Uunt Yus péṉker waitkiat tusa seamu
Tawit kantamámu
140
Uunt Yusru, yajauch awajkartin aents ainia nuyá̱ uwemtikrurta.2 Nusha ni enentái̱nkia yajauch ásar
ashí tsawant aya émesmaktinniak áujmatin áiniawai.
3 Tura yajauch shuara chichame̱ṉka
napí tséasri̱ya núnis najamin áiniawai. (Séraj)
4 Uunt Yusru, shuar aya emesmaktinian wakerin ainia nuyá̱ aṉkant awajtusta.
Kame wi túramun emestuktaj tusa chichaman juruttsaru ainia nuyá̱ wáitkiata.
5 Warí, naṉkamantu enentáimin ainia nu shuar
eṉkemkamtai yajauch awajtústaj tusa jintian akirturawarai. (Séraj)
6 Úunt Yusrun áujkun “Ámeka winia Yusur asakmin
wi seajmena nu anturtukta” tímiajai.
7 Uunt Yusá, Ámeka winia uwemtikrin kakaram Yus asam
mesetnum ejamtai̱rua núnisaitme.
8 Uunt Yusá, Ámin enentáimturmachu ainia nu ni wakeruiniamuri̱ tsaṉkatkaraip.
Ni túrataj tuíniamusha peṉké suritkiarta.
Túrachmaka naṉkamantu enentáimtumasara̱i̱ṉ. (Séraj)
9 Antsu wiji̱a̱i̱ iruntrar pujuinia ju̱sha yajauch awajtústaj tusa
áujmatruinia nu íksaṉ niṉki yajauch awajmámkartatui.
10 Nu shuarnum ji keá aju̱ṉnartatui.
Tura Yus jinium aju̱a̱waram nú wá̱a̱nmaya̱ peṉké jíinkichartatui.
11 Esetar enentáimtsuk chichauka ju̱ nuṉkanam péṉker pujú áchattawai.
Núnisaṉ emesmau shuar ainia núnaka ni yajauchiri̱n útsuktatui.
12 Tura shuar wáitkiasma ainia núnaka Uunt Yus yaya̱wai
núnisaṉ atsumainia nunasha ayampruiniawai, nuna nékajai.
13 Nekasaiti, péṉkera túrin ainia nuka ame náarmin shiir awajsártatui.
Tura péṉker wekain ainia nuke Aminí̱ pujusártatui.