Yus aentsun sumamtikiawartatui
Asap kantamámu
50
Najankamu yus ainia nuna Uunt Yusri̱ Yus chichakuititura etsa̱ jiini̱ akaana ímianai pujuinia nuyá̱ aentsun irur ujakáruiti.
2 Seúnnumia̱n Yus tsáapin ajasmiayi,
shíirmach pepru tí peṉker asamtai.
3 Kame ii Yusri̱ winiak tákamtak winishtatui,
ji áeskartua amukar tuke winiana tura kakaram naseja̱i̱ winitniuiti.
4 Nayaimpinmaya̱ncha tura nuṉka pujuinia nunasha ujawai
tura niniu ainia nuna sumamtikiawartatui.
5 Winia árumna nu iruntratarum
núnisaṉ wiji̱a̱i̱ chichaman najanawar ni aya̱shi̱n íktursarma nútiram iruntratarum.
6 Yuska sumamtikniuiti,
tuma asamtai nayaimpikia Yusa péṉkeri̱n paant awajtawai. (Séraj)
7 Tuma asamtai chichastatjai, Israerá antukta, atumín paant ujaktatjarme.
Wikia atumí Yusri̱ntji̱a̱i̱ Úunt Yusaitjiana nuitjiai.
8 Atumí taṉkuri̱ tuke tsawant áestureakmeka
núnisaṉ atumí taṉkuri̱ takamtsuk surarmena nuja̱i̱ tátsujrume.
9 Atumí waakari̱ áishmaṉchincha achikchattajai
núnisnak chipiu áishmaṉkach wenuknum eṉketna nunasha seatsjarme.
10 Tura ashí yajasma kampunniunmaya̱ ainia nuka winia áiniawai
núnisaṉ yajasma nekapmarchamnia naint irunainiawai.
11 Núnisnak nanamtin naint irunainiana nunasha nékajai
tura kampunniunam yajasma muchitiainia nuka Wíniaiti.
12 Kame wi tsukamaknaka áminkia amaschaintjiame.
Warí núṉkaka Wíniaiti, kame nuṉká írunna nuka ashí winia áiniawai.
13 ¿Kame Wi waaka namaṉke̱n yuámniakaitiaj
núnisnak chipiu numpe̱ncha umarminkiaitiaj?
14 Antsu namaṉ aesam súamna núnisam Yus yumiṉsam shiir awajsata.
Núnisam imiá Naṉkamantu Yus anajmatramna nu nekas umirkam susata.
15 Itiurchat pujakum untsurkata.
Túrutawakminkia uwemtikrattajme. Tura ámeka shiir awajtústatme.
16 Túrasha Yuska yajauch aentsun jú̱nis chicharui
“¿Wi akupkámusha warí amesha íistiniaitiam
tura Wi aentsja̱i̱ chícham najanamusha warí amesha áujmatsatniuitiam?
17 Kame Wikia jintintiátniun wakerimjiame túramaitiatam winia chichamur anturtsuk nakitniuitme.
Kame ámeka jintintiataj támaitiatam peṉké anturtatsme.
18 Tura kasasha shiir awajeame tura enentáimtiniaitme.
Núnismek tsanirma ainia núja̱i̱sha iruneame.
19 Nuyá̱ wenumji̱a̱i̱ tura iniaimiji̱a̱i̱ṉkia wáitriniaitme.
20 Tura pujusam ame írutramuram áujmatme
núnismek ame yatsuchirmek kajerame.
21 Kame ashí jú̱ túrashtin túramame túrasha wikia pachischamjame.
Tura ámeka wiya núniniaiti turutmiashum.
Túrasha yamaikia nekak tusan chichareakun paant iniaktustatjame” tawai.
22 Yúsnan kajinmatainia nútiram antuktarum núja̱i̱nchuka tsai̱ tsai̱ awajtámsamniaiti.
Túrutmamtai yaki uwemtikramprat.
23 Winia kuṉkuinian áestureana núnis nekas enentáimias kantamprútaṉka shiir awajtawai.
Tura shuar eseer wekaakka nin Yusai̱ uwemtikramun paant iniaktustatjai.