Sumamtikin 9

Awimirík Sekimnun úunt akupin ajamu

1-6 Awimiríkkia Jirupáar yáunchuka Jeteun tutai uchirí̱yayi túrasha nekas nuwe̱ya̱nchu antsu nuwe̱a núnis armia nui̱ yajutmarmiayi. Tura Awimiríkkia ni nukurí̱ pépruri̱n Sekimnun we nuyá̱ aentsun chicharainiak “Wi akupin ajastaj winia yatsur chíkich nuwa̱nmaya̱ ainia nuka máwartai” tímiayi. Tura maṉkartin armia nuna akik ni yachi̱ sataintia armia nuna máwarat tusar Sekimnumia̱ aentska Paarpirítia je̱e̱ya̱n sataintia kuítian Awimiríkian súsarmiayi. Nuya̱ṉka ni aparí̱ Jirupáar pujuya nui̱ Úpranam wéar ni yachí̱ sataintia armia núnaka nú kayanmaṉ kajeṉkármiayi. Túrasha chikichik ni yachí̱ Jutam pisarmiayi.

Awimirík túrunatniun Jutam étserma

7-21 Tura Jutamka chíkich tsawant Jeresém nainnium waka Awimirík tura ashí aents nui̱ matsamármia nu antukarat tusa jú̱nis tímiayi. “Numi akupniúri̱n anaikiattsa pujuarmai. Émkaka uriwiu numin nuya̱ṉka ikiu numin tura amúamunmaṉka jaṉkin chicharainiak ii akupniúri̱ atá tiarmai. Túrasha chíkich numi arma nuka nakitrarmatai antsu jaṉki wi akupniúka atajai” timiai. Nuna ti Jutamka chichaak “Nú jaṉkikia Awimiríkiaiti. Tura anintruiniak atumsha Awimirík úunt akupin ánaiyakrum péṉker enentái̱ji̱a̱i̱ tura nekasa nuja̱i̱ tímiatrusrumkek anaikiaitrun. Warí Jirupáarka Matian aentsnumia̱ atumín uwemtikrattsa mantamnamnia ajachmaka tura atumsha Jirupáarsha núnisrumek ni shuari̱sha tímiatrusrumkek túraitrum” tímiayi.

Sekimnumia̱ aents Awimiríkian kajerkarma

22-25 Nuya̱ṉka Awimirík akupin ajas menaintiú uwí Israernum pujái̱ Awimiríknasha tura Sekimnumia̱ aentsnasha Yus kajernáimtikiarmiayi. Túrunamtai Sekimnumia̱ aents Awimiríkian kajerkar nakitrarmiayi. Kame Awimiríkkia Sekimnumia̱ aentsja̱i̱ tsaniṉkiar ni yachi̱ sataintia armia nuna máwaru ásarmatai nui̱ makuntrarat tusa túrunamiayi. Tura Sekimnumia̱ aentska naintia tsakari̱n aentsu matsasármiayi nuya̱ṉka ashí aents nuní̱ naṉkaamainiakui kasariarmiayi. Túmainiakui nuna Awimiríkian ujakármiayi. 26-29 Núnisaṉ Ipitia uchirí̱ Kaarsha Sekimnumia̱ aentsja̱i̱ tsaniṉkiarmiayi. Nuya̱ṉka úwan júukar wíniun najankar ni yusri̱ je̱e̱n namperan najanainiak yurumáwar umararmiayi tura Awimiríkian yajauchiniam yumiṉkrarmiayi. Nuyá̱ Kaar chichaak “Awimiríksha tura Sekimsha ¿warí ainia ii ni takarniúri̱ ártincha? Jirupáara^a uchirí̱ṉkia tura ni suntari̱ uuntri̱ Sapursha nekaska Sekima uuntri̱ Jamur ¿takarniúri̱nchuk árminiait?” tímiayi. 30-33 Tura Sapurka nuna antuk chichama ú̱saṉ Awimiríkian akuptak “Iwiarnatkam nákaram tsawa̱a̱kui káshik pépruka jatekta” tímiayi.

