Ii najatma nuke shiir awajsatniuitji
104
Winia enentái̱ru Uunt Yusa naari̱ tuke shiir awajsata.Uunt Yusa, winia Yúsruitme.
Ameketme nekas Úuntam wincharmiji̱a̱i̱ tsáapniniaitme.
2 Ame nérentin asam tsáapnintrumji̱a̱i̱ pushí áentsratniua áitkiaitme.
Tura nayaimpikia tarach ayapá̱rma nútiksam ikiusuitme.
3 Ame pujutai̱ṉkia ti yakí̱ éntsanmaṉ jeamniuitme.
Ame eṉkempra wekatairmesha yuraṉmiti tura nasenam wekainiaitme.
4 Áminiun etserniuka nase áiniawai.
Tura Ame takartámniuka jíyaiti. 2 Akup. 2:11; Isr. 1:7
5 Péṉker aepak nuṉkancha najanamiayi.
Tuma asa peṉké umuchkiachminiaiti.
6 Nayantsaja̱i̱ṉkia pushí aentsua nútiksam áentsramiame.
Túramu asa náintniaka entsa amuruyayi.
7 Tura ipiamtaja̱i̱ métek chicharkam
nu chichamtaik kanararmiayi.
8 Tura naintkia yakini̱ wéakui antsu pákaka nuṉkaani̱
Ame tui̱ pujustarum tiarmam nui̱ṉ ashinkiarmai.
9 Ame ju̱i̱ṉ naṉkantia tímiam nui̱ṉ naṉkanka áiniawai.
Tuma asa atakka nuṉkanka amurchattawai.
10 Núnisaṉ náintniumia̱ púkuni jiini̱ ashints wainia Amek najankamiame.
11 Nu túrawakmin ashí kampunniunmaya̱ yajasma
tura kampunniunmaya̱ umpurusha entsa umarar kitiakén imikiainiawai.
12 Núnisaṉ ashí nanamtin ainia nu entsá yantam yujainiawai.
Tura numiniam ekemsar shiniuiniawai.
13 Ame pujamna nuya̱ṉ naintcha ukateame.
Nuja̱i̱ nuṉkaya̱sha nútsuiniawai.
14 Tura sa̱a̱kkia ashí yajasma yuáwarti tusam tsapamtikme.
Núnismek kampunniuka aents takakmas yurumáwarmi tusam súsaitme.
15 Umutai péṉker ainia nuna umarar shiir enentáimsarmi
nuyá̱ uriwiu numi asuitiri̱ji̱a̱i̱ yurumkan pachimiar yuáwar
aya̱shi̱ kakaram yapí puapuat tsamapkarin iira árat tusam súsaruitme.
16 Uunt Yuska ashí numincha tura Ríwianunmaya̱ sétruncha saṉkut shauṉ tsakarárat tusa tsapamtikiaiti.
17 Nui̱ chiṉkisha kanawe̱n pasuṉmainiawai.
Tura ímiaka tsakari̱n pasuṉmainiawai.
18 Naintkia, kampunniunmaya̱ chipiu matsamtainti.
Kayá wa̱a̱ka náinniumia̱ sa̱wa̱ pampaatainti.
19 Amek kashi nántuka tsawant nekapmarar nekaatin najanaitme.
Tura étsa̱ka taka akaamuri̱ nekaatin najanaitme.
20 Ame kashi ajasta tákumin kirit ajawai.
Túrunamtai ashí yajasma kampunniunmaya̱ jíiniar yujainiawai.
21 Úunt ya̱wa̱ka namaṉᵏᵉ surusai tusa
Yusan seainiak úttin áiniawai.
22 Tura tsawa̱rmataiṉkia namaṉke̱ jurumkiar wá̱a̱ri̱n tepenawai.
23 Aentska takatrí̱n jíintiukiar
takáa takakua kintiamniuiti.
24 Uunt Yusá ti urutmatsuk ame nekatairmiji̱a̱i̱ najankaitiam.
Nuṉkanka ame najankamurmek piákuiti.
25 Nui̱ nayants ti waṉkaram náṉkatkachu awai.
Nui̱sha namak nekapmarchamnia tura yajasmasha uuntcha uchichisha irunainiawai.
26 Nui̱sha uunt kanu wekainiawai.
Tura uunt yajasma riwiatán nakurúsat tusam najanaitme.
27 Nusha warí tsawantinia
Ame ayuratniuitiam nuna nákainiawai.
28 Ame súam e̱a̱mak yurumá ejemainiawai.
29 Antsu Ame páchiachmaka yurumtsuk pujuiniak
tsukari̱n jaka nuṉka ajak aya meṉkainiawai.
30 Túmainiak ataksha Ame Wakanmi kakarmari̱ji̱a̱i̱ ipiampáiniame.
Túrakum nuṉkaka ímiatrusmek awajeame.
31 Uunt Yusa páantniuri̱ṉkia tuke atí.
Ame najankamurmiji̱a̱i̱ Uunt Yusa warasta.
32 Kame Yus nuṉkan najana asa ú̱u̱rmamtikiui.
Túram naintcha muchitrar mukuintiuiniawai.
33 Tuma asamtai iwiaakjana ju̱i̱ṉkia
Úunt Yusrun kantampruáttajai.
34 Tuke enentáimtakun shiir enentáimtikrattsan wakerajai.
Túrakun Niji̱a̱i̱ warastatjai.
35 Nu tuma asamtai tunáa aents ju̱ nuṉkaya̱ jí̱i̱kiaru ártí.
Núnisaṉ Yusan enentáimtichu ainia nuka ashí amunkarti tajai.
Maa, Winia wakantru Uunt Yus tuke shiir awajsata.
¡Naṉkamantuitme Uunt Yusá!