen Yahweh come back, aah?
\q Wen he show up, eryting goin come hard fo you guys, not good!
\q2 Jalike one storm make eryting come dark, no mo light!
\q
\v 19 Fo you guys, goin be jalike dis -- you go run away from da lion,
\q2 An one nodda kine wild animal goin catch you from da odda side!
\q Den you go inside yoa house,
\q2 An put yoa hand on top da wall fo rest,
\q2 An da snake bite you!
\q
\v 20 Dat time, wen Yahweh come back, no goin be good fo you!
\q2 No goin get light! Ony goin get dark,
\q Jalike wen get black nite an no can see notting.”
\s3 Dey Tink If Dey Religious, Dey Okay, But Fo Real Dey Not
\m
\v 21 Yahweh say,
\q “Wen you guys make religious kine stuff,
\q2 I no take wat you guys doing!
\q Wen you guys stop work
\q2 Cuz you make like you coming togedda fo me,
\q2 Make me like bahf!
\q
\v 22 Da kine guys like you guys,
\q2 If you guys bring animals fo kill um an burn um up fo make sacrifice fo me,
\q2 If you guys bring wheat fo make present fo show you get respeck fo me,
\q2 I no like dat, notting.
\q Wen you guys kill da fat cow fo make da sacrifice,
\q2 Still yet, I no goin take um.
\q
\v 23 Eh, laytas, wit da noise from yoa religious kine songs.
\q2 Dey ony bodda me!
\q2 Dey ony noise!
\q I no like hear yoa guitar kine music
\q2 From you guys. Wase time!Vivid.
\q
\v 24 Mo betta, wen you judge da right way bout eryting,
\q2 Dat make da peopo change how dey tink,
\q2 Jalike wen da big watta come an change eryting.
\q You gotta do da right ting erytime,
\q2 Jalike one riva dat get watta inside erytime.
\p
\r (Jesus Guys 7:42-43)
\q
\v 25 “Rememba:
\q Dat time yoa ancesta guys wen stay inside da boonies,
\q2 Fo forty year, you Israel guys wen make sacrifice fo me,
\q2 An bring me presents cuz you like show me love an respeck.
\q
\v 26 Dat time, you guys neva carry aroun da idol kine god you call yoa ‘King’,
\q2 Da one dey call Sikut -- but dass wat you doing now!
\q You neva carry da Kiyyun statue wit you, da star god --
\q2 But dass wat you guys doing now.
\q Dem, da idol kine gods you guys pray to,
\q2 Dat you wen make fo yoa own self.
\q
\v 27 Dass why now, I goin throw you guys outa dis land
\q2 An make you guys go da odda side Damascus.
\q2 Go ahead! Take da idol kine gods wit you!”
\m Dass wat Yahweh say, da One dat stay da God Fo All Da Armies.
\c 6
\s3 Dey Tink If Dey Strong, Dey Okay, But Fo Real Dey Not Okay
\m
\v 1 Amos say dis too:
\q “Auwe, you guys dat stay tink you no mo notting fo do o no worry bout notting on top Zion hill, Jerusalem town!
\q2 An you guys dat stay tink you okay, Samaria town!
\q Auwe! You leada guys fo yoa country,
\q2 Who da Israel ohana peopo tink you guys can help dem!
\q
\v 2 You guys tell yoa peopo,
\q2 ‘Go da towns da Assyria army guys take ova awready,
\q Go Kalneh, mauka side long way, an check um out,
\q2 Come back by da big town Hamat,
\q Den go makai side by da Filisha peopo, Gat town.’
\q2 You tinking you guys mo betta den dose countries, yeah?
\q You guys tink yoa land mo big den dea lands, yeah?
\q2 Not even!
\b
\q
\v 3 “Auwe, you guys! You tink goin be long time
\q2 Befo bad tings goin happen to you guys!
\q But da way you guys ack, you ony making shua
\q2 Dat da guys dat like bus you up
\q2 Goin take ova you mo quick!
