Páshur túrunatin étserma
20
Yúsnan pujurin Imira uchirí̱ Páshur Uunt Yusa Je̱e̱n pujurniu peṉkeri̱ya̱nia nu Jirimías etsermia nuna antukmiayi. 2 Tura Páshur Yúsnan etserin Jirimíasan awati Uunt Yusa Je̱e̱n yantam Piṉjiamínkia wáitiri̱ya nu sepunam eṉkeamiayi. 3 Kashí tsawa̱r Páshur Jirimíasan sepunmaya̱ jí̱i̱kmiayi. Tura Jirimías chicharuk “Uunt Yus áminkia Páshur tuuka anaitiamkachuiti antsu Makurmisapíp tu anaitiamkaiti” tímiayi. 4 Uunt Yus jú̱nis túramui “Nekaata Wi ámin tura ashí ame amikruminiasha ashammai awajsattajme. Ame nemasrumi puya̱ri̱ji̱a̱i̱ iniartatme tura ame ji̱mi wáinkiartatui. Tura ashí Jutá Papirúnianmaya̱ úunt akupniu uwejé̱n íktusan iniaisattajai. Ni Papirúnianam jukittiawai tura puya̱ja̱i̱ akantatui. 5 Núnisnak péprunam ashí kuítrum írunna tura takatrumiya̱ nerea nuna tura ashí shíirmach ainia núnaka íktusan iniaisattajai. Núnisnak Jutanmaya̱ úunt akupin ainia nuna ashí kuítri̱n ni nemasri̱ uwejé̱n íktuan iniaisattajai. Túramtai utsantua warirí̱ atantar Papirúnianam júkiartatui. 6 Tura ame Pashurá ashí ame je̱e̱min pujuinia nui̱m achik juramkiartatui. Papirúnianam waya̱ttame túram nui̱ jakattame. Tura nui̱ waitruam etserkaitmena nuja̱i̱ amesha tura ashí ame amikrumji̱a̱i̱ iwiartamsartatui” tímiayi.Jirimías utma
7 Uunt Yusá Ame anaṉkruame tura wi anaṉkamu wejai. Wiji̱a̱i̱ naṉkaamas kakarmaitme túram nupettukume. Ashí tsawant wishiktai̱ wejai. Wíniaka aṉkant aṉkant wishikruiniawai. 8 Chichaajna nuiṉkia kakantran chichaajai. Emeskartin ti yajauch piakai Uunt Yusa chichame̱ṉka natsan wishiktai̱ ashí tsawant awajtawai. 9 Nin atakka peṉké enentáimtuschattajai tura ni naari̱ pachisnash chichatnash peṉké chichaschattajai. Tura winia enentái̱rui̱ ji kapá̱a̱ ukunchrui̱ wayá̱ núnis nekapeajai. Katsuntrataj tukamán tujintiajai. 10 Untsurí aents tsanumprutainian antukuitjiai. Ashamkatniuka ashí nuṉkanam awai. ¡Werí etsertuktarum, etsertuktarum! Ashí winia amikrusha unuk tiinti tusar nákarainiawai. Chichainiak “Anaṉkarkia maak túrar ni nupetkashtajiash túrar nuiṉkia yapajkiatai” tuíniawai. 11 Túrasha Uunt Yus Ashí Tujintkiachu wiji̱a̱i̱ pujawai. Tuma asamtai pataturainia nuka tukumkartatui túrasha nupettukchartatui. Ti natsant ajakártatui tura péṉker matsamsachartatui. Nuiṉkia tuke natsanmai̱ awajtai̱ peṉké kajinmatkichmin ajasártatui. 12 Ashí Akupin Uunt Yus Yusan enentáimtin ainia nuka nekapsam íiniaitme túram ni enentái̱sha tura enentáimtairi̱sha nekarainiame. Kame iniaitiusta wisha Ame yapajkiartatmena nuna íistaj. Tuma asan Amiin winia itiurchatrun ikiusjai. 13 Uunt Yus kantampruata túram Uunt Yus shiir awajsata. Yajauch ainia nuna uweje̱ya̱ atsumainia nuna aṉkant awajtúsuiti.
14 Wi akiiniamiaj nu tsawant yajauchiji̱a̱i̱ yumiṉkramu atí. Winia nukur takursámia nu tsawantka shiir áchati. 15 Áishmaṉ winia aparun chichaman ujak chicharuk “Uchi áishmaṉkach akiintiurmayi.” Waramtiksattsa tana nu yajauchiji̱a̱i̱ yumiṉkramu atí. 16 Nu áishmaṉnaka Uunt Yus péprun waitnentsuk aya jú̱nik awajsámia nútikiati. Káshik tsuumai̱ antitiam tura tutupin ajasáinia aiṉkia mesetnum untsumainiamu antukta. 17 Winia nukuru aya̱shi̱ni̱ṉᵏ ajakrurchamai. Túmaitkiunka winia nukurui̱ni̱ṉᵏ iwiarsamu a̱a̱jai. Winia nukurui̱ tuke ajamtin juaku initian iwiarsamu a̱a̱jai. 18 ¿Urukamtaitsuk init eṉketiatnasha jiinkiyaj? ¿Wáitsatniun tura wáitiain íistaj tusanash tura Winia tsawantrusha natsanmai̱ awajtiarmi tusanash jiinkiyaj?