Tawit Israernum úunt akupin ajasma
5
Ukunam ashí Israer shuar arakaani̱ matsamiarmia nu weanmaya̱ Eprun péprunam Tawit pujumia nui̱ weriar chicharainiak “Iisha Ame shuarketji. 2 Kame yáunchusha Saurka ii úunt akupniuri̱ ai̱ṉ iin Israer shuartin mesetnum yaruakmesha amek ikianniuyame. Túrasha nuna naṉkaamas áminkia Uunt Yus chichartamuk ‘Murikiu wáinin murikiun wainnia nútiksam Israera shuari̱ṉkia wáinkiartatme. Tura Israer shuara úunt akupniuri̱ átatme’ turammiayi” tiármiayi. 3 Israer shuarnum uunt pujuarmia nu akupin pujamu Eprunnum wéarmiayi. Nui̱ úunt akupin Tawit Uunt Yus íimmianum Israer shuar ni úuntri̱ji̱a̱i̱ chichaman najanamiayi. Tura Tawitian Israera úunt akupniuri̱ atí tusa Israernumia̱ uunt armia nu muuknum asuitin ukatkar anaikiarmiayi. 4 Tawitian anaikiarmia nuiṉkia traintia uwí takakuyayi, tura anaikiarmia nuya̱ṉka kuaraintia uwí akupin pujusmiayi. 5 Tura Eprunnum pujus siati uwí nuyá̱ sais nantu Jutanam matsamiarmia nunasha akupkámiayi. Tura ukunam Jerusaréṉnum pujus traintitráis uwí Jutanmasha tura Israer nuṉkanmasha matsamiarmia nunasha akupkarmiayi. 6 Nuiṉkia Jípius aents nu nuṉkanam pujuarmia nuna nupetkatai tusar úunt akupin ni shuari̱ji̱a̱i̱ Jerusaréṉnum wéarmiayi. Kame nu aentssha Tawitian chicharainiak “Ámeka iini̱ṉkia waya̱chminiaitme. Warí shutuapsha tura kusurúsha Tawit ji̱i̱ki̱ akuptámkamniaiti” turamartatui. (Nuní̱ tuiniakui “Tawitkia waya̱chminiaiti” ju̱na taku tawai.) 7 Nu ai̱ṉ Tawitkia Seuna pepru wenuke̱ iwiartukar utúachmin awajsamua nuna nupetak ata̱i̱miayi. Nuka yamaikia Tawitia Pépruri̱ tutainti.a 8 Kame nu tsawantai̱ Tawit chichaak “Mash Jípius aentsun maatai tusar weruinia nuka entsá wá̱a̱ri̱ni̱ utuawar shutuapnasha tura kusurúncha Tawit nakitiáinia núnaka máwarti” tímiayi. Nu asamtai shutuapsha tura kusurúsha je̱a̱nka waya̱charti tunamiayi.Suntar matsamtai̱ Seúnan Tawit akintiukma
9 Tawitkia suntara matsamtairi̱n pujusmiayi tura Tawitia Pépruri̱ tu anaikiamiayi. Miru kumpinian najana nuyá̱ juarki̱ suntara matsamtairi̱ncha wenuí mash eṉkekmiayi.
10 Tura Ashí Akupin Uunt Yusa nu Tawitniaka pujurma asa nú naṉkaamas kakaram ajakí̱ wémiayi.
Tawit ni je̱e̱n je̱a̱mma
11 Nuya̱ṉka Tírunmaya̱ úunt akupin Jiram aents chichaman etserin armia nuna Tawitian akuptúrmiayi. Núnisaṉ sétur numincha tura je̱a̱ je̱a̱mniuncha nuyá̱ wenuke̱ najatkatniunka kayá iwiarniun akuptúram Tawitia je̱e̱n je̱a̱riármiayi. 12 Túrunamtai Israernum úunt akupin átatme Tawitian Uunt Yus timia nuna umikiun nekaamiayi tura ni shuari̱n Israer shuaran aneak ni akupeamuri̱ncha páantin naat awajtúsmiayi.
Tawitia uchirí̱ Jerusaréṉnum akiiniawaru
13 Tawitkia Eprunnumia̱ taasha ni nuwe̱ya núnis árat tusa nuwa̱n núna nukap Jerusaréṉnumia̱n ikianawarmiayi. Túram Tawitia uchirí̱sha tura nawantri̱sha núna nukap akiinkiarmiayi. 14 Tawitia uchirí̱ Jerusaréṉnum akiiniawarmia nuna náari̱ṉkia ju̱ áiniawai Samúa, Supap, Natan, Saramúṉ 15 Ipjar, Irishúa, Nejep, Japía, 16 Irisáma, Iriata, Iripirít ármiayi.
Tawit Jiristíun nupetkamu
17 Tawitniaka asuitin ukatkar Israernum úunt akupin awajsarai táman Jiristíanmaya̱ aents antukarmiayi. Túrawar Tawit e̱a̱ktai tusar Jiristíanmaya̱ aents ashí káunkarmiayi. Tawitkia nuna antuk wenuke̱ iwiartukar utúachmin awajsámunam akaikímiayi. 18 Jiristíanmaya̱ aentska káunkar Repaimia pakarí̱n enetkar matsamkarmiayi. 19 Nuyá̱ Tawit Uunt Yusan anintrak “¿Jiristíanmaya̱ja̱i̱ mánaiktaj tusan waruktatjak? tura ¿winia uwejruí̱ íktursam iniaitiúrsattamek?” tímiayi. Tutai Uunt Yus Tawitian chicharuk “Warukta, warí, nekas Jiristíanmaya̱nka ame uwejmíin íktusan iniaitiústatjame” tímiayi. 20 Tura Tawitkia Paarpirasímnum jeamiayi tura nui̱ Tawit nupetmakmiayi. Nuya̱ṉka chichaak “Uunt Yus kakarmaja̱i̱ wayá̱ entsa emesmana tímiatrus winia nemasrunka wisha íimiai̱ṉ emeskayi” tímiayi. Tuma asamtai nu nuṉka náari̱nkia Paar Pirasím tu anaikiamiayi. 21 Kame Jiristíanmaya̱ aentska ní yusri̱ nakumkar najankamu armia nuna utsaṉkar nui̱ ikiukiármiayi tura Tawitkia ni aentsri̱ji̱a̱i̱ nuna yaruak áeskarmiayi. 22 Tura Jiristíanmaya̱ aentska waketrar káunkar Repaimia pakarí̱n enetak ataksha matsamkarmiayi. 23 Tura Tawit Uunt Yusan anintrúsmiayi túram chicharuk “Nákaka werip antsu ukunmaani̱ téntakam wawa írunna nuní̱ naka jeariarta. 24 Tura untsurí aents ashinma núnin wawá nuke̱ antukmeka antsu nui̱ṉkia kakaram ajasam jatékárta. Warí Jiristíanmaya̱ suntaran nupetkataj tusa Uunt Yus amiiya̱ṉka eem jiinkittiawai.” 25 Kame Tawit túrata tusa Uunt Yus akupkámia núnaka tímiatrusaṉ umikmiayi. Tuma asa Jiristíanmaya̱ aentsnaka nupetak Képanmaya̱ juárkiṉ Jesernum wá̱i̱ti̱a̱i̱ya̱ tímianai ejemiayi.