\b
\q
\v 4 “Auwe, you guys! Yoa lay down on yoa pune`e all day, all fix up wit fancy kine ivory.
\q2 You guys lay down all day an grind da lu`au food,
\q2 From bebe sheeps an cows!
\q
\v 5 You guys pick up da guitar fo jam
\q2 An make new kine songs --
\q An you tinking, ‘I can make da music
\q2 Same same, jalike King David!’
\q
\v 6 You guys drink da wine,
\q2 Da whole calabash one time!
\q You guys use da real expensive kine perfume oil.
\q2 But yoa ohana, da Joseph ohana, litto mo goin be poho.
\q An still yet, you guys no care, an no make you guys feel sick!
\b
\q
\v 7 “Fo shua, pretty soon now,
\q2 Da Assyria army guys goin come drag you guys outa hea.
\q You guys goin be da first one.
\q2 Den you no can lay dea an grind at da religious lu`aus fo da odda gods,
\q2 Cuz dey goin pau fo you guys.
\b
\q
\v 8 “My boss Yahweh, he make strong promise,
\q2 An he no need odda guy fo help him do um, jus him.
\q Dis wat Yahweh say, ‘Watch out!
\q2 Me, I so mad wit dem Israel guys!
\q2 Dey dea Israel ohana mo betta den anybody!
\q Dey get strong walls, but I going agains um!
\q2 Dea main town, an da peopo inside,
\q I goin give all a dem
\q2 To da guys dat stay agains um.’-”
\m Dass wat Yahweh say, an you know, yeah? he da God Fo All Da Armies.
\p
\v 9 Dat time, if get ten peopo dat stay inside one house, still yet bumbye dey all goin mahke.
\v 10 So, wen somebody mahke, one ohana guy goin come take da body outside da house fo burn da body. Dat ohana guy goin go inside da house an yell to whoeva stay inside da back a da house, “Hui! Still yet get odda peopo wit you?”
\p Den da guy inside da back a da house goin say, “No mo! Ony me!”
\p Da ohana guy goin say, “Eh, no talk! Make shua nobody say Yahweh name inside dis place!”
\q
\v 11 Cuz you know wat? Yahweh, he da one dat say da ting,
\q2 An cuz a dat, da big houses come all bus up
\q2 An da small houses come jalike rubbish.
\b
\q
\v 12 Eh! You tink da horse can run fast on top da pali?
\q2 You tink da farma guy can plow da ocean watta?
\q2 No can!
\q Jalike wen somebody like judge da right way,
\q2 Dey no can, cuz you guys make shua come out bad jalike poison!
\q Wen get anybody dat stay do da right ting,
\q2 You guys make shua dey no can,
\q2 Cuz you guys make stink kine stuff happen to dem!
\b
\q
\v 13 Get Israel guys dat feel real good inside
\q2 Cuz dea army guys wen take ova Lo-Debar, da notting town!
\q But dey bulai. Dey say, “You know wat?
\q2 Us guys so strong, we wen take ova Karnaim, da muscle town!”
\m
\v 14 But you know wat Yahweh say, da God Fo All Da Armies? He say dis:
\q “Eh, you guys from da Israel ohana!
\q2 I goin bring da army from one nodda country
\q2 Ova hea fo go afta you guys.
\q Dey goin make plenny trouble fo you guys, an chase you all da way
\q2 From Hamat Pass, nort side,
\q2 To da Arabah Valley, south side!”
\c 7
\s2 God Goin Wipe Out Da Israel Peopo
\r (Amos 3:3-4:3, 7:1-8:3)
\s3 Da Grasshoppas
\p
\v 1 Den Amos say: “One time, dis wat my boss Yahweh wen show me. Was jalike one dream. God, he stay getting togedda uku paila grasshoppa, same time! Was da time afta da peopo cut da grass fo da king horses, an stay plant new grass. Da small grass, jus starting fo come up.
