Yusa Je̱e̱ emesnakmatai utma
Asap kantamámu
74
¿Yusá urukamtai túkesha ajapa inikiartusum?Tura Ame sa̱a̱krumíya̱ murik árincha ¿urukamtai kajerkartukuitiam?
2 Tí yaunchuk Wi shuar árat tusam wakerukam achikmamna nu enentáimturiá.
Kame Wi shuar árat tusam sumakmame.
Ame pujutái̱ram Seun naintcha enentáimturta.
3 Yaunchu emeskamu tuke írunna nuní̱ Ámeka wetá.
Yus Shiir Awajtai̱ Je̱e̱n írunna núnaka ii nemasri̱ mash emeskaiti.
4 Yus Shiir Awajtai̱ Je̱a̱ Áminiua núnaka ajapéri̱n ame nemasrumka júrur ajainiawai
tura nekanati tusar ni tarachrí̱ncha nenaawarai.
5 Kampuntin ténam jachaja̱i̱ awatua nútiksar
ashí emeskar ikiukiármai.
6 Yamaikia jachaja̱i̱ núnisaṉ numi ajintiái̱ji̱a̱i̱ numiniam nakumkar najankamu ainia núnaka
kupí kupí najankar ikiukiáru áiniawai.
7 Yus Shiir Awajtai̱ Je̱a̱ Áminiua núnaka jiji̱a̱i̱ ekemákarai.
Túrawar Ame pujutái̱ram Ame náarmin apujsamua núnaka nuṉká emeskar mui̱jmiai̱ awajsarai.
8 Ni enentái̱ji̱a̱i̱ṉ chichainiak “Ju̱ chichamaik takamtsuk emeskartai” tuíniak
ashí Yus enentáimtutai̱ṉkia jiji̱a̱i̱ áeskarai.
9 Yus iniakmamu yamaikia wáintsuji
núnisaṉ Yúsnan etserniusha atsawai.
Nu asamtai nekatash nékatsji ashí ju̱sha ¿urutmá tsawantak jú̱nissha pujusat?
10 Yusá ¿urutáik némasa nusha wishiknarat?
¿Kame némassha Ame náarminkia túkek katsekkin wétata?
11 ¿Urukamtai untsuur uwejém émeteam
túram urukamtai kunturam miniá miniakmamusmesh pujam?
12 Túmaitkiuisha tí yaunchu Yuska winia úunt akupniuruyayi.
Nuṉká matsatainia nuna uwemtikna nuka Níyaiti.
13 Ame kakarmarmiji̱a̱i̱ nayants jímiapetek tesamiame
núnismek nayantsanmaya̱ yajasma muuke̱sha kupirkamame.
14 Riwiatán entsaya̱ uunt yajasma muuke̱sha ijiakturmame
túram atsamunam matsamin yajasma ayurkamamame.
15 Ashintsasha tura entsasha jíintrarmai
tura entsa ku̱yu̱achminiak kukach awajsarmame.
16 Núnisaṉ tsawantka Áminiuiti núnisaṉ káshisha Áminiukete.
Amek etsa̱sha tura nantusha ikiusármame.
17 Ámeka nuṉka tesarnáiyamu ainia nuka tesarmame
túram esatcha tura yumisha najankaitme.
18 Uunt Yusá, némas yajauch chichartamkana nu enentáimtusta.
Tura aents enentáimcha ainia nuka Ame náarminkia nakitiáiniawai.
19 Kajen yajasma ainia nu Ame yampitsrumin máwarat tusam ni iwiaakmari̱ tsaṉkatkaip.
Ashí kuítrincha Áminiu írunna nu tuke kajinmátkip.
20 Tsuumai̱ matsamtai̱ nuṉká írunna nui̱ yajauch awajkartutai̱ji̱a̱i̱ tí piaku ásarmatai
Ámiji̱a̱i̱ chícham najanamua nu enentáimturta.
21 Wáitkiasma matsatna nuka natsa̱a̱r waketkishti.
Núnisaṉ atsumainia nuka tura kúntuts pujuinia nusha Ame náarmin shiir awajsarti.
22 Yusá yajauch awajtámainia nu iisam ayamprumakta.
Aents enentáimcha ainia nuka ashí tsawant kajertamainia nu enentáimturarta.
23 Ámin kajertamainia nuka tétete ajakiar tuke iniaitsuk charaatum ajakí̱ wena asamtai
Ame nemasrum chichainia nu kajinmátkip.a