\id mal
\h Malakai
\mt Malakai
\mt2 Talk Fo God
\c 1
\s Yahweh Tell Malakai Talk Fo Him
\p
\v 1 Lissen! Dis wat Yahweh Up Dea Inside Da Sky tell. He tell dat me, Malakai, I da messenja guy dat suppose to tell da Israel peopo bout Yahweh.
\s Yahweh Get Love An Aloha Fo Da Israel Peopo
\r (Rome 9:13)
\p
\v 2 Yahweh say dis to you guys: “I get love an aloha fo you guys.”
\p But you guys tell God, “Eh! How you can tell, you get love an aloha fo us guys?!”
\p Dis wat Yahweh tell: “You know Jacob, yoa ancesta? He get one brudda Esau, aah? But da peopo dat come from Jacob, dass da Israel peopo I get love an aloha fo!
\v 3 But da Esau peopo, I hate dem. I make dea mountains all bus up so nobody can live dea. I make dea land come one place fo ony da wild dogs live.
\p
\v 4 “Da Esau peopo dat live inside da Edom land, tell: ‘Us guys stay all bus up, but we goin come back an build eryting dat wen get smash!’
\p “But me, Yahweh, Da God Ova All Da Armies, I tell: Wateva dey goin build, I goin bus um up. Wen odda peopos talk bout dem, dey goin call da Esau land ‘da land wea peopo dat do bad kine stuff stay,’ an ‘dat Yahweh stay put kahuna on top dem, foeva’
\v 5 An you Israel peopo goin see all dat happen wit yoa own eyes, an you goin say, ‘Eh! Yahweh get plenny mo powa den jus inside da Israel land!’-” An Yahweh tell, “Dass how I show I love you guys.”
\s Da Pries Guys, Dey Suppose To Respeck Yahweh
\p
\v 6 Yahweh tell, “Eh, you pries guys dat talk stink bout me! Da kids, dey suppose to get respeck fo dea fadda guys, yeah? An da worka guys, dey suppose to get respeck fo dea boss guys. So den! I da fadda fo you guys, but you guys no mo respeck fo me. I da boss fo you guys, but you no scared fo no do wat I tell you. I Yahweh, Da God Ova All Da Armies, an dass wat I telling you guys.”
\p But you pries guys tell, “Tell us, how us guys talk stink bout you?!”
\p
\v 7 Yahweh tell: “You bring pilau kine food, erytime you bring food by da altar fo make sacrifice fo me. Same time, you guys aks me, ‘How we make pilau kine to you?’ I tell you how you make pilau kine to me. You talk like az okay fo make any kine sacrifice fo me, Yahweh.
\v 8 You make sacrifice wit da kine animal dat no can see. You tink az okay! You bring animals dat no can walk o dat stay sick, an you tink az right. You know you no can bring dat kine animal fo make gif fo da govna guy! You tink he goin stay good inside if you do dat?! You tink he goin like lissen to you?! No way! But no foget, I Yahweh, Da God Ova All Da Armies dat telling you dis!
\v 9 But now, beg me fo make good to you guys, an maybe I give you guys chance, no matta you bring dat pilau kine sacrifice! How come you tinking, ‘Maybe Yahweh, Da God Ova All Da Armies, goin do good kine tings fo us guys,’ aah?!
\v 10 Mo betta one a you guys shut da doors fo da sacrifice place. Den you no can go inside fo make da fire on top da altar, fo make one sacrifice fo me dat ony wase time. All da stuff you guys do, dat no make me feel good inside notting. Dass me dat say dis, Yahweh, Da God Ova All Da Armies. No way I goin take da gifs you guys bring!
\p
\v 11 “All ova, from wea da sun come up to wea da sun go down, all da peopos know my name importan. Dey bring stuff fo make sacrifice cuz dey know wat kine god me, an dey bring da kine gifs dat no mo notting wrong wit dem. Dass cuz da diffren peopos dat know who me, dey know I importan.” Dass wat Yahweh, Da God Ova All Da Armies say.
\p
\v 12 But I tell, you pries guys, you da one make my Boss altar pilau wea you stay eat togedda wit him. Da tings you guys tell, dass wat make um pilau. You guys make erybody tink, da food on top dat altar, no good.
\p
\v 13 Yahweh, da God Ova All Da Armies, tell: “You guys tink, ‘Eh! Too much, dis!’ You guys ack jalike da sacrifices stink! Den you go bring da kine animals dat da wild animals rip up, an give um to me fo one sacrifice. Da kine no can walk, an sick. You tink I goin take um an stay good inside cuz you make lidat? I no tink so!” Dass wat Yahweh say.
