Li Hu GénesisJoꞌcaꞌin nak quiticla li ruchichꞌochꞌSaꞌ xticlajic li Dios quixyi̱b chak li choxa ut li ruchichꞌochꞌ.
Moco tuktu ta ru li ruchichꞌochꞌ nak quicuan ut toj ma̱cꞌaꞌ cuan chi saꞌ. Nujenak chi haꞌ ut kꞌojyi̱n ru. Caꞌaj cuiꞌ lix musikꞌ li Dios na-ecꞌan saꞌ xbe̱n li haꞌ.
Li Dios quixye: —Chicua̱nk li cutan, chan. Ut quicuan li cutan.
Ut li Dios quiril nak us li cutan. Ut quixjach li cutan riqꞌuin li kꞌojyi̱n.
Ut li cutan quixqꞌue ajcuiꞌ cutan chokꞌ xcꞌabaꞌ. Ut li kꞌojyi̱n, kꞌojyi̱n ajcuiꞌ quixqꞌue chokꞌ xcꞌabaꞌ. Ut qui-oc li kꞌojyi̱n ut quisake̱u. Aꞌan li xbe̱n li cutan.
Ut li Dios quixye: —Chicua̱nk li choxa re tixjach li haꞌ li cuan takꞌa riqꞌuin li cuan takecꞌ.— Ut quicꞌulman joꞌ quixye li Dios.
Li Dios quixjach ru li haꞌ chi ribil. Cuan li haꞌ quixcanab takꞌa ut cuan quixcanab takecꞌ saꞌ li choxa. Ut joꞌcan quixba̱nu li Dios.
Li choxa li quijachoc re li haꞌ chi ribil quixqꞌue chokꞌ xcꞌabaꞌ choxa. Qui-oc li kꞌojyi̱n ut quisake̱u. Aꞌan li xcab li cutan.
Ut li Dios quixye: —Chichꞌutla̱k chixjunil li haꞌ li cuan takꞌa ut chicana̱k chi chaki li chꞌochꞌ, chan. Ut quicꞌulman joꞌ quixye li Dios.
Li Dios quixye nak li chaki ru, chꞌochꞌ xcꞌabaꞌ. Ut li chꞌutubanbil haꞌ, palau quixqꞌue chokꞌ xcꞌabaꞌ. Ut li Dios quiril nak us li quixba̱nu.
Li Dios quixye: —Chicua̱nk li rax pim saꞌ ruchichꞌochꞌ, chan. Li acui̱mk ta̱u̱chi̱nk ut ta̱cua̱nk riyajil. Ut eb li cheꞌ teꞌu̱chi̱nk ut teꞌcua̱nk riyajil, aꞌ yal cꞌaꞌru li riyajil li junju̱nk. Ut quicꞌulman joꞌ quixye li Dios.
Quicuan li rax pim saꞌ ruchichꞌochꞌ. Li pim naxqꞌue riyajil aꞌ yal cꞌaꞌru chi pimul. Ut joꞌ ajcuiꞌ li cheꞌ nau̱chin ut cuan riyajil aꞌ yal cꞌaꞌru chi cheꞌil. Ut li Dios quiril nak us li quixba̱nu.
Ut qui-oc li kꞌojyi̱n ut quisake̱u. Aꞌan li rox li cutan.
Ut li Dios quixye: —Cheꞌcua̱nk xcutanquil ru li choxa re nak tixjach rib li cutan riqꞌuin li kꞌojyi̱n; ut eb aꞌan teꞌcꞌanjelak chokꞌ retalil li sakꞌehil ut li habalkꞌe, joꞌ ajcuiꞌ retalil li cutan ut li chihab.
Ut cheꞌlemtzꞌu̱nk chiru li choxa re xcutanobresinquil li ruchichꞌochꞌ. Ut quicꞌulman joꞌ quixye li Dios.
Li Dios quixyi̱b li sakꞌe ut li po re teꞌxcutanobresi ru li ruchichꞌochꞌ. Li sakꞌe aꞌan li kꞌaxal nim li nalemtzꞌun chiru li cutan ut li po aꞌan li nacutanobresin chiru li kꞌojyi̱n. Ut quixyi̱b ajcuiꞌ eb li chahim.
Ut li Dios quixqꞌueheb chiru li choxa re teꞌxcutanobresi ru li ruchichꞌochꞌ.
Li Dios quixqꞌueheb aran re xberesinquil li cutan ut li kꞌojyi̱n. Quixqꞌueheb re xjachbal li cutan riqꞌuin li kꞌojyi̱n. Ut li Dios quiril nak us li quixba̱nu.
Ut qui-oc li kꞌojyi̱n ut quisake̱u. Aꞌan li xca̱ li cutan.
Li Dios quixye: —Cheꞌcua̱nk nabaleb li xul saꞌ li haꞌ, ut cheꞌcua̱nk ajcuiꞌ li xul li nequeꞌrupupic chiru choxa. Ut joꞌcan quixba̱nu li Dios.
Ut li Dios quixyoꞌobtesiheb li ni̱nki car ut chixjunileb li xul li cuanqueb saꞌ haꞌ, aꞌ yal cꞌaꞌru chi xulil. Ut quixyoꞌobtesi ajcuiꞌ li xul li nequeꞌrupupic, aꞌ yal cꞌaꞌru chi xulil. Li Dios quiril nak us li quixba̱nu.
Li Dios quirosobtesiheb li xul aꞌan ut quixye reheb: —Chexnabalokꞌ ut chexqꞌuia̱nk. Ut chexcua̱nk saꞌ chixjunil li haꞌ yalak bar. Joꞌ ajcuiꞌ li cocꞌ xul chiru choxa cheꞌqꞌuia̱nk saꞌ ruchichꞌochꞌ.
Ut qui-oc li kꞌojyi̱n ut quisake̱u cuiꞌchic. Aꞌan li quixba̱nu saꞌ roꞌ li cutan.
Ut quixye ajcuiꞌ li Dios: —Cheꞌcua̱nk yalak cꞌaꞌru chi xulil saꞌ ruchichꞌochꞌ. Cheꞌcua̱nk chixjunileb li xul li nequeꞌcuaꞌac pim. Cheꞌcua̱nk eb li xul li nequeꞌxjucuqui rib chiru chꞌochꞌ. Joꞌ ajcuiꞌ li xul li nequeꞌcuan saꞌ qꞌuicheꞌ. Ut quicꞌulman joꞌ quixye li Dios.
Ut li Dios quixyoꞌobtesiheb chixjunil li xul li nequeꞌcuan saꞌ qꞌuicheꞌ aꞌ yal cꞌaꞌru chi xulil. Ut quixyoꞌobtesi chixjunileb li xul li nequeꞌcuaꞌac pim, aꞌ yal cꞌaꞌru chi xulil. Joꞌ ajcuiꞌ li xul li nequeꞌxjucuqui rib chiru chꞌochꞌ, aꞌ yal cꞌaꞌru chi xulil. Ut li Dios quiril nak us li quixba̱nu.
Ut quixye ajcuiꞌ li Dios: —Kayoꞌobtesihak li cui̱nk joꞌ li kiloba̱l la̱o. Ut aꞌan ta̱cua̱nk xcuanquil saꞌ xbe̱neb chixjunileb li xul li cuanqueb saꞌ ruchichꞌochꞌ, joꞌ li car saꞌ li palau ut li xul li nequeꞌrupupic chiru choxa. Ut ta̱cua̱nk xcuanquil saꞌ xbe̱neb li queto̱mk ut li xul li cuanqueb saꞌ pim, joꞌ ajcuiꞌ saꞌ xbe̱n chixjunileb li xul li nequeꞌxjucuqui rib saꞌ chꞌochꞌ, chan li Dios.
Ut li Dios quixyoꞌobtesi li cui̱nk ut li ixk joꞌ li riloba̱l aꞌan. Cui̱nk ut ixk nak quixyoꞌobtesiheb.
Li Dios quirosobtesiheb aꞌan ut quixye reheb: —Chicua̱nk le̱ cocꞌal ut chexqꞌuia̱nk toj retal nak ta̱nujak li ruchichꞌochꞌ. La̱ex textakla̱nk saꞌ xbe̱n chixjunil li cꞌaꞌru cuan. Textakla̱nk saꞌ xbe̱neb chixjunil li xul li cuanqueb saꞌ li haꞌ joꞌ ajcuiꞌ li cuanqueb chiru choxa ut li cuanqueb saꞌ ruchichꞌochꞌ, chan.
Ut quixye ajcuiꞌ: —Xinqꞌue e̱re chixjunil li acui̱mk li cuan saꞌ ruchichꞌochꞌ. Xinqꞌue e̱re li acui̱mk li cuan riyajil. Joꞌcan ajcuiꞌ chixjunil li cheꞌ li nau̱chin ut naxqꞌue riyajil re nak ta̱cua̱nk le̱ tzacae̱mk.
Chixjunil li rax pim xinqꞌue chokꞌ re xtzacae̱mkeb li xul li cuanqueb saꞌ ruchichꞌochꞌ. Xinqꞌue ajcuiꞌ reheb li xul li nequeꞌrupupic chiru choxa ut reheb chixjunileb li nequeꞌxjucuqui rib saꞌ chꞌochꞌ. Xinqꞌue chixjunil li rax pim chokꞌ re lix tzacae̱mkeb li xul. Ut quicꞌulman joꞌ quixye li Dios.
Ut li Dios quiril nak tzꞌakal re ru chixjunil li quixba̱nu. Ut qui-oc li kꞌojyi̱n ut quisake̱u. Aꞌan li xcuak li cutan.
Joꞌcaꞌin ut nak quixchoy li Dios xyi̱banquil li choxa ut li ruchichꞌochꞌ ut chixjunil li cꞌaꞌru cuan.
Nak ac xba̱nu chixjunil li cꞌanjel aꞌin, li Dios quihilan saꞌ xcuuk li cutan.
Li Dios quirosobtesi li xcuuk li cutan ut quixsantobresi xban nak saꞌ li cutan aꞌan quihilan riqꞌuin chixjunil li cꞌanjel li quixba̱nu.
Joꞌcaꞌin nak quiyi̱ba̱c chak li choxa ut li ruchichꞌochꞌ xban li Dios.Saꞌ li cutan nak li Ka̱cuaꞌ Dios quixyi̱b li choxa ut li ruchichꞌochꞌ,
toj ma̱cꞌaꞌ li acui̱mk ut ma̱cꞌaꞌ li pim xban nak li Ka̱cuaꞌ Dios toj ma̱jiꞌ quixqꞌue li hab saꞌ xbe̱n li ruchichꞌochꞌ. Chi moco cuan ta cui̱nk ta̱trabaji̱nk re li chꞌochꞌ.
Caꞌaj cuiꞌ li xbo̱c li chꞌochꞌ natakeꞌ re nak tixtꞌakresi chixjunil li chꞌochꞌ.
Li Ka̱cuaꞌ Dios quixyi̱b li cui̱nk. Quixpacꞌ riqꞌuin chꞌochꞌ ut quirapu saꞌ li ruꞌuj re nak tixqꞌue lix musikꞌ. Ut cuan chic xyuꞌam li cui̱nk.
Li Ka̱cuaꞌ Dios quixqꞌue jun xnaꞌaj li acui̱mk saꞌ li naꞌajej Edén xcꞌabaꞌ saꞌ xjayal na-el cuiꞌ chak li sakꞌe. Ut aran quixqꞌue li cui̱nk li quixyi̱b.
Ut li Ka̱cuaꞌ Dios quixqꞌue chi mokc saꞌ li naꞌajej aꞌan nabal pa̱y ru li cheꞌ li chꞌinaꞌus rilbal joꞌ ajcuiꞌ li cheꞌ li ta̱u̱chi̱nk re teꞌxtzaca. Ut saꞌ xyi lix naꞌaj li acui̱mk li Ka̱cuaꞌ Dios quixqꞌue jun to̱n li cheꞌ li naqꞌuehoc yuꞌam chi junelic. Ut quixqꞌue ajcuiꞌ aran jun to̱n li cheꞌ re xnaubal ru li us ut li incꞌaꞌ us.
Saꞌ li naꞌajej Edén nanumeꞌ jun li nimaꞌ re xtꞌakresinquil li acui̱mk. Ut cuan ca̱hib rok li nimaꞌ nak quixjachi rib ut quicana ca̱hib chi nimaꞌ.
Li xbe̱n li nimaꞌ Pisón xcꞌabaꞌ. Aꞌan li nanumeꞌ saꞌ li tenamit Havila xcꞌabaꞌ bar cuan cuiꞌ li oro.
Li oro li cuan saꞌ li naꞌajej aꞌan kꞌaxal cha̱bil. Cuan ajcuiꞌ aran cuib pa̱y ru li terto̱quil pec bedelio ut ónice xcꞌabaꞌeb.
Li xcab li nimaꞌ Gihón xcꞌabaꞌ. Aꞌan li nanumeꞌ saꞌ li tenamit Cus.
Li rox li nimaꞌ Tigris xcꞌabaꞌ. Aꞌan li naxic saꞌ releb sakꞌe saꞌ li tenamit Asiria. Li xca̱ li nimaꞌ aꞌan Éufrates xcꞌabaꞌ.
Li Ka̱cuaꞌ Dios quixqꞌue li cui̱nk saꞌ xnaꞌaj li acui̱mk aran Edén re nak aꞌan ta̱ilok re ut tixtrabaji li chꞌochꞌ.
Ut li Dios quixye re li cui̱nk: —Naru nacalou li ru chixjunil li cheꞌ li cuan.
Caꞌaj cuiꞌ ru li cheꞌ li re xnaubal ru li us ut li incꞌaꞌ us incꞌaꞌ naru nacalou, xban nak saꞌ li cutan nak ta̱lou aꞌan relic chi ya̱l tatca̱mk, chan li Dios.
Li Ka̱cuaꞌ Dios quixye nak incꞌaꞌ us ta̱cua̱nk li cui̱nk xjunes. —Tinqꞌue junak rochben re ta̱tenkꞌa̱nk re, chan.
Li Ka̱cuaꞌ Dios quixyi̱b riqꞌuin chꞌochꞌ chixjunil li xul cuanqueb saꞌ li pim. Quixyi̱b ajcuiꞌ chixjunileb li xul li nequeꞌrupupic. Quixcꞌameb chak li xul riqꞌuin laj Adán re nak ta̱ril chanru lix cꞌabaꞌeb tixqꞌue. Ut laj Adán quixqꞌueheb xcꞌabaꞌeb chixjunileb li xul.
Quixqꞌue xcꞌabaꞌeb chixjunileb li queto̱mk joꞌ ajcuiꞌ li xul li cuanqueb saꞌ qꞌuicheꞌ ut eb li xul li nequeꞌrupupic. Ut toj ma̱cꞌaꞌ junak rochben re ta̱tenkꞌa̱nk re laj Adán.
Li Ka̱cuaꞌ Dios quixcuartesi laj Adán. Nak sa xcuara laj Adán, li Dios quirisi jun xbakel, costilla xcꞌabaꞌ. Ut quixtzꞌap ru chi us lix tibel li bar quirisi cuiꞌ lix costilla.
Li Ka̱cuaꞌ Dios quixyi̱b jun li ixk riqꞌuin li costilla li quirisi riqꞌuin li cui̱nk. Ut quixqꞌue li ixk aꞌan chokꞌ rochben li cui̱nk.
Nak laj Adán quiril li ixk, quixye: —Li ixk aꞌin riqꞌuin lin bakel ut riqꞌuin lin tibel yi̱banbil. Ut lix cꞌabaꞌ ta̱qꞌuema̱nk, aꞌan ixk xban nak riqꞌuin li cui̱nk isinbil, chan.
Joꞌcan nak li cui̱nk tixcanab lix naꞌ ut lix yucuaꞌ. Ut tixlakꞌab rib riqꞌuin li rixakil. Ut junajakeb chic chi ribileb rib.
Laj Adán ut li rixakil tꞌustꞌu̱queb nak cuanqueb. Ut incꞌaꞌ nequeꞌxuta̱nac.
Li cui̱nk naxkꞌet ra̱tin li DiosLi cꞌantiꞌ kꞌaxal cuiꞌchic cuan xnaꞌleb chiruheb chixjunileb li xul li quixyoꞌobtesi li Ka̱cuaꞌ Dios. Kꞌaxal se̱b xchꞌo̱l chixba̱nunquil li incꞌaꞌ us. Li cꞌantiꞌ quixye re li ixk: —¿Ma relic chi ya̱l nak li Dios quixye e̱re nak incꞌaꞌ naru te̱lou li ru chixjunileb li cheꞌ li cuan saꞌ xnaꞌaj li acui̱mk?—
Ut li ixk quixye re li cꞌantiꞌ: —Naru takalou ru chixjunil li cheꞌ cuan saꞌ xnaꞌaj li acui̱mk.
Caꞌaj cuiꞌ li ru li cheꞌ li cuan saꞌ xyi incꞌaꞌ naru nakalou. Li Dios quixye ke nak incꞌaꞌ naru nakalou li ru aꞌan chi moco takachꞌeꞌ. “Cui te̱lou ru li cheꞌ aꞌan, texca̱mk”, chan ke.
Tojoꞌnak li cꞌantiꞌ quixye re li ixk: —Incꞌaꞌ. Relic chi ya̱l nak incꞌaꞌ texca̱mk.
Li Dios naxnau nak jokꞌe te̱lou ru li cheꞌ, te̱nau chic chixjunil. Chanchanakex chic li Dios. Te̱nau chic cꞌaꞌru li us ut cꞌaꞌru li incꞌaꞌ us, chan.
Ut li ixk quiril nak li ru li cheꞌ sa xloubal. Chꞌinaꞌus na-iloc ru li cheꞌ. Ut quixra ru xloubal re nak cua̱nk chic xnaꞌleb. Quixsicꞌ ru li cheꞌ. Quixlou ut quixqꞌue ajcuiꞌ re lix be̱lom. Ut chi xcabichaleb queꞌxlou ru li cheꞌ.
Tojoꞌnak chi xcabichaleb queꞌxnau chic cꞌaꞌru li us ut cꞌaꞌru li incꞌaꞌ us. Queꞌxqꞌue retal nak tꞌustꞌu̱queb. Queꞌxboj xak li cheꞌ higuera xcꞌabaꞌ chokꞌ ru̱chileb li rakꞌ. Ut riqꞌuin aꞌan queꞌxtzꞌap ribeb.
Nak ac x-ecuu chic, queꞌrabi nak yo̱ chi be̱c li Ka̱cuaꞌ Dios saꞌ xnaꞌaj li acui̱mk. Li cui̱nk rochben li rixakil queꞌxmuk rib chiru li Ka̱cuaꞌ Dios saꞌ xya̱nkeb li cheꞌ.
Li Ka̱cuaꞌ Dios quixbok li cui̱nk ut quixye re: —Adán, ¿bar cuancat?—
Ut laj Adán quichakꞌoc ut quixye: —Xcuabi nak yo̱cat chi be̱c saꞌ xnaꞌaj li acui̱mk. Ut xinxucuac xban nak tꞌustꞌu̱quin. Xinmuk cuib cha̱cuu, chan.
Li Dios quixye re: —¿Ani xyehoc a̱cue nak tꞌustꞌu̱cat? ¿Ma xalou ru li cheꞌ li xinye a̱cue nak incꞌaꞌ ta̱lou? chan.
Quichakꞌoc li cui̱nk ut quixye: —Li ixk li xaqꞌue chokꞌ cuochben, aꞌan xqꞌuehoc cue li ru li cheꞌ. Ut xinlou, chan.
Tojoꞌnak li Ka̱cuaꞌ Dios quixye re li ixk: —¿Cꞌaꞌru xaba̱nu?— Ut quichakꞌoc li ixk ut quixye: —Li cꞌantiꞌ xbalakꞌin cue. Xban aꞌan nak xinlou ru li cheꞌ, chan.
Tojoꞌnak li Ka̱cuaꞌ Dios quixye re li cꞌantiꞌ: —Xban nak xaba̱nu aꞌin, tzꞌekta̱nanbilakat chic chiruheb chixjunileb li xul. Ta̱jucuqui a̱cuib ut chiru a̱saꞌ chic tatbe̱k. Chꞌochꞌ chic ta̱lou chi junelic.—
Li Dios quixye ajcuiꞌ re li cꞌantiꞌ: —La̱in tinqꞌue raylal saꞌ e̱ya̱nk re nak xicꞌ chic te̱ril e̱rib la̱at ut li ixk. Xicꞌ teꞌril rib la̱ cualal a̱cꞌajol riqꞌuineb li ralal xcꞌajol li ixk. Saꞌ junak cutan la̱at ta̱rahobtesi li rit rok junak reheb li ralal xcꞌajol li ixk, ut aꞌan tixpuqꞌui la̱ jolom.Saꞌ li versículo 3:15 yo̱ chi a̱tinac chirix chanru nak laj tza tixrahobtesi li Cristo ut chanru nak li Cristo ta̱numta̱k saꞌ xbe̱n laj tza.
Ut li Dios quixye re li ixk: —Kꞌaxal cuiꞌchic nabal li raylal tinqꞌue saꞌ a̱be̱n nak cua̱nkat chi yaj aj ixk. Riqꞌuin raylal teꞌyoꞌla̱k la̱ cocꞌal. Ut ta̱cuaj nak cua̱nk la̱ be̱lom a̱cuiqꞌuin ut aꞌan ta̱takla̱nk a̱cue.
Ut li Dios quixye re laj Adán: —Xban nak xapa̱b re la̱ cuixakil ut xalou ru li cheꞌ li xinye a̱cue nak incꞌaꞌ ta̱lou, a̱ma̱c la̱at nak tzꞌekta̱nanbilak chic li chꞌochꞌ chi junelic. Ra sa chic nak ta̱tau la̱ tzacae̱mk joꞌ najtil tatcua̱nk saꞌ ruchichꞌochꞌ.
Qꞌuix ut pim ta̱e̱lk chiru li chꞌochꞌ. Ut la̱at ta̱tzaca li acui̱mk li ta̱e̱lk saꞌ li chꞌochꞌ li ta̱cꞌanjela ru.
Cau tattrabajik ut riqꞌuin la̱ tikob tatcuaꞌak. Joꞌcaꞌin nak tatcua̱nk toj retal tatca̱mk ut tatsukꞌi̱k cuiꞌchic chꞌochꞌ. Pacꞌbil chꞌochꞌ oquenakat chak ut chꞌochꞌ ajcuiꞌ tatsukꞌi̱k nak tat-osokꞌ, chan li Dios re laj Adán.
Ut laj Adán quixqꞌue xEva chokꞌ xcꞌabaꞌ li rixakil xban nak aꞌan xbe̱n xnaꞌeb chixjunil li toj teꞌyoꞌla̱k.
Ut li Ka̱cuaꞌ Dios quixyi̱b rakꞌ li cui̱nk ut li ixk riqꞌuin rix xul ut quixtikibeb.
Quixye li Ka̱cuaꞌ Dios: —Anakcuan li cui̱nk juntakꞌe̱t chic kiqꞌuin la̱o. Naxnau chic li us ut li incꞌaꞌ us. Tento takisi saꞌ li naꞌajej Edén re nak incꞌaꞌ tixsicꞌ ut tixlou ru li cheꞌ li naqꞌuehoc junelic yuꞌam, ut ta̱cua̱nk lix yuꞌam chi junelic, chan.
Joꞌcan nak li Dios quirisiheb saꞌ li naꞌajej Edén ut quixqꞌue chixtrabajinquil ru li chꞌochꞌ li quipaqꞌueꞌ cuiꞌ.
Li Dios quirisiheb li cui̱nk ut li ixk. Quixqꞌueheb li querubines aran saꞌ releb sakꞌe saꞌ li naꞌajej Edén. Quixqꞌueheb saꞌ li oqueba̱l re li naꞌajej re nak teꞌril nak ma̱ ani ta̱oc. Ut quixqꞌue jun li chꞌi̱chꞌ yo̱ xxamlel ut yo̱ xsutinquil rib yalak bar re xrambal ru li be re nak ma̱ ani ta̱oc cuan cuiꞌ li cheꞌ li naqꞌuehoc junelic yuꞌam.
Laj Caín ut laj AbelLaj Adán quicuan riqꞌuin lix Eva. Ut lix Eva quicana chi yaj aj ixk. Nak quiyoꞌla li cꞌulaꞌal, aj Caín queꞌxqꞌue chokꞌ xcꞌabaꞌ. Lix Eva quixye: —Saꞌ xcꞌabaꞌ li Ka̱cuaꞌ Dios cuan jun lin chꞌina al, chan.
Chirix aꞌan quicuan jun chic lix cꞌulaꞌal aj Abel xcꞌabaꞌ. Laj Abel, aꞌan aj qꞌuiresihom carner ut laj Caín, aꞌan aj acuinel.
Quicuulac xkꞌehil nak quixqꞌue lix mayej laj Caín chiru li Ka̱cuaꞌ Dios. Lix mayej, aꞌan ru li racui̱mk.
Ut laj Abel quixqꞌue ajcuiꞌ chokꞌ xmayej li xbe̱n ral lix carner. Quixsicꞌ ru li kꞌaxal cha̱bil saꞌ xya̱nkeb. Ut li Ka̱cuaꞌ Dios quisahoꞌ saꞌ xchꞌo̱l riqꞌuin laj Abel ut quixcꞌul lix mayej.
Abanan incꞌaꞌ quisahoꞌ xchꞌo̱l riqꞌuin laj Caín ut incꞌaꞌ quixcꞌul lix mayej. Cꞌajoꞌ nak quijoskꞌoꞌ laj Caín ut quipoꞌ li ru.
Ut li Dios quixye: —¿Cꞌaꞌut nak yo̱ a̱joskꞌil, Caín? ¿Cꞌaꞌut nak joskꞌ la̱ cuu?
¿Ma incꞌaꞌ ta biꞌ ta̱qꞌuehekꞌ a̱lokꞌal cui us ta̱ba̱nu? Cui incꞌaꞌ us ta̱ba̱nu, yo̱cat xqꞌuebal a̱cuib chi a̱le̱c ut li ma̱c ta̱numta̱k saꞌ a̱be̱n. Abanan cua̱nk raj a̱cuanquil re nak la̱at tatnumta̱k saꞌ xbe̱n li ma̱c, chan li Dios re laj Caín.
Saꞌ jun li cutan laj Caín quixye re li ri̱tzꞌin: —Yoꞌo saꞌ cꞌaleba̱l, chan re. Ut nak ac cuanqueb saꞌ li cꞌaleba̱l laj Caín quixcamsi laj Abel.
Li Dios quixye re laj Caín: —¿Bar cuan la̱ cui̱tzꞌin?— Laj Caín quixye: —Incꞌaꞌ ninnau. ¿Ma la̱in ta biꞌ aj ilol re li cui̱tzꞌin? chan.
Li Dios quixye ajcuiꞌ re: —¿Cꞌaꞌru xaba̱nu? Lix quiqꞌuel la̱ cui̱tzꞌin xahoy chiru chꞌochꞌ yo̱ chi kꞌoko̱nc chicuu.
Anakcuan tzꞌekta̱nanbilakat xban li chꞌochꞌ x-ucꞌac re lix quiqꞌuel la̱ cui̱tzꞌin xacamsi.
Nak ta̱trabaji li chꞌochꞌ, incꞌaꞌ chic ta̱u̱chi̱nk la̱ cuacui̱mk. Ta̱beni a̱cuib saꞌ xbe̱n li ruchichꞌochꞌ. Yalak bar a̱cue a̱cuu. Ut ma̱ jaruj tathila̱nk, chan li Dios re.
Ut quixye laj Caín re li Ka̱cuaꞌ Dios: —Kꞌaxal ra xtojbal rix li ma̱c li xinba̱nu. Ma̱min tincuy.
Xina̱cuisi saꞌ li naꞌajej aꞌin ut incꞌaꞌ chic tina̱cuil. Junes xbeninquil cuib aj chic tinba̱nu saꞌ ruchichꞌochꞌ. Ut yalak ani ta̱taꞌok cue, tinixcamsi, chan.
Li Dios quixye re: —Li ani ta̱camsi̱nk a̱cue, aꞌan cuukub sut xtojbal rix lix ma̱c tinqꞌue, chan. Chirix aꞌan li Dios quixqꞌue jun li retalil laj Caín re nak yalak ani ta̱taꞌok re incꞌaꞌ tixcamsi.
Qui-el laj Caín chiru li Ka̱cuaꞌ Dios. Ut co̱ chi cua̱nc saꞌ jun li naꞌajej Nod xcꞌabaꞌ li cuan saꞌ releb sakꞌe re li Edén.
Eb li ralal xcꞌajol laj CaínLaj Caín quicuan riqꞌuin li rixakil. Li ixk aꞌan quicana chi yaj aj ixk. Lix cꞌulaꞌal li quiyoꞌla, aj Enoc queꞌxqꞌue chokꞌ xcꞌabaꞌ. Laj Caín quixyi̱b jun li tenamit ut Enoc quixqꞌue chokꞌ xcꞌabaꞌ li tenamit xban nak aꞌan xcꞌabaꞌ li ralal.
Laj Enoc quicuan jun ralal aj Irad xcꞌabaꞌ. Laj Irad, aꞌan xyucuaꞌ laj Mehujael; ut laj Mehujael, aꞌan xyucuaꞌ laj Metusael; ut laj Metusael, aꞌan xyucuaꞌ laj Lamec.
Laj Lamec quicuan cuib li rixakil. Li jun xAda xcꞌabaꞌ ut li jun chic xZila xcꞌabaꞌ.
Ut lix Ada quicuan jun lix cꞌulaꞌal. Aj Jabal queꞌxqꞌue chokꞌ xcꞌabaꞌ. Eb li ralal xcꞌajol laj Jabal, aꞌaneb li queꞌcuan saꞌ eb li muheba̱l yi̱banbil riqꞌuin tꞌicr. Ut eb aꞌan aj qꞌuiresinel xul.
Laj Jabal quicuan jun ri̱tzꞌin aj Jubal xcꞌabaꞌ. Eb li ralal xcꞌajol laj Jubal, aꞌaneb li nequeꞌchꞌeꞌoc arpa ut xo̱lb.
Lix Zila quicuan ajcuiꞌ jun lix cꞌulaꞌal. Aj Tubal-caín queꞌxqꞌue chokꞌ xcꞌabaꞌ. Laj Tubal-caín, aꞌan aj tenol chꞌi̱chꞌ. Ut li chꞌi̱chꞌ li naxtrabaji, aꞌan bronce ut hierro. Laj Tubal-caín quicuan jun li ranab xNaama xcꞌabaꞌ.
Saꞌ jun li cutan laj Lamec quixye reheb li rixakil:—Cherabihak li oc cue chixyebal e̱re, la̱at Ada ut la̱at Zila. La̱ex, cuixakilex, abihomak li cꞌaꞌru tinye. Xincamsi jun li cui̱nk xban nak xinixyocꞌ. Xma̱c nak xinixsacꞌ, xincamsi aꞌan.
Cui cuukub sut tixtoj rix xma̱c li ani ta̱camsi̱nk re laj Caín, li ani ta̱chꞌeꞌok cue la̱in, lix tojbal rix lix ma̱c laje̱b xca̱cꞌa̱l cua chi cuukutk chic tixcꞌul, chan laj Lamec reheb li rixakil.
Ut laj Adán quicuan cuiꞌchic riqꞌuin li rixakil. Li rixakil quicuan jun chic lix cꞌulaꞌal. Aj Set quixqꞌue chokꞌ xcꞌabaꞌ. Li ixk quixye: —Li Dios quixqꞌue jun chic lin cꞌulaꞌal chokꞌ re̱kaj laj Abel li quixcamsi laj Caín, chan.
Ut mokon chic laj Set quicuan jun li ralal. Aj Enós quixqꞌue chokꞌ xcꞌabaꞌ. Nak ac cuan chic laj Enós, queꞌxtiquib xchꞌutubanquileb rib re xlokꞌoninquil li Dios.
Eb li ralal xcꞌajol laj AdánAꞌan aꞌin li hu li tzꞌi̱banbil cuiꞌ li retalileb li ralal xcꞌajol laj Adán. Nak li Dios quixyoꞌobtesi li cui̱nk, quixyi̱b joꞌ riloba̱l aꞌan.
Cui̱nk ut ixk nak quixyoꞌobtesiheb ut quirosobtesiheb. Cristian quixqꞌue chokꞌ xcꞌabaꞌeb.
Ac cuan jun ciento riqꞌuin laje̱b xcaꞌcꞌa̱l (130) chihab re laj Adán nak quiyoꞌla li rox ralal. Li ralal chanchan ajcuiꞌ na-iloc laj Adán. Aj Set quixqꞌue chokꞌ xcꞌabaꞌ.
Chirix lix yoꞌlajic laj Set, cuakxakib ciento (800) chihab chic quicuan laj Adán ut toj queꞌcuan chic ralal ut xrabin.
Bele̱b ciento riqꞌuin laje̱b xcaꞌcꞌa̱l (930) chihab cuan re laj Adán nak quicam.
Ac cuan jun ciento riqꞌuin o̱b (105) chihab re laj Set nak quiyoꞌla laj Enós li ralal.
Chirix lix yoꞌlajic laj Enós, laj Set quicuan cuakxakib ciento riqꞌuin cuukub (807) chihab chic. Ut toj queꞌcuan chic ralal ut xrabin.
Bele̱b ciento riqꞌuin cablaju (912) chihab cuan re laj Set nak quicam.
Laje̱b roꞌcꞌa̱l (90) chihab cuan re laj Enós nak quiyoꞌla laj Cainán li ralal.
Chirix lix yoꞌlajic laj Cainán, laj Enós quicuan cuakxakib ciento riqꞌuin oꞌlaju (815) chihab chic. Ut toj queꞌcuan chic ralal ut xrabin.
Bele̱b ciento riqꞌuin o̱b (905) chihab cuan re laj Enós nak quicam.
Laje̱b xca̱cꞌa̱l (70) chihab cuan re laj Cainán nak quiyoꞌla laj Mahalaleel li ralal.
Chirix lix yoꞌlajic laj Mahalaleel laj Cainán quicuan cuakxakib ciento riqꞌuin caꞌcꞌa̱l (840) chihab chic. Ut toj queꞌcuan chic li ralal ut xrabin.
Bele̱b ciento riqꞌuin laje̱b (910) chihab cuan re laj Cainán nak quicam.
O̱b xca̱cꞌa̱l (75) chihab cuan re laj Mahalaleel nak quiyoꞌla laj Jared li ralal.
Chirix lix yoꞌlajic laj Jared, laj Mahalaleel quicuan cuakxakib ciento riqꞌuin oxib xcaꞌcꞌa̱l (823) chihab chic. Ut toj queꞌcuan chic ralal ut xrabin.
Cuakxakib ciento riqꞌuin oꞌlaju roꞌcꞌa̱l (895) chihab cuan re laj Mahalaleel nak quicam.
Jun ciento riqꞌuin cuib xca̱cꞌa̱l (162) chihab cuan re laj Jared nak quiyoꞌla laj Enoc li ralal.
Chirix lix yoꞌlajic laj Enoc, laj Jared quicuan cuakxakib ciento (800) chihab chic. Ut toj queꞌcuan chic ralal ut xrabin.
Bele̱b ciento riqꞌuin cuib xca̱cꞌa̱l (962) chihab cuan re laj Jared nak quicam.
O̱b xca̱cꞌa̱l chihab (65) cuan re laj Enoc nak quiyoꞌla laj Matusalén li ralal.
Chirix lix yoꞌlajic laj Matusalén, laj Enoc quicuan oxib ciento (300) chihab chic. Ut toj queꞌcuan chic ralal ut xrabin. Laj Enoc quicuan chi sum a̱tin riqꞌuin li Dios.
Oxib ciento riqꞌuin o̱b xca̱cꞌa̱l (365) chihab cuan re laj Enoc.
Tzꞌakal re ru lix yuꞌam, ut saꞌ jun li cutan ma̱ ani chic saꞌ ruchichꞌochꞌ xban nak quicꞌameꞌ chi yoꞌyo xban li Dios.
Jun ciento riqꞌuin cuukub roꞌcꞌa̱l chihab (187) cuan re laj Matusalén nak quiyoꞌla laj Lamec li ralal.
Chirix lix yoꞌlajic laj Lamec, laj Matusalén quicuan cuukub ciento riqꞌuin cuib roꞌcꞌa̱l (782) chihab chic. Ut toj queꞌcuan chic ralal ut xrabin.
Laj Matusalén bele̱b ciento riqꞌuin bele̱b xca̱cꞌa̱l (969) chihab cuan re nak quicam.
Jun ciento riqꞌuin cuib roꞌcꞌa̱l (182) chihab cuan re laj Lamec nak quiyoꞌla jun li ralal.
Ut aj Noé quixqꞌue chokꞌ xcꞌabaꞌ. Laj Lamec quixye: —Xban nak li Ka̱cuaꞌ Dios xtzꞌekta̱na li chꞌochꞌ, tento nak totrabajik chi cau riqꞌuin kukꞌ. Ut li al aꞌin toxqꞌue chi hila̱nc caꞌchꞌinak, chan.
Chirix lix yoꞌlajic laj Noé, laj Lamec quicuan o̱b ciento riqꞌuin oꞌlaju roꞌcꞌa̱l (595) chihab chic. Ut toj queꞌcuan chic ralal ut xrabin.
Laj Lamec cuukub ciento riqꞌuin cuuklaju xca̱cꞌa̱l (777) chihab cuan re nak quicam.
Ut nak ac cuan o̱b ciento (500) chihab re laj Noé, queꞌcuan oxib li ralal. Aꞌan aꞌin lix cꞌabaꞌeb: laj Sem, laj Cam, ut laj Jafet.
Lix ma̱usilaleb li cui̱nkNak queꞌoc chi qꞌuia̱nc li cristian saꞌ ruchichꞌochꞌ, quilajeꞌcuan xrabin.
Li ralal xcꞌajol li Dios queꞌril nak chꞌinaꞌus nequeꞌiloc eb li ixk aꞌin ut queꞌxcꞌameb chokꞌ rixakileb.
Li Ka̱cuaꞌ Dios quixye: —Lin musikꞌ incꞌaꞌ ta̱cua̱nk riqꞌuineb chi junelic xban nak yal cristianeb. Incꞌaꞌ najt rok lix yuꞌameb tinqꞌue. Jun ciento riqꞌuin junmay (120) chihab ajcuiꞌ teꞌcua̱nk li cristian junju̱nk saꞌ ruchichꞌochꞌ, chan li Dios.
Saꞌ eb li cutan aꞌan queꞌcuan cui̱nk ni̱nkeb rok. Ut eb li ralal xcꞌajol li Dios quilajeꞌcuan ralal xcꞌajol riqꞌuineb li ixk. Ut li ralal xcꞌajol eb aꞌan ni̱nkeb ajcuiꞌ rokeb. Eb li cui̱nk aꞌan cauheb rib ut naꞌno ruheb.
Li Ka̱cuaꞌ Dios quiril nak yo̱ chi numta̱c lix ma̱queb li cristian saꞌ ruchichꞌochꞌ. Caꞌaj cuiꞌ li ma̱usilal nequeꞌxcꞌoxla.
Ut quiyotꞌeꞌ xchꞌo̱l li Dios nak quixyi̱beb li cristian saꞌ ruchichꞌochꞌ ut cꞌajoꞌ nak quirahoꞌ saꞌ xchꞌo̱l.
Li Ka̱cuaꞌ Dios quixye: —Tebinqꞌue chi osocꞌ li cristian li quinyoꞌobtesiheb, joꞌ ajcuiꞌ chixjunileb li xul li nequeꞌbe̱c ut teꞌosokꞌ li nequeꞌxjucuqui ribeb, joꞌ ajcuiꞌ li nequeꞌrupupic saꞌ choxa. Cꞌajoꞌ nak nayotꞌeꞌ inchꞌo̱l xbaneb. Incꞌaꞌ raj xebinyoꞌobtesi, chan li Dios.
Abanan laj Noé quitokꞌoba̱c ru xban li Dios.
Li jucub cab li quixyi̱b laj NoéLaj Noé aꞌan jun cui̱nk ti̱c xchꞌo̱l. Tzꞌakal re ru lix yuꞌam nak cuan saꞌ xya̱nkeb li ras ri̱tzꞌin ut ti̱c lix yuꞌam chiru li Dios. Aꞌan aꞌin retalil li ralal xcꞌajol laj Noé.
Laj Noé quicuan oxibeb li ralal ut aꞌaneb aꞌin lix cꞌabaꞌeb: laj Sem, laj Cam ut laj Jafet.
Saꞌ li ruchichꞌochꞌ numtajenak li raylal ut li ma̱usilal xban nak eb li cristian incꞌaꞌ chic nequeꞌxcꞌoxla li Dios ut cꞌajoꞌ xyibal ru lix naꞌlebeb.
Li Dios quiril nak kꞌaxal numtajenak li ma̱usilal saꞌ ruchichꞌochꞌ.
Joꞌcan nak quixye re laj Noé: —Tinsach ruheb chixjunil li cristian xban nak xnumta li ma̱c xeꞌxba̱nu. La̱in tinsach ru li ruchichꞌochꞌ chi junaj cua, chan li Dios.
Li Dios quixye ajcuiꞌ re laj Noé: —Ta̱yi̱b junak li jucub cab riqꞌuin cha̱bil cheꞌ joꞌ li ciprés. Ut nabal tasal xsaꞌ ta̱qꞌue. Ta̱tzꞌap chirix ut chi saꞌ riqꞌuin xkꞌol li cheꞌ re nak incꞌaꞌ ta̱oc li haꞌ chi saꞌ.
Joꞌcaꞌin nak ta̱yi̱b, chan li Dios. —Li rok numenak jun ciento riqꞌuin caꞌcꞌa̱l (140) vara. Li ru numenak cuukub xcaꞌcꞌa̱l (27) vara. Lix teram numenak cuaklaju (16) vara.
Ta̱yi̱b li jucub cab chi oxib tikil lix teram. Li bar toxrakekꞌ li rox tikil li jucub cab, aran ta̱canab chi teto chi junaj cua. Li teto ta̱cana̱k, aꞌan ta̱cana̱k chokꞌ junak ventana re nak ta̱oc li cutan chi saꞌ. Lix teram li teto numenak mero vara. Ut toxtzꞌap toj saꞌ xbe̱n. Ut ta̱qꞌue li oqueba̱l chiru.
Ut la̱in tinqꞌue li nimla butꞌi haꞌ saꞌ ruchichꞌochꞌ, re nak teꞌosokꞌ chixjunil li cuanqueb jun sut rubel choxa. Chixjunil li cuanqueb saꞌ ruchichꞌochꞌ talajeꞌca̱mk.
La̱in tinba̱nu jun li contrato a̱cuiqꞌuin. Tat-oc saꞌ li jucub cab la̱at ut eb la̱ cualal ut la̱ cuixakil joꞌ eb ajcuiꞌ li rixakileb la̱ cualal teꞌoc saꞌ li jucub cab.
Ut ta̱cuocsiheb saꞌ li jucub cab caꞌcabakeb li xul junju̱nk te̱lom ut junju̱nk ixk aꞌ yal cꞌaꞌru chi xulil. Teꞌoc re nak teꞌcolekꞌ a̱cuiqꞌuin.
Teꞌoc li xul li nequeꞌrupupic chiru choxa, joꞌ eb ajcuiꞌ li nequeꞌbe̱c saꞌ chꞌochꞌ. Ut teꞌoc ajcuiꞌ li nequeꞌxjucuqui rib saꞌ chꞌochꞌ. Chi caꞌcab aꞌ yal cꞌaꞌru chi xulil teꞌoc saꞌ li jucub cab a̱cuiqꞌuin re nak teꞌcolekꞌ.
Ta̱chꞌutub nabal pa̱y ru li tzacae̱mk ut ta̱cꞌu̱la saꞌ li jucub re nak ta̱cꞌanjelak chokꞌ e̱cua ut xcuaheb ajcuiꞌ li xul, chan li Dios.
Laj Noé quixba̱nu chixjunil joꞌ quiyeheꞌ re xban li Dios.
Li butꞌi haꞌLi Ka̱cuaꞌ Dios quixye re laj Noé, —Anakcuan ocan saꞌ li jucub cab la̱at a̱cuochbeneb la̱ cualal a̱cꞌajol ut la̱ cuixakil, xban nak caꞌaj cuiꞌ la̱at ti̱c a̱chꞌo̱l chicuu saꞌ xya̱nkeb li cristian li cuanqueb saꞌ eb li cutan aꞌin.
Ta̱cuocsi saꞌ li jucub cab cuukutk sumal chi xul li natiꞌeꞌ xtibeleb, te̱lom ut ixk. Ut ta̱cuocsiheb ajcuiꞌ junju̱nk sumalak li xul, li incꞌaꞌ natiꞌeꞌ xtibeleb, te̱lom ut ixk.
Ta̱cuocsi ajcuiꞌ cuukutk sumal li xul li nequeꞌrupupic, tzoꞌ ut tux, re nak cua̱nk riyajileb saꞌ ruchichꞌochꞌ.
Saꞌ cuukub cutan tintakla chak li hab. Ut chiru caꞌcꞌa̱l cutan ut caꞌcꞌa̱l kꞌojyi̱n yo̱k li hab. Chixjunil li cꞌaꞌak re ru quinyoꞌobtesi saꞌ ruchichꞌochꞌ tinsach ruheb, chan li Dios.
Ut laj Noé quixba̱nu chixjunil li quitakla̱c cuiꞌ xban li Dios.
Cuakib ciento (600) chihab cuan re laj Noé nak quicuan li butꞌi haꞌ saꞌ ruchichꞌochꞌ.
Laj Noé qui-oc saꞌ li jucub cab rochbeneb li ralal, li rixakil ut li rixakileb li ralal re xcolbaleb rib chiru li butꞌi haꞌ.
Queꞌoc li xul li natiꞌeꞌ xtibeleb. Ut queꞌoc ajcuiꞌ li xul incꞌaꞌ natiꞌeꞌ xtibeleb. Joꞌ ajcuiꞌ li xul li nequeꞌrupupic. Ut queꞌoc ajcuiꞌ li xul li nequeꞌxjucuqui rib saꞌ chꞌochꞌ.
Chi caꞌcabil queꞌoc li xul saꞌ li jucub riqꞌuin laj Noé, te̱lom ut ixk, joꞌ quiyeheꞌ re laj Noé xban li Dios.
Chixjunileb queꞌoc saꞌ li jucub. Nak quinumeꞌ li cuukub cutan, quiticla li hab ut quichal li butꞌ saꞌ ruchichꞌochꞌ.
Saꞌ eb li cutan aꞌan yalak bar quilajeꞌel chak li haꞌ saꞌ chꞌochꞌ. Ut nak quitehon li choxa, quichal li hab chi kꞌaxal cau. Aꞌin quicꞌulman saꞌ li cuuklaju xbe li xcab po re li chihab aꞌan. Cuakib ciento (600) chihab cuan re laj Noé nak quicꞌulman aꞌin.
Ut quixqꞌue li hab chiru caꞌcꞌa̱l cutan ut caꞌcꞌa̱l kꞌojyi̱n.
Nak toj ma̱jiꞌ naticla li butꞌi haꞌ, laj Noé qui-oc saꞌ li jucub cab rochben li oxib chi ralal, laj Sem, laj Cam, ut laj Jafet. Ut qui-oc ajcuiꞌ li rixakil laj Noé joꞌ eb ajcuiꞌ li rixakileb li oxib chi ralal.
Queꞌoc ajcuiꞌ saꞌ li jucub chixjunileb li xul aꞌ yal cꞌaꞌru chi xulil. Queꞌoc li xul li nequeꞌcuan saꞌ qꞌuicheꞌ joꞌ ajcuiꞌ li queto̱mk. Queꞌoc ajcuiꞌ li xul li nequeꞌrupupic chiru choxa joꞌ ajcuiꞌ li nequeꞌxjucuqui rib saꞌ chꞌochꞌ.
Chixjunil li xul queꞌoc saꞌ li jucub riqꞌuin laj Noé chi ju̱nk sumal.
Queꞌoc ju̱nk sumal li xul aꞌ yal cꞌaꞌru chi xulil joꞌ quiyeheꞌ re laj Noé xban li Dios. Ut nak xeꞌoc chixjunileb, li Dios quixtzꞌap li oqueba̱l re li jucub.
Caꞌcꞌa̱l cutan quixqꞌue li hab. Quichamoꞌ li butꞌ ut li jucub quicuaclesi̱c xban li haꞌ ut napamamnac saꞌ xbe̱n li haꞌ.
Kꞌaxal cuiꞌchic quichamoꞌ li butꞌ saꞌ xbe̱n li ruchichꞌochꞌ. Ut li jucub napamamnac saꞌ xbe̱n li haꞌ.
Quinujac li haꞌ saꞌ xbe̱n li ruchichꞌochꞌ toj retal queꞌmukun chixjunileb li ni̱nki tzu̱l.
Numenak cuukub vara xchamal li haꞌ saꞌ xbe̱neb li tzu̱l.
Ut quilajeꞌcam chixjunileb li cuanqueb saꞌ ruchichꞌochꞌ. Queꞌcam chixjunil li xul li nequeꞌrupupic, joꞌ ajcuiꞌ li nequeꞌxjucuqui rib saꞌ chꞌochꞌ. Queꞌcam li queto̱mk joꞌ eb ajcuiꞌ li nequeꞌcuan saꞌ qꞌuicheꞌ. Ut chixjunileb li cristian queꞌcam.
Chixjunileb li cuanqueb saꞌ ruchichꞌochꞌ, quilajeꞌcam. Eb li cristian joꞌ eb ajcuiꞌ li xul quilajeꞌcam.
Joꞌcaꞌin nak li Dios quixsach ruheb chixjunileb li cuanqueb saꞌ ruchichꞌochꞌ. Queꞌosoꞌ li cristian joꞌ ajcuiꞌ chixjunileb li xul li nequeꞌbe̱c. Joꞌ ajcuiꞌ li nequeꞌxjucuqui rib ut li nequeꞌrupupic chiru choxa. Caꞌaj chic laj Noé quicoleꞌ rochbeneb chixjunileb li cuanqueb saꞌ li jucub cab.
Jun ciento riqꞌuin mero ciento cutan quicuan li butꞌ saꞌ xbe̱n li ruchichꞌochꞌ.
Nak quiyama li habLi Dios quixtokꞌoba ru laj Noé joꞌ ajcuiꞌ chixjunileb li xul li cuanqueb saꞌ li jucub cab. Quixtakla jun nimla ikꞌ saꞌ xbe̱n li ruchichꞌochꞌ ut qui-oc chi chakic li haꞌ.
Quixcanab e̱lc li haꞌ saꞌ li chꞌochꞌ ut incꞌaꞌ chic quixqꞌue li hab.
Timil timil quichakic li haꞌ saꞌ ruchichꞌochꞌ. Chiru jun ciento riqꞌuin mero ciento cutan li haꞌ yo̱ chi sa̱c.
Saꞌ li cuuklaju xbe li xcuuk li po re li chihab aꞌan, li jucub cab coxhila̱nk saꞌ xbe̱n li tzu̱l Ararat xcꞌabaꞌ.
Yo̱ chi chakic li haꞌ ut toj saꞌ li xbe̱n li cutan re li xlaje li po quilajeꞌcꞌutun xbe̱n eb li tzu̱l.
Nak ac xnumeꞌ caꞌcꞌa̱l cutan chic laj Noé quixte lix ventanil li jucub cab li quixyi̱b.
Quirachꞌab jun li xul tzꞌok xcꞌabaꞌ. Li xul aꞌan yo̱ chi rupupic saꞌ xbe̱n li haꞌ toj retal nak quichakic li haꞌ saꞌ xbe̱n li chꞌochꞌ.
Mokon chic laj Noé quirachꞌab jun li paloma re nak tixnau ma yo̱ chi chakic li haꞌ saꞌ xbe̱n li chꞌochꞌ.
Li paloma quisukꞌi cuiꞌchic saꞌ li jucub cab xban nak incꞌaꞌ quixtau bar tixcꞌochob rib xban nak toj cuan li haꞌ saꞌ xbe̱n li ruchichꞌochꞌ. Laj Noé quixyeꞌ li rukꞌ. Quixchap li paloma ut quirocsi cuiꞌchic saꞌ li jucub cab.
Quiroybeni cuukub cutan chic ut quirachꞌab cuiꞌchic li paloma re nak tixnau ma yo̱ chi chakic li haꞌ.
Ecuu quisukꞌi chak li paloma. Quixcꞌam chak saꞌ ruch re jun xxak li cheꞌ olivo xcꞌabaꞌ. Chi joꞌcan laj Noé quixnau nak ac yo̱ chi sa̱c li haꞌ saꞌ ruchichꞌochꞌ.
Quiroybeni cuukub cutan chic ut quirachꞌab cuiꞌchic li paloma. Co̱ li paloma ut incꞌaꞌ chic quisukꞌi chak riqꞌuin laj Noé.
Cuakib ciento chihab riqꞌuin jun (601) chihab cuan re laj Noé nak quichakic li haꞌ. Saꞌ li xbe̱n cutan re li xbe̱n po laj Noé quixte lix tzꞌapbal re li jucub cab ut qui-iloc chirix cab. Quiril nak ac xchakic li haꞌ saꞌ ruchichꞌochꞌ.
Saꞌ li cuukub xcaꞌcꞌa̱l (27) xbe li xcab po ac xchakic chi us li ruchichꞌochꞌ.
Li Dios quia̱tinac riqꞌuin laj Noé ut quixye re:
—Anakcuan tat-e̱lk saꞌ li jucub cab a̱cuochben la̱ cuixakil. Ut teꞌe̱lk ajcuiꞌ la̱ cualal rochbeneb li rixakileb.
Ta̱cuisiheb ajcuiꞌ chixjunileb li xul li joꞌ qꞌuial li cuanqueb saꞌ li jucub cab a̱cuochben. Ta̱cuisiheb li xul li nequeꞌrupupic ut eb li xul li nequeꞌbe̱c, joꞌ ajcuiꞌ li xul li nequeꞌxjucuqui rib saꞌ chꞌochꞌ. Teꞌe̱lk re nak teꞌqꞌuia̱nk ut teꞌpucꞌa̱nk saꞌ ruchichꞌochꞌ, chan li Dios.
Ut qui-el laj Noé saꞌ li jucub cab rochben li rixakil. Ut queꞌel ajcuiꞌ li ralal rochbeneb li rixakil.
Queꞌel ajcuiꞌ chixjunileb li xul li nequeꞌrupupic ut li nequeꞌbe̱c, joꞌ eb ajcuiꞌ li xul li nequeꞌxjucuqui rib saꞌ chꞌochꞌ. Quilajeꞌel chi ju̱nk chꞌu̱tal chixjunileb li xul, aꞌ yal cꞌaꞌru chi xulil.
Laj Noé quixyi̱b jun artal riqꞌuin tusbil pec re xlokꞌoninquil li Ka̱cuaꞌ Dios. Ut quixchapeb li xul, li nequeꞌbe̱c joꞌ ajcuiꞌ li nequeꞌrupupic, saꞌ xya̱nkeb li xul li natiꞌeꞌ xtibeleb. Ut quixcꞌateb saꞌ xbe̱n li artal chokꞌ xmayej chiru li Ka̱cuaꞌ Dios.
Lix bo̱c li cꞌatbil mayej quicuulac riqꞌuin li Dios ut quicuulac chiru lix sununquil. Li Dios quixye saꞌ xchꞌo̱l: —Ma̱ jun cua chic tintzꞌekta̱na li ruchichꞌochꞌ xbaneb li cristian. Ac reheb li cristian nak aj ma̱queb. Ma̱ jun sut chic tinsach ruheb chixjunileb li cuanqueb saꞌ ruchichꞌochꞌ riqꞌuin butꞌi haꞌ.
Joꞌ najtil chic ta̱cua̱nk li ruchichꞌochꞌ junelic ta̱cua̱nk li a̱uc. Ta̱cua̱nk kꞌoloc. Ta̱cua̱nk li que ut ta̱cua̱nk li tik. Ta̱cua̱nk li sakꞌehil ut ta̱cua̱nk li habalkꞌe. Ta̱cua̱nk li cutan ut ta̱cua̱nk li kꞌojyi̱n. Incꞌaꞌ teꞌpaltok chiruheb, chan li Dios.
Li Dios quixba̱nu lix contrato riqꞌuin laj NoéLi Dios quirosobtesi laj Noé joꞌ eb ajcuiꞌ li ralal. Ut quixye reheb: —Chicua̱nk e̱cocꞌal ut chexnabalokꞌ toj retal texta̱mk saꞌ chixjunil li ruchichꞌochꞌ, chan li Dios.
—Chixjunileb li xul li cuanqueb saꞌ ruchichꞌochꞌ teꞌxucua̱nk e̱ru. Teꞌxucuak li xul li nequeꞌbe̱c saꞌ chꞌochꞌ, joꞌ ajcuiꞌ li xul li nequeꞌrupupic, joꞌ eb ajcuiꞌ li car li cuanqueb saꞌ li haꞌ, xban nak la̱at chic ta̱cua̱nk a̱cuanquil saꞌ xbe̱neb chixjunileb li xul.
Xinqꞌue e̱re chixjunil li acui̱mk chokꞌ re e̱tzacae̱mk. Anakcuan tinqꞌue ajcuiꞌ e̱re chixjunil li xul. Chixjunil li cꞌaꞌak re ru tinqꞌue chokꞌ re e̱tzacae̱mk.
Abanan la̱ex incꞌaꞌ naru te̱tiu li tib cui incꞌaꞌ nequerisi chi us lix quiqꞌuel xban nak aꞌ lix quiqꞌuel, aꞌan naqꞌuehoc re lix yuꞌam, chan.
Li Dios quixye ajcuiꞌ reheb: —Relic chi ya̱l tinye e̱re, cui junak tixcamsi li ras ri̱tzꞌin, tento nak ta̱cua̱nk re̱kaj. Cui junak xul tixcamsi junak cristian, tento ajcuiꞌ nak ta̱camsi̱k li xul. Ut cui junak cristian tixcamsi junak ras ri̱tzꞌin, tento nak ta̱camsi̱k ajcuiꞌ aꞌan.
Li ani tixcamsi junak ras ri̱tzꞌin, ta̱camsi̱k ajcuiꞌ aꞌan. Xinye aꞌin xban nak la̱in quinyoꞌobtesi li cui̱nk joꞌ li cuiloba̱l la̱in.
Chicua̱nk nabal le̱ cocꞌal ut chexqꞌuia̱nk. Chexta̱mk ut chexnabalokꞌ saꞌ ruchichꞌochꞌ, chan li Dios.
Nak li Dios yo̱ chi a̱tinac riqꞌuin laj Noé ut riqꞌuineb li ralal, quixye ajcuiꞌ reheb:
—Abihomak li cꞌaꞌru tinye e̱re. La̱in tinba̱nu jun li contrato e̱riqꞌuin la̱ex ut riqꞌuineb ajcuiꞌ le̱ ralal e̱cꞌajol.
Ut tinba̱nu ajcuiꞌ li contrato riqꞌuineb chixjunileb li xul. Tinba̱nu riqꞌuineb li xul li nequeꞌrupupic ut li queto̱mk joꞌ ajcuiꞌ li cuanqueb saꞌ qꞌuicheꞌ. Tinba̱nu li contrato riqꞌuineb chixjunileb li xul li queꞌel saꞌ li jucub cab.—
Li Dios quixye ajcuiꞌ: —La̱in tinxakab xcuanquil li contrato li tinba̱nu e̱riqꞌuin. Ma̱ jun sut chic tinsach ruheb li cristian ut eb li xul riqꞌuin butꞌi haꞌ. Incꞌaꞌ chic ta̱osokꞌ li ruchichꞌochꞌ riqꞌuin butꞌi haꞌ.
La̱in tinqꞌue jun retalil li contrato li tinba̱nu e̱riqꞌuin ut riqꞌuineb le̱ ralal e̱cꞌajol joꞌ ajcuiꞌ riqꞌuineb chixjunileb li xul.
La̱in tinqꞌue li xo̱quikꞌab chiru li choxa. Aꞌan li retalil li xinyechiꞌi e̱re ut re li ruchichꞌochꞌ.
La̱in tintakla chak li chok saꞌ xbe̱n li ruchichꞌochꞌ ut la̱ex te̱ril nak ta̱cꞌutu̱nk li xo̱quikꞌab saꞌ li chok.
Relic chi ya̱l nak cua̱nk junelic saꞌ inchꞌo̱l li cꞌaꞌru xinyechiꞌi e̱re la̱ex joꞌ ajcuiꞌ reheb li xul. Ma̱ jun sut chic teꞌosokꞌ chixjunileb li cuanqueb saꞌ ruchichꞌochꞌ riqꞌuin butꞌi haꞌ.
Nak tincuil li xo̱quikꞌab saꞌ li chok, junelic ta̱julticokꞌ cue li cꞌaꞌru quinyechiꞌi chak e̱re joꞌ ajcuiꞌ reheb li xul.
Li xo̱quikꞌab, aꞌan li retalil li contrato xinyechiꞌi chak e̱re joꞌ ajcuiꞌ reheb li xul, chan li Dios nak quia̱tinac riqꞌuin laj Noé.
Laj Noé rochbeneb li ralalEb li ralal laj Noé li queꞌel saꞌ li jucub cab, aꞌaneb aꞌin: laj Sem, laj Cam, ut laj Jafet. Laj Cam, aꞌan lix yucuaꞌ laj Canaán.
Ut riqꞌuineb li oxib chi ralal laj Noé, queꞌtam li cristian saꞌ chixjunil li ruchichꞌochꞌ.
Laj Noé qui-oc chixtrabajinquil li chꞌochꞌ. Nabal to̱n li uvas li quirau saꞌ li chꞌochꞌ.
Laj Noé quirucꞌ li vino, li yi̱banbil riqꞌuin lix yaꞌal li uvas ut quicala. Tꞌantꞌo quicana saꞌ lix muheba̱l chi tꞌustꞌu xban xcalajic.
Laj Cam, xyucuaꞌ laj Canaán, coxtau chi tꞌustꞌu lix yucuaꞌ. Co̱ chirix li muheba̱l chixyebal reheb li ras li cꞌaꞌru quiril.
Joꞌcan nak laj Sem ut laj Jafet queꞌxcꞌam chi helho saꞌ xbe̱neb lix tel jun li tꞌicr re nak teꞌxhel saꞌ xbe̱n lix yucuaꞌeb. Queꞌoc chi kꞌa̱jel ix ut yo̱queb chi iloc chiru re nak incꞌaꞌ teꞌril lix yucuaꞌeb chi tꞌustꞌu.
Laj Noé qui-aj ru ut quinumeꞌ lix calajic. Ut quixqꞌue retal li cꞌaꞌru qui-ux re xban laj Cam li i̱tzꞌinbej.
Laj Noé quixye:—Tzꞌekta̱nanbil taxak chi junaj cua laj Canaán rochbeneb li ralal xcꞌajol ut cheꞌcana̱k ta chokꞌ rahobtesinbil mo̱s riqꞌuineb li asbej.
Abanan aꞌ taxak li Ka̱cuaꞌ Dios chi-osobtesi̱nk re laj Sem, joꞌ eb ajcuiꞌ li ralal xcꞌajol. Ut laj Canaán rochbeneb li ralal xcꞌajol teꞌcana̱k chokꞌ rahobtesinbil mo̱s.—
Ut quixye ajcuiꞌ:—Li Dios chixnimobresi xcuanquil laj Jafet ut chixqꞌue taxak nabal li ralal xcꞌajol. Ut eb aꞌan cheꞌcua̱nk saꞌ lix muheba̱leb li ralal xcꞌajol laj Sem. Li ralal xcꞌajol laj Canaán cheꞌcana̱k chokꞌ rahobtesinbil mo̱s riqꞌuineb li ralal xcꞌajol laj Sem, chan laj Noé.
Nak ac xnumeꞌ li butꞌi haꞌ, laj Noé quixba̱nu oxib ciento riqꞌuin mero ciento (350) chihab chic.
Bele̱b ciento riqꞌuin mero ciento (950) chihab cuan re laj Noé nak quicam.
Eb li ralal xcꞌajol laj NoéAꞌaneb aꞌin lix cꞌabaꞌeb li oxib chi ralal laj Noé: laj Sem, laj Cam ut laj Jafet. Aꞌaneb li queꞌcuan ralal xcꞌajol nak ac xnumeꞌ li butꞌi haꞌ.
Aꞌaneb aꞌin lix cꞌabaꞌeb li ralal laj Jafet: laj Gomer, laj Magog, laj Madai, laj Javán, laj Tubal, laj Mesec, ut laj Tiras.
Aꞌaneb aꞌin lix cꞌabaꞌ eb li ralal laj Gomer: laj Askenaz, laj Rifat, ut laj Togarma.
Ut aꞌaneb aꞌin lix cꞌabaꞌeb li ralal laj Javán: laj Elisa, laj Tarsis, laj Quitim ut laj Dodanim.
Eb li ralal xcꞌajol laj Jafet queꞌtam chire li palau. Jalan jala̱nk lix tenamiteb joꞌ eb ajcuiꞌ li ra̱tinoba̱l jalan jala̱nk saꞌ li junju̱nk chi tenamit.
Aꞌaneb aꞌin lix cꞌabaꞌeb li ralal laj Cam: laj Cus, laj Mizraim, laj Fut, ut laj Canaán.
Ut aꞌaneb aꞌin lix cꞌabaꞌeb li ralal laj Cus: laj Seba, laj Havila, laj Sabta, laj Raama ut laj Sabteca. Aꞌaneb aꞌin lix cꞌabaꞌeb li ralal laj Raama: laj Seba ut laj Dedán.
Laj Cus quicuan jun chic li ralal aj Nimrod xcꞌabaꞌ. Aꞌan li xbe̱n cui̱nk qui-oc chi takla̱nc saꞌ xbe̱n li tenamit xban nak kꞌaxal nim xcuanquil.
Laj Nimrod cau rib chi yohoc xban nak natenkꞌa̱c xban li Ka̱cuaꞌ Dios. Joꞌcan nak nayeman nak junak cristian cau rib, aꞌan chanchan laj Nimrod li cau rib chi yohoc xban nak natenkꞌa̱c xban li Ka̱cuaꞌ Dios.
Laj Nimrod quicuan xcuanquil saꞌ xbe̱neb li tenamit Babel, Erec, Acad ut Calne. Eb li tenamit aꞌan cuanqueb xcue̱nt Sinar.
Nak qui-el saꞌ li naꞌajej aꞌan, laj Nimrod co̱ saꞌ jun nimla naꞌajej Asiria xcꞌabaꞌ. Ut aran quixyi̱b eb li tenamit Nínive, Rehobot, ut Cala.
Saꞌ xyi eb li cuib chi tenamit Cala ut Nínive quixyi̱b li tenamit Resén. Li oxib chi tenamit aꞌin queꞌjunajoꞌ ru ut quicana jun chi nimla tenamit.
Aꞌaneb aꞌin lix cꞌabaꞌeb li ralal laj Mizraim: laj Ludim, laj Anamim, laj Lehabim, ut laj Naftuhim.
Ut laj Patrusim, laj Casluhim ut laj Caftorim ralaleb ajcuiꞌ laj Mizraim. Eb li ralal xcꞌajol laj Casluhim, aꞌaneb laj filisteo.
Laj Canaán, aꞌan xyucuaꞌ laj Sidón ut laj Het. Laj Sidón, aꞌan li asbej.
Laj Canaán, aꞌan ajcuiꞌ lix yucuaꞌeb laj jebuseo, laj amorreo, laj gergeseo,
joꞌ ajcuiꞌ laj heveo, laj araceo, ut laj sineo.
Ut laj Canaán, aꞌan xyucuaꞌeb ajcuiꞌ laj arvadeo, laj zemareo, ut laj hamateo. Eb li ralal xcꞌajol laj Canaán aj cananeo nayeman reheb. Eb aꞌan queꞌxjeqꞌui rib ut queꞌco̱eb chi najt.
Lix chꞌochꞌeb laj cananeo naticla chak toj Sidón ut naxtau xnuba̱l li tenamit Gaza li nacana saꞌ xjayal Gerar. Ut naxtau ajcuiꞌ lix nuba̱l li tenamit Lasa li nacana saꞌ xjayal li ca̱hib chi tenamit Sodoma, Gomorra, Adma ut Zeboim.
Chixjunil li cꞌabaꞌej tzꞌi̱banbil arin, aꞌaneb li ralal xcꞌajol laj Cam. Aꞌaneb chꞌutchꞌu̱queb saꞌ lix tenamiteb ut jalan jala̱nk li ra̱tinoba̱leb saꞌ li junju̱nk chi tenamit.
Laj Sem, aꞌan li ras laj Jafet. Laj Sem, aꞌan lix xeꞌto̱nil yucuaꞌeb li ralal xcꞌajol laj Heber. Ut queꞌcuan ralal.
Aꞌaneb aꞌin lix cꞌabaꞌeb li ralal laj Sem: laj Elam, laj Asur, laj Arfaxad, laj Lud, ut laj Aram.
Aꞌaneb aꞌin lix cꞌabaꞌeb li ralal laj Aram: laj Uz, laj Hul, laj Geter ut laj Mas.
Laj Arfaxad quicuan li ralal laj Sala xcꞌabaꞌ. Ut laj Sala quicuan li ralal laj Heber xcꞌabaꞌ.
Laj Heber quicuan cuib li ralal. Li jun, aꞌan laj Peleg. Queꞌxqꞌue lix cꞌabaꞌ chi joꞌcan xban nak saꞌ li cutan aꞌan queꞌjeqꞌui̱c li cristian saꞌ ruchichꞌochꞌ. Li ri̱tzꞌin laj Peleg, aꞌan aj Joctán xcꞌabaꞌ.
Laj Joctán quicuan nabal li ralal. Aꞌaneb aꞌin lix cꞌabaꞌeb: laj Almodad, laj Selef, laj Hazar-mavet ut laj Jera,
joꞌ ajcuiꞌ laj Adoram, laj Uzal, laj Dicla,
ut laj Obal, laj Abimael, ut laj Seba,
joꞌ ajcuiꞌ laj Ofir, laj Havila ut laj Jobab. Aꞌaneb aꞌin chixjunileb li ralal laj Joctán.
Eb aꞌan queꞌcuan saꞌ li chꞌochꞌ li naticla chak toj Mesa ut nacuulac toj saꞌ li tzu̱l bar nacana cuiꞌ li tenamit Sefar. Li naꞌajej aꞌan nacana saꞌ xjayal li na-el cuiꞌ chak li sakꞌe.
Chixjunileb li tzꞌi̱banbileb xcꞌabaꞌ arin, aꞌaneb li ralal xcꞌajol laj Sem. Aꞌaneb chꞌutchꞌu̱queb saꞌ lix tenamiteb ut jalan jala̱nk li ra̱tinoba̱leb saꞌ li junju̱nk chi tenamit.
Arin quirakeꞌ xtzꞌi̱banquil lix cꞌabaꞌeb li ralal xcꞌajol laj Noé ut chanru nak queꞌtam chak saꞌ ruchichꞌochꞌ. Nak quinumeꞌ li butꞌi haꞌ, li ralal xcꞌajol laj Noé queꞌtam. Ut queꞌxjeqꞌui rib saꞌ xbe̱n li ruchichꞌochꞌ.
Li nimla ochoch torre xcꞌabaꞌ re BabelSaꞌ eb li cutan aꞌan jun ajcuiꞌ li ra̱tinoba̱leb li cristian saꞌ ruchichꞌochꞌ.
Li cristian queꞌco̱eb chi cua̱nc saꞌ li naꞌajej li cuan bar na-el cuiꞌ chak li sakꞌe. Queꞌxtau jun chꞌochꞌ helho ru. Li chꞌochꞌ aꞌan cuan xcue̱nt Sinar. Ut aran queꞌcana.
Ut queꞌxye chi ribileb rib: —Takayi̱b li xan ut takacꞌat chi us, chanqueb. Ut li xan quicꞌanjelac chokꞌ re̱kaj li pec. Ut li quicꞌanjelac re xletzbal li xan, aꞌan li na-el saꞌ chꞌochꞌ asfalto xcꞌabaꞌ.
Queꞌxye: —Kayi̱bak junak katenamit ut jun li nimla ochoch najt xteram torre xcꞌabaꞌ. Ta̱cuulak toj saꞌ choxa li xnajtil xteram. Chi joꞌcaꞌin teꞌxqꞌue retal saꞌ chixjunil li ruchichꞌochꞌ nak la̱o cuan kanaꞌleb. Ut incꞌaꞌ takajeqꞌui kib yalak bar saꞌ ruchichꞌochꞌ, chanqueb.
Ut li Ka̱cuaꞌ Dios quicube chak ut quiril li cꞌaꞌru yo̱queb chixba̱nunquil li cui̱nk. Quiril li tenamit ut li torre li yo̱queb chixyi̱banquil.
Li Ka̱cuaꞌ Dios quixye: —Li tenamit jun ajcuiꞌ ut jun ajcuiꞌ li ra̱tinoba̱leb. Xeꞌxtiquib xba̱nunquil li nimla ochoch aꞌin. Cui joꞌcaꞌin lix naꞌlebeb, ma̱min teꞌxcanab xba̱nunquil li cꞌaꞌru nequeꞌxcꞌoxla.
Joꞌcan ut tocubek ut takajal li ra̱tinoba̱leb re nak incꞌaꞌ teꞌxtau ru li cꞌaꞌru teꞌxye chi ribileb rib, chan li Dios.
Ut li Dios quixjeqꞌuiheb ru saꞌ chixjunil li ruchichꞌochꞌ ut queꞌxcanab li trabaj li queꞌxtiquib xba̱nunquil.
Xban nak li Dios quixjal li ra̱tinoba̱leb, queꞌxqꞌue chokꞌ xcꞌabaꞌ li naꞌajej aꞌan Babel. Ut li Ka̱cuaꞌ Dios quixjeqꞌuiheb chixjunil li cristian yalak bar saꞌ ruchichꞌochꞌ.
Eb li ralal xcꞌajol laj SemAꞌan aꞌin li retalileb li ralal xcꞌajol laj Sem. Jun ciento (100) chihab cuan re laj Sem nak quiyoꞌla laj Arfaxad li ralal. Ac cuib chihab chic xnumic li butꞌi haꞌ nak quiyoꞌla.