\v 2 I stay tinking, ‘Wat goin happen wen dem grasshoppas eat up da green plants all ova da land?’
\p “Den I tell God, ‘Auwe, God! Yeah, you da Boss! But I stay aks you, please hemo our shame fo da bad kine stuff we stay do, an let us go. Cuz if you no like let us go, no way us Israel peopo goin stay alive. Our ohana, no mo powa, you know!’
\p
\v 3 “So Yahweh, he change his mind bout da grasshoppas. He say, ‘Da ting you see now, no goin happen.’-”
\s3 Da Fire
\p
\v 4 “One nodda time, dis wat my boss Yahweh wen show me. Was jalike one dream. An you know wat? My boss Yahweh was making ready fo punish da peopo wit fire, da kine fire dat can even dry up da big watta. Now, dat fire stay ready fo burn up all da fields too!
\p
\v 5 “Den I tell God, ‘Eh Yahweh! You da boss fo me! But I stay aks you, please, yeah, no make da fire? How us Israel peopo goin stay alive? Us no mo powa, you know!’
\p
\v 6 “So my boss Yahweh, he change his mind bout da fire. He say, ‘Jalike da first time, wat you see, no goin happen.’-”
\s3 Da String Fo Check Out Da Wall
\p
\v 7 “Anodda time, dis wat Yahweh wen show me. Was jalike one dream. I see my boss. He stay standing dea nex to one wall. He stay pull one string fo check out da wall an make shua he stay strait.
\v 8 Yahweh wen aks me, ‘Eh Amos! Wat you see?’
\p “I tell um, ‘One string jalike da house builda guy pull fo check out if da wall stay strait.’
\p “My boss say, ‘I tell you dis: My peopo, da Israel peopo, dey no stay strait inside! I wen check dem out awready, jalike da house builda guy pull da string fo check out da wall. Dis time, cuz a da bad kine stuff dey stay do, no way I goin let dem go one mo time.’
\p
\v 9 “Yahweh wen say dis too:
\q ‘Da places on top da hills wea da Isaac ohana peopo go
\q2 Fo make sex an den pray,
\q2 I goin broke um down.
\q Da places da Israel peopo build fo be spesho fo me,
\q2 Goin come one rock pile.
\q Da peopo from da King Jeroboam ohana,
\q2 I goin send army guys fo go afta dem wit swords!’-”
\s3 Bad Tings Goin Happen
\p
\v 10 One time, had one a da main pries guys dat live Bethel side, name Amaziah. He wen send somebody by Jeroboam, da king fo da Israel peopo, fo tell um dis: “Amos, he live right hea wit us Israel peopo, but he making plan fo throw you out. Eh! Da tings dis guy stay tell, no good fo da peopo inside our land fo hear!
\v 11 Dis Amos guy, dis wat he stay tell peopo: ‘King Jeroboam, somebody goin kill him wit sword, an fo shua, dose peopo goin take all da Israel peopo far away from dea land.’-” Dass wat Amaziah tell Jeroboam.
\p
\v 12 Amaziah wen go talk to Amos too. He tell Amos: “Eh, talka fo God! Good you run away from hea. Go back Judah side. Be one talka fo God ova dea, an let da peopo dea pay you fo talk fo God.
\v 13 But no stay talk mo fo God ova hea, Bethel side, cuz dis da spesho place wea King Jeroboam come fo pray, an get our National Temple ova hea.”
\p
\v 14 Amos, he tell Amaziah: “You know, I not one regula kine talka fo God. I not one a da guys talk fo God fo get money. I jus one guy dat take care da sheeps, an take care da sycamore kine fig trees too.
\v 15 Was Yahweh dat wen tell me fo leave da sheeps. Was Yahweh dat wen tell me, ‘Go! Talk fo me. Tell my peopo, da Israel peopo, wat I say.’
