Wáitiakur Yus seamu
Tawit maski kanta kantamámu
Tawit wá̱a̱nam pujus Yusan seamu
142
Winia chichampruja̱i̱ Jiuwan untsúajai.Winia chichampruja̱i̱ waitnentrurat tusan Jiuwan seattajai.
2 Winia itiurchatrunka Ni pujamunam étsereajai.
Wi wáitiakun jakamnia nekapeamuncha Ni pujamunam paant awajjai.
3 Winia enentái̱rja̱i̱ ti wáitmiaj nui̱ṉkia wi itiur pujumaj nu Ame nekartimiame.
Wi wekaimiaj nu jintianmaṉka nápuktinian ú̱kar aepruttsarmai.
4 Winia untsuurui̱ni̱ íimsam iimiata yaaksha yáintkiatniuka atsawai.
Warí ú̱mkatniun takaktsujai winia iwiaakmarun wáinkiatniuka yáakesh atsawai.
5 Jiuwáa Ámin untsúajme.
Tura wikia aya Áminiak nákajme.
Ju̱ nuṉkanam iwiaaku pujusan takakeaj nuka aya Ameketme.
6 Wi untsumma antukta, ti wáitkiasma pujajai.
Winia pataturainia nuna wiji̱a̱i̱ naṉkaamas kakaram áiniakui nuyá̱ aṉkant awajtusta.
7 Wi Ame náarmin shiir awajsataj, sepunam eṉkeataj nuya̱ṉka ji̱i̱rkitia
Ame péṉkerum winia iniaktursa asaakmin péṉker enentáimkia ainia nu káutrukar téntakartatui.