Ut toj queꞌcuan chic ralal ut xrabin. Chirix lix yoꞌlajic laj Arfaxad, laj Sem quicuan o̱b ciento (500) chihab chic.
Oꞌlaju xcaꞌcꞌa̱l (35) chihab cuan re laj Arfaxad nak quiyoꞌla laj Sala li ralal.
Ut toj queꞌcuan chic ralal ut xrabin. Chirix lix yoꞌlajic laj Sala, laj Arfaxad quicuan ca̱hib ciento chihab riqꞌuin oxib (403) chihab chic.
Laje̱b xcaꞌcꞌa̱l (30) chihab cuan re laj Sala nak quiyoꞌla laj Heber li ralal.
Ut toj queꞌcuan chic ralal ut xrabin. Chirix lix yoꞌlajic laj Heber, laj Sala quicuan ca̱hib ciento riqꞌuin oxib (403) chihab chic.
Ca̱laju xcaꞌcꞌa̱l (34) chihab cuan re laj Heber nak quiyoꞌla laj Peleg li ralal.
Chirix lix yoꞌlajic laj Peleg, laj Heber quicuan ca̱hib ciento riqꞌuin laje̱b xcaꞌcꞌa̱l (430) chihab chic. Ut toj queꞌcuan chic ralal ut xrabin.
Laje̱b xcaꞌcꞌa̱l (30) chihab cuan re laj Peleg nak quiyoꞌla laj Reu li ralal.
Chirix lix yoꞌlajic laj Reu, laj Peleg quicuan cuib ciento riqꞌuin bele̱b (209) chihab chic. Ut toj queꞌcuan chic ralal ut xrabin.
Cablaju xcaꞌcꞌa̱l (32) chihab cuan re laj Reu nak quiyoꞌla laj Serug li ralal.
Chirix lix yoꞌlajic laj Serug, laj Reu quicuan cuib ciento riqꞌuin cuukub (207) chihab chic. Ut toj queꞌcuan chic ralal ut xrabin.
Laje̱b xcaꞌcꞌa̱l (30) chihab cuan re laj Serug nak quiyoꞌla laj Nacor li ralal.
Chirix lix yoꞌlajic laj Nacor, laj Serug quicuan cuib ciento (200) chihab chic. Ut toj queꞌcuan chic ralal ut xrabin.
Bele̱b xcaꞌcꞌa̱l (29) chihab cuan re laj Nacor nak quiyoꞌla laj Taré li ralal.
Chirix lix yoꞌlajic laj Taré, laj Nacor quicuan jun ciento riqꞌuin bele̱laju (119) chihab chic. Ut toj queꞌcuan chic ralal ut xrabin.
Laje̱b xca̱cꞌa̱l (70) chihab cuan re laj Taré nak quiyoꞌla laj Harán li ralal. Ut mokon chic quicuan cuib chic li ralal. Lix cꞌabaꞌeb aꞌan aj Abram ut aj Nacor.
Eb li ralal xcꞌajol laj TaréAꞌan aꞌin lix cꞌabaꞌeb li ralal xcꞌajol laj Taré. Laj Taré, aꞌan lix yucuaꞌeb laj Abram, laj Nacor ut laj Harán. Ut laj Harán, aꞌan lix yucuaꞌ laj Lot.
Nak quicam laj Harán, toj yoꞌyo lix yucuaꞌ. Laj Harán quicam saꞌ li naꞌajej Ur lix tenamiteb laj Caldea. Saꞌ li tenamit quiyoꞌla cuiꞌ, aran ajcuiꞌ quicam.
Laj Abram quisumla riqꞌuin jun li ixk xSarai xcꞌabaꞌ. Ut laj Nacor quisumla riqꞌuin lix Milca. Lix Milca ut lix Isca xrabineb laj Harán.
Lix Sarai ma̱ jun xcocꞌal quicuan. Ac re nak incꞌaꞌ naqꞌuiresin.
Laj Taré qui-el saꞌ li naꞌajej Ur, lix tenamiteb laj Caldea. Cuan saꞌ xchꞌo̱l nak ta̱xic saꞌ li tenamit Canaán. Quixcꞌam chirix laj Abram li ralal. Ut quixcꞌam ajcuiꞌ chirix laj Lot li ri. Laj Lot, aꞌan ralal laj Harán. Ut quixcꞌam ajcuiꞌ lix Sarai li ralib. Lix Sarai, aꞌan li rixakil laj Abram. Yo̱queb chi xic saꞌ li be li naxic Canaán nak queꞌxtau jun li tenamit Harán xcꞌabaꞌ. Ut coxeꞌcana̱k saꞌ li tenamit aꞌan.
Cuib ciento chihab riqꞌuin o̱b (205) chihab cuan re laj Taré nak quicam saꞌ li tenamit Harán.
Li Dios naxbok laj AbramLi Ka̱cuaꞌ Dios quixye re laj Abram: —Tat-e̱lk saꞌ li naꞌajej aꞌin. Ta̱canabeb la̱ cuechꞌalal ut ta̱canab ajcuiꞌ rochoch la̱ yucuaꞌ. Ut tatxic saꞌ li naꞌajej li tincꞌut cha̱cuu la̱in, chan.
—Eb la̱ cualal a̱cꞌajol teꞌqꞌuia̱nk. Ut ta̱nima̱nk lix cuanquileb saꞌ ruchichꞌochꞌ. Ut la̱in tin-osobtesi̱nk a̱cue. Ut la̱ cꞌabaꞌ naꞌno̱k ru yalak bar. Saꞌ a̱cꞌabaꞌ la̱at, nabaleb chic li cristian teꞌxcꞌul li usilal xban nak la̱at sicꞌbil a̱cuu inban.
Yalak ani ta̱ba̱nu̱nk usilal a̱cue, tinba̱nu ajcuiꞌ usilal re la̱in. Li ani ta̱tzꞌekta̱na̱nk a̱cue, la̱in tintzꞌekta̱naheb ajcuiꞌ aꞌan. Saꞌ a̱cꞌabaꞌ la̱at, tincuosobtesiheb chixjunileb li cristian li teꞌcua̱nk saꞌ ruchichꞌochꞌ, chan li Dios re laj Abram.
Laj Abram qui-el saꞌ li naꞌajej aꞌan joꞌ quiyeheꞌ re xban li Dios. Co̱ ajcuiꞌ laj Lot chirix. Oꞌlaju xca̱cꞌa̱l (75) chihab cuan re laj Abram nak qui-el chak saꞌ lix tenamit Harán.
Laj Abram quixcꞌam chirix lix Sarai li rixakil. Ut quixcꞌam ajcuiꞌ chirix laj Lot, li ralal li ri̱tzꞌin. Ut quixcꞌam ajcuiꞌ chixjunil li cꞌaꞌru cuan re li queꞌtam nak queꞌcuan saꞌ li tenamit Harán. Quixcꞌameb ajcuiꞌ lix mo̱s chirix. Ut queꞌoc chi xic saꞌ li tenamit Canaán ut yal jun nak coxeꞌxtau.
Laj Abram yo̱ chi numecꞌ saꞌ li tenamit aꞌan nak coxtau li naꞌajej Siquem. Aran cuan jun to̱n li cheꞌ ji re jun li cui̱nk aj More xcꞌabaꞌ. Saꞌ li naꞌajej aꞌan cuanqueb laj cananeo.
Saꞌ li naꞌajej aꞌan quia̱tinac li Dios riqꞌuin laj Abram ut quixye re, —Saꞌ jun cutan tinqꞌue chixjunil li naꞌajej aꞌin reheb la̱ cualal a̱cꞌajol, chan li Dios. Joꞌcan nak laj Abram quixtus li pec ut quixyi̱b jun lix artal re xlokꞌoninquil li Ka̱cuaꞌ Dios.
Chirix chic aꞌan, laj Abram co̱ saꞌ li tzu̱l li cuan jun pacꞌal li tenamit Bet-el saꞌ xjayal bar na-el cuiꞌ chak li sakꞌe. Quixyi̱b lix muheba̱l saꞌ li naꞌajej aꞌan saꞌ xya̱nkeb li cuib chi tenamit Bet-el ut Hai. Ut laj Abram quixyi̱b aran jun chic li artal ut quixlokꞌoni li Ka̱cuaꞌ Dios.
Laj Abram qui-oc cuiꞌchic chi xic saꞌ li naꞌajej Neguev.
Laj Abram quicuulac saꞌ li naꞌajej EgiptoSaꞌ eb li cutan aꞌan quicuan jun li nimla cueꞌej saꞌ li naꞌajej aꞌan. Xban nak ma̱cꞌaꞌ li tzacae̱mk, co̱eb laj Abram saꞌ li naꞌajej Egipto ut aran queꞌcana.
Ut nak yo̱ chi nachꞌoc riqꞌuin li tenamit Egipto, laj Abram quixye re li rixakil: —At Sarai, ninnau nak la̱at kꞌaxal chꞌinaꞌusat.
Nak tateꞌril eb laj Egipto, teꞌxye nak la̱at cuixakil. Naru tineꞌxcamsi la̱in ut la̱at tateꞌxcꞌam riqꞌuineb.
Ta̱ba̱nu usilal, ta̱yeheb re nak la̱at cuanab re nak incꞌaꞌ tineꞌxcamsi. Chi joꞌcan tina̱col saꞌ rukꞌeb laj Egipto, chan laj Abram re li rixakil.
Laj Abram rochben li rixakil queꞌcuulac saꞌ li naꞌajej Egipto. Ut eb laj Egipto queꞌril nak chꞌinaꞌus na-iloc li ixk.
Laj faraón, aꞌan li acuabej re li naꞌajej aꞌan. Eb laj tenkꞌom re laj faraón queꞌril ajcuiꞌ nak chꞌinaꞌus li ixk ut queꞌxye re: —Us li ixk aꞌan chokꞌ a̱cue, chanqueb. Ut lix Sarai quicꞌameꞌ saꞌ rochoch laj faraón.
Xban nak laj Abram quixkꞌaxtesi lix Sarai saꞌ rukꞌ laj faraón, nabal lix ra̱bal quiqꞌueheꞌ re laj Abram. Laj faraón quixqꞌue xqueto̱mk, quixqꞌue xcuacax, quixqꞌue xbu̱r ut quixqꞌue ajcuiꞌ lix mo̱s cui̱nk ut lix mo̱s ixk. Ut quiqꞌueheꞌ ajcuiꞌ xni̱nki xul camello xcꞌabaꞌ.
Ut li Ka̱cuaꞌ Dios quixqꞌue chixtojbal xma̱c laj faraón xban nak quixcꞌam saꞌ li rochoch lix Sarai. Quixtakla jun raylal saꞌ xbe̱neb li cuanqueb saꞌ rochoch laj faraón ut queꞌyajer chixjunileb.
Laj faraón quixtakla xbokbal laj Abram, ut quixye re: —¿Cꞌaꞌut nak xaba̱nu cue chi joꞌcaꞌin? Ut, ¿cꞌaꞌut nak incꞌaꞌ xaye cue nak a̱cuixakil lix Sarai?
¿Cꞌaꞌut nak xaye cue nak a̱cuanab aꞌan? La̱in xincꞌam raj chokꞌ cuixakil xban nak incꞌaꞌ xaye cue nak a̱cuixakil. Cueꞌ la̱ cuixakil. Cꞌam ut ayu. Elen saꞌ li tenamit aꞌin, chan re laj Abram.
Laj faraón quixtaklaheb lix mo̱s chi cꞌamoc be chiru laj Abram. Chi joꞌcan laj Abram qui-el rochben li rixakil. Queꞌxcꞌam chirix chixjunil li cꞌaꞌru cuan re.
Laj Abram ut laj Lot queꞌxjach ribebLaj Abram qui-el saꞌ li naꞌajej Egipto rochben li rixakil. Ut co̱ ajcuiꞌ laj Lot chirixeb. Queꞌxcꞌam li cꞌaꞌru reheb. Queꞌsukꞌi cuiꞌchic saꞌ li naꞌajej Neguev li cuan saꞌ xcue̱nt Canaán.
Numtajenak xbiomal laj Abram. Cuan x-oro. Cuan xplata ut cuan ajcuiꞌ nabal lix queto̱mk.
Laj Abram queꞌel saꞌ li naꞌajej Neguev ut queꞌnumeꞌ saꞌ li tenamit Bet-el. Queꞌcuulac cuiꞌchic saꞌ li naꞌajej bar quixyi̱b cuiꞌ lix muheba̱l junxil saꞌ xya̱nkeb li cuib chi tenamit Hai ut Bet-el.
Aꞌan li naꞌajej li quixyi̱b cuiꞌ li artal junxil. Ut aran laj Abram quixlokꞌoni cuiꞌchic li Ka̱cuaꞌ Dios.
Laj Lot biom ajcuiꞌ joꞌ laj Abram. Nabal lix queto̱mk, ut nabal ajcuiꞌ lix muheba̱l yi̱banbil riqꞌuin tꞌicr.
Xban nak numtajenak xqꞌuialeb lix queto̱mk chi xcabichaleb laj Lot ut laj Abram, incꞌaꞌ natzꞌakloc li naꞌajej chokꞌ reheb. Incꞌaꞌ chic naru teꞌcua̱nk saꞌ jun chi naꞌajej.
Ut saꞌ li naꞌajej aꞌan cuanqueb laj cananeo joꞌ eb ajcuiꞌ laj ferezeo. Xban nak kꞌaxal latzꞌ li naꞌajej, queꞌxpleti rib chi ribileb rib laj ilol xqueto̱mk laj Abram riqꞌuineb laj ilol xqueto̱mk laj Lot.
Laj Abram quixye re laj Lot: —La̱o kacomon kib. Incꞌaꞌ taxak ta̱cua̱nk li chꞌaꞌajquilal chi kibil kib. Joꞌ ajcuiꞌ riqꞌuineb li kamo̱s. Incꞌaꞌ nacuaj nak teꞌxpleti ribeb laj ilol reheb li kaqueto̱mk.
Il li naꞌajej aꞌin numtajenak xnimal. ¿Cꞌaꞌut nak incꞌaꞌ takajach kib? Sicꞌ li naꞌajej li ta̱cuulak cha̱cuu. Cui ta̱cuaj xic saꞌ la̱ nim, la̱in tinxic saꞌ la̱ tzꞌe. Cui ta̱cuaj xic saꞌ la̱ tzꞌe, la̱in tinxic saꞌ la̱ nim, chan laj Abram.
Laj Lot quiril nak cꞌajoꞌ xchꞌinaꞌusal li ru takꞌa cuan chire li nimaꞌ Jordán. Li naꞌajej aꞌan cha̱bil ut nim. Nacuulac toj cuan cuiꞌ li tenamit Zoar. Ut quiril nak cuan li haꞌ chokꞌ re li acui̱mk. Chanchan li naꞌajej Egipto li queꞌel cuiꞌ chak. Aꞌan quicꞌulman nak li Dios toj ma̱jiꞌ naxsach li tenamit Sodoma ut Gomorra.
Laj Lot quixchap chokꞌ re li ru takꞌa li nacana chire li nimaꞌ Jordán, ut co̱ saꞌ xjayal bar na-el cuiꞌ chak li sakꞌe. Joꞌcaꞌin nak queꞌxcanab ribeb laj Lot riqꞌuin laj Abram.
Laj Abram quicana saꞌ li naꞌajej Canaán. Ut laj Lot co̱ saꞌ li ru takꞌa cuanqueb cuiꞌ li cocꞌ tenamit. Quixyi̱b lix muheba̱l nachꞌ riqꞌuin li tenamit Sodoma.
Eb li cristian li cuanqueb aran saꞌ li tenamit Sodoma numtajenak xma̱queb chiru li Ka̱cuaꞌ Dios.
Nak ma̱ ani chic laj Lot, li Ka̱cuaꞌ Dios quia̱tinac riqꞌuin laj Abram ut quixye re: —Saꞌ li naꞌajej li xakxo̱cat cuiꞌ, ilon saꞌ xca̱ pacꞌalil li naꞌajej aꞌin.
Ut ilon chi us. Chixjunil li chꞌochꞌ, li yo̱cat chi rilbal, aꞌan tinqꞌue a̱cue la̱at chi junaj cua joꞌ ajcuiꞌ reheb la̱ cualal a̱cꞌajol. Aꞌin li naꞌajej li xinyechiꞌi a̱cue, chan.
—Tinqꞌueheb chi qꞌuia̱nc la̱ cualal a̱cꞌajol. Incꞌaꞌ ta̱ru̱k rajlanquileb xban xqꞌuialeb, joꞌ li poks saꞌ chꞌochꞌ incꞌaꞌ naru rajlanquil, chan.
Ut li Dios quixye ajcuiꞌ re laj Abram: —Ayu ut beni chak xsaꞌ li chꞌochꞌ aꞌin. Ta̱qꞌue chak retal saꞌ xca̱ pacꞌalil xban nak li chꞌochꞌ aꞌin tinqꞌue a̱cue, chan li Dios.
Tojoꞌnak laj Abram quixjal lix naꞌajeb lix muheba̱l. Ut co̱ chi cua̱nc saꞌ li naꞌajej ji ru. Eb li cheꞌ ji, aꞌan re laj Mamre. Li naꞌajej aꞌin nachꞌ cuan riqꞌuin li tenamit Hebrón. Ut laj Abram quixyi̱b jun chic li artal aran re xlokꞌoninquil li Ka̱cuaꞌ Dios.
Laj Abram naxcol laj LotSaꞌ eb li cutan aꞌan, laj Amrafel, aꞌan lix reyeb li tenamit Sinar. Laj Arioc, aꞌan lix reyeb li tenamit Elasar. Laj Quedorlaomer, aꞌan lix reyeb li tenamit Elam. Ut laj Tidal, aꞌan lix reyeb li tenamit Goim.
Eb li ca̱hib chi rey aꞌin queꞌxpleti ribeb riqꞌuineb o̱b chic li rey. Eb li rey o̱b chic, aꞌaneb aꞌin: laj Bera, aꞌan lix reyeb li tenamit Sodoma; laj Birsa, aꞌan lix reyeb li tenamit Gomorra; laj Sinab, aꞌan lix reyeb li tenamit Adma; laj Semeber, aꞌan lix reyeb li tenamit Zeboim; ut li rey jun chic, aꞌan lix reyeb li tenamit Bela, li nayeman ajcuiꞌ Zoar re.
Li o̱b chi rey aꞌin queꞌxchꞌutub ribeb rochbeneb lix soldados saꞌ li ru takꞌa Sidim. Anakcuan li naꞌajej aꞌan Mar Muerto xcꞌabaꞌ.
Eb li o̱b chi rey aꞌin queꞌcuan rubel xtakl laj Quedorlaomer chiru cablaju chihab. Aban nak ac yo̱ chic oxlaju chihab incꞌaꞌ chic queꞌraj cana̱c rubel xtakl aꞌan. Aꞌan aj e nak queꞌxchꞌutub ribeb chi pletic re nak teꞌxsach xcuanquil laj Quedorlaomer.
Nak ac xnumeꞌ chic jun chihab, li rey Quedorlaomer queꞌxchꞌutub rib rochbeneb li oxibeb chic li rey. Queꞌco̱eb rochbeneb lix soldados chi pletic. Nak yo̱queb chi xic chi pletic riqꞌuineb li o̱b chic li rey, saꞌ lix beheb queꞌxtau jalaneb tenamit ut queꞌpletic riqꞌuineb toj retal queꞌnumta saꞌ xbe̱neb laj Refaim li cuanqueb saꞌ li tenamit Astarot Karnaim, ut saꞌ xbe̱neb laj Zuz li cuanqueb saꞌ li tenamit Ham, joꞌ ajcuiꞌ saꞌ xbe̱neb laj Emita li cuanqueb saꞌ li tenamit Save-quiriataim.
Ut queꞌnumta ajcuiꞌ saꞌ xbe̱neb laj horeo li cuanqueb saꞌ li tenamit Seir li tzu̱l ru. Ut queꞌcuulac saꞌ li tenamit Parán li cuan toj saꞌ xnuba̱l li chaki chꞌochꞌ.
Nak quisukꞌi chak li rey Quedorlaomer rochbeneb li jun chꞌol chic queꞌcuulac saꞌ li tenamit En-mispat. Nequeꞌxye ajcuiꞌ Cades re li tenamit aꞌan. Ut queꞌnumta saꞌ xbe̱neb laj Amalec joꞌ eb ajcuiꞌ laj amorreo li cuanqueb saꞌ li naꞌajej Hazezon-tamar. Ut queꞌxsach ruheb chixjunil li cꞌaꞌru queꞌxtau saꞌ xbeheb nak yo̱queb chi xic.
Tojoꞌnak li o̱b chi rey rochbeneb lix soldados queꞌco̱eb chi pletic. Aꞌaneb li cuanqueb chokꞌ rey saꞌ eb li tenamit Sodoma, Gomorra, Adma, Zeboim ut Bela. Aran queꞌpletic saꞌ li ru takꞌa Sidim.
Eb aꞌan queꞌpletic riqꞌuineb li ca̱hib chi rey: laj Quedorlaomer lix reyeb li tenamit Elam; laj Tidal, lix reyeb li tenamit Goim; laj Amrafel, lix reyeb li tenamit Sinar ut laj Arioc, lix reyeb li tenamit Elasar.
Saꞌ li ru takꞌa Sidim cꞌajoꞌ li jul cuan. Saꞌ eb li jul aꞌin cuan li asfalto. Nak yo̱queb chi e̱lelic chiruheb li ca̱hib chi rey, eb li soldados re Sodoma ut Gomorra queꞌlajeꞌtꞌaneꞌ saꞌ li jul ut cuan li queꞌe̱lelic saꞌ li tzu̱l. Eb li o̱b chi rey incꞌaꞌ queꞌxcuy xcolbal ribeb saꞌ rukꞌeb li ca̱hib chic.
Eb li ca̱hib chi rey queꞌnumta saꞌ xbe̱neb li o̱b chi rey saꞌ li ple̱t. Li ca̱hib chi rey queꞌxxoc chixjunil li cuan saꞌ eb li tenamit Sodoma ut Gomorra. Queꞌxcꞌam chokꞌ reheb li tzacae̱mk joꞌ ajcuiꞌ lix biomaleb li cuib chi tenamit aꞌan ut queꞌco̱eb.
Laj Lot, li ralal li ri̱tzꞌin laj Abram, cuan saꞌ li tenamit Sodoma. Xban nak cuan aran, laj Lot quichapeꞌ xbaneb li queꞌnumta saꞌ xbe̱neb li tenamit. Queꞌxcꞌam ajcuiꞌ chixjunil li cꞌaꞌru cuan re laj Lot.
Abanan quie̱lelic jun li cui̱nk chiruheb aꞌan. Li cui̱nk aꞌan quicuulac riqꞌuin laj Abram laj hebreo ut quixye re li cꞌaꞌru quicꞌulman. Laj Abram cuan saꞌ li naꞌajej li ji ru. Eb li cheꞌ ji, aꞌan re laj Mamre. Laj Mamre, aꞌan xcomoneb laj amorreo. Aꞌan ras laj Escol joꞌ ajcuiꞌ laj Aner. Eb aꞌan rami̱gueb rib riqꞌuin laj Abram.
Nak laj Abram quirabi nak quicꞌameꞌ laj Lot, ticto quixchꞌutubeb oxib ciento riqꞌuin cuakxaklaju (318) lix mo̱s. Eb aꞌan yoꞌlajenakeb saꞌ lix chꞌochꞌ laj Abram. Chixjunileb queꞌxta̱ke li queꞌcꞌamoc re laj Lot. Queꞌcuulac toj saꞌ li tenamit Dan.
Chiru kꞌojyi̱n laj Abram queꞌco̱eb chi ma̱cꞌaꞌ resileb chixcolbal laj Lot. Ma̱cꞌaꞌ saꞌ xchꞌo̱leb li queꞌelkꞌan re laj Lot nak queꞌcuulac laj Abram. Nak queꞌril, xaka̱mileb laj Abram chiruheb. Queꞌxtiquib pletic ut li queꞌcꞌamoc re laj Lot ticto queꞌe̱lelic. Laj Abram quira̱linaheb toj saꞌ li tenamit Hoba. Li tenamit aꞌan cuan jun pacꞌal li tenamit Damasco.
Laj Abram quixcol laj Lot saꞌ rukꞌeb li queꞌelkꞌan re. Joꞌ ajcuiꞌ chixjunil li cꞌaꞌru cuan re laj Lot. Ut quixcol ajcuiꞌ nabaleb li cristian aj Sodoma, joꞌ cui̱nk joꞌ ixk li queꞌchapeꞌ.
Laj Melquisedec co̱ xcꞌulbal laj AbramLi rey Quedorlaomer joꞌ eb ajcuiꞌ li rochben queꞌosoꞌ saꞌ rukꞌ laj Abram. Nak laj Abram quisukꞌi chak, lix reyeb laj Sodoma qui-el chixcꞌulbal laj Abram. Queꞌxcꞌul rib saꞌ li ru takꞌa Save. Nayeman ajcuiꞌ re li naꞌajej aꞌan “Li Ru Takꞌa re li Rey”.
Laj Melquisedec, aꞌan lix reyeb laj Salem ut nacꞌanjelac ajcuiꞌ chokꞌ aj tij chiru li nimajcual Dios. Laj Melquisedec quixcꞌul laj Abram ut quixqꞌueheb xcua rucꞌa.
Laj Melquisedec quirosobtesi laj Abram riqꞌuin li a̱tin aꞌin: —Osobtesinbil taxak laj Abram xban li Ka̱cuaꞌ Dios, li kꞌaxal nim xcuanquil. Li Ka̱cuaꞌ Dios, aꞌan li quiyi̱ban re li choxa joꞌ ajcuiꞌ li ruchichꞌochꞌ.
Lokꞌoninbil taxak li Ka̱cuaꞌ Dios li kꞌaxal nim xcuanquil. Aꞌan xkꞌaxtesi saꞌ a̱cuukꞌ li xicꞌ nequeꞌiloc a̱cue, chan. Laj Abram quixsi re laj Melquisedec li junju̱nk saꞌ xlaje̱tkil re chixjunil li cꞌaꞌru quire̱chani chak.
Lix reyeb laj Sodoma quixye re laj Abram: —Ba̱nu usilal, kꞌaxtesiheb cuiꞌchic saꞌ li tenamit aꞌin chixjunileb li cristian li xacoleb chak saꞌ li ple̱t. Ut li cꞌaꞌru cuan reheb ta̱cana̱k chokꞌ a̱cue, chan.
Abanan laj Abram quichakꞌoc ut quixye re: —Ac xinba̱nu jun li juramento riqꞌuin li Ka̱cuaꞌ Dios, li quiyi̱ban re li ruchichꞌochꞌ joꞌ ajcuiꞌ li choxa.
Ac xinye re li Dios nak relic chi ya̱l ti̱c ma̱cꞌaꞌ tincꞌam chokꞌ cue. Chi moco tinxoc ta jun chꞌina tokolak li cꞌa̱m chokꞌ re xbacꞌbal inxa̱b. Incꞌaꞌ nacuaj ta̱ye nak saꞌ a̱cꞌabaꞌ la̱at xinbiomoꞌ.
Li cꞌaꞌru xeꞌxtzaca chak lin mo̱s, caꞌaj cuiꞌ aꞌan xincꞌul. Ut li oxib chi cui̱nk li xeꞌochbenin cue, eb aꞌan teꞌxcꞌul li cꞌaꞌru ta̱qꞌuema̱nk reheb chi xju̱nkaleb. Eb li cui̱nk aꞌan laj Aner, laj Escol ut laj Mamre, chan laj Abram.
Li Dios quixba̱nu jun li contrato riqꞌuin laj AbramChanchan matqꞌuec yo̱ laj Abram nak li Dios quixcꞌutbesi rib chiru saꞌ visión. Li Dios quixye re: —Matxucuac, Abram, xban nak la̱in tin-ilok a̱cue. Kꞌaxal numtajenak la̱ kꞌajca̱munquil tinqꞌue, chan li Dios.
Laj Abram quixye re: —At Ka̱cuaꞌ Dios, ¿cꞌaꞌru aj e nak nabal lin ra̱bal ta̱qꞌue? La̱at nacanau nak ma̱ jun cualal incꞌajol cuan. Ut li ani ta̱e̱chani̱nk re li cꞌaꞌru cuan cue, aꞌan li xbe̱n inmo̱s laj Eliezer li chalenak chak saꞌ li tenamit Damasco, chan.
—La̱at ma̱ jun li cualal xaqꞌue. Xban aꞌan chixjunil li cꞌaꞌru cuan cue, tento nak jun lin najter mo̱s quiyoꞌla saꞌ cuochoch, aꞌan ta̱e̱chani̱nk re, chan laj Abram.
Ut li Ka̱cuaꞌ Dios quixye re laj Abram: —Ma̱cuaꞌ la̱ mo̱s ta̱e̱chani̱nk re. Relic chi ya̱l tinye a̱cue nak li ani ta̱e̱chani̱nk re li cꞌaꞌru cuan a̱cue, aꞌan li tzꞌakal la̱ cualal, chan li Dios.
Li Dios quixcꞌam laj Abram chirix cab ut quixye re: —Ilon takecꞌ. Il ma tatru̱k rajlanquileb li chahim. Joꞌcan ajcuiꞌ xqꞌuial la̱ cualal a̱cꞌajol li tinqꞌue. Incꞌaꞌ tatru̱k rajlanquileb, chan li Dios.
Laj Abram quixpa̱b li cꞌaꞌru quiyeheꞌ re xban li Dios. Joꞌcan nak li Dios quixye nak laj Abram aꞌan jun cui̱nk ti̱c xchꞌo̱l.
Li Dios quixye re laj Abram; —La̱in li Ka̱cuaꞌ Dios. La̱in xin-isin chak a̱cue saꞌ li tenamit Ur ut xatincꞌam chak saꞌ li tenamit aꞌin. Ut li chꞌochꞌ aꞌin, la̱at tat-e̱chani̱nk re, chan.
Ut laj Abram quichakꞌoc ut quixye: —Ka̱cuaꞌ Dios, ¿chanru nak tinnau chi tzꞌakal nak tincue̱chani li chꞌochꞌ? ¿Cꞌaꞌru li retalil ta̱qꞌue? chan.
Ut li Dios quixye re laj Abram: —La̱in tinba̱nu jun li contrato a̱cuiqꞌuin. Ta̱cꞌameb chak li xul li tinye a̱cue. Ta̱cꞌam chak jun li chꞌina ba̱c oxib chihab cuan re, ut jun li ixki chiba̱t oxib chihab cuan re, ut jun li te̱lom carner oxib chihab cuan re. Ut ta̱cꞌam ajcuiꞌ chak junak li chꞌina mucuy joꞌ ajcuiꞌ junak chꞌina paloma, chan li Dios.
Ut laj Abram quixcꞌameb li xul li quipatzꞌeꞌ re xban li Dios. Quixcamsi ut quixjach saꞌ xyiheb li xul ut quixpacꞌabeb. Li mucuy ut li paloma incꞌaꞌ quixjacheb.
Queꞌcube chak li soꞌsol saꞌ xbe̱neb li camenak xul. Ut laj Abram quixyolesiheb.
Nak ac yo̱ chi muku̱nc li sakꞌe, laj Abram quicube xcuara. Nak yo̱ chi cua̱rc, saꞌ junpa̱t quikꞌojyi̱noꞌ chi us li cuan cuiꞌ ut cꞌajoꞌ nak quixucuac.
Ut li Dios quixye re: —Tento nak ta̱nau nak la̱ cualal a̱cꞌajol teꞌxic chi najt saꞌ jalan tenamit ma̱cuaꞌ xtenamiteb aꞌan. Ut kꞌaxal ra teꞌxcꞌul aran. Teꞌqꞌuehekꞌ chokꞌ rahobtesinbil mo̱s. Ut chiru ca̱hib ciento (400) chihab teꞌcua̱nk saꞌ raylal, chan li Dios.
Li Dios quixye: —La̱in tinrakok a̱tin saꞌ xbe̱neb li yo̱keb chi rahobtesi̱nc re la̱ cualal a̱cꞌajol. Mokon chic nak la̱ cualal a̱cꞌajol teꞌe̱lk chak aran, teꞌxcꞌam chak lix biomaleb chirixeb.
Nak ac ti̱xakat chic chi us, la̱at tatca̱mk. Cꞌojcꞌo̱k a̱chꞌo̱l nak tatca̱mk. Ut toxe̱tau e̱rib a̱cuochbeneb la̱ xeꞌto̱nil yucuaꞌ li ac camenakeb.
Li xca̱ xte̱pal la̱ cualal a̱cꞌajol teꞌsukꞌi̱k chak saꞌ li naꞌajej aꞌin. Abanan toj ta̱numta̱k li ma̱usilal teꞌxba̱nu laj amorreo, tojoꞌnak tinmakꞌ li naꞌajej aꞌin chiruheb, chan li Dios re laj Abram.
Nak kꞌojyi̱n chi us, laj Abram quiril nak cuta̱mil chiru jun xnaꞌaj li xam yo̱ chi e̱lc xsibel ut jun lochlo̱quil xam quinumeꞌ saꞌ xyiheb li xul li jachbileb.
Aꞌan aꞌin li retalil nak saꞌ li cutan aꞌan li Ka̱cuaꞌ Dios quixba̱nu jun li contrato riqꞌuin laj Abram. Ut li Dios quixye re laj Abram: —Li naꞌajej aꞌin tinqꞌue chokꞌ a̱cue ut chokꞌ reheb ajcuiꞌ la̱ cualal a̱cꞌajol li teꞌcua̱nk. Li naꞌajej li tinqꞌue reheb naticla chak cuan cuiꞌ li nimaꞌ re Egipto ut nocoxrakekꞌ cuan cuiꞌ li nimla nimaꞌ Éufrates, chan.
—Li naꞌajej aꞌin, li tinqꞌue e̱re, aꞌan li cuanqueb cuiꞌ eb laj Ceneo, ut eb laj cenezeo, ut eb laj cadmoneo.
Ut aran ajcuiꞌ cuanqueb laj hitita, ut eb laj ferezeo, ut eb laj refaíta.
Ut aran ajcuiꞌ cuanqueb laj amorreo, ut eb laj cananeo, ut eb laj gergeseo, ut eb laj jebuseo, chan li Dios re laj Abram.
Lix Agar ut lix yum aj Ismael xcꞌabaꞌLix Sarai li rixakil laj Abram ma̱ jun xcocꞌal. Aꞌan cuan jun xmo̱s xAgar xcꞌabaꞌ. Aꞌan chalenak chak Egipto.
Lix Sarai quixye re laj Abram: —La̱at nacanau nak ma̱ jun incꞌulaꞌal. La̱in tincuaj junak incꞌulaꞌal, aban li Ka̱cuaꞌ Dios incꞌaꞌ naxqꞌue cue. Naru tatcua̱nk riqꞌuin lin mo̱s. Ma̱re ta̱cua̱nk junak a̱cꞌulaꞌal riqꞌuin ut la̱in tinxoc chokꞌ cue, chan lix Sarai. Ut laj Abram quixpa̱b li cꞌaꞌru quiyeheꞌ re xban lix Sarai.
Nak quicꞌulman aꞌin ac laje̱b chihab roquiqueb saꞌ li tenamit Canaán. Lix Sarai quixkꞌaxtesi lix mo̱s saꞌ rukꞌ laj Abram re nak ta̱cua̱nk riqꞌuin.
Tojoꞌnak laj Abram quicuan riqꞌuin, ut lix Agar quicana chi yaj aj ixk. Nak quixnau nak ta̱cua̱nk junak lix cꞌulaꞌal, lix Agar incꞌaꞌ chic quixqꞌue saꞌ xnakꞌ ru lix Sarai. Ut lix Agar xicꞌ chic naril aꞌan.
Lix Sarai quixye re laj Abram: —Saꞌ a̱ma̱c la̱at nak yo̱quin chixcꞌulbal li raylal aꞌin. La̱in xinqꞌue lin mo̱s a̱cue ut anakcuan xicꞌ chic ninril. Nak xnau nak ta̱cua̱nk jun lix cꞌulaꞌal yo̱ chixnimobresinquil rib chicuu. Li Ka̱cuaꞌ Dios taxak tixye ke ani cuan xma̱c, ma la̱at malaj la̱in, chan lix Sarai.
Quichakꞌoc laj Abram ut quixye re: —La̱at nacanau nak la̱ mo̱s cuan rubel a̱takl. La̱at yal a̱cue cꞌaꞌru ta̱ba̱nu riqꞌuin, chan laj Abram. Cꞌajoꞌ nak quijoskꞌoꞌ lix Sarai saꞌ xbe̱n lix mo̱s ut cꞌajoꞌ nak quixchꞌila. Tojoꞌnak lix Agar quie̱lelic.
Lix Agar yo̱ chi be̱c saꞌ li chaki chꞌochꞌ. Quicuulac cuan cuiꞌ li yuꞌam haꞌ saꞌ li be naxic saꞌ li tenamit Shur. Ut aran quitaꞌeꞌ xban lix ángel li Ka̱cuaꞌ Dios.
Ut li ángel quia̱tinac riqꞌuin ut quixpatzꞌ re: —Agar, at xmo̱s lix Sarai, ¿bar xatchal chak? Ut, ¿bar yo̱cat chi xic? chan. Ut lix Agar quixye re: —La̱in yo̱quin chi e̱lelic chiru lix Sarai lin patrón, chan.
Lix ángel li Dios quixye re: —Sukꞌin cuiꞌchic riqꞌuin la̱ patrón. Tatcua̱nk saꞌ xya̱lal riqꞌuin ut ta̱pa̱b li cꞌaꞌru tixye a̱cue.
Teꞌcua̱nk nabal la̱ cualal a̱cꞌajol. Incꞌaꞌ ta̱ru̱k rajlanquileb xban nak numtajenak xqꞌuialeb la̱ cualal a̱cꞌajol teꞌcua̱nk.
Qꞌue retal, la̱at yaj aj ixkat. La̱ cꞌulaꞌal ta̱yoꞌla̱k chꞌina te̱lom. Aj Ismael ta̱qꞌue chokꞌ xcꞌabaꞌ. Joꞌcan lix cꞌabaꞌ ta̱qꞌue xban nak li Dios naxnau li raylal li yo̱cat chixcꞌulbal, ut aꞌan tatxtenkꞌa, chan.
Li ángel quixye ajcuiꞌ re: —Laj Ismael cauhak rib joꞌ junak joskꞌ aj xul ut ta̱pletik yalak ani aj iqꞌuin. Xicꞌ ta̱ilekꞌ xbaneb chixjunileb. Laj Ismael joꞌ eb ajcuiꞌ li ralal xcꞌajol teꞌxyi̱b lix naꞌaj nachꞌ riqꞌuineb li ri̱tzꞌin usta eb aꞌan incꞌaꞌ teꞌraj, chan li ángel.
Lix Agar quixye: —La̱at li Ka̱cuaꞌ Dios li nacat-iloc cue, chan re li Dios. Ut quixye cuiꞌchic, —Arin saꞌ li chaki chꞌochꞌ li Dios xcꞌutbesi rib chicuu ut moco xincam ta nak xcuil ru, chan.
Joꞌcan nak li yuꞌam haꞌ aꞌan quiqꞌueheꞌ chokꞌ xcꞌabaꞌ “Li yoꞌyo̱quil Dios li na-iloc cue”. Li yuꞌam haꞌ aꞌin cuan saꞌ xyi li cuib chi tenamit Cades ut Bered.
Nak quiyoꞌla li ralal laj Abram riqꞌuin lix Agar, laj Abram quixqꞌue aj Ismael chokꞌ xcꞌabaꞌ.
Cuakib roꞌcꞌa̱l (86) chihab cuan re laj Abram nak quiyoꞌla laj Ismael.
Li circuncisión nacꞌanjelac chokꞌ retalil li contratoNak ac bele̱laju roꞌcꞌa̱l (99) chihab cuan re laj Abram, li Ka̱cuaꞌ Dios quixcꞌutbesi rib chiru ut quixye re: —La̱in li Ka̱cuaꞌ Dios li kꞌaxal nim incuanquil. Chatcua̱nk saꞌ xya̱lal chicuu ut ti̱cak a̱chꞌo̱l.
La̱in tinxakab xcuanquil li contrato li xinba̱nu a̱cuiqꞌuin. La̱in tinqꞌue chi qꞌuia̱nc la̱ cualal a̱cꞌajol, chan li Ka̱cuaꞌ Dios re laj Abram.
Laj Abram quicuikꞌla ut quixxulub lix jolom saꞌ chꞌochꞌ.
Ut li Dios quixye ajcuiꞌ re laj Abram: —Li contrato li tinba̱nu a̱cuiqꞌuin, aꞌan aꞌin: La̱at tat-oc chokꞌ xxeꞌto̱nil yucuaꞌeb nabaleb chi tenamit, chan.
—Anakcuan ma̱cuaꞌ chic aj Abram la̱ cꞌabaꞌ. Aj Abraham chic a̱cꞌabaꞌ xban nak xatinqꞌue chokꞌ xxeꞌto̱nil yucuaꞌeb li qꞌuila tenamit.
Relic chi ya̱l nak tebinqꞌue chi qꞌuia̱nc la̱ cualal a̱cꞌajol. Nabalak le̱ tenamit ut teꞌcua̱nk ajcuiꞌ le̱ rey saꞌ le̱ tenamit chixju̱nkaleb.
Junelic ta̱cua̱nk xcuanquil li contrato li xinba̱nu a̱cuiqꞌuin joꞌ ajcuiꞌ riqꞌuineb la̱ cualal a̱cꞌajol. La̱in la̱ Dios la̱at, ut la̱in ajcuiꞌ xDioseb la̱ cualal a̱cꞌajol.
Li chꞌochꞌ Canaán li cuancat cuiꞌ anakcuan tinqꞌue a̱cue ut eb la̱ cualal a̱cꞌajol teꞌe̱chani̱nk re chi junaj cua. La̱inak lix Dioseb chixjunileb la̱ cualal a̱cꞌajol, chan.
Ut li Dios quixye ajcuiꞌ re laj Abraham: —Tento nak la̱at ta̱ba̱nu li contrato cuiqꞌuin la̱in. Joꞌcan ajcuiꞌ teꞌxba̱nu la̱ cualal a̱cꞌajol.
La̱at ta̱ba̱nu li cꞌaꞌru tinye a̱cue. Joꞌcan ajcuiꞌ teꞌxba̱nu chixjunileb la̱ cualal a̱cꞌajol. Ut aꞌan aꞌin li tinye e̱re. Li junju̱nk chi cui̱nk saꞌ e̱ya̱nk, tento nak teꞌxcꞌul li circuncisión.
Ut li circuncisión aꞌan aꞌin: Ta̱setma̱nk caꞌchꞌinak xtzꞌu̱mal ruꞌuj xtzꞌejcual li cui̱nk. Ta̱ba̱nu aꞌin chokꞌ retalil li contrato li xkaba̱nu chi kibil kib.
Li junju̱nk chi cꞌulaꞌal te̱lom tixcꞌul li circuncisión nak cua̱nk cuakxakib cutan xyoꞌlajic. Aꞌin lin chakꞌrab li ta̱ticla̱k anakcuan ut ta̱uxma̱nk chalen. Joꞌcan ta̱uxma̱nk reheb chixjunileb li cocꞌ te̱lom saꞌ xya̱nkeb la̱ cualal a̱cꞌajol joꞌ eb ajcuiꞌ la̱ lokꞌbil mo̱s usta jalan xtenamiteb.
Tento nak chixjunileb la̱ cualal a̱cꞌajol teꞌxcꞌul li circuncisión. Joꞌcan ajcuiꞌ eb la̱ mo̱s cui̱nk. Chi joꞌcaꞌin ta̱cana̱k jun retalil riqꞌuin le̱ tzꞌejcual. Aꞌan retalil li contrato li xkaba̱nu chi kibil kib.
Cui junak cui̱nk incꞌaꞌ tixcꞌul li circuncisión, aꞌan tzꞌekta̱nanbilak xban nak aꞌan xkꞌet lin chakꞌrab, chan li Dios.
Li Dios quixye ajcuiꞌ re laj Abraham: —Anakcuan ma̱cuaꞌak chic xSarai xcꞌabaꞌ la̱ cuixakil; xSara chic ta̱qꞌuema̱nk chokꞌ xcꞌabaꞌ.
La̱in tincuosobtesi lix Sara. Ut ta̱cua̱nk la̱ cualal riqꞌuin. Relic chi ya̱l tincuosobtesi aꞌan. Lix Sara ta̱cua̱nk nabaleb li ralal xcꞌajol. Aꞌan ta̱oc chokꞌ xnaꞌeb nabal chi tenamit li toj teꞌyoꞌla̱k mokon. Li ralal xcꞌajol lix Sara teꞌoc chokꞌ xreyeb li tenamit, chan li Dios.
Laj Abraham quicuikꞌla ut quixxulub lix jolom saꞌ chꞌochꞌ ut qui-oc chi seꞌec. Laj Abraham quixye saꞌ xchꞌo̱l: —¿Ma kꞌaxal ya̱l ta cuiꞌ nak ta̱cua̱nk junak cualal nak ac xinba̱nu li jun ciento chihab? Ut lix Sara, ¿ma ta̱cua̱nk ta biꞌ junak lix cꞌulaꞌal nak ac xba̱nu li laje̱b roꞌcꞌa̱l (90) chihab? chan.
Ut laj Abraham quixye re li Dios, —Usan cui laj Ismael tixcꞌul li usilal a̱cuiqꞌuin, chan.
Li Dios quixye re laj Abraham: —Ac xinye a̱cue nak lix Sara ta̱cua̱nk lix cꞌulaꞌal. Aj Isaac ta̱qꞌue chokꞌ xcꞌabaꞌ. La̱in tinba̱nu ajcuiꞌ lin contrato chi junelic riqꞌuin aꞌan joꞌ ajcuiꞌ riqꞌuineb li ralal xcꞌajol, chan.
—Xcuabi cꞌaꞌru xaye chirix laj Ismael. Matcꞌoxlac. Tincuosobtesi ajcuiꞌ aꞌan. Aꞌan ta̱cua̱nk ajcuiꞌ nabal li ralal xcꞌajol. Laj Ismael ta̱cua̱nk cablaju li ralal. Ni̱nkakeb xcuanquil saꞌ lix tenamiteb ut nimak ajcuiꞌ lix tenamiteb.
Abanan lin contrato junelic cua̱nk riqꞌuin laj Isaac. Aꞌan la̱ cualal li ta̱cua̱nk riqꞌuin lix Sara chiru li chihab jun, chan li Dios re laj Abraham.
Nak quirakeꞌ chi a̱tinac, li Ka̱cuaꞌ Dios qui-el riqꞌuin laj Abraham.
Saꞌ ajcuiꞌ li cutan aꞌan laj Abraham quixset lix tzꞌu̱mal ruꞌuj xtzꞌejcual laj Ismael. Chi joꞌcaꞌin quixba̱nu li circuncisión reheb lix mo̱s li queꞌyoꞌla saꞌ rochoch. Ut quixba̱nu ajcuiꞌ reheb lix lokꞌbil mo̱s. Saꞌ li cutan aꞌan qui-uxman chixjunil joꞌ quiyeheꞌ re xban li Ka̱cuaꞌ Dios.
Bele̱laju roꞌcꞌa̱l (99) chihab cuan re laj Abraham nak quixcꞌul lix circuncisión.
Oxlaju chihab cuan re laj Ismael nak quixcꞌul lix circuncisión.
Saꞌ li cutan aꞌan queꞌxcꞌul li circuncisión laj Abraham ut laj Ismael li ralal.
Chixjunileb lix mo̱s cui̱nk li queꞌyoꞌla saꞌ rochoch laj Abraham queꞌxcꞌul li circuncisión, joꞌ eb ajcuiꞌ li lokꞌbil mo̱s li jalan xtenamiteb.
Li Dios naxye nak chi ya̱l ta̱cua̱nk li ralal laj AbrahamNak ac xnumeꞌ cuaꞌleb, laj Abraham chunchu chire lix muheba̱l saꞌ li naꞌajej ji ru. Eb li cheꞌ ji, aꞌan re laj Mamre. Quicuulac li Ka̱cuaꞌ Dios riqꞌuin. Joꞌcaꞌin nak quixcꞌutbesi rib li Dios chiru laj Abraham.
Laj Abraham quiril nak xaka̱mileb oxibeb li cui̱nk chiru. Saꞌ junpa̱t qui-el chixcꞌulbaleb. Quixcuikꞌib rib ut quixxulub lix jolom saꞌ chꞌochꞌ, ut quixye:
—At Ka̱cuaꞌ, chan laj Abraham, —ta̱ba̱nu usilal, matxic cuan chi junpa̱t.
Tintakla xcꞌambal caꞌchꞌinak li haꞌ re te̱chꞌaj le̱ rok. Chexhila̱nk rubel xmu li cheꞌ.
Xban nak xexcꞌulun cuiqꞌuin, tincꞌam chak caꞌchꞌinak le̱ tzacae̱mk re nak sahak saꞌ le̱ chꞌo̱l nak texxic, chan laj Abraham. Ut eb aꞌan queꞌchakꞌoc ut queꞌxye re: —Us, bantiox a̱cue.
Laj Abraham qui-oc saꞌ lix muheba̱l ut quixye re lix Sara: —Se̱ba a̱cuib. Chap oxib bis li cꞌaj li cha̱bil ut ta̱yi̱b li caxlan cua, chan.
Laj Abraham co̱ saꞌ junpa̱t cuanqueb cuiꞌ lix queto̱mk. Quixchap jun li cuacax cha̱bil ut toj al. Quixqꞌue li xul re lix mo̱s re nak tixcꞌu̱b chak chi cha̱bil.
Quixcꞌam li cꞌu̱banbil tib chokꞌ reheb li rulaꞌ. Quixcꞌam ajcuiꞌ li queso ut li leche. Ut laj Abraham quixqꞌue xchꞌo̱l chixjecꞌbaleb xtzacae̱mkeb li rulaꞌ nak yo̱queb chi cuaꞌac rubel xmu li cheꞌ.
Nak queꞌrakeꞌ chi cuaꞌac li rulaꞌ, queꞌxpatzꞌ re laj Abraham, —¿Bar cuan lix Sara la̱ cuixakil?— Laj Abraham quixye reheb, —Cuan saꞌ cab, chan.
Ut jun li cuan saꞌ xya̱nkeb li oxib quixye re: —Toline̱lk cuiꞌchic saꞌ li chihab jun cha̱cuilbal. Ut lix Sara ac cua̱nk chic junak xcꞌulaꞌal te̱lom, chan re laj Abraham. Lix Sara cuan saꞌ cab ut quirabi li cꞌaꞌru yo̱queb chixyebal.
Laj Abraham ut lix Sara ac ti̱xeb chic. Lix Sara ac xnumeꞌ xkꞌehil nak ta̱cua̱nk xcocꞌal.
Xban aꞌan lix Sara quiseꞌec saꞌ xchꞌo̱l ut quixye: —¿Chanru nak ta̱cua̱nk li saylal aꞌin? Lin be̱lom ut la̱in ac xoti̱x chi us, chan saꞌ xchꞌo̱l.
Ut li Ka̱cuaꞌ Dios quixye re laj Abraham: —¿Cꞌaꞌut nak xseꞌec lix Sara? ¿Cꞌaꞌut nak incꞌaꞌ naxpa̱b nak ta̱cua̱nk junak lix cꞌulaꞌal saꞌ xti̱xilal?
La̱in li Ka̱cuaꞌ Dios. Ma̱cꞌaꞌ chꞌaꞌaj chicuu. Chiru li chihab jun chic tinsukꞌi̱k chak cha̱cuilbal ut lix Sara ac cua̱nk chic jun lix cꞌulaꞌal chꞌina te̱lom, chan li Ka̱cuaꞌ Dios.
Ut lix Sara quixucuac nak quirabi li a̱tin aꞌan ut quixye: —La̱in incꞌaꞌ xinseꞌec, chan. Ut li Ka̱cuaꞌ quixye, —La̱in ninnau nak xatseꞌec, chan.
Laj Abraham naxtzꞌa̱ma chiru li Dios nak tixtokꞌoba ruheb laj SodomaChirix chic aꞌan li oxibeb chi cui̱nk queꞌxakli ut queꞌoc chi xic saꞌ li tenamit Sodoma. Laj Abraham co̱ chirixeb re xchakꞌrabinquileb.
Tojoꞌnak li Ka̱cuaꞌ Dios quixye saꞌ xchꞌo̱l: —Incꞌaꞌ tinmuk chiru laj Abraham li cꞌaꞌru tinba̱nu.
Laj Abraham, aꞌan li ta̱oc chokꞌ xxeꞌto̱nil yucuaꞌeb li qꞌuila tenamit ut eb aꞌan nimak xcuanquileb. Chixjunileb li tenamit saꞌ ruchichꞌochꞌ teꞌxcꞌul li usilal saꞌ xcꞌabaꞌ laj Abraham.
Ac xinsicꞌ ru re ta̱cꞌamok be chiruheb li ralal xcꞌajol. Aꞌan ta̱chꞌoloba̱nk re xya̱lal chiruheb re nak teꞌxpa̱b li cua̱tin ut teꞌcua̱nk saꞌ usilal ut saꞌ ti̱quilal. Cui teꞌxba̱nu aꞌin, la̱in tinba̱nu chixjunil li cꞌaꞌru xinyechiꞌi re laj Abraham, chan li Dios.
Ut li Ka̱cuaꞌ Dios quixye re laj Abraham: —Nabal li cꞌaꞌak re ru incꞌaꞌ us xcuabi chirixeb laj Sodoma ut laj Gomorra. Numtajenakeb lix ma̱c.
Anakcuan xic cue aran ut tincuil ma ya̱l li cꞌaꞌru xcuabi chirixeb re nak tinnau, chan li Ka̱cuaꞌ Dios.
Eb li cuib chi cui̱nk queꞌco̱eb aran Sodoma. Ut laj Abraham quicana rochben li Ka̱cuaꞌ Dios.
Laj Abraham quinachꞌoc riqꞌuin li Ka̱cuaꞌ Dios ut quixye re: —¿Ma ta̱sach ruheb li ti̱queb xchꞌo̱l saꞌ xya̱nkeb li incꞌaꞌ ti̱queb xchꞌo̱l?
Ma̱re cuanqueb mero ciento chi cristian ti̱queb xchꞌo̱l saꞌ xya̱nkeb. Cui cuanqueb mero ciento li ti̱queb xchꞌo̱l, ¿ma incꞌaꞌ ta̱ru̱k ta̱cuy xma̱queb li incꞌaꞌ ti̱queb xchꞌo̱l? ¿Malaj cuan saꞌ a̱chꞌo̱l nak ta̱sach chi junaj cua li tenamit aꞌan? chan.
Incꞌaꞌ naru ta̱sacheb ru li ti̱queb xchꞌo̱l joꞌ ta̱ba̱nu riqꞌuineb li incꞌaꞌ ti̱queb xchꞌo̱l. Ninnau nak la̱at incꞌaꞌ ta̱ba̱nu aꞌan xban nak la̱at nacatrakoc a̱tin saꞌ xya̱lal saꞌ xbe̱neb chixjunileb li cuanqueb saꞌ ruchichꞌochꞌ, chan laj Abraham.
Li Ka̱cuaꞌ Dios quixye re laj Abraham: —Cui cuanqueb mero ciento li ti̱queb xchꞌo̱l saꞌ li tenamit Sodoma, saꞌ xcꞌabaꞌ eb aꞌan tincuy xma̱queb chixjunileb li cuanqueb aran, chan.
Ut laj Abraham quixye cuiꞌchic re li Ka̱cuaꞌ: —Chacuy inma̱c nak tina̱tinak cuiꞌchic a̱cuiqꞌuin chi joꞌcaꞌin. La̱at li Ka̱cuaꞌ Dios ut la̱in yal cui̱nkin.
Cui caꞌaj cuiꞌ o̱b roxcꞌa̱l (45) li cristian ti̱queb xchꞌo̱l cuanqueb saꞌ li tenamit aꞌan, ¿ma yal xban nak o̱b chic ta̱raj li mero ciento nak ta̱sach ru li tenamit? chan laj Abraham. Ut li Ka̱cuaꞌ Dios quixye re: —Cui cuanqueb o̱b roxcꞌa̱l (45) li cristian li ti̱queb xchꞌo̱l, la̱in incꞌaꞌ tinsach ru li tenamit, chan li Dios.
Ut laj Abraham quixpatzꞌ cuiꞌchic re: —Cui caꞌaj cuiꞌ caꞌcꞌa̱l (40) li ti̱queb xchꞌo̱l cuanqueb, ¿ma ta̱sacheb ru? chan. Ut li Dios quixye re, —Saꞌ xcꞌabaꞌeb li caꞌcꞌa̱l (40) li ti̱queb xchꞌo̱l, incꞌaꞌ tinsach ru li tenamit, chan.
Laj Abraham quixye cuiꞌchic re li Ka̱cuaꞌ: —Chacuy inma̱c. Us cui incꞌaꞌ tatjoskꞌokꞌ cuiqꞌuin xban nak tinpatzꞌok cuiꞌchic a̱cue. Ma̱re caꞌaj cuiꞌ laje̱b xcaꞌcꞌa̱l (30) cuanqueb. ¿Ma ta̱sacheb ru li tenamit? chan. Ut li Ka̱cuaꞌ quixye re, —Saꞌ xcꞌabaꞌeb li laje̱b xcaꞌcꞌa̱l (30) li ti̱queb xchꞌo̱l, la̱in tincuy xma̱queb li tenamit, chan.
Ut quixye cuiꞌchic laj Abraham: —At Ka̱cuaꞌ, chacuy inma̱c. Tinpatzꞌok cuiꞌchic a̱cue. Cui junmay (20) ajcuiꞌ li ti̱queb xchꞌo̱l, ¿ma ta̱sach ru li tenamit? chan. Ut li Ka̱cuaꞌ quixye re: —Saꞌ xcꞌabaꞌeb li junmay (20) li ti̱queb xchꞌo̱l, incꞌaꞌ tinsach ru li tenamit, chan.
Toj quixtzꞌa̱ma cuiꞌchic xcuybal laj Abraham ut quixye re li Ka̱cuaꞌ: —Ba̱nu usilal, at Ka̱cuaꞌ, matjoskꞌoꞌ cuiqꞌuin. Caꞌaj chic anakcuan tinpatzꞌok a̱cue ut incꞌaꞌ chic tatinchꞌiꞌchꞌiꞌi. ¿Cꞌaꞌru ta̱ba̱nu cui laje̱b (10) ajcuiꞌ li ti̱queb xchꞌo̱l li cuanqueb saꞌ li tenamit? chan. Ut li Ka̱cuaꞌ quixye re laj Abraham: —Saꞌ xcꞌabaꞌeb li laje̱b li ti̱queb xchꞌo̱l, incꞌaꞌ tinsach ru li tenamit, chan li Ka̱cuaꞌ.
Nak quirakeꞌ chi a̱tinac riqꞌuin laj Abraham, li Ka̱cuaꞌ Dios qui-el aran. Ut laj Abraham quisukꞌi cuiꞌchic saꞌ rochoch.
Li Dios naxsacheb li tenamit Sodoma ut GomorraNak ac oc re li kꞌojyi̱n, queꞌcuulac li cuib chi cui̱nk aran Sodoma. Aꞌaneb lix ángel li Dios. Laj Lot chunchu saꞌ li oqueba̱l re li tenamit saꞌ li naꞌajej li nequeꞌxchꞌutub cuiꞌ ribeb li cristian. Nak quirileb li cui̱nk, quicuacli laj Lot chixcꞌulbaleb, quixcuikꞌib rib ut quixxulub lix jolom saꞌ chꞌochꞌ.
Ut quixye reheb: —Ex Ka̱cuaꞌ, ba̱nuhomak li usilal. Yoꞌkeb saꞌ li cuochoch ut aran te̱numsi li kꞌojyi̱n. Aran naru te̱chꞌaj le̱ rok. Ut toj cuulaj ekꞌela texxic, chan. Eb aꞌan queꞌxye re: —Bantiox a̱cue. Ma̱chꞌiꞌchꞌiꞌi a̱cuib. Naru nococuar saꞌ be, chanqueb.
Abanan laj Lot quirelaji ruheb re nak teꞌxic saꞌ rochoch toj retal queꞌxsume cana̱c. Nak queꞌoc saꞌ li rochoch laj Lot quixyi̱b chi cha̱bil lix tibeleb xcua. Quixyi̱b lix caxlan cua xcomon li incꞌaꞌ nasipoꞌ, ut queꞌcuaꞌac.
Toj ma̱jiꞌ ajcuiꞌ nequeꞌoc chi cua̱rc nak queꞌcuulac chixjunileb li cui̱nk aj Sodoma joꞌ ti̱x ut joꞌ sa̱j. Queꞌxsut li rochoch.
Queꞌxjap re chixbokbal laj Lot ut queꞌxye re: —¿Bar cuanqueb li cui̱nk li xeꞌcꞌulun saꞌ la̱ cuochoch chiru li kꞌojyi̱n aꞌin? Isiheb chak chirix cab. Takaj toma̱cobk riqꞌuineb, chanqueb.
Laj Lot qui-el chirix cab chi a̱tinac riqꞌuineb ut quixtzꞌap li puerta chirix.
Quixye reheb: —Tintzꞌa̱ma usilal che̱ru, ex cuas cui̱tzꞌin. Nimla ma̱c xba̱nunquil li cꞌaꞌru nequecꞌoxla. Me̱ba̱nu li ma̱usilal aꞌin.
Cuanqueb cuib inrabin ma̱jiꞌ nequeꞌcuan riqꞌuin cui̱nk. Tincuisiheb chirix cab ut ba̱nuhomak li cꞌaꞌru te̱raj riqꞌuineb. Caꞌaj cuiꞌ li cuib chi ulaꞌ, ma̱cꞌaꞌ te̱ba̱nu reheb, chan.
Eb laj Sodoma queꞌxye re: —Elen arin. La̱at chalenakat chak saꞌ jalan tenamit ut anakcuan ta̱cuaj la̱at tattakla̱nk ke. Anakcuan nabal chic li raylal ta̱cꞌul la̱at chiru li teꞌxcꞌul eb aꞌan, chanqueb. Cꞌajoꞌ nak queꞌjoskꞌoꞌ saꞌ xbe̱n laj Lot. Queꞌjiloc chixcꞌatk re nak teꞌxcuek li puerta.
Ut eb li cui̱nk li cuanqueb saꞌ li cab saꞌ junpa̱t queꞌxquelo chi rukꞌ laj Lot ut queꞌrocsi ut queꞌxtzꞌap li puerta.
Eb li cuib chi cui̱nk lix takl li Dios queꞌqꞌuehoc reheb chi mutzꞌi̱rc eb li cui̱nk li teꞌraj oc saꞌ cab. Queꞌmutzꞌir li ti̱x joꞌ eb ajcuiꞌ li toj sa̱jeb. Ut eb li cui̱nk aꞌan queꞌlub chixsicꞌbal li puerta ut incꞌaꞌ queꞌxtau.
Ut eb li cuib chi cui̱nk queꞌxye re laj Lot: —¿Ma toj cuanqueb a̱cuechꞌalal saꞌ li tenamit aꞌin? Cui cuanqueb, isiheb saꞌ li tenamit aꞌin. Cꞌameb la̱ rabin ut la̱ cualal ut la̱ hiꞌ ut ayu. Ta̱cꞌameb chi najt chixjunileb la̱ cuechꞌalal li cuanqueb saꞌ li tenamit.
Anakcuan oc ke chixsachbal ru chi junaj cua li tenamit aꞌin xban nak kꞌaxal xnumta li ma̱c xeꞌxba̱nu. Aꞌan aj e nak xoxtakla chak li Ka̱cuaꞌ Dios chixsachbal ru li tenamit aꞌin, chanqueb.
Ut laj Lot co̱ chixyebal reheb li cui̱nk li teꞌsumla̱k cuiꞌ lix rabin ut quixye reheb: —Elenkex saꞌ li tenamit aꞌin ut ayukex chi najt xban nak li Ka̱cuaꞌ Dios oc re chixsachbal ru li tenamit, chan. Abanan eb li cui̱nk aꞌan incꞌaꞌ queꞌxpa̱b li cꞌaꞌru quixye laj Lot.
Nahiqꞌuicꞌnac ru li cutan nak eb li ángel queꞌxye re laj Lot: —Se̱ba a̱cuib, cꞌam la̱ cuixakil joꞌ eb ajcuiꞌ la̱ rabin. Elenkex saꞌ junpa̱t re nak incꞌaꞌ texca̱mk saꞌ xya̱nkeb li tenamit aꞌin li oqueb re chixtojbal xma̱queb, chanqueb.
Ut laj Lot toj quibay chi e̱lc. Li Ka̱cuaꞌ Dios quiril xtokꞌoba̱l ru laj Lot, joꞌ ajcuiꞌ lix comoneb. Ut eb li cuib chi cui̱nk queꞌxchap chi rukꞌ laj Lot, joꞌ eb ajcuiꞌ lix rabin ut li rixakil. Queꞌisi̱c saꞌ junpa̱t saꞌ li tenamit xbaneb lix takl li Dios.
Nak ac xeꞌel saꞌ li tenamit li cui̱nk quixye reheb: —A̱linankex re nak texcolekꞌ. Mex-iloc che̱rix chi moco te̱xakab e̱rib saꞌ li ru takꞌa. Ti̱c texxic toj saꞌ li tzu̱l re nak incꞌaꞌ tex-osokꞌ, chan reheb.
Ut laj Lot quixye reheb: —Checuy inma̱c, ex Ka̱cuaꞌ. Incꞌaꞌ nacuaj xic saꞌ li tzu̱l.
La̱ex nabal li usilal xeba̱nu cue. Joꞌcan nak xincoleꞌ. La̱in incꞌaꞌ nacuaj xic saꞌ li tzu̱l. Ma̱re tinca̱mk ajcuiꞌ aran.
Ilomak. Aran cuan jun chꞌina tenamit. Aꞌan caꞌchꞌin ut nachꞌ cuan. Choe̱canab chi xic aran re nak tocolekꞌ, chan laj Lot.
Jun reheb lix takl li Dios quichakꞌoc ut quixye re laj Lot: —Tinba̱nu li cꞌaꞌru xatzꞌa̱ma. Incꞌaꞌ tinsach ru li chꞌina tenamit li ta̱cuaj cuiꞌ xic.
Se̱ba a̱cuib. Ayu saꞌ junpa̱t. La̱in ma̱cꞌaꞌ naru tinba̱nu cui ma̱jiꞌ nequexcuulac aran, chan. Joꞌcan nak li tenamit aꞌan queꞌxqꞌue Zoar chokꞌ xcꞌabaꞌ.
Nak queꞌcuulac laj Lot saꞌ li chꞌina tenamit Zoar, ac x-el chak li sakꞌe.
Li Ka̱cuaꞌ Dios toj saꞌ choxa quixtakla chak li xam ut li azufre saꞌ xbe̱neb li tenamit Sodoma ut Gomorra.
Ut queꞌsacheꞌ chixjunil li tenamit. Queꞌosoꞌ chi junaj cua li cristian li cuanqueb aran ut chixjunil li acui̱mk. Queꞌosoꞌ chi junaj cua chixjunil li cuan saꞌ li ru takꞌa aꞌan.
Li rixakil laj Lot qui-iloc chirix ut aran quicana chokꞌ xpecal atzꞌam.
Joꞌ cuulajak chic laj Abraham co̱ cuiꞌchic saꞌ li naꞌajej li quia̱tina̱c cuiꞌ xban li Ka̱cuaꞌ.
Laj Abraham qui-iloc saꞌ li naꞌajej li queꞌcuan cuiꞌ li tenamit Sodoma ut Gomorra. Ut aran quiril nak ma̱ caꞌchꞌin li sib nakꞌujujnac chi takecꞌ. Chanchan jun nimla horno li yo̱ xxamlel.
Li Ka̱cuaꞌ Dios quixsach ruheb chi junaj cua chixjunil li tenamit li cuanqueb saꞌ li ru takꞌa. Abanan quijulticoꞌ re li cꞌaꞌru quixtzꞌa̱ma laj Abraham. Joꞌcan nak quixcol laj Lot.
Laj Lot quibalakꞌi̱c xbaneb lix rabin nak quicaltesi̱c xbanebLaj Lot quixucuac chi cana̱c saꞌ li chꞌina tenamit Zoar. Joꞌcan nak co̱ chi cua̱nc saꞌ li tzu̱l. Ut lix rabin cuib co̱eb chirix. Aran coxeꞌocak saꞌ jun ochoch pec.
Saꞌ jun li cutan eb lix rabin laj Lot yo̱queb chi a̱tinac chi ribileb rib. Li asbej quixye re li ri̱tzꞌin: —Li kayucuaꞌ yo̱ chi ti̱xc. Ut arin ma̱ jun cui̱nk cuan re tosumla̱k riqꞌuineb joꞌ na-uxman yalak bar.
Anakcuan takacaltesi li kayucuaꞌ ut la̱o tocua̱rk riqꞌuin re nak ta̱cua̱nk ralal xcꞌajol kiqꞌuin, chanqueb.
Ut chiru li kꞌojyi̱n queꞌxqꞌue nabal li vino re ut aꞌan quicala. Ut li asbej quicuar riqꞌuin. Abanan lix yucuaꞌ incꞌaꞌ quixqꞌue retal nak quicuan riqꞌuin lix rabin xban lix calajic.
Joꞌ cuulajak chic li asbej quixye re li ri̱tzꞌin: —Chi kꞌek la̱in xincuan riqꞌuin li kayucuaꞌ. Anakcuan takacaltesi cuiꞌchic re nak la̱at chic tatcua̱nk riqꞌuin. Chi joꞌcan ta̱cua̱nk li ralal xcꞌajol li kayucuaꞌ, chan re.
Saꞌ li kꞌojyi̱n aꞌan queꞌxcaltesi cuiꞌchic lix yucuaꞌeb. Ut li i̱tzꞌinbej co̱ chi cua̱rc riqꞌuin. Abanan lix yucuaꞌ incꞌaꞌ quixqꞌue retal nak quicuan riqꞌuin lix rabin xban lix calajic.
Ut lix rabin laj Lot chi xcabichaleb queꞌcana chi yaj aj ixk xban lix yucuaꞌeb.
Li asbej quicuan jun lix cꞌulaꞌal te̱lom. Aj Moab quixqꞌue chokꞌ xcꞌabaꞌ. Chalen anakcuan aꞌan lix xeꞌto̱nil yucuaꞌeb laj Moab.
Joꞌcan ajcuiꞌ li i̱tzꞌinbej quicuan ajcuiꞌ jun lix cꞌulaꞌal te̱lom. Ut aj Ben-ammi quixqꞌue chokꞌ xcꞌabaꞌ. Chalen anakcuan aꞌan lix xeꞌto̱nil yucuaꞌeb laj Amón.
Laj Abraham ut laj AbimelecLaj Abraham queꞌel saꞌ li naꞌajej li queꞌcuan cuiꞌ ut queꞌco̱eb saꞌ li naꞌajej Neguev. Queꞌcana saꞌ jun li naꞌajej li cuan saꞌ xya̱nk li cuib chi tenamit Cades ut Shur. Ut mokon chic queꞌel saꞌ li naꞌajej aꞌan. Queꞌco̱eb saꞌ li tenamit Gerar. Ut aran queꞌcana.
Nak ac cuanqueb aran, laj Abraham quixye: —Lix Sara ma̱cuaꞌ cuixakil. Aꞌan cuanab, chan. Lix reyeb li tenamit Gerar, aꞌan laj Abimelec. Li rey aꞌan quixtakla xcꞌambal lix Sara chokꞌ rixakil.
Chiru li kꞌojyi̱n aꞌan li Dios quia̱tinac riqꞌuin laj Abimelec saꞌ lix matcꞌ ut quixye re: —Anakcuan la̱at tatca̱mk xban nak li ixk xacꞌam a̱cuiqꞌuin cuan xbe̱lom, chan li Dios re.
Laj Abimelec toj ma̱jiꞌ nacuan riqꞌuin lix Sara. Laj Abimelec quixye re li Dios: —At Ka̱cuaꞌ, ¿ma nacacꞌoxla xcamsinquil li toj ma̱jiꞌ naxba̱nu li ma̱c?
Laj Abraham cuan re. Aꞌan xyehoc cue nak lix Sara, aꞌan ranab. Joꞌcan ajcuiꞌ lix Sara quixye cue nak laj Abraham, aꞌan ras. Ma̱cuaꞌ la̱in cuan cue nak xinba̱nu li naꞌleb aꞌin. Moco xinnau ta nak rixakil laj Abraham, chan laj Abimelec.
Ut li Ka̱cuaꞌ Dios quixye re saꞌ lix matcꞌ: —Ya̱l. La̱in ninnau nak moco la̱at ta cuan a̱cue. Xban nak ninnau aꞌin, joꞌcan nak incꞌaꞌ xatinqꞌue chi cua̱nc riqꞌuin lix Sara. Joꞌcan nak incꞌaꞌ xatma̱cob chicuu.
Ut anakcuan ta̱kꞌaxtesi li ixk aꞌin riqꞌuin lix be̱lom. Laj Abraham aꞌan jun li profeta li nayehoc re li cua̱tin ut aꞌan ta̱tijok cha̱cuix re nak incꞌaꞌ tatca̱mk. Abanan cui incꞌaꞌ nacakꞌaxtesi li ixk aꞌin, la̱at tatca̱mk, joꞌ eb ajcuiꞌ la̱ comon, chan li Dios.
Joꞌ cuulajak chic laj Abimelec quicuacli toj ekꞌela. Quixbokeb chixjunileb lix mo̱s ut quixserakꞌi reheb li cꞌaꞌru quiril saꞌ lix matcꞌ. Ut eb aꞌan cꞌajoꞌ nak queꞌxucuac chi rabinquil li a̱tin aꞌan.
Ut laj Abimelec quixbok laj Abraham ut quixye re: —Cꞌoxla cꞌaꞌru xaba̱nu cue. ¿Cꞌaꞌru inma̱c cha̱cuu nak xaqꞌue li raylal aꞌin saꞌ inbe̱n joꞌ ajcuiꞌ saꞌ xbe̱neb lin tenamit? Incꞌaꞌ us xaba̱nu cue.
