Umiktin Chicham Tias Akupkámu
5
1-6 Ashí Israer shuaran Muisais chicharainiak “Akupkámu umiktin chichaman wi tájarmena nu unuimiátrarum péṉker enentáimtusrum umirkatarum. Kame atumí aparí̱ji̱a̱i̱ṉkia chichamnaka najanachuiti. Atumji̱a̱i̱sha Urepnum chichamnaka najanamai. Paant iirmas chichartamkamarme túrasha átumka sapijmiakrum anturkachmarme. Túmakrumin atumniaka wi chichamnaka iniaṉkatmiajrume. Tura Uunt Yuska atumí Yusri̱ntji̱a̱i̱ Ejiptunam emetamu wáitkiatai pujarmin jí̱i̱rmiajrum nu Yúsketjai turamarme. 7 Tuma asamtai Uunt Yusai̱ya̱ṉka chíkich yuska takusairap. 8-10 Yakí̱ nayaimpiniam tura nuṉkasha núja̱i̱ṉchuka entsá init irunainia núnin warinkish najankarum enentáimtakrum tikishmátrairap. Warí Uunt Yuska chikichik Yusaiti tura akasmau Yus asa yajauch túramunka peṉké tsaṉkurchaiti. Antsu Ni chichame̱n umirainianka ti waitnenniuiti. 11 Uunt Yus atumí Yusri̱ naari̱ peṉké ántrarum pachikiairap. Kame Ni náari̱n ántar páchinia núnaka Uunt Yuska asuttsukka iniaisashtatui. 12-15 Kame Uunt Yus akupka asamtai aya sais tsawantchik takakmastarum. Antsu siati tsawantinkia Yusna ayamtai̱ tsawant asamtai ayampratniuitrume. Nu tsawantinkia yaaksha takakmaschatniuiti. Yajaya̱ aents niji̱a̱i̱ pujuiniasha tura taṉkusha núnisaṉ ashí ni shuari̱sha takakmaschartiniaiti. Nuyá̱ takarin áishmaṉ tura nuwa̱ áiniana nusha niji̱a̱i̱ métek ayamprartiniaiti. Warí Ejiptunam íniakur wáitkiatai pujuinian Uunt Yus ni kakarmari̱n iniakmas ji̱i̱rarmiania nuna enentáimtuiniak núnaka túrawartiniaiti. 16 Atumí aparí̱sha tura nukurí̱sha ti shiir enentáimtusrum arantúktiniaitrume. Nu túrakrumka nu nuṉkanmasha tí peṉker tura untsurí tsawant pujustatrume. 17-21 Maṉkartuawairap. Tsanirmawairap. Kasamkairap. Chíkich aents tsanumprurairap. Chíkich shuara nuwe̱ núja̱i̱nchuka warirí̱ṉsha ainia nu peṉké wakerutkairap. Jiin. 20:1-17 22 Kame naint tee ajasmanum núnisaṉ Israer shuar ántuiniamunam yuraṉminiam tura ji keamunam ajapén Uunt Yus kakantar patas chichatsuk nunak chichakmiayi. Tura jimiará kaya pakamámunam aar winia surusmai.
Israer Yusan ashamainiak Muisaisan ame áujsata tiarma
23-27 Kame Israer shuar naint ji keamunam Uunt Yusa chichame̱n antukar tura ni kakarmari̱ncha wáinkiar tí ashamkarmiayi. Tura írutkamu uuntri̱ armia nu Muisaisan tariar chicharainiak ‘¿Iisha yáitiaj Uunt Yus chichaamu ímia iik antukiatar iwiaaku pujutniusha? Tuma asamtai iikia kajinkiara̱i̱j ame Muisaisá Uunt Yuska áujsata. Túram ame Uunt Yusa chichame̱ṉka iini̱ṉkia etsertia. Nu túrawakmin iikia aya nu antukar umirkattaji’ tiármiayi.
28-31 Nuna tuíniakui Uunt Yussha antukmiayi. Tura Uunt Yus chichartak ‘Tuinia núnaka ashí antukjai túrasha nekas enentái̱ji̱a̱i̱ ashampruiniak ashí Wi akupkámu chichaman umirtuiniakka maak árainti. Túmainiakka yamaisha tura ukunmasha ni uchirí̱sha tuke péṉker pujusárainti. Túrasha waketkim chicharainiakum atumí je̱e̱ní̱ waketratarum tiartá. Túrasha ámeka ju̱i̱ṉ juaktá túrawakmin ashí akupkámu umiktin chichaman jintintrattajme. Amesha núnismek nu aents nuṉke̱n súsartatjana nui̱ waya̱war nérentin ajasár pujusársha péṉker enentáimtusar umirkarat ashí jintintrarta’ tímiayi Uunt Yus.
32-33 Tura Uunt Yusa chichame̱nka ishichkisha peṉké kajinmátkirap. Nu ashí umíakrumka nu nuṉkanam tuke péṉker untsurí tsawant pujustatrume.