Tawit Amarík aentsun yapajkiámu
30
1-8 Tawit tura áishmaṉ niin nétaku armia nui̱m Sekraknum menaintiú tsawantin jeawarmiayi tura pépruka ekemákman wáinkiarmiayi. Tura nuwa̱ncha uchincha tura ashí warirí̱ armia núnaka Amarík aents achir yarurkarmiayi. Nuyá̱ Tawit tura niji̱a̱i̱ pujuarmia nuja̱i̱ kakantar útiarmiayi. Ántsaṉ péprunmaya aents Tawitian kayaja̱i̱ tukurtai tu enentáimsarmiayi. Túrasha Tawitkia ni Uunt Yusri̱n tuke kaka̱rmiayi. Nuyá̱ Tawit Yúsnan pujurniun Awiatáran chicharuk “Waitneasam awaṉkém itiartitia” tímiayi. Tura Tawit Uunt Yusan ujak chicharuk “¿Ju̱ aentsu pataatukartatjak túran amayá̱ṉminkiaitiaj?” takui̱ Uunt Yus chicharuk “Pataastukta, tí nekas amayá̱ṉtatme túram achirma ainia nu aṉkant awajsarta” tímiayi.9-19 Nuiṉkia nuní̱ tutai Tawit saisiantu áishmaṉ niniu armia nuja̱i̱ weriarmiayi. Túrawar Wisur ashintsanam jearmiayi tura tusiantu áishmaṉ pimpikiar juákarmiayi. Nuyá̱ ukunam Ejiptunmaya̱ áishmaṉ jaa ikiukmian wáinkiarmiayi. Túrawar Tawitiai̱ júkiar yurumkan súsarmiayi. Nui̱ Tawit chicharuk “¿Amesha yáitiam?” tusa inintrúsmiayi. “¿Amesha tuya̱mpaitiam?” tutai chichaak “Wikia Ejiptunmaya̱ nátsaitjiai, Amarík aentsun takarniuitjiai. Wi menaintiú tsawant jaa pujakui winia úuntur ikiurkimiai. Ii Nekep nuṉka jatekármaji túrar Sekrak pépruka ekemákmaji” tímiayi. Nuna takui̱ Tawit chicharuk “¿Ju̱ aents ame yaruakminkiaitiam?” tutai chicharuk “Yus íimmianum máshtatjame tura ame úuntrumin uwejé̱ncha íktuan iniaisashtatjame turuttia. Túrutkumin jú̱ aentsnaka yaruaktatjai” tímiayi. Nu Ejiptunmaya̱ aents Tawitniasha ni suntari̱ji̱a̱i̱ júkiaram aentsnasha nuyá̱ ata̱rmancha namperan pujuráinian wáinkiarmiayi. Tura Tawitkia tsawa̱tsa̱i̱ṉ jatekratkamuk kashin ki̱arai̱ umirmiayi. Túrak chikichkiṉkisha ipisrachmiayi antsu aya kamiyunam ekemkarmia nuke kuatrusiántu natsa pisarar uwemprarmiayi. Tura Tawitkia Amarík aents achirar yaruakarmanka aṉkant awajsarmiayi. Núnisaṉ nuwa̱ncha uchincha tura nuwa̱ch armia nusha nuyá̱ kasamkámu armia nusha ántsaṉ wariṉkísh uchich tura úuntash iruniarmia nuka peṉké táaschamiayi antsu Tawitkia ashí awakearmiayi. Nuní̱ tura Tawit ní nua̱ri̱ncha aṉkant awajsarmiayi.
Ata̱rman Tawit akantrámu
20-31 Tura wakettsar tusiantu áishmaṉ ti pimpikiar wétinian tujintkiar juákarmia nui̱ jeawarmiayi. Tura ashí yajauch enentáimin aents Tawitiai̱ nétaku armia nu chichainiak “Winicharu ásar Amarík aents apapékar atantrámu ainia ju̱ka sunascharti. Antsu aṉkant aṉkant aya ní nuwe̱nak uchirí̱ji̱a̱i̱ júkiar waketrarti” tiármiayi. Tuíniakui Tawit chicharainiak “Winia yatsuru, Uunt Yus amasma núja̱i̱ṉkia núninkia túrawairap. Warí, Níṉkichuk waitnentrampraitiajⁱ ii nemasri̱ncha ii uwejé̱e̱n íkturmascharjik. Tuma asamtai mesetnum wéarusha tura wariṉkísha wáinkiatniun juákarusha ata̱rmanka métek nakarmán júkiartiniaiti” tímiayi. Nu túrunamtai Israernumka yamaiya̱ ju̱i̱sha tuke akupkámu umiktinian umikiarti tusa Tawit akupkámun najanamiayi. Tura Tawit Sekraknum jeamia nui̱ ata̱rman nakar ni amikri̱ Jutanmaya̱ uuntri̱ armia nuna tura Tawitji̱a̱i̱ áishmaṉ irunar tui̱ wekasarmia tímianaisha akuptúrarmiayi.