\id jon
\c 1
\s God Tell Jonah Fo Go Nineveh
\r (2 Kings 14:25)
\p
\v 1 Had one guy Jonah. His fadda, Amitai. One time, Yahweh
wen tell Jonah fo talk fo him. An dis wat Yahweh wen tell Jonah:
\v 2 “No wait! Go Nineveh town now, da main town Assyria side. Tell all da peopo ova dea, I know awready, all da pilau kine stuff dey stay do.”
\p 
\v 3 But Jonah, he neva lissen. He wen go da odda way from Yahweh fo
go ova dea Tarshish side (dass Spain, you know). He go down Joppa
boat harbor an find one big boat dat goin go Tarshish. He pay
da money fo go, an he go on top da boat fo go Tarshish wit da
saila guys. He tink he can go far way from Yahweh.
\s Da Storm
\p
\v 4 Wen dey was going, Yahweh, he wen make one bite-hard wind come
on top da sea. Da storm come on top da watta so strong, da boat
litto mo bus up.
\v 5 Da saila guys, dey plenny scared. Ery one a dem wen yell fo help
to dea own gods. Dey wen throw out da stuffs from da boat fo make
um not so heavy, so mo easy fo handle. All dat time, Jonah, he
stay down inside da bottom part a da boat. He wen lay down inside
dea an go pass out sleep.
\v 6 Da captain go by Jonah an yell at him, “Eh! Wassa matta you?
How come you sleeping lidat?! Get up an tell yoa god fo help us!
Den maybe yoa god goin tink fo help us guys, so we no wipe out!”
\s Dey Throw Jonah Outa Da Boat
\p
\v 7 Da saila guys, dey tell each odda, “Eh, good fo us if we can
find out who da guy dat wen make one god mad, an make dis bad
ting come to us guys. We go pull straw fo find out who him, yeah?”
Dey wen pull straw, an Jonah, he da one wen lose.
\p 
\v 8 Dey tell Jonah, “Kay den. You da guy dat wen make dis bad ting
come to us guys. So tell us, who you, an wat kine work you do?
Wea you come from? Wat country you come from? Wat yoa peopo?”
\p 
\v 9 Jonah tell um, “Me, I one Hebrew guy. I get love an respeck fo
Yahweh, da God Up Dea Inside Da Sky. He da One wen make da sea
an da land.
\v 10 An I stay running away from him.”
\p 
Wen da saila guys hear dat, dey come real scared. Dey aks Jonah,
“Eh, wat you do dat fo?”
\p 
\v 11 Da waves, dey stay coming mo big erytime. So da saila guys tell
Jonah, “Eh! Wat we gotta do to you, so yoa god make da sea come
quiet aroun us guys?”
\p 
\v 12 Jonah tell um, “Take me ova dea an throw me inside da sea. Den
da sea goin come quiet fo you guys. Cuz I know dis big storm wen
come to you guys cuz a me.”
\s Dey Throw Jonah Inside Da Sea
\p 
\v 13 Da saila guys, dey try firs fo row da boat back to da land. But
dey no can, cuz da storm stay coming mo big all aroun dem.
\v 14 Den dey wen yell fo help to Jonah's god Yahweh. Dey say, “Eh
Yahweh! Please, no let us guys wipe out jus cuz we goin kill dis
guy! If he neva do bad ting, an we kill um, please let go us guys!
Cuz you Yahweh, an was you dat wen make all dis happen, not us
guys. So no blame us!”
\v 15 Den da saila guys wen pick up Jonah an throw him inside da sea.
Right den an dea, da sea wen stop moving aroun an come quiet.
\p 
\v 16 Da saila guys, dey real scared a Yahweh, cuz he fo real, an dey
like show him plenny respeck. So dey wen kill one animal fo make
sacrifice to him, an dey make plenny serious kine promise, wat
dey goin do fo him bumbye.
