Aentska amuiniaiti tura Yuska tuke pujuwiti
Muisais Yusa takarniúri̱ Yus seamu
90
Uuntá Ámeka yáunchusha tura yamaishanuyá̱ ukunam matsamártatna nunasha ejamtairi̱yaitme.
2 Náintiash najana apujtsuk nuṉkasha
tura ashí nui̱ irunainia nusha najantsuk
3 Ame chicharkum “Jákatin aentsu nuṉká waketkitia”
tákumniṉkia aentska ataksha nuṉka ajawai.
4 Kame mir uwikia Ámiji̱a̱i̱ṉkia tsawant yau naṉkaamasma núnisaiti.
Tura nuna arant kashi ishichik ura iistá tusar apujsamu tsawantri̱ wárik naṉkaama núniniaiti. 2 Pit. 3:8
5 Iinkia entsa nujaṉkrua jukartana núnisam jukartame.
Tura iikia kanarua núniniaitji.
Iisha nupa̱a̱ káshik tsapana núnisketji.
6 Núpa̱a̱ka káshikkia tsakar ku̱ku̱jrawai
tura kí̱arai̱ṉkia tsupikiam ja̱ja̱tar kaawai.
7 Warí Ame suírumji̱a̱i̱ amukmaitji
tura Ame kajetáirmiji̱a̱i̱ sapijmiaku pujuiniaji.
8 Ii yajauchiri̱sha Ámeka paant wainme.
Ii u̱ka yajauch túramuri̱sha Ame tsáapnintrumji̱a̱i̱ṉkia paant awajme.
9 Ashí ii tsawantri̱nkia Ame kajetáirmiji̱a̱i̱ amuiniaiti,
ii uwiri̱sha enentáimsamu naṉkaama núnisaiti.
10 Ii iwiaaku pujustin tsawantka sataintia uwichikiti
tura ti kakaram ainia nuka uchaintia uwí pujuiniawai.
Tura ti iwiaaku pujamsha ti ititiaiti tura takataiti
tura ii uwiri̱sha wari naṉkaamawai iisha yajá wéaji.
11 Ame kakaram kajetáirmincha ¿ya nekaamniait?
Tura Ame kajetairmeka ti uunt asamtai
¿itiur ashamkar arantúkchamusha átatam?
12 Ii iwiaakmari̱ sútarchia nu nekamatin unuikiarturta.
Nuja̱i̱ nekatai̱ enentai takustatji.
13 Jiuwaá ¿urutáik iincha waketkitiam?
Ame takartámin ainia nusha waitnentrarta.
14 Tuke káshik Ame waitnenkartutairmiji̱a̱i̱ pimiuntikratkata
túrawakminkia iwiaaku pujutaj nuiṉkia warasar tuke kantamiartatji.
15 Iin wáitkiartusmam imianú tsawantak
tura nukapé uwí yajauch wainkiamajnia nuja̱i̱ métek waramtikiartusta.
16 Ame najankamurmesha Ame takartámin ainia nui̱ paant ajasti.
Tura Ame páantniurmesha nuna uchirí̱ ainia nui̱ paant ajasti.
17 Jiuwá ii Yusri̱ waitnenkartutairi̱ iin pujurtamsatji.
Ii takatrí̱sha ipiampárta.
Ee, nekas ii takatrí̱sha ipiampárta.