Yamaram Yus Papinium étserma
Yamaram Chichamka Yus Papí aarma ajapén nakakma amúamua nuiti. Yaunchu Áarmaka amukamuka kuatrusiántu uwí naṉkamasu ai̱ Jesus akiiniamuja̱i̱ Yus Papí Yamaram Áarmaka náṉkamui.
Yamaram Chichamsha nútiksarik jú̱tiksar kuatru akankámniaiti. Emka Jesus ju̱ nuṉkanam pujumia nui̱ itiur takakmasmia nu kuatru papí aarma áiniawai. Nuyá̱ Jesusa unuiniamuri̱ túrawarma chikichik papí aarma awai. Nu arant Yus shuar iruntrarma papí áarar akuptúkarma paintiúnu papí áiniawai. Tura nuyá̱ Jesukrístu paant awajsamu tura u̱kma ukunam átatna nuna ujaamu aarma chikichik papiyaiti. Tuma asa aya Yamaram Chichamnumaṉ paintisiáti papí irumpramka awai.
Yus Papí Yaunchu Aarma traintinuíwi papí áiniana nuja̱i̱ irumpramka Yus Papinium takamtsukka sasaintisáis papí ajawai. Chíkich papí ésaram áiniawai tura chíkichkia sútarach áiniawai. Yus Kanta áarmanum tí esaram siantuseṉkuíntia akankámu áiniawai. Tura chíkichkia peṉké sútarach Jirimiúṉkan áatramu tura Juaṉ Ataksha akupkámu tura Juaṉ Nuyá̱ akuptúkma nuyá̱ Jútas akuptúkma chikichkí akankámuksha áiniawai.
Kame Yus Papí Yamaram Aarma íismaka jú̱tiksar pekakar áakmaiti.
1. Émkaka Jesus túramuncha tura ujakmancha kuatru papí áarmaiti. Matéu tura Márkus nuyá̱ Rúkas núnisaṉ Juaṉ jú̱ papí náari̱ṉkia áararua nuna náari̱ji̱a̱i̱ anaikiarma áiniawai. Mateuka Márkussha tura Juaṉsha Jesusa unuiniamuri̱ ármiayi. Tura tsuákratin Rúkaska Páprun tí peṉker amikri̱yayi. Tuma asamtai Pápruka Kurusenam 4:14nam “Rúkas, aneamu tsuákratin” tíniuiti. Rúkasan anea asa Pápruka tí peṉker unuiniarmiayi. Kame Rúkaska tí peṉker unuimiaru asa Jesusa túramuncha émamkes tí peṉker áarmiayi. Kame ju̱ papí kuatru ainia ju̱ka Jesusa túramuri̱n tura Ni etsermia nuna awaiṉki̱ nunak ataksha áujmatainiawai túrasha chíkich áarcharua nuna aṉkant aṉkant émamkesar aaku áiniawai. Túmak Jesus jú̱ nuṉkanam pujus warinia túramia tura Yusa Chichame̱n etsermia nuna aṉkant aṉkant tí paant awajainiawai.
2. Jesusa unuiniamuri̱ túrawarmaka (Túramuri̱ Papí) Jesus Yusa Uchiríntiat Nin enentáimtuiniana nuka tunaari̱ tsaṉkurnararat tusa iin jarutramkattsa ju̱ nuṉkanam taramiayi. Yusa Chichame̱n etserkamia nuna ii Yusri̱ji̱a̱i̱ nawamnaikiar pujustinian Túramuri̱ papiniumaṉ áujmatui. Tuma asa Jesusa túramuri̱ ashí nuṉkanam aents matsasarmia nuna nu tsawantinkia ashí etsernakmiayi.
3. Ju̱ irumpramuka Jesusa unuiniamuri̱ núja̱i̱nchuka chíkich Yus shuar áararma áiniawai. Yus Chicham ashí nuṉkanam etsernaki̱ wéakui Yus shuar iruntramu najanaki̱ wénakui papí áatrarma áiniawai. Ju̱ papí aakma áiniana ju̱ja̱i̱ yamaiya̱ ju̱i̱sha Yus nekas enentáiji̱a̱i̱ enentáimtustai tusar wakerakur warí itiurkatniuitiaj núnaka mash jintintramji. Nútiksarik chíkich shuaran yáiṉtin wakerakur Jesukrístu túramuri̱n tura Ni etsermia nuna nuyá̱ jaka nantakmiája̱i̱ ii Yus tsaṉkatramkamiaj nu jintintiátniuncha yáinmaji.
4. Apukarípsiska ju̱ papí náari̱ṉkia Kriaku chichamaiti. Kame nu chichamnumka Apukarípsiska “u̱kma nu paant awajsamu” tawai.