Piṉjiamín shuarja̱i̱ mesetan najanamu
(1) Mesetan urukamtai najanawarma
19
1-10 Nu tsawantinkia Israernumka akupniúka atsumiayi. Tura Riwí shuar Eprain nainnium pujá Piriṉnumia̱ nua̱ri̱ya núnis amia nuna nuatkamiayi. Túrasha nuwa̱ áishri̱n kajerak ikiuak aparí̱n waketki̱ pujusmiayi. Kame kuatru nantu naṉkaamasmatai ni takarniúri̱n tura jimiará umpurun jukí̱ ni nua̱ri̱n ataksha utittsa Piriṉnum wémiayi. Tura we̱a̱rí̱ṉkia tí waras ju̱i̱ pujusta tímiayi. Túrasha menaintiú tsawant naṉkaamasmatai Riwí shuarka ni nua̱ri̱n jukí̱ waketkitiaj takui̱ we̱a̱rí̱ ju̱ tsawantchik juaktá tusa juámtikiamiayi. Núnisaṉ seṉku tsawant jeamtaisha ataksha juámtikiattsa wakerimiayi túrasha waketkitniun nisha wakerimiayi.11-21 Nuya̱ṉka Piriṉnumia̱ jíinkiar kí̱akui̱ takarniúri̱nkia Jípiusnum kanartai tusa wakerimiayi túrasha Riwí shuarka Kawaanam Israer shuar matsatu asamtai tímianai jeatniun wakerimiayi. Tura Kawáa péprunam jeawar nui̱ pujusármiayi. Túrasha yaaksha itiaacharmiayi. Tumá pujuiniai̱ uunt weamsa takatrí̱ya̱ winis wáinkiar winia je̱a̱rui̱ kanartarum tusar awayá̱warmiayi. Nawe̱n nijiatrar ayurawar umpururi̱ncha ayurtuawarmiayi.
22-26 Tura kanú pujuiniai̱ yajauch áishmaṉ káutkar úuntan chicharainiak “Riwí shuar amasta ii wakeramu túratai” tusar searmiayi. Tuíniakui uunt chichaak “Antsu tíiniuka túrawairap antsu winia nawantrun tura Riwí shuara nuwe̱ya núnisa nuna amastajrume” tiármiayi. Túrasha nu shuarka peṉké anticharmiayi. Túmainiakui Riwí shuar ni nua̱ri̱ya núnis amia nuna achik a̱a̱ jí̱i̱kmiayi. Túramtai nu áishmaṉka tí natsanmainia nuna túrawarmiayi. Túramu asa tsawa̱a̱kui jakamiayi.
27-30 Tura káshik wáitin urái iyaj tukamá jaka tepan wáinkiarmiayi. Túrunamtai Riwí shuarka umpururi̱n patak je̱e̱ní̱ jukimiayi. Tura je̱e̱ní̱ jeá kuchiin achik ni nua̱ri̱ya núnisauyania nuna tsupir tuse awajsámiayi tura Israer shuar tuse wea armia nuna aṉkant aṉkant akuptúkarmiayi. Tura nuna wáinkiar jú̱tikiamu peṉké wáinchaitji tiar itiurkattajia tusar anintrúsarmiayi.