\p
\v 14 But I tell, one guy make one promise fo make one sacrifice to my Boss befo time. Da guy get one good sheep, boy kine, fo make da sacrifice. But da guy tink he can bulai God, so he ony bring one no good kine sheep fo my Boss. But you know wat? Yahweh goin put kahuna on top dat guy! Cuz Yahweh, Da God Ova All Da Armies, tell: “I da big king. So wen all da diffren peopos find out wat kine god me, dey goin get real scared.”
\c 2
\s Da Pries Guys, All Jam Up
\p
\v 1 So now, you pries guys, dis wat you gotta do.
\v 2 Dis wat Yahweh, Da God Ova All Da Armies tell: “If you guys make deaf ear, an no like lissen fo show respeck fo me, no matta you know wat kine god me, den I goin put kahuna on top you guys. Erytime you guys tell da peopo, ‘Yahweh goin do good tings fo you guys,’ I goin make eryting come bad fo dem. Dass cuz you guys no put yoa heart fo show respeck fo me, no matta you know wat kine god me!
\v 3 Cuz a wat you guys do, I goin mess up you guys ohana, so come small. I goin take all da stuff from inside da animals dat you kill fo da spesho religious times an rub um all ova yoa face. Den I goin take you guys outside da town, an throw you on top da kukae pile.
\v 4 You guys know wat you suppose to do awready. Dass cuz I like da deal stay solid dat I get wit you guys ohana, da Levi ohana.” Dass wat Yahweh, Da God Ova All Da Armies tell.
\p
\v 5 He tell you guys: “Da deal dat I get wit da Levi ohana, goin stay solid. I wen give dem good kine life, an make tings come out good fo dem. I wen make da Levi ohana guys know who me, so dey stay scared an shaking in front me.
\v 6 Wen dey teach, dey tell da trut. Da tings dey tell, no mo notting bad. Eryting come out good fo dem. Dey do da right kine tings, an dey stay tight wit me. An dey help plenny peopo turn aroun fo no do bad kine stuff no moa.
\v 7 Az why, wen da pries guys talk, dass wea you go fo learn stuff, an aks dem fo teach you God's Rules. Cuz da pries guys, dey da messenja guys fo Yahweh, Da God Ova All Da Armies!
\p
\v 8-9 “But you guys wen go da wrong way! Da way you guys teach, you make plenny peopo go da wrong way too! You ack like no mo da deal I get wit da Levi ohana! I goin make erybody tink you guys pilau, an make you guys shame. Cuz wit you guys, no mo nobody do da tings da way I tell um fo do um! Wen you guys teach da peopo wat God's Rules mean, you tell um diffren fo diffren peopo.” Dass wat Yahweh, Da God Ova All Da Armies, tell.
\b
\q
\v 10 You no tink all us guys get da same fadda?!
\q2 You no tink da one God wen make us guys?!
\q How come all us guys ack
\q2 So not even our own brudda can trus us?!
\q So! How come we ack like da deal pilau
\q2 Dat God wen make fo our ancesta guys?!
\q
\v 11 Da Judah peopo, no can trus dem.
\q2 Some a da Israel peopo, an da peopo inside Jerusalem,
\q2 Dey do unreal pilau kine stuff dat make you like puke.
\q Cuz da Judah peopo, dey even go marry
\q2 Da wahines dat show love an respeck to da gods from da odda places.
\q Dass how dey make pilau, da place dat stay spesho fo Yahweh,
\q2 Da place God get love an aloha fo.
\q
\v 12 Get peopo dat make lidat,
\q2 Dey even bring gif fo make sacrifice fo Yahweh, Da God Ova All Da Armies.
\q I like fo Yahweh, cut off dem peopo from da Israel ohana,
\q2 No matta who dem.
\p
\v 13 An dass anodda ting you guys do. You guys cry big an moan all ova da altar wea you make sacrifice fo Yahweh. But Yahweh still yet no turn aroun an take da sacrifices you guys bring, an he no feel good cuz you bring um.
\v 14 But you guys, you tell, “How come Yahweh still tink I pilau?” I tell you how come! Cuz Yahweh know eryting bout you an yoa wife, da one you wen marry wen you was young. He know dat you bulai her, no matta she yoa bestes friend, an you wen make strong promise fo stick wit her. Az why he tink you pilau.
