Uunt akupin Yus shiir awajeamu
Tawit kantamámu
145
Úunt Akupin winia Yusru ti uunt naṉkamantu awajsattajmetura tuke iniaṉnatsuk Ame náarmin shiir awajtítiajme tajai.
2 Túran tuke tsawant shiir awajsattajme.
Tura Ámin tuke iniaṉnatsuk shiir awajtiatjame.
3 Kame Uunt Yuska imiá uunt asa shiir awajú ajataiti.
Kame timiá uunt asamtai Ni péṉkeri̱ takamtsuk nekaachminiaiti.
4 Ame najankamiam núnaka ukunam pujuartatna nusha nuyá̱ ni tiraṉki̱sha tuke enentáimtin ártatui
tura ame kakarmarmiji̱a̱i̱ najankaitmena nunasha áujmatiartatui.
5 Ame wincharmi shíirmari̱ tí naṉkamantua nuna
tura Ame najankamuram íijata núurmincha enentáimtustatjai.
6 Ame kakarmarmiji̱a̱i̱ najanamiam nuna shuar wáinkiar áujmatiartatui
tura Ame najanamun áujmatainiakui wisha núnisnak Yusru Ame ti úuntaitmena nuna pachisan áujmatsattajai.
7 Ame waitnenkartutairam ti uunta nuna enentáimtusar chichasártatui.
Túmainiak Ame naka túrutairmin pachisar kantamprútmawartatui.
8 Uunt Yuska yáiṉkratniuiti tura katsuntniuiti.
Wárik kajechu asa ti waitnenkartiniaiti.
9 Kame Uunt Yuska ashiji̱a̱i̱ péṉkeraiti
núnisaṉ ashí ni najankamuri̱n waitnenkartutariji̱a̱i̱ wainiui.
10 Maa Uunt Yusá ashí Ame najankamu írunna nu Áminkia shiir awajtámsarti.
Núnisaṉ Ámiji̱a̱i̱ wekainia nu áentsrum shiir awajtámsarti.
11 Nisha Ame akupeamurmi shíirmari̱sha
tura kakarmarmesha áujmatiarti.
12 Túrawar Ame kakarmarmiji̱a̱i̱ najankaitmena nuna aentsun nekamtikiawartatui
tura Ame akupeamuram ti naṉkamantua nuna winchari̱n áujmattsartatui.
13 Ame akupeamurmeka uwir uwir náṉkatkachuiti
tura Ame kakarmarmeka ukunam matsamártatna ímianaisha nuyá̱ ni tiraṉki̱ ártatna ímianaisha Ámeka akuptiatme.
14 Kame kakarmachu ainia núnaka Uunt Yus émeteawai
tura kijinia entsaakua núnis wáitkiasma pujuinia nunasha Ni ataksha ipiaṉkeawai.
15 Aminiak ashí shuar enentáimturmasar pujuiniawai.
Túmainiakui ni yurumke̱ tuke tsawant suíniame.
16 Ashí iwiaakainia nu ayuram ejemamtikiainiame.
17 Uunt Yuska ashí Ni jínti̱nkia ímiatrus nákaiti
tura ashí Ni najankamuri̱n waitnenniuiti.
18 Ashí untsuinia núnaka Uunt Yuska tíjiu̱ch pujurui.
Kame ashí ti nekas untsuinia núnaka pujuráiniawai.
19 Kame Uunt Yusan ashamak enentáimtuinia núnaka ni wakeramun umirniuiti.
Núnisaṉ yainkiai tusa untsumkuisha anturak uwemtikrattawai.
20 Uunt Yus nu aentsun anea asa péṉker wainiui
antsu Yusan umircha ainia núnaka ashí emeskattawai.
21 Wikia Úunt Yusrun shiir awajsattajai.
¡Ashí aya̱shtin árumna nu ni naari̱ péṉkera nuna iniaṉnatsuk tuke shiir awajsatarum!