Israer shuar Senái nainnium jeamu
19
Israer shuar Ejiptunmaya̱ jíinkiarmia nuyá̱ menaintiú nantu jeamunam nu tsawantini̱ṉ Senái kampuntin atsú nuṉkanam jeawarmiayi. 2 Tura Ripitímnumia̱ jíinkiar Senainium kampuntin atsunum jeawar Israer shuarsha naint íṉkiuasmak matsamkarmiayi. 3 Tura Muisais Uunt Yusja̱i̱ chichastaj tusa Senái nainnium wakamiayi. Nui̱ Uunt Yus Muisaisan chicharuk “Jakupa uchirí̱ jú̱nisam tiartá. 4 Tura atumsha Ejiptu aentsnum túramaj nu wainkiamarme. Tura atumniaka churuwia nanaki̱ wéana nútiksanak Winí̱ itiachmakajrum. 5 Tuma asamtai yamaikia winia chichamur ántakrumka tura Wi aentsja̱i̱ chícham najanamu umíakrumka Wi íismaka ashí shuarja̱i̱ naṉkaamas peṉkeri̱ átatrume. Warí ashí nuṉkaka Wíniachukait. 6 Kame atumsha ti nekas Uunt Yus anaikiamu asarum Winia takartin átatrume tawai tusam ju̱ chicham ashí Israer shuar ujakárta” tímiayi Uunt Yus.7 Nuyá̱ Muisais taa Israer shuara uuntri̱ armia nuna untsukar Uunt Yus timia nu chichaman ashí ujakármiayi. 8 Tura Uunt Yus chichakmán ujainiam ashí Israer shuar chichainiak “Uunt Yus tana nuka ashí umiktatji” tiármiayi. Nuna tuíniakui Muisais Israer shuara chichame̱n Uunt Yusan ujakmiayi. 9 Nuiṉkia Uunt Yus Muisaisan chicharuk “Iistá, Wikia yuraṉkim tee ajasmanum tarittiajme. Wi ámiji̱a̱i̱ chichamum Israer shuar antukar tuke nekasaiti turamiarat” tímiayi. Tutai Muisais Israer shuara chichame̱n Uunt Yusan ujakmiayi. 10 Nuiṉkia Muisaisan Uunt Yus chicharuk “Weme Israer shuar imiatkincha awajsarta. Yamaisha tura kashincha atumí pushiri̱ nijiamaktarum. 11 Túrarum menaintiú tsawanta nui̱ṉkia iwiarnarum nákastarum. Warí menaintiú tsawantin ashí Israer shuar iimiainiamunam Senái nainnium Uunt Yus tarattawai. 12 Núnisaṉ Israer shuar naṉkaamakiara̱i̱ṉ tesarawarta. Túram chicharainiakum ‘Aneartarum. Naint wakairap tura tesamusha antiṉkiairap. Yaaksha naintia ántiakka nekas jakattawai. 13 Tura áentskesha nuyá̱ yajasmaksha antiṉkiara̱i̱ṉ nuna antiṉkiuka kayaja̱i̱ tukurar túrutskesha tíshimkiuja̱i̱ eketkar maamu ártatui. Antsu aya kachun miajiatrutsuk umpuiniakui antukar naintia táritkiamuri̱n wajasarti’ tiartá” tímiayi.
14 Nuya̱ṉka Muisais náinniumia̱ waketki̱ taa Israer shuaran mui̱jmiai̱nchu awajsarmiayi. Tura ni pushiri̱ncha nijiamawarmiayi. 15 Tura chicharainiak “Menaintiú tsawanta nui̱ṉkia iwiarnartarum tura atumí nuwe̱ja̱i̱sha peṉké tsaniṉkiairap” tímiayi.
16 Tura menaintiú tsawant tsawa̱a̱munam peemsha, chárpisha ajamiayi. Tura Senainiumka yuraṉkim tee ajasmanum kachusha ti kakaram umpuamu antuimiayi. Túmakui̱ matsamkamunam ashí Israer shuar pujuarmia nuka ti sapijmiainiak kurainiarmiayi. 2 Sam. 22:9 17 Nuyá̱ Muisais Israer shuaran matsamkamunmaya̱ yaruak Yus iṉkiuṉtai tusa naint táritkiamunam wajasármiayi. 18 Uunt Yus jinium páchitkia tara asamtai Senái naintkia takamtsuk múkuint ajamiayi. Túmak jinia mukuintiuri̱ya̱ tímianu jíinmiayi. Tímiatmakui Senái naintcha takamtsuk téter ajamiayi. 19 Tura Senainiumsha kachu umpuamusha nuna kakaram ajakí̱ wémiayi. Tura Muisais chichaakui Uunt Yuska charpia ímiatrus áimiayi.
20 Nuyá̱ Uunt Yuska Senái naintia tsakarí̱n tara Muisaisan untsukmiayi. Túram Muisaissha wakamiayi. 21 Nui̱ Uunt Yus Muisaisan chicharuk “Israer shuar Uunt Yusan iistai tusar tesamua nuyá̱ naṉkamakiar untsurí jákara̱i̱ṉ waketrukim enentáimtikiarta. 22 Núnisaṉ Yúsnan pujurin ainia nusha Uunt Yusan weantúrkartin ásar imiatkincha ajasárti. Nuíchuka Uunt Yus amukara̱i̱ṉ” tímiayi. 23 Tutai Muisais Uunt Yusan aya̱k “Warí ame chichaakum naint tesaata tura imiatkincha awajsarta tíchamkum. Timia ásar Israer shuarka Senainiumka wákachartatui” tímiayi. 24 Tutai Uunt Yus Muisaisan chicharuk “Waketkim Araunja̱i̱ wakata. Antsu Yúsnan pujurin núnisaṉ ashí Israer shuar Uunt Yusja̱i̱ iṉkiunaiktai tusar wainiak tesamun naṉkaikicharti jákara̱i̱ṉᵏⁱ” tímiayi. 25 Nuyá̱ Muisais náinniumia̱ taara ataksha Israer shuaran nuna ujakármiayi.