\v 15 You donno, God wen make you an yoa wife one?! He da one dat own you guys body an spirit. An you know why Yahweh wen make you one? So wen you get kids, dey stay all out fo God! So, you guys make shua you stay okay inside, an no bulai da wife you wen marry wen you was young.
\p
\v 16 Yahweh, da God fo da Israel peopo, tell: “I hate wen you leave yoa wife, an wen you bus up peopo an make like you neva do notting!” Dass wat Yahweh, Da God Ova All Da Armies tell. So, you guys make shua you stay okay inside, an no bulai!
\p
\v 17 You guys, you talk too much, you make Yahweh real tired! An you say, “How us guys make God tired?” Cuz you tell, weneva you do bad kine stuff, Yahweh tink you good, an he stay good inside fo wat you do. So you guys tell, “You tink God goin judge us? No way!”
\c 3
\s Da Messenja Guy From Yahweh
\r (Matthew 3:3, 11:10; Mark 1:2-4; Luke 1:76, 7:27)
\p
\v 1 Yahweh Up Dea Inside Da Sky, da God Ova All Da Armies, tell dis:
\q You know wat I goin do?
\q2 I stay ready fo send my messenja guy
\q2 He goin make ready da road befo I go dea.
\q I goin show up mo fas den you tink,
\q2 Ova dea inside my own temple!
\q Dat messenja guy, da one dat you guys stay looking fo him,
\q2 He da messenja fo set up da deal wit me,
\q An you guys tell,
\q2 ‘We goin stay good inside wen he come!’
\q2 You neva know?! He stay coming awready!”
\m
\q
\v 2 Da messenja guy goin come,
\q2 An you tink you can handle wen he come?! No way!
\q He goin show up,
\q2 An you tink you can face him an no run away? Not even!
\q Cuz him, he real strong,
\q2 Jalike da real hot fire dat da peopo use fo take da junk stuff outa da silva.
\q Jalike da wash soap
\q2 Da peopo use fo make da clothes real clean.
\q
\v 3 Da messenja guy, he goin make like da guy
\q2 Dat melt da silva fo take out da junk stuff.
\q Da pries guys dat come from Levi,
\q2 He goin make dem come all clean inside.
\q He goin throw out all da junk stuff inside dem,
\q2 Jalike he melt da gold an silva fo burn up da junks.
\q Den, da Levi peopo goin be da ones
\q2 Dat make da sacrifices for Yahweh,
\q2 Cuz den, dey goin be da kine peopo dat stay do da right ting.
\q
\v 4 Wen da Judah ohana an da Jerusalem peopo
\q2 Bring dea sacrifice fo Yahweh,
\q Goin be jalike da ol days, long time ago,
\q2 Jalike how was wen da sacrifice was good kine.
\p
\v 5 Yahweh Ova All Da Armies say dis too:
\q “I goin go by you guys in front da judge right den an dea,
\q2 I goin tell da judge wat I know bout you guys,
\q Bout da ones dat make kahuna,
\q2 An da ones dat fool aroun behin dea wife o husban back,
\q An da ones dat make strong promise but dey bulai,
\q2 An da ones dat make trouble fo dea worka guys cuz dey no like pay um,
\q An make trouble fo da widows an da kids dat no mo fadda o mudda,
\q2 An da ones dat give hard time to da peopo from odda place.
\q All dose peopo, dey no scared me!”
\s Time Fo Tink Diffren Kine
\p
\v 6 Yahweh, he say dis too:
\q “I Yahweh, Yahweh, an I no change how I ack.
\q2 I still da same.
\q2 Az why you guys from da Jacob ohana no stay wipe out!
\q
\v 7 From da time dat yoa ancesta guys wen live,
\q2 You guys erytime turn aroun an go da odda way from my Rules
\q2 An you guys no stick wit um.
\q Come back an be my guys one mo time!
\q2 An I goin come back to you guys!
\q I Yahweh, Da God Ova All Da Armies,
\q2 An dass wat I tell.”
\p But you guys tell, “How us guys goin come back?! Us guys neva go way!”
\p
\v 8 Yahweh tell,
\q “You guys tink anybody can steal from God, o wat? No way!
\q2 Cuz you da ones dat stay steal from me, you know.”
\p But you guys tell, “How us guys stay steal from you?!”
\p Yahweh tell, “You guys owe me ten percent a eryting you get, an odda gifs, you know. Wen you guys no pay, you stay steal from me!
\v 9 Az why erybody inside da whole nation get kahuna on top dem, cuz you guys stay steal from me.
\b
\q
\v 10 “Go bring all da ten percent you owe me
\q2 Inside da temple storage place.