\p
\v 16 “Eh Amaziah! Now, you gotta lissen to wat Yahweh say. You tell me, ‘No talk fo God about da Israel ohana! No stay teach agains da Isaac ohana!’
\v 17 But cuz you talking lidat, dis wat Yahweh say:
\q ‘Yoa wife, she goin come one wahine
\q2 Dat fool aroun fo money, right hea inside yoa home town.
\q Yoa boys an yoa girls, da army guys goin kill dem wit da swords.
\q2 Yoa land, da army guys goin measure um fo broke um up an sell um.
\q An you, you goin mahke one nodda land wea nobody know God,
\q2 Cuz da army guys goin drag you Israel peopo away from yoa own land.’-”
\c 8
\s2 Wat Happen To Da Talka Fo God
\s3 Da Ripe Fruits
\p
\v 1 Den Amos say: “One nodda time, dis wat my boss Yahweh wen show me. Was jalike one dream. Get one basket wit ripe kine fruits inside dat ony get summa time.
\v 2 Yahweh den aks me, ‘Eh Amos! Wat you see ova dea?’
\p “I tell um, ‘One basket. Inside, get ripe kine fruits dat ony get summa time.’
\p “Den Yahweh tell me, ‘Dass jalike my own peopo, da Israel peopo. Litto bit mo an dey goin come pau too. No way I goin let dem go again!’
\p
\v 3 “My boss Yahweh, he tell dis too: ‘Wen dat time come, da peopo dat going sing inside da Temple, no can sing, cuz dey sore inside an stay cry loud. Dey goin tell:
\q ‘Get so plenny mahke bodies!
\q All ova da place!
\q Take um outside da town!
\q An no talk!’-”
\s2 God Punish Da Israel Peopo
\r (Amos 1:3-3:2)
\s3 Da Rich Ones
\m
\v 4 Den Amos tell:
\q “So! You rich guys, you betta lissen to dis!
\q2 You guys go all out fo make presha
\q2 Fo da peopo dat no mo notting,
\q An you try fo wipe out guys inside yoa land
\q2 Dat stay scared fo stand up agains you.
\q
\v 5 You guys, dis wat you tinking, yeah?
\q2 ‘Us guys no like wait fo da new moon time
\q2 Wen pau da religious kine stuff!
\q Cuz us guys like sell food.
\q2 But no can, till da religious kine stuff pau!
\q An us guys no like wait fo sell da wheat
\q2 Till da Rest Day pau.
\q Us guys goin make uku paila money,
\q2 Cuz da measure us guys use,
\q2 Goin be mo small den suppose to be.
\q We goin take da money from da peopo
\q2 Fo mo den wat suppose to be wort.
\q Den, wateva dey buy,
\q2 We goin mess up da scale too.
\q
\v 6 We even pick up da junks from da wheat
\q2 An sell dat too.
\q Den we use dat money
\q2 Fo go find peopo dat no mo notting,
\q2 An odda guys dat owe somebody money fo one pair slippa,
\q An we buy dem cheap
\q2 Fo come slaves fo us guys.’-”
\s3 God Goin Shake Up Da Whole World
\p
\v 7 Amos tell dis: “Da Israel peopo, dey real big head, cuz dey Yahweh peopo. But Yahweh da one dat wen make strong promise lidis:
\q ‘Fo shua, I no goin foget
\q2 Da bad kine tings da Israel peopo wen do, eva!
\q
\v 8 So, wat? You tink da groun goin shake
\q2 Cuz a all dat bad kine stuff?
\q2 Fo shua, goin shake!
\q You tink erybody dat live inside dat land
\q2 Goin cry plenny?
\q2 Fo shua, dey goin cry plenny.
\q Da whole land goin move up an goin shake
\q2 An goin move back down
\q2 Jalike da Nile Riva, Egypt side.’
\m
\v 9 “My boss Yahweh say dis too:
\q ‘Wen da time come, I goin make da sun come dark, noon time.