\s Da Big Fish Swallow Jonah
\r (Matthew 12:40)
\p 
\v 17 Yahweh, he wen make ready one mangus fish fo swallow Jonah. An
den Jonah stay inside da fish opu, three days an three nites.
\c 2
\s Jonah Pray To God
\p 
\v 1 Wen Jonah stay inside da fish, he wen go pray to his God Yahweh.
\p 
\v 2 He say:
\q 
“Wen I get plenny trouble,
\q2 
I yell out to you, Yahweh, fo help me,
\q 
An you help me.
\q 
“Wen I was inside da fish opu
\q2 
Was jalike inside da place wea da mahke peopo stay.
\q 
I yell fo help,
\q2 
An you lissen to me.
\q 
\v 3 You throw me down inside da real deep place
\q2 
Inside da middo a da sea.
\q 
Da watta come all aroun me.
\q2 
All da big wave dat you send go ova me.
\q 
\v 4 I stay tinking lidis: ‘God, he wen throw me out,
\q2 
He make me go way wea he no see me.’
\q 
I tinking: ‘Fo shua I no goin see one mo time
\q2 
Da Temple dass spesho fo God.’
\q 
\v 5 Da watta wen come ova me an litto bit mo I goin mahke,
\q2 
Da deep watta come all aroun me,
\q 
Big seaweed wen wrap aroun my head,
\q2 
\v 6 I wen go down to wea da mountains stand, on top da ocean bottom.
\q 
Jalike I go down to da Mahke Peopo Place,
\q2 
Dat get lock fo keep me inside,
\q2 
An I no can go outside, eva!
\q 
But you, you my God Yahweh!
\q2 
You wen bring me up outa da grave
\q2 
An I stay alive still yet!
\q 
\v 7 “Wen I wen feel like I goin stay alive ony litto bit moa,
\q2 
I tink plenny bout you, cuz you Yahweh.
\q 
I wen pray hard to you
\q2 
Ova dea wea you stay inside da Temple dass spesho fo you.
\q 
\v 8 Whoeva go down in front
\q2 
Da idol kine gods dat good fo notting,
\q 
Dey no like stay tight wit you.
\q2 
You da One dat erytime stick wit dem.
\q 
\v 9 But me, I like make sacrifice fo you bumbye,
\q2 
An sing an tell you dat you da greates!
\q 
Da ting I wen promise you dat I goin do,
\q2 
I goin do um.
\q 
Cuz you Yahweh,
\q2 
An you da One wen bring me outa trouble!”
\p 
\v 10 Den Yahweh, he wen tell da big fish wat fo do, an he bahf Jonah
out on top da beach.
\c 3
\s Jonah Go Do Wat Da Boss Tell Um
\p 
\v 1 One mo time Yahweh talk to Jonah. He tell Jonah dis:
\v 2 “No wait! Go Nineveh town, da main town Assyria side. Tell da
peopo ova dea all da tings I stay telling you now.”
\v 3 So Jonah, right den an dea he wen go Nineveh, jalike Yahweh wen
tell um fo do.
\p 
Niniveh, dass one mangus town, you know. Need three days fo walk
all ova da town.
\v 4 Wen Jonah get dea, he start fo go hea an dea inside da town. He
walk fo one whole day. He talk so erybody can hear: “Ony get
forty days mo from now, God goin wipe out Nineveh town!”
\p 
\v 5 Da Nineveh peopo, dey believe wat God wen say. Dey tell everybody,
“Auwe! All us guys betta no eat food so we can pray!” Da importan
peopo an da regula kine peopo, everybody wen put on burm bag kine
clotheses fo show dey stay sorry inside.
\p 
\v 6 Den da king fo Nineveh, he wen hear bout wat Jonah stay tell too.
He stand up from his throne, take off his fancy king kine robe,
an put on burm bag kine clotheses an go sit down on top da ashes,
fo show he stay sorry inside.