\q2 Den goin get food inside my house.
\q So, try see if I fo real bout all dat!
\q2 See if I no goin open da windows inside da sky
\q An pour down fo you guys plenny good tings,
\q2 Too plenny fo you guys handle!
\q2 I Yahweh, Da God Ova All Da Armies, an dass wat I tell.
\q
\v 11 I goin chase away da bugs so dey no eat wat you guys plant.
\q2 Dey no goin wipe out da tings dat grow outa da groun.
\q Da grapes no goin fall down from da grape plants befo dey ready.
\q2 I Yahweh, Da God Ova All Da Armies, an dass wat I tell.
\b
\q
\v 12 “Den all da peopos from diffren place goin say
\q2 You guys can stay good inside,
\q Cuz yoa land, one real nice place.
\q2 Dass wat I tell, an I Yahweh, Da God Ova All Da Armies.”
\p
\v 13 Yahweh tell, “You guys, you talk stink agains me!”
\p But you guys tell, “Wot, us guys talk stink agains you?! No way!”
\p
\v 14 You guys tell, “Ony wase time, work fo God! Wat we goin get from dat?! Notting! Us guys do all da religious kine stuff fo God awready, an now, us stay make real sad face in front Yahweh, Da God Ova All Da Armies.
\v 15 So den, from now, us guys goin tink, ‘Da peopo dat ack like dey mo betta den all da odda peopo an no care bout nobody, dey da ones dat can stay good inside.’ Da peopo dat do wass wrong, dey da ones dat come rich! Even wen dey push God fo see if he goin punish dem, notting bad happen to dem!”
\s God Give Chance To Da Peopo Dat Do Da Right Ting
\p
\v 16 But den, get da odda peopo dat stay feel jalike dey real scared wen dey in front Yahweh. All dem talk wit odda guys dat tink da same ting jalike dem. Yahweh, he lissen plenny an hear wat da guys saying. He wen write down eryting on top one paypa dat stay in front him, fo no foget wat da peopo saying. Yahweh do all dat fo da ones dat stay feel jalike dey real scared in front him, an dat tink plenny bout wat kine god he stay.
\p
\v 17 Den Yahweh, Da God Ova All Da Armies tell: “Wen da time come fo me make dem my spesho peopo, dey goin come mines.
\v 18 Den you guys goin see jalike befo time, da peopo dat stay do wass right, dey stay diffren den da peopo dat stay do wass wrong, an da peopo dat work fo God stay diffren den da peopo dat no work fo God.”
\c 4
\s Da Time Wen Da Judge Come Back
\r (Luke 1:17)
\p
\v 1 Dis wat Yahweh, Da God Ova All Da Armies tell:
\q “You know wat I goin do?
\q2 Fo all da peopo dat ack jalike dey mo betta den anybody,
\q2 An fo all da peopo dat stay do bad kine stuff --
\q Da time goin come, wen dose peopo goin come
\q2 Jalike da lef ova junk kine stuff from da wheat
\q2 Dat peopo burn up inside one hot burning oven!
\q No goin get notting lef,
\q2 Not even da roots, not even da branches!
\q
\v 2 But fo you guys dat feel real scared
\q2 Wen you tink bout wat kine god me,
\q2 Erybody goin see fo real kine wat stay right,
\q Jalike wen da bright sun come up
\q2 An you can see eryting mo clea.
\q2 An dass goin make all you guys feel good.
\q Den, you guys goin run aroun an jump,
\q2 Jalike wen peopo let da bebe cows outa da pen!
\q
\v 3 Da time wen I goin do all dat,
\q2 Jalike you guys goin walk all ova da bad kine peopo,
\q2 Cuz dey goin be jalike da dirt undaneat you guys feets.”
\m Dass wat Yahweh, Da God Ova All Da Armies tell.
\b
\q
\v 4 “No foget da Rules from my worka guy Moses.
\q2 I wen teach him wat he gotta do, Mount Sinai side,
\q So dat he can teach all da Israel peopo da Rules
\q2 Fo know wass right an wass wrong.
\b
\q
\v 5 An one mo ting I goin do,
\q2 I goin send Elijah to you guys,
\q2 Da guy dat wen talk fo me befo time.
\q He goin show up befo I come back.
\q2 An dat time goin be awesome an real scary!
\q
\v 6 Da Elijah guy, he goin make da faddas come back togedda wit dea kids
\q2 An da kids come back togedda wit dea faddas.
\q Cuz if dat no happen,
\q2 Den I goin wipe out erybody inside da world!”