¿Cꞌaꞌut nak xaba̱nu li naꞌleb aꞌin? chan laj Abimelec.
Laj Abraham quichakꞌoc ut quixye re: —La̱in xincꞌoxla nak incꞌaꞌ nequepa̱b li Ka̱cuaꞌ Dios saꞌ li tenamit aꞌin. Cuan saꞌ inchꞌo̱l nak ma̱re tine̱camsi xban li cuixakil.
Ya̱l li cꞌaꞌru xinye a̱cue nak lix Sara cui̱tzꞌin. Junaj li kayucuaꞌ ut li kanaꞌ jalaneb. Joꞌcan nak quinsumla riqꞌuin.
Li Dios quiyehoc cue nak tincanab rochoch lin yucuaꞌ ut tinxic saꞌ jalan naꞌajej. La̱in quinye re li cuixakil nak yalak bar tonumekꞌ aꞌan tixye nak la̱in li ras, chan laj Abraham.
Tojoꞌnak laj Abimelec quixkꞌaxtesi lix Sara saꞌ rukꞌ laj Abraham. Ut quixqꞌue nabal lix queto̱mk. Quixqꞌue ajcuiꞌ lix mo̱s cui̱nk ut lix mo̱s ixk.
Laj Abimelec quixye re laj Abraham: —Il li naꞌajej aꞌan. Chixjunil li chꞌochꞌ aꞌan cue la̱in. Ta̱sicꞌ li bar cuan ta̱cuulak cha̱cuu ut aran tatcua̱nk, chan.
Ut laj Abimelec quixye re lix Sara: —Qꞌue retal. La̱in xinqꞌue jun mil tumin plata re la̱ cuas. Xinba̱nu aꞌin re nak li cuanqueb saꞌ la̱ cuochoch teꞌxqꞌue retal nak saꞌ xya̱lal xatinkꞌaxtesi riqꞌuin la̱ be̱lom, ut re ajcuiꞌ nak chixjunileb teꞌxqꞌue retal nak ma̱cꞌaꞌ a̱ma̱c, chan laj Abimelec re.
(17-18) Xban li cꞌaꞌru quicꞌulman riqꞌuin lix Sara, li Ka̱cuaꞌ Dios quixtakla jun li yajel saꞌ xbe̱neb chixjunileb li cuanqueb saꞌ rochoch laj Abimelec re nak eb aꞌan incꞌaꞌ teꞌcua̱nk xcocꞌaleb. Laj Abraham quitijoc chiru li Dios chirixeb. Li Dios quirabi ut quixqꞌuirtesiheb chixjunileb li cuanqueb saꞌ rochoch laj Abimelec re nak teꞌcua̱nk xcocꞌaleb ut quixqꞌuirtesiheb ajcuiꞌ lix mo̱seb.
(-)
Lix yoꞌlajic laj IsaacLix Sara quixcꞌul li quiyechiꞌi̱c re junxil xban li Ka̱cuaꞌ Dios.
Quicuan jun lix cꞌulaꞌal te̱lom. Ac ti̱x chic laj Abraham nak quiyoꞌla li ralal. Quiyoꞌla li cꞌulaꞌal tzꞌakal saꞌ li cutan li quixye li Dios.
Laj Abraham quixqꞌue aj Isaac chokꞌ xcꞌabaꞌ li ralal li quicuan riqꞌuin lix Sara.
Nak ac cuan cuakxakib cutan re laj Isaac, laj Abraham quixba̱nu li circuncisión re joꞌ quiyeheꞌ re xban li Dios.
Jun ciento chihab cuan re laj Abraham nak quiyoꞌla laj Isaac.
Lix Sara quixye saꞌ xchꞌo̱l: —Li Dios xinixqꞌue chi seꞌec xban xsahil inchꞌo̱l xban nak xcuan incꞌulaꞌal. Ut nak teꞌrabi nak xyoꞌla lin cꞌulaꞌal, chixjunileb teꞌsahokꞌ saꞌ xchꞌo̱leb cuiqꞌuin.
¿Ani ta cuiꞌ raj xyehoc re laj Abraham nak ta̱cua̱nk junak lix cꞌulaꞌal cuiqꞌuin? Ma̱ ani. Ut anakcuan saꞌ xti̱xilal laj Abraham, xyoꞌla jun lix cꞌulaꞌal cuiqꞌuin, chan lix Sara.
Lix Agar rochben laj Ismael queꞌisi̱c saꞌ rochoch laj AbrahamNak ac nim chic laj Isaac, quimakꞌeꞌ xtuꞌ xban lix naꞌ. Saꞌ li cutan aꞌan laj Abraham quixba̱nu jun li ninkꞌe.
Lix Sara quiril nak laj Ismael yo̱ chiretzꞌu̱nquil laj Isaac. Laj Ismael, aꞌan li ralal laj Abraham li quicuan riqꞌuin lix Agar. Aꞌan li mo̱s chalenak chak Egipto.
Lix Sara co̱ chi jitoc riqꞌuin laj Abraham ut quixye re: —Isi li mo̱s aꞌin. Xicak rochben lix yum. Laj Ismael incꞌaꞌ ta̱tzꞌak li joꞌ qꞌuial ta̱re̱chani laj Isaac, chan.
Nak laj Abraham quirabi li ra̱tin, quirahoꞌ saꞌ xchꞌo̱l chirix laj Ismael xban nak aꞌan ralal ajcuiꞌ.
Abanan li Ka̱cuaꞌ Dios quixye re laj Abraham: —La̱at ta̱ba̱nu li cꞌaꞌru xye lix Sara. Matcꞌoxlac chirix laj Ismael joꞌ ajcuiꞌ chirix la̱ mo̱s. Laj Isaac, aꞌan la̱ cualal li xinyechiꞌi a̱cue. Saꞌ xcꞌabaꞌ laj Isaac teꞌcua̱nk la̱ cualal a̱cꞌajol li xinyechiꞌi a̱cue junxil.
Ut tincuosobtesi ajcuiꞌ la̱ cualal li quicuan riqꞌuin la̱ mo̱s. Teꞌqꞌuia̱nk li ralal xcꞌajol laj Ismael xban nak a̱cualal ajcuiꞌ aꞌan, chan.
Joꞌ cuulajak chic nak toj ekꞌela, laj Abraham quixqꞌue xcua lix Agar. Ut quixqꞌue jun bo̱ls tzꞌu̱m lix haꞌ ut lix Agar quixjelo saꞌ xbe̱n xtel. Nak laj Abraham quixkꞌaxtesi laj Ismael saꞌ rukꞌ lix Agar, quixchakꞌrabiheb. Tojoꞌnak queꞌco̱eb ut queꞌxsuti rib saꞌ li chaki chꞌochꞌ Beerseba xcꞌabaꞌ.
Nak qui-osoꞌ lix haꞌeb saꞌ lix bo̱ls tzꞌu̱m li naꞌbej quixcanab laj Ismael chi yocyo saꞌ xmu jun li cheꞌ.
Ut lix Agar co̱ chi chunla̱c najt caꞌchꞌin riqꞌuin lix yum. Incꞌaꞌ quiraj rilbal nak ta̱ca̱mk. Chunchu aran lix Agar nak quirabi nak yo̱ chi ya̱bac lix yum.
Li Dios quirabi nak yo̱ chi ya̱bac li al. Lix ángel li Dios quia̱tinac chak toj saꞌ choxa riqꞌuin lix Agar ut quixye re: —¿Cꞌaꞌut nak ra saꞌ a̱chꞌo̱l? Matxucuac. Li Dios ac xrabi xya̱b xcux la̱ yum li bar cuan cuiꞌ.
Cuaclin la̱at ut ta̱cuaclesi ajcuiꞌ li al ut ta̱chap chi rukꞌ. Teꞌqꞌuia̱nk li ralal xcꞌajol laj Ismael ut ta̱cua̱nk ajcuiꞌ xcuanquileb aꞌan, chan li ángel.
Tojoꞌnak li Ka̱cuaꞌ Dios quixcꞌut chiru lix Agar jun li yuꞌam haꞌ. Lix Agar coxbutꞌ lix bo̱ls tzꞌu̱m riqꞌuin haꞌ, ut quixqꞌue rucꞌa laj Ismael.
Ut li Dios quitenkꞌan re laj Ismael. Aꞌan quicui̱nkiloꞌ saꞌ li chaki chꞌochꞌ. Quixtzol chi us li cutuc riqꞌuin tzimaj.
Laj Ismael quicuan saꞌ li chaki chꞌochꞌ Parán. Aran quisumuba̱c xban lix naꞌ riqꞌuin jun li ixk aj Egipto.
Laj Abraham naxba̱nu jun li contrato rochben laj AbimelecSaꞌ eb li cutan aꞌan laj Abimelec rochben laj Ficol co̱eb chi a̱tinac riqꞌuin laj Abraham. Laj Ficol aꞌan li nataklan saꞌ xbe̱neb lix soldados laj Abimelec. Laj Abimelec quixye re laj Abraham: —La̱o yo̱co chixqꞌuebal retal nak nacatxtenkꞌa li Dios riqꞌuin chixjunil li cꞌaꞌak re ru nacaba̱nu.
Xban aꞌan, tintzꞌa̱ma cha̱cuu nak ta̱ye cue saꞌ xya̱lal chiru li Ka̱cuaꞌ Dios nak la̱at incꞌaꞌ ta̱ba̱nu li incꞌaꞌ us kiqꞌuin. Incꞌaꞌ ta̱ba̱nu li incꞌaꞌ us riqꞌuineb li cualal, joꞌ ajcuiꞌ riqꞌuineb li ralal xcꞌajol eb aꞌan. Joꞌ nak xinba̱nu li usilal a̱cue la̱at, joꞌcan ajcuiꞌ nak ta̱ba̱nu li usilal ke la̱o. Ta̱ba̱nu ajcuiꞌ usilal reheb li cristian li cuanqueb saꞌ li naꞌajej li cuancat cuiꞌ la̱at, chan.
Ut laj Abraham quixye re: —Relic chi ya̱l tinye a̱cue, tinba̱nu li cꞌaꞌru xatzꞌa̱ma chicuu, chan.
Ut laj Abraham quijitoc chiru laj Abimelec chirix jun li becbil haꞌ. Quixye re nak li becbil haꞌ aꞌan quimakꞌeꞌ chiru xbaneb lix mo̱s laj Abimelec.
Laj Abimelec quixye re: —La̱in incꞌaꞌ xinnau aꞌan. Nasach inchꞌo̱l a̱ban. Incꞌaꞌ ninnau ani xba̱nun re aꞌan, chan.
Ut laj Abraham quixsi cuib oxib xcarner ut xcuacax laj Abimelec. Ut saꞌ li cutan aꞌan queꞌxba̱nu jun li contrato re nak rami̱gakeb rib.
Nak laj Abraham quixcꞌam chak li queto̱mk li tixsi re laj Abimelec, quixchꞌutub cuukub li ixki carner ut jalan quixqꞌueheb cuiꞌ.
Ut laj Abimelec quixpatzꞌ re laj Abraham: —¿Cꞌaꞌru aj e nak jalan xachꞌutubeb cuiꞌ li cuukub chi carner? chan.
Laj Abraham quichakꞌoc ut quixye re: —Nak ta̱cꞌul li cuukub chi carner aꞌin, aꞌan retalil nak cue li becbil haꞌ xban nak la̱in xinbecoc re, chan.
Li becbil haꞌ aꞌin Beerseba queꞌxqꞌue chokꞌ xcꞌabaꞌ xban nak aran queꞌxba̱nu li contrato.
Nak ac xeꞌxba̱nu li contrato, laj Abimelec rochben laj Ficol, queꞌsukꞌi saꞌ lix tenamiteb. Laj Abimelec ut laj Ficol, aꞌaneb laj filisteo.
Ut laj Abraham quirau jun to̱n li cheꞌ tamarisco aran Beerseba. Ut saꞌ li naꞌajej aꞌan quitijoc chiru li Ka̱cuaꞌ Dios.
Laj Abraham najt quicuan saꞌ xtenamiteb laj filisteo.
Li Dios naril ma tzꞌakal xpa̱ba̱l laj AbrahamMokon chic li Dios quixyal rix lix pa̱ba̱l laj Abraham. Li Dios quixye re: —Abraham.— Ut aꞌan quixye: —Cueꞌquin, Ka̱cuaꞌ.—
Li Dios quixye re: —Cꞌam la̱ cualal li jun ajcuiꞌ cha̱cuu. Aꞌan laj Isaac li kꞌaxal raro a̱ban. Ta̱cꞌam aꞌan saꞌ li naꞌajej Moriah saꞌ li tzu̱l li tincꞌut cha̱cuu. Ut aran ta̱qꞌue la̱ cualal chokꞌ jun cꞌatbil mayej chicuu, chan li Dios.
Joꞌ cuulajak chic nak toj ekꞌela laj Abraham quicuacli. Quixqꞌue rix lix bu̱r. Ut quixyocꞌ lix siꞌ. Ut co̱ saꞌ li naꞌajej li quiyeheꞌ re xban li Dios. Quixcꞌam li ralal chirix nak co̱ ut quixcꞌam ajcuiꞌ cuib lix mo̱s li toj sa̱jeb.
Saꞌ rox li cutan laj Abraham quiril chi najt li naꞌajej li yo̱queb cuiꞌ chi xic.
Quixye reheb lix mo̱s cuib: —Cana̱kex arin e̱rochben li bu̱r. La̱in tinxic cuochben li cualal toj saꞌ xbe̱n li tzu̱l. Ut aran takalokꞌoni li Ka̱cuaꞌ Dios tojoꞌnak tosukꞌi̱k chak, chan.
Laj Abraham quixqꞌue li siꞌ chiri̱ka laj Isaac. Li siꞌ aꞌan ta̱cꞌanjelak re xcꞌatbal li mayej. Ut laj Abraham quixcꞌam xchꞌi̱chꞌ ut quixcꞌam ajcuiꞌ caꞌchꞌin li ru xam re xlochbal li siꞌ. Ut cuotz queꞌtakeꞌ saꞌ li tzu̱l laj Abraham rochben li ralal.
Junpa̱t na chic nak laj Isaac quixye re laj Abraham: —At inyucuaꞌ, chan. —¿Cꞌaꞌru ta̱cuaj, at cualal? chan laj Abraham. Laj Isaac quixye re: —Cuan li siꞌ ut cuan ajcuiꞌ li ru xam. Ut li carner li takacꞌat chokꞌ re li kamayej, ¿bar cuan? chan.
Laj Abraham quixye re: —Matcꞌoxlac, at cualal. Li Dios ta̱qꞌuehok re li carner li takacꞌat chokꞌ re li kamayej, chan. Ut yo̱queb chi xic saꞌ li tzu̱l.
Queꞌcuulac saꞌ li naꞌajej li quiyeheꞌ re xban li Dios. Ut laj Abraham quixyi̱b jun lix artal riqꞌuin li tusbil pec ut quixtus lix siꞌ saꞌ xbe̱n. Ut quixbacꞌ li ralal ut quixyocob saꞌ xbe̱n li siꞌ.
Laj Abraham quixchap lix chꞌi̱chꞌ ut quixtaksi li rukꞌ. Oc raj re xcamsinquil li ralal.
Tojoꞌnak jun lix ángel li Ka̱cuaꞌ Dios quia̱tinac chak saꞌ choxa ut quixye re laj Abraham: —¡Abraham! ¡Abraham!— Ut laj Abraham quichakꞌoc ut quixye re: —Arin cuanquin, chan.
Lix ángel li Ka̱cuaꞌ Dios quixye re: —Ma̱camsi la̱ cualal. Ma̱cꞌaꞌ ta̱ba̱nu re. Ninnau nak nacapa̱b chi tzꞌakal li Dios. La̱ cualal jun ajcuiꞌ ut aꞌan xaqꞌue raj chokꞌ re la̱ mayej chiru li Dios, chan.
Laj Abraham qui-iloc chirix. Ut aran cuan jun li carner tꞌiltꞌo lix xucub saꞌ jun chamal pim. Ut laj Abraham co̱ chixchapbal li carner. Aꞌan li quixmayeja chokꞌ re̱kaj li ralal.
Ut laj Abraham quixqꞌue chokꞌ xcꞌabaꞌ li naꞌajej aꞌan, “Li Ka̱cuaꞌ Dios naxqꞌue chak li cꞌaꞌru napaltoc ke.” Ut chalen anakcuan nayeman, “Saꞌ lix tzu̱l li Ka̱cuaꞌ Dios naqꞌueheꞌ li cꞌaꞌru na-ajman ru”.
Lix ángel li Ka̱cuaꞌ Dios quia̱tinac chak saꞌ choxa xcaꞌ sut riqꞌuin laj Abraham.
Ut quixye re: —Joꞌcaꞌin xye li Ka̱cuaꞌ Dios: xban nak la̱at xamayeja raj la̱ cualal chicuu, relic chi ya̱l tinye a̱cue nak tatincuosobtesi.
Kꞌaxal numtajenak li usilal tinba̱nu a̱cue. Joꞌ xqꞌuialeb li chahim li cuanqueb saꞌ choxa, joꞌcan ajcuiꞌ xqꞌuialeb la̱ cualal a̱cꞌajol li teꞌcua̱nk. Ut joꞌ xqꞌuial li cocꞌ ru li samaib li cuanqueb chire li palau nak teꞌta̱mk la̱ cualal a̱cꞌajol. Ut kꞌaxal cuiꞌchic nimak xcuanquileb la̱ cualal a̱cꞌajol chiruheb li xicꞌ teꞌilok reheb aꞌan.
Xban nak xapa̱b li cua̱tin, chixjunileb li tenamit saꞌ ruchichꞌochꞌ teꞌxcꞌul li usilal saꞌ xcꞌabaꞌeb la̱ cualal a̱cꞌajol, chan.
Chirix chic aꞌan laj Abraham quisukꞌi cuiꞌchic saꞌ li naꞌajej li quixcanabeb cuiꞌ lix mo̱s. Ut chixjunileb queꞌco̱eb cuiꞌchic saꞌ li tenamit Beerseba. Ut aran quicana laj Abraham.
Mokon chic laj Abraham quirabi resil nak laj Nacor li ri̱tzꞌin quicuan xcocꞌal riqꞌuin lix Milca.
Li xbe̱n li quiyoꞌla, aꞌan laj Uz xcꞌabaꞌ. Ut li xcab, aꞌan laj Buz. Ut li rox, aꞌan laj Kemuel. Nak ac cui̱nk chic laj Kemuel quicuan jun li ralal laj Aram xcꞌabaꞌ.
Chirix chic laj Kemuel, toj queꞌcuan cuiꞌchic xcocꞌaleb laj Nacor. Aꞌaneb aꞌin lix cꞌabaꞌeb: laj Quesed, laj Hazo, laj Pildas, laj Jidlaf, ut laj Betuel.
Ut laj Betuel quicuan jun xrabin xRebeca xcꞌabaꞌ. Chi joꞌcaꞌin laj Nacor li ri̱tzꞌin laj Abraham quicuan cuakxakib lix cocꞌal riqꞌuin lix Milca.
Ut laj Nacor quicuan ajcuiꞌ lix cocꞌal riqꞌuin lix Reúma. Aꞌaneb aꞌin lix cꞌabaꞌeb; laj Teba, laj Gaham, laj Tahas, ut laj Maaca.
Nak quicam lix SaraJun ciento riqꞌuin cuukub xcaꞌcꞌa̱l (127) chihab cuan re lix Sara nak quicam.
Quicam saꞌ li tenamit Quiriat-arba, li nayeman ajcuiꞌ Hebrón. Li tenamit aꞌan cuan saꞌ xcue̱nt Canaán. Laj Abraham kꞌaxal ra saꞌ xchꞌo̱l xban nak quicam lix Sara, ut cꞌajoꞌ nak quiya̱bac chirix.
Laj Abraham quixakli chixcꞌatk lix caxonil lix camenak ut quia̱tinac riqꞌuineb laj hititas.
Quixye reheb: —La̱in chalenakin chak saꞌ jalan tenamit. Te̱ba̱nu usilal cꞌayihomak caꞌchꞌinak li naꞌajej re tinmuk lin camenak, chan.
Eb laj hititas queꞌchakꞌoc ut queꞌxye re:
—Ka̱cuaꞌ Abraham, choa̱cuabi. Arin cuancat saꞌ kaya̱nk ut la̱at sicꞌbil a̱cuu xban li Dios. Muk la̱ camenak saꞌ junak mukleba̱l li nacuulac cha̱cuu la̱at. Ma̱ ani ta̱yehok a̱cue nak incꞌaꞌ takaqꞌue xnaꞌaj la̱ camenak. Muk la̱ camenak. La̱o incꞌaꞌ tatkachꞌiꞌchꞌiꞌi, chanqueb.
Laj Abraham quicuacli ut quixcꞌutzub rib chiruheb laj hititas.
Quixye reheb: —Cui naxcꞌul le̱ chꞌo̱l nak tinmuk lin camenak arin, cherabihak li cꞌaꞌru tinye e̱re. Tex-a̱tinak chicuix riqꞌuin laj Efrón li ralal laj Zohar.
Te̱tzꞌa̱ma chiru nak tixcꞌayi chokꞌ cue li ochoch pec, Macpela xcꞌabaꞌ, li cuan saꞌ xnuba̱l lix chꞌochꞌ. Tintoj chi tzꞌakal li joꞌ nimal naraj chirix lix chꞌochꞌ. Aꞌan tixkꞌaxtesi cue li chꞌochꞌ che̱ru la̱ex. Chi joꞌcan ta̱cua̱nk li naꞌajej re xmukbaleb lin camenak, chan laj Abraham.
Laj Efrón cuan saꞌ xya̱nkeb laj hititas. Quichakꞌoc chiruheb li cuanqueb aran joꞌ ajcuiꞌ chiruheb li yo̱queb chi numecꞌ saꞌ li oqueba̱l re li tenamit.
Quixye re laj Abraham: —Ka̱cuaꞌ Abraham, chacuabi li cꞌaꞌru tinye a̱cue. Li chꞌochꞌ aꞌan yal tinsi a̱cue joꞌ ajcuiꞌ li ochoch pec li cuan aran. Aꞌin tinba̱nu chiruheb chixjunileb lin comon. Muk chak la̱ camenak aran, chan laj Efrón.
Ut laj Abraham quixcꞌutzub cuiꞌchic rib chiruheb li tenamit.
Chiruheb chixjunileb laj Abraham quixye re laj Efrón: —Cui naxcꞌul a̱chꞌo̱l, ba̱nu usilal chacuabi li cꞌaꞌru tinye a̱cue. La̱in tinqꞌue a̱cue xtzꞌak li chꞌochꞌ li xinpatzꞌ. Ta̱cꞌul li tumin cuiqꞌuin ut la̱in tinxic chixmukbal lin camenak aran, chan.
Laj Efrón quichakꞌoc ut quixye:
—Ka̱cuaꞌ Abraham, abi li cꞌaꞌru tinye a̱cue. Lix tzꞌak li chꞌochꞌ aꞌan ca̱hib ciento bisoc chi plata. ¿Cꞌaꞌ ta ru aj e nak tinpatzꞌ li tumin a̱cue? Muk chak la̱ camenak, chan.
Nak quirabi joꞌ nimal xtzꞌak li chꞌochꞌ, laj Abraham qui-oc chixbisbal li plata. Quixbis ca̱hib ciento bisoc li plata joꞌ nequeꞌbisoc laj cꞌay. Ut quixqꞌue li plata re laj Efrón chiruheb laj hititas.
Laj Efrón quixkꞌaxtesi re laj Abraham li chꞌochꞌ Macpela xcꞌabaꞌ, li nacana jun pacꞌal Mamre. Quixkꞌaxtesi ajcuiꞌ li ochoch pec li cuan aran, joꞌ eb ajcuiꞌ chixjunil li cheꞌ li joꞌ qꞌuial cuan saꞌ li chꞌochꞌ.
Li chꞌochꞌ aꞌan quikꞌaxtesi̱c re laj Abraham chiruheb laj hititas, joꞌ ajcuiꞌ chixjunileb li yo̱queb chi numecꞌ saꞌ li oqueba̱l re li tenamit.
Ut laj Abraham quixmuk li rixakil chi saꞌ li ochoch pec li cuan saꞌ li chꞌochꞌ Macpela. Macpela, aꞌan cuan jun pacꞌal li naꞌajej Mamre li nayeman ajcuiꞌ Hebrón re. Aꞌan cuan saꞌ xcue̱nt Canaán.
Li chꞌochꞌ ut li ochoch pec ac kꞌaxtesinbil chic saꞌ rukꞌ laj Abraham xbaneb laj hititas. Li naꞌajej aꞌan re chic laj Abraham ut ta̱cꞌanjelak chiru re xmukbaleb lix camenak.
Laj Abraham naxsicꞌ rixakil laj IsaacLaj Abraham ac ti̱x chic. Qꞌuila chihab cuan re. Laj Abraham qui-osobtesi̱c xban li Dios. Numtajenak li usilal li quiqꞌueheꞌ re.
Cuan jun xmo̱s cui̱nk laj Abraham. Najter na-oc riqꞌuin. Aꞌan tzꞌakal na-iloc re chixjunil li cꞌaꞌru cuan re. Saꞌ jun li cutan laj Abraham quixye re: —Takaba̱nu jun li juramento saꞌ xcꞌabaꞌ li Ka̱cuaꞌ Dios. Qꞌue la̱ cuukꞌ rubel li cuaꞌ joꞌ cꞌaynako chixba̱nunquil nak nakaba̱nu li juramento.
Saꞌ xcꞌabaꞌ li Ka̱cuaꞌ Dios ta̱ye cue nak incꞌaꞌ ta̱sicꞌ rixakil li cualal saꞌ li tenamit Canaán li cuanquin cuiꞌ anakcuan. Ta̱ye cue chiru li tzꞌakal Dios li cuan saꞌ choxa re nak tinpa̱b la̱ cua̱tin nak incꞌaꞌ ta̱sicꞌ xcomoneb aj Canaán chokꞌ rixakil.
Tatxic ban saꞌ lin tenamit li cuanqueb cuiꞌ chak lin comon. Ut saꞌ xya̱nkeb aꞌan ta̱sicꞌ junak rixakil laj Isaac li cualal, chan.
Ut lix mo̱s quichakꞌoc ut quixye re: —Ma̱re incꞌaꞌ ta̱raj cha̱lc li ixk arin. Cui incꞌaꞌ naraj cha̱lc arin, ¿ma ta̱ru̱k tincꞌam la̱ cualal aran saꞌ li tenamit li chalenakat cuiꞌ chak la̱at? chan.
Ut laj Abraham quixye re lix mo̱s, —Qꞌue retal cꞌaꞌru ta̱ba̱nu. La̱in incꞌaꞌ nacuaj nak ta̱xic li cualal aran.
Li Ka̱cuaꞌ Dios li cuan saꞌ choxa, aꞌan qui-isin chak cue saꞌ rochoch lin yucuaꞌ. Aꞌan qui-isin chak cue saꞌ xya̱nkeb lin comon saꞌ li naꞌajej li quinyoꞌla cuiꞌ chak. Aꞌan quia̱tinac cuiqꞌuin ut quixye cue, “La̱in tinqꞌue li chꞌochꞌ aꞌin a̱cue ut reheb ajcuiꞌ la̱ cualal a̱cꞌajol,” chan. Li Ka̱cuaꞌ Dios tixtakla chak lix ángel ut aꞌan ta̱cꞌamok be cha̱cuu nak tatxic chixsicꞌbal rixakil li cualal. Matcꞌoxlac. Aran ta̱cꞌam chak li rixakil li cualal.
Abanan cui li ixk incꞌaꞌ naraj cha̱lc, ma̱cꞌoxla chic li juramento li xkaba̱nu. Caꞌaj cuiꞌ aꞌin tintzꞌa̱ma cha̱cuu nak ma̱cꞌam li cualal aran, chan laj Abraham.
Tojoꞌnak lix mo̱s quixqꞌue li rukꞌ rubel li raꞌ laj Abraham lix patrón. Joꞌcaꞌin nak quixba̱nu li juramento.
Lix mo̱s laj Abraham quixcꞌam laje̱b li camello chirix. Quixcꞌam ajcuiꞌ qꞌuila pa̱y ru li ma̱tan terto xtzꞌak li quitakla̱c xban laj Abraham. Li mo̱s co̱ saꞌ li tenamit Mesopotamia. Aꞌan lix tenamit laj Nacor, li ri̱tzꞌin laj Abraham.
Chire li tenamit cuan jun li becbil haꞌ. Li mo̱s quixqꞌueheb chi buchlac li camellos aran. Ac ecuu chic nak quicuulac. Aꞌan x-o̱ril nak nequeꞌcuulac li ixk chixcꞌambal lix haꞌeb.
Li mo̱s quitijoc ut quixye re li Dios: —At Ka̱cuaꞌ, la̱at li Dios li naxlokꞌoni laj Abraham lin patrón. Tintzꞌa̱ma cha̱cuu nak china̱tenkꞌa anakcuan. Chacuuxta̱na taxak ru lin patrón.
Arin cuanquin. Xakxo̱quin chire li haꞌ. Ut yo̱queb chi cha̱lc eb li xkaꞌal chixcꞌambal lix haꞌeb.
La̱in tinye re junak li xkaꞌal, “Ba̱nu usilal, cubsi la̱ cuc. Si bayak cuucꞌa”, chaꞌkin re. Ut cui aꞌan tixye cue, “Us. Ucꞌan ut tinqꞌue ajcuiꞌ rucꞌaheb la̱ camello”, chaꞌak cue, aꞌanak taxak retalil nak li ixk aꞌan li sicꞌbil ru a̱ban chokꞌ rixakil laj Isaac la̱ mo̱s. Chi joꞌcaꞌin tinnau nak xaba̱nu usilal re lin patrón, chan li mo̱s.
Lix mo̱s laj Abraham ma̱jiꞌ narakeꞌ chi tijoc nak quicuulac lix Rebeca chire li haꞌ. Pakpo chak lix cuc saꞌ xbe̱n xtel. Lix Rebeca, aꞌan lix rabin laj Betuel, li ralal laj Nacor riqꞌuin lix Milca. Laj Nacor, aꞌan li ri̱tzꞌin laj Abraham.
Cꞌajoꞌ xchꞌinaꞌusal na-iloc lix Rebeca. Aꞌan toj tukꞌ ixk. Toj ma̱jiꞌ cuanjenak riqꞌuin cui̱nk. Lix Rebeca quicube saꞌ li haꞌ. Quixbutꞌ chak lix cuc ut quitakeꞌ chak.
Lix mo̱s laj Abraham co̱ saꞌ junpa̱t chi a̱tinac riqꞌuin lix Rebeca. Ut quixye re: —Ba̱nu usilal, si bayak cuucꞌa li cuan saꞌ la̱ cuc. Ta̱chakik cue, chan li mo̱s.
Lix Rebeca quixcubsi lix cuc ut quixye re: —Ucꞌan, cuaꞌchin,— ut quixqꞌue li rucꞌa.
Nak yo̱ chi ucꞌac lix mo̱s laj Abraham, lix Rebeca quixye re: —Tinqꞌue ajcuiꞌ rucꞌaheb la̱ camello toj retal teꞌucꞌak chi us, chan.
Quixcukꞌ li haꞌ saꞌ li nequeꞌucꞌac cuiꞌ li camello ut co̱ cuiꞌchic xcꞌambal chak rucꞌaheb chixjunileb li camellos.
Ut lix mo̱s laj Abraham sachso xchꞌo̱l chirilbal ut quixye saꞌ xchꞌo̱l: —Aꞌan tana aꞌin li ixk li sicꞌbil ru xban li Dios. Xintau lin taklanquil li xinchal chixba̱nunquil arin, chan.
Nak queꞌrakeꞌ chi ucꞌac eb li camellos, lix mo̱s laj Abraham quixkꞌaxtesi lix ma̱tan lix Rebeca. Quixqꞌue jun lix sahob ru li ruꞌuj tzꞌakal oro caꞌchꞌin chic ma̱ mero onza li ra̱lal ut quixqꞌue ajcuiꞌ cuib xsahob ru lix cux rukꞌ oro numenak ca̱hib onza li ra̱lal.Saꞌ li versículo 24:22 naxpatzꞌ xsahob ru li ruꞌuj xban nak saꞌ eb li cutan aꞌan cꞌaynakeb chirocsinquil li argolla saꞌ ruꞌujeb. Chanchan nak na-ocsiman li caꞌ xic anakcuan.
Lix mo̱s laj Abraham quixpatzꞌ re: —¿Ani la̱ yucuaꞌ? ¿Ma ta̱ru̱k tohila̱nk jun kꞌojyi̱nak saꞌ le̱ rochoch? chan re.
Lix Rebeca quichakꞌoc ut quixye re: —La̱in xrabin laj Betuel. Lin yucuaꞌ, aꞌan li ralal laj Nacor riqꞌuin lix Milca.
Cuan naꞌajej chokꞌ e̱re saꞌ li kochoch. Cuan li qꞌuim ut cuan ajcuiꞌ xcuaheb la̱ xul, chan.
Nak quirabi aꞌan, lix mo̱s laj Abraham quixxulub lix jolom ut qui-oc chixlokꞌoninquil li Ka̱cuaꞌ Dios.
Quixye re li Dios: —Kꞌaxal nim la̱ cuanquilal. La̱at li Dios li naxlokꞌoni laj Abraham lin patrón. Junelic cuan saꞌ a̱chꞌo̱l ut nacaba̱nu li usilal re. La̱at xatcꞌamoc be chicuu. Joꞌcan nak xintau lix comoneb lin patrón, chan re li Ka̱cuaꞌ Dios.
Lix Rebeca co̱ saꞌ junpa̱t cuan cuiꞌ lix naꞌ. Ut quixcꞌut chiru li ma̱tan li quiqꞌueheꞌ re ut quixserakꞌi re chixjunil li cꞌaꞌru quiyeheꞌ re xban li cui̱nk li quixtau chire li haꞌ.
Lix Rebeca cuan jun ras cui̱nk aj Labán xcꞌabaꞌ. Laj Labán co̱ saꞌ junpa̱t chi a̱tinac riqꞌuin li cui̱nk li cuan chire li haꞌ.
Quirabi nak lix Rebeca quixserakꞌi re lix naꞌ li cꞌaꞌru quiyeheꞌ re xban li cui̱nk. Quiril ajcuiꞌ lix sahob ru li ruꞌuj joꞌ ajcuiꞌ lix sahob ru lix cux rukꞌ. Joꞌcan nak co̱ saꞌ junpa̱t chi a̱tinac riqꞌuin li cui̱nk. Xakxo li cui̱nk chire li haꞌ nak quixtau rochben lix camellos.
Laj Labán quixye re: —La̱at raro̱cat xban li Dios. Incꞌaꞌ tatcana̱k arin chire li haꞌ. Yoꞌo saꞌ kochoch ut tathila̱nk kiqꞌuin. Ac yi̱banbil le̱ naꞌaj joꞌ ajcuiꞌ xnaꞌajeb la̱ camellos, chan.
Ut li cui̱nk qui-oc saꞌ li rochoch ut laj Labán quixhiteb li ri̱keb li camellos. Quixqꞌue li qꞌuim joꞌ ajcuiꞌ xcuaheb li camellos. Quixqꞌue ajcuiꞌ xhaꞌeb li cui̱nk re nak teꞌxchꞌaj li rok.
Ut quixqꞌue ajcuiꞌ lix tibel xcuaheb li cui̱nk. Lix mo̱s laj Abraham quixye re laj Labán: —Chacuy inma̱c. Toj ma̱jiꞌ nacuaj cuaꞌac. Xbe̱n cua tinye e̱re cꞌaꞌru lin taklanquil, chan. Ut laj Labán quixye re, —Ye ke cꞌaꞌru la̱ taklanquil xatchal chixba̱nunquil, chan re.
Ut li cui̱nk quixye reheb: —La̱in lix mo̱s li Ka̱cuaꞌ Abraham.
Li Ka̱cuaꞌ Dios nabal li usilal xba̱nu re lin patrón. Nim lix cuanquil laj Abraham. Cꞌajoꞌ xqꞌuial li cꞌaꞌru re li quiqꞌueheꞌ re xban li Ka̱cuaꞌ Dios. Ma̱ caꞌchꞌin lix queto̱mk cuan. Cuan xcarner, cuan xcuacax, cuan xcamellos ut cuan xburros. Cuan ajcuiꞌ nabal lix oro ut lix plata. Ut nabaleb ajcuiꞌ lix mo̱s, joꞌ ixk joꞌ cui̱nk.
Li rixakil laj Abraham xSara xcꞌabaꞌ. Nak ac ti̱x chic lix Sara, quicuan jun li ralal laj Abraham riqꞌuin. Chixjunil li cꞌaꞌru cuan re laj Abraham, aꞌ li ralal ta̱e̱chani̱nk re.
La̱in xinba̱nu jun li juramento riqꞌuin lin patrón. Aꞌan quixye cue, “Ma̱sicꞌ junak rixakil li cualal saꞌ li tenamit Canaán li cuanquin cuiꞌ la̱in anakcuan,” chan cue.
Quixye ajcuiꞌ cue: “Tatxic cuanqueb cuiꞌ chak lin comon. Saꞌ xya̱nkeb aꞌan, ta̱sicꞌ rixakil li cualal,” chan.
Ut la̱in quinye re lin patrón: “Ma̱re li ixk incꞌaꞌ ta̱raj cha̱lc chikix,” chanquin re.
Ut aꞌan quixye cue, “Matcꞌoxlac. Li Ka̱cuaꞌ Dios li na-iloc cue, aꞌan tixtakla chak junak lix ángel cha̱cuochbeninquil. Li ángel aꞌan tatxtenkꞌa re nak us tat-e̱lk saꞌ la̱ viaje nak tatxic aran. Ta̱sicꞌ junak rixakil li cualal saꞌ xya̱nkeb lin comon,” chan cue.
Ut quixye ajcuiꞌ cue laj Abraham, “Nak tatcuulak aran riqꞌuineb lin comon, ta̱sicꞌ rixakil li cualal. Cui eb li cuechꞌalal incꞌaꞌ teꞌxqꞌue li ixk, matcꞌoxlac chic chirix li juramento li xkaba̱nu,” chan cue laj Abraham.
Nak xincꞌulun cuan cuiꞌ li becbil haꞌ, xin-oc chi tijoc chiru li Ka̱cuaꞌ Dios, li naxlokꞌoni laj Abraham. La̱in xinye re, “China̱tenkꞌa taxak re nak tintau lin taklanquil li xinchal chixba̱nunquil arin.
Anakcuan xakxo̱quin arin chire li haꞌ. Ut yo̱queb chi cha̱lc eb li xkaꞌal chixcꞌambal lix haꞌ. La̱in tinye re junak li xkaꞌal, ‘Ba̱nu usilal, cubsi la̱ cuc. Si bayak cuucꞌa’, chaꞌkin re.
Ut cui aꞌan tixye cue, ‘Us. Ucꞌan ut tinqꞌue ajcuiꞌ rucꞌaheb la̱ camellos,’ chaꞌak cue, aꞌan taxak retalil nak aꞌan li ixk li sicꞌbil ru a̱ban chokꞌ rixakil li ralal laj Abraham lin patrón,” chanquin re li Dios.
La̱in toj yo̱quin ajcuiꞌ chi tijoc nak xchal lix Rebeca. Pakpo chak lix cuc xbe̱n xtel. Ut aꞌan xcube chixbutꞌbal lix cuc. Nak xtakeꞌ chak, la̱in xinye re, “Ba̱nu usilal, si bayak cuucꞌa. Ta̱chakik cue,” chanquin re.
Ut lix Rebeca xcubsi lix cuc ut xye cue, “Ucꞌan ut tinqꞌue ajcuiꞌ rucꞌaheb la̱ camellos,” chan cue. La̱in xin-ucꞌac ut xeꞌucꞌac ajcuiꞌ lin camellos.
Ut la̱in xinpatzꞌ re, “¿Ani la̱ yucuaꞌ?” Ut aꞌan xye cue, “La̱in lix rabin laj Betuel. Lin yucuaꞌ, aꞌan li ralal laj Nacor riqꞌuin lix Milca,” chan. La̱in xinqꞌue re lix sahob ru li ruꞌuj. Ut xinqꞌue ajcuiꞌ lix sahob ru lix cux rukꞌ.
Ut la̱in xinxulub lin jolom chixlokꞌoninquil li Ka̱cuaꞌ Dios li naxlokꞌoni laj Abraham lin patrón. Xinbantioxi chiru li Dios nak aꞌan xberesin chak cue ut xcꞌut chicuu ani tzꞌakal ta̱oc chokꞌ rixakil laj Isaac, chan.
—Anakcuan checuyak inma̱c nak tinpatzꞌ e̱re. ¿Ma te̱ba̱nu li usilal re lin patrón? ¿Ma te̱takla lix Rebeca chokꞌ rixakil li ralal lin patrón malaj ut incꞌaꞌ? Yehomak cue re nak tinnau ma tento nak tinxic saꞌ jalan naꞌajej chixsicꞌbal rixakil laj Isaac, chan.
Ut quichakꞌoc laj Labán rochben laj Betuel. Ut queꞌxye re, —Riqꞌuin li Ka̱cuaꞌ Dios chalenak chak li naꞌleb aꞌin. Ma̱cꞌaꞌ naru takaye chirix.
Takaqꞌue lix Rebeca. Naru nacacꞌam cha̱cuix. Aꞌan ta̱oc chokꞌ rixakil li ralal la̱ patrón joꞌ quixye li Ka̱cuaꞌ Dios, chanqueb re.
Nak lix mo̱s laj Abraham quirabi li cꞌaꞌru queꞌxye, quixxulub rib saꞌ chꞌochꞌ chixbantioxinquil chiru li Dios.
Tojoꞌnak quixkꞌaxtesi nabal lix ma̱tan lix Rebeca. Quixqꞌue li rakꞌ, quixqꞌue lix plata joꞌ ajcuiꞌ lix oro. Lix naꞌ ut li ras lix Rebeca queꞌxcꞌul ajcuiꞌ nabal lix ma̱tan terto xtzꞌak.
Ut lix mo̱s laj Abraham joꞌ eb ajcuiꞌ li rochben queꞌqꞌueheꞌ xcua rucꞌa. Ut aran ajcuiꞌ queꞌcuar. Joꞌ cuulajak chic lix mo̱s laj Abraham quixye reheb: —Anakcuan raj toxic riqꞌuin lin patrón, chan.
Laj Labán ut lix naꞌ queꞌxye re: —¿Ma incꞌaꞌ naru ta̱cana̱k laje̱bak cutan chic lix Rebeca kiqꞌuin? Chirix li laje̱b cutan aꞌan ta̱ru̱k ta̱xic, chanqueb.
Ut aꞌan quixye cuiꞌchic reheb: —Cheba̱nu usilal. Moe̱bay chic xban nak li Dios ac xcꞌut chiku li cꞌaꞌru naraj. Choe̱canab chi xic riqꞌuin lin patrón, chan.
Eb aꞌan queꞌxye re: —Kabokak cuan lix Rebeca ut takapatzꞌ re cꞌaꞌ na ru tixye aꞌan, chanqueb.
Ut queꞌxbok chak lix Rebeca ut queꞌxye re: —¿Cꞌaꞌru nacacꞌoxla? ¿Ma ta̱cuaj xic anakcuan? chanqueb re. Ut aꞌan quixye: —La̱in tinxic anakcuan, chan.
Ut queꞌxchakꞌrabi lix Rebeca rochben jun lix mo̱s ixk li quixcꞌam chirix. Queꞌxchakꞌrabi ajcuiꞌ lix mo̱s laj Abraham ut eb li rochben.
Queꞌxye re lix Rebeca: —Li Ka̱cuaꞌ Dios taxak chi-osobtesi̱nk a̱cue. Ut cheꞌcua̱nk taxak nabal la̱ cualal a̱cꞌajol. Ut nimak taxak xcuanquil eb la̱ cualal a̱cꞌajol li teꞌcua̱nk chiruheb li xicꞌ teꞌilok reheb aꞌan, chanqueb re.
Lix Rebeca ut lix mo̱s ixk queꞌtakeꞌ chirixeb li camellos ut queꞌco̱eb chirix lix mo̱s laj Abraham.
Laj Isaac nacuan saꞌ li naꞌajej Neguev. Quicuulac cuan cuiꞌ li yuꞌam haꞌ “Li yoꞌyo̱quil Dios li na-iloc cue” xcꞌabaꞌ. Chirix aꞌan quisukꞌi cuiꞌchic saꞌ rochoch.
Nak qui-ecuu, laj Isaac co̱ chi be̱c saꞌ cꞌaleba̱l. Ut nak qui-iloc saꞌ be, quiril nak yo̱queb chak chi nachꞌoc li camellos.
Lix Rebeca quiril nak yo̱ chak chi cha̱lc jun li cui̱nk, ut quicube chirix li camello.
Quixpatzꞌ re lix mo̱s laj Abraham: —¿Ani li cui̱nk li yo̱ chak chi cha̱lc? chan. Li mo̱s quixye re: —Aꞌan laj Isaac li ralal lin patrón, chan. Lix Rebeca quixhel lix tꞌicr saꞌ xjolom ut quixtzꞌap li ru.
Nak queꞌxcꞌul rib saꞌ be, lix mo̱s laj Abraham quixserakꞌi re laj Isaac chixjunil li cꞌaꞌru quixba̱nu saꞌ xtenamit lix Rebeca.
Ut laj Isaac quixcꞌam lix Rebeca chokꞌ rixakil saꞌ rochoch lix naꞌ camenak. Laj Isaac cꞌajoꞌ nak quixra lix Rebeca. Ut riqꞌuin aꞌan quicꞌojla xchꞌo̱l ut incꞌaꞌ chic quirahoꞌ xchꞌo̱l xban xcamic lix naꞌ.
Eb li ralal xcꞌajol laj Abraham riqꞌuin lix CeturaLaj Abraham quixcꞌam cuiꞌchic jun rixakil xCetura xcꞌabaꞌ.
Ut queꞌcuan xcocꞌal riqꞌuin. Aꞌaneb aꞌin lix cꞌabaꞌeb. Laj Zimram, laj Jocsán, laj Medán, laj Madián, laj Isbac, ut laj Súa.
Laj Jocsán, aꞌan xyucuaꞌeb laj Seba ut laj Dedán. Ut laj Dedán, aꞌan xyucuaꞌeb laj Asurim, laj Letusim ut laj Leumim.
Laj Madián, aꞌan xyucuaꞌeb laj Efa, laj Efer, laj Hanoc, laj Abida ut laj Elda. Aꞌaneb aꞌin li ralal xcꞌajol laj Abraham li queꞌcuan riqꞌuin lix Cetura.
Chixjunil li cꞌaꞌru cuan re laj Abraham, laj Isaac quie̱chanin re.
Nak toj yoꞌyo laj Abraham, quixqꞌueheb xma̱tan li ralal xcꞌajol li queꞌcuan riqꞌuineb jalan ixk. Quixtaklaheb saꞌ jun cꞌaleba̱l najt riqꞌuin li naꞌajej li cuan cuiꞌ laj Isaac. Li naꞌajej li queꞌco̱eb cuiꞌ, aꞌan cuan saꞌ xjayal li na-el cuiꞌ chak li sakꞌe.
Lix camic laj AbrahamJun ciento riqꞌuin oꞌlaju xca̱cꞌa̱l (175) chihab quiyoꞌyo laj Abraham.
Nak ac ti̱x chic chi us laj Abraham quicam ut co̱ chixtaubaleb lix xeꞌto̱nil yucuaꞌ li ac camenakeb.
Laj Isaac ut laj Ismael queꞌxmuk lix yucuaꞌeb saꞌ li ochoch pec li cuan saꞌ li naꞌajej Macpela. Li mukleba̱l aꞌan cuan chixcꞌatk lix chꞌochꞌ laj Efrón li ralal laj Zohar laj hitita. Li naꞌajej aꞌan cuan chak jun pacꞌal li naꞌajej Mamre.
Laj Abraham quimukeꞌ saꞌ li naꞌajej li queꞌxmuk cuiꞌ lix Sara li rixakil. Aꞌan li chꞌochꞌ li quixlokꞌ junxil laj Abraham riqꞌuineb laj hititas.
Nak camenak chic laj Abraham, laj Isaac qui-osobtesi̱c xban li Dios. Laj Isaac quicuan saꞌ li naꞌajej cuan cuiꞌ li yuꞌam haꞌ “Li yoꞌyo̱quil Dios li na-iloc cue” xcꞌabaꞌ.
Aꞌaneb aꞌin chixjunileb li ralal xcꞌajol laj Ismael, li ralal laj Abraham. Lix naꞌ laj Ismael, aꞌan lix Agar li chalenak chak Egipto. Aꞌan li quicuan chokꞌ xmo̱s lix Sara.
Aꞌaneb aꞌin lix cꞌabaꞌeb li ralal xcꞌajol laj Ismael. Li xbe̱n, aꞌan laj Nebaiot. Chirix chic aꞌan queꞌcuan laj Cedar, laj Adbeel ut laj Mibsam,
ut queꞌcuan ajcuiꞌ laj Misma, laj Duma ut laj Massa,
joꞌ eb ajcuiꞌ laj Hadar, laj Tema, laj Jetur, laj Nafis, ut laj Cedema. Laj Cedema, aꞌan li i̱tzꞌinbej.
Aꞌaneb aꞌin li cablaju chi ralal laj Ismael. Ac xtenamiteb li junju̱nk ut aꞌaneb ajcuiꞌ queꞌcuan chokꞌ rey saꞌ lix tenamiteb.
Jun ciento riqꞌuin cuuklaju xcaꞌcꞌa̱l (137) chihab cuan re laj Ismael nak quicam. Ut coxtauheb lix xeꞌto̱nil yucuaꞌ li ac camenakeb.
Eb li ralal laj Ismael queꞌcuan saꞌ li chꞌochꞌ li naticla saꞌ li tenamit Havila ut naxic toj saꞌ li tenamit Shur ut nacuulac toj saꞌ li nuba̱l re li tenamit Asiria. Li naꞌajej aꞌin cuan saꞌ xcaꞌyaba̱l Egipto. Ut aran queꞌxyi̱b lix naꞌajeb laj Ismael usta incꞌaꞌ queꞌraj lix comoneb.
Lix yoꞌlajiqueb laj Jacob ut laj EsaúAꞌaneb aꞌin chixjunileb li ralal xcꞌajol laj Isaac, li ralal laj Abraham.
Caꞌcꞌa̱l (40) chihab cuan re laj Isaac nak quixcꞌam lix Rebeca chokꞌ rixakil. Lix Rebeca, aꞌan lix rabin laj Betuel aj arameo re li tenamit Padan-aram. Li ras lix Rebeca, aꞌan laj Labán.
Laj Isaac quitijoc chiru li Ka̱cuaꞌ Dios. Quitijoc chirix li rixakil xban nak ma̱ jun lix cocꞌal nequeꞌcuan. Li Ka̱cuaꞌ Dios quirabi xtij laj Isaac. Ut lix Rebeca quicana chi yaj aj ixk.
Saꞌ jun li cutan nak ma̱jiꞌ nacuulac xcutanquil xyoꞌlajic lix cꞌulaꞌal, lix Rebeca quirecꞌa nak cꞌajoꞌ nak yo̱ chi ecꞌa̱nc lix cꞌulaꞌal. Ut qui-oc xcꞌaꞌux riqꞌuin li cꞌaꞌru quirecꞌa. Lix Rebeca quixye saꞌ xchꞌo̱l: —¿Cꞌaꞌut nak yo̱quin chixcꞌulbal chi joꞌcaꞌin? chan. Ut quitijoc chiru li Dios ut quixye: —¿Cꞌaꞌut nak yo̱quin chixcꞌulbal chi joꞌcaꞌin? chan re li Dios.
Li Ka̱cuaꞌ Dios quixye re lix Rebeca: —Li cocꞌal li teꞌyoꞌla̱k, luteb. Li asbej ta̱cꞌanjelak chiru li i̱tzꞌinbej. Riqꞌuin li cuib li cocꞌal aꞌin teꞌcua̱nk cuib li ni̱nki tenamit. Jun li tenamit kꞌaxal nimak xcuanquil chiru li tenamit jun chic. Ut incꞌaꞌ teꞌxcꞌam rib saꞌ usilal, chan li Dios.
Ut luteb lix cocꞌal lix Rebeca li queꞌyoꞌla.
Li xbe̱n li quiyoꞌla kꞌan xjolom ut kꞌol is rix. Aj Esaú queꞌxqꞌue chokꞌ xcꞌabaꞌ.
Nak quiyoꞌla li i̱tzꞌinbej, chapcho lix cux rok li asbej xban. Ut queꞌxqꞌue chokꞌ xcꞌabaꞌ li i̱tzꞌinbej aj Jacob. Oxcꞌa̱l (60) chihab cuan re laj Isaac nak queꞌyoꞌla li ralal riqꞌuin lix Rebeca.
Laj Esaú quixcꞌayi lix ma̱tan li ta̱re̱chani rajEb li cocꞌal queꞌqꞌui. Nak ac nim chic laj Esaú, aꞌan jun cha̱bil aj yo. Ut nacuulac chiru li cua̱nc saꞌ qꞌuicheꞌ. Laj Jacob, aꞌan jun cui̱nk kꞌun xchꞌo̱l ut nacuulac chiru li cua̱nc saꞌ cab.
Laj Isaac kꞌaxal naxra laj Esaú xban nak aꞌan naxtiu li xul li naxyo chak. Ut laj Jacob, aꞌan li kꞌaxal raro xban lix Rebeca.
Saꞌ jun li cutan laj Jacob yo̱ chixchikbal xtibel xcua nak quisukꞌi chak laj Esaú chi yohoc. Laj Esaú lublu chi us.
Quixye re laj Jacob: —Qꞌue bayak cue li tibel cua li cak ru li yo̱cat chixyi̱banquil. Numtajenak lin tzꞌocajic, chan. Xban aꞌin queꞌxqꞌue jun chic xcꞌabaꞌ laj Esaú. Aj Edom queꞌxqꞌue chokꞌ xcab xcꞌabaꞌ.
Ut laj Jacob quixye re laj Esaú: —Tinqꞌue a̱cue li cua cui ta̱cꞌayi chokꞌ cue la̱ primogenitura, li ta̱cue̱chani joꞌ xbe̱n alalbej, chan.
Laj Esaú quixye re laj Jacob: —Cui tinca̱mk xban intzꞌocajic, cꞌaꞌ ta cuiꞌ ru ta̱oc cuiꞌ cue li ma̱tan aꞌan, chan.
Laj Jacob quixye re laj Esaú: —Ye cue anakcuan chiru li Dios nak ta̱cꞌayi chokꞌ cue, chan. Ut laj Esaú quixcꞌayi chokꞌ re laj Jacob li cꞌaꞌru quire̱chani raj joꞌ jun xbe̱n alalbej.
Ut laj Jacob quixqꞌue lix tibel xcua laj Esaú. Ut laj Esaú quicuaꞌac chi us. Nak quirakeꞌ chi cuaꞌac co̱. Joꞌcan nak laj Esaú quixtzꞌekta̱na lix primogenitura, lix ma̱tan li quire̱chani raj xban nak aꞌan li xbe̱n alalbej.
Laj Isaac naxic saꞌ li naꞌajej Gerar xcꞌabaꞌQuicuan cuiꞌchic jun li cueꞌej saꞌ li naꞌajej aꞌan joꞌ nak quicuan junxil nak toj yoꞌyo laj Abraham. Laj Isaac co̱ saꞌ li tenamit Gerar li cuan cuiꞌ laj Abimelec. Laj Abimelec, aꞌan xreyeb laj filisteo.
Ut li Ka̱cuaꞌ Dios quixcꞌutbesi rib chiru laj Isaac ut quixye re: —Matxic saꞌ li tenamit Egipto. Tatcua̱nk saꞌ li naꞌajej li tinye a̱cue.
Tatcana̱k saꞌ li naꞌajej aꞌin li cuancat cuiꞌ anakcuan. La̱in tinberesi̱nk a̱cue ut tatcuosobtesi. Chixjunil li chꞌochꞌ aꞌin tinqꞌue a̱cue la̱at ut reheb ajcuiꞌ la̱ cualal a̱cꞌajol re nak ta̱tzꞌaklok ru li contrato li quinba̱nu chak najter riqꞌuin la̱ yucuaꞌ, chan li Dios.
Teꞌnabalokꞌ la̱ cualal a̱cꞌajol joꞌ xqꞌuial li chahim chiru choxa. Chixjunil li chꞌochꞌ aꞌin tinqꞌue chokꞌ reheb la̱ cualal a̱cꞌajol. Chixjunileb li tenamit li teꞌcua̱nk saꞌ ruchichꞌochꞌ teꞌosobtesi̱k saꞌ xcꞌabaꞌeb la̱ cualal a̱cꞌajol, chan.
—Tinba̱nu aꞌin a̱cuiqꞌuin xban nak laj Abraham quixpa̱b chi anchal xchꞌo̱l li cua̱tin ut quixba̱nu li cꞌaꞌru naxye lin chakꞌrab. Quixba̱nu chixjunil li quinye re, chan li Ka̱cuaꞌ Dios.
Ut laj Isaac quicana chi cua̱nc saꞌ li tenamit Gerar.
Ut eb li cui̱nk li cuanqueb saꞌ li tenamit aꞌan queꞌxpatzꞌ re laj Isaac: —¿Ani li ixk aꞌan? chanqueb. Laj Isaac quichakꞌoc ut quixye reheb: —Aꞌan li cuanab, chan. Quixucuac chixyebal nak lix Rebeca, aꞌan rixakil xban nak lix Rebeca chꞌinaꞌus na-iloc. Aꞌan quixcꞌoxla nak ma̱re teꞌxcamsi re nak teꞌxcꞌam lix Rebeca.
Ac xnumeꞌ chic nabal cutan nak laj Abimelec yo̱ chi iloc saꞌ ventana. Quiril nak laj Isaac yo̱ chixkꞌalunquil lix Rebeca.
Laj Abimelec quixbok laj Isaac ut quixye re: —Anakcuan ninnau nak lix Rebeca a̱cuixakil. ¿Cꞌaꞌut nak xaye cue nak a̱cuanab? chan. Ut laj Isaac quixye re: —Xinye e̱re chi joꞌcan xban nak xinxucuac. Xincꞌoxla nak ma̱re tine̱camsi xban lix Rebeca, chan.
Laj Abimelec quixye re laj Isaac: —¿Cꞌaꞌut nak xaba̱nu ke chi joꞌcaꞌin? —¿Cꞌaꞌut nak xoa̱balakꞌi? Cui ta incꞌaꞌ xkanau nak a̱cuixakil lix Rebeca, ma̱re xchapeꞌ raj xban junak li cui̱nk li cuan saꞌ katenamit. Cui xba̱nu raj aꞌin, la̱at raj cuan a̱cue nak xkaba̱nu li ma̱c aꞌin, chan.
Ut laj Abimelec quixye reheb chixjunileb li cristian: —Li ani ta̱chꞌiꞌchꞌiꞌi̱nk re li cui̱nk aꞌin joꞌ ajcuiꞌ li rixakil ta̱camsi̱k, chan.
Saꞌ li chihab aꞌan laj Isaac qui-au saꞌ li naꞌajej aꞌan. Ut kꞌaxal cuiꞌchic nabal li ru li racui̱mk li quixxoc xban nak li Ka̱cuaꞌ Dios quirosobtesi laj Isaac.
Cꞌajoꞌ nak quitam li cꞌaꞌru re. Quibiomoꞌ chi us.
Cꞌajoꞌ lix queto̱mk. Cuanqueb ajcuiꞌ nabal lix mo̱s. Ut eb laj filisteo queꞌoc chixcakalinquil laj Isaac.
Chixjunil li becbil haꞌ li queꞌxbec lix mo̱seb laj Abraham xyucuaꞌ laj Isaac, eb laj filisteo queꞌxbutꞌ chꞌochꞌ chi saꞌ.
Ut laj Abimelec quixye re laj Isaac: —Kꞌaxal us cui tat-e̱lk saꞌ li katenamit xban nak yo̱ chi nima̱nc a̱cuanquil, chan.
Ut laj Isaac queꞌel aran ut co̱ toj saꞌ li ru takꞌa re Gerar. Ut aran queꞌcana chi cua̱nc.
Laj Isaac quixtakla cuiꞌchic xbecbaleb lix julel li haꞌ li queꞌxbec nak toj yoꞌyo̱k laj Abraham, li queꞌxbutꞌ eb laj filisteo nak ac xcam laj Abraham. Lix cꞌabaꞌeb li qꞌuebil chak junxil xban laj Abraham, aꞌan cuiꞌchic quixqꞌue chokꞌ xcꞌabaꞌ laj Isaac.
Saꞌ jun li cutan eb lix mo̱s laj Isaac yo̱queb chixbecbal jun chic lix julel haꞌ saꞌ li ru takꞌa nak queꞌxtau jun yuꞌam haꞌ.
Eb laj ilol queto̱mk re Gerar queꞌpletic riqꞌuineb li nequeꞌiloc re xqueto̱mk laj Isaac. Queꞌxye reheb: —Li yuꞌam haꞌ aꞌin, ke la̱o, chanqueb. Xban nak queꞌpletic, laj Isaac quixqꞌue Esek chokꞌ xcꞌabaꞌ li yuꞌam haꞌ aꞌan.
Ut lix mo̱s laj Isaac queꞌxbec jun chic lix julel haꞌ. Ut quicuan cuiꞌchic li ple̱t chirix lix julel haꞌ aꞌan. Ut laj Isaac quixqꞌue Sitna chokꞌ xcꞌabaꞌ lix julel haꞌ aꞌan.
Ut laj Isaac queꞌel aran ut queꞌco̱eb saꞌ jalan chic naꞌajej. Ut aran queꞌxbec jun chic lix julel haꞌ. Aran ma̱ ani chic queꞌchꞌiꞌchꞌiꞌin re chirix li becbil haꞌ. Laj Isaac quixqꞌue Rehobot chokꞌ xcꞌabaꞌ li becbil haꞌ aꞌan. Ut laj Isaac quixye: —Anakcuan li Ka̱cuaꞌ Dios xoxtenkꞌa chixtaubal jun li kanaꞌaj cha̱bil. Sa chic tocua̱nk arin ut ta̱cua̱nk chixjunil li cꞌaꞌru ke, chan.
Ut laj Isaac co̱ saꞌ li naꞌajej Beerseba.
Saꞌ li kꞌojyi̱n aꞌan li Ka̱cuaꞌ Dios quixcꞌutbesi rib chiru laj Isaac ut quixye re: —La̱in li Ka̱cuaꞌ Dios li quinixlokꞌoni chak laj Abraham la̱ yucuaꞌ. Matxucuac. La̱in junelic tin-ilok a̱cue ut tatincuosobtesi. Ut tebinqꞌue ajcuiꞌ chi qꞌuia̱nc la̱ cualal a̱cꞌajol. Tinba̱nu aꞌin a̱cuiqꞌuin xban nak joꞌcaꞌin quinyechiꞌi chak re laj Abraham junxil, chan li Dios.
Ut laj Isaac quixtus li pec ut quixyi̱b jun lix artal ut quixlokꞌoni li Ka̱cuaꞌ Dios. Laj Isaac quixyi̱b ajcuiꞌ lix muheba̱l re nak ta̱cua̱nk aran. Ut eb lix mo̱s laj Isaac queꞌxbec aran jun chic lix julel haꞌ.
Laj Isaac quixba̱nu jun contrato riqꞌuin laj AbimelecSaꞌ jun li cutan laj Abimelec qui-el Gerar ut co̱ Beerseba chi a̱tinac riqꞌuin laj Isaac. Quixcꞌam jun li rami̱g chirix aj Ahuzat xcꞌabaꞌ ut quixcꞌam ajcuiꞌ laj Ficol li nataklan reheb lix soldados.
Laj Isaac quixye reheb: —¿Cꞌaꞌut nak xexchal arin cuiqꞌuin? Julticak e̱re nak xicꞌ quine̱ril nak quine̱risi chak saꞌ e̱ya̱nk, chan.
Eb aꞌan queꞌchakꞌoc ut queꞌxye re: —La̱o xkil nak li Ka̱cuaꞌ Dios yo̱ cha̱tenkꞌanquil. Ut xkaye chi kibil kib nak takaba̱nu junak li contrato a̱cuiqꞌuin.
Me̱ba̱nu li incꞌaꞌ us kiqꞌuin. La̱o ma̱cꞌaꞌ kaba̱nu chak e̱re. Junes usilal kaba̱nu chak e̱riqꞌuin. Saꞌ xya̱lal catkisi saꞌ kaya̱nk. Ut anakcuan la̱at osobtesinbilat xban li Ka̱cuaꞌ Dios, chan laj Abimelec.
Ut laj Isaac quixba̱nu jun li ninkꞌe. Eb aꞌan queꞌcuaꞌac ut queꞌucꞌac.
Joꞌ cuulajak chic ekꞌela nak queꞌsake̱u, queꞌxba̱nu jun li contrato chi ribileb rib. Laj Isaac queꞌxchakꞌrabi rib saꞌ usilal. Ut eb aꞌan queꞌco̱eb.
Saꞌ ajcuiꞌ li cutan aꞌan lix mo̱seb laj Isaac queꞌcuulac riqꞌuin ut queꞌxye re nak queꞌxbec jun chic lix julel li haꞌ. Queꞌxye re, —Anakcuan xkatau li haꞌ, chanqueb.
Ut laj Isaac quixqꞌue Seba chokꞌ xcꞌabaꞌ li haꞌ aꞌan. Ut chalen anakcuan, Beerseba nayeman re li tenamit aꞌan li queꞌxtau cuiꞌ li haꞌ.
Caꞌcꞌa̱l (40) chihab cuan re laj Esaú nak quixcꞌam lix Judit chokꞌ rixakil. Lix Judit aꞌan xrabin laj Beeri laj hitita. Ut quixcꞌam ajcuiꞌ chokꞌ rixakil lix Basemat, lix rabin laj Elón laj hitita.
Cꞌajoꞌ li raylal queꞌxcꞌul laj Isaac ut lix Rebeca xbaneb li rixakil laj Esaú.
Laj Isaac quirosobtesi laj Jacob ut laj EsaúNak ac ti̱x chic chi us laj Isaac, quimoy li xnakꞌ ru ut incꞌaꞌ chic sa na-iloc. Saꞌ jun li cutan laj Isaac quixbok li xbe̱n ralal. Aꞌan laj Esaú. Quixye re: —At cualal.— Laj Esaú quichakꞌoc ut quixye re: —Cueꞌquin.—
Laj Isaac quixye re: —La̱at nacanau nak ti̱xin chic. Ma̱re chi se̱b nincam.
Anakcuan tatxic saꞌ qꞌuicheꞌ chi yohoc. Cꞌam li cꞌaꞌru a̱cue ta̱cꞌanjelak re xcamsinquil li xul. Ta̱cꞌam chak chokꞌ cue li cꞌaꞌru ta̱camsi.
Ut ta̱yi̱b caꞌchꞌinak lin tzacae̱mk li nacuulac chicuu. Nak ac xincuaꞌac, la̱in tatcuosobtesi nak toj yoꞌyo̱quin, chan laj Isaac re laj Esaú.
Lix Rebeca quirabi li cꞌaꞌru quixye laj Isaac re laj Esaú. Laj Esaú co̱ saꞌ qꞌuicheꞌ chi yohoc re nak tixcamsi chak li xul li quiyeheꞌ re xban lix yucuaꞌ.
Lix Rebeca quixye re laj Jacob li cꞌaꞌru quirabi. —La̱in xcuabi li cꞌaꞌru xye la̱ yucuaꞌ re la̱ cuas.
La̱ yucuaꞌ xye re, “Ayu chi yohoc ut ta̱cꞌam chak junak li xul re nak ta̱yi̱b lin tzacae̱mk. Tincuaꞌak ut la̱in tatcuosobtesi chiru li Ka̱cuaꞌ Dios nak toj yoꞌyo̱quin,” chan la̱ yucuaꞌ re laj Esaú.
Anakcuan, Jacob, ba̱nu li cꞌaꞌru tinye a̱cue.
Ayu cuanqueb cuiꞌ li queto̱mk ut ta̱cꞌam chak cuibak li cha̱bil chiba̱t li toj sa̱jeb. Riqꞌuineb aꞌan la̱in tinyi̱b xtibel xcua la̱ yucuaꞌ li nacuulac chiru.
Ut la̱at tatxic chixqꞌuebal li tzacae̱mk aꞌan re la̱ yucuaꞌ. Ut aꞌan tixtzaca ut tatrosobtesi nak toj ma̱jiꞌ nacam, chan lix Rebeca.
Laj Jacob quixye re: —Li cuas kꞌol is rix ut la̱in moco kꞌol is ta cuix.
Ma̱re tinixma̱yu lin yucuaꞌ ut tixnau nak yo̱quin chixbalakꞌinquil. Ma̱re ma̱cuaꞌ chic cuosobtesinquil tinbok chak saꞌ inbe̱n. Ma̱re intzꞌekta̱nanquil li ta̱cha̱lk saꞌ inbe̱n, chan laj Jacob.
Ut lix naꞌ quixye re: —Matcꞌoxlac chirix aꞌan. La̱in chincꞌuluk re li raylal aꞌan. La̱at ba̱nu li cꞌaꞌru yo̱quin chixyebal a̱cue. Cꞌameb chak li chiba̱t li xinye a̱cue, chan re laj Jacob.
Laj Jacob co̱ chixcꞌambaleb li chiba̱t ut quixkꞌaxtesi saꞌ rukꞌ lix naꞌ. Ut lix naꞌ quixyi̱b li tibel cua li nacuulac chiru lix yucuaꞌ laj Jacob.
Lix Rebeca quirisi chak li rakꞌ laj Esaú li kꞌaxal cha̱bil li xocxo xban, ut quixqꞌue chirix laj Jacob li i̱tzꞌinbej.
Ut quixbat rix li chiba̱t chiru lix tel laj Jacob joꞌ ajcuiꞌ chirix xcux.
Ut quixkꞌaxtesi li tibel cua joꞌ ajcuiꞌ li caxlan cua saꞌ rukꞌ laj Jacob.
Laj Jacob co̱ cuan cuiꞌ lix yucuaꞌ ut quixye re: —At inyucuaꞌ, chan. Laj Isaac quixye re: —Cueꞌquin. ¿Anihat la̱at? ¿Ma la̱at laj Esaú? chan.
Laj Jacob quixye re lix yucuaꞌ: —La̱in li xbe̱n a̱cualal. Xinba̱nu li cꞌaꞌru xaye cue. Cueꞌ lix tibel a̱cua li xinyo chak. Ba̱nu usilal. Tatcuaꞌak ut tina̱cuosobtesi, chan laj Jacob.
Laj Isaac quixye re: —At cualal, ¿ma saꞌ junpa̱t xatau chak li xinpatzꞌ a̱cue? chan. Ut laj Jacob quichakꞌoc ut quixye re, —Li Ka̱cuaꞌ Dios li nacalokꞌoni, aꞌan xtenkꞌan cue chixtaubal chi junpa̱t, chan.
Laj Isaac quixye re: —Jilon chak chincꞌatk re nak tinma̱yu ru la̱ tel, at cualal. ¿Ma la̱at na tzꞌakal laj Esaú li cualal? chan.
Laj Jacob quijiloc chixcꞌatk lix yucuaꞌ. Laj Isaac quixma̱yu ru lix tel ut quixye re: —La̱in nacuabi nak lix ya̱b la̱ cux, aꞌan xya̱b xcux laj Jacob, ut la̱ tel, aꞌan xtel laj Esaú nak nacuecꞌa, chan.
Laj Isaac incꞌaꞌ quixnau ru laj Jacob xban nak lix tel kꞌol is ru joꞌ lix tel laj Esaú. Nak ac oc re chirosobtesinquil laj Jacob,
laj Isaac quixye cuiꞌchic re: —Ye cue, ¿ma relic chi ya̱l nak la̱at laj Esaú, li cualal? chan. Ut laj Jacob quichakꞌoc ut quixye re: —La̱in laj Esaú la̱ cualal, chan.
Laj Isaac quixye re: —Qꞌue cue lix tibel lin cua li xayo chak. Tincuaꞌak ut chirix aꞌan tatcuosobtesi, chan. Laj Jacob quixqꞌue re lix tibel xcua. Quixqꞌue ajcuiꞌ lix vino. Ut laj Isaac quixtzaca li quiqꞌueheꞌ re.
Ut quixye re: —Anakcuan tatjilok chak cuiqꞌuin ut ta̱cuutzꞌ li cuu, at cualal, chan.
Laj Jacob quijiloc chixcꞌatk ut quirutzꞌ ru lix yucuaꞌ. Laj Isaac quirutzꞌ xbo̱c li rakꞌ. Ut quirosobtesi laj Jacob ut quixye:—Lix bo̱c li rakꞌ li cualal, aꞌan joꞌ xbo̱c li qꞌuicheꞌ li quirosobtesi chak li Ka̱cuaꞌ Dios.
Aꞌ taxak li Ka̱cuaꞌ Dios tixqꞌue chak li hab saꞌ xbe̱n la̱ cuacui̱mk. Tixqꞌue ajcuiꞌ a̱cue li cha̱bil chꞌochꞌ re nak sa talajeꞌqꞌuik la̱ cuacui̱mk joꞌ ajcuiꞌ la̱ quiꞌil kꞌe̱n.
Nimak taxak la̱ cuanquil saꞌ xbe̱neb lix ni̱nkal tenamit. Joꞌ ajcuiꞌ saꞌ xbe̱neb la̱ cuechꞌalal. Eb li ralal xcꞌajol la̱ naꞌ oxlokꞌ taxak tateꞌril. Li ani ta̱tzꞌekta̱na̱nk a̱cue, tzꞌekta̱nanbilak ajcuiꞌ aꞌan. Ut ani ta̱ba̱nu̱nk usilal a̱cue, usilal ajcuiꞌ ta̱uxk re aꞌan, chan laj Isaac.
Nak quirakeꞌ rosobtesinquil laj Jacob, qui-el riqꞌuin lix yucuaꞌ. Junpa̱t relic laj Jacob nak quisukꞌi chak laj Esaú chi yohoc.