\q2 Dass wen da whole world goin come dark, no matta day time.
\q
\v 10 Weneva you guys do religious kine stuff dat make you feel good,
\q2 I goin change um an make you guys come sad.
\q Wen you guys sing,
\q2 I goin make you guys sing sad kine song.
\q I goin make erybody stay sore inside
\q2 An wear burm bag kine cloth
\q2 An shave bolohead fo show dey stay sore inside.
\q Goin be jalike wen da fadda-mudda guys come sad
\q2 Cuz dea one an ony boy, mahke.
\q Dat time, goin be jalike eryting taste real bad, till da end.’-”
\s3 Da Peopo No Lissen God
\p
\v 11 Amos say dis: “Dis wat my boss Yahweh tell: ‘You know wat?
\q Goin come da time,
\q2 I goin make erybody all ova da land
\q2 Feel jalike dey hungry.
\q But I not talking bout hungry like fo bread
\q2 O thirsty like fo watta.
\q Me, Yahweh, I talking bout dis:
\q2 Dey goin like hear all da tings I wen tell befo,
\q2 Cuz dey goin come hungry fo hear all dat now!
\v 12 Dey goin go aroun from one sea to da odda sea, an from da nort side to da east side. Dey goin go all ova da place, aksing peopo “Eh! Yahweh, wat he trying fo tell us guys?” But dey no goin find out notting.’
\p
\v 13 “Dat time, even da good looking young girls an da young guys goin pass out cuz dey so thirsty.
\v 14 All dose peopo dat stay tink lidat, wen dey make strong promise, dey aks da pilau idol kine god dat da Samaria peopo pray to, fo wipe dem out if dey no do wat dey promise! O dey tell
\q ‘I shua dat I goin do um,
\q2 Jalike I shua dat da idol kine god dat da Dan ohana peopo pray to, stay alive!’
\q O ‘jalike I shua dat da idol kine god we go pray to Beersheba side, stay alive!’
\b
\q But all dose peopo dat make dat kine promise, dey goin fall down an mahke.
\q2 Dey no goin get up, eva!”
\m Dass wat Yahweh say.
\c 9
\s3 Wen God Punish, No Can Run Away
\p
\v 1 Amos say: “Jalike one dream, I wen see my Boss. He real big an awesome, an he stand right dea ova da altar fo da sacrifice. He say dis:
\q ‘Go wack da top a da main pos inside da temple!
\q2 So dat eryting undaneat da pos shake an fall down!
\q Bus um up so da whole ting fall down
\q2 Bring um down on top da head
\q2 A all da peopo dat stay still yet inside da temple!
\q Anybody stay alive still yet,
\q2 I goin kill um wit da sword.
\q No mo nobody goin get outa dea,
\q2 No mo nobody goin run way!
\m
\q
\v 2 ‘No matta dey dig way down inside da Mahke Peopo Place,
\q2 I goin pull um back outa dea wit my hand.
\q No matta dey go up to da sky,
\q2 I goin pull um back down from dea.
\q
\v 3 No matta dey go all da way on top Mount Carmel
\q2 An hide ova dea so nobody can see um,
\q2 I goin find um an drag um back.
\q No matta dey stay hide from me on da bottom a da ocean,
\q2 I goin tell da sea snake wat fo do
\q2 An he goin go afta um an bite um.
\q
\v 4 No matta da guys dat stay agains um make dem come prisonas
\q2 An walk all da way to anodda country,
\q2 I goin tell da peopo ova dea fo kill um wit swords.
\q I goin watch fo make shua dat bad tings happen to dem,
\q2 Not good tings.’-”
\m Dass wat Yahweh say.
\s2 God Get Power Fo Punish
\r (Amos 1:2, 4:13, 5:8-9)
\q
\v 5 “My Boss Yahweh,
\q2 Da God Dat Stay In Charge Ova All Da Armies,
\q Wen he touch da world, jalike da world melt,
\q2 An erybody dat stay live inside da world come real sad.
