Kame ju̱ papikia menaintiú aents nuwa̱ tura áishmaṉ nuyá̱ nuna amikrí̱ ainia nu túruiniamun áujmatui. Kame nisha aṉkant aṉkant ni enentáimmianka peṉké arantsuk ti paant chichainiawai.

Núnisaṉ jú̱ papiniumka nuwa̱ja̱i̱ áishmaṉ jímiaraitiat chikichik ajasár áishmaṉsha chikichik tura nuwa̱sha chikichik itiurá tímiatrusar aneniatniuit tusar áujmatainiawai. Kame tí peṉker anajmanairu ásar nuwa̱ja̱i̱ áishmaṉ jímiarchik mái̱ metek aneniawarat tusar ikiakáiniawai.

Ántsaṉ ju̱ papiniumka Yus yama naṉkamtaik enentáimsamia nútikias jímiarchik nuwa̱ áishri̱ji̱a̱i̱ aya̱shí̱n takamtsuk mái̱ metek tsaṉkatnaiyamun paant iniakmawai. Warí Yuska nuṉkan yáma nájanuk chichaak “Áishmaṉ niṉki pujustin péṉkerchaiti” tusa ní aya̱shí̱nian paen jurus ni ai̱n nuwa̱n “nin péṉker yaiṉtí” tusa najatachmakia. (Náṉkammari̱ 2:18-22)

Núnisaṉ ju̱ papinium émamkesar íismaka Yuska ní najanamuri̱n nekaska áishmaṉja̱i̱ nuwa̱n Niji̱a̱i̱ métektaku najanamu ásar anenainia nusha paant nekamniaiti.

Kame Yus Chicham aarma ainia nui̱ṉkia menaint ainia nuyá̱ ya chicháa núnaka paant iniakmainiawai. Tuma asa nua̱ri̱sha tura áishri̱sha nuyá̱ ni amikrí̱sha urutái chichainia nu paant nekaatniun yáintmaji.