34-41 Nuyá̱ Awimiríkkia tímiatrusaṉ umik iwiarnatak u̱mprurar Sekiman nákakarmiayi. Nuyá̱ pepru wá̱i̱ti̱a̱i̱ri̱n Kaar pujusmiayi. Tumai̱ Awimirík ashí suntari̱ji̱a̱i̱ ú̱mprar matsatainia jíintrar wininian wáinkiarmiayi. Nuna wainiak Kaar Sapuran chicharuk “Aents wininian wainjiai” tímiayi. Tutai Sapur chicharuk “Auka naint ainia nuna aje̱tari̱ wainiainiakum tame” tutai ataksha Kaar chichaak “Tapurarétnumaani̱ aents wininiawai tura ensena numí nekatai̱ jintia nuní̱ suntar iruntraru wininiawai” tímiayi. Tutai nuya̱ṉka Sapur Káaran chicharuk “¿Urukamtai yamaisha tame enta áuchuk Awimiríksha warimpiait? ii ni takarniúri̱ ártincha tame yamaikia jiinkim mánaikta” tímiayi. Tutai Kaarsha Sekimnumia̱ aentsja̱i̱ jiintiurar Awimiríkji̱a̱i̱ mánaikiarmiayi. Túrasha Kaarka pisarmiayi núnisaṉ ti untsurí kajinkiarmiayi. Túrunamtai Awimiríkkia Arumanam juákmiayi tura Kaarka ni yachi̱ armia nuja̱i̱ Sekimnum pujusai tusar nuya̱ṉka Sapur ji̱i̱r akuprarmiayi.

Sekiman Awimirík émeseamu

42-45 Nuyá̱ kashí tsawantai̱ aents pépruri̱n ikiukiar jíintrarai tusar Awimiríkian ujakármiayi. Awimiríkkia nuna antuk suntari̱ji̱a̱i̱ ashintiuk aents péprunmaya̱ jiiniainiakui jatekármiayi. Tura takamtsuk tsawant mánaikiarmiayi túrasha aents jíintrarunka ashí kajeṉkarmiayi. Nuya̱ṉka péprunam utsanawar nui̱sha aentsnaka ashí amukármiayi tura pépruncha tsai̱ tsai̱ awajsar ween ukararmiayi.

46-49 Tura Sekimnumia̱ aents kumpin je̱a̱nam pujuarmia nuka nuna antukar ni yusri̱ Piritia je̱e̱ iwiarkar utúachmin awajsámuya nui̱ utsanawarmiayi. Nu ujakam Awimiríkkia Sarmun nainnium waka numí kanawe̱n tsupik yanakí̱ wéak ashí aents niji̱a̱i̱ pujuarmia nuna chicharainiak “Wi túramu wainkiarmena nu atumsha túratarum” tutai nisha tímiatrusaṉ túrawarmiayi. Túrawar ashinkiar Pirit yusa je̱e̱ iwiarkar utúachmin awajsámuya nui̱ irumprar takamtsuk ekemákarmiayi tura aents nui̱ matsamármia nuka ashí kajinkiarmiayi. Kame áishmaṉ nuwa̱ja̱i̱ irumpramka mir aents pujuiniachiawash.

Awimirík jakamu

50-57 Nuya̱ṉka Awimiríkkia Tépesa werí matsamtuk atá̱i̱ nérentin ajasmiayi. Nuna túramtai péprunmaya̱ nuwa̱sha áishmaṉsha tura uuntri̱ armia nuja̱i̱ péprunam kumpin je̱á̱ iwiarkar utúachmin awajsámuya nui̱ utsanawar wáitinkia epentrar je̱a̱ taṉkiri̱n aṉkantin amia nui̱ wákarmiayi. Nuya̱ṉka Awimiríkkia nuna werí ekemáktaj tusa wáitiri̱n weantan neketai̱ kayan nuwa̱ aju̱ntá tukú muuke̱n tsairamiayi. Nuya̱ṉka ni tantari̱n takurniuya nuna untsuk “nuwa̱ mámiayi tuna̱i̱j” mantuata tutai mámiayi tura nuna wáinkiar Israer shuarka ni je̱e̱ni̱ṉ waketrarmiayi. Nuja̱i̱ Awimiríknaka ni yachi̱n kajeṉkar aparí̱n itiurchat awajsámia núnisaṉ Yus nincha túramiayi. Núnisaṉ Sekimnumia̱ aentssha yajauchin túrawarmia nuja̱i̱ nisha makuntrarmiayi. Tura Jutam yumiṉmarmia nu yumiṉ jearáwarmiayi.