Laj Esaú quixyi̱b ajcuiꞌ lix tibel xcua lix yucuaꞌ ut quixcꞌam riqꞌuin. Quixye re: —Ba̱nu usilal, tatcuaꞌak. Cueꞌ lix tibel a̱cua li xinyo chak. Nak tatrakekꞌ chi cuaꞌac, tina̱cuosobtesi, chan laj Esaú.
Laj Isaac quixye re: —¿Anihat la̱at?— Laj Esaú quixye re: —La̱in laj Esaú li xbe̱n a̱cualal, chan.
Laj Isaac quisach xchꞌo̱l ut nasicsot. Quixye re: —¿Ut ani li xcꞌamoc chak re lin tzacae̱mk xbe̱n cua? La̱in xintzaca chixjunil li xcꞌam chak nak toj ma̱jiꞌ nacatcꞌulun la̱at. La̱in xincuosobtesi ut aꞌan osobtesinbil chic anakcuan, chan.
Nak quirabi li cꞌaꞌru quixye lix yucuaꞌ, laj Esaú quixjap re chi ya̱bac xban xrahil saꞌ xchꞌo̱l. Ut quixtzꞌa̱ma chiru lix yucuaꞌ: —China̱cuosobtesi ajcuiꞌ la̱in, at inyucuaꞌ, chan.
Laj Isaac quixye re: —Xcꞌulun la̱ cui̱tzꞌin ut aꞌan xinixbalakꞌi ut xmakꞌ cha̱cuu la̱ cuosobtesinquil li xinqꞌue raj a̱cue, chan.
Laj Esaú quixye re lix yucuaꞌ: —Ma̱re xban aꞌan nak xeqꞌue aj Jacob chokꞌ xcꞌabaꞌ. Ac xcaꞌ sut xba̱nunquil cue chi joꞌcaꞌin. Xbe̱n cua quixmakꞌ chicuu li primogenitura. Ut anakcuan xmakꞌ cuiꞌchic chicuu li usilal li oc raj cue xcꞌulbal riqꞌuin li Dios. ¿Ma incꞌaꞌ ta biꞌ naru tina̱cuosobtesi ajcuiꞌ la̱in? chan laj Esaú.
Laj Isaac quixye re: —Laj Jacob, aꞌan chic nima̱k xcuanquil cha̱cuu. Chixjunileb chic li rechꞌalal teꞌcꞌanjelak chiru. Xincuosobtesi aꞌan re nak teꞌu̱chi̱nk chi us li racui̱mk joꞌ ajcuiꞌ lix quiꞌil kꞌe̱n. Anakcuan, ¿cꞌaꞌ ta chic ru tinba̱nu a̱cue la̱at, at cualal? chan.
Laj Esaú quixye re lix yucuaꞌ: —¿Ma chi ti̱c incꞌaꞌ tatru̱k chicuosobtesinquil? Ba̱nu usilal, at inyucuaꞌ, china̱cuosobtesi taxak, chan. Ut laj Esaú quixjap re chi ya̱bac.
Laj Isaac quichakꞌoc ut quixye re:—Incꞌaꞌ tatcua̱nk saꞌ cha̱bil chꞌochꞌ chi moco tixqꞌue li hab saꞌ xbe̱n la̱ chꞌochꞌ.
Ut riqꞌuin pletic ta̱col rix la̱ yuꞌam chi junelic. La̱at tatcꞌanjelak chiru la̱ cui̱tzꞌin. Abanan ta̱cuulak xkꞌehil nak la̱at ta̱col a̱cuib chiru ut incꞌaꞌ chic tatcua̱nk rubel xcuanquil. Joꞌcaꞌin ajcuiꞌ teꞌxcꞌul eb la̱ cualal a̱cꞌajol, chan laj Isaac re laj Esaú.
Laj Jacob nae̱lelic chiru laj EsaúCꞌajoꞌ nak quijoskꞌoꞌ laj Esaú saꞌ xbe̱n laj Jacob xban nak qui-osobtesi̱c xban lix yucuaꞌ. Quixye saꞌ xchꞌo̱l: —Chi se̱b nacuulac xkꞌehil nak ta̱ca̱mk lin yucuaꞌ. Chirix aꞌan tincamsi li cui̱tzꞌin, chan laj Esaú.
Lix Rebeca quixnau cꞌaꞌru yo̱ chixcꞌoxlanquil laj Esaú. Quixtakla xbokbal laj Jacob li i̱tzꞌinbej. Quixye re: —Qꞌue retal. Laj Esaú yo̱ chixcꞌoxlanquil a̱camsinquil.
Anakcuan ba̱nu li cꞌaꞌru tinye a̱cue. Yi̱b li cꞌaꞌru a̱cue ut tate̱lelik. Tatxic saꞌ rochoch laj Labán li cuas, li cuan chak saꞌ li tenamit Harán.
Tatcua̱nk chak riqꞌuin toj ta̱numekꞌ xjoskꞌil la̱ cuas.
Nak acak xnumeꞌ xjoskꞌil la̱ cuas, ta̱sachk saꞌ xchꞌo̱l li cꞌaꞌru xaba̱nu re. Tojoꞌnak la̱in tintakla a̱cꞌambal. Incꞌaꞌ nacuaj texinsach che̱cabichal, chan lix Rebeca re laj Jacob.
Joꞌcan nak lix Rebeca co̱ chi a̱tinac riqꞌuin laj Isaac ut quixye re: —La̱in xintitzꞌ xbaneb li rixakil laj Esaú. Eb aꞌan aj hitita. Cui laj Jacob naxcꞌam junak li ixk aj hitita chokꞌ rixakil, ¿cꞌaꞌru aj e nak cua̱nkin arin? Us raj nak tinca̱mk, chan lix Rebeca re laj Isaac.
Laj Isaac quixbok laj Jacob riqꞌuin ut quixtzꞌa̱ma rusilal li Dios saꞌ xbe̱n. Quixye re: —Incꞌaꞌ naru ta̱cꞌam chokꞌ a̱cuixakil junak li ixk aj Canaán, li cuanqueb arin.
Anakcuan yi̱b a̱cuib ut tatxic toj saꞌ li tenamit Padan-aram. Tatxic saꞌ rochoch laj Betuel lix yucuaꞌ la̱ naꞌ. Aran ta̱sicꞌ junak la̱ cuixakil saꞌ xya̱nkeb lix rabin laj Labán li ras la̱ naꞌ, chan.
Li Ka̱cuaꞌ Dios, li kꞌaxal nim xcuanquil, aꞌan taxak ta̱osobtesi̱nk a̱cue ut tixqꞌue chi qꞌuia̱nc la̱ cualal a̱cꞌajol. Riqꞌuineb aꞌan teꞌcua̱nk li ni̱nki tenamit.
Aꞌ taxak li Ka̱cuaꞌ Dios chi-osobtesi̱nk a̱cue, joꞌqueb ajcuiꞌ la̱ cualal a̱cꞌajol, joꞌ quixyechiꞌi re laj Abraham. La̱ex te̱re̱chani li chꞌochꞌ aꞌin li cuanco cuiꞌ anakcuan joꞌ aj numelo. Li chꞌochꞌ aꞌin yechiꞌinbil re laj Abraham xban li Ka̱cuaꞌ Dios, chan laj Isaac.
Tojoꞌnak laj Isaac quixtakla laj Jacob saꞌ li tenamit Padan-aram riqꞌuin laj Labán. Aꞌan li ralal laj Betuel aj arameo. Laj Labán, aꞌan ras lix Rebeca lix naꞌ laj Jacob ut laj Esaú.
Lix sumlajic laj EsaúLaj Esaú quixnau nak laj Isaac quirosobtesi laj Jacob. Quirabi ajcuiꞌ nak quixtakla laj Jacob saꞌ li tenamit Padan-aram chixsicꞌbal junak rixakil. Quixnau ajcuiꞌ nak laj Isaac quixye re laj Jacob nak incꞌaꞌ naru tixsicꞌ junak rixakil saꞌ xya̱nkeb laj Canaán.
Quixqꞌue retal nak laj Jacob quixpa̱b li ra̱tin lix naꞌ ut lix yucuaꞌ. Quiril nak laj Jacob co̱ saꞌ li tenamit Padan-aram.
Xban nak laj Jacob quiyeheꞌ re nak incꞌaꞌ ta̱sumla̱k riqꞌuineb li ixk aj Canaán, laj Esaú quixtau ru nak lix yucuaꞌ incꞌaꞌ nacuulac chiru lix naꞌlebeb li ixk aj Canaán.
Joꞌcan nak laj Esaú co̱ riqꞌuin laj Ismael li ralal laj Abraham chixtzꞌa̱manquil chokꞌ rixakil lix Mahalat lix rabin. Lix Mahalat, aꞌan ri̱tzꞌin laj Nebaiot. Ac cuan cuib li rixakil laj Esaú nak quixcꞌam lix Mahalat chokꞌ rixakil.
Li Dios quixcꞌutbesi rib chiru laj Jacob saꞌ li naꞌajej Bet-elLaj Jacob qui-el saꞌ li tenamit Beerseba ut co̱ toj saꞌ li tenamit Harán.
Nak laj Jacob quiril nak oc re li kꞌojyi̱n quicana chi cua̱rc saꞌ be. Quixtau jun li pec helho ru ut quixqꞌue chokꞌ xsoc xjolom ut quicuar.
Nak yo̱ chi cua̱rc, laj Jacob quimatqꞌuec. Saꞌ xmatcꞌ quiril jun chanchan escalera xakxo saꞌ chꞌochꞌ ut nacuulac toj saꞌ choxa xnajtil rok. Ut eb lix ángel li Ka̱cuaꞌ nequeꞌtakeꞌ ut nequeꞌcube chak chiru li escalera nak quiril.
Li Ka̱cuaꞌ Dios cuan chak toj saꞌ xbe̱n li escalera ut aꞌan quixye re laj Jacob: —La̱in li Ka̱cuaꞌ Dios. La̱in li quinixlokꞌoni chak laj Abraham la̱ xeꞌto̱nil yucuaꞌ. La̱in ajcuiꞌ li quinixlokꞌoni laj Isaac la̱ yucuaꞌ. La̱in tinqꞌue a̱cue li chꞌochꞌ li yo̱cat cuiꞌ chi hila̱nc anakcuan. Tinqꞌue ajcuiꞌ reheb la̱ cualal a̱cꞌajol.
La̱ cualal a̱cꞌajol teꞌqꞌuia̱nk joꞌ xqꞌuial li poks li cuan saꞌ li chꞌochꞌ ut telajeꞌxjeqꞌui rib saꞌ ruchichꞌochꞌ. Saꞌ a̱cꞌabaꞌ la̱at joꞌ ajcuiꞌ saꞌ xcꞌabaꞌeb la̱ cualal a̱cꞌajol, chixjunileb li tenamit li teꞌcua̱nk saꞌ ruchichꞌochꞌ teꞌxcꞌul jun li nimla usilal.
La̱in junelic cua̱nkin a̱cuiqꞌuin. Yalak bar tatxic, la̱in tin-ilok a̱cue. Nak la̱at cua̱nkat chak saꞌ jalan chic naꞌajej, la̱in tatincꞌam cuiꞌchic chak saꞌ li chꞌochꞌ aꞌin. Incꞌaꞌ tatintzꞌekta̱na. Tinqꞌue a̱cue chixjunil li cꞌaꞌru xinyechiꞌi a̱cue, chan li Ka̱cuaꞌ Dios re laj Jacob.
Laj Jacob qui-aj ru ut quixye: —Relic chi ya̱l nak li Ka̱cuaꞌ Dios cuan saꞌ li naꞌajej aꞌin. Ut la̱in incꞌaꞌ xinnau nak xin-oc chi hila̱nc arin, chan.
Cꞌajoꞌ nak quixucuac laj Jacob ut quixye: —Ma̱ caꞌchꞌin nak nasach inchꞌo̱l chirilbal li lokꞌlaj naꞌajej aꞌin. Kꞌaxal lokꞌ. Aꞌin xmuheba̱l li Ka̱cuaꞌ Dios ut aꞌin ajcuiꞌ li oqueba̱l re li choxa, chan.
Joꞌ cuulajak chic nak quisake̱u, laj Jacob quixchap li pec li quixqꞌue chokꞌ xsoc xjolom. Ut li pec aꞌan quixxakab ut quixqꞌue li aceite saꞌ xbe̱n. Aꞌan quixba̱nu chokꞌ retalil nak li naꞌajej aꞌan kꞌaxal lokꞌ.
Li naꞌajej aꞌan Luz xcꞌabaꞌ nak quicuan. Abanan laj Jacob quixjal xcꞌabaꞌ. Bet-el chic quixqꞌue chokꞌ xcꞌabaꞌ.
Ut laj Jacob quixye: —Cui li Ka̱cuaꞌ Dios ta̱beresi̱nk cue ut ta̱ilok cue, ut cui aꞌan tixqꞌue cue lin tzacae̱mk joꞌ ajcuiꞌ li cuakꞌ, la̱in tinlokꞌoni aꞌan.
Cui li Ka̱cuaꞌ Dios ta̱tenkꞌa̱nk cue re nak tincuulak cuiꞌchic saꞌ rochoch lin yucuaꞌ, ut cui takacꞌam cuiꞌchic kib saꞌ usilal riqꞌuin li cuas, la̱in tinlokꞌoni li Ka̱cuaꞌ Dios chi anchal inchꞌo̱l.
Li pec aꞌin xinxakab anakcuan chokꞌ retalil nak li naꞌajej aꞌin, aꞌan re xlokꞌoninquil li Ka̱cuaꞌ Dios, chan. Ut laj Jacob quixye re li Dios, —La̱in tinmayeja cha̱cuu li junju̱nk saꞌ xlaje̱tkil re chixjunil li cꞌaꞌru ta̱qꞌue cue, chan.
Laj Jacob qui-oc cuiꞌchic chi xic saꞌ li tenamit Harán. Quicuulac saꞌ li naꞌajej li cuan saꞌ xjayal li na-el cuiꞌ chak li sakꞌe.
Quiril nak cuan jun becbil haꞌ saꞌ li ru takꞌa. Oxib chꞌu̱t li carner yo̱queb chi hila̱nc chire li haꞌ xban nak aran nequeꞌrisi rucꞌaheb li carner. Jun nimla pec nacꞌanjelac chokꞌ xtzꞌapbal re li becbil haꞌ.
Nak nequeꞌoc xqꞌuebal rucꞌaheb li carner, eb laj ilol re li xul nequeꞌrisi li pec. Nak nequeꞌrakeꞌ xqꞌuebal rucꞌa, nequeꞌxtzꞌap cuiꞌchic.
Laj Jacob quixpatzꞌ reheb laj ilol xul: —Ex cuas cui̱tzꞌin, ¿bar cuan le̱ tenamit?— Eb aꞌan queꞌxye re: —Harán xcꞌabaꞌ li katenamit, chanqueb.
Laj Jacob quixye cuiꞌchic reheb, —¿Ma nequenau ru laj Labán li ralal laj Nacor? chan. Eb aꞌan queꞌchakꞌoc ut queꞌxye re: —Nakanau ru.—
Laj Jacob quixpatzꞌ cuiꞌchic reheb: —¿Ma sa saꞌ xchꞌo̱l laj Labán?— Eb aꞌan queꞌchakꞌoc ut queꞌxye: —Sa saꞌ xchꞌo̱l. Ilon aran. Li ixk li yo̱ chak chi cha̱lc rochben lix carner, aꞌan lix Raquel lix rabin laj Labán, chanqueb.
Ut laj Jacob quixye reheb: —Toj cutan cuanco. ¿Cꞌaꞌut nak ac oc e̱re chixtzꞌapbaleb li carner anakcuan? Qꞌuehomakeb cuan chi ucꞌac ut te̱qꞌueheb ajcuiꞌ chi ichajibc, chan.
Ut eb aꞌan queꞌxye re: —Anakcuan incꞌaꞌ naru xqꞌuebal rucꞌaheb. Takoybeni toj teꞌchꞌutla̱k chixjunileb li carner tojoꞌnak takisi li xtzꞌapbal re li haꞌ re nak naru takaqꞌueheb chi ucꞌac chixjunileb li carner, chanqueb.
Toj yo̱ ajcuiꞌ chi a̱tinac laj Jacob riqꞌuineb li cui̱nk nak quicuulac lix Raquel rochbeneb lix carner. Aꞌan na-iloc re lix carner lix yucuaꞌ.
Lix Raquel, aꞌan xrabin laj Labán; ut laj Labán, aꞌan ras lix naꞌ laj Jacob. Nak quiril lix Raquel, laj Jacob co̱ saꞌ junpa̱t chirisinquil li nimla pec li tzꞌaptzꞌo cuiꞌ li re li haꞌ ut quixqꞌueheb chi ucꞌac li carner.
Laj Jacob quirutzꞌ ru lix Raquel ut quiya̱bac xban xsahil saꞌ xchꞌo̱l.
Laj Jacob quixye re lix Raquel: —Lin naꞌ la̱in, aꞌan lix Rebeca li ri̱tzꞌin la̱ yucuaꞌ. La̱o kacomon kib, chan. Ut lix Raquel co̱ saꞌ junpa̱t chixyebal re lix yucuaꞌ nak quia̱tinac riqꞌuin laj Jacob lix comoneb.
Nak laj Labán quirabi resil nak laj Jacob cuan aran, quia̱linac saꞌ junpa̱t chixcꞌulbal. Nak quicuulac cuan cuiꞌ laj Jacob, quixkꞌalu ut quirutzꞌ ru. Ut saꞌ junpa̱t quixbok saꞌ rochoch. Laj Jacob najt quiserakꞌic riqꞌuin laj Labán.
Ut laj Labán quixye re laj Jacob: —Relic chi ya̱l nak tzꞌakal kacomon kib ut kaquiqꞌuel kib, chan. Ut laj Jacob quicana saꞌ rochoch laj Labán.
Ac jun po chic roquic laj Jacob aran nak laj Labán quixye re: —La̱at yo̱cat chi trabajic cuiqꞌuin ut toj ma̱jiꞌ nacatintoj. La̱in nincꞌoxla nak tento tatintoj usta kacomon kib. Ye cue joꞌ nimal ta̱cuaj tatintoj cuiꞌ. La̱in tintoj joꞌ nimal ta̱patzꞌ, chan.
Laj Labán cuan cuib lix rabin. Li asbej, aꞌan xLea xcꞌabaꞌ ut li i̱tzꞌinbej, aꞌan xRaquel xcꞌabaꞌ.
Lix Lea incꞌaꞌ chꞌinaꞌus na-iloc. Ut lix Raquel, aꞌan chꞌinaꞌus na-iloc.
Laj Jacob co̱ xchꞌo̱l chirix lix Raquel ut quixye re laj Labán: —La̱in tintrabajik cuukub chihab a̱cuiqꞌuin re nak ta̱qꞌue chokꞌ cuixakil lix Raquel li i̱tzꞌinbej, chan.
Laj Labán quixye re: —Chokꞌ cue la̱in us nak a̱cue tinqꞌue lin rabin. Chi joꞌcan incꞌaꞌ tinqꞌue re junak ma̱cuaꞌ kacomon. Anakcuan tatcana̱k kiqꞌuin, chan.
Cuukub chihab tzꞌakal quitrabajic laj Jacob re nak tixcꞌam lix Raquel chokꞌ rixakil. Laj Jacob incꞌaꞌ quirecꞌa nak quinumeꞌ li cuukub chihab xban nak cꞌajoꞌ nak naxra lix Raquel.
Nak quinumeꞌ li cuukub chihab, laj Jacob quixye re laj Labán: —Anakcuan xcuulac xkꞌehil nak ta̱kꞌaxtesi la̱ rabin chokꞌ cuixakil xban nak ac xnumeꞌ cuukub chihab cuoquic chi trabajic a̱cuiqꞌuin, chan.
Laj Labán quixba̱nu jun li ninkꞌe saꞌ xsumlajic lix rabin ut quixbokeb chixjunil li rech cabal.
Abanan chiru li kꞌojyi̱n aꞌan laj Labán quixkꞌaxtesi lix Lea re laj Jacob. Ut laj Jacob quicuan riqꞌuin.
Laj Labán quixqꞌue jun xmo̱s ixk lix Lea. Li ixk aꞌan xZilpa xcꞌabaꞌ.
Joꞌ cuulajak chic laj Jacob quixqꞌue retal nak aꞌ lix Lea li quikꞌaxtesi̱c re. Ut laj Jacob co̱ riqꞌuin laj Labán ut quixye re, —Incꞌaꞌ us xaba̱nu cue. ¿Cꞌaꞌut nak xaba̱nu cue chi joꞌcaꞌin? ¿Ma ma̱cuaꞌ ta biꞌ lix Raquel xintoj rix nak xintrabajic a̱cuiqꞌuin? ¿Cꞌaꞌut nak xina̱balakꞌi chi joꞌcaꞌin? chan laj Jacob.
Ut laj Labán quixye re: —La̱o moco cꞌaynako ta nak xbe̱n cua li i̱tzꞌinbej takasumub.
Numekꞌ cuan jun xama̱nak la̱ sumlajic riqꞌuin lix Lea, tojoꞌnak tinqꞌue a̱cue lix Raquel. Abanan tento nak tattrabajik cuukubak chihab chic cuiqꞌuin, chan laj Labán.
Quixcꞌul xchꞌo̱l laj Jacob li cꞌaꞌru quiyeheꞌ re xban laj Labán. Nak quinumeꞌ li jun xama̱n lix sumlajic laj Jacob riqꞌuin lix Lea, laj Labán quixkꞌaxtesi lix Raquel re laj Jacob. Ut laj Jacob quisumla riqꞌuin.
Laj Labán quixqꞌue jun xmo̱s ixk lix Raquel. Li mo̱s aꞌan xBilha xcꞌabaꞌ.
Laj Jacob quixlakꞌab rib riqꞌuin lix Raquel ut aꞌan li kꞌaxal quixra chiru lix Lea. Ut laj Jacob quitrabajic cuukub chihab chic riqꞌuin laj Labán.
Eb li ralal laj JacobLi Ka̱cuaꞌ Dios quiril nak lix Lea incꞌaꞌ naraheꞌ xban laj Jacob. Joꞌcan nak li Ka̱cuaꞌ Dios quixqꞌue chi cua̱nc xcocꞌal. Abanan lix Raquel incꞌaꞌ quiqꞌueheꞌ xcocꞌal.
Lix Lea quicana chi yaj aj ixk. Quicuan jun lix cꞌulaꞌal. Lix Lea quixye: —Li Ka̱cuaꞌ Dios quixnau nak quirahoꞌ saꞌ inchꞌo̱l junxil. Anakcuan tinixra chic lin be̱lom, chan. Joꞌcan nak aj Rubén quixqꞌue chokꞌ xcꞌabaꞌ lix cꞌulaꞌal.
Ut lix Lea quicuan jun chic lix cꞌulaꞌal ut quixqꞌue aj Simeón chokꞌ xcꞌabaꞌ. Ut quixye: —Li Ka̱cuaꞌ Dios quixnau nak incꞌaꞌ ninraheꞌ. Joꞌcan nak xqꞌue jun chic lin cꞌulaꞌal, chan.
Ut quicuan jun chic xcꞌulaꞌal lix Lea ut quixqꞌue aj Leví chokꞌ xcꞌabaꞌ. Lix Lea quixye: —Anakcuan ac xcuan oxib li ralal laj Jacob cuiqꞌuin. Ma̱re riqꞌuin aꞌin ta̱cua̱nk junelic cuiqꞌuin lin be̱lom, chan.
Ut lix Lea quicuan jun chic xcꞌulaꞌal ut quixqꞌue aj Judá chokꞌ xcꞌabaꞌ. Quixye: —Anakcuan tinlokꞌoni li Ka̱cuaꞌ Dios riqꞌuin li usilal xba̱nu cue, chan. Chirix li ca̱hib chi cocꞌal aꞌin, toj ma̱jiꞌ chic quicuan xcocꞌal lix Lea.
Lix Raquel quixcakali lix Lea xban nak ma̱ jun lix cocꞌal nacuan riqꞌuin laj Jacob. Lix Raquel quixye re lix be̱lom: —La̱in tincuaj nak teꞌcua̱nk incocꞌal. Cui incꞌaꞌ teꞌcua̱nk incocꞌal, ¿cꞌaꞌru aj e nak yoꞌyo̱kin? chan.
Laj Jacob quichal xjoskꞌil saꞌ xbe̱n lix Raquel ut quixye re: —¿Cꞌaꞌut nak nacaye chi joꞌcan? ¿Ma la̱in ta biꞌ Dios la̱in nak tinqꞌueheb a̱cocꞌal? chan.
Ut lix Raquel quixye re laj Jacob: —Tinqꞌue a̱cue lix Bilha lin mo̱s re tatcua̱nk riqꞌuin. Nak ta̱yoꞌla̱k xcꞌulaꞌal, la̱in tinxoc chokꞌ cue. Chi joꞌcaꞌin ta̱cua̱nk incocꞌal, chan.
Lix Raquel quixqꞌue lix mo̱s re laj Jacob re ta̱cua̱nk riqꞌuin.
Ut lix Bilha quicana chi yaj aj ixk. Laj Jacob quicuan li ralal riqꞌuin lix Bilha.
Tojoꞌnak lix Raquel quixye: —Anakcuan aj Dan tinqꞌue chokꞌ xcꞌabaꞌ li cꞌulaꞌal aꞌin xban nak li Ka̱cuaꞌ Dios xrabi li cꞌaꞌru xintzꞌa̱ma chiru. Xinrisi saꞌ raylal ut quixqꞌue cue jun lin cꞌulaꞌal, chan lix Raquel.
Laj Jacob quicuan jun chic li ralal riqꞌuin lix Bilha.
Lix Raquel quixye: —Anakcuan aj Neftalí tinqꞌue chokꞌ xcꞌabaꞌ li cꞌulaꞌal aꞌin xban nak xinyal inkꞌe riqꞌuin li cuas ut anakcuan cuan incocꞌal, chan.
Chirix chic aꞌin, lix Lea quixqꞌue retal nak ma̱jiꞌ chic nacuan junak lix cꞌulaꞌal. Lix Lea quixkꞌaxtesi lix mo̱s, xZilpa xcꞌabaꞌ, saꞌ rukꞌ laj Jacob re nak ta̱cua̱nk riqꞌuin.
Ut laj Jacob quicuan jun li ralal riqꞌuin lix Zilpa.
Ut lix Lea quixxoc li cꞌulaꞌal chokꞌ re ut quixye: —Us xak cue. Xcuan chic jun lin cꞌulaꞌal, chan. Ut aj Gad quixqꞌue chokꞌ xcꞌabaꞌ.
Ut laj Jacob quicuan cuiꞌchic jun li ralal riqꞌuin lix Zilpa.
Ut lix Lea quixye: —Cꞌajoꞌ xsahil saꞌ inchꞌo̱l. Anakcuan eb li ixk teꞌxye nak us xak re chaꞌkeb cue, chan. Ut aj Aser quixqꞌue chokꞌ xcꞌabaꞌ li cꞌulaꞌal.
Saꞌ jun li cutan nak yo̱queb chi sicꞌoc trigo saꞌ cꞌaleba̱l, laj Rubén quixtau aran li ixki kꞌe̱n mandrágoras xcꞌabaꞌ, ut coxkꞌaxtesi li ixki kꞌe̱n saꞌ rukꞌ lix naꞌ. Lix Raquel quiril nak cuan li ixki kꞌe̱n riqꞌuin lix Lea ut quixye re: —Ba̱nu usilal, qꞌue chokꞌ cue li ixki kꞌe̱n li xcꞌam chak la̱ yum, chan.
Lix Lea quixye re lix Raquel: —¿Cꞌaꞌ chic ru ta̱cuaj anakcuan? Ac xamakꞌ lin be̱lom chicuu ut anakcuan ta̱cuaj ta̱makꞌ cuiꞌchic lin ixki kꞌe̱n li xcꞌam chak inyum, chan. Ut lix Raquel quichakꞌoc ut quixye re, —Cui ta̱qꞌue cue li ixki kꞌe̱n, laj Jacob naru ta̱xic jun kꞌojyi̱nak a̱cuiqꞌuin, chan.
Nak laj Jacob quisukꞌi chak chi sicꞌoc trigo, lix Lea ticto qui-el chixcꞌulbal ut quixye re: —Anakcuan tatcua̱nk jun kꞌojyi̱nak cuiqꞌuin. Aꞌan aj e nak xinqꞌue li ixki kꞌe̱n re lix Raquel. Li ixki kꞌe̱n aꞌan, laj Rubén xcꞌamoc chak re, chan. Ut saꞌ li kꞌojyi̱n aꞌan laj Jacob quicuan riqꞌuin lix Lea.
Lix Lea quicana chi yaj aj ixk. Ut quiyoꞌla roꞌ lix cꞌulaꞌal lix Lea xban nak li Dios quirabi lix tij.
Lix Lea quixye: —Anakcuan aj Isacar tinqꞌue chokꞌ xcꞌabaꞌ lin cꞌulaꞌal. Li Dios xqꞌue jun chic lin ra̱bal xban nak la̱in junxilaj quinkꞌaxtesi lin mo̱s re laj Jacob re nak ta̱cua̱nk riqꞌuin, chan.
Laj Jacob quicuan xcuak li ralal riqꞌuin lix Lea.
Ut lix Lea quixye: —Li Dios xqꞌue jun chic lin ma̱tan. Anakcuan raro̱kin chic xban lin be̱lom xban nak cuakib li ralal ac xeꞌyoꞌla cuiqꞌuin. Anakcuan aj Zabulón tinqꞌue chokꞌ xcꞌabaꞌ li cꞌulaꞌal aꞌin, chan.
Chirix chic aꞌan, quiyoꞌla jun lix coꞌ lix Lea ut xDina quixqꞌue chokꞌ xcꞌabaꞌ.
Li Dios quiril xtokꞌoba̱l ru lix Raquel ut quirabi lix tij. Xban aꞌan, li Dios quixqꞌue chi cua̱nc xcocꞌal.
Lix Raquel quicana chi yaj aj ixk. Ut quiyoꞌla jun lix cꞌulaꞌal te̱lom. Quixye: —La̱in xinxuta̱nac xban nak ma̱ jun incocꞌal cuan. Anakcuan li Dios xrisi inxuta̱n, chan.
Lix Raquel quixqꞌue aj José chokꞌ xcꞌabaꞌ lix cꞌulaꞌal. Quixye: —Aꞌ taxak li Ka̱cuaꞌ Dios chi-osobtesi̱nk cue ut tixqꞌue ta chic junak incꞌulaꞌal te̱lom, chan.
Laj Jacob ut laj Labán queꞌxbalakꞌi ribChirix lix yoꞌlajic laj José, laj Jacob quia̱tinac riqꞌuin laj Labán ut quixye re: —Anakcuan nacuaj nak tina̱canab chi xic saꞌ lin tenamit li xinchal cuiꞌ chak.
Tincꞌameb li cuixakil chicuix, joꞌ eb ajcuiꞌ lin cocꞌal. Xtzꞌakloc li trabaj xinba̱nu a̱cuiqꞌuin chirixeb la̱ rabin. La̱at cutan saken cha̱cuu cꞌaꞌru li trabaj xinba̱nu a̱cuiqꞌuin. China̱canab chi xic anakcuan, chan.
Ut laj Labán quixye: —Ba̱nu usilal, cana̱kat cuiqꞌuin. Xinqꞌue retal nak saꞌ a̱cꞌabaꞌ la̱at ninrosobtesi li Ka̱cuaꞌ Dios.
Anakcuan ta̱ye cue joꞌ nimal la̱ tojbal ta̱cuaj ut la̱in tatintoj, chan laj Labán.
Laj Jacob quixye re: —La̱at cutan saken cha̱cuu chanru nak xintrabajic a̱cuiqꞌuin. Nacanau ajcuiꞌ chanru nak xinchꞌolaniheb la̱ queto̱mk, chan.
Julticak a̱cue nak xincꞌulun a̱cuiqꞌuin, incꞌaꞌ qꞌui li cꞌaꞌru a̱cue. Ut anakcuan numtajenakeb xqꞌuial li cꞌaꞌru a̱cue. Chalen cuoquic a̱cuiqꞌuin, li Ka̱cuaꞌ Dios xatrosobtesi inban. Ut anakcuan ¿jokꞌe naru tintiquib trabajic re nak eb li cualal incꞌajol ta̱cua̱nk cꞌaꞌru reheb? chan.
Laj Labán quixye re: —¿Joꞌ nimal ta̱ru̱k tatintoj cuiꞌ? chan. Laj Jacob quixye re: —Ma̱ joꞌ nimal. Anakcuan cuan jun naꞌleb tincuaj xyebal a̱cue. Incꞌaꞌ ninnau ma ta̱cuulak ta cha̱cuu. Cui tixcꞌul a̱chꞌo̱l, la̱in tincana̱k cuiꞌchic chirilbaleb la̱ queto̱mk, chan.
Laj Jacob quixye re laj Labán: —La̱in tinxic saꞌ xya̱nkeb la̱ queto̱mk. Ut tinsicꞌ chokꞌ cue li chiba̱t li repex rixeb ut li tzꞌi̱b saꞌ rixeb. Teꞌcana̱k ajcuiꞌ li carner li repex rixeb ut li tzꞌi̱b saꞌ rixeb joꞌ eb ajcuiꞌ li kꞌek rixeb. Li queto̱mk aꞌin tincꞌam chokꞌ cue chokꞌ re̱kaj intojbal, chan.
Ut laj Jacob quixye ajcuiꞌ: —Ma̱re mokon chic nak tatxic chirilbaleb lin queto̱mk, la̱at ta̱qꞌue retal nak saꞌ xya̱lal xinba̱nu. Cui ta̱tau li carner li moco kꞌek ta rixeb ut li chiba̱t moco repex ta rixeb, naru ta̱ye nak la̱in xcuelkꞌa eb aꞌan a̱cuiqꞌuin, chan.
Ut laj Labán quixye re: —Us. Xcꞌul inchꞌo̱l li cꞌaꞌru xaye, chan.
Chiru ajcuiꞌ li cutan aꞌan, co̱ laj Labán saꞌ lix naꞌajeb lix queto̱mk. Quirisiheb chixjunil li chiba̱t li repex rixeb joꞌ ixk joꞌ te̱lom. Quirisiheb ajcuiꞌ li carner li kꞌek rixeb. Laj Labán quixkꞌaxtesiheb li queto̱mk aꞌan saꞌ rukꞌeb li ralal re nak aꞌan eb chic teꞌilok re.
Ut laj Labán co̱ saꞌ jun li naꞌajej oxib cutan xnajtil riqꞌuin laj Jacob. Ut laj Jacob quicana chirilbaleb lix queto̱mk laj Labán.
Laj Jacob quixsicꞌ oxib pa̱y ru li cheꞌ, aꞌ li álamo, li avellano ut li castaño xcꞌabaꞌeb. Quixyocꞌ eb li rukꞌ li cheꞌ li toj rax. Quixmichꞌ caꞌchꞌin rixeb li cheꞌ re nak teꞌcꞌutu̱nk chi repex rixeb li rukꞌ cheꞌ.
Laj Jacob quixqꞌue retal nak eb li queto̱mk nequeꞌbatzꞌun chire li haꞌ nak nequeꞌcuulac chi ucꞌac. Xban aꞌan nak quixtususi li rukꞌ cheꞌ saꞌ li haꞌ re nak teꞌril li cheꞌ nak yo̱queb chi batzꞌu̱nc.
Li queto̱mk queꞌbatzꞌun aran saꞌ xcaꞌyaba̱l eb li cheꞌ li repex rixeb. Ut eb li cocꞌ ral li queꞌyoꞌla repex rixeb.
Laj Jacob quixsicꞌ ruheb li carner li repex rixeb ut li tzꞌi̱b saꞌ rixeb ut quixqꞌue saꞌ xya̱nkeb li re. Joꞌ ajcuiꞌ chixjunileb li kꞌek rixeb li cuanqueb saꞌ xya̱nkeb li re laj Labán, quixqꞌue ajcuiꞌ saꞌ xya̱nkeb li re. Chi joꞌcaꞌin laj Jacob quirisi lix queto̱mk saꞌ xya̱nkeb li re laj Labán.
Rajlal nak nequeꞌcuulac li xul li ni̱nkeb xtibel ut cauheb rib chi batzꞌu̱nc chire li haꞌ, laj Jacob naxqꞌue li cheꞌ saꞌ li haꞌ re nak teꞌril nak yo̱queb chi batzꞌu̱nc.
Nak nequeꞌcuulac li xul li incꞌaꞌ cauheb rib chi batzꞌu̱nc, laj Jacob incꞌaꞌ naxqꞌue li cheꞌ saꞌ li haꞌ. Nak nequeꞌyoꞌla li raleb li xul li incꞌaꞌ cauheb rib queꞌcana re laj Labán. Ut li raleb li xul li cauheb rib queꞌcana chokꞌ re laj Jacob.
Chi joꞌcaꞌin laj Jacob quinumta xbiomal. Quicuan nabaleb lix queto̱mk. Quicuan ajcuiꞌ nabal lix camellos joꞌ ajcuiꞌ lix burros. Ut queꞌcuan ajcuiꞌ nabal lix mo̱s joꞌ cui̱nk joꞌ ixk.
Laj Jacob narabi li cꞌaꞌru nequeꞌxye li ralal laj Labán nak nequeꞌxye: —Laj Jacob xcꞌam chokꞌ re li cꞌaꞌru re li kayucuaꞌ. Ut riqꞌuin aꞌan xbiomoꞌ, chanqueb.
Laj Jacob quixqꞌue retal nak incꞌaꞌ chic sa na-ileꞌ xban laj Labán. Moco joꞌ ta junxil.
Li Ka̱cuaꞌ Dios quixye re laj Jacob: —Anakcuan tatsukꞌi̱k cuiꞌchic saꞌ la̱ tenamit li cuanqueb cuiꞌ la̱ cuechꞌalal. Ut la̱in junelic cua̱nkin a̱cuiqꞌuin, chan li Ka̱cuaꞌ Dios.
Laj Jacob quixtakla xbokbal lix Raquel joꞌ ajcuiꞌ lix Lea re nak ta̱a̱tinak riqꞌuineb saꞌ li naꞌajej li yo̱ cuiꞌ chi iloc queto̱mk laj Jacob.
Laj Jacob quixye reheb li rixakil: —La̱in yo̱quin chixqꞌuebal retal nak le̱ yucuaꞌ incꞌaꞌ chic sa ninril joꞌ junxil. Ut li Ka̱cuaꞌ Dios li naxlokꞌoni lin yucuaꞌ, aꞌan xtenkꞌan cue arin.
La̱ex xeril ajcuiꞌ nak xincꞌanjelac chi anchal inchꞌo̱l chiru le̱ yucuaꞌ.
Ut aꞌan xinixbalakꞌi ut yalak jokꞌe naxjal lin tojbal. Abanan li Ka̱cuaꞌ Dios yo̱ chintenkꞌanquil chi junelic. Joꞌcan nak laj Labán incꞌaꞌ naru xba̱nunquil li incꞌaꞌ us cue.
Le̱ yucuaꞌ quixye cue, “La̱ tojbal aꞌan chixjunileb li xul li repex rixeb” chan. Ut chixjunileb li xul li queꞌyoꞌla repex chic rix. Ut quixye cuiꞌchic cue, “La̱ tojbal, aꞌan li xul li balacꞌ saꞌ rixeb” chan cue. Nak naxye chi joꞌcan junes balacꞌ chic rixeb li xul li nequeꞌyoꞌla.
Joꞌcan nak li Dios incꞌaꞌ quixqꞌue chi ta̱mc lix queto̱mk le̱ yucuaꞌ ut eb li cue la̱in quixqꞌueheb chi ta̱mc, chan laj Jacob.
Ut laj Jacob quixye cuiꞌchic reheb: —Saꞌ jun li cutan nak yo̱ ruheb li carner la̱in quinmatqꞌuec ut quicuil nak li te̱lom carner li balacꞌ rixeb ut li repex rixeb, junes eb aꞌan li yo̱queb chi batzꞌu̱nc riqꞌuineb li ixki carner.
Ut saꞌ inmatcꞌ lix ángel li Dios quixye cue, “Jacob”, chan. Ut la̱in quinye re, “Cueꞌquin”.
Ut li ángel quixye cue, “Ilon aran. Ta̱cuil nak eb li te̱lom carner li balacꞌ rixeb ut li repex rixeb, junes eb aꞌan li yo̱queb chi batzꞌu̱nc riqꞌuineb li ixki carner. La̱in li Ka̱cuaꞌ Dios. Xinba̱nu chi joꞌcaꞌin xban nak xcuil chixjunil li cꞌaꞌru yo̱ chixba̱nunquil laj Labán a̱cue.
La̱in li Ka̱cuaꞌ Dios. La̱in li quincꞌutbesi chak cuib cha̱cuu saꞌ li naꞌajej Bet-el nak caqꞌue li aceite saꞌ xbe̱n li pec li caxakab aran nak caba̱nu li contrato cuiqꞌuin. Anakcuan tat-e̱lk saꞌ li naꞌajej aꞌin ut tatxic cuiꞌchic saꞌ la̱ tenamit li yoꞌlajenakat cuiꞌ chak,” chan cue.—
Ut lix Raquel rochben lix Lea queꞌchakꞌoc ut queꞌxye re laj Jacob: —La̱o ma̱cꞌaꞌ cꞌaꞌru re li kayucuaꞌ take̱chani arin.
Chanchan ma̱cuaꞌo xrabin nak nocoril li kayucuaꞌ. La̱o cꞌayinbilo a̱cue xban li kayucuaꞌ. Ac xatoj rix li kasumlajic. Ut anakcuan, ¿cꞌaꞌ chic ru ta̱raj? Aꞌan yo̱ chixsachbal li katzꞌak.
Lix biomal li qui-isi̱c chiru xban li Ka̱cuaꞌ Dios, aꞌan ke chic anakcuan ut reheb ajcuiꞌ li kalal kacꞌajol. La̱at ba̱nu chixjunil li cꞌaꞌru xye a̱cue li Ka̱cuaꞌ Dios, chanqueb re laj Jacob.
Laj Jacob qui-el saꞌ li naꞌajej Padan-aramLaj Jacob quixyi̱b rib re ta̱xic. Quixtaksiheb li rixakil joꞌ ajcuiꞌ eb lix cocꞌal chirixeb li camello.
Ut queꞌoc chi xic Canaán saꞌ lix tenamit laj Isaac lix yucuaꞌ. Laj Jacob quixcꞌam chirix chixjunileb lix queto̱mk joꞌ ajcuiꞌ chixjunil li cꞌaꞌru re li quixtoj rix riqꞌuin lix trabaj saꞌ li naꞌajej Padan-aram.
Ma̱ ani laj Labán. Cuan chak saꞌ jalan naꞌajej chixbesbal rixeb lix carner nak lix Raquel quirelkꞌaheb lix dios lix yucuaꞌ.
Ma̱cꞌaꞌ resil nak queꞌel laj Jacob saꞌ li naꞌajej aꞌan. Chi joꞌcaꞌin laj Jacob quixbalakꞌi laj Labán laj arameo.
Laj Jacob quie̱lelic riqꞌuin chixjunil li cꞌaꞌru cuan re. Quinumeꞌ saꞌ li nimaꞌ Éufrates ut quixcꞌam li be li naxic saꞌ li tzu̱l Galaad.
Saꞌ rox li cutan laj Labán quirabi resil nak quie̱lelic laj Jacob.
Laj Labán quixchꞌutubeb li rechꞌalal ut queꞌxta̱ke laj Jacob. Toj chiru cuukub cutan coxeꞌxtau saꞌ li tzu̱l Galaad.
Saꞌ li kꞌojyi̱n aꞌan, li Ka̱cuaꞌ Dios quixcꞌutbesi rib chiru laj Labán laj arameo saꞌ xmatcꞌ. Li Ka̱cuaꞌ Dios quixye re: —China̱cuabi. Mat-a̱tinac saꞌ joskꞌil riqꞌuin laj Jacob, chan li Dios.
Laj Labán quixtauheb laj Jacob saꞌ li tzu̱l Galaad li queꞌxyi̱b cuiꞌ lix muheba̱leb. Ut saꞌ ajcuiꞌ li naꞌajej aꞌan queꞌxyi̱b lix muheba̱leb laj Labán.
Laj Labán quixye re laj Jacob: —¿Cꞌaꞌut nak xaba̱nu cue chi joꞌcaꞌin? Xacꞌameb chak lin rabin saꞌ junpa̱t. Chanchan yo̱co saꞌ ple̱t, chan.
—¿Cꞌaꞌut nak incꞌaꞌ xaye cue nak e̱lc chak e̱re cuiqꞌuin? Cui ta xaye cue, la̱in xinba̱nu raj jun nimla ninkꞌe re e̱chakꞌrabinquil. Xinbokeb raj saꞌ li ninkꞌe li nequeꞌchꞌeꞌoc tambor joꞌ eb ajcuiꞌ li nequeꞌchꞌeꞌoc arpa.
Saꞌ junpa̱t xacꞌameb chak. Incꞌaꞌ xqꞌue rib nak xcuutzꞌeb ru lin rabin joꞌ eb ajcuiꞌ li cui re xchakꞌrabinquileb. Xban a̱to̱ntil nak xaba̱nu a naꞌleb aꞌin.
La̱in naru raj tinba̱nu raylal e̱re. Abanan chi kꞌek quia̱tinac cuiqꞌuin li Ka̱cuaꞌ Dios, li naxlokꞌoni la̱ yucuaꞌ. Aꞌan xye cue nak incꞌaꞌ tina̱tinak saꞌ joskꞌil a̱cuiqꞌuin.
La̱in ninnau nak xat-el cuiqꞌuin saꞌ junpa̱t xban nak ta̱cuaj ru xic saꞌ rochoch la̱ yucuaꞌ. Caꞌaj cuiꞌ li incꞌaꞌ nintau ru la̱in, ¿cꞌaꞌut nak xacuelkꞌaheb chak lin dios? chan laj Labán.
Ut laj Jacob quixye re laj Labán: —La̱in qui-oc inxiu. Quincꞌoxla nak ma̱re ta̱makꞌeb la̱ rabin chicuu.
Chiruheb li kechꞌalal naru ta̱siqꞌueb la̱ dios saꞌ kaya̱nk. Cui ta̱tauheb arin, ta̱cꞌameb ut ta̱ca̱mk li ani xcꞌamoc chak re, chan laj Jacob. Laj Jacob incꞌaꞌ naxnau nak aꞌ lix Raquel qui-elkꞌan reheb lix dios laj Labán.
Ut laj Labán quixsiqꞌueb lix dios saꞌ xmuheba̱l laj Jacob ut incꞌaꞌ quixtau. Quixsicꞌ ajcuiꞌ saꞌ xmuheba̱l lix Lea ut incꞌaꞌ quixtau. Quixsicꞌ ajcuiꞌ saꞌ xmuheba̱l li cuib chi mo̱s ut incꞌaꞌ ajcuiꞌ quixtau. Tojoꞌnak co̱ chixsicꞌbal saꞌ xmuheba̱l lix Raquel.
Abanan lix Raquel ac xmukeb lix dios rubel lix soc rix li camello. Chunchu aran saꞌ xbe̱n nak quicuulac laj Labán riqꞌuin. Laj Labán quixsiqꞌui lix dios yalak bar ut incꞌaꞌ quixtau.
Lix Raquel quixye re: —At inyucuaꞌ, chacuy inma̱c. Incꞌaꞌ naru tincuacli̱k cha̱cꞌulbal xban nak anakcuan yo̱ inyajel ut incꞌaꞌ sa tinxakli̱k cha̱cuu. Usan cui incꞌaꞌ tatjoskꞌokꞌ cuiqꞌuin nak incꞌaꞌ tinxakli̱k cha̱cꞌulbal, chan. Ut laj Labán napokoknac chixsicꞌbaleb lix dios ut incꞌaꞌ quixtau.
Laj Jacob quijoskꞌoꞌ chiru laj Labán ut quixye re: —¿Cꞌaꞌut nak xina̱ta̱ke chak toj arin? ¿Cꞌaꞌru inma̱c cha̱cuu?
Xapokle li cꞌaꞌru ke ut ¿cꞌaꞌru xatau? Cꞌut chiku anakcuan li cꞌaꞌru a̱cue xatau saꞌ xya̱nkeb li cꞌaꞌru ke la̱o. Eb li kechꞌalal teꞌyehok ani cuan xma̱c, ma la̱in malaj ut la̱at.
Junmay chihab tzꞌakal xintrabajic a̱cuiqꞌuin. Ut eb la̱ queto̱mk ma̱ jun cua queꞌxtzꞌek li ral. Ut la̱in ma̱ jun la̱ carner xincamsi re tintiu.
Ma̱ jun cua xincꞌam chak a̱cuiqꞌuin li queto̱mk li nequeꞌcamsi̱c xban li joskꞌ aj xul, xban nak la̱in ninqꞌuehoc re̱kaj eb aꞌan. Ut la̱at junelic nacacuisi re̱kaj eb li xul chicuu, li nequeꞌelkꞌa̱c chi cutan joꞌ ajcuiꞌ chiru kꞌojyi̱n, chan.
Laj Jacob quixye ajcuiꞌ: —La̱in xincuy rilbaleb la̱ queto̱mk. Chi cutan caꞌchꞌin ma̱ nincam xban xtikcual li sakꞌe ut chiru kꞌojyi̱n ma̱ caꞌchꞌin nak niquinixcꞌol li que. Incꞌaꞌ naru nacube bayak lin cuara xban li que.
Junmay chihab tzꞌakal xintrabajic a̱cuiqꞌuin. Ca̱laju chihab xintrabajic chirixeb la̱ rabin. Ut cuakib chihab chic xintrabajic chirix lin queto̱mk. Ut la̱at nabal sut nacajal lin tojbal chicuu, chan.
Relic chi ya̱l li Ka̱cuaꞌ Dios xinixtenkꞌa. Aꞌan li Ka̱cuaꞌ Dios li quixlokꞌoni laj Abraham joꞌ ajcuiꞌ laj Isaac lin yucuaꞌ. Cui ta incꞌaꞌ xinixtenkꞌa li Ka̱cuaꞌ Dios, xina̱takla raj chak chi ma̱cꞌaꞌ cꞌaꞌru cue. Li Ka̱cuaꞌ Dios quiril xtokꞌoba̱l cuu ut aꞌan naxnau chanru nak xintrabajic a̱cuiqꞌuin. Xban aꞌan li Ka̱cuaꞌ Dios xatxkꞌus chi kꞌek, chan laj Jacob re laj Labán.
Laj Labán quichakꞌoc ut quixye re: —Eb li ixk aꞌin, aꞌaneb lin rabin ut eb li cocꞌal aꞌin, aꞌaneb li cui. Joꞌ eb ajcuiꞌ li queto̱mk aꞌin cueheb ajcuiꞌ. Chixjunil li joꞌ qꞌuial yo̱cat chirilbal, aꞌan cueheb la̱in. Ut anakcuan cꞌaꞌ ta chic ru ta̱ru̱k tinba̱nu riqꞌuineb lin rabin joꞌ ajcuiꞌ riqꞌuineb lix cocꞌal xban nak ac xeꞌchal cha̱cuix.
Joꞌcan nak anakcuan la̱o takaba̱nu junak li contrato chi kibil kib. Takaba̱nu li contrato chokꞌ retalil nak xkayi̱b ru li chꞌaꞌajquilal aꞌin saꞌ xya̱lal, chan laj Labán.
Laj Jacob quixchap jun li pec ut quixxakab saꞌ li chꞌochꞌ.
Ut quixye reheb li rechꞌalal: —Cꞌamomak chak nabalak li pec, chan. Eb aꞌan queꞌxchꞌutub li pec ut queꞌxtus. Ut queꞌcuaꞌac saꞌ xbe̱n li tusbil pec aꞌan.
Ut laj Labán quixqꞌue Jegar Sahaduta chokꞌ xcꞌabaꞌ li naꞌajej aꞌan. Li cꞌabaꞌej aꞌin saꞌ ra̱tinoba̱l laj Labán. Ut laj Jacob quixqꞌue cuiꞌchic xcꞌabaꞌ li naꞌajej saꞌ li ra̱tinoba̱l. Galaad quixqꞌue chokꞌ xcꞌabaꞌ.
Laj Labán quixye: —Li tusbil pec li xkaqꞌue arin, aꞌan retalil li contrato xkaba̱nu arin, chan. Aꞌan aj e nak Galaad queꞌxqꞌue chokꞌ xcꞌabaꞌ.
Ut queꞌxqꞌue ajcuiꞌ Mizpa chokꞌ xcꞌabaꞌ li naꞌajej aꞌan. Laj Labán quixye, Aꞌ taxak li Ka̱cuaꞌ Dios chi-ilok ke nak takacanab kib chi kibil kib, chan.
Ut laj Labán quixye ajcuiꞌ re laj Jacob: Li Ka̱cuaꞌ Dios ta̱naꞌok re chixjunil li cꞌaꞌru takaba̱nu. Cui la̱at ta̱rahobtesiheb lin rabin, li Ka̱cuaꞌ Dios ta̱naꞌok re. Cui la̱at ta̱cꞌam jalan chic ixk chokꞌ a̱cuixakil, ma̱re la̱at ta̱cꞌoxla nak ma̱ ani nanaꞌoc re li cꞌaꞌru yo̱cat. Abanan li Ka̱cuaꞌ Dios tixnau, chan.
Qꞌue retal li tusbil pec li xkaqꞌue arin joꞌ ajcuiꞌ li jun li xakxo saꞌ xyi.
Aꞌan li retalil nak la̱at incꞌaꞌ ta̱ru̱k tatnumekꞌ arin chi pletic cuiqꞌuin, chi moco la̱in ta̱ru̱k tinnumekꞌ chi pletic a̱cuiqꞌuin la̱at. Aꞌan aj e nak xkaqꞌue li pec arin, chan.
Li Dios li quixlokꞌoni laj Abraham la̱ xeꞌto̱nil yucuaꞌ joꞌ ajcuiꞌ laj Nacor lin xeꞌto̱nil yucuaꞌ aꞌan ta̱rakok a̱tin saꞌ kabe̱n cui incꞌaꞌ takaba̱nu li cꞌaꞌru xkaye, chan laj Labán. Ut laj Jacob quixye re laj Labán: —La̱in tinye a̱cue chiru li Ka̱cuaꞌ Dios, li quixlokꞌoni laj Isaac lin yucuaꞌ, nak ac xcꞌul inchꞌo̱l li contrato li xkaba̱nu chi kibil kib, chan.
Ut laj Jacob quixlokꞌoni li Ka̱cuaꞌ Dios saꞌ li tzu̱l aꞌan ut quixqꞌue lix mayej chiru. Ut quixbokeb ajcuiꞌ li rechꞌalal chi cuaꞌac. Queꞌcuaꞌac chixjunileb ut saꞌ li tzu̱l queꞌxnumsi li kꞌojyi̱n.
Joꞌ cuulajak chic nak quisake̱u, laj Labán quicuacli ut quirutzꞌ ruheb li ri, joꞌ eb ajcuiꞌ lix rabin. Quixtzꞌa̱ma chiru li Dios nak ta̱rosobtesiheb. Ut chirix aꞌan quisukꞌi saꞌ rochoch.
Laj Jacob quixucuac chixcꞌulbal laj EsaúUt laj Jacob qui-el saꞌ li naꞌajej aꞌan ut quixtiquib cuiꞌchic xic saꞌ lix tenamit. Nak yo̱ chi xic, quixcꞌuleb lix ángel li Ka̱cuaꞌ Dios.
Nak quirileb aꞌan, laj Jacob quixye: —Aꞌineb lix soldado li Ka̱cuaꞌ Dios.— Ut quixqꞌue chokꞌ xcꞌabaꞌ li naꞌajej aꞌan Mahanaim.
Laj Jacob quixtaklaheb lix takl chi ubej re nak teꞌxic saꞌ li tenamit Seir li cuan xcue̱nt Edom, re nak teꞌxye re laj Esaú nak cuulac re laj Jacob.
Laj Jacob quixye reheb lix takl: —Joꞌcaꞌin te̱ye re laj Esaú: “Ka̱cuaꞌ Esaú, cha̱lc cuiꞌchic re a̱cuiqꞌuin laj Jacob la̱ cui̱tzꞌin. Aꞌan xye nak tixqꞌue rib rubel a̱takl. Chalen relic arin, riqꞌuin laj Labán cuan chak,” chaꞌkex re.
Ut te̱ye ajcuiꞌ re nak nabaleb lin queto̱mk cuan; cuan incuacax, cuan inbu̱r. Ut cuan ajcuiꞌ nabaleb inmo̱s, joꞌ cui̱nk joꞌ ixk. Joꞌcan nak xintakla xyebal chi joꞌcaꞌin. Usan cui tinixcꞌul saꞌ xya̱lal, chan laj Jacob. Ut eb lix takl laj Jacob queꞌco̱eb riqꞌuin laj Esaú.
Nak queꞌsukꞌi chak eb lix takl queꞌxye re laj Jacob: —Xocuulac riqꞌuin laj Esaú la̱ cuas ut aꞌan yo̱ chi cha̱lc cha̱cꞌulbal. Ut xeꞌchal ajcuiꞌ ca̱hib ciento li cui̱nk chirix, chanqueb.
Nak laj Jacob quirabi li cꞌaꞌru queꞌxye, ma̱ caꞌchꞌin nak quixucuac ut cꞌajoꞌ nak qui-oc xcꞌaꞌux. Quixjachiheb ru li cristian li cuanqueb rochben joꞌ eb ajcuiꞌ lix cuacax ut lix bu̱r, joꞌ ajcuiꞌ eb lix camello. Chi joꞌcan quicana chi cuib chꞌu̱t li cꞌaꞌru re.
Laj Jacob cuan saꞌ xchꞌo̱l nak ma̱re laj Esaú ta̱cha̱lk chi pletic riqꞌuin. Cui laj Esaú tixtiquib pletic riqꞌuineb li jun chꞌu̱t, li jun chꞌu̱t chic ta̱ru̱k teꞌe̱lelik re teꞌxcol rib.
Ut laj Jacob qui-oc chi tijoc ut quixye: —At inDios, la̱at li Dios li quixlokꞌoni laj Abraham lin xeꞌto̱nil yucuaꞌ. Ut la̱at ajcuiꞌ catxlokꞌoni chak laj Isaac, lin yucuaꞌ. La̱at xatyehoc cue nak tinsukꞌi̱k cuiꞌchic saꞌ lin tenamit li cuanqueb cuiꞌ lin comon. Xaye ajcuiꞌ cue nak ta̱ba̱nu li usilal cue.
La̱in ma̱cuaꞌ incꞌulub chixjunil li usilal xaba̱nu cue. Ma̱cꞌaꞌ cuan cue nak xinnumeꞌ saꞌ li nimaꞌ Jordán. Caꞌaj cuiꞌ lin xukꞌ natelnac saꞌ cuukꞌ. Ut anakcuan nabal lin biomal cuan xban nak la̱at xatqꞌuehoc re.
Ba̱nu usilal cue, china̱col saꞌ rukꞌ laj Esaú li cuas. La̱in ninxucuac xban li cuas. Naru tinixcamsi ut naru tixcamsiheb li cuixakil joꞌ eb ajcuiꞌ lin cocꞌal.
La̱at junxil caye chak cue nak tina̱cuosobtesi ut caye ajcuiꞌ nak teꞌcua̱nk nabal li cualal incꞌajol joꞌ xqꞌuial ru li samaib li cuan chire li palau, li incꞌaꞌ naru rajlanquil xban xqꞌuial, chan.
Laj Jacob quixnumsi li kꞌojyi̱n aran. Ut saꞌ xya̱nkeb li cꞌaꞌru cuan re, quixsicꞌ ru li ma̱tan li tixqꞌue re laj Esaú.
Ut li ma̱tan li tixqꞌue re li ras, aꞌan aꞌin: cuib ciento li ixki chiba̱t ut junmay te̱lom, ut cuib ciento li ixki carner ut junmay li te̱lom;
laje̱b xca̱cꞌa̱l (70) li camello rochben li ral; caꞌcꞌa̱l (40) li ba̱c ut laje̱b li toro; junmay li ixki bu̱r ut laje̱b te̱lom.
Ut laj Jacob quixkꞌaxtesiheb li xul aꞌin saꞌ rukꞌeb lix mo̱s. Junju̱nk chi mo̱s quicꞌamoc reheb li ju̱nk chꞌu̱tal chi xul. Ut laj Jacob quixye ajcuiꞌ reheb lix mo̱s: —La̱ex xbe̱n cua texxic ut najt caꞌchꞌinak e̱ya̱nk nak texxic, chan.
Ut quixye re lix mo̱s, li ta̱xic chi ubej: —Nak ta̱cꞌul laj Esaú li cuas, aꞌan tixpatzꞌ a̱cue, “¿Ani a̱patrón ut bar xic a̱cue? ¿Ani aj e li queto̱mk li yo̱cat chixcꞌambal?” chaꞌak a̱cue.
Ut la̱at ta̱ye re, “At Ka̱cuaꞌ Esaú, li queto̱mk aꞌin li yo̱quin chixcꞌambal, aꞌan la̱ ma̱tan xtakla chak laj Jacob la̱ mo̱s. Aꞌan yo̱ chak chi cha̱lc chikix,” chaꞌkat re, chan laj Jacob re li mo̱s li ta̱xic chi ubej.
Joꞌcan ajcuiꞌ quixye re li xcab ut li rox li quixtakla ut chixjunileb li yo̱queb chi cꞌamoc re li ju̱nk chꞌu̱tal chi xul. —Joꞌcan te̱ye re laj Esaú nak te̱cꞌul, chan reheb.
Ut quixye ajcuiꞌ reheb: “Laj Jacob la̱ mo̱s yo̱ chak chi cha̱lc chikix,” chaꞌkex re laj Esaú.— Laj Jacob quixba̱nu chi joꞌcaꞌin xban nak cuan saꞌ xchꞌo̱l nak ta̱kꞌuna̱k xchꞌo̱l laj Esaú nak ta̱rileb lix ma̱tan. Ut quixcꞌoxla nak ma̱re ta̱cꞌulekꞌ saꞌ xya̱lal xban laj Esaú.
Quixtaklaheb lix mo̱s chixkꞌaxtesinquil lix ma̱tan laj Esaú ut laj Jacob toj quicana chixnumsinquil li kꞌojyi̱n aran.
Laj Jacob quixyal xmetzꞌe̱u riqꞌuin li ángelSaꞌ ajcuiꞌ li kꞌojyi̱n aꞌan, laj Jacob quicuacli ut quixtaklaheb chi xcabichal li rixakil jun pacꞌal li nimaꞌ Jaboc. Quixtaklaheb ajcuiꞌ li cuib chi mo̱s ixk joꞌ ajcuiꞌ li ralal junlaju.
Ut laj Jacob quixnumsi ajcuiꞌ jun pacꞌal li nimaꞌ chixjunil li cꞌaꞌru re.
Nak laj Jacob quicana xjunes, quicuulac riqꞌuin jun xtakl li Dios chanchan jun cui̱nk ut queꞌoc chixkꞌuchinquil ribeb rochben laj Jacob toj retal quisake̱u.
Li cui̱nk quiril nak cau rib laj Jacob ut incꞌaꞌ quixcuy xmetzꞌe̱u. Quixtochꞌ laj Jacob saꞌ xcꞌulbal rib xbakel li raꞌ. Ut quibokꞌe xbakel li raꞌ laj Jacob nak yo̱ chixyalbal xmetzꞌe̱u.
Ut li cui̱nk quixye re laj Jacob: —China̱cuachꞌab xban nak yo̱ chi sake̱uc, chan re. Ut laj Jacob quixye re: —Cui incꞌaꞌ tina̱cuosobtesi, incꞌaꞌ tatcuachꞌab, chan.
Ut li cui̱nk quixpatzꞌ re: —¿Ani a̱cꞌabaꞌ la̱at?— Laj Jacob quixye re, —Aj Jacob incꞌabaꞌ.—
Ut li cui̱nk quixye: —Anakcuan ma̱cuaꞌ chic aj Jacob a̱cꞌabaꞌ. Aj Israel chic a̱cꞌabaꞌ xban nak xayal a̱metzꞌe̱u riqꞌuin li Dios joꞌ ajcuiꞌ riqꞌuineb li cui̱nk. La̱at cau a̱cuib, chan.
Ut laj Jacob quixye re: —Ba̱nu usilal ye cue ani a̱cꞌabaꞌ la̱at, chan. Ut lix takl li Dios quixye re laj Jacob: —¿Cꞌaꞌut nak ta̱cuaj ta̱nau ani incꞌabaꞌ? chan. Ut lix takl li Dios quirosobtesi laj Jacob saꞌ li naꞌajej aꞌan.
Laj Jacob quixqꞌue chokꞌ xcꞌabaꞌ li naꞌajej aꞌan Peniel. Quixqꞌue lix cꞌabaꞌ aꞌin xban nak quixye: —Saꞌ li naꞌajej aꞌin xcuil ru li Ka̱cuaꞌ Dios ut toj yoꞌyo̱quin, chan.
Xban nak quibokꞌe xbakel li raꞌ, naye̱kan chic li rok laj Jacob nak qui-el saꞌ li naꞌajej Peniel. Yo̱ chak chi e̱lc li sakꞌe nak qui-el aran.
Chalen chak aꞌan, eb li ralal xcꞌajol laj Israel incꞌaꞌ nequeꞌxtiu li richꞌ mul xbakel raꞌ li xul xban nak quibokꞌe xbakel li raꞌ laj Jacob.
Laj Jacob ut laj Esaú queꞌxcꞌul rib saꞌ xya̱lalLaj Jacob qui-iloc chi najt ut quiril nak yo̱ chi cha̱lc laj Esaú rochbeneb li ca̱hib ciento chi cui̱nk. Ut laj Jacob quixkꞌaxtesiheb li cocꞌal saꞌ rukꞌ lix Lea, saꞌ rukꞌ lix Raquel ut saꞌ rukꞌeb ajcuiꞌ li cuib chi mo̱s, lix Zilpa ut lix Bilha.
Quixqꞌueheb li cuib chi mo̱s chi ubej rochbeneb lix cocꞌal. Chirix aꞌan quixqꞌue lix Lea rochbeneb lix cocꞌal ut toj chi ixbej quixqꞌue lix Raquel rochben laj José lix yum.
Laj Jacob quicꞌamoc be chiru chixjunileb. Nak yo̱ chi xic chixcꞌulbal li ras, yo̱ chixcuikꞌibanquil rib chiru toj retal quicuulac riqꞌuin. Cuukub sut quixcuikꞌib rib nak yo̱ chi xic.
Laj Esaú quia̱linac chixcꞌulbal li ri̱tzꞌin. Quixkꞌalu chi xcux laj Jacob ut quirutzꞌ ru ut queꞌoc chi ya̱bac xcabichaleb xban xsahileb saꞌ xchꞌo̱l.
Ut laj Esaú quirileb li ixk joꞌ eb ajcuiꞌ li cocꞌal ut quixye re laj Jacob: —¿Aniheb li cristian aꞌin? chan. Laj Jacob quixye re: —Aꞌineb lin cocꞌal li quixqꞌue cue li Ka̱cuaꞌ Dios.—
Queꞌchal li cuib chi mo̱s ixk rochbeneb lix cocꞌal. Queꞌjiloc riqꞌuin laj Esaú ut queꞌxcuikꞌib rib chiru.
Ut quichal ajcuiꞌ lix Lea rochbeneb lix cocꞌal ut queꞌxcuikꞌib ajcuiꞌ rib chiru. Ut quichal ajcuiꞌ lix Raquel rochben laj José ut queꞌxcuikꞌib ajcuiꞌ rib chiru laj Esaú.
Ut laj Esaú quixpatzꞌ re laj Jacob: —¿Cꞌaꞌru xya̱lal nak xatakla li queto̱mk li xebincꞌul saꞌ be? chan. Laj Jacob quixye, —Xintakla chokꞌ a̱cue re nak tina̱cꞌul saꞌ usilal, chan.
Laj Esaú quixye: —Incꞌaꞌ. La̱in incꞌaꞌ naru tincꞌuleb li queto̱mk aꞌan. La̱at cui̱tzꞌin. Ut la̱in tzꞌakal ajcuiꞌ li cꞌaꞌru cue cuan. Li cꞌaꞌru xasi cue, cana̱k chokꞌ a̱cue, chan.
Laj Jacob quichakꞌoc ut quixye re: —Ba̱nu usilal, cui ac xina̱cꞌul saꞌ usilal, tento nak ta̱cꞌul li ma̱tan li xinqꞌue a̱cue. Cꞌajoꞌ xsahil inchꞌo̱l nak xcuil a̱cuu. Chanchan xcuil ru li Dios nak xatcuil. La̱at xina̱cꞌul saꞌ xya̱lal.
Nintzꞌa̱ma cha̱cuu nak ta̱cꞌul li ma̱tan li xinqꞌue a̱cue. Anakcuan xinbiomoꞌ xban li Ka̱cuaꞌ Dios. Numtajenak li cꞌaꞌru cue, chan. Laj Jacob quirelaji ru laj Esaú re nak tixcꞌul li ma̱tan toj retal quixcꞌul.
Laj Esaú quixye re: —Us, ma̱cꞌaꞌ naxye. Yoꞌo anakcuan. La̱in tincꞌamok be cha̱cuu, chan.
Ut laj Jacob quixye: —Ka̱cuaꞌ Esaú, la̱at nacanau nak eb li cocꞌal toj coqꞌueb. Incꞌaꞌ naru nakaqꞌueheb chi be̱c chi cau chixjunil li cutan. Joꞌeb ajcuiꞌ li queto̱mk li toj coqꞌueb. Cui takalubtesiheb chiru jun cutan naru nequeꞌcam chiku saꞌ be, chan.
La̱in nacatinqꞌue saꞌ xnakꞌ cuu. Cui ta̱ba̱nu usilal, la̱at tatxic xbe̱n cua chiku. La̱o timil yo̱ko chi xic cha̱cuix xban nak eb li cocꞌal ut li xul timil nequeꞌbe̱c. Toj aran toxkatau kib saꞌ li tenamit Seir, chan.
Laj Esaú quixye re, —Us. La̱in nacuaj raj xcanabanquil cuib oxibakeb li cui̱nk li xeꞌchal chicuix re nak eb aꞌan teꞌochbeni̱nk e̱re saꞌ be, chan. Laj Jacob quixye re, —Incꞌaꞌ, Ka̱cuaꞌ Esaú. Ba̱nu usilal ma̱chꞌiꞌchꞌiꞌi a̱cuib xba̱nunquil aꞌan. Tzꞌakal riqꞌuin aꞌin nak xina̱cꞌul cuiꞌchic saꞌ xya̱lal, chan laj Jacob.
Saꞌ ajcuiꞌ li cutan aꞌan laj Esaú quisukꞌi saꞌ li tenamit Seir.
Ut laj Jacob co̱ saꞌ li naꞌajej Sucot. Ut aran quixyi̱b lix muheba̱l ut quixyi̱b ajcuiꞌ lix naꞌajeb li xul. Xban aꞌan Sucot quixqꞌue chokꞌ xcꞌabaꞌ li naꞌajej aꞌan.
Nak qui-el Sucot, laj Jacob quixyi̱b lix muheba̱l chire li tenamit Siquem. Ut quicuulac toj Canaán chi sa saꞌ xchꞌo̱l chalen nak qui-el chak saꞌ li tenamit Padan-aram.
Laj Jacob quixlokꞌ li chꞌochꞌ li quixyi̱b cuiꞌ lix muheba̱l. Jun ciento chi tumin quixtoj cuiꞌ li chꞌochꞌ riqꞌuineb li ralal laj Hamor. Laj Hamor aꞌan lix yucuaꞌ laj Siquem.
Ut aran quixyi̱b jun li artal laj Jacob re xlokꞌoninquil li Ka̱cuaꞌ Dios. Li naꞌajej aꞌan quixqꞌue chokꞌ xcꞌabaꞌ El-Elohe-Israel.
Lix Dina quichapeꞌ saꞌ pue̱rs xban laj SiquemLix Dina aꞌan lix rabin laj Jacob riqꞌuin lix Lea. Lix Dina co̱ chirulaꞌaninquileb li xkaꞌal saꞌ li tenamit re nak tixnauheb ru.
Laj Hamor, aj heveo, aꞌan li acuabej re li tenamit aꞌan. Li ralal laj Hamor, aꞌan laj Siquem. Nak laj Siquem quiril lix Dina, quixchap ut quixpuersi ru re nak ta̱cua̱nk riqꞌuin.
Riqꞌuin li cꞌaꞌru quixba̱nu laj Siquem, cꞌajoꞌ nak co̱ xchꞌo̱l chirix lix Dina, lix rabin laj Jacob. Ut qui-oc chixkꞌunbesinquil.
Laj Siquem quia̱tinac riqꞌuin laj Hamor lix yucuaꞌ ut quixye re, —Ba̱nu usilal cue, tzꞌa̱ma chokꞌ cuixakil li xkaꞌal aꞌan. La̱in tincuaj sumla̱c riqꞌuin, chan re.
Laj Jacob quirabi resil nak quichapeꞌ lix rabin xban laj Siquem. Ut aꞌan ma̱cꞌaꞌ quixye. Toj quiroybeni nak queꞌsukꞌi chak eb li ralal li cuanqueb chak chi iloc queto̱mk saꞌ cꞌaleba̱l.
Toj ma̱jiꞌ nequeꞌcuulac nak laj Hamor, xyucuaꞌ laj Siquem, co̱ chi a̱tinac riqꞌuin laj Jacob.
Nak eb li ralal laj Jacob queꞌrabi resil li cꞌaꞌru quicꞌulman, queꞌsukꞌi chak saꞌ junpa̱t. Eb aꞌan queꞌrahoꞌ saꞌ xchꞌo̱l ut queꞌchal ajcuiꞌ xjoskꞌileb xban nak nimla ma̱c chiruheb chixjunileb laj Israel nak laj Siquem quicuan riqꞌuin lix rabin laj Jacob. Incꞌaꞌ raj xru xba̱nu chi joꞌcan riqꞌuin junak xkaꞌal aj Israel.
