4 Tura nuiwi uwí akupin ajas pujamunam nántuka tiástin tura tsawantcha tiásnumaṉ Papirúnianmaya̱ úunt akupin Napukutunusúr ashí suntari̱ntiuk Jerusaréṉkan jatektaj tusa káutkar matsamtúkarmiayi. Nui̱ matsamak pujusár wakar utsantuatniuncha wenuke̱n átuti najatkar téntakarmiayi.

5 Kame úunt akupin Setekías aunse uwí akupkámia tímianaisha péprunka matsamtúkar pujuriarmiayi. 6 Tura nantu kuatru jeamtai tsawantka nuíwitin péprunam ti tsukamnamiayi. Nuyá̱ nu nuṉkanam aents matsamármia nu yúawartinkia yurumak peṉké atsumiayi. 7 Túrunamtai pepru wenuke̱n wa̱a̱mawar mesetnum mánin armia nuka ashí pisakármiayi. Kame jimiará wénuk ámanum ajapén úunt akupniu kuku̱j ajarí̱n ápatnik waiti amia nuní̱ péprunmaya̱ṉka kashi jíintrarmiayi. Kame Kartíu aents péprunam ápatnik téntakar pujuráinian ikiuiniak Arapá jintianmaani̱ wéarmiayi. 8 Túrasha Kartíu suntarka úunt akupin Setekíasan apapékar Jirikiú pakanam amayá̱ṉkarmiayi. Túrawar Setekíasa suntari̱nkia ashí tsakiṉmatkiakarmiayi.

9 Nuya̱ṉka úunt akupniun achikiar Papirúnianmaya̱ úunt akupin pujamunam Amat nuṉkanam Rípranam júkiarmiayi tura úunt akupin nui̱ sumamtikiamiayi. 10 Tura nisha íimmianumaṉ Papirúnianmaya̱ úunt akupin Setekías uchirí̱ sue̱n tsupirkarmiayi. Núnisaṉ Rípranmasha Jutanmaya̱ pepru uuntri̱ armia nunasha sue̱n tsupirkamiayi. 11 Antsu Setekíasnaka ji̱n ukuikiar yaṉkú jiruja̱i̱ jiṉkiá eṉkeawarmiayi. Kame Papirúnianmaya̱ úunt akupniuka achik Papirúnianam jukí̱ jáamam sepunam eṉkeá iniaisámiayi.

12 Kame Papirúnianmaya̱ úunt akupin ajas tiasinuíwi uwí pujamunam nántuka sénkutin tsawantka tias naṉkaamasu ai̱ úunt akupniu wainniu uuntri̱ Napusaratán úunt akupin pujamunam takamia nu Jerusaréṉnum waya̱miayi. 13 Tura Uunt Yusa je̱e̱ncha núnisaṉ úunt akupniu je̱e̱ncha tura je̱a̱ Jerusaréṉnum írununcha ekemainiak ashí je̱a̱ uunt armia nunasha ekemármiayi. 14 Ashí Kartíu suntarja̱i̱ pujuarmia nuka Jerusaréṉka wenuke̱nka tsai̱ tsai̱ awajsar ashí téntakarmiayi.

15 Úunt akupniu wainniu uuntri̱ Napusaratánka aents kuítri̱ncha wárumchik juákarun tura aents péprunam juákaruncha núnisaṉ aents pisarar Papirúnianmaya̱ úunt akupniui̱ naṉkaamararmia nunasha ántsaṉ chíkich aents wariṉkísha najanin armia nunasha achir yaruakmiayi. 16 Túrayat úunt akupniu wainniu uuntri̱ Napusaratán aents peṉké kuítrincha nu nuṉkanam pujuarmia núnaka úwan arakmakar juu matsamsarat tusa akanák nui̱ ikiukiármiayi.

17 Tura Kartíu aentska pau ukuamu yaṉkú jiruja̱i̱ najanamu Uunt Yusa je̱e̱n armia nunasha kupirarmiayi. Núnisaṉ entsa pajamtai nawé̱ jukimnia armia nuna nuyá̱ entsa yaratai̱ Uunt Yusa je̱e̱n amia nunasha tsairar yaṉkú jirunka Papirúnianam ashí yaruakarmiayi. 18 Núnisaṉ ichiṉnancha nuṉka shikitiáincha kaí̱ri̱ tsaurtai̱ncha shikitiáincha tura yaṉkú jiruja̱i̱ najankamu takakmatai̱ armia núnaka ashí yaruakarmiayi. 19 Núnisaṉ úunt akupniu wainniu úuntri̱ṉkia winiu umutai̱ piniṉkian tura kuṉkuin yarar ekemátaincha amamkun ichiṉnan shirikpin, kucharán, tsapa kuriji̱a̱i̱ tura kuít jiruja̱i̱ najankamuncha ashí yaruakarmiayi.

