Juup enentáimmian kajinmatkichma
13
“Kame jú̱naka ashí winia jí̱ruja̱i̱sha wáinkiaitjiaitura antukan nékaitjiai.
2 Wisha átum nékarmena núnisnak nékajai,
átumka wíniaka nékachua núnisrumek enentáimturum.
3 Antsu Ashí Tujintkiachu Yusja̱i̱ chichasaintjiai
túran anturnaikiatniun wakerajai.
4 Warí átumka atumí wáitrutai̱ri̱ji̱a̱i̱n nekasa núja̱i̱sha ú̱maitrume.
Tuma asarum átumka ántar tsuákratniuitrume.
5 Tura átum títrumna nu mash initiusrumka
neka núnis áintrume.
6 Wi enentáimiaj ju̱na takui̱
waitneasrum esetrarum anturtuktarum.
7 Atumí waitri̱ji̱a̱i̱ Yus ¿ayamprarmek?
tura wait chichamja̱i̱ anaṉkamniaitji ¿tárumek?
8 Atumsha shuar akanearum nuja̱i̱
Yus yaya̱krum ¿ayamprarmek?
9 Yus nekarmawitkiurmiṉkia shiir túrakrum péṉker ainti.
Tura shuar wishikratniua nútiksarum Yus ¿wishikramniakaitrum?
10 Átum ú̱krum aents ántrarum akantrármeka
Yuska ashí iimiainiamunam iniakturmasartatui.
11 Kame ti uunta nu ashamkam sapijmiaktatrume.
Kame atumí úuntri̱ya̱ awakmaku ajatin enentáimsairap.
Warí atumíṉkia tí tsuumai̱ awajnásrum nekaprattarme.
12 Atumín chichakmari̱sha ántar ásar yuṉkunmiji̱a̱i̱ métek áiniawai.
Tura ayamprumatairmesha nuweja̱i̱ wenuir ayamprumaktinia núnisaiti.
13 Yamaikia wi chichaktatjai aṉkant initiustarum
túramtai warí naṉkatustata nu naṉkatusti.
14 Takamtsuk aya̱shtiuk tsaṉkamatkattajai
tura winia iwiaakmarnasha wiki sumamattajai.
15 Mántakuisha Níniak nákastatjai.
Tura wi túramurnasha nákak chichamprumaktatjai.
16 Ju̱sha núniskeash uwemtikrurat.
Warí Yusan umircha ainia nuka Ni pujamunmaṉka waya̱chminiaiti.
17 Péṉker esetrarum antuktarum,
wi enentáimmiarun paant awajtústatjarmena nu.
18 Tura atumín wi paant awajtúsmaka
atumsha nekasaiti turuttiattrume.
19 Urukamtai chikitcha awajirum
túrutkuiṉkia tákamtak jákaintjiai.
20 Uunt Yusru jímiara ju̱ka tsaṉkatrukaip
nuiṉkia amiiya̱ṉka ú̱mkashtatjai.
21 Asutiam nuka iniaitiusta
nu arant asutiakmeka sapijmiamtikrukaim.
22 Ame untsurkata wi ái̱ktajme
nuíchuka wi chichakmatai ame ái̱rkata.
23 Winia tunaarusha tura yajauch túramur ¿urutmá ainia?
Kame winia tunaarusha tura yajauchirsha túa ainia nu paant awajtúrsata.
24 ¿Warí urukamtai ú̱mprutam túram
ame nemasrumea áitkiaram?
25 ¿Nuka kaaru nase umpuimiu yakí̱ nanatua nu tsáirtatmek
tura tsuat kaarua nusha apapékaintmek?
26 Wíniaka sumamtikruam yapá nupa̱ nuní̱ nekapran kúntuts tura wáitsatin chicham áatrurume.
Túram wi natsa pujusan yajauch túrutai̱nium wáitkiarame.
27 Ashí wekaamur wáinniuitme.
Nu arant winia nawersha numiji̱a̱i̱ chanuntruitme.
Tura winia naweru pakarí̱ṉkia téntatrukume.
28 Tuma asa wikia entsa nuapnum uwamu amúana
tura pushin ka̱ya̱ yúana núnisaitjiai”
Juup tímiayi Uunt Yusan.