Ashí najanin Yus shiir awajsatin
33
Maa péṉker túrintirmeka Uunt Yusai̱ warastarum.Naka wekain ainia nuna shiir awajmari̱ṉkia nekas shíirmaiti.
2 Ke̱e̱r tuntuiyarum Uunt Yus yumiṉsatai
tura arpa neturmari̱ tias takakna nuja̱i̱ kantampruátarum.
3 Warasa shiir enentáimprarum neturmari̱ túntuiyakrum
yamaram kanta kantampruátarum.
4 Uunt Yusa chichame̱ṉka nákaiti.
Ashí Ni takatri̱ najanamu ainia nuka tímiatrusaṉ najanamu áiniawai.
5 Niṉkia nekasa nuja̱i̱ métek túrana núnaka tura naka túrin ainia nunasha aneawai.
Uunt Yusa waitnenkartutairi̱ṉkia nuṉká piákuiti.
6 Uunt Yuska aya chichame̱ja̱i̱ṉ nayaimpinkia najankarmiayi.
Ni wene̱ja̱i̱ umpuí Ni yáari̱n nekapmarchamniaitiatar ashí najankarmiayi.
7 Nayantsa entsari̱ṉkia irumpratniua nútikias íruawai
tura nayantsa kunarí̱ṉkia ni pujutái̱ri̱ni̱ṉ ikiuawai.
8 Ashí nuṉka Uunt Yusnaka ashamkarti.
Ashí nuṉká matsatrumna nú aentstirmeka ashamakrum tákeer ajatarum.
9 Warí Ni chichakmatai najanakarmai.
Ni chichakmaja̱i̱ iruniarmai.
10 Uunt Yus uunt nuṉka mátsatka ainia nuna jintíamuri̱n peṉké ántar awajtúsuiti
núnisaṉ aents niní̱ enentáimtumatairi̱ya nunasha Uunt Yus emestukaruiti.
11 Uunt Yusa jintinkratmari̱ṉkia tuke iniaitsuk imiá nekas ártatui.
Núnisaṉ Ni enentái̱ji̱a̱i̱ enentáimmiaka ashí atumí uchirí̱ṉsha tura tiraṉki̱ṉsha nuyá̱ tiraṉmia ímianaisha ártatui.
12 Uunt nuṉka mátsatka ainia nuna Yusri̱ Úunt Yusaitkiuiṉkia
nu shuar Níniua nútikias achikma nuka tuke péṉkeran nekapsar
péṉker yumiṉkramuja̱i̱ shiir enentáimsamnia ártatui.
13 Uunt Yuska nayaimpinmaya̱n iimiui
tura aentsu uchirí̱ncha ashí iyawai.
14 Ashí nuṉka matsatainia núnaka
Ni pujutái̱ri̱ya̱ iyawai.
15 Ashí Ni enentái̱n najatawaru asa
ashí Ni najankamuri̱nkia nékawai.
16 Úunt akupniuka untsurí suntarja̱i̱sha uwemchaiti
núnisaṉ kakarma nuka ti kakarmaitiat niṉki pisarchamniaiti.
17 Kawaisha nupetmaktinniumka ántraiti.
Ti kakarmaitiat niji̱a̱i̱ uwemprachminiaiti.
18 Uunt Yusa ji̱ṉkia Nin ashamainia nuna
tura Ni waitnenkartutairi̱n nákainia nunasha wainiainiawai.
19 Tuma asa jatainmaya̱ ni wakaní̱n uwemtikrattsa
tura tsukaisha iwiaakman susataj tusa túriniaiti.
20 Ii wakaní̱nkia Uunt Yusan nákawai.
Iin yáintmauka tura ii tantari̱ṉkia Níyaiti.
21 Tuma asamtai ii enentáiṉkia Nin waraawai,
warí Ni naari̱ tunaari̱ncha nu enentáimtiniaitji.
22 Maa Uunt Yusá iiní̱ Ame waitnenkartutairam atí,
Amiin nákajnia nuja̱i̱ métek.