Laj Hamor quia̱tinac riqꞌuineb ut quixye reheb: —Laj Siquem li cualal cꞌajoꞌ nak xco̱ xchꞌo̱l chirix li xkaꞌal. Ba̱nuhomak usilal, qꞌuehomak li xkaꞌal re ta̱sumla̱k riqꞌuin li cualal.
Us raj nak teꞌxcꞌam ribeb li kalal kacꞌajol re nak kechꞌalalak chic kib, chan. Li kalal la̱o teꞌsumla̱k riqꞌuineb le̱ rabin la̱ex. Ut le̱ ralal la̱ex teꞌsumla̱k riqꞌuineb li karabin la̱o.
La̱ex naru texcana̱k kiqꞌuin saꞌ li chꞌochꞌ aꞌin. Naru textrabajik ut naru texcua̱nk chi junaj cua arin. Te̱ba̱nu li cꞌanjel li cꞌaꞌru te̱raj ut naru ajcuiꞌ te̱lokꞌ le̱ chꞌochꞌ arin, chan.
Laj Siquem quixye re lix yucuaꞌ lix Dina joꞌ ajcuiꞌ reheb li ras ut li ri̱tzꞌin: —Chixcꞌulak e̱chꞌo̱l li cꞌaꞌru xyeman e̱re. Aꞌ yal cꞌaꞌru te̱patzꞌ cue, la̱in tinqꞌue e̱re.
Yehomak cue joꞌ nimal te̱raj. Usta nabal, la̱in tinqꞌue e̱re. Mexcꞌoxlac riqꞌuin aꞌan. Qꞌuehomak cue li xkaꞌal re nak tinsumla̱k riqꞌuin, chan.
Xban nak ac nequeꞌxnau nak laj Siquem quixchap saꞌ pue̱rs lix Dina, eb li ras riqꞌuin balakꞌ aj a̱tin queꞌchakꞌoc chiruheb laj Hamor ut laj Siquem.
Queꞌxye reheb: —Incꞌaꞌ naru takaqꞌue li kanab re junak cui̱nk ma̱jiꞌ naxcꞌul li circuncisión xban nak xuta̱nal aꞌan saꞌ kaya̱nk la̱o, chanqueb.
Cui chixjunilex la̱ex te̱cꞌul li circuncisión joꞌ nak xkacꞌul la̱o, la̱o takasume li cꞌaꞌru xaye ke.
Chi joꞌcaꞌin tixcꞌul kachꞌo̱l re nak le̱ ralal teꞌsumla̱k riqꞌuineb li karabin ut li kalal la̱o teꞌsumla̱k riqꞌuineb le̱ rabin. Ut la̱o tocua̱nk saꞌ e̱ya̱nk ut takajunaji kib.
Abanan cui la̱ex incꞌaꞌ te̱cꞌul li circuncisión, la̱o toe̱lk saꞌ e̱ya̱nk ut takacꞌam li kanab chikix nak toxic, chanqueb li ralal laj Jacob.
Ut laj Hamor joꞌ ajcuiꞌ laj Siquem queꞌxcꞌul xchꞌo̱l li cꞌaꞌru quiyeheꞌ reheb.
Laj Siquem saꞌ junpa̱t quixcꞌul li circuncisión xban nak cꞌajoꞌ nak nacuulac chiru lix rabin laj Jacob. Laj Siquem, aꞌan li kꞌaxal oxlokꞌinbil chiruheb li cuanqueb saꞌ rochoch lix yucuaꞌ.
Ut laj Siquem rochben lix yucuaꞌ, queꞌco̱eb saꞌ li oqueba̱l re li tenamit li nequeꞌxchꞌutub cuiꞌ ribeb li cristian. Ut queꞌoc chi a̱tinac riqꞌuineb li cuanqueb aran.
Queꞌxye reheb: —Eb li cui̱nk aꞌin, aꞌan kami̱gueb. Teꞌcua̱nk saꞌ kaya̱nk ut teꞌtrabajik arin. Ut tzꞌakal ajcuiꞌ li naꞌajej chokꞌ reheb aꞌan. Chi joꞌcan ta̱ru̱k tosumla̱k riqꞌuineb lix rabin. Ut eb aꞌan teꞌsumla̱k riqꞌuineb li karabin la̱o.
Abanan eb aꞌan xeꞌxye nak tento takacꞌul li circuncisión joꞌ nak queꞌxcꞌul chak eb aꞌan re nak junajak chic ku.
Ut chixjunil li cꞌaꞌru cuan reheb la̱o toe̱chani̱nk re. Joꞌ ajcuiꞌ eb lix queto̱mk. Abanan tento nak takacꞌul li circuncisión re nak teꞌcana̱k arin saꞌ kaya̱nk, chanqueb.
Chixjunileb li cui̱nk saꞌ li tenamit aꞌan queꞌxcꞌul xchꞌo̱l li cꞌaꞌru quiyeheꞌ reheb xbaneb laj Hamor ut laj Siquem. Ut chixjunileb queꞌxcꞌul li circuncisión.
Abanan saꞌ rox li cutan nak toj ra cuanqueb li cui̱nk xban li circuncisión, cuib li ralal laj Jacob, laj Simeón rochben laj Leví, queꞌco̱eb chi pletic saꞌ li tenamit aꞌan chi ma̱cꞌaꞌ saꞌ xchꞌo̱leb. Chixjunileb li cui̱nk aꞌin queꞌcamsi̱c chi chꞌi̱chꞌ xbaneb laj Simeón ut laj Leví, li raseb lix Dina.
Riqꞌuin kꞌesnal chꞌi̱chꞌ queꞌxcamsi laj Hamor joꞌ ajcuiꞌ laj Siquem. Saꞌ junpa̱t queꞌrisi lix Dina saꞌ rochocheb laj Siquem, ut queꞌxcꞌam chirix nak queꞌco̱eb.
Ut eb li jun chꞌol chic li ralal laj Jacob queꞌcuulac saꞌ li tenamit. Quilajeꞌnumeꞌ saꞌ xbe̱neb li camenak ut quilajeꞌrisi chixjunil li cꞌaꞌak re ru li cuan saꞌ li tenamit. Queꞌxba̱nu chi joꞌcaꞌin xban li ma̱usilal li quixba̱nu re lix Dina laj Siquem.
Quilajeꞌxcꞌam ajcuiꞌ chixjunil li queto̱mk li cuan aran, joꞌ ajcuiꞌ li cꞌaꞌru cuan reheb, joꞌ saꞌ tenamit joꞌ saꞌ cꞌaleba̱l.
Quilajeꞌrelkꞌa li cꞌaꞌru cuan saꞌ li rochocheb. Queꞌxcꞌam ajcuiꞌ chixjunileb li ixk joꞌ eb ajcuiꞌ li cocꞌal.
Laj Jacob quixye re laj Simeón joꞌ ajcuiꞌ re laj Leví: —La̱ex xeqꞌue jun li nimla raylal saꞌ inbe̱n la̱in. Anakcuan chixjunileb li cristian saꞌ li naꞌajej aꞌin xicꞌ chic tineꞌril, eb laj cananeo ut eb laj ferezeo. Ma̱re teꞌxchꞌutub ribeb re teꞌpletik kiqꞌuin. Ut la̱o coꞌxibo ajcuiꞌ. ¿Cꞌaꞌru takaba̱nu? To-osokꞌ chikajunilo, chan laj Jacob.
Ut eb li ralal queꞌchakꞌoc ut queꞌxye re: —¿Ma xacuaj raj la̱at nak xkacanab li ki̱tzꞌin re nak ta̱osokꞌ joꞌ junak ixk yibru xnaꞌleb? chanqueb re lix yucuaꞌ.
Li Dios quirosobtesi laj Jacob saꞌ li naꞌajej Bet-elUt li Dios quixye re laj Jacob: —Anakcuan yi̱bomak li cꞌaꞌru e̱re ut texxic saꞌ li tenamit Bet-el ut texcana̱k aran. Ut ta̱yi̱b junak li artal re tina̱lokꞌoni cuiꞌ. Aꞌan li naꞌajej li quincꞌutbesi cuiꞌ cuib cha̱cuu nak cat-e̱lelic chiru laj Esaú la̱ cuas, chan li Dios.
Laj Jacob quixye reheb li ralal xcꞌajol joꞌ eb ajcuiꞌ li cuanqueb rubel xtakl: —Isihomak chixjunileb li jalanil dios li cuanqueb e̱riqꞌuin. Tex-ati̱nk ut texjalok chokꞌ retalil nak te̱canab xba̱nunquil li ma̱usilal.
Ut yoꞌkeb saꞌ junpa̱t saꞌ li naꞌajej Bet-el. Aran tinyi̱b jun li artal re xlokꞌoninquil li tzꞌakal Dios, li Dios li quitenkꞌan chak cue nak cuanquin saꞌ raylal. Aꞌan qui-ochbenin chak cue nak quilajinnumeꞌ chak yalak bar, chan.
Eb aꞌan queꞌxkꞌaxtesi saꞌ rukꞌ laj Jacob chixjunileb li jalanil dios. Queꞌxkꞌaxtesiheb ajcuiꞌ chixjunileb li caꞌxic li queꞌxqꞌue xcuanquil. Laj Jacob quixmuk li cꞌaꞌak re ru aꞌin saꞌ chꞌochꞌ rubel jun to̱n li cheꞌ ji. Li cheꞌ aꞌan nachꞌ cuan riqꞌuin li tenamit Siquem.
Li Dios quixqꞌue xxiuheb chixjunileb li tenamit li cuanqueb chi nachꞌ riqꞌuin li quicuan cuiꞌ laj Jacob. Xban nak queꞌxucuac, incꞌaꞌ queꞌxta̱ke laj Jacob re teꞌxpleti nak yo̱queb chi xic Bet-el.
Quicuulac laj Jacob saꞌ li naꞌajej Luz rochbeneb chixjunileb li yo̱queb chi xic chirix. Nayeman ajcuiꞌ Bet-el re. Li naꞌajej aꞌan cuan saꞌ xcue̱nt Canaán.
Laj Jacob quixyi̱b jun li artal ut quixqꞌue El-bet-el chokꞌ xcꞌabaꞌ li naꞌajej aꞌan. Quixqꞌue xcꞌabaꞌ chi joꞌcaꞌin xban nak aran quixcꞌutbesi rib li Dios chiru nak yo̱ chi e̱lelic chiru li ras.
Ut quicam lix Débora li quicuan chokꞌ xmo̱s li camenak Rebeca. Ut queꞌxbec xjulel rubel jun lix to̱nal ji ut aran queꞌxmuk nachꞌ riqꞌuin li tenamit Bet-el. Alón-bacut queꞌxqꞌue chokꞌ xcꞌabaꞌ li naꞌajej aꞌan.
Nak quisukꞌi chak laj Jacob Padan-aram, li Ka̱cuaꞌ Dios quixcꞌutbesi cuiꞌchic rib chiru. Ut aran laj Jacob qui-osobtesi̱c cuiꞌchic xban li Dios.
Li Ka̱cuaꞌ Dios quixye re: —La̱at aj Jacob a̱cꞌabaꞌ. Abanan anakcuan ma̱cuaꞌ chic aj Jacob teꞌxye a̱cue. Aj Israel chic a̱cꞌabaꞌ, chan. Joꞌcaꞌin nak li Dios quixqꞌue aj Israel chokꞌ xcꞌabaꞌ.
Li Dios quixye re: —La̱in li Ka̱cuaꞌ Dios li kꞌaxal nim incuanquil. Chexqꞌui̱k ut cheꞌta̱mk la̱ cualal a̱cꞌajol. Riqꞌuineb la̱ cualal a̱cꞌajol teꞌcua̱nk li ni̱nki tenamit. Ut saꞌ xya̱nkeb ajcuiꞌ aꞌan teꞌcua̱nk ajcuiꞌ li rey.
Li chꞌochꞌ li xinqꞌue re laj Abraham joꞌ ajcuiꞌ re laj Isaac, anakcuan tinkꞌaxtesi chokꞌ a̱cue. Ut nak tatca̱mk la̱at, tinkꞌaxtesi li chꞌochꞌ aꞌin reheb la̱ cualal a̱cꞌajol, chan li Dios.
Nak li Dios quirakeꞌ chi a̱tinac riqꞌuin laj Jacob, qui-el saꞌ li naꞌajej aꞌan.
Ut laj Jacob quixchap jun li pec ut quixxakab saꞌ li naꞌajej aꞌan chokꞌ retalil nak aran quia̱tinac li Dios riqꞌuin. Ut laj Jacob quixqꞌue li aceite joꞌ ajcuiꞌ li vino saꞌ xbe̱n li pec chokꞌ retalil nak li naꞌajej aꞌan osobtesinbil.
Laj Jacob quixqꞌue cuiꞌchic Bet-el chokꞌ xcꞌabaꞌ li naꞌajej aꞌan xban nak aꞌan li naꞌajej li quia̱tina̱c cuiꞌ xban li Dios.
Lix camic lix RaquelEb aꞌan queꞌel saꞌ li naꞌajej Bet-el. Toj cuan ma̱ nequeꞌcuulac saꞌ li tenamit Efrata nak quicuulac xcutanquil nak ta̱qꞌuira̱k lix Raquel. Abanan quicuan chꞌaꞌajquilal saꞌ xyoꞌlajic li cꞌulaꞌal.
Nak yo̱ chi yoꞌla̱c li cꞌulaꞌal, li ixk li yo̱ chi iloc re quixye: —Matcꞌoxlac. Te̱lom la̱ cꞌulaꞌal li xyoꞌla, chan.
Ut nak ac ca̱mc re, lix Raquel quixye: —Aj Benoni te̱qꞌue chokꞌ xcꞌabaꞌ li cꞌulaꞌal aꞌin, chan ut quicam. Abanan li yucuaꞌbej quixqꞌue aj Benjamín chokꞌ xcꞌabaꞌ.
Joꞌcaꞌin nak quicam lix Raquel ut quimukeꞌ saꞌ li be li naxic Efrata. Anakcuan Belén nayeman re li tenamit aꞌan.
Laj Jacob quixxakab jun li nimla pec saꞌ xbe̱n li camenak Raquel chokꞌ retalil. Ut li pec aꞌan toj cuan aran anakcuan.
Laj Israel qui-el aran ut quixyi̱b lix muheba̱l jun pacꞌal li naꞌajej Migdal-edar xcꞌabaꞌ.
Nak ac cuanqueb chic saꞌ li naꞌajej aꞌan, laj Rubén quixchꞌic rib riqꞌuin lix Bilha li quicuan riqꞌuin lix yucuaꞌ joꞌ rixakil. Cꞌajoꞌ nak quijoskꞌoꞌ laj Israel nak quirabi cꞌaꞌru quixba̱nu li ralal.Cablaju eb li ralal laj Jacob queꞌcuan, li nayeman ajcuiꞌ aj Israel re.
Aꞌaneb aꞌin li ralal li quicuan riqꞌuin lix Lea. Laj Rubén, aꞌan li asbej. Chirix chic aꞌan quicuan laj Simeón, laj Leví, laj Judá, laj Isacar ut laj Zabulón.
Riqꞌuin lix Raquel queꞌcuan cuib li ralal laj Jacob. Aꞌaneb aꞌin lix cꞌabaꞌeb: laj José ut laj Benjamín.
Ut quicuan ajcuiꞌ cuib li ralal riqꞌuin lix Bilha, lix mo̱s lix Raquel. Aꞌaneb aꞌin lix cꞌabaꞌeb: laj Dan ut laj Neftalí.
Ut quicuan ajcuiꞌ cuib li ralal riqꞌuin lix Zilpa, lix mo̱s lix Lea. Aꞌaneb aꞌin lix cꞌabaꞌeb: laj Gad ut laj Aser. Aꞌaneb aꞌin li ralal laj Jacob, li queꞌyoꞌla saꞌ li naꞌajej Padan-aram.
Lix camic laj IsaacLaj Jacob co̱ saꞌ li tenamit Mamre chirilbal laj Isaac lix yucuaꞌ. Arba ut Hebrón nequeꞌxye re li tenamit aꞌan. Saꞌ ajcuiꞌ li naꞌajej aꞌan quicuan laj Abraham nak toj yoꞌyo̱k.
Jun ciento riqꞌuin ca̱cꞌa̱l (180) chihab cuan re laj Isaac.
Nak ac ti̱x chic chi us, laj Isaac quicam ut coxtauheb lix xeꞌto̱nil yucuaꞌ. Laj Esaú ut laj Jacob queꞌxmuk lix yucuaꞌeb nak quicam.
Eb li ralal xcꞌajol laj EsaúAꞌaneb aꞌin li ralal xcꞌajol laj Esaú, li nayeman ajcuiꞌ Edom re.
Laj Esaú quisumla riqꞌuin oxib chi ixk aj cananeo. Aꞌaneb aꞌin lix cꞌabaꞌeb: lix Ada aꞌan lix rabin laj Elón aj hitita; lix Aholibama, aꞌan lix rabin laj Aná. Lix Aholibama, aꞌan li ri laj Zibeón aj heveo.
Ut li rox li rixakil, aꞌan lix Basemat. Aꞌan lix rabin laj Ismael. Laj Nebaiot, aꞌan li ras lix Basemat.
Laj Esaú quicuan jun li ralal riqꞌuin lix Ada. Aꞌan aj Elifaz xcꞌabaꞌ. Ut quicuan ajcuiꞌ jun li ralal riqꞌuin lix Basemat. Aꞌan laj Reuel xcꞌabaꞌ.
Ut laj Esaú quicuan oxib li ralal riqꞌuin lix Aholibama. Aꞌaneb aꞌin lix cꞌabaꞌeb; laj Jeús, laj Jaalam, ut laj Coré. Chixjunileb li o̱b chi ralal laj Esaú queꞌyoꞌla aran saꞌ li tenamit Canaán.
Laj Esaú qui-el saꞌ li naꞌajej li cuan cuiꞌ laj Jacob li ri̱tzꞌin. Quixcꞌameb li rixakil ut lix rabin ut li ralal chirix joꞌ eb ajcuiꞌ chixjunileb li cuanqueb riqꞌuin. Quixcꞌam chixjunileb lix queto̱mk joꞌ ajcuiꞌ li cꞌaꞌru re li joꞌ qꞌuial li queꞌtam aran Canaán.
Joꞌcan nak queꞌel aran xban nak kꞌaxal nabal li cꞌaꞌak re ru cuan reheb ut incꞌaꞌ chic natzꞌakloc lix naꞌajeb lix queto̱mk. Joꞌcan nak queꞌel saꞌ li naꞌajej li cuanqueb cuiꞌ.
Joꞌcan nak laj Esaú co̱ chi cua̱nc saꞌ li naꞌajej li tzu̱l ru Seir xcꞌabaꞌ. Nayeman ajcuiꞌ aj Edom re laj Esaú.
Aꞌaneb aꞌin li ralal xcꞌajol laj Esaú. Laj Esaú, aꞌan lix xeꞌto̱nil yucuaꞌeb laj Edom li cuanqueb saꞌ li naꞌajej Seir li tzu̱l ru.
Aꞌaneb aꞌin lix cꞌabaꞌeb li ralal xcꞌajol laj Esaú: laj Elifaz, aꞌan li ralal riqꞌuin lix Ada. Laj Reuel, aꞌan li ralal riqꞌuin lix Basemat.
Aꞌaneb aꞌin lix cꞌabaꞌeb li ralal laj Elifaz: laj Temán, laj Omar, laj Zefo, laj Gatam ut laj Cenaz.
Laj Elifaz quicuan jun chic li ixk riqꞌuin. Aꞌan lix Timna xcꞌabaꞌ. Laj Elifaz quicuan jun li ralal aj Amalec xcꞌabaꞌ riqꞌuin lix Timna. Aꞌaneb li ralal xcꞌajol lix Ada li rixakil laj Esaú.
Aꞌaneb aꞌin lix cꞌabaꞌeb li ralal laj Reuel: laj Nahat, laj Zera, laj Sama ut laj Miza. Aꞌaneb li ralal xcꞌajol laj Esaú riqꞌuin lix Basemat.
Lix Aholibama, aꞌan li rox rixakil laj Esaú. Laj Esaú quicuan ralal riqꞌuin. Aꞌaneb aꞌin lix cꞌabaꞌeb: laj Jeús, laj Jaalam ut laj Coré. Lix Aholibama aꞌan lix rabin laj Aná li ralal laj Zibeón.
Li queꞌtaklan saꞌ xbe̱neb li ralal xcꞌajol laj Esaú, aꞌaneb li ralal laj Elifaz li asbej saꞌ xya̱nkeb li ralal xcꞌajol laj Esaú. Aꞌaneb aꞌin lix cꞌabaꞌeb: laj Temán, laj Omar, laj Zefo ut laj Cenaz,
joꞌ eb ajcuiꞌ laj Coré, laj Gatam, ut laj Amalec. Aꞌaneb aꞌin li queꞌtaklan saꞌ xbe̱neb li ralal xcꞌajol laj Elifaz saꞌ li tenamit Edom. Aꞌaneb li ri lix Ada.
Laj Reuel, aꞌan li ralal laj Esaú. Eb li ralal laj Reuel, aꞌaneb aꞌin: laj Nahat, laj Zera, laj Sama ut laj Miza. Aꞌaneb li queꞌtaklan saꞌ xbe̱neb li ralal xcꞌajol laj Reuel saꞌ li tenamit Edom. Aꞌaneb li ri laj Esaú riqꞌuin lix Basemat.
Lix Aholibama li rixakil laj Esaú, aꞌan lix rabin laj Aná. Aꞌaneb aꞌin li xcꞌabaꞌeb li ralal laj Esaú riqꞌuin lix Aholibama: laj Jeús, laj Jaalam, ut laj Coré.
Aꞌaneb li ralal xcꞌajol laj Esaú, li nayeman ajcuiꞌ aj Edom re. Aꞌaneb li queꞌtaklan saꞌ lix tenamiteb.
Eb laj horeo queꞌcuan ajcuiꞌ saꞌ li naꞌajej aꞌan. Laj Seir aꞌan aj horeo. Aꞌaneb aꞌin li ralal laj Seir; laj Lotán, laj Sobal, ut laj Zibeón. Laj Aná, aꞌan li ralal laj Zibeón.
Laj Seir quicuan oxib chic li ralal. Aꞌaneb aꞌin lix cꞌabaꞌeb: laj Disón, laj Ezer ut laj Disán. Eb aꞌan queꞌtaklan saꞌ xbe̱neb laj horeo. Eb laj horeo, aꞌaneb li ralal xcꞌajol laj Seir. Eb aꞌan queꞌcuan saꞌ li tenamit Edom.
Aꞌaneb aꞌin li ralal laj Lotán: laj Hori, ut laj Hemam. Ut lix Timna, aꞌan li ri̱tzꞌin laj Lotán.
Aꞌaneb aꞌin li ralal laj Sobal; laj Alván, laj Manahat, laj Ebal, laj Sefo ut laj Onam.
Aꞌaneb aꞌin li ralal laj Zibeón: laj Aja, ut laj Aná. Laj Aná, aꞌan li quitaꞌoc re li yuꞌam haꞌ saꞌ li chaki chꞌochꞌ nak yo̱ chirilbaleb lix bu̱r lix yucuaꞌ.
Laj Aná quicuan jun li ralal laj Disón xcꞌabaꞌ. Quicuan ajcuiꞌ jun xrabin xAholibama xcꞌabaꞌ.
Aꞌaneb aꞌin li ralal laj Disón: laj Hemdán, laj Esbán, laj Itrán, ut laj Querán.
Ut eb li ralal laj Ezer, aꞌaneb aꞌin: laj Bilhán, laj Zaaván ut laj Acán.
Aꞌaneb aꞌin li ralal laj Disán: laj Uz ut laj Arán.
Aꞌaneb aꞌin li nequeꞌtaklan saꞌ xbe̱n li tenamit Seir: laj Lotán, laj Sobal, laj Zibeón, laj Aná,
joꞌ eb ajcuiꞌ laj Disón, laj Ezer ut laj Disán. Eb aꞌan queꞌtaklan saꞌ xbe̱neb laj horeo. Eb li cui̱nk aꞌin, aꞌaneb li queꞌtaklan saꞌ xbe̱neb li ju̱nk chꞌu̱tal li ralal xcꞌajoleb.
Nak toj ma̱jiꞌ nacuan xreyeb laj Israel, aꞌaneb aꞌin li queꞌtaklan saꞌ li tenamit Edom.
Laj Bela, li ralal laj Beor, aꞌan li quicuan chokꞌ rey saꞌ li naꞌajej Edom. Dinaba xcꞌabaꞌ li tenamit li quicuan cuiꞌ chi takla̱nc laj Bela.
Nak quicam laj Bela, laj Jobab qui-oc chokꞌ re̱kaj. Laj Jobab, aꞌan li ralal laj Zera li chalenak chak Bosra.
Nak quicam laj Jobab, laj Husam qui-oc chokꞌ re̱kaj. Aꞌan li chalenak chak Temán.
Nak quicam laj Husam, laj Hadad qui-oc chokꞌ re̱kaj. Laj Hadad, aꞌan li ralal laj Bedad. Laj Bedad, aꞌan li quinumta saꞌ xbe̱neb laj Madián nak queꞌpletic saꞌ li naꞌajej Moab. Avit xcꞌabaꞌ li tenamit li quicuan cuiꞌ chi takla̱nc laj Hadad.
Nak quicam laj Hadad, aꞌ chic laj Samla qui-oc chokꞌ re̱kaj. Laj Samla, aꞌan chalenak chak saꞌ li tenamit Masreca.
Nak quicam laj Samla, aꞌ chic laj Saúl qui-oc chokꞌ re̱kaj. Laj Saúl, aꞌan chalenak chak saꞌ li tenamit Rehobot li cuan chire li nimaꞌ Éufrates.
Nak quicam laj Saúl, laj Baal-hanán li ralal laj Acbor qui-oc chokꞌ re̱kaj.
Nak quicam laj Baal-hanán, aꞌ chic laj Hadar qui-oc chokꞌ re̱kaj. Pau xcꞌabaꞌ li tenamit li quicuan cuiꞌ chi takla̱nc laj Hadar. Ut li rixakil laj Hadar, aꞌan lix Mehetabel xcꞌabaꞌ. Aꞌan lix coꞌ lix Matred, lix rabin laj Mezaab.
Aꞌaneb aꞌin lix cꞌabaꞌeb li queꞌtaklan saꞌ xbe̱neb li ju̱nk chꞌu̱tal li ralal xcꞌajol laj Esaú. Li tenamit li queꞌtaklan cuiꞌ quiqꞌueheꞌ xcꞌabaꞌeb joꞌ xcꞌabaꞌeb li queꞌtaklan saꞌ xbe̱neb. Aꞌaneb aꞌin lix cꞌabaꞌeb: laj Timna, laj Alva, ut laj Jetet,
ut eb laj Aholibama, laj Ela, ut laj Pinón,
ut eb laj Cenaz, laj Temán, ut laj Mibzar,
joꞌ eb ajcuiꞌ laj Magdiel ut laj Iram. Chixjunil li cꞌabaꞌej tzꞌi̱banbil arin, aꞌaneb li queꞌtaklan saꞌ xbe̱neb li ralal xcꞌajol laj Esaú. Tzꞌi̱banbil ajcuiꞌ lix cꞌabaꞌeb li tenamit li queꞌcuan cuiꞌ chi takla̱nc. Lix xeꞌto̱nil yucuaꞌeb laj Edom, aꞌan laj Esaú.
Laj Jacob quicuan aran Canaán saꞌ li naꞌajej li quicuan cuiꞌ lix yucuaꞌ.
Ut joꞌcaꞌin nak queꞌcuan chak li ralal xcꞌajol laj Jacob.Laj José cuan cuuklaju chihab re, ut aꞌan natenkꞌan reheb li ras chi iloc reheb li queto̱mk. Eb li ras li nequeꞌochbenin re laj José, aꞌan eb li ralal laj Jacob riqꞌuineb lix Bilha ut lix Zilpa. Nak laj José quiril nak incꞌaꞌ us nequeꞌxba̱nu li ras, najitoc chiru lix yucuaꞌ.
Laj Israel cꞌajoꞌ naxra laj José chiruheb li jun chꞌol chic li ralal xban nak aꞌan li ralal li quicuan nak ac ti̱x chic. Laj Israel quixsi jun li rakꞌ laj José xcomon li cha̱bil ut chꞌinaꞌus xyi̱banquil. Najt rok ut nim rukꞌ.
Eb li asbej queꞌril nak laj José, aꞌan li kꞌaxal raro xban li yucuaꞌbej. Joꞌcan nak xicꞌ nequeꞌril laj José ut incꞌaꞌ chic nequeꞌa̱tinac saꞌ xya̱lal riqꞌuin.
Saꞌ jun li kꞌojyi̱n laj José quimatqꞌuec. Ut quixserakꞌi reheb li ras li cꞌaꞌru quiril saꞌ lix matcꞌ. Nak queꞌrabi li cꞌaꞌru quixye laj José, kꞌaxal cuiꞌchic xicꞌ queꞌril.
Aꞌan aꞌin li quixye laj José reheb li ras: —Ba̱nuhomak usilal, abihomak ut tinye e̱re li cꞌaꞌru xinmatqꞌue.
La̱in xcuil saꞌ lin matcꞌ nak yo̱co chixbacꞌbal chi jo̱b li trigo. Ut li jun jo̱b li cue quicuacli ut quixxakab rib aran. Eb li ju̱nk jo̱b e̱re queꞌxsut li cue ut queꞌxcꞌutzub rib chiru li cue nak quicuil, chan laj José.
Eb li ras queꞌxye re: —¿Ma nacacꞌoxla nak la̱at tat-oc chi takla̱nc saꞌ kabe̱n? Ut, ¿ma nacacꞌoxla nak la̱o takaqꞌue kib rubel a̱takl? chanqueb re. Ut kꞌaxal cuiꞌchic xicꞌ queꞌril laj José xban li cꞌaꞌru quixye ut xban li cꞌaꞌru quixmatqꞌue.
Laj José quimatqꞌuec cuiꞌchic ut quixserakꞌi reheb li ras. Quixye reheb: —Abihomak cuiꞌchic la̱ex li cꞌaꞌru xcuil saꞌ lin matcꞌ. La̱in xcuil ru li sakꞌe ut li po ut xcuil ajcuiꞌ junlaju li chahim. Eb aꞌan queꞌxcuikꞌib rib chicuu nak xcuil, chan reheb li ras.
Ut quixserakꞌi ajcuiꞌ re lix yucuaꞌ. Lix yucuaꞌ quixchꞌila aꞌan ut quixye re: —¿Cꞌaꞌru xya̱lal li nacamatqꞌue? ¿Ma aꞌan naraj naxye nak la̱in ut la̱ naꞌ joꞌ eb ajcuiꞌ la̱ cuas takacuikꞌib kib cha̱cuu? chan re laj José.
Eb li ras cꞌajoꞌ nak nequeꞌxcakali riqꞌuin li cꞌaꞌak re ru aꞌin. Ut lix yucuaꞌ qui-oc chi cꞌoxlac chirix li quixmatqꞌue.
Saꞌ jun li cutan eb li ras laj José queꞌco̱eb Siquem chixberesinquileb lix queto̱mk lix yucuaꞌeb.
Laj Israel quixye re laj José: —Eb la̱ cuas yo̱queb chak chixberesinquil lin queto̱mk aran Siquem. La̱in tincuaj nak tatxic chirilbaleb, chan. Ut laj José quixye: —Us. La̱in tinxic, chan.
Ut laj Israel quixye re: —Ayu. Toxa̱cuileb chak chanru cuanqueb la̱ cuas joꞌ eb ajcuiꞌ li queto̱mk. Chirix aꞌan tatsukꞌi̱k chak chixyebal cue chanru cuanqueb, chan laj Israel. Laj José qui-el saꞌ li ru takꞌa re Hebrón ut co̱ toj saꞌ li naꞌajej Siquem.
Laj José yo̱ chixbeninquil rib saꞌ cꞌaleba̱l chixsicꞌbaleb li ras nak quixcꞌul jun li cui̱nk. Li cui̱nk quixpatzꞌ re: —¿Cꞌaꞌru yo̱cat arin? chan.
Laj José quixye re: —La̱in yo̱quin chixsicꞌbaleb li cuas li yo̱queb chixberesinquil lix queto̱mk lin yucuaꞌ. Chacuy inma̱c tinpatzꞌ a̱cue, ¿ma incꞌaꞌ xacuileb ru li cuas arin? Ba̱nu usilal, ye cue bar cuanqueb, chan re.
Li cui̱nk quixye re: —Eb la̱ cuas ac xeꞌco̱eb. La̱in xcuabi nak yo̱queb xyebal nak teꞌxic saꞌ li naꞌajej Dotán, chan li cui̱nk. Ut laj José yal jun nak co̱ Dotán ut aran coxtauheb li ras.
Yo̱ chak chi cha̱lc chi najt laj José nak qui-ileꞌ xbaneb li ras. Ut eb aꞌan queꞌoc chixcꞌoxlanquil chanru nak teꞌxcamsi aꞌan.
Queꞌxye chi ribileb rib: —Cueꞌ chak li namatqꞌuec.
Cha̱lk cuan. Ho̱n nakacamsi. Ut takacut saꞌ junak jul. Ut takaye nak ma̱re junak joskꞌ aj xul xcamsin re. Ut takil cꞌaꞌru ta̱cana̱k cuiꞌ lix matcꞌ, chanqueb chi ribileb rib.
Nak laj Rubén quirabi aꞌin, quiraj raj xcolbal laj José saꞌ rukꞌeb. Ut quixye reheb: —Incꞌaꞌ naru takacamsi li ki̱tzꞌin, chan.
Incꞌaꞌ takisi xquiqꞌuel. Me̱ba̱nu raylal re. Cutumak saꞌ li jul li cuan arin saꞌ li chaki chꞌochꞌ, chan laj Rubén. Aꞌan cuan saꞌ xchꞌo̱l nak naru tixcol mokon ut tixcꞌam cuiꞌchic riqꞌuin lix yucuaꞌ.
Nak laj José quicuulac riqꞌuineb li ras, ticto queꞌrisi lix cha̱bil akꞌ li cuan chirix.
Queꞌxchap laj José ut queꞌxcut chi saꞌ li chaki jul.
Chirix chic aꞌan, queꞌchunla ut queꞌoc chi cuaꞌac. Nak yo̱queb chi cuaꞌac queꞌril nak yo̱queb chi cha̱lc jun chꞌu̱t eb li cui̱nk aj ismaelita. Yo̱queb chak chi cha̱lc Galaad. Ut chirixeb lix camello yo̱queb chak chixcꞌambal oxib pa̱y ru li sununquil ban re teꞌxcꞌayi aran Egipto. Aꞌin lix cꞌabaꞌeb li oxib pa̱y ru chi sununquil ban: aromas, bálsamo ut mirra.
Laj Judá quixye reheb li ras ut li ri̱tzꞌin: —¿Cꞌaꞌru aj e nak takacamsi li ki̱tzꞌin saꞌ mukmu?
Kacꞌayihak reheb laj ismaelita. Kꞌaxal us nak ti̱c takacꞌayi ut incꞌaꞌ takacamsi xban nak aꞌan ki̱tzꞌin ut kaquiqꞌuel kib chi kibil kib, chan laj Judá. Ut eb li ras ut eb li ri̱tzꞌin queꞌxcꞌul xchꞌo̱l li quixye.
Nak yo̱queb chi numecꞌ saꞌ li naꞌajej aꞌan eb laj madianita rochbeneb laj ismaelita, eb li ras laj José queꞌrisi saꞌ li jul ut queꞌxcꞌayi reheb laj ismaelita. Junmay ajcuiꞌ chi tumin plata queꞌxcꞌayi cuiꞌ laj José. Ut chirix aꞌan, queꞌxcꞌam toj Egipto.
Nak quisukꞌi laj Rubén chirilbal saꞌ li jul, quiril nak ma̱ ani chic laj José. Cꞌajoꞌ nak qui-oc xcꞌaꞌux ut quixkꞌichi li rakꞌ xban xrahil xchꞌo̱l.
Laj Rubén co̱ riqꞌuineb li ri̱tzꞌin ut quixye reheb: —Anakcuan ma̱ ani chic li ki̱tzꞌin saꞌ li jul. ¿Cꞌaꞌru ta̱ru̱k tinba̱nu anakcuan? chan.
Ut eb li asbej queꞌxcamsi jun li chꞌina chiba̱t ut saꞌ lix quiqꞌuel li chiba̱t li queꞌxcamsi queꞌxchꞌulaqui lix cha̱bil akꞌ laj José.
Ut li rakꞌ laj José li chꞌulaquinbil saꞌ li quicꞌ, queꞌxcꞌam riqꞌuin lix yucuaꞌ. Ut queꞌxye re: —Il li xkatau chak, at kayucuaꞌ. Joꞌ li aꞌin anchal lix cha̱bil akꞌ la̱ cualal, chanqueb re.
Laj Jacob ticto quixnau ru li rakꞌ aꞌan, ut quixye reheb: —Ay, aꞌin tzꞌakal rakꞌ li cualal nacuil. Ma̱re junak joskꞌ aj xul xtiꞌoc re ut x-osoꞌ chi junaj cua, chan laj Jacob.
Laj Jacob quixkꞌichi li rakꞌ li cuan chirix xban xrahil saꞌ xchꞌo̱l chirix lix camic li ralal. Ut quixqꞌue li kꞌesnal ru tꞌicr chirix chanchan coxtal retalil nak ra saꞌ xchꞌo̱l. Najt quicuan li rakꞌ aꞌan chirix ut incꞌaꞌ quinumeꞌ xrahil saꞌ xchꞌo̱l.
Ut chixjunileb li ralal xcꞌajol queꞌoc chixcꞌojobanquil xchꞌo̱l lix yucuaꞌeb. Abanan laj Jacob incꞌaꞌ quixcꞌojob xchꞌo̱l ut quixye: —La̱in incꞌaꞌ ta̱cꞌojla̱k inchꞌo̱l chalen nak tinca̱mk ut tintau li cualal li ac camenak, chan. Ut li yucuaꞌbej junelic naya̱bac chirix laj José.
Nak queꞌcuulac aran Egipto eb laj madianita rochbeneb laj ismaelita queꞌxcꞌayi cuiꞌchic laj José re jun li cui̱nk aj Potifar xcꞌabaꞌ. Laj Potifar aꞌan li natenkꞌan re laj faraón chixtaklanquileb li soldado. Ut laj faraón, aꞌan li acuabej re li nimla tenamit Egipto.
Laj Judá ut lix TamarSaꞌ eb li cutan aꞌan, laj Judá quirisi rib saꞌ xya̱nkeb li ras ut li ri̱tzꞌin ut co̱ saꞌ li naꞌajej li cuan cuiꞌ jun li cui̱nk aj adulamita. Li cui̱nk aꞌan aj Hira xcꞌabaꞌ.
Ut aran cuan jun li cui̱nk aj cananeo aj Súa xcꞌabaꞌ. Laj Súa cuan jun lix rabin. Ut co̱ xchꞌo̱l laj Judá chirix li xkaꞌal aꞌan toj retal quixcꞌam chokꞌ rixakil.
Li rixakil laj Judá quicana chi yaj aj ixk ut quicuan jun li ralal riqꞌuin. Aj Er queꞌxqꞌue chokꞌ xcꞌabaꞌ li cꞌulaꞌal.
Laj Judá quicuan cuiꞌchic jun li ralal riqꞌuin li ixk aꞌan ut quixqꞌue aj Onán chokꞌ xcꞌabaꞌ.
Laj Judá quicuan rox li ralal riqꞌuin li ixk aꞌan ut quixqꞌue aj Sela chokꞌ xcꞌabaꞌ. Laj Sela, aꞌan quiyoꞌla saꞌ li tenamit Quezib.
Laj Judá quixsumub laj Er li xbe̱n ralal riqꞌuin jun li ixk xTamar xcꞌabaꞌ.
Laj Er kꞌaxal yibru xnaꞌleb chiru li Dios. Joꞌcan nak li Ka̱cuaꞌ Dios quixrak xcutan laj Er.
Chirix lix camic laj Er, laj Judá quixye re laj Onán li ralal: —Anakcuan tatxic riqꞌuin li rixakil la̱ cuas camenak. Ut tatcua̱nk riqꞌuin re nak ta̱cua̱nk ralal xcꞌajol la̱ cuas camenak, chan laj Judá.
Ut laj Onán quixnau nak li cocꞌal li teꞌyoꞌla̱k riqꞌuin li ixk aꞌan ma̱cuaꞌ saꞌ xcꞌabaꞌ aꞌan teꞌyoꞌla̱k. Saꞌ xcꞌabaꞌ ban li ras camenak. Incꞌaꞌ quicuulac chiru. Joꞌcan nak laj Onán nak nacuan riqꞌuin li ixk, naxsicꞌ xya̱lal chanru tixba̱nu re nak li ixk incꞌaꞌ ta̱cana̱k chi yaj.
Xban nak incꞌaꞌ quicuulac chiru li Dios li cꞌaꞌru quixba̱nu laj Onán, li Dios quixrak ajcuiꞌ lix yuꞌam aꞌan.
Ut laj Judá quixye re li ralib: —Anakcuan tatxic saꞌ rochoch la̱ yucuaꞌ ut tatcana̱k a̱junes toj retal ta̱cui̱nkilokꞌ li cualal laj Sela, chan laj Judá re lix Tamar. Ut laj Judá quixye saꞌ xchꞌo̱l: —Micam anchal laj Sela joꞌ nak xeꞌcam li ras, chan. Ut lix Tamar co̱ saꞌ rochoch lix yucuaꞌ ut aran quicana.
Mokon chic quicam li rixakil laj Judá. Li ixk aꞌan, aꞌan lix rabin laj Súa. Nak ac xnumeꞌ xrahil xchꞌo̱l laj Judá chirix xcamic li rixakil, co̱ saꞌ li tenamit Timnat li nabeseꞌ cuiꞌ rixeb lix carner. Laj Hira aj adulamita co̱ rochben.
Lix Tamar quirabi resil nak ta̱cuulak laj Judá saꞌ li tenamit Timnat chixqꞌuebal chi besecꞌ rixeb lix carner. Laj Judá, aꞌan lix yucuaꞌ lix be̱lom camenak.
Lix Tamar quixnau nak ac xcui̱nkiloꞌ laj Sela ut incꞌaꞌ quiqꞌueheꞌ chokꞌ xbe̱lom joꞌ quiyechiꞌi̱c re junxil. Quirisi li rakꞌ chirix li nequeꞌrocsi li xma̱lcaꞌan ut quixtzꞌap li ru ut quixlan rib riqꞌuin lix tꞌicr re nak ta̱cꞌutu̱nk joꞌ junak ixk li naxcꞌayi rib. Ut co̱ saꞌ li oqueba̱l re li tenamit Enaim, li cuan saꞌ xbehil Timnat.
Nak laj Judá quiril li ixk, aꞌan quixcꞌoxla nak aꞌan jun ixk xcomoneb li nequeꞌxcꞌayi rib xban nak tzꞌaptzꞌo li ru riqꞌuin lix tꞌicr.
Laj Judá incꞌaꞌ naxnau nak aꞌan li ralib. Quijiloc chixcꞌatk ut quixye re, —China̱canab chi cua̱nc a̱cuiqꞌuin, chan. Li ixk quixye re: —¿Cꞌaꞌru ta̱qꞌue cue cui tincanab cuib cha̱cuu? chan.
Laj Judá quixye re: —La̱in tintakla chak junak ral li chiba̱t chokꞌ a̱cue, chan. Ut li ixk quixye: —Us, abanan canab cuan junak retalil cue ma relic na chi ya̱l nak ta̱takla chak li chꞌina chiba̱t, chan.
Laj Judá quixye re: —¿Cꞌaꞌru ta̱cuaj tinqꞌue a̱cue? chan. Ut li ixk quixye re: —Qꞌue chokꞌ cue la̱ matkꞌab li cuan cuiꞌ retalil la̱ cꞌabaꞌ joꞌ ajcuiꞌ lix cꞌa̱mal. Ut ta̱canab ajcuiꞌ cuiqꞌuin la̱ xukꞌ li cuan saꞌ a̱cuukꞌ, chan li ixk. Ut laj Judá quixqꞌue re li cꞌaꞌru quixpatzꞌ ut quicuan riqꞌuin. Ut lix Tamar quicana chi yaj aj ixk.
Ut li ixk qui-el saꞌ li naꞌajej aꞌan, ut quirisi lix tꞌicr li quixlan cuiꞌ rib. Ut quixqꞌue cuiꞌchic chirix li rakꞌ li nequeꞌrocsi li xma̱lcaꞌan.
Ut laj Judá quixtakla li chꞌina chiba̱t chirix laj adulamita re nak li ixk tixkꞌaxtesi chak lix matkꞌab joꞌ ajcuiꞌ lix xukꞌ. Abanan laj adulamita nak quicuulac incꞌaꞌ chic quixtau li ixk. Ma̱ ani chic.
Laj adulamita quixpatzꞌ reheb li cui̱nk aran: —Checuy inma̱c. ¿Ma incꞌaꞌ xeril ru li ixk arin li naxcꞌayi rib li quicuan saꞌ li oqueba̱l re li tenamit Enaim?— Eb aꞌan queꞌchakꞌoc ut queꞌxye re: —Arin ma̱ jun ixk yibru xnaꞌleb nacuan, chanqueb re.
Ut laj adulamita quisukꞌi riqꞌuin laj Judá ut quixye re, —Incꞌaꞌ xintau li ixk li xaye cue. Ut li cui̱nk li cuanqueb aran, xinpatzꞌ reheb ut xeꞌxye cue nak ma̱ jun ixk yibru xnaꞌleb nacuan aran chanqueb cue.—
Laj Judá quixye re: —¿Cꞌaꞌ xjalenquil? Cana̱keb cuan li cꞌaꞌru cue riqꞌuin li ixk aꞌan. Chi joꞌcan incꞌaꞌ tincꞌut inxuta̱n chiruheb li tenamit. La̱in xintakla li chꞌina chiba̱t chokꞌ re abanan incꞌaꞌ xatau chak, chan.
Nak ac xnumeꞌ chic oxib po queꞌxye re laj Judá: —Lix Tamar la̱ cualib yo̱ chi yumbe̱tac xban nak yaj aj ixk chic.— Ut laj Judá quixye reheb: —Ayukex. Te̱risi li ixk aꞌan saꞌ rochoch lix yucuaꞌ ut te̱cꞌat, chan laj Judá reheb.
Nak eb li cui̱nk yo̱queb chirisinquil lix Tamar saꞌ rochoch, quixtakla xkꞌaxtesinquil li cꞌaꞌru re laj Judá. Ut quixtakla ajcuiꞌ xyebal re, —La̱in yaj aj ixkin anakcuan xban laj e̱chal re li cꞌaꞌak re ru aꞌin. Ba̱nu usilal, il chi us ani na laj e̱chal re li matkꞌab aꞌin, joꞌ ajcuiꞌ lix cꞌa̱mal ut li xukꞌ, chan reheb.
Nak queꞌcuulac li takl riqꞌuin laj Judá, queꞌxcꞌut chiru li cꞌaꞌak re ru li quixtakla lix Tamar. Ut laj Judá ticto quixqꞌue retal nak aꞌan laj e̱chal re li cꞌaꞌak re ru aꞌan. Ut quixye: —Li ixk aꞌin ti̱c xchꞌo̱l chicuu la̱in. Xinma̱cob xban nak incꞌaꞌ xinqꞌue li cualal laj Sela chokꞌ xbe̱lom joꞌ xinyechiꞌi chak junxil, chan. Ut laj Judá incꞌaꞌ chic quicuan riqꞌuin li ixk.
Ut nak quicuulac xkꞌehil nak quiqꞌuira lix Tamar, lut eb lix cocꞌal li queꞌyoꞌla.
Nak yo̱ chi yoꞌla̱c li xbe̱n cꞌulaꞌal, qui-el chak li rukꞌ xbe̱n cua. Ut li ixk li yo̱ chi iloc re lix Tamar quixbacꞌ jun li caki cꞌa̱m chi xcux rukꞌ li cꞌulaꞌal ut quixye: —Li caki cꞌa̱m aꞌin, aꞌan retalil nak aꞌan li asbej, chan.
Saꞌ junpa̱t quirocsi cuiꞌchic rukꞌ li cꞌulaꞌal. Ut aꞌ chic li ri̱tzꞌin quiyoꞌla xbe̱n cua. Ut laj ilol re quixye: —¿Cꞌaꞌut nak la̱at chic tatyoꞌla̱k xbe̱n cua? chan li ixk re li cꞌulaꞌal. Ut aj Fares queꞌxqꞌue chokꞌ xcꞌabaꞌ li cꞌulaꞌal.
Chirix aꞌan quiyoꞌla li quirisi li rukꞌ xbe̱n cua li quiqꞌueheꞌ retalil riqꞌuin caki cꞌa̱m. Ut aj Zara queꞌxqꞌue chokꞌ xcꞌabaꞌ li cꞌulaꞌal.
Laj José ut li rixakil laj PotifarLaj José quicꞌameꞌ saꞌ li nimla tenamit Egipto xbaneb laj ismaelita. Jun li cui̱nk aj Potifar quilokꞌoc re. Laj Potifar, aꞌan natenkꞌan re laj faraón chixtaklanquileb li soldados. Laj faraón, aꞌan li acuabej re li tenamit Egipto.
Li Ka̱cuaꞌ Dios quitenkꞌan re laj José ut us qui-el riqꞌuin chixjunil nak cuan saꞌ rochoch laj Egipto lix patrón.
Laj Potifar quixqꞌue retal nak li Ka̱cuaꞌ Dios yo̱ chi tenkꞌa̱nc re laj José. Joꞌcan nak us na-el chiru chixjunil li cꞌaꞌru naxba̱nu.
Ut quixqꞌue ajcuiꞌ retal nak laj José naxqꞌue xchꞌo̱l chixba̱nunquil lix cꞌanjel. Joꞌcan nak quixqꞌue chokꞌ xbe̱n mo̱s ut quixkꞌaxtesi saꞌ rukꞌ chixjunil li cꞌaꞌru cuan re.
Chalen nak quixkꞌaxtesi saꞌ rukꞌ laj José li cꞌaꞌru cuan re, li Ka̱cuaꞌ Dios quirosobtesi laj Potifar laj Egipto saꞌ xcꞌabaꞌ laj José. Xban li Ka̱cuaꞌ Dios quinabaloꞌ li cꞌaꞌru cuan re laj Potifar.
Laj Potifar incꞌaꞌ nacꞌoxlac chirix li cꞌaꞌru re xban nak laj José naril chi us chixjunil. Caꞌaj chic lix tzacae̱mk naxcꞌoxla. Laj José cꞌajoꞌ xchakꞌal ru ut chꞌinaꞌus na-iloc.
Joꞌcan nak li rixakil laj Potifar cꞌajoꞌ nak quicuulac chiru. Saꞌ jun li cutan li rixakil laj Potifar quixye re: —At José, quim arin. Anakcuan tatcua̱rk cuiqꞌuin, chan li ixk.
Laj José incꞌaꞌ quiraj xba̱nunquil li quixye li ixk ut quixye re: —Lin patrón laj Potifar incꞌaꞌ nacꞌoxlac chicuix riqꞌuin li cꞌaꞌru cuan re. Chixjunil quixkꞌaxtesi saꞌ cuukꞌ.
Ma̱ ani chic nim xcuanquil chicuu la̱in saꞌ li cab aꞌin. Chixjunil li cꞌaꞌru cuan re xkꞌaxtesi saꞌ cuukꞌ. Caꞌaj cuiꞌ la̱at incꞌaꞌ xatxkꞌaxtesi saꞌ cuukꞌ xban nak la̱at li rixakil. ¿Chanru nak tin-oc chixchꞌicbal cuib a̱cuiqꞌuin? Ma̱ jokꞌe tinba̱nu chi joꞌcan. Aꞌan nimla ma̱c chiru li Ka̱cuaꞌ Dios, chan laj José.
Li ixk rajlal cutan naxtikcuasi xjolom laj José. Abanan laj José incꞌaꞌ naxcꞌul xchꞌo̱l li cꞌaꞌru naxye re.
Saꞌ jun li cutan laj José co̱ chi trabajic saꞌ rochoch laj Potifar ut ma̱ jun eb li mo̱s cuanqueb saꞌ cab nak quicuulac.
Li ixk qui-oc saꞌ junpa̱t ut quixchap li rakꞌ laj José ut quixye re: —Anakcuan tatcua̱rk cuiqꞌuin, chan re. Laj José saꞌ junpa̱t quie̱lelic chiru li ixk. Xban nak quia̱linac saꞌ junpa̱t quicana li rakꞌ saꞌ rukꞌ li ixk.
Nak quie̱lelic laj José, li ixk quiril nak quicana li rakꞌ saꞌ rukꞌ.
Quixbokeb lix mo̱s saꞌ cab ut quixye reheb: —Ilomak li cui̱nk aj hebreo li xcꞌam chak laj Potifar. Aꞌan xraj raj xcꞌutbal kaxuta̱n. Xol-ocak cuiqꞌuin ut xraj raj inchapbal. Ut la̱in xinjap cue chi cau.
Ut aꞌan xril nak xinjap cue saꞌ rukꞌ, ut saꞌ junpa̱t x-e̱lelic. Xban nak x-e̱lelic saꞌ junpa̱t xcana li rakꞌ arin, chan.
Ut li ixk quixxoc li rakꞌ laj José re nak tixcꞌut chiru lix be̱lom nak ta̱cuulak saꞌ cab.
Nak laj Potifar quicuulac saꞌ cab, li ixk quiticꞌtiꞌic chiru. Quixye re: —Qꞌue retal li mo̱s aj hebreo li xacꞌam chak kiqꞌuin, aꞌan x-oc cuiqꞌuin saꞌ cab ut xraj raj inchapbal.
Ut nak xril nak la̱in xinjap cue chi cau, aꞌan x-e̱lelic saꞌ junpa̱t. Ut xcana li rakꞌ cuiqꞌuin.
Joꞌcaꞌin quixba̱nu la̱ mo̱s cuiqꞌuin, chan li ixk. Cꞌajoꞌ nak quipoꞌ laj Potifar nak quirabi cꞌaꞌru quiyeheꞌ re xban li rixakil. Ma̱ caꞌchꞌin lix joskꞌil quichal saꞌ xbe̱n laj José.
Ut laj Potifar quixtakla xchapbal laj José ut quixqꞌue saꞌ tzꞌalam li nequeꞌcuan cuiꞌ li pre̱x li nequeꞌtakla̱c saꞌ tzꞌalam xban li acuabej. Ut aran quicana laj José chi pre̱xil.
Ut li Dios junelic cuan riqꞌuin. Quixtokꞌoba ru laj José ut quixtenkꞌa. Laj ilol tzꞌalam quixqꞌue retal nak laj José, aꞌan cha̱bil.
Quixkꞌaxtesi saꞌ rukꞌ laj José chixjunileb li pre̱x re nak aꞌan chic ta̱ilok reheb. Aꞌ chic laj José naba̱nun re chixjunil lix cꞌanjel laj ilol tzꞌalam.
Li Ka̱cuaꞌ Dios natenkꞌan re laj José riqꞌuin chixjunil li cꞌaꞌak re ru naxba̱nu. Laj ilol tzꞌalam incꞌaꞌ chic nacꞌoxlac chirixeb li cuanqueb aran. Ut li Ka̱cuaꞌ Dios junelic na-iloc re laj José.
Laj José quixchꞌolob xya̱lal li cuib chi matcꞌMokon chic nak ac xcꞌulman aꞌin, cuib lix mo̱s laj faraón queꞌpaltoꞌ chiru. Li jun, aꞌan aj yi̱bom caxlan cua ut li jun chic aꞌan li naqꞌuehoc rucꞌa li rey.
Li jun, aꞌan li nataklan reheb li nequeꞌyi̱ban caxlan cua ut li jun chic, aꞌan li nataklan reheb li nequeꞌqꞌuehoc rucꞌa li rey. Laj faraón quijoskꞌoꞌ saꞌ xbe̱neb aꞌan.
Quixkꞌaxtesiheb saꞌ rukꞌ li nataklan reheb li soldados. Aꞌan li na-iloc tzꞌalam. Ut saꞌ li tzꞌalam aꞌan cuan laj José chi pre̱xil.
Laj ilol tzꞌalam quixkꞌaxtesiheb saꞌ rukꞌ laj José re nak aꞌan chic ta̱ilok reheb. Ut najt queꞌcuan chi pre̱xil.
Saꞌ jun li kꞌojyi̱n li cuib chi pre̱x queꞌmatqꞌuec. Jalan jala̱nk lix matcꞌ li junju̱nk ut jalan jala̱nk ajcuiꞌ lix ya̱lal.
Joꞌ cuulajak chic nak quisake̱u, laj José quicuulac riqꞌuineb li pre̱x. Quiril nak mas sakquirin nequeꞌiloc xban nak ra saꞌ xchꞌo̱leb.
Laj José quixpatzꞌ reheb li cuib chi cui̱nk li cuanqueb chi pre̱xil: —¿Cꞌaꞌut nak ra saꞌ e̱chꞌo̱l? chan reheb.
Eb aꞌan queꞌxye re: —La̱o xomatqꞌuec ut ma̱ ani naru xyebal ke cꞌaꞌru xya̱lal li kamatcꞌ.— Laj José quixye reheb: —Caꞌaj cuiꞌ li Ka̱cuaꞌ Dios nanaꞌoc re cꞌaꞌru xya̱lal lix matcꞌ li junju̱nk. Naru te̱ye cue le̱ matcꞌ, chan.
Ut li jun li quitaklan reheb laj qꞌuehol ucꞌa saꞌ rochoch laj faraón, quixserakꞌi lix matcꞌ re laj José ut quixye: —Saꞌ lin matcꞌ xcuil jun to̱n li uvas.
Li jun to̱n chi uvas cuan oxib rukꞌ ut qui-atzꞌumac. Saꞌ junpa̱t quiu̱chin ut quikꞌanoꞌ li ru.
Xcuil nak chapcho lix secꞌ laj faraón saꞌ cuukꞌ. Yo̱quin chixyatzꞌbal lix yaꞌal li uvas chi saꞌ lix secꞌ ut la̱in xinqꞌue re laj faraón, chan li cui̱nk.
Ut laj José quixye re: —Aꞌan aꞌin xya̱lal la̱ matcꞌ. Li oxib li rukꞌ li uvas li xacuil, aꞌan retalil oxib cutan.
Saꞌ rox li cutan laj faraón tatxcꞌam cuiꞌchic chi trabajic saꞌ rochoch. Ut la̱at ta̱qꞌue cuiꞌchic rucꞌa laj faraón joꞌ caba̱nu chak junxil.
Nak cua̱nkat cuiꞌchic saꞌ rochoch laj faraón saꞌ la̱ cꞌanjel, ba̱nu usilal, chijulticokꞌ a̱cue li usilal xinba̱nu a̱cue. Chat-a̱tinak chicuix riqꞌuin laj faraón re nak naru tineꞌrisi ajcuiꞌ la̱in.
La̱in yal quineꞌrelkꞌa chak junxil saꞌ xtenamiteb laj hebreo. Ma̱cuaꞌ incꞌulub cua̱nc arin saꞌ tzꞌalam xban nak ma̱cꞌaꞌ inma̱c, chan laj José.
Ut li cui̱nk, li quitaklan reheb laj yi̱bom caxlan cua saꞌ rochoch laj faraón quixqꞌue retal nak cha̱bil lix matcꞌ li rochben. Aꞌan quixye re laj José: —La̱in xinmatqꞌuec ajcuiꞌ. Saꞌ lin matcꞌ xcuil oxib li chacach bitꞌbo̱queb inban ut cuan li saki caxlan cua chi saꞌ.
Ut li chacach li cuan saꞌ xbe̱n nujenak chi caxlan cua qꞌuila pa̱y ru. Li caxlan cua aꞌan re laj faraón. Ut quicuil nak yo̱queb chi rupupic li xul saꞌ xbe̱neb li chacach li cuan saꞌ injolom ut yo̱queb chixcuaꞌbal li caxlan cua li cuan chi saꞌ, chan.
Laj José quixye re: —Aꞌan aꞌin xya̱lal la̱ matcꞌ. Li oxib chi chacach, aꞌan retalil oxib cutan.
Ut saꞌ rox li cutan laj faraón tixtakla risinquil la̱ jolom ut tateꞌxtꞌuyub chiru junak cheꞌ. Ut eb li soꞌsol teꞌcha̱lk ut telajeꞌxtꞌupi la̱ tibel ut tateꞌxtiu, chan laj José.
Ut saꞌ rox li cutan quixninkꞌei xchihab laj faraón. Quixbokeb chixjunileb lix mo̱s saꞌ lix ninkꞌe. Quixbokeb ajcuiꞌ li cuib chi pre̱x, jun li quitaklan reheb laj yi̱bom caxlan cua, ut li jun chic li quitaklan reheb laj qꞌuehol rucꞌa.
Laj faraón quixqꞌue cuiꞌchic xcꞌanjel li cui̱nk li quitaklan reheb laj qꞌuehol rucꞌa. Ut li cui̱nk aꞌan quixqꞌue cuiꞌchic rucꞌa saꞌ rukꞌ laj faraón.
Ut li cui̱nk jun chic li quitaklan reheb laj yi̱bom caxlan cua, laj faraón quixtakla chi tꞌuyuba̱c. Quixcꞌul joꞌ quiyeheꞌ re xban laj José.
Ut li cui̱nk li nataklan reheb laj qꞌuehol rucꞌa laj faraón incꞌaꞌ chic quijulticoꞌ re laj José. Quisach ban saꞌ xchꞌo̱l.
Laj José quixchꞌolob xya̱lal lix matcꞌ laj faraónAc cuib chihab chic xnumic lix matqꞌueb li mo̱s nak quimatqꞌuec laj faraón. Ut saꞌ lix matcꞌ laj faraón quiril nak xakxo chire li nimaꞌ Nilo.
Cuukubeb li cuacax queꞌel chak saꞌ li nimaꞌ nak quiril. Kꞌaxal cha̱bileb ut ni̱nkeb xtibel. Yo̱queb chi ichajibc chire li nimaꞌ.
Quiril ajcuiꞌ nak queꞌel cuukub chic li cuacax saꞌ li nimaꞌ. Kꞌaxal bakeb ut chakiheb. Coxeꞌxakli̱k chixcꞌatk eb li cuacax li cha̱bileb xtibel li cuanqueb chire li nimaꞌ.
Eb li cuukub li ni̱nkeb xtibel queꞌtiꞌeꞌ xbaneb li bakeb. Ut qui-aj ru laj faraón.
Ut chirix aꞌan quicube cuiꞌchic xcuara laj faraón. Ut quimatqꞌuec cuiꞌchic xcaꞌ sut. Saꞌ lix matcꞌ quiril jun rok li trigo cuan cuukub chi̱j li ru cꞌajoꞌ xchakꞌal ru.
Ut quiril ajcuiꞌ nak queꞌel chak cuukub chi̱j chic chi trigo kꞌaxal cocꞌ ut ac xtzꞌumar xban li tikcual ikꞌ.
Ut li cuukub chi̱j chi trigo li chaki queꞌxcꞌux li cuukub li cha̱bil. Ut qui-aj ru laj faraón ut quixqꞌue retal nak matqꞌuec yo̱.
Nak quisake̱u cꞌajoꞌ lix cꞌaꞌux laj faraón. Quixtakla xbokbal chixjunileb laj kꞌe li cuanqueb Egipto, joꞌ ajcuiꞌ li cuanqueb xnaꞌleb. Ut laj faraón quilajxserakꞌi reheb li cꞌaꞌru quixmatqꞌue. Ma̱ jun quitaꞌoc ru lix ya̱lal lix matcꞌ laj faraón.
Tojoꞌnak li cui̱nk li nataklan reheb laj qꞌuehol rucꞌa quixye re laj faraón: —Anakcuan xjulticoꞌ cue chanru nak quinpaltoc cha̱cuu.
Ut saꞌ li cutan aꞌan catpoꞌ chicuu, at faraón, ut quina̱qꞌue saꞌ tzꞌalam. Joꞌ ajcuiꞌ li cui̱nk li quitaklan reheb laj yi̱bom caxlan cua.
Chi kacabichalo comatqꞌuec saꞌ jun li kꞌojyi̱n ut jalan jala̱nk li kamatcꞌ ut jalan jala̱nk ajcuiꞌ lix ya̱lal.
Ut cuan aran kochben jun li cui̱nk aj hebreo li nacꞌanjelac chiru laj ilol tzꞌalam. Kaserakꞌi li kamatcꞌ re ut aꞌan quixye ke cꞌaꞌru xya̱lal li kamatcꞌ chi kaju̱nkal.
Ut quicꞌulman li cꞌaꞌru quixye ke chirix li kamatcꞌ. La̱in quin-oc cuiꞌchic chi cꞌanjelac cha̱cuu ut li jun chic catakla chi tꞌuyuba̱c, chan li cui̱nk re laj faraón.
Tojoꞌnak laj faraón quixtakla xbokbal laj José. Queꞌrisi saꞌ junpa̱t saꞌ tzꞌalam. Laj José quixjo rib ut quixtikib rib chi us ut co̱ riqꞌuin laj faraón.
Nak quicuulac riqꞌuin laj faraón, laj faraón quixye re: —La̱in xinmatqꞌuec. Ut arin ma̱ ani nataꞌoc ru xya̱lal lin matcꞌ. La̱in xcuabi resil nak la̱at nacaye xya̱lal li matcꞌ, chan laj faraón.
Ut laj José quixye re: —La̱in injunes incꞌaꞌ naru tinye cꞌaꞌru xya̱lal la̱ matcꞌ. Caꞌaj cuiꞌ li Ka̱cuaꞌ Dios nanaꞌoc re lix ya̱lal. Aꞌan ta̱tenkꞌa̱nk cue xtaubal ru xya̱lal la̱ matcꞌ, at faraón, re nak ta̱cꞌojla̱k a̱chꞌo̱l, chan laj José.
Ut laj faraón quixserakꞌi re li quixmatqꞌue. Quixye re laj José: —Saꞌ lin matcꞌ xcuil nak xakxo̱quin chire li nimaꞌ Nilo.
Ut cuukub li ni̱nki cuacax queꞌel chak saꞌ li nimaꞌ ut yo̱queb chi ichajibc chire li nimaꞌ.
Chirix chic aꞌan queꞌel cuukub chic li cuacax kꞌaxal bakeb. Ma̱ jun cua cuilom ru cuacax arin Egipto joꞌ li xcuil saꞌ lin matcꞌ. Cꞌajoꞌ xyibal ruheb.
Ut li cuukub chi cuacax li ni̱nkeb xtibel, queꞌtiꞌeꞌ xbaneb li bakeb.
Nak queꞌrakeꞌ chixtiubaleb li ni̱nki cuacax, incꞌaꞌ nacꞌutun nak aꞌan ta queꞌtiꞌoc re xban nak xnaꞌajquileb ajcuiꞌ queꞌcana. Moco queꞌni̱nkan ta. Ut chirix aꞌan qui-aj cuu.
Ut chirix chic aꞌan quicube cuiꞌchic incuara ut quinmatqꞌuec xcaꞌ sut. Saꞌ lin matcꞌ xcuil jun rok li trigo cuan cuukub chi̱j li ru cꞌajoꞌ xchakꞌal ru.
Tojoꞌnak queꞌel cuukub chi̱j chic chi trigo kꞌaxal cocꞌ ut ac xtzꞌumar xban li tikcual ikꞌ.
Ut li cuukub chi̱j chi trigo li cha̱bil queꞌcꞌuxeꞌ xbaneb li chaki. La̱in xinserakꞌi reheb laj kꞌe. Abanan ma̱ jun xtaꞌoc re cꞌaꞌru xya̱lal lin matcꞌ, chan laj faraón.
Tojoꞌnak laj José quixye re laj faraón: —Li cuib la̱ matcꞌ juntakꞌe̱t lix ya̱lal. Li Ka̱cuaꞌ Dios yo̱ chixcꞌutbal cha̱cuu li cꞌaꞌru tixba̱nu.
Li cuukub chi ni̱nki cuacax aꞌan retalil li cuukub chihab li ta̱cha̱lk. Joꞌcan ajcuiꞌ li cuukub chi̱j chi trigo. Li cuib la̱ matcꞌ juntakꞌe̱t lix ya̱lal.
Ut li cuukub chi cuacax li bakeb, li queꞌel saꞌ li haꞌ mokon, aꞌan retalil li cuukub chihab li ta̱cha̱lk mokon. Joꞌcan ajcuiꞌ eb li cuukub chi̱j chic chi trigo li chakiheb. Aꞌin retalil li cuukub chihab chi cueꞌej li ta̱cua̱nk mokon.
Li xinye a̱cue, at faraón, aꞌan lix ya̱lal la̱ matcꞌ. Riqꞌuin la̱ matcꞌ aꞌan li Ka̱cuaꞌ Dios yo̱ chixcꞌutbal cha̱cuu li cꞌaꞌru tixba̱nu.
Chiru li cuukub chihab li teꞌnumekꞌ xbe̱n cua, telajeꞌe̱lk chi us li acui̱mk saꞌ li tenamit Egipto.
Ut nak ta̱numekꞌ li cuukub chihab aꞌan, ta̱cua̱nk jun nimla cueꞌej saꞌ li tenamit aꞌin. Cuukub chihab tzꞌakal ta̱cua̱nk li cueꞌej. Chixjunil li cꞌaꞌak re ru li cuan arin telajeꞌosokꞌ xban li cueꞌej.
Chixjunil li ta̱sicꞌma̱nk chiru li cuukub chihab cha̱bil, aꞌan incꞌaꞌ ta̱tzꞌaklok nak yo̱k li cueꞌej.
Re nak ta̱pa̱b nak chi se̱b ta̱cꞌulma̱nk joꞌ quixye li Ka̱cuaꞌ Dios, joꞌcan nak xatxqꞌue chi matqꞌuec cuib sut.
Anakcuan us raj ta̱ba̱nu li naꞌleb aꞌin. Sicꞌ junak cui̱nk cha̱bil xnaꞌleb re nak aꞌan ta̱tenkꞌa̱nk a̱cue chixtaklanquil li tenamit Egipto.
Chaba̱nu chi joꞌcaꞌin, at faraón. Chasiqꞌueb li ani teꞌtakla̱nk reheb li junju̱nk chi tenamit. Ut chiru li cuukub chihab aꞌin nak ta̱cua̱nk nabal li acui̱mk, ta̱xocma̱nk lix oꞌotkil li acui̱mk rajlal chihab.
Ut saꞌ a̱cꞌabaꞌ la̱at, ta̱xocma̱nk chixjunil li acui̱mk aꞌin, at faraón. Ut aꞌan xocxo̱k a̱ban chiru li cuukub chihab aꞌin saꞌ li junju̱nk chi tenamit re nak ta̱cua̱nk xtzacae̱mk li cristian.
Ut li acui̱mk li ta̱xocma̱nk, aꞌan ta̱cꞌanjelak chiru li cuukub chihab nak yo̱k li cueꞌej. Chi joꞌcaꞌin incꞌaꞌ teꞌosokꞌ li tenamit li cuanqueb arin Egipto, chan laj José.
Laj José quiqꞌueheꞌ chi takla̱nc saꞌ xbe̱neb li cuanqueb EgiptoLaj faraón ut eb laj cꞌanjel chiru queꞌxcꞌul xchꞌo̱l li cꞌaꞌru queꞌyeheꞌ re xban laj José.
Laj faraón quixye reheb li nequeꞌcꞌanjelac chiru: —Ma̱ bar takatau junak cui̱nk joꞌ li jun aꞌin. Li cui̱nk aꞌin cuan lix musikꞌ li Ka̱cuaꞌ Dios riqꞌuin, chan laj faraón reheb.
Ut quixye re laj José: —Li Ka̱cuaꞌ Dios xcꞌutuc re cha̱cuu chixjunil li naꞌleb aꞌin. Xban aꞌan, ma̱ ani chic junak cuan xnaꞌleb cha̱cuu la̱at.
La̱at tattakla̱nk reheb li cuanqueb saꞌ cuochoch. Ut chixjunileb lin tenamit teꞌcana̱k rubel a̱takl. Caꞌaj cuiꞌ la̱in kꞌaxal nimak incuanquil cha̱cuu xban nak la̱in li rey, chan.
Laj faraón quixye cuiꞌchic re laj José: —Anakcuan la̱in xinkꞌaxtesi rubel a̱takl chixjunileb li tenamit arin Egipto, joꞌ eb ajcuiꞌ li cꞌaꞌak re ru cuan, chan.
Ut quirisi chi ruꞌuj rukꞌ lix matkꞌab li retalil lix cuanquil, ut quixqꞌue chi ruꞌuj rukꞌ laj José. Quixqꞌue lix cha̱bil akꞌ yi̱banbil riqꞌuin li cha̱bil tꞌicr lino, re nak laj José tixtikib rib chi chꞌinaꞌus. Ut quixqꞌue ajcuiꞌ chi xcux laj José jun lix cadena tzꞌakal oro.
Laj faraón quixqꞌue laj José chi beresi̱c saꞌ li xcab lix carre̱t ut quixye reheb chixjunileb li tenamit nak teꞌxcuikꞌib rib chiru. Ut chixjunileb li tenamit queꞌcana rubel xtakl laj José.
Ut laj faraón quixye re laj José: —La̱in laj faraón. Ma̱ jun naru tixba̱nu li cꞌaꞌak re ru cui la̱at incꞌaꞌ nacataklaheb aꞌan, chan.
Ut laj faraón quixqꞌue jun chic xcꞌabaꞌ laj José. Aj Zafnat-panea chic quiyeman re. Laj faraón quixqꞌue lix Asenat chokꞌ rixakil laj José. Lix Asenat aꞌan lix rabin laj Potifera. Laj Potifera, aꞌan aj cꞌamol be re tijoc reheb laj On li nequeꞌlokꞌonin re li sakꞌe. Ut laj José qui-oc chirulaꞌaninquil li junju̱nk chi cocꞌ tenamit li cuanqueb aran saꞌ li nimla tenamit Egipto.
Nak quirakeꞌ chi a̱tinac laj faraón, laj José qui-el chixsutinquil li tenamit Egipto re nak tixnau ru chixjunileb li tenamit. Laje̱b xcaꞌcꞌa̱l chihab (30) cuan re laj José nak qui-oc chi cꞌanjelac chiru laj faraón.
