Jerusaréṉka wáitsatniuri̱
3
¡Maaj umichu shuartirmesha yajauchiji̱a̱i̱ mátratirmeshatura péejchach ainia nu kakarmaja̱i̱ umimtikiatin wakerintirmesha aneartarum!
2 Warí ní chichame̱ncha anturkachuiti
tura awajirmatai chicharkamsha nekaachuiti.
Núnisan nekas enentáiji̱a̱i̱ Jiuwancha enentáimtuschaiti
tura ni Yusri̱ncha weantúkchaiti.
3 Tura úunt akupniu uchirí̱nkia uunt ya̱wa̱ tsará tsará ajana núnis ajapén matsatainiawai.
Tura ni sumamtikniuri̱nkia kashi wekain rúpu yukartua kashin yuami̱j tusa ukunchí̱ṉkisha ampirmachua núnis áiniawai.
4 Ni etserniuri̱sha péṉker umichu anaṉkartin áiniawai.
Yúsnan pujurniusha Yus Shiir Awajtai̱ Je̱a̱ncha aya yajauchiji̱a̱i̱ imiararuiti.
Akupkámuncha waitruawar etserainiawai.
5 Túmaitkiuisha Jiuwaka aya tí peṉkernak túriniaiti,
yajauchinkia túrashtatui.
Táamtsuk tuke káshik ni naka sumamtiktairi̱n paant awajui
tura Ni túrutai̱ya núnaka túrutskeka iniaisashtatui.
Túrasha Yusan enentáimtichuka natsantan nékatsui.
6 “Uunt nuṉka mátsatkamu ainia núnaka Wi emesmamtikiamjai
túramu asar ni matsamin armia nusha mashiakarai.
Núnisnak ni páasari̱ncha nímpianpiatak nuṉka nútikruawarmajai
túramunmasha yaki naṉkaamakiarat tura
ni pépruri̱sha aents atsá asa aya jú̱nik ajasárai
warí nui̱ matsatuka peṉké atsuiniawai.
7 ‘Wi jintintiam nekas ashamprukar
Wikia umirtukchartimpiash’ tumammiajai.
Tura asutiáwarmiaj nuya̱ṉka nu arantka ni pujutái̱ri̱ṉkia péṉke emestunkashtatui.
Túramaitiatcha núja̱i̱sha niṉkia ashí yajauchin túrawarmai.
8 Túmaitkiuiṉkia sumamtikiatin tsawant jeamam nákarsatarum” tawai Jiuwá.
“Warí ashí uunt matsatkamu
tura akupeamu ainia nunasha
ashí Winia tí kajekmarun iniaktusartaj tusan irurartatjai.
Túran Wi suir kajenkamurja̱i̱
ashí nuṉkan jiji̱a̱i̱ aeskan amuktatjai.”
Israer shuarcha ukunam shiir awajnásartin
9 “Jiuwá náari̱n ashí aents páchiniak métekrak chichasar Nin péṉker takarsarat tusan
nu tsawantinkia ashí nuṉkanmaya̱ aentsun ni wene̱ja̱i̱ṉkia aya péṉkera nunak Wikia ataksha chichamtikiattajrume.
10 Itiupíanmaya̱ entsa irunainia nuyá̱ arantia̱ Wi shuar tsakiṉmaka ainia nu tikishmátrurtaj tusa
tarutiar ni enentái̱ji̱a̱i̱ṉᵏⁱ ánik surustinian ikiatrukartatui.
11 Nu tsawantinkia Winia umirtuktin nakitiakum túraitme núja̱i̱ṉkia natsan awajkámuka áchattame.
Warí, ame naṉkamantu enentáimtumatairmin wararin ainia nu aentsnaka amiya̱ṉka jusattajai.
Túramu asam Winia akantúrkamu náintrui̱ṉkia atakka peṉké naṉkamantuka enentáimtumaschattame.
12 Tura amiinkia aents péejchach tura waantu enentáimtumachu ainia nunak ujakártatjai
túram niṉkia nekas enentáiji̱a̱i̱ Jiuwá náari̱n enentáimtursartatui.
13 Israernumia̱ juákarua nuka yajauchin túrichartatui
tura wáitniasha chichaschartatui
tura ni wene̱nia̱sha anaṉkartuatniuka atsuttui.
Warí, péṉker wainkiamu ártatui.
Tura yáakesh sapijmiamtikiachma péṉker kanarartatui.”
14 Seuna nawantri̱yá kantamáta.
Israerá waraakun charáa charáa ajata.
Jerusaréṉka nawantri̱yá nekas warasma enentái̱ji̱a̱i̱ ti shiir naṉkaamas warasta.
15 Ame asutniátniurmin Jiuwá jurutrámsaiti.
Ame nemasrumnia̱sha ji̱i̱r akupraruiti.
Jiuwaka Israera akupniúri̱ amiin pujawai.
Áminkia atakka warí itiurchatkesha tarutrámchattawai.
16 Nu tsawantinkia “Seuná Sapijmiakaip, yawe̱kim kuntukip”
Jerusaréṉkan tiártatui.
17 “Jiuwaka amiin pujawai
tura kakarmari̱ji̱a̱i̱ uwemtikramprattawai.
Ámin shiir enentáimturmak warastatui.
Anenmamuja̱i̱ mitia apujtamsattawai
tura waramuja̱i̱ kantamprútmattawai.
18 Áminiu uwir uwir ti itiurchat matsamsar
natsan ajainiak kijin entsaktinia núnis nekapearmia núnaka Wi irurartatjai.a
19 Nu tsawantinkia ámin wáitkiarmasarua núnaka ashí apapékartatjai.
Túran murik shutuapnaka uwemtikraran
jintía waakar meṉkakaruncha ikiankartatjai.
Túran ashí nuṉkanam natsan awajkámu pujumarmena nui̱ péṉkeri̱
tura náakam awajnásarat tusan apujsartajrume.
20 Átum achirar yaruakma matsatrumin aṉkant awajsattajrumna nuka atumí jí̱ji̱a̱i̱ṉ wainkiattarme.
Túrunawakrumni̱ṉkia nu tsawantinkia Wiki ikiankattajrume
túran Wiki irurtatjarme nu tsawantinkia.
Túran ashí nu nuṉkanam aents matsatainia nu shiir awajtai̱
tura nekaamu árat tusan apujsattajrume”
tawai Jiuwá.