Waakaja̱i̱ nuṉká pukuak takakma nakumkamu
27
Setekías akuptan juármanum Jutanmaya̱ úunt akupin Jusíasa uchirí̱n Uunt Yusa chichame̱ Jirimíasan tarimiayi. 2 Tura Uunt Yus chichartak “Aents waakaja̱i̱ nuṉká pukuak kuntujnum numi awantai̱ najankarta. Túram kuntujmin ikiusta. 3 Túram ujaakum Etumnumia̱ úunt akupin tura Muápnumia̱ úunt akupniusha, Amun úunt akupniu uchirí̱sha tura Tírunmaya̱ úunt akupin nuyá̱ Setunnumia̱ úunt akupin chichaman etserin Jerusaréṉnum Jutanmaya̱ úunt akupin Setekíasai̱ wininiakui aṉkant aṉkant akuptúkarta. 4 ‘Israera Yusri̱ Uunt Yus tawai’ tusa ni úuntri̱n ujakárat tusam akupkarta. Atumí uuntri̱ chicharkuram jú̱nis ujaktarum. 5 ‘Uunt Yus chichaak Winia ti kakarmar kunturun iwiaintiukan nuṉkancha aentsnasha yajasmancha nuṉká írunna nunasha najankamjai tura wi yana wakeraj nuna súsaitjiai. 6 Wi yamaikia winia takartin Napukutunusúr Papirúnianmaya̱ úunt akupniu uwejé̱n ashí ju̱ nuṉkanka íktusan iniaisaitjiai. Nuya̱sha kampunniunam yajasma írunna nunasha ni iistí tusan súsaitjiai. 7 Ashí uunt nuṉka mátsatkamu ainia nu nincha ni uchirí̱ncha nuyá̱ tiraṉki̱ncha umirkartatui. Nuyá̱ ni nekas tsawantri̱ jeamam uunt nuṉka mátsatkamu ainia nu tura úunt akupin ainia nunasha iniatai̱ awajsártatui. 8 Túrasha yamaikia uunt nuṉka mátsatkamu ainia nuka núnisaṉ chíkich akupeamu ainia nusha Papirúnianmaya̱ úunt akupin Napukutunusúran takareachunka tura kuntujé̱n numina awantkátjam tutai surimianka asutiáwartatjai. Kame nú uunt nuṉka mátsatkamun Wikia mesetja̱i̱sha tsukaja̱i̱sha núnisaṉ suṉkurja̱i̱sha ashí jaka amuumam asutiáwartatjai’ tawai Uunt Yus. 9 Atumí etserniuri̱ṉkia, nekamniusha, mesekra nékausha, wakaní̱ untsuusha, uwishniusha chichartamainiak ‘Papirúnianmaya̱ úunt akupin umirkairap’ turamainia nuka átumka anturkashtiniaitrume. 10 Niṉkia wáitian etserainiawai atumí nuṉke̱ya̱ akantámkitiaj tusa tura Wi atumín ji̱i̱ra ajapam amuukarat tusar turamainiawai. 11 Tura uunt nuṉka mátsatkamu Papirúnianmaya̱ úunt akupniun umirainiak kuntuje̱n numin awantkartatna núnisa nuka ní nuṉke̱ni̱n takakmas tuke nui̱ṉ matsamsartatui” tawai Uunt Yus.12 Nuyá̱ wikia chíkich aentsun ujakmaj núnisan Jutanmaya̱ úunt akupin Setekíasan chicharkun “Papirúnianmaya̱ úunt akupniu akupeamuri̱ kuntuje̱n numin awantkartatna núnaka umirkátjai tákurmeka nuiṉkia atumsha iwiaaku pujustarum. 13 Yuska Papirúnianmaya̱ úunt akupniun umirainiachuka mesetja̱i̱sha tsukaja̱i̱sha suṉkurja̱i̱sha uunt nuṉka mátsatkamun jákatniuiti takui̱ ¿urukamtaik amesha tura ame shuarumji̱a̱i̱sha Yus timia nuja̱i̱ métek jakatarum? 14 Yúsnan etserin chichartamainiak ‘Papirúnianmaya̱ úunt akupin umirkairap’ waitruá étseruk turamainia nu anturkairap.” 15 Uunt Yus chichaak “Wi nu Yúsnan etserin ainia núnaka akupkacharuitjiai túramaitiat winia náarun ántar pachisar etserainiawai. Núja̱i̱ṉkia tsakiṉmamtikramak amutmakarmatai atumsha niji̱a̱i̱ métek jakattarme” tawai.
16 Tura Yúsnan etserin ainia nu tura ashí aents chicharkum “Jú̱nisam atumnia Yúsnan etserin ainia nuna chichame̱ anturkairap tiartá. Étseruk chichartamainiak ‘Nekaata Uunt Yusa Je̱e̱ya takakmatai ainia nu wárik Papirúnianmaya̱ ikiankatárme’ tuinia nuka ántar etserainiawai. 17 Yúsnan etserin ainia nuka anturkairap antsu Papirúnianmaya̱ úunt akupin anturkatarum túrarum iwiaaku matsamsatarum. ¿Urukamtai ju̱ péprusha aya jú̱nik juákat? 18 Wats ti nekas Yusa chichame̱n etserin áiniaka tura nekas Uunt Yusa chichame̱n etserainiakka nuiṉkia Ashí Akupin Uunt Yusa Je̱e̱n takakmatai írunna nuna Papirúnianmaya̱ wéar Uunt Yusa Je̱e̱n tura Jutanmaya̱ úunt akupniu je̱e̱ncha tura Jerusaréṉnum Yusna takarkur takakmatai írunna nuna yaruakcharat tusar seawarti. 19 Kame Ashí Akupin Uunt Yus jú̱nis tawai. Yusa Je̱e̱ya̱ pauri̱n núnisaṉ entsá pajamtaisha tura tépakmari̱nkia nuyá̱ takakmatai írunna nuka jú̱ peprunam juákaruka ashí yarunkartatui. 20 Warí Juakinb Juasimia uchirí̱n Jutanmaya̱ úunt akupniun achik Papirúnianam Jerusaréṉnumia̱n tura Jutanmaya̱ ashí náakam armia nuna júkiarmia nuiṉkia Napukutunusúr Papirúnianmaya̱ úunt akupniuka chíkich yaruakmin irunainia nunasha yaruakcharman ukunmaṉka yaruakartatui. 21 Ashí Akupin Uunt Yus Israera Yusri̱ Uunt Yusa Je̱e̱n tura úunt akupniu je̱e̱ncha Jerusaréṉnum juákarmia nuna chichaak 22 ‘Yusa Je̱e̱n takakmatai ainia nu Papirúnianam yaruakma ártatui. Tura Wi íistaj tusan wétataj nú tsawant jeatsa̱i̱ṉ nui̱ṉ pujusártatui. Tura nu tsawant jeamtai mash ikiankan awakeartatjai’ tawai Uunt Yus” tímiayi Jirimías.