Pataaturainia nuyá̱ aṉkant awajtúsat tusar seamu
Ju̱ yamaram kanta kantamtikniun áatar súsaiti. Nusha kanta “Emestukaip” tusar kantamámua nuja̱i̱ métek nakumsar kantamátniuiti. Tawit Sáurai̱ya̱ pisar wá̱a̱nam pujus jú̱ kantan áaruiti.a
57
Maa Yusá waitnentrurtanekas winia waitnentrurta.
Warí wikia Ámin nekas enentáimtajme
tuma asam atash uchirí̱n wear etektus pujurna áitkiasam pujurtakmin itiurchat naṉkaamam Ame nanaprumi ejetarmin ejamkattajai.
2 Ashí Naṉkamantu Yusan tura winia waitnentrin Yusan untsuktatjai.
3 Yajauch chichartuiniak apapétuk wáitkiarainia nuyá̱ Yus nayaimpinmaya̱ uwemtikrurtatui. (Séraj)
Yus Ni waitnenkartutairi̱n tura nekasa nuna akuptúrkattawai.
4 Winia iwiaakmarka úunt ya̱wa̱ riún írunna núninnium pujawai. Nu yukartin ainia nui̱ apujsamuitjiai.
Kame aentsu nai̱ṉkia tura tíshimkiunam eketkar ekentai̱ naṉkia núnin áiniawai. Núnisaṉ ni iniai̱ṉkia puyá̱ atsakamua núnisaiti.
5 Nayaimp áawini̱ya̱ tímianaisha Yusá, shiir awajsamu atá.
Ántsaṉ ashí nuṉka náṉkatrana tímianai Ame wincharum atí.
6 Wí naṉkaamatainmaṉka nekan ikiurtusarai.
Túrutawarmatai enentái̱rka kakarmachu ajasái.
Wi pujamunmaṉka wa̱a̱n táutriarai tura nu táurmanumka ímia niṉki iniawarai.(Séraj)
7 Winia enentái̱rka iwiarnas awai.
Yusru winia enentái̱rka kantan kantamprútmataj tusa aya ajas pujurtamui.
8 Winia enentái̱ru shintiarta.
Shintiarta arpáa tura ke̱e̱rá.
Tsawa̱ana nui̱ shintiaran nantaktiatjai.
9 Maa Uuntá, shuar írunmanum shiir awajsattajme.
Uunt nuṉka mátsatkamunmasha shiir awajkun kantampruáttajme.
10 Ame waitnenkartutairmeka ti uunt asa nayaimpiniam jeawai.
Tura Ame chichakma nekasa nuka yuraṉkim tí yaki̱ya̱ tímianai awai.
11 Nayaimpia tímiania Yusá, shiir awajsamu atá.
Ántsaṉ ashí nuṉka náṉkatrana tímianai Ame páantniuram atí.