Uunt Yus Júupan chicharma
41
Riwiatán, entsaya̱ uunt yajasma, kaníatsa ániua nu tsauja̱i̱ ¿japikminkiaitiamtúram ni iniai̱n naekja̱i̱ jiṉkiam emetamniakaitiam?
2 ¿Núnismek nuji̱niam jiim chapikji̱a̱i̱ jiṉkiamniakaitiam
tura jaṉke̱nam weakminkiaitiam?
3 ¿Nuní̱ túram ámin untsurí seamun seatmamniakait
tura shiir chichamja̱i̱ áujtamsattawak?
4 ‘Wi iwiaakajna ju̱ya̱ṉka ámiji̱a̱i̱ chichaman najanan
ame takarniúram atajai’ ¿títinian jeawak?
5 ¿Tura chiṉkichia nútiksam niji̱a̱i̱ nakurúsminkiaitiam
tura ame nawantrumi wasurtairi̱ awajsámniakaitiam?
6 Núnisaṉ ni namaṉké̱ncha namakan achin súruinia ¿áitkiamniakait?
¿Surincha ni namaṉke̱n ajamnaisamniak ainia?
7 ¿Tura kátsuram jiru ajaṉkémprar najanamuja̱i̱ nuapnum ijium uyu̱amniakaitiam,
nuyá̱ ni muuke̱ncha naṉkiji̱a̱i̱ ijiumniakaitiam?
8 Núnismek uwejmiji̱a̱i̱ takasa iyakmeka mesetnum pujá aan
enentáimpram atakka peṉké túrashtatme.
9 Nui̱ṉkia túrataj tu enentáimsamuka ántraiti.
Warí, Riwiatán entsaya̱ yajasma aents wáinkiarka aya íisaraṉ maiyái ashiniak inianmin áiniawai.
10 Náṉkamas aents nuna weantichuitkiuṉka
¿yaki Winiasha naka wajatrusaint?
11 Wi nin awaṉtitin ¿ya emka Winia surusuit?
¿Warí, ashí nayaimpinmasha nuṉká irunainia nusha Wíniachuk ainia?
12 Riwiatán urukuit nuna kakarmari̱ncha,
shíirmachin najanamajna nunasha ámin ujaktatjame.
13 ¿Yaki nuapé̱ jiruja̱i̱ méteknasha pakakaint
tura yaki nuapé̱ jiru tuupa ímianuncha weantúkaint?
14 ¿Yaki iwiaṉᵏⁱ íisaint,
nai̱ imiá tsuumainniasha?
15 Tuntupnumsha ni saepe̱ ti pipis akujnaira ásarmatai
nuja̱i̱ ti naṉkamantu enentáimtumawiti.
16 Ni saepe̱sha kú̱jaru ásarmatai
nasesha waya̱chminiaiti.
17 Núnisaṉ saepe̱sha chíkich saepe̱ja̱i̱ achimpra asa
peṉké kanakchamnia áiniawai.
18 Ni jachitkiuṉka peetua áitkiawiti.
Ji̱ṉkia etsa̱ jíiniuk kapan awajna ániuiti.
19 Tura wene̱ya̱ ji keak tsákir awajniuiti.
20 Ni nuji̱ya̱ mukuint jíiniuk
ichiṉnanam páinkiamu kuá ímianu mukuintiniaiti.
21 Ni mayatmari̱sha ji keek kaí̱rmamtikniuiti.
Tuma asa ni wene̱nkia ji kéenaiti.
22 Ni kakarmari̱sha kuntuje̱n awai.
Tuma asamtai íisrik mayai̱ ashiṉkiamniaiti.
23 Namaṉke̱sha ti katsurmaiti.
Warinkísh waintiúachminiaiti.
Ímiatrusar najanamu asa muchitkiusha namaṉke̱n umutchaiti.
24 Enentáimtairi̱ṉkia kaya núnisaiti,
nekaska neketai̱ kaya wakenmari̱ katsurma ímianuiti.
25 Ashí kakaram ainia nu achiktaj tuíniayat
ni nantaakuiṉkia sapijmiainiak páchim enentáimiainiawai.
26 Tura puya̱ja̱i̱sha, naṉkisha,
tsentsaṉkaja̱i̱sha peṉké máchminiaiti.
27 Níji̱a̱i̱ṉkia jirusha tsuata áintsaiti
núnisaṉ yaṉkú jirusha numi mamurua núnisaiti.
28 Naṉkisha niṉkia ipiseatsui
tura kaya naṉkíamsha tsuat naṉkíatniua áintsaiti.
29 Níji̱a̱i̱nkia ajintrutai̱ji̱a̱i̱ awatmiasha pintiuja̱i̱ awatmia núnis nekapeawai
tura tantar tantan ajakmataisha wishikiawai.
30 Tura netsepnumia̱ saepe̱nka atsakamua ímiatrus asar
japinki̱ wéakka kuchanka urar ikiuawai.
31 Entsá kunarí̱ṉkia ichiṉnanam kuá tímiatikiak téter awajeak wainchi péper awajeawai.
32 Tura wéakka ukunmaani̱ṉkia entsaṉka sauur awajeak tsáapin awajeawai.
Nuyá̱ entsá kunarí̱ṉkia jeempée pujua nútikiawai.
33 Nuṉkaṉka niji̱a̱i̱ métek jú̱nis sapijtichu najanamuka peṉké atsawai.
34 Yajasma ti kajen ainia núnasha wajatui,
tuma asa ashí yajasman úuntri̱nti” Uunt Yus Júupan tímiayi.