20 Tura jimiará pau tura entsa yaratai̱ tura tuse waaka áishmaṉ yaṉkú jiruja̱i̱ najanamua nuna wakenmari̱n armia nunasha tura entsa pajamtai jukimnian úunt akupin Saramúṉ Uunt Yusa je̱e̱n najankamia nuka peṉké nekapmachminiauyayi. 21 Kame pau esantíṉkia tiasiúchu kuntu tura kampuntíṉkia tuse kuntu jea ármiayi aṉkant aṉkant. Initiani̱ṉkia wa̱a̱ tura nupa̱nti̱ṉkia tsara uwej kuatru jea armai. 22 Páunam yakiini̱ yaṉkú jiru ikiursamu armia nuna yakiiri̱ṉkia seṉku kuntu jea ámiayi. Tura páunam yakiini̱ yaṉkú jiru ikiursamua nuna yakiri̱ṉkia neka núninnium munchi aya yaṉkú jiruja̱i̱ṉ najankamu nenarmauyi. Nuyá̱ chíkich páunmasha múnchiya tímiatrusrik najankamuyi. 23 Aṉkant aṉkant nuwintisáis munchi chikichik pekakmanumaṉ netuamu armai. Ashí nu nekapmarmaka nekanam yakiini̱ sian téntakma armai.

24 Núnisaṉ úunt akupniu wainniu úuntri̱ṉkia Yúsnan pujurniu uuntri̱ Serayásan nuyá̱ Yúsnan pujurniu uuntri̱ pátatkari̱ Supuniásnasha tura waiti wáinniuncha menaintiun achikiármiayi. 25 Tura péprunmaya̱n chikichik áishmaṉ mesetan unuimiátkarun wáinniun tura siati áishmaṉ úunt akupniu nekas amikri̱ péprunam pujuinian núnisaṉ suntara papiri̱ áatniuya aents nu nuṉkanam matsatainian achirar suntar awajniuya nuna ántsaṉ sasaintia shuar nu nuṉkanam péprunam matsatainiancha achirármiayi. 26 Nuya̱ṉka úunt akupniu wainniu uuntri̱ Napusaratánka nu aentsun achir Papirúnianmaya̱ úunt akupin pujamunam Rípranam júkiarmiayi. 27 Tura Amat nuṉkanam Rípranam Papirúnianmaya̱ úunt akupin íjiuar máwarmiayi. Túrawar Jutanka achirar ni nuṉke̱ya̱ yajá júkiarmiayi.

28 Kame Napukutunusúr aentsun achir yaruakarmia nuka timiajú̱ untsurí áiniawai. Uunt akupin ajas siati uwí pujus menaintiú mir paintitráis aents Israer shuaran achir yaruakmiayi. 29 Tura tiasiúchu uwí pujuska Napukutunusúrka uchusiántu traintitús aentsun Jerusaréṉnumia̱n achir yaruakmiayi. 30 Antsu paintitráis uwí Napukutunusúr úunt akupin pujumia nui̱ṉkia úunt akupniu wainniu uuntri̱ Napusaratánka siatisiántu kuaraintiséṉku aents Israer shuaran achir yaruakmiayi. Ashí aents irurmaka kuatru mir saisiantu armai.

31 Kame Jutanmaya̱ úunt akupin Juakinkia achikiar jukimiu traintisiáti uwí yajá pujamunam nantu túsetin tura tsawantka paintiséṉkutin Papirúnianmaya̱ úunt akupin Epirmirutak chikichik uwí úunt akupin pujus Jutanmaya̱ úunt akupin Juakinkian waitnentar tsaṉkur sepunmaya̱ṉka jí̱i̱kmiayi. 32 Juakinji̱a̱i̱ṉkia amikri̱ya núnis chichas chíkich úunt akupin niji̱a̱i̱ Papirúnianam pujuarmia nuna naṉkaamas yakí̱ apujsamiayi. 33 Sepunam pujusár entsatái̱ pushinkia yapajmiama iwiaaku pujumia nuiṉkia úunt akupin pujamunam tuke tsawant Juakinkia yurummiayi. 34 Ni yúatniunka tesará ashí tsawantin warí súsatniuit núnaka tímiatrusaṉ Papirúnianmaya̱ úunt akupniui̱ya̱ súmiayi. Ni jáamam ashí tsawant núnaka súmiayi.