Chiru li cuukub chihab aꞌan cꞌajoꞌ nak quiu̱chin li acui̱mk.
Laj José quixtakla xxocbal li acui̱mk li qui-el chiru li cuukub chihab. Saꞌ li junju̱nk chi tenamit cuan li cꞌu̱leba̱l re li ru li acui̱mk.
Ma̱ caꞌchꞌin li trigo li quixxoc laj José. Lix qꞌuial joꞌ xqꞌuial li cocꞌ ru li samaib chire li palau. Xban nak ma̱ caꞌchꞌin xqꞌuial li trigo quixxoc, incꞌaꞌ chic quiru chi xbisbal.
Nak ma̱jiꞌ nacuulac xkꞌehil li cueꞌej, laj José quicuan cuib li ralal riqꞌuin lix Asenat, lix rabin laj Potifera laj cꞌamol be re tijoc saꞌ xya̱nkeb laj On.
Laj José quixqꞌue aj Manasés chok xcꞌabaꞌ li xbe̱n ralal. Ut quixye: —Li Dios xsachoc re saꞌ inchꞌo̱l chixjunil li raylal joꞌ ajcuiꞌ chixjunileb li cuanqueb saꞌ rochoch lin yucuaꞌ, chan.
Ut laj José quixqꞌue aj Efraín chokꞌ xcꞌabaꞌ li ralal jun chic. Ut quixye: —Li Ka̱cuaꞌ Dios xqꞌuehoc re li sahil echej cue saꞌ li tenamit aꞌin bar xincꞌul cuiꞌ li raylal, chan.
Quinumeꞌ li cuukub chihab nak quicuan nabal li tzacae̱mk saꞌ li tenamit Egipto.
Ut quiticla li cuukub chihab chi cueꞌej joꞌ quixye laj José junxilaj. Ut quicuan li cueꞌej saꞌ chixjunileb li tenamit li cuanqueb chi xjun sutam li tenamit Egipto. Caꞌaj cuiꞌ aran Egipto cꞌu̱lanbil li tzacae̱mk.
Nak qui-osoꞌ lix tzacae̱mkeb li tenamit aran Egipto, chixjunileb queꞌxtiquib xtzꞌa̱manquil lix tzacae̱mk riqꞌuin laj faraón. Ut laj faraón quixye reheb: —Ayukex riqꞌuin laj José ut te̱ba̱nu li cꞌaꞌru tixye e̱re, chan.
Nak laj José quiril nak kꞌaxal numtajenak li cueꞌej yalak bar, quixtakla xtebaleb li cꞌu̱leba̱l re li trigo. Ut queꞌxcꞌayi li trigo riqꞌuineb laj Egipto xban nak kꞌaxal numtajenak lix tzꞌocajiqueb.
Jalan jala̱nk xtenamiteb li queꞌcꞌulun Egipto chixlokꞌbal lix trigo riqꞌuin laj José xban nak yo̱ chi numta̱c li cueꞌej yalak bar.
Eb li ras laj José queꞌcuulac EgiptoNak laj Jacob quirabi resil nak cuan li trigo aran Egipto, quixye reheb li ralal: —La̱ex ma̱cꞌaꞌ yo̱quex chixba̱nunquil. ¿Cꞌaꞌut nak yal yo̱quex chixcaꞌyanquil e̱rib chi ribil e̱rib?
La̱in xcuabi resil nak aran Egipto cuan li trigo. Ayukex la̱ex ut te̱lokꞌ chak caꞌchꞌinak ke re nak incꞌaꞌ toca̱mk xban katzꞌocajic, chan laj Jacob.
Ut li laje̱b li ras laj José queꞌco̱eb chixlokꞌbal li trigo aran Egipto.
Abanan laj Jacob incꞌaꞌ quixtakla laj Benjamín chirixeb li ras xban nak cꞌajoꞌ lix cꞌaꞌux chirix. Cuan saꞌ xchꞌo̱l nak ma̱re cꞌaꞌru tixcꞌul saꞌ be nak yo̱keb chi xic.
Eb li ralal laj Jacob, li nayeman ajcuiꞌ aj Israel re, queꞌcuulac saꞌ xya̱nkeb li yo̱queb chi lokꞌoc trigo aran Egipto xban nak yo̱ ajcuiꞌ li cueꞌej saꞌ li tenamit Canaán.
Laj José, aꞌan li nataklan saꞌ li tenamit Egipto ut saꞌ rukꞌ aꞌan quicana xcꞌayinquil li trigo. Eb li ras laj José queꞌcuulac riqꞌuin ut queꞌxxulub rib saꞌ chꞌochꞌ chiru.
Nak laj José quirileb ru, aꞌan ticto quixnau ruheb nak aꞌaneb li ras, abanan quixba̱nu rib nak incꞌaꞌ naxnauheb ru. Kꞌetkꞌet caꞌchꞌin laj José nak quira̱tinaheb li ras. Quixpatzꞌ reheb: —¿Bar xexchal chak la̱ex? chan reheb. Eb aꞌan queꞌchakꞌoc ut queꞌxye re: —La̱o xochal Canaán. Xochal arin chixlokꞌbal caꞌchꞌinak li katzacae̱mk, chanqueb re.
Laj José quixnau ruheb li ras, abanan eb aꞌan incꞌaꞌ queꞌxqꞌue retal nak aꞌan laj José.
Ut quinak saꞌ xchꞌo̱l laj José chanru nak quimatqꞌuec chirixeb li ras. Quixye reheb: —La̱ex moco ya̱l ta nak chi lokꞌoc xexchal arin. La̱ex yal qꞌuehoc etal xexchal arin re nak te̱ril li cꞌaꞌru cuan arin, chan laj José.
Eb aꞌan queꞌxye re: —Chacuy taxak li kama̱c, at Ka̱cuaꞌ. La̱at nim la̱ cuanquil. Li cꞌaꞌru xochal xba̱nunquil arin yal xlokꞌbal caꞌchꞌinak li katrigo re ta̱cꞌanjelak chokꞌ re li katzacae̱mk.
La̱o kas kib. Junaj kayucuaꞌ. Saꞌ xya̱lal nococuan. La̱o ma̱cuaꞌo aj qꞌuehol etal, chanqueb re.
Laj José quixye cuiꞌchic reheb: —Moco ya̱l ta li nequeye. La̱ex xexchal chixqꞌuebal retal cꞌaꞌru cuan saꞌ li tenamit aꞌin, chan.
Eb aꞌan queꞌxye re: —La̱o cablajuho chikajunil. Ralalo jun chi cui̱nk aj Canaán. Li i̱tzꞌinbej xcana chak riqꞌuin li kayucuaꞌ. Ut li jun chic ma̱ ani chic saꞌ kaya̱nk, chanqueb re laj José.
Ut laj José quixye reheb: —Ya̱l ajcuiꞌ li xinye e̱re nak la̱ex aj qꞌuehol etal.
Chi joꞌcaꞌin ta̱tzꞌilma̱nk a̱tin che̱rix ma relic chi ya̱l li cꞌaꞌru yo̱quex chixyebal. Tinye e̱re saꞌ xcꞌabaꞌ laj faraón nak la̱ex incꞌaꞌ naru tex-e̱lk arin toj ta̱cha̱lk le̱ ri̱tzꞌin.
Xicak junak li cuan saꞌ e̱ya̱nk chixcꞌambal chak le̱ ri̱tzꞌin. Ut la̱ex texcana̱k arin saꞌ tzꞌalam. Chi joꞌcan tinnau ma relic chi ya̱l li cꞌaꞌru yo̱quex chixyebal cue. Cui incꞌaꞌ nequecꞌam chak le̱ ri̱tzꞌin, ta̱nauma̱nk saꞌ xcꞌabaꞌ laj faraón nak la̱ex aj qꞌuehol etal, chan.
Laj José quixtaklaheb chixjunileb saꞌ tzꞌalam re oxib cutan.
Saꞌ rox li cutan laj José quixye reheb: —La̱in ninqꞌue xcuanquil li Dios. Te̱ba̱nu li cꞌaꞌru tinye e̱re re nak texcolekꞌ.
Cui ya̱l nak saꞌ xya̱lal nequexcuan, cana̱k junak le̱ ras arin saꞌ tzꞌalam. Ut li bele̱b chic ta̱ru̱k teꞌxcꞌam li trigo saꞌ le̱ rochoch xban nak yo̱ ajcuiꞌ li cueꞌej aran.
Ut texsukꞌi̱k cuiꞌchic chak ut te̱cꞌam chak arin le̱ ri̱tzꞌin. Chi joꞌcan tinnau nak ya̱l li cꞌaꞌru xeye cue ut la̱ex texcolekꞌ che̱junilex. Cui incꞌaꞌ ya̱l, la̱ex texca̱mk, chan. Ut queꞌoc chixcꞌoxlanquil chanru teꞌxba̱nu.
Ut queꞌxye chi ribileb rib: —Relic chi ya̱l nak xoma̱cob riqꞌuin li cꞌaꞌru kaba̱nu chak junxil re laj José, li ki̱tzꞌin. La̱o quikil nak quirahoꞌ saꞌ xchꞌo̱l riqꞌuin li kaba̱nu re. La̱o incꞌaꞌ quikil xtokꞌoba̱l ru nak quixtzꞌa̱ma chiku nak takatokꞌoba ru. Xban aꞌan nak xchal li raylal aꞌin saꞌ kabe̱n, chanqueb chi ribileb rib.
Ut laj Rubén quixye reheb: —¿Ma incꞌaꞌ ta biꞌ quinye e̱re nak incꞌaꞌ te̱ba̱nu raylal re laj José li ki̱tzꞌin? Ut la̱ex incꞌaꞌ xex-abin chicuu. Ut anakcuan tento nak ta̱cua̱nk re̱kaj lix camic. Aꞌan na li cꞌaꞌru yo̱co chixtojbal anakcuan riqꞌuin li xkaba̱nu chak junxil, chan laj Rubén.
Eb aꞌan incꞌaꞌ queꞌxnau nak laj José yo̱ chixtaubal ru li ra̱tinoba̱leb xban nak cuan jun laj jalol a̱tin na-ochbenin re ut aꞌan najaloc re li a̱tin li naxye laj José.
Ut laj José quixcanabeb junpa̱t ut co̱ chi ya̱bac xjunes xban xsahil saꞌ xchꞌo̱l. Quisukꞌi ut quia̱tinac riqꞌuineb. Laj José quixchap laj Simeón ut quixbacꞌ li rukꞌ chiruheb li ras.
Ut quixtakla xbutꞌbal li trigo saꞌ eb lix coxtal. Ut saꞌ li junju̱nk chi coxtal quixkꞌajsi li tumin li queꞌxtoj cuiꞌ li trigo. Ut quixqꞌueheb ajcuiꞌ xtzacae̱mk re nak teꞌcuaꞌak saꞌ be. Joꞌcan quixba̱nu reheb.
Ut eb aꞌan quilajeꞌxbacꞌ li ju̱nk coxtal chi trigo chirixeb lix bu̱r, ut queꞌco̱eb.
Eb aꞌan queꞌoc chi hila̱nc saꞌ jun li muheba̱l bar teꞌxnumsi cuiꞌ li kꞌojyi̱n. Ut jun reheb qui-oc chixqꞌuebal xcua lix bu̱r. Nak quixhit lix coxtal, quisach xchꞌo̱l chirilbal nak cuan peꞌ li tumin chi saꞌ lix coxtal.
Ut aꞌan quixye reheb li ras: —Ilomak li cꞌaꞌru xintau saꞌ lin coxtal. Xeꞌxkꞌajsi chak xtzꞌak li trigo li xkatoj cuiꞌ. ¿Cꞌaꞌut nak xeꞌxba̱nu ke chi joꞌcaꞌin? chan. Ut queꞌsach xchꞌo̱leb. Nequeꞌsicsot nak queꞌxye: —¿Cꞌaꞌ xak ru nak xba̱nu ke li Dios chi joꞌcaꞌin? chanqueb.
Ut queꞌcuulac Canaán riqꞌuin lix yucuaꞌeb ut queꞌxserakꞌi re chixjunil li cꞌaꞌru queꞌxcꞌul.
Ut queꞌxye re: —Cꞌoxla, li cui̱nk nataklan saꞌ li tenamit Egipto kꞌaxal kꞌetkꞌet nak xora̱tina. Ut xye ke nak la̱o aj qꞌuehol etal.
La̱o xkaye re: “La̱o saꞌ xya̱lal nococuan. La̱o incꞌaꞌ cꞌaynako chi qꞌuehoc etal.”
Ut xkaye ajcuiꞌ re, “La̱o cablajuho chikajunilo. Jun ajcuiꞌ li kayucuaꞌ. Jun li ki̱tzꞌin ma̱ ani chic. Ut li i̱tzꞌinbej xcana chak saꞌ li tenamit Canaán riqꞌuin li kayucuaꞌ,” chanco re.
Tojoꞌnak li cui̱nk li nataklan saꞌ li tenamit Egipto quixye ke, “Re nak tinpa̱b ma relic na chi ya̱l nak la̱ex ti̱c le̱ chꞌo̱l, ta̱cana̱k junak e̱re arin. Ut li jun chꞌol chic teꞌxcꞌam lix trigo reheb le̱ rechꞌalal li ca̱mqueb re xban cueꞌej.
Ayukex ut cꞌamomak chak le̱ ri̱tzꞌin li xeye cue. Chi joꞌcan la̱in tinnau nak la̱ex ma̱cuaꞌex aj qꞌuehol etal. Ut tinnau nak la̱ex ti̱c e̱chꞌo̱l. Ut la̱in tinkꞌaxtesi e̱re le̱ ras ut naru texlokꞌok cuiꞌchic saꞌ li tenamit aꞌin,” chan. Joꞌcaꞌin xye ke, chanqueb re lix yucuaꞌeb.
Ut nak coxeꞌxte li junju̱nk chi coxtal quilajeꞌxtau li jun jo̱b chi tumin saꞌ eb lix coxtal. Ut nak queꞌril li tumin, cꞌajoꞌ nak queꞌxucuac, joꞌ ajcuiꞌ li yucuaꞌbej.
Ut laj Jacob quixye reheb: —Anakcuan cꞌajoꞌ yo̱quex chak chixba̱nunquil cue. Ma̱ ani chic li cualal laj José. Ut anakcuan incꞌaꞌ chic xsukꞌi chak laj Simeón. Ut toj te̱raj cuiꞌchic xmakꞌbal laj Benjamín chicuu. ¿Cꞌaꞌut nak chixjunil natꞌaneꞌ saꞌ inbe̱n? chan laj Jacob reheb.
Ut laj Rubén quixye re lix yucuaꞌ: —Kꞌaxtesi saꞌ cuukꞌ laj Benjamín. Matcꞌoxlac. La̱in tincꞌam cuiꞌchic chak a̱cuiqꞌuin. Cui incꞌaꞌ tincꞌam chak laj Benjamín ut tinkꞌaxtesi saꞌ a̱cuukꞌ, la̱at ta̱ru̱k ta̱camsi xcabichaleb li cualal, chan laj Rubén.
Ut laj Jacob quixye re: —Ma̱ jaruj ta̱ru̱k ta̱xic li cualal che̱rix. Cꞌoxla, camenak li cualal jun ut caꞌaj chic laj Benjamín nacuan cuiqꞌuin. Ma̱re cꞌaꞌru tixcꞌul saꞌ be nak yo̱kex chi xic. Cui ma̱ anihak chic laj Benjamín cuiqꞌuin, la̱in naru nincam xban xrahil saꞌ inchꞌo̱l xban nak la̱in ti̱xin chic. La̱ex cuan e̱ma̱c cui nincam xban xrahil inchꞌo̱l, chan laj Jacob.
Laj Benjamín quicꞌameꞌ saꞌ li naꞌajej EgiptoNak yo̱ chi numta̱c li cueꞌej saꞌ li tenamit Canaán,
qui-osoꞌ li trigo li queꞌxlokꞌ chak Egipto. Laj Jacob quixye reheb: —Anakcuan ma̱cꞌaꞌ chic li katzacae̱mk. Ayukex cuiꞌchic chixlokꞌbal caꞌchꞌinak ke, chan laj Jacob.
Abanan laj Judá quichakꞌoc ut quixye re lix yucuaꞌ: —Li cui̱nk li nataklan saꞌ li tenamit Egipto, saꞌ joskꞌil quixye ke, “Te̱cꞌam chak le̱ ri̱tzꞌin che̱rix. Cui incꞌaꞌ nequecꞌam chak aꞌan, ma̱ jaruj tincꞌut bayak cuib che̱ru”, chan ke.
Cui la̱at ta̱takla laj Benjamín chikix, la̱o toxic cuiꞌchic chixlokꞌbal li katzacae̱mk.
Cui incꞌaꞌ nacatakla aꞌan, incꞌaꞌ toxic xban nak li cui̱nk quixye ke, “Incꞌaꞌ chic te̱ril cuu cui incꞌaꞌ nequecꞌam chak le̱ ri̱tzꞌin che̱rix,” chan ke, chan laj Judá.
Ut laj Israel quixye reheb: —¿Cꞌaꞌut nak xeba̱nu cue chi joꞌcaꞌin? ¿Cꞌaꞌut nak xeye re nak cuan jun chic le̱ ri̱tzꞌin? Incꞌaꞌ raj xeye chak re chi joꞌcan, chan.
Ut eb aꞌan queꞌchakꞌoc ut queꞌxye re: —Li cui̱nk aꞌan quixpatzꞌ ke chanru nak cuanco. Quipatzꞌoc chikix joꞌ ajcuiꞌ chirixeb li kechꞌalal. Quixpatzꞌ ke ma toj yoꞌyo li kayucuaꞌ ut ma cuan chic junak ki̱tzꞌin. ¿Cꞌaꞌ ta cuiꞌ chic ru takaye re nak xpatzꞌ ke chi joꞌcan? Xban aꞌan nak xkaye lix ya̱lal re. ¿Chan ta biꞌ ru nak takanau nak tixye ke nak takacꞌam li ki̱tzꞌin riqꞌuin? chanqueb.
Ut laj Judá quixye re lix yucuaꞌ: —Ba̱nu usilal, takla laj Benjamín chicuix. Chi joꞌcan naru toxic chi lokꞌoc. Ut incꞌaꞌ tatca̱mk la̱at, joꞌ ajcuiꞌ la̱o ut eb li kacocꞌal xban li cueꞌej.
Matcꞌoxlac. Saꞌ inbe̱n la̱in ta̱cana̱k rilbal la̱ cualal. Cui incꞌaꞌ tincꞌam cuiꞌchic chak, ta̱cana̱k saꞌ inbe̱n chi junaj cua nak la̱in cuan inma̱c cui cꞌaꞌru tixcꞌul.
Cꞌoxla, cui ta incꞌaꞌ yo̱co chi ba̱yc arin, ac raj xosukꞌi chak caꞌ sutak chixlokꞌbal li katzacae̱mk, chan laj Judá.
Ut laj Israel, li yucuaꞌbej, quixye reheb: —¿Cꞌaꞌru xjalenquil? Cui tento nak ta̱xic, xicak. Nak la̱ex texxic, te̱cꞌam caꞌchꞌinak li sahil echej li kꞌaxal cha̱bil na-el saꞌ li chꞌochꞌ arin ut te̱si aꞌin re li cui̱nk li nataklan aran. Aꞌaneb aꞌin li ma̱tan li te̱si re. Te̱cꞌam caꞌchꞌinak li bálsamo, caꞌchꞌinak li xyaꞌal cab, li sununquil ban, aromas ut mirra. Ut te̱cꞌam ajcuiꞌ li nueces ut li almendras.
Te̱cꞌam xtzꞌak li trigo li xecꞌam chak xbe̱n cua. Ut te̱cꞌam ajcuiꞌ lix tzꞌak li te̱lokꞌ chak. Te̱kꞌajsi li tumin li quichal saꞌ le̱ coxtal. Ma̱re yal xeꞌsach nak yo̱queb chixbutꞌbal li trigo.
Cꞌamomak le̱ ri̱tzꞌin ut texxic riqꞌuin li cui̱nk li nataklan aran Egipto.
Li Ka̱cuaꞌ Dios taxak ta̱tenkꞌa̱nk e̱re nak texcuulak riqꞌuin li cui̱nk aꞌan. Chisahokꞌ taxak saꞌ xchꞌo̱l nak texril ut tixba̱nu usilal e̱re. Ta̱rachꞌab taxak laj Simeón ut chicha̱lk taxak laj Benjamín nak texsukꞌi̱k chak la̱ex. Cui nequeꞌsach chicuu chi xcabichaleb li cualal, ¿cꞌaꞌ ta chic ru ta̱ru̱k tinba̱nu la̱in? chan laj Jacob.
Eb li ralal laj Jacob queꞌxcꞌam li ma̱tan. Ut queꞌxcꞌam ajcuiꞌ li tumin re nak teꞌxtoj li trigo li ac queꞌxcꞌam chak junxil joꞌ ajcuiꞌ li toj teꞌxlokꞌ chak anakcuan. Ut queꞌxcꞌam laj Benjamín chirixeb nak queꞌco̱eb Egipto ut queꞌcuulac riqꞌuin laj José.
Ut laj José quiril nak cuan laj Benjamín rochbeneb. Ticto quixye re li xbe̱n mo̱s saꞌ rochoch: —Anakcuan ta̱cuocsiheb li cui̱nk aꞌin saꞌ cuochoch. Ta̱camsi junak li cuacax ut ta̱cꞌu̱b chi cha̱bil xban nak anakcuan teꞌcuaꞌak cuiqꞌuin li cui̱nk aꞌin saꞌ cuaꞌleb, chan.
Lix mo̱s quixba̱nu li cꞌaꞌru quiyeheꞌ re ut quirocsiheb li ralal laj Jacob saꞌ rochoch laj José.
Nak eb aꞌan queꞌrabi nak teꞌocsi̱k saꞌ rochoch laj José, cꞌajoꞌ nak queꞌxucuac. Queꞌxye chi ribileb rib: —Joꞌcan nak xocꞌameꞌ chak arin anakcuan xban nak xkatau li tumin saꞌ li kacoxtal. Anakcuan aꞌan tixye nak la̱o aj e̱lkꞌ. Riqꞌuin aꞌan ma̱re tixmakꞌ chiku li kabu̱r ut la̱o tocana̱k chokꞌ rahobtesinbil mo̱s, chanqueb.
Nak queꞌcuulac saꞌ li oqueba̱l re li rochoch laj José, queꞌxye re li xbe̱n mo̱s:
—At Ka̱cuaꞌ, chacuy kama̱c. Ba̱nu usilal, abi li cꞌaꞌru takaye a̱cue. Nak xocꞌulun chi lokꞌoc xbe̱n sut, xkatoj li trigo.
Nak xohilan saꞌ be, bar xkanumsi cuiꞌ li kꞌojyi̱n, xkateheb li kacoxtal. Ut xkaqꞌue retal nak cuan li tumin xtzꞌak li trigo chi saꞌ li kacoxtal. Joꞌcan nak la̱o xkacꞌam cuiꞌchic chak xcaꞌ sut lix tzꞌak li trigo li xkacꞌam junxil.
Ut xkacꞌam ajcuiꞌ chak xtzꞌak li takalokꞌ anakcuan. La̱o ti̱c incꞌaꞌ nakanau ani ta cuiꞌ xqꞌuehoc re li tumin saꞌ li kacoxtal, chanqueb re.
Li mo̱s quixye reheb: —Ocankex ut mexcꞌoxlac chic chirix aꞌan. La̱in quincꞌuluc re xtzꞌak li trigo che̱ru. Le̱ Dios li naxlokꞌoni le̱ yucuaꞌ, aꞌan xqꞌuehoc re jun le̱ ra̱bal li xetau saꞌ le̱ coxtal, chan li mo̱s. Tojoꞌnak quixcꞌam chak laj Simeón riqꞌuineb.
Ut li mo̱s quirocsiheb li cui̱nk saꞌ rochoch laj José, ut quixtakla xcꞌambal li haꞌ re nak teꞌxchꞌaj li rokeb. Ut queꞌqꞌueheꞌ ajcuiꞌ xcuaheb lix bu̱r.
Ut eb li ralal laj Jacob quilajeꞌxyi̱beb chi chꞌinaꞌus li ma̱tan li teꞌxsi re laj José xban nak ac queꞌrabi resil nak teꞌcuaꞌak riqꞌuin cuaꞌleb.
Nak laj José quicuulac saꞌ rochoch, eb aꞌan queꞌxcuikꞌib rib chiru ut queꞌxqꞌue re lix ma̱tan li queꞌxcꞌam.
Ut laj José quixye reheb: —¿Chan xeril?— Ut quixye ajcuiꞌ reheb: —Xeye nak ti̱x chi us le̱ yucuaꞌ. ¿Chanru aꞌan? ¿Ma toj yoꞌyo? ¿Ma cau? chan.
Eb aꞌan queꞌchakꞌoc ut queꞌxye re laj José: —Bantiox xak a̱cue, Ka̱cuaꞌ, nak nacatpatzꞌoc chikix. Cau li kayucuaꞌ, chanqueb ut queꞌxcuikꞌib rib chiru laj José re nak teꞌxqꞌue xcuanquil.
Laj José quiril laj Benjamín, ut quijulticoꞌ re nak junajeb lix naꞌ riqꞌuin, ut quixye reheb: —¿Ma aꞌin le̱ ri̱tzꞌin li xeye cue junxil? chan reheb. Tojoꞌnak laj José quixye re laj Benjamín: —Li Dios taxak chi-osobtesi̱nk a̱cue, chan re.
Joꞌcan nak qui-el laj José saꞌ xya̱nkeb xban nak oc raj re chi ya̱bac. Cꞌajoꞌ nak quisahoꞌ saꞌ xchꞌo̱l chi rilbal laj Benjamín xban nak kꞌaxal naxra li ri̱tzꞌin. Laj José co̱ jun pacꞌal xjunes ut aran quiya̱bac.
Nak quirakeꞌ chak chi ya̱bac, laj José quixchꞌaj li ru ut coxtauheb cuiꞌchic li ras. Quixcuy lix ya̱b re nak incꞌaꞌ chic ta̱ya̱bak chiruheb li ras. Ut quixtakla xqꞌuebal li me̱x re nak teꞌcuaꞌak ut quixye reheb lix mo̱s: —Cꞌamomak chak li katzacae̱mk, chan.
Laj José jalan li me̱x quixqꞌueheb cuiꞌ chi cuaꞌac eb li ras. Ut jalan ajcuiꞌ quixqꞌueheb cuiꞌ chi cuaꞌac eb laj Egipto. Ut laj José quicuaꞌac xjunes. Quixba̱nu chi joꞌcaꞌin xban nak ma̱ jaruj teꞌxjunaji rib laj Egipto chi cuaꞌac rochbeneb laj hebreo.
Laj José quixcꞌojobeb saꞌ me̱x eb li ras aꞌ yal chanru lix chihabeb li junju̱nk. Xbe̱n cua quixcꞌojob li xbe̱n asbej. Toj saꞌ rosoꞌjic quixcꞌojob li i̱tzꞌinbej. Chi tzoltzo quixcꞌojobeb. Ut eb li ras queꞌxye saꞌ xchꞌo̱leb: —¿Chanru nak li cui̱nk aꞌin naxnau li kachihab chi kaju̱nkal? chanqueb. Eb li ras queꞌsach xchꞌo̱l chi rilbal li cꞌaꞌru yo̱ laj José.
Ut laj José quixtakla xjeqꞌuinquileb lix tibel xcua. Ut o̱b sut tzꞌakal xqꞌuial li quixcꞌul laj Benjamín chiruheb li ras. Ut chixjunileb queꞌcuaꞌac ut queꞌucꞌac ut quisahoꞌ saꞌ xchꞌo̱leb rochben laj José.
Lix secꞌ laj José queꞌxqꞌue saꞌ lix coxtal laj BenjamínLaj José quixye re li xbe̱n mo̱s: —Ayu la̱at ut ta̱butꞌeb lix coxtal riqꞌuin li trigo li joꞌ qꞌuial na teꞌxcuy xcꞌambal. Ut ta̱qꞌue cuiꞌchic lix tumineb li junju̱nk saꞌ eb lix coxtal.
Ut saꞌ lix coxtal li i̱tzꞌinbej, ta̱qꞌue lin secꞌ plata. Ut ta̱qꞌue ajcuiꞌ lix tumin chi saꞌ lix coxtal, chan. Ut li mo̱s quixba̱nu joꞌ quiyeheꞌ re xban laj José.
Joꞌ cuulajak chic nak quisake̱u, eb li ralal laj Jacob queꞌchakꞌrabi̱c xban laj José ut queꞌco̱eb ut queꞌxcꞌameb ajcuiꞌ lix bu̱r.
Tojoꞌ junpa̱t reliqueb li cui̱nk saꞌ li tenamit, nak laj José quixbok li xbe̱n mo̱s ut quixye re: —Ayu saꞌ junpa̱t ut toxa̱tauheb li cui̱nk li xeꞌco̱eb. Ut ta̱ye reheb, “¡Cꞌoxlahomak chi us! Usilal xba̱nu e̱re lin patrón. ¿Cꞌaꞌut nak xeba̱nu li incꞌaꞌ us re? ¿Cꞌaꞌut nak xerelkꞌa chak lix secꞌ plata lin patrón?” chaꞌkat reheb.
Ut ta̱ye ajcuiꞌ reheb, “Li secꞌ aꞌan, aꞌan li na-ucꞌac cuiꞌ lin patrón ut aꞌan nacꞌanjelac ajcuiꞌ re kꞌehi̱nc. Cꞌajoꞌ xyibal ru li xeba̱nu chak re lin patrón,” chaꞌkat reheb, chan laj José re lix mo̱s.
Li mo̱s co̱ saꞌ junpa̱t ut coxtauheb li cui̱nk saꞌ be. Ut quixye reheb chixjunil li quiyeheꞌ re xban laj José.
Eb aꞌan queꞌchakꞌoc ut queꞌxye re: —At Ka̱cuaꞌ, ¿cꞌaꞌut nak yo̱cat chixyebal ke chi joꞌcan? La̱o moco cꞌaynako ta chixba̱nunquil li naꞌleb aꞌan.
¿Ma incꞌaꞌ ta biꞌ xaqꞌue retal nak xkakꞌaxtesi li tumin li xkatau saꞌ eb li kacoxtal Canaán? Aꞌan retalil nak la̱o ma̱ jaruj to-oc chirelkꞌanquil xbiomal la̱ patrón. Usta plata, usta oro, la̱o incꞌaꞌ naru to-oc xchꞌeꞌbal li cꞌaꞌru re.
Sicꞌ saꞌ li kacoxtal. Ma ho̱n tana nacatau saꞌ eb li kacoxtal. Cui ta̱tau li secꞌ saꞌ xcoxtal junak, aꞌan ta̱camsi̱k. Ut chikajunilo tocana̱k chokꞌ xmo̱s la̱ patrón, chanqueb re.
Li mo̱s quixye reheb: —Chi-uxma̱nk taxak joꞌ xaye. Li ani tintau cuiꞌ li secꞌ, aꞌan ta̱cana̱k chokꞌ aj cꞌanjel chicuu chi junaj cua. Ut la̱ex li jun chꞌol chic naru texxic xban nak ma̱cuaꞌ la̱ex cuan e̱re, chan.
Ut eb aꞌan saꞌ junpa̱t quilajeꞌxcubsi chiru chꞌochꞌ lix coxtal ut li junju̱nk queꞌxhit lix coxtaleb.
Ut li mo̱s quixtiquib xsicꞌbal xbe̱n cua saꞌ xcoxtal li asbej. Toj saꞌ rosoꞌjic quixsicꞌ saꞌ xcoxtal li i̱tzꞌinbej. Ut aran quixtau li secꞌ saꞌ xcoxtal laj Benjamín.
Ut eb li ras laj Benjamín queꞌxkꞌichi li rakꞌeb chirixeb xban xrahileb saꞌ xchꞌo̱l. Quilajeꞌxbacꞌ lix coxtal saꞌ junpa̱t. Quilajeꞌxtaksi cuiꞌchic chirixeb lix bu̱r. Ut queꞌsukꞌi cuiꞌchic saꞌ li tenamit li cuan cuiꞌ laj José.
Ut laj Judá rochbeneb li ri̱tzꞌin ut li ras queꞌcuulac saꞌ li rochoch laj José. Eb aꞌan queꞌxcuikꞌib rib saꞌ chꞌochꞌ chiru laj José.
Laj José quixye reheb aꞌan: —¿Cꞌaꞌut nak xeba̱nu chi joꞌcaꞌin? ¿Ma incꞌaꞌ ta biꞌ nequenau nak junak cui̱nk joꞌ la̱in kꞌaxal nim incuanquil, ninnau ajcuiꞌ kꞌehi̱nc? chan laj José reheb.
Laj Judá quixye re: —At Ka̱cuaꞌ, ¿cꞌaꞌru raj takaye a̱cue? ¿Cꞌaꞌ chic ru naru takaye a̱cue re nak ta̱pa̱b nak ma̱cuaꞌ la̱o xoba̱nun re aꞌin? Li Ka̱cuaꞌ Dios nanaꞌoc re cꞌaꞌru kama̱c. Ma̱cuaꞌ caꞌaj cuiꞌ riqꞌuin li xeꞌxtau cuiꞌ la̱ secꞌ ta̱cana̱k chokꞌ a̱mo̱s. Tocana̱k ajcuiꞌ la̱o chikajunilo, chanqueb.
Laj José quichakꞌoc ut quixye reheb: —Incꞌaꞌ nacuaj chi joꞌcan. Caꞌaj cuiꞌ li xtauman cuiꞌ lin secꞌ, aꞌan ta̱cana̱k chokꞌ inmo̱s. Ut la̱ex naru texsukꞌi̱k saꞌ xya̱lal riqꞌuin le̱ yucuaꞌ, chan.
Laj Judá quixtzꞌa̱ma nak ta̱tokꞌoba̱k ru laj BenjamínUt laj Judá quinachꞌoc chiru laj José ut quixye re: —Chacuy inma̱c. La̱in tincuaj xyebal cuib oxibak a̱tin a̱cue. Usan cui incꞌaꞌ ta̱cha̱lk a̱joskꞌil saꞌ kabe̱n xban nak la̱at kꞌaxal nim a̱cuanquil. La̱at joꞌ laj faraón, chan.
Laj Judá quixye ajcuiꞌ re: —At Ka̱cuaꞌ, la̱at xatpatzꞌoc ke ut xaye ke “¿Ma cuan le̱ yucuaꞌ? ¿Ma cuan le̱ ri̱tzꞌin?” chancat ke.
Ut la̱o xkaye a̱cue, “Cuan li kayucuaꞌ. Ti̱x chic. Ut cuan ajcuiꞌ li ki̱tzꞌin toj sa̱j. Saꞌ xti̱xilal li kayucuaꞌ quiyoꞌla li ki̱tzꞌin aꞌan. Caꞌaj chic a jun aꞌin cuan reheb li cuib chi ralal li junaj xnaꞌeb. Li ras li ki̱tzꞌin aꞌin ac camenak. Ut li kayucuaꞌ cꞌajoꞌ nak naxra laj Benjamín.”
La̱at xaye ke, “Cꞌamomak chak le̱ ri̱tzꞌin arin. Tincuaj tincuil ru,” chancat ke.
Ut la̱o xkaye a̱cue, “Li ki̱tzꞌin incꞌaꞌ naru tixcanab chak li kayucuaꞌ xjunes. Cui tixcanab chak li kayucuaꞌ xjunes naru nacam li kayucuaꞌ xban xrahil saꞌ xchꞌo̱l.”
Abanan la̱at xaye ke, “Cui incꞌaꞌ nequecꞌam chak le̱ ri̱tzꞌin, incꞌaꞌ chic te̱ril cuu,” chancat ke.
Nak xocuulac riqꞌuin li kayucuaꞌ, ticto xkaye re cꞌaꞌru xaye ke la̱at.
Ut li kayucuaꞌ xye ke, “Ayukex cuiꞌchic chixlokꞌbal caꞌchꞌinak katzacae̱mk,” chan.
Ut la̱o xkaye re, “Incꞌaꞌ naru toxic cui incꞌaꞌ naxic li ki̱tzꞌin chikix. Incꞌaꞌ toxcꞌul li cui̱nk cui incꞌaꞌ nakacꞌam li ki̱tzꞌin chikix,” chanco re.
Ut li kayucuaꞌ xye ke, “La̱ex nequenau nak cuib ajcuiꞌ li cualal quicuan riqꞌuin li cuixakil camenak.
Li jun quintakla chi takl ut incꞌaꞌ chic quisukꞌi chak. La̱in ninye nak junak joskꞌ aj xul xcamsin re. Incꞌaꞌ chic xcuil bayak ru.
Cui te̱cꞌam che̱rix laj Benjamín, ma̱re cꞌaꞌru tixcꞌul saꞌ be. La̱ex cuan e̱re cui nincam xban xrahil saꞌ inchꞌo̱l,” chan ke li kayucuaꞌ.
Ut anakcuan cui tinsukꞌi̱k riqꞌuin lin yucuaꞌ ut ma̱ anihak chic laj Benjamín chicuix, la̱in ninye nak ta̱ca̱mk xban nak junes laj Benjamín naxcꞌoxla.
Ut la̱o cuan ke cui nacam li kayucuaꞌ xban xrahil saꞌ xchꞌo̱l.
La̱in xinye re lin yucuaꞌ, “Cui incꞌaꞌ ta̱sukꞌi̱k chak la̱ cualal chicuix, ta̱cana̱k chi junaj cua li raylal saꞌ inbe̱n,” chanquin re.
Xban aꞌan tintzꞌa̱ma cha̱cuu nak tina̱cꞌul chokꞌ re̱kaj laj Benjamín. La̱in tincana̱k chokꞌ a̱mo̱s. Ba̱nu usilal, canab chi xic laj Benjamín chirixeb li ras.
¿Chan ta cuiꞌ ru nak tinxic riqꞌuin lin yucuaꞌ cui ma̱ anihak chic laj Benjamín chicuix? Incꞌaꞌ tincuy rilbal inyucuaꞌ nak cꞌajoꞌak xrahil saꞌ xchꞌo̱l, chan laj Judá re laj José.
Laj José quixye reheb li ras nak aꞌan li ri̱tzꞌinebLaj José incꞌaꞌ chic quixcuy xya̱b. Xban nak oc raj re chi ya̱bac chiruheb laj Egipto, joꞌcan nak quixye reheb: —Elenkex cuan junpa̱tak chirix cab, chan reheb. Ut ma̱ ani chic quicana riqꞌuin laj José. Caꞌaj chic eb li ras queꞌcana riqꞌuin. Ut laj José quixchꞌolob xya̱lal chiruheb nak aꞌan li i̱tzꞌinbej li quicꞌayi̱c junxil.
Ut laj José quiya̱bac chi cau xban xsahil saꞌ xchꞌo̱l. Eb laj Egipto queꞌrabi nak yo̱ chi ya̱bac. Queꞌrabi ajcuiꞌ li cuanqueb saꞌ rochoch laj faraón.
Laj José quixye reheb li ras: —La̱in laj José. ¿Ma toj yoꞌyo lin yucuaꞌ? chan reheb. Ut eb li ras incꞌaꞌ queꞌru chi chakꞌoc. Queꞌsach xnaꞌleb riqꞌuin li cꞌaꞌru quixye laj José.
Laj José quixye reheb: —Ba̱nu usilal, jilonkex chak cuiqꞌuin.— Ut eb aꞌan queꞌjiloc riqꞌuin. Laj José quixye reheb: —La̱in laj José le̱ ri̱tzꞌin, li xine̱cꞌayi chak riqꞌuineb laj Egipto.
Anakcuan mirahoꞌ chic saꞌ e̱chꞌo̱l ut mexcꞌoxlac chic chirix nak la̱ex xexcꞌayin chak cue. Li Ka̱cuaꞌ Dios xtaklan chak cue arin re nak la̱ex texcolekꞌ inban.
Ac xnumeꞌ cuib chihab li cueꞌej ut toj o̱b chihab chic ta̱cua̱nk. Ut incꞌaꞌ ta̱uxma̱nk li a̱uc, ut ma̱cꞌaꞌak ajcuiꞌ li acui̱mk.
Li Ka̱cuaꞌ Dios quinixtakla chak arin chi cꞌamoc be che̱ru re nak texcolekꞌ. Chi joꞌcaꞌin ta̱cua̱nk nabaleb li kalal kacꞌajol. Li Ka̱cuaꞌ Dios quinixtakla arin re nak eb laj Israel incꞌaꞌ teꞌosokꞌ saꞌ ruchichꞌochꞌ.
Ma̱cuaꞌ e̱ban la̱ex nak cuanquin arin. Aꞌ li Ka̱cuaꞌ Dios quinixtakla chak arin re nak tinchꞌolob xya̱lal chiru laj faraón. Li Ka̱cuaꞌ Dios quixkꞌaxtesi saꞌ cuukꞌ chixjunil li cꞌaꞌru cuan re laj faraón ut la̱in ajcuiꞌ quin-oc chokꞌ acuabej re chixjunil li tenamit Egipto.
Anakcuan te̱se̱ba e̱rib ut texxic cuan cuiꞌ chak lin yucuaꞌ ut te̱ye re chi joꞌcaꞌin. “Aꞌin ra̱tin laj José la̱ cualal xtakla chak chikix,” chaꞌkex re. “Li Dios quinixqꞌue chokꞌ x-acuabej li tenamit Egipto. Texcha̱lk chi junpa̱t cuiqꞌuin. Me̱bay chak e̱rib barak chic.
Texinqꞌue chi cua̱nc saꞌ li tenamit Gosén re nak nachꞌak caꞌchꞌinak kaya̱nk cuochbenex. Te̱cꞌameb chak le̱ ralal e̱cꞌajol. Te̱cꞌameb chak le̱ queto̱mk joꞌ eb ajcuiꞌ chixjunil li cꞌaꞌak re ru cuan e̱re.
Toj o̱b chihab chic ta̱cua̱nk li cueꞌej. Nak ac cuanquex chic arin, talajinqꞌue e̱tzacae̱mk. Ma̱ ani e̱re ta̱ca̱mk xban cueꞌej.” Chixjunil aꞌin te̱ye re lin yucuaꞌ.
Anakcuan qꞌuehomak retal la̱ex chixjunilex, joꞌ ajcuiꞌ la̱at, at Benjamín. La̱in tzꞌakal li yo̱quin chi a̱tinac saꞌ le̱ ra̱tinoba̱l.
Yehomak re li kayucuaꞌ chanru lin cuanquil saꞌ li tenamit aꞌin. Serakꞌihomak re chixjunil li xeril arin cuiqꞌuin. Se̱bahomak e̱rib ut te̱cꞌam chak li kayucuaꞌ arin, chan.
Ut laj José quixkꞌalu xcux laj Benjamín ut queꞌya̱bac chi xcabichaleb.
Ut quilajrutzꞌeb ru li ras chixju̱nkaleb ut quiya̱bac xban xsahil saꞌ xchꞌo̱l. Ut eb aꞌan queꞌa̱tinac chi ribileb rib.
Ut quicuulac resil saꞌ rochoch laj faraón nak queꞌcuulac eb li ras laj José riqꞌuin. Ut laj faraón, joꞌ eb ajcuiꞌ laj cꞌanjel chiru, queꞌsahoꞌ saꞌ xchꞌo̱l chirabinquil aꞌin.
Laj faraón quixye re laj José: —Ye reheb la̱ cuas xqꞌuehakeb li ri̱k chirixeb lix bu̱r ut teꞌxic saꞌ junpa̱t saꞌ li tenamit Canaán.
Cꞌamomak chak le̱ yucuaꞌ ut te̱cꞌam ajcuiꞌ chak chixjunil le̱ jun cablal li cuan aran. Tinqꞌue ajcuiꞌ e̱re chixjunil li cꞌaꞌak re ru li cha̱bil li cuan arin saꞌ li tenamit Egipto. Ut ta̱cua̱nk ajcuiꞌ chi tzꞌakal le̱ cha̱bil tzacae̱mk arin.
Joꞌcaꞌin ta̱ba̱numa̱nk. Joꞌ yo̱quin chixyebal a̱cue, joꞌcan ajcuiꞌ ta̱ye reheb la̱ cuas. “Cꞌamomakeb li carre̱t li cuanqueb arin Egipto. Ut aꞌan ta̱cꞌanjelak che̱ru re xcꞌambal chak le̱ yucuaꞌ joꞌ eb ajcuiꞌ le̱ rixakil ut le̱ cocꞌal.
Mexcꞌoxlac chirix li cꞌaꞌak re ru li nacꞌanjelac che̱ru saꞌ le̱ rochoch, xban nak arin cuan nabal li cꞌaꞌak re ru li cha̱bil chokꞌ e̱re,” chan laj faraón re laj José.
Ut eb li ralal laj Israel queꞌxba̱nu joꞌ quiyeheꞌ reheb. Laj José quixkꞌaxtesiheb li carre̱t reheb li ras joꞌ quiyeheꞌ re xban laj faraón. Ut quixqꞌueheb ajcuiꞌ nabal lix tzacae̱mk re nak teꞌcuaꞌak saꞌ be.
Ut quixqꞌueheb rakꞌ li junju̱nk. Laj Benjamín quixqꞌue o̱b sumal li rakꞌ ut quixqꞌue ajcuiꞌ oxib ciento lix tumin plata.
Ut quixtakla laje̱b li bu̱r re lix yucuaꞌ. Eb li bu̱r aꞌin teꞌi̱ka̱nk re li cꞌaꞌak re ru li kꞌaxal cha̱bil li cuan Egipto. Quixtakla ajcuiꞌ laje̱b li ixki bu̱r li teꞌi̱ka̱nk re li trigo ut lix tzacae̱mk lix yucuaꞌ re nak teꞌcuaꞌak saꞌ be nak yo̱keb chi cha̱lc.
Ut laj José quixye reheb aꞌan: —Cheba̱nu usilal, me̱pleti e̱rib nak yo̱kex chi xic, chan reheb. Ut laj José quixchakꞌrabiheb ut queꞌco̱eb.
Eb aꞌan queꞌel saꞌ li tenamit Egipto ut queꞌcuulac toj saꞌ li tenamit Canaán li cuan cuiꞌ chak laj Jacob lix yucuaꞌeb.
Ut queꞌxye re laj Jacob: —¡Cꞌoxla! Yoꞌyo laj José. Aꞌan li nataklan saꞌ xbe̱n chixjunil li tenamit Egipto, chanqueb. Ut quisach xchꞌo̱l laj Jacob nak quirabi resil li ralal. Laj Jacob incꞌaꞌ quixpa̱b li cꞌaꞌru quiyeheꞌ re xbaneb li ralal.
Eb li ralal queꞌxserakꞌi re chixjunil li cꞌaꞌru quitakla̱c xyebal re xban laj José. Nak quirileb li carre̱t li quixtakla, tojoꞌnak quicꞌulun xchꞌo̱l laj Jacob.
Ut laj Jacob quixye: —Tzꞌakal riqꞌuin aꞌin. La̱in ninpa̱b nak relic chi ya̱l toj yoꞌyo li cualal laj José. La̱in tinxic aran ut tincuil ru nak toj yoꞌyo̱quin la̱in, chan laj Jacob.
Laj Jacob quicuulac saꞌ li naꞌajej EgiptoLaj Israel qui-el aran ut quixcꞌam chirix chixjunil li cꞌaꞌru cuan re. Ut nak quicuulac saꞌ li naꞌajej Beerseba, quimayejac chiru li Ka̱cuaꞌ Dios, li naxlokꞌoni laj Isaac lix yucuaꞌ.
Chiru li kꞌojyi̱n aꞌan, li Ka̱cuaꞌ Dios quia̱tinac riqꞌuin laj Israel chanchan saꞌ xmatcꞌ. —Jacob, chan li Dios re. —Cueꞌquin, cuanquin arin, chan nak quichakꞌoc laj Israel.
Ut li Ka̱cuaꞌ Dios quixye re: —La̱in li Ka̱cuaꞌ Dios li quixlokꞌoni la̱ yucuaꞌ. Matxucuac chi xic Egipto xban nak aran tinqꞌueheb chi qꞌuia̱nc nabaleb la̱ cualal a̱cꞌajol. Riqꞌuineb aꞌan ta̱cua̱nk jun nimla tenamit.
Anakcuan la̱in tin-ochbeni̱nk a̱cue toj saꞌ li tenamit Egipto. Relic chi ya̱l la̱in texinsukꞌisi cuiꞌchic arin saꞌ li naꞌajej Canaán. Ut laj José, aꞌan li ta̱tzꞌapok re la̱ cuu nak tatca̱mk, chan li Dios re laj Israel.
Ut laj Jacob qui-el saꞌ li naꞌajej Beerseba. Eb li ralal queꞌcꞌamoc re aꞌan saꞌ li carre̱t li taklanbileb chak xban laj faraón. Ut queꞌxcꞌam ajcuiꞌ li rixakil eb aꞌan joꞌ eb ajcuiꞌ lix cocꞌaleb.
Queꞌxcꞌameb lix queto̱mk chirixeb, joꞌ ajcuiꞌ chixjunil li cꞌaꞌru reheb li quitam saꞌ li tenamit Canaán. Ut quicuulac Egipto laj Jacob rochbeneb chixjunileb li ralal xcꞌajol.
Laj Jacob quixcꞌam chirix chixjunileb li ralal, joꞌ ajcuiꞌ lix rabin. Ut quixcꞌameb ajcuiꞌ chixjunileb li ri. Chixjunileb li ralal xcꞌajol queꞌco̱eb Egipto chirix laj Jacob.
Arin tzꞌi̱banbil xcꞌabaꞌeb li ralal xcꞌajol laj Israel li queꞌco̱eb Egipto. Laj Rubén, aꞌan li xbe̱n ralal laj Jacob.
Aꞌaneb aꞌin lix cꞌabaꞌeb li ralal laj Rubén: laj Hanoc, laj Falú, laj Hezrón, ut laj Carmi.
Ut aꞌaneb aꞌin lix cꞌabaꞌeb li ralal laj Simeón: laj Jemuel, laj Jamín, laj Ohad, laj Jaquín, laj Zohar, ut quicuan jun chic li ralal riqꞌuin jun ixk aj cananea. Aj Saúl xcꞌabaꞌ li ralal li quicuan.
Aꞌaneb aꞌin lix cꞌabaꞌeb li ralal laj Leví: laj Gersón, laj Coat, ut laj Merari.
Ut aꞌaneb aꞌin lix cꞌabaꞌeb li ralal laj Judá: laj Er, laj Onán, laj Sela, laj Fares ut laj Zara. Laj Er ut laj Onán queꞌcam saꞌ li tenamit Canaán. Ut laj Fares quicuan cuib li ralal laj Hezrón ut laj Hamul xcꞌabaꞌeb.
Aꞌaneb aꞌin lix cꞌabaꞌeb li ralal laj Isacar: laj Tola, laj Fúa, laj Job ut laj Simrón.
Ut aꞌaneb aꞌin lix cꞌabaꞌeb li ralal laj Zabulón: laj Sered, laj Elón ut laj Jahleel.
Joꞌcaꞌin xcꞌabaꞌeb li oxlaju xcaꞌcꞌa̱l (33) chi ralal xcꞌajol laj Jacob li quicuan riqꞌuin lix Lea saꞌ li naꞌajej Padan-aram. Ut quicuan ajcuiꞌ jun xrabin riqꞌuin lix Lea, xDina xcꞌabaꞌ.
Aꞌaneb aꞌin lix cꞌabaꞌeb li ralal laj Gad: laj Zifión, laj Hagui, laj Ezbón, laj Suni, laj Eri, laj Arodi ut laj Areli.
Ut aꞌaneb aꞌin lix cꞌabaꞌeb li ralal laj Aser: laj Imna, laj Isúa, laj Isúi, laj Bería, ut lix Sera li ri̱tzꞌineb. Laj Bería quicuan cuib li ralal, laj Heber ut laj Malquiel xcꞌabaꞌeb.
Joꞌcaꞌin xcꞌabaꞌeb li cuaklaju (16) chi ralal xcꞌajol laj Jacob li quicuan riqꞌuin lix Zilpa. Lix Zilpa, aꞌan li mo̱s li quiqꞌueheꞌ re lix Lea xban laj Labán.
Laj Jacob quicuan cuib li ralal riqꞌuin lix Raquel. Laj José ut laj Benjamín xcꞌabaꞌeb.
Laj Manasés ut laj Efraín xcꞌabaꞌeb li cuib chi ralal laj José, li queꞌcuan riqꞌuin lix Asenat aran Egipto. Lix Asenat, aꞌan xrabin laj Potifera, li quicꞌamoc be chi tijoc chiruheb laj On.
Aꞌaneb aꞌin lix cꞌabaꞌeb li ralal laj Benjamín: laj Bela, laj Bequer, laj Asbel, laj Gera, laj Naamán, laj Ehi, laj Ros, laj Mupim, laj Hupim ut laj Ard.
Joꞌcaꞌin xcꞌabaꞌeb li ralal xcꞌajol laj Jacob li quicuan riqꞌuin lix Raquel. Aꞌan ca̱lajuheb (14) chixjunileb.
Li ralal laj Dan, aꞌan aj Husim xcꞌabaꞌ.
Aꞌaneb aꞌin lix cꞌabaꞌeb li ralal laj Neftalí: laj Jahzeel, laj Guni, laj Jezer ut laj Silem.
Joꞌcaꞌin xcꞌabaꞌeb li cuukub chi ralal xcꞌajol laj Jacob li quicuan riqꞌuin lix Bilha. Lix Bilha, aꞌan li mo̱s li quiqꞌueheꞌ re lix Raquel xban laj Labán.
Cuakib xca̱cꞌa̱l (66) li ralal xcꞌajol laj Jacob li junaj xquiqꞌueleb li queꞌco̱eb Egipto. Ma̱cꞌaꞌ eb saꞌ ajl li rixakil eb li ralal.
Cuib li ralal laj José queꞌyoꞌla aran Egipto. Laje̱b xca̱cꞌa̱l (70) chixjunileb li ralal xcꞌajol laj Jacob li cuanqueb Egipto.
Ut laj Jacob quixtakla laj Judá chi cꞌamoc be re teꞌxcꞌul laj José saꞌ li tenamit Gosén. Ut queꞌco̱eb.
Ut laj José quixyi̱b lix carre̱t ut qui-oc chi saꞌ. Tojoꞌnak co̱ Gosén chixcꞌulbal lix yucuaꞌ. Nak queꞌxcꞌul rib, laj José ticto quixkꞌalu xcux lix yucuaꞌ ut ma̱ caꞌchꞌin nak quiya̱bac nak queꞌxkꞌalu ribeb.
Ut laj Jacob quixye re laj José: —Anakcuan naru tinca̱mk xban nak xcuil la̱ cuu ut ya̱l nak toj yoꞌyo̱cat, chan.
Ut laj José quixye reheb li ras joꞌ eb ajcuiꞌ reheb li rechꞌalal, —La̱in xic cue chixyebal re laj faraón nak ac xeꞌcꞌulun lin yucuaꞌ cuiqꞌuin joꞌ eb li cuas ut joꞌ eb ajcuiꞌ li kechꞌalal li xeꞌcuan chak Canaán.
Tinye ajcuiꞌ re nak eb li cuas, aꞌaneb aj ilol queto̱mk xban nak li cꞌanjel aꞌan cꞌaynakeb chixba̱nunquil saꞌ li tenamit Canaán. Queꞌxcꞌameb chak chirixeb lix queto̱mk, joꞌ eb ajcuiꞌ lix carner, joꞌ eb ajcuiꞌ lix cuacax, ut chixjunil li cꞌaꞌru cuan reheb, chaꞌkin re laj faraón.
Ut nak laj faraón ta̱a̱tinak e̱riqꞌuin ut tixpatzꞌ e̱re cꞌaꞌru li cꞌanjel li nequeba̱nu la̱ex,
la̱ex texchakꞌok ut te̱ye re, “Chalen chak saꞌ kacaꞌchꞌinal, la̱o aj ilol queto̱mk. Aꞌan ajcuiꞌ li cꞌanjel li queꞌxba̱nu chak eb li kaxeꞌto̱nil yucuaꞌ.” Joꞌcaꞌin te̱ye re laj faraón re nak aꞌan tixye e̱re nak texcana̱k saꞌ li naꞌajej Gosén. Kꞌaxal us raj texcana̱k arin Gosén xban nak eb laj Egipto xicꞌ nequeꞌrileb li nequeꞌqꞌuiresin queto̱mk, chan laj José reheb li ras.
Laj José quicuulac riqꞌuin laj faraón ut quixye re: —Lin yucuaꞌ joꞌ eb ajcuiꞌ li cuas xeꞌel chak saꞌ li tenamit Canaán ut anakcuan ac xeꞌcꞌulun saꞌ li naꞌajej Gosén. Xeꞌxcꞌam chak chixjunileb lix queto̱mk chirix joꞌ eb ajcuiꞌ chixjunil li cꞌaꞌru cuan reheb, chan.
Laj José quixcꞌam o̱b li ras chirix ut quixcꞌuteb aꞌan chiru laj faraón re nak tixnauheb ru.
Ut laj faraón quixye reheb: —¿Cꞌaꞌru cꞌanjelil nequeba̱nu la̱ex? chan. Eb aꞌan queꞌchakꞌoc ut queꞌxye re: —Chacuy taxak kama̱c, at Ka̱cuaꞌ. Anakcuan cuanco cha̱cuu re nak la̱at tattakla̱nk ke. La̱o aj ilol xul joꞌ eb ajcuiꞌ li kaxeꞌto̱nil yucuaꞌ najter, chanqueb.
Ut queꞌxye ajcuiꞌ re laj faraón: —La̱o xochal chi cua̱nc arin xban nak kꞌaxal numtajenak li cueꞌej aran Canaán, yal ta li pachꞌayaꞌ cuan re teꞌxcuaꞌ li kaqueto̱mk. Aꞌan aj e nak xochal chixtzꞌa̱manquil a̱cue nak ta̱ba̱nu usilal, toa̱canab chi cua̱nc saꞌ li naꞌajej Gosén, chanqueb re.
Ut laj faraón quixye re laj José: —La̱ yucuaꞌ joꞌ eb ajcuiꞌ la̱ cuas xeꞌcꞌulun a̱cuiqꞌuin.
Chixjunil li tenamit Egipto cuan rubel a̱takl. Canabeb chi cua̱nc saꞌ li naꞌajej Gosén xban nak li chꞌochꞌ aꞌan cha̱bil. Ut cui cuanqueb saꞌ e̱ya̱nk li nequeꞌxba̱nu chi us li cꞌanjel, ta̱kꞌaxtesiheb inqueto̱mk reheb re nak eb aꞌan teꞌilok re, chan laj faraón.
Ut laj José quirocsi lix yucuaꞌ re nak laj faraón tixnau ru. Ut laj Jacob quixtzꞌa̱ma re li Ka̱cuaꞌ Dios nak aꞌan taxak chi-osobtesi̱nk re laj faraón.
Laj faraón quixpatzꞌ re laj Jacob: —¿Jarub chihab cuan a̱cue la̱at, Jacob? chan re.
Ut laj Jacob quichakꞌoc ut quixye re: —Jun ciento riqꞌuin laje̱b xcaꞌcꞌa̱l (130) chihab cuoquic chi be̱c la̱in yalak bar. Nabal li raylal xincꞌul saꞌ ruchichꞌochꞌ ut incꞌaꞌ qꞌui lin chihab joꞌ lix chihab eb lin xeꞌto̱nil yucuaꞌ nak queꞌcuan saꞌ ruchichꞌochꞌ, chan laj Jacob.
Ut laj Jacob quixtzꞌa̱ma re li Ka̱cuaꞌ Dios nak aꞌan taxak ta̱osobtesi̱nk re laj faraón. Nak quixchakꞌrabi laj faraón, laj Jacob qui-el riqꞌuin.
Ut laj José quixqꞌue chi cua̱nc lix yucuaꞌ saꞌ li tenamit Egipto, joꞌeb ajcuiꞌ li ras. Ut quixsi reheb li chꞌochꞌ li kꞌaxal cha̱bil. Li naꞌajej aꞌan Gosén xcꞌabaꞌ. Ramesés ajcuiꞌ nayeman re li naꞌajej aꞌan. Laj José quixba̱nu joꞌ quiyeheꞌ re xban laj faraón.
Laj José quixqꞌue xtzacae̱mk lix yucuaꞌ joꞌ eb ajcuiꞌ li ras ut chixjunileb li rechꞌalal. Aꞌ yal chanru xqꞌuialeb lix cocꞌal, chixjunileb queꞌxcꞌul lix tzacae̱mk.
Nak quinumta li cueꞌej aran, ma̱cꞌaꞌ chic li tzacae̱mk saꞌ li tenamit Egipto. Ca̱mqueb re chixjunileb laj Egipto joꞌeb ajcuiꞌ laj Canaán xban lix tzꞌocajiqueb.
Chixjunil li tumin li queꞌxtoj cuiꞌ lix trigo eb laj cananeo joꞌ eb ajcuiꞌ laj Egipto, laj José quicꞌuluc re ut quixkꞌaxtesi saꞌ rochoch laj faraón.
Chi joꞌcaꞌin quilaj chixjunil li tumin re li tenamit Canaán joꞌ ajcuiꞌ Egipto. Ut chixjunileb laj Egipto queꞌcuulac riqꞌuin laj José ut queꞌxye re: —Ba̱nu usilal, qꞌue bayak katzacae̱mk. ¿Ma naru ta biꞌ toa̱qꞌue chi ca̱mc xban nak anakcuan xlaj li katumin? chanqueb re laj José.
Laj José quixye reheb: —La̱ex cuan le̱ cuacax. Naru te̱qꞌue le̱ cuacax chokꞌ xtzꞌak le̱ trigo, chan.
Eb aꞌan queꞌxkꞌaxtesi lix cuacaxeb riqꞌuin laj José, joꞌ eb ajcuiꞌ lix cacua̱y, lix carner ut eb lix bu̱r. Ut laj José quixqꞌue lix tzacae̱mk aꞌ yal chanru xqꞌuialeb lix cuacaxeb. Ut chiru li chihab aꞌan queꞌxqꞌueheb lix cuacax chokꞌ xtzꞌakeb lix trigo.
Nak quirakeꞌ li chihab aꞌan, queꞌcuulac cuiꞌchic riqꞌuin laj José ut queꞌxye re: —La̱o incꞌaꞌ takamuk cha̱cuu nak quilaj li katumin joꞌ eb ajcuiꞌ li cuacax. Chixjunil li cꞌaꞌru ke la̱o, ac xkakꞌaxtesi re laj faraón. Caꞌaj chic la̱o cuanco ut li kachꞌochꞌ.
Incꞌaꞌ naru toca̱mk cha̱cuu. Anakcuan la̱o ma̱cꞌaꞌ chic naru nakaba̱nu. Us raj toa̱lokꞌ chokꞌ a̱mo̱s ut ta̱lokꞌ ajcuiꞌ li kachꞌochꞌ re nak ta̱qꞌue bayak katzacae̱mk. Ut la̱o joꞌ ajcuiꞌ li kachꞌochꞌ aꞌan ta̱cꞌanjelak chokꞌ xtzꞌak li katzacae̱mk. La̱o chic xlokꞌbil mo̱s laj faraón. Ut ta̱qꞌue li kiyaj re nak toa̱uk ut riqꞌuin aꞌan incꞌaꞌ toca̱mk, chanqueb re laj José.
Ut laj José quixlokꞌ chixjunil lix chꞌochꞌeb chokꞌ re laj faraón. Eb laj Egipto quilajeꞌxcꞌayi chixjunil lix chꞌochꞌeb xban nak numtajenak li cueꞌej. Ut chixjunil li chꞌochꞌ quicana chokꞌ re laj faraón.
Chixjunileb li cuanqueb saꞌ cꞌaleba̱l queꞌchal saꞌ li nimla tenamit re teꞌcꞌanjelak.
Caꞌaj cuiꞌ eb laj cꞌamol be re tijoc incꞌaꞌ queꞌxcꞌayi lix chꞌochꞌeb riqꞌuin laj José xban nak junelic nequeꞌqꞌueheꞌ xtzacae̱mk xban laj faraón. Joꞌcan nak incꞌaꞌ queꞌxcꞌayi lix chꞌochꞌ.
Tojoꞌnak laj José quixye reheb li tenamit: —Anakcuan la̱ex lokꞌbilex che̱junilex inban chokꞌ re laj faraón joꞌ eb ajcuiꞌ le̱ chꞌochꞌ. Cueꞌ le̱ riyaj ut ayukex chi a̱uc.
Nak te̱sicꞌ ru le̱ racui̱mk, te̱qꞌue li roꞌ jachal re laj faraón. Ut li ca̱hib jachal chic ta̱cana̱k chokꞌ e̱re. Aꞌan ta̱cꞌanjelak che̱ru chokꞌ re e̱riyaj nak tex-a̱uk saꞌ li chihab jun. Ut ta̱cꞌanjelak ajcuiꞌ chokꞌ xtzacae̱mk le̱ ralal e̱cꞌajol joꞌ ajcuiꞌ chixjunileb li cuanqueb saꞌ le̱ rochoch, chan laj José.
Eb aꞌan queꞌchakꞌoc ut queꞌxye re: —La̱o xocoleꞌ a̱ban. Chixcꞌul taxak a̱chꞌo̱l la̱at nak la̱o to-oc chokꞌ xmo̱s laj faraón, chanqueb.
Tojoꞌnak laj José quixqꞌue jun li chakꞌrab saꞌ li tenamit Egipto re nak laj faraón junelic tixcꞌul li roꞌ jachal li acui̱mk li ta̱e̱lk aran. Caꞌaj chic laj cꞌamol be re tijoc incꞌaꞌ queꞌxqꞌue li roꞌ jachal li racui̱mk xban nak eb lix chꞌochꞌ moco lokꞌbil ta xban laj faraón. Toj chalen anakcuan cuan li chakꞌrab aꞌan.
Ut eb laj Israel queꞌcana aran Egipto saꞌ li naꞌajej Gosén. Ut queꞌtam li cꞌaꞌru reheb aꞌan. Ut queꞌqꞌuian ajcuiꞌ eb li ralal xcꞌajol.
Cuuklaju chihab tzꞌakal quicuan laj Jacob saꞌ li tenamit Egipto. Jun ciento riqꞌuin cuukub roxcꞌa̱l (147) chihab quixba̱nu laj Jacob saꞌ ruchichꞌochꞌ.
Nak yo̱ chi cuulac xkꞌehil lix camic, laj Israel quixbok laj José riqꞌuin ut quixye re: —Anakcuan la̱in tincuaj ta̱ba̱nu junak usilal cue. Qꞌue la̱ cuukꞌ rubel cuaꞌ joꞌ cꞌaynakeb chixba̱nunquil li katenamit nak nequeꞌxba̱nu li juramento. Tintzꞌa̱ma cha̱cuu nak incꞌaꞌ tina̱muk arin Egipto.
Nak tinca̱mk, tine̱risi Egipto ut tine̱cꞌam aran Canaán ut tine̱muk chixcꞌatk li naꞌajej li queꞌmukeꞌ cuiꞌ lin yucuaꞌ camenak joꞌ ajcuiꞌ lin yucuaꞌchin, chan laj Jacob. Ut laj José quixye re: —Us. Matcꞌoxlac. Tinba̱nu li cꞌaꞌru yo̱cat chixyebal cue, chan.
Ut lix yucuaꞌ quixye re: —Ye cue ma relic chi ya̱l nak ta̱ba̱nu chi joꞌcan, chan. Ut laj José quixye re: —Relic chi ya̱l tinye a̱cue nak la̱in tinba̱nu chi joꞌcan, chan. Ut laj Jacob quix-anab rib chiru xjolom lix chꞌa̱t ut quixlokꞌoni li Ka̱cuaꞌ Dios.
Laj Jacob quirosobtesi laj Efraín ut laj ManasésMokon chic coxeꞌxye re laj José: —Anakcuan xniman xyajel la̱ yucuaꞌ, chanqueb re. Ut laj José quixcꞌameb chirix xcabichaleb li ralal, laj Manasés ut laj Efraín. Ut queꞌco̱eb chirilbal laj Jacob.
Nak laj Jacob quirabi resil nak quicuulac laj José chirilbal, quixpuersi rib chi cꞌojla̱c chiru lix chꞌa̱t.
Ut laj Jacob quia̱tinac riqꞌuin laj José ut quixye re: —Li Ka̱cuaꞌ Dios li kꞌaxal nim xcuanquil, quicuulac cuiqꞌuin saꞌ li naꞌajej Luz, li cuan Canaán. Ut aran li Ka̱cuaꞌ Dios quinrosobtesi.
Ut quixye cue: —La̱in tinqꞌueheb chi qꞌuia̱nc la̱ cualal a̱cꞌajol. Ut riqꞌuineb la̱ cualal a̱cꞌajol ta̱nima̱nk ru junak li nimla tenamit. Li chꞌochꞌ aꞌin tinyechiꞌi a̱cue chi junaj cua la̱at ut reheb ajcuiꞌ la̱ cualal a̱cꞌajol, chan cue li Ka̱cuaꞌ Dios.
Ut li cuib la̱ cualal li queꞌyoꞌla arin Egipto nak ma̱jiꞌ nincꞌulun arin a̱cuiqꞌuin, tzꞌakal cualaleb ajcuiꞌ nak nequeꞌcuil. Joꞌcan nak laj Efraín ut laj Manasés teꞌcua̱nk chokꞌ cue joꞌ nak cuanqueb laj Simeón ut laj Rubén.
Ut eb li jun chꞌol chic la̱ cualal li teꞌyoꞌla̱k, aꞌaneb a̱cue. Saꞌ xcꞌabaꞌeb li cuib li raseb teꞌtzꞌako̱nk riqꞌuin li cꞌaꞌru teꞌre̱chani eb aꞌan.
Nak quin-el saꞌ li tenamit Padan-aram, yo̱co chi xic saꞌ xbehil Canaán nak quicam lix Raquel la̱ naꞌ chicuu saꞌ be. Caꞌchꞌin chic ma̱ nococuulac saꞌ li naꞌajej Efrata nak quincꞌul li raylal aꞌan. Ut aran quinmuk li cuixakil. Belén nayeman ajcuiꞌ re li naꞌajej Efrata, chan.
Ut laj Israel quirileb li ralal laj José ut quixpatzꞌ re: —¿Aniheb aꞌin li cuanqueb arin? chan.
Laj José quichakꞌoc ut quixye re lix yucuaꞌ: —Li Ka̱cuaꞌ Dios x-osobtesin cue ut aꞌaneb li cualal li queꞌyoꞌla arin Egipto, chan. Ut laj Jacob quixye re, —Ba̱nu usilal, jilosiheb chak chincꞌatk ut la̱in tintzꞌa̱ma chiru li Ka̱cuaꞌ Dios nak ta̱rosobtesiheb, chan laj Israel.
Quichokoꞌ saꞌ li ru laj Israel xban lix ti̱xilal ut incꞌaꞌ chic sa na-iloc. Laj José quixjilosiheb li ralal chixcꞌatk lix yucuaꞌchin. Ut laj Jacob quixkꞌaluheb ut quirutzꞌeb ru.
Laj Jacob quixye re laj José: —La̱in cuan saꞌ inchꞌo̱l nak incꞌaꞌ chic tincuil a̱cuu. Abanan li Ka̱cuaꞌ Dios xba̱nu usilal cue. Xcuil a̱cuu la̱at ut xcuil ajcuiꞌ ruheb la̱ cualal, chan laj Jacob.
Ut laj José quirisiheb lix cocꞌal chixbe̱n li ruch raꞌ lix yucuaꞌchin, ut quixcuikꞌib rib aꞌan chiru lix yucuaꞌ.
Nak quixakli, laj José quixchap li cuib chi ralal. Quixchap laj Efraín riqꞌuin lix nim ukꞌ ut quixchap laj Manasés riqꞌuin lix tzꞌe. Ut nak quixjilosiheb riqꞌuin laj Israel, laj Manasés quicana saꞌ xnim ukꞌ laj Israel, ut laj Efraín quicana saꞌ lix tzꞌe.
Ut laj Israel quixjalpaki li rukꞌ re nak lix nim ukꞌ tixqꞌue saꞌ xjolom laj Efraín li i̱tzꞌinbej, ut lix tzꞌe ukꞌ tixqꞌue saꞌ xjolom laj Manasés li asbej.
Ut laj Israel quirosobtesi laj José nak quixye re chi joꞌcaꞌin:—Li Ka̱cuaꞌ Dios li x-osobtesin chak reheb lin yucuaꞌ laj Abraham, joꞌ eb ajcuiꞌ laj Isaac, aꞌan ajcuiꞌ li Ka̱cuaꞌ Dios li yo̱ chi iloc chak cue chalen anakcuan;
Ut aꞌ taxak lix ángel li Dios li na-iloc cue junelic, aꞌan taxak chi-osobtesi̱nk reheb li al aꞌin. Ut cheꞌta̱mk taxak eb li ralal xcꞌajol saꞌ incꞌabaꞌ la̱in joꞌ ajcuiꞌ saꞌ xcꞌabaꞌeb lin xeꞌto̱nil yucuaꞌ laj Abraham ut laj Isaac. Ut chi joꞌcan ta̱nima̱nk ru jun nimla tenamit saꞌ ruchichꞌochꞌ xbaneb, chan.
Ut laj José quiril nak lix yucuaꞌ quixqꞌue lix nim ukꞌ saꞌ xjolom laj Efraín li i̱tzꞌinbej. Incꞌaꞌ quicuulac chiru. Laj José ticto quixjal li rukꞌ lix yucuaꞌ ut quixqꞌue lix nim ukꞌ saꞌ xbe̱n xjolom laj Manasés.
Laj José quixye re lix yucuaꞌ: —Incꞌaꞌ, at inyucuaꞌ, ma̱ba̱nu chi joꞌcan xban nak laj Manasés, aꞌan li asbej. Qꞌue ban la̱ nim ukꞌ saꞌ xbe̱n xjolom aꞌan, chan laj José.
