Ístras
aarma
Akupin Siru Yusa Je̱e̱ ataksha je̱a̱mtiarum timia
1
Pirsia nuṉkanam Siru úunt akupin náamak chikichik uwí pujamunam Jirimíasai̱ni̱ Uunt Yusa chichame̱ etserkamu uminkiati tusa Uunt Yus Sírun enentáimtikram Síruka chíchamja̱i̱ṉsha tura papiniumsha aar akupeak chichaak 2 “Wi Siru Pírsianmaya̱ úunt akupin asan ju̱ chichamam paant étsereajai. Nayaimpinmaya̱ Uunt Yus winia ashí nuṉkanam akupkatniun apujtusuiti tura Jutá nuṉkanam Jerusaréṉnum Uunt Yusa Je̱e̱ je̱a̱mtinian anaitiukuiti. Isa. 44:28 3 Kame atum shuar Yusna árumna nútirmiṉkia Yus pujurtamprume. Jutá nuṉkanam Jerusaréṉnum werum Israer shuara Uunt Yusri̱ Je̱e̱ je̱a̱mtarum. Warí níyaiti Jerusaréṉnum pujana nu Yus. 4 Tura ashí nuṉkanam tuke pujutiram atumí nuṉke̱ya̱ waketainia nuka kuitji̱a̱i̱, kuriji̱a̱i̱ tura warirum takakrumna nuja̱i̱ nuyá̱ waakaja̱i̱sha yaiṉtarum. Nu arantcha wakeruiniakka Yusa Je̱e̱ Jerusaréṉnum je̱a̱mtinian ni enentái̱ji̱a̱i̱ṉ súsarti” tímiayi.5 Nuya̱ṉka Jutá tura Piṉjiamín weanmaya̱ uuntri̱ armia nuna núnisaṉ Yúsnan pujurin armia nunasha nuyá̱ Riwí shuarnasha Yus Jerusaréṉnum Uunt Yusa Je̱e̱ je̱a̱mtinian enentáimtikraram waketkitiai tusar iwiarnararmiayi. Jrm. 25:11; 29:10 6 Tura ímiatrusaṉ ashí pujuarmia nu Israer shuaran wariṉkísha kuitji̱a̱i̱ kuriji̱a̱i̱ ni waakari̱ji̱a̱i̱sha núnisaṉ ni warirí̱ kuitji̱a̱i̱ tura kuriji̱a̱i̱ najanamu ainia nunasha súsar nu arant ni wakeraka ni enentái̱ji̱a̱i̱ṉsha Yúsnaka súsarmiayi. 7 Núnisaṉ úunt akupin Napukutunusúr Jerusaréṉnumia̱ Uunt Yusa Je̱e̱ya̱n Yúsnan takarkur takakmatai̱n yaruak ni najanamu yusri̱ je̱e̱n ikiusármia nuna úunt akupin Siru jusa ashí awakearmiayi. 8 Tura Pírsianmaya̱ úunt akupin Siru kuitia juuya nuna Mitritiátisan chicharuk “Jutanmaya̱ anaikiamu Sespasár mash nekapmatram susata” tímiayi. 9 Tura ju̱ áiniawai, 30 piniṉ kúriji̱a̱i̱ṉ najanamu, nuyá̱ 1.000 piniṉkia kuit jiruja̱i̱ najanamu núnisaṉ 29 kuchí. 10 Nu arantcha 30 tsapa kúriji̱a̱i̱ṉ najanamu núnisaṉ 410 tsápaka jirú kuitia ániuja̱i̱ najanamu nuyá̱ chíkich takatai̱ arma nuka 1.000 armai. 11 Kame ashí Yúsnan takarkur takakmatai̱ kuriji̱a̱i̱ tura kuitji̱a̱i̱ najankamu armia nuka 5.400 ármiayi. Tura ashí achirar yaruakmaja̱i̱ Sespasár Papirúnianmaya̱ Jerusaréṉnum waketkiarmiayi.