Yúsnan pujurniu uuntri̱ entsatái̱
Awaṉkém
39
1-7 Yúsnan pujurniu uuntri̱ Araunna awaṉkém kiṉkiaja̱i̱ yamákáiji̱a̱i̱ tura kapanniuja̱i̱ jiu aya kúrik najanamu riniu yaraṉmarmaja̱i̱ najanamai. Únise kayach arma nuka yakainium apujturmai nuyá̱ kurimkiamai. Uunt Yus Muisaisan timia ímiatrusaṉ Israer shuara uchirí̱ náari̱n enentáimtutai̱ amí tusa apujturmiayi.Aya netsepnumaṉ entsatái̱
8-21 Tura aya netsepnumaṉ entsatáincha awaṉkéman najanawarma núninniak najanawarmai. Ríniuja̱i̱ najanainiak kuatru yantameṉka métekrak uwejé̱ waṉkantí̱ji̱a̱i̱ jean najanawarmai. Najanainiak kuriji̱a̱i̱ wa̱a̱mpruamunam shíirmach kaya kuatru eṉkerma menaintiú pekakman najanawarmai. Nu kayanmaṉka Israera uchirí̱ tuse arma nuna naari̱ nui̱ áararmai. Kame Uunt Yus Muisaisan túrata timia nútiksarik aya netsepnumaṉ entsatái̱ṉkia kuri najanamuja̱i̱ tura yáraṉ kiṉkiaja̱i̱ awaṉkémnum achimtikramuyi.
Takamtsuk entsatái̱ kunturtin
22-26 Núnisaṉ takamtsuk entsatái̱ kunturtinian awaṉkémja̱i̱ entsatái̱n najanawarmai. Nuka mashⁱ kiṉkia armai tura ajapén chiṉkiar náimpramuyi. Áitkiasaṉ kampanchin aya kúriji̱a̱i̱ṉ najankar riniu uku̱jtiurmaja̱i̱ munchi najankamun eteṉkar Uunt Yus Muisaisan timia tímiatrusaraṉ pushí tsakari̱n netar awajtúkarmai.
Yúsnan pujurniu chíkich pushiri̱
27-31 Núnisaraṉ riniu yaraṉmarmaja̱i̱ pushin tura etseṉkrutai̱n nuyá̱ pantarúntri̱ncha áitkiasaṉ akachumtairi̱ncha Araunnan tura Arauna uchirí̱niun najatkarmai. Nútiksaraṉ kuku̱jia ániun aya kúriji̱a̱i̱ṉ najatawar “Yusna Akantúkma” tu áatrar yáraṉ kiṉkiaja̱i̱ jiṉkiawar Uunt Yus Muisaisan túrata tusa akupkámia tímiatrusaraṉ etseṉkrutairi̱n netuawarmiayi.
Yus Shiir Awajtai̱ Je̱a̱ je̱a̱mar amukma
32 Uunt Yus Muisaisan Yus Shiir Awajtai̱ Je̱a̱ je̱a̱mtarum tusa jintintramia ímiatrusaṉ Israer shuarsha ju̱na mash iwiarak umirkarmiayi. 33 Tura umikiar jutai̱ je̱a̱ ashí mash Muisaisan ikiatkarmiayi. Yus Shiir Awajtai̱ Je̱a̱ je̱a̱mtin iwiarkamu núnisaṉ je̱á̱ init takasártin armia nunasha nuyá̱ tseṉkennasha, numi nakarmáncha, pauri̱ncha, wiyaṉkencha, aeprurtinniasha 34 nuyá̱ murikiú nuape̱ yamákáiji̱a̱i̱ eṉkerman tura nukurkatniunka tejuṉ yajasma nuape̱ja̱i̱ nuyá̱ ajapén tarach ejaatniuncha 35 tura Yus Aentsja̱i̱ Chícham Najanamu Eṉketáin tura etektutai̱ri̱ Tunaan Akikmatrukmatai Tsaṉkurnatai̱ncha nuyá̱ wearkar jutairtiuk, 36 ántsaṉ Yus Aentsja̱i̱ Pujajai tusa nakumeamu páṉnasha tura nu awa̱tai̱ncha wariri̱ntiuk 37 nuyá̱ ekemárar nui̱ ekentrar tsáapin awajtai̱ aya kúriji̱a̱i̱ṉ najanamun núnisaṉ nui̱ takastintri̱ncha nuyá̱ ekemáktinniasha asuitin, 38 tura kuṉkuin aestai̱ kuriji̱a̱i̱ najanamu nuyá̱ ukattai̱ asuitincha tura áestutai̱ kuṉkuinniasha, nuyá̱ Yus Shiir Awajtai̱ Je̱a̱ wá̱i̱ti̱a̱i̱ri̱n ejatai̱ tarachin 39 núnisaṉ taṉku áestutai̱ yaṉkú jiruja̱i̱ najana neka núnin awantkamu tura wearkar júkitniuri̱ncha tura nui̱ takastintri̱ncha núnisaṉ nijiamatai̱ncha tura nu ekentai̱ri̱ncha 40 ántsaṉ á̱a̱ri̱ni̱ wénuitniuri̱ tarachniasha ukúatniuri̱ncha wiyaṉkencha núnisaṉ wá̱i̱ti̱a̱i̱ri̱n nenaatin tarachniasha tura ajintrukar neturtinniasha, ashí nui̱ Yus Shiir Awajtai̱ Je̱e̱n init iruniartatna nuna mash iwiarkar Israer shuar ikiankarmiayi. 41 Yusa Je̱e̱n takakmakur etsantáiri̱ṉkia awantár najanamu átatui. Tura Yúsnan pujurin Araun Yúsnan takarkur entsatái̱ núnisaṉ ni uchirí̱ Yúsnan takarkur entsatái̱sha ártatui. 42 Kame Uunt Yus Muisaisan timia ímiatrusaṉ Israer shuar ashí takatan umikiarmiayi. 43 Israer shuar túrawarmia nuna Muisais ashí iis Uunt Yus timia ímiatrusan túramun wáitkiamiayi. Nuní̱ túramun wainiak Muisais Israer shuaran péṉker pujutnum yumiṉkrarmiayi.