Abanan laj Israel incꞌaꞌ quixcꞌul xchꞌo̱l xba̱nunquil chi joꞌcan ut quixye, —La̱in ninnau nak aꞌan li asbej, at cualal. Ta̱nima̱nk lix cuanquil aꞌan. Abanan li i̱tzꞌinbej kꞌaxal cuiꞌchic numtajenak lix cuanquil chiru li asbej. Kꞌaxal nabaleb li ralal xcꞌajol li teꞌcua̱nk, chan laj Israel.
Ut saꞌ li cutan aꞌan laj Israel quixtzꞌa̱ma chiru li Dios nak aꞌan taxak chi-osobtesi̱nk reheb li cuib chi al. Ut laj Israel quixye ajcuiꞌ reheb, —Nak junak li kalal kacꞌajol tixtzꞌa̱ma chiru li Dios nak aꞌan ta̱osobtesi̱nk re junak chic, joꞌcaꞌin tixye, “Li Ka̱cuaꞌ Dios taxak ta̱osobtesi̱nk a̱cue joꞌ nak queꞌosobtesi̱c laj Efraín ut laj Manasés xban li Ka̱cuaꞌ Dios,” chan laj Israel reheb. Ut chi joꞌcaꞌin laj Israel quixnimobresi xcuanquil laj Efraín chiru laj Manasés.
Ut laj Israel quixye re laj José: —Anakcuan ca̱mc cue la̱in. Li Ka̱cuaꞌ Dios taxak chicua̱nk e̱riqꞌuin, ex cualal incꞌajol. Ut aꞌan taxak chisukꞌisi̱nk e̱re saꞌ lix tenamiteb li kaxeꞌto̱nil yucuaꞌ.
La̱in numtajenak xqꞌuial li cꞌaꞌak re ru li xinqꞌue a̱cue chiruheb la̱ cuas. Anakcuan tinkꞌaxtesi a̱cue li naꞌajej Siquem li xincue̱chani nak xinpletic riqꞌuineb laj amorreo, chan laj Jacob re laj José.
Laj Jacob quixserakꞌi reheb li ralal cꞌaꞌru ta̱cha̱lk saꞌ xbe̱nebUt laj Jacob quixbokeb li ralal ut quixye reheb: —Jilonkex chak che̱junilex. Chi joꞌcan la̱in tinchꞌolob che̱ru cꞌaꞌru ta̱cha̱lk saꞌ e̱be̱n chiruheb li chihab ta̱cha̱lk.
Chꞌutubomak e̱rib ut te̱rabi li cua̱tin, ex cualal. Te̱rabi li cꞌaꞌru tinye e̱re. La̱in laj Israel, le̱ yucuaꞌ.
La̱at, Rubén, la̱at li tzꞌakal asbej saꞌ xya̱nkeb li cualal. Xban aꞌin la̱at li xcacuub lin metzꞌe̱u. La̱at raj laj cꞌamol be chiruheb la̱ cui̱tzꞌin. Nim raj ajcuiꞌ a̱cuanquilal chiruheb aꞌan.
La̱at chanchanat li jun cuokox chi haꞌ. Incꞌaꞌ nacacuy a̱cuib. Xban nak xatma̱cob riqꞌuin li ixk cuan cuiqꞌuin, incꞌaꞌ chic ta̱cua̱nk la̱ cuanquilal saꞌ xbe̱neb la̱ cui̱tzꞌin.
La̱ex, Simeón ut Leví, e̱ri̱tzꞌin e̱rib. Le̱ chꞌi̱chꞌ xcꞌanjelac che̱ru re camsi̱nc.
Mixjunaji taxak rib li cua̱m riqꞌuin li camsi̱nc li queba̱nu chak la̱ex nak numtajenak e̱joskꞌil. Joꞌcan nak xecamsiheb li cui̱nk ut quilajeꞌxyoqꞌui ajcuiꞌ li richꞌ mul li rokeb li bo̱yx re nak incꞌaꞌ chic teꞌxcuy be̱c.
Tzꞌekta̱nanbilakex taxak xban le̱ joskꞌil. Kꞌaxal numtajenak le̱ joskꞌil. Li Ka̱cuaꞌ Dios ta̱jeqꞌui̱nk reheb le̱ ralal e̱cꞌajol saꞌ xya̱nkeb chixjunileb li cualal incꞌajol.
La̱at, Judá, eb la̱ cuas ut eb la̱ cui̱tzꞌin tateꞌxqꞌue saꞌ xnakꞌ ruheb. Ta̱cua̱nk ajcuiꞌ a̱cuanquilal saꞌ xbe̱neb li xicꞌ nequeꞌiloc a̱cue. Eb la̱ cuas ut eb la̱ cui̱tzꞌin teꞌxqꞌue a̱cuanquil.
La̱at, Judá, la̱at joꞌ ral jun li cakcoj li cau rib chiru chixjunileb li xul. Joꞌcan nak nacatinjuntakꞌe̱ta riqꞌuin li cakcoj xban nak cau a̱cuib. Li cakcoj naxchap li xul ut naxtiu ut natakeꞌ saꞌ li tzu̱l, ut aran nabuchla chak ut ma̱ ani naru nachꞌeꞌoc re.
La̱at, Judá, ma̱ ani ta̱ru̱k ta̱isi̱nk re saꞌ la̱ cuukꞌ li xukꞌ li retalil la̱ cuanquil joꞌ ajcuiꞌ saꞌ rukꞌeb la̱ cualal a̱cꞌajol. Ma̱ ani ta̱isi̱nk re le̱ cuanquilal toj tol-e̱lk laj e̱chal re li xukꞌ, li jun li yechiꞌinbil chak xban li Dios. Ut aꞌan chic ta̱pa̱ba̱k xbaneb chixjunileb li cuanqueb saꞌ ruchichꞌochꞌ.
La̱at, Judá, kꞌaxal cuiꞌchic ta̱nabalokꞌ la̱ biomal la̱at, joꞌ ajcuiꞌ reheb la̱ cualal a̱cꞌajol. Xban aꞌan naru te̱bacꞌ le̱ bu̱r saꞌ junak xto̱nal li quiꞌil kꞌe̱n uvas xcꞌabaꞌ. Te̱bacꞌ ajcuiꞌ li ral le̱ bu̱r saꞌ lix to̱nal li uvas li kꞌaxal cha̱bil. Xban nak numtajenak le̱ biomal, naru te̱puchꞌ le̱ tꞌicr saꞌ li vino ut naru te̱puchꞌ le̱ rakꞌ saꞌ xyaꞌal li uvas.
La̱at, Judá, lix nakꞌ e̱ru chanchan rilbal xcakil li vino. Ut li ruch e̱re sak sak chanchan xsakil li leche. Aꞌin ninye a̱cue xban nak sa textzaca̱nk riqꞌuin li cꞌaꞌak re ru li ta̱e̱lk saꞌ le̱ chꞌochꞌ.
Ut la̱at, at Zabulón, la̱at joꞌ eb ajcuiꞌ la̱ cualal a̱cꞌajol texcua̱nk nachꞌ chire li palau. Telajeꞌhila̱nk eb li ni̱nki jucub chire li palau li cua̱nkex cuiꞌ la̱ex. Li naꞌajej li texcua̱nk cuiꞌ, aꞌan cuan saꞌ xjayal li tenamit Sidón.
La̱at, Isacar, nacatinjuntakꞌe̱ta riqꞌuin jun li bu̱r li kꞌaxal cau rib li nabuchla saꞌ xnaꞌajeb li queto̱mk.
Li bu̱r nacuulac chiru li hila̱nc ut naxsicꞌ li cha̱bil naꞌajej re ta̱hila̱nk cuiꞌ. Abanan naxqꞌue rib re nak ta̱ri̱ka li cꞌaꞌak re ru chꞌaꞌaj ri̱kanquil. Joꞌcan ajcuiꞌ la̱at, usta ta̱cua̱nk la̱ cha̱bil naꞌaj, la̱at joꞌ eb ajcuiꞌ la̱ cualal a̱cꞌajol te̱qꞌue e̱rib chi trabajic chi cau joꞌ eb li lokꞌbil mo̱s.
La̱at, Dan, la̱at tatrakok a̱tin saꞌ xbe̱neb la̱ cualal a̱cꞌajol ut tatcꞌamok be chiruheb saꞌ xya̱nkeb laj Israel.
La̱at, Dan, nacatinjuntakꞌe̱ta riqꞌuin jun li cꞌantiꞌ li naxmuk rib saꞌ be. Li cꞌantiꞌ aꞌan naxtiu li rok li cacua̱y re nak li cristian li cuan chirix ta̱tꞌanekꞌ saꞌ chꞌochꞌ. Ninye chi joꞌcan a̱cue xban nak incꞌaꞌ qꞌuiheb la̱ cualal a̱cꞌajol teꞌcua̱nk. Abanan la̱ex te̱sicꞌ chanru nak te̱col e̱rib chiruheb li xicꞌ nequeꞌiloc e̱re joꞌ nak naxcol rib li cꞌantiꞌ.
Ut laj Jacob quixye re li Ka̱cuaꞌ Dios: —At inDios, la̱in yo̱quin cha̱cuoybeninquil nak tatcha̱lk chincolbal, chan re li Dios.
Ut laj Jacob quixye re laj Gad: —La̱at, Gad, joꞌ eb ajcuiꞌ la̱ cualal a̱cꞌajol, cauhak e̱rib chiruheb li xicꞌ teꞌilok e̱re ut incꞌaꞌ textꞌanekꞌ saꞌ rukꞌ eb aꞌan nak tateꞌxpleti. Aban la̱at chic ta̱pleti eb aꞌan.
La̱at, Aser, joꞌ eb ajcuiꞌ la̱ cualal a̱cꞌajol, texcua̱nk saꞌ li cha̱bil chꞌochꞌ. Ut kꞌaxal cuiꞌchic nabalak le̱ tzacae̱mk. Ut la̱ex texqꞌuehok xtzacae̱mk li acuabej.
La̱at, Neftalí, tatinjuntakꞌe̱ta riqꞌuin junak li quej li yal nara̱lina rib saꞌ qꞌuicheꞌ. Ut cꞌajoꞌ xchakꞌal ru li cocꞌ ral. La̱at, joꞌ eb ajcuiꞌ la̱ cualal a̱cꞌajol, ma̱cꞌaꞌak ra xi̱cꞌ saꞌ e̱ya̱nk.
Ut la̱at, José, tatinjuntakꞌe̱ta riqꞌuin jun to̱n li cheꞌ li nacuan chire li haꞌ. Ut li rukꞌ nequelajeꞌxchapi rib saꞌ xbe̱n li tzꞌac li cuan chire li haꞌ. Ut aꞌan cꞌajoꞌ nak nau̱chin.
Eb li xicꞌ nequeꞌiloc a̱cue, tateꞌxcuti riqꞌuin lix tzimaj. Kꞌesnal cheꞌ tateꞌxcut cuiꞌ. Ut cꞌajoꞌ li raylal ta̱cꞌul saꞌ rukꞌ eb li xicꞌ nequeꞌiloc a̱cue.
Ut ta̱cuy chak xcolbal a̱cuib saꞌ rukꞌ eb aꞌan. Li Ka̱cuaꞌ Dios xqꞌuehoc xcacuilal a̱cuok a̱cuukꞌ. Bantiox re li Ka̱cuaꞌ Dios li naqꞌuehoc re lin metzꞌe̱u. Bantiox re li Ka̱cuaꞌ Dios li na-iloc ke joꞌ naxba̱nu junak laj ilol queto̱mk. Li Ka̱cuaꞌ Dios, aꞌan joꞌ jun sako̱nac ut ma̱ ani naru natꞌanoc re. Ut aꞌan naxqꞌue li kacuanquilal.
Li Ka̱cuaꞌ Dios, li ninlokꞌoni la̱in, aꞌan ta̱tenkꞌa̱nk a̱cue. Li Ka̱cuaꞌ Dios li kꞌaxal nim xcuanquil, aꞌan ta̱osobtesi̱nk a̱cue. Aꞌan ta̱qꞌuehok a̱cue chixjunil li usilal li nachal saꞌ choxa, joꞌ li hab ut li sakꞌe. Aꞌan ta̱qꞌuehok a̱cue chixjunil li usilal li nacuan saꞌ ruchichꞌochꞌ, joꞌ li haꞌ li na-el saꞌ chꞌochꞌ. Aꞌan tixqꞌue chi qꞌuia̱nc nabaleb la̱ cualal a̱cꞌajol.
Kꞌaxal nim li usilal li yo̱quin chixtzꞌa̱manquil chiru li Ka̱cuaꞌ Dios chokꞌ a̱cue la̱at. Moco joꞌ ta li queꞌxtzꞌa̱ma chak chokꞌ cue lin yucuaꞌ camenak. Numtajenak cuiꞌchic xqꞌuial li yo̱quin chixtzꞌa̱manquil chokꞌ a̱cue. Joꞌ nak li tzu̱l incꞌaꞌ nequeꞌosoꞌ, joꞌcan ajcuiꞌ nak incꞌaꞌ ta̱osokꞌ la̱ cuosobtesinquil li yo̱quin chixtzꞌa̱manquil chokꞌ a̱cue. La̱at, José, chixjunil li usilal aꞌin ta̱cana̱k saꞌ a̱be̱n. La̱at li quisiqꞌueꞌ a̱cuu saꞌ xya̱nkeb la̱ cuas.
Ut la̱at, Benjamín, tatinjuntakꞌe̱ta riqꞌuin li joskꞌ aj xoj xban nak la̱at joꞌ eb la̱ cualal a̱cꞌajol nabal li pletic te̱ba̱nu riqꞌuineb li xicꞌ teꞌilok e̱re. Ekꞌela texxic chi pletic ut ecuu te̱jeqꞌui li cꞌaꞌru te̱makꞌ chak chiruheb nak texpletik, chan laj Israel.
Lix camic laj JacobAꞌaneb aꞌin li cablaju xte̱paleb li ralal xcꞌajol laj Israel. Tzꞌi̱banbil arin li cꞌaꞌru queꞌyeheꞌ reheb xban lix yucuaꞌeb nak quixtzꞌa̱ma chiru li Ka̱cuaꞌ Dios li rosobtesinquil li junju̱nk. Jalan jala̱nk li rosobtesinquileb.
Joꞌcaꞌin quixye laj Jacob reheb: —Xcuulac xkꞌehil lin camic. Xic cue anakcuan. Aran tine̱muk saꞌ li ochoch pec li mukbileb cuiꞌ lin xeꞌto̱nil yucuaꞌ. Li ochoch pec aꞌan cuan saꞌ lix chꞌochꞌ laj Efrón aj hitita.
Li mukleba̱l aꞌan cuan saꞌ li naꞌajej Macpela. Li naꞌajej aꞌan laj Abraham quilokꞌoc re junxil riqꞌuin laj Efrón laj hitita. Li naꞌajej aꞌan cuan xcue̱nt Canaán ut cuan saꞌ xcaꞌyaba̱l Mamre.
Saꞌ li naꞌajej aꞌan quimukeꞌ laj Abraham joꞌ ajcuiꞌ lix Sara li rixakil. Aran ajcuiꞌ quimukeꞌ laj Isaac joꞌ ajcuiꞌ lix Rebeca li rixakil. Ut aran ajcuiꞌ quinmuk lix Lea.
Li chꞌochꞌ aꞌan joꞌ ajcuiꞌ li ochoch pec lokꞌbil riqꞌuineb laj hitita, chan laj Jacob.
Nak laj Jacob quirakeꞌ chixchakꞌrabinquileb li ralal, quixtaksi li rok chiru lix chꞌa̱t, quixyocob rib ut quicam. Ut co̱ riqꞌuineb lix xeꞌto̱nil yucuaꞌ li camenakeb.
Nak quiril nak camenak chic lix yucuaꞌ, laj José ticto quixkꞌalu ut quirutzꞌ ru ut quiya̱bac.
Tojoꞌnak quixtakla xbokbaleb lix mo̱s li nequeꞌbanoc camenak re nak incꞌaꞌ ta̱chuhokꞌ. Ut eb aꞌan queꞌxban li camenak re nak incꞌaꞌ ta̱chuhokꞌ.
Caꞌcꞌa̱l cutan tzꞌakal queꞌxban cuiꞌ li camenak. Ut eb laj Egipto laje̱b xca̱cꞌa̱l (70) cutan queꞌrahoꞌ saꞌ xchꞌo̱l xban xcamic laj Jacob.
Ut nak quirakeꞌ li laje̱b xca̱cꞌa̱l (70) cutan nak raheb saꞌ xchꞌo̱l xban xcamic lix yucuaꞌeb, laj José quia̱tinac riqꞌuineb li cuanqueb saꞌ rochoch laj faraón. Quixye reheb, —Cui niquine̱ra, te̱ba̱nu li usilal aꞌin cue. Tex-a̱tinak chicuix riqꞌuin laj faraón.
Ut te̱ye re chi joꞌcaꞌin: Junxil nak toj yoꞌyo lin yucuaꞌ, la̱in xinba̱nu li juramento riqꞌuin. Ut lin yucuaꞌ quixye cue, “Chi se̱b nincam,” chan cue. “Ta̱ba̱nu li usilal. Tina̱muk chak aran Canaán saꞌ li naꞌajej li ac becbil inban junxil saꞌ li ochoch pec li cuan Macpela,” chan cue lin yucuaꞌ nak toj yoꞌyo. Ut anakcuan tintzꞌa̱ma usilal che̱ru nak te̱ye re laj faraón nak tinixcanab chi xic aran chixmukbal inyucuaꞌ camenak. Caꞌaj cuiꞌ toxinmuk chak lin yucuaꞌ ut tinsukꞌi̱k cuiꞌchic arin, chan laj José reheb.
Nak laj faraón quirabi resil nak ta̱raj xic laj José, quixye: —Us. Ayu. Muk chak la̱ yucuaꞌ joꞌ xtzꞌa̱ma cha̱cuu, chan laj faraón.
Ut laj José co̱ chixmukbal lix yucuaꞌ. Numtajenak xqꞌuialeb li queꞌco̱eb chirix. Queꞌco̱eb laj tenkꞌom re laj faraón, joꞌ ajcuiꞌ li cuan xcuanquil saꞌ rochoch laj faraón. Queꞌco̱eb ajcuiꞌ li ni̱nkeb xcuanquil saꞌ li tenamit Egipto.
Queꞌco̱eb ajcuiꞌ chixjunileb li cuanqueb saꞌ rochoch laj José. Queꞌco̱eb li ras ut li ri̱tzꞌin laj José. Queꞌco̱eb ajcuiꞌ li cuanqueb saꞌ rochoch lix yucuaꞌ camenak. Caꞌaj chic eb li cocꞌal ut li queto̱mk queꞌcana saꞌ li tenamit Gosén.
Queꞌco̱eb ajcuiꞌ nabal li soldados saꞌ eb li carre̱t ut nabaleb ajcuiꞌ queꞌco̱eb chirix cacua̱y. Chi joꞌcaꞌin numtajenak xqꞌuialeb laj mukunel li queꞌco̱eb.
Queꞌcuulac jun pacꞌal li nimaꞌ Jordán saꞌ li naꞌajej li nequeꞌtenoc cuiꞌ trigo. Laj e̱chal re li naꞌajej aꞌan, aꞌan aj Atad xcꞌabaꞌ. Ut aran laj José queꞌxyoꞌle cuiꞌchic cuukub cutan lix yucuaꞌ camenak. Ut nequeꞌhuyhut chi ya̱bac xban xrahileb xchꞌo̱l.
Nak eb laj cananeo queꞌril nak yo̱queb chi yoꞌlec cuukub cutan, queꞌxye, —Aꞌan jun nimla rahil chꞌo̱lejil chokꞌ reheb laj Egipto, chanqueb. Xban aꞌan queꞌxqꞌue Abel-mizraim chokꞌ xcꞌabaꞌ li naꞌajej aꞌan. Li naꞌajej aꞌan cuan jun pacꞌal li nimaꞌ Jordán.
Queꞌxba̱nu li ralal laj Jacob joꞌ li quixtzꞌa̱ma chiruheb.
Queꞌxpako lix caxonil lix yucuaꞌ saꞌ xbe̱neb lix tel ut queꞌxcꞌam aran Canaán. Ut queꞌxmuk aꞌan saꞌ li ochoch pec li cuan Macpela, li cuan jun pacꞌal Mamre. Aꞌan li mukleba̱l li quixlokꞌ laj Abraham junxil riqꞌuin laj Efrón laj hitita.
Nak quirakeꞌ li mukuc, laj José quisukꞌi cuiꞌchic Egipto rochbeneb li ras ut li ri̱tzꞌin. Queꞌsukꞌi ajcuiꞌ chak chixjunileb li joꞌ qꞌuial li queꞌcuulac chirix chixmukbal lix yucuaꞌ.
Ta̱cuulak xkꞌehil xcamic laj JoséChirix lix camic li yucuaꞌbej, eb li ras laj José queꞌoc chi cꞌoxlac ut queꞌxye chi ribileb rib: —Anakcuan ma̱re xicꞌ chic toril laj José. Ma̱re tixye ke nak tento takatoj rix li kama̱c li kaba̱nu chak re junxil, chanqueb.
Eb aꞌan queꞌxye re laj José: —Nak toj yoꞌyo li kayucuaꞌ, aꞌan x-a̱tinac kiqꞌuin ut xye ke nak takaye a̱cue li ra̱tin.
Aꞌin li ra̱tin li kayucuaꞌ. “Tintzꞌa̱ma cha̱cuu nak ta̱cuy xma̱queb la̱ cuas riqꞌuin li cꞌaꞌru xeꞌxba̱nu chak a̱cue junxil,” chan ke. Ut anakcuan la̱o yo̱co chixtzꞌa̱manquil cha̱cuu. La̱o nakanau nak yibru kaba̱nu chak a̱cue junxil. La̱o nakalokꞌoni li Dios li quixlokꞌoni li kayucuaꞌ camenak, chanqueb re laj José. Nak laj José quirabi li ra̱tineb li ras, quiya̱bac.
Eb li ras laj José queꞌjiloc chixcꞌatk. Queꞌxcuikꞌib rib saꞌ chꞌochꞌ chiru ut queꞌxye re, —Anakcuan la̱o cuanco arin ut takaqꞌue kib rubel a̱takl, chanqueb re laj José.
Ut laj José quixye reheb: —Mexxucuac. ¿Ma la̱in ta biꞌ li Ka̱cuaꞌ Dios chi rakoc a̱tin saꞌ e̱be̱n? chan.
Relic chi ya̱l nak la̱ex xeya̱ba li incꞌaꞌ us saꞌ inbe̱n. Abanan li Ka̱cuaꞌ Dios xjal ru chokꞌ usilal. Xban nak cuanquin arin la̱in, nabaleb toj yoꞌyo̱queb inban. Nabal li tenamit xeꞌcoleꞌ saꞌ incꞌabaꞌ la̱in nak xcuan li cueꞌej.
Anakcuan mexxucuac chic la̱ex. La̱in chic tin-ilok e̱re ut tinqꞌue ajcuiꞌ li cꞌaꞌru ta̱paltok e̱re, joꞌ ajcuiꞌ reheb le̱ cocꞌal, chan laj José. Ut laj José quixcꞌojobeb xchꞌo̱l li ras nak quia̱tinac riqꞌuineb saꞌ usilal.
Laj José quicana saꞌ li tenamit Egipto. Aran ajcuiꞌ queꞌcana chixjunileb li ralal xcꞌajol lix yucuaꞌ camenak. Chixjunil lix chihab laj José, aꞌan jun ciento riqꞌuin laje̱b (110) chihab.
Chiru laj José queꞌyoꞌla lix cocꞌal laj Efraín, joꞌ ajcuiꞌ lix cocꞌal laj Maquir li ralal laj Manasés. Laj Maquir, aꞌan li ri laj José. Lix cocꞌal laj Maquir chanchan ajcuiꞌ ralal laj José nak narileb.
Saꞌ jun li cutan, laj José quixye reheb li ras: —La̱in chi se̱b nincam. Li Ka̱cuaꞌ Dios ta̱ilok e̱re chi junelic. Ut aꞌan ta̱isi̱nk e̱re saꞌ li tenamit aꞌin ut texcꞌam cuiꞌchic saꞌ li tenamit Canaán. Aꞌan li chꞌochꞌ li yechiꞌinbil chak najter xban li Ka̱cuaꞌ Dios reheb laj Abraham, laj Isaac ut laj Jacob, chan.
Laj José quixye ajcuiꞌ reheb: —Anakcuan la̱ex te̱ba̱nu junak li juramento cuiqꞌuin. Nak li Ka̱cuaꞌ Dios texrisi saꞌ li tenamit aꞌin, te̱ba̱nu usilal, te̱cꞌam lin bakel che̱rix nak texxic, chan laj José. Ut eb li ras laj José queꞌxcꞌul xchꞌo̱l li juramento li quixye reheb.
Laj José jun ciento riqꞌuin laje̱b (110) chihab cuan re nak quicam. Ut eb aꞌan queꞌxban li camenak José re nak incꞌaꞌ ta̱chuhokꞌ. Ut queꞌxqꞌue saꞌ xcaxonil aran Egipto.
Li Hu ÉxodoCꞌajoꞌ li raylal queꞌxcꞌul eb laj Israel aran EgiptoAꞌaneb aꞌin lix cꞌabaꞌeb li ralal xcꞌajol laj Israel, li nayeman ajcuiꞌ Jacob re. Li junju̱nk chi ralal coxeꞌocak Egipto rochbeneb li ralal xcꞌajol. Aꞌaneb aꞌin lix cꞌabaꞌeb:
laj Rubén, laj Simeón, laj Leví, laj Judá,
laj Isacar, laj Zabulón, laj Benjamín,
laj Dan, laj Neftalí, laj Gad, ut laj Aser.
Laj José ac cuan aran Egipto. Chixjunil li ralal xcꞌajol laj Jacob rochbeneb li ri cuanqueb laje̱b xca̱cꞌa̱l (70).
Quicam laj José ut queꞌcam ajcuiꞌ chixjunileb li ras ut eb li ri̱tzꞌin.
Aꞌut eb li imambej queꞌnabaloꞌ ut queꞌqꞌuian li ralal xcꞌajol laj Israel. Queꞌnumtajenakoꞌ lix cacuilaleb ut quila̱tzꞌoꞌ lix naꞌajeb.
Saꞌ li tenamit Egipto quijala li acuabej. Li acuabej aꞌan incꞌaꞌ quixnau chanru nak quicuan laj José.
Li acuabej quixye reheb lix tenamit: —Cꞌoxlahomak. Li ralal xcꞌajol laj Israel kꞌaxal nabaleb ut ma̱re kꞌaxal cauheb rib chiku la̱o.
Anakcuan chicua̱nk taxak kanaꞌleb. Tocꞌoxlak chirix li cꞌaꞌru takaba̱nu re nak incꞌaꞌ chic teꞌqꞌuia̱nk. Cui ta̱cua̱nk li ple̱t ma̱re teꞌxjunaji rib riqꞌuin li xicꞌ nequeꞌiloc ke ut teꞌe̱lelik chiku, chan.
Tojoꞌnak laj faraón li acuabej quixxakabeb laj taklanel saꞌ xya̱nkeb re nak eb aꞌan teꞌtakla̱nk reheb laj Israel chi trabajic chi cau. Eb laj Israel yo̱queb chixyi̱banquil li ni̱nki ochoch re laj faraón saꞌ li cuib chi tenamit Pitón ut Ramesés. Ut aran ta̱cꞌu̱lama̱nk lix biomal laj faraón.
Nak ra queꞌux reheb, kꞌaxal cuiꞌchic queꞌqꞌui. Cꞌajoꞌ nak queꞌxucuac eb laj Egipto chirilbaleb laj Israel.
Ut eb laj Israel queꞌqꞌueheꞌ joꞌ rahobtesinbil mo̱s.
Cꞌajoꞌ li raylal nequeꞌxcꞌul xban li cacuil trabaj nequeꞌxba̱nu nak nequeꞌxpacꞌ li chꞌochꞌ chokꞌ xan. Ut joꞌcan ajcuiꞌ nak yo̱queb chi trabajic saꞌ cꞌaleba̱l. Kꞌaxal cuiꞌchic ra li yo̱queb chixcꞌulbal xban nak saꞌ joskꞌil nequeꞌtakla̱c ut yalak cꞌaꞌru cꞌanjelil nequeꞌqꞌueheꞌ reheb re teꞌxba̱nu.
Li acuabej aran Egipto quia̱tinac riqꞌuin cuib li ixk aj hebreo. (Aj hebreo nayeman ajcuiꞌ reheb laj Israel.) Lix cꞌabaꞌeb li ixk aꞌan xSifra ut xFúa. Aꞌaneb li nequeꞌxococ reheb li cꞌulaꞌal nak nequeꞌyoꞌla.
Quixye reheb: —Nak te̱rileb li ixk aj hebreo, cui te̱lom lix cꞌulaꞌaleb teꞌyoꞌla̱k te̱camsiheb. Ut cui ixk lix cꞌulaꞌaleb te̱canabeb chi qꞌui̱c, chan.
Li cuib chi ixk aꞌin nequeꞌxpa̱b li Dios. Joꞌcan nak incꞌaꞌ queꞌxba̱nu joꞌ quiyeheꞌ reheb xban li acuabej re Egipto. Incꞌaꞌ queꞌxcamsiheb li cocꞌ te̱lom aj hebreo.
Ut li acuabej re Egipto quixtakla xbokbal li cuib chi ixk ut quixye reheb: —¿Cꞌaꞌut nak incꞌaꞌ xeba̱nu li xinye e̱re? ¿Cꞌaꞌut nak incꞌaꞌ xecamsi li cocꞌ te̱lom aj hebreo nak xeꞌyoꞌla? chan reheb.
Ut li cuib chi ixk queꞌchakꞌoc ut queꞌxye re laj faraón: —Xban nak eb li ixk aj hebreo ma̱cuaꞌ joꞌ eb li ixk aj Egipto. Aꞌan cauheb rib. Ma̱jiꞌ nococuulac riqꞌuineb nak ac xeꞌyoꞌla lix cꞌulaꞌaleb, chanqueb.
Li Ka̱cuaꞌ Dios quixba̱nu usilal reheb laj xoconeleb. Ut eb laj hebreo queꞌnabaloꞌ ut queꞌqꞌuian ut cauheb rib.
Li cuib chi ixk, li nequeꞌxococ cꞌulaꞌal, queꞌxxucua ru li Dios. Joꞌcan nak li Dios quirosobtesiheb ut quixqꞌueheb nabal li ralal xcꞌajoleb.
Tojoꞌnak laj faraón quixtakla resil saꞌ chixjunil lix tenamit nak ta̱cutekꞌ saꞌ nimaꞌ li jarubeb li cocꞌ te̱lom li teꞌyoꞌla̱k saꞌ xya̱nkeb li ixk aj hebreo. Chixjunileb li cocꞌ xkaꞌal teꞌcanaba̱k chi qꞌui̱c.
Lix yoꞌlajic laj MoisésJun li cui̱nk xcomoneb li ri xmam laj Leví quixsicꞌ rixakil. Xcomoneb ajcuiꞌ li ralal xcꞌajol laj Leví li ixk li quixsicꞌ.
Li rixakil quicana chi yaj aj ixk. Quicuan jun xcꞌulaꞌal te̱lom. Quiril nak cꞌajoꞌ xchakꞌal ru li cꞌulaꞌal ut quixmuk oxib po.
Nak incꞌaꞌ chic quiru xmukbal li cꞌulaꞌal, li naꞌbej quixyi̱b jun li chacach riqꞌuin li bayal. Quixtzꞌap ru li chacach riqꞌuin jun li ban asfalto xcꞌabaꞌ joꞌ ajcuiꞌ lix kꞌol li cheꞌ brea re nak incꞌaꞌ ta̱oc li haꞌ chi saꞌ. Quixqꞌue li cꞌulaꞌal saꞌ li chacach. Tojoꞌnak coxcanab chak saꞌ nimaꞌ bar cuiꞌ cuan li caxlan aj.
Li ranab li cꞌulaꞌal najt caꞌchꞌin quixqꞌue rib riqꞌuin li cꞌulaꞌal ut yo̱ chixcꞌacꞌalenquil re nak ma̱cꞌaꞌ tixcꞌul.
Lix rabin laj faraón quicuulac chi ati̱nc saꞌ nimaꞌ rochbeneb lix mo̱s ixk. Nak yo̱queb chi be̱c chire li nimaꞌ, lix rabin laj faraón quiril li chacach saꞌ xya̱nk li caxlan aj ut quixtakla jun lix mo̱s ixk chixxocbal.
Lix rabin laj faraón quixte li chacach ut quiril li cꞌulaꞌal. Quiril xtokꞌoba̱l ru nak yo̱ chi ya̱bac ut quixye: —Li chꞌina te̱lom aꞌin xcomoneb tana laj hebreo, chan.
Li ranab li cꞌulaꞌal quijiloc chixcꞌatk lix rabin laj faraón ut quixye re: —¿Ma ta̱cuaj tinsicꞌ chak junak ixk aj hebreo re tixqꞌuiresi li cꞌulaꞌal aꞌin chokꞌ a̱cue? chan.
Lix rabin laj faraón quixye re: —Ayu. Sicꞌ chak.— Ut li xkaꞌal co̱ xbokbal lix naꞌ.
Nak quicuulac li ixk, lix rabin laj faraón quixye re: —Cꞌam ut ta̱qꞌuiresi li cꞌulaꞌal aꞌin chokꞌ cue. La̱in tatintoj, chan. Ut li naꞌbej quixcꞌam li cꞌulaꞌal ut quixqꞌuiresi.
Nak ac nim chic, quixcꞌam li chꞌina al riqꞌuin lix rabin laj faraón ut aran quicana joꞌ tzꞌakal re. Lix rabin laj faraón quixye: —Li chꞌina al aꞌin aj Moisés xcꞌabaꞌ xban nak la̱in xcuisi saꞌ li haꞌ, chan. (Saꞌ ra̱tinoba̱leb laj hebreo li cꞌabaꞌej Moisés naraj naxye “isinbil saꞌ li haꞌ”.)
Laj Moisés quie̱lelic saꞌ li tenamit EgiptoLaj Moisés quicui̱nkiloꞌ. Saꞌ jun li cutan co̱ chirilbaleb li ras ri̱tzꞌin ut quiril nak ra yo̱queb chixcꞌulbal. Quiril jun li cui̱nk aj Egipto yo̱ chixsacꞌbal jun aj hebreo rech tenamitil laj Moisés.
Laj Moisés qui-iloc chirix ut chi caꞌ pacꞌalil. Quiril nak ma̱ jun chic cuan aran ut quixcamsi laj Egipto. Aran quixmuk saꞌ li samaib.
Joꞌ cuulajak chic laj Moisés qui-el cuiꞌchic chi be̱c ut quiril cuib aj hebreo yo̱queb chi pletic. Quixye re li jun li quipaltoꞌ: —¿Cꞌaꞌut nak yo̱cat chixsacꞌbal la̱ cuech cristianil?—
Ut aꞌan quichakꞌoc ut quixye re: —Ut la̱at, ¿ani xqꞌuehoc a̱cue chi takla̱nc saꞌ kabe̱n? ¿Ma tina̱camsi la̱in joꞌ nak xacamsi laj Egipto? chan. Tojoꞌnak laj Moisés quixucuac ut quixye saꞌ xchꞌo̱l: —Xnauman peꞌ li cꞌaꞌru xinba̱nu.—
Quicuulac resil aꞌin riqꞌuin laj faraón ut quixcamsi raj laj Moisés. Ut laj Moisés quie̱lelic saꞌ junpa̱t chiru laj faraón. Co̱ saꞌ li tenamit Madián xcꞌabaꞌ.
Ut aran coxtau jun li becbil haꞌ ut coxchunla̱k aran. Laj tij saꞌ li tenamit Madián cuukub lix rabin cuan. Eb aꞌan queꞌcuulac chirisinquil li haꞌ re nak teꞌxbutꞌ xnaꞌajeb rucꞌa lix queto̱mk lix yucuaꞌ.
Nak queꞌcuulac jalan chic laj ilol xul, queꞌra̱linaheb li xkaꞌal chire li haꞌ. Laj Moisés quicuacli chixtenkꞌanquileb li xkaꞌal chixqꞌuebal rucꞌaheb li queto̱mk.
Eb li xkaꞌal queꞌsukꞌi saꞌ rochocheb. Lix yucuaꞌ aj Reuel xcꞌabaꞌ. Aꞌan quixpatzꞌ reheb: —¿Cꞌaꞌut nak saꞌ junpa̱t xexsukꞌi chak anakcuan?— chan.
Eb aꞌan queꞌchakꞌoc ut queꞌxye re: —Jun li cui̱nk aj Egipto xoxcol chiruheb laj ilol xul. Aꞌan ajcuiꞌ x-isin re li haꞌ ut xqꞌue rucꞌaheb li kaqueto̱mk, chanqueb.
Laj Reuel quixye reheb lix rabin: —¿Bar cuan li cui̱nk aꞌan? ¿Cꞌaꞌut nak xecanab chak aran? Ayukex, bokomak chak re nak ta̱cuaꞌak kiqꞌuin, chan.
Laj Moisés quicuulac ut aran quicana saꞌ rochoch laj Reuel. Laj Reuel quixsumub lix Séfora lix rabin riqꞌuin laj Moisés.
Laj Moisés quicuan jun li ralal riqꞌuin lix Séfora. Quixye: —La̱in jalan intenamit. Ma̱cuaꞌin aj arin. Joꞌcan nak tinqꞌue aj Gersón chokꞌ xcꞌabaꞌ.—
Ac xnumeꞌ chic nabal cutan nak quicam lix reyeb laj Egipto. Eb laj Israel japjo̱queb re xban li raylal yo̱queb chixcꞌulbal joꞌ rahobtesinbil mo̱s. Li Dios quirabi nak yo̱queb chi kꞌoko̱nc.
Nak li Dios quirabi nak yo̱queb chi kꞌoko̱nc, quijulticoꞌ re li usilal li quixyechiꞌi chak reheb laj Abraham, laj Isaac ut laj Jacob junxil.
Li Dios quixqꞌue retal li raylal li yo̱queb chixcꞌulbal eb laj Israel ut quiril xtokꞌoba̱l ruheb.
Laj Moisés quibokeꞌ xban li DiosLaj Moisés yo̱ chixcꞌacꞌalenquil lix queto̱mk laj Jetro lix yucuaꞌ li rixakil. (Aj Jetro nayeman ajcuiꞌ re laj Reuel.) Aꞌan xbe̱n aj tij reheb laj Madián. Laj Moisés najt quixcꞌameb li queto̱mk saꞌ li chaki chꞌochꞌ, toj retal queꞌcuulac cuan cuiꞌ li tzu̱l Horeb bar quia̱tinac cuiꞌ li Dios riqꞌuin laj Moisés.
Aran quixcꞌutbesi rib lix ángel li Ka̱cuaꞌ Dios chiru laj Moisés saꞌ rakꞌ li xam saꞌ li jun to̱n chi qꞌuix. Laj Moisés quiril nak yo̱ xxamlel ut incꞌaꞌ na-osoꞌ li qꞌuix.
Quixye: —Tinxic. Tinjilok ut tincuil cꞌaꞌru chi xxamil aꞌan. ¿Cꞌaꞌut nak yo̱ xxamlel ut incꞌaꞌ nacꞌat li qꞌuix?—
Quiril li Ka̱cuaꞌ Dios nak laj Moisés quijiloc chixcꞌatk. Ut saꞌ li qꞌuix li yo̱ chi cꞌatc, quia̱tinac li Dios ut quixye: —At Moisés, chan. Laj Moisés quixye: —Cueꞌquin, chan.
Li Ka̱cuaꞌ Dios quixye: —Matjiloc chak arin. Ta̱cuisi la̱ xa̱b cha̱cuok xban nak li naꞌajej cuancat cuiꞌ aꞌan santil naꞌajej.—
Ut li Dios quixye ajcuiꞌ: —La̱in lix Dios la̱ xeꞌto̱nil yucuaꞌ. La̱in lix Dios laj Abraham, laj Isaac ut laj Jacob, chan. Laj Moisés quixucuac chirilbal li Dios ut quixmuk li ru.
Li Ka̱cuaꞌ Dios quixye re: —La̱in yo̱quin chirilbal li raylal li yo̱queb chixcꞌulbal lin tenamit li cuanqueb Egipto. Yo̱quin chirabinquil nak yo̱queb chixkꞌokonquil ribeb saꞌ rukꞌeb li nequeꞌtaklan reheb saꞌ joskꞌil. Ninnau nak kꞌaxal nayotꞌeꞌ xchꞌo̱leb xban nak rahobtesinbileb.
Joꞌcan nak la̱in tincoleb saꞌ rukꞌeb laj Egipto ut tincuisiheb ajcuiꞌ saꞌ li tenamit aꞌan. Tincꞌameb saꞌ jun nimla naꞌajej numtajenak xcha̱bilal bar cuan cuiꞌ li sahil echej. Aꞌan li chꞌochꞌ li bar cuanqueb cuiꞌ laj cananeo, eb laj heteo, eb laj amorreo, eb laj ferezeo, eb laj heveo, ut eb laj jebuseo.
Nacuabi nak yo̱queb chi ya̱bac ut yo̱queb chixkꞌokonquil ribeb. Ut ninnau ajcuiꞌ chanru nak nequeꞌrahobtesi̱c xbaneb laj Egipto.
Abi li cꞌaꞌru tinye a̱cue anakcuan. La̱in tatintakla riqꞌuin laj faraón re nak ta̱cuisiheb chak lin tenamit Egipto, chan li Dios.
Ut laj Moisés quichakꞌoc ut quixye re li Dios: —¿Ma cuan ta biꞌ incuanquil la̱in nak tinxic riqꞌuin laj faraón ut tincuisiheb chak laj Israel? chan.
Li Dios quichakꞌoc ut quixye re laj Moisés: —Ayu ut la̱in cua̱nkin a̱cuiqꞌuin. Ut aꞌin a̱cuetalil nak la̱in xintaklan a̱cue. Nak ac xacuisiheb chak laj Israel saꞌ li tenamit Egipto, saꞌ li tzu̱l aꞌin tina̱lokꞌoni cuiꞌchic, chan li Dios.
Laj Moisés quixye re li Dios: —Nak tincuulak riqꞌuineb laj Israel, tinye reheb nak lix Dios lix xeꞌto̱nil yucuaꞌeb xtaklan cue. Ut eb aꞌan teꞌxpatzꞌ cue, “¿Ani xcꞌabaꞌ li Dios aꞌan?” Ut, ¿cꞌaꞌru tinye reheb? chan laj Moisés.
Li Dios quixye cuiꞌchic re laj Moisés: —La̱in cuanquin chalen chak kꞌe cutan ut chalen anakcuan. La̱in li Dios. Ta̱ye reheb laj Israel nak La̱in xintaklan a̱cue.
Li Dios quixye cuiꞌchic re laj Moisés: —Joꞌcaꞌin ta̱ye reheb laj Israel, “Li nimajcual Dios xtaklan chak cue. Aꞌan li Dios li queꞌxlokꞌoni eb le̱ xeꞌto̱nil yucuaꞌ laj Abraham, laj Isaac ut laj Jacob.” Nimajcual Dios incꞌabaꞌ ut aꞌan tincꞌabaꞌin chi junelic kꞌe cutan.—
Li Dios quixye cuiꞌchic re laj Moisés: —Ayu ut ta̱chꞌutubeb li cui̱nk li nequeꞌcꞌamoc be saꞌ xya̱nkeb laj Israel. Ut ta̱ye reheb, “Li nimajcual Dios li queꞌxlokꞌoni laj Abraham, laj Isaac ut laj Jacob, aꞌan xcꞌutbesi rib chicuu. Joꞌcaꞌin quixye cue: Xexcuil ut ninnau chixjunil li cꞌaꞌru yo̱quex chixcꞌulbal arin Egipto.
La̱in tinyechiꞌi e̱re nak texcuisi saꞌ li raylal li yo̱quex chixcꞌulbal arin Egipto. Texincꞌam saꞌ li chꞌochꞌ li cuanqueb cuiꞌ laj cananeo, eb laj heteo, eb laj amorreo, eb laj ferezeo, eb laj heveo ut eb laj jebuseo. Aꞌan jun nimla naꞌajej numtajenak xcha̱bilal bar cuan cuiꞌ li sahil echej”, chaꞌkat reheb.
Eb aꞌan teꞌrabi la̱ cua̱tin. La̱at ut eb li cui̱nk li nequeꞌcꞌamoc be saꞌ xya̱nkeb laj Israel texxic riqꞌuin lix reyeb laj Egipto ut te̱ye re, “Li nimajcual Dios li nequeꞌxlokꞌoni laj hebreo, aꞌan quixcꞌutbesi rib chiku. Choa̱canab chi xic saꞌ li chaki chꞌochꞌ oxib cutan chi be. Aran tomayejak chiru li Ka̱cuaꞌ Dios”, chaꞌkex re.
La̱in ac ninnau nak lix reyeb laj Egipto incꞌaꞌ texcanab chi e̱lc cui incꞌaꞌ tincꞌut lin cuanquil chiruheb.
La̱in tincꞌut lin cuanquil chiruheb laj Egipto. Tinrahobtesiheb ut riqꞌuin aꞌan texcanab chi e̱lc.
Ut la̱in tinba̱nu nak eb laj Egipto teꞌxcꞌam rib saꞌ usilal riqꞌuineb laj Israel re nak incꞌaꞌ tex-e̱lk chak aran Egipto chi ma̱cꞌaꞌ te̱cꞌam.
Chixjunileb li ixk aj Israel teꞌxtzꞌa̱ma li cꞌaꞌak re ru yi̱banbil riqꞌuin oro ut plata riqꞌuineb li rechcabal joꞌ ajcuiꞌ riqꞌuineb li ani teꞌhila̱nk riqꞌuineb. Teꞌxtzꞌa̱ma ajcuiꞌ li cha̱bil akꞌej ut te̱qꞌueheb chirixeb le̱ ralal e̱cꞌajol. Chi joꞌcaꞌin ta̱makꞌma̱nk lix biomaleb laj Egipto, chan li Dios.
Tojoꞌnak laj Moisés quichakꞌoc ut quixye: —Eb laj Israel incꞌaꞌ tineꞌxpa̱b ut incꞌaꞌ teꞌraj rabinquil li cꞌaꞌru tinye. Eb aꞌan teꞌxye cue, “Li Ka̱cuaꞌ Dios incꞌaꞌ xcꞌutbesi rib cha̱cuu,” chaꞌkeb.—
Li Dios quixye re: —¿Cꞌaꞌru li cuan saꞌ a̱cuukꞌ? chan. —Jun li xukꞌ, chan laj Moisés.
Li Ka̱cuaꞌ Dios quixye: —Cut chiru chꞌochꞌ.— Nak quixcut lix xukꞌ chiru chꞌochꞌ quisukꞌi chokꞌ cꞌantiꞌ. Nak quiril li cꞌantiꞌ laj Moisés quie̱lelic chiru.
Tojoꞌnak li Ka̱cuaꞌ Dios quixye cuiꞌchic re laj Moisés: —Chap chi xye li cꞌantiꞌ, chan. Ut laj Moisés quixchap li cꞌantiꞌ. Ut saꞌ li rukꞌ quisukꞌi cuiꞌchic chokꞌ xukꞌ.
Ut li Dios quixye re: —Ba̱nu chi joꞌcan chiruheb laj Israel re nak eb aꞌan teꞌxpa̱b nak la̱in lix Dios lix xeꞌto̱nil yucuaꞌeb laj Abraham, laj Isaac ut laj Jacob. La̱in xincꞌutbesi cuib cha̱cuu.—
Li Ka̱cuaꞌ Dios quixye cuiꞌchic re: —Chꞌic la̱ cuukꞌ rubel la̱ tel.— Laj Moisés quixchꞌic li rukꞌ rubel lix tel ut nak quiril chic saklep chic li rukꞌ. Sak sak chi us li rukꞌ.
Li Ka̱cuaꞌ Dios quixye: —Chꞌic cuiꞌchic la̱ cuukꞌ rubel la̱ tel.— Laj Moisés quixchꞌic cuiꞌchic li rukꞌ rubel lix tel. Nak quirisi li rukꞌ ac xqꞌuira.
Ut li Dios quixye re: —Cui li tenamit incꞌaꞌ tateꞌxpa̱b ut cui incꞌaꞌ teꞌraj teꞌril li ta̱ba̱nu xbe̱n cua riqꞌuin la̱ xukꞌ, ma̱re teꞌxpa̱b nak ta̱ba̱nu xcaꞌ sut riqꞌuin la̱ cuukꞌ.
Cui incꞌaꞌ teꞌxpa̱b li cuib chi naꞌleb aꞌin ut incꞌaꞌ teꞌraj teꞌrabi la̱ cua̱tin, ta̱chap caꞌchꞌinak li haꞌ li cuan saꞌ li nimaꞌ ut ta̱hoy saꞌ chꞌochꞌ. Li haꞌ aꞌan ta̱sukꞌi̱k chokꞌ quicꞌ chiru chꞌochꞌ, chan li Ka̱cuaꞌ Dios.
Tojoꞌnak quichakꞌoc laj Moisés ut quixye: —At Ka̱cuaꞌ, la̱in chꞌaꞌaj li a̱tinac chicuu. Ac cue nak incꞌaꞌ ninnau a̱tinac chalen chak saꞌ incaꞌchꞌinal. Ut chalen ajcuiꞌ anakcuan nak yo̱cat chicua̱tinanquil incꞌaꞌ ninnau a̱tinac, chan laj Moisés.
Ut li Ka̱cuaꞌ Dios quixye re: —¿Ma ma̱cuaꞌ ta biꞌ la̱in xinqꞌuehoc xtzꞌu̱mal re li cui̱nk? ¿Ani xba̱nun re li mem ut li tzꞌap xic ut li mutzꞌ? ¿Ma ma̱cuaꞌ la̱in li nimajcual Dios?
Anakcuan tatxic ut la̱in tintenkꞌa̱nk a̱cue riqꞌuin la̱ cua̱tin. La̱in tincꞌut cha̱cuu li cꞌaꞌru ta̱ye, chan li Ka̱cuaꞌ Dios.
Ut laj Moisés quixye: —At Ka̱cuaꞌ, ba̱nu usilal, takla jalan chic.—
Quichal xjoskꞌil li Ka̱cuaꞌ Dios saꞌ xbe̱n laj Moisés. Tojoꞌnak quixye re laj Moisés: —¿Ma incꞌaꞌ ta biꞌ ninnau ru la̱ cuas laj Aarón laj levita? Aꞌan sa naa̱tinac. Nak tatxic aran Egipto aꞌan ta̱e̱lk chak cha̱cꞌulbal. Ta̱sahokꞌ saꞌ xchꞌo̱l nak ta̱ril a̱cuu.
La̱at ta̱cua̱tina aꞌan ut ta̱chꞌolob chiru li cꞌaꞌru tixye. La̱in tintenkꞌa̱nk a̱cue riqꞌuin la̱ cua̱tin joꞌ ajcuiꞌ aꞌan. La̱in tincꞌut che̱ru li cꞌaꞌru te̱ba̱nu.
Aꞌan ta̱cꞌanjelak chokꞌ a̱cuu̱chil. La̱at ta̱yehok li cua̱tin re aꞌan ut aꞌan chic ta̱yehok reheb li tenamit.
Ut li xukꞌ aꞌin ta̱cꞌam saꞌ a̱cuukꞌ ut riqꞌuin aꞌan ta̱ba̱nu li naꞌleb li xincꞌut cha̱cuu, chan li Dios re.
Laj Moisés quisukꞌi cuiꞌchic EgiptoJoꞌcan nak co̱ laj Moisés ut cox-e̱lk riqꞌuin laj Jetro lix yucuaꞌ li rixakil ut quixye re: —Ba̱nu usilal tina̱canab chi xic chirilbaleb lin comon li cuanqueb aran Egipto. Tincuileb chak ma saheb saꞌ xchꞌo̱l, ma yoꞌyo̱queb na chixjunileb, chan. Laj Jetro quixye re laj Moisés: —Ayu biꞌ. Chatsukꞌi̱k taxak joꞌ nak xic a̱cue, chan.
Laj Moisés cuan chak Madián nak quia̱tina̱c xban li Ka̱cuaꞌ Dios. Quiyeheꞌ re: —Ayu, tatxic cuiꞌchic Egipto xban nak xeꞌcam li queꞌajoc raj re a̱camsinquil.—
Tojoꞌnak laj Moisés quixqꞌue li rixakil joꞌ eb ajcuiꞌ li ralal chirixeb lix bu̱reb. Ut queꞌco̱eb Egipto. Quixcꞌam ajcuiꞌ saꞌ rukꞌ lix xukꞌ li quiqꞌueheꞌ re xban li Dios.
Li Ka̱cuaꞌ Dios quixye ajcuiꞌ re laj Moisés: —Nak cua̱nkat aran Egipto, ta̱ba̱nu chiru laj faraón chixjunil li cꞌaꞌru xinye a̱cue ut xinqꞌue a̱cuanquilal chixba̱nunquil. La̱in tinqꞌue xcacuil xchꞌo̱l laj faraón re nak incꞌaꞌ tixcanabeb chi e̱lc eb laj Israel.
Ta̱ye re laj faraón, “Li Ka̱cuaꞌ Dios xye chi joꞌcaꞌin: Eb laj Israel aꞌaneb li xbe̱neb cualal incꞌajol.
Xinye a̱cue nak ta̱canabeb chi xic eb laj Israel re nak teꞌcꞌanjelak chicuu. Cui incꞌaꞌ nacacanabeb chi xic, la̱in tincamsi li xbe̱n a̱cualal, chaꞌkat re laj faraón,” chan li Dios re laj Moisés.
Li naxcꞌul laj Moisés xban nak incꞌaꞌ quixba̱nu li circuncisión re li ralalSaꞌ li be naxic Egipto yo̱queb chixnumsinquil li kꞌojyi̱n saꞌ jun cab nak coxtauhekꞌ laj Moisés xban li Ka̱cuaꞌ Dios. Quicamsi̱c raj aran xban li Ka̱cuaꞌ Dios.
Tojoꞌnak lix Séfora quixchap jun li kꞌesnal pec ut quixba̱nu circuncidar li ralal laj Moisés chiru li pec aꞌan. Quixcut lix tzꞌu̱mal li quixset saꞌ rok lix be̱lom ut quixye re: —Xban nak xhoyeꞌ xquiqꞌuel la̱ cualal nak xcꞌul li circuncisión, la̱at incꞌaꞌ tatca̱mk, chan.
Xban li circuncisión lix Séfora quixye re: —Xban nak xhoyeꞌ xquiqꞌuel la̱ cualal nak xcꞌul li circuncisión, la̱at incꞌaꞌ tatca̱mk, chan. Joꞌcan nak li Dios incꞌaꞌ quixcamsi laj Moisés.
Li Ka̱cuaꞌ Dios quixye re laj Aarón: —Tatxic saꞌ li chaki chꞌochꞌ. Ta̱cꞌul chak laj Moisés.— Ut laj Aarón co̱ chixcꞌulbal laj Moisés saꞌ li tzu̱l bar quia̱tina̱c cuiꞌ xban li Dios. Laj Aarón quirutzꞌ ru xban nak sa saꞌ xchꞌo̱l chi rilbal.
Ut laj Moisés quixserakꞌi re laj Aarón chixjunil li cꞌaꞌru quiyeheꞌ re xban li Ka̱cuaꞌ Dios. Quixserakꞌi ajcuiꞌ re chirix chixjunil li cꞌaꞌru quitakla̱c xba̱nunquil.
Queꞌco̱eb Egipto laj Moisés rochben laj Aarón. Ut aran queꞌxchꞌutubeb chixjunileb li cui̱nk li nequeꞌcꞌamoc be saꞌ xya̱nkeb laj Israel.
Ut laj Aarón quia̱tinac riqꞌuineb laj Israel ut quixye reheb li cꞌaꞌru quiyeheꞌ re laj Moisés xban li Ka̱cuaꞌ Dios. Ut laj Moisés quixcꞌut ajcuiꞌ chiruheb li milagros joꞌ quiyeheꞌ re xban li Ka̱cuaꞌ Dios.
Ut li cristian queꞌxpa̱b li cꞌaꞌru queꞌyeheꞌ re. Queꞌrabi nak li Ka̱cuaꞌ Dios quixnau li raylal li yo̱queb chixcꞌulbal ut quixtokꞌoba ruheb, queꞌxxulub lix jolomeb ut queꞌxlokꞌoni li Ka̱cuaꞌ Dios.
Laj Moisés rochben laj Aarón queꞌcuulac riqꞌuin laj faraónChirix nak queꞌa̱tinac riqꞌuineb laj Israel, laj Moisés ut laj Aarón queꞌco̱eb riqꞌuin laj faraón ut queꞌxye re: —Li nimajcual Dios, li nequeꞌxlokꞌoni laj Israel, xye chi joꞌcaꞌin, “Canabeb chi xic lin tenamit saꞌ li chaki chꞌochꞌ re nak aran teꞌninkꞌei̱k re xqꞌuebal inlokꞌal,” chan li Ka̱cuaꞌ Dios.—
Ut laj faraón quichakꞌoc ut quixye: —¿Ani li nimajcual Dios re nak tinpa̱b lix chakꞌrab nak tincanabeb laj Israel chi xic? La̱in incꞌaꞌ ninnau ru li nimajcual Dios aꞌan. Incꞌaꞌ tincanabeb chi xic laj Israel.—
Eb aꞌan queꞌxye re: —Li nimajcual Dios, li nakalokꞌoni la̱o aj hebreo, xcꞌutbesi rib chiku. Ba̱nu usilal, toa̱canab chi xic saꞌ li chaki chꞌochꞌ oxib cutan chi be. Ut aran tomayejak chiru li nimajcual Dios li nakalokꞌoni la̱o re nak incꞌaꞌ ta̱cha̱lk li rax ca̱mc saꞌ kabe̱n ut re ajcuiꞌ nak incꞌaꞌ tocamsi̱k riqꞌuin chꞌi̱chꞌ, chanqueb.
Tojoꞌnak lix reyeb laj Egipto quichakꞌoc ut quixye reheb: —At Moisés, ut at Aarón, ¿Cꞌaꞌut nak yo̱quex xbaybaleb li cristian saꞌ lix trabaj? La̱ex ba̱nuhomak le̱ trabaj.—
Ut quixye ajcuiꞌ laj faraón: —Anakcuan li cristian saꞌ li tenamit nabaleb chic ut la̱ex yo̱quex chixbaybaleb saꞌ lix trabaj, chan.
Saꞌ ajcuiꞌ li cutan aꞌan laj faraón quixtakla resil riqꞌuineb li nequeꞌtaklan ut riqꞌuineb ajcuiꞌ li nequeꞌiloc re li trabaj li nequeꞌxba̱nu laj Israel ut quixye reheb:
—Anakcuan incꞌaꞌ chic ta̱qꞌuema̱nk li qꞌuim reheb laj pacꞌol xan. Chalen anakcuan aꞌaneb chic teꞌxic xxocbaleb xqꞌuim.
Ta̱qꞌuema̱nk ajcuiꞌ lix trabajeb joꞌ junxil. Incꞌaꞌ naru te̱cꞌos lix qꞌuial li xan li nequeꞌxba̱nu. Xban nak moco sacꞌaheb ta chic chi trabajic ut mas a̱leb, joꞌcan nak nequeꞌayaynac ut teꞌraj xic chi mayejac chiru lix Dioseb.
Re nak incꞌaꞌ teꞌxpa̱b li ticꞌtiꞌ li naxye laj Moisés, qꞌuehomak ban xtrabajeb chi nabal, chan laj faraón.
Queꞌel laj ilol trabaj rochbeneb li nequeꞌtaklan ut queꞌxye reheb laj Israel: —Laj faraón quixye nak incꞌaꞌ chic ta̱qꞌuema̱nk li qꞌuim.
Anakcuan la̱ex chic texxic chixxocbal le̱ qꞌuim yalak bar te̱tau chak. Li trabaj saꞌ xnaꞌajquilak ajcuiꞌ. Incꞌaꞌ ta̱cꞌosk xqꞌuial li xan nequeyi̱b, chanqueb.
Tojoꞌnak chixjunileb laj Israel queꞌxjeqꞌui rib saꞌ li tenamit Egipto chixsicꞌbaleb lix qꞌuim.
Kꞌaxal cuiꞌchic xjoskꞌileb li nequeꞌtaklan saꞌ xbe̱neb ut queꞌxye reheb: —Te̱choy le̱ trabaj li nakꞌaxtesiman e̱re rajlal cutan joꞌ nequeba̱nu nak kꞌaxtesinbil le̱ qꞌuim junxil, chanqueb re.
Eb laj Israel li cuanqueb chokꞌ aj ilol trabaj queꞌsaqꞌueꞌ xbaneb laj Egipto li nequeꞌtaklan saꞌ xbe̱neb saꞌ xcꞌabaꞌ laj faraón. Eb li nequeꞌtaklan queꞌxpatzꞌ reheb laj ilol re li trabaj: —¿Cꞌaꞌut nak ma̱jiꞌ nequekꞌaxtesi xqꞌuial li xan re ecue̱r ut re anakcuan joꞌ xeba̱nu junxil? chanqueb.
Eb laj Israel li xakabanbileb chi iloc trabaj queꞌcuulac riqꞌuin laj faraón chi jitoc ut queꞌxpatzꞌ re: —¿Cꞌaꞌut nak yo̱cat chixba̱nunquil aꞌin reheb la̱ mo̱s?
Incꞌaꞌ chic naqꞌueman li qꞌuim reheb li mo̱s ut chixjunil li nequeꞌtaklan nequeꞌxye ke, “Yi̱bomak li xan.” Ut sacꞌbilo chikajunilo xbaneb. Abanan ma̱cuaꞌ la̱o aj Israel cuan ke. Aꞌ ban la̱ tenamit cuanqueb re, chanqueb re laj faraón.
Laj faraón quixye reheb: —La̱ex moco sacꞌahex ta. Joꞌcan nak incꞌaꞌ nequeraj trabajic. Xban aꞌan nak yo̱quex xyebal nak te̱raj xic chi mayejac chiru le̱ Dios.
Ayukex. Ba̱nuhomak le̱ trabaj. Moco ta̱qꞌuehekꞌ ta chic le̱ qꞌuim. Ut li xan te̱kꞌaxtesi joꞌ xqꞌuial nequekꞌaxtesi rajlal, chan laj faraón.
Tojoꞌnak laj ilol trabaj xcomoneb laj Israel queꞌxnau nak cꞌajoꞌ cuiꞌchic li raylal saꞌ xbe̱neb ut queꞌrahoꞌ xchꞌo̱l nak queꞌrabi nak ma̱ jokꞌe ta̱cꞌosma̱nk li cꞌanjel chokꞌ reheb.
Nak eb laj ilol trabaj queꞌel saꞌ rochoch laj faraón, coxeꞌxtau laj Moisés rochben laj Aarón nak yo̱queb chi oybeni̱nc.
Ut queꞌxye reheb, —Li Ka̱cuaꞌ Dios taxak chiqꞌuehok re̱kaj li cꞌaꞌru yo̱quex la̱ex. E̱ma̱c la̱ex nak laj faraón joꞌ ajcuiꞌ li nequeꞌtaklan kꞌaxal cuiꞌchic yo̱queb xjoskꞌil saꞌ kabe̱n. Teꞌraj ajcuiꞌ kacamsinquil, chanqueb re laj Moisés.
Laj Moisés natijocTojoꞌnak laj Moisés quia̱tinac cuiꞌchic riqꞌuin li Ka̱cuaꞌ Dios ut quixye re: —Ka̱cuaꞌ, ¿cꞌaꞌut nak yo̱cat chixqꞌuebal saꞌ raylal li tenamit aꞌin? ¿Cꞌaꞌru aj e nak xina̱takla chak arin?
Chalen nak xina̱tinac riqꞌuin laj faraón joꞌ xaye cue, mas cuiꞌchic li raylal yo̱ chixqꞌuebal saꞌ xbe̱neb laj Israel. La̱at ma̱cꞌaꞌ nacaba̱nu re xcolbaleb la̱ tenamit, chan laj Moisés.
Ut li Ka̱cuaꞌ Dios quixye re laj Moisés: —Anakcuan ta̱cuil cꞌaꞌru tinba̱nu re laj faraón. Moco caꞌaj cuiꞌ ta tixcanabeb chi xic laj Israel. Saꞌ joskꞌil ban tixyolesiheb nak ta̱risiheb saꞌ lix tenamit, chan li Dios.
Laj Moisés nabokeꞌ cuiꞌchic xban li DiosLi Dios quixye ajcuiꞌ re laj Moisés, —La̱in li nimajcual Dios.
La̱in quincꞌutbesi chiruheb laj Abraham, laj Isaac joꞌ ajcuiꞌ laj Jacob nak la̱in li nimajcual Dios. Aban incꞌaꞌ quincꞌutbesi chiruheb nak la̱in li Dios li nacoloc.
La̱in quinba̱nu lin contrato riqꞌuineb ut quinyechiꞌi reheb li naꞌajej Canaán. Yal aj numeleb nak queꞌhilan aran.
Ut la̱in xcuabi nak yo̱queb chi ya̱bac laj Israel, li yo̱queb xrahobtesinquil xbaneb laj Egipto. Xjulticoꞌ cue li usilal quinyechiꞌi chak reheb.
Ta̱ye reheb laj Israel li tinye a̱cue anakcuan. La̱in li nimajcual Dios ut la̱in ajcuiꞌ tin-isi̱nk reheb saꞌ li cacuil trabaj saꞌ rukꞌeb laj Egipto. La̱in tincolok reheb saꞌ xya̱lal nak tinrahobtesiheb laj Egipto nak tincꞌut lin cuanquil chiruheb.
La̱in texinqꞌue chokꞌ intenamit. La̱inak le̱ Dios. La̱ex te̱nau nak la̱in li nimajcual Dios li ta̱isi̱nk e̱re saꞌ li cacuil trabaj saꞌ rukꞌeb laj Egipto.
La̱in texincꞌam saꞌ li naꞌajej li quinyechiꞌi reheb laj Abraham, laj Isaac ut laj Jacob. Relic chi ya̱l te̱re̱chani li naꞌajej saꞌ incꞌabaꞌ la̱in. La̱in li nimajcual Dios li nacoloc e̱re, chan li Dios.
Laj Moisés quia̱tinac riqꞌuineb laj Israel joꞌ quiyeheꞌ re xban li Dios. Ut eb aꞌan incꞌaꞌ queꞌrabi li ra̱tin xban nak ac xeꞌchꞌinan xchꞌo̱leb ut tacuajenakeb xban lix cacuil trabaj.
Ut li Ka̱cuaꞌ Dios quixye re laj Moisés:
—Tatxic cuiꞌchic chi a̱tinac riqꞌuin laj faraón lix reyeb laj Egipto. Ta̱ye re nak tixcanabeb chi e̱lc laj Israel saꞌ lix tenamit, chan li Dios.
Laj Moisés quixye re li Ka̱cuaꞌ Dios: —La̱at nacanau nak eb laj Israel incꞌaꞌ nequeꞌxpa̱b li cua̱tin. Cui eb aꞌan incꞌaꞌ nequeꞌabin chicuu, ¿ma tojaꞌ ta chic laj faraón ta̱abi̱nk chicuu? La̱in incꞌaꞌ ninnau a̱tinac chi us, chan laj Moisés.
Ut li Ka̱cuaꞌ Dios quia̱tinac riqꞌuin laj Moisés ut laj Aarón. Quixqꞌue li chakꞌrab reheb laj Israel joꞌ ajcuiꞌ laj faraón re nak teꞌisi̱k laj Israel saꞌ li tenamit Egipto.
Aꞌaneb aꞌin li yucuaꞌbej saꞌ xya̱nkeb li ralal xcꞌajol laj Israel. Li xbe̱n ralal laj Israel, aꞌan laj Rubén. Ut eb li ralal laj Rubén, aꞌaneb aꞌin: laj Hanoc, laj Falú, laj Hezrón, ut laj Carmi. Aꞌaneb li ralal laj Rubén.
Aꞌaneb aꞌin li ralal laj Simeón: laj Jemuel, laj Jamín, laj Ohad, laj Jaquín, laj Zohar, ut laj Saúl li quicuan riqꞌuin jun ixk aj cananea. Aꞌaneb li ralal laj Simeón.
Aꞌaneb aꞌin lix cꞌabaꞌeb li ralal laj Leví: laj Gersón, laj Coat, ut laj Merari. Aꞌaneb li ralal xcꞌajol laj Leví. Jun ciento riqꞌuin cuuklaju xcaꞌcꞌa̱l (137) chihab cuan re laj Leví nak quicam.
Aꞌaneb aꞌin li ralal laj Gersón: laj Libni ut laj Simei. Aꞌaneb li ralal laj Gersón.
Aꞌaneb aꞌin li ralal laj Coat: laj Amram, laj Izhar, laj Hebrón ut laj Uziel. Jun ciento riqꞌuin oxlaju xcaꞌcꞌa̱l (133) chihab cuan re laj Coat nak quicam.
Aꞌaneb aꞌin li ralal laj Merari: laj Mahli ut laj Musi. Aꞌaneb li ralal laj Leví.
Laj Amram quixcꞌam chokꞌ rixakil li ri̱tzꞌin lix yucuaꞌ lix Jocabed xcꞌabaꞌ. Quicuan cuib li ralal riqꞌuin. Laj Aarón ut aj Moisés xcꞌabaꞌeb. Jun ciento riqꞌuin cuuklaju xcaꞌcꞌa̱l (137) chihab cuan re nak quicam.
Aꞌaneb aꞌin li ralal laj Izhar: laj Coré, laj Nefeg ut laj Zicri.
Aꞌaneb aꞌin li ralal laj Uziel, laj Misael, laj Elzafán ut laj Sitri.
Laj Aarón quixcꞌam chokꞌ rixakil lix Elisabet lix coꞌ lix Aminadab li ri̱tzꞌin laj Naasón. Laj Aarón quicuan ca̱hib li ralal riqꞌuin. Aꞌaneb aꞌin lix cꞌabaꞌ: laj Nadab, laj Abiú, laj Eleazar ut laj Itamar.
Aꞌaneb aꞌin li ralal laj Coré: laj Asir, laj Elcana ut laj Abiasaf. Aꞌaneb aꞌin li ralal xcꞌajoleb laj coreítas.
Laj Eleazar li ralal laj Aarón, quixcꞌam chokꞌ rixakil jun lix rabin laj Futiel. Ut quicuan li ralal riqꞌuin aj Finees xcꞌabaꞌ. Aꞌaneb li queꞌtaklan reheb li yucuaꞌbej saꞌ xya̱nkeb laj levitas. Aꞌaneb aꞌin li ralal xcꞌajol laj Eleazar.
Aꞌ laj Aarón ut laj Moisés aꞌaneb li queꞌa̱tina̱c xban li Ka̱cuaꞌ Dios ut quixye reheb nak teꞌrisiheb laj Israel saꞌ li tenamit Egipto chi tzoltzo.
Laj Moisés ut laj Aarón aꞌaneb li queꞌa̱tinac riqꞌuin li rey faraón re nak ta̱risiheb laj Israel saꞌ li tenamit Egipto.
(28-29) Saꞌ li cutan nak li Ka̱cuaꞌ Dios quia̱tinac riqꞌuin laj Moisés aran saꞌ li tenamit Egipto, quixye re: —La̱in li Ka̱cuaꞌ Dios. Chixjunil li tinye a̱cue, la̱at ta̱ye re laj faraón lix reyeb laj Egipto, chan.
(-)
Ut laj Moisés quixye: —La̱in incꞌaꞌ ninnau a̱tinac chi us. ¿Chanru nak laj faraón tixpa̱b li cꞌaꞌru tinye la̱in? chan.
Ut li Ka̱cuaꞌ Dios quixye re laj Moisés: —La̱at tatinqꞌue chi cꞌanjelac chokꞌ cuu̱chil chiru laj faraón. Ut laj Aarón ta̱a̱tinak chokꞌ a̱cuu̱chil la̱at.
La̱at tatyehok re laj Aarón chixjunil li cꞌaꞌru tinye a̱cue la̱in. Ut aꞌan ta̱jalok re la̱ cua̱tin chiru laj faraón re nak aꞌan tixcanabeb chi xic laj Israel.
La̱in tincacuubresi xchꞌo̱l laj faraón. Nabal incuanquilal tincꞌutbesi saꞌ li tenamit Egipto.
Ut laj faraón ti̱c incꞌaꞌ ta̱abi̱nk che̱ru. La̱in tinrakok a̱tin saꞌ xbe̱neb laj Egipto. Tintakla nabal raylal saꞌ xbe̱neb re nak ta̱ru̱k tincuisiheb lin tenamit Israel saꞌ xya̱nkeb laj Egipto.
Nak tinrakok a̱tin saꞌ xbe̱neb teꞌxnau nak la̱in li Ka̱cuaꞌ Dios ut tincuisiheb lin tenamit saꞌ xya̱nkeb, chan li Dios.
Laj Moisés ut laj Aarón queꞌxba̱nu chi tzꞌakal re ru li quiyeheꞌ reheb xban li Ka̱cuaꞌ Dios.
Ca̱cꞌa̱l (80) chihab cuan re laj Moisés ut oxib rocꞌa̱l (83) chihab cuan re laj Aarón nak queꞌa̱tinac riqꞌuin laj faraón.
Lix xukꞌ laj AarónUt li Ka̱cuaꞌ Dios quixye reheb laj Moisés ut laj Aarón:
—Cui laj faraón tixye e̱re “Cꞌutumak chicuu le̱ cuanquil”, tojoꞌnak la̱at, at Moisés, ta̱ye re laj Aarón “Cut la̱ xukꞌ chi rok laj faraón” ut la̱ xukꞌ ta̱sukꞌi̱k chokꞌ cꞌantiꞌ, chan li Dios.
Laj Moisés rochben laj Aarón nak queꞌcuulac riqꞌuin laj faraón. Ut queꞌxba̱nu joꞌ queꞌyeheꞌ re xban li Ka̱cuaꞌ Dios. Laj Aarón quixcut lix xukꞌ chiru laj faraón rochbeneb laj cꞌanjel chiru. Ut lix xukꞌ quisukꞌi chokꞌ cꞌantiꞌ.
