Yus waitnentrurat tusa untsúamu
Ju̱ kanta kantamtikniun áatar súsaiti. Kurái uchirí̱ kantamámu.
85
Maa Jiuwaá Ámeka Ame shuarum waitnentrarmametúram Jakup aents achirar yaruakma awakearmame.
2 Ame shuarumi yajauchiri̱ṉkia tsaṉkurarmame
túram ashí ni tunaari̱ṉkia nukurkarmame. (Séraj)
3 Ame kajetairmeka ashí emetamame túram Ame suir kaje̱ntkamusha Amiya̱ṉka akankaitme.
4 ¡Ii uwemtikkiartin Yusá ataksha Ámin awaṉkartuktia
túram Ame iin kajerkartamna nuka iniaisata!
5 ¿Iincha tuke kajertamkimik wétatam?
¿Ámeka ukunam matsamiartatna nusha kajerkiarmekek wéartatam?
6 ¿Ame shuarum ainia nuka atakka iwiaakmaka súsachartatmek
Ámin warasarat tusamka?
7 Maa Jiuwaá Ame waitnenkartutairam iin amasta
túram Ame uwemtikkiartutairam sukartusta.
8 Jiuwá Yus títiatna nuna antuktatjai.
Ni shuari̱ Yusan arantuk wekain ainia nuna Niṉkia waurka ajastinnium waketkiara̱i̱ṉ tusa aṉkant shiir matsamsatniun nekas susattajai tawai.
9 Ii nuṉke̱n Ni winchari̱ pujusat tusa ti nekas arantuk ashampramainia
nuna uwempratniuri̱nkia ishichik ajasái.
10 Waitnenkartutai̱ nekasa nuja̱i̱ wainniaikiarmai
tura nákak túrutai̱ aṉkantin shiira nuja̱i̱ meje̱naisarmai.
11 Nekasa nuka nuṉkaya̱ tsapái̱ jíintiatui
tura nekasa nuja̱i̱ métek túrutaiṉkia nayaimpinmaya̱n íittiawai.
12 Nu arant Jiuwá péṉkernak amastatji
tura ii nuṉke̱sha péṉkeran nerektatui.
13 Nekasa nuja̱i̱ métek túrutai̱ jintia iwiarki̱ emkittiawai Ni wekaasatniuri̱n.