Uunt Yus tura najankamu Yus
115
Maa Uunt Yusá iinkia atsá kame iinkia atsá antsu Ame náaram shiir awajsata.Ame waitnenkartutairmiji̱a̱i̱ tura Ame nekasaitmena nuja̱i̱ túrata.
2 Uunt nuṉka mátsatka ainia nusha
¿urukamtai Ame Yusrumsha yamaisha tui̱ pujá tiarat?
3 Warí ii Yusri̱ṉkia nayaimpiniam pujawai
tura najanatniun wakerimia núnaka najankaiti.
4 Ni aents najanamu yusri̱ṉkia kuri
tura kuit jiru áiniawai.
Aents uwejéja̱i̱ najankamu áiniawai.
5 Wene̱ncha takakainiawai
túrasha chichachu áiniawai.
Ji̱ncha achíakainiawai
túrasha iimtsui.
6 Kuishin takakainiawai
túrasha ántichu áiniawai.
Nuji̱ncha takakainiawai
tura nekapcha áiniawai.
7 Uwejé̱n takakainiawai
túrasha takas íistinian nékainiatsui.
Nawe̱n takakainiawai
túrasha wekaicha áiniawai.
Wene̱n takakainiawai túrasha chichachu áiniawai.
8 Najanin ainia nuka nuja̱i̱ métek áiniawai
tura nin náṉkamas enentáimtin áiniawai.
9 Uunt Yus enentáimtusta Israerá.
Ámin yáintmauka Níyaiti tura ame tantarumete.
10 Arauna shuari̱tirmeka Uunt Yus enentáimtustarum.
Ámin yáintmauka tura ame tantarumka Níyaiti.
11 Uunt Yus ashamniutirmeka Uunt Yus enentáimtustarum.
Atumín yáintmauka Níyaiti tura atumí tantari̱nti.
12 Uunt Yus iin enentáimturmasarji
tura shiir pujutnum yumiṉkramprattaji.
Israera shuari̱ncha péṉker pujutnum yumiṉkrartatui.
Arauna shuari̱ncha péṉker pujutnum yumiṉkrartatui.
13 Uunt Yusan ashamin ainia núnaka
péṉker pujutnum uchirí̱ncha tura úuntnasha yumiṉkrartatui.
14 Uunt Yuska nú nukap atumíncha
tura atumí uchirí̱ncha péṉker pujutnum suramsarti.
15 Átum Úunt Yusnaitrumna nútirmeka shiir atarum.
Niṉkia nayaimpincha nuṉkancha najankamai.
16 Nayaimpir nayaimpir Uunt Yusna áiniawai
túrasha aentsu uchirí̱n nuṉkanka súsaiti.
17 Jákaru ainia nuka Uunt Yusnaka shiir awajáiniatsui.
Chikichkisha jaka mitiatniunam akainia nusha tujintiainiawai.
18 Antsu iikia Uunt Yus shiir awajsatai.
Yamaiya̱ ju̱yá̱ juárkimiuk tuke tsawant Uunt Yus shiir awajsatai.
¡Naṉkamantuitme Uunt Yusá!a