Ut laj faraón quixbokeb li cui̱nk li cuanqueb xnaꞌleb joꞌ eb ajcuiꞌ laj kꞌe li cuanqueb saꞌ li tenamit Egipto. Joꞌ quixba̱nu laj Aarón, joꞌcan ajcuiꞌ queꞌxba̱nu eb aꞌan.
Quilajeꞌxcut lix xukꞌ chi chꞌochꞌ ut eb lix xukꞌ queꞌsukꞌi chokꞌ cꞌantiꞌ. Ut lix xukꞌ laj Aarón quixnukꞌeb lix xukꞌ eb laj kꞌe.
Aban laj faraón toj naxcacuubresi lix chꞌo̱l ut ti̱c incꞌaꞌ na-abin chiruheb, joꞌ quixye li Ka̱cuaꞌ Dios.
Li nimla raylal nak li haꞌ quisukꞌi chokꞌ quicꞌTojoꞌnak li Ka̱cuaꞌ Dios quixye re laj Moisés: —Cau xchꞌo̱l laj faraón ut incꞌaꞌ naxcanabeb chi xic li tenamit.
Cuulaj tatxic chire li nimaꞌ ut aran ta̱cuoybeni laj faraón nak ta̱cuulak. Ut ta̱cꞌam saꞌ a̱cuukꞌ la̱ xukꞌ li quisukꞌi chokꞌ cꞌantiꞌ.
Ut ta̱ye re, “Li Ka̱cuaꞌ Dios lix Dioseb laj hebreo, xtaklan chak cue a̱cuiqꞌuin. Joꞌ aꞌin xye a̱cue: Xcanabakeb chi xic lin tenamit re nak eb aꞌan tineꞌxlokꞌoni saꞌ li chaki chꞌochꞌ. Chalen anakcuan incꞌaꞌ nacacuaj xba̱nunquil li cꞌaꞌru nacuaj chan li Dios a̱cue.
Anakcuan, at faraón, la̱at ta̱qꞌue retal nak aꞌan li Ka̱cuaꞌ Dios, ut kꞌaxal nim xcuanquil. La̱in tinsacꞌ li nimaꞌ Nilo riqꞌuin lin xukꞌ. Ut riqꞌuin aꞌan ta̱quicꞌokꞌ li haꞌ.
Ut li car li cuanqueb saꞌ li nimaꞌ teꞌca̱mk. Ta̱chuhokꞌ li nimaꞌ. Ut eb laj Egipto incꞌaꞌ chic teꞌrucꞌ li haꞌ xban nak chuhak chic.”
Li Dios quixye ajcuiꞌ re laj Moisés: —Ta̱ye re laj Aarón, “Yeꞌ la̱ xukꞌ saꞌ xbe̱neb li haꞌ li cuan Egipto, saꞌ xbe̱neb li nimaꞌ, li cocꞌ rok haꞌ, joꞌ eb ajcuiꞌ li palau re nak ta̱quicꞌokꞌ. Yalak bar naxocman cuiꞌ li haꞌ saꞌ li tenamit Egipto, junes quicꞌ chic ta̱tauma̱nk,” chan.
Laj Moisés ut laj Aarón queꞌxba̱nu joꞌ quiyeheꞌ reheb xban li Ka̱cuaꞌ Dios. Chiru laj faraón rochbeneb laj cꞌanjel chiru, laj Aarón quixsacꞌ li nimaꞌ riqꞌuin lix xukꞌ. Chixjunil li haꞌ quiquicꞌoꞌ.
Quilajeꞌcam chixjunil li car saꞌ li nimaꞌ ut quichuhoꞌ li haꞌ. Incꞌaꞌ chic naru teꞌrucꞌ li haꞌ. Yalak bar saꞌ li tenamit Egipto, junes quicꞌ chic li haꞌ.
Joꞌ nak queꞌxcꞌutbesi lix naꞌlebeb laj Moisés ut laj Aarón, joꞌcan ajcuiꞌ queꞌxba̱nu laj kꞌe. Ut kꞌaxal cuiꞌchic quicacuuc xchꞌo̱l laj faraón. Joꞌ quixye li Ka̱cuaꞌ Dios, laj faraón chi ti̱c incꞌaꞌ qui-abin chiru.
Ut laj faraón ma̱cꞌaꞌ naraj re li cꞌaꞌru yo̱ chixcꞌulbal. Quixsukꞌisi rib ut co̱ saꞌ rochoch.
Xban nak incꞌaꞌ chic naru teꞌrucꞌ li haꞌ saꞌ li nimaꞌ, chixjunileb laj Egipto quilajeꞌxbec xhaꞌeb chire li nimaꞌ.
Cuukub cutan tzꞌakal quicuan chokꞌ quicꞌ li haꞌ xban li Ka̱cuaꞌ Dios.
Li nimal raylal xban li qꞌuila amochTojoꞌnak li Ka̱cuaꞌ Dios quixye re laj Moisés: —Tatxic cuiꞌchic riqꞌuin laj faraón ut ta̱ye re, “Joꞌcaꞌin xye li Ka̱cuaꞌ Dios: Xcanabakeb chi xic lin tenamit re nak tineꞌxlokꞌoni.
Ut cui incꞌaꞌ nacacanabeb chi xic lin tenamit, la̱in tintakla chak nabal li amoch saꞌ la̱ tenamit.
Numtajenakak xqꞌuial li amoch saꞌ li nimaꞌ. Telajeꞌoc saꞌ la̱ cuochoch ut teꞌoc ajcuiꞌ saꞌ li naꞌajej li nacatcuar cuiꞌ. Telajeꞌpiscꞌok saꞌ xbe̱n la̱ chꞌa̱t. Telajeꞌoc ajcuiꞌ saꞌ rochocheb le̱ mo̱s ut saꞌ rochocheb chixjunileb li tenamit. Telajeꞌoc saꞌ le̱ horno ut telajeꞌpiscꞌok saꞌ xbe̱n le̱ caꞌ.
Telajeꞌpiscꞌok cha̱cuix la̱at joꞌ ajcuiꞌ chirixeb chixjunileb li tenamit. Telajeꞌpiscꞌok ajcuiꞌ chirixeb la̱ mo̱s”, chan li Dios.
Ut li Ka̱cuaꞌ Dios quixye ajcuiꞌ re laj Moisés: —Ta̱ye re laj Aarón nak tixyeꞌ lix xukꞌ saꞌ xbe̱n li nimaꞌ, saꞌ xbe̱neb li cocꞌ rok haꞌ joꞌ ajcuiꞌ saꞌ xbe̱neb li palau re nak teꞌe̱lk chak li amoch saꞌ li haꞌ. Ut telajeꞌxic saꞌ li tenamit Egipto, chan.
Tojoꞌnak laj Aarón quixyeꞌ lix xukꞌ saꞌ xbe̱neb chixjunileb li haꞌ. Ut queꞌel chak li amoch ut quilajeꞌtam saꞌ li tenamit Egipto.
Ut eb laj kꞌe queꞌxba̱nu ajcuiꞌ joꞌ quixba̱nu laj Moisés. Ut nabaleb li amoch queꞌel chak xbaneb.
Tojoꞌnak laj faraón quixbok laj Moisés ut laj Aarón. Quixye reheb: —Te̱tzꞌa̱ma chiru li Ka̱cuaꞌ Dios nak ta̱risi chixjunil li amoch cuiqꞌuin joꞌ ajcuiꞌ riqꞌuineb lin tenamit. Ut la̱in tincanabeb chi xic laj Israel re nak teꞌxic chi mayejac chiru li Dios, chan.
Laj Moisés quixye re laj faraón: —La̱at yal a̱cue jokꞌe ta̱cuaj tintijok chiru li Dios cha̱cuix la̱at ut chirixeb la̱ mo̱s, joꞌ eb ajcuiꞌ la̱ tenamit. Tintzꞌa̱ma chiru nak ta̱risiheb li amoch e̱riqꞌuin ut saꞌ le̱ rochoch. Caꞌaj chic li joꞌ qꞌuial teꞌcana̱k saꞌ li nimaꞌ, chan laj Moisés.
Laj faraón quixye: —Cuulaj ajcuiꞌ ta̱ba̱nu.— Ut laj Moisés quixye re: —Cuulaj ajcuiꞌ ta̱uxma̱nk li cꞌaꞌru yo̱cat chixtzꞌa̱manquil re nak ta̱cuil nak ma̱cꞌaꞌ chic junak Dios joꞌ li Ka̱cuaꞌ Dios, li nakalokꞌoni la̱o.
Chixjunil li amoch teꞌe̱lk a̱cuiqꞌuin. Teꞌe̱lk ajcuiꞌ riqꞌuineb la̱ mo̱s, joꞌ ajcuiꞌ riqꞌuineb chixjunileb li tenamit. Teꞌe̱lk ajcuiꞌ saꞌ le̱ rochoch. Caꞌaj chic li cuanqueb saꞌ li nimaꞌ teꞌcana̱k, chan laj Moisés.
Tojoꞌnak laj Moisés rochben laj Aarón queꞌel riqꞌuin laj faraón. Ut laj Moisés quia̱tinac riqꞌuin li Ka̱cuaꞌ Dios chirix li amoch joꞌ quixtzꞌa̱ma laj faraón.
Li Ka̱cuaꞌ Dios quixba̱nu joꞌ quixtzꞌa̱ma laj Moisés. Quilajeꞌcam chixjunil li amoch saꞌ li rochocheb ut quilajeꞌcam chi ruꞌuj neba̱l ut saꞌ li cꞌaleba̱l.
Ut eb li cristian quilajeꞌxchꞌutub li camenak amoch ut cꞌajoꞌ nak quichuhoꞌ li tenamit xban xbo̱c li amoch.
Ut laj faraón nak quiril nak qui-usa li tenamit, quixcacuubresi cuiꞌchic xchꞌo̱l. Ut incꞌaꞌ qui-abin, joꞌ quixye li Ka̱cuaꞌ Dios.
Li nimla raylal xban li qꞌuila sukTojoꞌnak li Ka̱cuaꞌ Dios quixye re laj Moisés: —Joꞌcaꞌin ta̱ye re laj Aarón: “Ta̱yeꞌ la̱ xukꞌ ut ta̱sacꞌ li poks riqꞌuin la̱ xukꞌ. Riqꞌuin aꞌan teꞌpucꞌa̱nk li sukSaꞌ li versión Valera, naxye ucꞌ saꞌ li versículo 8:16. Abanan saꞌ li hebreo naxye suk. saꞌ li tenamit Egipto”, chan.
Joꞌcan queꞌxba̱nu. Laj Aarón quixyeꞌ lix xukꞌ ut quixsacꞌ li poks. Ut li qꞌuila suk nequeꞌcuoyoynac chirixeb li cristian joꞌ ajcuiꞌ chirixeb li xul. Chixjunil li poks saꞌ li tenamit Egipto quisukꞌi chokꞌ suk.
Joꞌcan ajcuiꞌ eb laj kꞌe queꞌxyal xba̱nunquil riqꞌuin lix naꞌleb aꞌan. Abanan incꞌaꞌ queꞌru. Li suk nequeꞌhananac chirixeb li cristian joꞌ eb ajcuiꞌ li xul.
Eb laj kꞌe queꞌxye re laj faraón: —Aꞌin xba̱nuhom li Ka̱cuaꞌ Dios, chanqueb. Ut joꞌ quixye li Dios, laj faraón kꞌaxal cuiꞌchic quicacuubresi xchꞌo̱l ut incꞌaꞌ qui-abin chiruheb.
Li nimla raylal xban li raxya̱tTojoꞌnak li Ka̱cuaꞌ Dios quixye re laj Moisés: —Ekꞌela tatcuacli̱k cuulaj ut tatxic chire li nimaꞌ. Aran ta̱cuoybeni laj faraón nak ta̱cuulak. Ta̱ye re, “Joꞌcaꞌin xye li Ka̱cuaꞌ Dios a̱cue: Canabeb chi xic lin tenamit re nak tineꞌxlokꞌoni.
Cui incꞌaꞌ nacacanabeb chi xic lin tenamit, la̱in tintakla li qꞌuila okꞌob chi raxya̱t saꞌ e̱ya̱nk ut saꞌ xya̱nkeb la̱ mo̱s, ut saꞌ xya̱nkeb chixjunileb li tenamit joꞌ eb ajcuiꞌ saꞌ le̱ rochoch. Telajeꞌqꞌuia̱nk saꞌ le̱ rochoch ut telajeꞌqꞌuia̱nk ajcuiꞌ saꞌ li chꞌochꞌ bar cuiꞌ telajexcua̱nk.
Aban incꞌaꞌ tintakla li raxya̱t saꞌ li naꞌajej Gosén bar cuanqueb cuiꞌ lin tenamit. Aran incꞌaꞌ teꞌchꞌiꞌchꞌiꞌi̱nk li raxya̱t. Riqꞌuin aꞌan te̱nau nak la̱in li Ka̱cuaꞌ Dios ut cuan incuanquil saꞌ xbe̱n li ruchichꞌochꞌ.
Sicꞌbil ru inban lin tenamit. Jalan tinba̱nu re lin tenamit la̱in chiru la̱ tenamit la̱at. Cuulaj ta̱ba̱numa̱nk li xinye a̱cue”, chan li Ka̱cuaꞌ Dios.
Ut joꞌcan quixba̱nu li Ka̱cuaꞌ Dios. Quilajeꞌtam li raxya̱t saꞌ rochoch laj faraón joꞌ ajcuiꞌ li rochocheb lix mo̱s. Xban xqꞌuialeb li raxya̱t quiyiboꞌ ru chixjunil li cꞌaꞌru cuan saꞌ li tenamit Egipto.
Ut laj faraón quixbok laj Moisés ut laj Aarón ut quixye reheb: —Mayejankex chak chiru le̱ Dios. Aban te̱ba̱nu saꞌ li naꞌajej li cuanquex cuiꞌ, chan.
Ut laj Moisés quixye re: —Incꞌaꞌ naru nakaba̱nu chi joꞌcan. Joꞌ nocomayejac la̱o chiru li Ka̱cuaꞌ Dios, xicꞌ nequeꞌril eb laj Egipto. Toloeꞌxqꞌue chi pec cui nocomayejac chiru li kaDios saꞌ li tenamit aꞌin.
Tento nak toxic aran saꞌ li chaki chꞌochꞌ oxib cutan chi be. Ut aran tomayejak chiru li kaDios joꞌ xye ke li Ka̱cuaꞌ, chan.
Laj faraón quixye re: —La̱in texincanab chi xic. Mayejankex chak chiru le̱ Dios saꞌ li chaki chꞌochꞌ. Aban incꞌaꞌ mas najt texxic. Textijok ajcuiꞌ chicuix, chan laj faraón.
Laj Moisés quichakꞌoc ut quixye re: —Xic cue anakcuan. Tintzꞌa̱ma chiru li Ka̱cuaꞌ Dios nak cuulaj ta̱risiheb li raxya̱t a̱cuiqꞌuin joꞌ ajcuiꞌ riqꞌuineb la̱ mo̱s ut riqꞌuineb chixjunileb le̱ tenamit. Ut, ba̱nu usilal, moa̱balakꞌi cuiꞌchic. Ma̱ye cuiꞌchic ke nak incꞌaꞌ toxic chi mayejac chiru li Ka̱cuaꞌ Dios, chan laj Moisés.
Ut laj Moisés qui-el riqꞌuin laj faraón. Quitijoc chiru li Ka̱cuaꞌ Dios.
Li Ka̱cuaꞌ Dios quixba̱nu joꞌ quixtzꞌa̱ma laj Moisés. Quirisiheb chixjunileb li raxya̱t riqꞌuin laj faraón joꞌ ajcuiꞌ riqꞌuineb lix mo̱s ut riqꞌuineb ajcuiꞌ chixjunileb li tenamit. Ti̱c ma̱ jun chic quicana.
Aban quixcacuubresi cuiꞌchic xchꞌo̱l laj faraón ut incꞌaꞌ quixcanabeb chi xic li tenamit.
Li nimla raylal nak quilajeꞌyajer li cuacaxTojoꞌnak li Ka̱cuaꞌ Dios quixye re laj Moisés: —Tatxic cuiꞌchic riqꞌuin laj faraón ut ta̱ye re, “Joꞌcaꞌin quixye li Ka̱cuaꞌ Dios, lix Dioseb aj hebreo: Xcanabakeb chi xic lin tenamit re nak tineꞌxlokꞌoni.
Ut cui incꞌaꞌ nacacanabeb chi xic ut yo̱cat chixbaybaleb chi xic,
la̱in tintakla jun nimla raylal saꞌ xbe̱neb le̱ queto̱mk li cuanqueb saꞌ cꞌaleba̱l. Jun nimla yajel ta̱tꞌanekꞌ saꞌ xbe̱neb li cuacax, li cacua̱y, li bu̱r, li camello joꞌ ajcuiꞌ eb li carner.
Abanan lix queto̱mkeb laj Israel ma̱cꞌaꞌ teꞌxcꞌul. Caꞌaj cuiꞌ lix queto̱mkeb laj Egipto teꞌca̱mk”, chan li Dios.
Chꞌolchꞌo chiru li Dios jokꞌe ta̱cꞌulma̱nk aꞌin. Li Dios quixye reheb: —Cuulaj tinba̱nu aꞌin saꞌ li tenamit, chan.
Joꞌ cuulajak chic li Ka̱cuaꞌ Dios quixba̱nu joꞌ quixye reheb. Quilajeꞌcam lix queto̱mkeb laj Egipto ut reheb laj Israel ma̱ jun queꞌcam.
Laj faraón quixtakla rilbal lix queto̱mkeb laj Israel ma xeꞌcam na. Ut quirabi resil nak ma̱ jun queꞌcam. Ut toj cau ajcuiꞌ xchꞌo̱l laj faraón ut incꞌaꞌ quixcanabeb chi xic li tenamit.
Li nimla raylal nak quilajeꞌxcꞌul li ni̱nki xoxLi Ka̱cuaꞌ Dios quixye re laj Moisés ut laj Aarón: —Te̱chap jun mo̱chꞌak li cha li cuan saꞌ xnaꞌaj li xam ut laj Moisés tixcut takecꞌ nak yo̱ chi iloc laj faraón.
Yalak bar saꞌ li tenamit Egipto pukuknac li cha saꞌ xbe̱neb li cristian ut pukuknac saꞌ xbe̱neb li xul. Riqꞌuin aꞌan ta̱ticla̱k li ni̱nki xox chirixeb, chan.
Tojoꞌnak queꞌxchap jun mo̱chꞌ li cha cuan saꞌ xnaꞌaj li xam. Chiru laj faraón laj Moisés quixcut takecꞌ. Riqꞌuin aꞌan quichal li ni̱nki xox saꞌ xbe̱neb li cristian ut saꞌ xbe̱neb ajcuiꞌ li xul.
Eb laj kꞌe incꞌaꞌ chic queꞌru xcꞌutbal xcuanquileb chiru laj Moisés xban nak yajeb xban li xox joꞌ nak queꞌyajer chixjunileb laj Egipto.
Ut li Ka̱cuaꞌ Dios quixcacuubresi xchꞌo̱l laj faraón. Joꞌ quixye li Ka̱cuaꞌ Dios re laj Moisés junxil, laj faraón ti̱c incꞌaꞌ quixba̱nu li cꞌaꞌru queꞌxye.
Li nimla raylal xban li sakbachTojoꞌnak li Ka̱cuaꞌ Dios quixye re laj Moisés: —Cuulaj tatcuacli̱k ekꞌela ut tatxic riqꞌuin laj faraón. Ta̱ye re, “Joꞌcaꞌin xye a̱cue li Ka̱cuaꞌ Dios, lix Dioseb laj hebreo: Canabeb chi xic lin tenamit re nak tineꞌxlokꞌoni.
Ut anakcuan tintakla cuiꞌchic jun raylal saꞌ a̱be̱n joꞌ ajcuiꞌ saꞌ xbe̱neb la̱ mo̱s ut saꞌ xbe̱neb ajcuiꞌ chixjunil li tenamit re nak chi joꞌcan ta̱nau nak ma̱ ani chic junak Dios saꞌ ruchichꞌochꞌ joꞌ la̱in.
Cui ta la̱in xcuaj, xinqꞌue raj jun nimla yajel saꞌ e̱be̱n ut xex-osoꞌ raj. Ut xexcuisi raj chi junaj cua saꞌ ruchichꞌochꞌ.
Abanan la̱in incꞌaꞌ xinqꞌue li yajel aꞌan saꞌ e̱be̱n xban nak xcuaj xcꞌutbal lin cuanquil che̱ru. Ut re ajcuiꞌ nak te̱ye cuesilal saꞌ ruchichꞌochꞌ.
Abanan la̱at riqꞌuin chixjunil aꞌin, toj yo̱cat chixnimobresinquil a̱cuib saꞌ xbe̱neb lin tenamit ut incꞌaꞌ nacacanabeb chi xic.
Cuulaj ta̱qꞌue retal nak saꞌ li o̱r aꞌin tintakla chak li ni̱nki sakbach hamamnak saꞌ xbe̱n li tenamit Egipto. Ma̱ jun sut e̱rilom chak chalen kꞌe cutan.
Joꞌcan nak takla xtzꞌapbal saꞌ rochocheb la̱ queto̱mk joꞌ ajcuiꞌ li cꞌaꞌru cuan a̱cue saꞌ cꞌaleba̱l re nak incꞌaꞌ teꞌca̱mk xban li sakbach li ta̱tꞌanekꞌ saꞌ xbe̱neb. Teꞌca̱mk xban li sakbach chixjunileb li cristian joꞌ eb ajcuiꞌ li xul cui incꞌaꞌ tzꞌaptzꞌo̱queb,” chan li Ka̱cuaꞌ Dios.
Cuanqueb saꞌ xya̱nkeb lix tenamit laj faraón li queꞌxpa̱b li cꞌaꞌru quixye li Dios. Quilajeꞌrocsiheb lix mo̱s joꞌ ajcuiꞌ eb lix queto̱mk li cuanqueb saꞌ cꞌaleba̱l.
Aban li incꞌaꞌ queꞌxpa̱b li ra̱tin li Ka̱cuaꞌ Dios queꞌxcanabeb lix mo̱s saꞌ cꞌaleba̱l rochbeneb lix queto̱mk.
Ut li Ka̱cuaꞌ Dios quixye re laj Moisés: —Taksi la̱ cuukꞌ ut riqꞌuin aꞌan ta̱tꞌanekꞌ chak li sakbach saꞌ chixjunil li tenamit Egipto. Telajeꞌtꞌanekꞌ chak saꞌ xbe̱neb li cristian ut saꞌ xbe̱neb li xul joꞌ ajcuiꞌ li acui̱mk yalak bar saꞌ li tenamit Egipto, chan li Dios.
Tojoꞌnak laj Moisés quixtaksi lix xukꞌ saꞌ choxa ut li Ka̱cuaꞌ Dios quixtakla li ca̱k ut li sakbach. Ni̱nki sakbach quixtakla chak li Ka̱cuaꞌ Dios saꞌ xbe̱n li tenamit.
Nareploc li rakꞌ ca̱k ut yo̱ li sakbach. Ma̱ jun sut queꞌxcꞌul chi joꞌcan saꞌ li tenamit Egipto chalen kꞌe cutan.
Xban li sakbach quilajeꞌosoꞌ chixjunil li cꞌaꞌak re ru li cuan chirix cab. Li sakbach quilajxtꞌani li cristian joꞌ ajcuiꞌ eb li xul. Quilajxtꞌani li acui̱mk ut quilajxpuqꞌui chixjunil li cheꞌ.
Caꞌaj chic saꞌ li tenamit Gosén incꞌaꞌ quicuan li sakbach xban nak aran cuanqueb laj Israel.
Tojoꞌnak laj faraón quixtakla xbokbaleb laj Moisés ut laj Aarón. Quixye reheb: —Anakcuan xinnau nak xinma̱cob. Moco li Ka̱cuaꞌ Dios ta cuan re. La̱in cuan cue ut joꞌ ajcuiꞌ lin tenamit cuanqueb re.
Ta̱ya̱ba xcꞌabaꞌ li Ka̱cuaꞌ Dios. Tzꞌakal li xkacꞌul riqꞌuin li sakbach ut li ca̱k. Texincanab chi xic. Incꞌaꞌ chic nacuaj nak texba̱yk arin, chan.
Laj Moisés quixye re: —Nak tincuulak chire li tenamit, aran tintaksi li cuukꞌ ut tintijok chiru li Ka̱cuaꞌ Dios. Incꞌaꞌ chic ta̱cua̱nk sakbach chi moco li ca̱k. Chi joꞌcan ta̱nau nak li Ka̱cuaꞌ Dios aꞌan laj e̱chal re li ruchichꞌochꞌ.
La̱in ninnau nak la̱at chanchanateb ajcuiꞌ laj cꞌanjel cha̱cuu. Incꞌaꞌ nequexucua ru li Ka̱cuaꞌ Dios, chan laj Moisés.
Xban nak ac cuan ru li acui̱mk cebada xcꞌabaꞌ ut yo̱ chi atzꞌumac li lino, nak quichal li sakbach saꞌ xbe̱n quilajxtoki chixjunil ut qui-osoꞌ.
Aban li trigo ut li centeno ma̱cꞌaꞌ queꞌxcꞌul xban nak toj yo̱queb chi mokc.
Tojoꞌnak laj Moisés qui-el riqꞌuin laj faraón. Nak cuan chire li tenamit, quixtaksi li rukꞌ ut quitijoc chiru li Ka̱cuaꞌ Dios. Ut li Dios quixchꞌanab li sakbach joꞌ ajcuiꞌ li ca̱k. Incꞌaꞌ chic xqꞌue li hab.
Ut laj faraón quiril nak chꞌanamil. Ma̱cꞌaꞌ chic li hab ut li ca̱k ut ma̱cꞌaꞌ chic li sakbach. Quima̱cob cuiꞌchic laj faraón. Quixcacuubresi xchꞌo̱l joꞌ eb ajcuiꞌ laj cꞌanjel chiru.
Quixcacuubresi cuiꞌchic xchꞌo̱l laj faraón ut incꞌaꞌ quixcanabeb chi xic laj Israel. Joꞌ quixye li Ka̱cuaꞌ Dios junxilaj re laj Moisés, joꞌcan quixba̱nu laj faraón.
Li nimla raylal xban li qꞌuila sa̱cꞌLi Ka̱cuaꞌ Dios quixye re laj Moisés: —Tatxic cuiꞌchic riqꞌuin laj faraón. La̱in xincacuubresi xchꞌo̱l laj faraón joꞌ eb ajcuiꞌ laj cꞌanjel chiru re nak tincꞌut lin cuanquilal chiruheb.
Chi joꞌcan la̱ex te̱ye reheb le̱ ralal e̱cꞌajol chanru xinba̱nu riqꞌuineb laj Egipto nak xincꞌutbesi lin cuanquilal chiruheb. La̱ex te̱nau nak relic chi ya̱l nak la̱in li Ka̱cuaꞌ Dios, chan.
Tojoꞌnak laj Moisés ut laj Aarón queꞌco̱eb riqꞌuin laj faraón ut queꞌxye re: —Joꞌcaꞌin xye a̱cue li Ka̱cuaꞌ Dios, lix Dioseb laj hebreo. “¿Jokꞌe ta̱cubsi a̱cuib chicuu? Canabeb chi xic lin tenamit re nak tineꞌxlokꞌoni.”
Ut xye ajcuiꞌ, “Cui incꞌaꞌ nacacanabeb chi xic lin tenamit, cuulaj tintaklaheb laj sa̱cꞌ saꞌ la̱ tenamit.
Tintakla li qꞌuila okꞌob chi aj sa̱cꞌ toj retal ta̱tzꞌapo̱nk li chꞌochꞌ xbaneb. Joꞌ qꞌuial chic li acui̱mk incꞌaꞌ xcamsi li sakbach, talajeꞌxlou chixjunil. Talajeꞌxcuaꞌ xxak li cheꞌ.
Talajeꞌoc saꞌ la̱ cuochoch ut talajeꞌoc saꞌ rochocheb laj cꞌanjel cha̱cuu. Talajeꞌoc saꞌ rochocheb chixjunileb laj Egipto. Ma̱ jun sut rilomeb la̱ yucuaꞌ chi moco la̱ xeꞌto̱nil yucuaꞌ joꞌ tinba̱nu anakcuan,” chan a̱cue li Ka̱cuaꞌ Dios.— Ut laj Moisés qui-el riqꞌuin laj faraón.
Ut eb laj cꞌanjel chiru laj faraón queꞌxye re laj faraón: —¿Joꞌ najtil chic toxchꞌiꞌchꞌiꞌi li cui̱nk aꞌin? Canabeb chi xic laj Israel re nak eb aꞌan teꞌxlokꞌoni chak li Ka̱cuaꞌ lix Dioseb. ¿Ma incꞌaꞌ nacacuil nak x-osoꞌ li katenamit Egipto? chanqueb.
Tojoꞌnak laj Moisés rochben laj Aarón queꞌcꞌameꞌ cuiꞌchic riqꞌuin laj faraón. Laj faraón quixye reheb: —Ayukex. Lokꞌonihomak chak ru li Ka̱cuaꞌ le̱ Dios. Ut ¿aniheb li teꞌxic? chan.
Laj Moisés quichakꞌoc ut quixye: —Chikajunilo toxic xban nak toninkꞌei̱k chiru li kaDios. Teꞌxic li sa̱j cui̱nk ut teꞌxic li che̱quel cui̱nk ut teꞌxic ajcuiꞌ li ixk. Talajeꞌxic li kalal kacꞌajol. Ut takacꞌameb ajcuiꞌ li kaqueto̱mk, chan laj Moisés.
Laj faraón saꞌ joskꞌil quichakꞌoc. Re xhobbaleb nak quixye reheb: —Tento nak le̱ Dios textenkꞌa cui la̱ex cuan saꞌ e̱chꞌo̱l nak texincanab chi xic e̱rochbeneb le̱ cocꞌal. La̱in moco texincanab ta chi xic chi joꞌcan. La̱in ninnau nak inbalakꞌinquil te̱raj. Ma̱ jaruj texincanab chi xic che̱junilex.
Incꞌaꞌ texincanab chi xic cui te̱cꞌameb li cocꞌal. Caꞌaj cuiꞌ la̱ex cui̱nk texxic ut te̱lokꞌoni le̱ Dios cui joꞌcan te̱raj, chan. Ut laj Moisés ut laj Aarón queꞌa̱linasi̱c saꞌ junpa̱t xban laj faraón.
Tojoꞌnak li Ka̱cuaꞌ Dios quixye re laj Moisés: —Taksi la̱ cuukꞌ saꞌ xbe̱n li tenamit re nak teꞌcha̱lk laj sa̱cꞌ. Chixjunil li cheꞌcꞌam saꞌ li tenamit Egipto li incꞌaꞌ qui-osoꞌ xban li sakbach, eb laj sa̱cꞌ talajeꞌxcuaꞌ chixjunil, chan li Ka̱cuaꞌ Dios.
Ut laj Moisés quixtaksi lix xukꞌ saꞌ xbe̱n li tenamit Egipto. Ut li Ka̱cuaꞌ Dios quixtakla chak jun cacuil ikꞌ. Li ikꞌ qui-el chak saꞌ li na-el cuiꞌ chak li sakꞌe. Chi cutan ut chi kꞌojyi̱n yo̱ li ikꞌ. Ut nak quisake̱u, ac cuanqueb chic laj sa̱cꞌ li quixcꞌam chak li ikꞌ.
Quilajeꞌchal laj sa̱cꞌ saꞌ chixjunil li tenamit Egipto. Nequeꞌhirirnac saꞌ xbe̱n li tenamit. Ma̱ jun cua rilomeb aꞌan chalen kꞌe cutan, ut ma̱ jun cua chic teꞌril mokon.
Quikꞌojyi̱noꞌ li tenamit Egipto xban xqꞌuialeb laj sa̱cꞌ ut quitzꞌapon li chꞌochꞌ xbaneb. Quilajeꞌxcuaꞌ chixjunil li cheꞌcꞌam ut li ru li cheꞌ li incꞌaꞌ qui-osoꞌ xban li sakbach, quilajeꞌxcꞌux. Ma̱cꞌaꞌ chic cꞌaꞌru rax ru quicana saꞌ li tenamit Egipto. Ma̱cꞌaꞌ chic li cheꞌcꞌam, ut ma̱cꞌaꞌeb chic lix xak li cheꞌ.
Tojoꞌnak laj faraón saꞌ junpa̱t quixbokeb chak laj Moisés ut laj Aarón. Quixye reheb: —Xinma̱cob chiru li Ka̱cuaꞌ la̱ Dios ut che̱ru ajcuiꞌ la̱ex.
Tintzꞌa̱ma che̱ru, caꞌaj chic anakcuan te̱cuy inma̱c ut chetzꞌa̱ma chiru le̱ Dios nak ta̱risi li raylal aꞌin saꞌ kabe̱n nak toj ma̱jiꞌ nococam, chan.
Laj Moisés qui-el riqꞌuin laj faraón ut quitijoc chiru li Ka̱cuaꞌ Dios.
Li Ka̱cuaꞌ Dios quixtakla cuiꞌchic jun li cacuil ikꞌ. Qui-el chak saꞌ li na-oc cuiꞌ li sakꞌe. Eb laj sa̱cꞌ quilajeꞌcꞌameꞌ xban li ikꞌ. Quilajeꞌcuteꞌ saꞌ jun li nimla palau Mar Rojo xcꞌabaꞌ. Ti̱c ma̱ jun chic laj sa̱cꞌ queꞌcana saꞌ li tenamit Egipto.
Li Ka̱cuaꞌ Dios quixcacuubresi cuiꞌchic xchꞌo̱l laj faraón ut incꞌaꞌ quixcanabeb chi xic laj Israel.
Li nimal raylal xban nak quikꞌojyi̱noꞌ ru li cutanUt li Ka̱cuaꞌ Dios quixye re laj Moisés: —Taksi la̱ cuukꞌ re nak ta̱kꞌojyi̱nokꞌ ru li cutan saꞌ li tenamit Egipto. Nak teꞌbe̱k li cristian yal teꞌxchꞌeꞌ aj chic lix beheb, chan li Dios.
Laj Moisés quixtaksi li rukꞌ. Ut chirix aꞌan quicana li tenamit saꞌ kꞌojyi̱n. Oxib cutan tzꞌakal quicuan li kꞌojyi̱n saꞌ li tenamit Egipto.
Eb laj Egipto incꞌaꞌ quiru queꞌril rib xban nak kꞌaxal cuiꞌchic kꞌojyi̱n. Yal chunchu̱queb aj chic saꞌ lix naꞌajeb saꞌ kꞌojyi̱n chiru li oxib cutan aꞌan. Ma̱ bar naru nequeꞌxic. Abanan eb laj Israel cutan saꞌ li naꞌajej li cuanqueb cuiꞌ.
Ut laj faraón quixbok laj Moisés ut quixye re: —Ayukex. Lokꞌonihomak chak le̱ Dios. Cꞌamomak le̱ cocꞌal. Aban le̱ queto̱mk te̱canab arin, chan.
Laj Moisés quixye re: —Tento nak takacꞌam li kaqueto̱mk re nak tomayejak chiru li kaDios. Takacꞌat li kamayej.
Tento nak ta̱xic chixjunil li kaqueto̱mk. Ma̱ jun takacanab. Saꞌ xya̱nkeb aꞌan takasicꞌ ru li takamayeja chiru li kaDios. Nak tocuulak, aran takil bar cuan li ta̱cꞌanjelak chokꞌ kamayej, chan laj Moisés.
Ut li Dios quixcacuubresi cuiꞌchic xchꞌo̱l laj faraón ut incꞌaꞌ quixcanabeb chi xic.
Laj faraón quixye re laj Moisés: —Elen saꞌ xnakꞌ cuu chi junaj cua. Incꞌaꞌ chic nacuaj rilbal a̱cuu. Relic chi ya̱l tinye a̱cue nak saꞌ li cutan nak tincuil cuiꞌchic a̱cuu, aran tatca̱mk, chan.
Laj Moisés quixye re: —Chi-uxma̱nk joꞌ xaye. Nak tine̱lk a̱cuiqꞌuin, incꞌaꞌ chic ta̱cuil cuu, chan re.
Resilal xcamiqueb li xbe̱n alalbejLi Ka̱cuaꞌ Dios quixye re laj Moisés: —Jun chic li raylal tintakla saꞌ xbe̱n laj faraón joꞌ cuiꞌ anchal saꞌ xbe̱n li tenamit Egipto. Ut riqꞌuin aꞌan texcanab chi xic laj faraón. Aban moco caꞌaj cuiꞌ ta texcanab chi xic, texra̱lina chi junaj cua.
Anakcuan ta̱yeheb re laj Israel nak xicakeb chixtzꞌa̱manquil li cꞌaꞌak re ru yi̱banbil riqꞌuin oro ut plata. Eb li cui̱nk teꞌxtzꞌa̱ma riqꞌuineb li rech cui̱nkilal ut joꞌcan ajcuiꞌ li ixk teꞌxtzꞌa̱ma riqꞌuin li rech ixkilal, chan li Dios.
Li Ka̱cuaꞌ Dios quixkꞌunobresi xchꞌo̱leb li tenamit Egipto ut queꞌxcꞌam rib saꞌ usilal riqꞌuineb laj Israel. Ut eb laj cꞌanjel chiru laj faraón joꞌ eb ajcuiꞌ chixjunileb laj Egipto queꞌx-oxlokꞌi chic laj Moisés.
Ut laj Moisés quixye re laj faraón: —Joꞌcaꞌin xye li Ka̱cuaꞌ Dios a̱cue. “Saꞌ tuktu kꞌojyi̱n tincꞌut lin cuanquil saꞌ li tenamit Egipto.
Ut telajeꞌca̱mk li xbe̱neb e̱ralal. Ma̱ jun teꞌcolekꞌ. Usta la̱at aj faraón, kꞌaxal nim a̱cuanquil, ta̱ca̱mk li xbe̱n a̱cualal. Ut teꞌca̱mk ajcuiꞌ xbe̱n ralal la̱ mo̱s ixk li ti̱c ma̱cꞌaꞌeb xcuanquil. (Chixjunileb li xbe̱n ralaleb laj Egipto talajeꞌca̱mk, li cuanqueb xcuanquil ut li ma̱cꞌaꞌeb xcuanquil.) Ut talajeꞌca̱mk ajcuiꞌ chixjunil li xbe̱n ral li queto̱mk.
Saꞌ li tenamit Egipto chixjunileb li cristian japjo̱keb re chi ya̱bac xban xrahileb saꞌ xchꞌo̱l. Ma̱ jun sut rabiom li ya̱bac chi joꞌcan chi moco ta̱abima̱nk mokon.
Riqꞌuin aꞌan ta̱qꞌue retal nak eb laj Israel sicꞌbileb ru inban. Eb aꞌan ma̱cꞌaꞌ teꞌxcꞌul, chi moco eb li xul. Chi ti̱c ma̱cꞌaꞌ teꞌxcꞌul laj Israel. Chi moco li tzꞌiꞌ teꞌcuo̱bak,” chan li Dios.—
Laj Moisés quixye ajcuiꞌ re laj faraón: —Chixjunileb laj cꞌanjel cha̱cuu teꞌcuulak cuiqꞌuin ut teꞌxcuikꞌib rib chicuu chixtzꞌa̱manquil. Teꞌxye cue, “Ba̱nu usilal, ayu la̱at a̱cuochbeneb chixjunileb laj Israel.” Ut chirix aꞌan tine̱lk saꞌ e̱ya̱nk, chan laj Moisés. Ut ma̱ caꞌchꞌin xjoskꞌil laj Moisés nak qui-el riqꞌuin laj faraón.
Junxil yebil chak re laj Moisés nak li Ka̱cuaꞌ Dios quixye re: —Laj faraón incꞌaꞌ ta̱abi̱nk cha̱cuu xban nak toj tincuaj tincꞌutbesi lin cuanquil chiruheb chixjunileb li tenamit Egipto.—
Laj Moisés rochben laj Aarón sachba chꞌo̱lej li quilajeꞌxba̱nu chiru laj faraón. Aban li Ka̱cuaꞌ Dios quixcacuubresi xchꞌo̱l laj faraón ut incꞌaꞌ quixcanabeb chi e̱lc laj Israel saꞌ li tenamit Egipto.
Li Ka̱cuaꞌ Dios quinumeꞌ chi rakoc a̱tinNak toj cuanqueb saꞌ li tenamit Egipto laj Moisés ut laj Aarón, li Ka̱cuaꞌ Dios quixye reheb:
—Chalen anakcuan li po aꞌin, aꞌan chic xticlajic li chihab chokꞌ e̱re la̱ex.
Ta̱ye reheb chixjunileb laj Israel nak saꞌ li laje̱b xbe li po aꞌin li cui̱nk teꞌxsicꞌ junju̱nk li carner re li ju̱nk cabal.
Li incꞌaꞌ qꞌuiheb saꞌ rochocheb naru nequeꞌxic chi cuaꞌac rochbeneb li rech cabal re nak teꞌxchoy xtiubal chixjunil lix tibel li carner. Teꞌxbir rix joꞌ qꞌuial li teꞌxtzaca li junju̱nk.
Usta chiba̱t, usta carner li te̱sicꞌ, jun chihab cua̱nk re. Ut tento nak te̱lom li xul ut cha̱bilak. Ma̱cꞌaꞌak xyajel.
Nak ac xesicꞌ aꞌan, te̱xoc. Saꞌ li ca̱laju xbe li po nak ac namoynac, che̱junilex la̱ex aj Israel te̱camsi li chꞌina carner li sicꞌbil ru e̱ban.
Te̱rach xquiqꞌuel li carner saꞌ xbe̱n li puerta joꞌ ajcuiꞌ saꞌ xcaꞌ pacꞌalil xcheꞌel li puerta saꞌ le̱ rochoch li bar yo̱kex cuiꞌ chi cuaꞌac.
Saꞌ li kꞌojyi̱n aꞌan te̱tiu li tib chi pombil. Te̱cuaꞌ li caxlan cua xcomon li ma̱cꞌaꞌ xchꞌamal ut te̱tiu ajcuiꞌ li ichaj li cꞌa.
Me̱tiu li tib chi rax chi moco chi caltinbil. Chi pombil ban te̱tiu. Te̱pom chi tzꞌakal jun, rochben lix jolom joꞌ ajcuiꞌ li rok, li rukꞌ ut li cuan chi saꞌ. Caꞌaj cuiꞌ lix tzꞌaj te̱risi.
Li joꞌ qꞌuial li ta̱elaꞌa̱nk me̱xoc chokꞌ re cuulaj. Cꞌatbil te̱ba̱nu.
Joꞌcaꞌin nak texcuaꞌak. Nak ac oc e̱re chi cuaꞌac, te̱qꞌue lix cꞌa̱mal e̱saꞌ, te̱qꞌue le̱ xa̱b ut cua̱nk le̱ xukꞌ saꞌ le̱ rukꞌ. Te̱se̱ba e̱rib chi cuaꞌac. Aꞌan li kꞌojyi̱n nak la̱in li Ka̱cuaꞌ Dios tinnumekꞌ saꞌ li tenamit chi rakoc a̱tin.
Saꞌ li kꞌojyi̱n aꞌan la̱in tincuulak saꞌ li tenamit Egipto ut tincamsiheb chixjunileb li xbe̱n alalbej saꞌ xya̱nkeb laj Egipto, joꞌcan ajcuiꞌ li xbe̱n ral li queto̱mk. Ut la̱in tinrakok a̱tin saꞌ xbe̱neb lix dioseb li nequeꞌxlokꞌoni laj Egipto. La̱in li Ka̱cuaꞌ Dios.
Abanan li quicꞌ li te̱qꞌue chire xpuertil le̱ rochoch, aꞌan e̱retalil chicuu. Nak tincuil li quicꞌ, ti̱c tinnumekꞌ saꞌ le̱ rochoch. Ma̱ jun ta̱ca̱mk saꞌ le̱ rochoch la̱ex nak yo̱kin chixcamsinquil li xbe̱n ralaleb aj Egipto.
Chalen anakcuan rajlal chihab texninkꞌei̱k saꞌ incꞌabaꞌ saꞌ li ca̱laju xbe li xbe̱n po. Li ninkꞌe aꞌin, aꞌan re xjulticanquil chanru nak xexincol.
Chiru cuukub cutan yo̱kex chi ninkꞌei̱k. Saꞌ li xbe̱n cutan te̱risi saꞌ le̱ rochoch chixjunil li naxqꞌue chi si̱pocꞌ li caxlan cua. Re li cuukub cutan li caxlan cua li te̱cuaꞌ, aꞌan xcomon li ma̱cꞌaꞌ xchꞌamal. Ut cui junak cristian tixcuaꞌ li caxlan cua xcomon li cuan xchꞌamal, li cristian aꞌan ta̱isi̱k saꞌ e̱ya̱nk.
Saꞌ li xbe̱n cutan te̱chꞌutub e̱rib re xlokꞌoninquil li Dios ut saꞌ xcuuk li cutan te̱chꞌutub cuiꞌchic e̱rib. Saꞌ li cuib chi cutan aꞌan incꞌaꞌ textrabajik. Caꞌaj cuiꞌ le̱ tzacae̱mk te̱yi̱b.
Saꞌ li ninkꞌe aꞌin te̱cuaꞌ li caxlan cua li ma̱cꞌaꞌ xchꞌamal xban nak saꞌ li cutan aꞌin xexcuisi saꞌ li tenamit Egipto. Re xjulticanquil li xinba̱nu e̱re, chalen anakcuan, texninkꞌei̱k chi joꞌcaꞌin joꞌ eb ajcuiꞌ le̱ ralal e̱cꞌajol. Li cutan aꞌan te̱oxlokꞌi xban nak saꞌ li cutan aꞌan quexcuisi saꞌ li tenamit Egipto.
Saꞌ li ca̱laju xbe li xbe̱n po nak ac namoynac, te̱cuaꞌ li caxlan cua li ma̱cꞌaꞌ xchꞌamal. Joꞌcaꞌin te̱ba̱nu toj saꞌ li jun xcaꞌcꞌa̱l (21) xbe li po.
Cuukub cutan tzꞌakal ma̱cꞌaꞌak li caxlan cua li cuan xchꞌamal saꞌ le̱ rochoch. Li ani ta̱cuaꞌok li caxlan cua li cuan xchꞌamal usta yal numecꞌ yo̱ saꞌ e̱ya̱nk, aꞌan ta̱isi̱k saꞌ e̱ya̱nk la̱ex aj Israel.
Me̱cuaꞌ li caxlan cua xcomon li cuan xchꞌamal. Saꞌ li junju̱nk chi cab, te̱cuaꞌ li caxlan cua li ma̱cꞌaꞌ xchꞌamal, chan li Dios.
Tojoꞌnak laj Moisés quixbok chixjunileb li cui̱nk li nequeꞌcꞌamoc be saꞌ xya̱nkeb laj Israel. Quixye reheb: —Te̱sicꞌ le̱ carner ut te̱camsi chokꞌ reheb li cuanqueb saꞌ le̱ rochoch.
Lix quiqꞌuel te̱cꞌul saꞌ junak ucꞌal. Te̱tzꞌa saꞌ li quicꞌ jun chꞌina jo̱b li pim hisopo xcꞌabaꞌ. Te̱qꞌue li quicꞌ saꞌ xbe̱n li puerta joꞌ ajcuiꞌ chiru li cheꞌ li cuan xcaꞌ pacꞌalil li puerta. Ut chetzꞌapak e̱rib saꞌ le̱ rochoch ut ma̱ jun e̱re ta̱e̱lk toj saꞌ li cutan jun chic.
Li Dios ta̱numekꞌ saꞌ li junju̱nk chi cab chi rakoc a̱tin saꞌ xbe̱neb laj Egipto. Nak ta̱ril li quicꞌ saꞌ xbe̱n li puerta ut chiru li cuib chi cheꞌ li cuan saꞌ xcaꞌ pacꞌalil li puerta, li Ka̱cuaꞌ Dios ta̱numekꞌ saꞌ li puerta aꞌan ut tixram lix be laj camsinel re nak incꞌaꞌ ta̱oc saꞌ le̱ rochoch chi camsi̱nc.
Ut chalen anakcuan la̱ex, joꞌ eb ajcuiꞌ le̱ ralal e̱cꞌajol, texninkꞌei̱k rajlal chihab re xjulticanquil chanru nak quex-el chak saꞌ li tenamit Egipto.
Ut chi joꞌcaꞌin chexninkꞌei̱k ut chexlokꞌoni̱nk ajcuiꞌ nak texcuulak saꞌ li naꞌajej yechiꞌinbil e̱re xban li Ka̱cuaꞌ Dios.
Nak eb le̱ ralal e̱cꞌajol teꞌxpatzꞌ e̱re cꞌaꞌru xya̱lal li ninkꞌe li nequeba̱nu,
la̱ex te̱chꞌolob xya̱lal chiruheb ut te̱ye reheb: —Aꞌin li kamayej re li ninkꞌe pascua re xjulticanquil chanru nak coxcol li Ka̱cuaꞌ Dios nak quinumeꞌ saꞌ li tenamit Egipto chixcamsinquil li xbe̱n ralaleb, chan laj Moisés. Ut eb laj Israel quilajeꞌxxulub xjolomeb ut queꞌxlokꞌoni li Ka̱cuaꞌ Dios.
Chixjunil li queꞌyeheꞌ re laj Moisés ut laj Aarón xban li Ka̱cuaꞌ Dios, queꞌxba̱nu chixjunileb laj Israel.
Lix camiqueb li xbe̱n alalbejTuktu kꞌojyi̱n nak quinumeꞌ li Dios ut quilajxcamsi li xbe̱n ralaleb chixjunileb laj Egipto. Quixcamsi li xbe̱n ralal laj faraón li kꞌaxal nim xcuanquil. Joꞌcan ajcuiꞌ li cuanqueb saꞌ tzꞌalam queꞌcamsi̱c ajcuiꞌ li xbe̱n ralaleb. Quilajeꞌcamsi̱c ajcuiꞌ li xbe̱n raleb lix queto̱mk chixjunileb, li cuanqueb xcuanquil ut li ma̱cꞌaꞌeb xcuanquil, chixjunileb li xbe̱n alalbej aran Egipto quilajeꞌcamsi̱c.
Chiru li kꞌojyi̱n aꞌan laj faraón quicuacli. Queꞌcuacli ajcuiꞌ laj cꞌanjel chiru joꞌ eb ajcuiꞌ chixjunileb laj Egipto. Japjo̱queb re chi ya̱bac chixjunileb laj Egipto xban nak camenakeb chic li xbe̱n alalbej saꞌ li junju̱nk chi cab.
Ut laj faraón chiru li kꞌojyi̱n aꞌan quixtakla resil riqꞌuin laj Moisés ut laj Aarón. Quixye reheb: —Cuaclinkex. Elenkex saꞌ junpa̱t. Cꞌamomak che̱rix chixjunileb laj Israel. Ayukex ut lokꞌonihomak ru le̱ Dios joꞌ xeye cue.
Cꞌamomak ajcuiꞌ che̱rix le̱ queto̱mk joꞌ xeye. Se̱bahomak e̱rib ut elenkex. Ut textijok chicuix, chan laj faraón.
Ut eb laj Egipto queꞌxtzꞌa̱ma ajcuiꞌ chiruheb laj Israel nak teꞌxse̱ba rib chi xic. Queꞌxye reheb: —Ayukex. Se̱bahomak e̱rib chi xic. Ma̱re toca̱mk ajcuiꞌ la̱o cui la̱ex incꞌaꞌ texxic, chanqueb.
Tojoꞌnak eb laj Israel queꞌxcꞌam xkꞌemal lix caxlan cua li ma̱cꞌaꞌ xchꞌamal. Queꞌxlan lix yokꞌlebeb saꞌ lix tꞌicr ut queꞌri̱ka.
Ac quilajeꞌxba̱nu laj Israel joꞌ queꞌyeheꞌ reheb xban laj Moisés. Quilajeꞌxtzꞌa̱ma riqꞌuineb laj Egipto li cꞌaꞌak re ru yi̱banbil riqꞌuin oro ut plata joꞌ ajcuiꞌ li rakꞌeb.
Ut xban nak li Dios quixba̱nu nak eb laj Egipto queꞌxcꞌam rib saꞌ usilal riqꞌuineb laj Israel, aꞌ yal cꞌaꞌru li queꞌxtzꞌa̱ma, queꞌqꞌueheꞌ reheb. Chi joꞌcaꞌin eb laj Israel quiru queꞌrisi chiruheb laj Egipto nabal lix biomaleb.
Eb laj Israel queꞌe̱lelic chak EgiptoUt chixjunileb laj Israel queꞌel saꞌ li tenamit Ramesés ut queꞌco̱eb saꞌ li tenamit Sucot. Cuakib ciento mil (600,000) chi cui̱nk queꞌco̱eb chi rok. Eb li ixk joꞌ ajcuiꞌ eb li cocꞌal ma̱cꞌaꞌeb saꞌ ajl.
Ut cuanqueb ajcuiꞌ laj Egipto li queꞌco̱eb saꞌ xya̱nkeb laj Israel. Ut ma̱ caꞌchꞌin xqꞌuial li queto̱mk queꞌxcꞌam nak queꞌco̱eb.
Xban nak queꞌisi̱c saꞌ junpa̱t saꞌ li tenamit Egipto, ma̱cꞌaꞌ xcuaheb yi̱banbil nak queꞌco̱eb. Riqꞌuin lix kꞌemal li caxlan cua queꞌxyi̱b lix cuaheb xcomon li ma̱cꞌaꞌ xchꞌamal.
Eb laj Israel ca̱hib ciento riqꞌuin laje̱b xcaꞌcꞌa̱l (430) chihab queꞌcuan saꞌ li tenamit Egipto.
Tzꞌakal ca̱hib ciento riqꞌuin laje̱b xcaꞌcꞌa̱l (430) chihab nak queꞌel chixjunileb li ralal xcꞌajol li Dios saꞌ li tenamit Egipto.
Saꞌ li kꞌojyi̱n aꞌan li Ka̱cuaꞌ Dios quixcꞌacꞌaleheb chi us re nak ta̱risiheb saꞌ li tenamit Egipto. Ut riqꞌuin aꞌan chalen anakcuan eb laj Israel nequeꞌxyoꞌle li kꞌojyi̱n aꞌan re xjulticanquil chanru nak li Dios quirisiheb chak saꞌ li tenamit Egipto.
Li Ka̱cuaꞌ Dios quixye re laj Moisés ut laj Aarón: —Joꞌcaꞌin nak texninkꞌei̱k re xjulticanquil chanru nak quexcoleꞌ nak quilajeꞌcamsi̱c li xbe̱n ralaleb laj Egipto. Ma̱ jun jalan xtenamit ta̱tzaca̱nk re li tzacae̱mk aꞌin.
Eb li lokꞌbil mo̱s cui xeꞌxcꞌul li circuncisión ta̱ru̱k teꞌxtzaca li tzacae̱mk aꞌan.
Abanan eb li tojbil mo̱s ut eb li jalan xtenamiteb incꞌaꞌ naru teꞌxtzaca.
Te̱ba̱nu saꞌ junak cab. Incꞌaꞌ te̱jor li bak ut incꞌaꞌ te̱risi li tib chirix cab.
Chixjunileb laj Israel teꞌxba̱nu aꞌin.
Cui cuanqueb jalan xtenamit saꞌ e̱ya̱nk teꞌraj teꞌoque̱nk saꞌ li ninkꞌe aꞌin, tento nak chixjunileb li cui̱nk teꞌxcꞌul li circuncisión. Nak ac xeꞌxcꞌul li circuncisión, e̱comonakeb chic ut naru chic teꞌxtzaca li tzacae̱mk aꞌin. Aban ma̱ jun naru ta̱tzaca̱nk re cui ma̱jiꞌ xcꞌul li circuncisión.
Juntakꞌe̱takeb chic li chakꞌrab chokꞌ e̱re joꞌ ajcuiꞌ reheb li jalan xtenamiteb.
Ut joꞌ quixye li Ka̱cuaꞌ Dios reheb laj Moisés ut laj Aarón, joꞌcan quilajeꞌxba̱nu chixjunileb laj Israel.
Ut saꞌ li cutan aꞌan li Ka̱cuaꞌ Dios quilajrisiheb chak laj Israel saꞌ li tenamit Egipto. Nequeꞌtzololnac nak queꞌel laj Israel chi junju̱nk chꞌu̱tal aran Egipto.
Li xbe̱n ralaleb laj Israel queꞌkꞌaxtesi̱c saꞌ rukꞌ li Dios(1-2) Ut li Ka̱cuaꞌ Dios quixye re laj Moisés: —Te̱kꞌaxtesi saꞌ cuukꞌ chixjunileb li xbe̱n ralaleb laj Israel ut te̱kꞌaxtesi ajcuiꞌ chixjunileb li xbe̱n raleb li xul. Eb aꞌan cue la̱in, chan.
(-)
(3-4) Laj Moisés quixye reheb: —Saꞌ li cutan aꞌin re li po Abib xcꞌabaꞌ, li Ka̱cuaꞌ Dios xexrisi chak saꞌ li tenamit Egipto bar quexcꞌanjelac cuiꞌ chak chokꞌ rahobtesinbil mo̱s. Rajlal chihab texninkꞌei̱k re xjulticanquil li cutan aꞌin, ut me̱cuaꞌ li caxlan cua li cuan xchꞌamal. Chijulticokꞌ e̱re nak riqꞌuin xnimal xcuanquil li Dios quexrisi chak saꞌ li tenamit aꞌan.
(-)
Texninkꞌei̱k rajlal chihab saꞌ li po aꞌin nak cua̱nkex saꞌ li naꞌajej li yo̱ cuiꞌ che̱cꞌambal li Ka̱cuaꞌ Dios. Aꞌan li cha̱bil naꞌajej li quiyechiꞌi̱c reheb le̱ xeꞌto̱nil yucuaꞌ junxil ut te̱re̱chani ajcuiꞌ la̱ex. Aꞌan li naꞌajej cuanqueb cuiꞌ laj cananeo, laj heteo, laj amorreo, laj heveo ut laj jebuseo.
Cuukub cutan te̱cuaꞌ li caxlan cua li ma̱cꞌaꞌ xchꞌamal. Saꞌ xcuuk li cutan ta̱cua̱nk li ninkꞌe saꞌ xcꞌabaꞌ li Ka̱cuaꞌ Dios re xnimanquil ru.
Cuukub cutan te̱cuaꞌ li caxlan cua li ma̱cꞌaꞌ xchꞌamal. Incꞌaꞌ ta̱cua̱nk saꞌ e̱ya̱nk li caxlan cua li nasipoꞌ. Ut incꞌaꞌ ajcuiꞌ ta̱cua̱nk saꞌ le̱ rochoch li na-oc chokꞌ xchꞌamal li caxlan cua.
Ut saꞌ li cutan aꞌan te̱ye reheb le̱ ralal e̱cꞌajol nak li ninkꞌe li nequeba̱nu, aꞌan re xjulticanquil nak li Ka̱cuaꞌ Dios qui-isin chak e̱re saꞌ li tenamit Egipto.
Li ninkꞌe aꞌin ta̱cꞌanjelak chokꞌ e̱re re xjulticanquil nak junelic cua̱nk saꞌ e̱chꞌo̱l li ra̱tin li Dios. Te̱serakꞌi ajcuiꞌ li ra̱tin li Dios xban nak riqꞌuin lix nimal xcuanquilal, li Dios quexrisi chak saꞌ li tenamit Egipto.
Rajlal chihab texninkꞌei̱k. Ac chꞌolchꞌo cꞌaꞌru li cutan texninkꞌei̱k cuiꞌ.
Li Ka̱cuaꞌ Dios texcꞌam saꞌ li tenamit bar cuanqueb cuiꞌ laj cananeo. Ut la̱ex te̱re̱chani li naꞌajej li quixyechiꞌi li Dios reheb le̱ xeꞌto̱nil yucuaꞌ junxilaj ut quixyechiꞌi ajcuiꞌ e̱re la̱ex.
Nak cua̱nkex aran la̱ex te̱kꞌaxtesi saꞌ rukꞌ li Dios li xbe̱n e̱ralal. Ut te̱kꞌaxtesi ajcuiꞌ re chixjunil li xbe̱n raleb le̱ queto̱mk li te̱lom.
Li xbe̱n raleb li bu̱r, carner te̱qꞌue chokꞌ ru̱chil. Cui incꞌaꞌ te̱qꞌue ru̱chil, tento nak te̱tok xcux li chꞌina bu̱r. Ut tento ajcuiꞌ nak te̱mayeja junak xul chokꞌ ru̱chil li xbe̱n e̱ralal.
Mokon chic le̱ ralal e̱cꞌajol teꞌxpatzꞌ e̱re cꞌaꞌru xya̱lal li nequeba̱nu. La̱ex te̱ye reheb, “Nakaba̱nu aꞌin re xjulticanquil nak riqꞌuin xnimal xcuanquilal li Dios corisi chak saꞌ li tenamit Egipto bar cocuan cuiꞌ chak chokꞌ rahobtesinbil mo̱s.
Laj faraón quixcacuubresi xchꞌo̱l ut incꞌaꞌ coxcanab chi e̱lc saꞌ li tenamit Egipto. Ut li Ka̱cuaꞌ Dios quixqꞌueheb chi ca̱mc chixjunileb li xbe̱n ralaleb laj Egipto. Quixqꞌueheb ajcuiꞌ chi ca̱mc li xbe̱n ral li queto̱mk. Re xjulticanquil li xba̱nu li Dios, la̱in ninmayeja chiru li Dios li xbe̱n raleb lin xul. Ut tinqꞌue chokꞌ ru̱chil li xbe̱n cualal”, chaꞌkex reheb le̱ ralal e̱cꞌajol.
Li ninkꞌe aꞌan ta̱cꞌanjelak e̱re re xjulticanquil nak junelic cua̱nk saꞌ e̱chꞌo̱l li ra̱tin li Dios xban nak riqꞌuin lix nimal xcuanquil li Dios quexrisi chak Egipto, chan laj Moisés.
Li Dios quicꞌamoc be chiruheb riqꞌuin jun chok ut jun xamNak laj faraón quixcanabeb chi xic laj Israel, nachꞌ raj li be li nanumeꞌ saꞌ xtenamiteb laj filisteo, aban li Dios incꞌaꞌ quixcꞌameb aran. Quixye li Dios: —Ma̱re teꞌpletik eb laj filisteo riqꞌuineb laj Israel ut ma̱re ta̱chꞌina̱k xchꞌo̱leb ut teꞌxic cuiꞌchic xcaꞌ sut Egipto, chan.
Li Dios quixcꞌameb aꞌan saꞌ li chaki chꞌochꞌ saꞌ xjayal li palau Mar Rojo xcꞌabaꞌ. Nequeꞌtzololnac nak queꞌel chi junju̱nk chꞌu̱tal saꞌ li tenamit Egipto.
Laj Moisés quixcꞌam xbakel li camenak José chirixeb nak queꞌco̱eb. Quicꞌameꞌ xbakel xban nak junxilaj laj José quixye reheb li ralal xcꞌajol: —Chi ya̱l li Ka̱cuaꞌ Dios texrisi saꞌ li tenamit aꞌin. Te̱cꞌam lin bakel che̱rix nak tex-e̱lk arin, chan.
Ut nak queꞌel saꞌ li naꞌajej Sucot xcꞌabaꞌ, queꞌco̱eb toj saꞌ li naꞌajej Etam li cuan chire li chaki chꞌochꞌ.
Cuan nak queꞌbe̱c chi kꞌek chi cutan. Chiru li cutan li Ka̱cuaꞌ Dios quicꞌamoc be chiruheb riqꞌuin jun chok ut chiru li kꞌojyi̱n quicꞌamoc be riqꞌuin jun xam saꞌ choxa re xcutanobresinquil ruheb lix beheb.
Li chok ut li xam cuan chi junelic. Incꞌaꞌ napaltoꞌ chi cꞌamoc be chiruheb.
Eb laj Israel queꞌnumeꞌ cuan cuiꞌ li palau Mar Rojo xcꞌabaꞌTojoꞌnak li Ka̱cuaꞌ Dios quixye re laj Moisés:
—Ye reheb laj Israel nak jalan li be teꞌxcꞌam toj jun pacꞌal li naꞌajej Pi-hahirot. Saꞌ xyi li naꞌajej Migdol ut li palau saꞌ xjayal li naꞌajej Baal-zefón te̱yi̱b le̱ muheba̱l chire li palau.
Laj faraón tixye nak xsach li be chiruheb saꞌ li chaki chꞌochꞌ. Aran incꞌaꞌ naru teꞌnumekꞌ, chaꞌak.
Ut la̱in tincacuubresi xchꞌo̱l laj faraón ut laj faraón texta̱ke la̱ex aj Israel re nak texsukꞌisi chak. Ut kꞌaxal cuiꞌchic ta̱nimobresi̱k lin cꞌabaꞌ xban laj faraón ut eb lix soldado. Ut eb laj Egipto teꞌxnau nak la̱in li Ka̱cuaꞌ Dios, chan li Dios re laj Moisés. Ut eb laj Israel queꞌxba̱nu joꞌ quixye li Ka̱cuaꞌ Dios.
Nak quirabi nak ac xeꞌel laj Israel, laj faraón joꞌ eb ajcuiꞌ laj cꞌanjel chiru queꞌyotꞌeꞌ xchꞌo̱l nak queꞌxcanabeb chi xic. Eb aꞌan queꞌxye: —¿Ma us ta biꞌ nak xkacanabeb chi xic ut xocana chi ma̱cꞌaꞌ chic kamo̱s? chanqueb.
Tojoꞌnak laj faraón quixtakla xbokbaleb lix soldado. Ut quixtakla ajcuiꞌ xcꞌambaleb lix carruaje.
Xbe̱n cua quixtakla li cuakib ciento (600) lix carruaje li mas cha̱bil. Chirix aꞌan quixtakla chixjunileb li incꞌaꞌ mas cha̱bil. Queꞌco̱eb ajcuiꞌ li nequeꞌtaklan reheb.
Li Ka̱cuaꞌ Dios quixcacuubresi xchꞌo̱l laj faraón lix reyeb laj Egipto re nak tixta̱keheb laj Israel. Ut eb laj Israel nequeꞌtzololnac chi xic. Ut li Ka̱cuaꞌ Dios yo̱ chi cꞌamoc be chiruheb riqꞌuin lix nimal xcuanquilal.
Eb laj Egipto queꞌxta̱keheb laj Israel. Queꞌco̱eb lix cacua̱y laj faraón joꞌ ajcuiꞌ eb lix carruaje. Queꞌco̱eb chixjunileb lix soldado. Ut coxeꞌxtauheb xmuheba̱l laj Israel jun pacꞌal li naꞌajej Pi-hahirot chire li palau saꞌ xjayal li naꞌajej Baal-zefón.
Nak queꞌril laj Israel nak yo̱queb chi nachꞌoc laj faraón rochbeneb chak lix soldado quilajeꞌsach xchꞌo̱l ut cꞌajoꞌ nak queꞌxucuac. Japjo̱queb re chiru li Ka̱cuaꞌ Dios.
Ut queꞌxye re laj Moisés: —¿Ma ma̱cꞌaꞌ mukleba̱l aran Egipto? ¿Cꞌaꞌut nak xoa̱cꞌam chak arin chi ca̱mc saꞌ li chaki chꞌochꞌ? ¿Cꞌaꞌut nak xaba̱nu ke chi joꞌcaꞌin? ¿Cꞌaꞌru rajbal nak xoa̱cuisi saꞌ li tenamit Egipto?
Nak toj cuanco aran xkaye a̱cue nak toa̱canab chi trabajic riqꞌuineb laj Egipto. Us raj chokꞌ ke li trabajic riqꞌuineb chiru nak toeꞌxcamsi arin saꞌ li chaki chꞌochꞌ, chanqueb.
Laj Moisés quixye reheb: —Mexxucuac. Cacuubresihomak ban e̱chꞌo̱l. Ho̱n nequeril chanru nak tocolekꞌ xban li Ka̱cuaꞌ Dios. Eb laj Egipto li yo̱quex chi rilbal anakcuan ma̱ jun cua chic te̱ril ruheb.
La̱ex mexcꞌoxlac. Ma̱cuaꞌ la̱ex texpletik. Li Ka̱cuaꞌ Dios ban ta̱pletik riqꞌuineb chokꞌ e̱ru̱chil, chan laj Moisés.
Ut li Ka̱cuaꞌ Dios quixye re laj Moisés: —¿Cꞌaꞌru nequeroybeni? Ye reheb li cristian nak xicakeb.
La̱at ta̱taksi la̱ xukꞌ ut ta̱teleb la̱ cuukꞌ saꞌ xbe̱n li palau re nak tixjach rib li haꞌ. Tincanab chi chaki le̱ be re nak texnumekꞌ saꞌ li palau.
La̱in tincacuubresi xchꞌo̱leb laj Egipto re nak teꞌxic che̱rix. Ut riqꞌuin li tinba̱nu riqꞌuineb laj faraón joꞌ eb ajcuiꞌ chixjunileb lix soldado, joꞌ ajcuiꞌ eb lix carruaje, kꞌaxal cuiꞌchic teꞌxqꞌue inlokꞌal eb laj Israel.
Ut chixjunileb laj Egipto teꞌxqꞌue retal nak la̱in li tzꞌakal Dios. Teꞌxqꞌue incuanquil nak teꞌril nak kꞌaxal nim incuanquilal saꞌ xbe̱n laj faraón ut chixjunileb lix soldado joꞌ ajcuiꞌ eb lix carruaje, chan li Dios.
Ut lix ángel li Dios li yo̱ chi cꞌamoc be chiruheb laj Israel quixjal xnaꞌaj. Quicana chi ixbej. Joꞌcan ajcuiꞌ li chok co̱ chi ixbej.
Li chok quicana saꞌ xyiheb laj Israel ut laj Egipto. Chi joꞌcan quikꞌojyi̱noꞌ lix beheb laj Egipto ut eb laj Israel cutan yo̱queb cuiꞌ chi xic. Quinumeꞌ li kꞌojyi̱n ut incꞌaꞌ queꞌcuulac cuanqueb cuiꞌ laj Israel.
Tojoꞌnak laj Moisés quixqꞌue li rukꞌ saꞌ xbe̱n li palau. Li Ka̱cuaꞌ Dios quixtakla jun cacuil ikꞌ li nachal chak saꞌ releb li sakꞌe. Yo̱ li ikꞌ chixjunil li kꞌojyi̱n ut xban li ikꞌ li palau quixjach rib ut quixchakihobresi lix beheb laj Israel li teꞌnumekꞌ cuiꞌ saꞌ li palau.
Ut eb laj Israel saꞌ chaki chꞌochꞌ queꞌnumeꞌ nak quixjach rib li haꞌ. Chanchan li tzꞌac quicana li haꞌ saꞌ xcaꞌ pacꞌalil li be.
Ut chixjunileb lix soldado laj faraón joꞌ eb ajcuiꞌ lix carruaje yo̱queb chixta̱kenquileb laj Israel. Queꞌoc ajcuiꞌ saꞌ xyi li palau saꞌ li chaki be.
Nak yo̱ chi sake̱uc cuan li Ka̱cuaꞌ Dios saꞌ li chok ut saꞌ li xam. Quirileb laj Egipto ut quixtakla li raylal saꞌ xbe̱neb.
Ut eb li carruaje queꞌxtiquib tꞌilc. Chꞌaꞌaj chic nak yo̱queb chi xic. Eb laj Egipto queꞌxucuac ut queꞌxye chi ribileb rib: —Us tosukꞌi̱k. Us toe̱lelik chiruheb laj Israel. Li Ka̱cuaꞌ Dios yo̱ xtenkꞌanquileb aꞌan ut la̱o aj Egipto xicꞌ yo̱ chikilbal, chanqueb.
Tojoꞌnak li Ka̱cuaꞌ Dios quixye re laj Moisés: —Teleb la̱ cuukꞌ saꞌ xbe̱n li palau re nak tixjunaji rib li haꞌ ut ta̱xic saꞌ xbe̱neb laj Egipto rochbeneb lix carruaje, chan.
Ut saꞌ li cutan aꞌan toj ekꞌela laj Moisés quixqꞌue li rukꞌ saꞌ xbe̱n li palau. Ut li haꞌ quixjunaji rib. Riqꞌuin li quixba̱nu li Dios, eb laj Egipto queꞌxsach xnaꞌleb saꞌ xyi li palau ut queꞌe̱lelic raj saꞌ li haꞌ.
Aban quixcꞌul cuiꞌchic rib li haꞌ ut queꞌmukun rubel chixjunileb laj Egipto joꞌ eb ajcuiꞌ li carruaje li yo̱queb cuiꞌ chi ta̱ke̱nc reheb laj Israel. Queꞌosoꞌ chixjunileb. Ma̱ jun chic queꞌcoleꞌ.
Ut eb laj Israel ac xeꞌnumeꞌ jun pacꞌal li palau saꞌ li chaki chꞌochꞌ. Chanchan li tzꞌac quicana li haꞌ saꞌ xcaꞌ pacꞌalil li be nak queꞌnumeꞌ.
Joꞌcaꞌin nak li Ka̱cuaꞌ Dios quixcoleb laj Israel saꞌ rukꞌeb laj Egipto saꞌ li cutan aꞌan. Ut xban xcuanquil li Ka̱cuaꞌ Dios, eb laj Egipto queꞌcam saꞌ li palau. Eb laj Israel queꞌril nak camenakeb chic laj Egipto chire li palau.
Ut eb laj Israel queꞌxxucua ru ut queꞌxlokꞌoni li Ka̱cuaꞌ Dios nak queꞌril li quixba̱nu reheb laj Egipto. Queꞌxpa̱b li Dios ut queꞌabin chiru laj Moisés xban nak aꞌan aj cꞌanjel chiru li Dios.
Lix bich laj Moisés ut lix MaríaLaj Moisés rochbeneb laj Israel queꞌbichan re xlokꞌoninquil li Ka̱cuaꞌ Dios. Aꞌin lix bicheb:La̱in tinbicha̱nk chiru li Ka̱cuaꞌ Dios xban nak kꞌaxal nim lix cuanquilal.Quixcanabeb chi osocꞌ saꞌ li haꞌ li cacua̱y joꞌ eb ajcuiꞌ li cuanqueb chirix.