\q Da land move up an move back down
\q2 Jalike da Nile Riva Egypt side.
\q
\v 6 Yahweh, he build da top part a his house inside da sky,
\q2 Da arch go all da way up from da earth.
\q He tell da watta fo come up outa da ocean,
\q2 Den he pour um out on top da groun.
\q Yahweh, dass his name,
\q2 Cuz dass who him!”
\s2 God Punish, An God Make New
\s3 Da Israel Peopo Not Mo Betta Peopo Den Da Odda Peopos
\m
\v 7 Dis wat Yahweh say:
\q “Eh you Israel peopo!
\q Fo shua, I no make diffren to you guys
\q2 An to da peopo from da Sudan land!
\q I wen bring you Israel peopo up hea outa da Egypt land,
\q2 I wen bring da Filistine peopo from Crete Island too,
\q2 An da Aram peopo, I wen bring dem from Kir side.
\q
\v 8 You know wat? Me, I Yahweh, yoa boss,
\q2 An I stay watching yoa land,
\q2 Cuz all da peopo ova dea stay do wrong!
\q Fo shua, I goin wipe out dat land all da way,
\q2 All da peopo dat come from yoa ancesta guy Jacob!”
\m Dass wat Yahweh tell.
\m
\v 9 Yahweh say dis too:
\q “You know wat I goin do?
\q I da one dat goin say da ting
\q2 Fo make da peopo dat stay agains you guys
\q Throw you Israel peopo outa yoa land
\q2 An make you go diffren countries fo live dea!
\q Goin be jalike wen somebody shake one straina
\q2 An all da good stuff no fall down to da ground.
\q
\v 10 Goin get war,
\q2 An all my peopo dat do wrong goin mahke.
\q Dey da ones dat say,
\q2 ‘Notting bad goin happen to us guys!
\q2 All dat bad kine stuff no goin catch us up!’
\s3 God Goin Make Da Israel Peopo Come New
\r (Amos Jesus Guys 15:16-18)
\m
\v 11 Plus, Yahweh say dis:
\q “Dis peopo dat had King David fo dea king befo time,
\q2 Now dey all mess up, jalike one shack ready fo fall down.
\q But goin come da time,
\q2 I goin fix up dea land jalike King David time was.
\q Jalike da peopo fix one wall dass all broke an fall down,
\q2 I goin fix dat wall dat was all bus up
\q An put up da tings dat wen broke.
\q2 I goin build um jalike was befo time.
\q
\v 12 Cuz a dat, da Israel peopo goin take ova da odda part a da Edom land
\q2 An all da odda countries dat was mines befo time.”
\m Dass wat Yahweh tell, da One who goin do all dat.
\m
\v 13 An you know wat? Yahweh say dis too:
\q “Goin come da time,
\q2 Wen dey plant stuff, goin grow so quick
\q Da firs part goin be ready fo cut
\q2 Befo dey even ready fo plant da odda part!
\q Even wen time awready fo make ready da grape seeds
\q2 Fo plant da next time
\q Dey still no goin pau step all da grapes dey get
\q2 Fo make wine, from da las time!
\q Goin get so plenny juice from da fresh grapes,
\q2 Goin run down da hills
\q2 An make da hills look jalike dey stay melting all ova da place!
\q
\v 14 I goin bring my Israel peopo back
\q2 From da place wea dey stay prisonas.
\q Dey goin build again da towns dat was all bus up.
\q2 Dey goin make house dea, an plant grape fields
\q2 An drink da wine dat dey make dea.
\q Dey goin plant gardens
\q2 An eat da fruits dat grow dea.
\q
\v 15 I goin put my peopo on top dea own land
\q2 Jalike I planting um dea.
\q An nobody goin throw um outa dea land, eva.
\q2 Cuz I wen give um dat land.”
\m Dass wat Yahweh say, an he da God fo dem!