\v 7 Da king wen send guys all ova Nineveh town fo tell da peopo fo
come togedda. Den he tell everybody: “Da king an da ali`i guys,
we all say dis: Nobody eat notting now -- da peopo an all da animals,
da cows, da sheeps, everybody gotta no eat food so we can pray!
Da animals no can eat grass o drink watta.
\v 8 Erybody gotta put on burm bag kine clotheses, all da peopo an
da animals, fo show dey stay sorry inside, same same. Erybody
gotta go all out fo yell fo help to God. Erybody gotta pau do
bad kine tings! Erybody gotta stop hurting odda peopo!
\v 9 Nobody know if God goin change his mind bumbye. He no take da
kine tings us guys stay doing, but maybe he goin show pity an
change his mind so us guys no goin wipe out bumbye!”
\p 
\v 10 God, wen he see wat dey stay doing, an see dat dey wen change
how dey ack an pau do bad kine tings, he wen change his mind bout
doing bad tings to dem, da way he wen say befo time dat he was
goin do. Cuz a dat, he neva do notting bad to dem.
\c 4
\s Bodda Jonah Cuz Da Peopo Come Sorry
\p 
\v 1 Wen bodda Jonah plenny, cuz God wen change his mind. Jonah wen
come real huhu wit God cuz a dat.
\v 2 Jonah wen pray to Yahweh lidis: “Auwe, Yahweh! You know, all
dis wen happen jalike I wen say wen I wen stay my own country!
Dass why quick I wen run away fo go Tarshish side, you know. I
know dat you da kine God dat like do good tings fo peopo an show
pity fo dem. Take long time befo you come huhu. You stay tight
wit yoa peopo long time an give um chance. Dass why you change
yoa mind an no punish da bad kine stuff peopo do.
\v 3 You, you Yahweh! Kill me now, cuz mo betta I mahke den stay alive!”
\p 
\v 4 But Yahweh tell Jonah, “So? You tink dass good fo you, fo stay
huhu cuz da Nineveh peopo wen come sorry fo da bad kine stuff
dey wen do, o wat?”
\s God Take Care Jonah
\p 
\v 5 So, afta Jonah tell da Nineveh peopo wat God tell him, Jonah go
outside Nineveh town, an he stay ova dea da east side. He wen
build one shack ova dea, so he get shade an wait fo find out wat
goin happen wit da peopo inside da town.
\v 6 God Yahweh, he wen make one tall plant come up dea an make leaf
go all ova Jonah's head fo make shade, so make um not too bad
fo Jonah. An he stay plenny good inside cuz a da plant.
\v 7 But da nex day, wen still yet litto bit dark jus befo da sun come
up, God wen make one army worm go up da plant. Da army worm wen
go afta da bush an make um come all poho.
\v 8 Den, wen da sun come hot, God wen make one hot wind come from
da east side. Da sun wen shine real strong on top Jonah's head,
an he litto mo pass out. Jonah wen tell God, “Why you no jus
let me mahke?! Mo betta fo me mahke den stay alive!”
\p 
\v 9 God, he tell Jonah, “So! You tink dass good you stay huhu cuz
da plant gone awready?!”
\p 
Jonah tell um, “Yeah! Good ting dat I stay so huhu dat I like
mahke!”
\s God Show Pity
\p 
\v 10 But Yahweh wen tell Jonah: “Kay den. One nite dat plant wen come
up, an anodda nite, da plant wen come poho. You, you neva work
notting fo make da plant come up, an you neva do notting fo make
um grow. Still yet, you neva like see notting bad happen to dat
plant, yeah?
\p 
\v 11 “So now, tink bout me. You tink dass good, o no good, cuz I no
like see notting bad happen to all da peopo inside dat big town
Nineveh?! Get mo den hundred twenny tousan peopo inside dea, you
know, plus all dea animals. An da peopo dea, dey donno notting
bout wass right an wass wrong, jalike dey donno wass dea right
hand an wass dea left hand! An den!”